នៅក្នុងព្រឹត្តិការណ៍ជម្រើសជើងឯកថ្នាក់ជាតិ វៀតណាម ក្នុងឆ្នាំ ២០២៦ មានកីឡាករបរទេសសរុប ៩ រូប ត្រូវបានចុះឈ្មោះចូលរួមជាមួយក្រុមបាល់ទះ ៨ ផ្សេងគ្នា ក្នុង​នោះ​ក៏​មាន​ គួន ម៉ុម ដែល​បានចូលរួមជាមួយក្រុម Ha Noi។

កីឡាករបរទេសទាំង ៩ នាក់ ដែលបានលេងនៅជម្រើសជើងឯកថ្នាក់ជាតិ វៀតណាម ឆ្នាំនេះសុទ្ធតែឆ្នើមៗ ប៉ុន្តែមានកីឡាករ ៣ នាក់ត្រូវបានគេចាប់អារម្មណ៍បំផុត ដោយសំអាងលើសមត្ថភាព និងសមិទ្ធផលកន្លងមកជាមួយក្រុមជម្រើសជាតិ។

ទី ១. កីឡាករ Rivan Nurmulki របស់ក្រុមបាល់ទះ THỂ CÔNG TÂN CẢNG៖ អ្នកគាំទ្រ កម្ពុជា ក៏ដូចជាអ្នកគាំទ្រទូទាំងតំបន់ អាស៊ាន ទាំងមូល ច្បាស់ជាបានស្គាល់ហើយអំពីអតីតស្មាត់ធំរបស់ជម្រើសជាតិ ឥណ្ឌូណេស៊ី រូបនេះ។ Rivan មានបទពិសោធច្រើនជាមួយក្លិបអាជីព មុនពេលមកចូលរួមជាមួយក្រុម THỂ CÔNG TÂN CẢNG ដោយកីឡាករធ្លាប់លេងនៅ ឥណ្ឌូណេស៊ី ថៃ និងជប៉ុន។

នៅជម្រើសជាតិ Rivan ធ្លាប់បានឈ្នះមេដាយមាសនៅកីឡាស៊ីហ្គេម ៣ លើក មេដាយប្រាក់ ២ លើក និងសំរឹទ្ធ ១ លើក។ ចំណែកនៅពាន SEV V.League ធ្លាប់បានឈ្នះមេដាយមាស ១ លើកកាលពីឆ្នាំ ២០២៥។ កាលពី ៤ ខែមុន ស្មាត់វ័យ ៣០ ឆ្នាំរូបនេះ បានប្រកាសចូលនិវត្តន៍ពីជម្រើសជាតិហើយ បន្ទាប់ពីបញ្ចប់ព្រឹត្តិការណ៍កីឡាស៊ីហ្គេម នៅថៃ។

ទី ២. កីឡាករ Garrett Muagututia របស់ក្រុម SANEST KHÁNH HÒA៖ អតីតកីឡាករជម្រើសជាតិ អាមេរិក រូបនេះ រាប់បានជាកីឡាករជើងចាស់មួយរូប ដែលមានបទពិសោធជោកជាំក្នុងកីឡាបាល់ទះ។ បច្ចុប្បន្ន Garrett មានវ័យ ៣៨ ឆ្នាំរៀងជ្រែបន្តិច ប៉ុន្តែសមត្ថភាពវាយផ្តាច់រកពិន្ទុនៅតែល្អប្រសើរ។ កីឡាកររូបនេះ ធ្លាប់មានបទពិសោធច្រើនលេងនៅ អាមេរិក អេស្ប៉ាញ តួកគី អ៉ីតាលី ហ្វាំងឡង់ ប៉ូឡូញ ចិន ព័រទុយហ្គាល់ ក្រិច អេហ្ស៊ីប ឥណ្ឌូណេស៊ី និង ប៉េរូ ជាដើម។

ចំណែកសមិទ្ធផលនៅជម្រើសជាតិវិញ Garrett ធ្លាប់ជួយឱ្យ អាមេរិក ឈ្នះមេដាយមាសព្រឹត្តិការណ៍បាល់ទះជើងឯកពិភពលោក ១ លើក, មេដាយមាស World League ១ លើក, មេដាយមាស Pan American Cup ១ លើក, មេដាយមាស NORCECA Championships ១ លើក, មេដាយប្រាក់ Volleyball Nations League ៣ លើក និងមេដាយមួយចំនួនទៀត។

ទី ៣. កីឡាករ គួន ម៉ុម របស់ក្រុម Ha Noi៖ កីឡាករជម្រើសជាតិ កម្ពុជា រូបនេះ ត្រូវបានគេចាត់ទុកជាកីឡាករគួរឱ្យចាប់អារម្មណ៍ស្ថិតនៅចំណាត់ថ្នាក់ទី ៣ ក្នុងការប្រកួតប្រជែងជម្រើសជើងឯកថ្នាក់ជាតិ វៀតណាម។ បើប្រៀបធៀបអំពីសមិទ្ធផលជាមួយកីឡាករ ២ នាក់ខាងលើ អាចនឹងខុសគ្នាឆ្ងាយ ប៉ុន្តែបើធៀបជាមួយកីឡាករបរទេស ៦ នាក់ផ្សេងទៀត គឺមិននៅក្រោមគេនោះទេ។ បច្ចុប្បន្ន គួន ម៉ុម ត្រូវបានគេចាត់ទុកជាកីឡាករសំខាន់ម្នាក់របស់ Ha Noi ព្រោះកាលពីឆ្នាំមុន រូបគេជាអ្នកជួយស្រោចស្រង់ក្រុមរបស់វៀតណាមមួយនេះឱ្យឡើងពីចំណាត់ថ្នាក់បាតតារាង មកចំណាត់ថ្នាក់លេខ ៥ ដើម្បីទទួលបានកៅអីលេងក្នុងជម្រើសជើងឯក វៀតណាម កម្រិតទី ១។

គួន ម៉ុម មានបទពិសោធច្រើនជាមួយក្លិបអាជីព ដោយធ្លាប់លេងនៅ កម្ពុជា ឥណ្ឌូណេស៊ី និង វៀតណាម។ នៅជម្រើសជាតិ កីឡាករវ័យ ២៧ ឆ្នាំ កម្ពស់ ១.៩៨ ម៉ែត្ររូបនេះ គឺជាស្មាត់ដ៏សំខាន់ម្នាក់ ដោយធ្លាប់បានជួយក្រុមឈ្នះមេដាយប្រាក់កីឡាករស៊ីហ្គេម ១ លើក និងមេដាយសំរឹទ្ធ ១ លើក។ ជាមួយគ្នានេះ ក៏បានជួយឱ្យ កម្ពុជា ឈ្នះមេដាយមាស ១ លើកផងដែរ ក្នុងព្រឹត្តិការណ៍ SEA V.League Challenge។

គួរបញ្ជាក់ ថា ការប្រកួត​កីឡាបាល់ទះ​ជើង​ឯក​ជាតិថ្នាក់ជាតិ​​វៀតណាម បានចាប់ផ្តើមហើយ។ ព្រឹត្តិការណ៍នេះបែងចែកជា ២ ដំណាក់កាល ដោយដំណាក់កាលទី ១ ពីថ្ងៃទី ៦ ដល់ថ្ងៃទី ១៩ ខែ មេសា និង​ដំណាក់កាលទី ២ ចាប់ពីថ្ងៃទី ២៨ ខែ តុលា ដល់ថ្ងៃទី ៨ ខែ វិច្ឆិកា ឆ្នាំ ២០២៦៕

អត្ថបទ៖ សេម កុសល

The post គួន ម៉ុម ស្ថិតក្នុងកីឡាករបរទេសលេចធ្លោ ៣ នាក់ លេង​នៅ​ជម្រើស​ជើង​ឯក​វៀតណាម​ appeared first on Kampuchea Thmey Daily.

យោងតាមសារព័ត៌មាន វៀតណាម Lao Dong បានឱ្យដឹង ថា កីឡាករ គួន ម៉ុម បានចុះកិច្ចសន្យារួចរាល់ ក្នុងការចូលរួមជាមួយក្លិបបាល់ទះ ហាណូយ (Ha Noi) ដើម្បីប្រកួតប្រជែងពានលីគបាល់ទះ វៀតណាម The Vietnam National Volleyball Championship សម្រាប់ការប្រកួតក្នុងជុំទី ១ នៅឆ្នាំ ២០២៦។

គួន ម៉ុម ធ្លាប់បានចូលរួមជាមួយក្រុម ហាណូយ នេះរួចម្តងហើយ កាលពី តុលា ឆ្នាំ ២០២៥។ ពេលនោះស្មាត់ កម្ពុជា វ័យ ២៧ ឆ្នាំ កម្ពស់ ១.៩៨ ម៉ែត្ររូបនេះ បានបង្ហាញសមត្ថភាពល្អគួរឱ្យកត់សម្គាល់ រហូតជួយស្រោចស្រង់ក្រុម ហាណូយ ឱ្យឡើងពីចំណាត់ថ្នាក់លេខ ៨ បាតតារាង មកកាន់ចំណាត់ថ្នាក់លេខ ៥ ដើម្បីបន្តលេងក្នុងលីគទី ១ វៀតណាម នៅឆ្នាំ ២០២៦ នេះ។

ងាកមកកាន់កីឡាករតួនាទីអ្នកលើកបាល់ សួន ចាន់ណារ៉ូ វិញ ក៏មានតម្រុយចូលរួមជាមួយក្លិបបាល់ទះក្នុងប្រទេស វៀតណាមដែរ។ នេះបើតាមអ្វី ដែលកីឡាករធ្លាប់ប្រាប់សារព័ត៌មាន «កម្ពុជាថ្មី» និងកីឡាករបង្ហោះនៅលើទំព័រ Facebook។ ទោះបីជាយ៉ាងណា សួន ចាន់ណារ៉ូ មិនទាន់បានបង្ហើបនៅឡើយទេ ថា រូបគេនឹងទៅចូលរួមជាមួយក្លិបមួយណានៅទីនោះ។

គួរបញ្ជាក់ ថា ការប្រកួត​កីឡាបាល់ទះ​ជើង​ឯក​ជាតិ​​វៀតណាម បែងចែកជា ២ ដំណាក់កាល។ ដំណាក់កាលទី ១ នឹងចាប់ផ្តើមពីថ្ងៃទី ៦ ដល់ថ្ងៃទី ១៩ ខែ មេសា ឆ្នាំ ២០២៦ និង​ដំណាក់កាលទី ២ ចាប់ពីថ្ងៃទី ២៨ ខែ តុលា ដល់ថ្ងៃទី ៨ ខែ វិច្ឆិកា ឆ្នាំ ២០២៦៕

អត្ថបទ៖ សេម កុសល

The post កីឡាករកម្ពុជាឆ្នើម ២ រូប នឹងចូលរួមជាមួយក្លិប​បាល់ទះ​វៀតណាម ឆាប់ៗនេះ appeared first on Kampuchea Thmey Daily.

ណារ៉ូ និង​ គួន​ ម៉ុម​ កន្លងទៅ

លើក​ឡើង​ក្នុង​វីដេអូ​សម្ភាស​មួយ​កីឡាករ​ គួន​ ម៉ុម​ ឆ្លើយ​បែប​លេង​សើច​រំលឹក​ទៅ​កាន់​រៀមច្បង​ សួន​ ចាន់ណារ៉ូ​ ថា​លែង​ជា​គ្នា​ឯង​ហើយ​ ព្រោះ​នៅ​ក្រុម​ផ្សេង​គ្នា​ពិសេស​កំពុង​លេង​ពាន​ដូច​គ្នា​នៅ​ពេល​នេះ​ទៀត។​ រូប​គេ​បន្ថែម​ទៀត​ថា​ដៃ​ប៉ះ​សេ​ថ្មី​ជនជាតិ​ហ្វីលីពីន​នេះ​សមត្ថភាព​ល្អ​ជាង​ ណារ៉ូ​ ទៀត​ផង។​ រូប​គេ​ក៏​ឆ្លើយ​ទៀត​ថា​មិន​ខ្លាច​រៀមច្បង​ទេ​ និង​ចង់​ប៉ះ​ក្រុម​ស្នងការ​ខេត្ត​ ន.ប​ ខេត្ត​ស្វាយរៀង​នៅ​វគ្គ​ ៨​ក្រុម​ចុងក្រោយ​ពាន​រង្វាន់​សម្ដេច​ លើក​ទី៤​ នេះ។​

កីឡាករ គួន ម៉ុម

បន្ទាប់​ពី​ឃើញ​ការ​លើក​ឡើង​របស់​ គួន​ ម៉ុម​ រួច​មក​កីឡាករ​ចាស់​វស្សា​ សួន​ ចាន់ណារ៉ូ​ ក៏​មិន​ចាំ​យូរ​ដែរ​ឆ្លើយ​តប​ភ្លាមៗ​វិញ​ថា​ «មិនចាំបាច់អាយដលមុំ ទេខ្ញុំសួនចាន់ណារ៉ូក៏ចង់លេងដែរ​»។​ ដូច្នេះ​ហើយ​តាម​រយៈ​ការ​ឌឺដង​ដាក់​គ្នា​នេះ​ក្នុង​មជ្ឈដ្ឋាន​បាល់ទះ​មាន​ការ​ចាប់​អារម្មណ៍​ខ្លាំង​មិន​ថា​អ្នក​គាំទ្រ​ទេ​ សូម្បី​កីឡាករ​ខ្លួន​ឯងតាម​ក្លឹប​ក៏​ចង់​ប៉ះ​គ្នា​ភ្លាមៗ​ដែរដើម្បី​ចង់​ដឹង​ក្រុម​ណា​ខ្លាំង​ជាង​ ក្រុម​ណា​បាន​ឡើង​ទៅ​ជុំ​បន្ទាប់​ប្រសិន​បើ​ប៉ះ​គ្នា​នោះ។​

កីឡាករ​ សួន​ ចាន់ណារ៉ូ

បញ្ជាក់​ដែរ​ថា​ សហព័ន្ធ​កីឡា​បាល់ទះ​ឥលូវ​នេះ​កំពុង​តែ​ដំណើរ​ប្រកួត​ពាន​រង្វាន់​សម្ដេច​ ក្រឡាហោម​ លើក​ទី៤​ ដោយ​ជិត​បញ្ចប់​វគ្គ​សន្សំពិន្ទុ​ក្នុង​ពូល​ហើយ​ដែរ។​ ក្រុម​វិសាខា​របស់​ គួន​ ម៉ុម​ ស្ថិត​នៅ​ក្នុង​ពូល​ H ​និង​បាន​ឡើង​ទៅ​ជុំ​ទី២​ ហើយ​ក្រោយ​ឈ្នះ​ ២ប្រកួត​ជាប់​គ្នា។​ ចំណែក​ក្រុម​ស្នងការ​ ន.ប​ ខេត្ត​ស្វាយរៀង​ របស់​ សួន​ ចាន់ណារ៉ូ គឺ​សិ្ថត​នៅ​ពូល​ F ​ក៏​បាន​ឡើង​ទៅ​ជុំ​ទី២​ ផង​ដែរ​ក្រោយ​ឈ្នះ​ ២ប្រកួត​ជាប់​គ្នា។​ ចាំមើល​តើ​ក្រុម​ទាំង ២​អាច​នឹង​ជួប​គ្នា​នៅ​ជុំ​ទីប៉ុន្មាន​នៃ​ពាន​រង្វាន់​សម្ដេច​ ក្រឡាហោម​ លើក​ទី៤​ នេះ៕​

ណារ៉ូ និង​ គួន​ ម៉ុម​ កន្លងទៅ

អត្ថបទដោយ៖ នូន ស៊ីណា​

The post ឡើង​កម្ពៅ​បន្តិចហើយ​ខាង​ គួន​ ម៉ុម​ របស់​វិសាខា​ ចង់​ប៉ះ​សិស្សច្បង​ សួន​ ចាន់ណារ៉ូ ​របស់​ស្វាយរៀង​នៅ​វគ្គ​ ៨ក្រុមបណ្ដោយ​ទៅ​ appeared first on Kampuchea Thmey Daily.

យោងតាមសារព័ត៌មាន វៀតណាម Tap Chi Bong Chuyen+ បានឱ្យដឹងថា ក្លិបបាល់ទះ ហាណូយ បានបន្តកិច្ចសន្យាថ្មីជូនកីឡាករ គួន ម៉ុម ដល់ឆ្នាំ ២០២៦ ដើម្បីបន្តការប្រកួតក្នុងលីគបាល់ទះ វៀតណាម The Vietnam National Volleyball Championship សម្រាប់ការប្រកួតក្នុងជុំទី ១ នៅឆ្នាំ ២០២៦។ តាមរយៈការបន្តកិច្ចសន្យាថ្មីនេះ បានធ្វើឱ្យគួន ម៉ុម ក្លាយជាកីឡាករបរទេសទី ១ ដែលត្រូវបានប្រកាសសម្រាប់ការចូលរួមប្រកួតក្នុងលីគបាល់ទះ វៀតណាម នៅឆ្នាំក្រោយ។

គួរឱ្យបញ្ជាក់ ថា គួន ម៉ុម ត្រូវបានក្លិបបាល់ទះ ហាណូយ ចុះកិច្ចសន្យាយកបាននៅខែ តុលា ឆ្នាំ ២០២៥ នេះ ដើម្បីមកជួយក្រុម ក្នុងការប្រកួតក្នុងជុំទី ២ នៃលីគបាល់ទះ វៀតណាម ឆ្នាំ ២០២៥។ ស្មាត់ កម្ពុជា វ័យ ២៧ ឆ្នាំ កម្ពស់ ១.៩៨ ម៉ែត្ររូបនេះ បានបង្ហាញសមត្ថភាពល្អគួរឱ្យកត់សម្គាល់ ហើយរូបគេបានរួមចំណែកយ៉ាងធំធេង ក្នុងការជួយស្រោចស្រង់ក្រុម ហាណូយ ឱ្យឡើងពីចំណាត់ថ្នាក់លេខ ៨ បាតតារាង មកកាន់ចំណាត់ថ្នាក់លេខ ៥ ដើម្បីបន្តលេងក្នុងលីគទី ១ វៀតណាម នៅឆ្នាំក្រោយ ២០២៦ បន្តទៀត។

កីឡាករ​ជម្រើស​ជាតិ​កម្ពុជា គួន ម៉ុម អាច​ចាត់​ទុក​ជា​កីឡាករ​បាល់ទះ​កម្ពុជា ដែល​ទទួល​បាន​ជោគជ័យ​បំផុត​សម្រាប់​ការ​ចេញ​ទៅ​លេង​នៅ​ក្រៅ​ប្រទេស បន្ទាប់​ពី​កីឡាករ វឿន វាសនា នៅ​លីគ​បាល់ទះ​កំពូល​តៃវ៉ាន់។ គួន ម៉ុម ធ្លាប់​បាន​ចេញ​ទៅ​លេង​នៅ​ប្រទេស​ឥណ្ឌូណេស៊ី និង​ប្រទេស​វៀតណាម​ជា​ច្រើន​លើក។ ពេល​ក្លិប​វៀតណាម​ពេញ​ចិត្ត​បន្ត​កុងត្រា​ឲ្យ​រូប​គេ​ទៀត៕

អត្ថបទ៖ សេម កុសល

The post ពេញ​ចិត្ត​នឹង​សមត្ថភាព​បស់ គួន ម៉ុម ក្លិប Ha Noi បាន​សម្រេច​បន្ត​កុងត្រា​ដល់​​ឆ្នាំ ២០២៦ appeared first on Kampuchea Thmey Daily.

ការប្រកួតលីគបាល់ទះ វៀតណាម The 2025 Vietnam National Volleyball Championship បានបញ្ចប់ជាស្ថាពរហើយ ត្រឹមថ្ងៃ ព្រហស្បតិ៍ ទី ១៦ ខែ តុលា ឆ្នាំ ២០២៥ ម្សិលមិញ។ ក្នុងនោះក្រុមជើងឯកបានទៅលើក្រុម Border Guard MB បន្ទាប់ពីយកឈ្នះលើក្រុម Tan Cang Sports Center នៅវគ្គផ្តាច់ព្រ័ត្រ ៣ សិតទល់ ២ កាលពីថ្ងៃទី ១៥ ខែ តុលា។ ចំណែកក្រុមចំណាត់ថ្នាក់លេខ ៣ បានទៅលើក្រុម Ho Chi Minh City Police ក្រោយយកឈ្នះលើក្រុម LP Bank Ninh Binh ក្នុងលទ្ធផល ៣ សិត ១ កាលពីថ្ងៃទី ១៦ ខែ តុលា ឆ្នាំ ២០២៥។

ងាកមកកាន់ក្រុម Ha Noi របស់ គួន ម៉ុម វិញ បានបញ្ចប់ពានលីគបាល់ទះវៀតណាម ២០២៥ នេះ ដោយស្ថិតនៅចំណាត់ថ្នាក់ទី ៥ បន្ទាប់ពីឆ្លងកាត់ការប្រកួតដំណាក់កាលទី ២ ដែលជាជុំចុងក្រោយ ៦ ប្រកួត ឈ្នះ ៤ និងចាញ់ ២ មាន ១១ ពិន្ទុ។

យ៉ាងណា បើគិតអំពីលទ្ធផលនេះ អាចនិយាយបាន ថា កីឡាករគួន ម៉ុម ពិតជាមានគុណសម្បត្តិច្រើនក្នុងការជួយក្រុម Ha Noi នៅជុំទី ២ នេះ ព្រោះអំឡុងការប្រកួតកាលពីជុំទី ១ មុនពេលមានវត្តមានស្មាត់ជម្រើសជាតិ កម្ពុជា អាយុ ២៧ ឆ្នាំ កម្ពស់ ១.៩៨ ម៉ែត្រ ពួកគេបានឆ្លងកាត់ការប្រកួត ៧ ប្រកួត ចាញ់ ៦ និងឈ្នះត្រឹម ១ ប្រកួតប៉ុណ្ណោះ និងឈរនៅលេខ ៨ ដែលជាចំណាត់ថ្នាក់បាតតារាង។

ប៉ុន្តែលទ្ធផលក្រុមទាំងមូល បានប្រែផ្ទុយស្រឡះនៅជុំទី ២ ចាប់តាំងពីពួកគេចុះកិច្ចសន្យាយកគួន ម៉ុម នៅក្នុងខែ តុលា ឆ្នាំ ២០២៥ ដោយពេលនេះពួកគេបានបញ្ចប់ការប្រកួតលីគបាល់ទះ វៀតណាម ២០២៥ ដោយហក់ឡើងមកឈរនៅចំណាត់ថ្នាក់ទី ៥ វិញ និងរឿងសំខាន់មួយទៀត ពួកគេទទួលបានកៅអីបន្តលេងក្នុងលីគបាល់ទះទី ១ វៀតណាម នៅឆ្នាំក្រោយបន្តទៀត។

ដោយឡែកក្រុម Lavie Tay Ninh គឺជាក្រុម ដែលត្រូវកាត់ចេញពីលីគបាល់ទះទី ១ វៀតណាម នៅឆ្នាំក្រោយ បន្ទាប់ពីពួកគេស្ថិតនៅលេខរៀងទី ៨ បាតតារាង ក្រោយឆ្លងកាត់ ៦ ប្រកួតក្នុងជុំទី ២ ឈ្នះ ១ និងចាញ់ ៥ មាន ៥ ពិន្ទុ៕

អត្ថបទ៖ សេម កុសល

The post ស្មាត់ កម្ពុជា គួន ម៉ុម រួមចំណែកធំជួយ Ha Noi បន្តលេងក្នុងលីគបាល់ទះទី ១ វៀតណាម ឆ្នាំក្រោយ appeared first on Kampuchea Thmey Daily.

គួន ម៉ុន ត្រូវបានក្លិប ហាណូយ បានចាប់អារម្មណ៍ខ្លាំងនៅពេលរូបគេ បង្ហាញសមត្ថភាពលេចធ្លោជាមួយ ក្រុមវិសាខា ក្នុងព្រឹត្តិការណ៍បាល់ទះប៉ូលិសអន្តរជាតិ កាលពីខែសីហា ឆ្នាំ ២០២៥ កន្លងទៅ។ ក្រោយចប់ព្រឹត្តិការណ៍នោះភ្លាម ក្លិបក៏បានប្រកាសពីការនាំចូលកីឡាករជម្រើសជាតិកម្ពុជាតែម្តង ហើយកាលពីពាក់កណ្តាលខែកញ្ញា កន្លងទៅ​កីឡាករ​កម្ពុជា​ ក៏បានធ្វើដំណើរទៅប្រទេសវៀតណាមរួចរាល់ដែរ។

មុនពេលលីគបាល់ទះវៀតណាម រដូវកាលថ្មីបានចាប់ផ្តើម សារព័ត៌មាននៅប្រទេសវៀតណាមបានលើកឡើងពីកីឡាករ ៨ រូប ប្រចាំក្លិបទាំង ៨ គួរឲ្យចាប់អារម្មណ៍បំផុត។ ក្នុងនោះមានស្មាត់សញ្ជាតិ ថៃ Jakkrit Thanomnoi របស់ក្រុម Biên Phòng MB។ ស្មាត់សញ្ជាតិ អាហ្សង់ទីន Federico Pereyra របស់ក្រុម Sanest Khánh Hòa។ ស្មាត់ជម្រើសជាតិ ឥណ្ឌូណេស៊ី Rivan Nurmulki របស់ក្រុម Thể Công Tân Cảng។ ស្មាត់សញ្ជាតិ គុយបា Yaisel Puñales របស់ក្រុម LPBank Ninh Bình។

ចំណែក ៤ នាក់ទៀត រួមានស្មាត់ជម្រើសជាតិ ឥណ្ឌូណេស៊ី Agil Anggara របស់ក្រុម Đà Nẵng។ ស្មាត់ជម្រើសជាតិ ថៃ Anurak Phanram របស់ក្រុម Tây Ninh។ ស្មាត់ធំក្រុមជម្រើសជាតិ កម្ពុជា កីឡាករ គួន ម៉ុម របស់ក្រុម Hà Nội និងអតីតស្មាត់ជម្រើសជាតិ ប៉ូឡូញ កីឡាករ Michal Kubiak របស់ក្រុម Công An TP. HCM។

គួរឱ្យដឹងថា នេះមិនមែនជាលើកទី ១ នោះទេ ដែលកីឡាករ គួន ម៉ុម បានទៅលេងនៅលីគរបស់ប្រទេស វៀតណាម។ កាល​ពី​ឆ្នាំ ២០២៤ កីឡាករវ័យ ២៧ ឆ្នាំ កម្ពស់ ១.៩៨ ម៉ែត្ររូបនេះ ធ្លាប់បានទៅលេងនៅ​លីគ វៀតណាម ​ដែល​ពេលនោះបានទៅចូលរួមជាមួយក្រុម Lavie Long An៕

អត្ថបទ៖ សេម កុសល

The post គួន ម៉ុម ស្ថិតក្នុងចំណោម​កីឡាករកំពូល ៨ រូប​ គួរ​ឲ្យ​ចាប់​អារម្មណ៍​ នៅលីគបាល់ទះ វៀតណាម appeared first on Kampuchea Thmey Daily.

កីឡាករ​ គួន ម៉ុម បាន​បដិសេធ​ជុំ​វិញ​ការ​បង្ហោះ​ត​ៗ​គ្នា​រឿង​ប្រាក់​ខែ។ កីឡាករ​​បាន​ប្រាប់​ថា មិន​មែន​ជា​ការ​ពិត​ទេ។ ខ្លួន​មិន​ធ្លាប់​បាន​ប្រាប់​ឲ្យ​នរណា​ដឹង​ពី​រឿង​ប្រាក់​ខែ​ឡើយ ហើយ​ក៏​ស្ថិត​នៅ​ក្នុង​ការ​ពិភាក្សា​មិន​ទាន់​រួច​រាល់​ដែរ។

គួន ម៉ុម បាន​ធ្វើ​តេស្ត​ជាប់​រួច​ហើយ​ក្នុង​ការ​ទៅ​លេង​នៅ​លីគ​របស់​ប្រទេស​កូរ៉េ​ខាង​ត្បូង ប៉ុន្តែ​សម្រាប់តម្លៃ​ពលកម្ម​លើ​ទី​លាន​មិន​ពិភាក្សា​រួច​រាល់​ឡើយ។

ទោះបី​ជា​យ៉ាង​ណា ប្រសិន​បើ គួន ម៉ុម ទទួល​បាន​ឱកាស​ទៅ​លេង​នៅ​ប្រទេស​កូរ៉េ​ខាង​ត្បូង​ពិត​ប្រាកដ​មែន តម្លៃពលកម្ម​នៅ​លើ​ទី​លាន​ក៏​មិន​ទាប​ដែរ។ ម្យ៉ាង​ទៀត វិស័យ​បាល់ទះ​នៅ​កូរ៉េ​ខាង​ត្បូង​ក៏​មាន​តម្លៃ​ពលកម្ម​ខ្ពស់​ដែរ។

គួន ម៉ុម នឹង​ក្លាយ​ជា​កីឡាករ​បាល់ទះ​កម្ពុជា​ទី១​បានទៅ​លេង​នៅ​លីគកូរ៉េ​ខាង​ត្បូង ប្រសិន​បើ​ចុះ​កុងត្រា​រួច​រាល់ ហើយ​អាច​ក្លាយ​ជា​កីឡាករ​កម្ពុជា​ទី២​ដែល​មាន​តម្លៃ​ខ្លួន​ខ្ពស់ បន្ទាប់​ពី វឿន វាសនា ដែល​កំពុង​លេង​នៅ​លីគ​តៃវ៉ាន់។ វឿន វាសនា ទទួល​បាន​ប្រាក់​ខែ​ជាង​១​ម៉ឺន​ដុល្លារ​ដែល​កំពុង​ជួយ​ក្រុម Win Streek ឈ្នះ​ជើង​ឯក​លីគ​តៃ​វ៉ាន់​ជា​លើក​ទី​២៕

អត្ថបទ៖ វីរបុត្រ

The post គួន ម៉ុម បដិសេធ​​រឿង​​ប្រាក់​ខែ​១២០០០​ដុល្លារ​នៅកូរ៉េ​ appeared first on Kampuchea Thmey Daily.

កីឡាករ​លេង​ក្នុង​តំណែង​ជា​អ្នក​បញ្ជូន​បាល់​ដែល​ភាសា​សាមញ្ញ​ហៅ​ថា អ្នក​ប៉ះសេស​គឺ​មិន​សូវ​សំបូរ​ច្រើន​ទេ​នៅ​ក្នុង​ប្រទេស​កម្ពុជា ​ដូច្នេះ​ត្រូវ​ការ​ស្វែង​រក​អ្នក​មាន​​ទេពកោសល្យ​ដើម្បី​បណ្តុះ​បណ្តាល​ឲ្យ​ដិត​ដល់។

តាម​ការ​លើក​ឡើង​របស់​​​កីឡាករ និង​អ្នក​គាំទ្រ​​​បាន​ឃើញ​កីឡាករ​៣​រូប​ដែល​អាច​​បន្ត​វេន សួន ចាន់ណារ៉ូ​ នៅ​ក្នុង​ក្រុម​បាល់ទាត់​ជម្រើស​ជាតិ​កម្ពុជា។ សួន ចាន់ណារ៉ូ​ ដែល​បាន​ចូល​និវត្តន៍​ហើយ​បាន​លើក​ឡើង​ថា កែវ ស្រេងលីហ៊ួរ អាច​ជំនួស​ខ្លួន​បាន ប៉ុន្តែ​កីឡាករ​រូប​នេះនៅ​ក្មេង​ខ្ចី​ផ្នែក​ស្មារតី ដូច្នេះត្រូវ​​ការ​បទពិសោធ​លើ​ឆាក​អន្តរជាតិ រៀន​សូត្រ​ពី​របៀប​ទប់​អារម្មណ៍ និង​អត់​ធន់​បាន​ឲ្យ​បាន​ខ្ពស់។

ជា​មួយ​គ្នា​នេះ គួន ម៉ុម ​ដែល​ជា​កីឡាករ​វ៉ៃ​ផ្តាច់​ដ៏​ឆ្នើម​ម្នាក់​បាន​លើក​ឡើង​ថា នៅ​ក្លិប​វិសាខា​នៅ​មិន​ទាន់​មាន​អ្នក​ដែល​អាច​ជំនួស សួន ចាន់ណារ៉ូ បាន​ទេ ប៉ុន្តែ​បើ​នៅ​ក្នុង​ក្រុម​បាល់ទះ​ជម្រើស​ជាតិ​វិញ​គឺ​​អាច​មាន កែវ ស្រេងលីហ៊ួរ និង យ៉ុន ខេមរៈ ​ដែល​អាច​ជំនួស​បាន។

គួន ម៉ុម បានប្រាប់​សារព័ត៌មាន​«កម្ពុជា​ថ្មី​»​ដា ៖«នៅ​ក្នុង​ក្រុម​ជម្រើសស​ជាតិ ខ្ញុំ​គិត​ថា យើង​មាន​កីឡាករ កែវ ស្រេងលីហ៊ួរ និង​កីឡាករ យ៉ុន ខេមរៈ នៅ​ក្រុម​ស្នងការ​គឺ​អាច​​បាន​៧០​%​បន្ត​ពី ចាន់ណារ៉ូ។ យើង​អាច​លេង​បាន ពី​ព្រោះ​កាយ​សម្បទា​ធំ​ៗ​ដូច​គ្នា យើង​អាច​សង្គ្រោះ​គ្នា​បាន ពី​ព្រោះ​ពួក​គាត់​អាច​កែ​បាល់​បាន​ច្បាស់»។

បន្ថែម​លើ​កីឡាករ​ទាំង​ពីរ​​ខាង​លើ អ្នក​គាំទ្រ​បាន​លើក​ឡើង​ថា កីឡាករ ឡាង រាសីកែវ ក៏​ជា​អ្នក​ប៉ះ​សេ​​ដ៏​ល្អ​ម្នាក់​ដែល​អាច​បន្ត​វេន សួន ចាន់ណារ៉ូ​ បាន​ដែរ។ អ្នក​ប៉ះសេ​រូប​នេះ​ក៏​ជា​កីឡាករ​ដ៏​សំខាន់​នៅ​ក្នុង​ក្រុម​ស្នងការដ្ឋាន​រាជ​ធានី​ភ្នំពេញ​ជា​មួយ យ៉ុន ខេមរៈ ដែរ។

ជុំ​វិញ​កង្វះ​អ្នក​ប៉ះសេ​នេះ​ដែរ ផល រតនៈ ​អ្នក​បិទ​កណ្តាល​ដ៏​ឆ្នើម​នៅ​ក្លិប​វិសាខា និង​ជម្រើស​ជាតិ​កម្ពុជា ធ្លាប់​បាន​លើក​ឡើង​នៅ​ថ្ងៃ​ដែល សួន ចាន់ណារ៉ូ ប្រកាស​ចូល​និវត្តន៍​ជា​ផ្លូវ​ការ​ថា ​ឥឡូវ​នេះ​មាន​កីឡាករ​ពីរ​បី​នាក់​ដែល​អាច​ជំនួស សួន ចាន់ណារ៉ូ បាន ប៉ុន្តែ​ក្នុង​​ក្រុម​ជម្រើស​ជាតិ​កម្ពុជា​ត្រូវ​ការ​ពេល​វេលា​យូរ​បន្តិច​ទើប​អាច​យល់​ចិត្ត​គ្នា។

ផល រតនៈ បាន​លើក​ឡើង​​ថា ការ​លេង​ជា​មួយ​ សួន ចាន់ណារ៉ូ គឺ​អត់​ពិបាក​ស្រែក​ប្រាប់​​​ថា​តើ​ត្រូវ​លើក​បាល់ទៅ​ខាង​ណា ខ្ពស់ ឬ​ទាប​ទេ ពី​ព្រោះ​ក្នុង​ក្រុម​ជម្រើស​ជាតិ​យល់​ចិត្ត​គ្នា​ច្រើន​ឆ្នាំ​ហើយ ប៉ុន្តែ​បើ​លេង​ជា​មួយ​​​អ្នក​ប៉ះ​សេ​ថ្មី​គឺ​ត្រូវ​​​ស្រែក​ប្រាប់​មុន​ពី​ការ​លើក​បាល់ទៅឆ្វេង ទៅ​ស្តាំ ឬ​កណ្តាល ដូច្នេះ​ត្រូវ​ការ​ពេល​ហោច​ណាស់​១​ឆ្នាំ​ទៀត​ទើប​អាច​យល់​ចិត្ត​គ្នា។

រហូត​ដល់​ពេល​នេះ កីឡាករ កែវ ស្រេងលីហ៊ួរ, យ៉ុន ខេមរៈ និង ឡាវ រាសីកែវ មិន​សូវ​បាន​លេង​​ឲ្យ​​ក្រុម​ជម្រើស​ជាតិ​កម្ពុជា​ក្នុង​ព្រឹត្តិការណ៍​ធំ​ៗ​ទេ។ ពួក​គាត់​ភាគ​ច្រើន​លេង​​​​ក្លិប​នៅ​​ក្នុង​ព្រឹត្តិការណ៍​ប្រកួត​ក្នុង​ស្រុក​ប៉ុណ្ណោះ៕

អត្ថបទ៖ វីរបុត្រ

The post អ្នក​ប៉ះសេ​៣​រូប​អាច​​​ជំនួស សួន ចាន់ណារ៉ូ នៅក្រុម​ជម្រើស​ជាតិ appeared first on Kampuchea Thmey Daily.