គូស្នេហ៍ Archives - Kampuchea Thmey Daily

វត្ថុ ៨យ៉ាង គេជឿថា នាំលាភសំណាងឱ្យឆាប់ដល់គូ

Sonya — Thu, 09 Feb 2023 13:48:10 +0000

ជំនឿក្រៅខ្លួន ជាថាមពលវិជ្ជមានមួយប្រភេទដែលមនុស្សជំនាន់មុននិយមប្រើអស់មកជាច្រើនពាន់ឆ្នាំ ព្រោះវាជាទំនាក់ទំនងពិសេសម្យ៉ាងដែលមិនអាចកាត់ផ្ដាច់ពីការរស់នៅបានឡើយ។ តួយ៉ាង ក្នុងរឿងគូស្រករ ការភ្ជាប់និស្ស័យស្នេហ៍តាមរយៈវត្ថុស័ក្តិសិទ្ធិ គឺជាជំនឿមួយ ដែលគេនិយមធ្វើតៗគ្នា ជាពិសេសសម្រាប់អ្នកដែលចង់ឱ្យខ្លួនឆាប់មានគូ។

១. អណ្ដាតសារិកា (សារិកា លិនថោង)

បន្តោងខ្សែក ដាក់អាណ្ដាតសត្វសារិកា ត្រូវបានគេជឿថា បង្កើនភាពទាក់ទាញ ក្ដីមេត្តា និងសំណាងខាងជីវិតគូ។ វាជួយបង្កើនទំនាក់ទំនង ការចរចា និងនិយាយអ្វីក៏ត្រូវចិត្តមនុស្ស។ សូម្បីអ្នកដែលចង់លែងលះ ក៏អាចត្រូវរ៉ូវគ្នាវិញ ប្រសិនពាក់វត្ថុស័ក្តិសិទ្ធិនេះជាប់នឹងខ្លួន។ វាក៏ជាគ្រឿងអលង្ការមានការពេញនិយមក្នុងចំណោមអ្នកប្រកបរបររកស៊ីជួញដូ ឬអ្នកដែលឧស្សាហ៍ជួបបញ្ហាការងារផងដែរ។

២. ខ្សែអំបោះក្រហម

អំបោះក្រហម ជាវត្ថុនាំសំណាង តំណាងស្នេហាដ៏ពេញនិយមក្នុងប្រទេសចិន ហុងកុង និងតៃវ៉ាន់។ យោងទៅតាមរឿងព្រេង គេជឿថា មនុស្សដែលកើតមកមាននិស្ស័យជាមិត្ត ១០០ឆ្នាំជាមួយគ្នា តែងតែខ្សែជាប់មកនូវអំបោះពណ៌ក្រហមចងនៅចុងម្រាមដៃ ហើយមនុស្សមិនមែនជាគូ នឹងមិនអាចមើលឃើញនោះទេ។ ដូច្នេះ សម្រាប់អ្នកមិនមានអំបោះក្រហម នៅនឹងដៃ គួរប្រើអំបោះពណ៌នេះជាខ្សែដៃពាក់ជានិច្ច។

៣. បន្តោងគុជ

បើនិយាយដល់អាគមមន្តស្នេហ៍ ប្រជាជនកោះតៃវ៉ាន់ តែងតែមានបន្តោងគុជមួយដាក់តាមខ្លួន ឬពាក់ជាប់នឹងចង្កេះមិនដែលខាន ព្រោះគេជឿថា វាជាវត្ថុស័ក្តិសិទ្ធិដែលអាចទាក់ទាញមនុស្សភេទផ្ទុយឱ្យចូលមកក្បែរ សាងស្នេហ៍ជាគូអនាគត។

៤. បន្តោងខ្សែក

តាមជំនឿប្រទេសមីយ៉ាន់ម៉ា បន្តោងខ្សែក ជានិមិត្តរូបជួយលើកកម្ពស់ជីវិត បង្កើនភាពទាក់ទាញ និងមានតែមនុស្សចោមរោមស្រឡាញ់។ បើធ្វើជំនួញ ឬជួញដូរ នឹងមានមនុស្សចិត្តល្អជួយជ្រោមជ្រែងជានិច្ច។

៥. រូបសំណាកព្រះពុទ្ធ

រូបសំណាកព្រះពុទ្ធ ជាគ្រឿងសក្ការរបស់ប្រជាជនថៃ ដែលគេជឿមុតមាំថា ប្រើជាប់ខ្លួននឹងបង្កើនភាពទាក់ទាញ និងក្តីអាណិតស្រឡាញ់ពីមនុស្សជុំវិញខ្លួន។

៦. ថង់ក្រអូប

ថង់ក្រអូប ច្នៃពីក្រណាត់ និងប៉ាក់ផ្កា ជាវត្ថុមានប្រជាប្រិយភាពក្នុងចំណោមភ្ញៀវទេសចរនៅប្រទេសថៃ ព្រោះប្រជាជនដើមជឿថា នៅពេលគោរពបូជាវត្ថុប្រភេទនេះនឹងមានតែសំណាងក្នុងរឿងស្នេហា។

៧. ក្រមួនស្នេហ៍

ក្រមួនស្នេហ៍ ជាវត្ថុស័ក្តិសិទ្ធិពីប្រទេសសចិន សិង្ហបុរី សម្រាប់អ្នកនៅលីវ មិនថាក្នុងសង្គមអតីតកាល និងបច្ចុប្បន្នឡើយ។ ប្រើវាកាលណា គេជឿថា អាចជួយបន្ថែមភាពទាក់ទាញ មានតែមនុស្សស្រឡាញ់រាប់អាន ទាក់ទាញភេទផ្ទុយគ្នា និងចងចិត្តដៃគូមិនឱ្យបែកបែរ។

៨. យ័ន្តស្នេហ៍

យ័ន្តស្នេហ៍ ជាជំនឿរបស់ថៃ ដែលត្រូវបានគេជឿថា ការថ្វាយបង្គំ ឬដាក់វាតាមខ្លួន នឹងបង្កើនភាពទាក់ទាញ និងបង្កើនជោគវាសនាល្អនៃទំនាក់ទំនងស្នេហា។

តើប្រិយមិត្តជឿកម្រិតណាដែរ?

អត្ថបទ៖ សន្យា

ចុចអាន៖ ទិវានៃក្ដីស្រឡាញ់ រើសរុក្ខជាតិ ៤នេះ ជូនមនុស្សពិសេស នឹងផ្ដល់សំណាងដល់ពួកគេ

ចុចអាន៖ ទស្សន៍ទាយជោគជតារាសី ឆ្នាំកំណើតទាំង ១២ អំឡុងខែកុម្ភៈ

The post វត្ថុ ៨យ៉ាង គេជឿថា នាំលាភសំណាងឱ្យឆាប់ដល់គូ appeared first on Kampuchea Thmey Daily.

អំណាចនៃស្នេហ៍ពិត នឹងធ្វើឲ្យអ្នកជួបរឿងល្អៗចូលមកក្នុងជីវិត

សាង ស្រីល័ក្ខ — Fri, 03 Feb 2023 08:36:50 +0000

ហេតុអ្វីបានជាស្នេហា ធ្វើឲ្យយើងចង់ក្លាយជាមនុស្សល្អ? តើអំណាចនៃស្នេហា ពិតជាអាចកែប្រែមនុស្សបាន? មនុស្សជាច្រើនដែលមិនធ្លាប់មានស្នេហាពិតប្រាកដ ប្រហែលជាមិនយល់ពីវាទេ។ ដែលជាអំណាចនៃសេចក្តីស្រឡាញ់ ជារឿយៗគេនិយាយទាំងវិជ្ជមាន និងអវិជ្ជមាន។

អំណាចនៃសេចក្តីស្រឡាញ់អវិជ្ជមាន ដូចពាក្យចាស់តែពោលថា “សេចក្ដីស្រឡាញ់គឺធ្វើឲ្យខ្វាក់ភ្នែក”។ ពួកគេមិនឃើញអ្វីដែលគួរមើលឃើញឡើយ។ ប៉ុន្តែងប់ងុលស្រលាញ់ នឹងធ្វើឲ្យយើងខកចិត្ត ហើយជ្រើសរើសបដិសេធការពិត។ ចំណែកអំណាចនៃសេចក្តីស្រឡាញ់នៅក្នុងវិធីវិជ្ជមាន មានន័យថា “ស្នេហាធ្វើឲ្យខ្ញុំចង់ក្លាយជាមនុស្សល្អមួយរូប” ទោះបីជាដៃគូមិនសុំឲ្យអ្នកផ្លាស់ប្តូរខ្លួនឯងក៏ដោយ នោះហើយជាមូលហេតុដែលស្នេហា ធ្វើឲ្យមនុស្សចង់ក្រោកឡើង ហើយវាក៏អាចជះឥទ្ធិពលដល់បេះដូង ដែលធ្វើឲ្យមនុស្សចង់កែប្រែខ្លួនឯងខ្លាំងដែរ។

ស្នេហាបង្រៀនអ្នកនូវអ្វីមួយ នៅក្នុងទំនាក់ទំនង ស្នេហានឹងអនុញ្ញាតឲ្យអ្នករៀនអ្វីដែលថ្មី ពេញចិត្តចំពោះអ្វីដែលអ្នកមិនធ្លាប់គិតថាអ្នកអាចរីករាយ។ ដឹងពីរបៀបដោះស្រាយជាមួយខ្លួនឯង ថាតើវាជាការឆ្លើយតបរបស់អ្នកចំពោះស្ថានភាពជាក់លាក់ ឬអ្វីៗដែលអ្នកអាចកែលំអបាន។ មួយទៀតគឺបង្ហាញពីទិដ្ឋភាពល្អនៃបុគ្គលិកលក្ខណៈខ្លួនឯង ដែលអ្នកប្រហែលជាមិនធ្លាប់បានដឹង។

ស្នេហាផ្តល់ឲ្យអ្នកនូវទស្សនៈថ្មីៗ មនុស្សធំឡើងជាមួយនឹងទស្សនៈ គំនិត និងជំនឿលើពិភពលោក ដែលតែងតែប្រកាន់យកតាមរបៀបនោះ។ រហូតដល់ទស្សនៈមួយទៀតលេចចេញមក។ ជាការពិតដែលមនុស្សតែងតែបញ្ចប់ទំនាក់ទំនងជាមួយមនុស្សដែលមានទស្សនៈពិភពលោកស្រដៀងគ្នា ប៉ុន្តែអ្នកមិនដូចគ្នាទាំងអស់នោះទេ។ មានជំនឿជាច្រើនដែលមនុស្សជាទីស្រលាញ់មើលឃើញខុសពីអ្នក ហើយអ្នកមិនចាំបាច់យល់ព្រមជាមួយមនុស្សជាទីស្រឡាញ់ជានិច្ចនោះទេ។ ប៉ុន្តែគួរតែមើលឃើញថាមានភាពខុសគ្នា វាជួយពង្រីកការយល់ដឹង និងមើលឃើញទស្សនៈថ្មីលើជីវិត។

ស្នេហាធ្វើឲ្យកាន់តែភ្លឺ យើងធ្លាប់មានជីវិតធ្ងន់ធ្ងរពេក ឬតានតឹងពេករហូតធ្វើឲ្យឈឺចាប់ ប៉ុន្តែប្រសិនបើមានស្នេហាល្អ អ្នកនឹងឃើញថាមានរឿងគួរឲ្យចាប់អារម្មណ៍ជាច្រើននៅក្នុងជីវិតចូលមក។ គ្រាន់តែឃើញមុខមនុស្សដែលយើងស្រលាញ់ យើងនឹងមានអារម្មណ៍ថា អ្វីៗកាន់តែងាយស្រួលដោះស្រាយ។ ភាពតានតឹងក៏តិច ហើយកាន់តែរីករាយជាងមុន វាមិនគ្រាន់តែកែលំអអាកប្បកិរិយាប៉ុណ្ណោះទេ ប៉ុន្តែក៏ដើម្បីបង្កើនបុគ្គលិកលក្ខណៈផងដែរ។

ស្នេហាធ្វើឲ្យមានអារម្មណ៍ល្អ ស្នេហ៍ពិតនឹងជួយយឹតយោងគ្នា ហើយតែងមិនចង់ឲ្យរឿងអាក្រក់មករំខានដល់ការគិតពីសុភមង្គលចំពោះមនុស្សជាទីស្រឡាញ់ឡើយ។ ស្នេហ៍ពិតមិនឲ្យអ្នកខឹងនិងជេរស្តីពីរឿងមិនល្អដល់ដៃគូ ព្រោះអ្នកក៏មិនចង់ឲ្យគាត់មានអារម្មណ៍អាក្រក់ ឬមានអារម្មណ៍ព្រួយបារម្ភអំពីអ្នក។ អ្នកនឹងស្ងប់ស្ងាត់ អត់ធ្មត់ ក្នុងការបង្ហាញខ្លួនឯង។

ស្នេហាគឺជាកម្លាំងជំរុញ ស្នេហាល្អជំរុញអ្នកឲ្យក្លាយជាមនុស្សល្អ ដោយមិនមានអារម្មណ៍សម្ពាធ។ វានឹងនាំអ្នកទៅរកតែរឿងល្អជានិច្ច។ ជាការពិត នៅពេលដែលអ្វីៗនៅជុំវិញល្អ នោះចិត្តខាងក្នុងនឹងជំរុញអ្នកឲ្យមានអារម្មណ៍ល្អ ក្លាយជាមនុស្សល្អ ដើម្បីសមនឹងទទួលបានរបស់ល្អដែលអ្នកបានជួបប្រទះ និងតបស្នងដល់អ្នកដែលអ្នកស្រលាញ់ ដែលអាចនាំអ្នកឲ្យឆ្លងកាត់រឿងអាក្រក់ទាំងអស់។

ស្នេហាធ្វើឲ្យមានអារម្មណ៍ថាបានបំពេញ នៅពេលដែលអ្នកមានស្នេហាល្អ នោះនឹងមិនមានអារម្មណ៍ថាបាត់អ្វីមួយឡើយ។ ដោយសារតែគូស្នេហ៍នឹងធ្វើឲ្យយើងមានអារម្មណ៍គ្រប់យ៉ាងដែលយើងចង់បាន គឺមានជានិច្ច។ គាតនឹងជាពាក់កណ្តាលទៀត ដែលជួយបំពេញអ្វីគ្រប់យ៉ាងដែលយើងមិនធ្លាប់មាន។ បំផុសគំនិតអ្នកឲ្យស្វែងរកការពេញចិត្តដោយខ្លួនឯង។ នេះជាអ្វីដែលអាចឲ្យអ្នកដឹងថា អ្នកអាចក្លាយជាមនុស្សល្អជាងមុន។

ស្នេហាជួយឲ្យសម្រេចបាននូវគោលដៅ មានគូស្នេហ៍ល្អគឺជាសំណាង មិនថាគោលដៅរបស់អ្នកស្ថិតក្នុងជីវិតបែបណានោះទេ មនុស្សដែលអ្នកស្រលាញ់ នឹងមិនដែលចោទសួរពីគោលដៅរបស់អ្នកឡើយ។ ដោយសារតែពួកគេយល់ថាគោលដៅទាំងនោះមានសារៈសំខាន់សម្រាប់អ្នក។ ទោះបីជាអ្នកមិនដែលពន្យល់ក៏ដោយ។ ពួកគេនឹងមិនព្យាយាមបញ្ឈប់អ្នកសម្រាប់ហេតុផលអត្មានិយមនោះទេ។ ពួកគេមើលឃើញសុភមង្គលផ្ទាល់ខ្លួនរបស់អ្នកថា សំខាន់ដូចពួកគេដែរ។ ប្រសិនបើអ្នកសប្បាយចិត្ត គូស្នេហ៍ក៏សប្បាយចិត្ត។

ស្នេហាផ្តល់ឲ្យនូវបញ្ហាប្រឈមដើម្បីផ្លាស់ប្តូរខ្លួនឯង ប្រសិនបើកាលពីអតីតកាល អ្នកបានរស់នៅក្នុងហានិភ័យ ការមានស្នេហាអាចធ្វើឲ្យយើងប្រែក្លាយខ្លួនឯង ទៅជាមនុស្សដែលចេះដឹង។ ដោយសារតែអ្នកចង់សប្បាយចិត្តជាមួយមនុស្សដែលអ្នកស្រលាញ់ឲ្យបានយូរ អ្នកមិនចង់នឹកពេលវេលាជាច្រើនឆ្នាំ ដែលនឹងត្រូវចំណាយជាមួយគាត់។ ហើយមិនចង់ឲ្យពួកគេមានហានិភ័យជាមួយអ្នកទេ។ អ្នកអាចឈប់ផឹកឈប់ជក់បារី ចាប់ផ្តើមធ្វើលំហាត់ប្រាណ ចាប់ផ្តើមញ៉ាំបន្លែ និងត្រី ថែរក្សាខ្លួនអ្នកឲ្យបានល្អ ចំណាយពេលជាមួយគូស្នេហ៍ច្រើនតាមដែលអាចធ្វើទៅបាន។

ស្នេហាល្អនឹងលើកទឹកចិត្តឲ្យក្លាយជាមនុស្សល្អ មនុស្សដែលស្រឡាញ់ពិតប្រាកដ មិនអនុញ្ញាតឲ្យយើងបណ្ដោយខ្លួនក្នុងរឿងអាក្រក់ទេ។ គូស្នេហ៍ពិត នឹងយកចិត្តទុកដាក់ចំពោះយើងគ្រប់ពេល ហើយតែងប្រាប់ការពិត ឲ្យយើងរៀនកែលម្អខ្លួន។ គ្រប់រឿងទាំងអស់គូស្នេហ៍ពិតតែងលើកទឹកចិត្តអ្នកឲ្យក្លាយជាមនុស្សល្អ ហើយក៏មិនមែនសម្រាប់ពួកគេទេ ប៉ុន្តែសម្រាប់ខ្លួនអ្នកនេះហើយ៕

អត្ថបទ៖ សាង ស្រីល័ក្ខ

The post អំណាចនៃស្នេហ៍ពិត នឹងធ្វើឲ្យអ្នកជួបរឿងល្អៗចូលមកក្នុងជីវិត appeared first on Kampuchea Thmey Daily.

គូស្នេហ៍ល្បីឈ្មោះលំដាប់ពិភពលោក ៧ គូនេះ ការពិតជាបងប្អូននឹងគ្នាសោះ

Boa Sokunveary — Wed, 28 Dec 2022 08:31:34 +0000

ការស្រលាញ់រវាងបងប្អូន និងប្ដីប្រពន្ធជារឿងពីរផ្សេងគ្នា តើការរៀបការអាចទៅរួចរវាងបងប្អូនទេ? ទោះបីជាការរៀបការរវាងបងប្អូនមិនសូវពេញនិយមក៏ដោយ ប៉ុន្តែជំនាន់មុនពិតជាសម្បូរខ្លាំងណាស់រួមមានបុគ្គលល្បីៗខាងក្រោមនេះដែរ ៖

១. ម្ចាស់ក្សត្រី Elizabeth II រៀបការជាមួយព្រះអង្គម្ចាស់ Philip ដែលមានជីលួតរួមគ្នា

ទ្រង់រៀបអភិសេកក្នុងឆ្នាំ១៩៤៧ រហូតដល់ឆ្នាំ២០១៧ ដែលជាឆ្នាំព្រះអង្គម្ចាស់ Philip សោយទិវង្គត ។ ខណៈមានពាក្យចចាមរ៉ាមថា ព្រះអង្គម្ចាស់ Philip ក្បត់ចិត្តម្ចាស់ក្សត្រី ទ្រង់នៅតែស្រលាញ់លះបង់សម្រាប់ព្រះស្វាមីដដែល ។

២. Kevin Bacon និង Kyra Sedgwick ជាបងប្អូនជីដូនមួយសាច់ឆ្ងាយនឹងគ្នា

តារាសម្ដែង Kevin Bacon រៀបការជាមួយ Kyra Sedgwick ក្នុងឆ្នាំ១៩៨៨ ទាំងមិនដឹងខ្លួនថាត្រូវជាបងប្អូននឹងគ្នារហូតដល់រៀបការរួចទើបបែកធ្លាយ ។

៣. លោក Rudy Giuliani រៀបការជាមួយប្អូនជីទួតមួយអស់រយៈពេល ១៤ឆ្នាំ

លោក Rudolph William Louis Giuliani គឺជាអ្នកនយោបាយ និងមេធាវីជនជាតិអាមេរិក ដែលបានបម្រើការជាអភិបាលក្រុងញូវយ៉កទី១០៧ ពីឆ្នាំ១៩៩៤ ដល់ឆ្នាំ២០០១ ។ ក្នុងឆ្នាំ១៩៦៨ គាត់រៀបការជាមួយប្អូនជីទួតមួយរបស់គាត់ឈ្មោះ Regina Peruggi ប៉ុន្តែក្រោយរៀបការរយៈពេល១៤ឆ្នាំមកនេះ ពួកគេទាំងពីរគ្មានកូនជាមួយគ្នាទេ ។

Regina Peruggi

៤. អ្នកប្រាជ្ញ អាល់បឺត អែនស្ទែន និង Elsa Lowenthal

គាត់បានរៀបការក្នុងឆ្នាំ១៩១៩ ជាមួយប្អូនជីដូនមួយដែលជាប់សាច់ឈាមទាំងខាងម្ដាយផង និងឪពុកផង ។ នេះជាមង្គលការលើកទីពីររបស់អាល់បឺត ជាអកុសល Elsa បានស្លាប់ក្នុងឆ្នាំ១៩៣៦ បាត់ទៅ ។

៥. លោក Franklin D. Roosevelt និង Eleanor Roosevelt ជាប្អូនជីដូនមួយ៥ជំនាន់

Franklin D. Roosevelt ជាប្រធានាធិបតេយ្យទី៣២នៃអាមេរិក មង្គលការរបស់គាត់ធ្វើឡើងក្នុងឆ្នាំ១៩០៥ បន្ទាប់ពីស្នេហាលួចលាក់អស់២ឆ្នាំ ។ ជីវិតអាពាហ៍ពិពាហ៍នេះមានអាយុ ៤០ឆ្នាំ និងផ្ដល់កំណើតដល់កូន ៦នាក់ ។

៦. លោក Jerry Lee Lewis រៀបការជាមួយប្អូនជីដូនមួយឈ្មោះ Myra Gale

Jerry គឺជាអ្នកចម្រៀង អ្នកនិពន្ធចម្រៀង និងជាអ្នកលេងព្យាណូ ជនជាតិអាមេរិក ។ លោកបានរៀបការជាមួយ Myra ក្នុងឆ្នាំ១៩៥៧ កាលនោះអ្នកស្រីទើបតែមានអាយុ ១៣ឆ្នាំប៉ុណ្ណោះ ។ យ៉ាងណាមិញ ចំណងស្នេហ៍គូនេះត្រូវបញ្ចប់ដោយការលែងលះក្នុងឆ្នាំ១៩៧០ ព្រោះអំពើហិង្សាលើផ្លូវកាយ និងផ្លូវចិត្ត ។

៧. លោក Edgar Allan Poe រៀបការជាមួយប្អូនជីដូនមួយឈ្មោះ Virginia Eliza Clemm

Edger ជាអ្នកនិពន្ធជនជាតិអាមេរិក គាត់រៀបការជាមួយ Virginia ពេលនាងអាយុ ១៣ឆ្នាំ និងខ្លួនលោកផ្ទាល់មានអាយុ ១៧ឆ្នាំ ។ ជាក់ស្ដែង អ្នកជីវប្រវត្តិខ្លះនិយាយថា អ្នកទាំងពីរស្រលាញ់គ្នាដូចបងប្អូនទៅវិញ ៕

ប្រែសម្រួលដោយ ៖ វារី

ចុចអាន ៖ តារាប្រុស ៦រូប ហ៊ានបើកចំហចំណងស្នេហ៍ជាមួយមនុស្សស្រីអាយុច្រើនជាងខ្លួន មិនខ្លាចពាក្យរិះគន់

ចុចអាន ៖ មកស្គាល់បុគ្គលល្បីៗទូទាំងពិភពលោក ៩ រូប មាន ជំងឺខ្វាក់ពណ៌

The post គូស្នេហ៍ល្បីឈ្មោះលំដាប់ពិភពលោក ៧ គូនេះ ការពិតជាបងប្អូននឹងគ្នាសោះ appeared first on Kampuchea Thmey Daily.

គូស្នេហ៍ ៤ ប្រភេទ មនុស្សប្រុស-ស្រីតែងប្រថ្នាចង់ជួបទៅថ្ងៃអនាគត

សាង ស្រីល័ក្ខ — Thu, 29 Sep 2022 07:52:25 +0000

សេចក្ដីស្រលាញ់ស្មោះសរជានិរន្តរ៍ដល់ចាស់កោងខ្នង អ្នកណាៗក៏ប្រាថ្នាចង់បានចូលមកក្នុងជីវិត។ ព្រោះទំនាក់ទំនងល្អមួយ ត្រូវការភាពឱបក្រសោបឲ្យបានយូរ យល់ពីទុក្ខលំបាករវាងគ្នា មិនឲ្យម្ខាងៗទៀតឯកា។ មិនមែនមាត់ថា ស្រលាញ់ៗ តែទង្វើខុសពីទ្រឹស្ដីឡើយ!

យ៉ាងណាមិញ ប្រសិនបើអ្នកបានរកឃើញគាត់ឬនាង ដែលសាងតែអារម្មណ៍ល្អៗឲ្យគ្នា ទទួលយកចរិតលក្ខណៈអាក្រក់និងល្អបាន និង បំពេញឲ្យគ្នាទៅវិញទៅមក ចូររក្សាគេទុក កុំឲ្យបាត់បង់។

១ មនុស្សដែលមិនរារាំងគោលដៅ ឬលើកទឹកចិត្តគ្រប់ពេល

អ្នកដែលអាចនៅជាមួយយើង លើកទឹកចិត្តយើងក្នុងគ្រប់មធ្យោបាយ ដោយមិនរារាំងយើងមិនថាការងារ អំពីសង្គមនិយម និងរឿងរ៉ាវនៃជីវិតរបស់យើងគ្រប់ផ្នែក។ នោះចាត់ទុកជាគូស្នេហ៍ ដែលត្រៀមដើរក្បែរយើងគ្រប់កាលៈទេសៈ។មនុស្សប្រភេទនេះ ជាមនុស្សដែលក្លាហាន និងបើកចិត្តទូលាយចំពោះគូស្នេហ៍។ គេក៏ទទួលយកការរីកចម្រើនរបស់គ្នាទៅវិញទៅមក ដោយស្មោះសរ មិនលម្អៀង ឬច្រណែនម្ខាងទៀត ដោយសារហេតុផលនានា។

២ មនុស្សដែលមិនសួរអំពីអតីតកាល

មានគូស្នេហ៍ជាច្រើន មានបញ្ហានិងទំនាស់ដោយសារតែជជីកសួររកឫសគល់ពីអតីតកាលគ្នា។ អ្នកណាក៏មានអតីតកាលជារបស់ខ្លួន ប៉ុន្តែរឿងខ្លះវាជាឯកជនភាពមិនអាចប្រាប់បាន ចំណែករឿងខ្លះ មិនគួររំលឹកឲ្យបេះដូងពើតផ្សាររៀងខ្លួនឡើយ។ ជាពិសេសអំពីអតីតគូស្នេហ៍ ដែលតែងតែក្លាយជាបញ្ហាធំសម្រាប់គូស្នេហ៍នាបច្ចុប្បន្ននេះជាច្រើន។ ដូច្នេះហើយ បើអ្នកបានជួបគាត់ឬនាង ដែលគិតតែពីអនាគតនិងតែងមានស្នេហាល្អសម្រាប់អ្នក ហើយមិនដែលសួរនាំពីអ្នកចាស់ នោះគេជាមនុស្សល្អហើយ វាក៏បង្ហាញពីការទុកចិត្តរបស់គេ មកលើអ្នកផងដែរ។

៣ អ្នកដែលតែងតែយល់ពីទំនាក់ទំនង

ត្រូវទទួលស្គាល់ថា ស្នេហាក្នុងសម័យបច្ចុប្បន្ននេះមានទម្រង់ជាច្រើន។ អ្នកខ្លះគ្រាន់តែជាមិត្តភ័ក្ដិ ឬជាមនុស្សជជែករបស់គូស្នេហ៍ប៉ុណ្ណោះ។ ដូច្នេះប្រសិនបើគាត់ឬនាងតែងតែយល់ពីទំនាក់ទំនងនេះ ហើយមិនព្យាយាមឈ្លានពានឯកជនភាពរបស់អ្នក នោះមានន័យថា គាត់គោរពសិទ្ធិរបស់អ្នក ហើយនេះគឺជាមនុស្សល្អដែលអ្នកគួរតែរក្សា ប្ដូរឋានៈទៅជាគូស្នេហ៍ដោយភាពជឿជាក់បំផុត។

៤ មនុស្សដែលស្របគំនិតគ្នា

ភាពស៊ីសង្វាក់គ្នា គឺកម្រកើតឡើងសម្រាប់គូស្នេហ៍ជាច្រើន ទំនាស់តិចតួចមិននិយាយ មិនជជែកឲ្យស្របគំនិតគ្នា យូរៗនឹងគរដូចជើងភ្នំមិនខាន។ ប្រសិនបើស្នេហារបស់អ្នក ជួបនឹងអ្នកមនុស្សដែលងាយចុះសម្រុងគ្នា បញ្ចាក់បានថា អ្នកជោគជ័យមួយកម្រិតហើយ។ បើសិនគូស្នេហ៍នៅតែរក្សាមនោសញ្ចេតនា រក្សាភាពអត់ធន់និងស្របគ្នាក្នុងរឿងរ៉ាវដែលបានកើតឡើងរវាងអ្នកទាំងពីរ តាំងពីថ្ងៃដំបូង និងសព្វថ្ងៃនេះនៅតែមិនប្រែប្រួល។ វាមានន័យថា គាត់បានបង្ហាញខ្លួនយ៉ាងច្បាស់តាំងពីដើមមក។ ដូច្នេះហើយ ចាត់ទុកថាជាគូស្នេហ៍ដែលអាចប្រើជីវិតរួមគ្នា ទៅថ្ងៃអនាគតបានឥតគិតច្រើន។

ត្បិតថាមនុស្សល្អ៤ប្រភេទខាងលើពិបាករក ប៉ុន្តែបើបានជួបហើយ ចូរថែរក្សាឲ្យជាប់ កុំឲ្យបាត់បង់ ហើយមកសម្រក់ទឹកភ្នែកស្ដាយក្រោយហួសពេល។ ព្រោះអ្នកដែលយល់ពីយើងគ្រប់ផ្នែក គ្រប់រឿងរ៉ាវ និងព្រមដាក់ខ្លួន ហើយមិនអើពើនឹងអតីតកាល នៅតែស្រឡាញ់អ្នកជាអ្នកតាំងពីថ្ងៃដំបូងរហូតដល់ថ្ងៃនេះ ចាត់ទុកថាជាមនុស្សវិសេសវិសាល ពិបាកស្វែងរកណាស់ក្នុងសង្គមបច្ចុប្បន្ន។ ជួបហើយចូរថែឲ្យគង់ មនុស្សល្អៗបែបនេះ ដើរមួយផែនដីសឹងថារកមិនឃើញផង!

អត្ថបទ៖ សាង ស្រីល័ក្ខ

ចុចអាន៖ឃ្លាសារភាពស្នេហ៍ ២៩ ប្រយោគ សម្រាប់អ្នកលួចស្រលាញ់គេតែម្នាក់ឯង

ចុចអាន៖ទំនាក់ទំនងពោរពេញដោយការកុហក ចុងក្រោយ នឹងទទួលបានបែបនេះក្នុងជីវិត

The post គូស្នេហ៍ ៤ ប្រភេទ មនុស្សប្រុស-ស្រីតែងប្រថ្នាចង់ជួបទៅថ្ងៃអនាគត appeared first on Kampuchea Thmey Daily.

តារាប្រុស ៦រូប ហ៊ានបើកចំហចំណងស្នេហ៍ជាមួយមនុស្សស្រីអាយុច្រើនជាងខ្លួន មិនខ្លាចពាក្យរិះគន់

Sonya — Mon, 11 Jul 2022 13:25:35 +0000

កាលពីមុន បុរសស្រឡាញ់មនុស្សស្រីចាស់ជាងខ្លួន រមែងត្រូវគេនិយាយខ្សឹបខ្សៀវមុខក្រោយមិនឈប់។ យ៉ាងណាមិញ នាពេលបច្ចុប្បន្ន ស្នេហាខុសវ័យ ឬមនុស្សស្រីអាយុច្រើន លែងជារឿងចម្លែកទៀតហើយ ជាពិសេសនៅក្នុងវិស័យសិល្បៈតែម្តង។ ជាក់ស្ដែងតារាប៉ុន្មានគូខាងក្រោមនេះ សុទ្ធសឹងមានកេរ្តិ៍ឈ្មោះល្បីល្បាញក្នុងពិភពកម្សាន្ត ប៉ុន្តែពួកគេហ៊ានបើកបង្ហាញពីទំនាក់ទំនងជាសាធារណៈ មិនខ្លាចពាក្យរិះគន់ឡើយ។

Britney Spears និង Sam Asghari

ម្ចាស់ក្សត្រីប៉ុប Britney Spears បានធ្វើឱ្យមហាជនស្ងើចចំពោះទំនាក់ទំនងអាពាហ៍ពិពាហ៍រវាងនាងនិងតារាសម្តែង Sam Asghari កាលពីពេលថ្មីៗនេះ។

គូស្នេហ៍នេះបានស្គាល់គ្នា បន្ទាប់ពីថត MV បទ “Slumber Party” ឆ្នាំ២០១៦ ហើយអ្នកទាំងពីរចាប់ផ្ដើមមានអារម្មណ៍ល្អឱ្យគ្នាទៅវិញទៅមក។ ក្នុងអំឡុងពេលមានស្នេហា Sam Asghari ធ្លាប់រងការរិះគន់ថា ចង់តោងមិត្តស្រីដើម្បីល្បី ជាពិសេសសំឡឹងឃើញទ្រព្យរបស់នាង។ ដោយមិនអើពើពីពាក្យចចាមអារ៉ាម មិត្តប្រុសអាយុប្អូន ១៣ឆ្នាំ ក៏បានរៀបការជាមួយ Britney Spears ដោយសុភមង្គល។

Jennifer Lopez និង Ben Affleck

គូស្នេហ៍ Jennifer Lopez និង Ben Affleck បានជួបគ្នាពេលកំពុងថតរឿង “Gigli” ក្នុងឆ្នាំ២០០៣ ។ ពួកគេបានចាប់ផ្តើមទាក់ទងគ្នានៅឆ្នាំ២០០២ ហើយតារាសម្តែង Ben Affleck ក៏បានសុំ Jennifer Lopez ទាក់ទងគ្នានៅចុងឆ្នាំនោះ។ បច្ចុប្បន្ននាងអាយុ ៥៣ឆ្នាំ ខណៈតារាសម្តែង Ben Affleck អាយុ ៥០ឆ្នាំ។

ទោះយ៉ាងណា នៅឆ្នាំ២០២១ អ្នកទាំងពីរបានប្រកាសបែកគ្នា ប៉ុន្តែនៅដើមឆ្នាំ២០២២ Affleck បានសុំ Lopez រៀបការ ហើយនាងក៏យល់ព្រម។

Goldie Hawn និង Kurt Russell

តារាសម្ដែង Goldie Hawn មានអាយុ ៧៦ឆ្នាំ នៅឆ្នាំនេះ ហើយ Kurt Russell មានអាយុតិចជាងនាង ៥ឆ្នាំ។ អ្នកទាំងពីរបានជួបគ្នាក្នុងឈុត The One and Only, True, Original Family Band កាលពីឆ្នាំ១៩៦៦។

ក្នុងឆ្នាំ១៩៨៣ ពួកគេបានជួបគ្នាជាលើកទីពីរនៅលើឈុត Swing Shift ហើយពេលនោះឯងពួកគេបានលង់ស្រឡាញ់គ្នា។ មុនពេលចូលរោងការ Goldie Hawn បានរៀបការពីរដងហើយ ចំណែកតារាសម្តែង Kurt Russell ជាគូស្នេហ៍ចុងក្រោយ ដែលបន្តរហូតដល់បច្ចុប្បន្ន។

Priyanka Chopra Jonas និង Nick Jonas

គូស្នេហ៍ Priyanka Chopra Jonas និង Nick Jonas ជាគូដ៏ល្បីល្បាញបំផុតនៅក្នុងហូលីវូដ។ រាល់ពេលបង្ហាញមុខនៅមុខប្រព័ន្ធផ្សព្វផ្សាយ អ្នកទាំងពីរធ្វើឱ្យមហាជនសម្ដែងការច្រណែនព្រាត។

គេដឹងថា តារាចម្រៀងប្រុសរូបនេះ មានវ័យក្មេងជាងស្រីស្អាត Priyanka Chopra Jonas ១០ឆ្នាំឯណោះ។ អ្នកទាំងពីរបានណាត់ជួបគ្នាជាផ្លូវការ នៅឆ្នាំ២០១៧។ មួយឆ្នាំក្រោយមក ស្នេហានេះបានបញ្ចប់ដោយចំណងអាពាហ៍ពិពាហ៍ ហើយសព្វថ្ងៃអ្នកទាំងពីរមានកូនប្រុសម្នាក់ផងដែរ។

Olivia Wilde និង Harry Styles

ថ្មីៗនេះ គេបានឃើញរូបភាពជាច្រើនសន្លឹករបស់ Olivia Wilde និង Harry Styles ដើរចាប់ដៃគ្នានៅតាមដងផ្លូវ។ តាមប្រភពគូស្នេហ៍នេះមានគម្លាតអាយុគ្នា ១០ឆ្នាំ។

Heidi Klum និង Tom Kaulitz

ក្នុងឆ្នាំ២០១៨ គូស្នេហ៍ Heidi Klum និង Tom Kaulitz ត្រូវបានគេប្រទះឃើញបណ្ដើរគ្នាជាលើកដំបូង។ ក្រោយមកបានមួយឆ្នាំ អ្នកទាំងពីរបានសម្រេចចិត្តរៀបការនៅក្នុងប្រទេសអ៊ីតាលី។ រឿងរ៉ាវស្នេហាខុសវ័យ ១៦ឆ្នាំនៃគូស្នេហ៍នេះ ធ្វើឱ្យអ្នកគាំទ្រសរសើរគ្រប់គ្នា៕

ប្រែសម្រួល៖ សន្យា

ចុចអាន៖ គូស្នេហ៍តារាល្បីៗ ១២គូ ស្រឡាញ់គ្នាបានយូរបំផុត មិនធ្លាប់លេចឮព័ត៌មានជម្លោះ

ចុចអាន៖ Amber Heard កំពុងវ័ណ្ឌក ព្រោះគ្មានប្រាក់សង Johnny Depp

The post តារាប្រុស ៦រូប ហ៊ានបើកចំហចំណងស្នេហ៍ជាមួយមនុស្សស្រីអាយុច្រើនជាងខ្លួន មិនខ្លាចពាក្យរិះគន់ appeared first on Kampuchea Thmey Daily.

សកម្មភាព ៥ យ៉ាង អាចឈានទៅបែកបាក់គ្នា តែគូស្នេហ៍ជាច្រើនតែងចាត់ទុកធម្មតា

សាង ស្រីល័ក្ខ — Mon, 20 Jun 2022 08:05:29 +0000

មានគូស្នេហ៍ជាច្រើន តែងបញ្ចប់ទំនាក់ទំនង ក្រោមហេតុផលមានចរិតមិនចុះសម្រុងនឹងគ្នា។ ប៉ុន្តែភាពមិនចុះសម្រុងនេះ គឺដោយសារតែអ្នកទាំងពីរ មិនដែលបើកចិត្តទូលាយនិយាយគ្នា ហើយគិតថាបញ្ហាអស់ហ្នឹង ជារឿងតូចប៉ុណ្ណោះ។ ជាពិសេសរឿងតូចនេះហើយ ដែលកកកុញ កើតជាបញ្ហាធំឡើងមក រហូតចែកផ្លូវមើលមុខគ្នាមិនត្រង់។

១ តែងសម្លឹងមើលតែអតីតកាលរវាងគ្នា

គូស្នេហ៍ដែលនិយមប្រៀបធៀបជាមួយអ្នកចាស់ ហើយតែងលើកយកកំហុសពីអតីតកាលមកនិយាយគ្នាលេង ចុងក្រោយភាគីទាំងសងខាង នឹងប្រើជាលេសពេលមានបញ្ហា ហើយធ្វើឲ្យមានអារម្មណ៍មិនល្អឡើងមក។ មនុស្សណាក៏មានកំហុស តែត្រូវយកមកជាមេរៀន។ គួរតែជួយគ្នាដោះស្រាយ ប៉ុន្តែកុំនាំវាមកធ្វើឲ្យដៃគូម្ខាងទៀត ខូចចិត្តឲ្យសោះ។

២ មិនពិភាក្សាគ្នាដោយផ្ទាល់

មានរឿងជាច្រើន ដែលអ្នកចង់និយាយទៅកាន់ដៃគូ តែជ្រើសរើសមិននិយាយ ហើយរក្សាទុកតែឯង និងព្យាយាមរកវិធីធ្វើវាតាមរបៀបដែលខ្លួនឯងចង់បានវិញ។ នៅទីបំផុត រឿងទាំងនោះបានបង្កបញ្ហាធំឡើងមក។ ជាការពិតណាស់ មានរឿងខ្លះពិតជាមិនសមទំនង នឹងនិយាយទៅកាន់គូស្នេហ៍ឡើយ តែបើរឿងខ្លះ ធ្វើឲ្យអ្នកមិនសប្បាយចិត្ត ឬមិនចូលចិត្តទេចូរសាកល្បងទល់មុខជជែកគ្នាដោយស្មោះត្រង់ ជាជាងទុកចោល។

៣ ពេលខូចចិត្តយកអ្នកផ្សេងមកបញ្ឈឺគ្នា

បើធ្វើបែបនេះ មិនបានជួយឲ្យទំនាក់ទំនងប្រសើរឡើយ តែក៏អាចឈានទៅបែកបាក់គ្នា។ បើមិនពេញចិត្ត មិនចាំបាច់ទៅរកអ្នកផ្សេងមកជំនួសគ្នានោះទេ។ ជាធម្មតា ជម្លោះនិងបញ្ហាអាចកើតឡើងរវាងគូស្នេហ៍ ប៉ុន្តែយើងត្រូវនិយាយគ្នាច្រើនជាងដាក់បន្ទុកឲ្យគ្នា។ មនុស្សគ្រប់រូបគឺជាមនុស្សដែលអាចធ្វើខុស និងរៀនបាន។ កុំលើកការគំរាមកំហែង ឬពាក្យសំដីបំបាក់ទឹកចិត្តគ្នាឲ្យសោះ។

៤ មិនទម្លាប់គ្រប់គ្រងអារម្មណ៍ខឹងមួយឆាវ

មនុស្សគ្រប់រូបមានថ្ងៃល្អឬអាក្រក់ ហើយវានឹងធ្វើឲ្យយើងមានអារម្មណ៍មិនល្អ។ ចៃដន្យ ដៃគូរបស់យើងបានបង្កើតរឿងណាមួយឡើងមក ក្លាយជាការខឹងសម្បារ រហូតមួម៉ៅឡើងមក។ ដូច្នេះចូរព្យាយាមគ្រប់គ្រងអារម្មណ៍របស់អ្នកឲ្យបានល្អប្រសើរជាងជាងជះកំហឹងឲ្យគ្នា។

៥ ការច្រណែន ឬប្រចណ្ឌហួសហេតុពេក

ការច្រណែនឬប្រចណ្ឌគឺជារឿងធម្មតា លើសពីនេះ វាក៏ជាពេលមួយ គួរឲ្យស្រលាញ់ផងដែរ ។ ប៉ុន្តែបើដៃគូបង្ហាញភាពច្រណែន ឬប្រចណ្ឌហួសហេតុពេក បើទោះជាភាគីម្ខាងទៀតមិនទាន់បានធ្វើអ្វីក៏ដោយ វាក៏អាចនាំឲ្យមានជម្លោះឡើងមកបានដែរ។ យ៉ាងណាមិញ អាចពិបាកបន្តិចក្នុងការនិយាយថាត្រូវធ្វើអ្វី ប៉ុន្តែគន្លឹះសំខាន់ គឺត្រូវទុកចិត្តគ្នា ជឿជាក់គ្នាទៅវិញទៅមក កុំធ្វើអ្វីដែលធ្វើឲ្យអ្នកម្ខាងទៀត ព្រួយបារម្ភហួសហេតុ។

ទោះយ៉ាងណា បញ្ហាតូចៗនេះអាចនិយាយបានថាមិនសំខាន់ឬ ចាត់ទុកវាជារឿងធម្មតា ប៉ុន្តែប្រយ័ត្នរឿងកាក់ល្អិតនេះកក់កុញ នាំឲ្យឲ្យមានបញ្ហាធំ។ មានតែការបើកចិត្តព្រមទទួលយកគ្នា ព្រមនិយាយទល់មុខដោយស្មោះ គ្មានការលាក់លៀម ទើបអាចរស់នៅមានសុភមង្គលដូចគេ។ ភាពមិនស្មោះត្រង់ នឹងនាំឲ្យអ្នកទាំងពីរឈានទៅបែកបាក់គ្នា ទោះរឿងតូចមួយក៏ដោយ៕

ប្រែសម្រួល៖ សាង ស្រីល័ក្ខ

ចុចអាន៖ចរិតលក្ខណៈ ៥ យ៉ាង របស់គូស្នេហ៍ ដែលបញ្ចាក់ថា គាត់ស្រលាញ់អ្នកស្មោះខ្លាំង

The post សកម្មភាព ៥ យ៉ាង អាចឈានទៅបែកបាក់គ្នា តែគូស្នេហ៍ជាច្រើនតែងចាត់ទុកធម្មតា appeared first on Kampuchea Thmey Daily.

Miss Universe ៣ រូប ហ៊ានបង្ហាញមុខគូស្នេហ៍ឲ្យអ្នកគាំទ្រស្គាល់ជាសាធារណៈ

Sorn Phanith — Thu, 26 May 2022 08:11:14 +0000

មិនត្រឹមតែបញ្ចេញសម្រស់ទាក់ទាញទស្សនិកជននិងអ្នកគាំទ្រប៉ុណ្ណោះទេ តែបវរកញ្ញាចក្រវាឡ ៣ រូបនេះ ក៏ហ៊ានបញ្ចេញមុខបុរសជាគូស្នេហ៍ឲ្យអ្នកគាំទ្រស្គាល់ជាសាធារណៈ។

មួយរយៈចុងក្រោយនេះ វិស័យបវរកញ្ញាកំពុងទទួលបានការគាំទ្រជោគជាំជាខ្លាំងពីសំណាក់ប្រជាជនកម្ពុជា ហើយក៏បានធ្វើឲ្យបរទេសចាប់អារម្មណ៍ជាមួយបេក្ខភាពតំណាងប្រទេសមិនថា សម្រស់ ចំណោះដឹង បូករួមនឹងទេពកោសល្យផងដែរ។ ស្របពេលវិស័យនេះកំពុងរីកចម្រើននៅក្នុងប្រទេស ស្រាប់តែបវរកញ្ញាចក្រវាឡ ៣ រូបនេះ បើកមុខបុរសជាគូស្នេហ៍ជាសាធារណៈឲ្យអ្នកគាំទ្រស្គាល់ ដោយមិនខ្លាចការបាត់បង់ប្រជាប្រិយភាព។

១. កញ្ញា ប៊ី សុធារី

កញ្ញា ប៊ី សុធារី អតីតបវរកញ្ញាចក្រវាឡឆ្នាំ ២០១៧ បានបង្ហាញមុខគូស្នេហ៍ជាបុរសសង្ហាសាច់សឲ្យអ្នកគាំទ្រស្គាល់ ដោយមិនញញើតពីអ្នករិះគន់។

២. កញ្ញា រ៉េត សារីតា

ក្រោយបញ្ចប់ការប្រកួតបវរកញ្ញាចក្រវាឡឆ្នាំ ២០២០ នៅប្រទេសអាមេរិក កញ្ញា រ៉េត សារីតា បានបង្ហាញមុខបុរសគូស្នេហ៍ជនជាតិបរទេសជាសាធារណៈ ដើម្បីជម្រះមន្ទិលសង្ស័យរបស់អ្នកគាំទ្រឲ្យដឹងពីទំនាក់ទំនងស្នេហារបស់ខ្លួន។

៣. កញ្ញា ងិន ម៉ារ៉ាឌី

កាលពីពេលថ្មីនេះ ស្រីតូចច្រឡឹង ងិន ម៉ារ៉ាឌី បវរកញ្ញាចក្រវាឡឆ្នាំ ២០២១ បានបង្ហោះរូបភាពមួយសន្លឹក បង្ហាញពីភាពស្និទ្ធស្នាលជាមួយគូស្នេហ៍ផ្អើលអ្នកគាំទ្រ ក្រោយជោគជ័យលើឆាតប្រកួតនៅប្រទេសអ៉ីស្រាអែល។

អត្ថបទ៖ ផានិត

The post Miss Universe ៣ រូប ហ៊ានបង្ហាញមុខគូស្នេហ៍ឲ្យអ្នកគាំទ្រស្គាល់ជាសាធារណៈ appeared first on Kampuchea Thmey Daily.

តារាថៃ ៤គូ ស្រឡាញ់គ្នាចាក់ទឹកមិនលិច រហូតជាប់ឈ្មោះជាគូស្នេហ៍គំរូ ប្រចាំប្រទេស

Sonya — Sun, 08 May 2022 10:20:02 +0000

ក្នុងវិស័យសិល្បៈ តារាៗលង់ស្រឡាញ់គ្នា យើងអាចមើលឃើញ មិនចេះតិចគូនោះទេ។ យ៉ាងណាមិញ គូស្នេហ៍ដែលអាចរក្សាចំណងស្នេហ៍បានយូររហូតដល់ថ្ងៃចូលរោងការ ឬរៀបការនឹងគ្នាបានយូរឆ្នាំ បែរក្លាយទៅជារឿងកម្រទៅវិញ។

ទោះយ៉ាងណា កម្រមិនមែនមានន័យថាគ្មានទេ! ជាក់ស្ដែងតារាប្រុសស្រី ថៃ ៤គូនេះ ជាគូស្នេហ៍ដែលមហាជនចាត់ទុកជាគូស្នេហ៍ឆ្នើម ដែលគួរយកគំរូតាម ជាពិសេសពួកគេមិនដែលលេចឮព័ត៌មានជម្លោះសូម្បីម្ដង។

Mai Davika និង Ter Chantavit

Mai Davika និង Ter Chantavit ត្រូវបានអ្នកគាំទ្រជាច្រើនដាក់នាមជា “គូស្នេហ៍ដ៏ល្អបំផុត ក្នុងវិស័យសិល្បៈថៃ” ព្រោះតារាប្រុសស្រីមួយគូនេះ សុទ្ធតែមានឈ្មោះល្បីល្បាញ ដូចគ្នា។

គូស្នេហ៍មួយគូនេះបើកបង្ហាញទំនាក់ទំនងជាសាធារណៈក្នុងឆ្នាំ ២០១៨ ហើយទទួលបានមតិរិះគន់ជាច្រើន ក្រោយប្រកាសស្នេហាផ្លូវការ។ ដោយសារតារាប្រុស Ter Chantavit មានអាយុលើស Davika ៩ឆ្នាំ ទើបធ្វើឲ្យពួកគេពិបាកគេចផុតពីការនិយាយដើមរបស់មហាជន។ យ៉ាងណាមិញ ពេលវេលាបានបង្ហាញឲ្យឃើញហើយថា គូស្នេហ៍មួយគូនេះ ពិតជាស្រឡាញ់គ្នាស្មោះ ហើយមកទល់នឹងបច្ចុប្បន្នពួកគេទទួលបានការគាំទ្រកាន់តែខ្លាំងឡើងពីទស្សនិកជន។

យោងតាមព័ត៌មានក្នុងស្រុកជាច្រើនបានឱ្យដឹងថា បើសិនម្ចាស់ប្រេនឬកម្មវិធីចង់ជួលគូស្នេហ៍នេះ ឱ្យផ្សព្វផ្សាយផលិតផល ឬចូលរួមព្រឹត្តិការណ៍ណាមួយ ពួកគេត្រូវចំណាយប្រាក់ចំនួន ៥សែនបាតលើអ្នកទាំងពីរ។

Yaya Urassaya និង Nadech Kugimiya

គូស្នេហ៍មួយគូនេះវិញ ក៏មិនអន់ដែរ ពួកគេសុទ្ធតែជាប្រុសស្អាតស្រីស្អាត និងមានទេពកោសល្យជាមួយនឹងកេរ្តិ៍ឈ្មោះសុះសាយមិនចាញ់គ្នា។

ក្នុងឆ្នាំ ២០១០ រឿងភាគ Akkanee’s Heart គឺជាខ្សែភាពយន្តដែលYaya Urassaya និង Nadech Kugimiya សម្ដែងរួមគ្នាលើកដំបូង។ ក្រោយពីរឿងដំបូងចាក់ផ្សាយចប់ អ្នកទាំងពីរតែងតែប៉ះគ្នាជាញឹកញាប់ ក្នុងនាមជាតួឯក រហូតហ្វេននាំគ្នាចំអន់លាន់។ រហូតដល់ឆ្នាំ២០១៩ នៅពេលដែល Yaya បង្ហាញមុខក្នុងកម្មវិធីប្រគុំតន្ត្រីរបស់តារាសម្តែង Nadech លោកបានប្រកាសថា នាងជាគូស្នេហ៍របស់លោក។

Jooy Warattaya និង Push Puttichai

Jooy Warattaya និង Push Puttichai ទទួលបានឱកាសសម្តែងរួមគ្នាលើកដំបូងក្នុងរឿង Bodyguard និងរឿង Superstar ។ ក្រោយមកពួកគេក៏បានស្រឡាញ់គ្នា។ ពេលប្រកាសទំនាក់ទំនងដំបូងៗ គូស្នេហ៍មួយគូនេះ មិនត្រូវបានទស្សនិកគាំទ្រប៉ុន្មានឡើយ ដោយសារតែ Push Puttichai ជាតារាសម្តែងជួរមុខក្នុងប្រទេសថៃ និងមានហ្វេនគាំទ្រច្រើន។ ចំណែកឯក Jooy Warattaya មានវ័យចាស់ជាងមិត្តប្រុសដល់ទៅ ៣ ឆ្នាំ ដែលវាជាបញ្ហាធ្វើឱ្យអ្នកគាំទ្រតែងតែលើកមកវាយប្រហារអ្នកទាំងពីរ។

យ៉ាងណាមិញ ពួកគេនៅតែជ្រើសរើសជឿជាក់ និងកំដរគ្នាទៅវិញទៅមក ដើម្បីជម្នះរាល់ពាក្យចចាមអារ៉ាម។ ចុងបញ្ចប់ពួកគេបានដឹកដៃគ្នាចូលរោងការ កាលពីឆ្នាំ ២០១៨ បន្ទាប់ពីស្រឡាញ់គ្នាអស់រយៈពេល ៤ឆ្នាំ។

Kimmy Kimberley និង Mark Prin

មិនខុសពីគូស្នេហ៍ដទៃឡើយ ពេលនៅជាមួយគ្នាដំបូង Kimmy Kimberley និង Mark Prin មិនបានបើកចំហរថាពួកគេជាគូស្នេហ៍ឡើយ។

តាមរយៈភាពយន្តដែលធ្លាប់សម្ដែងជាមួយគ្នាជាច្រើនរឿងដូចជា Lovely Maid, Secret Love Online ឬ Journey to Find Love and Justice ។ល។ បានជំរុញឱ្យ Kimberley និង Mark ទទួលបានសេចក្តីស្រឡាញ់ពីទស្សនិកជនពេញទំហឹង និងប្រាថ្នាឱ្យពួកគេក្លាយជាគូស្នេហ៍ពិត។ លុះមកឆ្នាំ២០១២ សារព័ត៌មានបានចុះផ្សាយថា Kimmy Kimberley និង Mark Prin ជាគូស្នេហ៍នឹងគ្នា។

ស្នេហាពួកគេក៏មានឧបសគ្គជាច្រើនប្រឈមផងដែរ។ ប៉ុន្តែពួកគេតែងប្រឈមមុខនឹងភាពចម្រូងចម្រាស ហើយប្រកាន់ភាពជឿជាក់ និងក្ដីស្រឡាញ់ឱ្យគ្នា ដោយបានរួមរស់ជាមួយគ្នាយ៉ាងស្ងៀមស្ងាត់អស់រយៈពេល ៩ ឆ្នាំមកហើយ។ កាលពីចុងខែមេសា ឆ្នាំ២០២២ កន្លងទៅនេះ តារាប្រុស Mark Prin បានសុំ Kimberley រៀបការជាផ្លូវការហើយ៕

ប្រែសម្រួល៖ សន្យា

ចុចអាន៖ ក្រោយបាត់បង់កូនប្រុស Ronaldo ប្រកាសឈ្មោះកូនស្រីដែលនៅរស់

ចុចអាន៖ ថៃ តែងតាំងបវរកញ្ញារបស់ខ្លួនឱ្យកាន់តំណែង Miss Grand មីយ៉ាន់ម៉ា ឆ្នាំ២០២២

The post តារាថៃ ៤គូ ស្រឡាញ់គ្នាចាក់ទឹកមិនលិច រហូតជាប់ឈ្មោះជាគូស្នេហ៍គំរូ ប្រចាំប្រទេស appeared first on Kampuchea Thmey Daily.