ក្លឹបបាល់ទាត់គិរីវង់សុខសែនជ័យ Archives - Kampuchea Thmey Daily

AFC Challenge League ជាព្រឹត្តិការណ៍ប្រវត្តិសាស្រ្ដ កក្រើកដូចស៊ីហ្គេម ២០២៣ ទទួលបានការឧបត្ថម្ភពីក្រុមហ៊ុនវឌ្ឍនៈ

chean virakbot — Fri, 09 May 2025 02:59:37 +0000

ប្រជាជនកម្ពុជា ជាពិសេសអ្នកគាំទ្រកីឡាបានកំពុងរីករាយនឹងក្លិបព្រះខ័នរាជស្វាយរៀង ដែលឈានដល់វគ្គផ្តាច់ព្រ័ត្រ ពានរង្វាន់ក្លិបអាស៊ី AFC Challene League ដែលទទួលបានការឧបត្ថម្ភពីក្រុមហ៊ុន វឌ្ឍនៈ។

នេះជាព្រឹត្តិការណ៍ប្រវត្តិសាស្ត្រលើកដំបូងនៅលើទឹកដីនៃព្រះរាជាណាចក្រកម្ពុជាដែលទទួលបានការចាប់អារម្មណ៍ខ្លាំងបំផុតពីមហាជនទាំងនៅរាជធានីភ្នំពេញ និងគ្រប់ខេត្តទាំងអស់។ ទន្ទឹមជាមួយគ្នានេះ ក្រុមហ៊ុន វឌ្ឍនៈ មានមោទកភាពយ៉ាងក្រៃលែងដែលបានក្លាយជាដៃគូឧបត្ថម្ភដល់ក្លិប ព្រះខ័នរាជស្វាយរៀង តំណាងឲ្យក្លិបកម្ពុជាក្នុងពានរង្វាន់អន្តរជាតិ។ ក្រុមហ៊ុនបានរួមចំណែកយ៉ាងសំខាន់ដល់ក្លិបផ្ទាល់ និងធ្វើយ៉ាងណាឲ្យអ្នកគាំទ្រទទួលបានភាពសប្បាយរីករាយតាមរយៈការដាក់ផ្សាយបន្តផ្ទាល់ដោយផ្ទាំង LED ខ្នាតយក្សនៅសួន វឌ្ឍនៈក្នុងរាជធានីភ្នំពេញ។

សន្ទុះនៃការគាំទ្រភ្លូកទឹក ភ្លូកដីទូទាំងប្រទេសបែបនេះបានធ្វើឲ្យក្រុម ហ៊ុន វឌ្ឍនៈ នឹកឃើញដល់មហាព្រឹត្តិការណ៍កីឡាប្រចាំតំបន់អាស៊ីអាគ្នេយ៍គឺ ស៊ីហ្គេម-អាស៊ានប៉ារ៉ាហ្គេម ឆ្នាំ២០២៣ ដែលកម្ពុជាទទួលរៀបចំធ្វើជាម្ចាស់ផ្ទះលើកដំបូង។ ពេលនោះ ក្រុមហ៊ុនគឺជាដៃគូឧបត្ថម្ភធំដល់ព្រឹត្តិការណ៍ទាំងមូលដែលរួមចំណែកជួយឲ្យម្ចាស់ផ្ទះកម្ពុជាទទួលបានជោគជ័យគឺមេដាយច្រើនបំផុតក្នុងប្រវត្តិសាស្ត្ររបស់ខ្លួន។

មែនទែនទៅ ក្រុមហ៊ុន វឌ្ឍនៈ បានរួមចំណែកជួយអភិវឌ្ឍវិស័យកីឡានៅក្នុងប្រទេសកម្ពុជាអស់រយៈពេលជាច្រើនឆ្នាំមកហើយដែលនេះជាផ្នែកដ៏ចាំបាច់បំផុតរបស់ស្ថាប័នឯកជនក្នុងការចូលរួមជាមួយរាជរដ្ឋាភិបាល។ ក្រុមហ៊ុនបានឧបត្ថម្ភគាំទ្រដល់កីឡាស្ទើរគ្រប់ទម្រង់ដូចជាស្ថាប័នកីឡា សហព័ន្ធកីឡាជាតិ កម្មវិធីប្រកួត និងអត្តពលិកផ្ទាល់ មានដូចជា ឧបត្ថម្ភដល់សហព័ន្ធកីឡាបាល់ទាត់កម្ពុជា ក្រុមបាល់ទាត់ជម្រើសជាតិកម្ពុជា។ ការឧបត្ថម្ភដល់កម្មវិធីប្រកួតលីគបាល់ទាត់កំពូលកម្ពុជាកម្ពុជា។

ការឧបត្ថម្ភដល់ព្រឹត្តិការណ៍កីឡាជាតិ៣លើកជាប់គ្នា ព្រឹត្តិការណ៍រត់ពាក់កណ្តាលម៉ារ៉ាតុងជាច្រើនលើក ព្រឹត្តិការណ៍កីឡាប្រដាល់គ្រុឌគុនខ្មែរ និង ដ្រាហ្គិនគុនខ្មែរ ការប្រកួតបាល់ទាត់គ្រុឌស៊ូបភើខាប់ ការប្រកួតកីឡាបាល់ទាត់ជើងឯកអនុវិទ្យាល័យ និងវិទ្យាល័យ ការឧបត្ថម្ភគាំទ្រដល់ក្លិបបាល់ទាត់ក្នុងលីគកំពូលកម្ពុជាមានដូចជា ក្លិបបាល់ទាត់ គិរីវង់សុខសែនជ័យ ព្រះខ័នរាជស្វាយរៀង និងបឹងកេត ព្រមទាំងឧបត្ថម្ភដល់ព្រឹត្តិការណ៍ផ្សេងៗជាច្រើនទៀត។

ការឧបត្ថម្ភគាំទ្រទាំងនេះបានក្លាយជាសសរស្តម្ភក្នុងការជំរុញ បង្កើន និងអភិវឌ្ឍវិស័យកម្ពុជាឲ្យរីកចម្រើន ប្រកបដោយគុណភាពទាំងកម្រិតជាតិ និងអន្តរជាតិ ហើយកីឡាករ កីឡាការិនី គ្រូបង្វឹក និងអ្នកពាក់ព័ន្ធកាន់តែមានជីវភាពធូរធារ។

ក្រុមហ៊ុន វឌ្ឍនៈ មិនឈប់បង្អង់ត្រឹមនេះទេគឺនៅតែបន្តមានមហិច្ឆតារួមចំណែកជួយដល់វិស័យកីឡាកម្ពុជាយូរអង្វែងបន្តទៀត។ សូមកុំភ្លេចណាទៅគាំទ្រឲ្យបានច្រើនកុះករនៅពហុកីឡដ្ឋានជាតិមរតកតេជោ និងការផ្សាយបន្តផ្ទាល់នៅសួនវឌ្ឍនៈ ដើម្បីលើកទឹកចិត្តដល់ក្លិបព្រះខ័នរាជស្វាយរៀង និងធ្វើជាសក្ខីភាពផ្ទាល់ភ្នែកសម្រាប់ព្រឹត្តិការណ៍ជាប្រវត្តិសាស្ត្រដំបូងនៅទឹកដីកម្ពុជា។ ជោគជ័យរបស់ក្លិបព្រះខ័នរាជស្វាយរៀងគឺជាជោគជ័យរបស់ខ្មែរយើងទាំងអស់គ្នា៕

អត្ថបទ៖ វីរបុត្រ

The post AFC Challenge League ជាព្រឹត្តិការណ៍ប្រវត្តិសាស្រ្ដ កក្រើកដូចស៊ីហ្គេម ២០២៣ ទទួលបានការឧបត្ថម្ភពីក្រុមហ៊ុនវឌ្ឍនៈ appeared first on Kampuchea Thmey Daily.

ការប្រកួតពានសម្តេចតេជោជើងទី២ ភ្នំពេញក្រោននិងគិរីវង់ប្តូរទៅថ្ងៃទី២៨កុម្ភៈ

Pha Rothana — Fri, 16 Feb 2024 04:58:34 +0000

ការប្រកួតជើងទី២ ពានរង្វាន់សម្តេចតេជោ ហ៊ុន សែន ថ្នាក់ជាតិ រវាងក្រុមភ្នំពេញក្រោន និងគិរីវង់សុខសែនជ័យ ត្រូវបានលើកទៅថ្ងៃទី២៨ ខែកុម្ភៈ ឆ្នាំ២០២៤ ដោយសារភ្នំពេញក្រោនមមាញឹកខ្លាំង។

ការប្រកួតក្នុងវគ្គ៨ក្រុមចុងក្រោយ ជើងទី២ ពានរង្វាន់សម្ដេចតេជោ នឹងធ្វើនៅថ្ងៃទី២១ ខែកុម្ភៈ ទាំងអស់ ប៉ុន្ដែសម្រាប់ការប្រកួតរបស់ភ្នំពេញក្រោន និងគិរីវង់សុខសែនជ័យ ប្តូរទៅថ្ងៃទី២៨ ខែកុម្ភៈវិញ។ ការផ្លាស់ប្តូរកាលបរិច្ឆេទនេះដោយសារភ្នំពេញក្រោនមមាញឹកខ្លាំង ជាពិសេសពួកគេទើបបញ្ចប់ភារកិច្ចក្នុងពានរង្វាន់ AFC Cup កាលពីថ្ងៃទី១៣ ខែកុម្ភៈ។ ត្រឡប់មកដល់កម្ពុជាវិញ ភ្នំពេញក្រោនត្រូវប្រកួតជាមួយក្រសួងការពារជាតិ សប្តាហ៍ទី២១នៃលីគកំពូលកម្ពុជា ថ្ងៃទី១៨ ខែកុម្ភៈ។

កាលវិភាគប្រកួតវគ្គ៨ក្រុមចុងក្រោយជើងទី២
ថ្ងៃទី២១ ខែកុម្ភៈ

វិសាខា vs ព្រៃវែង វេលាម៉ោង៦យប់ នៅកីឡដ្ឋានព្រីនស៍
ព្រះខ័នរាជស្វាយរៀង vs ណាហ្គាវើលដ៍ វេលាម៉ោង៦យប់ នៅកីឡដ្ឋានស្វាយរៀង
អាយ អេស អាយ ដង្កោសែនជ័យ vs បឹងកេត វេលាម៉ោង៦យប់ នៅកីឡដ្ឋានអេអាយអេ ខេអឹមអេចផាក

ថ្ងៃទី២៨ ខែកុម្ភៈ

ភ្នំពេញក្រោន vs គិរីវង់ សុខសែនជ័យ វេលាម៉ោង៦យប់ នៅកីឡដ្ឋានស្មាត អ អេស អិន

អត្ថបទ៖ ផា រតនា

The post ការប្រកួតពានសម្តេចតេជោជើងទី២ ភ្នំពេញក្រោននិងគិរីវង់ប្តូរទៅថ្ងៃទី២៨កុម្ភៈ appeared first on Kampuchea Thmey Daily.

ឃាន់ សុប៉ិន រំពឹងលេងបានច្រើន ក្រោមការដឹកនាំលោកគ្រូ សាប៊ូន វិនតា

Pha Rothana — Wed, 22 Nov 2023 01:39:43 +0000

ខ្សែប្រយុទ្ធ ឃាន់ សុប៉ិន បានផ្លាស់ទៅក្លិបគិរីវង់សុខសែនជ័យក្នុងលក្ខខណ្ឌខ្ចីជើងជុំទី២ ខេមបូឌានព្រីមៀរលីគ ក្រោយមិនសូវមានឱកាសបង្ហាញខ្លួនជាមួយបឹងកេត។

កីឡាករ ឃាន់ សុប៉ិន សង្ឃឹមទទួលបានឱកាសច្រើនក្នុងការបង្ហាញលើទីលាន ជុំទី២។ ការចូលរួមជាមួយគិរីវង់សុខសែនជ័យគឺជាពេលវេលាក្រោមការដឹកនាំរបស់លោកគ្រូ សាប៊ូន វិនតា ជាលើកទី២ ក្រោយធ្លាប់ហ្វឹកហាត់នៅមជ្ឈមណ្ឌលបាល់ទាត់ជាតិបាទីជាមួយគ្រូបង្វឹករូបនេះ។

កីឡាករបានប្រាប់«កម្ពុជាថ្មី»ថា ៖«ខ្ញុំមានអារម្មណ៍រីករាយ ដែលបានចូលរួមជាមួយគិរីវង់។ ខ្ញុំសង្ឃឹមច្រើនក្នុងការបង្ហាញខ្លួន ជាពិសេសខ្ញុំយល់ច្បាស់ពីទម្រង់លេងរបស់ក្លិប។ ម្យ៉ាងទៀត ខ្ញុំធ្លាប់ហាត់ជាមួយលោកគ្រូ សាប៊ូន វិនតា នៅបាទីជាង២ឆ្នាំ»។

ក្នុងជុំទី២ ជម្រើសជើងឯកខេមបូឌានព្រីមៀរលីគ គិរីវង់សុខសែនជ័យចែកផ្លូវគ្នាជាមួយកីឡាករ នុប តុលា និង Jahana Daiki ដើម្បីផ្លាស់ប្តូរប្រព័ន្ធលេង បន្ទាប់ពីជុំទី១ ធ្វើមិនបានល្អដោយស្ថិតនៅបាតតារាងពិន្ទុ។

កីឡាករចំណូលថ្មីដែលលោក សាប៊ូន វិនតា បាននាំចូលក្នុងជើងទី២នេះ មានកីឡាករ ឃាន់ សុបិន ខ្ចីជើងពីបឹងកេត និង Mizuno Hikaru ខ្ចីជើងពីព្រះខ័នរាជស្វាយរៀង៕

អត្ថបទ៖ ផា រតនា

The post ឃាន់ សុប៉ិន រំពឹងលេងបានច្រើន ក្រោមការដឹកនាំលោកគ្រូ សាប៊ូន វិនតា appeared first on Kampuchea Thmey Daily.

គ្រូគីរីវង់សុខសែនជ័យ និយាយពីការប្រកួតសេសសល់ ទោះអស់ឱកាសប្រជែងនៅលីគកំពូល

អ៊ិន ពិសី — Mon, 10 Oct 2022 09:43:30 +0000

ក្លិបបាល់ទាត់គីរីវង់សុខសែនជ័យ អស់ឱកាសប្រជែងតំណែងនានានៅក្នុងពានរង្វាន់ខេមបូឌានព្រីមៀរលីគ ទាំងជើងឯក ក៏ដូចជាតំណែងកំពូលទាំង ៤ (Top 4) បន្ទាប់ពីត្រូវបានគូប្រកួតនាំមុខដាច់ពិន្ទុទាំងអស់។

ត្រឹមសប្ដាហ៍ទី ១៩ គីរីវង់សុខសែនជ័យ ប្រកួត ១៩ ដង ឈ្នះតែម្ដងគត់ ស្មើ ២ និងចាញ់ ១៦ រកបានតែ ៥ ពិន្ទុ ត្រូវក្រុមលេខ ៧ កងយោធពលខេមរភូមិន្ទ ដាច់ពិន្ទុដល់ទៅ ១៥ ពិន្ទុ ខណៈនៅសល់ការប្រកួតចំនួន ២ លើកទៀតប៉ុណ្ណោះនឹងបញ្ចប់ ហើយក្លិបកំពុងប្រឈមនឹងការកាត់ទៅលេងលីគទី ២ (ករណីក្លិបនៅលីគទី ២ គ្រប់លក្ខខណ្ឌឡើងមកលីគកំពូល)។

បើទោះបីជាអស់ឱកាសប្រជែងតំណែងណាមួយក៏ដោយ លោក Manuel Retamero Fraile ដែលជាគ្រូបង្គោលរបស់ក្លិប ថានៅតែធ្វើតាមផែនការរបស់ក្លិប ខណៈក្លិបក៏នៅត្រូវការពេលវេលាផងដែរ។

លោក Manuel Fraile បានឲ្យ ‘កម្ពុជាថ្មី’ដឹងថា ៖ «ដូចអ្វីដែលយើងព្យាយាមជានិច្ច ដើម្បីរកបានពិន្ទុតាមរយៈការប្រកួតដែលសេសសល់នេះ យើងត្រូវមានស្មារតីរឹងមាំល្អសម្រាប់ខ្លួនយើង និងក្លិប និងអ្នកគាំទ្រដែលតែងតែគាំទ្រយើង»។

«ចាញ់ ឬស្មើ យើងត្រូវតែធ្វើតាមវិធីរបស់យើងដើម្បីទទួលបានភាពជោគជ័យ ប៉ុន្តែពេលខ្លះយើងត្រូវការពេលវេលាបន្ថែមទៀត ដើម្បីឲ្យបានកម្រិតរបស់ក្លិប ឬក្រុមផ្សេងទៀត ការអត់ធ្មត់ ហើយបន្តរីកចម្រើនជាក្រុមតែមួយ»។ គ្រូបង្វឹកសញ្ជាតិអេស្ប៉ាញរូបនេះ បានសង្កត់ធ្ងន់។

គួររំលឹកថា គីរីវង់សុខសែនជ័យ នៅសល់ ២ ប្រកួតទៀត ដែលអាចនិយាយបានថា សុទ្ធតែជាការប្រកួតបង្គ្រប់កិច្ច ពោលគឺថ្ងៃទី ១៥ តុលាខាងមុខ ត្រូវជួប បឹងកេត នៅកីឡដ្ឋានខេមបូឌាអ៊ែវ៉េ និងប្រកួតចុងក្រោយជួបសមាគមកីឡាបាល់ទាត់កងយោធពលខេមរភូមិន្ទ លើទឹកដីរបស់ខ្លួន នាថ្ងៃទី ២២ ខែតុលា ឆ្នាំ ២០២២៕

អត្ថបទ ៖ មន្នីរ័ត្ន

The post គ្រូគីរីវង់សុខសែនជ័យ និយាយពីការប្រកួតសេសសល់ ទោះអស់ឱកាសប្រជែងនៅលីគកំពូល appeared first on Kampuchea Thmey Daily.

គ្រូគិរីវង់សុខសែនជ័យ និយាយពីការត្រៀមជួបម្ចាស់ទឹកដីថ្មី ណាហ្គាវើលដ៍ ល្ងាចនេះ

Sovath Sok — Sat, 01 Oct 2022 04:13:10 +0000

ក្លិបបាល់ទាត់គីរីវង់សុខសែនជ័យ នឹងត្រូវឡើងពីខេត្តតាកែវ ទៅជួបក្លិបណាហ្គាវើលដ៍ លើទឹកដីថ្មីក្នុងខេត្តកំពងស្ពឺ សម្រាប់ជំនួបសប្ដាហ៍ទី១៨ នៃក្របខ័ណ្ឌខេមបូឌានព្រីមៀរលីគ ខណៈគ្រូបង្វឹក លោក Manuel Retamero Fraile បានបញ្ជាក់ពីការត្រៀមខ្លួនរួចរាល់ ក៏ដូចជាចំណាប់អារម្មណ៍ដទៃទៀតពាក់ព័ន្ធនឹងលីគ។

ការប្រកួតរវាងក្រុមទាំងពីរនឹងធ្វើឡើងនៅកីឡដ្ឋានខេត្តកំពង់ស្ពឺ នៅវេលាម៉ោង ៦:៣០នាទីល្ងាច ដោយមានការផ្សាយផ្ទាល់តាមរយៈហ្វេសប៊ុកផេក ‘កម្ពុជាថ្មី – Kampuchea Thmey Daily’ ផ្ទាល់តែម្ដង។ អ្វីដែលគួរឱ្យចាប់អារម្មណ៍នេះ កីឡដ្ឋាននេះទើបតែសម្ភោធ និងដាក់ឱ្យដំណើរការប្រើប្រាស់ជាផ្លូវការ កាលពីខែមុនផងដែរ។

មុនការប្រកួតមកដល់ លោក Manuel Retamero Fraile គ្រូបង្វឹកនៃក្លិបគីរីវង់សុខសែនជ័យ បានឱ្យ ‘កម្ពុជាថ្មី’ ដឹងថា៖ «ការរៀបចំក្រុម គឺដូចជាខ្ញុំធ្វើរាល់ដង ពិនិត្យមើលស្ថានភាពក្រុមរបស់ខ្ញុំជាមុនសិន កីឡាកររបស់ខ្ញុំ ហើយត្រូវធ្វើយ៉ាងណាជាមួយក្រុមគូប្រកួត…។ យើងតែងតែព្យាយាមឲ្យអស់ពីសមត្ថភាពដើម្បីឈ្នះការប្រកួត។»

ជុំវិញការប្រកួតនៅលើកីឡដ្ឋានថ្មី គ្រូបង្វឹកសញ្ជាតិអេស៉្បាញរូបនេះបានបន្តទៀតថា៖ «យើងរំភើបណាស់ដែលបានចូលរួមជាមួយរឿងនេះ ដើម្បីមើលពីរបៀបដែលក្លិប និងរចនាសម្ព័ន្ធនៅក្នុងក្លិបនីមួយៗកំពុងផ្លាស់ប្តូរ និងកែលម្អ។ និយាយទៅកាន់ណាហ្គា យើងសូមសម្ដែងការអបអរសាទរ សង្ឃឹមថានឹងឃើញរឿងនេះនៅក្នុងក្លិបជាច្រើនទៀត ហើយខ្ញុំសង្ឃឹមថាយើងអាចធ្វើការសម្របខ្លួនបានល្អសម្រាប់ថ្ងៃនេះ។»

គួររំលឹកថា គីរីវង់សុខសែនជ័យ បច្ចុប្បន្នស្ថិតនៅចំណាត់ថ្នាក់លេខ៨ នៃតារាងចំណាត់ថ្នាក់ខេមបូឌានព្រីមៀរលីគ រដូវកាល២០២២ ក្រោយប្រកួត ១៧ដង ឈ្នះ១ ស្មើ២ និងចាញ់១៤ មាន ៥ពិន្ទុ ដោយឡែកណាហ្គាវើលដ៍ ឈរនៅលេខ៥ ក្រោយប្រកួត ១៧ដងដូចគ្នា ឈ្នះ៥ ស្មើ៥ និងចាញ់៧ មាន ២០ពិន្ទុ។

និយាយពីប្រវត្តិជួបគ្នា ២លើកចុងក្រោយនៅរដូវកាលនេះ គីរីវង់សុខសែនជ័យ បានរងបរាជ័យទាំងពីរលើក ពោលគឺក្នុងលទ្ធផល ២-១ ដូចគ្នាទាំងពីរជើង៕

អត្ថបទ៖ មន្នីរ័ត្ន

The post គ្រូគិរីវង់សុខសែនជ័យ និយាយពីការត្រៀមជួបម្ចាស់ទឹកដីថ្មី ណាហ្គាវើលដ៍ ល្ងាចនេះ appeared first on Kampuchea Thmey Daily.

ក្លឹបបាល់ទាត់គិរីវង់សុខសែនជ័យ Archives - Kampuchea Thmey Daily

AFC Challenge League ជា​ព្រឹត្តិការណ៍ប្រវត្តិសាស្រ្ដ កក្រើកដូចស៊ីហ្គេម ២០២៣ ទទួលបានការឧបត្ថម្ភ​ពីក្រុមហ៊ុនវឌ្ឍនៈ

ការប្រកួតពានសម្តេចតេជោជើងទី២ ភ្នំពេញក្រោននិងគិរីវង់ប្តូរទៅថ្ងៃទី២៨កុម្ភៈ

ឃាន់ សុប៉ិន​ រំពឹងលេងបានច្រើន ក្រោមការដឹកនាំលោកគ្រូ សាប៊ូន វិនតា

គ្រូគីរីវង់សុខសែនជ័យ និយាយពីការប្រកួតសេសសល់ ទោះអស់ឱកាសប្រជែងនៅលីគកំពូល​

គ្រូគិរីវង់សុខសែនជ័យ និយាយពីការត្រៀមជួបម្ចាស់ទឹកដីថ្មី ណាហ្គាវើលដ៍ ល្ងាចនេះ

AFC Challenge League ជាព្រឹត្តិការណ៍ប្រវត្តិសាស្រ្ដ កក្រើកដូចស៊ីហ្គេម ២០២៣ ទទួលបានការឧបត្ថម្ភពីក្រុមហ៊ុនវឌ្ឍនៈ

ឃាន់ សុប៉ិន រំពឹងលេងបានច្រើន ក្រោមការដឹកនាំលោកគ្រូ សាប៊ូន វិនតា

គ្រូគីរីវង់សុខសែនជ័យ និយាយពីការប្រកួតសេសសល់ ទោះអស់ឱកាសប្រជែងនៅលីគកំពូល