នាង​ទេពមច្ឆា​នេះ​គឺជា​ក្រុម​សម្តែង​​​ប្រចាំ​នៅ​មជ្ឈមណ្ឌលអភិរក្សសត្វសមុទ្រ-ទឹកសាប អង្គរ វ៉ាយឡាយ & អឹឃ្វារីយ៉ូម (Angkor Wildlife & Aquarium) ក្នុង​ខេត្តសៀមរាប។

បើ​តាម​ប្រភព​ពី​បុគ្គលិក​នៅមជ្ឍមណ្ឌលអភិរក្សសត្វព្រៃ អង្គរ វ៉ាយឡាយ & អឹឃ្វារីយ៉ូម (Angkor Wildlife & Aquarium) ខេត្ត​សៀមរាប​បាន​បញ្ជាក់​ថា កម្មវិធី​នាង​ទេព​មច្ឆា​​សម្តែងជាមួយ​សត្វត្រី​ក្នង​អាងហែលទឹក​ ​ទទួល​បាន​ការ​គាំទ្រ​យ៉ាង​ខ្លាំង​ពី​សំណាក់​ទស្សនិកជន។

ប្រភពបានបន្ត​ថា ដំបូងឡើយកាលពីឆ្នាំ ២០២៥ ខាងសួនកម្សាន្តបានអញ្ជើញក្រុមសម្ដែងទេពមច្ឆាមកពីប្រទេសជិតខាងឱ្យមកសម្ដែងក្នុងឱកាសបុណ្យចូលឆ្នាំខ្មែរ។

ក្រោយ​មក​ដោយសារតែការ​ទទួលបានការគាំទ្រយ៉ាងខ្លាំងពីសំណាក់ទស្សនិកជន ខណៈ​បុគ្គលិកខ្មែរដែលបម្រើការងារផ្ទាល់ក្នុងមជ្ឍមណ្ឌល​យល់ថា ខ្លួនមានសមត្ថភាពអាចសម្ដែងបានដូចគ្នា ក៏បានចាប់​ផ្ដើមហ្វឹកហាត់ដោយខ្លួនឯង។ ការសម្ដែងជាផ្លូវការបានចាប់ផ្តើម​នៅក្នុងខែ តុលា ឆ្នាំ២០២៥ ចំពេល​​ពិធីបុណ្យភ្ជុំបិណ្ឌ ដែល​នេះជាការបង្កើតក្រុមសម្ដែងនាងទេពមច្ឆាដែលជាកូនខ្មែរដំបូងបំផុតនៅក្នុងប្រទេសកម្ពុជា។

ក្នុ​ងដំណើរ​ចុះ​សិក្សា​​ពី​តំបន់បេតិកភណ្ឌ​ក្នុង​ទៅ​ខេត្ត​សៀមរាបកាលពីពេលថ្មីៗ​នេះ​ ក្រុម​អ្នក​សារព័ត៌មាន​​​បាន​ទៅដល់​ទីតាំង​សម្តែង​នាង​ទេពមច្ឆា ខណៈ​ដែល​​មាន​ទេសចរ​ជាច្រើន​កំពុង​ទស្សនា។ ក្រុម​សម្តែង​សុទ្ធ​តែ​កូន​ខ្មែរ​បានប្រាប់​ថា ការ​សម្តែង​នេះជួប​ការ​លំបាក​ខ្លះ​ដែរ ដោយសារ​​ត្រូវ​ការ​ទប់​ដង្ហើម​នៅ​ក្នុង​ទឹក​ឲ្យ​បានយូរ សម្រាប់ការ​សម្ដែង​ជូន​ទស្សនិកជន​ទស្សនា។

ក្រុមសម្តែងទេពមច្ឆាខ្មែរនៅ​អង្គរ វ៉ាយឡាយ & អឹឃ្វារីយ៉ូម

ការ​សម្តែង​ក៏​ត្រូវ​ការសម្របខ្លួន​ជាមួយ​សម្ពាធទឹក និង​សត្វត្រី និងត្រូវរៀនបច្ចេកទេសហែលទឹក ដើម្បី​កុំ​ឱ្យ​ត្រី​ផ្អើល។ លើស​ពីនេះក៏​ត្រូវរៀន​សម្របខ្លួនក្នុងការហែលជាមួយត្រីធំៗ ដូចជាត្រីរាជ និងត្​រីកូរាំងជាដើម។

យ៉ាងណាមិញ ក្រុម​អ្នក​សម្តែង​បាន​ប្រាប់​ថា សត្វត្រីនៅក្នុងអាងគឺ​ជាត្រីទឹកសាប​មក​ពីបឹងទន្លេសាប និង​ទន្លេ​មេគង្គ មិន​បង្កគ្រោះថ្នាក់ខ្លាំងដូចត្រីទឹកប្រៃ ដូចជាត្រីឆ្លាមដែលអាចខាំនោះទេ។ ប៉ុន្តែ​ហានិភ័យ​ធំ​បំផុត​គឺ​អាច​​ត្រី​ហែល​បុក ឬ​ប៉ះទង្គិចប៉ុណ្ណោះ ហើយ​ក៏ត្រូវ​ចេះ​របៀប​ដោះស្រាយ​ក្នុង​ស្ថានភាព ដូចជាពេលត្រីបុក ឬ​របូត​របាំង​មុខកំឡុងពេលសម្ដែង។

បើ​តាម​ក្រុម​អ្នក​សម្តែង​ ការ​សម្ដែង​កម្មវិធី​នីមួយៗ​ មានរយៈពេលប្រហែល ១៥ ទៅ ២០ នាទី ខណៈ​ការ​សម្ដែងត្រូវ​ធ្វើ​ឡើងនៅក្នុងអាង​ទឹកដែលមានជម្រៅប្រហែល ៣ ម៉ែត្រ ទៅ ៣.២៣ ម៉ែត្រ។

បច្ចុប្បន្ន ការសម្ដែង​នាង​ទេព​មច្ឆា​បាយ័ន​ធ្វើ​ឡើង​ជារៀងរាល់ចុងសប្តាហ៍ គឺ​ថ្ងៃសៅរ៍ និង​ថ្ងៃ​អាទិត្យ និង​​ថ្ងៃ​បុណ្យ​ជាតិ។ ក្នុងមួយថ្ងៃ​មាន ២ លើក គឺ​ពេលព្រឹក​ម៉ោង ១០:៣០ នាទី និង​ពេល​រសៀល​ម៉ោង ២:៣០ នាទី។

ប្រភព​ពី​អ្នក​គ្រប់គ្រង​នៅ​អង្គរ វ៉ាយឡាយ & អឹឃ្វារីយ៉ូម (Angkor Wildlife & Aquarium) បាន​បញ្ជាក់ថា ដំបូង​ឡើយ​ការ​រៀបចំ​ការ​សម្តែង​នា​ទេព​មច្ឆា​បាយ័ននេះ​ សម្ដែង​តែថ្ងៃបុណ្យ​ជាតិ​ប៉ុណ្ណោះ ប៉ុន្តែ​ដោយ​សារ​មាន​ការ​សាកសួរ​រក​ពីភ្ញៀវទេសចរ​ច្រើន ទើប​សម្រេចចិត្ត​ដាក់​សម្ដែង​រៀង​រាល់​ចុង​សប្ដាហ៍។

បើ​តាម​ប្រភព​អ្នក​គ្រប់គ្រង ការ​សម្ដែង​នេះ​​ក៏​ជាចំណី​ចក្ខុ​ប្លែក​ថ្មីមួយ​ក្នុង​ប្រទេសកម្ពុជា និង​ជួយ​ទាក់​ទាញ​ភ្ញៀវ​ទេសចរ​មក​ក​ម្សាន្តនៅ​ខេត្ត​សៀមរាប ក្រៅ​ពី​ការ​ទៅទស្សនា​ប្រាសាទ​បុរាណ គឺ​ទេសចរ​អាច​មក​មើល​សត្វ​ត្រី​ដែល​កំពុង​អភិរក្ស និង​ទស្សនា​ការសម្ដែង​ដ៏​ជក់ចិត្ត​នេះ៕

The post កោះរ៉ុង​ល្បី​ដើមឈើឆ្នេរ​ឡុង​ប៊ិច ខណៈ​នៅ​សៀមរាប​​ផ្ទុះ​ចាប់អារម្មណ៍​ទេព​មច្ឆា​បាយ័ន​មុជទឹក​​ប្រលែង​ត្រី​ appeared first on Kampuchea Thmey Daily.

លោក ង៉ូវ សេងកាក់ អភិបាលរងខេត្តសៀមរាប មានប្រសាសន៍ថា នេះជាព្រឹត្តិការណ៍ដ៏មានសារៈសំខាន់បំផុតសម្រាប់ខេត្តសៀមរាប ក៏ដូចជាស្រុកសូទ្រនិគម ជាពិសេសប្រជាសហគមន៍ក្នុងឃុំកំពង់ឃ្លាំង។ ព្រឹត្តិការណ៍នេះ បានប្រព្រឹត្តទៅស្របពេលដែលរាជរដ្ឋាភិបាលកម្ពុជា កំពុងយកចិត្តទុកដាក់យ៉ាងខ្លាំងលើការអភិវឌ្ឍទេសចរណ៍បៃតង ទេសចរណ៍សហគមន៍ និង ទេសចរណ៍ធម្មជាតិ ដែលជាវិស័យអាទិភាពមួយក្នុងការលើកកម្ពស់កំណើនសេដ្ឋកិច្ច បង្កើតការងារ និង ធ្វើឲ្យប្រសើរឡើងនូវជីវភាពរស់នៅរបស់ប្រជាពលរដ្ឋ។ ពិតជាមានអត្ថន័យយ៉ាងជ្រាលជ្រៅ ព្រោះមិនត្រឹមតែបង្ហាញពីសម្រស់ធម្មជាតិដ៏សម្បូរបែប នៃរដូវកាលបៃតងនោះទេ ប៉ុន្តែថែមទាំងជាការបង្ហាញនូវការដឹងគុណ និង ការទទួលស្គាល់តម្លៃដ៏ធំធេងរបស់បឹងទន្លេសាប ដែលជាប្រភពជីវិត សេដ្ឋកិច្ច និង វប្បធម៌របស់ប្រជាជនកម្ពុជា។

លោក ង៉ូវ សេងកាក់ បន្តថា ខេត្តសៀមរាប ជាពិសេសតំបន់បឹងទន្លេសាប និង សហគមន៍កំពង់ឃ្លាំង គឺជាតំបន់ដែលមានសក្ដានុពលខ្ពស់ទាំងផ្នែកធម្មជាតិ វប្បធម៌ និង ទេសចរណ៍សហគមន៍។ ការរស់នៅរបស់ប្រជាពលរដ្ឋលើផ្ទៃទឹក ប្រពៃណី វប្បធម៌ និង ធនធានធម្មជាតិដ៏សម្បូរបែប បានក្លាយជាអត្តសញ្ញាណពិសេស ដែលទាក់ទាញភ្ញៀវទេសចរជាតិ និង អន្តរជាតិ ឲ្យមកទស្សនា និង សិក្សាស្វែងយល់។ យើងក៏ត្រូវទទួលស្គាល់ថា បញ្ហាបរិស្ថាន ដូចជាសំណល់ប្លាស្ទិក ការប្រែប្រួលអាកាសធាតុ និង ការបាត់បង់ធនធានធម្មជាតិ គឺជាបញ្ហាប្រឈមធំមួយដែលទាមទារឲ្យមានការចូលរួមពីគ្រប់ភាគី។ ដូច្នេះ ព្រឹត្តិការណ៍ថ្ងៃនេះ គឺជាវេទិកាសំខាន់មួយក្នុងការលើកកម្ពស់ការយល់ដឹង និង ជំរុញសកម្មភាពជាក់ស្ដែងក្នុងការថែរក្សាបរិស្ថានឲ្យបានយូរអង្វែង។ លោកក៏សូមអរគុណចំពោះក្រុមការងារ និង សមាគមទេសចរណ៍ក្នុងឃុំកំពង់ឃ្លាំងទាំងអស់ ដែលបានខិតខំប្រឹងប្រែងរួមគ្នា និង ធ្វើការសម្ដែងបានយ៉ាងល្អក្នុងការឆ្លុះបញ្ចាំងពីការងារអប់រំផ្សព្វផ្សាយបរិស្ថាន ក៏ដូចជាការបង្ហាញពីតម្លៃ នៃការប្រើប្រាស់ និង អភិរក្សជីវចម្រុះដ៏សម្បូរបែបនៅក្នុងតំបន់បឹងទន្លេសាប។ ហើយលោកក៏សូមអំពាវនាវដល់អាជ្ញាធរមូលដ្ឋាន សហគមន៍ វិស័យឯកជន យុវជន និង ប្រជាពលរដ្ឋទាំងអស់ បន្តរួមគ្នាថែរក្សាធនធានធម្មជាតិ និង បរិស្ថាន ឲ្យបានគង់វង្ស ដើម្បីឲ្យកម្ពុជា ជាពិសេសខេត្តសៀមរាប ក្លាយជាគោលដៅទេសចរណ៍បៃតងប្រកបដោយភាពទាក់ទាញ គុណភាព និង ចីរភាពសម្រាប់ពិភពលោក។

លោក គុជ បញ្ញាសា រដ្ឋលេខាធិការក្រសួងទេសចរណ៍ បានគូសបញ្ជាក់ថា វិស័យទេសចរណ៍ គឺជា«ការនាំចេញនៅនឹងកន្លែង» ដែលបានចូលរួមចំណែកដោយផ្ទាល់ក្នុងការគាំទ្រសេដ្ឋកិច្ចមូលដ្ឋាន និង ម៉ាក្រូសេដ្ឋកិច្ចជាតិ។ ពិតណាស់ សហគមន៍កំពង់ឃ្លាំង មានលក្ខណៈពិសេសដាច់គេលើ«ទេសចរណ៍អត្តសញ្ញាណជលផលប្រវត្តិសាស្ត្រ»។ ដូច្នេះដើម្បីទាក់ទាញភ្ញៀវទេសចរអន្តរជាតិ ស្របតាមនិន្នាការអេកូទេសចរណ៍ ប្រជាសហគមន៍ និង អាជ្ញាធរទាំងអស់ ត្រូវរួមគ្នាសម្អាតបរិស្ថាន និង ធានាបដិសណ្ឋារកិច្ចឲ្យបានល្អ ព្រោះបើខ្វះអនាម័យ នឹងបាត់បង់គោលដៅទេសចរណ៍ដ៏មានតម្លៃនេះភ្លាមៗ។

សូមបញ្ជាក់ថា ព្រឹត្តិការណ៍រយៈពេល ២ ថ្ងៃនេះ ចាប់ពីថ្ងៃទី ២៦-២៧ ខែមិថុនា មានសកម្មភាពយ៉ាងសម្បូរបែប រួមមាន ក្បួនដង្ហែយានយន្តបរិស្ថាន ក្បួនដង្ហែតុក្កតាជើងគោកបឹងទន្លេសាប កម្មវិធីរត់កម្សាន្តដើម្បីសុខភាព និង ការប្រកួតល្បែងប្រជាប្រិយអ្នកចម្បាំងបឹងទន្លេសាប។ បន្ទាប់ពីកម្មវិធីផ្លូវការ នឹងមានការបន្តរៀបចំបុណ្យភូមិសហគមន៍ ផ្សាររាត្រីលក់ម្ហូបអាហារ និង ការសម្តែងល្ខោនបាសាក់ ដើម្បីញ៉ាំងឲ្យបរិយាកាសកាន់តែអធិកអធម និង សប្បាយរីករាយផងដែរ៕  
អត្ថបទ ៖ គឿនវេត

The post ព្រឹត្តិការណ៍ទេសចរណ៍បរិស្ថាន និង បុណ្យដឹងគុណបឹងទន្លេសាប ឆ្នាំ ២០២៦ នៅសហគមន៍កំពង់ឃ្លាំង appeared first on Kampuchea Thmey Daily.

ប្រធានមន្ទីរកសិកម្ម រុក្ខាប្រម៉ាញ់ និងនេសាទខេត្ត មានប្រសាសន៍ថា កូនឈើប្រមាណ ២ ៥០០ដើមនេះ ត្រូវបានដាំលើផ្ទៃដី ២ហិចតា ជាប្រភេទឈើសម្រាប់ព្រៃលិចទឹក មានតួនាទីសំខាន់ក្នុងការរក្សាសមតុល្យបរិស្ថាន គាំទ្រជីវៈចម្រុះ និងជួយស្តារប្រព័ន្ធអេកូឡូស៊ីនៅតំបន់ទន្លេសាបឡើងវិញ។ សកម្មភាពនេះ គឺជាផ្នែកមួយក្នុងការឆ្លើយតបទៅនឹងគោលនយោបាយជាតិ និងគោលដៅបរិស្ថានសកល ដើម្បីចូលរួមដោះស្រាយបញ្ហាប្រែប្រួលអាកាសធាតុ។

លោក ទា គឹមសុទ្ធ មានប្រសាសន៍ទៀតថា ការដាំដើមឈើ មិនត្រឹមតែជួយស្ដារព្រៃដែលត្រូវបានបំផ្លាញឡើងវិញប៉ុណ្ណោះទេ ប៉ុន្តែថែមទាំងជួយកាត់បន្ថយឥទ្ធិពលនៃការប្រែប្រួលអាកាសធាតុ ដូចជាការកើនឡើងនៃសីតុណ្ហភាព និងការប្រែប្រួលទឹកភ្លៀងផងដែរ។ ជាមួយគ្នានេះ លោកក៏បានជំរុញ និងលើកទឹកចិត្តឱ្យប្រជាពលរដ្ឋ និងយុវជន ចូលរួមយ៉ាងសកម្មក្នុងការដាំ និងថែរក្សាព្រៃឈើ ដើម្បីធានាឱ្យធនធានធម្មជាតិនៅតែមាននិរន្តរភាពសម្រាប់ជំនាន់ក្រោយ។

លោកប្រធានមន្ទីរ បានបន្តថា ការចូលរួមពីសហគមន៍មូលដ្ឋាន ត្រូវបានចាត់ទុកថាជាចំណុចសំខាន់បំផុត ដើម្បីធានាថាកូនឈើដែលបានដាំអាចលូតលាស់ល្អ និងក្លាយជាព្រៃសម្បូរបែបឡើងវិញនាពេលអនាគត។ ការដាំកូនឈើព្រៃលិចទឹកនេះ គឺជាភស្តុតាងនៃការសហការយ៉ាងជិតស្និទ្ធរវាងអាជ្ញាធរ អង្គការដៃគូ និងប្រជាពលរដ្ឋក្នុងការថែរក្សាបរិស្ថាន និងធនធានធម្មជាតិ ព្រោះវាបានបង្ហាញពីការយល់ដឹងកាន់តែខ្ពស់អំពីសារៈសំខាន់នៃព្រៃលិចទឹក និងតួនាទីរបស់វាក្នុងការរក្សាសមតុល្យបរិស្ថាន ក៏ដូចជាការការពារជីវភាពរស់នៅរបស់ប្រជាពលរដ្ឋក្នុងតំបន់ផងដែរ៕

ដោយ៖ គឿនវេត

The post កូនឈើព្រៃលិចទឹកជាង ២ពាន់ដើម ត្រូវបានអាជ្ញាធរខេត្តសៀមរាប ដឹកនាំពលរដ្ឋដាំស្ដារឡើងវិញក្នុងភូមិសាស្ត្រ ឃុំកំពង់ឃ្លាំង appeared first on Kampuchea Thmey Daily.

នាឱកាសនោះ លោក ពៅ ប៊ុនធឿន បានកោតសរសើរចំពោះ ព្រះសង្ឃ មន្ត្រីរាជការ ប្រជាពលរដ្ឋ និង សិស្សានុសិស្សទាំងអស់ ដែលចូលរួមក្នុងពិធីដាំកូនឈើនេះឡើង ដើម្បីជួយឲ្យបរិស្ថានក្នុងមូលដ្ឋានកាន់តែល្អប្រសើរ ព្រោះដើមឈើគឺជាជម្រកដ៏ត្រជាក់សម្រាប់មនុស្ស សត្វ ទាំងពេលបច្ចុប្បន្ន និង អនាគត។ ពិតណាស់ មនុស្ស សត្វ មិនអាចខ្វះបានឡើយនូវបរិស្ថានជុំវិញខ្លួន ប៉ុន្តែក្នុងនោះបើបរិស្ថានជុំវិញខ្លួនមិនល្អ បរិយាកាសមិនល្អ មនុស្ស សត្វ ក៏មិនអាចរស់នៅបានដែរ។

លោកបញ្ជាក់ថា ការដាំកូនឈើ នាពេលនេះ ជាការចូលរួមការពារ និង ស្ដារព្រៃឈឺឡើងវិញ។ ក្រៅពីការដាំនៅក្នុងវត្តវិសុទ្ធិមគ្គ នាពេលនេះ អាជ្ញាធរ និង ប្រជាពលរដ្ឋ ក៏បានដាំបន្ថែមនៅតាមដងផ្លូវសំខាន់ៗ ក្នុងមូលដ្ឋានស្រុកអង្គរធំ ដោយធ្វើយ៉ាងណាជំរុញឲ្យមូលដ្ឋានមួយនេះ ក្លាយជាមូលដ្ឋានមានភាពបៃតង បរិយាកាសល្អប្រសើរសម្រាប់ការរស់នៅប្រចាំថ្ងៃរបស់មនុស្ស សត្វ ជាពិសេសភាពបៃតង នឹងជួយដល់ការទាក់ទាញភ្ញៀវទេសចរផងដែរ។

លោកអភិបាលស្រុក ក៏បានសំណូមពរដល់ប្រជាពលរដ្ឋ ចូលរួមដាំដើមឈើ និង ថែរក្សាបរិស្ថានទាំងអស់គ្នា កន្លែងដែលរិចរិល សូមចូលរួមដាំបន្ថែម កន្លែងមានដើមឈើ សូមចូលរួមថែរក្សា ធ្វើយ៉ាងណាឲ្យព្រៃឈើមានបន្តដល់កូនចៅជំនាន់ក្រោយ ដើម្បីពួកគាត់ស្គាល់ពូជឈើសំខាន់ៗ មាននៅកម្ពុជា។

ប្រជាពលរដ្ឋ បានបង្ហាញអារម្មណ៍រំភើបដែលបានចូលរួមដាំដើមឈើ ព្រោះដើមឈើមិនត្រឹមតែផ្ដល់នូវម្លប់ដ៏ត្រជាក់ត្រជំប៉ុណ្ណោះទេ ប៉ុន្តែថែមទាំងដើរតួនាទីយ៉ាងសំខាន់ក្នុងការការពារពីគ្រោះធម្មជាតិដូចជា ព្យុះភ្លៀង និង ជួយឲ្យបរិស្ថានមានភាពស្រស់បំព្រង និង បរិសុទ្ធ ថែមទៀតផង។ ក្រៅពីអត្ថប្រយោជន៍ខាងបរិស្ថាន ការដាំដើមឈើ ត្រូវបានចាត់ទុកជាកិច្ចការដ៏ប្រសើរនៅក្នុងផ្លូវព្រះពុទ្ធសាសនា ដែលជាការសាងបុណ្យកុសលសម្រាប់ប្រយោជន៍ដល់មនុស្ស និង សត្វទាំងមូល ផងដែរ។ បន្ថែនេះ ពួកគាត់ ក៏បានសំណូមពរឲ្យមានការផ្សព្វផ្សាយកម្មវិធីនេះឲ្យកាន់តែទូលំទូលាយ ដើម្បីប្រជាពលរដ្ឋ ជាពិសេសក្មេងជំនាន់ក្រោយបានយល់ដឹងកាន់តែច្បាស់អំពីសារៈសំខាន់ នៃដើមឈើ៕
អត្ថបទ ៖ គឿនវេត

The post អាជ្ញាធរ និង ប្រជាពលរដ្ឋ ស្រុកអង្គរធំ ដាំកូនឈើជាង ៣ ម៉ឺនដើម បំផុសគំនិតដល់សាធារណជនទូទៅជំរុញភាពបៃតងក្នុងមូលដ្ឋាន appeared first on Kampuchea Thmey Daily.

សិល្បករមួយរូប មានមូលដ្ឋាននៅក្នុងសង្កាត់គោកចក ក្រុងសៀមរាប លោក សិទ្ធ ឃន ដែលជាជាងគំនូរ និងជាគ្រូបង្រៀនគំនូរដ៏មានបទពិសោធជាង ២០ ឆ្នាំមកហើយ បានឲ្យដឹងថា លោកប្រកបមុខរបរនេះដោយក្តីស្រឡាញ់ និង មានបំណងចង់អភិរក្សសិល្បៈវប្បធម៌ខ្មែរ។ តាមរយៈការគូររូបភាពដែលបង្កប់ដោយអត្តសញ្ញាណជាតិ លោកជឿជាក់ថា នឹងអាចជួយផ្សព្វផ្សាយសិល្បៈវប្បធម៌ខ្មែរឲ្យពិភពលោកបានស្គាល់ ក៏ដូចជាអាចរកចំណូលសម្រាប់ផ្គត់ផ្គង់គ្រួសារបានចន្លោះពី ៤០០ ទៅ ៥០០ ដុល្លារអាមេរិក ក្នុង ១ ខែ ផងដែរ។

លោក សិទ្ធ ឃន បានបង្ហាញថា តម្លៃ នៃផ្ទាំងគំនូរ ស្ថិតនៅលើគុណភាព នៃស្នាដៃ បើស្នាដៃល្អ គំនូរក៏លក់បានតម្លៃខ្ពស់ផងដែរ។ ដូច្នេះ សិល្បៈគំនូរមិនមែនពឹងផ្អែកតែលើទេពកោសល្យពីកំណើតប៉ុណ្ណោះទេ ប៉ុន្តែវាតម្រូវឲ្យមានការតស៊ូ និង ការលះបង់ខ្ពស់ ទើបអាចទទួលបានជោគជ័យក្នុងអាជីពនេះ។ លោកថា កន្លងមក សិស្សដែលរៀនជាមួយលោក ខ្លះទទួលបានជោគជ័យក្នុងមុខរបរនេះ ប៉ុន្តែខ្លះទៀតក៏មិនអាចបន្តទៅមុខបានដែរ ដោយសារខ្វះភាពអត់ធ្មត់។

លោកបន្ថែមថា ស្នាដៃគំនូរដែលលោកបង្កើតឡើងភាគច្រើនផ្តោតលើទិដ្ឋភាពប្រាសាទអង្គរវត្ត និង ជីវភាពរស់នៅរបស់ប្រជាពលរដ្ឋនៅតំបន់បឹងទន្លេសាប។ គំនូរទាំងនេះ មានតម្លៃចាប់ពី ១៥ ដុល្លារអាមេរិក ឡើងទៅ ហើយបច្ចុប្បន្នកំពុងទទួលបានការគាំទ្រទាំងការលក់រាយ និង លក់ដុំ ជាពិសេសគំនូរប្រាសាទអង្គរវត្ត ដែលជាជម្រើសចម្បងរបស់អតិថិជន។

សិល្បកររូបនេះ ក៏បានអំពាវនាវដល់សាធារណជនទាំងអស់ សូមចូលរួមគាំទ្រស្នាដៃគំនូរដែលបង្កើតឡើងដោយកូនខ្មែរ ដើម្បីលើកទឹកចិត្តដល់សិល្បករឲ្យបន្តបង្កើតស្នាដៃថ្មីៗ ដែលមានគុណភាព និង ភាពច្នៃប្រឌិត។ គំនូរមិនត្រឹមតែជាការតុបតែងលម្អនោះទេ ប៉ុន្តែវាជាការកត់ត្រានូវទិដ្ឋភាពប្រពៃណី ជីវភាពរស់នៅ និង ប្រាសាទបុរាណ ដែលជាមោទនភាពរបស់ជាតិខ្មែរ។ ការទិញ ឬ ការចែកចាយស្នាដៃទាំងនេះ គឺជាការរួមចំណែកក្នុងការអភិរក្សវប្បធម៌ដ៏មានប្រសិទ្ធភាព។ ជាពិសេសការបន្តចូលរួមជាវស្នាដៃគំនូរទាំងនេះ នឹងជួយឲ្យសិល្បករមានជីវភាពកាន់តែប្រសើរ ដែលជាកត្តាជំរុញឲ្យពួកគេអាចបន្តប្រកបរបរនេះបានយូរអង្វែង៕
អត្ថបទ ៖ ជុន កុសល

The post ជាងគំនូរ រួមចំណែកនាំវប្បធម៌ខ្មែរឲ្យពិភពលោកបានស្គាល់ appeared first on Kampuchea Thmey Daily.

វេទិកាការងារ សន្តិសុខសង្គម និង បណ្ដុះបណ្ដាលវិជ្ជាជីវៈ នេះ នឹងត្រូវរៀបចំនៅថ្ងៃទី ១២ ខែមិថុនា ក្នុងបរិវេណសាលាបឋមសិក្សា សម្តេច ហ៊ុន សែន រណសិរ្សត្រីភូមិ និង នៅថ្ងៃទី ១៣ ខែមិថុនា ក្នុងបរិវេណសាលាស្រុកជីក្រែង ស្រុកជីក្រែង ខេត្តសៀមរាប។

លោក ស៊ុន មេសា អ្នកនាំពាក្យ នៃក្រសួងការងារ និង បណ្ដុះបណ្ដាលវិជ្ជាជីវៈ បានថ្លែងថា “ការរៀបចំវេទិកាការងារនេះឡើងមកគឺដើម្បីជួយលើកកម្ពស់វិស័យការងារ សន្តិសុខសង្គម និង ការបណ្ដុះបណ្ដាលវិជ្ជាជីវៈ ដែលមាននៅក្នុងស្រុក ជាពិសេសេគឺការចូលរួមពីសំណាក់ក្រុមហ៊ុនឯកជនដែលជាដៃគូសហការរបស់ក្រសួងការងារដោយផ្ទាល់”។

លោកបានបញ្ជាក់ថា ក្នុងវេទិកាការងារនេះ នឹងមានផ្ដល់ជូននូវឱកាសការងារ ក្នុងនោះ អ្នកចូលរួមទាំងអស់ នឹងទទួលបានព័ត៌មានអំពីឱកាសការងារដ៏សម្បូរបែបសរុប ៩១,៨១៦ កន្លែង នៅទូទាំងប្រទេស វគ្គបណ្តុះបណ្តាលបច្ចេកទេសដោយឥតគិតថ្លៃ និង អត្ថប្រយោជន៍របស់បេឡាជាតិសន្តិសុខសង្គម។ បន្ថែមពីលើនេះ គឺការទទួលបាននូវអាហារ ភេសជ្ជៈ ការដឹកជញ្ជូនទៅចូលរួមវេទិកាដោយឥតគិតថ្លៃថែមទៀតផង។

ជាមួយគ្នានេះ លោក ស៊ុន មេសា នៅតែបន្តអំពាវនាវសាជាថ្មីម្តងទៀតទៅដល់អតីតពលករមកពីប្រទេសថៃ និង ប្រជាពលរដ្ឋនៅមូលដ្ឋាន ជាពិសេសខេត្តជាប់ព្រំដែន ដែលមានបំណងស្វែងរកការងារធ្វើ សូមទាក់ទងមកលេខ ១២៩៧ ដើម្បីទទួលបានឱកាសការងារក្នុងស្រុកដែលមានប្រាក់ឈ្នួលប្រហាក់ប្រហែលគ្នា អត្ថប្រយោជន៍សង្គមច្រើនជាង សុវត្ថិភាព និង ចូលរួមក្នុងការអភិវឌ្ឍសេដ្ឋកិច្ចជាតិរបស់ខ្លួន៕

The post ស្អែកនេះ ក្រសួងការងារ នឹងនាំយកឱកាសការងារជាង ៩ ម៉ឺនកន្លែង ជូនអតីតពលករត្រឡប់ពីថៃ និង ពលរដ្ឋ នៅខេត្តសៀមរាប appeared first on Kampuchea Thmey Daily.

ថ្លែងក្នុងពិធីបើកកម្មវិធីបណ្ដុះបណ្ដាលស្ដីពី «ការអភិវឌ្ឍគម្រោងអាជីវកម្មឌីជីថល» នៃកម្មវិធីយុវជន ២១ ឆ្នាំ ២០២៦ ក្រោមប្រធានបទ «ការចាប់ផ្ដើមអាជីវកម្មបច្ចេកវិទ្យារបស់យុវជន ៖ គំនិតវ័យក្មេង ការផ្លាស់ប្ដូរពិតនៅមជ្ឈមណ្ឌលជាតិយុវជន» ខេត្តសៀមរាប កាលពីថ្ងៃទី ៩ ខែមិថុនា ឆ្នាំ ២០២៦ លោកបណ្ឌិត កុលផេង វឌ្ឍនា អនុរដ្ឋលេខាធិការក្រសួងអប់រំ យុវជន និង កីឡា បានមានប្រសាសន៍ថា យុវជនកម្ពុជា ត្រូវត្រៀមខ្លួនក្លាយជាអ្នកបង្កើតនវានុវត្តន៍ ជាយុវសហគ្រិន និងជាអ្នកដឹកនាំការផ្លាស់ប្ដូរ តាមរយៈការប្រើប្រាស់បច្ចេកវិទ្យា ចំណេះដឹង និង ភាពច្នៃប្រឌិត ដើម្បីដោះស្រាយបញ្ហាសង្គម និង រួមចំណែកអភិវឌ្ឍន៍សេដ្ឋកិច្ចជាតិប្រកបដោយបរិយាបន្ន និង និរន្តរភាព។

លោកបណ្ឌិត កុលផេង វឌ្ឍនា បានថ្លែងអំណរគុណយ៉ាងជ្រាលជ្រៅចំពោះគណៈកម្មការរៀបចំ គ្រូឧទ្ទេស ដៃគូពាក់ព័ន្ធ ក្រុមការងារ និង អ្នកគាំទ្រទាំងអស់ ដែលបានចូលរួមធ្វើឲ្យកម្មវិធីបណ្ដុះបណ្ដាលនេះអាចប្រព្រឹត្តទៅបានដោយរលូន និង មានប្រសិទ្ធភាព។

គួរបញ្ជាក់ថា កម្មវិធីបណ្ដុះបណ្ដាលនេះ នឹងប្រព្រឹត្តទៅរយៈពេល ៦ ថ្ងៃ ចាប់ពីថ្ងៃទី ៩ ដល់ថ្ងៃទី ១៤ ខែមិថុនា ឆ្នាំ ២០២៦ ដោយមានសាកលវិទ្យាល័យ/វិទ្យាស្ថានចំនួន ១០ ដែលបានឆ្លងកាត់វគ្គជម្រុះ កាលពីពេលកន្លងទៅ រួមមាន ៖ បណ្ឌិត្យសភាបច្ចេកវិទ្យាឌីជីថលកម្ពុជា វិទ្យាស្ថានបច្ចេកវិទ្យាកម្ពុជា វិទ្យាស្ថានវិទ្យាសាស្ត្រសុខាភិបាល ខ.ភ.ម សាកលវិទ្យាល័យអាស៊ីអឺរ៉ុប សាកលវិទ្យាល័យភ្នំពេញអន្តរជាតិ សាកលវិទ្យាល័យប៊ែលធីអន្តរជាតិ សាកលវិទ្យាល័យ ហេង សំរិន ត្បូងឃ្មុំ សាកលវិទ្យាល័យកម្ពុជា សាកលវិទ្យាល័យពុទ្ធិសាស្ត្រ សាកលវិទ្យាល័យភូមិន្ទភ្នំពេញ។

កម្មវិធីបណ្ដុះបណ្ដាលមានការចូលរួមពីថ្នាក់ដឹកនាំក្រសួងអប់រំ យុវជន និង កីឡា មន្ទីរអប់រំ យុវជន និង កីឡា ខេត្តសៀមរាប នាយិកាវិទ្យាល័យអប់រំពិសេសខេត្តសៀមរាប គ្រូឧទ្ទេស លោកគ្រូ អ្នកគ្រូដឹកនាំ បេក្ខនិស្សិត និង ក្រុមការងារ នៃកម្មវិធីយុវជន ២១ សរុបប្រមាណ ៩៥ នាក់ (ស្រី ៤២ នាក់)៕
អត្ថបទ ៖ សំអឿន

The post មន្ត្រីជាន់ខ្ពស់អប់រំ ណែនាំយុវជនកម្ពុជា ត្រូវត្រៀមខ្លួនក្លាយជាអ្នកបង្កើតនវានុវត្តន៍ និងជាអ្នកដឹកនាំ ដើម្បីអភិវឌ្ឍន៍សេដ្ឋកិច្ចជាតិ appeared first on Kampuchea Thmey Daily.

ការណែនាំនេះ ក្នុងឱកាស សម្ដេចអគ្គមហាសេនាបតីតេជោ ហ៊ុន សែន ប្រមុខរដ្ឋស្ដីទី ប្រធានព្រឹទ្ធសភា និងជាប្រធានសមាគមអតីតយុទ្ធជន និង និវត្តជនកម្ពុជា បានអញ្ជើញជាអធិបតីភាពដ៏ខ្ពង់ខ្ពស់ ក្នុងពិធីសំណេះសំណាលជាមួយក្រុមប្រឹក្សាខេត្ត ក្រុង ស្រុក ឃុំ-សង្កាត់ និង ថ្នាក់ដឹកនាំ មន្ទីរអង្គភាពនានា ជុំវិញខេត្តសៀមរាប និង ខេត្តឧត្តរមានជ័យ នៅសាលសន្និបាតសណ្ឋាគារសុខា ខេត្តសៀមរាប ដែលមានអ្នកចូលរួមប្រមាណជិត ២,០០០ នាក់ កាលពីព្រឹកថ្ងៃទី ១០ ខែមិថុនា ឆ្នាំ ២០២៦។

មានប្រសាសន៍ក្នុងពិធីសំណេះសំណាលព្រឹកមិញនេះ សម្តេចតេជោ ហ៊ុន សែន បានអំពាវនាវ និង ណែនាំឲ្យថ្នាក់ដឹកនាំ និង អាជ្ញាធរមូលដ្ឋាន នៃខេត្តទាំងពីរ ត្រូវបន្តយកចិត្តទុកដាក់គ្រប់គ្រងវត្តមានអតីតយុទ្ធជន ជាពិសេសក្រុមគ្រួសារយុទ្ធជនពលីនៅសមរភូមិ ដែលជាកិច្ចការដែលយើងត្រូវធ្វើ ដើម្បីពង្រឹងខឿនការពារជាតិឲ្យបានល្អប្រសើរ និង កាត់បន្ថយការលំបាករបស់គ្រួសារយុទ្ធជនពលី។ សម្ដេចតេជោ បានអំពាវនាវឲ្យយកចិត្តទុកដាក់ជាពិសេសដល់ការលើកកម្ពស់ការសិក្សាអប់រំរបស់កូន ចៅ យុទ្ធជនពលី ឲ្យទទួលបានការរៀនសូត្រ និង ត្រូវផ្ដល់អាទិភាពឲ្យពួកគេទទួលបានអាហារូបករណ៍សិក្សាដោយមិនបង់ថ្លៃ។

បន្ថែមពីនេះ សម្តេចតេជោ ប្រធានសមាគម ក៏មានប្រសាសន៍ឲ្យយកចិត្តទុកដាក់ទាំងអតីតមន្រ្តីរាជការស៊ីវិលដែលចូលនិវត្តន៍ ដូចជា អតីតអភិបាលខេត្ត អភិបាលស្រុក អតីតមេឃុំ ចៅសង្កាត់ ជាដើមនោះ គប្បីយកចិត្តទុកដាក់បន្ថែមទៀត ដោយឧស្សាហ៍ចុះសួរសុខទុក្ខ ផ្ដល់ភាពកក់ក្ដៅដល់ពួកគាត់ និង ត្រូវផ្ដល់ឱកាស អញ្ជើញពួកគាត់ចូលរួមក្នុងពិធីជួបជុំ និង សំណេះសំណាលផ្សេងៗ ស្របពេលដែលពេលនេះ សម្ដេចតេជោ បានដាក់បញ្ចូលពួកគាត់ជានិវត្តជន មកក្រោមឆ័ត្រតែមួយរបស់សមាគម ដោយបានធ្វើវិសោធនកម្មលក្ខន្តិកៈពីសមាគមអតីតយុទ្ធជនកម្ពុជា មកជាអតីតយុទ្ធជន និង និវត្តជនកម្ពុជា។

ឆ្លៀតក្នុងឱកាសនេះ សម្ដេចតេជោ ហ៊ុន សែន ក្នុងនាមជាប្រមុខរដ្ឋស្ដីទី ក៏បានមានប្រសាសន៍កោតសរសើរចំពោះយន្តការរបស់រាជរដ្ឋាភិបាល តាមរយៈធនាគារជាតិដែលបានជួយសម្រាលបន្ទុកគ្រួសារយុទ្ធជនពលីទូទាំងប្រទេស ដោយបានផ្ដល់ការអនុគ្រោះ លុបចោលបំណុលដែលខ្ចីពីធនាគារក្នុងស្រុក ព្រមទាំងបានជួយពន្យារការសងត្រឡប់ក្នុងករណីមួយចំនួនដែល សម្ដេច បានហៅយន្តការអនុគ្រោះនេះ គឺជាផ្នែកមួយ នៃការជួយពង្រឹងខឿនការពារជាតិយ៉ាងពិតប្រាកដ ជាពិសេសបានបង្ហាញពីស្មារតី នៃការរួបរួមគ្នាជាកម្លាំងសាមគ្គីជាតិបានល្អបំផុត។

គួរជម្រាបជូនថា ចំពោះការងារគ្រប់គ្រង អតីតយុទ្ធជន និង និវត្តជន ក្នុងខេត្តឧត្តរមានជ័យ យោងតាមរបាយការណ៍របស់ លោក មាន ចាន់យ៉ាដា អភិបាល នៃគណៈអភិបាលខេត្ត បានបញ្ជាក់ថា បច្ចុប្បន្ននេះ មានអតីតយុទ្ធជនសរុប ៤,៩៨៧ នាក់ ក្នុងនោះ អ្នកនៅក្នុងបន្ទុកមានចំនួន ៧,៥៦១ នាក់។ អតីតយុទ្ធជន ចូលជាសមាជិកសមាគមមានចំនួន  ៣,៤៣២ នាក់ (ស្រី ១៥៣ នាក់។ មុខសញ្ញានិវត្តជន ជាអតីតមន្រ្តីរាជការស៊ីវិលក្នុងខេត្តមានចំនួនសរុប ៣៥០ នាក់ (ស្រី ៤១ នាក់)។ បច្ចុប្បន្ន អ.ន.ក ខេត្តឧត្តរមានជ័យ កំពុងគ្រប់គ្រងដីសម្បទានសង្គមកិច្ចសម្រាប់អតីតយុទ្ធជនមាន ២ កន្លែង ដែលមានទំហំ ២,៦៦៥ ហិតា ដែលទីតាំងនៅ ៖ ១.ភូមិអូរតារម៉ែង ឃុំអន្លង់វែង ស្រុកអន្លង់វែង មានទំហំ ៥៤ ហិតា និង ទីតាំងទី ២ ស្ថិតនៅភូមិបាត់ថ្កៅ ឃុំចុងកាល់ ស្រុកចុងកាល់ មានទំហំ ២,៦១១ ហិតា។ ចំពោះការងារសាងសង់ផ្ទះចាប់ពីឆ្នាំ ២០១៦-២០២៦ សាងសង់បាន ៦៥២ ខ្នង ស្មើនឹង ៦៥២ គ្រួសារ ដែលជាអំណោយដ៏ថ្លៃថ្លារបស់ សម្ដេចតេជោ ហ៊ុន សែន និង សម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន។

ដោយឡែកការងារគ្រប់គ្រង អតីតយុទ្ធជន និង និវត្តជន ក្នុងខេត្តសៀមរាប លោក ប្រាក់ សោភ័ណ អភិបាល នៃគណៈអភិបាលខេត្ត បានលើកឡើងក្នុងរបាយការណ៍ថា គិតត្រឹមខែមិថុនា ឆ្នាំ ២០២៦ នេះ ខេត្តសៀមរាប មានអតីតយុទ្ធជនសរុបចំនួន ៩,៣៣៤ នាក់ ក្នុងនោះអ្នកនៅក្នុងបន្ទុកមានចំនួន ១២,៤៧៥ នាក់ អតីតយុទ្ធជនចូលជាសមាជិកសមាគមមានចំនួន ៦,៦៣១ នាក់ , មុខសញ្ញានិវត្តជន ជាអតីតមន្រ្តីរាជការស៊ីវិល មានចំនួនសរុប ២,០៨៨ នាក់។ បច្ចុប្បន្ន អ.ន.ក ខេត្តសៀមរាប កំពុងគ្រប់គ្រងដីសម្បទានសង្គមកិច្ចសម្រាប់អតីតយុទ្ធជនមាន ២ កន្លែង ៖ ១.ស្ថិតនៅឃុំស្លែងស្ពាន ស្រុកស្រីស្នំ ខេត្តសៀមរាប មានទំហំ ៣,០៨០ ហិតា។ ២.ស្ថិតនៅឃុំឃុនរាម និង ឃុំខ្នារសណ្តាយ ស្រុកបន្ទាយស្រី ខេត្តសៀមរាប ដែលមានទំហំ ១,៣១៧ ហិតា និង បែងចែកដីឡូត៍កម្មសិទ្ធជូនអតីតយុទ្ធជនចំនួន ១៥២ គ្រួសារ។ ចំពោះការងារសាងសង់ផ្ទះវិញ ចាប់ពីឆ្នាំ ២០១៧ – ២០២១ បានសាងសង់ផ្ទះសរុបបានចំនួន ៩០ ខ្នងផ្ទះ ជាអំណោយដ៏ថ្លៃថ្លារបស់ សម្ដេចអគ្គមហាសេនាបតីតេជោ ហ៊ុន សែន និង សម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន , សម្ដេចធិបតី ហ៊ុន ម៉ាណែត និង លោកជំទាវបណ្ឌិត ពេជ ចន្ទមុន្នី ហ៊ុន ម៉ាណែត៕

The post សម្តេចតេជោ ហ៊ុន សែន បន្តណែនាំអាជ្ញាធរខេត្តសៀមរាប-ឧត្តរមានជ័យ យកចិត្តទុកដាក់ជាពិសេសគ្រួសារយុទ្ធជនពលីនៅសមរភូមិ និង គ្រួសារអតីតយុទ្ធជន appeared first on Kampuchea Thmey Daily.