ដោយអនុវត្តតាមបទបញ្ជាដ៏ម៉ឺងម៉ាត់របស់ លោកនាយឧត្តមសេនីយ៍ ស ថេត អគ្គស្នងការនគរបាលជាតិ និងលោក សោម ពិសិដ្ឋ អភិបាលនៃគណៈអភិបាលខេត្តកែប ក្នុងការបង្ការបង្ក្រាប និងបោសសំអាតឱ្យអស់នូវបទល្មើសឆបោកតាមប្រព័ន្ធបច្ចេកវិទ្យា (Online Scams) កាលពីថ្ងៃទី១ ខែមិថុនា ឆ្នាំ២០២៦ លោកឧត្តមសេនីយ៍ទោ សម្បត្តិ សុធារដ្ឋ ស្នងការនគរបាលខេត្តកែប បានដឹកនាំកម្លាំងផែនការងារអន្តោប្រវេសន៍, ផែនការងារនគរបាលព្រហ្មទណ្ឌ, កម្លាំងអធិការដ្ឋាននគរបាលក្រុងកែប ដោយមានការសម្របសម្រួលនីតិវិធី ពីលោក ច័ន្ទ ដារិទ្ធ ព្រះរាជអាជ្ញារង នៃអយ្យការអមសាលាដំបូងខេត្តកែន ដែលមានការចូលរួម ពីអាជ្ញាធរក្រុង សង្កាត់ បានចុះប្រតិបត្តិការស្រាវជ្រាវបង្ក្រាបករណីឆបោកតាមប្រព័ន្ធបច្ចេកវិទ្យា (Online Scams) នៅចំណុចផ្ទះជួលមួយកន្លែង ស្ថិតក្នុងភូមិថ្មី សង្កាត់ព្រៃធំ ក្រុងកែប ខេត្តកែប។

ក្នុងរង្វង់កិច្ចប្រតិបត្តិការកម្លាំងជំនាញបានឃាត់ខ្លួនជនសង្ស័យពាក់ព័ន្ធបទល្មើសឆបោកតាមប្រព័ន្ធបច្ចេកវិទ្យា (Online Scams) ចំនួន៨នាក់ (ជនជាតិចិន ចំនួន៧នាក់ និងជនជាតិមីយ៉ាន់ម៉ា ចំនួន១នាក់) និងដកហូតសម្ភារ:វត្ថុតាងរួមមាន: កុំព្យូទ័រលើតុ ៥គ្រឿង និងទូរសព្ទ ៣គ្រឿង រួមទាំងសម្ភារៈជាឧបករណ៍សម្រាប់ប្រព្រឹត្តបទល្មើសឆបោកតាមប្រព័ន្ធបច្ចេកវិទ្យា មួយចំនួនទៀត។

គួររំលឹក  លោក សោម ពិសិដ្ឋ អភិបាលខេត្ត តែងតែក្រើនរំលឹកដល់ពលរដ្ឋទាំងអស់ ដែលរស់នៅក្នុងខេត្តកែប ជាម្ចាស់ផ្ទះជួល រីស៊ត ផ្ទះសំណាក់ និងសណ្ឋាគារ ត្រូវត្រួតពិនិត្យរាល់លិខិតឆ្លងដែនទាំងអស់ របស់ជនបរទេស ដែលមានបំណងជួលសំរាប់ស្នាក់នៅ និងត្រូវរាយការណ៍មកអាជ្ញារធរដែលគ្រប់គ្រងនៅក្នុងឃុំ សង្កាត់ នៃទីតាំងអាគាររបស់បងប្អូន និងហាមឃាត់ជាដាច់ខាតពាក់ព័ន្ធទៅនិង (Scam online )។

បច្ចុប្បន្នជនសង្ស័យរួមទាំងវត្ថុតាងដែលពាក់ព័ន្ធ ត្រូវបានសមត្ថកិច្ចជំនាញកំពុងបន្តនីតិវិធី នៅស្នងការដ្ឋាននគរបាលខេត្តកែប៕

The post សមត្ថកិច្ចខេត្តកែប បើកការស្រាវជ្រាវចុះបង្រ្កាបករណីឆបោកតាមប្រព័ន្ធបច្ចេកវិទ្យាឃាត់ខ្លួនជនបរទេស៨នាក់ appeared first on Kampuchea Thmey Daily.

ការអំពាវនាវនេះ ធ្វើឡើងបន្ទាប់ពីមានករណីឧបទ្ទវហេតុលិចទូកស្មិច(ហៅទូកយ៉ៗ) បណ្តាលឱ្យម្តាយ និងកូនពីរនាក់ស្លាប់ (សរុបចំនួន៣នាក់) ខណៈចេញទៅរកងាវ។ ហេតុការណ៍ដ៏អាក្រក់នេះ កើតឡើងនៅថ្ងៃទី១៧ ខែឧសភា ឆ្នាំ២០២៦ វេលាម៉ោងប្រមាណ១២:៥០នាទីរសៀល មានករណីលិចទូកស្មាច់មួយគ្រឿង នៅចំណុចមុខឃ្លោងព្រែកសរសៀរ ស្ថិតក្នុងភូមិអូរក្រសារ សង្កាត់អូរក្រសារ ក្រុងកែប ខេត្តកែប។

តាមសេចក្តីរាយការណ៍ពីសមត្ថកិច្ច ក្នុងទូកមានមនុស្សចំនួន៤នាក់ ក្នុងនោះមានឪពុកឈ្មោះ រស់ សាម អាយុ៤០ឆ្នាំ បានរស់រានមានជីវិត។ ប៉ុន្តែប្រពន្ធអាយុ៣៨ឆ្នាំ និងកូនប្រុស២នាក់ ម្នាក់អាយុ១០ឆ្នាំ និងម្នាក់ទៀត អាយុ៨ឆ្នាំ បានបាត់បង់ជីវិត។

សូមជម្រាបថា ក្រោយទទួលបានដំណឹងភ្លាម លោក ហ៊ួរ មិថុនា អភិបាលរងខេត្ត និងជាប្រធានលេខាធិការដ្ឋានគណៈកម្មាធិការគ្រប់គ្រងគ្រោះមហន្តរាយខេត្តកែប បានដឹកនាំកម្លាំងចម្រុះចុះស្វែងរកជនរងគ្រោះ។ លុះព្រឹកឡើង នៅថ្ងៃទី១៨ ខែឧសភា ឆ្នាំ២០២៦ កម្លាំងចម្រុះបានរកឃើញសពជនរងគ្រោះទាំង៣នាក់ ហើយសពត្រូវបានយកទៅធ្វើបុណ្យតាមប្រពៃណី។

ក្នុងនាមអាជ្ញាធរខេត្ត លោកបានសម្តែងការចូលរួមរំលែកទុក្ខយ៉ាងក្រៀមក្រំជាមួយក្រុមគ្រួសារសព និងអំពាវនាវដល់ប្រជាពលរដ្ឋដែលប្រកបរបរនៅលើផ្ទៃសមុទ្រ មេត្តាបង្កើនការប្រុងប្រយ័ត្នខ្ពស់ក្នុងអំឡុងរដូវវស្សា និងពេលមានអាកាសធាតុមិនអំណោយផល។

ជាការកត់សម្កាល់ រៀងរាល់រដូវវស្សាចូលមកដល់ រដ្ឋបាលខេត្តនៅជាប់សមុទ្ររួមមានខេត្ត ខេត្តកែប កំពត ព្រះសីហនុ និងកោះកុង តែងតែចេញសេចក្តីជូនដំណឹងឱ្យបង្កើនការប្រុងប្រយ័ត្នខ្ពស់ពេលចេញទូកនេសាទ នៅពេលមានកត្តាអាកាសធាតុមិនអំណោយផល ដូចជាព្យុះ ភ្លៀងធ្លាក់ខ្លាំង និងរលកសមុទ្រធំៗជាដើម៕

The post ក្រោយករណីលិចទូកស្លាប់ទាំងម្តាយនិងកូន!មន្រ្តីគ្រោះមហន្តរាយខេត្តកែប អំពាវនាវអ្នកប្រកបរបរលើផ្ទៃសមុទ្របង្កើនការប្រុងប្រយ័ត្នរដូវវស្សា appeared first on Kampuchea Thmey Daily.

ក្រោមការអនុវត្តណែនាំ និងបទបញ្ជាយ៉ាងម៉ឺងម៉ាត់របស់លោក សោម ពិសិដ្ឋ អភិបាលខេត្តកែប និងប្រធានគណៈបញ្ជាការឯកភាពរដ្ឋបាលខេត្តកែប បានចង្អុលបង្ហាញឱ្យលោក ប៊ុន យោង អភិបាលរងខេត្តកែប និងជាប្រធានលេខាធិការដ្ឋានគណៈបញ្ជាការឯកភាពរដ្ឋបាលខេត្តកែប ដឹកនាំកម្លាំងនគរបាលចុះធ្វើការត្រួតពិនិត្យរតាមបណ្តាទីតាំង ផ្ទះសំណាក់ ផ្ទះជួល ស្នាក់នៅជនបរទេស នៅក្នុងមូលដ្ឋានភូមិសាស្រ្តក្រុងកែប ជាពិសេសកន្លែងស្នាក់នៅ ប្រមូលផ្ដុំ ដើម្បីពិនិត្យ និងផ្ទៀងផ្ទាត់ការស្នាក់នៅ សំដៅធ្វើយ៉ាងណាធានាឱ្យបានសន្ដិសុខ សុវត្ថិភាព និងសណ្ដាប់ធ្នាប់ក្នុងមូលដ្ឋាន ជៀសវាងនូវការជាប់ពាក់ព័ន្ធនឹងការប្រើប្រាស់ទីតាំងប្រព្រឹត្តបទល្មើសគ្រប់ប្រភេទ ជាពិសេសការឆបោកតាមប្រព័ន្ធបច្ចេកវិទ្យា Scam Online។

លោក ប៊ុន យោង បានណែនាំឲ្យអាជ្ញាធរមូលដ្ឋាន និងប្រជាពលរដ្ឋចូលរួមសហការផ្ដល់ព័ត៌មានមកកាន់សមត្ថកិច្ចជាបន្ទាន់ បើមានការសង្ស័យទីតាំងដែលមានការប្រមូលផ្តុំជាប់ពាក់ព័ន្ធនឹងការប្រព្រឹត្តបទល្មើសនានា ដើម្បីមានវិធានការចុះត្រួតពិនិត្យ និងបង្ក្រាបឧ្យបានទាន់ពេលវេលានៅក្នុងភូមិសាស្រ្តក្រុងកែបខេត្តកែបទាំងមូល៕

អត្ថបទ៖ សឹង រ៉ាត់

The post អាជ្ញាធរខេត្តកែប ចុះពិនិត្យទីតាំងអគារស្នាក់នៅប្រមូលផ្ដុំជនបរទេស ជាពិសេសករណី Online Scam appeared first on Kampuchea Thmey Daily.

ថ្លែងក្នុងពិធីអបអរសាទរខួបអនុស្សាវរីយ៍លើកទី១៤០ នៃទិវាពលកម្មអន្តរជាតិ ១ឧសភា ឆ្នាំ២០២៦ នាថ្ងៃទី១១ ខែឧសភា លោក សោម ពិសិដ្ឋ អភិបាលខេត្តកែប មានប្រសាសន៍ថា ការវិនិយោគលើរោងចក្រផលិតត្រីខ និងទឹកត្រីនេះ គឺជាជំហានសំខាន់មួយក្នុងការជំរុញផលិតផលកែច្នៃក្នុងស្រុកឱ្យកាន់តែមានសក្តានុពល និងអាចប្រកួតប្រជែងលើទីផ្សារបាន។

លោកអភិបាលខេត្តបញ្ជាក់ថា ស្របពេលប្រជាពលរដ្ឋខ្មែរកាន់តែគាំទ្រផលិតផលដែលផលិតដោយកូនខ្មែរ និងប្រើវត្ថុធាតុដើមក្នុងស្រុក ផលិតផលត្រី ខ កំប៉ុង និងទឹកត្រីរបស់ខេត្តកែប ក៏ត្រូវបានរំពឹងថា នឹងប្រែក្លាយជាជម្រើសថ្មីសម្រាប់អ្នកប្រើប្រាស់ផលិតផលក្នុងស្រុក និងជួយកាត់បន្ថយការពឹងផ្អែកលើផលិតផលនាំចូលពីប្រទេសជិតខាងផងដែរ។ លោកអភិបាលខេត្តលើកទឹកចិត្តឱ្យក្រុមហ៊ុនពន្លឿនក្នុងការសាងសង់ និងពង្រីកសមត្ថភាពផលិតដើម្បីឆ្លើយតបទៅនឹងតម្រូវការទីផ្សារ និងបង្កើនតម្លៃផលិតផលជលផលក្នុងស្រុកឱ្យបានល្អ។

លោក ហ៊ឹម ពិសិដ្ឋ អ្នកគ្រប់គ្រងទូទៅក្រុមហ៊ុន សៃសាន់ អ៊ីនវេសម៉ិន ឯ.ក បានឱ្យដឹងថា ក្រុមហ៊ុនសម្រេចវិនិយោគ​លើគម្រោងនេះ ក្នុងគោលបំណងចូលរួមលើកកម្ពស់ផលិតផលខ្មែរ និងបង្កើតផលិតផលដែលមានគុណភាពសម្រាប់ផ្គត់ផ្គង់ទីផ្សារក្នុងស្រុក។

លោក ហុឹម ពិសិដ្ឋ បន្តថា ការស្ថាបនាសាងសងសម្រេចបានជាង៦០ភាពរយ ហើយបន្ទាប់ពីដំណើរការផលិត រោងចក្រនេះនឹងមានតម្រូវការត្រីទឹកសាប និងត្រីទឹកប្រៃជាច្រើនតោនក្នុងមួយថ្ងៃ ដូចជាត្រីកាម៉ុង ត្រីគួន និងត្រីកាកឺមជាដើម ដែលនឹងជួយបង្កើនទីផ្សារលក់ជូនប្រជានេសាទ និងបង្កើតការងារជូនប្រជាពលរដ្ឋក្នុងមូលដ្ឋាន។

គួរបញ្ជាក់ថា ក្រុមប្រឹក្សាអភិវឌ្ឍន៍កម្ពុជា (CDC) បានអនុម័តគម្រោងបង្កើតរោងចក្រត្រីខកំប៉ុង និងទឹកត្រីនេះ កាលពីខែមករា ឆ្នាំ២០២៦ ក្រោមទុនវិនិយោគប្រមាណ ៧លានដុល្លារ ដែលត្រូវបានរំពឹងថា នឹងផ្តល់ឱកាសការងារជាង២០០​កន្លែងជូនដល់ប្រជាពលរដ្ឋនៅក្នុងខេត្តកែបនៅថ្ងៃខាងមុខផងដែរ៕

អត្ថបទ៖ សឹង រ៉ាត់

The post ខេត្តកែប ត្រៀមបង្ហាញផលិតផលត្រី ខ កំប៉ុង និងទឹកត្រី​ផលិតក្នុងស្រុកលើទីផ្សារកម្ពុជា appeared first on Kampuchea Thmey Daily.

អ្នកគ្រប់គ្រងការងារទូទៅនៅលើកោះអាចម៍សេះរបស់អង្គការ MCC កញ្ញា តៃ ឆេន បានប្រាប់ឲ្យដឹងថា បន្ទាប់ពីបានបង្កើតតំបន់អភិរក្សជលផលនៅតាមតំបន់ប្រជុំកោះ និងមានការចូលរួមសហការល្អពីគ្រប់ភាគីពាក់ព័ន្ធ ពិសេសអាជ្ញាធរ មន្ត្រីជំនាញ និងប្រជានេសាទ គេបានប្រទះឃើញវត្តមានត្រីសេះសមុទ្រដែលជាសត្វងាយរងគ្រោះញឹកញាប់ជាងមុន នៅក្នុងតំបន់ប្រជុំកោះ ពិសេសកោះអាចម៍សេះ។

កញ្ញា តៃ ឆេន បានបញ្ជាក់ឱ្យដឹងថា ត្រីសេះសមុទ្រមានលក្ខណៈពិសេសខុសពីត្រី និងសត្វដទៃ គឺចូលចិត្តរស់នៅស្ងាមស្ងាត់ ហើយសត្វឈ្មោលពពោះភ្ញាស់កូន។ អ្នកស្រាវជ្រាវរូបនោះ បានបញ្ជាក់បន្ថែមថា វត្តមានត្រីសេះសមុទ្រកាន់តែច្រើន បានបង្ហាញអំពីភាពវិជ្ជាមាន ចំពោះការកកើតនៃធនធានជីវចម្រុះ ពិសេសការស្តារប្រព័ន្ធអេកូឡូស៊ីសមុទ្រកម្ពុជាឡើងវិញ។

សូមបញ្ជាក់ថា តំបន់អភិរក្សជលផលខេត្តកែបសំខាន់បំផុត ហើយសំបូរត្រីសេះសមុទ្រច្រើនជាងគេ គឺនៅតំបន់ជុំវិញកោះអាចម៍សេះ ដែលជាកោះនៅឆ្ងាយពីក្រុងកែបជាងគេ ហើយនៅជាប់នឹងព្រំដែនសមុទ្រនៃប្រទេសវៀតណាម។ ក្រោមការអភិរក្សរបស់អង្គការMCC និងមន្ត្រីជលផលខេត្តកែប ទូកនេសាទ ទូកទេសចរណ៍កម្សាន្ត និងទូកស្ទួចត្រីកម្សាន្ត មិនអនុញ្ញាតឲ្យចូលទៅក្បែរកោះអាចម៍ឡើយ៕

អត្ថបទ៖ សឹង រ៉ាត់

The post វត្តមានត្រីសេះសមុទ្រជាច្រើននៅខេត្តកែបបញ្ជាក់​ពីភាពល្អប្រសើរឡើងវិញនៃប្រព័ន្ធអេកូឡូស៊ី appeared first on Kampuchea Thmey Daily.

ឆ្លើយតបការ​សាកសួរ​​របស់​កម្ពុជាថ្មី លោក ភោគ សុខេន បានប្រាប់ថា គម្រោងវិនិយោគ​រោងចក្រ​ផលិត​ត្រី​ខ​កំប៉ុង​នៅ​ក្នុង​​ខេត្ត​កែប​ ទទួលបានការឯកភាពពីក្រុម​ប្រឹក្សា​អភិវឌ្ឍន៍​កម្ពុជា និង​មាន​ច្បាប់​សាងសង់​ត្រឹមត្រូវ​ពីក្រសួងដែនដីរួចរាល់ហើយ។

ទោះជាយ៉ាងណា លោកប្រធាន​មន្ទីរ​ពុំទាន់​អាចបញ្ជាក់បាន​​ពី​ភាគ​រយ​នៃ​ដំណើរការ​​សាងសង់ ឬ​កាល​បរិច្ឆេទ​នៃការបញ្ចប់​​គម្រោង​បានច្បាស់លាស់នៅឡើយទេ ដោយ​សារ​រោងចក្រ​ស្ថិត​នៅ​ក្នុង​ដំណាក់កាលសាងសង់ មិនទាន់​ឈាន​ដល់ការដំណើរការផលិតកម្មនៅ​​ឡើយ។

«បើ​តាម​ដឹង ស្រុក​ខ្មែរ​យើង​មិន​ទាន់​មាន​រោងចក្រ​ផលិត​ត្រី​ខ​កំប៉ុង​នៅ​ឡើយ​ទេ ហើយ​រោងចក្រ​នេះ​ជា​រោងចក្រ​ដំបូង​ដែល​ផលិត​ត្រី​ខ​កំប៉ុង​ផ្គត់ផ្គង់​ទីផ្សារ​ក្នុង​ស្រុក»។ លោក ភោគ សុខេន ​អះអាង ​មុន​លោក​បន្ត​ថា «នៅពេលរោងចក្រនេះ​ដំណើរ​ការពេញលេញ នឹង​ផ្តល់​ផល​ប្រយោជន៍​យ៉ាង​ច្រើន​ដល់​ខេត្តកែបនិង​ប្រទេស​កម្ពុជា​ តាម​រយៈ​ការ​​​ជួយ​បង្កើតការងារ ដែល​រោងចក្រនឹង​ផ្តល់​ការងារ​ដល់​ប្រជាពលរដ្ឋ​ក្នុង​មូលដ្ឋាន​ផ្ទាល់ ជួយឱ្យ​ពលរដ្ឋ​មានការងារ​ធ្វើមិនចាំបាច់ចំណាក​​​ស្រុក​ទៅធ្វើការ​នៅ​កន្លែង​ឆ្ងាយ»។

បន្ថែមពីនេះ លោក ភោគ សុខេន បញ្ជាក់ទៀត​ថា «​ដោយសារ​ជារោងចក្រ​ផលិត​ត្រីខដំបូងគេនៅកម្ពុជា វា​ក៏​នឹង​ជួយ​លើក​ស្ទួយ​ការ​ប្រើប្រាស់​ផលិតផល​នៅក្នុងស្រុក​ កាត់បន្ថយការនាំចូលត្រីខពីបរទេស»។

ចំណុច​ពិសេស​របស់រោងចក្រ​នេះ គឺ​ប្រើប្រាស់​វត្ថុធាតុ​ដើម​ក្នុង​ស្រុក​ទាំង​ស្រុង ដែល​​រោងចក្រ​នឹង​ចាប់​ដៃគូ​ជាមួយ​សហគមន៍​នេសាទ​ក្នុង​ខេត្តកែប និង​កំពតដើម្បី​ផ្គត់ផ្គង់​ត្រី​ទឹក​ប្រៃ ហើយ​ក៏​នឹង​យក​ត្រី​ទឹក​សាប​​ពី​តំបន់​ទន្លេសាប​តាម​បណ្ដា​ខេត្ត​ផ្សេងៗ​ ដែល​នេះ​ជា​ការ​ជួយ​ប្រើប្រាស់​ធនធាន​ក្នុងស្រុក​ឱ្យ​អស់​លទ្ធភាព​ជា​ជាង​ការនាំចេញ​វត្ថុធាតុ​ដើម​ទៅក្រៅ។

បើតាមលោក ភោគ សុខេន រោងចក្រ​នេះ​ក្រៅ​ពី​ផលិត​ត្រីខ​កំប៉ុង ក៏​មាន​ផលិត​ផលិត​ផល​ផ្សេង​ៗ​ទៀត​ដោយ​រួម​ផលិត​ផល​​ទឹកត្រី​ផង​ដែរ។

ក្រុម​ប្រឹក្សាអភិវឌ្ឍន៍​កម្ពុជា ​(CDC) បាន​អនុម័ត​គម្រោង​បង្កើត​រោងចក្រ​ត្រី​ខ​កំប៉ុងនិង​ទឹកត្រី ​ក្រោម​ទំហំ​ទុន​វិនិយោគ ៧ លាន​ដុល្លារ​ ស្ថិត​នៅ​ក្នុង​ស្រុក​ដំណាក់ចង្អើរ ខេត្ត​កែប ដែល​អាច​បង្កើត​ការងារ​បាន​ប្រមាណ ១៧១ កន្លែង។

ពាក់ព័ន្ធ​ស្ថានភាព​សហគ្រាស​ក្នុង​ខេត្ត​កែប បើតាម​ប្រធាន​មន្ទីរ​ឧស្សាហកម្មខេត្តកែប ក្រៅ​ពី​រោងចក្រ​​ផលិត​ត្រីខ​ដែល​កំពុង​ដំណើរការ​សាងសង់ ខេត្ត​កែប​ពុំ​ទាន់​មាន​រោងចក្រឬ​សហគ្រាស​ខ្នាត​ធំ​ផ្សេង​ទៀត​នៅ​ឡើយ​ទេ។

បច្ចុប្បន្ន​ខេត្ត​​មាន​សិប្បកម្ម​ផលិត​ទឹកត្រី​លក្ខណៈ​គ្រួសារដែល​កំពុង​មាន​ឈ្មោះ​បោះ​សំឡេង និង​ចរាចរណ៍​លក់​ទូទាំង​ប្រទេស ដូចជា​ទឹក​ត្រី​ម៉ាក “គីម ហ៊ី រូប​ទន្សាយ ១” និង “លឹម លាង​​ រូប​នាង​ទេពមច្ឆា”​។

លោក ភោគ សុខេន បាន​បញ្ជាក់ថា អាជ្ញាធរខេត្ត​បាន​​កំពុង​ខិតខំ​ជំរុញនិង​ស្វែងរក​ទីផ្សារ​បន្ថែម ដើម្បី​ឱ្យ​សិប្បកម្ម​លក្ខណៈ​គ្រួសារអាច​ពង្រីក​ដើម​ទុន​ក្លាយ​ជា​សហគ្រាស​ធុន​មធ្យម ឬ​ខ្នាត​ធំ​នៅ​ពេល​ខាងមុខ៕

The post រោងចក្រ​ផលិត​ត្រីខ​កំប៉ុង មាន​ទីតាំង​ផលិត​នៅ​ខ្មែរ​ពិតប្រាកដ​ កំពុង​សាងសង់​​ប្រើប្រាស់​ធនធាន​សមុទ្រ​ខ្មែរ​ផលិត​ផ្គត់ផ្គង់​ទីផ្សារ​ក្នុង​ស្រុក appeared first on Kampuchea Thmey Daily.

កម្មវិធីនេះត្រូវបានរៀបចំឡើងក្នុងគោលបំណងអបអរសាទរបុណ្យចូលឆ្នាំប្រពៃណីជាតិខ្មែរ ព្រមទាំងលើកកម្ពស់វប្បធម៌ ប្រពៃណី និងអត្តសញ្ញាណជាតិឲ្យកាន់តែរឹងមាំក្នុងឱកាសបុណ្យចូលឆ្នាំថ្មីដែលបានបង្ហាញម្ហូបអាហារប្រពៃណីជាច្រើនប្រភេទ ក្នុងការរៀបចំលេងល្បែងប្រជាប្រិយ ដូចជា ចោលឈូង បោះអង្គុញ និងល្បែងប្រជាប្រិយផ្សេងៗទៀត។

លោក សោម ពិសិដ្ឋ បានមានប្រសាសន៍ថា ល្បែងប្រជាប្រិយ គឺជាមរតកវប្បធម៌ដ៏មានតម្លៃដែលបន្សល់ទុកពីបុព្វបុរសខ្មែរ មានសារៈសំខាន់ក្នុងការបណ្តុះស្មារតីសាមគ្គីភាព និងការសហការរវាងយុវជន និងក្មេងៗជំនាន់ក្រោយ។ លោកអភិបាលខេត្តកែប បានលើកឡើងថា ការរៀបចំលេងល្បែងប្រជាប្រិយក្នុងឱកាសបុណ្យចូលឆ្នាំ មិនត្រឹមតែផ្តល់ភាពសប្បាយរីករាយប៉ុណ្ណោះទេ ប៉ុន្តែជាការចូលរួមអភិរក្ស និងផ្សព្វផ្សាយអត្តសញ្ញាណជាតិឲ្យបានបន្តជាយូរអង្វែង។

ទន្ទឹមនោះដែរលោកអភិបាលខេត្តកែប ក៏បានអញ្ជើញទស្សនាពិព័រណ៍ម្ហូបអាហារនានា ដែលត្រូវបានរៀបចំយ៉ាងសម្បូរបែប និងមានរសជាតិបែបខ្មែរ។ ក្នុងឱកាសនោះ លោកក៏បានភ្លក់ម្ហូបមួយចំនួន ដើម្បីលើកទឹកចិត្តដល់អ្នករៀបចំ និងអ្នកចម្អិនអាហារ ដែលបានខិតខំបង្ហាញស្នាដៃ និងអភិរក្សរសជាតិដើម៕

អត្ថបទ៖ សឹង រ៉ាត់

The post អភិបាលខេត្តកែប ជំរុញឱ្យលើកកម្ពស់វប្បធម៌ជាតិ និងលេងល្បែងប្រជាប្រិយក្នុងឱកាសបុណ្យចូលឆ្នាំខ្មែរ appeared first on Kampuchea Thmey Daily.

លោក សោម ពិសិដ្ឋ លើកឡើងថា ក្នុងនាមជាកងកម្លាំង គឺពិតជាមានពេលវេលាតិចតួចណាស់ សម្រាប់ក្រុមគ្រួសារ ជាពិសេស នៅគ្រប់ពិធីបុណ្យជាតិ សាសនា ដែលប្រជាពលរដ្ឋជួបជុំគ្រួសារ ដើរលេងសប្បាយ គឺជាពេលវេលាដែលកម្លាំងសមត្ថកិច្ច រឹតតែត្រូវយកចិត្តទុកដាក់ លើកកម្ពស់ស្មារតីទទួលខុសត្រូវលើការថែរក្សាសន្តិសុខ សណ្តាប់ធ្នាប់ ជូនដល់ប្រជាពលរដ្ឋ ភ្ញៀវទេសចរជាតិ អន្តរជាតិ ដែលដើរលេងកំសាន្តអោយមានសុខសុវត្ថិភាព។ លោកអភិបាលខេត្ត ក៏បានសម្តែងនូវអំណរគុណយ៉ាងជ្រាលជ្រៅបំផុត ចំពោះកងកម្លាំងក្រោមឱវាទទាំងអស់ ដែលបានលះបង់កម្លាំងកាយកម្លាំងចិត្តបំពេញភារកិច្ចយ៉ាងហត់នឿយ ពេញមួយឆ្នាំកន្លងមក។

ការលើកឡើងរបស់អភិបាលខេត្តកែបនេះ ធ្វើឡើងនៅក្នុងពិធីសំណេះសំណាល សួរសុខទុក្ខជាមួយកងកម្លាំងនគរបាលនៃស្នងការដ្ឋាននគរបាលខេត្តកែប កាលពីព្រឹកថ្ងៃទី១៣ ខែមេសា ឆ្នាំ២០២៦។

ការលើកទឹកចិត្តដល់កងកម្លាំងប្រដាប់អាវុធ គឺជាកត្តាសំខាន់មួយ​ ដើម្បីពង្រឹងសាមគ្គីភាព ពង្រឹងស្មារតីការពារមូលដ្ឋាន បង្កើនការទប់ស្កាត់ រាល់ទម្រង់បទល្មើសគ្រប់ប្រភេទ សំខាន់នោះ ដាស់តឿនក្រើនរំលឹកនៅការអនុវត្តច្បាប់ស្តីពីការប្រឆាំងការឆបោកតាមប្រព័ន្ធបច្ចេកវិទ្យា អោយមានប្រសិទ្ធភាព៕

អត្ថបទ៖ សឹង រ៉ាត់

The post អភិបាលខេត្តកែប៖ កងកម្លាំងពិតជាមានពេលវេលាតិចតួចណាស់សម្រាប់ក្រុមគ្រួសារ ជាពិសេស នៅគ្រប់ពិធីបុណ្យជាតិ appeared first on Kampuchea Thmey Daily.