របាយការណ៍ «ស្ថានភាពខ្យល់» ឆ្នាំ ២០២៦ របស់​សមាគម​សួត​អាមេរិករកឃើញថា មនុស្សជាង​ ១២៩ លាន​នាក់​រស់នៅក្នុងខេត្ត​មានកម្រិត​​បំពុលអូហ្សូន។ ការបំពុលប្រភេទនេះ​កើតឡើងពេលពន្លឺ​ព្រះ​អាទិត្យ​មាន​អន្តរកម្មជាមួយ​សមាសធាតុ​ដែលបញ្ចេញ​​ពី​ឧស្សាហ​កម្មរថ​យន្ត​និងសារធាតុគីមី បង្កើត​ជា​ស្រទាប់​អូហ្សូន​កម្រិតក្នុង​ដី​ បង្កគ្រោះ​ថ្នាក់​នៅ​ក្នុងខ្យល់។

យោងតាមរបាយការណ៍ដដែល​ថា​ ប្រជាជន​ជាង​ ៦២ លាននាក់​រស់​នៅក្នុងខេត្ត​ដែល​មានកម្រិតខ្យល់​មិនល្អ​សម្រាប់ការបំពុលភាគ​ល្អិត​កើន​ឡើងជារៀងរាល់ថ្ងៃ វា​​មាន​ភាគល្អិតតូចៗ​នៅក្នុងខ្យល់ មក​ពី​ប្រភព​ដូច​ជា​ផ្សែងរថយន្ត រោងចក្រថាមពល សំណង់ ភ្លើងឆេះ និង​ធូលីដី។

យ៉ាង​ណា​ ការប៉ះពាល់នឹង​ខ្យល់កខ្វក់​មិន​ស្មើ​គ្នា​ទេ​។ របាយការណ៍​នោះ​​រកឃើញ​ថា​​ ប្រជាជនស្បែកខ្មៅរស់នៅក្នុងតំបន់ដែល​មិនអនុវត្តតាម​វិធាន​ការបំពុល​សំខាន់ៗ​ទាំងអស់ច្រើនជាង​ពីរ​ដង។

លោក វេជ្ជបណ្ឌិត Afif El-Hasan អ្នកជំនាញ​ខាងជំងឺសួត​និងជា​អ្នក​នាំពាក្យ​របស់​សមាគមសួតអាមេរិក ប្រាប់ ABC News ថា៖ « [នៅក្នុងតំបន់] ដែល​មនុស្សមានធនធានសេដ្ឋកិច្ចសង្គមតិចជាង[…] ​រង​​ឥទ្ធិពល​ជាង​ ពីព្រោះតំបន់ទាំងនោះ​អាចមានការចូលប្រើប្រាស់អាហារ​ដែល​មិន​អំណោយផលដល់សុខភាព​ កន្លែងមានសុវត្ថិភាព​តិចជាង​សម្រាប់​ហាត់ប្រាណនៅខាងក្រៅ និងការចូលប្រើប្រាស់ការថែទាំសុខភាពតិចជាង»។

លោក El-Hasan និយាយ​ថា៖ « តំបន់ជាច្រើនដែល​មានការបំពុលខ្ពស់​ក៏​ជាតំបន់ដែល​មិនសូវមានសេវាកម្ម ឬមានមធ្យោបាយសេដ្ឋកិច្ចសង្គមទាប។ ការស្រូបខ្យល់ដែល​មានមេរោគមិនត្រឹមតែ​ធ្វើឱ្យ​មនុស្សឈឺប៉ុណ្ណោះទេ។ វាប៉ះពាល់​ដល់សក្ដានុពល​គ្រួសារ ហិរញ្ញវត្ថុ ​និងស្ទើរតែគ្រប់ទិដ្ឋភាពផ្សេងទៀត​នៃជីវិត»៕

ប្រែសម្រួល៖ ណឺ មិនា

The post ប្រជាជន​អាមេរិកជិតពាក់​កណ្តាល​​​រស់​នៅ​​​​​តំបន់​​​ខ្យល់​​ពុល​​បង្កគ្រោះថ្នាក់​​​​សុខភាព​ appeared first on Kampuchea Thmey Daily.

សារព័ត៌មាន The Nation បានដកស្រង់ទិន្នន័យពីមជ្ឈមណ្ឌលកាត់បន្ថយការបំពុលខ្យល់ (CAPM) ​ដែលបញ្ចេញរបាយការណ៍កាលពីល្ងាចថ្ងៃពុធថា PM2.5 ក្នុងកម្រិតប៉ះពាល់ខ្លាំងដល់សុខភាពមនុស្ស បានគ្របដណ្តប់ខេត្តថៃចំនួន៣៨ ដែលក្នុងនោះតំបន់ភាគខាងជើង ត្រូវរងគ្រោះខ្លាំងជាងគេ។

នៅភាគខាងជើង ខេត្តចំនួន៥បានឈានដល់កម្រិតប្រកាសអាសន្នធ្ងន់ធ្ងរពណ៌ក្រហមដូចជា Chiang Rai, Chiang Mai, Mae Hong Son, Lamphun និង Lampang ដោយ PM2.5 ឈានដល់១២៥មីក្រូក្រាមក្នុងមួយម៉ែត្រគូបនៃខ្យល់ ខណៈកម្រិតស្តង់ដារដែលកំណត់ដោយរដ្ឋាភិបាលថៃ គឺត្រឹម ៣៧.៥មីក្រូក្រាមប៉ុណ្ណោះ។

មួយឆ្នាំៗ ប្រជាជនថៃរាប់លាននាក់ កើតជំងឺដោយសារខ្យល់ពុល ខណៈយោងតាមទិន្នន័យក្នុងឆ្នាំ២០២៥ ប្រជាជនថៃរហូតដល់ទៅជាង ១០លាននាក់មានបញ្ហាសុខភាពធ្ងន់ធ្ងរ ដោយសារតែឥទ្ធិពល PM2.5។

ក្នុងចំណោមមនុស្សទាំងជាង១០លាននាក់នោះ ភាគច្រើនមានបញ្ហាផ្លូវដង្ហើម ដូចជាជំងឺហឺតនិងជំងឺស្ទះសួតរ៉ាំរ៉ៃ ហើយអ្នកខ្លះមានឡើងកន្ទួលលើស្បែកនិង បញ្ហាភ្នែក។ ក្នុងករណីធ្ងន់ធ្ងរបំផុត អ្នកជំងឺផ្លូវដង្ហើមខ្លះ ត្រូវការជំនួយពីម៉ាស៊ីនដកដង្ហើមជាចាំបាច់ដើម្បីរស់ ហើយខ្លះឈានដល់ការជំងឺមហារីកសួតតែម្តង៕

អត្ថបទ៖ សុខ សុវណ្ណ

The post ខ្យល់ពុលកម្រិតគ្រោះថ្នាក់ គ្របដណ្តប់ពាក់កណ្តាលប្រទេសថៃ appeared first on Kampuchea Thmey Daily.

ក្នុងសន្និសីទសារព័ត៌មានស្ដីទីលទ្ធផលនៃទស្សនកិច្ចទៅកាន់ប្រទេសជប៉ុន ធ្វើឡើងនៅអាកាសយានដ្ឋានអន្តរជាតិតេជោ កាលពីថ្ងៃទី១៩​ ខែកុម្ភៈ  រដ្ឋមន្ត្រីក្រសួងបរិស្ថាន បានថ្លែងដូច្នេះអំពីបញ្ហាខ្យល់ពុលដូច្នេះ ៖« បញ្ហាគុណភាពខ្យល់ទាំងប្រជាជន ទាំងខ្ញុំសុទ្ធតែមានកង្វល់ ប៉ុន្តែជាមួយនឹងកង្វល់ហ្នឹង ខ្ញុំសូមឱ្យយើងរួមគ្នាចាត់វិធានការការពារផង។ កុំគ្រាន់តែបង្ហាញក្ដីកង្វល់! កុំគ្រាន់តែផ្សព្វផ្សាយថាជាតិពុលមកហើយ ផ្សែងពុលមកហើយ អ័ព្ទមកហើយ ប៉ុន្តែត្រូវរួមគ្នាកុំដុតសំរាម ជាពិសេសសំរាមប្លាស្ទិកហ្នឹង សូមកុំដុតវាលស្រែ សូមកុំដុតព្រៃរបស់យើង ព្រោះការដុតទាំងនោះ ដែលនាំជាតិពុលឱ្យមកយើងកើតក្ដីបារម្ភ បើយើងមិននាំគ្នាដុតទេ យើងក៏មិនពិបាកបារម្ភរឿងគុណភាពខ្យល់ដែរ។»។

រដ្ឋមន្ត្រីក្រសួងបរិស្ថាន អំពាវនាវជាថ្មីម្ដងទៀត ទៅកាន់ពលរដ្ឋខ្មែរនៅទូទាំងប្រទេសឱ្យបញ្ឈប់សកម្មភាពដុតសំរាមប្លាស្ទិក ដុតព្រៃ និងសំណល់កសិកម្ម ដើម្បីចូលថែរក្សាធនធានធម្មជាតិ និងថែរក្សាសុខភាពសាធារណៈ និងគុណភាពខ្យល់ឱ្យល្អប្រសើរ។

ជាការកត់សម្គាល់ អំឡុងដើមសប្ដាហ៍ទី២ នៃខែកុម្ភៈ ឆ្នាំ២០២៦ នេះ អ្នកប្រើប្រាស់បណ្ដាញសង្គម បានបង្ហាញក្ដីបារម្ភខ្លាំងអំពីបញ្ហាខ្យល់ពុលនៅរាជធានីភ្នំពេញ ដែលជាទីប្រជុំជនដែលមានប្រជាជនរស់នៅជាង២លាននាក់ បន្ទាប់ពីស្ថានភាពផ្ទៃមេឃមានសភាពចុះអ័ព្ទខ្លាំង។ ជុំវិញករណីនេះ ក្រសួងបរិស្ថាន បានអះអាងថា គុណភាពខ្យល់នៅកម្ពុជា មានការប្រែប្រួលខ្លាំងនៅតាមតំបន់ខ្លះប៉ុណ្ណោះ ហើយការធ្លាក់ចុះគុណភាពខ្យល់នៅកន្លែងទាំងនោះ គឺរយៈពេលខ្លីហើយត្រឡប់មកល្អធម្មតាវិញ និងមិនដល់កម្រិតប្រកាសអាសន្ននៅឡើយ។

ដោយហេតុថា បញ្ហាគុណភាពខ្យល់ជាក្ដីកង្វល់រួម ដូច្នេះ ក្រសួងបរិស្ថានកម្ពុជាមានបំណងធ្វើទំនើបកម្មប្រព័ន្ធតាមដានគុណភាពខ្យល់ ដី និងទឹក ដើម្បីការពារសុខភាពសាធារណៈឲ្យកាន់តែប្រសើរ។ តាមរយៈនេះ ក្រសួងបរិស្ថានកម្ពុជា បានចុះហត្ថលេខាលើអនុស្សរណៈនៃកិច្ចសហប្រតិបត្តិការ (MoC) ជាមួយក្រសួងបរិស្ថានជប៉ុន ក្នុងដំណើរទស្សនកិច្ចរបស់រដ្ឋមន្ត្រីក្រសួងបរិស្ថាន អ៊ាង សុផល្លែត ទៅកាន់ប្រទេសជប៉ុន។

តាមរយៈMoC នេះ រដ្ឋមន្ត្រី អ៊ាង សុផល្លែត អះអាងថា ក្រុមហ៊ុនជប៉ុន នឹងផ្ដល់ឧបករណ៍ត្រួតពិនិត្យគុណភាពខ្យល់មកឱ្យកម្ពុជា ដើម្បីពិនិត្យគុណភាពខ្យល់ពុល។ឧបករណ៍ត្រួតពិនិត្យគុណភាពខ្យល់ដ៏ទំនើប នឹងផ្ដល់ភាពងាយស្រួលក្នុងការតាមដានគុណភាពខ្យល់នៅកម្ពុជា ដោយគ្រាន់តែបើកដំណើរ មន្ត្រីជំនាញនឹងអាចដឹងបានភ្លាមថា​នៅក្នុងខ្យល់មានសារធាតុពុល និងសារធាតុវិទ្យុសកម្ម សារធាតុគីមីអ្វីខ្លះ។

រដ្ឋមន្ត្រីក្រសួងបរិស្ថាន បានឱ្យដឹងថា ក្រសួងក៏មានគម្រោងបំពាក់បន្ថែមទៀតនូវឧបករណ៍តាមដាន ពិនិត្យគុណភាពខ្យល់នៅតាមបណ្ដាខេត្តបន្ថែមពីលើឧបករណ៍តាមដានគុណភាពខ្យល់ដែលបានបំពាក់រួចហើយ ដោយបំពាក់ឱ្យបានយ៉ាងហោចណាស់ចំនួន ២ ឬ៣ឧបករណ៍តាមដានគុណភាពខ្យល់នៅតាមបណ្ដាខេត្តនីមួយៗ។ 

ដើម្បីទប់ស្កាត់ការបំពុលខ្យល់នេះដែរ  ក្នុងពេលបំពេញទស្សនកិច្ចនៅជប៉ុន លោក អ៊ាង សុផល្លែត  រដ្ឋមន្ត្រីក្រសួងបរិស្ថាន បានបញ្ជាទិញឡបច្ចេកទេសសម្រាប់ដុតសំណល់វេជ្ជសាស្ត្រ និងសំណល់ប្លាស្ទិក ដែលដុតហើយគ្មានផ្សែង ពីប្រទេសជប៉ុន និងតម្រូវឱ្យក្រុមហ៊ុនផលិត កែច្នៃឡនេះ ទៅជាឡដែលប្រើប្រាស់ថាមពលពន្លឺព្រះអាទិត្យ ជំនួសថាមពលអគ្គិសនីវិញ។  

គួរឱ្យដឹងថា គិតត្រឹមបច្ចុប្បន្ន ក្រសួងបរិស្ថានដាក់ពង្រាយឧបករណ៍ប្រព័ន្ធត្រួតពិនិត្យគុណភាពខ្យល់កម្រិតខ្ពស់ ចំនួន៥៩កន្លែងនៅទូទាំងប្រទេសកម្ពុជា រួមជាមួយស្ថានីយផ្កាយរណប ចំនួន១គ្រឿង និងរថយន្តចល័តចំនួន៣គ្រឿង ដើម្បីតាមដានគុណភាពខ្យល់ (កំហាប់ភាគល្អិត PM2.5) ឱ្យបានត្រឹមត្រូវ និងលទ្ធផលគុណភាពខ្យលល់ដែលបានមកពីឧបករណ៍ប្រព័ន្ធត្រួតពិនិត្យ គឺក្រសួងបរិស្ថានផ្សព្វផ្សាយផ្ទាល់ជូនសាធារណជន បានជ្រាបអំពីទិន្នន័យគុណភាពខ្យល់ និងវិធានការការពារសុខភាព តាមរយៈបណ្ដាញសង្គមរបស់ក្រសួង៕

ដោយ៖ ង៉ិល ណារ៉ាត់

The post រដ្ឋមន្ត្រីបរិស្ថាន៖ បើមិនចង់ភ័យរឿងខ្យល់ពុល ពលរដ្ឋត្រូវរួមគ្នាទប់ស្កាត់ការដុតសំរាម ដុតព្រៃ appeared first on Kampuchea Thmey Daily.

សារព័ត៌មាន Khaosod បានដកស្រង់ប្រភពពីមជ្ឈមណ្ឌលទំនាក់ទំនងគ្រប់គ្រងការបំពុលខ្យល់ ដែលព្យាករថា នៅរយៈពេល៧ថ្ងៃបន្ទាប់ ស្ថានភាពខ្យល់ពុលនៅថៃ នឹងឈានដល់កម្រិតគ្រោះថ្នាក់លើសស្តង់ដារសុវត្ថិភាព។ 

ការព្រមាននេះកើតឡើង ស្របពេលខេត្តចំនួន៣១ក្នុងប្រទេសថៃ ត្រូវគ្របដណ្តប់ដោយខ្យល់ពុលក្នុងកម្រិតគ្រោះថ្នាក់ ដែលប៉ះពាល់ដល់សុខភាពមនុស្ស។

មជ្ឈមណ្ឌលទំនាក់ទំនងគ្រប់គ្រងការបំពុលខ្យល់ បានឲ្យដឹងថា គិតត្រឹមម៉ោង៧ព្រឹកថ្ងៃចន្ទទី១៦ខែកុម្ភៈ PM2.5 ក្នុងខេត្តចំនួន៣១ បានកើនលើសកម្រិតស្តង់ដារហើយ។

ក្នុងចំណោមខេត្តទាំង៣១ តំបន់ដែលមានខ្យល់ពុលខ្លាំងបំផុតគឺភាគកណ្តាលនិងខាងលិច ដោយ PM2.5 ខ្ពស់បំផុតបានឈានដល់ ៦០.៧មីក្រូក្រាមក្នុងមួយម៉ែត្រគូបនៃខ្យល់ បន្ទាប់មកគឺប៉ែកឦសាន ដែល PM2.5 ខ្ពស់បំផុតបានឈានដល់ ៥៩.៣មីក្រូក្រាមក្នុងមួយម៉ែត្រគូបនៃខ្យល់៕ 

អត្ថបទ៖ សុខ សុវណ្ណ

The post ថៃ នឹងត្រូវគ្របដណ្តប់ដោយខ្យល់ពុលដ៏គ្រោះថ្នាក់ ពេញមួយសប្តាហ៍ appeared first on Kampuchea Thmey Daily.

តាម​រយៈ​ព័ត៌មាន​ដែល​បង្ហោះ​លើ​​ហ្វេសបុក​ផេក​នៅ​ថ្ងៃ​ទី​១៦ ខែ​កុម្ភៈនេះ ​រដ្ឋមន្ត្រី​ក្រសួង​បរិស្ថាន​លោក អ៊ាង សុផល្លែត បាន​ចុះ​ហត្ថលេខា​លើ​អនុស្សរណៈ​នៃ​កិច្ច​សហប្រតិបត្តិការ​ចំនួន​៤​ជា​មួយ​រដ្ឋមន្ត្រី​ក្រសួង​បរិស្ថាន​ជប៉ុន​លោក ISHIHARA Hirotaka ដោយ​ក្នុង​នោះ​ក៏​មាន​ MOC អំពី​ការ​ការពារ​ការ​បំពុល​ទឹក ដី និង​ខ្យល់​ផង​ដែរ​។

ដោយ​ឡែក​អនុស្សរណៈ​នៃ​កិច្ច​សហប្រតិបត្តិការ​៣​ទៀត​រួម​មាន​​ ការ​កាត់​បន្ថយ និង​ការ​សម្រប​ខ្លួន​ទៅ​នឹង​ការ​ប្រែ​ប្រួល​អាកាស​ធាតុ អនុស្សរណៈ​នៃ​កិច្ច​សហប្រតិបត្តិការ​លើ​សេដ្ឋកិច្ច​ចម្រុះ និង​អនុស្សរណៈ​នៃ​ការ​អភិរក្ស​ជីវៈ​ចម្រុះ​ ក៏​ត្រូវ​បាន​ចុះ​ហត្ថលេខា​ផង​ដែរ​។

ការ​ធ្វើ​កិច្ច​សហការ​ពី​ជប៉ុន​លើ​ការ​ធ្វើ​ទំនើប​កម្ម​ប្រព័ន្ធ​តាម​ដាន​គុណភាព​ខ្យល់ ដី និង​ទឹក​នេះ ស្រប​គ្នា​នឹង​ការ​ចោទ​ជា​សំណួរ​ពី​អ្នក​ប្រើប្រាស់​បណ្ដាញ​សង្គម​ និង​មហាជន​ជា​ច្រើន ​ក្នុង​រាជធានី​ភ្នំពេញ​លើ​ប្រព័ន្ធ​តាមដាន​គុណភាព​ខ្យល់​ក្នុង​រាជធានី​កាល​ពី​កន្លង​ទៅ​ ក្នុង​ពេល​ដែល​ប្រព័ន្ធ​តាមដាន​អន្តរជាតិ​បង្ហាញ​ពី​គុណភាព​ខ្យល់​ក្នុង​រាជធានី​ខុស​ពី​ប្រព័ន្ធ​តាមដាន​របស់​ក្រសួង​៕

អត្ថបទដោយ ហ៊ុន សិរីវឌ្ឍន៍

The post កម្ពុជា​គ្រោង​ធ្វើ​ទំនើប​កម្ម​ប្រព័ន្ធ​តាមដាន​គុណភាព​ខ្យល់​ ដី និង​ទឹក ដោយ​មាន​កិច្ច​សហការ​ពី​ជប៉ុន appeared first on Kampuchea Thmey Daily.

តាមការផ្សាយរបស់ Khaosod នៅថ្ងៃចន្ទទី១៦ខែកុម្ភៈ ដោយដកស្រង់ប្រភពពីនាយកដ្ឋានឧតុនិយម, តំបន់ភាគខាងកើត ខាងត្បូងនិងកណ្តាល រួមទាំងទីក្រុងបាងកក ផងនោះ នឹងជួបប្រទះព្យុះភ្លៀងលាយឡំផ្គររន្ទះ នៅថ្ងៃអង្គារ។

នៅភាគកណ្តាល ខេត្តដែលនឹងរងឥទ្ធិពលដោយសារព្យុះភ្លៀងគឺ Nakhon Pathom និង Phra Nakhon Si Ayutthaya រីឯភាគខាងត្បូងមានខេត្ត Surat Thani, Nakhon Si Thammarat, Phatthalung, Songkhla, Yala និង Narathiwat។

ចំណែកនៅភាគខាងកើតវិញ ខេត្តដែលក៏នឹងរងឥទ្ធិពលដោយសារព្យុះភ្លៀងដែរនោះ មានដូចជា Chonburi, Rayong, Chanthaburi និង Trat។

ស្របពេលជាមួយគ្នានោះ បើតាមការផ្សាយរបស់ Khaosod ដដែល, ខេត្តចំនួន៣១ក្នុងប្រទេសថៃ ត្រូវគ្របដណ្តប់ដោយខ្យល់ពុលក្នុងកម្រិតគ្រោះថ្នាក់ ដែលប៉ះពាល់ដល់សុខភាពមនុស្ស។

មជ្ឈមណ្ឌលទំនាក់ទំនងគ្រប់គ្រងការបំពុលខ្យល់ បានឲ្យដឹងថា គិតត្រឹមម៉ោង៧ព្រឹកថ្ងៃចន្ទ កំហាប់ភាគល្អិត PM2.5 ក្នុងខេត្តចំនួន៣១ បានកើនលើសកម្រិតស្តង់ដារហើយ។

ក្នុងចំណោមខេត្តទាំង៣១ តំបន់ដែលមានខ្យល់ពុលខ្លាំងបំផុតគឺភាគកណ្តាលនិងខាងលិច ដោយ PM2.5 ខ្ពស់បំផុតបានឈានដល់ ៦០.៧មីក្រូក្រាមក្នុងមួយម៉ែត្រគូបនៃខ្យល់ បន្ទាប់មកគឺប៉ែកឦសាន ដែល PM2.5 ខ្ពស់បំផុតបានឈានដល់ ៥៩.៣មីក្រូក្រាមក្នុងមួយម៉ែត្រគូបនៃខ្យល់៕ 

អត្ថបទ៖ សុខ សុវណ្ណ

The post ថៃ រងការវាយប្រហារដោយព្យុះភ្លៀងផង និងខ្យល់ពុលផង appeared first on Kampuchea Thmey Daily.

អ្នកនាំពាក្យបានឱ្យដឹងថា នៅរាជធានីភ្នំពេញ គិតចាប់ពីម៉ោង១ ទៀបភ្លឺ រហូតដល់ម៉ោង១០ ព្រឹក ថ្ងៃទី១១ ខែកុម្ភៈ ឆ្នាំ២០២៦ គុណភាពខ្យល់មានការប្រែប្រួលខ្លាំង ដែលក្នុងនោះកំហាប់ភាគល្អិតនិចល កើតមានចន្លោះពី៣០ មីក្រូក្រាម ក្នុងមួយម៉ែត្រគូបខ្យល់(µg/m3) ទៅ១០០µg/m3 ប៉ុន្តែមានតែចំណុចក្នុងភូមិសាស្រ្តក្បែរ តំបន់វត្តឧណ្ណាលោម រាជធានីភ្នំពេញ នាវេលាម៉ោង៨ព្រឹក ប៉ុណ្ណោះដែលកំហាប់ភាគល្អិតមានការកើនឡើង ហើយបានធ្លាក់ចុះយ៉ាងឆាប់មកជាល្អធម្មតាវិញ (រូបភាពក្រាហ្វិក)។ ដូចគ្នាដែរ នៅតាមបណ្តាខេត្ត មានការកត់សម្គាល់ពីការប្រែប្រួលគុណភាពខ្យល់នៅកន្លែងខ្លះ ប៉ុន្តែមិនមានន័យថានៅទូទាំងខេត្តនោះទេ គឺនៅកន្លែងដែលអាចមានការឆេះ និងការដុតជាដើម។

អ្នកនាំពាក្យបញ្ជាក់ថា ការផ្សាយរបស់ព័ត៌មានអន្តរជាតិមួយចំនួន ជារឿយៗបង្ហាញពីការព្រួយបារម្ភ អំពីគុណភាពខ្យល់ នៅតាមបណ្តាប្រទេសកំពុងអភិវឌ្ឍន៍ រួមទាំងតំបន់អាស៊ីអាគ្នេយ៍ផងដែរ ដោយផ្តោតលើកំហាប់ភាគល្អិត PM2.5 កើនឡើង ដែលបានឆ្លុះបញ្ចាំងលើស្តង់ដាគុណភាពខ្យល់ជាតិ នៃប្រទេសនីមួយៗ ដែលបានកំណត់យក ស្របតាមបទដ្ឋាននៃប្រទេស និងការទទួលស្គាល់ពីអង្គការសុខភាពពិភពលោក។ យ៉ាងណាក៏ដោយ កម្ពុជាបានពង្រឹងប្រព័ន្ធត្រួតពិនិត្យ និងផ្សព្វផ្សាយទិន្នន័យជាក់ស្តែង (Real-time data) ជាប្រចាំ ដើម្បីគ្រប់គ្រង និងធានាគុណភាពខ្យល់ តាមប្រព័ន្ធត្រួតពិនិត្យគុណភាពខ្យល់កម្រិតខ្ពស់ ចំនួន៥៩កន្លែងនៅទូទាំងប្រទេស រួមជាមួយស្ថានីយផ្កាយរណប ចំនួន១គ្រឿង និងរថយន្តចល័តចំនួន៣គ្រឿង ដើម្បីតាមដានកំហាប់ភាគល្អិត PM2.5 ឱ្យបានត្រឹមត្រូវ និងផ្សព្វផ្សាយផ្ទាល់ជូនសាធារណជន (Real time) បានជ្រាប។ ការផ្សព្វផ្សាយជាសាធារណៈមានបង្ហាញ ទិន្នន័យគុណភាពខ្យល់ និងវិធានការការពារសុខភាព។

អ្នកនាំពាក្យក្រសួងបរិស្ថាន បានស្នើឱ្យសាធារណជន តាមដានព័ត៌មានស្តីពៅគុណភាពខ្យល់ ជាផ្លូវការ ដែលក្រសួងបានចេញផ្សាយ តាមរយៈវេបសាយ www.airquality.moe.gov.kh និងកម្មវិធីទូរស័ព្ទដៃ (APP) ឈ្មោះ CGS SPA ឬទាញយកកម្មវិធីសម្រាប់ Android និង IOS បានក្រប់ពេលវេលា។ ព័ត៌មានគុណភាពខ្យល់ មានផ្សាយតាមបណ្តាយផេកហ្វេសប៊ុករបស់ក្រសួងបរិស្ថាន: Ministry of Environment និងបណ្តាញផ្សព្វផ្សាយមួយចំនួនថែមទៀត។

អ្នកនាំពាក្យអះអាងថា ជាមួយគ្នានេះក្រសួងបរិស្ថានបាននិងកំពុងចាត់វិធានការទប់ស្កាត់ការបំពុលខ្យល់ ដោយធ្វើការផ្សព្វផ្សាយជាប្រចាំ និងអនុវត្តវិធានការទប់ស្កាត់ការបំពុល រួមមានការកាប់រុករានដី ឆ្ការដុតព្រៃ ការដុតសំណល់កសិកម្ម គល់ជញ្ជ្រាំង និងសំរាមសំណល់ប្លាស្ទិកជាដើម៕

The post ក្រសួងបរិស្ថាន៖ គុណភាពខ្យល់នៅកម្ពុជា មានការប្រែប្រួលខ្លាំងតាមតំបន់ខ្លះ តែមិនមែនទូទាំងប្រទេសឡើយ ហើយមិនទាន់មានការប្រកាសអាសន្នឡើយ appeared first on Kampuchea Thmey Daily.

តាមការផ្សាយរបស់ Amarin, នៅម៉ោង៧ព្រឹក, PM2.5 ជាមធ្យមនៅបាងកក បានឈានដល់កម្រិតគ្រោះថ្នាក់ពណ៌ទឹកក្រូច ៤១.១មីក្រូក្រាមក្នុងមួយម៉ែត្រគូបនៃខ្យល់ ពោលគឺវាលើសពីកម្រិតស្តង់ដារដែលកំណត់ត្រឹម ៣៧.៥មីក្រូក្រាមប៉ុណ្ណោះ។

ខ្យល់ពុលនៅបាងកក បានគ្របដណ្តប់ខ័ណ្ឌចំនួន១២ ក្នុងនោះ Lat Krabang ត្រូវរងគ្រោះខ្លាំងជាងគេដោយ PM2.5 ហក់ឡើងដល់ ៦១.៦ មីក្រូក្រាមក្នុងមួយម៉ែត្រគូបនៃខ្យល់ឯណោះ បន្ទាប់មកគឺ Bang Rak (៥៣.៤មីក្រូក្រាម) និង Prawet (៤៩.៤មីក្រូក្រាម)។

ខ្យល់ពុលគឺជាបញ្ហាដ៏រ៉ាំរ៉ៃនៅប្រទេសថៃ ដែលមកទល់ពេលនេះ រដ្ឋាភិបាលទីក្រុងបាងកក គ្មានវិធានការដោះស្រាយចេញទេ។ 

តាមរបាយការណ៍ មូលហេតុនៃខ្យល់ពុល គឺបណ្តាលមកពីការដុតជញ្ជ្រាំងស្រូវ ចម្ការអំពៅ និងចម្ការជ័រកៅស៊ូ ដើម្បីត្រៀមដីសម្រាប់រដូវថ្មី។ ការប្រើប្រាស់រថយន្តម៉ាស៊ីនម៉ាស៊ូតចាស់ៗ និងសកម្មភាពឧស្សាហកម្មក្នុងទីក្រុងធំៗដូចជាបាងកក ក៏រួមចំណែកបង្កជាខ្យល់ពុលផងដែរ។

មួយឆ្នាំៗ ប្រជាជនថៃរាប់លាននាក់ កើតជំងឺដោយសារខ្យល់ពុល ខណៈយោងតាមទិន្នន័យក្នុងឆ្នាំ២០២៥ ប្រជាជនថៃរហូតដល់ទៅជាង ១០លាននាក់មានបញ្ហាសុខភាពធ្ងន់ធ្ងរ ដោយសារតែឥទ្ធិពល PM2.5។

ក្នុងចំណោមមនុស្សទាំងជាង១០លាននាក់នោះ ភាគច្រើនមានបញ្ហាផ្លូវដង្ហើម ដូចជាជំងឺហឺតនិងជំងឺស្ទះសួតរ៉ាំរ៉ៃ ហើយអ្នកខ្លះមានឡើងកន្ទួលលើស្បែកនិង បញ្ហាភ្នែក។ ក្នុងករណីធ្ងន់ធ្ងរបំផុត អ្នកជំងឺផ្លូវដង្ហើមខ្លះ ត្រូវការជំនួយពីម៉ាស៊ីនដកដង្ហើមជាចាំបាច់ដើម្បីរស់ ហើយខ្លះឈានដល់ការជំងឺមហារីកសួតតែម្តង៕

អត្ថបទ៖ សុខ សុវណ្ណ

The post សឹងពេញមួយក្រុងបាងកក ត្រូវគ្របដណ្តប់ដោយខ្យល់ពុល កម្រិតគ្រោះថ្នាក់ appeared first on Kampuchea Thmey Daily.