ខណ្ឌព្រែកព្នៅ Archives - Kampuchea Thmey Daily

នគរបាលរាជធានី បង្ហាញមុខជនសង្ស័យ ២៧ នាក់ ពាក់ព័ន្ធបទល្មើស ០៨ ករណី

អ៊ិន ពិសី — Sat, 04 Apr 2026 04:34:17 +0000

នាព្រឹកថ្ងៃទី ០៤ ខែមេសា ឆ្នាំ ២០២៦ នេះ នគរបាលរាជធានីភ្នំពេញ បាននាំខ្លួនជនសង្ស័យចំនួន ២៧ នាក់ ពាក់ព័ន្ធបទល្មើស ០៨ ករណី មកបើកបង្ហាញមុខជាសាធារណៈ នៅស្នងការដ្ឋាននគរបាលរាជធានីភ្នំពេញ បន្ទាប់ពីបញ្ចប់ការសួរនាំ។

ការបង្ហាញមុខជនសង្ស័យជាសាធារណៈនេះ បន្ទាប់ពីការិយាល័យព្រហ្មទណ្ឌកម្រិតស្រាល សហការជាមួយ នគរបាលខណ្ឌចំនួន ០៥ បានបើកការស្រាវជ្រាវរយៈពេល ០៣ ថ្ងៃ បង្រ្កាបជនសង្ស័យ ២៧ នាក់ ពាក់ព័ន្ធបទល្មើស ០៨ ករណី។

នគរបាលព្រហ្មទណ្ឌ បានឲ្យដឹងថា ដោយអនុវត្តតាមបទបញ្ជា លោកឧត្តមសេនីយ៍ឯក ជួន ណារិន្ទ អគ្គស្នងការរង និងជាស្នងការនគរបាលរាជធានីភ្នំពេញ បានបញ្ជាឲ្យអធិការខណ្ឌទាំង ១៤ ត្រូវបង្ការ និង ទប់ស្កាត់ រាល់បទល្មើសដែលកើតឡើងក្នុងមូលដ្ឋាន ដើម្បីរក្សាសុខសុវត្ថិភាពជូនប្រជាពលរដ្ឋ។

នគរបាល បានបន្តថា ចំពោះការយកជនសង្ស័យមកបង្ហាញមុខនេះមានការចូលរួមពីនគរបាលព្រហ្មទណ្ឌកម្រិតស្រាល សហការជាមួយ ខណ្ឌព្រែកព្នៅ , ខណ្ឌ ០៧ មករា , ខណ្ឌពោធិ៍សែនជ័យ , ខណ្ឌចំការមន , ខណ្ឌបឹងកេងកង ដោយរួមមានបទល្មើសឃាតកម្ម ០១ ករណី , ហិង្សា ០៣ ករណី , លួច ០៤ ករណី និង ដកហូតវត្ថុតាង ដុំថ្ម និង កាំបិតកែច្នៃ។

បច្ចុប្បន្ន ជនសង្ស័យទាំង ២៧ នាក់ ត្រូវបានសមត្ថកិច្ចតាមបណ្តាខណ្ឌ នាំយកទៅកាន់សាលាដំបូងរាជធានីភ្នំពេញ ដើម្បីចាត់ការតាមផ្លូវច្បាប់៕
អត្ថបទ ៖ រដ្ឋា

The post នគរបាលរាជធានី បង្ហាញមុខជនសង្ស័យ ២៧ នាក់ ពាក់ព័ន្ធបទល្មើស ០៨ ករណី appeared first on Kampuchea Thmey Daily.

ព្រះសង្ឃ៣អង្គ និងអ្នករៀបចំពិធីការវត្តម្នាក់ស្លៀកពាក់ស៊ីវិលជិះឡានចេញពីក្លិបវិញ ជ្រុលបុកផ្ទះលក់កាហ្វេស្លាប់២នាក់ និងរបួសធ្ងន់ស្រាល២អង្គ

Ung Meng — Wed, 21 Jan 2026 03:32:30 +0000

អ្នករៀបចំពិធីការវត្តភ្នៀតសិម្ពលីម្នាក់និងព្រះសង្ឃស្លៀក ពាក់ស៊ីវិល៣អង្គ បាននាំគ្នាចូលក្លិប ហើយបានបើករថយន្ត មួយគ្រឿងត្រឡប់ទៅវិញ ក៏បានជួបគ្រោះថ្នាក់ចរាចរណ៍បុកចូលហាងកាហ្វេមួយកន្លែង និងបុកខឿនដាំដើមឈើ បណ្ដាលឲ្យស្លាប់ចំនួន២អង្គ/នាក់ និងរងរបួសធ្ងន់ស្រាល២អង្គ។

ហេតុការណ៍គ្រោះថ្នាក់ចរាចរណ៍ខាងលើនេះបានកើត ឡើងនៅវេលាម៉ោង៤ ទៀបភ្លឺ ថ្ងៃទី២១ខែមករា ឆ្នាំ២០២៦ នៅតាមបណ្ដោយផ្លូវឧកញ៉ាឌីប៉ុក ក្នុងភូមិស្វាយចេក សង្កាត់គោករការ ខណ្ឌព្រែកព្នៅ រាជធានីភ្នំពេញ។

ជនរងគ្រោះដែលស្លាប់រួមមាន ១-ឈ្មោះសៀក តុន អាយុប្រហែល៣០ឆ្នាំ ជាអ្នករៀបចំពិធីការវត្តភ្នៀតសិម្ពលី ទី២ ឈ្មោះវ័ន ជាព្រៈសង្ឃ ។ ចំណែកព្រះសង្ឃ២អង្គទៀតដែលរងរបួសធ្ងន់និងស្រាលពុំទាន់ ស្គាល់អត្តសញ្ញាណនៅឡើយទេ។

តាមសាក្សីបានឲ្យដឹងថា នៅមុនពេលកើតហេតុ គេឃើញរថយន្តម៉ាក ឡិចស៊ីស ពណ៌ស្ករ ពាក់ស្លាកលេខ ភ្នំពេញ 2BG3223 មួយគ្រឿងធ្វើដំណើរតាមវិថីឧកញ៉ាឌីប៉ុក ក្នុងទិសដៅពីកើតទៅលិចដោយល្បឿនលឿន ។ នៅពេលធ្វើដំណើរមកដល់ចំណុចកើតហេតុដែលជាចំណុចផ្លូវបំបែកជា៣ រថយន្តពុំបានបត់ឆ្វេងឬបត់ស្ដាំឡើយគឺបើកត្រង់ទៅបុកចូលផ្ទះលក់កាហ្វេមួយកន្លែងខាងលើនិងបុកខឿនដាំផ្កា យ៉ាងពេញទំហឹង បណ្ដាលឲ្យរថយន្តរួញមុខ និងបង្កឲ្យអ្នកជិះដែលគេអះអាងថាអ្នកបើកបរជាអ្នករៀបចំពិធីការនៅវត្តភ្នៀត និងព្រះ សង្ឃ១អង្គ ដែលស្លៀកពាក់ស៊ីវិលបណ្ដាលឲ្យស្លាប់នៅនឹងកន្លែង។ ដោយឡែក២នាក់ទៀតដែលស្លៀកពាក់ស៊ីវិលដែលគេអះអាងជាព្រៈសង្ឃដូចគ្នាក៏បានរងរបួសធ្ងន់និងស្រាលត្រូវបានបញ្ជូនទៅសង្គ្រោះ។

តាម ព័ត៌មានឲ្យដឹងទៀតថា នៅក្នុងរថយន្តមានគ្នាចំនួន៤នាក់ដែលនៅក្នុងនោះមានម្នាក់ជាអ្នករៀបចំពិធីការនៅវត្តភ្នៀតសិម្ពលី និងបីនាក់ទៀតជាព្រះសង្ឃ ដែលបានដោះស្បង់ចីវរស្លៀកពាក់ស៊ីវិល ក្រោមការរៀបចំពីសំណាក់ពិធីការ ហើយបានបើករថយន្តម៉ាក់ឡិចស៊ីសមួយគ្រឿងខាងលើនាំគ្នា ចូលក្លឹបសប្បាយនៅពេលបើករថយន្តត្រឡប់ទៅវត្តវិញក៏បានជួបគ្រោះថ្នាក់ចរាចរណ៍បណ្ដាលឲ្យស្លាប់និងរបួសតែម្ដង ។ នៅក្នុងរថយន្តសមត្ថកិច្ចរកឃើញស្បង់ជីវរចំនួន២។

បន្ទាប់ពីកើតហេតុ នគរបាលមូលដ្ឋានបានចុះទៅកន្លែងកើតហេតុដើម្បីវាស់វែងរួចស្ទូចយករថយន្តបញ្ជូនទៅកាន់ការិយាល័យចរាចណ៍ ផ្លូវគោកដើម្បីដោះស្រាយពេលក្រោយ។

នៅព្រឹកនោះដែរគេឃើញមានព្រះសង្ឃ និងគណៈកម្មការវត្តក៏បាននាំគ្នានិងនិមន្តទៅសូត្រមន្តរៀបចំដឹកសពអ្នករៀបចំពិធីការ និងព្រះសង្ឃបញ្ជូនទៅធ្វើបុណ្យនៅវត្តភ្នៀតសិម្ពលីដែលស្ថិតនៅសង្កាត់ស្នោ ខណ្ឌកំបូល រាជធានីភ្នំពេញ ៕ដោយ៖សុខា

The post ព្រះសង្ឃ៣អង្គ និងអ្នករៀបចំពិធីការវត្តម្នាក់ស្លៀកពាក់ស៊ីវិលជិះឡានចេញពីក្លិបវិញ ជ្រុលបុកផ្ទះលក់កាហ្វេស្លាប់២នាក់ និងរបួសធ្ងន់ស្រាល២អង្គ appeared first on Kampuchea Thmey Daily.

ឪកូនជិះម៉ូតូឌុបគ្នា តែអកុសល ត្រូវរថយន្តដឹកដីថយកិនស្លាប់ ២ នាក់ និង របួសធ្ងន់ម្នាក់ នៅខណ្ឌព្រែកព្នៅ

អ៊ិន ពិសី — Wed, 10 Dec 2025 00:00:00 +0000

ស្លាប់ ២ នាក់ និងរបួសធ្ងន់ម្នាក់ ភ្លាមៗ ក្រោយរថយន្តដឹកដីដាក់លេខថយក្រោយ មិនប្រយ័ត្ន ជ្រុលបុក រួចកិនពីលើ នៅខណ្ឌព្រែកព្នៅ។

ហេតុការណ៍នេះបានកើតឡើងកាលពីវេលាម៉ោង ៦ និង ៥០ យប់ ថ្ងៃទី ៨ ខែធ្នូ ឆ្នាំ ២០២៥ ថ្មីៗ នេះ ស្ថិតនៅតាមបណ្ដោយផ្លូវបេតុង សង្កាត់ពន្សាំង ខណ្ឌព្រែកព្នៅ រាជធានីភ្នំពេញ។

ប្រភពពីពលរដ្ឋ បានឲ្យដឹងថា គេបានឃើញ ឪពុកកូន ៣ នាក់ កំពុងដឹកគ្នា ជិះតាមផ្លូវបេតុង លុះពេលមកដល់ចំណុចកើតហេតុ ស្រាប់តែមានរថយន្តដឹកដី ១ គ្រឿង ពាក់ស្លាកលេខ KDL-1879 បានបើកដាក់លេខថយក្រោយ ជ្រុលទៅបុក និងកិនពីលើ បណ្តាលឲ្យស្លាប់ ២ នាក់ និង កូនម្នាក់ទៀត របួសធ្ងន់។ ចំណែកអ្នកបើករថយន្តដឹកដី បានរត់គេចខ្លួនបាត់ស្រមោល។

ក្រោយកើតហេតុ សមត្ថកិច្ចជំនាញចរាចរណ៍ផ្លូវគោក នៃអធិការដ្ឋាននគរបាលខណ្ឌព្រែកព្នៅ បានវាស់វែងយករថយន្ត និងម៉ូតូ ទៅរក្សាទុក រង់ចាំការដោះស្រាយនៅពេលក្រោយ។ ចំណែកឯសពជនរងគ្រោះ សមត្ថកិច្ចសម្រេចធ្វើលិខិតប្រគល់ជូនសាច់ញាតិយកទៅធ្វើបុណ្យតាមប្រពៃណី៕

អត្ថបទ ៖ រដ្ឋា

The post ឪកូនជិះម៉ូតូឌុបគ្នា តែអកុសល ត្រូវរថយន្តដឹកដីថយកិនស្លាប់ ២ នាក់ និង របួសធ្ងន់ម្នាក់ នៅខណ្ឌព្រែកព្នៅ appeared first on Kampuchea Thmey Daily.

ពលរដ្ឋស្នើអាជ្ញាធរ ពិនិត្យមើលទីតាំងផ្លូវជាប់គល់ស្ពានព្រែកព្នៅកំពុងរងការខូចខាត

អ៊ិន ពិសី — Sat, 06 Sep 2025 01:43:38 +0000

ប្រជាពលរដ្ឋ ស្នើអាជ្ញាធរពាក់ព័ន្ធ ជួយពិនិត្យមើលផ្លូវ ១ កន្លែង ជាប់គល់ស្ពានព្រែកព្នៅ កំពុងរងការខូចខាតជាបណ្ដើរៗ ដោយនៅផ្នែកមួយចំនួនមានការស្រុត ផ្នែកខ្លះទៀតបែកប្រេះ ធ្វើឲ្យពិបាកក្នុងការធ្វើដំណើរ តែងតែបង្កគ្រោះថ្នាក់ដល់អ្នកដំណើរ គេចពីជង្ហុកខូចខាត បែរជាទៅប៉ះរថយន្តផ្សេងទៀតទៅវិញ។

ជាក់ស្ដែងទីតាំងកំពុងរងការខូចខាតនេះស្ថិតនៅត្រង់ចំណុចជាប់គល់ស្ពានព្រែកព្នៅ បត់ពីផ្លូវជាតិលេខ ៥ ឆ្ពោះមកផ្លូវទំនប់កប់ស្រូវ ក្នុងសង្កាត់ព្រែកព្នៅ ខណ្ឌព្រែកព្នៅ រាជធានីភ្នំពេញ។

លោក ឆា ដា ប្រជាពលរដ្ឋរស់នៅតំបន់នោះ បានឲ្យដឹងថា កាលពីដើមឡើយ នៅចំណុចនេះ មិនមានការខូចខាតដល់ថ្នាក់នេះនោះទេ តែដោយសារមានរថយន្តដឹកទំនិញធំៗ បើកឆ្លងកាត់រាល់ថ្ងៃ សង្ស័យដឹកលើសទម្ងន់ធ្វើឲ្យស្រុតបន្តិចម្ដងៗ។

លោកបានបន្តថា បើរថយន្តដឹកដី ដីខ្សាច់វិញ ពេលដឹកឆ្លងកាត់ម្ដងៗ តែងតែឃើញមានទឹកហូរពេញផ្លូវ នេះជាហេតុធ្វើឲ្យផ្លូវឆាប់ខូច ដោយសារពេលមានទឹកដក់យូរៗ ទៅ ផ្លូវស្រុត ប្រេះ ខូច។

ចំណែក អ្នកស្រី លីកា ជាប្រជាពលរដ្ឋរស់នៅតំបន់ខាងលើ បានស្នើសុំឲ្យអាជ្ញាធរមេត្តាជួយចុះពិនិត្យ និងធ្វើការជួសជុលផ្លូវខាងលើឲ្យបានឆាប់កាន់តែល្អ ពីព្រោះអាណិតអ្នកធ្វើដំណើរដោយម៉ូតូ ពេលមានភ្លៀងធ្លាក់មកលិចជង្ហុកបាត់មើលមិនឃើញ តែងតែដួលគ្រោះថ្នាក់ជាញឹកញាប់ ចំណែកខ្លះទៀត គេចកន្លែងស្រុតតែងតែទៅប៉ះជាមួយរថយន្តធ្វើដំណើរស្របគ្នា បើរថយន្តតូចៗ មិនអី នោះទេ តែបើរថយន្តធ្ងន់ធំអាចប៉ះពាល់ដល់អាយុជីវិត។

ពាក់ព័ន្ធបញ្ហានេះ លោក ធឹម សំអាន អភិបាល នៃគណៈអភិបាលខណ្ឌព្រែកព្នៅ បានប្រាប់ឲ្យកម្ពុជាថ្មីដឹងថា លោកអរគុណចំពោះការផ្តល់ព័ត៌មានមកកាន់អាជ្ញាធរ។ លោកសូមឲ្យប្រជាពលរដ្ឋមេត្តាយោគយល់ និង អធ្យាស្រ័យ ទៅដល់ការងារជួសជុលផងដែរ ដោយមួយរយៈនេះ កម្លាំងជំនាញកំពុងបន្តការជួសជុលជង្ហុកមួយចំនួននៅទីតាំងផ្សេងទៀត ក្នុងមូលដ្ឋានខណ្ឌ ហើយចំណុចទីតាំងខូចខាតនេះដែរ លោកនឹងចាត់កម្លាំងជំនាញចុះមកជួសជុលជាបន្ទាន់ ដើម្បីបញ្ចៀសគ្រោះថ្នាក់ណាមួយកើតឡើងជាយថាហេតុ។

លោកអភិបាលខណ្ឌព្រែកព្នៅ បញ្ជាក់ថា ជង្ហុកនានា ក្នុងមូលដ្ឋាន ភាគច្រើនខូចដោយសារតែរថយន្តធុនធំបើកបរឆ្លងកាត់។ លោកអំពាវនាវដល់ប្រជាពលរដ្ឋនៅពេលបានឃើញផ្លូវខូចកើតទៅជាជង្ហុក ក្នុងមូលដ្ឋានខណ្ឌព្រែកព្នៅ សូមប្រញាប់រាយការណ៍ជូនអាជ្ញាធរជំនាញ ដើម្បីចុះទៅជួសជុលជូន៕

អត្ថបទ ៖ ម៉េង

The post ពលរដ្ឋស្នើអាជ្ញាធរ ពិនិត្យមើលទីតាំងផ្លូវជាប់គល់ស្ពានព្រែកព្នៅកំពុងរងការខូចខាត appeared first on Kampuchea Thmey Daily.

បុរសពិការដៃម្នាក់ សង្ស័យជិះម៉ូតូលឿន ដល់ផ្លូវកោងរេចង្កូតបុកខឿនផ្លូវ អូសបោកក្បាលស្លាប់

អ៊ិន ពិសី — Wed, 03 Sep 2025 23:30:00 +0000

បុរសពិការដៃម្នាក់ សង្ស័យជិះម៉ូតូលឿន ខ្វះការប្រុងប្រយ័ត្ន ដល់ចំណុចផ្លូវកោង ក៏ជ្រុលចង្កូតទៅបុកខឿនផ្លូវ បណ្ដាលឲ្យបោកក្បាលដេកស្លាប់ក្នុងថ្លុកឈាម។

គ្រោះថ្នាក់ចរាចរណ៍នេះបានកើតឡើងកាលពីវេលាម៉ោង ២ និង ២៨ នាទីរសៀល ថ្ងៃទី ៣ ខែកញ្ញា ឆ្នាំ ២០២៥ ស្ថិតតាមបណ្ដោយផ្លូវសំរោងថ្មី ភូមិសំរោង សង្កាត់សំរោង ខណ្ឌព្រែកព្នៅ រាជធានីភ្នំពេញ។

ប្រភពព័ត៌មានបានឲ្យដឹងថា មុនពេលកើតហេតុ គេឃើញបុរសពិការដៃខាងស្តាំ (យកដៃខាងឆ្វេងសម្រាប់មួលហ្គែរ) ជិះម៉ូតូ ១ គ្រឿង ម៉ាកហុងដាឌ្រីមសង់ សេ ១២៥ ស៊េរី ២០១០ ពណ៌ខ្មៅ ពាក់ស្លាកលេខ ភ្នំពេញ 1AX-0671 ធ្វើដំណើរតាមបណ្ដោយផ្លូវសំរោងក្រាមថ្មី ទិសដៅពីត្បូងទៅជើង ក្នុងល្បឿនលឿន ខណៈដល់ចំណុចកើតហេតុ សភាពផ្លូវកោងខ្លាំងពេក ក៏រេចង្កូតទៅខាងស្ដាំដៃបុកខឿនផ្លូវ បណ្ដាលឲ្យអូសជាច្រើនម៉ែត្រ ដួលបោកក្បាលស្លាប់ខ្លួនឯងភ្លាមៗ តែម្ដង។

ក្រោយពេលកើតហេតុ សមត្ថកិច្ចមូលដ្ឋាន បានទាក់ទងសមត្ថកិច្ចជំនាញចរាចរណ៍ ធ្វើការវាស់វែង យកម៉ូតូជនរងគ្រោះទៅរក្សាទុក។ ចំណែក សពជនរងគ្រោះ ត្រូវបានប្រគល់ជូនសាច់ញាតិដឹកទៅធ្វើបុណ្យនៅឯខេត្តកំពង់ឆ្នាំង៕

អត្ថបទ ៖ រដ្ឋា

The post បុរសពិការដៃម្នាក់ សង្ស័យជិះម៉ូតូលឿន ដល់ផ្លូវកោងរេចង្កូតបុកខឿនផ្លូវ អូសបោកក្បាលស្លាប់ appeared first on Kampuchea Thmey Daily.

រថយន្ត ២ គ្រឿង បុកគ្នា ប្លោងអ្នកបើកបរម្នាក់ចេញ ធ្លាក់កៀបជាប់រថយន្តស្លាប់ភ្លាមៗ

អ៊ិន ពិសី — Wed, 03 Sep 2025 07:17:26 +0000

រថយន្តដឹកឥដ្ឋ បុកជាមួយ រថយន្តពោងដឹកស៊ីម៉ងត៍ បណ្ដាលឲ្យអ្នកបើកបរម្នាក់ ប្លោងចេញធ្លាក់កៀបជាប់ជាមួយរថយន្ត ស្លាប់ភ្លាមៗ នៅកន្លែងកើតហេតុ។

ហេតុការណ៍នេះបង្កការភ្ញាក់ផ្អើលកាលពីវេលាម៉ោង ១០ និង ១០ នាទីព្រឹក ថ្ងៃទី ៣ ខែសីហា ឆ្នាំ ២០២៥ នៅចំណុចស្ថានីយប្រេងឥន្ធនៈ តេលា តាមបណ្ដោយផ្លូវជាតិលេខ ៥ សង្កាត់ព្រែកព្នៅ ខណ្ឌព្រែកព្នៅ រាជធានីភ្នំពេញ។

ប្រភពព័ត៌មានពីប្រជាពលរដ្ឋបានឲ្យដឹងថា មុនកើតហេតុ គេបានឃើញជនរងគ្រោះជាអ្នកបើករថយន្តពោងដឹកស៊ីម៉ងត៍ ពាក់ស្លាកលេខ ភ្នំពេញ 3F-7305 បើកតាមបណ្ដោយផ្លូវជាតិលេខ ៥ ទិសដៅពីត្បូងទៅជើង ខណៈមកដល់ចំណុចកើតហេតុ បានបត់ឆ្វេងឆ្លងផ្លូវចូលទៅក្នុងការដ្ឋាន ស្របពេលនោះ ក៏ស្រាប់តែមានរថយន្តដឹកឥដ្ឋ ១ គ្រឿង ពាក់ស្លាកលេខ បាត់ដំបង 3A-0863 បើកក្នុងល្បឿនលឿន ទិសដៅបញ្ច្រាសគ្នាជាមួយរថយន្តដឹកស៊ីម៉ងត៍ ពីជើងទៅត្បូង បណ្ដាលឲ្យបុកចំផ្នែកកាប៊ីន រថយន្តដឹកស៊ីម៉ងត៍ ពេញទំហឹង បង្កឲ្យបុរសជាអ្នកបើករថយន្តស៊ីម៉ងត៍ ប្លោងចេញធ្លាក់កៀបជាប់ជាមួយរថយន្ត ស្លាប់ភ្លាមៗ នៅកន្លែងកើតហេតុ។ ខណៈនោះ ប្រជាពលរដ្ឋ រួមនឹងសមត្ថកិច្ច បានឃាត់អ្នកបើករថយន្តដឹកឥដ្ឋយកទៅសួរនាំនៅប៉ុស្តិ៍ភ្លាមៗ។ រីឯសព ត្រូវបានពលរដ្ឋ និងសមត្ថកិច្ច ជួយអូសយកចេញពីក្រោមរថយន្តមកក្រៅ និងទំនាក់ទំនងរកសាច់ញាតិមកទទួល។

ក្រោយកើតហេតុ សមត្ថកិច្ចជំនាញចរាចរណ៍ បានធ្វើការវាស់វែងយករថយន្តទាំង ២ គ្រឿង ទៅរក្សាទុក រង់ចាំដោះស្រាយពេលក្រោយ។ ចំណែក សពជនរងគ្រោះ ត្រូវបានប្រគល់ជូនសាច់ញាតិយកទៅធ្វើបុណ្យតាមប្រពៃណី៕

អត្ថបទ ៖ រដ្ឋា

The post រថយន្ត ២ គ្រឿង បុកគ្នា ប្លោងអ្នកបើកបរម្នាក់ចេញ ធ្លាក់កៀបជាប់រថយន្តស្លាប់ភ្លាមៗ appeared first on Kampuchea Thmey Daily.

មនុស្ស ០៥ នាក់ រងរបួសធ្ងន់-ស្រាល ក្នុងហេតុការណ៍គ្រោះថ្នាក់ក្រឡាប់រថយន្ត នៅខណ្ឌព្រែកព្នៅ

អ៊ិន ពិសី — Fri, 13 Jun 2025 09:33:54 +0000

រថយន្តធុនធំ ០១ គ្រឿង បើកគេចម៉ូតូឆ្លងផ្លូវ ស្របពេលផ្លូវកោង ក៏ក្រឡាប់ខ្ទាតធុងស្តុកទឹកសម្រាប់ក្រឡុកស៊ីម៉ងត៍ សង្កត់លើម៉ូតូ ០៤ គ្រឿង បណ្ដាលឲ្យមនុស្សប្រុស-ស្រី ចំនួន ០៥ នាក់ របួសធ្ងន់ និងស្រាល។

ហេតុការណ៍នេះបានកើតឡើងកាលពីវេលាម៉ោង ០៣ និង ៣០ នាទីរសៀល ថ្ងៃទី ១៣ ខែមិថុនា ឆ្នាំ ២០២៥ ស្ថិតនៅតាមបណ្ដោយផ្លូវជាតិលេខ ០៥ សង្កាត់ព្រែកព្នៅ ខណ្ឌព្រែកព្នៅ រាជធានីភ្នំពេញ។

តាមប្រភពព័ត៌មានពីប្រជាពលរដ្ឋបានឲ្យដឹងថា មុនកើតហេតុ មានរថយន្តធុនធំ ដឹកទឹកសម្រាប់ក្រឡុកស៊ីម៉ងត៍ ០១ គ្រឿង ម៉ាក ហ៊ីយ៉ាន់ដាយ ពាក់ស្លាកលេខ ភ្នំពេញ 3F-6791 បើកបរទិសដៅពីត្បូងទៅជើង ក្នុងល្បឿនលឿន ខណៈមកដល់ចំណុចកើតហេតុ ផ្លូវកោង ស្រាប់តែមានម៉ូតូ ០១ គ្រឿង មិនចាំម៉ាក បើកឆ្លងផ្លូវ ធ្វើឲ្យអ្នកបើករថយន្តធំ ជាន់ហ្វ្រាំងបួងចង្កូតគេច ប៉ុន្តែដោយសាររថយន្តដឹកធ្ងន់ផង ក៏ក្រឡាប់ធ្លាក់ធុងស្តុកទឹកពេញខ្ទាតចេញពីរថយន្តចូលផ្ទះប្រជាពលរដ្ឋ សង្កត់លើមនុស្សប្រុស-ស្រី ចំនួន ០៥ នាក់ រងរបួសធ្ងន់-ស្រាល ត្រូវបានបញ្ជូនទៅមន្ទីរពេទ្យ ចំណែកម៉ូតូ ០៤ គ្រឿង រងការខូចខាតនៅនឹងកន្លែង។

បច្ចុប្បន្ន សមត្ថកិច្ចមូលដ្ឋាន បានចុះមកដល់ទីតាំងកើតហេតុ រួចធ្វើការវាស់វែងស្ទូចរថយន្តធុនធំ ដើម្បីយកទៅរក្សាទុកនៅការិយាល័យចរាចរណ៍ផ្លូវគោក នៃស្នងការដ្ឋាននគរបាលរាជធានីភ្នំពេញ រង់ចាំដោះស្រាយគ្នានៅពេលក្រោយ៕

អត្ថបទ ៖ រដ្ឋា

The post មនុស្ស ០៥ នាក់ រងរបួសធ្ងន់-ស្រាល ក្នុងហេតុការណ៍គ្រោះថ្នាក់ក្រឡាប់រថយន្ត នៅខណ្ឌព្រែកព្នៅ appeared first on Kampuchea Thmey Daily.

យុវជនម្នាក់ ស្លាប់បាត់បង់ជីវិត ដាច់ខ្លួនជា ២ កំណាត់ ខណៈសង្ស័យជិះម៉ូតូវ៉ាជែងរថយន្តសណ្ដោងរ៉ឺម៉ក ១ គ្រឿង

អ៊ិន ពិសី — Mon, 02 Jun 2025 02:00:00 +0000

យុវជនម្នាក់ ស្លាប់បាត់បង់ជីវិត ដាច់ខ្លួនជា ២ កំណាត់ នៅក្រោមកង់រថយន្តសណ្ដោងរ៉ឺម៉ក ១ គ្រឿង ខណៈសង្ស័យជនរងគ្រោះជិះម៉ូតូព្យាយាមវ៉ាជែង រួចដួលចូលកង់រថយន្ត។

ហេតុការណ៍នេះបានកើតឡើងកាលពីវេលាម៉ោង ៣ និង ៤៥ នាទីល្ងាច ថ្ងៃទី ១ ខែមិថុនា ឆ្នាំ ២០២៥ ស្ថិតនៅចំណុចមុខមន្ទីរពេទ្យជាតិ តេជោសន្តិភាព តាមបណ្ដោយមហាវិថីឈ្នះឈ្នះ សង្កាត់គោករកា ខណ្ឌព្រែកព្នៅ រាជធានីភ្នំពេញ។

សពជនរងគ្រោះឈ្មោះ កេន ឌី ភេទប្រុស អាយុ ១៨ ឆ្នាំ មុខរបរកម្មករសំណង់ ស្នាក់នៅការដ្ឋានសំណង់ដែលស្ថិតនៅសង្កាត់គោករកា ខណ្ឌព្រែកព្នៅ និងមានស្រុកកំណើតនៅភូមិរវាំងជំ ឃុំរោងដំរី ស្រុកបាភ្នំ ខេត្តព្រៃវែង។

តាមប្រភពពីកន្លែងកើតហេតុបាននិយាយថា គេឃើញជនរងគ្រោះម្នាក់ ជិះម៉ូតូ ១ គ្រឿង ម៉ាក Today ពាក់ស្លាកលេខ ភ្នំពេញ 1FN-6767 ធ្វើដំណើរក្នុងទិសដៅពីលិចទៅកើត ខណៈពេលមកដល់ចំណុចទីតាំងកើតហេតុខាងលើ ក៏វ៉ាជែងរថយន្តសណ្ដោងរ៉ឺម៉កដឹកទំនិញ ក្បាលពណ៌ស លាយខៀវ ពាក់ស្លាកលេខ ភ្នំពេញ 3C-0094 និងស្លាកកន្ទុយរ៉ឺម៉ក បាត់ដំបង 4A-0090 បើកក្នុងទិសដៅស្របគ្នា។

ប្រភពបានបន្តថា ខណៈជនរងគ្រោះវ៉ាផុតក្បាលរថយន្តបានបន្តិច ស្រាប់តែដួលស្របនឹងរថយន្តកំពុងលឿនកិនជនរងគ្រោះចំកង់ខាងឆ្វេង ដាច់ខ្លួនជា ២ កំណាត់ តែម្ដង។ ភ្លាមៗ តៃកុង បានបើកទ្វារចុះរត់ តែត្រូវប្រជាពលរដ្ឋឃាត់ប្រគល់ឱ្យសមត្ថកិច្ចដែលប្រចាំការនៅគោលដៅគល់ស្ពានព្រែកព្នៅ។

ក្រោយកើតហេតុ កម្លាំងសមត្ថកិច្ចជំនាញខណ្ឌព្រែកព្នៅ ចុះមកដល់ទីតាំងខាងលើ និងរាយការណ៍ទៅកាន់សមត្ថកិច្ចជំនាញការិយាល័យនគរបាលចរាចរណ៍ផ្លូវគោក នៃស្នងការដ្ឋាននគរបាលរាជធានីភ្នំពេញ ដើម្បីចុះមកធ្វើការវាស់វែងយករថយន្តបង្ក តៃកុងបើកបរ និងម៉ូតូរងគ្រោះ ទៅរក្សាទុកនៅការិយាល័យជំនាញ រង់ចាំដោះស្រាយគ្នានៅពេលក្រោយផងដែរ៕

អត្ថបទ ៖ សំណាង

The post យុវជនម្នាក់ ស្លាប់បាត់បង់ជីវិត ដាច់ខ្លួនជា ២ កំណាត់ ខណៈសង្ស័យជិះម៉ូតូវ៉ាជែងរថយន្តសណ្ដោងរ៉ឺម៉ក ១ គ្រឿង appeared first on Kampuchea Thmey Daily.