គ្រឹះស្ថានអប់រំបណ្ដុះបណ្ដាលបច្ចេកទេស Archives - Kampuchea Thmey Daily

កម្ពុជា មានគ្រឹះស្ថានអប់រំបណ្ដុះបណ្ដាលបច្ចេកទេស និងវិជ្ជាជីវៈ កើនឡើងជាង ២៥០ កន្លែង នៅទូទាំងប្រទេស

អ៊ិន ពិសី — Mon, 16 Jun 2025 10:00:00 +0000

លោក ហេង សួរ រដ្ឋមន្ត្រីក្រសួងការងារ និងបណ្ដុះបណ្ដាលវិជ្ជាជីវៈ បានឱ្យដឹងថា គិតត្រឹមខែឧសភា ឆ្នាំ ២០២៥ មានគ្រឹះស្ថានអប់រំបណ្ដុះបណ្ដាលបច្ចេកទេស និងវិជ្ជាជីវៈ ក្រោមឱវាទក្រសួងសរុបចំនួន ២៥៤ គ្រឹះស្ថាន ក្នុងនោះ គ្រឹះស្ថានសាធារណៈចំនួន ៣៧ គ្រឹះស្ថាន ឯកជនចំនួន ១៩៣ គ្រឹះស្ថាន ដោយចុះបញ្ជីការនៅក្រសួងចំនួន ៧២ គ្រឹះស្ថាន និងគ្រឹះស្ថានក្រោមឱវាទមន្ទីរចំនួន ១២១ គ្រឹះស្ថាន និងអង្គការ/សមាគមចំនួន ២៤ គ្រឹះស្ថាន។

ថ្លែងក្នុងទិវាជាតិអប់រំបណ្ដុះបណ្ដាលបច្ចេកទេស និងវិជ្ជាជីវៈ លើកទី ៨ ក្រោមប្រធានបទ «TVET បង្កើតឱកាសការងារ សាងក្តីសង្ឃឹមដល់យុវជន» រយៈពេលពីរថ្ងៃ ចាប់ពីថ្ងៃទី ១៥ ដល់ថ្ងៃទី ១៦ ខែមិថុនា នេះ លោករដ្ឋមន្ត្រី បានបន្តថា គ្រឹះស្ថានអប់រំបណ្តុះបណ្តាលបច្ចេកទេស និងវិជ្ជាជីវៈ ២៥៤ គ្រឹះស្ថាន បានផ្តល់ការបណ្តុះបណ្តាលទាំងរយៈពេលខ្លី មធ្យម និងវែង ជាមធ្យមប្រមាណ ៦ ម៉ឺននាក់ និងការហ្វឹកហ្វឺនកូនជាងជាមធ្យមប្រមាណជាង ៣ ម៉ឺននាក់ ក្នុងមួយឆ្នាំ។ ក្នុងចំណោមគ្រឹះស្ថានសាធារណៈទាំង ៣៧ មានគ្រឹះស្ថានចំនួន ៣៦ ដែលបានទទួលវិញ្ញាបនបត្រប្រព័ន្ធគ្រប់គ្រងគុណភាពស្តង់ដារអន្តរជាតិ ISO 9001:2015។

លោករដ្ឋមន្ត្រី បានបន្តទៀតថា កន្លងមក ក្រសួង បានបន្តកសាង អភិវឌ្ឍន៍ និងធ្វើបរិវត្តកម្មវិស័យអប់រំបណ្តុះបណ្តាលបច្ចេកទេស និងវិជ្ជាជីវៈ ឱ្យកាន់តែទំនើប និងមានគុណភាពខ្ពស់កាន់តែប្រសើរ ទាំងហេដ្ឋារចនាសម្ព័ន្ធផ្នែករឹង (រូបវន្ត) និងទាំងហេដ្ឋារចនាសម្ព័ន្ធផ្នែកទន់ ដើម្បីឆ្លើយតបទៅនឹងការវិវត្តន៍យ៉ាងឆាប់រហ័ស នៃមូលដ្ឋាន សេដ្ឋកិច្ច ឧស្សាហកម្ម បច្ចេកវិទ្យាឌីជីថល និងការការពារបរិស្ថានប្រកបដោយចីរភាពរួមមាន ១.បានប្រែក្លាយគ្រឹះស្ថានអប់រំបណ្តុះបណ្តាលបច្ចេកទេស និងវិជ្ជាជីវៈ ដែលមានសភាពចាស់ ទ្រុឌទ្រោម និងមានទំហំតូចឱ្យទៅជាគ្រឹះស្ថានមានទំហំធំ កម្ពស់ច្រើនជាន់។ ទី២.ការដាក់ពង្រាយការបណ្តុះបណ្តាលតាមសហគមន៍សម្រាប់ជំនាញសេវាកម្ម និង ជំនាញពាក់ព័ន្ធនឹងកសិកម្ម និងកសិ-ឧស្សាហកម្ម។ ទី៣. ការពង្រឹងភាពជាដៃគូរវាងរដ្ឋ និងឯកជន ក្នុងការចូលរួមអភិវឌ្ឍន៍វិស័យ TVET តាមរយៈការលើកទឹកចិត្តក្នុងការបង្កើត និង/ឬពង្រីកកិច្ចសហការរវាងវិស័យឯកជន (សាកលវិទ្យាល័យ គ្រឹះស្ថានសិក្សា រោងចក្រ សហគ្រាស) និងក្រសួងការងារ និងបណ្តុះបណ្តាលវិជ្ជាជីវៈ លើការបណ្តុះបណ្តាល TVET សម្រាប់កម្មវិធីបណ្ដុះបណ្ដាលផ្អែកលើការងារ , ការផ្លាស់ប្តូរជំនាញ , ការបង្កើនជំនាញ និងប្រសិទ្ធភាព នៃការគ្រប់គ្រង ដែលសហគ្រាស គ្រឹះស្ថាន អាចជាអ្នកផ្តល់ការបណ្តុះបណ្តាលដោយផ្ទាល់ ប្រសិនបើសហគ្រាស គ្រឹះស្ថានមានបំណងចង់ធ្វើដោយខ្លួនឯង។ សហគ្រាស នឹងមិនត្រឹមតែជាអ្នកផ្តល់ការងារប៉ុណ្ណោះទេ ប៉ុន្តែក៏ជាកន្លែងផ្តល់នូវជំនាញ(កម្មវិធីបណ្តុះបណ្តាលនៅកន្លែងការងារ) , លើកកម្ពស់ផលិតភាព , និង ចេញវិញ្ញាបនបត្របញ្ជាក់សមត្ថភាពផងដែរ។ ទី៤.ការលើកកម្ពស់ ពន្លឿន និងជំរុញការអនុវត្តថ្នាលបណ្តុះបណ្តាលតាមប្រព័ន្ធអេឡិចត្រូនិក ដែលអនុញ្ញាតឱ្យកម្មករ-និយោជិត អាចសិក្សាតាមប្រព័ន្ធអនឡាញ (ពីចម្ងាយ) ឬសិក្សា ដោយខ្លួនឯងបាន។ ទី៥.ក្រសួងការងារ និងបណ្តុះបណ្តាលវិជ្ជាជីវៈ បាន និងសហការជាមួយក្រសួងអប់រំ យុវជន និងកីឡា ក្នុងការរៀបចំនូវឯកសារទស្សនាទានគន្លងអប់រំថ្មី ដើម្បីត្រៀមអនុវត្តសាកល្បងនាពេលខាងមុខឆាប់ៗ នេះ។

លោករដ្ឋមន្ត្រី ជឿជាក់ថា ទិវានេះ នឹងជួយជំរុញការគាំទ្រ និងចូលរួមបន្ថែមទៀតពីគ្រប់ក្រសួង ស្ថាប័ន ពាក់ព័ន្ធ រដ្ឋបាលរាជធានី ខេត្ត អាជ្ញាធរមូលដ្ឋានគ្រប់លំដាប់ថ្នាក់ ស្ថាប័នជាតិ និងអន្តរជាតិ សមាគម អង្គការសង្គមស៊ីវិល សហគ្រាស គ្រឹះស្ថានឯកជន សមាគមនិយោជក សហជីព កម្មករ-និយោជិត ដៃគូអភិវឌ្ឍន៍ និងគ្រប់ភាគីពាក់ព័ន្ធទាំងអស់ រួមទាំងយុវជន និស្សិត មាតាបិតា អាណាព្យាបាល និងសាធារណជន លើការអប់រំបណ្តុះបណ្តាលបច្ចេកទេស និងវិជ្ជាជីវៈ៕

អត្ថបទ ៖ សំអឿន

The post កម្ពុជា មានគ្រឹះស្ថានអប់រំបណ្ដុះបណ្ដាលបច្ចេកទេស និងវិជ្ជាជីវៈ កើនឡើងជាង ២៥០ កន្លែង នៅទូទាំងប្រទេស appeared first on Kampuchea Thmey Daily.

រដ្ឋមន្រ្តីការងារ ប្រកាសបើកដំណើរការគ្រឹះស្ថានអប់រំបណ្តុះបណ្តាលបច្ចេកទេស និងវិជ្ជាជីវៈឡើងវិញ

KC Virak — Tue, 12 Oct 2021 04:38:23 +0000

រដ្ឋមន្រ្តីក្រសួងការងារ និងបណ្តុះបណ្តាលវិជ្ជាជីវៈបានប្រកាសដំណើរការគ្រឹះស្ថានអប់រំបណ្តុះបណ្តាលបច្ចេកទេស និងវិជ្ជាជីវៈ (អ.ប.វ) ឡើងវិញ បន្ទាប់ពីទទួលបានការឯកភាពពីសម្តេចអគ្គមហាសេនាបតីតេជោ ហ៊ុន សែន នាយករដ្ឋមន្រ្តី នៃព្រះរាជាណាចក្រកម្ពុជារួចមក។ ការប្រកាសនេះ ធ្វើឡើងតាមរយៈប្រព័ន្ធវីដេអូ (Zoom) នៅព្រឹកថ្ងៃទី១២ ខែតុលានេះ ក្រោមអធិបតីភាពលោកបណ្ឌិត អ៊ិត សំហេង រដ្ឋមន្រ្តីក្រសួងការងារ និងបណ្តុះបណ្តាលវិជ្ជាជីវៈ។

លោក អ៊ិត សំហេង រដ្ឋមន្ត្រី រដ្ឋមន្រ្តីក្រសួងការងារ និងបណ្តុះបណ្តាលវិជ្ជាជីវៈ បានមានប្រសាសន៍ថា ការបើកដំណើរការឡើងវិញគ្រឹះស្ថាន អ.ប.វ. គឺមានភាពចាំបាច់ណាស់ ដើម្បីធានាបាននូវការបណ្តុះបណ្តាលប្រកបដោយគុណភាព និងប្រសិទ្ធភាពនៃកម្លាំងពលកម្មជំនាញ ឱ្យឆ្លើយតបទៅនឹងតម្រូវការទីផ្សារការងារ។ ជាងនេះទៅទៀត ការអប់ររំបណ្តុះបណ្តាលបច្ចេកទេស និងវិជ្ជាជីវៈ គឺជាឧបករណ៍ដ៏សំខាន់មួយរបស់រាជរដ្ឋាភិបាលក្នុងការស្តារសេដ្ឋកិច្ចជាតិឡើងវិញ បន្ទាប់ពីទទួលរងផលប៉ះពាល់ពីជំងឺកូវីដ-១៩។

លោករដ្ឋមន្ត្រីបានបន្តថា មុននឹងឈានដល់ការទទួលការអនុញ្ញាតឱ្យបើកដំណើរការសិក្សាឡើងវិញ គ្រឹះស្ថានអប់រំបណ្តុះបណ្តាលបច្ចេកទេស និងវិជ្ជាជីវៈក្រោមឱវាទក្រសួង ពីប្រមុខរាជរដ្ឋាភិបាល គឺអនុគណៈកម្មការវាយតម្លៃ ផែនការ និងយុទ្ធសាស្រ្ត នៃគណកម្មការអន្តរក្រសួងប្រយុទ្ធនឹងជំងឺកូវីដ-១៩ បានពិនិត្យនិងវាយតម្លៃ លើការរៀបចំគោលការណ៍ប្រតិបត្តិស្តង់ដា (SOP) រួចដាក់ឆ្លងការប្រជុំសម្រេចពីគណៈប្រចាំការ នៃគណៈកម្មការជាតិប្រយុទ្ធនឹងជំងឺកូវីដ-១៩ (គ.ប.ក) កាលពីថ្ងៃទី៤ ខែតុលា ឆ្នាំ២០២១ កន្លងទៅ ដោយផ្អែកលើហេតុផលពីរ។

លោករដ្ឋមន្ត្រីបានបន្តទៀតថា ទី១. ក្រសួងបានរៀបចំគោលការណ៍ប្រតិបត្តិស្តង់ដា (SOP) ដែលមានលក្ខណៈគ្រប់ជ្រុងជ្រោយធានាបាននូវការបង្ការ ទប់ស្កាត់ ការរីករាលដាលនៃជំងឺកូវីដ-១៩ ជាពិសេសមានយន្តការច្បាស់លាស់ក្នុងការពិនិត្យវាយតម្លៃហានិភ័យ លក្ខណៈវិនិច្ឆ័យក្នុងការបិទ និងបើក និងមានប្រព័ន្ធរាយការណ៍ច្បាស់លាស់។

ទី២. គ្រឹះស្ថានអប់រំបណ្តុះបណ្តាលបច្ចេកទេស និងវិជ្ជាជីវៈ ដូចគ្នានឹងឧត្តមសិក្សានៃក្រសួងអប់រំ យុវជន និងកីឡាដែរ ម្យ៉ាងទៀត បុគ្គលិក សាស្រ្តាចារ្យ គ្រូបច្ចេកទេស ព្រមទាំងសិក្ខាកាម សិស្ស និស្សិត (មានអាយុចាប់ពី១៥ឆ្នាំឡើងទៅ) បានទទួលវ៉ាក់សាំងស្ទើរតែ ១០០ភាគរយ និងកំពុងបន្តទទួលដូសជំរុញ ឬដូសទី៣។

លោករដ្ឋមន្ត្រី លើកឡើងបន្តថា៖ “ដើម្បីជួយសង្គ្រោះអាយុជីវិតប្រជាជន ការពារនូវសុខភាព និងសេចក្តីសុខរបស់ប្រជាជនរួចផុតពីជំងឺរាតត្បាតជាសកល កូវីដ-១៩ ហើយយើងអាចរៀបចំដំណើរការសកម្មភាពសេដ្ឋកិច្ចរបស់យើងជាបណ្តើរៗឡើងវិញ ធានាបាននូវការរស់នៅមួយដែលយើងអាចរៀនរស់នៅជាមួយជំងឺកូវីដ-១៩ តាមគន្លងប្រក្រតីភាពថ្មី សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្រ្តីនៃព្រះរាជាណាចក្រកម្ពុជា បានដាក់ចេញនូវវិធានការជាច្រើន ហើយបានខិតខំស្វះស្វែងរិះរកគ្រប់មធ្យោបាយ ដើម្បីទទួលបានវ៉ាក់សំាងប្រឆាំងនឹងជំងឺកូវីដ-១៩ ចាក់ជូនប្រជាជនកម្ពុជា ដែលបានធ្វើឱ្យមានភាពស៊ាំ និងកាត់បន្ថយហានិភ័យនៃជំងឺកូវីដ-១៩នៅក្នុងសហគមន៍”។

គួរបញ្ជាក់ថា បច្ចុប្បន្ន ក្រសួងការងារ និងបណ្តុះបណ្តាលវិជ្ជាជីវៈ មានគ្រឹះស្ថាន អ.ប.វ. ចំនួន ១៩៩ ក្នុងនោះគ្រឹះស្ថាន អ.ប.វ. សាធារណៈ ចំនួន៣៨ និងឯកជន អង្គការ/សមាគម ចំនួន ១៦១ ដែលមានសិក្ខាកាម សិស្ស និស្សិត ប្រមាណជាង ៦០.០០០ នាក់ បានបញ្ចប់ការសិក្សា និងចូលទៅក្នុងទីផ្សារការងារជារៀងរាល់ឆ្នាំ៕

អត្ថបទ៖ សំអឿន

The post រដ្ឋមន្រ្តីការងារ ប្រកាសបើកដំណើរការគ្រឹះស្ថានអប់រំបណ្តុះបណ្តាលបច្ចេកទេស និងវិជ្ជាជីវៈឡើងវិញ appeared first on Kampuchea Thmey Daily.