ខូចផ្លូវ Archives - Kampuchea Thmey Daily

ពលរដ្ឋស្នើអាជ្ញាធរជួសជុលកំណាត់ផ្លូវ ២៧១ កែង ៣៧១ ចំណុចស្តុបបឹងទំពុន ដែលរងការខូចខាតយូរឆ្នាំ

អ៊ិន ពិសី — Fri, 13 Mar 2026 08:41:13 +0000

ប្រជាពលរដ្ឋ បានស្នើដល់អាជ្ញាធរ ជួសជុលកំណាត់ផ្លូវ ២៧១ កែង ៣៧១ ដែលរងការខូចខាតជាយូរឆ្នាំមកហើយ។

ផ្លូវរងការខូចខាតនេះនៅត្រង់ចំណុចស្តុបបឹងទំពុន តាមបណ្ដោយផ្លូវ ២៧១ កែងផ្លូវ ៣៧១ សង្កាត់បឹងទំពុនទី ២ ខណ្ឌមានជ័យ រាជធានីភ្នំពេញ។

លោក ចំរ៉ុង ជាអ្នកដំណើរឆ្លងកាត់ បានលើកឡើងថា ផ្លូវនេះគាត់ធ្វើដំណើរជាប្រចាំ។ ដំបូង ផ្លូវមានជង្ហុកតូចៗ ជាច្រើនកន្លែង ប៉ុន្តែដោយមានរថយន្ត ម៉ូតូ ឆ្លងកាត់ផ្លូវយូរៗ ទៅ ក៏កើតទៅជាជង្ហុកធំតែម្ដង។

លោកបន្តថា មកដល់ខែមីនា នេះ អាកាសធាតុចាប់ផ្ដើមមានភ្លៀងកក់ខែហើយ ធ្វើឲ្យជង្ហុកដក់ទឹក កាន់តែពិបាកដល់អ្នកដំណើរមើលមិនឃើញ។ ជាពិសេសបើមានម៉ូតូឆ្លងកាត់យប់ឡើង មិនចាប់អារម្មណ៍ នឹងធ្លាក់ជង្ហុកជាក់ជាពុំខាន។

ដោយឡែក អ្នកស្រី ចាន់ សុលី ជាប្រជាពលរដ្ឋរស់នៅតំបន់ក្បែរនោះ លើកឡើងដែរថា បើសិនជាអាជ្ញាធរពាក់ព័ន្ធមិនជួសជុលឲ្យទាន់ពេលវេលានោះទេ ផ្លូវមួយនេះអាចនឹងខូចខ្លាំង ហើយក៏បង្កគ្រោះថ្នាក់ដល់អ្នកធ្វើដំណើរច្រើនផងដែរ។

អ្នកស្រី បានស្នើដល់អាជ្ញាធរពាក់ព័ន្ធទាំងអស់ សូមមេត្តាជួយចុះមកពិនិត្យ និងធ្វើការជួសជុលឲ្យបានស្អាតឡើងវិញផង ដើម្បីងាយស្រួលក្នុងការធ្វើដំណើរ និងបញ្ចៀសគ្រោះថ្នាក់កើតឡើង។

ពាក់ព័ន្ធបញ្ហានេះ លោក ផន រឹម អ្នកនាំពាក្យក្រសួងសាធារណការ និងដឹកជញ្ជូន បានប្រាប់ឲ្យកម្ពុជាថ្មីដឹងថា លោកបានប្រាប់ទៅមន្ទីរសាធារណការ និងដឹកជញ្ជូនរាជធានីភ្នំពេញ ឲ្យពិនិត្យមើលករណីនេះរួចហើយ៕

អត្ថបទ ៖ រដ្ឋា

វីដេអូ ៖ កំណាត់ផ្លូវ ២៧១ កែង ៣៧១ ចំណុចស្តុបបឹងទំពុន ដែលរងការខូចខាតយូរឆ្នាំ

The post ពលរដ្ឋស្នើអាជ្ញាធរជួសជុលកំណាត់ផ្លូវ ២៧១ កែង ៣៧១ ចំណុចស្តុបបឹងទំពុន ដែលរងការខូចខាតយូរឆ្នាំ appeared first on Kampuchea Thmey Daily.

ផ្លូវនៅក្នុងស្រុកព្រះនេត្រព្រះ ៣ខ្សែ ត្រូវបានរងផលប៉ះពាល់ដោយជំនន់ទឹកភ្លៀង

Kang Tola — Fri, 26 Sep 2025 15:44:07 +0000

បន្ទាយមានជ័យ ៖ ជំនន់ទឹកភ្លៀងបានបណ្តាលអោយផ្លូវជនបទក្នុងស្រុកព្រះនេត្រព្រះ ចំនួន៣ខ្សែរងផលប៉ះពាល់ដោយទឹកហូរច្រោះជើងទេរនិងហូរដាច់តួផ្លូវ។

លោកជា យុទ្ធារុណ ប្រធានមន្ទីរអភិវឌ្ឍន៍ជនបទខេត្តបន្ទាយមានជ័យបានចុះពិនិត្យជាក់ស្តែងកាលពីព្រឹកថ្ងៃទី២៦ ខែកញ្ញា ឆ្នាំ២០២៥ឃើញថា ផ្លូវជនបទក្នុងស្រុកព្រះនេត្រព្រះ ចំនួន៣ខ្សែ ប្រវែង២០ ១០០ម៉ែត្រ ត្រូវបានរងផលប៉ះពាល់ដោយជំនន់ទឹកភ្លៀងប្រវែង៥២០ម៉ែត្រ ច្រោះជើងទេរប្រវែង៤០០ម៉ែត្រ ហូរដាច់តួផ្លូវប្រវែង៣០ម៉ែត្រ ខូចលូ១កន្លែង ដូចខាងក្រោម

១-ខ្សែផ្លូវស្មាច់ លេខកូដ3T1ប្រវែង១០ ០០០ម៉ែត្រ នៅក្នុងឃុំទឹកជោរ ស្រុកព្រះនេត្រព្រះ ត្រូវបានលិចទឹកប្រវែង៣៥០ម៉ែត្រ និងច្រោះជើងទេរប្រវែង៣៥០ម៉ែត្រ និងដាច់តួផ្លូវប្រវែង៣០ម៉ែត្រ និងខូចខាតលូ១កន្លែង

២-ខ្សែផ្លូវឡោទេរ លេខកូដ27T2 ប្រវែង៨ ២០០ម៉ែត្រ ក្នុងឃុំភ្នំលៀប ស្រុកព្រះនេត្រព្រះ ត្រូវបានលិចទឹកប្រវែង៥០ម៉ែត្រ ច្រោះជើងទេរប្រវែង៥០ម៉ែត្រ

៣-ខ្សែផ្លូវទឹកជោរ លេខកូដ1392T4 ប្រវែង១ ៩០០ម៉ែត្រ ក្នុងឃុំទឹកជោរ ស្រុកព្រះនេត្រព្រះ ត្រូវបានលិចទឹកប្រវែង១២០ម៉ែត្រ។

សូមបញ្ជាក់ថា ដោយរយៈពេលប៉ុន្មានថ្ងៃចុងក្រោយនេះមានភ្លៀងធ្លាក់ជាបន្តបន្ទាប់ បណ្តាលឱ្យមានជំនន់ទឹកភ្លៀងជន់លិចតំបន់មួយចំនួន នៅស្រុកព្រះនេត្រព្រះ ជាពិសេសវាលស្រែពលរដ្ឋនៅសងខាងផ្លូវជាតិលេខ៦A៕

The post ផ្លូវនៅក្នុងស្រុកព្រះនេត្រព្រះ ៣ខ្សែ ត្រូវបានរងផលប៉ះពាល់ដោយជំនន់ទឹកភ្លៀង appeared first on Kampuchea Thmey Daily.

ផ្លូវសំបុកមាន់ក្នុងក្រុងបាត់ដំបង ត្រូវបានមន្ទីរជំនាញជួសជុលជាបណ្ដើរៗ

អ៊ិន ពិសី — Fri, 18 Jul 2025 02:00:30 +0000

ផ្លូវសំបុកមាន់ក្នុងក្រុងបាត់ដំបង ត្រូវបានមន្ទីរជំនាញជួសជុលជាបណ្ដើរៗ ហើយ ខណៈបច្ចុប្បន្នផ្លូវទាំងនេះបានរងការខូចខាតយ៉ាងធ្ងន់ធ្ងរដោយសារតែការរៀបចំប្រព័ន្ធលូរបស់ធនាគារអភិវឌ្ឍន៍អាស៊ី (ADB) មិនទាន់រួចរាល់ជាស្ថាពរ ដែលធ្វើឲ្យផ្លូវគ្រប់ច្រកល្ហកកំពុងប្រឈមការខ្ទេចខ្ទី។

ទោះបីជាផ្លូវកំពុងខូចខាតយ៉ាងធ្ងន់ធ្ងរក៏ដោយ ក៏គេសង្កេតឃើញថា ក្រុមការងារ នៃមន្ទីរសាធារណការបាននិងកំពុងដើរជួសជុល និងក្រាលកៅស៊ូនៅត្រង់ចំណុចណាដែលមានការខូចខាតបន្តិចបន្តួច ដើម្បីឲ្យពលរដ្ឋធ្វើដំណើរបានស្រួលជាបណ្ដោះអាសន្ន។

គួរបញ្ជាក់ដែរថា គម្រោងរបស់ធនាគារអភិវឌ្ឍន៍អាស៊ី គឺ ត្រូវក្រាលកៅស៊ូទាំងអស់ឡើងវិញ នៅពេលណាដែលការបង្កប់លូបញ្ចប់ ប៉ុន្តែក្នុងដំណាក់កាលកំពុងស្ថាបនា គឺ ខាងមន្ទីរជំនាញ ចុះធ្វើការជួសជុលតាមផ្លូវសំបុកមាន់ក្នុងក្រុងបាត់ដំបងជាបណ្ដោះអាសន្នសិន ដើម្បីងាយស្រួលក្នុងការធ្វើដំណើរ។

លោក ព្រួញ រិទ្ធថា ប្រធានមន្ទីរសាធារណការ បានបញ្ជាក់ថា មួយរយៈនេះ ដោយសារភ្លៀងធ្លាក់ជាប់ៗ គ្នារហូត ធ្វើឲ្យការងារជួសជុលត្រូវរាំងស្ទះ មិនអាចដំណើរការបាន ព្រោះនៅលើផ្លូវ និងជង្ហុក ពោរពេញដោយទឹកដក់។ ទើបតែប៉ុន្មានថ្ងៃនេះ មិនមានភ្លៀងធ្លាក់ ដូច្នេះក្រុមការងារក៏បានចាប់ផ្ដើមដំណើរការឡើងវិញ ដោយព្យាយាមជួសជុលទៅតាមទីតាំងមួយចំនួនក្នុងផ្លូវសំបុកមាន់ ដើម្បីឲ្យប្រជាពលរដ្ឋធ្វើដំណើរបានងាយស្រួល។ ដោយឡែកសម្រាប់គម្រោងស្ថាបនាផ្លូវ និងក្រាលកៅស៊ូទាំងអស់ឡើងវិញ ដរាបណាការងាររបស់ធនាគារអភិវឌ្ឍន៍អាស៊ីរួចរាល់ 100%៕

អត្ថបទ ៖ សោ និយមរ័ត្ន

The post ផ្លូវសំបុកមាន់ក្នុងក្រុងបាត់ដំបង ត្រូវបានមន្ទីរជំនាញជួសជុលជាបណ្ដើរៗ appeared first on Kampuchea Thmey Daily.

ផ្លូវជនបទរងការខូចខាតដោយជំនន់ទឹកភ្លៀង ត្រូវក្រសួងអភិវឌ្ឍន៍ជនបទ ត្រៀមជួសជុលឡើងវិញ

អ៊ិន ពិសី — Wed, 19 Oct 2022 09:51:45 +0000

លោក អ៊ិន ចន្ថា រដ្ឋលេខាធិការ និងជាប្រធានលេខាធិការដ្ឋានគ្រប់គ្រងគ្រោះមហន្តរាយក្រសួងអភិវឌ្ឍន៍ជនបទ ក្រុមការងារពិសេសទី ២ តំណាងលោកបណ្ឌិតសភាចារ្យ អ៊ុក រ៉ាប៊ុន រដ្ឋមន្ត្រីក្រសួងអភិវឌ្ឍន៍ជនបទ កាលពីរសៀលថ្ងៃទី ១៨ ខែតុលា បានដឹកនាំក្រុមការងារចុះពិនិត្យ និងវាយតម្លៃបឋមនៅផ្លូវជនបទដែលរងផលប៉ះពាល់ដោយជំនន់ទឹកភ្លៀង ក្នុងខេត្តប៉ៃលិន ឆ្នាំ ២០២២ នេះ ចំនួន ៤ ឃុំ ក្នុងស្រុកសាលាក្រៅ រួមមាន ឃុំសាលាក្រៅ ឃុំអូរអណ្តូង ឃុំស្ទឹងកាច់ និងឃុំស្ទឹងត្រង់។

បើតាមលោក ហ៊ត ឬទ្ធី ប្រធានមន្ទីរអភិវឌ្ឍន៍ជនបទខេត្តប៉ៃលិន បានឲ្យដឹងថា ដោយមានការចង្អុលបង្ហាញ និងណែនាំដ៏ខ្ពង់ខ្ពស់ពីលោកស្រី បាន ស្រីមុំ អភិបាលខេត្តប៉ៃលិន ដល់មន្ទីរជំនាញជុំវិញខេត្ត ក្រោយពីរដូវភ្លៀង ត្រូវចុះពិនិត្យមើលរាល់ហេដ្ឋារចនាសម្ព័ន្ធខូចខាត ដើម្បីសិក្សា រៀបចំស្តារឡើងវិញ ក្នុងគោលបំណងសម្រួលការធ្វើដំណើរ ដឹកកសិផលរបស់ប្រជាពលរដ្ឋបានទាន់ពេលវេលា។

លោកបន្តថា ជំនន់ទឹកភ្លៀងបណ្ដាលឲ្យផ្លូវជនបទនៅក្នុងខេត្តប៉ៃលិន ទទួលរងការខូចខាតធ្ងន់ធ្ងរចំនួន ៥ ខ្សែ ប្រវែង ២៤.៩ គ.ម នៅស្រុកសាលាក្រៅ។ ក្នុងនោះរួមមាន ៖ ១.ស្ពានថ្មទំនប់ និងចម្ការស្វាយថៃ អូរទឹកភ្ងាវ ស្ថិតនៅឃុំស្ទឹងត្រង់ និងឃុំអូរអណ្តូង ប្រវែង ៧.៧០ គ.ម។ ២.ក្បាលឡាន ស្ថិតនៅឃុំសាលាក្រៅ ប្រវែង ៤.៥០ គ.ម។ ៣.ទឹកចេញ និងព្រះឥន្ទលក់លត ស្ថិតនៅឃុំស្ទឹងកាច់ និងឃុំអូរអណ្តូង ប្រវែង ៤.៨០ គ.ម។ ៤.សៃឡូសៀលេក-ភ្នំស្តង់ ស្ថិតនៅឃុំសាលាក្រៅ ប្រវែង ៣.៥០ គ.ម។ ៥.ស្រែម្អម-បឹងអាជាង ស្ថិតនៅឃុំសាលាក្រៅ ប្រវែង ៤.៤០ គ.ម ផងដែរ។

ក្នុងឱកាសចុះពិនិត្យនេះដែរ លោក អ៊ិន ចន្ថា រដ្ឋលេខាធិការក្រសួងអភិវឌ្ឍន៍ជនបទ មានប្រសាសន៍ថា ដោយមានការយកចិត្តទុកដាក់ពីលោកបណ្ឌិតសភាចារ្យ អ៊ុក រ៉ាប៊ុន បានចាត់តាំងក្រុមការងារ ឲ្យចុះធ្វើការពិនិត្យលទ្ធភាព និងអន្តរាគមន៍ តភ្ជាប់ផ្លូវជនបទឡើងវិញ ដើម្បីឲ្យប្រជាពលរដ្ឋបានប្រើប្រាស់ បន្ទាប់ពីរងផលប៉ះពាល់ខូចខាតដោយសារជំនន់ទឹកភ្លៀង។

ជាមួយគ្នានោះ លោកក៏បានធ្វើការកោតសរសើរ និងវាយតម្លៃខ្ពស់ចំពោះលោក-លោកស្រីថ្នាក់ដឹកនាំ មន្ត្រីរាជការ នៃមន្ទីរអភិវឌ្ឍន៍ជនបទខេត្តប៉ៃលិន ដែលបានសហការសាមគ្គីភាពគ្នាក្នុងការអនុវត្តការងាររយៈពេលកន្លងមកបានល្អប្រសើរច្រើនស្របតាមគោលដៅគ្រោងទុក។

លោកបានបន្ថែមថា ក្នុងសកម្មភាពចុះថែទាំផ្លូវជនបទ អណ្ដូងស្នប់ និងបង្គន់អនាម័យ ទាំងរដូវប្រាំង និងរដូវវស្សា ក្នុងការជួសជុលតភ្ជាប់ និងស្តារឡើងវិញ ជូនប្រជាពលរដ្ឋបានប្រើប្រាស់។ ព្រោះផ្លូវជនបទមានសារៈសំខាន់ណាស់សម្រាប់បងប្អូនធ្វើដំណើរឆ្លងកាត់ សិស្សានុសិស្សទៅសាលារៀន ប្រជាពលរដ្ឋរកសេវានានា ពិសេសស្ត្រីមានផ្ទៃពោះទៅរកសេវាសុខាភិបាល និងប្រកបរបររកស៊ី ក៏ដូចជាដឹកជញ្ជូនភោគផលដំណាំកសិកម្មផ្សេងៗផងដែរ៕

អត្ថបទ ៖ សេង សុវណ្ណារិទ្ធ

The post ផ្លូវជនបទរងការខូចខាតដោយជំនន់ទឹកភ្លៀង ត្រូវក្រសួងអភិវឌ្ឍន៍ជនបទ ត្រៀមជួសជុលឡើងវិញ appeared first on Kampuchea Thmey Daily.

ពលរដ្ឋក្នុងភូមិលេខ ១ក សង្កាត់ស្វាយរលំ ស្នើឲ្យក្រុមឡានដឹក ខ្សាច់ ធ្វើផ្លូវឲ្យពួកគាត់ឡើងវិញ

sopheak khoun — Mon, 15 Nov 2021 08:49:19 +0000

ប្រជាពលរដ្ឋប្រមាណ ៤០នាក់ នៅក្នុងភូមិលេខ ១ក សង្កាត់ស្វាយរលំ ក្រុងតាខ្មៅ ខេត្តកណ្ដាល នៅល្ងាចថ្ងៃទី១៤ ខែវិច្ឆិកា ឆ្នាំ២០២១ បាននាំគ្នាចេញមុខស្នើសុំដល់ក្រុមឡានដឹកខ្សាច់ ដែលបើកបំផ្លាញផ្លូវលំក្នុងភូមិរបស់ពួកគាត់ ធ្វើឲ្យខូចខាតស្ទើរតែទាំងស្រុង។

លោក កែវ សុខគុណ តំណាងប្រជាពលរដ្ឋក្នុងភូមិលេខ ១ក មានប្រសាសន៍ប្រាប់ក្រុមអ្នកសារព័ត៌មានថា កន្លងមក ពួកគាត់បានចូលលុយគ្នា ដើម្បីចាក់ថ្មគ្រួសធ្វើផ្លូវជាង ១គីឡូម៉ែត្រនេះយ៉ាងស្អាត។ ប៉ុន្តែចាប់ពីចុងខែតុលាមក មានក្រុមឡានដឹកខ្សាច់ធំៗ ជាច្រើនគ្រឿង បានបើកបរលើផ្លូវនេះជារៀងរាល់ថ្ងៃ ហើយស្របពេលមានភ្លៀងធ្លាក់ផងនោះ ក៏បានធ្វើឲ្យផ្លូវនេះខូចខាតស្ទើរតែទំាងស្រុង។

លោក កែវ សុខគុណ បានឲ្យដឹងបន្តថា ក្រុមប្រជាពលរដ្ឋ បានស្នើដល់ក្រុមឡានដឹកខ្សាច់ទាំងនោះដែរ តែពួកគេគ្រាន់ចាក់ដី ចាក់ថ្ម ២ ទៅ៣ឡានប៉ុណ្ណោះ ហើយមិនបានធ្វើឲ្យផ្លូវនេះមានភាពល្អប្រសើរវិញឡើយ។ ក្នុងនាម តំណាងប្រជាពលរដ្ឋក្នុងភូមិលេខ ១ក លោកស្នើសុំឲ្យក្រុមឡានដឹកខ្សាច់ទាំងនោះ ផ្អាកការដឹកចេញ-ចូលក្នុងភូមិរបស់លោកបណ្ដោះអាសន្នសិន ដោយរង់ចាំមេឃឈប់ធ្លាក់ភ្លៀង ហើយត្រូវធ្វើផ្លូវជូនពួកគេឲ្យបានស្អាត ដូចមុនផងដែរ។

ក្រុមប្រជាពលរដ្ឋ ក្នុងភូមិលេខ ១ក បានរៀបរាប់អំពីទុក្ខលំបាក ដល់ក្រុមអ្នកសារព័ត៌មានថា ពួកគេពិបាកជាខ្លាំងក្នុងការធ្វើដំណើរទៅធ្វើការ រកស៊ី និងទៅសិក្សាជាដើម ដោយសារផ្លូវលំនេះ ត្រូវបានកម្ទិចអស់ស្ទើរទាំងស្រុង ដោយសារក្រុមឡានដឹកខ្សាច់ទាំងនោះ។ ពួកគាត់ស្នើសុំ ដោយទទូចឲ្យក្រុមឡានទាំងនោះ ផ្អាកការធ្វើដំណើរសិន ហើយធ្វើផ្លូវឲ្យបានស្អាតឡើងវិញផងដែរ។ ប្រសិនបើមិនព្រមផ្អាកទេ ពួកគាត់នឹងបិទផ្លូវលែងឲ្យធ្វើដំណើរ ឬក៏អាចដាក់ពាក្យប្ដឹង ទៅតុលាការថែមទៀត។

នៅល្ងាចថ្ងៃអាទិត្យម្សិលមិញ ក្រុមអ្នកសារព័ត៌មាន បានទៅដល់ទីតាំងក្រុមឡានដឹកខ្សាច់នោះ ដើម្បីស្នើសុំការឆ្លើយតប ជុំវិញការទាមទាររបស់ប្រជាពលរដ្ឋខាងលើនេះ តែពួកគេមិនបានចេញមកឆ្លើយតប ជាមួយអ្នកសារព័ត៌មានឡើយ។

ទោះជាបែបណាក៏ដោយលោក មឹង យូឡេង ប្រធានមន្ទីរសាធារណការ និងដឹកជញ្ជូនខេត្តកណ្ដាល បានប្រាប់អ្នកសារព័ត៌មានថា លោកនឹងពិនិត្យលើករណីនេះ ហើយស្នើសុំឲ្យប្រជាពលរដ្ឋ ដាក់លិខិតអន្តរាគមន៍ចូលមកមន្ទីរ ដើម្បីលោកនឹងកោះហៅ ខាងភាគីក្រុមឡានដឹកខ្សាច់ និងអ្នកពាក់ព័ន្ធមកសាកសួរ និងដើម្បីបញ្ជាឲ្យធ្វើផ្លូវជូនពលរដ្ឋឡើងវិញ៕

អត្ថបទ៖ ឃួន សុភ័ក្រ

The post ពលរដ្ឋក្នុងភូមិលេខ ១ក សង្កាត់ស្វាយរលំ ស្នើឲ្យក្រុមឡានដឹក ខ្សាច់ ធ្វើផ្លូវឲ្យពួកគាត់ឡើងវិញ appeared first on Kampuchea Thmey Daily.

ពលរដ្ឋសុំឱ្យអាជ្ញាធរ ពិនិត្យមើលផ្លូវមួយខ្សែនៅកណ្ដាលក្រុងបាត់ដំបងរងការខូចខាត

deth leng — Sun, 11 Jul 2021 01:26:30 +0000

ប្រជាពលរដ្ឋក្នុងក្រុងបាត់ដំបង ស្នើទៅអាជ្ញាធរ និងមន្ទីរពាក់ព័ន្ធ ឱ្យជួយពិនិត្យមើលផ្លូវមួយខ្សែ ស្ថិតនៅចំកណ្ដាលក្រុងបាត់ដំបង បានរងនូវការខូចខាតយ៉ាងដំណំ ធ្វើឱ្យលំបាកក្នុងការធ្វើដំណើររបស់ប្រជាពលរដ្ឋ។

ផ្លូវមួយខ្សែនេះគឺជាផ្លូវលេខ ១៣៩ ស្ថិតនៅក្បែរបងសាលាចិន ក្នុងភូមិកម្មករ សង្កាត់ស្វាយប៉ោ ក្រុងបាត់ដំបង ខេត្តបាត់ដំបង ដោយកំពុងរងនូវការខូចខាតប្រវែងប្រមាណ ជាង១០០ ម៉ែត្រ។

ពលរដ្ឋដែលរស់នៅក្នុងតំបន់នេះបានត្អូញត្អែថា មានការពិបាកយ៉ាងខ្លាំងក្នុងការធ្វើដំណើរ កុំថារដូវភ្លៀងដែលមានទឹកពេញៗក្នុងជង្ហុក ទោះបីជាខែប្រាំងក៏ដោយក៏នៅតែពិបាកធ្វើដំណើរដូចគ្នា ព្រោះដោយសារជង្ហុកវាធំៗពេក កន្លែងខ្លះសឹងតែកាត់ទទឹងផ្លូវអស់ទៅហើយបើទោះបីជារកកន្លែងវាងក៏ទៅមិនរួចដែរ។

ពួកគាត់បានស្នើសុំអោយអាជ្ញាធរក្រុង ឬក៏មន្ទីរពាក់ព័ន្ធមេត្តាជួយពិនិត្យមើលត្រចំណុចនេះផង ដើម្បីអោយការធ្វើចរាចរណ៍យប់ ថ្ងៃរបស់ពួកគាត់បានស្រួលផង៕ ដោយ: សោ និយមរ័ត្ន

The post ពលរដ្ឋសុំឱ្យអាជ្ញាធរ ពិនិត្យមើលផ្លូវមួយខ្សែនៅកណ្ដាលក្រុងបាត់ដំបងរងការខូចខាត appeared first on Kampuchea Thmey Daily.

រថយន្តដឹកលើសទម្ងន់បង្កឱ្យ ខូចខាតផ្លូវជនបទ១ ខ្សែ ក្នុងស្រុកភ្នំស្រុក អាជ្ញាធររុញដាក់គ្នា

deth leng — Fri, 28 May 2021 03:53:53 +0000

រដ្ឋបាលខេត្តបន្ទាយមានជ័យ បានចាត់តាំងក្រុមប្រចាំការត្រួតពិនិត្យយានយន្ត ដឹកជញ្ជូន លើសទម្ងន់ បើកលើផ្លូវក្រាលកៅស៊ូ នៅភូមិត្រាង ឃុំភ្នំដី រហូតដល់ភូមិធ្នង់ ឃុំណាំតៅ ស្រុកភ្នំស្រុក ខេត្តបន្ទាយមានជ័យ។

ចំណាត់ការនេះកើតមានឡើង បន្ទាប់ពីអាជ្ញាធរស្រុកបានបើកដៃឱ្យរថយន្តដឹកខ្សាច់ និងរថយន្តដឹកលើសទំងន់ បើកបរលើផ្លូវក្រាលកៅស៊ូ១ខ្សែនេះ ជាថ្នូរនឹងការបង់ប្រាក់ទៅឱ្យអភិបាលស្រុក។

មេភូមិ រង្វាន ឃុំណាំតៅ បានប្រាប់ការពិតថា ពិតជាបានបង់លុយ ថ្លៃរបរបូមខ្សាច់ ជូនទៅលោកអភិបាលស្រុក ភ្នំស្រុកពិតមែន ហើយការចរាចរដឹកខ្សាច់នោះ ក៏បានធ្វើឱ្យខូចផ្លូវជនបទយ៉ាងដំណំ។

កន្លងទៅ សមត្ថកិច្ចក៏ធ្លាប់ចុះចាប់ឡានដឹកដី និងដឹកខ្សាច់ ព្រមទាំងដឹកសម្ភារលើសទម្ងន់ដោយ ឃាត់ឡានចំនួន៤គ្រឿងនៅចំណុច ផ្លូវបំបែក ទៅ ឃុំណាំតៅ និងឃុំស្ពានស្រែង ស្ថិតក្នុងឃុំភ្នំដី ស្រុក ភ្នំស្រុកយកមកធ្វើកិច្ចសន្យាលើកទី១ក្នុង ខណៈដែលម្ចាស់បើករថយន្តក៏បានតវ៉ាថា ខ្លួនបានបង់ប្រាក់ទៅឱ្យអភិបាលស្រុក ភ្នំស្រុករួចហើយ។

ឆ្លើយតបនឹងការចោទប្រកាន់នេះ អភិបាលស្រុក ភ្នំស្រុក លោក យឹម សំណាង បានថ្លែងបដិសេធថាលោកមិនបានដឹងរឿងនេះឡើយ ហើយបង្វែរឱ្យទៅសួរលោក សុក រឹទ្ធិ អភិបាលស្រុករងទៅវិញ៕

អត្ថបទ៖ វ៉ាន់ ណាង

The post រថយន្តដឹកលើសទម្ងន់បង្កឱ្យ ខូចខាតផ្លូវជនបទ១ ខ្សែ ក្នុងស្រុកភ្នំស្រុក អាជ្ញាធររុញដាក់គ្នា appeared first on Kampuchea Thmey Daily.