ក្រុមហ៊ុន Apple Archives - Kampuchea Thmey Daily

លោក Tim Cook លាតំណែងនាយកប្រតិបត្តិក្រុមហ៊ុន Apple ក្រោយដឹកនាំ១៥ឆ្នាំ

សាង ស្រីល័ក្ខ — Tue, 21 Apr 2026 04:06:13 +0000

ក្រុមហ៊ុនបច្ចេកវិទ្យាលំដាប់យក្ស Apple បានប្រកាសព័ត៌មានចុះថ្ងៃទី២០ ខែមេសា ថា លោក Tim Cook នឹងលាលែងពីតំណែងនាយកប្រតិបត្តិនៃក្រុមហ៊ុនបច្ចេកវិទ្យាសកលនេះនៅក្នុងខែកញ្ញា ហើយប្រគល់តំណែងលំដាប់កំពូលនេះទៅឲ្យបុគ្គលិកចាស់វស្សាគឺលោក John Ternus។ នេះបើយោងតាមការចុះផ្សាយពីទីភ្នាក់ងារ usatoday ។

រូបភាព៖Reuters

យោងតាមសេចក្តីប្រកាសព័ត៌មាន បុរសវ័យ៦៥ឆ្នាំរូបនេះនឹងនៅតែជានាយកប្រតិបត្តិរហូតដល់ថ្ងៃទី១ ខែកញ្ញា នៅពេលដែលលោក Ternus ចូលកាន់តំណែង។ ក្រុមហ៊ុនបានហៅការផ្លាស់ប្តូរមុខតំណែងអ្នកដឹកនាំ ថា ជាលទ្ធផលនៃ «ដំណើរការរៀបចំផែនការបន្តវេនរយៈពេលវែង និងគិតគូរយ៉ាងល្អិតល្អន់»។

លោក Tim Cook នឹងក្លាយជាប្រធានប្រតិបត្តិនៃក្រុមប្រឹក្សាភិបាលក្រុមហ៊ុន នៅពេលដែលការផ្លាស់ប្តូរនេះ ដែលទទួលបានការយល់ព្រមជាឯកច្ឆ័ន្ទពីក្រុមប្រឹក្សាភិបាលរបស់ Apple ផ្ទាល់តែម្ដង។

នៅក្នុងសេចក្តីប្រកាសព័ត៌មានដដែលនោះ លោក Tim Cook បានលើកឡើងថា «វាជាសិទ្ធិពិសេសដ៏អស្ចារ្យបំផុតនៃជីវិតរបស់ខ្ញុំ ដែលបានក្លាយជានាយកប្រតិបត្តិរបស់ក្រុមហ៊ុន Apple ហើយត្រូវបានជឿទុកចិត្តឲ្យដឹកនាំក្រុមហ៊ុនដ៏អស្ចារ្យបែបនេះ»។

សូមរំឭកថា នាយកប្រតិបត្តិរូបនេះបានចូលរួមជាមួយក្រុមហ៊ុន Apple ក្នុងឆ្នាំ ១៩៩៨ ដោយរួមចំណែកធ្វើឲ្យក្រុមហ៊ុនយក្សកាន់តែរីកចម្រើន និងបានជួយលើកកម្ពស់ភាពជោគជ័យរបស់ក្រុមហ៊ុន ក្នុងនាមជានាយកប្រតិបត្តិ ដោយសម្របសម្រួលខ្សែសង្វាក់ផ្គត់ផ្គង់ស្មុគស្មាញរបស់ក្រុមហ៊ុនផលិត iPhone មួយនេះ។ ក្រោយមក លោកបានក្លាយជានាយកប្រតិបត្តិរបស់ក្រុមហ៊ុន Apple ក្នុងឆ្នាំ ២០១១ បន្ទាប់ពីសហស្ថាបនិក និងជាអ្នកដឹកនាំដ៏ល្បីល្បាញ លោក Steve Jobs បានចាកចេញដោយសារបញ្ហាសុខភាព៕

អត្ថបទ៖ សាង ស្រីល័ក្ខ

The post លោក Tim Cook លាតំណែងនាយកប្រតិបត្តិក្រុមហ៊ុន Apple ក្រោយដឹកនាំ១៥ឆ្នាំ appeared first on Kampuchea Thmey Daily.

ក្រុមហ៊ុន Apple ដាស់តឿនដល់អ្នកប្រើប្រាស់ អំពីកម្មវិធីថ្មីដើម្បីសុវត្ថិភាព

Minea Neu — Tue, 30 Dec 2025 10:48:40 +0000

ក្រុមហ៊ុន Apple ព្រមានដល់អ្នកប្រើប្រាស់ Iphone និង ipad ឱ្យអាប់ដេតកម្មវិធីចុងក្រោយរបស់ខ្លួនដើម្បីការពារការគំរាមកំហែងនានា និងធានាបានសុវត្ថិភាព។

ក្រុមហ៊ុន Apple. Reuters

ក្រុមហ៊ុនបច្ចេកវិទ្យាយក្សរបស់ apple បាននិយាយថា គុណវិបត្តិចម្បងចំនួនពីរត្រូវបានរកឃើញនៅក្នុង WebKit ម៉ាស៊ីនកម្មវិធីរុករក(browser) ដែលផ្តល់ថាមពលដល់កម្មវិធី Safari និងកម្មវិធីរុករកទាំងអស់នៅលើ iOS និយាយថាពួកវាជាផ្នែកមួយនៃការវាយប្រហារដ៏ស្មុគស្មាញបំផុតដែលផ្តោតលើបុគ្គលណាម្នាក់ជាក់លាក់។

ហានិភ័យកើតចេញពីគេហនានា ដែលអាចបញ្ឆោតឱ្យកម្មវិធីមួយចំនួនរបស់អ្នកប្រើប្រាស់ដំណើរឱ្យមានការរអាក់រអួលដែលនាំឱ្យគ្រោះថ្នាក់។ ក្នុងន័យនេះ មានន័យថាពួក Hacker ប្រហែលជាអាចគ្រប់គ្រង iPhone ឬ iPad របស់អ្នកប្រើប្រាស់ ឬដំណើរការកូដដោយគ្មានការអនុញ្ញាតពីនរណាម្នាក់ឡើយ។

សម្រាប់អ្នកប្រើប្រាស់ដែលបានបើកការអាប់ដេតដោយស្វ័យប្រវត្តិ ដែលមានកម្មវិធីដែលត្រូវបានដំឡើងរួចហើយ ខណៈដែលអ្នកផ្សេងទៀតនឹងត្រូវទាញយក iOS ២៦.២ ឬ iPadOS ២៦.២ ដោយដៃតាមរយៈការកំណត់ឧបករណ៍ឆ្លាតវៃរបស់ពួកគេ។

ឧបករណ៍ដែលមានហានិភ័យបំផុតរួមមានទូរសព្ទ iPhone ១១ ជំនាន់មុននិងក្រោយ, iPad Pro ១២.៩ អ៊ីញ (ជំនាន់ទី 3 និងក្រោយ) និង iPad Pro ១១ អ៊ីញ (ជំនាន់ទី 1 និងក្រោយ)និងឧបករណ៍មួយចំនួនផ្សេងទៀតដែលពាក់ពន្ធ័។

គុណវិបត្តិនេះត្រូវបានចាត់ថ្នាក់ថាជាភាពងាយរងគ្រោះគ្មានថ្ងៃត្រឡប់ ដែលមានន័យថាពួកគេមិនស្គាល់អ្នកបង្កើតកម្មវិធី ហើយអាចត្រូវបានកេងប្រវ័ញ្ចដោយពួក Hacker មុនពេលមានដំណោះស្រាយ។

ក្រុមសន្តិសុខប្រព័ន្ធបច្ចេកវិទ្យា រួមទាំងក្រុមវិភាគការគំរាមកំហែងរបស់ Apple និង Google បានរកឃើញចំណុចខ្សោយ ដោយព្រមានថាកំហុសនេះអាចបើកការវាយប្រហារតាមអ៊ីនធឺណិតដែលអាចបំផ្លិចបំផ្លាញបាន។

ដើម្បីការពារអតិថិជនរបស់ Apple ក្រុមហ៊ុនមិនបង្ហាញ ពិភាក្សា ឬបញ្ជាក់ពីសុវត្ថិភាពទេ រហូតទាល់តែមានការស៊ើបអង្កេតកើតឡើង ហើយមានការដោះស្រាយ ឬការចេញផ្សាយណាដែលអាចរកមកធ្វើភស្តុតាងបាន។

អ្នកជំនាញផ្នែកសន្តិសុខតាមអ៊ីនធឺណិត លោក Kurt Knutsson បានចែករំលែកពីរបៀបដែលអ្នកប្រើប្រាស់ iPhone អាចការពារខ្លួនពីភាពងាយរងគ្រោះមួយចំនួនបាន។

លោក Knutsson បានសរសេរនៅលើសារព័ត៌មាន FOX News ថាការអាប់ដេតកម្មវិធីមួយចំនួនភ្លាមៗគឺមានសារៈសំខាន់ណាស់ ពីព្រោះការវាយប្រហារដែលគ្មានថ្ងៃត្រឡប់តែងតែណែនាំឱ្យអ្នកប្រើប្រាស់ប្រុងប្រយ័ត្នជាមួយនឹងកម្មវិធីដែលហួសសម័យ។

ដើម្បីរក្សាសុវត្ថិភាព ជៀសវាងការចុចលើតំណដែលមានអ្នកផ្ញើឱ្យតាមរយៈ SMS, WhatsApp, Telegram ឬអ៊ីមែលជាដើម។

លោក Knutsson បានពន្យល់ទៀតថា ប្រសិនបើតំណភ្ជាប់ហាក់ដូចជាគួរឱ្យសង្ស័យ គួរវាយអាសយដ្ឋានគេហទំព័រដោយផ្ទាល់ទៅក្នុងកម្មវិធីរុករករបស់អ្នកប្រើប្រាស់ ជំនួសឱ្យការចុចលើវា។

កម្មវិធីសុវត្ថិភាពល្អក៏អាចព្រមានអ្នកអំពី email phishing និង ransomware ដោយជួយរក្សាទិន្នន័យផ្ទាល់ខ្លួន និងទ្រព្យសម្បត្តិឌីជីថលរបស់អ្នកឱ្យមានសុវត្ថិភាព។

លោក Knutsson បាននិយាយថា ទោះបីជាគ្មានសេវាកម្មណាមួយអាចលុបព័ត៌មានរបស់អ្នកចេញពីអ៊ីនធឺណិតបានទាំងស្រុង ការប្រើសេវាកម្មដកទិន្នន័យខ្លះចេញគឺជាជម្រើសដ៏ឆ្លាតវៃ។

តាមរយៈការបង្រួមទិន្នន័យរបស់អ្នកឱ្យតិចបំផុត វាកាន់តែពិបាកសម្រាប់អ្នកបោកប្រាស់ក្នុងការបញ្ចូលគ្នានូវព័ត៌មានដែលបំពានជាមួយនឹងអ្វីជាសាធារណៈនៅលើអ៊ីនធឺណិត ដោយកាត់បន្ថយហានិភ័យនៃការក្លាយជាគោលដៅរបស់ជនបោកប្រាស់អនឡាញ៕

ប្រែសម្រួល៖ ណឺ មិនា

The post ក្រុមហ៊ុន Apple ដាស់តឿនដល់អ្នកប្រើប្រាស់ អំពីកម្មវិធីថ្មីដើម្បីសុវត្ថិភាព appeared first on Kampuchea Thmey Daily.

ត្រាំ៖ Apple បន្ថែមការវិនិយោគ ១០០ ប៊ីលានដុល្លារនៅអាមេរិក

Huon Dina — Thu, 07 Aug 2025 09:57:45 +0000

ប្រធានាធិបតីសហរដ្ឋអាមេរិក លោក ដូណាល់ ត្រាំ បានប្រកាសថា ក្រុមហ៊ុនបច្ចេកវិទ្យា Apple គ្រោងនឹងបន្ថែមការវិនិយោគ ១០០ ប៊ីលានដុល្លារ ពីលើការប្ដេជ្ញាចិត្ត ៥០០ ប៊ីលានដុល្លារ កាលពីដើមឆ្នាំ។ នេះបើតាមការចុះផ្សាយរបស់សារព័ត៌មាន Al Jazeera ។

ថ្លែងពីការិយាល័យពងក្រពើកាលពីថ្ងៃពុធ លោក ត្រាំ ដែលឈរនៅក្បែរនាយកប្រតិបត្តិក្រុមហ៊ុន Apple លោក Tim Cook បានសរសើរថា ការបង្កើនការវិនិយោគរបស់ Apple គឺដោយសារតែផែនការ «អាមេរិកទី១» របស់លោក។

លោក ត្រាំ បានបញ្ជាក់ថា ឥឡូវនេះការប្ដេជ្ញាវិនិយោគសរុបរបស់ Apple មានទំហំដល់ ៦០០ ប៊ីលានដុល្លារ។ លោកបន្តថា៖ «នេះគឺជាការវិនិយោគដ៏ធំបំផុតដែល Apple មិនធ្លាប់មាននៅសហរដ្ឋអាមេរិក និងប្រទេសផ្សេងទៀត»។

គេមើលឃើញថា លោក ត្រាំ បានជំរុញឱ្យមានការផលិតក្នុងស្រុកកាន់តែច្រើនក្នុងវិស័យបច្ចេកវិទ្យា និងឧស្សាហកម្មផ្សេងទៀត ហើយបានគំរាមកំហែងដាក់ពន្ធលើក្រុមហ៊ុននានា ប្រសិនបើគេដាក់រោងចក្រផលិតកម្មនៅបរទេស។

ជាផ្នែកមួយនៃការប្រកាសនេះ លោក ត្រាំ កាលពីថ្ងៃពុធដដែល បាននិយាយថា លោកនឹងដាក់ពន្ធ ១០០ ភាគរយ លើបន្ទះឈីបនាំចូលសហរដ្ឋអាមេរិក។

កន្លងមក អ្នកជំនាញបានលើកឡើងពីកង្វល់ដែលថា គោលនយោបាយការពារនិយមរបស់ ត្រាំ អាចធ្វើឱ្យពាណិជ្ជកម្មអាមេរិកធ្លាក់ចុះ និងបង្កើនតម្លៃសម្រាប់អ្នកប្រើប្រាស់អាមេរិក។ យ៉ាងណាមិញ កាលពីថ្ងៃពុធ លោកបានច្រានចោលការព្រួយបារម្ភបែបនេះ ដោយហៅការផ្សាយពីក្ដីកង្វល់ដដែលថាជាការលម្អៀងប្រឆាំងនឹងរដ្ឋបាលរបស់លោក។

គួររំឭកថា កាលពីខែកុម្ភៈ ក្រុមហ៊ុន Apple បានប្រកាសពីការវិនិយោគចំនួន ៥០០ ប៊ីលានដុល្លារ ដែលរួមបញ្ចូលទាំងគម្រោងបើករោងចក្រនៅរដ្ឋតិចសាស់ ដើម្បីផលិតម៉ាស៊ីនមេបញ្ញាសិប្បនិម្មិត (AI)។ ក្រុមហ៊ុនក៏បានវិនិយោគសម្រាប់ការងារស្រាវជ្រាវ និងអភិវឌ្ឍន៍(R&D) បន្ថែល ប្រហែល ២០ ០០០ កន្លែង នៅទូទាំងប្រទេសផងដែរ។ យ៉ាងណាមិញ គួររំឭកថា Apple តែងតែសន្យាវិនិយោគក្នុងទំហំទឹកប្រាក់រាប់ពាន់លានដុល្លារក្នុងទសវត្សរ៍ចុងក្រោយនេះ មិនមែនតែនៅក្នុងអាណត្តិរបស់លោក ត្រាំ នោះទេ៕

The post ត្រាំ៖ Apple បន្ថែមការវិនិយោគ ១០០ ប៊ីលានដុល្លារនៅអាមេរិក appeared first on Kampuchea Thmey Daily.

ឥណ្ឌា និងវៀតណាម វ៉ាដាច់ចិន លើការនាំចេញស្មាតហ្វូនទៅអាមេរិក

Huon Dina — Tue, 29 Jul 2025 08:05:19 +0000

ក្រុមហ៊ុនស្រាវជ្រាវទីផ្សារ Canalys បានឱ្យដឹងថា ប្រទេសឥណ្ឌា និងវៀតណាម បានវ៉ាដាច់ចិន ក្លាយជាអ្នកនាំចេញស្មាតហ្វូនកំពូលទៅកាន់សហរដ្ឋអាមេរិក ដែលនេះឆ្លុះបញ្ចាំងពីការផ្លាស់ប្តូរនៃខ្សែច្រវ៉ាក់ផ្គត់ផ្គង់ផលិតកម្មពីចិន ចំពេលមានភាពមិនប្រាកដប្រជានៃពន្ធអាមេរិក។

តាមការចុះផ្សាយរបស់បណ្ដាញទូរទស្សន៍ CNBC ទិន្នន័យរបស់ Canalys ដែលចេញផ្សាយកាលពីថ្ងៃចន្ទ បានបង្ហាញថា ស្មាតហ្វូនដែលដំឡើងនៅឥណ្ឌា រួមចំណែក ៤៤ ភាគរយ នៃការនាំចូលស្មាតហ្វូនសរុបរបស់សហរដ្ឋអាមេរិក ក្នុងត្រីមាសទី ២ ធៀបនឹង ១៣ ភាគរយ នៅត្រីមាសដូចគ្នាកាលពីឆ្នាំមុន។ ជាមួយគ្នានោះ Canalys បាននិយាយថា បរិមាណសរុបនៃស្មាតហ្វូនផលិតនៅឥណ្ឌា បានកើនឡើងរហូតដល់ ២៤០ ភាគរយ ធៀបនឹងរយៈពេលដូចគ្នាឆ្នាំ ២០២៤។

ផ្ទុយទៅវិញ នៅត្រីមាសទី២ ឆ្នាំនេះ ការនាំចេញស្មាតហ្វូនដំឡើងនៅចិន រួមចំណែកត្រឹមតែ ២៥ ភាគរយ ប៉ុណ្ណេះ នៃការនាំចូលស្មាតហ្វូនសរុបរបស់អាមេរិក ដោយធ្លាក់ចុះពីប្រមាណ ៦១ ភាគរយ នៅរយៈពេលដូចគ្នាកាលពីឆ្នាំមុន។

ក្រៅពីឥណ្ឌា វៀតណាមក៏នាំមុខចិនលើការនាំចេញស្មាតហ្វូនទៅសហរដ្ឋអាមេរិកផងដែរ ដោយរួមចំណែកប្រមាណ ៣០ ភាគរយ។

អ្នកវិភាគរបស់ Canalys បាននិយាយថា កំណើននៃការនាំចេញស្មាតហ្វូនពីឥណ្ឌាទៅអាមេរិក ជំរុញដោយការផ្លាស់ទីតាំងផលិតកម្មរបស់ក្រុមហ៊ុន Apple ពីចិនទៅឥណ្ឌា ដោយសារតែភាពមិនប្រាកដប្រជាពាណិជ្ជកម្មចិន-អាមេរិក ដោយសារតែពន្ធគយរបស់ប្រធានាធិបតីអាមេរិក លោក ដូណាល់ ត្រាំ។ នេះគឺជាលើកទី១ហើយ ដែលឥណ្ឌានាំចេញស្មាតហ្វូនទៅអាមេរិកច្រើនជាងចិន។

គួរគូសបញ្ជាក់ថា Apple កំពុងពន្លឿនផែនការផលិត iPhone ដែលលក់នៅអាមេរិកភាគច្រើន នៅរោងចក្រក្នុងប្រទេសឥណ្ឌា ក្រោមគោលដៅផលិត iPhone ១/៤ នៅឥណ្ឌា នៅប៉ុន្មានឆ្នាំខាងមុខ។ កន្លងមក លោក ត្រាំ បានគំរាមដំឡើងពន្ធលើ Apple ហើយជំរុញឱ្យនាយកប្រតិបត្តិក្រុមហ៊ុននេះ លោក Tim Cook ផលិត iPhone នៅសហរដ្ឋអាមេរិក ប៉ុន្តែអ្នកជំនាញនិយាយថា វាស្ទើរតែមិនអាចទៅរួចទេ ព្រោះ Apple ពឹងផលិតកម្មនៅបរទេសរួចទៅហើយ ហើយពន្ធអាចធ្វើឱ្យផលិតផលរបស់ក្រុមហ៊ុនឡើងថ្លៃ៕

The post ឥណ្ឌា និងវៀតណាម វ៉ាដាច់ចិន លើការនាំចេញស្មាតហ្វូនទៅអាមេរិក appeared first on Kampuchea Thmey Daily.

ការលក់ដុំ iPhone នៅចិន ធ្លាក់ចុះ ៩ % នៅត្រីមាសដើមឆ្នាំនេះ

Huon Dina — Fri, 18 Apr 2025 07:57:15 +0000

ការលក់ដុំនៃទូរស័ព្ទម៉ាក iPhone របស់ក្រុមហ៊ុនបច្ចេកវិទ្យា Apple នៅក្នុងប្រទេសចិន បានធ្លាក់ចុះប្រមាណ ៩ ភាគរយ នៅត្រីមាសទី ១ ឆ្នាំ ២០២៥ ធៀបនឹងរយៈពេលដូចគ្នាកាលពីឆ្នាំមុន។ នេះបើតាមការចុះផ្សាយរបស់ទីភ្នាក់ងារសារព័ត៌មានរ៉យទ័រ។

នេះបង្ហាញថា ការលក់ iPhone បានធ្លាក់ចុះ ៧ ត្រីមាសជាប់ៗគ្នា នៅក្នុងប្រទេសចិន ដែលជាទីផ្សារយក្សដ៏សំខាន់បំផុតមួយរបស់ក្រុមហ៊ុន Apple។

ទិន្នន័យពីក្រុមហ៊ុនស្រាវជ្រាវ IDC បានបង្ហាញថា Apple បានបោះដុំ iPhone ប្រមាណ ៩,៨ លានគ្រឿង ធ្លាក់ចុះ ៩ ភាគរយ ដែលធ្វើឱ្យចំណែកទីផ្សារស្មាតហ្វូននៅចិន ធ្លាក់ចុះមកត្រឹម ១៣,៧ ភាគរយ ពី ១៧,៤ ភាគរយ នៅត្រីមាសចុងឆ្នាំមុន។

អ្នកវិភាគ IDC លោក Will Wong បាននិយាយថា ការធ្លាក់ចុះនៃការលក់របស់ Apple រួមចំណែកជាអន្លើរដោយតម្លៃខ្ពស់។ ការណ៍នេះធ្វើឱ្យស្មាតហ្វូនរបស់ Apple មិនទទួលបានកញ្ចប់ឧបត្ថម្ភធនថ្មីពីរដ្ឋាភិបាលចិន ដែលជួញទូទាត់ ១៥ ភាគរយ នៃការចំណាយសម្រាប់គ្រឿងអេឡិចត្រូនិច ក្រោម ៦ ០០០ យន់ (ប្រហែល ៨២០ ដុល្លារ) ខណៈឧបករណ៍របស់ Apple ភាគច្រើន មានតម្លៃខ្ពស់ជាងនោះ។

ផ្ទុយទៅវិញ ការលក់ស្មាតហ្វូនបោះដុំរបស់ក្រុមហ៊ុន Xiaomi បានកើនឡើង ៤០ ភាគរយ រហូតដល់ ១៣,៣ លានគ្រឿង ដែលរួមចំណែកដល់កំណើន ៣,៣ ភាគរយ នៃទីផ្សារស្មាតហ្វូននៅចិនទាំងមូល ក្នុងអំឡុងត្រីមាសទី ១ ដូចគ្នា៕

The post ការលក់ដុំ iPhone នៅចិន ធ្លាក់ចុះ ៩ % នៅត្រីមាសដើមឆ្នាំនេះ appeared first on Kampuchea Thmey Daily.

Apple ដឹកជញ្ជូន iPhone តាមយន្តហោះ ៦០០ តោន ពីឥណ្ឌាទៅអាមេរិក

Huon Dina — Thu, 10 Apr 2025 10:43:31 +0000

ក្រុមហ៊ុនបច្ចេកវិទ្យា Apple បានដឹកជញ្ជូនតាមជើងយន្តហោះនូវទូរស័ព្ទម៉ាក iPhone ប្រមាណ ៦០០ តោន ឬប្រហែល ១,៥ លានគ្រឿង ពីឥណ្ឌាទៅកាន់សហរដ្ឋអាមេរិក ដើម្បីទប់ទល់នឹងវិធានការពន្ធគយបដិការរបស់ប្រធានាធិបតី ដូណាល់ ត្រាំ ក្រោយក្រុមហ៊ុននេះជំរុញផលិតកម្មនៅឥណ្ឌា។ នេះបើតាមការចុះផ្សាយសារព័ត៌មានរ៉យទ័រ ដែលស្រង់សម្ដីប្រភពដឹកច្បាស់ពីបញ្ហានេះ។

ព័ត៌មាននេះ បង្ហាញអំពីយុទ្ធសាស្ត្រឯកជនរបស់ក្រុមហ៊ុន ក្នុងការស្វះស្វែងរកដំណោះស្រាយជុំវិញពន្ធរបស់លោក ត្រាំ និងបង្កើនស្តុកទូរស័ព្ទ iPhone នៅសហរដ្ឋអាមេរិក ដែលជាទីផ្សារដ៏ធំបំផុតមួយរបស់ខ្លួន។ កន្លងមក អ្នកវិភាគបានព្រមានថា តម្លៃ iPhone នៅសហរដ្ឋអាមេរិកអាចនឹងកើនឡើង ដោយសារក្រុមហ៊ុន Apple ពឹងផ្អែកខ្លាំងលើការនាំចូលទូរស័ព្ទម៉ាកនេះមកពីប្រទេសជាមជ្ឈមណ្ឌលផលិត ចិន ដែលរងការដាក់ពន្ធ ១២៥ ភាគរយ ពីលោក ត្រាំ។ អត្រាពន្ធគយបដិការលើឥណ្ឌាត្រឹមតែ ២៦ ប៉ុណ្ណេះ ហើយឥឡូវនេះ ពន្ធដដែលត្រូវផ្អាកអនុវត្ត ៩០ ថ្ងៃ និងបន្ថយមកត្រឹម ១០ ភាគរយ។

ប្រភពផ្សេងៗគ្នា ដែលសុំមិនបញ្ចេញឈ្មោះ បានអះអាងថា ចាប់តាំងពីខែមីនាមក យន្តហោះដឹកទំនិញប្រហែល ៦ គ្រឿង ដែលយន្តហោះមួយផ្ទុកទម្ងន់ទូរស័ព្ទ iPhone ១០០ តោន បានហោះចេញពីប្រទេសឥណ្ឌា រួមទាំង ១ គ្រឿងដែលបានដឹកជញ្ជូនក្នុងសប្ដាហ៍នេះ។ រ៉យទ័របានប៉ាន់ប្រមាណថា iPhone 14 និងឆ្នាំងសាកនីមួយៗ មានទម្ងន់ប្រហែល ៣៥០ ក្រាម នោះទំនិញ ៦០០ តោន អាចស្មើនឹង iPhone ១,៥ លានគ្រឿង រួមទាំងកញ្ចប់ផងដែរ។

ប្រភពម្នាក់ដែលដឹងពីគម្រោងបាននិយាយថា៖ «Apple ចង់ជម្នះលើវិធានការពន្ធ»។ ប្រភពដដែលបាននិយាយថា Apple បានស្នើឱ្យមន្ត្រីអាកាសយានដ្ឋានឥណ្ឌា បង្កើនល្បឿនគយនៅអាកាសយានដ្ឋាន Chennai ដោយកាត់បន្ថយពេលវេលារង់ចាំពី ៣០ ម៉ោងមកត្រឹមតែ ៦ ។ ប្រភពបន្តថា Apple បានបង្កើត «ច្រករបៀងពណ៌បៃតង» នៅអាកាសយានដ្ឋានឥណ្ឌា ស្រដៀងទៅនឹងប្រព័ន្ធដែលខ្លួនប្រើនៅព្រលានយន្តហោះចិនមួយចំនួន។

ក្រុមហ៊ុន Apple និងក្រសួងអាកាសចរណ៍ឥណ្ឌា មិនបានឆ្លើយតបនឹងសំណើសុំការអត្ថាធិប្បាយទេ។

គួរគូសបញ្ជាក់ថា Apple បានលក់ iPhone ជាង ២២០ លានគ្រឿង/ឆ្នាំនៅទូទាំងពិភពលោក ដោយវិទ្យាស្ថានស្រាវជ្រាវ Counterpoint Research បានប៉ាន់ប្រមាណថា ១/៥ នៃការនាំចូល iPhone សរុបទៅសហរដ្ឋអាមេរិក គឺមានប្រភពមកពីឥណ្ឌា ហើយ ៤/៥ គឺមកពីចិន៕

The post Apple ដឹកជញ្ជូន iPhone តាមយន្តហោះ ៦០០ តោន ពីឥណ្ឌាទៅអាមេរិក appeared first on Kampuchea Thmey Daily.

Apple និងឥណ្ឌូណេស៊ីព្រមព្រៀងគ្នា ដើម្បីលុបការបិទការលក់ iPhone 16

Huon Dina — Tue, 25 Feb 2025 07:32:36 +0000

សារព័ត៌មាន Bloomberg បានចុះផ្សាយនៅថ្ងៃអង្គារនេះដោយស្រង់សម្ដីប្រភពដឹងច្បាស់ពីបញ្ហាថា ក្រុមហ៊ុនបច្ចេកវិទ្យាអាមេរិក Apple និងរដ្ឋាភិបាល បានព្រមព្រៀងគ្នាលើលក្ខខណ្ឌផ្សេងៗ ដើម្បីឆ្ពោះទៅរកការលុបចោលការហាមប្រាមមិនឱ្យលក់ទូរស័ព្ទម៉ាក iPhone 16 នៅឥណ្ឌូណេស៊ី។

ប្រភពមិនបានបញ្ជាក់ថាតើភាគីបានព្រមព្រៀងគ្នាលើលក្ខខណ្ឌគ្នាអ្វីខ្លះនោះទេ ប៉ុន្តែថា ក្រសួងឧស្សាហកម្មឥណ្ឌូណេស៊ីដែលទទួលបន្ទុកលើការហាមឃាត់ គ្រោងនឹងចុះហត្ថលេខាលើអនុស្សរណៈនៃកិច្ចព្រមព្រៀងជាមួយក្រុមហ៊ុន Apple ឱ្យបានឆាប់ ក្នុងសប្តាហ៍នេះ។

ក្រោយចុះហត្ថលេខារួច ក្រសួងនឹងរៀបចំសន្និសីទកាសែត និងចេញលិខិតអនុញ្ញាតការលក់ iPhone 16 ឱ្យបានឆាប់តាមដែលអាចធ្វើទៅបាន។

គួររំឭកថា រដ្ឋាភិបាលឥណ្ឌូណេស៊ីបានចេញការហាមឃាត់ការលក់ទូរស័ព្ទម៉ាក iPhone 16 របស់ Apple កាលពីខែតុលា ឆ្នាំមុន ដោយសម្អាងថា ក្រុមហ៊ុនមិនបានវិនិយោគតាមទឹកប្រាក់ដែលខ្លួនបានសន្យា និងផលិតទូរស័ព្ទដោយមិនប្រើប្រាស់គ្រឿងគ្រៅក្នុងស្រុកឥណ្ឌូណេស៊ី ដែលច្បាប់បានកំណត់ (ត្រូវប្រើប្រាស់សមាសធាតុក្នុងស្រុក ៣៥ ភាគរយ)។

ក្រោយពីនោះមក រដ្ឋមន្ត្រីវិនិយោគរបស់ឥណ្ឌូណេស៊ីបាននិយាយថា Apple គ្រោងនឹងវិនិយោគ ១ ប៊ីលានដុល្លារនៅរោងចក្រផលិតគ្រឿងបន្លាស់សម្រាប់ស្មាតហ្វូន និងផលិតផលផ្សេងទៀតរបស់ក្រុមហ៊ុន។ ក្រៅពីការវិនិយោគនេះ ក្រុមហ៊ុន Apple ប្តេជ្ញាបណ្តុះបណ្តាលធនធានមនុស្សក្នុងស្រុកលើការស្រាវជ្រាវ និងការអភិវឌ្ឍតាមរយៈកម្មវិធីផ្សេងៗ លើសពីកម្មវិធីដែលខ្លួនធ្លាប់មានស្រាប់នាពេលកន្លងមក។

ទោះជាយ៉ាងណាក៏ដោយ Apple គ្មានគម្រោងដាក់រោងចក្រផលិតទូរស័ព្ទម៉ាក iPhone ភ្លាមៗក្នុងស្រុកឥណ្ឌូណេស៊ី នាពេលនេះនោះទេ៕

The post Apple និងឥណ្ឌូណេស៊ីព្រមព្រៀងគ្នា ដើម្បីលុបការបិទការលក់ iPhone 16 appeared first on Kampuchea Thmey Daily.

ឥណ្ឌូណេស៊ី៖ ការប្ដេជ្ញាវិនិយោគរបស់ Apple មានត្រឹម ២០០ លានដុល្លារ ប៉ុណ្ណោះ មិនមែន ១ ប៊ីលានដុល្លារទេ

Huon Dina — Thu, 23 Jan 2025 07:47:40 +0000

ក្រសួងឧស្សាហកម្មឥណ្ឌូណេស៊ី បានអះអាងថា ក្រុមហ៊ុនបច្ចេកវិទ្យាយក្សរបស់អាមេរិក Apple មានគម្រោងវិនិយោគត្រឹមតែប្រមាណ ២០០ លានដុល្លារ ប៉ុណ្ណោះ លើគម្រោងសាងសង់រោងចក្រផលិតឧបករណ៍តាមដានសម្ភារៈ AirTag នៅលើកោះបាតាំ។ ចំនួននេះ គឺទាបជាងឆ្ងាយ ធៀបនឹងការសន្យាវិនិយោគ ១ ប៊ីលានដុល្លារ ដែលគេរាយការណ៍កាលពីលើកមុន។

ទីភ្នាក់ងារសារព័ត៌មានរដ្ឋឥណ្ឌូណេស៊ី Antara បានចុះផ្សាយការណ៍នេះនៅថ្ងៃព្រហស្បតិ៍ ដោយស្រង់សម្ដីអ្នកនាំពាក្យរបស់ក្រសួងដែលនិយាយថា ការវាយតម្លៃដំបូងនៃសំណើវិនិយោគរបស់ក្រុមហ៊ុន Apple បានបង្ហាញពីការកាត់បន្ថយនៃតួលេខ។

អ្នកនាំពាក្យក្រសួង លោក Febri Hendri Antoni Arif បាននិយាយកាលពីថ្ងៃពុធថា៖ «ផ្អែកលើការវាយតម្លៃបច្ចេកទេសរបស់យើង តម្លៃនៃការវិនិយោគសម្រាប់រោងចក្រ AirTag របស់ក្រុមហ៊ុន Apple នៅកោះបាតាំ (Batam) មានត្រឹមតែ ២០០ លានដុល្លារប៉ុណ្ណោះ ពោលគឺទាបជាងការប្តេជ្ញាចិត្តចំនួន ១ ប៊ីលានដុល្លារ ដែលមានចែងក្នុងសំណើដាក់ជូនយើង»។

យោងតាម Febri តួលេខ ២០០ លានដុល្លារនេះ រួមបញ្ចូលទាំងការចំណាយដើមទុនដូចជាការទិញដី ថ្លៃសាងសង់ និងថ្លៃលទ្ធកម្មឧបករណ៍សម្រាប់រោងចក្រ។

លោកបានពន្យល់ថា ភាពខុសគ្នានេះបានកើតឡើងដោយសារតែការគណនារបស់រដ្ឋាភិបាល មិនមានការប៉ាន់ស្មានតម្លៃនាំចេញ និងការផ្គត់ផ្គង់វត្ថុធាតុដើម ដែលមានក្នុងសំណើរបស់ Apple នោះទេ ។

Febri បានបន្ថែមថា ការវិនិយោគ 1 ប៊ីលានដុល្លាររបស់ក្រុមហ៊ុន Apple នឹងល្អកាន់តែខ្លាំង ប្រសិនបើវាត្រូវបានចំណាយទាំងស្រុងលើការចំណាយមូលធន (Capital expenditure)។

គួរគូសបញ្ជាក់ថា ក្នុងការរាយការណ៍កាលពីលើកមុន ក្រុមហ៊ុន Apple បានប្ដេជ្ញាវិនិយោគនៅឥណ្ឌូណេស៊ីចំនួន ១ ប៊ីលានដុល្លារ ដើម្បីជាថ្នូរឱ្យរដ្ឋាភិបាលនេះបញ្ឈប់ការហាមឃាត់ការរឹតត្បឹតការលក់ទូរស័ព្ទម៉ាក iPhone 16 របស់ខ្លួន។ រដ្ឋាភិបាលឥណ្ឌូណេស៊ីលើកឡើងថា ក្រុមហ៊ុន Apple មិនបានចំណាយតាមការសន្យាវិនិយោគ ហើយថា ក្រុមហ៊ុននេះមិនបានប្រើប្រាស់សមាធាតុក្នុងស្រុកឥណ្ឌូណេស៊ី ដើម្បីផលិត iPhone 16 ស្របតាមច្បាប់កំណត់៕

The post ឥណ្ឌូណេស៊ី៖ ការប្ដេជ្ញាវិនិយោគរបស់ Apple មានត្រឹម ២០០ លានដុល្លារ ប៉ុណ្ណោះ មិនមែន ១ ប៊ីលានដុល្លារទេ appeared first on Kampuchea Thmey Daily.

ក្រុមហ៊ុន Apple Archives - Kampuchea Thmey Daily

លោក Tim Cook លា​តំណែង​នាយកប្រតិបត្តិក្រុមហ៊ុន Apple ក្រោយ​ដឹកនាំ​១៥ឆ្នាំ​

ក្រុមហ៊ុន Apple ដាស់តឿន​​ដល់​អ្នកប្រើប្រាស់​​ អំពី​​កម្មវិធី​ថ្មី​​ដើម្បីសុវត្ថិភាព​

ត្រាំ៖ Apple បន្ថែមការវិនិយោគ ១០០ ប៊ីលាន​ដុល្លារនៅអាមេរិក

ឥណ្ឌា និងវៀតណាម វ៉ាដាច់ចិន លើការនាំចេញស្មាតហ្វូនទៅអាមេរិក​