គ្រូពេទ្យ Archives - Kampuchea Thmey Daily

រដ្ឋមន្ត្រីសុខាភិបាល ណែនាំគ្រូពេទ្យត្រូវចាត់ទុកការសង្គ្រោះព្យាបាលវីរកងទ័ព គឺជាអាទិភាពខ្ពស់បំផុត

អ៊ិន ពិសី — Tue, 16 Dec 2025 02:59:53 +0000

លោកសាស្ត្រាចារ្យ ឈាង រ៉ា រដ្ឋមន្ត្រីក្រសួងសុខាភិបាល បានធ្វើការណែនាំដល់បុគ្គលិកគ្រូពេទ្យត្រូវចាត់ទុកការសង្គ្រោះព្យាបាលវីរកងទ័ព គឺជាអាទិភាពខ្ពស់បំផុត ទោះស្ថិតក្នុងស្ថានការណ៍លំបាកយ៉ាងណាក៏ដោយ។

លោករដ្ឋមន្ត្រីបានលើកឡើងបែបនេះកាលពីរសៀលថ្ងៃទី ១៥ ខែធ្នូ ឆ្នាំ ២០២៥ ក្នុងឱកាសអញ្ជើញចុះសួរសុខទុក្ខវីរកងទ័ពដែលកំពុងសម្រាកព្យាបាលជំងឺនៅមន្ទីរពេទ្យកាល់ម៉ែត និងមន្ទីរពេទ្យព្រះអង្គឌួង។

លោករដ្ឋមន្ត្រី ក៏បានណែនាំឱ្យក្រុមគ្រូពេទ្យខិតខំយកចិត្តទុកដាក់ថែទាំព្យាបាលជូនវីរកងទ័ពឱ្យបានល្អប្រសើរ រហូតបានជាសះស្បើយ។ ព្រោះថា វីរកងទ័ព បានបូជាអាយុជីវិត ដើម្បីបុព្វហេតុជាតិមាតុភូមិ។

លោករដ្ឋមន្ត្រី បានបន្តថា «ខ្ញុំសូមថ្លែងអំណរគុណ និងដឹងគុណ ចំពោះវីរភាពដ៏អង់អាចក្លាហាន របស់កងទ័ពជួរមុខទាំងអស់ ដែលក្នុងនាម «កងទ័ពអាវស» នៅជួរក្រោយ ខិតខំយកចិត្តទុកដាក់ខ្ពស់ ក្នុងការសង្គ្រោះព្យាបាលវីរកងទ័ពរបស់យើង និងសូមជូនពរបងប្អូនកងទ័ពឱ្យឆាប់ជាសះស្បើយ មានសុខភាពប្រសើរឡើងដើម្បីការពារជាតិមាតុភូមិកម្ពុជា»។

ជាមួយគ្នានេះដែរ លោករដ្ឋមន្ត្រី បានពាំនាំនូវពាក្យផ្ដាំផ្ញើសួរសុខទុក្ខដោយក្តីបារម្ភដ៏ខ្ពង់ខ្ពស់បំផុតរបស់ សម្ដេចអគ្គមហាសេនាបតីតេជោ ហ៊ុន សែន ប្រធានព្រឹទ្ធសភា និងសម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ប្រធានកាកបាទក្រហមកម្ពុជា ព្រមទាំង សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា និងលោកជំទាវ ជូនចំពោះវីរកងទ័ពដែលកំពុងសម្រាកព្យាបាលជំងឺគ្រប់ៗ រូប៕

អត្ថបទ ៖ សំអឿន

The post រដ្ឋមន្ត្រីសុខាភិបាល ណែនាំគ្រូពេទ្យត្រូវចាត់ទុកការសង្គ្រោះព្យាបាលវីរកងទ័ព គឺជាអាទិភាពខ្ពស់បំផុត appeared first on Kampuchea Thmey Daily.

រដ្ឋមន្ត្រីសុខាភិបាល លើកទឹកចិត្តក្រុមគ្រូពេទ្យអភិវឌ្ឍន៍ជំនាញបច្ចេកទេសព្យាបាលអ្នកជំងឺតាមបែបទំនើប

អ៊ិន ពិសី — Mon, 03 Nov 2025 03:34:17 +0000

លោកសាស្ត្រាចារ្យ ឈាង រ៉ា រដ្ឋមន្ត្រីក្រសួងសុខាភិបាល បានជំរុញថ្នាក់ដឹកនាំ និងក្រុមគ្រូពេទ្យ ត្រូវបន្តអភិវឌ្ឍន៍ជំនាញបច្ចេកទេសព្យាបាលអ្នកជំងឺតាមបែបទំនើប និងមានប្រសិទ្ធភាពខ្ពស់។

នៅក្នុងពិធីសម្ពោធដាក់ឱ្យប្រើប្រាស់ជាផ្លូវការ អគារមជ្ឈមណ្ឌលព្យាបាលកុមារអាស៊ី នៃអង្គការបេះដូងជប៉ុន នៃមន្ទីរពេទ្យបង្អែកជ័យជំនះ នៅខេត្តកណ្ដាល កាលពីចុងសប្ដាហ៍នេះ លោករដ្ឋមន្ត្រី បានមានប្រសាសន៍ថា លើសពីនេះទៀត ថ្នាក់ដឹកនាំ ត្រូវរួមសហការជាមួយក្រុមគ្រូពេទ្យ គ្រូពេទ្យជំនាញ និងអ្នកស្ម័គ្រចិត្តជប៉ុន ក្នុងការបម្រើសេវាពិនិត្យ និងព្យាបាលអ្នកជំងឺដោយយកចិត្តទុកដាក់ខ្ពស់បំផុត។ បន្តអភិវឌ្ឍន៍ជំនាញបច្ចេកទេសព្យាបាលអ្នកជំងឺតាមបែបទំនើប និងមានប្រសិទ្ធភាពខ្ពស់។ បង្កើនសកម្មភាពពិគ្រោះជំងឺក្រៅ និងធ្វើរោគវិនិច្ឆ័យឱ្យបានកាន់តែប្រសើរឡើង។ លើកកម្ពស់គុណតម្លៃក្រមសីលធម៌ក្នុងការប្រាស្រ័យទាក់ទងជាមួយអ្នកជំងឺ ដើម្បីកសាងទំនុកចិត្ត។ បង្កលក្ខណៈងាយស្រួលដល់អ្នកជំងឺ និងធានាការបម្រើសេវាពេញលេញ ២៤/២៤ ម៉ោង។ ជួយផ្សព្វផ្សាយ និងអប់រំអ្នកជំងឺពីវិធីបង្ការ និងថែទាំសុខភាព ដើម្បីកាត់បន្ថយអត្រាឈឺ និងបន្តបណ្ដុះបណ្ដាលដល់ក្រុមគ្រូពេទ្យឱ្យមានសមត្ថភាព និងមានគុណវុឌ្ឍិគ្រប់គ្រាន់ក្នុងការអប់រំព្យាបាលថែទាំជំងឺមហារីក។

លោកសាស្ត្រាចារ្យ រដ្ឋមន្ត្រី សង្ឃឹមថា អគារមជ្ឈមណ្ឌលព្យាបាលកុមារអាស៊ី នៃអង្គការបេះដូងជប៉ុន មានកម្ពស់ ៣ ជាន់ មានបន្ទប់ ១០០ បន្ទប់ មានគ្រែចំនួន ២០០ គ្រែ និងបន្ទប់វះកាត់ ៤ បន្ទប់ រួមទាំងការបំពាក់សម្ភារៈបរិក្ខារពេទ្យដែលចំណាយថវិកាសរុបចំនួន ១៣ លាន ៧ សែន ៧ ម៉ឺន ៧ ពាន់ដុល្លារអាមេរិក នេះ នឹងរួមចំណែកក្នុងការសម្រេចបានគោលបំណងរួមបញ្ចូលគ្នា និងប្រកបដោយនិរន្តរភាពក្នុងការប្រយុទ្ធជំងឺមហារីក ក្នុងនោះ ពិនិត្យ និងរកឱ្យឃើញទាន់ពេល ធ្វើរោគវិនិច្ឆ័យទាន់ពេលវេលា បំពាក់ឧបករណ៍ក្នុងបន្ទប់ពិសោធន៍ និងក្រុមវេជ្ជសាស្ត្រជាមួយនឹងបច្ចេកវិទ្យាទំនើប ផ្ដល់សេវាវិនិច្ឆ័យច្បាស់លាស់ និងរហ័ស ព្យាបាលកម្រិតខ្ពស់ និងការថែទាំដែលមានគុណភាព ជាមួយគ្រូពេទ្យមានបទពិសោធ និងតាមដានបន្ត និងការស្ដារនីតិសម្បទា ធានានូវការថែទាំជាបន្តបន្ទាប់ ការគាំទ្រផ្នែកចិត្តសាស្ត្រ។

លោកសាស្ត្រាចារ្យរដ្ឋមន្ត្រី បានអរគុណរាជរដ្ឋាភិបាល និងប្រជាជនជប៉ុន ជាពិសេសស្ថាបនិក បុគ្គលិក នៃអង្គការបេះដូងជប៉ុន ដែលបានកៀរគរថវិកាពីសប្បុរសជនជប៉ុន និងសប្បុរសជនកម្ពុជា ដែលបានសាងសង់អគារមជ្ឈមណ្ឌលព្យាបាលកុមារអាស៊ី នៃអង្គការបេះដូងជប៉ុន ជូនប្រជាពលរដ្ឋក្នុងខេត្តកណ្ដាល និងខេត្តផ្សេងទៀតជាប់នឹងខេត្តកណ្ដាល។

គួរបញ្ជាក់ថា អគារនេះមានកម្ពស់ ៣ ជាន់ បន្ទប់ ១០០ បន្ទប់ គ្រែចំនួន ២០០ គ្រែ និងបន្ទប់វះកាត់ ៤ បន្ទប់ រួមទាំងការបំពាក់សម្ភារៈបរិក្ខារពេទ្យដែលចំណាយថវិកាសរុបចំនួន ១៣ លាន ៧ សែន ៧ ម៉ឺន ៧ ពាន់ដុល្លារអាមេរិក ដែលជាថវិកាពីសប្បុរសជនជប៉ុន និងសប្បុរសជនក្នុងប្រទេសកម្ពុជា៕

អត្ថបទ ៖ សំអឿន

The post រដ្ឋមន្ត្រីសុខាភិបាល លើកទឹកចិត្តក្រុមគ្រូពេទ្យអភិវឌ្ឍន៍ជំនាញបច្ចេកទេសព្យាបាលអ្នកជំងឺតាមបែបទំនើប appeared first on Kampuchea Thmey Daily.

រដ្ឋមន្រ្តីសុខាភិបាល ណែនាំគ្រូពេទ្យត្រូវតម្កល់អ្នកជំងឺជាធំ ភ្ជាប់ជាមួយមនុស្សធម៌ និងក្តីករុណា

Samean Lay — Fri, 24 Oct 2025 04:32:36 +0000

រដ្ឋមន្ដ្រីក្រសួងសុខាភិបាល លោក ឈាង រ៉ា បានណែនាំដល់ថ្នាក់ដឹកនាំមន្ទីរពេទ្យនិងគ្រូពេទ្យទាំងអស់ត្រូវបង្កើនការយកចិត្តទុកដាក់ព្យាបាលថែទាំអ្នកជំងឺប្រកបដោយគុណភាព ប្រសិទ្ធិភាព ស័ក្តិសិទ្ធិភាព និងសមធម៌ ដោយចាត់ទុកអ្នកជំងឺជាសាច់ញ្ញាតិរបស់ខ្លួននិងតម្កល់អ្នកជំងឺជាធំ ភ្ជាប់ជាមួយមនុស្សធម៌ និងក្តីករុណា។

ការណែនាំនេះបានធ្វើឡើងកាលពីថ្ងៃទី ២៣ ខែតុលា ក្នុងឱកាសលោកបានអញ្ជើញជាអធិបតីក្នុងពិធីបើកទិវាវេជ្ជសាស្រ្ត សល្យសាស្រ្ត និងថែទាំវេជ្ជសាស្ត្រលើកទី១ ឆ្នាំ២០២៥ ក្រោមមូលបទ៖ «សាមគ្គីភាពក្នុងវិស័យសុខាភិបាល ការលើកកម្ពស់គុណភាពព្យាបាល ព្រមទាំងការថែទាំតាមរយៈនវានុវត្តន៍ និងកិច្ចសហការ» នៅមន្ទីរពេទ្យជាតិ តេជោសន្ដិភាព។

នាឱកាសនោះ លោកបានជំរុញឱ្យថ្នាក់ដឹកនាំ និងមន្ត្រីរាជការ បុគ្គលិកនៃសុខាភិបាលទាំងអស់ត្រូវបង្កើនការងារទំនាក់ទំនងគ្នាឱ្យបានជិតស្និត ជាពិសេសអ្នកជំងឺរបស់យើងតែម្តង ត្រូវបង្កើនការផ្សារភ្ជាប់ជាមួយសហភារតៈ ដោយថ្នាក់ដឹកនាំ ត្រូវចុះទៅដល់ផ្នែកជួបជាប់ផ្ទាល់ជាមួយមន្រ្តីសុខាភិបាល ដឹងសុខទុក្ខជាមន្រ្តីរបស់ខ្លួន និងសុខទុក្ខអ្នកជំងឺនិងត្រូវដាក់ចេញនូវការធ្វើរោគវិនិច្ឆ័យបានទាន់ពេលវេលា និងត្រឹមត្រូវ។ បន្ថែមពីនេះ ត្រូវផ្ដល់ព័ត៌មានស្តីពីការវិវត្តជំងឺដល់គ្រួសារអ្នកជំងឺ ចៀសវាងការព្យាបាលណាមួយ ដែលគ្រួសារអ្នកជំងឺមិនបានដឹង និងចូលរួមវគ្គបណ្ដុះបណ្ដាលនានា ដើម្បីបង្កើនចំណេះដឹងថ្មីៗនិងនវានុវត្ដន៍និងចែករំលែកចំណេះដឹងនិងបទពិសោធន៍ដល់សហភារតៈ ដើម្បីការព្យាបាលកាន់តែប្រសើរឡើង។

ជាមួយគ្នានេះដែរ ត្រូវផ្សារភ្ជាប់ជាមួយគោលនយោបាយរាជរដ្ឋាភិបាល និងក្រសួងសុខាភិបាល ហើយត្រូវមានចក្ខុវិស័យនៃទំនើបកម្ម សមភាព និងមនុស្សធម៌។ គុណភាព និងសុវត្ថិភាពការព្យាបាល ត្រូវតែមានពិធីសារ និងនីតិវិធីស្តង់ដានៃការព្យាបាលឱ្យបានច្បាស់លាស់ ហើយត្រូវឱ្យចងចាំ បិតនៅលើជញ្ជាំង ដើម្បីងាយស្រួលអនុវត្តឱ្យបានត្រឹមត្រូវ និងត្រូវចេះផ្តួចផ្តើមនូវគំនិតថ្មីៗ។ លោករដ្ឋមន្រ្តី បញ្ជាក់ថា ព្រោះថាប្រសិទ្ធភាពផ្សារភ្ជាប់ជាមួយការអនុវត្ត ត្រូវទៅដល់តាមគ្រប់មធ្យោយបាយ ហើយត្រូវតម្កល់អ្នកជំងឺជាធំ ភ្ជាប់ជាមួយមនុស្សធម៌ និងក្តីករុណាហើយសមភាព ឬសមធម៌ ត្រូវតែមានភាពស្មើគ្នាគ្រប់អ្នកជំងឺ ហើយត្រូវមើលឱ្យបានវែងឆ្ងាយ។

លោកសាស្ត្រាចារ្យ ក៏បានណែនាំដល់ថ្នាក់ដឹកនាំត្រូវធានារៀបចំឱ្យមានការបណ្តុះបណ្តាលជានិរន្ត អនុវត្ត មានការលើកទឹកចិត្ត ប្រកបដោយនវានុវត្តន៍ឱ្យបានល្អ ទាំងនវានុវត្តន៍ផ្នែកបច្ចកវិទ្យា នវានុវត្តន៍ឌីជីថល និងនវានុវត្តន៍អង្គភាព ហើយត្រូវផ្សារភ្ជាប់ក្រមសីលធម៌ ស្របតាមក្បួនខ្នាត៕

អត្ថបទ៖ សំអឿន

The post រដ្ឋមន្រ្តីសុខាភិបាល ណែនាំគ្រូពេទ្យត្រូវតម្កល់អ្នកជំងឺជាធំ ភ្ជាប់ជាមួយមនុស្សធម៌ និងក្តីករុណា appeared first on Kampuchea Thmey Daily.

គ្រូពេទ្យខេត្តកោះកុង ចុះពិនិត្យនិងព្យាបាលកុមារកំព្រា ខណៈពួកគេកង្វះអនាម័យរស់នៅ

Kang Tola — Mon, 01 Sep 2025 10:46:56 +0000

កោះកុង ៖ ក្រុមគ្រូពទេ្យមន្ទីរពេទ្យបង្អែកខេត្ត បានចុះពិនិត្យ និងព្យាបាលជំងឺជាលក្ខណៈបឋមដល់កុមារកំព្រាចំនួន១៥នាក់ ស្របពេលពួកគេកង្វះការយល់ដឹងអំពីអនាម័យ និងលើកកម្ពស់ផ្នែកមនុស្សធម៌។

យ៉ាងហោចណាស់ ក៏មានកុមារកំព្រាចំនួន១៥នាក់ ដែលត្រូវបានក្រុមគ្រូពេទ្យនៃមន្ទីរបង្អែកខេត្តកោះកុងចុះបេសកកម្មពិគ្រោះ និងព្យាបាលនៅនឹងកន្លែងផ្ទាល់តែម្តង ក្រោមរូបភាពមនុស្សធម៌ និងការណែនាំរបស់រដ្ឋបាលខេត្ត។

លោកវេជ្ជបណ្ឌិត ហៃ ឡៃសុន ប្រធានមន្ទីរបង្អែកខេត្តកោះកុង បានឱ្យដឹងនៅរសៀលថ្ងៃទី១ ខែកញ្ញា ឆ្នាំ២០២៥នេះថា សកម្មភាពពិនិត្យព្យាបាលជូនកុមារកំព្រានៅពេលនេះ ដោយសារតែពួកគេមានកង្វះអនាម័យថែទាំខ្លួនប្រាណ និងជាបេសកម្មប្រចាំរបស់មន្ទីរពេទ្យលើផ្នែកមនុស្សធម៌។

លោកវេជ្ជបណ្ឌិត ហៃ ឡៃសុន គូសបញ្ជាក់ទៀតថា កុមារនៅមណ្ឌលកំព្រា មានជំងឺសើស្បែកមួយចំនួន និងជំងឺមាត់ធ្មេញដោយក្រុមគ្រូពេទ្យនឹងអប់រំណែនាំបន្ថែមអំពីវិធីសាស្រ្តការពារជំងឺដល់ពួកគេ ដើម្បីជៀសផុតនៃការរីករាលដាលជំងឺផ្សេងៗបន្ត។

លោក សែម វ៉ាន់នី ជាអ្នកគ្រប់គ្រងមណ្ឌលកុមារកំព្រាខេត្តកោះកុង និយាយថា មណ្ឌលកុមារកំព្រាក្នុងខេត្ត សព្វថ្ងៃមានកុមារចំនួន១៥នាក់ដែលកំពុងស្នាក់នៅរៀនសូត្រ ដែលពួកគេត្រូវបានម្តាយឪពុកបោះចោល និងខ្លះទៀតជាប់ពន្ធនាការ។

បើតាមលោក សែម វ៉ាន់នី សម្តែងក្តីរីករាយដែលមានក្រុមគ្រូពេទ្យចុះមកព្យាបាលជំងឺទូទៅដល់កុមារនៅមណ្ឌលរបស់លោក ព្រោះនៅមានចំណុចខ្វះខាត និងតម្រូវការជាច្រើនទៀតបម្រើការដល់ជួយផ្គត់ផ្គង់យកចិត្តទុកដាក់។

ដោយឡែកលោកស្រី ឈី វ៉ា អភិបាលខេត្តកោះកុង ក៏សូមថ្លែងអំណអរគុណយ៉ាងជ្រោលជ្រៅជូនក្រុមគ្រូពេទ្យនៃមន្ទីរបង្អែកខេត្តដែលបានដឹកនាំគ្រូពេទ្យចុះមកពិនិត្យព្យាបាលជំងឺដល់កុមារនៅមណ្ឌលកំព្រាផ្ទាល់តែម្តង គ្រាយកចិត្តទុកដាក់នេះមិនអាចកាត់ថ្លៃបានទេសំដៅដល់លើកកម្ពស់សុខភាពរស់នៅរបស់កុមារប្រចំាថ្ងៃ។

លោកស្រី ឈី វ៉ា រំលេចដែរថា កន្លងទៅ និងបច្ចុប្បន្នរដ្ឋបាលខេត្ត មន្ទីរពាក់ព័ន្ធ និងសប្បុរសជិតឆ្ងាយនានា បានជួយគាំទ្រទំនុកបម្រុងអាហារ កសាងបន្ទប់ស្នាក់នៅ ធ្វើសួនច្បារ និងបំពេញរាល់តម្រូវការផ្សេងៗបន្ថែមជូនមណ្ឌលកុមារកំព្រា ក្រៅពីការយកចិត្តទុកដាក់លើការផ្នែកអនាម័យសុខភាព៕

អត្ថបទ ៖ សិរីវឌ្ឍនៈ

The post គ្រូពេទ្យខេត្តកោះកុង ចុះពិនិត្យនិងព្យាបាលកុមារកំព្រា ខណៈពួកគេកង្វះអនាម័យរស់នៅ appeared first on Kampuchea Thmey Daily.

រដ្ឋមន្ត្រីសុខាភិបាល៖ ក្នុងនាមគ្រូពេទ្យ ត្រូវខិតខំឱ្យអស់ពីលទ្ធភាព និងសមត្ថភាពវិជ្ជាជីវៈ ការពារសុខភាពប្រជាជន

Ken Malis — Thu, 10 Apr 2025 02:01:12 +0000

លោក ឈាង រ៉ា រដ្ឋមន្ត្រីក្រសួងសុខាភិបាល បានលើកឡើងថា ក្នុងនាមគ្រូពេទ្យ ត្រូវខិតខំឱ្យអស់ពីលទ្ធភាព និងសមត្ថភាពវិជ្ជាជីវៈ ការពារសុខភាព និងសុខុមាលភាពប្រជាជន។ លោកបានថ្លែងបែបនេះ នាឱកាសអញ្ជើញជាអធិបតីក្នុងពិធីបើក មហាសន្និបាតក្រុមប្រឹក្សាគណៈគ្រូពេទ្យជាតិ អាណត្តិ៦ឆ្នាំ លើកទី៣ ទិសដៅការងារ និងបោះឆ្នោតជ្រើសរើសការិយាល័យក្រុមប្រឹក្សាអាណត្តិទី៤ នាថ្ងៃទី៩ ខែមេសា ឆ្នាំ២០២៥។

លោករដ្ឋមន្រ្តី បានមានប្រសាសន៍ថា ដូចនីតិកាលមុនៗ ដែរ រាជរដ្ឋាភិបាលនីតិកាលទី៧ នៃរដ្ឋសភា នៅតែបន្តយកចិត្តទុកដាក់ និងផ្តល់អាទិភាពខ្ពស់ ដល់វិស័យសុខាភិបាល ព្រមទាំងបានកំណត់ថា សុខភាពរបស់ប្រជាជនជាស្នូល នៃការអភិវឌ្ឍសេដ្ឋកិច្ច សង្គម និងមានចក្ខុវិស័យរយៈពេលវែងគឺ «ប្រជាជនកម្ពុជាទាំងអស់មានសុខភាព និងសុខុមាលភាពកាន់តែប្រសើរ ដើម្បីរួមចំណែកដល់ការអភិវឌ្ឍសេដ្ឋកិច្ចសង្គមប្រកបដោយចីរភាព និងបរិយាបន្ន»។

លោកបានបញ្ចាក់បន្ថែមថា ដើម្បីសម្រេចបាននូវចក្ខុវិស័យនេះ ការចូលរួមរបស់តួអង្គពាក់ព័ន្ធ ពិតជាមានសារៈសំខាន់ជាសារវន្ត ដល់ការបង្កើនភាពទទួលបានសេវាថែទាំសុខភាពរបស់ប្រជាជន ព្រោះការធានាគុណភាព សុវត្ថិភាព និងប្រសិទ្ធភាពនៃសេវាសុខាភិបាល ជាភាពប្រឈមចម្បងសម្រាប់អ្នកជំងឺ អតិថិជន និងសមត្ថភាពនិយ័តកម្មរបស់ក្រសួងសុខាភិបាល ក៏ដូចជាតួអង្គពាក់ព័ន្ធទាំងអស់ ពិសេសគណៈវិជ្ជាជីវៈសុខាភិបាល ដែលជាតួអង្គសំខាន់ក្នុងការគ្រប់គ្រង អ្នកប្រកបវិជ្ជាជីវៈសុខាភិបាលនៅកម្ពុជា។

ទន្ទឹមនឹងនេះដែរ លោករដ្ឋមន្រ្តី ក៏បានផ្តល់អនុសាសន៍មួយចំនួន ដល់សមាជិក សមាជិកានៃគណៈគ្រូពេទ្យកម្ពុជា ដោយត្រូវពង្រឹងបន្ថែមនូវ ការចុះបញ្ជិកា ផ្តល់អាជ្ញាបណ្ណ និងបន្តសុពលភាពអាជ្ញាបណ្ណប្រកបវិជ្ជាជីវៈវេជ្ជសាស្រ្ត។ អភិវឌ្ឍវិជ្ជាជីវៈបន្តសម្រាប់អ្នកប្រកបវិជ្ជាជីវៈវេជ្ជសាស្រ្ត និងត្រួតពិនិត្យជាប្រចាំនូវសម្បទាក្នុងការប្រកបវិជ្ជាជីវៈ និងធ្វើការពិនិត្យរាល់បណ្តឹង ឬការរាយការណ៍ដែលពាក់ព័ន្ធនឹងសម្បទាក្នុងការប្រកបវិជ្ជាជីវៈ។ ពង្រឹងកិច្ចសហការជាមួយភាគីពាក់ព័ន្ធ ជាពិសេសត្រូវបំពេញការងារជិតស្និទ្ធជាមួយក្រសួងសុខាភិបាល គណៈវិជ្ជាជីវៈសុខាភិបាលផ្សេងទៀត និងអង្គភាពសុខាភិបាលគ្រប់លំដាប់ថ្នាក់។

លើសពីនេះ គណៈគ្រូពេទ្យកម្ពុជា ត្រូវមានកាលះបង់ មានការទទួលខុសត្រូវ និងធ្វើឱ្យសង្គមទទួលស្គាល់ « ជារួម៖ តូនាទីរបស់គណៈគ្រូពេទ្យ គឺបម្រើភាពត្រឹមត្រូវរបស់គ្រូពេទ្យ សំដៅអត្ថប្រយោជន៍របស់អ្នកជំងឺ»។ ត្រូវធ្វើការយ៉ាងជិតស្និទ្ធ ជាមួយអ្នកប្រកបមុខរបរវិជ្ជាជីវៈ ហើយត្រូវធ្វើបទបង្ហាញឱ្យគាត់ដឹងអំពីច្បាប់ ក្រមសីលធម៌វេជ្ជសាស្ត្រ គរុកោសល្យ និងវិន័យ ដល់អ្នកជំងឺ ក្នុងការបម្រើសេវាឱ្យមានគុណភាព។

លោករដ្ឋមន្ត្រី ក៏បានកោតសរសើរចំពោះគ្រូពេទ្យទាំងអស់ ដែលបានខិតខំប្រឹងប្រែងបម្រើសេវាជូនប្រជាជន និងសម្តែងនូវការកោតសរសើរផងដែរដល់ថ្នាក់ដឹកនាំ និងក្រុមប្រឹក្សាគណៈគ្រូពេទ្យគ្រប់ថ្នាក់ ដែលបានខិតខំបំពេញការងារកន្លងមក និងបានរួមគ្នារៀបចំការបោះឆ្នោតជ្រើសរើសក្រុមប្រឹក្សាគណៈគ្រូពេទ្យអាណត្តិទី៤ ក្នុងគោលបំណងលើកកម្ពស់ប្រសិទ្ធភាពនៃការបម្រើសេវាសុខាភិបាលឱ្យកាន់តែប្រសើរឡើង ពិសេសក្នុងបេសកកម្មជាគណៈគ្រូពេទ្យកម្ពុជា៕

The post រដ្ឋមន្ត្រីសុខាភិបាល៖ ក្នុងនាមគ្រូពេទ្យ ត្រូវខិតខំឱ្យអស់ពីលទ្ធភាព និងសមត្ថភាពវិជ្ជាជីវៈ ការពារសុខភាពប្រជាជន appeared first on Kampuchea Thmey Daily.

ពលរដ្ឋប្រមាណ ៦០០នាក់ នៅស្រុកអូររាំង ទទួលបានសេវាព្យាបាលឥតគិតថ្លៃពីគ្រូពេទ្យយោធាប្រទេសវៀតណាម

Ken Malis — Wed, 09 Apr 2025 06:58:41 +0000

កាលពីថ្ងៃទី៨ ខែមេសា ឆ្នាំ២០២៥ គ្រូពេទ្យយោធាខេត្តដាក់ណុង នៃសាធារណរដ្ឋសង្គមនិយមវៀតណាម សហការជាមួយអាជ្ញាធរស្រុកអូររាំង បានចុះពិនិត្យព្យាបាលប្រជាពលរដ្ឋប្រមាណ ៦០០នាក់ ដោយឥតគិតថ្លៃ នៅមណ្ឌលសុខភាពអូររាំង ដែលស្ថិតក្នុងភូមិពូហ្សាម ឃុំសែនមនោរម្យ ស្រុកអូររាំង ខេត្តមណ្ឌលគិរី។

លោក សៀក មុនី អភិបាលស្រុកអូររាំង បានឱ្យដឹងថា ដើម្បីអបអរសាទរបុណ្យចូលឆ្នាំថ្មីប្រពៃណីជាតិខ្មែរ គណៈប្រតិភូយោធាភូមិភាគ៥ ខេត្តដាក់ណុង នៃសាធារណៈរដ្ឋសង្គមនិយមវៀតណាម ដឹកនាំដោយលោក ង្វៀន វ៉ាន់ឃើយ អនុប្រធានការិល័យនយោបាយយោធាភូមិភាគ៥ បានសហការជាមួយអាជ្ញាធរមូលដ្ឋានស្រុកអូររាំង ដើម្បីពិនិត្យសុខភាព និងព្យាបាលជូនដល់ប្រជាពលរដ្ឋ ចំនួន ៦០០នាក់ ដែលរស់នៅឃុំសែនមនោរម្យ ស្រុកអូររាំង ខេត្តមណ្ឌលគិរី។

លោកបន្តថា ដើម្បីពង្រឹងសហប្រតិបត្តិការនាប្រទេសទាំ២ រវៀងខេត្តដាក់ណុងប្រទេសវៀតណាម និងខេត្តមណ្ឌលគិរីប្រទេសកម្ពុជា ក្រុមគ្រូពេទ្យយោធាខេត្តដាក់ណុងនៃសាធារណរដ្ឋសង្គមនិយមវៀតណាម តែងតែចុះជួយពិនិត្យព្យាបាលប្រជាពលរដ្ឋខេត្តមណ្ឌលគិរីជាញឹកញាប់។

លោកបានបញ្ជាក់ថា ក្រោយពីការពិនិត្យព្យាបាលរួចហើយប្រជាពលរដ្ឋដែលមកទទួលពិនិត្យ និងព្យាបាលមានជីវភាពខ្វះខាតចំនួន ២៥០គ្រួសារ ក៏បានទទួលអំណោយ ដូចជាអង្ករ និងគ្រឿងទេសមួយចំនួនទៀតពីរដ្ឋបាលស្រុកអូររាំង មុនត្រឡប់ទៅគេហដ្ឋានវិញផងដែរ៕

អត្ថបទ៖រៀម សុខហេង

The post ពលរដ្ឋប្រមាណ ៦០០នាក់ នៅស្រុកអូររាំង ទទួលបានសេវាព្យាបាលឥតគិតថ្លៃពីគ្រូពេទ្យយោធាប្រទេសវៀតណាម appeared first on Kampuchea Thmey Daily.

រដ្ឋមន្ត្រីសុខាភិបាល៖ជាពេទ្យ ត្រូវដណ្ដើមជីវិតអ្នកជំងឺពីមាត់មច្ចុរាជឱ្យបាន មិនថាថ្ងៃឬយប់ ថ្ងៃសម្រាក ឬវេលាណាទេ

Ngoeul Narath — Mon, 07 Apr 2025 11:03:54 +0000

រដ្ឋមន្ត្រីក្រសួងសុខាភិបាល លោក ឈាង រ៉ា ថ្លែងថា អាជីពជាគ្រូពេទ្យត្រូវដណ្ដើមអាយុជីវិតរបស់អ្នកជំងឺពីមាត់មច្ចុរាជឱ្យបាន មិនថាថ្ងៃឬយប់ ថ្ងៃឈប់សម្រាក ឬវេលាណាទេ។ លោក ឈាង រ៉ា រដ្ឋមន្រ្ដីក្រសួងសុខាភិបាល ថ្លែងដូច្នេះ ក្នុងពិធីបើកសិក្ខាសាលាពិគ្រោះយោបល់លើសេចក្តីព្រាងព្រះរាជក្រឹត្យ ស្តីពីលក្ខន្តិកៈដោយឡែកនៃអង្គសុខាភិបាល នាថ្ងៃទី៧ ខែមេសា ឆ្នាំ២០២៥ ។

លោករដ្ឋមន្រ្តី៖«មុនចូលរៀនវិជ្ជាពេទ្យ យើងម្នាក់ៗបានដឹងរួចហើយថាត្រូវតែព្យាយាម ប្រឹងប្រែង តស៊ូជាមួយគ្រប់ការលំបាក ខិតខំឆ្លើយតបជាដំណោះស្រាយសង្គ្រោះអាយុជីវិតអ្នកជំងឺ រាល់គ្រប់វិនាទី មិនថាយប់ថ្ងៃ មិនថាថ្ងៃសម្រាក ឫវេលាណាទេ។»។

ពីពិធីដដែល លោករដ្ឋមន្រ្តី កោតសរសើរលើកិច្ចខិតខំប្រឹងប្រែងរបស់ក្រុមការងារ ក្រសួងសុខាភិបាល និងក្រសួងមុខងារសាធារណៈ ក្នុងការរៀបចំសេចក្តីព្រាងនេះឡើង ក្នុងគោលបំណងគិតគូរដល់ការអភិវឌ្ឍធនធានមនុស្ស សំដៅធ្វើយ៉ាងណាជួយគាំទ្រដល់ការគ្រប់គ្រងមន្រ្តីរាជការស៊ីវិល ក្នុងវិស័យសុខាភិបាល ឱ្យមានប្រសិទ្ធភាពខ្ពស់ ដើម្បីជំរុញដល់ការផ្តល់សេវាសុខាភិបាល ប្រកបដោយគុណភាព សុវត្ថិភាព ប្រសិទ្ធភាព និងសមធម៌ ដើម្បីឆ្លើយតបនឹងតម្រូវការរបស់ប្រជាពលរដ្ឋ។

លោករដ្ឋមន្រ្តី បានរំលឹកអំពីសារសំខាន់នៃការបណ្តុះបណ្តាលវិជ្ជាពេទ្យ រយៈពេលវេលាសិក្សាវែង និងបន្តមិនចប់មួយជីវិត ដើម្បីការកសាង និងបន្តរក្សាបាននូវសមត្ថភាពមុតស្រួច ទាំងចំណេះវេជ្ជសាស្ត្រទូទៅ ទាំងចំណេះឯកទេស និងឈានទៅជាអ្នកជំនាញកម្រឹតខ្ពស់ (seniors)។ រយៈពេលសិក្សាយូរ ពី៨ ដល់១០ឆ្នាំ និងបន្ថែមពីនេះ បន្តកម្មសិក្សានៅក្រៅប្រទេស ចំពោះវេជ្ជបណ្ឌិតទូទៅ និងវេជ្ជបណ្ឌិតឯកទេសនេះហើយ ទើបធានាបានសុវត្ថិភាពខ្ពស់បំផុតសម្រាប់អាយុជីវិតអ្នកជំងឺ។

ជាទីបញ្ចប់ លោករដ្ឋមន្រ្តី បានលើកទឹកចិត្តដល់សមាជិក សមាជិកាក្នុងសិក្ខាសាលា ខិតខំចូលរួមផ្តល់នូវធាតុចូល ដើម្បីពិភាក្សា និងសម្រេចឱ្យបានលើទិដ្ឋភាពគ្រប់ជ្រុងជ្រោយ អំពីសេចក្តីព្រាងព្រះរាជក្រឹត្យនេះ៕

The post រដ្ឋមន្ត្រីសុខាភិបាល៖ជាពេទ្យ ត្រូវដណ្ដើមជីវិតអ្នកជំងឺពីមាត់មច្ចុរាជឱ្យបាន មិនថាថ្ងៃឬយប់ ថ្ងៃសម្រាក ឬវេលាណាទេ appeared first on Kampuchea Thmey Daily.

មជ្ឈមណ្ឌលវះកាត់កុមារ ផ្តល់ជូនការពិនិត្យព្យាបាល និងវះកាត់ បញ្ហាឆ្អឹងជើង ចាប់ពីថ្ងៃទី១៧-២១ ខែមីនា ខាងមុខ

Ken Malis — Fri, 14 Mar 2025 04:40:42 +0000

មជ្ឈមណ្ឌលវះកាត់កុមារ ហៅថាពេទ្យគៀនឃ្លាំង នឹងមានក្រុមគ្រូពេទ្យជំនាញផ្នែកជើង មកពីប្រទេសសង្ហបុរី ផ្តល់ជូនការពិនិត្យព្យាបាល និងវះកាត់ ចាប់ពីថ្ងៃទី១៧ ដល់ ថ្ងៃទី២១ ខែមីនា ឆ្នាំ២០២៥ ខាងមុខ។ នេះបើតាមការជូនដំណឹងរបស់ មជ្ឈមណ្ឌលវះកាត់កុមារ កាលពីពេលថ្មីៗនេះ។

ការព្យាបាលនេះ គឺសម្រាបអ្នកជំងឺពេញវ័យតែប៉ុណ្ណោះ ដែលមានបញ្ហាដូចជា បញ្ហាឆ្អឹងត្រគាក បញ្ហាឆ្អឹងប្រអប់កជើង បញ្ហាឆ្អឹងជើង។ ដូច្នេះអ្នកជំងឺដែលមានបញ្ហាឆ្អឹងជើង មកចុះឈ្មោះពិនិត្យថ្ងៃចន្ទទី១៧ ដល់ថ្ងៃទី២០ ខែមីនា ខាងមុខនេះ ចាប់ពីម៉ោង ៨ព្រឹក ដល់ម៉ោង ៤ល្ងាច។ បើតាមមន្ទីពេទ្យ ចំពោះអ្នកក្រីក្រ មន្ទីរពេទ្យមិនគិតថ្លៃទេ តែបើអ្នកមានលទ្ធភាពសូមជួយបរិច្ចាកថវិការ។

អាស័យដ្ឋាន៖ ក្នុងមជ្ឈមណ្ឌលជាតិស្តារលទ្ធភាពពលកម្មគៀនឃ្លំាង ផ្លូវ៦អា ភូមិគៀនឃ្លំាង ខណ្ឌ ជ្រោយ ចង្វារ រាជធានីភ្នំពេញ។ សម្រាប់ព័ត៌មានបន្ថែមអាចទាក់ទងតាមលេខទូរសព្ទ ០២៣៤៣០២០២៕

The post មជ្ឈមណ្ឌលវះកាត់កុមារ ផ្តល់ជូនការពិនិត្យព្យាបាល និងវះកាត់ បញ្ហាឆ្អឹងជើង ចាប់ពីថ្ងៃទី១៧-២១ ខែមីនា ខាងមុខ appeared first on Kampuchea Thmey Daily.