គេងមិនលក់ Archives - Kampuchea Thmey Daily

កុំទុកយូរ! បើគេងមិនលក់រាល់ថ្ងៃ ដល់កម្រិតនេះហើយ គួរទៅជួបពេទ្យ

សាង ស្រីល័ក្ខ — Mon, 10 Apr 2023 01:45:53 +0000

ធ្លាប់អត់ ពេលដែលរាងកាយយើងទន់អស់ហើយ ភ្នែកក៏ធ្លាក់ដែរ យើងចង់គេងណាស់ ប៉ុន្តែខួរក្បាលយើងមិនឲ្យគេងសោះ នៅវិលវល់មិនព្រមសម្រាក។ ជឿថា មានគ្នាយើងមិនតិចទេ ដែលជួបប្រទះបញ្ហាគេងមិនលក់នេះ ទោះខំប្រឹងប៉ុនណាក៏គេងមិនលក់ដែរ ហើយមានខ្លះទៀតគេងមិនលក់ស្ទើររាល់ថ្ងៃដែលយូរៗទៅ ក្លាយជាបញ្ហាគេងមិនលក់រ៉ាំរ៉ៃក៏មាន។

បញ្ហាគេងមិនលក់រ៉ាំរ៉ៃអាចបណ្ដាលឲ្យយើងពិបាកគេងលក់ ឬគេងលក់ហើយ តែងាយភ្ញាក់មកវិញ ឬគេងលក់ហើយ តែភ្ញាក់មកវិញ ហើយគេងលែងលក់ម្ដងទៀត។ល។ បញ្ហាគេងមិនលក់នេះមិនត្រឹមតែធ្វើឲ្យយើងគេងមិនឆ្អែត អស់កម្លាំងទេ វាក៏អាចប៉ះពាល់ទៅដល់សុខភាព ការបំពេញចការងារ និងគុណភាពជីវិតថែមទៀត។ នេះបើតាមការឲ្យដឹងពីលោកវេជ្ជបណ្ឌិត ចាន់ ស៊ីណេត ឯកទេសជំងឺទូទៅ។

ចុះយើងគេងមិនលក់ដល់កម្រិតណា ទើបគួរទៅជួបគ្រូពេទ្យ?

ភាគច្រើន គ្នាយើងនិយមញ៉ាំថ្នាំងងុយគេង ដើម្បីជួយឲ្យគេងលក់ តែនេះមិនមែនជាវិធីល្អប៉ុន្មានទេ។ វេជ្ជបណ្ឌិតបន្តថា បើយើងគេងមិនលក់រាល់យប់ ហើយទម្រាំគេងលក់ម្ដងៗពិបាក ហើយបើយើងឃើញថា សូម្បីតែនៅពេលថ្ងៃ ក៏យើងពិបាកផ្ចង់អារម្មណ៍ធ្វើការ ហត់អស់កម្លាំងទៀតនោះ យើងគួរទៅជួបគ្រូពេទ្យ ដើម្បីរកមូលហេតុច្បាស់ និងរកវិធីព្យាបាល មុនពេលវាប៉ះពាល់ទៅដល់សុខភាពយើងបាន។

មនុស្សយើងម្នាក់ៗសុទ្ធតែជួបបញ្ហាគេងមិនលក់ម្ដងម្កាល ប៉ុន្តែមនុស្សមួយចំនួនដូចខាងក្រោមនេះ ងាយរងគ្រោះដោយសារជំងឺគេងមិនលក់រ៉ាំរ៉ៃនេះជាងគេងដូច៖

– មនុស្សស្រី (ពិសេសស្ត្រីពពោះ)

– មនុស្សចាស់ (អាយុ៦០ឆ្នាំឡើង)

– មនុស្សស្ត្រេសច្រើន គិតច្រើន

– មនុស្សមានកាលវិភាគមិនច្បាស់លាស់ (ផ្លាស់ប្ដូរម៉ោងធ្វើការ ពិសេសការងារពេលយប់ ឬធ្វើដំណើរទៅកន្លែងម៉ោងខុសគ្នា)

ម៉្យាងវិញទៀត បញ្ហាគេងមិនលក់រ៉ាំរ៉ៃក៏បង្កជាផលពិបាកច្រើនគួរសមទៅដល់សុខភាព និងគុណភាពនៃការរស់នៅសព្វថ្ងៃរបស់យើងដែរ ធ្វើឲ្យការងារ ឬការសិក្សាធ្លាក់ចុះ អត្រានៃការជួបគ្រោះថ្នាក់កើនឡើង ប៉ះពាល់ទៅដល់ផ្លូវអារម្មណ៍ (កើតជំងឺបាក់ទឹកចិត្ត ជំងឺថប់បារម្ភ។ល។) និងអាចបង្កឲ្យកើតជំងឺបេះដូង ឬជំងឺលើសសម្ពាធឈាមជាដើម។

អត្ថបទផ្ដល់ដោយ៖Hello Krupet

ចុចអាន៖ហេតុអ្វីបានជាស្ងាបញឹកញាប់ តើមានគ្រោះថ្នាក់ដល់ជីវិតដែរទេ ?

ចុចអាន៖គន្លឹះល្អៗទាំង ៤ បង្ការជំងឺស្លេកស្លាំងបែបធម្មជាតិ

The post កុំទុកយូរ! បើគេងមិនលក់រាល់ថ្ងៃ ដល់កម្រិតនេះហើយ គួរទៅជួបពេទ្យ appeared first on Kampuchea Thmey Daily.

ហេតុអ្វីបានជាស្ងាបញឹកញាប់ តើមានគ្រោះថ្នាក់ដល់ជីវិតដែរទេ ?

សាង ស្រីល័ក្ខ — Thu, 13 Jan 2022 06:05:00 +0000

ងងុយគេងបន្ទាប់ពីស្ងាបច្រើនដង គឺជាយន្តការមួយដែលរាងកាយត្រូវការ ដើម្បីយកអុកស៊ីសែនពីខ្យល់ចូលទៅក្នុងចរន្តឈាម។ ក្នុងពេលជាមួយគ្នា នេះវាជួយជំរុញកាបូនឌីអុកស៊ីតនៅក្នុងឈាម ដើម្បីរក្សាតុល្យភាពនៃរាងកាយ។ វាក៏កើតឡើងនៅពេលដែលរាងកាយមិនមានអុកស៊ីសែនគ្រប់គ្រាន់ ឬមានកាបូនឌីអុកស៊ីតច្រើនពេក នៅក្នុងឈាម រហូតដល់ធ្វើឲ្យងងុយដេក។

ការស្ងាបច្រើនដង ជារឿងធម្មតា តែស្ថានភាពខ្លះ យើងក៏គួរទៅពិគ្រោះជាមួយគ្រូពេទ្យឲ្យច្បាស់ ព្រោះករណីមួយទៀត អាចជាជំងឺ។

១ ការគេងមិនគ្រប់គ្រាន់

ការគេងមិនគ្រប់គ្រាន់ អាចបណ្តាលឲ្យងងុយគេងពេលថ្ងៃ ទោះបីជាវាមិនធ្ងន់ធ្ងរក៏ដោយ។ ប៉ុន្តែអាចប៉ះពាល់ដល់ប្រព័ន្ធភាពស៊ាំ វាក៏បង្កហានិភ័យនៃការវិវត្តទៅជាជំងឺធ្ងន់ធ្ងរដូចជា ជំងឺធាត់ បេះដូង ឬធ្លាក់ទឹកចិត្តជាដើម។ ទោះជាយ៉ាងណាក៏ដោយ ព្យាយាមពិនិត្យមើលខ្លួនឯង ប្រសិនបើដូច្នេះមែន ចូរកែសម្រួលទម្លាប់គេងរបស់អ្នក និងកំណត់កាលវិភាគគេងថ្មី។

២ ដេកអត់លក់

ការគេងមិនលក់ គឺជារោគសញ្ញាដែលរាងកាយមានអារម្មណ៍ថាចង់គេង ប៉ុន្តែមិនអាចគេងបានដោយត្រូវចំណាយពេលយូរជាងធម្មតា។ យើងងងុយគេង ប៉ុន្តែក្រោកពីព្រលឹម ឬភ្ញាក់ឡើងនៅពាក់កណ្តាលយប់ និងមិនអាចគេងបានទៀតទេ ធ្វើឲ្យរាងកាយមានអារម្មណ៍ខ្សោយ ។

ដូច្នេះគួរចៀសវាងភេសជ្ជៈដែលមានសារធាតុរំញោចខួរក្បាល ដូចជា ជាតិកាហ្វេអ៊ីន ដែលមាននៅក្នុងតែ កាហ្វេ ភេសជ្ជៈប៉ូវកម្លាំង ជាដើម ប៉ុន្តែប្រសិនបើអ្នកចង់ផឹក គួរតែជ្រើសរើសផឹកមុនម៉ោង ២រសៀល ព្រោះបើផឹកក្រោយម៉ោង ២រសៀល អាចបណ្តាលឲ្យរាងកាយមានបញ្ហាគេងមិនលក់ ប្រសិនបើមានការគេងមិនលក់ញឹកញាប់ អ្នកគួរតែទៅជួបគ្រូពេទ្យ។

៣ ផលប៉ះពាល់នៃថ្នាំ

ក្រុមមនុស្សដែលប្រើថ្នាំ ដូចជាថ្នាំប្រឆាំងនឹងជំងឺធ្លាក់ទឹកចិត្ត ឬក្រុមថ្នាំថប់បារម្ភ អាចបណ្តាលឲ្យមានផលប៉ះពាល់ ងងុយដេក គេងមិនលក់។

៤ ផលវិបាកពីជំងឺដែលមានស្រាប់

មានជំងឺជាច្រើន ដែលធ្វើឲ្យរាងកាយស្រវាំងជាងធម្មតាដូចជា MS (multiple sclerosis) ដុំសាច់ក្នុងខួរក្បាល។ ជំងឺដាច់សរសៃឈាមខួរក្បាល ជំងឺឆ្កួតជ្រូក ជំងឺខ្សោយថ្លើម ជំងឺដាច់សរសៃឈាមខួរក្បាលស្រួចស្រាវ ជាដើម។

វិធីព្យាបាលការអាការស្ងាបញឹកញាប់

ប្រសិនបើយើងជាមនុស្សម្នាក់ដែលស្ងាបច្រើន ហើយបង្កបញ្ហាដូចជា ងងុយដេកអំឡុងពេលធ្វើការ រៀនសូត្រ ឬកិច្ចប្រជុំញឹកញាប់ ខាងក្រោមនេះជាដំណោះស្រាយមួយចំនួន៖

-គេងឲ្យបានគ្រប់គ្រាន់ ដើម្បីបំពេញតម្រូវការរបស់រាងកាយ ជាធម្មតា ៦-៩ ម៉ោង។
-បន្តធ្វើលំហាត់ប្រាណឲ្យបានទៀងទាត់ ដើម្បីរក្សារាងកាយឲ្យស្រស់ថ្លា ។
-ផឹកទឹកឲ្យបានច្រើន ដើម្បីបន្ថែមភាពស្រស់ស្រាយដល់រាងកាយ។
-ចៀសវាងអាហារម្សៅ និងជាតិស្ករលើស ព្រោះញ៉ាំម្សៅ និងស្ករច្រើនពេកនឹងធ្វើឲ្យរាងកាយងងុយគេង។

-ដោយសារតែលំពែងបញ្ជូនអាំងស៊ុយលីនចេញ ដើម្បីរំលាយជាតិស្ករក្នុងបរិមាណច្រើន។ ជាលទ្ធផល កម្រិតជាតិស្ករក្នុងឈាមកើនឡើង បណ្ដាលឲ្យងងុយដេក។
-ក្រោកពីកៅអី នៅពេលអង្គុយនៅក្នុងថ្នាក់ អង្គុយក្នុងទីតាំងដដែលរយៈពេលយូរ។
-បដិសេធ ឬកាត់បន្ថយគ្រឿងស្រវឹង និងភេសជ្ជៈដែលមានជាតិកាហ្វេអ៊ីន។

យ៉ាងណាមិញ ប្រសិនបើយើងបានព្យាយាមកែតម្រូវអាកប្បកិរិយាអាក្រក់នេះរួច ហើយការងងុយគេងញឹកញាប់ នៅតែមិនប្រសើរឡើង នោះគួរតែទៅពិគ្រោះជាមួយវេជ្ជបណ្ឌិត ដើម្បីស្វែងរកមូលហេតុពិតប្រាកដ និងបន្តការព្យាបាលនៅនឹងកន្លែងតែម្ដង៕

ប្រែសម្រួល៖ សាង ស្រីល័ក្ខ

ចុចអាន៖គេងមិនលក់ចង់ប្រើថ្នាំ ត្រូវស្គាល់ប្រភេទថ្នាំ និងវិធីប្រើមានសុវត្ថិភាព

ចុចអាន៖អាហារ ៦ ប្រភេទមិនគួរហូបច្រើនពេកនៅពេលល្ងាច ដែលអាចប៉ះពាល់ដល់ដំណេកធ្ងន់ធ្ងរ

The post ហេតុអ្វីបានជាស្ងាបញឹកញាប់ តើមានគ្រោះថ្នាក់ដល់ជីវិតដែរទេ ? appeared first on Kampuchea Thmey Daily.

ជួបបញ្ហាគេងមិនលក់? សាកវិធីដកដង្ហើមដោយប្រើតិចនិក ៤-៧-៨ អាចជួយឱ្យគេងឆាប់លក់

Sonya — Thu, 25 Nov 2021 09:44:46 +0000

រឿងឈឺក្បាលរបស់មនុស្សមួយចំនួនធំមិនថាយើង ឬអ្នកផ្សេងទេ គឺពិបាកចិត្ដរឿងគេងមិនលក់ ជាពិសេសពេលយើងត្រូវមានកម្មវិធីសំខាន់ត្រូវចូលរួមនៅថ្ងៃបន្ទាប់ តែបែរជាគេងមិនលក់ទៅវិញ។ ទាក់ទងនឹងការគេងមិនលក់នេះ លោកស្រីវេជ្ជបណ្ឌិត ចូ បានបង្ហាញអំពីវិធីដកដង្ហើម ដែលវិធីនេះអាចជួយឲ្យយើងគេងបានឆាប់ និងគេងបានស្កប់ទៀតផង។

លោកស្រីវេជ្ជបណ្ឌិតខាងលើបានហៅវិធីនោះថា តិចនិច ៤-៧-៨ ដែលតម្រូវឲ្យយើងដកដង្ហើមចូលចំនួន ៤វិនាទី រួចទប់ដង្ហើម ៧វិនាទី និងដកដង្ហើមចេញវិញចំនួន ៨វិនាទី។

លោកស្រីបានណែនាំឲ្យយើងដកដង្ហើមចូលធម្មតា មួយៗ ហើយបន្ទាប់មក ទប់ដង្ហើមនោះឲ្យបាន ៧វិនាទី។ ក្រោយមកទៀតដកដង្ហើមចេញ ដោយធ្វើមាត់ឲ្យរៀងស្រួចបន្តិច ដូចយើងផ្លំខ្យល់ចេញ ឲ្យបាន ៨វិនាទីវិញ។ ពេលខ្លះយើងពិតជាមិនអាចដកដងហើមចេញបានរហូតដល់ ៨វិនាទីមនោះទេ ប៉ុន្តែពេលយើងព្យាយាមធ្វើវាកាន់តែច្រើន នោះយើងនឹងអាចធ្វើបាន។

លោកស្រីវេជ្ជបណ្ឌិត ចូ ក៏បានណែនាំឲ្យយើងគេងផ្ងារដើម្បី អនុវត្តវិធីដកដង្ហើមបែបនេះ ដើម្បីទទួលបានផលប្រយោជន៍បាន។

ពេលយើងសាកល្បងអនុវត្តវិធីនេះលើកដំបូង យើងអាចនឹងមានការលំបាកបន្តិច ដោយថាអាចពិបាកស៊ាំជាមួយវា ប៉ុន្តែពេលយើងទម្លាប់ធ្វើកាន់តែយូរទៅ យើងនឹងអាចគេងលក់បានឆាប់ជាងមុន។ ដូចនេះយើងត្រូវព្យាយាមធ្វើឲ្យបានយូរបន្តិច ទើបឃើញលទ្ធផលល្អ៕

អត្ថបទផ្ដល់សិទ្ធិ៖ Hello គ្រូពេទ្យ

ចុចអាន៖ ដេកអត់លក់ ហាត់ប្រាណពិសេសមួយនេះ អាចឲ្យដេកលក់ស្កប់ស្កល់

ចុចអាន៖ គេងមិនលក់ចង់ប្រើថ្នាំ ត្រូវស្គាល់ប្រភេទថ្នាំ និងវិធីប្រើមានសុវត្ថិភាព

The post ជួបបញ្ហាគេងមិនលក់? សាកវិធីដកដង្ហើមដោយប្រើតិចនិក ៤-៧-៨ អាចជួយឱ្យគេងឆាប់លក់ appeared first on Kampuchea Thmey Daily.

គ្រូពេទ្យស្រឡាំងកាំង ពេលស្រ្តីម្នាក់អះអាងថា មិនដែលដេកសោះ រយៈពេល៤០ឆ្នាំ

Sok Sovann — Tue, 07 Sep 2021 07:19:35 +0000

ករណីដ៏ចម្លែកមួយ ដែលស្ត្រីម្នាក់អះអាងថា នាងមិនដែលដេកសោះក្នុងរយៈពេល ៤០ ឆ្នាំមកនេះ បានធ្វើឲ្យក្រុមគ្រូពេទ្យ មានការភ្ញាក់ផ្អើលយ៉ាងខ្លាំង។

អ្នកស្រី Li Zhanying មកពីខេត្ត Henan ប្រទេសចិនបានអះអាងថា នាងបានដេកលើកចុងក្រោយបំផុត នៅពេលនាងមានអាយុ៥ឆ្នាំ។

ដោយសារតែចង់ដឹងការពិត អ្នកជិតខាងបាននាំនាងលេងបៀរមួយយប់ទាល់ភ្លឺ។ តែអ្នកទាំងនោះ មានខ្លះដេកលើតុ ខ្លរត់ទៅផ្ទះ រីឯអ្នកស្រី Li នៅតែបង្ហាញសភាពធម្មតា។

អ្នកស្រីថែមទាំងអាចទប់ទល់បានផងដែរ បើទោះបីជាលេបថ្នាំងងុយដេកក៏ដោយ ហើយបាតុភូតចម្លែកនេះបានធ្វើឲ្យនាងក្លាយជាតារាល្បីក្នុងស្រុក។

ប្តីរបស់នាងឈ្មោះ Liu Suoquin បានប្រាប់សារព័ត៌មានក្នុងស្រុកថា ការអះអាងរបស់នាងគឺជាការពិត។ គាត់បាននិយាយថា ចាប់តាំងពីអ្នកទាំងពីររៀបការ នាងបានបំពេញការងារផ្ទះជាប្រចាំទោះនៅពេលយប់ងងឹតក៏ដោយ។

នៅពេលគូស្នេហ៍នេះចាប់ផ្តើមគេងលើគ្រែតែមួយ នាងតែងតែលាន់មាត់ថា “ខ្ញុំមិនអាចគេងលក់ទេ!”។

ទោះបីជាយ៉ាងណាក៏ដោយ មកទល់ពេលនេះ គ្រូពេទ្យមិនទាន់អាចធ្វើរោគវិនិច្ឆ័យស្ថានភាពរបស់អ្នកស្រី Li បានទេ៕

ប្រែសម្រួល៖ Vann Vann

ប្រភព៖ Daily Star

ចុចអាន៖ កូនភ្លោះអាយុ២០ខែ ត្រូវម្តាយទុកក្នុងឡានយូរពេក រហូតដល់ស្លាប់

The post គ្រូពេទ្យស្រឡាំងកាំង ពេលស្រ្តីម្នាក់អះអាងថា មិនដែលដេកសោះ រយៈពេល៤០ឆ្នាំ appeared first on Kampuchea Thmey Daily.

គេងមិនលក់ចង់ប្រើថ្នាំ ត្រូវស្គាល់ប្រភេទថ្នាំ និងវិធីប្រើមានសុវត្ថិភាព

សាង ស្រីល័ក្ខ — Tue, 07 Sep 2021 00:55:00 +0000

គេងមិនលក់ ម៉ោង២ ម៉ោង ៣ភ្លឺ រាប់យប់ ព្រឹកឡើងគ្មានកម្លាំងនឹងក្រោកផង កុំថាឡើយទៅធ្វើការនោះ។ យ៉ាងណា ថ្នាំងងុយគេង មិនមែនមិត្តស្និទ្ធស្នាលសម្រាប់គ្នាយើងមានអាការគេងមិនលក់ ប៉ុន្តែបើពិតជាត្រូវប្រើថ្នាំប្រភេទនេះ អ្វីយើងត្រូវដឹងច្បាស់ជាមុន គឺប្រភេទថ្នាំ និងវិធីប្រើមានសុវត្ថិភាពជាមុនសិន។

១- ប្រភេទថ្នាំងងុយគេង

– ថ្នាំ Melatonin៖ នៅពេលបរិយាកាសខាងក្រៅ ចាប់ផ្ដើមងងឹត ខួរក្បាលចាប់ផ្ដើមផលិតអ័រម៉ូនមួយប្រភេទ ហៅថា Melatonin។ អ័រម៉ូននេះកំណត់វដ្ដនៃការគេង ដោយបញ្ជាទៅរាងកាយ ដល់ពេលសម្រាកហើយ។ ខួរក្បាលផលិតអ័រម៉ូននេះតិច នៅពេលមានពន្លឺ និងផលិតច្រើន នៅពេលងងឹត។ អាយុក៏ពាក់ព័ន្ធនឹងការផលិតអ័រម៉ូននេះដូចគ្នា ពេលអាយុកាន់តែច្រើន ការផលិតអ័រម៉ូន Melatonin កាន់តែតិច។ ថ្នាំជំនួយការគេងភាគច្រើន មានផ្ទុកសារធាតុ Melatonin នេះ។ ថ្នាំនេះ ល្អបំផុតពេលប្រើក្នុងករណីដូចជា៖

ពេលធ្វើតាមយន្តហោះរយៈចម្ងាយឆ្ងាយ ហើយមានការផ្លាស់ប្ដូរម៉ោងគេង
ពេលមានបញ្ហាមិនងងុយគេង នៅពេលយប់
ពេលផ្លាស់ប្ដូរម៉ោងធ្វើការវេនយប់

– ថ្នាំប្រឆាំងអ៊ីស្ដាមីន (Sedating Antihistamines)៖ ថ្នាំប្រឆាំងអ៊ីស្ដាមីន អាចប្រើប្រាស់ជួយដល់យើងមានបញ្ហាគេងមិនលក់។ ពិតណាស់ ថ្នាំប្រឆាំងអ៊ីស្ដាមីន អាចរកទិញបានដោយមិនចាំបាច់មានវេជ្ជបញ្ជា ត្រូវបានប្រើប្រាស់ព្យាបាលអាលែកហ្ស៊ី ហើយអាចបណ្ដាលឲ្យងងុយគេង។ ថ្នាំប្រឆាំងអ៊ីស្ដាមីន ជំនាន់ទី១ ឬ (Sedating Antihistamines) ត្រូវប្រើប្រាស់ ដើម្បីជំនួយការគេង ឬសម្រួលភាពតានតឹង និងស្មុគស្មាញ។

– ឫសដើម Valerian៖ ឫសដើម Valerian ត្រូវប្រើប្រាស់ជាឱសថ តាំងពីសម័យក្រិក និងអាណាចក្រ រ៉ូម មកម្ល៉េះ។ ឫសដើមនេះ ជំនួយដល់ការគេង ការសម្រាក និងសម្រួលភាពស្មុគស្មាញ។ ឫសដើមនេះ យកធ្វើជាតែ ថ្នាំគ្រាប់ សម្រាប់ផឹកបាន។

– ថ្នាំ Hypnotics៖ Hypnotics ជាក្រុមថ្នាំងងុយគេង ប៉ុន្តែដើម្បីអាចមានសិទ្ធិទិញថ្នាំនេះ ទាល់តែមានវេជ្ជបញ្ជា។ ពេទ្យនឹងចេញវេជ្ជបញ្ជាឲ្យប្រើប្រាស់ថ្នាំនេះ ពេលមានបញ្ហាគេងមិនលក់រយៈពេលយូរ ព្រោះថ្នាំនេះ មានផលប៉ះពាល់ជាច្រើន៕

អត្ថបទផ្ដល់ដោយ៖ Hello Krupet

ចុចអាន៖៥ យ៉ាងអាចមិនដឹង ហើយប្រើថ្នាំប៉ារ៉ាសេតាម៉ុលខុស ដែលបណ្ដាលឲ្យគ្រោះថ្នាក់ដល់ជីវិត

The post គេងមិនលក់ចង់ប្រើថ្នាំ ត្រូវស្គាល់ប្រភេទថ្នាំ និងវិធីប្រើមានសុវត្ថិភាព appeared first on Kampuchea Thmey Daily.

មូលហេតុ និងហេតុផលមួយចំនួនដែលបណ្ដាលឲ្យគេងមិនលក់

Sorn Phanith — Thu, 02 Sep 2021 01:26:51 +0000

១) អ្វីទៅជាការគេងមិនលក់?

ការគេងមិនលក់ គឺជាស្ថានភាពដែលយើងពិបាកគេង បើទោះជាយើងមានពេលវេលាគ្រប់គ្រាន់សម្រាប់គេងក៏ដោយ។ ការគេងមិនលក់អាចជាការគេងក្រលក់ ការភ្ញាក់ច្រើនដង ឬការឆាប់ភ្ញាក់ហើយគេងទៅវិញមិនលក់ ជាដើម។

២) អ្វីខ្លះជាផលវិបាកនៃការគេងមិនលក់?

ផលប៉ះពាល់ខ្លះៗនៃការគេងមិនគ្រប់គ្រាន់រួមមាន៖

– ងងុយគេងនៅពេលថ្ងៃ

– អស់កម្លាំង

– អារម្មណ៍មិនមូល

– ការចងចាំចុះអន់ថយ

– ពិបាកសម្រេចចិត្ត

– ឆាប់ខឹងមួម៉ៅ

– អន្ទះអន្ទែង ងាយមានគ្រោះថ្នាក់ផ្សេងៗ ជាដើម។

៣) អ្វីខ្លះដែលអាចនាំឲ្យគេងមិនលក់?

ការគេងមិនលក់អាចបណ្ដាលមកពីមូលហេតុច្រើនយ៉ាង ដូចជា៖

– មូលហេតុផ្លូវកាយ: ក្រពះមិនរំលាយអាហារ ការឈឺចាប់លើរាងកាយ ជំងឺបេះដូង ជំងឺហឺតរលាកឆ្អឹងប្រហោងមុខ ជាដើម។

– មូលហេតុផ្លូវចិត្ត: មានអារម្មណ៍តានតឹង ព្រួយបារម្ភច្រើន មានអារម្មណ៍ជ្រួលច្របល់ ខឹងសម្បារ មានអារម្មណ៍សោកសៅ ជាដើម។

– មូលហេតុទាក់ទងនឹងរបៀបរបបរស់នៅ: ផឹកកាហ្វេ ឬតែច្រើន ផឹកស្រានៅពេលយប់ ហូបអាហារច្រើនពេកមុនចូលគេង ជក់បារីច្រើន ធ្វើការខ្លាំងមុនចូលគេង មិនសូវបានហាត់ប្រាណគេងថ្ងៃច្រើន គេងមិនទៀងពេល ជាដើម។

– មូលហេតុទាក់ទងនឹងបរិស្ថាន: កន្លែងគេងមានសំឡេងរំខាន បរិយាកាសអាប់អួ កន្លែងគេងមានពន្លឺខ្លាំងពេក រស់នៅគ្នាច្រើន ជាដើម។

៤) ការព្យាបាលការគេងមិនលក់

ថ្វីបើការគេងមិនលក់ម្ដងម្កាល និងក្នុងរយៈពេលមួយទៅពីរថ្ងៃអាចជារឿងធម្មតា ដែលមនុស្សគ្រប់គ្នាអាចជួបប្រទះក៏ដោយក្ដី ក៏ការគេងមិនលក់ញឹកញាប់ និងក្នុងរយៈពេលយូរ ទាមទារឲ្យមានការពិគ្រោះ និងវាយតម្លៃឲ្យបានដិតដល់ ដើម្បីព្យាបាលទៅតាមមូលហេតុដែលនាំឲ្យគេងមិនលក់។ ការប្រើប្រាស់ថ្នាំងងុយគេងដោយចិត្តឯង មិនមែនជាជម្រើសល្អទេ ព្រោះការប្រើវាយូរៗទៅអាចបណ្ដាលឲ្យប្រើលែងត្រូវ និងត្រូវការប្រើថ្នាំកាន់តែច្រើនទៅៗ។

ប្រសិនបើលោកអ្នកមានការរំខានដោយបញ្ហាគេងមិនលក់យូរ សូមមកទទួលសេវាពិគ្រោះ និងព្យាបាលជាមួយគ្រូពេទ្យជំនាញនៅមន្ទីរពេទ្យកាល់ម៉ែត ដើម្បីជាគុណប្រយោជន៍ដល់សុខភាព៕

អត្ថបទ៖ រស្មី

The post មូលហេតុ និងហេតុផលមួយចំនួនដែលបណ្ដាលឲ្យគេងមិនលក់ appeared first on Kampuchea Thmey Daily.

អាហារ ៦ ប្រភេទមិនគួរហូបច្រើនពេកនៅពេលល្ងាច ដែលអាចប៉ះពាល់ដល់ដំណេកធ្ងន់ធ្ងរ

សាង ស្រីល័ក្ខ — Fri, 27 Aug 2021 01:34:05 +0000

មិនត្រឹមតែកាហ្វេឬភេសជ្ជៈដែលមានជាតិកាហ្វេអ៉ីនទេ ដែលអាចរំខានដល់ដំណេក សូម្បីតែអាហារក៏អាចប៉ះពាល់ដល់គុណភាពនៃការគេង ដែលនឹកស្មានមិនដល់។

វេជ្ជបណ្ឌិត Thidakan Ruchipattanakul គ្រូពេទ្យឯកទេសរោគសើស្បែកនិងប្រឆាំងភាពចាស់នៃមន្ទីរពេទ្យ Samitivej Sukhumvit បានបញ្ជាក់ថា អាហារ ៦ យ៉ាងដែលអ្នកមិនគួរហូបច្រើនពេកនៅពេលល្ងាច អាចមានហានិភ័យនៃការគេងមិនលក់។

១ សូកូឡា មនុស្សជាច្រើនភ្លេចថាសូកូឡាមានជាតិកាហ្វេអ៉ីនដូចនៅក្នុងកាហ្វេនិងតែ។ ប្រសិនបើអ្នកហូបច្រើនពេកវាអាចបណ្ដាលឲ្យគេងមិនលក់ផងដែរ។

២ ម្ទេស ជឿឬមិនជឿថាម្ទេសក៏ជាបញ្ហា។ ជាលទ្ធផលសីតុណ្ហភាពរាងកាយខ្ពស់អាចបណ្តាលឲ្យគេងមិនលក់ជាខ្លាំង។

៣ ទឹកផ្លែឈើ វាអាចជារឿងគួរឲ្យភ្ញាក់ផ្អើលបន្តិច ដែលអ្នកមិនអាចផឹកទឹកផ្លែឈើសម្រាប់អាហារពេលល្ងាចឬមុនពេលចូលគេង អាចមិនឲ្យគេងលក់។ ដោយសារទឹកផ្លែឈើជាពិសេសរបស់ជូរៗ អាចបណ្តាលឲ្យមនុស្សប្រឈមនឹងការចាល់អាស៊ីតនៅពេលយប់។

៤ ឈីស មូលហេតុដែលឈីសអាចបណ្តាលឲ្យអ្នកគេងមិនលក់ គឺដោយសារតែប្រភេទឈីសខ្លះមានអាស៊ីដអាមីណូខ្ពស់ tyramin។ ជាលទ្ធផលខួរក្បាលភ្ញាក់កណ្ដាលយប់ ឬគេងមិនលក់តែម្ដង។

៥ ខ្ទឹមនិងខ្ទឹមបារាំង ខ្ទឹមនិងខ្ទឹមបារាំងគឺជាបន្លែដែលបង្កើនខ្យល់ក្នុងក្រពះ ដែលអាចបណ្តាលឲ្យហើមពោះនិងគេងមិនលក់។

៦ ស្រា ក៏អាចធ្វើឲ្យអ្នកគេងលក់ដូចគ្នា។ ភាគច្រើនផលប៉ះពាល់នៃជាតិអាល់កុល នឹងធ្វើឲ្យអ្នកងងុយដេក។គេងមិនបានស្កប់ស្កល់ ដូចមានអារម្មណ៍ថាមិនបានសម្រាកពេញលេញដែរ។ ព្រោះគ្រឿងស្រវឹងពិតជារំខានដល់វដ្តនៃការគេងបែបធម្មជាតិ ដែលបណ្តាលឲ្យគេងមិនលក់។

ដូច្នេះត្រូវចៀសវាងអាហារដែលបណ្ដាលឲ្យគេងមិនលក់ ដូចដែលបានរៀបរាប់នៅក្នុងអត្ថបទខាងលើនេះ៕

ប្រែសម្រួល៖ សាង ស្រីល័ក្ខ

ចុចអាន៖ផឹកទឹកភ្លៀងមានគុណប្រយោជន៍ និងប៉ះពាល់អីខ្លះ?

ចុចអាន៖អនុវត្តគន្លឹះទាំងនេះ ធានាថានឹងបំបាត់ការគេងស្រមុក លែងរំខានដំណេកអ្នកជិតខ្លួន

The post អាហារ ៦ ប្រភេទមិនគួរហូបច្រើនពេកនៅពេលល្ងាច ដែលអាចប៉ះពាល់ដល់ដំណេកធ្ងន់ធ្ងរ appeared first on Kampuchea Thmey Daily.

ដេកមិនលក់ យូរៗអាចក្លាយជាជំងឺផ្លូវចិត្តអត់?

Sonya — Tue, 24 Aug 2021 09:02:00 +0000

ឥឡូវមានមនុស្សជាច្រើនកំពុងតែប្រឈមមុខនូវបញ្ហាគេងមិនលក់។ តើការគេងមិនលក់យូរៗទៅអាចជាជំងឺផ្លូវចិត្តដែរឬទេ? ដើម្បីស្រាយចម្ងល់នេះ សាស្ត្រាចារ្យវេជ្ជបណ្ឌិត យឹម សុបុត្រា ឯកទេសវិកលវិទ្យា និងជាប្រធានផ្នែកសុខភាពផ្លូវចិត្ត និងបំពានគ្រឿងញៀន នៅមន្ទីរពេទ្យមិត្តភាពខ្មែរ-សូវៀត បានរៀបរាប់ដូចខាងក្រោមនេះ៖

គ្រូពេទ្យផ្នែកវិកលវិទ្យាថា ការគេងមិនលក់មកពីខួរក្បាលមិនបានសម្រាក ព្រោះមូលហេតុផ្សេងៗគ្នា ដូចនេះហើយបានជាត្រូវស្វែងរកពីឫសគល់ ដើម្បីធ្វើយ៉ាងណាដោះស្រាយស្ថានភាពនេះបាន។ តែលោកគ្រូពេទ្យ បានបញ្ជាក់ថាមិនគួរប្រើប្រាស់ថ្នាំងុយដេកឡើយ គួរតែចាំជួបជាមួយអ្នកជំនាញសិន ទើបអាចដឹងពីស្ថានភាពខ្លួននាពេលបច្ចុប្បន្ន។

លោកថា “កាលណាយើងនិយាយពីរឿងដំណេក វាធ្វើការបែងចែកជាច្រើនទៀត។ វិបត្តិដំណេកខ្លះគេងបានតិចជាង ៦ ម៉ោង ហើយខ្លះទៀតលើសពី ៨ ម៉ោង។ មួយវិញទៀតអ្នកដេកមិនលក់មកពីជំងឺបេះដូង ឬជំងឺធ្ងន់ធ្ងរដទៃទៀត ធ្វើឲ្យមានការបារម្ភរហូតដេកមិនលក់ជាដើម ហើយបើធ្លាក់ទឹកចិត្តក៏ដេកមិនលក់ដែរ”។

ជាចុងក្រោយលោកបានបញ្ជាក់ទៀតថា ការថែរក្សាផ្លូវកាយបានល្អ សុខភាពផ្លូវចិត្តក៏ល្អដែរ ហើយបើពេលជួបបញ្ហាណាមួយ ត្រូវតែដោះស្រាយឲ្យបានលឿនកុំអូសបន្លាយ ឬបើរឿងគ្មានប្រយោជន៍ តិចតួចគួរបោះបង់ទៅ ព្រោះវានឹងបណ្ដាលឲ្យយើងគិតច្រើនអត់អំពើ។ ចុះចំពោះសំណួរថា អាចវិវត្តជាជំងឺផ្លូវចិត្ត ឬអត់? លោកគ្រូពេទ្យថា មានជំងឺផ្លូវចិត្តអាចធ្វើឲ្យយើងដេកមិនលក់ តែបើការដេកមិនលក់យូរអាចវិវត្តទៅជាជំងឺផ្លូវចិត្តនោះ លោកមិនហ៊ានបញ្ជាក់នោះឡើយ គ្រាន់តែឲ្យរកពីមូលហេតុដែលបង្កឲ្យគេងមិនលក់ជាមុនសិន៕

អត្ថបទផ្ដល់សិទ្ធិ៖ Hello គ្រូពេទ្

ចុចអាន៖ គេងគ្រប់ហើយនៅតែអស់កម្លាំង មកពីធ្វើតែរឿងអស់នេះក្នុងជីវិតឲ្យក្លាយជាទម្លាប់

ចុចអាន៖ យុវវ័យឥឡូវ ងាយប្រឈមបញ្ហាផ្លូវចិត្តដោយសារកត្តាអីខ្លះ? អាចដឹងដោយរបៀបណា?

The post ដេកមិនលក់ យូរៗអាចក្លាយជាជំងឺផ្លូវចិត្តអត់? appeared first on Kampuchea Thmey Daily.