ខែត្រជាក់ Archives - Kampuchea Thmey Daily

ខែត្រជាក់ អាចរំខានដល់ការមករដូវរបស់ស្រីៗមួយចំនួន

សាង ស្រីល័ក្ខ — Wed, 15 Dec 2021 09:55:00 +0000

ជឿអត់ថាខែត្រជាក់អាចរំខានដល់វដ្ដរដូវរបស់ស្រីៗ? រដូវធ្លាក់ខ្យល់ អាកាសធាតុក៏ត្រជាក់ជាងខែផ្សេងៗទៀត ដែលការណ៍នេះ អាចធ្វើឲ្យគ្នាយើងមួយចំនួនងាយនឹងឈឺ។ ដូចគ្នាដែរ ស្រីៗមួយចំនួនអាចមានអារម្មណ៍ប្រែប្រួលនៅរដូវធ្លាក់ខ្យល់ត្រជាក់ ជាពិសេសក៏អាចមានបញ្ហាដល់ការមករដូវផងដែរ។

មូលហេតុមួយចំនួននាំឲ្យរដូវរងា អាចរំខានដក់ការមករដូវ៖

១. សកម្មភាពអូវែត្រូវកាត់បន្ថយ

អាកាសធាតុប្រែប្រួល ក៏អាចធ្វើឲ្យវដ្ដរដូវរបស់ស្រីៗយើងប្រែប្រួលដូចគ្នា។ តាមរយៈការសិក្សាកន្លងមក នៅរដូវរងា ស្រ្តីហាក់មានការបញ្ចេញអ័រម៉ូនច្រើន និងវដ្ដរដូវខ្លីជាងរដូវក្ដៅ ០,៩ថ្ងៃ។ ដូចគ្នាដែរ សកម្មភាពរបស់អូវែ ដំណើរការបានល្អនៅក្នុងរដូវក្ដៅ បើធៀបនឹងដំណើរការដូចគ្នានៅរដូវរងា។ ដូចនេះហើយ បានជាស្រីៗមួយចំនួនអាចជួបបញ្ហាខ្លះទាក់ទងនឹងការមករដូវក្នុងរដូវរងា។

២. រោគសញ្ញាមុនមករដូវ

ស្រ្តីមួយចំនួន នៅរដូវរងា អាចមានរោគសញ្ញាមុនមករដូវធ្ងន់ធ្ងរជាងរដូវក្ដៅ។ អំឡុងពេលអាកាសធាតុចុះត្រជាក់ ស្រីៗយើងអាចចំណាយពេលច្រើននៅក្នុងផ្ទះ ធ្វើសកម្មភាពរាងកាយតិច និងអាចញ៉ាំអាហារច្រើនជាងធម្មតា។ ការណ៍នេះអាចរំខានដល់វដ្ដរដូវ និងបង្កជារោគសញ្ញាអវិជ្ជមានមួយចំនួនដល់រោគសញ្ញាមុនមករដូវ។

ហេតុអ្វីអាកាសធាតុត្រជាក់រំខានដល់វដ្ដរដូវរបស់ស្រីៗ?

ពេលអាកាសធាតុល្អមនុស្សយើងអាចចំណាយពេលច្រើននៅក្រៅផ្ទះ។ ការសិក្សាជាច្រើនបានបង្ហាញថា ការធ្វើសកម្មភាពរាងកាយច្រើន និងទៀងទាត់អាចគ្រប់គ្រងវដ្ដរដូវបានល្អ ជាងអ្នកដែលមិនសូវបានបញ្ចេញសកម្មភាពរាងកាយ។ ចំណែករដូវត្រជាក់មនុស្សជាច្រើនចំណាយពេលនៅក្នុងផ្ទះជាជាងចេញក្រៅ ដែលជាហេតុនាំឲ្យសកម្មភាពរាងកាយថយចុះដូចគ្នា។

យ៉ាងណា បើសិនជាស្រីៗយើងមានឈាមរដូវច្រើនជាងធម្មតា រោគសញ្ញាមុនមករដូវដូចជាឈឺក្បាល ចង្អោរ ហើមពោះ ឈឺក្នុងពោះ តឹងសុដន់ និងអស់កម្លាំងខ្លាំង គួរពិភាក្សាជាមួយគ្រូពេទ្យ។

តិចនិកដោះស្រាយខ្លះ

ញ៉ាំអាហារសម្បូរសារធាតុចិញ្ចឹម ល្អចំពោះសុខភាព
ហាត់ប្រាណឲ្យបានទៀងទាត់
រក្សាទម្ងន់ឲ្យបានត្រឹមត្រូវ
ស្អំទឹកក្ដៅបើឈឺពោះ ឬឈឺចាប់ពេលមករដូវ៕

អត្ថបទផ្ដល់ដោយ៖ Hello Krupet

ចុចអាន៖អាការមុនមករដូវ អាចច្រឡំនឹងអាការ មានផ្ទៃពោះដំបូង?

The post ខែត្រជាក់ អាចរំខានដល់ការមករដូវរបស់ស្រីៗមួយចំនួន appeared first on Kampuchea Thmey Daily.

ខែខ្យល់ត្រជាក់ កូនតូចៗងាយកើតជំងឺត្រអក គួរការពារបែបម៉េច?

សាង ស្រីល័ក្ខ — Sat, 11 Dec 2021 09:10:00 +0000

ក្នុងអាកាសធាតុត្រជាក់បែបនេះ គ្នាយើងដែលមានកូនតូចច្បាស់ជាកំពុងគិតច្រើនរឿងកូនឈឺផ្ដាសាយ តឹងច្រមុះហើយ។ ទន្ទឹមនឹងជំងឺផ្ដាសាយ កូនតូចៗក៏ងាយប្រឈមនឹងការកើតជំងឺសើស្បែកដូចជា ជំងឺត្រអកជាដើម ដែលអាចធ្វើទុក្ខអាអូន ផ្ដល់ភាពឈឺចាប់ដល់កូន។

ជំងឺត្រអក ជាជំងឺសើស្បែកម្យ៉ាង ឧស្សាហ៍កើតលើទារក ប៉ុន្តែក៏អាចកើតមានលើមនុស្សពេញវ័យដូចគ្នា ហើយវាបង្កឲ្យស្បែកស្ងួត និងរមាស់ បញ្ហានេះឧស្សាហ៍កើតមានបំផុតលើក្មេងតូចៗ ដោយសារប្រព័ន្ធការពារខ្លួន មានប្រតិកម្មខ្លាំងពេកជាមួយសារធាតុណាមួយដែលបង្កឲ្យមានបញ្ហាអាលែកហ្ស៊ី។ ទោះជាជំងឺត្រអកត្រឹមតែជាជំងឺសើស្បែក ក៏ប៉ុន្តែវាក៏អាចផ្ដល់ផលពិបាកមួយចំនួនដល់អ្នកកើតបានដែរដូចជា បង្កជាជំងឺហឺត ឬអាលែកហ្ស៊ីច្រមុះ ឡើងរមាស់រ៉ាំរ៉ៃ ឬឆ្លងមេរោគលើស្បែក។

” ខែធ្លាក់ខ្យល់ត្រជាក់ គឺជាពេលដែលក្មេងៗមានស្បែក (ជំងឺត្រអក)ធ្វើទុក្ខ។ “ នេះបើតាមការឲ្យដឹងពីលោកស្រីវេជ្ជបណ្ឌិត កុសល កណិការ ឯកទេសជំងឺកុមារ។

តិចនិកការពារកូនពីជំងឺត្រអក

– ផ្ដល់សំណើមដល់ស្បែកយ៉ាងហោចណាស់ ២ដង/ថ្ងៃ។ ម៉ាក់ប៉ាអាចប្រើជែល petroleum លើស្បែកកូន ដើម្បីទប់ស្កាត់កុំឲ្យជំងឺត្រអកកើតឡើង។
– ព្យាយាមកំណត់អត្តសញ្ញាណ និងចៀសវាងកត្តាដែលធ្វើឲ្យស្ថានភាពជំងឺត្រអកកាន់តែធ្ងន់ធ្ងរឡើងដូចជា ញើស ស្ត្រេស សាប៊ូ ធូលី និងលម្អងផ្សេង។ ចំពោះទារក និងកុមារ អាហារមួយចំនួនរួមមាន ស៊ុត ទឹកដោះគោ សណ្ដែកសៀង និងស្រូវសាលី អាចជាប្រភពបង្កបញ្ហានេះ។
– ចៀសវាងងូតទឹកឲ្យកូនយូរៗ (ត្រឹម១០-១៥នាទី ល្មម)
– ប្រើសាប៊ូ ឬផលិតផលមានជាតិកាត់ទាបបំផុតសម្រាប់កូន។ ចំពោះសាប៊ូជួយបំបាត់ក្លិន និងសាប៊ូប្រឆាំងបាក់តេរីអាចកម្ចាត់ជាតិប្រេងធម្មជាតិច្រើន ជាហេតុបណ្ដាលឲ្យស្បែកស្ងួត។
– បន្ទាប់ពីងូតទឹករួច ម៉ាក់ប៉ាគួរយើងកន្សែងទន់ៗ ជូតខ្លួនកូន ហើយលាបឡេផ្ដល់សំណើមស្របពេលដែលស្បែកអាអូននៅសើមតិចៗ៕

អត្ថបទផ្ដល់ដោយ៖Hello Krupet

ចុចអាន៖មូលហេតុមួយចំនួននេះ អាចធ្វើឲ្យកូន លូតលាស់យឺត

The post ខែខ្យល់ត្រជាក់ កូនតូចៗងាយកើតជំងឺត្រអក គួរការពារបែបម៉េច? appeared first on Kampuchea Thmey Daily.