គ្រូបង្រៀនអនុវិទ្យាល័យ Archives - Kampuchea Thmey Daily

គ្រូជនជាតិវៀតណាមរងពិន័យ ដោយសារតម្រូវឱ្យសិស្សខ្លួនចូលគេងមុនម៉ោង៩យប់និងក្រោកនៅម៉ោង៥ព្រឹក

Minea Neu — Tue, 23 Dec 2025 10:17:55 +0000

គ្រូបង្រៀននៅវិទ្យាល័យមួយក្នុងទីក្រុងហូជីមិញ ត្រូវបានដាក់ពិន័យបន្ទាប់ពីឱ្យសិស្សធ្វើតាមតារាងកាលវិភាគប្រចាំថ្ងៃដ៏តឹងតែងរបស់ខ្លួន និងតម្រូវឱ្យកូនសិស្សគេងមុនម៉ោង៩យប់ ហើយក្រោកម៉ោង៥ទៀបភ្លឺ បង្កឱ្យមានការរិះគន់ពីឪពុកម្តាយរបស់ពួកគេ។ នេះបើតាមសារព័ត៌មាន VN express។

សិស្សថ្នាក់ទី៨ នៃវិទ្យាល័យ Tran Van Dang ប្រទេសវៀតណាម។ VN express

ឪពុកម្តាយរបស់សិស្ស បាននិយាយថា៖«គ្រូបង្រៀនដែលបង្រៀនថ្នាក់ទី៨ នៅតាមផ្ទះនៃវិទ្យាល័យ Tran Van Dang បានដាក់ច្បាប់យ៉ាងតឹងរឹងលើថ្នាក់រៀនទាំងមូល យើងស្នើសុំឱ្យអ្នកគ្រប់គ្រងសាលាត្រួតពិនិត្យមើលការការត្អូញត្អែរបស់ឳពុកម្តាយសិស្សនៅក្នុងក្រុមជជែកផង»។ ពួកគាត់បន្តថា សិស្សដែលមិនអនុវត្តតាមកាលវិភាគរបស់គ្រូ នឹងត្រូវផាកពិន័យចំនួន១សែនដុង (៤ដុល្លារអាមេរិក) ក្នុងពេលនីមួយៗ។

កុមារី Hoai ដែលសិស្សម្នាក់នៅក្នុងថ្នាក់ បាននិយាយថា សិស្សផ្សេងទៀតក៏មានអារម្មណ៍ថាទទួលរងអយុត្តិធម៌ផងដែរ ប៉ុន្តែពួកគេមិនហ៊ាននិយាយ។

នាងនិយាយថា៖«កុមារទាំងអស់តូចចិត្តតែមិនហ៊ានតវ៉ាទេ ព្រោះខ្លាចមានទោសធ្ងន់ធ្ងរ។ ហើយខ្លះត្រូវបានផាកពិន័យជាង២០ម៉ឺនដុង។ ពេលឪពុកម្ដាយពួកយើងសម្តែងការព្រួយបារម្ភ គ្រូបែរយកលេសមិនចង់បង្រៀនពួកយើងទៅវិញ»។

ឪពុកម្តាយក៏បានត្អូញត្អែរដែរថា គ្រូបានដាក់កិច្ចការផ្ទះម្តងហើយម្តងទៀតដោយមិនឱ្យពិន្ទុសោះ ហើយសិស្សដែលមិនយល់មេរៀនត្រូវឈរនៅខាងក្រោយថ្នាក់រៀនច្រើនដង។

នាយកសាលាលោក Duong Tan Phuoc កាលពីថ្ងៃទី២២ ខែធ្នូបានបញ្ជាក់ពីហេតុការណ៍នេះ ដោយនិយាយថាគ្រូបានទទួលស្គាល់ វិធីសាស្រ្តរបស់គាត់មិនសមរម្យ។ ទោះជាយ៉ាងណាក៏ដោយ លោក Phuoc បាននិយាយទៀតថា ចំនួនលុយជាក់ស្តែងដែលប្រមូលបានមានចំនួនតិចជាងអ្វីដែលបានរាយការណ៍ ដោយសិស្សមួយចំនួនត្រូវពិន័យត្រឹមតែ ១ម៉ឺនដុងប៉ុណ្ណោះ តែបែរទៅជាច្រើនម៉ឺនដុងទៅវិញ។ លុយទាំងអស់ត្រូវបានប្រគល់ឱ្យសិស្សវិញតាំងពីពេលនោះមក។

នាយកសាលាបាននិយាយថា៖ «វិធីសាស្ត្រនេះគឺខុស ទោះបីជាចេតនាជួយសិស្សបង្កើតវិន័យល្អក៏ដោយ»។

នាយកសាលាបានបន្ថែមថា គ្រូបង្រៀនត្រូវបានព្យួរការងារកាលពី៩ឆ្នាំមុន ពីបទរំលោភបំពានសិស្សដោយពាក្យសំដី និងបង្ខំពួកគេឱ្យលុតជង្គង់ វាជារឿងមួយដែលត្រូវបានចាត់ទុកថាជាករណីធ្ងន់ធ្ងរ នឹងត្រូវត្រួតពិនិត្យវិន័យបច្ចុប្បន្ននេះឡើងវិញ៕

ប្រែសម្រួល៖ ណឺ មិនា

The post គ្រូជនជាតិវៀតណាមរងពិន័យ ដោយសារតម្រូវឱ្យសិស្សខ្លួនចូលគេងមុនម៉ោង៩យប់និងក្រោកនៅម៉ោង៥ព្រឹក appeared first on Kampuchea Thmey Daily.

២ ថ្ងៃទៀត ការប្រឡងជ្រើសរើសគ្រូបង្រៀននៅអនុវិទ្យាល័យ សម្រាប់វិញ្ញាសាសរសេរលើកទី ២ នឹងឈានមកដល់

អ៊ិន ពិសី — Thu, 16 May 2024 06:07:49 +0000

ជាទម្លាប់ នៅមុនពេលការប្រឡងនីមួយៗ ឯកឧត្ដម ហ៊ុន ម៉ានី ឧបនាយករដ្ឋមន្ត្រី រដ្ឋមន្ត្រីក្រសួងមុខងារសាធារណៈ និងជាប្រធានគណៈកម្មការប្រឡងប្រជែង តែងតែដឹកនាំកិច្ចប្រជុំធ្វើវឌ្ឍនភាពការងារ និងជម្រះមន្ទិល ឬបញ្ហាប្រឈមនានា ឆ្ពោះទៅកាន់ការប្រឡងប្រជែងនីមួយៗ។

ជាក់ស្ដែង នាព្រឹកថ្ងៃទី ១៦ ខែឧសភា ឆ្នាំ ២០២៤ នេះ កិច្ចប្រជុំដើម្បីធ្វើវឌ្ឍនភាពត្រូវបានប្រព្រឹត្តទៅដោយមានការអញ្ជើញចូលរួមពីតំណាងក្រសួងសេដ្ឋកិច្ច និងហិរញ្ញវត្ថុ តំណាងក្រសួងអប់រំ យុវជន និងកីឡា តំណាងអង្គភាពប្រឆាំងអំពើពុករលួយ ព្រមទាំងថ្នាក់ដឹកនាំ និងមន្ត្រីជំនាញ ដែលជាប្រធាន អនុប្រធាន និងសមាជិក នៃគណៈកម្មការ និងអនុគណៈកម្មការការប្រឡងប្រជែងជ្រើសរើសគ្រូបង្រៀននៅអនុវិទ្យាល័យ វិញ្ញាសាសរសេរលើកទី ២។

ស្របពេលជាមួយនឹងការធ្វើរបាយការណ៍វឌ្ឍនភាព អង្គប្រជុំក៏បានចែករំលែកនូវមតិយោបល់ប្រហាក់ប្រហែលគ្នាថា កន្លងមកគណៈកម្មការរៀបចំការប្រឡងប្រជែង ក៏ដូចជាក្រុមការងារ នៃក្រសួងមុខងារសាធារណៈ បានអនុវត្តការងារយ៉ាងល្អិតល្អន់ និងទទួលបានការសាទរពីប្រជាពលរដ្ឋ ជាពិសេសបេក្ខជន និងអាណាព្យាបាល ដែលបានចូលរួមប្រឡងប្រជែង ស្របនឹងគោលការណ៍ថ្មីនេះ។ ទោះបីជាយើងមានការគិតគូរល្អិតល្អន់យ៉ាងណាក៏ដោយ បញ្ហាប្រឈមនានាតែងតែកើតឡើងចំពោះមុខ ជាពិសេសការប្រឡងលើកចុងក្រោយនេះ ដែលមានបរិមាណបេក្ខជនចូលរួមយ៉ាងច្រើនដែលយើងមិនធ្លាប់ជួបប្រទះ ធ្វើឱ្យយើងជួបបញ្ហាប្រឈមត្រូវដោះស្រាយជាបន្តបន្ទាប់។ ដូច្នេះលទ្ធផល នៃកិច្ចប្រជុំនេះ មានសារៈសំខាន់ចំពោះការងារឆ្ពោះទៅមុខ ទៅលើការរៀបចំប្រឡងប្រជែងលើកទី ២ ក្នុងការប្រឡងប្រជែងជ្រើសរើសបេក្ខជនចំនួន ៤៤១ នាក់ ឱ្យចូលបង្រៀននៅអនុវិទ្យាល័យ ក្នុងក្របខណ្ឌក្រសួងអប់រំ យុវជន និងកីឡា។

តាមរយៈកិច្ចប្រជុំនេះ ឯកឧត្ដមឧបនាយករដ្ឋមន្ត្រី បានធ្វើការកោតសរសើរ និងវាយតម្លៃខ្ពស់ចំពោះកិច្ចខិតខំប្រឹងប្រែងរបស់ថ្នាក់ដឹកនាំ និងក្រុមការងារបច្ចេកទេសទាំងអស់ ដែលមាននៅក្នុងគណៈកម្មការ និងអនុគណៈកម្មការនីមួយៗ ប្រកបដោយសាមគ្គីភាព និងការសហការគ្នាបានល្អប្រសើររវាងក្រុមការងារ ដែលបានធ្វើឱ្យដំណើរការប្រឡងសម្រាំងលើកទី ១ កាលពីថ្ងៃទី ២ ដល់ទី ៥ ខែឧសភា ឆ្នាំ ២០២៤ កន្លងមក ដែលមានបេក្ខជនសរុប ៣៣ ៣១៤ នាក់ ដោយទទួលបានសម្រាំងបេក្ខជនចំនួន ១ ៣៧៩ នាក់ សម្រាប់ប្រឡងវិញ្ញាសាសរសេរលើទី ២ បានបញ្ចប់ដោយរលូន ដូចការគ្រោងទុក។ ឯកឧត្ដម ក៏បានថ្លែងអំណរគុណដល់ក្រសួងអប់រំ យុវជន និងកីឡា, ក្រសួងសេដ្ឋកិច្ច និងហិរញ្ញវត្ថុ និងអង្គភាពប្រឆាំងអំពើពុករលួយ ចំពោះកិច្ចសហការនាពេលកន្លងមក ជាពិសេសការចែករំលែកនូវបទពិសោធក្នុងការគាំទ្រការរៀបចំដំណើរការប្រឡងមួយនេះ៕

The post ២ ថ្ងៃទៀត ការប្រឡងជ្រើសរើសគ្រូបង្រៀននៅអនុវិទ្យាល័យ សម្រាប់វិញ្ញាសាសរសេរលើកទី ២ នឹងឈានមកដល់ appeared first on Kampuchea Thmey Daily.

ឯកឧត្ដម ហ៊ុន ម៉ានី ៖ បេក្ខជនប្រឡងចូលគ្រូបង្រៀនអនុវិទ្យាល័យមានសមត្ថភាពលើសគេ នឹងក្លាយជាមន្ត្រីរាជការស៊ីវិលដ៏មានគុណភាពរបស់កម្ពុជា

អ៊ិន ពិសី — Sat, 04 May 2024 08:10:41 +0000

ឯកឧត្ដម ហ៊ុន ម៉ានី ឧបនាយករដ្ឋមន្ត្រី រដ្ឋមន្ត្រីក្រសួងមុខងារសាធារណៈ និងជាប្រធានគណៈកម្មការប្រឡងប្រជែង បានគូសបញ្ជាក់ថា បេក្ខជនប្រឡងចូលគ្រូបង្រៀនអនុវិទ្យាល័យដែលមានសមត្ថភាពពិតប្រាកដលើសគេ នឹងទទួលបានជោគជ័យលើការប្រឡងប្រជែងនេះ ហើយនឹងក្លាយជាមន្ត្រីរាជការស៊ីវិលដ៏មានគុណភាពរបស់កម្ពុជា។

នៅរសៀលថ្ងៃទី ០៤ ខែឧសភា ឆ្នាំ ២០២៤ នេះ តាមរយៈទំព័រហ្វេសប៊ុក ឯកឧត្ដម ហ៊ុន ម៉ានី បានលើកឡើងថា នៅក្រៅមណ្ឌលប្រឡង មិនថាអាកាសធាតុក្តៅយ៉ាងណា ក៏ ឪពុកម្ដាយ អាណាព្យាបាល រង់ចាំលើកទឹកចិត្តបេក្ខជនដែលកំពុងប្រឡងប្រជែងនៅខាងក្នុងមណ្ឌល ប្រកបដោយក្តីស្រឡាញ់។

ឯកឧត្ដម ហ៊ុន ម៉ានី បានលើកឡើងបន្តថា សូមអាណាព្យាបាលបេក្ខជនប្រឡងចូលគ្រូបង្រៀនអនុវិទ្យាល័យទាំងអស់ ទុកចិត្តលើប្រព័ន្ធប្រឡងប្រជែង ហើយសូមកុំមានការព្រួយបារម្ភលើភាពមិនប្រក្រតីណាមួយជុំវិញការប្រឡង។

ឯកឧត្ដម ហ៊ុន ម៉ានី ក៏បានគូសបញ្ជាក់ដែរថា «ប្អូនៗ ក្មួយៗ ជាបេក្ខជនដែលមានសមត្ថភាពពិតប្រាកដលើសគេ នឹងទទួលបានជោគជ័យលើការប្រឡងប្រជែងនេះ ហើយនឹងក្លាយជាមន្ត្រីរាជការស៊ីវិលដ៏មានគុណភាពរបស់កម្ពុជា»។

សូមបញ្ជាក់ថា ការប្រឡងប្រជែងជ្រើសរើសគ្រូអនុវិទ្យាល័យ របស់ ក្រសួងអប់រំ យុវជន និងកីឡា ប្រព្រឹត្តទៅមានរយៈពេល ៤ ថ្ងៃ ជាប់គ្នា គឺ ចាប់ពីថ្ងៃទី ២ ដល់ទី ៥ ខែឧសភា ឆ្នាំ ២០២៤ មណ្ឌលប្រឡងស្ថិតនៅសាកលវិទ្យាល័យភូមិន្ទភ្នំពេញ សាកលវិទ្យាល័យនីតិសាស្ត្រ និងវិទ្យាសាស្ត្រសេដ្ឋកិច្ច និងសាលាភូមិន្ទរដ្ឋបាល៕

អត្ថបទ ៖ ពិសី

The post ឯកឧត្ដម ហ៊ុន ម៉ានី ៖ បេក្ខជនប្រឡងចូលគ្រូបង្រៀនអនុវិទ្យាល័យមានសមត្ថភាពលើសគេ នឹងក្លាយជាមន្ត្រីរាជការស៊ីវិលដ៏មានគុណភាពរបស់កម្ពុជា appeared first on Kampuchea Thmey Daily.

ការប្រឡងប្រជែងជ្រើសរើសគ្រូបង្រៀនអនុវិទ្យាល័យ ថ្ងៃទី ៣ ចាប់ផ្ដើម

អ៊ិន ពិសី — Sat, 04 May 2024 06:32:12 +0000

នាវេលាម៉ោង ១២ ថ្ងៃត្រង់ ថ្ងៃទី ០៤ ខែឧសភា ឆ្នាំ ២០២៤ ឯកឧត្ដម ហ៊ុន ម៉ានី ឧបនាយករដ្ឋមន្ត្រី រដ្ឋមន្ត្រីក្រសួងមុខងារសាធារណៈ និងជាប្រធានគណៈកម្មការប្រឡងប្រជែង អញ្ជើញបើកវិញ្ញាសាសរសេរ សម្រាប់ការប្រឡងប្រជែងជ្រើសរើសគ្រូបង្រៀនសម្រាប់បង្រៀននៅអនុវិទ្យាល័យ។ នៅមណ្ឌលប្រឡងសាលាភូមិន្ទរដ្ឋបាល និងសាកលវិទ្យាល័យភូមិន្ទនីតិសាស្ត្រ និងវិទ្យាសាស្ត្រសេដ្ឋកិច្ច។

មិនខុសពីការប្រឡងម្សិលមិញទេ ការប្រឡងប្រជែង នឹងត្រូវប្រព្រឹត្តិទៅចំនួន ២ វេន ដោយវេនទី ១ ចាប់ពីម៉ោង ១២ ដល់ ម៉ោង ២ រសៀល និង វេនទី ២ ចាប់ពីម៉ោង ៤ រសៀល ដល់ម៉ោង ៦ ល្ងាច លើមុខវិជ្ជាឯកទេស ជីវវិទ្យា, ជីវវិទ្យា-ផែនដីវិទ្យា, និងគណិតវិទ្យា-រូបវិទ្យា៕

The post ការប្រឡងប្រជែងជ្រើសរើសគ្រូបង្រៀនអនុវិទ្យាល័យ ថ្ងៃទី ៣ ចាប់ផ្ដើម appeared first on Kampuchea Thmey Daily.

ការប្រឡងប្រជែងជ្រើសរើសគ្រូអនុវិទ្យាល័យ លើកទី ១ បានបន្តដល់ថ្ងៃទី ២

អ៊ិន ពិសី — Fri, 03 May 2024 01:27:12 +0000

សម្រាប់ការប្រឡងនៅថ្ងៃទី ០៣ ខែឧសភា ឆ្នាំ ២០២៤ នេះ ត្រូវបានបែងចែកជា ២ មណ្ឌល ៖ មណ្ឌលទី ១ សាកលវិទ្យាល័យភូមិន្ទនីតិសាស្ត្រ និងវិទ្យាសាស្ត្រសេដ្ឋកិច្ច និង មណ្ឌលទី ២ សាលាភូមិន្ទរដ្ឋបាល។

ដូចសព្វមួយដង ការប្រឡងប្រជែងប្រជែង នឹងត្រូវអនុវត្តតាមនិយាមនីតិវិធីប្រតិបត្តិ នៃការប្រឡងប្រជែងជ្រើសរើសមន្ត្រីរាជការស៊ីវិល គណៈកម្មការមេប្រយោគធ្វើការរៀបចំតាក់តែងវិញ្ញាសានៅពេលព្រឹក ហើយប្រឡងនៅពេលរសៀល។

សម្រាប់ការប្រឡងនៅពេលរសៀល ត្រូវបានបែងចែកជា ២ វេន ហើយវេននីមួយៗ មានបេក្ខជនចូលរួមប្រឡងប្រជែងផ្សេងៗ គ្នា វិញ្ញាសាផ្សេងៗ គ្នា៕

The post ការប្រឡងប្រជែងជ្រើសរើសគ្រូអនុវិទ្យាល័យ លើកទី ១ បានបន្តដល់ថ្ងៃទី ២ appeared first on Kampuchea Thmey Daily.

ឯកឧត្ដម ហ៊ុន ម៉ានី អំពាវនាវដល់បេក្ខជនប្រឡងចូលគ្រូបង្រៀនអនុវិទ្យាល័យ ត្រូវបង្កើនការយកចិត្តទុកដាក់ ថែរក្សាសុខភាព

អ៊ិន ពិសី — Thu, 02 May 2024 07:17:57 +0000

ឯកឧត្ដម ហ៊ុន ម៉ានី ឧបនាយករដ្ឋមន្ត្រី រដ្ឋមន្ត្រីក្រសួងមុខងារសាធារណៈ និងជាប្រធានគណៈកម្មការប្រឡងប្រជែង បានអំពាវនាវដល់ បេក្ខជនប្រឡងប្រជែងជ្រើសរើសគ្រូបង្រៀនអនុវិទ្យាល័យ ទាំងអស់ ត្រូវបង្កើនការយកចិត្តទុកដាក់ កត់សម្គាល់ព័ត៌មាន និងថែរក្សាសុវត្ថិភាព សុខភាពផ្ទាល់ខ្លួន ដើម្បីបង្ការរាល់ការរំខាននានា ដែលអាចប៉ះពាល់ដល់ដំណើរការប្រឡងប្រជែង។

នៅថ្ងៃទី ០២ ខែឧសភា ឆ្នាំ ២០២៤ នេះ តាមរយៈទំព័រហ្វេសប៊ុក ឯកឧត្ដម ហ៊ុន ម៉ានី បានមានប្រសាសន៍ថា ថ្ងៃនេះ ក្រសួងមុខងារសាធារណៈ ចាប់ផ្ដើមការប្រឡងប្រជែងជ្រើសរើសគ្រូបង្រៀនអនុវិទ្យាល័យលើកទី ១ (ដើម្បីសម្រាំងបេក្ខជន) រយៈពេល ៤ ថ្ងៃ ដែលមានបេក្ខជនចូលរួមចំនួន ៣៣ ៣១៤ នាក់ និងប្រើប្រាស់មណ្ឌលប្រឡងចំនួន ៣ មណ្ឌល។

ឯកឧត្ដម ហ៊ុន ម៉ានី បានមានប្រសាសន៍បន្តថា មិនថាយើងធ្លាប់ឆ្លងកាត់ការរៀបចំការប្រឡងច្រើនដងយ៉ាងណាក្តី មិនថាយើងមាននិយាមនីតិវិធីប្រតិបត្តិសម្រាប់ការប្រឡងប្រជែងជ្រើសរើសមន្ត្រីយ៉ាងណាក្តី ក្រុមការងាររៀបចំការប្រឡងទាំងអស់ នៅតែបន្តអនុវត្តការងារប្រកបដោយវិជ្ជាជីវៈ ទំនួលខុសត្រូវ និងធានាឲ្យខាងតែបានថា ការប្រឡងប្រជែង ត្រូវប្រព្រឹត្តទៅប្រកបដោយ គុណាធិបតេយ្យ តម្លាភាព យុត្តិធម៌ បរិយាបន្ន និងប្រសិទ្ធភាព «ចេះគឺជាប់ ជាប់ដោយមោទនៈ មិនជាប់ដោយអស់ចិត្ត»។

ជាមួយគ្នានេះ ឯកឧត្ដម ហ៊ុន ម៉ានី បានលើកឡើង និងអំពាវនាវថា «ដោយសារបេក្ខជនមានចំនួនច្រើន អាកាសធាតុក្តៅ ទីធ្លាសម្រាប់ចំណតយានយន្តមានកំណត់ បន្ទប់ប្រឡង និងមណ្ឌលប្រឡងមានទីតាំងផ្សេងៗ គ្នា ដូច្នេះ សូមបេក្ខជនទាំងអស់ បង្កើនការយកចិត្តទុកដាក់ កត់សម្គាល់ព័ត៌មាន និងថែរក្សាសុវត្ថិភាព សុខភាពផ្ទាល់ខ្លួន ដើម្បីបង្ការរាល់ការរំខាននានា ដែលអាចប៉ះពាល់ដល់ដំណើរការប្រឡងប្រជែង»។

ទន្ទឹមនោះ ឯកឧត្ដម ហ៊ុន ម៉ានី ក៏បានអំពាវនាវដល់បេក្ខជនប្រឡងប្រជែងជ្រើសរើសគ្រូបង្រៀនអនុវិទ្យាល័យទាំងអស់ ត្រូវយកឱកាសដែលរាជរដ្ឋាភិបាលបានផ្តល់ជូនស្មើៗ គ្នា នេះ បញ្ចេញអស់ពីសមត្ថភាព ដើម្បីក្លាយខ្លួនជាមន្ត្រីរាជការស៊ីវិលរបស់កម្ពុជាម្នាក់ប្រកបដោយគុណភាព។

គួរជម្រាបថា ការប្រឡងប្រជែងជ្រើសរើសគ្រូអនុវិទ្យាល័យ របស់ ក្រសួងអប់រំ យុវជន និងកីឡា ប្រព្រឹត្តទៅមានរយៈពេល ៤ ថ្ងៃ ជាប់គ្នា គឺ ចាប់ពីថ្ងៃទី ២ ដល់ទី ៥ ខែឧសភា ឆ្នាំ ២០២៤ មណ្ឌលប្រឡងស្ថិតនៅសាកលវិទ្យាល័យភូមិន្ទភ្នំពេញ សាកលវិទ្យាល័យនីតិសាស្ត្រ និងវិទ្យាសាស្ត្រសេដ្ឋកិច្ច និងសាលាភូមិន្ទរដ្ឋបាល៕

អត្ថបទ ៖ ពិសី

The post ឯកឧត្ដម ហ៊ុន ម៉ានី អំពាវនាវដល់បេក្ខជនប្រឡងចូលគ្រូបង្រៀនអនុវិទ្យាល័យ ត្រូវបង្កើនការយកចិត្តទុកដាក់ ថែរក្សាសុខភាព appeared first on Kampuchea Thmey Daily.