អ្នកនាំពាក្យព្រឹទ្ធសភាកម្ពុជាលោក ជា ធីរិទ្ធ មើលឃើញថា មូលហេតុដែលប្រទេសទីម័រប្រគល់គ្រឿងឥស្សរិយយសGrand Collar of the order of Timor-Leste ជូនសម្តេចតេជោ ហ៊ុន សែន គឺគឺព្រោះតែទីម័រគោរពចំពោះការយកជីវិតធ្វើដើមទុនដើម្បីសង្គ្រោះពលរដ្ឋខ្មែរពីសង្គ្រាមកាត់សម្លាប់គ្នាឯង និងដើម្បីសន្តិភាពយូរអង្វែង ក៏ដូចជាដើម្បីអរគុណសម្ដេចតេជោសម្រាប់ការជួយដល់ទីម័ររយៈពេលជាងពីរទសវត្សរ៍មកនេះ។

លោកជា ធីរិទ្ធ លើកឡើងពីការមើលឃើញដូច្នេះនៅក្នុងសន្និសីទសារព័ត៌មានស្ដីពីលទ្ធផលនៃដំណើរទស្សនកិច្ចរបស់សម្ដេចតេជោ ហ៊ុន សែន ទៅប្រទេសឥណ្ឌូនេស៊ី និងទីម័រ ដែលរៀបចំឡើងនៅអាកាសយានដ្ឋានអន្តរជាតិភ្នំពេញនារសៀលថ្ងៃទី០៩ ខែឧសភានេះ។

លោក ជា ធីរិទ្ធ គូសបញ្ជាក់ដូច្នេះ÷”ការផ្ដល់គ្រឿងឥស្សរិយយសនេះ គឺជាការផ្ដល់តម្លៃធំធេងសម្រាប់សម្ដេចតេជោ និងមានចំណុច២សំខាន់ គឺជាការគោរពចំពោះពលិកម្មរបស់សម្ដេចតេជោ ក្នុងបុព្វហេតុ ដើម្បីប្រជាជនកម្ពុជា។ ទី ២គឺការផ្ដល់តម្លៃដែលសម្ដេចតេជោគាំទ្រចំពោះទីម័រ។”។

អ្នកនាំពាក្យព្រឹទ្ធសភាបន្ថែមថា គ្រឿងឥស្សរិយយសGrand Collar of the order of Timor-Leste នេះ គឺជាគ្រឿងឥស្សរិយយសដ៏ខ្ពស់បំផុតរបស់ទីម័រឡេស្តេដែលផ្ដល់ទៅឲ្យមេដឹកនាំប្រទេសទាំងឡាយដែលមានស្នាដៃជាប្រវត្តិសាស្ត្រដ៏ធំធេងសម្រាប់ប្រទេសជាតិនិងសម្រាប់មនុស្សជាតិ។

លោក ជា ធីរិទ្ធ គូសបញ្ជាក់ថា មេដឹកនាំទីម័របានបញ្ជាក់ម្ដងហើយម្ដងទៀតអំពីពលិកម្មរបស់សម្ដេចតេជោ ដែលជាអ្នករំដោះប្រជាជនកម្ពុជា និងជាស្ថាបនិកកម្ពុជាក្នុងសម័យទំនើប។

អ្នកនាំពាក្យព្រឹទ្ធសភាបានអះអាងទៀតថា នៅលើទឹកដីទីម័ររាប់ចាប់តាំងពីអ្នកនយោបាយបក្សប្រឆាំងនិងថ្នាក់ដឹកនាំជាន់ខ្ពស់ទីម័រ សុទ្ធតែបានចាត់ទុក និងគោរពវីរភាពរបស់សម្ដេចតេជោ។

អ្នកនាំពាក្យបានបន្ថែមថា ការណ៍ដែលទីម័រប្រគល់គ្រឿងឥស្សរិយយសជូនសម្ដេចតេជោ ក៏មិនមែនដោយសារតែសម្ដេចតេជោជួយទីម័ររឿងចូលជាសមាជិកអាស៊ានមួយមុខឡើយ គ្រប់យ៉ាងគឺទីម័រមើលឃើញពី ការលះបង់ដើម្បីមនុស្សជាតិកម្ពុជា ដែលជាមេដឹកនាំដ៏ឆ្នើមមួយរូបនាំកម្ពុជាមកដល់ចំណុចរីកចម្រើនអភិវឌ្ឍន៍ដូចបច្ចុប្បន្ន។

ចំណែកលោក ចែម វីឌ្យ៉ា អតីតមន្ត្រីការទូតជើងចាស់ និងជាអ្នកនាំពាក្យនៃទស្សនកិច្ចនេះ អះអាងថា អ្វីដែលសម្ដេចតេជោបានលះបង់នាពេលកន្លងមកដើម្បីប្រទេសជាតិ គឺមានគុណបំណាច់មិនអាចកាត់ថ្លៃបានឡើយ ហេតុនេះហើយទើបទីម័រប្រគល់គ្រឿងឥស្សរិយយសដល់ខ្ពស់បំផុតមួយនេះជូនសម្ដេចតេជោ។

លោក ចែម វីឌ្យ៉ា រំលឹកថាកន្លងមកសម្ដេចតេជោហ៊ុនសែនគាត់ធ្លាប់ទទួលបានកាំភ្លើងខ្លីមាមាស ដែលប្រគល់ជូនដោយអតីតរដ្ឋមន្ត្រីការពារជាតិឥណ្ឌូនេស៊ី លោកប្រាបូវ៉ូ ស៊ូប៊ីនយ៉ាន់តូ ដែលបច្ចុប្បន្នជាប្រធានាធិបតីឥណ្ឌូនេស៊ីរួចមកហើយដែរ។ ហើយកាំភ្លើងខ្លីមាសនោះសព្វថ្ងៃកំពុងតម្កល់ទុកនៅវិមានឈ្នះឈ្នះដែលស្ថិតនៅក្នុងខណ្ឌជ្រោយចង្វាររាជធានីភ្នំពេញ។

លោក ចែម វីឌ្យ៉ា ដាក់ក្ដីសង្ឃឹមថាសម្ដេចតេជោ និងយកគ្រឿងឥស្សរិយយទីម័រទើបនឹងប្រគល់នេះយកទៅតម្កល់ទុកនៅវិមានឈ្នះឈ្នះទៀត៕

The post អ្នកនាំពាក្យ÷ទីម័រប្រគល់គ្រឿងឥស្សរិយយសខ្ពស់បំផុតជូនសម្ដេចតេជោ ព្រោះគោរពការដែលសម្ដេចយកជីវិតធ្វើដើមទុនដើម្បីប្រជាជន និងបានជួយទីម័រកន្លងមក appeared first on Kampuchea Thmey Daily.

គួរជ្រាបថា កាលពីថ្ងៃទី ២៩ ខែមេសា ឆ្នាំ២០២៥ ទីស្តីការគណៈរដ្ឋមន្រ្តីរដ្ឋាភិបាលជប៉ុនបានប្រកាសឈ្មោះអ្នកដែលត្រូវទទួលគ្រឿងឥស្សរិយយសសម្រាប់សរទររដូវឆ្នាំ២០២៥។ ឧត្ដមប្រឹក្សាផ្ទាល់ព្រះមហាក្សត្រកម្ពុជា លោក ជា សុផារ៉ា គឺជាឥស្សរជនកម្ពុជាតែម្នាក់គត់ ក្នុងចំណោមមនុស្ស១០៧នាក់ ដែលត្រូវបានទីស្តីការគណៈរដ្ឋមន្រ្តីរដ្ឋាភិបាលជប៉ុនប្រកាសផ្ដល់ជូនគ្រឿងឥស្សរិយយសសម្រាប់និទាឃរដូវឆ្នាំ២០២៥។ ជប៉ុន ផ្ដល់គ្រឿងឥស្សរិយយសនេះ ដល់លោក ជា សុផារ៉ា គឺតែមើលឃើញថា លោក បានរួមចំណែកក្នុងកិច្ចការដែលជាផ្ដល់ប្រយោជន៍រួម ក្នុងកិច្ចការងារសង្គម និងបានពង្រឹងទំនាក់ទំនងនិងមិត្តភាពរវាងជប៉ុន និងកម្ពុជា។

គួរ​ឱ្យដឹងថា លោក ជា សុផារ៉ា  កើតថ្ងៃទី ២០ ខែមីនា ឆ្នាំ១៩៥៣ នៅភូមិរការខ្មែរ ឃុំរការខ្នុរ ស្រុកក្រូចឆ្មារ ខេត្តកំពង់ចាម។ លោក គឺជាបុគ្គលឆ្នើមមួយរូបមានកេរិ៍ឈ្មោះល្បីល្បាញជំនាញដោះស្រាយបញ្ហាដីធ្លីនៅកម្ពុជា។ ក្នុងបទពិសោធសិក្សា លោកជា សុផារ៉ា បានឆ្លងកាត់វគ្គសិក្សានយោបាយជាច្រើននៅទីក្រុងហូជីមិញ ប្រទេសវៀតណាម។ លោកបានបញ្ចប់វគ្គសិក្សានយោបាយ ជំនាន់ទី១ នៅសាលានយោបាយរដ្ឋធានី វគ្គសិក្សានយោបាយបច្ចេកទេស នៅសាលារដ្ឋបាលនីតិវិធី វគ្គសិក្សាទ្រឹស្តីនយោបាយ ជំនាន់ទី៤ នៅសាលាង្វៀនអាយតួក។

លោកធ្លាប់កាន់តំណែងចាប់ពីអនុប្រធានតំបន់៤ក្រុងភ្នំពេញចាប់ពីឆ្នាំ ១៩៧៩ និងកាន់តំណែងជាអនុប្រធានគណៈកម្មាធិការប្រជាជនសង្កាត់លេខ៤ ក្រុងភ្នំពេញ, ប្រធានគណៈកម្មាធិការប្រជាជនខណ្ឌទួលគោក,អនុប្រធានគណៈកម្មាធិការប្រជាជនក្រុងភ្នំពេញ, អភិបាលរងរាជធានី, អភិបាលរងទី១ រាជធានី, ប្រតិភូរាជរដ្ឋាភិបាលទទួលបន្ទុកអភិបាលរងទី១ រាជធានី,ប្រតិភូរាជរដ្ឋាភិបាលទទួលបន្ទុកអភិបាលរាជធានី, ឯកអគ្គរាជទូតកម្ពុជាប្រចាំមីយ៉ាន់ម៉ា,ទីប្រឹក្សាសម្ដេចតេជោ ហ៊ុន សែន, រដ្ឋលេខាធិការក្រសួងរៀបចំដែនដី, រដ្ឋមន្ត្រីក្រសួងអភិវឌ្ឍន៍ជនបទ។

លោក ឡើងកាន់តំណែងជាទេសរដ្ឋមន្ត្រី រដ្ឋមន្ត្រីក្រសួងរៀបចំដែនដីនគរូបនីយកម្ម ពីខែមេសា២០១៦ ដល់ខែកញ្ញា ឆ្នាំ២០១៨, នៅខែកញ្ញា ឆ្នាំ២០១៨ រដ្ឋាភិបាលនីតិកាលទី៦ ចាប់ផ្ដើមឡើង លោកត្រូវបានតែងតាំងឧបនាយករដ្ឋមន្ត្រី រដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់។ នៅថ្ងៃទី១២ខែតុលា ឆ្នាំ២០២៣ ព្រះករុណា ព្រះបាទសម្ដេចព្រះបរមនាថ នរោត្តម សីហមុនី ព្រះមហាក្សត្រកម្ពុជា តែងតាំងលោក ជា សុផារ៉ា ជាឧត្ដមប្រឹក្សាផ្ទាល់ព្រះមហាក្សត្រ ឋានៈស្មើឧបនាយករដ្ឋមន្ត្រី។ ក្រៅពីលោក ជា សុផារ៉ា ក៏ជាសមាជិករដ្ឋសភានីតិកាលទី៧ផងដែរ៕

ដោយ៖ ង៉ិល ណារ៉ាត់

ចុចអាន៖ លោក ជា សុផារ៉ា  ជាឥស្សរជនកម្ពុជាតែម្នាក់គត់ ក្នុងចំណោមបុគ្គល១០៧នាក់ ដែលជប៉ុន ផ្ដល់គ្រឿងឥស្សរិយយស

The post ព្រឹកនេះ លោក ជា សុផារ៉ា ទៅដល់ជប៉ុនហើយ ដើម្បីទទួលគ្រឿងឥស្សរិយយសនៅក្នុងព្រះរាជវាំងជប៉ុន appeared first on Kampuchea Thmey Daily.

គ្រឿងឥស្សរិយយសទាំង៣ ដែលជាព្រះរាជប្រទានដោយព្រះមហាក្សត្រ ជូនសពឯកឧត្តម​ អ្នកឧកញ៉ាឧត្តមមេត្រីវិសិដ្ឋ ហ៊ុន ​សាន ​ជាកិច្ចបច្ចាមរណៈ មាន១.គ្រឿងឥស្សរិយយសមុនីសារាភណ័្ឌ ​ថ្នាក់មហាសេរីវឌ្ឍន៍ ២.គ្រឿងឥស្សរិយយស សុវត្ថារា ថ្នាក់មហាសេរីវឌ្ឍន៍ និងទី៣.គ្រឿងឥស្សរិយយសសម្ដេច​ព្រះមហាក្សត្រីយានី ព្រះស៊ីសុវតិ្ថ​មុនីវង្ស​ កុសុម:នារីរត្ន័​ថ្នាក់មហាសេរីវឌ្ឍន៍។

នាពេលកន្លងមក ក្នុងពលិកម្មដើម្បីជាតិ សាសនា និងព្រះមហាក្សត្រ ឯកឧត្តម ក៏ត្រូវបានប្រោសព្រះរាជទាននូវគ្រឿងឥស្សរិយយសជាច្រើនផងដែរ ពិសេសគ្រឿងឥស្សរិយយសខ្ពស់បំផុតរបស់ព្រះរាជាណាចក្រកម្ពុជា គឺ ថ្នាក់ជាតូបការ និងគោរមងារជា អ្នកឧកញ៉ា ឧត្តមមេត្រីវិសិដ្ឋ ហ៊ុន សាន ពីព្រះមហាក្សត្រ នាថ្ងៃទី១៥ ខែកក្កដា ឆ្នាំ២០២៣។

ឯកឧត្តម អ្នកឧកញ៉ាឧត្តមមេត្រីវិសិដ្ឋ ហ៊ុន សាន​ រដ្ឋលេខាធិការក្រសួងសាធារណការ និងដឹកជញ្ជូន ដែលជាបងប្រុសបង្កើតរបស់សម្តេចតេជោ ហ៊ុន សែន បានទទួលមរណភាពនៅម៉ោង ២:២៧នាទីទាបភ្លឺ ថ្ងៃទី២៨ ខែមីនា ឆ្នាំ២០២៥ ក្នុងជន្មាយុ៧៨ឆ្នាំ ដោយរោគាពាធ៕

The post ឯកឧត្តម ហ៊ុន សាន ទទួលបានគ្រឿងឥស្សរិយយសចំនួន៣ ជាកិច្ចបច្ចាមរណៈ ពីព្រះមហាក្សត្រ appeared first on Kampuchea Thmey Daily.

នៅក្នុង​ពិធី​សំណេះសំណាល និង​បំពាក់​ឋានន្តរសក្ដិ ជូន​យោធិន​ចូលនិវត្តន៍​ឆ្នាំ​២០២៤ នៅ​តំបន់​ប្រតិបត្តិការ​សឹក​រង​ក្រចេះ នាពេលនោះ លោក​ឧ​ត្ត​ម​សេនីយ៍​ទោ ណៃ តឹង​ឡឹង បាន​មានប្រសាសន៍ថា យោធិន​បាន​ចូលនិវត្តន៍​នៅពេលនេះ គឺជា​អ្នកចូលរួម​ធ្វើ​ពលិកម្ម​យ៉ាង​ធំធេង​ក្នុង​ការរំដោះ​ប្រទេសជាតិ​បាន​ផ្ដួល​រលំ​ទប់ស្កាត់​របប​ប្រល័យពូជសាសន៍​ប៉ុលពត និង​ចូលរួម​យ៉ាងសកម្ម​នឹង​ចលនា​បង្រួបបង្រួម​ជាតិ​តាមរយៈ​នយោបាយ ឈ្នះ ឈ្នះ នាំមក​នូវ​សុខសន្តិភាព​ឯកភាព​ជាតិ​ពេញលេញ ការកសាង និង​អភិវឌ្ឍន៍​ប្រទេសជាតិ នាំ​ឲ្យ​ប្រទេសជាតិ មាន​សន្តិភាព រហូតមកដល់​សព្វថ្ងៃ​នេះ។

លោក​ឧ​ត្ត​ម​សេនីយ៍​ទោ បាន​បញ្ជាក់ថា ការបំពាក់​ឋានន្តរសក្ដិ​ជូន​យោធិន​សោធន​និវត្តន៍​នៅពេលនេះ គឺជា​ការបំពាក់​ឋានន្តរសក្ដិ​គោលនយោបាយ​របស់​រាជ​រដ្ឋាភិបាល ដែល​យោធិន​សោធន​និវត្តន៍ ត្រូវបាន​តម្លើង​ឋានន្ដរសក្តិ​មួយ​ថ្នាក់​បន្ថែមទៀត។ គោលនយោបាយ​របស់​រា​ជ​រដ្ឋាភិបាល បាន​គិតគូរ​យកចិត្ត​ទុកដាក់​ចំពោះ​យោធិន​យើង​គ្រប់ពេលវេលា តាមរយៈ​ការដំឡើង​ប្រាក់បៀវត្ស ប្រាក់​អត្ថប្រយោជន៍​ផ្សេងៗ ទោះបី​ពេល​កំពុង​បំពេញភារកិច្ច ពេល​ចូលនិវត្តន៍​ ឬ​ ក្រោយ​ចូលនិវត្តន៍​ហើយក៏​ដោយ ក៏​រដ្ឋាភិបាល​មិនអាច​បំភ្លេចបាន​ឡើយ​ចំពោះ​បងប្អូន​ជា​យោធិន​ចូល​សោធន​និវត្តន៍ ដែល​បាន​រួម​ចំណែក​ធ្វើ​ពលិកម្ម​យ៉ាង​ធំធេង​ក្នុង​បុព្វហេតុ​ជាតិ​មាតុភូមិ និង​ប្រជាជន។

លោក​ឧ​ត្ត​ម​សេនីយ៍​ទោ ណៃ តឹង​ឡឹង បាន​សំណូមពរ ដល់​បងប្អូន ត្រូវ​ចូល​សោធន​និវត្តន៍​ទាំងអស់ ពេលទៅដល់​មូលដ្ឋាន​វិញ ត្រូវ​ចុះឈ្មោះ​ចូល​ជា​សមាជិកសមាគម​អតីតយុទ្ធជន​កម្ពុជា ដើម្បី​ទទួលបាន​ការមើល​ថែទាំ ​ពី​អតីត​យុទ្ធជន​កម្ពុជា នៅតាម​មូលដ្ឋាន​ខេត្ត ក្រុង ស្រុក ដែល​បងប្អូន​បានរស់នៅ។

ក្នុង​ពិធី​សំណេះសំណាល​នាពេលនោះ យោធិន ត្រូវ​ចូលនិវត្តន៍ មាន​ចំនួន ២៨​នាក់ បានទទួល​កាដូ​អនុស្សាវរីយ៍ ពីស​ម្តេច​ធិបតី ហ៊ុន ម៉ា​ណែ​ត នាយករដ្ឋមន្ត្រី​នៃ​ព្រះរាជាណាចក្រ​កម្ពុជា និង​លោកជំទាវ​បណ្ឌិត តាមរយៈ​លោក​ឧ​ត្ត​ម​សេនីយ៍​ទោ ណៃ តឹង​ឡឹង ដែល​ក្នុង​មួយ​នាក់​ម្នាក់ៗ វត្ថុ​អនុស្សាវរីយ៍ និង​ទទួលបាន​ថវិកា​ពីរ​សែន​រៀល​ផង​ដែរ៕

ដោយ ៖ ប្រុ​ញ វិធិ​ន

The post ពិធី​សំណេះសំណាល បំពាក់​ឋានន្តរសក្ដិ និង​គ្រឿងឥស្សរិយយស​ ជូន​យោធិន​ចូលនិវត្តន៍ ឆ្នាំ​២០២៤ appeared first on Kampuchea Thmey Daily.

ក្នុងឱកាសនោះ ឯកអគ្គរាជទូតជប៉ុនប្រចាំកម្ពុជា លោក UENO Atsushi បានអបអរសារទរជូនលោកបណ្ឌិត អ៊ុំ រម្យណី ក្នុងពេលទទួលបានគ្រឿងឥស្សរិយយស “The Order of the Rising Sun, Gold Rays with Neck Ribbon” ដែលប្រទេសជប៉ុនប្រគល់ជូនឥស្សរជនជនជាតិបរទេសសម្រាប់និទាឃរដូវឆ្នាំ២០២៤។

លោកទូតជប៉ុន អះអាងថា  គ្រឿងឥស្សរិយយសដែលជប៉ុនប្រគល់ជូនលោកបណ្ឌិត អ៊ុម រម្យណី នេះ គឺជាការទទួលស្គាល់នូវ ការរួមចំណែកដ៏ឆ្នើមរបស់លោកបណ្ឌិតក្នុងការជំរុញការផ្លាស់ប្តូរការសិក្សា និងការយល់ដឹងពីគ្នាទៅ វិញទៅមករវាងប្រទេសជប៉ុន និងកម្ពុជា កំឡុងពេលលោក អ៊ុម រម្យណីកាន់តំណែងជា អគ្គនាយកវិទ្យាស្ថានបច្ចេកវិទ្យាកម្ពុជា(ITC)។

​បើតាមលោកទូតជប៉ុនប្រចាំកម្ពុជាគឺ លោក បណ្ឌិត អ៊ុម រម្យណី គឺជានិស្សិតខ្មែរម្នាក់ ក្នុងចំណោមនិស្សិតខ្មែរឈានមុខគេដែលទទួលបានជោគជ័យជាប់អាហារូបករណ៍រដ្ឋាភិបាលជប៉ុនទៅសិក្សានៅប្រទេសជប៉ុនក្នុងឆ្នាំ១៩៩៣។

ផ្អែកលើកិច្ចការងាររវាងលោកបណ្ឌិត ជាមួយរដ្ឋាភិបាលជប៉ុននាពេលកន្លងមក លោកទូតជប៉ុន សម្ដែងការអរគុណម្ដងហើយម្ដងទៀតជូនបណ្ឌិត អ៊ុំ រម្យណី ដែលខិតខំបំពេញការងារ ជាមួយស្ថានទូតជប៉ុនប្រចាំកម្ពុជាក្នុងការជ្រើសរើសនិស្សិតពីកម្ពុជា ទៅសិក្សានៅប្រទេសជប៉ុនតាមរយៈអាហារូបករណ៍រដ្ឋាភិបាលជប៉ុន ការសហការលើការរៀបចំវគ្គពន្យល់ជាច្រើនស្តីពី អាហារូបករណ៍រដ្ឋាភិបាលជប៉ុនដែលធ្វើឡើងនៅវិទ្យាស្ថានបច្ចេកវិទ្យាកម្ពុជា ឬសាលាតិចណូ ក៏ដូចជារួមជាមួយ បុគ្គលិកនៅសាលាតិចណូ ក្នុងកិច្ចការធ្វើ បាឋកថាបន្ថែម សម្រាប់អ្នកដាក់ពាក្យអាហារូបករណ៍សិក្សានៅជប៉ុន។

ជាមួយគ្នានេះ ឧបនាយករដ្ឋមន្ត្រី រដ្ឋមន្ត្រីក្រសួងអប់រំ យុវជន និងកីឡា លោកបណ្ឌិតសភាចារ្យ ហង់ ជួនណារ៉ុន បានចាត់ទុកពិធីបំពាក់គ្រឿងឥស្សរិយយសនេះ គឺជា សក្ខីភាពដែលបញ្ជាក់ពីការចូលរួមចំណែកចំពោះបុព្វហេតុជាតិដ៏វិសេស ក្នុងការពង្រឹងចំណង មិត្តភាពទ្វេភាគីកម្ពុជា-ជប៉ុន តាមរយៈការជំរុញការផ្លាស់ប្តូរប្រជាជន និងប្រជាជន ការទំនាក់ទំនងវប្បធម៌ និងកិច្ចសហប្រតិបត្តិការអប់រំ។

លោកឧបនាយករដ្ឋមន្ត្រី រដ្ឋមន្ត្រីក្រសួងអ​​ប់រំ បានទទួលស្គាល់ថា លោកបណ្ឌិត អ៊ុម រម្យណី ពិតជាបានខិតខំប្រឹងប្រែង និងមានឆន្ទៈដ៏វិសិដ្ឋ ក្នុងការចូល រួមចំណែកបម្រើជាតិ បម្រើប្រជាជនក្នុងតួនាទីជាស្ពាននៃការរឹតបន្តឹងចំណងមិត្តភាពជា ប្រពៃណីរវាងប្រទេសកម្ពុជា និងជប៉ុន ជាពិសេសលើការពង្រឹងកិច្ចសហប្រតិបត្តិការ និងផ្លាស់ប្តូរ វិស័យអប់រំ ដើម្បីជំរុញការស្វែងយល់ពីគ្នាទៅវិញទៅមកឱ្យកាន់តែស៊ីជម្រៅ។

លោក ហង់ ជួនណារ៉ុន ក៏បានចាត់ទុកលោកបណ្ឌិត អ៊ុម រម្យណី  គឺជាវីរជនគំរូមួយរូបសម្រាប់ប្រទេសជាតិ ដែលបាននាំមកនូវកិត្តិយស និង មោទនភាពជូនជាតិមាតុភូមិ និងក្រុមគ្រួសារ តាមរយៈការបង្កើតសមិទ្ធផលស្នាដៃ ដែលមិន អាចកាត់ថ្លៃបានសម្រាប់អនាគតយុវជនជំនាន់ក្រោយ។

សម្រាប់លោកបណ្ឌិត អ៊ុម រម្យណី ដែលទទួលបានគ្រឿងឥស្សរិយយស បានអរគុណចំពោះរដ្ឋាភិបាលជប៉ុនដែលបានប្រគល់ជូនលោក និងបានអរគុណដល់ភាគីជប៉ុនដែលផ្ដល់ការគាំទ្រដល់កម្ពុជា និងគាំទ្រចំពោះការងាររបស់លោក។

ជាក្ដីសង្ឃឹមទៅថ្ងៃខាងមុខ លោកឧបនាយករដ្ឋមន្ត្រី រដ្ឋមន្ត្រីក្រសួងអប់រំ បុង លោកទូតជប៉ុន បានដាក់ក្ដីរំពឹងថា លោកបណ្ឌិត អ៊ុម រម្យណី នឹងបន្តដឹកនាំជំរុញការផ្លាស់ប្តូរ ការ សិក្សា និងការយល់ដឹងពីគ្នាទៅវិញទៅមករវាងប្រទេសជប៉ុន និងកម្ពុជាបន្តទៀត។

នៅចំពោះមុខលោក ហង់ ជួនណារ៉ុន និងលោកឯកអគ្គរាជទូតជប៉ុនប្រចាំកម្ពុជា លោកបណ្ឌិត អ៊ុម រម្យណី បានប្រកាសទទួលយកមេដាយនេះដោយស្មារតីទទួលខុសត្រូវយ៉ាងជ្រាលជ្រៅ និងប្តេជ្ញាចិត្តយ៉ាង មុតមាំថានឹងបន្តជំរុញនូវទំនាក់ទំនងជាវិជ្ជមានរវាងប្រជាជាតិទាំងពីរជាបន្តទៅទៀត។

គួរឱ្យដឹងថា កាលពីថ្ងៃទី២២ ខែធ្នូ ឆ្នាំ២០២១ លោកបណ្ឌិត អ៊ុម រម្យណី ក៏ធ្លាប់ទទួលបានពានរង្វាន់ «JICA President Award» ទីភ្នាក់ងារសហប្រតិបត្តិការអន្តរជាតិនៃប្រទេសជប៉ុន ប្រចាំប្រទេសកម្ពុជា (JICA) ៕

ដោយ៖ ង៉ិល ណារ៉ាត់

The post ជប៉ុន ប្រគល់គ្រឿងឥស្សរិយយសដល់អតីតអគ្គនាយកវិទ្យាស្ថានបច្ចេកវិទ្យាកម្ពុជា ត្រូវជាស្វាមីលោកស្រី ឱ វណ្ណឌីន appeared first on Kampuchea Thmey Daily.

លោក ឆាយ វីរៈយុទ្ធ បាន​បង្ហាញ​អារម្មណ៍​រំភើប​ថា «ថ្ងៃនេះ​ជា​មហា កិត្តិយស​ខ្លាំង​បំផុត​ដែល​ខ្ញុំ​បាទ​បាន​ទទួល​គ្រឿង​ឥស្សរិយយស​ព្រះរាជាណាចក្រ​កម្ពុជា ថ្នាក់​មហា​សិរីវឌ្ឍន៍​ពី​សម្តេច​កិត្តិ​សង្គហ​បណ្ឌិត ម៉ែន សំអន ក្នុង​ឱកាស​អបអរសាទ​ទិវា​ជាតិ និង​អន្តរជាតិ​ប្រយុទ្ធប្រឆាំង​អំពើពុករលួយ ៩ធ្នូ ក្រោម​ការដឹកនាំរបស់ ឯកឧត្តម កិត្តិនីតិកោសលបណ្ឌិត ឱម យ៉ិនទៀង»។

ចំណែក​តារា​ចម្រៀង​សំនៀង​ផ្អែម​លំដាប់​ជួរ​មុខ​របស់​សាន់ដេ កញ្ញា សុខ ពិសី បាន​លើកឡើង​ដែរថា “សូម​ថ្លែង​អំណរ​គុណ​យ៉ាង​ជ្រាលជ្រៅ​ចំពោះ​ថ្នាក់​ដឹកនាំ​សំរាប់​ការ​ផ្ដល់​កិត្តិយស​ដ៏ធំមួយនេះ​សម្រាប់​នាង​ខ្ញុំ សុខ ពិសី”។

ដោយ​ឡែក​សម្រាប់​តារា​ចម្រៀង​នាយ ចឺម ក៏​មិន​ខុស​ពី​ គ្នា​តារា ២​ដួង ខាងលើ​ទេ លោក​បាន​លើកឡើង​ថា «ខ្ញុំ​ពិត​ជា​មាន​មហា កិត្តិយស​ខ្លាំង​បំផុត​ដែល​ខ្ញុំបាទ​បាន​ទទួល​គ្រឿង​ឥស្សរិយយស​ព្រះរាជាណាចក្រ​កម្ពុជា​ថ្នាក់​មហា សេនា​ពី​សម្ដេច​កិត្តិសង្គហបណ្ឌិត ម៉ែន សំអន ក្នុង​ឱកាស​អបអរសាទរ​ទិវា​ជាតិ និង​អន្តរជាតិប្រយុទ្ធប្រឆាំងអំពើពុករលួយ ៩ធ្នូ ក្រោមការដឹកនាំរបស់ឯកឧត្តមកិត្តិនីតិកោសលបណ្ឌិត ឱម យ៉ិនទៀង»។

សូម​បញ្ជាក់​ថា កាល​ពីថ្ងៃ​ទី០៦ ខែធ្នូ ឆ្នាំ២០២៣ អង្គភាព​ប្រឆាំង​អំពើ​ពុករលួយ​បាន​រៀប​ចំ«ទិវាជាតិ-អន្តរ​ជាតិ​ ៩ធ្នូ ប្រយុទ្ធ​ប្រឆាំង​អំពើពុករលួយ»​ដោយ​មាន​ការចូលរួមពីមន្ត្រីគ្រប់ជាន់ថ្នាក់ និងស្ថាប័ន​ពាក់ព័ន្ធ​ព្រម​ទាំង​ក៏មានការចូលរួមពី​សិល្បករ-ការិនី មួយ​ចំនួន​ផងដែរ៕

​អត្ថបទ៖ ចាន់រ៉ា

The post កំពូលតារាចម្រៀង ៣ ដួងទទួលបានគ្រឿងឥស្សរិយយស appeared first on Kampuchea Thmey Daily.

​

អ្នក​​នាង​ ស្រួង​ ភាវី បាន​លើក​ឡើង​បែប​នេះ បន្ទាប់​ពី​នាង​ទទួល​បាន​គ្រឿង​ឥស្សរិយយស​សម្ដេច​ព្រះមហាក្សត្រិយានី ព្រះស៊ីសុវត្ថិ មុនីវង្ស កុសុមៈនារីរ័ត្ន ថ្នាក់មហា​​សេរីវឌ្ឍន៍ពី​ព្រះមហាក្សត្រ​នៃ​ព្រះរាជាណាចក្រ​កម្ពុជា។

អ្នកនាង ស្រួង​ ភាវី ​សង្កត់​ធ្ងន់​ដែរ​ថា «តាម​ពិត​ទៅ​ការ​​ទទួល​បាន​នូវ​គ្រឿង​ឥស្សរិយយស​ក្ដី​ មេដាយ​ក្ដី ពាន​ក្ដី មិន​មែន​ជា​អ្វី​ដែល​ខ្ញុំ​​ប្រាថ្នា​ចង់​បាន​នោះទេ។ អ្វី​ៗដែល​ខ្ញុំ​​ធ្វើ​គឺ​គ្រាន់​តែ​ដើម្បី​ជាតិ និង​​ប្រជាជន​ដែល​កើត​ចេញ​ពី​បេះដូង​ក្នុង​​នាម​ជា​កូន​ខ្មែរ​​មួយ​រូប​បាន​កើត​លើ​ទឹក​ដី​សុវណ្ណភូមិដ៏​ល្អ​មួយ​នេះ​»។

បន្ថែមពីនេះ​កីឡា​ការិនី ស្នូកឃ័រ​ រូប​នេះ​អះអាង​បន្ត​ថា «ខ្ញុំ​ធ្វើ​តាម​សុឆន្ទៈ​ ខ្ញុំ​ធ្វើ​តាម​បេះដូង ខ្ញុំ​ធ្វើ​តាម​មនសិការ ព្រោះ​អ្វីៗ​ទាំង​អស់​នេះ​គឺ​ជា​ការ​ងារ​ចាំបាច់​របស់​ខ្ញុំ​ក្នុង​ជីវិត​នេះ»។

គួរជម្រាបថា នាពេលកន្លងមក ស្រួង ភាវី តែងតែបញ្ចេញសកម្មភាពសប្បុរសធម៌ជួយដល់កុមារ ក្មេងកំព្រា ចាស់ជរា​ និងជនក្រីក្រ នៅក្នុងប្រទេសកម្ពុជា ដែលត្រូវការជំនួយ និងកំពុងត្រូវការស្វែងអនាគតផងដែរ៕

The post ស្រួង ភាវី អះអាង​ រាល់សកម្មភាពជួយ​ជាតិ​និងប្រជាជន កើតចេញពីបេះដូងក្នុងនាមជាខ្មែរ appeared first on Kampuchea Thmey Daily.

ពិធី​បំពាក់​គ្រឿង​ឥស្សរិយយស​នេះ បាន​ធ្វើឡើង​នៅ​រសៀល​ថ្ងៃទី​២៩​ ខែឧសភា​ ឆ្នាំ​២០២៣ ​ក្រោម​អធិបតីភាព​លោក​សាស្ត្រាចារ្យ ម៉ម ប៊ុនហេង រដ្ឋមន្ត្រីក្រសួង​សុខាភិបាល​និង​ជា​ប្រធាន​ក្រុមប្រឹក្សាភិបាល នៃ​សាកលវិទ្យាល័យ​វិទ្យាសាស្ត្រ​សុខាភិបាល។

លោក​សាស្ត្រាចារ្យ សា​ផុន វឌ្ឍនៈ​ទីប្រឹក្សា​ក្រសួងសុខាភិបាល​និង​ជា​សកលវិទ្យាធិការ​សាកល​វិទ្យាល័យ​វិទ្យាសាស្ត្រ​សុខាភិបាល បាន​មានប្រសាសន៍ថា ​លោក​បណ្ឌិត Olivier Segeral បាន​សិក្សា និង​ទទួលបាន​សញ្ញាប័ត្រ ជាច្រើន​។​ ចាប់​តាំង​ពី​ឆ្នាំ​១៩៩៩ មក លោក​បណ្ឌិត បានចាប់ផ្តើម​អនុវត្ត​ការងារ ស្រាវជ្រាវ ដែល​ការងារ​ស្រាវជ្រាវ​ជា​ចម្បង​របស់​គាត់ ផ្តោតលើ ជំងឺឆ្លង រូ​ម​មាន Ebola virus, HIV, Hepatitis, HPV និង​ជំងឺ​ឱកាសនិយម​ផ្សេងៗ​ទៀត​។

លោក​សាស្ត្រាចារ្យ​បាន​បន្ត​ថា ​តាមរយៈ​កិច្ចសហប្រតិបត្តិការ រវាង សាកលវិទ្យាល័យ​វិទ្យាសាស្ត្រ​សុខាភិបាល និង Agence Nationale de Recherche sur le sida et les hepatites virales (ANRS) នៅ​ឆ្នាំ​២០១៥ លោក​បណ្ឌិត Olivier Segeral បានមក បំរើកា​រងារ នៅ​សាកលវិទ្យាល័យ​វិទ្យាសាស្ត្រ​សុខាភិបាល ក្នុងតួនាទី​ជា អ្នកជំនាញការ​បច្ចេក​ទេស​អន្តរជាតិ​។

ក្នុង​តួនាទី​នេះ​ហើយ ដែល​លោក​បណ្ឌិត បាន​ចូលរួមចំណែក​យ៉ាងសំខាន់ ក្នុង ការបណ្ដុះបណ្តាល និង​ស្រាវជ្រាវ នៅ​សាកលវិទ្យាល័យ​វិទ្យាសាស្ត្រ​សុខាភិបាល​។ លោក​បណ្ឌិត បាន​ជួយ សម្របសម្រួល​ភាពជា​ដៃគូ និង​បណ្តាញ​ស្រាវជ្រាវ រវាង​សាកលវិទ្យាល័យ វិទ្យាសាស្ត្រ​សុខាភិបាល ជាមួយ​ស្ថាប័ន​ស្រាវជ្រាវ​ផ្សេងៗ ទាំង​ក្នុង​និង​ក្រៅប្រទេស ព្រមទាំង​បាន​ជួយ​សម្របសម្រួល ជាមួយ​ស្ថាប័ន​ផ្តល់ជំនួយ​នានា​។

សម្របសម្រួល​ដល់​ការអភិវឌ្ឍ​វិធីសាស្ត្រ​ស្រាវជ្រាវ និង​ដំណើរការ​អនុវត្ត​គម្រោង ស្រាវជ្រាវ​នានា ដែល​រួមមាន​លើក​សំណើ​គម្រោង​ស្រាវជ្រាវ​ស្នើសុំ​ថវិកា​ចំនួន ១១ សំណើ​គម្រោង និង​ទទួលបាន​ការគាំទ្រ​ថវិកា​ពី​ANRS ចំនួន ១០ គម្រោង សរុប​ជា​ទឹកប្រាក់​ជាង ២ លាន​អឺរ៉ូ​។

ទន្ទឹម​នឹង​នេះ លោក​បណ្ឌិត បាន​បណ្តុះបណ្តាល និង​ដឹកនាំ និក្ខេបបទ​ដល់​និស្សិត និង​បុគ្គលិក នៃ​សាកល វិទ្យាល័យ​វិទ្យាសាស្ត្រ​សុខាភិបាល អំពី​វិធីសាស្ត្រ​នៃ​ការស្រាវជ្រាវ និង​របៀប​សរសេរ គម្រោង​ស្រាវជ្រាវ បាន​ជាង ១០០​នាក់​និង​បាន​គាំទ្រ​ដល់​ការផ្សព្វផ្សាយ​លទ្ធផល​សិក្សា​ស្រាវជ្រាវ ចំនួន ២០ បទ​បង្ហាញ​។

លោក​សាស្ត្រាចារ្យ​បាន​បន្ត​ទៀត​ថា ​លោក​បណ្ឌិត Olivier : Segeral បានបញ្ចប់​បេសកកម្ម​របស់លោក នៅ​សាកលវិទ្យាល័យ វិទ្យាសាស្ត្រ​សុខាភិបាល ក្នុង​ឆ្នាំ​២០២២ និង​បច្ចុប្បន្នកំពុង​បម្រើការ​ងារ​ជា​អ្នកស្រាវជ្រាវ នៅ​មន្ទីរពេទ្យ សាកលវិទ្យាល័យ Geneva ប្រទេស​ស្វី​ស​។

​លោក សាស្ត្រាចារ្យ​សូម​ថ្លែងអំណរគុណ​ដល់​លោក​បណ្ឌិត Oivier Segeral ដែល​បាន​ជួយ សាកលវិទ្យាល័យ​វិទ្យាសាស្ត្រ​សុខាភិបាល​កន្លងមក និង​ទទួល​បាន​លទ្ធផល​ដ៏​ល្អ​និង​សូម​សំដែង​ការ​អបអរសាទរ​ដោយ​ស្មោះ ចំពោះ​លោក​បណ្ឌិត ដែល​បានការ​ទទួលស្គាល់​ស្នាដៃ ពី​រាជរដ្ឋាភិបាល នៃ​ព្រះរាជាណាចក្រ​កម្ពុជា ដោយ​រាជរដ្ឋាភិបាល​បានសម្រេច​ផ្តល់ជូន​លោក​បណ្ឌិត នូវ​គ្រឿង​ឥស្សរិយយស មេដាយ​សហ​មេត្រី​។

លោក សាស្ត្រាចារ្យ ម៉ម ប៊ុនហេង រដ្ឋមន្ត្រី​ក្រសួងសុខាភិបាល​បាន​សម្តែង​នូវ​ការកោតសរសើរ​ដោយស្មោះ​ដល់​លោក​បណ្ឌិត Olivier. Segeral ដែល​បាន​ខិតខំ​លើកស្ទួយ​កិច្ចការ​ស្រាវជ្រាវ​នៅ​សាកលវិទ្យាល័យ​វិទ្យាសាស្ត្រ​សុខាភិបាល ព្រមទាំង​បាន​ចូលរួម​បណ្តុះបណ្តាល ដឹកនាំ​និក្ខេបបទ អំពី​វិធីសាស្ត្រ​នៃ​ការស្រាវជ្រាវ និង​របៀប​សរសេរ​គ​ម្រោ​ង​ស្រាវជ្រាវ​ដល់​និស្សិត​និង​បុគ្គលិក​សាកលវិទ្យាល័យ​វិទ្យាសាស្ត្រ​សុខាភិបាល ក្នុង​រយៈពេល​កន្លងមក​។

ជា​មួយ​គ្នា​នេះ​ដែរ លោក​រដ្ឋមន្ត្រី​បាន​ថ្លែងអំណរគុណ​ដល់​ស្ថានទូត​បារាំង ប្រចាំ​កម្ពុជា ដែល​បាន​ជួយ សម្របសម្រួល​ផ្តល់​នូវ​អ្នកជំនាញការ​បច្ចេកទេស​អន្តរជាតិ ជូន​សាកលវិទ្យាល័យ​វិទ្យាសាស្ត្រ​សុខា​ភិ បាល ដើម្បី​គាំទ្រ អនុវត្ត​ការងារ​ស្រាវជ្រាវ​និង​ជួយ​បណ្តុះបណ្តាល​មន្ត្រី បុគ្គលិក និស្សិត​របស់​សាកល វិទ្យាល័យ​វិទ្យាសាស្ត្រ​សុខាភិបាល​។ ខ្ញុំ​ក៏​សូម​ថ្លែងអំណរគុណ​ដល់ អង្គការ ANRS ដែល​បាន​ជួយ ឧបត្ថម្ភ គាំទ្រ​គម្រោង​សិក្សា​ស្រាវជ្រាវ​នានា នៅ​សាកលវិទ្យាល័យ​វិទ្យាសាស្ត្រ​សុខាភិបាល​។

លោក​រដ្ឋមន្ត្រី​បាន​មានប្រសាសន៍ថា​« ខ្ញុំ​សូម​វាយតម្លៃ​ខ្ពស់​ចំពោះ កិច្ចសហប្រតិបត្តិការ​ប្រកបដោយ​ផ្លែផ្កា​ទាំងនេះ និង​ជាពិសេស ចំពោះ​កិច្ចខិតខំ​ប្រឹងប្រែង​រប​ស់ លោក​បណ្ឌិត Olivier Segeral. នាពេល​កន្លងមក​។ ខ្ញុំ​សង្ឃឹមថា លោក​បណ្ឌិត​នឹង​បន្ត​ជួយ​សាកលវិទ្យាល័យ​វិទ្យាសាស្ត្រ​សុខាភិបាល​បន្តទៀត ទោះ​លោក​បណ្ឌិត បានបញ្ចប់​អាណត្តិ​ការងារ​របស់ខ្លួន​នៅ​សាកលវិទ្យាល័យ​វិទ្យាសាស្ត្រ​សុខាភិបាល រួចហើយ​ក្ដី​»​។

​លោក​រដ្ឋមន្ត្រី​បាន​បន្ត​ថា ​ដើម្បី​ជា​សក្ខីភាព នៃ​ការដឹងគុណ​ចំពោះ​ការខិតខំ​ប្រឹងប្រែង​រប​ស់លោក​បណ្ឌិត រាជរដ្ឋាភិបាល​កម្ពុជា សម្រេច​ផ្តល់ជូន​នូវ​គ្រឿង​ឥស្ស​វ័យ​យស រម​ដោយ​សហ​មេត្រី ថ្នាក់​ធិបឌិន្ទ។

​លោក​រដ្ឋមន្ត្រី​បាន​បន្តទៀតថា​« ដើម្បី​បង្កើន​គុណភាព នៃ​ការផ្តល់សេវា​ពិនិត្យ និង​ព្យាបាល​ជំងឺ​ជូន​ប្រជាពលរដ្ឋ​ប្រកបដោយប្រសិទ្ធភាព រាជរដ្ឋាភិបាល​កម្ពុជា ក្រោម​ការដឹកនាំ​ដ៏​ឈ្លាសវៃ និង​ប្រកបដោយ​គតិបណ្ឌិត​រប​ស់ សម្តេច អគ្គមហាសេនាបតី​តេ​ជោ ហ៊ុន សែន នាយករដ្ឋមន្ត្រី នៃ​ព្រះរាជាណាចក្រ​កម្ពុជា គាំទ្រ​យ៉ាង ពេញទំហឹង ដោយ​ផ្តល់​អាទិភាព​ខ្ពស់​ដល់​វិស័យ​សុខាភិបាល ជាពិសេស​ការបណ្តុះបណ្តាល​ធនធាន មនុស្ស ប្រកបដោយ​សមត្ថភាព ដែល​នេះ​នឹង​នាំមក​នូវ​ភាពរឹងមាំ នៃ​ការអភិវឌ្ឍ​សេដ្ឋកិច្ចជាតិ​»​។

​លោក​រដ្ឋមន្ត្រី​បាន​បន្តថា​ លើ​មូលដ្ឋាន​នេះ ក្រសួងសុខាភិបាល​លើកទឹកចិត្ត​ឱ្យ​សាស្ត្រាចារ្យ និស្សិត​សាកលវិទ្យាល័យ វិទ្យាសាស្ត្រ​សុខាភិបាល ខិតខំ​ធ្វើការ​សិក្សា​ស្រាវជ្រាវ​ជាប្រចាំ ដើម្បី​សម្រួច​ទាំង​ចំណេះដឹង ទ្រឹស្ដី និង​ការអនុវត្ត​ជាក់ស្ដែង ឱ្យ​កាន់តែ​ប្រសើរឡើង សំដៅ​បង្កើន​ប្រសិទ្ធភាព​ក្នុង​ការផ្តល់សេវា​សុខាភិបាល ជូន​ប្រជាពលរដ្ឋ​។ ក្រសួងសុខាភិបាល​តែងតែ​ជំរុញ​កិច្ចសហប្រតិបត្តិការ​និង​លើកកម្ពស់​ភាពជា​ដៃគូ រវាង​រាជរដ្ឋាភិបាល​កម្ពុជា និង​ដៃគូ​អភិវឌ្ឍ​ទាំងអស់ ដើម្បី​ពង្រឹង​ការងារ​បណ្តុះបណ្តាល និង​ការងារ ស្រាវជ្រាវ​ក្នុង​វិស័យ​សុខាភិបាល​៕

ដោយ ៖ សំអឿន

The post រាជរដ្ឋាភិបាល​កម្ពុជា​ បំពាក់​គ្រឿង​ឥស្សរិយយស មេដាយ​សហ​មេត្រី ថ្នាក់​ធិ​ប​ឌិ​ន្ទ​ជូន​អ្នកជំនាញការ​បច្ចេកទេស​អន្តរជាតិ បារាំង appeared first on Kampuchea Thmey Daily.