ក្លិបអង្គរថាយហ្គឺរ Archives - Kampuchea Thmey Daily

បឹងកេត អស់ឱកាសលេខ ២ ខណៈ ភ្នំពេញក្រោន និង អង្គរថាយហ្គឺរ ត្រូវប្រជែងគ្នាដល់ប្រកួតចុងក្រោយ

Kosal Sem — Mon, 11 May 2026 02:49:12 +0000

ក្រុម ភ្នំពេញក្រោន និង អង្គរថាយហ្គឺរ នៅមិនទាន់សម្រេចថា តើក្រុមណាទទួលបានចំណាត់ថ្នាក់លេខ ២ ក្នុងលីគកំពូលកម្ពុជា រដូវកាលនេះទេ បើទោះបីជានៅសល់តែ ១ ប្រកួតចុងក្រោយនឹងបញ្ចប់ ខណៈ បឹងកេត វិញ គឺបានអស់ឱកាសហើយ។

ការប្រជែងតំណែងលេខ ២ នៅក្នុងលីគកំពូល កម្ពុជា នៅតែជាប្រធានបទក្តៅក្នុងរដូវកាលនេះ បន្ទាប់ពី ភ្នំពេញក្រោន និង អង្គរថាយហ្គឺរ ឈ្នះដូចគ្នាកាលពីល្ងាចថ្ងៃ អាទិត្យ ទី ១០ ខែ ឧសភា ឆ្នាំ ២០២៦។ លទ្ធផលក្នុងសប្តាហ៍ទី ២៩ គឺ ភ្នំពេញក្រោន បានឈ្នះក្រុម ណាហ្គាវើលដ៍ នៅទឹកដីខ្លួន ៣-០ ខណៈ អង្គរថាយហ្គឺរ ឈ្នះ អឹមអូអាយ កំពង់ដេវ៉ា ២-១ នៅកីឡដ្ឋាន វិសាខា។

បច្ចុប្បន្នក្រុម ភ្នំពេញក្រោន បានហក់ឡើងមកឈរ ២ វិញ ដោយមាន ៥៣ ពិន្ទុស្មើគ្នា ជាមួយនឹងក្រុមលេខ ៣ អង្គរថាយហ្គឺរ។ ក្រុមទាំង ២ ត្រូវរង់ចាំអ៊ុតមើលដល់សប្តាហ៍ទី ៣០ ដែលជាការប្រកួតចុងក្រោយក្នុងលីគរដូវកាលនេះ ទើបនឹងរកឃើញក្រុមទទួលបានតំណែងលេខ ២ ជាផ្លូវការ ដើម្បីទទួលបានកន្លះកៅអីចូលរួមការប្រកួតក្នុងពាន AFC Champions League Two។

ប្រកួតនៅថ្ងៃ អាទិត្យ ចុងសប្តាហ៍នេះ ក្រុម ភ្នំពេញក្រោន ត្រូវជួបក្រុមម្ចាស់ជើងឯក ព្រះខ័នរាជស្វាយរៀង នៅពហុកីឡដ្ឋានជាតិមរតកតេជោ។ ចំណែក អង្គរថាយហ្គឺរ ត្រូវជួបក្រុម ណាហ្គាវើលដ៍ នៅទឹកដីខេត្ត សៀមរាប។ ប្រសិនបើ ភ្នំពេញក្រោន និង អង្គរថាយហ្គឺរ ឈ្នះ ឬ ចាញ់ដូចគ្នា នោះ ភ្នំពេញក្រោន នឹងនៅបន្តកាន់កាប់តំណែងលេខ ២ ដដែល ដោយផ្អែកលើរូបមន្ត head to head។ ដូច្នេះ ករណីដែល អង្គរថាយហ្គឺរ អាចឡើងមកឈរលេខ ២ បាន ទាល់តែពួកគេឈ្នះ ហើយ ភ្នំពេញក្រោន ចាញ់ការប្រកួតចុងក្រោយនេះ។

ងាកទៅកាន់ក្រុម បឹងកេត វិញ គឺបានអស់ឱកាសប្រជែងលេខ ២ ហើយ ទោះពេលនេះពួកគេមាន ៥០ ពិន្ទុ ដោយចាញ់ពិន្ទុក្រុមលេខ ២ តែ ៣ ពិន្ទុក៏ដោយ។ ប្រការនេះ មានន័យ ថា ការប្រកួតចុងក្រោយក្រោយទល់នឹងក្រុម អឹមអូអាយ កំពង់ដេវ៉ា ទោះ បឹងកេត ឈ្នះ ហើយក្រុម ភ្នំពេញក្រោន និង អង្គរថាយហ្គឺរ ចាញ់ដូចគ្នា ក៏ក្រុមនាគខៀវមិនអាចឡើងមកលេខ ២ បានដែរ ដោយសារតែគិតលើរូបមន្ត head to head។

គិតត្រឹមពេលនេះ មានតែ ភ្នំពេញក្រោន និង អង្គរថាយហ្គឺរ ប៉ុណ្ណោះ ដែលនៅស្ថិតជាបេក្ខភាពប្រជែងតំណែងលេខ ២ ដល់ការប្រកួតចុងក្រោយ។ យ៉ាងណា ភ្នំពេញក្រោន ហាក់មានតែមជាងបន្តិច ត្រង់ ថា អង្គរថាយហ្គឺរ មិនបានជាប់ក្នុងអាជ្ញាបណ្ណក្លិប AFC នោះទេ។ ចំណុចនេះ ធ្វើឱ្យក្រុមមានមូលដ្ឋាននៅខេត្តសៀមរាបហាក់មានភាគរយទាបក្នុងការតំណាងឱ្យ កម្ពុជា ឡើងទៅលេងពានទី ២ របស់ទ្វីប អាស៊ី ទោះពួកគេដណ្តើមបានលេខ ២ ក្នុងលីគ។

គ្រប់យ៉ាងមានតែរង់់ចាំដល់ដំណាក់កាលចុងក្រោយតែម្តង ដោយសារប្រធានក្លិបរបស់ អង្គរថាយហ្គឺរ លោក Akihiro Kato បានលើកឡើង ថា ក្រុមលោកនឹងតស៊ូដល់ទីបញ្ចប់ ហើយកំពុងដាក់បណ្តឹងឧទ្ធរណ៍ ដើម្បីតវ៉ាអំពីអាជ្ញាប័ណ្ណក្លិប AFC នេះ។ ដូច្នេះ អង្គរថាយហ្គឺរ នៅតែមានឱកាសអាចលេងពាន AFC2 បាន ប្រសិនបើការតវ៉ាទទួលបានជោគជ័យ៕

អត្ថបទ៖ សេម កុសល

The post បឹងកេត អស់ឱកាសលេខ ២ ខណៈ ភ្នំពេញក្រោន និង អង្គរថាយហ្គឺរ ត្រូវប្រជែងគ្នាដល់ប្រកួតចុងក្រោយ appeared first on Kampuchea Thmey Daily.

អង្គរថាយហ្គឺរ ជិតសម្រេចគោលដៅអ្នកគាំទ្រ ៣ ម៉ឺននាក់ រដូវកាលនេះ ខណៈខ្វះតែជាង ១ ពាន់នាក់

chean virakbot — Wed, 06 May 2026 00:54:45 +0000

ក្លិបបាល់ទាត់ អង្គរថាយហ្គឺរ ត្រូវបានមើលឃើញជាក្លិបមួយដែលយកចិត្តទុកដាក់ក្នុងសកម្មភាពទាក់ទាញ និងប្រមូលផ្តុំអ្នកគាំទ្រគួរឲ្យចាប់អារម្មណ៍បំផុតក្នុងចំណោមក្លិបនៃលីគបាល់ទាត់កំពូលកម្ពុជានៅរដូវកាលនេះ។

ពីមួយប្រកួតទៅមួយប្រកួត កីឡដ្ឋានអាគីហ៊ីរ៉ូកាតុ តែងតែទទួលបានអ្នកគាំទ្រចូលទស្សនាផ្ទាល់ច្រើន ទាំងជនជាតិខ្មែរ និងជនជាតិបរទេស។ ការទទួលបានអ្នកគាំទ្រចូលទស្សនាផ្ទាល់បែបនេះមិនមែនជារឿងចៃដន្យនោះទេ ប៉ុន្តែជាផែនការយុទ្ធសាស្ត្រសុទ្ធសាធ។ ក្លិបដែលមានម្ចាស់ជាជនជាតិជប៉ុនបានធ្វើសកម្មភាពជាច្រើននាប៉ុន្មានរដូវកាលចុងក្រោយ។

ក្រៅពីមានយុទ្ធសាស្ត្រផ្សព្វផ្សាយលើបណ្តាញទំនាក់ទំនងសង្គម ថ្នាក់ដឹកនាំ ក្រុមការងារ និងកីឡាករក៏បានចេញធ្វើសកម្មភាពផ្ទាល់តាមមូលដ្ឋានទាំងទីប្រជុំជន តាមផ្លូវថ្នល់ និងសាលារៀនជាដើមដើម្បីទាក់ទាញអ្នកគាំទ្រឲ្យចូលទស្សនាផ្ទាល់។

ក្លិបអង្គរថាយហ្គឺរ មានផេកផ្លូវការ និងវេបសាយសម្រាប់ការផ្សព្វផ្សាយពីសកម្មភាពរបស់ក្រុមជារៀងរាល់ថ្ងៃ ប៉ុន្តែក្លិបមួយនេះក៏មានផេកមួយទៀតគឺ Akihiro Kato Stadium សម្រាប់តែកីឡដ្ឋាន។ ផេកមួយនេះ ពួកគេប្រើប្រាស់សម្រាប់ការផ្សព្វផ្សាយពីអ្នកគាំទ្រសុទ្ធសាធតែម្តងដែលរបៀបផ្សព្វផ្សាយនេះស្ទើរគ្មានក្លិបណាផ្សេងនៃលីគកំពូលកម្ពុជាធ្វើដូចឡើយ។ ក្លិបខ្លះមានផេកសម្រាប់កីឡដ្ឋានដែរ ប៉ុន្តែមិនសូវមានសកម្មភាពផ្សព្វផ្សាយជាប្រចាំឡើយ។

នៅរដូវកាល ២០២៥-២៦ ក្លិបអង្គរថាយហ្គឺរ បានដាក់គោលដៅរកឲ្យបានអ្នកគាំទ្រសរុបចំនួន ៣ ម៉ឺននាក់ ដែលបានចូលទស្សនាផ្ទាល់។ ការប្រកួតសប្តាហ៍ទី២៨ កាលពីថ្ងៃអាទិត្យ ទី៣ ខែឧសភា ឆ្នាំ ២០២៦ កីឡដ្ឋាន អាគីហ៊ីរ៉ូ កាតុ ទទួលបានចំនួនអ្នកគាំទ្រច្រើនបំផុតកំណត់ត្រាថ្មីគឺចំនួន ២,៩៩៧នាក់ នៅពេល អង្គរថាយហ្គឺរ បានឈ្នះ ព្រះខ័នរាជស្វាយរៀង ដោយលទ្ធផល ៤-៣។

គិតត្រឹមសប្តាហ៍ទី ២៨ ពួកគេទទួលបានអ្នកគាំទ្រចំនួន ២៨,៦៣៨ នាក់ហើយ ដោយខ្វះតែ ១,៣៦២ នាក់ទៀតប៉ុណ្ណោះនឹងសម្រេចគោលដៅ។ ពួកគេទំនងជាសម្រេចបានគោលដៅសម្រាប់ការប្រកួតចុងក្រោយនៅរដូវកាលនេះនៅពេលពួកគេបើកទ្វារផ្ទះរបស់ខ្លួនទទួល ក្រុមណាហ្គាវើលដ៍ នៅថ្ងៃទី១៧ ខែឧសភា ឆ្នាំ ២០២៦។

អ្នកគាំទ្រជាផ្នែកមួយដ៏សំខាន់ដែលមិនអាចខ្វះបានសម្រាប់វិស័យបាល់ទាត់។ ម្ចាស់ក្លិបអាចយកទិន្នន័យនៃអ្នកគាំទ្រដើម្បីទាក់ទាញម្ចាស់ឧបត្ថម្ភដើម្បីទទួលបានចំណូល។ មិនត្រឹមតែប៉ុណ្ណោះ ក្លិបក៏អាចទទួលបានចំណូលពីការលក់សំបុត្រដល់អ្នកគាំទ្រ។ ម្យ៉ាងទៀត អ្នកគាំទ្រច្រើនក៏ជាសញ្ញាបង្ហាញឲ្យឃើញពីបាល់ទាត់រីកចម្រើនទាំងក្រុម ក្លិប លីគ និងជម្រើសជាតិ៕

ទិន្នន័យមុនការប្រកួតជាមួយ ព្រះខ័នរាជស្វាយរៀង

ទិន្នន័យការប្រកួតជាមួយ ព្រះខ័នរាជស្វាយរៀង

អត្ថបទ៖ វិរបុត្រ

The post អង្គរថាយហ្គឺរ ជិតសម្រេចគោលដៅអ្នកគាំទ្រ ៣ ម៉ឺននាក់ រដូវកាលនេះ ខណៈខ្វះតែជាង ១ ពាន់នាក់ appeared first on Kampuchea Thmey Daily.

ផ្លូវការ! ក្លិប អង្គរថាយហ្គឺរ បានពិន័យកីឡាករ មុត សត្យា ៤ ចំណុចធំ

Kosal Sem — Mon, 16 Mar 2026 07:43:36 +0000

ក្លិប អង្គរថាយហ្គឺរ បានចេញការពិន័យជាផ្លូវការលើកីឡាករ មុត សត្យា បន្ទាប់ពីបានប្រើអំពើហិង្សាដោយចេតនាលើកីឡាករ Connor Shields របស់ក្រុម ព្រះខ័នរាជស្វាយរៀង អំឡុងការប្រកួតក្រុមលំដាប់ Top 6 នៃលីគកំពូល កម្ពុជា កាលពីថ្ងៃ អាទិត្យ ទី ១៥ ខែ មីនា ឆ្នាំ ២០២៦ ម្សិលមិញ។

អំឡុងការប្រកួត ក្រុម អង្គរថាយហ្គឺរ ចាញ់ក្រុម ព្រះខ័នរាជស្វាយរៀង ០-២ ម្សិលមិញ បានមានរឿងចម្រូងចម្រាស់មួយនៅចុងការប្រកួត ដោយកីឡាករ មុត សត្យា ប្រើកែងរបស់ខ្លួនវាយទៅលើកីឡាករ Connor Shields ដោយចេតនា រហូតធ្វើឱ្យមានរបួសត្រង់ក្បាល។ ក្រោយប្រើសកម្មភាពហិង្សាបែបនេះ កីឡាករ មុត សត្យា ត្រូវបានលោកអាជ្ញាកណ្តាលផ្តល់កាតក្រហមបណ្តេញចេញពីទីលានប្រកួតភ្លាម។

យ៉ាងណាមិញ នៅថ្ងៃទី ១៦ ខែ មីនា ឆ្នាំ ២០២៦ នេះ ក្លិប អង្គរថាយហ្គឺរ បានបញ្ចេញចំណាត់ការភ្លាមៗលើកីឡាកររបស់ខ្លួន ដោយបានប្រកាសដាក់ពិន័យដូចតទៅ៖

ផ្អាកការចូលរូមការប្រកួតដែលនៅសេសសល់ទាំងអស់នៅរដូវកាលនេះ (៧ ប្រកួត)
មិនឲ្យចូលរួមហ្វឹកហាត់រហូតដល់ដាច់ខែនេះ
ត្រូវចូលរួមការងារស្ម័គ្រចិត្តក្នុងសហគមន៍ រួមទាំងការសម្អាតទីក្រុង ក្នុងអំឡុងពេលព្យួរការហ្វឹកហាត់
កាត់ប្រាក់បៀវត្សមួយផ្នែក រហូតដល់ចប់រដូវកាល

សូមបញ្ជាក់ថា នេះគ្រាន់តែជាការពិន័យរបស់ក្លិបប៉ុណ្ណោះ។ កីឡាករអាចនឹងត្រូវរងពិន័យបន្ថែមទៀតពីលីគ CPL។

ទោះបីជាយ៉ាងណា ក្លិបអង្គរថាយហ្គឺរ បានបញ្ជាក់ថា កីឡាករ មុត សន្យា បានសោកស្តាយចំពោះទង្វើរបស់ខ្លួនដែលមិនអាចគ្រប់គ្រងបាននៅលើទីលាន ហើយក្លិបនឹងធ្វើការអប់រំ និងស្តារនីតិសម្បទាកីឡាករឲ្យល្អប្រសើរឡើងវិញ។ ជាពិសេសក្លិបដែលមានជនជាតិជប៉ុនជាប្រធានអនុវត្តច្បាប់ និងគោលការណ៍យ៉ាងម៉ត់ចត់៕

អត្ថបទ៖ សេម កុសល

The post ផ្លូវការ! ក្លិប អង្គរថាយហ្គឺរ បានពិន័យកីឡាករ មុត សត្យា ៤ ចំណុចធំ appeared first on Kampuchea Thmey Daily.

កីឡាករ Facunda ធ្លាប់ស៊ុតចូល ភ្នំពេញក្រោន ក្នុងពាន ACGL មុនពេលចូលរួម អង្គរថាហ្គឺរ

chean virakbot — Fri, 09 Jan 2026 01:38:27 +0000

ក្លិបបាល់ទាត់ អង្គរថាយហ្គឺរ បានប្រកាសជាផ្លូវការពីការនាំចូលកីឡាករបរទេសថ្មី Facunda Aranda ដែលលេងតួនាទីជាខ្សែបម្រើប្រយុទ្ធមកពីក្លិប Tainan City នៃលីគបាល់ទាត់កំពូលតៃវ៉ាន់។

កីឡាករ Facunda Aranda សញ្ជាតិអាហ្សង់ទីន អាយុ ២៥ ឆ្នាំ កម្ពស់ ១.៨០ម៉ែត្រ ដែលមានបទពិសោធច្រើនគួរសម។ ចន្លោះឆ្នាំ ២០២១-២៤ រូបគេលេងឲ្យក្រុម ៣ ផ្សេងគ្នានៅប្រទេសអាហ្សង់ទីនគឺក្រុម San Telmo II, Sta Lucía U22 និង Peñarol (SJ)។

នៅរដូវកាល ២០២៤-២៥ រូបគេបានផ្លាស់ទៅចូលរួមជាមួយក្រុម Persis Solo នៃលីគបាល់ទាត់កំពូលឥណ្ឌូណេស៊ី។ ទោះបីជាយ៉ាងណា នៅក្លិបឥណ្ឌូណេស៊ីមិនសូវបានយូរប៉ុន្មានឡើយក៏បានចាកចេញ ដោយនៅទំនេរជាច្រើនខែ។

នៅខែសីហា ឆ្នាំ ២០២៥ ទើបកីឡាករ Facunda Aranda បានចូលរួមជាមួយក្រុម Tainan City នៃលីគកំពូលតៃវ៉ាន់។ នៅក្លិបថ្មីនេះ រូបគេបង្ហាញខ្លួននៅលើទីលានបានច្រើនទាំងការប្រកួតក្នុងលីគ និងពានរង្វាន់អន្តរជាតិ។

សម្រាប់ការបង្ហាញខ្លួននៅក្នុងលីគតៃវ៉ាន់ រូបគេរកបាន ២ គ្រាប់ និងពានរង្វាន់អន្តរជាតិ AFC Challenge League រកបាន ២ គ្រាប់។ នៅវគ្គជម្រុះពានរង្វាន់ AFC Challenge League គឺរកបានគ្រាប់ទី១នៅពេលរូបគេស៊ុតចូលក្រុមរបស់ម៉ុងហ្គោលី Khangarid នៅនាទី២២ ដែលបានជួយឲ្យក្រុម Tainan City ទទួលបានជ័យជម្នះដោយលទ្ធផល ៤-១។

កីឡាករ Facunda Aranda រកបានគ្រាប់បាល់ទី២ នៅវគ្គសន្សំពិន្ទុក្នុងពូលពានរង្វាន់ AFC Challenge League នៅពេលស៊ុតចូលក្រុម ភ្នំពេញក្រោន នៅនាទី១៣ ប៉ុន្តែក្រុមរបស់ខ្លួនបានចាញ់ក្រុមរបស់កម្ពុជា ដោយលទ្ធផល ២-៣ ហើយមិនបានឡើងវគ្គ៨ក្រុមចុងក្រោយទេ។

នៅពេលចប់ជុំទី១ នៃរដូវកាល ២០២៥-២៦ កីឡាករអាហ្សង់ទីនរូបនេះបានចាកចេញពីក្លិបរបស់តៃវ៉ាន់ ហើយបានមកចូលរួមជាមួយ អង្គរថាយហ្គឺរ សម្រាប់ជើងទី២នៃលីគបាល់ទាត់កំពូលកម្ពុជា។

ពេលនេះ ក្លិបអង្គរថាយហ្គឺរ មាន កីឡាករបរទេស ៦ នាក់គឺ ជប៉ុន ៣នាក់ ប្រេស៊ីល ១នាក់ ហូឡង់ ១នាក់ និងអាហ្សង់ទីន ១នាក់៕

អត្ថបទ៖ វិរបុត្រ

The post កីឡាករ Facunda ធ្លាប់ស៊ុតចូល ភ្នំពេញក្រោន ក្នុងពាន ACGL មុនពេលចូលរួម អង្គរថាហ្គឺរ appeared first on Kampuchea Thmey Daily.

ជាការរួមចំណែកជួយដល់កងទ័ព ជនភៀសសឹក ក្លឹបបាល់ទាត់ Angkor Tiger ចូលរួមឧបត្ថម្ភ ១,000ដុល្លារ

Sina Noun — Thu, 11 Dec 2025 04:27:27 +0000

ដោយមើលឃើញពីស្ថានភាពតានតឹងផ្នែកព្រំដែន និងផលលំបាករបស់ជនភៀសសឹកអំឡុងការឈ្លានពានរបស់សៀមមកលើកម្ពុជានៅពេលនេះក្លឹបបាល់ទាត់អាជីពនៅលីគកំពូលកម្ពុជាគឺ Angkor Tiger បានចូលរួមឧបត្ថម្ភជាថវិកា ១,000ដុល្លារជួយជម្រួលដល់ការលំបាកផ្សេងៗ។

ក្រុមបាល់ទាត់ Angkor Tiger

បើតាមសេចក្ដីប្រកាសលើហ្វេសបុកផេករបស់ក្លឹបបាល់ទាត់ Angkor Tiger កាលពីម្សិលមិញនេះបានបញ្ជាក់ថា «ក្លិបបាល់ទាត់អង្គរថាយហ្គឺរបានចូលរួមឧបត្ថម្ភគាំទ្រថវិកាជូនទៅកាន់គ្រួសារទ័ពនិងប្រជាជនភៀសសឹកតាមរយៈរដ្ឋបាលខេត្តសៀមរាប។ យើងសូមអំពាវនាវដល់សប្បុរសជន អ្នកគាំទ្រ និងអ្នកស្រលាញ់បាល់ទាត់ទាំងអស់ជួយចូលរួមឧបត្ថម្ភគាំទ្រថវិកា និង គ្រឿងឧបភោគតាមរយៈរដ្ឋបាលខេត្តសៀមរាប។»

ក្លឹបបាល់ទាត់ដែលមានម្ចាស់ជាជនជាតិជប៉ុនខាងលើនេះ មិនត្រឹមតែឧបត្ថម្ភថវិកាខ្លួនឯងហើយ និងបានអំពាវនាវដល់ដល់សប្បុរសជន និងអ្នកគាំទ្របាល់ទាត់ទៀតផងឲ្យជួយឧបត្ថម្ភជាថវិកា ឬគ្រឿងឧបភោគបរិភោគផ្សេងតាមដែលអាចធ្វើទៅបាន។

លោក Akihiro Kato ដែលជាម្ចាស់ក្លឹបបាល់ទាត់ខាងលើនេះត្រូវបានគេដឹងថា ជាអ្នកចូលរួមចំណែកអភិវឌ្ឍន៍វិស័យបាល់ទាត់នៅកម្ពុជាឲ្យមានភាពរីកចម្រើន និងប្រកបដោយការប្រកួតប្រជែង។ បន្ថែមពីនេះលោកក៏ជាអ្នកដែលមានទឹកចិត្តស្រឡាញ់ប្រទេសកម្ពុជា ប្រជាជនខ្មែរ និងតែងតែជួយលើកិច្ចការងារមនុស្សធម៌ជាបន្តបន្ទាប់រហូតមកពិសេសដូចជាការចំណាយថវិកាលើការជួយដល់ក្រុមគ្រួសារកងទ័ពនៅពេលនេះជាដើម។

លោក Akihiro Kato

បញ្ជាក់ដែរថា ថវិការដែលក្លឹបបាល់ទាត់ Angkor Tiger បានឧបត្ថម្ភនេះគឺបានផ្ទេរទៅតាមរដ្ឋបាលខេត្តសៀមរាបដែលកំពុងតែអំពាវនាវដល់សប្បុរសជនជិតឆ្ងាយឲ្យជួយក្នុងគ្រាលំបាកនេះ។ នៅពេលនេះជម្លោះឈ្លានរបស់ប្រទេសសៀមមកលើកម្ពុជាមិនទាន់បានថមថយ ឬបញ្ឈប់នៅឡើយទេបន្ទាប់ពីប្រទេសនេះបើកការវាយប្រហារមកលើកម្ពុជាតាំងពីថ្ងៃទី៨ ខែធ្នូ ឆ្នាំ២០២៥ មកម្ល៉េះ។ គិតមកដល់ពេលនេះមានគ្រួសារកងទ័ព និងប្រជាពលរដ្ឋខ្មែររាប់ម៉ឺននាក់ដែលរស់នៅតាមបណ្ដោយព្រំដែនធ្វើការភៀសខ្លួនរកទីកន្លែងមានសុខសុវត្ថិភាព៕

សេចក្ដីអំពាវនាវរបស់រដ្ឋបាលខេត្តសៀមរាប

ជនភៀសសឹកកម្ពុជា

អត្ថបទដោយ៖ នួន ស៊ីណា

The post ជាការរួមចំណែកជួយដល់កងទ័ព ជនភៀសសឹក ក្លឹបបាល់ទាត់ Angkor Tiger ចូលរួមឧបត្ថម្ភ ១,000ដុល្លារ appeared first on Kampuchea Thmey Daily.

រដូវកាលនេះ អង្គរថាយហ្គឺរ កំពុងប្រជែងកំពូលតារាង ក្រោយចាញ់តែ ២ ប្រកួត

chean virakbot — Tue, 11 Nov 2025 02:01:20 +0000

ក្រុម អង្គរថាយហ្គឺរ កំពុងធ្វើបានយ៉ាងល្អក្នុងរដូវកាលនេះ ដោយពួកគេកំពុងឈរចំណាត់ថ្នាក់លេខ២នៃតារាងលីគបាល់ទាត់កំពូលកម្ពុជា និងជាក្រុមប្រជែងកំពូលតារាង។

ក្រុមអង្គរថាយហ្គឺរ

ពួកគេបានឆ្លងកាត់ ៩ ប្រកួត គឺឈ្នះ ៧ និងចាញ់ ២ រកបាន ២១ ពិន្ទុ ឈរលេខ ២ ក្នុងតារាង ស្មើពិន្ទុក្រុមកំពូលតារាង ព្រះខ័នរាជស្វាយរៀង។ ពួកគេបានចាញ់ក្រុម ព្រះខ័នរាជស្វាយរៀង ០-៣ និងចាញ់ ណាហ្គាវើលដ៍ ០-១ ខណៈ៧ប្រកួតផ្សេងទៀតសុទ្ធតែឈ្នះ។

អ្វីដែលគួរឲ្យចាប់អារម្មណ៍ អង្គរថាយហ្គឺរជាក្រុមដែលរកបានគ្រាប់បាល់ច្រើនជាងគេក្នុងចំណោម ១១ ក្រុមគិតត្រឹមសប្តាហ៍ទី១១។ ពួកគេរកបាន ៣០ គ្រាប់ពីការប្រកួត ៩ លើក ប៉ុន្តែត្រូវបានដៃគូស៊ុតចូលវិញ ១០ គ្រាប់ ធ្វើឲ្យពួកគេនៅពីក្រោម ព្រះខ័នរាជស្វាយរៀង ដែលស៊ុតចូលដៃគូ ២៧ គ្រាប់ តែត្រូវដៃគួស៊ុតចូល ៦ គ្រាប់ប៉ុណ្ណោះពីការប្រកួត ៨ លើក។

អង្គរថាយហ្គឺរ (ខៀវ) និង កងយោធពលខេមរភូមិន្ទ (ក្រហម)

ការប្រកួតឈានដល់សប្តាហ៍ទី១១ សបញ្ជាក់យ៉ាងច្បាស់ថា ក្រុមអង្គរថាយហ្គឺរ មិនមែនត្រឹមតែប្រជែងក្រុមលំដាប់កំពូលទាំង ៦ (Top 6) ដែលត្រូវឡើងទៅជុំទី៣ប៉ុណ្ណោះទេ ប៉ុន្តែជាក្រុមដែលប្រជែងជើងឯកថែមទៀត។

ពួកគេត្រូវបានមើលឃើញពីទម្រង់លេងដ៏ល្អគ្រប់តំបន់ មិនថា តំបន់ប្រយុទ្ធ តំបន់បម្រើ ឬការពារទេ។ ជាពិសេសជាក្រុមលេងប្រយុទ្ធច្រើនទើបធ្វើឲ្យពួកគេរកបានគ្រាប់បាល់ច្រើន។ ជាក់ស្តែង ពួកគេស៊ុតចូលក្រុម អាយអេសអាយ ដង្កោសែនជ័យ ដល់ទៅ ៨ គ្រាប់។

អង្គរថាយហ្គឺរ (ខៀវ) និង កងយោធពលខេមរភូមិន្ទ (ក្រហម)

ស្ថិតិ ៩ ប្រកួតរបស់ អង្គរថាយហ្គឺរ

ឈ្នះ អឹមអួអាយ កំពង់ដេវ៉ា ៦-៣
ចាញ់ ព្រះខ័នរាជស្វាយរៀង ០-៣
ឈ្នះ គិរីវង់សុខសែនជ័យ ៤-០
ឈ្នះ អាយអេសអាយ ដង្កោសែនជ័យ ៨-០
ចាញ់ ណាហ្គាវើលដ៍ ០-១
ឈ្នះ បឹងកេត ៣-០
ឈ្នះ វិសាខា ៣-២
ឈ្នះ ឡាយហ្វ ខេត្តព្រះសីហនុ ៣-១
ឈ្នះ កងយោធពលខេមរភូមិន្ទុ ៣-០

អង្គរថាយហ្គឺរ (ខៀវ) និង កងយោធពលខេមរភូមិន្ទ (ក្រហម)

អត្ថបទ៖ វីរបុត្រ

The post រដូវកាលនេះ អង្គរថាយហ្គឺរ កំពុងប្រជែងកំពូលតារាង ក្រោយចាញ់តែ ២ ប្រកួត appeared first on Kampuchea Thmey Daily.

ឈ្នះប៉ះឈ្នះ! អង្គរថាយហ្គឺរ ជួប ព្រះខ័នរាជស្វាយរៀង ជាក្រុមជួបគ្នាតែងតែជក់ចិត្ត

chean virakbot — Fri, 15 Aug 2025 02:58:42 +0000

ក្រុមអង្គរថាយហ្គឺរ បើកទ្វារកីឡដ្ឋានរបស់ខ្លួនទទួល ក្រុមខ្លាំង ព្រះខ័នរាជស្វាយរៀង វេលាម៉ោង ៦ ល្ងាច ថ្ងៃសៅរ៍ ទី១៦ ខែសីហា ឆ្នាំ ២០២៥ សម្រាប់ការប្រកួតសប្តាហ៍ទី២ លីគបាល់ទាត់កំពូលកម្ពុជា។

ក្រុមអង្គរថាយហ្គឺរ

អង្គរថាយហ្គឺរ តែងតែនាំចូលកីឡាករបរទេសល្អៗ ប៉ុន្តែមិនរក្សាទុកច្រើនរដូវកាលឡើយ។ កីឡាករបរទេសនៅក្លិបកម្ពុជាជាច្រើនត្រូវបាននាំយកពីក្លិបអង្គរថាយហ្គឺរ។ សម្រាប់រដូវកាលថ្មីនេះ ពួកគេមានកីឡាករបរទេសដែលមានល្បឿនលឿន និងបញ្ចប់ទីច្បាស់ មានដូចជា ខ្សែការពារប្រេស៊ីល Matheus Freitas ខ្សែបម្រើជប៉ុន Takara Masutani និង Takuto Yasuoka ខណៈខ្សែប្រយុទ្ធជប៉ុន Mark Ajay Kurita, ហូឡង់ Guytho Mijland និងប្រេស៊ីល Eduardo Junior។

ក្រុមព្រះខ័នរាជស្វាយរៀង

ព្រះខ័នរាជស្វាយរៀង សំបូរកីឡាករល្អៗទាំងខ្មែរ និងបរទេស។ ខ្សែបម្រើជប៉ុន Ryo Fujii និង 2- Takashi Odaawara និងខ្សែប្រយុទ្ធឡាវ Bounphachan Bounkong, Cristian Roque (ប្រេស៊ីល), Kwame Peprah (ហ្គាណា) និង Patrick Souza (ប្រេស៊ីល)។

កីឡាករប្រេស៊ីល Matheus Freitas

កាលពីសប្តាហ៍ទី១ អង្គរថាយហ្គឺរ ទទួលបានជ័យជម្នះធំធេងលើក្រុម អឹមអូអាយ កំពង់ដេវ៉ា ដោយលទ្ធផល ៦-៣ ដើម្បីទទួលបាន ៣ ពិន្ទុ ឈរលើកំពូលតារាង ខណៈ ព្រះខ័នរាជស្វាយរៀង បានឈ្នះ ណាហ្គាវើលដ៍ ៣-០ ដើម្បីឈរចំណាត់ថ្នាក់លេខ ២ ក្នុងតារាង។

កីឡាករប្រេស៊ីល Patrick Souza

នេះជាការប៉ះគ្នារវាង ក្រុមឈ្នះ និង ក្រុមឈ្នះ ដែលនឹងក្លាយជាជំនួបដ៏អស្ចារ្យសម្រាប់អ្នកគាំទ្រ។ សម្រាប់ការជួបគ្នា ១៣ លើកក្នុងលីគ និងពានសម្តេចតេជោ ព្រះខ័នរាជស្វាយរៀង ឈ្នះ ១២ លើក ហើយ អង្គរថាយហ្គឺរ ឈ្នះ ១ លើក។

កីឡាករ សុផល ឌីម៉ង់ ជួបក្រុមចាស់

អ្វីដែលគួរឲ្យកត់សំគាល់ រាល់ក្រុមទាំងពីរប៉ះគ្នាតែងតែជក់ចិត្ត និងកើតមានគ្រាប់បាល់ច្រើនចាប់ពី ៣ គ្រាប់ឡើង។

ព្រះខ័នរាជស្វាយរៀង ៦-១ អង្គរថាយហ្គឺរ (លីគ ២០២៤-២៥)
ព្រះខ័នរាជស្វាយរៀង ៥-២ អង្គរថាយហ្គឺរ (លីគ ២០២៤-២៥)
ព្រះខ័នរាជស្វាយរៀង ៣-២ អង្គរថាយហ្គឺរ (លីគ ២០២៤-២៥)
ព្រះខ័នរាជស្វាយរៀង ៤-២ អង្គរថាយហ្គឺរ (លីគ ២០២៣-២៤)
ព្រះខ័នរាជស្វាយរៀង ៣-០ អង្គរថាយហ្គឺរ (លីគ ២០២៣-២៤)
ព្រះខ័នរាជស្វាយរៀង ៧-១ អង្គរថាយហ្គឺរ (លីគ ២០២៣)
ព្រះខ័នរាជស្វាយរៀង ៥-២ អង្គរថាយហ្គឺរ (លីគ ២០២៣)
ព្រះខ័នរាជស្វាយរៀង ៦-០ អង្គរថាយហ្គឺរ (លីគ ២០២២)
ព្រះខ័នរាជស្វាយរៀង ៤-០ អង្គរថាយហ្គឺរ (លីគ ២០២២)
ព្រះខ័នរាជស្វាយរៀង ៤-១ អង្គរថាយហ្គឺរ (លីគ ២០២២)
ព្រះខ័នរាជស្វាយរៀង ៥-២ អង្គរថាយហ្គឺរ (លីគ ២០២១)
ព្រះខ័នរាជស្វាយរៀង ៣-០ អង្គរថាយហ្គឺរ (ពានសម្តេចតេជោ ២០២១)
ព្រះខ័នរាជស្វាយរៀង ១-២ អង្គរថាយហ្គឺរ (លីគ ២០២១)

អត្ថបទ៖ វីរបុត្រ

The post ឈ្នះប៉ះឈ្នះ! អង្គរថាយហ្គឺរ ជួប ព្រះខ័នរាជស្វាយរៀង ជាក្រុមជួបគ្នាតែងតែជក់ចិត្ត appeared first on Kampuchea Thmey Daily.

បុរសជប៉ុន Akihiro Kato បង្ហាញទឹកចិត្តជួយខ្មែរក្នុងគ្រាលំបាក

chean virakbot — Fri, 25 Jul 2025 04:50:42 +0000

ជនជាតិជប៉ុន លោក Akihiro Kato បានបង្ហាញកាយវិការ និងទឹកចិត្តជួយខ្មែរក្នុងគ្រាលំបាកដោយអាចផ្តល់បន្ទប់ស្នាក់នៅចំនួន ៥ នៅសណ្ឋាគារមួយកន្លែងក្នុងខេត្តសៀមរាប ដល់ប្រជាពលរដ្ឋដែលគ្មានកន្លែងស្នាក់នៅពីជម្លោះព្រំដែនខ្មែរ-ថៃ។

លោក Akihiro Kato ឈរនៅមុខកីឡដ្ឋាន

នៅព្រឹកថ្ងៃទី២៥ ខែកក្កដា ឆ្នាំ ២០២៥ លោក Akihiro Kato បានសរសេរថា ៖«ជូនចំពោះជនភៀសខ្លួនពីតំបន់ជម្លោះ ដែលគ្មានកន្លែងបត់។ ទោះបីជាសមត្ថភាពមានកម្រិតក៏ដោយ ក៏ខ្ញុំផ្តល់ជូនបន្ទប់ចំនួន ៥ សម្រាប់មនុស្ស ១៥ នាក់នៅសណ្ឋាគារ Angkor Tiger Resort ក្នុងខេត្តសៀមរាប ជាកន្លែងស្នាក់នៅបណ្តោះអាសន្ន»។

លោកបានបញ្ជាក់ថា ៖«ខ្ញុំសង្ឃឹមយ៉ាងមុតមាំសម្រាប់ការបញ្ចប់អរិភាពភ្លាមៗ និងសម្រាប់ការសម្រុះសម្រួលដោយមិនលំអៀងដោយស្ថាប័នភាគីទីបីអន្តរជាតិ»។

សូមបញ្ជាក់ថា លោក Akihiro Kato ជាម្ចាស់ក្លិបបាល់ទាត់ អង្គរថាយហ្គឺរ ដែលកំពុងលេងក្នុងក្របខណ្ឌលីគបាល់ទាត់កំពូលកម្ពុជា។ ការបង្កើតក្លិបបាល់ទាត់របស់លោកនៅស្រុកខ្មែរបានរួមចំណែកជួយអភិវឌ្ឍកីឡាបាល់ទាត់ ផ្តល់ការងារដល់ប្រជាជនកម្ពុជា និងរួមចំណែកសកម្មភាពកិច្ចការងារសង្គមជាច្រើនទៀត។ លោកត្រូវបានគេមើលឃើញពីទឹកចិត្តស្រឡាញ់ គាំទ្រ និងចូលចិត្តប្រទេសកម្ពុជាយ៉ាងខ្លាំងនាប៉ុន្មានឆ្នាំចុងក្រោយ៕

លោក Akihiro Kato បង្ហោះសារបង្ហាញទឹកចិត្តចូលរួមជួយខ្មែរ

អត្ថបទ៖ វីរបុត្រ

The post បុរសជប៉ុន Akihiro Kato បង្ហាញទឹកចិត្តជួយខ្មែរក្នុងគ្រាលំបាក appeared first on Kampuchea Thmey Daily.

ក្លិបអង្គរថាយហ្គឺរ Archives - Kampuchea Thmey Daily

បឹងកេត អស់ឱកាសលេខ ២ ខណៈ ភ្នំពេញក្រោន និង អង្គរថាយហ្គឺរ ត្រូវប្រជែងគ្នាដល់ប្រកួតចុងក្រោយ

អង្គរថាយហ្គឺរ ជិត​សម្រេច​គោល​ដៅ​អ្នក​គាំទ្រ ៣ ម៉ឺន​នាក់ រដូវ​កាល​នេះ ខណៈខ្វះ​តែ​ជាង ១ ពាន់​នាក់​

ផ្លូវការ! ក្លិប អង្គរថាយហ្គឺរ បានពិន័យ​កីឡាករ មុត សត្យា ៤​ ចំណុច​ធំ

កីឡាករ Facunda ធ្លាប់​ស៊ុត​ចូល ភ្នំពេញ​ក្រោន ក្នុង​ពាន ACGL មុន​ពេល​ចូល​រួម អង្គរថាហ្គឺរ

ជា​ការ​រួមចំណែក​ជួយ​ដល់​កងទ័ព​ ជន​ភៀសសឹក​ ក្លឹប​បាល់ទាត់​ Angkor Tiger​ ចូលរួម​ឧបត្ថម្ភ​ ១,000​ដុល្លារ​

រដូវ​កាល​នេះ អង្គរថាយហ្គឺរ កំពុង​ប្រជែង​កំពូល​តារាង ក្រោយចាញ់តែ ២ ប្រកួត

ឈ្នះ​ប៉ះ​ឈ្នះ! អង្គរថាយហ្គឺរ ជួប ព្រះ​ខ័ន​រាជ​ស្វាយរៀង ជាក្រុម​ជួប​គ្នា​តែង​តែ​ជក់​ចិត្ត

បុរស​ជប៉ុន Akihiro Kato បង្ហាញ​ទឹក​ចិត្ត​ជួយ​ខ្មែរ​ក្នុង​គ្រា​លំបាក

អង្គរថាយហ្គឺរ ជិតសម្រេចគោលដៅអ្នកគាំទ្រ ៣ ម៉ឺននាក់ រដូវកាលនេះ ខណៈខ្វះតែជាង ១ ពាន់នាក់

ផ្លូវការ! ក្លិប អង្គរថាយហ្គឺរ បានពិន័យកីឡាករ មុត សត្យា ៤ ចំណុចធំ

កីឡាករ Facunda ធ្លាប់ស៊ុតចូល ភ្នំពេញក្រោន ក្នុងពាន ACGL មុនពេលចូលរួម អង្គរថាហ្គឺរ

ជាការរួមចំណែកជួយដល់កងទ័ព ជនភៀសសឹក ក្លឹបបាល់ទាត់ Angkor Tiger ចូលរួមឧបត្ថម្ភ ១,000ដុល្លារ

រដូវកាលនេះ អង្គរថាយហ្គឺរ កំពុងប្រជែងកំពូលតារាង ក្រោយចាញ់តែ ២ ប្រកួត

ឈ្នះប៉ះឈ្នះ! អង្គរថាយហ្គឺរ ជួប ព្រះខ័នរាជស្វាយរៀង ជាក្រុមជួបគ្នាតែងតែជក់ចិត្ត

បុរសជប៉ុន Akihiro Kato បង្ហាញទឹកចិត្តជួយខ្មែរក្នុងគ្រាលំបាក