កាលពី​រសៀល​ថ្ងៃទី​ ២៧ ខែកុម្ភៈ ឆ្នាំ​ ២០២៦ គណៈ​បញ្ជាការ​ឯកភាព​ខណ្ឌ​ ៧​ មករា ដឹកនាំ​ដោយ លោក ថេ​ង សុ​ថុល អភិបាល នៃ​គណៈ​អភិបាល​ខណ្ឌ​ ៧​ មករា និង​មានការ​ចូលរួម​ពី​លោក អភិបាល​រង លោក​ចៅសង្កាត់ និង ក្រុមការងារ​មូលដ្ឋាន​សង្កាត់​អូរឫស្សី​ទី​ ២ បាន​ចុះ​ត្រួតពិនិត្យ​ទីតាំង ការរៀបចំ​សណ្តាប់ធ្នាប់ ឲ្យមាន​របៀបរៀបរយ តាម​បណ្ដោយ​ផ្លូវ​ ១៦៦ ក្នុង​សង្កាត់​អូរឫស្សី ​២ ខណ្ឌ​ ៧ ​មករា ដែល​​អាជីវករ​បានដាក់​លក់​អីវ៉ាន់ បន្លែ ម្ហូបអាហារ សាច់ ត្រី លើ​ចិញ្ចើម​ផ្លូវ បណ្តាល​ឲ្យ​មាន​ការ​កកស្ទះ​ខ្លាំង​ក្នុង​ការ​ធ្វើ​ដំណើរ​របស់​​ប្រជាពលរដ្ឋ​ក្នុង​មូលដ្ឋាន​កន្លងមក​។

ក្រោយពី​បាន​ធ្វើការ​ផ្សព្វផ្សាយ និង​កំណត់​ទីតាំង​លក់ដូរ​ជូន​​ប្រជាពលរដ្ឋ​​ប្រកប​អាជីវកម្ម​លើ​កំណាត់​ផ្លូវ​លេខ ១៦៦ ឲ្យ​មាន​របៀបរៀបរយ​រួចមក ឃើញថា អាជីវករ បាន​ចូលរួម​សហការ​ជាមួយ​អាជ្ញាធរ និង​សម្តែង​ការ​សប្បាយរីករាយ និង​បាន​លើកឡើងថា អស់​រយៈពេល​រាប់​សិប​ឆ្នាំ​ហើយ ពីមុន​ផ្លូវ​នេះ​តូច​ចង្អៀត​រក​កន្លែង​ដើរ​ស្ទើរតែ​មិនបាន កុំថាឡើយ​ម៉ូតូ​ឡាន​ជិះ​ចូល​គឺ​ធ្វើដំណើរ​មិនបាន​ទាល់តែ​សោះ​ គឺ​ដោយសារ​​អាជីវករ​ខ្លះ​ដាក់​លក់​លើផ្លូវ​តែម្តង​ ដែល​បណ្តាល​ឲ្យ​​មាន​ការ​កកស្ទះ​ចេញចូល​មិន​បាន តែ​ឥឡូវនេះ អាជ្ញាធរ​ខណ្ឌ និង​សង្កាត់ បាន​ធ្វើការ​ពន្យល់​ណែនាំ និង​រៀបចំ​កំណត់​ទីតាំង​ឲ្យ​មាន​កា​រដាក់​លក់ដូរ​មាន​របៀបរៀបរយ​សណ្ដាប់ធ្នាប់​ល្អ​ធ្វើឲ្យមាន​ច្រក​ផ្លូវចេញចូល​បានល្អ​ប្រសើរ​ខ្លាំង និង​សំណូមពរ​ឲ្យ​ការ​ដាក់​លក់​នៅ​បន្ត​រក្សា​គម្លាត​បែបនេះ​ជា​រៀងរហូត​តែម្ដង។

ជា​ចុងក្រោយ អាជីវករ រួមទាំង​អ្នកដំណើរ​ចេញចូល បាន​សម្តែង​ការ​អបអរសាទរ និង​សប្បាយចិត្ត​យ៉ាង​ខ្លាំង​ចំពោះ​ការ​យកចិត្តទុកដាក់​របស់​អាជ្ញាធរ​ខណ្ឌ ​៧​ មករា ជាមួយ​​អាជីវករ​ទាំងអស់​គ្នា​ផង​ដែរ​៕​

​អត្ថបទ​ ៖ សុភា​

The post អាជីវករលក់ដូរលើកំណាត់ផ្លូវលេខ ១៦៦ សប្បាយរីករាយ ក្រោយអាជ្ញាធររៀបចំសណ្ដាប់ធ្នាប់មានសោភ័ណភាព appeared first on Kampuchea Thmey Daily.

ក្នុងសំណើដែលធ្វើឡើងនៅព្រឹកថ្ងៃទី៩កក្កដា ឆ្នាំ២០២៥ ក្នុងពិធីសំណេះសំណាលនេះ លោក-លោកស្រីប្រធានភូមិ បានលើកឡើងថា បច្ចុប្បន្ននៅតាមតំបន់ភូមិ សង្កាត់មួយចំនួន នៅតែមានបញ្ហាពាក់ពន្ធ័នឹងក្មេងអនាថា និងក្មេងជំទង់ដែលងាយរងផលប៉ះពាល់ពីបញ្ហាញៀនថ្នាំញៀន បង្កការភ័យខ្លាចដល់ការរស់នៅប្រចាំថ្ងៃរបស់ប្រជាពលរដ្ឋ។ ក្នុងន័យនេះ ពួកគាត់បានស្នើសុំឲ្យអភិបាលខណ្ឌ និងមន្ត្រីជំនាញពាក់ព័ន្ធ ជួយពង្រឹងការសហការជាមួយកម្លាំងនគរបាល កម្លាំងអាវុធហត្ថ ក៏ដូចជាកម្លាំងជំនាញផ្សេងៗដើម្បីបង្កើនសមត្ថភាពក្នុងការបង្ការ និងទប់ស្កាត់សកម្មភាពអំពើបទល្មើសទាំងនេះឲ្យជាប់ជាប្រចាំ។

លោក ថេង សុថុល អភិបាលខណ្ឌ៧មករា យល់ឃើញថា ការលើកឡើងរបស់ប្រធានភូមិ ពិតជាបញ្ហាសមហេតុផល ហើយលោកសន្យាថានឹងចាត់ការបន្ថែម ដើម្បីពង្រឹងការងារសន្តិសុខ រវាងអាជ្ញាធរ កម្លាំងមានសមត្ថកិច្ច និងប្រជាពលរដ្ឋឲ្យកាន់តែមានប្រសិទ្ធភាព។

លោកអភិបាល ក៏បញ្ជាក់បន្ថែមថា ការពង្រឹងសន្តិសុខ និងសុវត្ថិភាពជាភារកិច្ចរួម ដែលតម្រូវឲ្យមានការចូលរួមជាប្រព័ន្ធគ្រប់ភាគី ដើម្បីបន្តសហការជាមួយអាជ្ញាធរ កម្លាំងមានសមត្ថកិច្ចមដើម្បីធានាថា ប្រជាពលរដ្ឋរស់នៅមានសុវត្ថិភាព និង មិនមានភាពភ័យខ្លាច៕

អត្ថបទ៖ សំណាង

The post ប្រធានភូមិទូទាំងខណ្ឌ ៧មករា ស្នើឲ្យអភិបាលខណ្ឌពង្រឹងការងារសន្តិសុខ សុវត្ថិភាព និងទប់ស្កាត់បទល្មើសក្នុងមូលដ្ឋាន appeared first on Kampuchea Thmey Daily.

អ្នកស្រី ប៉ី ប៉ី ម្ចាស់តូបលក់កាហ្វេហ្វីន ម្ដុំផ្លូវ១៣៤ បានប្រាប់ឱ្យ កម្ពុជាថ្មី ដឹងថា អ្នកស្រី មិនបដិសេធនឹងការចុះរៀបចំសណ្ដាប់ធ្នាប់របស់អាជ្ញាធរ នោះឡើយ ប៉ុន្ដែ អ្នកស្រី ស្នើសុំអាជ្ញាធរទុកពេលសម្រាប់ការរុះរើចេញយ៉ាងតិច ១សប្ដាហ៍ និងសូមឱ្យអាជ្ញាធរអនុវត្តការងារប្រកបដោយតម្លាភាព ស្មើភាពគ្នាទាំងអស់សម្រាប់អ្នកលក់ដូរទាំងអស់ នៅត្រង់ចំណុចផ្លូវ១៣៤ ​​និងមុខមន្ទីរពេទ្យបង្អែករាជធានីភ្នំពេញនេះ ផ្ទាល់តែម្ដង។

អ្នកស្រី បន្ថែមថា អ្នកស្រី បានបើកតូបលក់កាហ្វេនៅទីនេះ ជាង១៥ឆ្នាំមកហើយ អ្នកស្រី ទទួលស្គាល់ផ្លូវម្ដុំមន្ទីរពេទ្យនេះ មានលក្ខណៈចង្អៀត និងមានការកកស្ទះ យ៉ាងពិតប្រាកដមែន តែប្រសិនបើគ្មានជម្រើសទើប អ្នកស្រី នៅតែបន្តលក់ដូរនៅទីនេះ ម្យ៉ាងក៏ដោយសារ អ្នកស្រី មានអតិថិជនដែលមកជួយទិញកាហ្វេក៏ច្រើនផងនោះ​ ទើបអ្ន​កស្រី មិនដាច់ចិត្តរុះរើចេញ ពីកន្លែងនេះ។

ចំណែក អ្នកលក់ចេកអាំង តាមរទះម្នាក់ សុំមិនបញ្ចេញឈ្មោះក៏បានប្រាប់ឱ្យ កម្ពុជាថ្មី ដឹងដូចគ្នាដែរថា លោកក៏មិនបដិសេធនឹងការចុះរៀបចំសណ្ដាប់ធ្នាប់របស់អាជ្ញាធរដែរ ប៉ុន្ដែសូមអាជ្ញាធរចុះអនុវត្តការងាររបស់ខ្លួន ឱ្យស្មើភាពគ្នា រវាងអ្នកលក់ដូរ នៅទីនេះផង។

អ្នកលក់ដូររូបនេះ អះអាងទៀតថា ប្រសិនបើអាជ្ញាធរឱ្យរុះរើចេញ ត្រូវតែរុះរើចេញទាំងអស់គ្នា មិនមែនចេញតែអ្នកលក់ដូរតាមរទះ តែអ្នកលក់ផ្សេងទៀតនៅតែបន្តលក់ដូរបានធម្មតានោះទេ។

យ៉ាងណា អ្នកលក់ដូរម្នាក់ទៀត សុំមិនបញ្ចេញឈ្មោះដូចគ្នា ក៏បានប្រាប់ឱ្យ កម្ពុជាថ្មី ដឹងថា ក្នុងនាមលោកជាអាជីវករលក់ដូរបន្ដិចបន្ដួច សូមស្នើសុំដល់អាជ្ញាធរ មេត្តាពិចារណាឱ្យបានច្បាស់លាស់ជាមុនសិន មុននឹង​ឱ្យរុះរើចេញ សូមទុកពេលឱ្យអ្នកលក់ទាំងអស់ បានត្រៀមលក្ខណៈ និងស្វែងរកកន្លែងលក់ថ្មី បានសិន។

លោក បន្ថែមថា ការលក់ដូរនៅមុខមន្ទីរពេទ្យបង្អែករាជធានីភ្នំពេញនេះ លោក និងគ្រួសារ បានលក់ដូរជាង ៣ជំនាន់ មកហើយ ប្រសិនបើ អាជ្ញាធរ ឱ្យរុះរើចេញទុករយៈពេលតែ ៣ថ្ងៃ តើឱ្យលោកទៅរកកន្លែងណាលក់បានភ្លាមៗនោះ?

គូរបញ្ជាក់ថា កាលពីថ្ងៃទី ២៩ ខែកុម្ភៈ កន្លងទៅនេះ​ កម្លាំងគណៈបញ្ជាការឯកភាពខណ្ឌ ៧មករា បានចុះរៀបចំសណ្ដាប់ធ្នាប់តាម​បណ្ដោយ​ផ្លូវ​លេខ​១៣៤ ចំណុច មុខមន្ទីរពេទ្យបង្អែករាជធានីភ្នំពេញ ដោយ​ធ្វើកិច្ច​សន្យា​ទុក្ខ​រយៈពេល​៣ថ្ងៃ​ឱ្យ​ក្រុម​អាជីវករ​លក់ដូរ ដែលរំលោភលើចិញ្ចើមផ្លូវរុះរើចេញដោយខ្លួនឯង បើពុំដូច្នេះ​ទេ ​អាជ្ញាធរ និង​ចុះចា​ត់​វិធាន​ការរដ្ឋបាល៕

អត្ថបទ ៖ សួស សិត

The post អ្នកលក់ដូរ តាមបណ្ដោយផ្លូវ ១៣៤ និងមុខមន្ទីរពេទ្យបង្អែករាជធានីភ្នំពេញ ស្នើអាជ្ញាធរពន្យាពេលរុះរើចេញ appeared first on Kampuchea Thmey Daily.

វេទិកានេះធ្វើឡើងក្រោមវត្តមាន លោក ម៉ប់ សារិន ប្រធានក្រុមប្រឹក្សារាជធានីភ្នំពេញ និងលោកស្រី កែវ សុខពិសី  អភិបាលរងរាជធានី តំណាង លោក ឃួង ស្រេង អភិបាលរាជធានីភ្នំពេញ។

វេទិកានេះប្រជាពលរដ្ឋបានលើកឡើងជាសំណួរ និងសំណើរដោយផ្ទាល់មាត់ចំនួន ៤នាក់ និងសំណើរជាលាយលក្ខណ៍អក្សរចំនួន ៧បញ្ហា។ ចំពោះ សំណួរ និងសំណើរផ្ទាល់មាត់រួមមាន៖ ប្រជាពលរដ្ឋរស់នៅភូមិ១២ សង្កាត់វាលរង់ ស្នើសុំជួយទប់ស្កាត់ក្មេងទំនើង ទប់ស្កាត់ចោរគាស់ផ្ទះនិងការស្នើសុំជួយពន្លឿនការផ្តល់កម្មសិទ្ធិផ្ទះឱ្យបានលឿន ខណៈ លោក ឃួង ស្រេង អភិបាលរាជធានីភ្នំពេញបានយកចិត្តទុកដាក់ខ្លាំងលើបញ្ហានេះ។ ចំណែកប្រជាពលរដ្ឋរស់នៅភូមិ៥ សង្កាត់អូឬស្សីទី៤ បានស្នើនិងសំណូមពរ អាជ្ញាធរ ជួយជួលជុលកាំជណ្តើរឡើងរួម ដោយជណ្តើរនោះ ពុកផុយងាយនឹងគ្រោះថ្នាក់ដល់ប្រជាពលរដ្ឋរាប់សិបគ្រួសារ។

ចំពោះការលើកសំណើរផ្ទាល់មាត់ទាំង៤នាក់ខាងលើនេះ ត្រូវបាន លោក ថេង សុថុល អភិបាលខណ្ឌមករា បញ្ជាក់ថា៖ ចំពោះការស្នើសុំជួលជុលកាំជណ្តើរឡើងរួម នៅភូមិ៥ សង្កាត់អូឬស្សីទី៤ លោកបានឱ្យមន្ត្រីជំនាញចុះសិក្សាហើយ នៅពេលដែលលោកបានផ្លាស់មកធ្វើជាអភិបាលខណ្ឌ៧មករា រយៈពេល ៤ខែនេះ។ លោកបន្តថា ចំពោះការស្នើសុំជួយពន្លឿនការផ្តល់កម្មសិទ្ធិផ្ទះឱ្យបានលឿននោះ លោកក៏បានបញ្ជាក់ថា ការងារនេះ លោក ឃួង ស្រេង អភិបាលរាជធានីភ្នំពេញ បានយកចិត្តទុកដាក់ណាស់ ដោយបានបញ្ជាឱ្យ លោក ឃ្លាំង ហួត អភិបាលរងរាជធានី ចុះមកអនុវត្ថការងារនេះជាបន្តបន្ទាប់ ប៉ុន្តែដោយសារការងារច្រើនពេក ពាក់ព័ន្ធកិច្ចប្រជុំអាស៊ានទើបការងារនេះត្រូវបានលើកពេលជាបន្តបន្ទាប់។ តែទោះជាយ៉ាងណាក្តី ការងារនេះអាជ្ញាធរនឹងពន្លឿនឱ្យបានលឿនទៅតាមការចង់បានរបស់ប្រជាពលរដ្ឋ។

ចំពោះការស្នើសុំជួយទប់ស្កាត់ក្មេងទំនើង ទប់ស្កាត់ចោរគាស់ផ្ទះ ក្នុងនាមគណៈបញ្ជាការឯកភាពខណ្ឌ បាន និងកំពុងប្រឹងប្រែង ដើម្បីភាពសុខសាន្តជូនប្រជាពលរដ្ឋ។ ដោយឡែក លោកបន្តថា ការជួសជុលកាំជណ្តើរឡើងរួមនេះ មិនមែនចេះតែធ្វើនោះទេ ពោលគឺ ទាមទារការសិក្សាពីលក្ខណៈបច្ចេកទេសជាមុនសិន ទើបអាចជួសជុលបាន ជៀសវាងគ្រោះថ្នាក់។

ប្រធានក្រុមប្រឹក្សារាជធានីភ្នំពេញ លោក ម៉ប់ សារិន បានមានប្រសាសន៍ថា វេទិការផ្សព្វផ្សាយ និងពិគ្រោះយោបល់របស់ក្រុមប្រឹក្សារាជធានីភ្នំបេញ ត្រូវបានធ្វើ ឡើងក្នុង ១ឆ្នាំម្តង ដើម្បីដោះស្រាយរាល់កង្វល់ សំណូមពរ និងសំណើររបស់ប្រជាពលរដ្ឋ។ ប៉ុន្តែក្នុងរយៈពេល ២ឆ្នាំជាប់គ្នានេះត្រូវបានខកខាន ដោយការរាតត្បាតជំងឺកូវីដ-១៩។ វេទិកាផ្សព្វផ្សាយ និងពិគ្រោះយោបល់របស់ក្រុមប្រឹក្សារាជធានីភ្នំពេញ ផ្តោតសំខាន់ពាក់ព័ន្ធកង្វល់ផ្ទាល់របស់ប្រជាពលរដ្ឋ ក្នុងនោះរួមមាន បញ្ហាសន្តិសុខ សណ្តាប់ធ្នាប់ បញ្ហាបរិស្ថាន និងបញ្ហាអភិវឌ្ឍន៍នៅមូលដ្ឋាន ដើម្បីឱ្យអាជ្ញាធរបានដឹងលឺ និងរកយន្តការដោះស្រាយ៕

អត្ថបទ៖ ស្រីរ័ត្ន

The post ប្រជាពលរដ្ឋខណ្ឌ៧មករា ស្នើអាជ្ញាធរ ពន្លឿនផ្តល់កម្មសិទ្ធិផ្ទះ ទប់ស្កាត់ក្មេងទំនើង ចោរគាស់ផ្ទះ appeared first on Kampuchea Thmey Daily.

រដ្ឋបាលខណ្ឌ៧មករា បានឱ្យដឹងថា នៅថ្ងៃទី០៣ ខែ វិច្ឆិកា ឆ្នាំ២០២២ វេលាម៉ោង ១៥ៈ៣០នាទី ក្រុមការងារចំនួន ០៤នាក់ បានចុះរៀបចំសណ្តាប់ធ្នាប់ចរាចរណ៍លើ កំណាត់ផ្លូវលេខ១៦៤ ក្នុងសង្កាត់វាលវង់ ខណ្ឌ៧មករា ដែលមានការចតយានជំនិះ រទេះអេតចាយ និងរទេះលក់ទំនិញ ផ្សេងៗលើទ្រូងថ្នល់នៃកំណាត់ផ្លូវនេះ។

ក្នុងកំឡុងពេលនៃការរៀបចំសណ្តាប់ធ្នាប់នេះ ក្រុមការងារបានផ្សព្វផ្សាយ ណែនាំតាមឧយ្យោសនសព្ទឱ្យម្ចាស់យានជំនិះ និងរទេះដែលចតលើកំណាត់ផ្លូវ១៦៤ ឱ្យយកយានជំនិះ និងរទេះរបស់ ខ្លួនចេញ ដើម្បីសម្រួលដល់ការធ្វើចរាចរណ៍បានល្អប្រសើរ រំពេចនោះក៏មានយុវជនម្នាក់ដែលជាម្ចាស់រទេះអេតចាយ បានធ្វើសកម្មភាពជេរប្រមាថមកលើក្រុមការងារដោយមិនព្រមយករទេះចេញពីលើទ្រូងថ្នល់ ហើយក្រុមការងារក៏បាន ព្យាយាមនាំយករទេះ និងយុវជនម្នាក់នោះមកអប់រំ។ ប៉ុន្តែយុវជនជាម្ចាស់រទេះអេតចាយនោះមិនព្រម ថែមទាំងបន្តជេរ ប្រមាថមកលើក្រុមការងារក៏បានកើតមានការប្រតាយប្រតប់គ្នាទៅវិញទៅមករហូតដល់មានការប្រើអំពើហិង្សារបន្តិច បន្ដួច។

ក្រោយកើតហេតុ រដ្ឋបាលខណ្ឌបានជួបជាមួយយុវជនជាម្ចាស់រទេះអេតចាយ ជាមួយគ្នានេះដែរយុវជនរូបនោះ បានសុំទោស និងទទួលស្គាល់កំហុស ហើយមិនមានការប្តឹងផ្តល់អ្វីឡើយ។ ចំពោះក្រុមការងារដែលបានប្រព្រឹត្តកំហុស ឈ្មោះ ឆាំ ឆាន រដ្ឋបាលខណ្ឌបានធ្វើការអប់រំ ដាក់ពិន័យដោយបញ្ឈរជើង ផ្អាកប្រាក់ខែរយៈពេល៦ខែ និងដាក់ពិន័យ ទៅតាមច្បាប់ ព្រមទាំងលិខិតបទដ្ឋានគតិយុត្តជាធរមាន៕

The post មន្ត្រីសណ្ដាប់ធ្នាប់ វាយបុរសរើសអេតចាយ រងពិន័យរដ្ឋបាល ពី អភិបាល ខណ្ឌ ៧មករា appeared first on Kampuchea Thmey Daily.