គួន មុំ Archives - Kampuchea Thmey Daily

គួន ម៉ុម កំពុងល្បីទៅលីគកូរ៉េ ចុះនៅទីនោះជាទូទៅប្រាក់ខែប៉ុន្មាន?

Kosal Sem — Wed, 12 Mar 2025 01:31:11 +0000

នាមួយរយៈចុងក្រោយនេះ ហាក់ផ្ទុះការចាប់អារម្មណ៍ខ្លាំងមែនទែន ជុំវិញពាក្យចចាមរ៉ាម ដែល ស្មាត់ស្តាំរបស់វិសាខា និងជម្រើសជាតិកម្ពុជា គួន ម៉ុម កំពុងចរចាទៅលេងនៅលីគបាល់ទះរបស់ប្រទេស កូរ៉េខាងត្បូង V-League។ ហើយមិនត្រឹមតែប៉ុណ្ណោះ ក៏មានព័ត៌មានរសើបផងដែរចំពោះការផ្លាស់ទៅលេងនៅទីនោះ ថាស្មាត់ធំកម្ពស់ ១.៩៨ ម៉ែត្រ នឹងទទួលបានប្រាក់ឈ្នួលដល់ទៅ ១២, ០០០ ដុល្លារអាមេរិក។

គួន ម៉ុម

ទោះបីជាយ៉ាងណា ព័ត៌មានអំពីរឿងប្រាក់ខែនេះ គួន ម៉ុម បានចេញមុខច្រានចោលហើយ ដោយបានបញ្ជាក់ថា វាគឺមិនដូចអ្វី ដែលគេបាននិយាយទេ។ ចំពោះព័ត៌មាន ដែលគាត់កំពុងចរចាទៅលេងនៅលីគរបស់ កូរ៉េខាងត្បូង គាត់បានសារភាពថា វាគឺជារឿងពិតមែន។

ជឿជាក់ថា អ្នកគាំទ្រទាំងអស់ នៅតែមានការងឿយឆ្ងល់ចង់ដឹងចង់ឮ អំពីព័ត៌មានពិតប្រាកដ ថាតើនៅលីគបាល់ទះ V-League ដែលជាលីគដ៏ធំមួយក្នុងពិភពលោក កីឡាករម្នាក់ៗនឹងទទួលបានប្រាក់ឈ្នួលចាប់ពីប៉ុន្មានឡើងទៅ។ យោងតាមការចុះផ្សាយដោយសារព័ត៌មានកូរ៉េខាងត្បូង KOVO ដែលជាវេបសាយផ្លូវការបស់សមាគមបាល់ទះកូរ៉េខាងត្បូង បានឱ្យដឹងថា គ្រប់កីឡាករ ទាំងអស់ ដែលបានមកលេងនៅទីនេះ ក្នុងឆ្នាំដំបូង នឹងទទួលបានប្រាក់ឈ្នួលទាបបំផុត ១០ ម៉ឺនដុល្លារអាមេរិក ក្នុងមួយឆ្នាំ។ ដោយឡែកពេលចូលឆ្នាំទី ២ នឹងឡើងបានដល់ ១២ ម៉ឺនដុល្លារអាមេរិក ក្នុងមួយឆ្នាំ។

តាមរយៈប្រភពខាងលើដដែល បានបញ្ជាក់ថា លីគបាល់ទះកូរ៉េខាងត្បូងបច្ចុប្បន្នកំពុងផ្តោតខ្លាំងលើការនាំចូលកីឡាករកូតា អាស៊ី និងអាស៊ីអាគ្នេយ៍ ដើម្បីពង្រឹងវិស័យកីឡាបាល់ទះអាស៊ីឲ្យកាន់តែរីកចម្រើន។ ឥឡូវនេះមានកីឡាករអាស៊ីចំនួន ១០០ នាក់ហើយ ដែលបានដាក់ពាក្យទៅលេងទីនោះ។ ក្នុងនោះមានមកពី អ៊ីរ៉ង់ ៤៥ នាក់, អូស្ត្រាលី ១១ នាក់, ឥណ្ឌូនេស៊ី ៩ នាក់, កាហ្សាក់ស្ថាន ៨ នាក់, ប៉ាគីស្ថាន ៤ នាក់, ជប៉ុន ម៉ុងហ្គោលី និងហុងកុង មាន ៣ នាក់ដូចគ្នា។ ចំណែក ថៃ តៃវ៉ាន់ បារ៉ែន និង ៨ ប្រទេសផ្សេងទៀតមាន ២ នាក់ដូចគ្នា។ ខណៈឆាប់ៗខាងមុខ គួន ម៉ុម ទំនងនឹងក្លាយកីឡាករ កម្ពុជា ទី ១ ដែលទៅលេងនៅទីនោះ ប្រសិនបើការចរចាជោគជ័យ៕

កីឡាករលេងនៅលីគ កូរ៉េខាងត្បូង

អត្ថបទ៖ សេម កុសល

The post គួន ម៉ុម កំពុងល្បីទៅលីគកូរ៉េ ចុះនៅទីនោះជាទូទៅប្រាក់ខែប៉ុន្មាន? appeared first on Kampuchea Thmey Daily.

គួន មុំ ប្តេជ្ញានាំវិសាខាឆ្ពោះទៅរកមេដាយមាសតេជោលីគ

chean virakbot — Thu, 28 Dec 2023 01:29:02 +0000

កីឡាករបាល់ទះឆ្នើម គួន មុំ បានប្តេជ្ញានាំក្រុមបាល់ទះវិសាខាឆ្ពោះទៅរកការឈ្នះជើងឯកលីគបាល់ទះកំពូលកម្ពុជា (តេជោលីគ) រដូវកាលដំបូងដែលគ្រោងនឹងចាប់ផ្តើមនាខែមករា ឆ្នាំ២០២៤។

សមាជិកក្រុមបាល់ទះជម្រើសជាតិកម្ពុជា គួន មុំ បានបង្ហាញអារម្មណ៍រីករាយចំពោះសហព័ន្ធកីឡាបាល់ទះកម្ពុជាដែលបានខិតខំប្រឹងប្រែងរយៈពេលប៉ុន្មានឆ្នាំចុងក្រោយរហូតទទួលបានលទ្ធផលល្អប្រសើរ និងមានលទ្ធភាពបង្កើតឲ្យមានការប្រកួតលីគបាល់ទះកំពូលកម្ពុជាជាលើកដំបូង។

គួច មុំ បានលើកឡើងថា ៖«ក្នុងនាមខ្ញុំជាកីឡាករម្នាក់ ខ្ញុំសប្បាយចិត្តខ្លាំងសម្រាប់សហព័ន្ធយើងអាចបង្កើតលីគបានជាលើកដំបូង។ នេះជាការអភិវឌ្ឍមួយជំហានទៀតដែលយើងមិនធ្លាប់មានពីមុន។ ខ្ញុំសង្ឃឹមថា លីគនេះនឹងជួយអភិវឌ្ឍវិស័យកីឡាបាល់ទះកម្ពុជា ជំរុញឲ្យកម្ពុជាសំបូរធនធានកាន់តែច្រើន ក្រុមជម្រើសជាតិកាន់តែខ្លាំង»។

នៅពេលសួរថា តើលោករំពឹងទទួលបានលទ្ធផលយ៉ាងណាសម្រាប់វិសាខាដែលបានចូលរួមប្រកួតតេជោលីគលើកដំបូងនេះ? កីឡាករដែលរួមចំណែកជួយក្រុមជម្រើសជាតិឈ្នះមេដាយប្រាក់ និងសំរិទ្ធស៊ីហ្គេមបានឆ្លើយតបថា ៖«ខ្ញុំអត់ទាន់ហ៊ាននិយាយបែបណាទេ ពីព្រោះមានក្រុមខ្លាំងៗចូលរួមច្រើន។ ការប្រឹងប្រែងក្រុមរបស់ខ្ញុំគឺដឹងថា ឆ្ពោះទៅមុខរកមេដាយមាសឲ្យទាល់តែបាន តែលទ្ធផលយ៉ាងណានៅពេលខាងមុខអត់ដឹងទេ។ ពីព្រោះក្រុមខ្លាំងៗច្រើន ពួកគេក៏មានកីឡាករបរទេស ហើយយើងមានកីឡាករបរទេសដែរ។ មើលអត់ទាន់ដឹង អត់ហ៊ានកំណត់ទុកមុនទេ»។

«ខ្ញុំសូមសំណូមពរប្អូនៗ អ្នកគាំទ្រដែលស្រឡាញ់ចូលចិត្តកីឡាបាល់ទះ សូមគាំទ្រ លើកទឹកចិត្តដើម្បីវិស័យកីឡានៅក្នុងប្រទេសកម្ពុជារបស់យើងកាន់តែរីកចម្រើន»។ គួន មុំ អំពាវនាវប្រជាពលរដ្ឋចូលរួមគាំទ្រលើកទឹកចិត្តឲ្យបានច្រើនសម្រាប់ការប្រកួតលីគបាល់ទះកំពូលកម្ពុជាជាលើកដំបូង។

តាមការគ្រោងទុក ការប្រកួត«តេជោលីគ»នឹងចាប់ផ្តើមនៅថ្ងៃទី១២ ខែមករា ដល់ទីថ្ងៃ១៨ ខែកុម្ភៈ ឆ្នាំ២០២៤ នៅវិមានពហុកីឡដ្ឋានជាតិអូឡាំពិកមានក្រុមបាល់ទះអាជីពចំនួន៨ចូលរួមប្រកួតរួមមានក្រុមបាល់ទះវិសាខា ក្រសួងមហាផ្ទៃ បញ្ជាការដ្ឋានអង្គរក្ស កងពលធំអន្តរាគមន៍លេខ៣ រដ្ឋបាលរាជធានីភ្នំពេញ ក្រុមនគរបាលព្រះសីហនុ ក្រុមនគរបាលពោធិ៍សាត់ និងក្រុមនគរបាលខេត្តកណ្តាល។

ជុំទី១ ការប្រកួតជុំសន្សំពិន្ទុ។ បន្ទាប់មកក្រុម២ទាបជាងគេត្រូវបានកាត់ចេញ ហើយក្រុមលេខ១ដល់៦ត្រូវបន្តប្រកួតសន្សំពិន្ទុជុំទី២។ ក្រោយចប់ជុំទី២ ក្រុម២មានពិន្ទុទាបជាងគេត្រូវកាត់ចេញ និងមាន៤ក្រុមឡើងទៅជុំទី៣ដែលត្រូវវគ្គពាក់កណ្តាលផ្តាច់ព្រ័ត្រ និង២ក្រុមឡើងវគ្គផ្តាច់ព្រ័ត្រតែម្តង៕

អត្ថបទ៖ វីរបុត្រ

The post គួន មុំ ប្តេជ្ញានាំវិសាខាឆ្ពោះទៅរកមេដាយមាសតេជោលីគ appeared first on Kampuchea Thmey Daily.

គួន មុំ Archives - Kampuchea Thmey Daily

គួន ម៉ុម កំពុងល្បីទៅលីគកូរ៉េ ចុះនៅទីនោះជា​ទូទៅ​ប្រាក់ខែ​ប៉ុន្មាន?

គួន មុំ ប្តេជ្ញានាំវិសាខាឆ្ពោះទៅរកមេដាយមាសតេជោលីគ

គួន ម៉ុម កំពុងល្បីទៅលីគកូរ៉េ ចុះនៅទីនោះជាទូទៅប្រាក់ខែប៉ុន្មាន?