គ្រោះថ្នាក់ចរាចរណ៍ Archives - Kampuchea Thmey Daily

នគរបាលរាជធានី អំពាវនាវដល់ពលរដ្ឋគោរពច្បាប់ចរាចរណ៍ ខណៈគ្រោះថ្នាក់បាត់បង់អាយុជីវិតមានរាល់ថ្ងៃ

Ung Meng — Tue, 02 Jun 2026 07:45:00 +0000

លោកឧត្តមសេនីយ៍ទោ ហេង រតនា ស្នងការរងផែនការងារនគរបាលចរាចរណ៍ នៃ ស្នងការដ្ឋាននគរបាលរាជធានីភ្នំពេញ បានឲ្យដឹងថា ក្នុងមួយរយៈពេលក្រោយមកនេះ ស្របពេលដែលថ្នាក់ដឹកនាំក្រសួងមហាផ្ទៃ បានសម្រេចឲ្យផ្អាកការអនុវត្តច្បាប់ចរាចរណ៍ នៅពេលថ្ងៃមកមានការកត់សម្គាល់ ឃើញថាប្រជាពលរដ្ឋមួយចំនួនតូចបាន នឹងកំពុងបន្តការមិនទាន់ចូលរួមគោរពច្បាប់នៅឡើយ ដែលជាហេតុនាំឲ្យមានការកកស្ទះពិសេសអាច បង្កើតមាននូវគ្រោះថ្នាក់បានគ្រប់ពេល។

លោកឧត្តមសេនីយ៍ទោ ហេង រតនា ស្នងការរងផែនការងារនគរបាលចរាចរណ៍

លោកឧត្តមសេនីយ៍ទោស្នងការរងបន្ថែមថា ៖ កត្តាគ្រោះថ្នាក់ចរាចរណ៍ គឺ ជាក្តីកង្វល់និងចាំបាច់ត្រូវព្រួយបារម្ភ ដើម្បីទប់ស្កាត់ឲ្យបានខ្ពស់ ពិសេសនោះក្នុងនាមនគរបាលជំនាញ គឺ មិនត្រូវបណ្តែតបណ្តោយនោះឡើយ។

លោកស្នងការរងបានសង្កត់ធ្ងន់ថា សកម្មភាពពលរដ្ឋនៅតែដដែល មិនកែចរិកសោះ ស្តាប់តែពេលណែនាំ ណែនាំហើយដដែលមិនកែ ចាប់យកម៉ូតូទុកមួយខែបានរាងមើលទៅ បើមិនគិតគ្រោះថ្នាក់ខ្លួនអែង ត្រូវចេះគិតគ្រោះថ្នាក់ដល់គេផ្សេងផង ដោយរាល់មានអ្នកស្លាប់រាល់ថ្ងៃ គ្មានថ្ងៃណាមិនស្លាប់ដោយសារគ្រោះថ្នាក់ចរាចរណ៍ ប៉ូលីសណែនាំឡើងចង់អស់ខ្យល់ហើយ ពេលខ្លះជេទាំងប៉ូលីសទៀតក៏មានហួសចិត្ត។

បើទោះបីជាច្បាប់ត្រូវបានផ្អាកការអនុវត្តក៏ពិតមែន ក៏ប៉ុន្តែក្រុមយុវជននិងជាពលរដ្ឋ ក្នុងសង្គមបង្ហាញការបន្តចូលរួមគោរពច្បាប់ចរាចរណ៍ឲ្យបានត្រឹមត្រូវ ដើម្បីការពារអាយុជីវិតខ្លួនឯង និង ដើម្បីសុខសុវត្ថិភាពលើដងផ្លូវសាធារណៈផងដែរ។

ក្រុមយុវជននិងជាពលរដ្ឋ

គួរបញ្ជាក់ថា៖បច្ចុប្បន្ននេះកម្លាំងនគរបាលជំនាញផែនចរាចរណ៍នៅក្នុងក្របខណ្ឌទីទាំងរាជធានីភ្នំពេញតែងតែបង្កើនការយកចិត្តទុកដាក់ក្នុងការផ្សព្វផ្សាយតាមបណ្តាញសង្គមនិងចុះអប់រំណែនាំពីច្បាប់ចរាចរណ៍ដល់ពលរដ្ឋដើម្បីជាការបញ្ចៀបការយល់ដឹងឲ្យបានទូលំទូលាយនិងដើម្បីឲ្យពួកគាត់ចូលរួមគោរពច្បាប់ដើម្បីកាត់បន្ថយគ្រោះថ្នាក់ជាអតិបរិមា៕អត្ថបទ៖សុភា

The post នគរបាលរាជធានី អំពាវនាវដល់ពលរដ្ឋគោរពច្បាប់ចរាចរណ៍ ខណៈគ្រោះថ្នាក់បាត់បង់អាយុជីវិតមានរាល់ថ្ងៃ appeared first on Kampuchea Thmey Daily.

រយៈពេល ១១ ខែ មានកម្មករ-និយោជិត ជួបគ្រោះថ្នាក់ចរាចរណ៍ជាង ៥ ពាន់ករណី ស្លាប់ និងរបួសជាង ៦ ពាន់នាក់

អ៊ិន ពិសី — Wed, 03 Dec 2025 02:34:48 +0000

ក្នុងរយៈពេល ១១ ខែ ឆ្នាំ ២០២៥ នេះ មានកម្មករ-និយោជិត ជួបគ្រោះថ្នាក់ចរាចរណ៍នៅទូទាំងប្រទេសជាង ៥ ពាន់ករណី ដោយមានមនុស្សស្លាប់ និងរបួសជាង ៦ ពាន់នាក់ កើនឡើងជាង ៦%។

លោកបណ្ឌិត ហេង សុផាន់ណារិទ្ធ អគ្គនាយករង ប.ស.ស និងជាអ្នកនាំពាក្យក្រសួងការងារ និងបណ្ដុះបណ្ដាលវិជ្ជាជីវៈ បានមានប្រសាសន៍កាលពីរសៀលថ្ងៃទី ២ ធ្នូ នេះថា រយៈពេល ១១ ខែ ឆ្នាំ ២០២៥ នេះ នៅទូទាំងប្រទេសកម្ពុជា មានកម្មករ-និយោជិត ជួបករណីគ្រោះថ្នាក់ចរាចរណ៍ចំនួន ៥,១៣៩ ករណី មានជនរងគ្រោះសរុបចំនួន ៦,០៤៩ នាក់ ស្លាប់ចំនួន ១៣៥ នាក់ របួសធ្ងន់ចំនួន ១,៦៧១ នាក់ និងរបួសស្រាលចំនួន ៤,២៤៣ នាក់ បើធៀបនឹងរយៈពេល ១១ ខែ ឆ្នាំ ២០២៤ មានការកើនឡើងចំនួន ៣២៥ ករណី ប្រមាណ ៦.៧៥% ខណៈ ១១ ខែ ឆ្នាំ ២០២៤ មានករណីគ្រោះថ្នាក់ចរាចរណ៍លើកម្មករ-និយោជិតចំនួន ៤,៨១៤ ករណី ប៉ុណ្ណោះ។

លោកបណ្ឌិត ហេង សុផាន់ណារិទ្ធ បានបញ្ជាក់ថា ក្នុងចំណោមគ្រោះថ្នាក់ខាងលើ ក្នុងនោះ ករណីគ្រោះថ្នាក់ចរាចរណ៍លើរថយន្តដឹកកម្មករ-និយោជិត មានចំនួន ១០ ករណី មានជនរងគ្រោះសរុបចំនួន ១៧៤ នាក់ ស្លាប់ចំនួន ២ នាក់ របួសធ្ងន់ចំនួន ២១ នាក់ និងរបួសស្រាលចំនួន ១៥១ នាក់ បើធៀបនឹងរយៈពេល ១១ ខែ ឆ្នាំ ២០២៤ ករណីគ្រោះថ្នាក់ចរាចរណ៍លើរថយន្តដឹកកម្មករ-និយោជិត មាន ១២ ករណី ថយចុះ ២ ករណី ស្មើនឹងប្រមាណ ១៧%។

លោកបណ្ឌិត បានពន្យល់ថា មូលហេតុចម្បងៗ ដែលបណ្តាលឱ្យមានគ្រោះថ្នាក់ចរាចរណ៍រួមមាន ការបើកបរលើសល្បឿនកំណត់ ការមិនគោរពសិទ្ធិអាទិភាព ការមិនប្រកាន់ស្តាំ(បញ្ច្រាសទិស) ការបត់ខ្វះការប្រុងប្រយ័ត្ន ការជែងក្នុងស្ថានភាពគ្រោះថ្នាក់ កត្តាផ្លូវ និងលក្ខណៈបច្ចេកទេសយានយន្ត និងកត្តាផ្សេងៗ។

លោកបណ្ឌិត បានធ្វើការអំពាវនាវដល់កម្មករ-និយោជិត ទាំងអស់ មេត្តាបង្កើនការប្រុងប្រយ័ត្នឱ្យបានខ្ពស់ក្នុងការធ្វើដំណើរ ទាំងអ្នកធ្វើដំណើរដោយម៉ូតូ និងទាំងអ្នកធ្វើដំណើរដោយរថយន្តដឹកកម្មករ-និយោជិត ត្រូវគោរពច្បាប់ស្ដីពីចរាចរណ៍ផ្លូវគោក ដើម្បីជៀសវាងករណីគ្រោះថ្នាក់ជាយថាហេតុ និងក្រើនរំលឹកទៅកាន់អ្នកបើកបររថយន្តដឹកកម្មករ-និយោជិត ទាំងអស់ ត្រូវមានស្មារតីទទួលខុសត្រូវខ្ពស់ និងយកចិត្តទុកដាក់រាល់ពេលបើកបរផងដែរ៕

អត្ថបទ ៖ សំអឿន

The post រយៈពេល ១១ ខែ មានកម្មករ-និយោជិត ជួបគ្រោះថ្នាក់ចរាចរណ៍ជាង ៥ ពាន់ករណី ស្លាប់ និងរបួសជាង ៦ ពាន់នាក់ appeared first on Kampuchea Thmey Daily.

រដ្ឋមន្ត្រីមហាផ្ទៃ លើកឡើងពីកង្វះការប្រុងប្រយ័ត្នរបស់អ្នកបើកបរ នៅពេលផ្លូវកាន់ល្អស្អាត

Thoeun Vansong — Thu, 13 Nov 2025 07:23:17 +0000

ពេលផ្លូវកាន់តែងាយស្រួលធ្វើដំណើរ អ្នកបើកបរកាន់តែខ្វះការប្រុងប្រយ័ត្ន និងមិនគោរពច្បាប់។ នេះជាការកត់សម្គាល់របស់រដ្ឋមន្ត្រីក្រសួងមហាផ្ទៃ លោក ស សុខា ដែលក្នុងន័យនេះ លោកនៅតែទទូចសុំដល់អ្នកដំណើរទាំងអស់បន្តចូលរួមគោរពច្បាប់ចរាចរណ៍ និងប្រុងប្រយ័ត្នពេលបើកបរតាមដងផ្លូវ។

ការលើកឡើងដូច្នេះរបស់រដ្ឋមន្ត្រីក្រសួងមហាផ្ទៃ គឺបានធ្វើឡើងក្នុងពិធីសម្ពោធដាក់ឱ្យប្រើប្រាស់ជាផ្លូវការនូវកំណាត់ផ្លូវបេតុង ពីភូមិច្រាំងទទឹង ឃុំព្រែកអន្ទះ ដល់ភូមិយាយសល់ ឃុំពោធិ៍រៀង ស្រុកពោធិ៍រៀង ខេត្តព្រៃវែង កាលពីថ្ងៃទី១២ ខែវិច្ឆិកា ឆ្នាំ២០២៥។

លោក ស សុខា ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ បានគូសបញ្ជាក់ពីសារៈសំខាន់នៃសមិទ្ធផលជាផ្លូវបេតុងនេះ ដែលបានតភ្ជាប់ និងកាន់តែបង្កើនភាពងាយស្រួលសម្រាប់ប្រជាពលរដ្ឋធ្វើដំណើរក្នុងជីវភាពប្រចាំថ្ងៃ រួមទាំងអ្នកដំណើរទៅមករាជធានីភ្នំពេញ និងក្រុងព្រៃវែង។

ភ្ជាប់ទៅនឹងការសាទរចំពោះសមិទ្ធផលថ្មីនេះ លោក ស សុខា ដែលជាប្រធានគណៈកម្មាធិការជាតិសុវត្ថិភាពចរាចរណ៍ផ្លូវគោកផងនោះ បានអំពាវនាវយ៉ាងទទូចទៅកាន់ប្រជាពលរដ្ឋក្នុងស្រុកពោធិ៍រៀង និយាយដោយឡែក និងនិយាយជារួមសម្រាប់អ្នកដំណើរទូទៅឱ្យបើកបរដោយការគោរពច្បាប់ចរាចរណ៍ និងបង្កើនការប្រុងប្រយ័ត្នគ្រប់ពេលវេលាខណៈករណីគ្រោះថ្នាក់ចរាចរណ៍នឹងបន្តកើតមានឡើង នៅពេលដែលមានផ្លូវងាយស្រួលធ្វើដំណើរបែបនេះ។

ចេញពីបញ្ហាចរាចរណ៍ រដ្ឋមន្ត្រីក្រសួងមហាផ្ទៃរូបនេះ ក៏បានណែនាំដល់អាជ្ញាធរគ្រប់ជាន់ថ្នាក់ឱ្យបង្កើនការរឹតបន្តឹងវិធានការបង្ក្រាបក្រុមក្មេងទំនើងដោយគ្មានលើកលែង ពោលគឺត្រូវឃាត់ខ្លួន និងកសាងសំណុំរឿងបញ្ជូនទៅស្ថាប័នតុលាការ។ ចំណែក វិធានការបង្ការបញ្ហានេះ ប្រមុខក្រសួងមហាផ្ទៃ ក៏បានគូសបញ្ជាក់ពីភាពចាំបាច់នៃការចូលរួមពីនាយកសាលា លោកគ្រូអ្នកគ្រូ ជាពិសេសអាណាព្យាបាល៕

The post រដ្ឋមន្ត្រីមហាផ្ទៃ លើកឡើងពីកង្វះការប្រុងប្រយ័ត្នរបស់អ្នកបើកបរ នៅពេលផ្លូវកាន់ល្អស្អាត appeared first on Kampuchea Thmey Daily.

បុរសម្នាក់ ជិះម៉ូតូបុកបង្គោលស្លាកសញ្ញាចរាចរណ៍ស្លាប់ភ្លាមៗ នៅខណ្ឌកំបូល

អ៊ិន ពិសី — Tue, 29 Jul 2025 01:00:00 +0000

បុរសម្នាក់ បានស្លាប់ភ្លាមៗ នៅទីតាំងកើតហេតុ បន្ទាប់ពីជិះម៉ូតូក្នុងល្បឿនលឿន និងបាត់បង់ការគ្រប់គ្រង បង្កឲ្យបុកបង្គោលស្លាកសញ្ញាចរាចរណ៍។

ហេតុការណ៍គ្រោះថ្នាក់ចរាចរណ៍នេះ បានកើតឡើងកាលពីវេលាម៉ោង ១ និង ៣០ នាទីរំលងអធ្រាត្រ ឈានចូលថ្ងៃទី ២៩ ខែកក្កដា ឆ្នាំ ២០២៥ ស្ថិតនៅតាមបណ្ដោយផ្លូវជាតិលេខ ៣ ចំណុចភូមិតាំងរនាម សង្កាត់ប្រទះឡាង ខណ្ឌកំបូល រាជធានីភ្នំពេញ។

ជនរងគ្រោះឈ្មោះ ច្រឹម រដ្ឋា ភេទប្រុស អាយុ ៣០ ឆ្នាំ មានទីលំនៅបច្ចុប្បន្ននៅសង្កាត់ប្រទះឡាង ខណ្ឌកំបូល រាជធានីភ្នំពេញ និងមានស្រុកកំណើតនៅស្រុកស្ទោង ខេត្តកំពង់ធំ។

តាមសមត្ថកិច្ចនៅកន្លែងកើតហេតុ បានឲ្យដឹងថា មុនពេលកើតហេតុ ជនរងគ្រោះបានជិះម៉ូតូម៉ាក Honda Beat ពណ៌ស ស្លាកលេខ ភ្នំពេញ 1JK-7789 ធ្វើដំណើរទៅទិសត្បូង តាមបណ្តោយផ្លូវជាតិលេខ ៣ ក្នុងល្បឿនលឿន។ លុះដល់ចំណុចកើតហេតុ គាត់បានរេចង្កូតទៅផ្នែកខាងស្ដាំ និងជ្រុលធ្លាក់ផ្លូវ បុកនឹងបង្គោលស្លាកសញ្ញាចរាចរណ៍យ៉ាងខ្លាំង បណ្ដាលឲ្យក្បាលបែក ហូរឈាម ស្លាប់ភ្លាមៗ នៅទីនោះ។

ចំពោះម៉ូតូរងការខូចខាតផ្នែកខាងស្ដាំ ដោយបន្ទាប់មក ប្រជាពលរដ្ឋដែលធ្វើដំណើរតាមផ្លូវបានឃើញហេតុការណ៍ ក៏រាយការណ៍ទៅសមត្ថកិច្ចមូលដ្ឋានឲ្យចុះមកពិនិត្យ។

បច្ចុប្បន្ន សពជនរងគ្រោះ ត្រូវបានសមត្ថកិច្ចផ្នែកជំនាញចរាចរណ៍ធ្វើឯកសារប្រគល់ជូនសាច់ញាតិ ដឹកយកទៅធ្វើបុណ្យតាមប្រពៃណីនៅស្រុកកំណើត ខណៈម៉ូតូត្រូវបានយកទៅរក្សាទុកនៅការិយាល័យចរាចរណ៍ផ្លូវគោក ដើម្បីបន្តនីតិវិធី៕

អត្ថបទ ៖ សំណាង

The post បុរសម្នាក់ ជិះម៉ូតូបុកបង្គោលស្លាកសញ្ញាចរាចរណ៍ស្លាប់ភ្លាមៗ នៅខណ្ឌកំបូល appeared first on Kampuchea Thmey Daily.

បុគ្គលបើកបរមិនប្រុងប្រយ័ត្ន ស្ថិតក្រោមស្ថានភាពស្រវឹង បង្កគ្រោះថ្នាក់ចរាចរណ៍ឱ្យស្លាប់អ្នកដទៃ មានទោសបែបណា?

អុន ស្រីមាន — Fri, 16 May 2025 03:28:58 +0000

គ្រោះថ្នាក់ចរាចរណ៍ នៅតែជាបញ្ហាមួយគួរឱ្យព្រួយបារម្ភសម្រាប់ប្រជាជនខ្មែរ ដែលឆក់យកអាយុជីវិតមនុស្សចន្លោះ ៤ ទៅ៥នាក់ ក្នុងមួយថ្ងៃៗ ដោយសារកត្តាបើកបរមិនគោរពច្បាប់ បើកបរក្រោមឥទ្ធិពលគ្រឿងស្រវឹង កត្តាផ្លូវថ្នល់ និងកត្តាផ្សេងៗទៀត។ ជាក់ស្តែង កាលពីថ្ងៃទី១៥ ខែឧសភា មានគ្រោះថ្នាក់ចរាចរណ៍មួយបង្កឡើងដោយមន្ត្រីប៉ូលិសម្នាក់បើកបរក្រោមស្ថានភាពស្រវឹង បានបើករថយន្តបុករះម៉ូតូកង់បី ៣គ្រឿង ម៉ូតូ១គ្រឿង និងរថយន្ត១គ្រឿង បណ្តាលឱ្យបុរសបើកកង់បីម្នាក់ស្លាប់ និងរងរបួសធ្ងន់ ស្រាល៥នាក់ នៅមុខក្រសួងមហាផ្ទៃ។

ក្រឡេកមកមើលច្បាប់ស្តីពីចរាចរណ៍ផ្លូវគោកវិញ តើ បុគ្គលដែលបើកបរដោយមិនមានការប្រុងប្រយ័ត្ន ស្ថិតក្នុងស្ថានភាពស្រវឹង ដែលបង្កគ្រោះថ្នាក់ដល់អ្នកដទៃ ធ្វើឱ្យស្លាប់ ឬរបួស ត្រូវមានទោសបែបណា? បើតាមច្បាប់ស្តីពីចរាចរណ៍ផ្លូវគោក ដែលធ្វើវិសោធនកម្មថ្ងៃទី២៦ ខែមករា ឆ្នាំ២០១៧ មាត្រា ៨៥ បានបញ្ជាក់ថា ជនណាបើកបរដោយធ្វេសប្រហែស ខ្ជីខ្ជា មិនប្រុងប្រយ័ត្ន ឬមិនគោរពកាតព្វកិច្ចដែលបទប្បញ្ញាត្តិស្តីពីចរាចរណ៍ផ្លូវគោកតម្រូវបណ្តាលឱ្យស្លាប់អ្នកដទៃ ត្រូវផ្តន្ទាទោសដាក់ពន្ធនាគារពី១ឆ្នាំ ទៅ៣ឆ្នាំ និងពិន័យជាទឹកប្រាក់ ៤លានរៀល ទៅ១៥លានរៀល និងអាចត្រូវផ្តន្ទាទោសដោយទោសបន្ថែមមួយ ឬច្រើន ដូចមានចែងក្នុងមាត្រា៥៣ (ប្រភេទនៃទោសបន្ថែម) នៃក្រមព្រហ្មទណ្ឌ។

ជាមួយគ្នានេះ អំពើល្មើសខាងលើ ត្រូវផ្តន្ទាទោសដាក់ពន្ធនាគារពី ២ឆ្នាំ ទៅ៥ឆ្នាំ និងពិន័យប្រាក់ពី ១០លានរៀល ទៅ២៥លានរៀល កាលបើអំពើទាំងនេះប្រព្រឹត្តក្នុងករណីណាមួយដូចខាងក្រោម៖

ក.បើកបរដោយគ្មានបណ្ណបើកបរ ឬមានបណ្ណបើកបរ តែមិនត្រឹមត្រូវតាមប្រភេទយានយន្ត។

ខ.ស្ថិតក្នុងស្ថានភាពស្រវឹងដោយមានអត្រាជាតិអាកុលចាប់ពី ០,៤០មីលីក្រាមក្នុងមួយលីត្រខ្យល់ ឬចាប់ពី ០,៨០ក្រាមក្នុងមួយលីត្រឈាមឡើងទៅ។

គ.បណ្តាលឱ្យមានស្លាប់មនុស្សច្រើននាក់។

ឃ.រត់គេចពីកន្លែងកើតហេតុ ក្នុងគោលបំណងគេចវេសពីការទទួលខុសត្រូវ។

ចំពោះបទល្មើសដែលមានចែងក្នុងមាត្រានេះ ទោសបន្ថែមដូចតទៅនេះអាចត្រូវបានប្រកាស៖

១.ការហាមឃាត់ចំពោះការប្រកបវិជ្ជាជីវៈ កាលបើបទល្មើសនេះបានប្រព្រឹត្តនៅក្នុងការប្រកបវិជ្ជាជីវៈ ឬនៅក្នុងឱកាសនៃការប្រកបវិជ្ជាជីវៈនៃការប្រកបវិជ្ជាជីវៈនេះចាស្ថាពរ ឬសម្រាប់រយៈពេល ៥ឆ្នាំ។

២.ការហាមឃាត់ចំពោះការបើកយានយន្ត ទោះបីជាប្រភេទណាក៏ដោយ រយៈពេល ៥ឆ្នាំ យ៉ាងច្រើន។

៣.ការព្យួរលិខិតបើកបររយៈពេល ៥ឆ្នាំ យ៉ាងច្រើន។

៤.ការបិទផ្សាយសេចក្តីសម្រេចផ្តន្ទាទោស សម្រាប់រយៈពេល ២ខែ យ៉ាងច្រើន។

៥.ការផ្សាយសេចក្តីសម្រេចផ្តន្ទាទោសក្នុងសារព័ត៌មាន។

៦.ការផ្សាយសេចក្តីសម្រេចផ្តន្ទាទោស តាមគ្រប់មធ្យោបាយទូរគមនាគមន៍ សោតទស្សន៍ រយៈពេល ៨ខែ យ៉ាងច្រើន៕

The post បុគ្គលបើកបរមិនប្រុងប្រយ័ត្ន ស្ថិតក្រោមស្ថានភាពស្រវឹង បង្កគ្រោះថ្នាក់ចរាចរណ៍ឱ្យស្លាប់អ្នកដទៃ មានទោសបែបណា? appeared first on Kampuchea Thmey Daily.

របួស១៤នាក់ ក្នុងហេតុការណ៍រថយន្តដឹកនិស្សិតកសិកម្មចុះកម្មសិក្សានៅមណ្ឌលគិរី ជួបគ្រោះថ្នាក់ចរាចរណ៍

Ngoeul Narath — Fri, 07 Feb 2025 09:21:03 +0000

រថយន្តក្រុងដឹកមនុស្ស ប្រុសស្រីចំនួន៤៦នាក់ បានជួបគ្រោះថ្នាក់ចរាចរណ៍ដោយខ្លួនឯងពេលកំពុងធ្វើដំណើរចុះចំណោតកែងខ្លាំង។ ហេតុការណ៍បានកើតឡើងនៅវេលាម៉ោងជាង៩ព្រឹកថ្ងៃទី៧ខែកុម្ភៈឆ្នាំ២០២៥ ស្ថិតក្នុងភូមិសាស្ត្រ សង្កាត់រមនា ក្រុងសែនមនោរម្យ ខេត្តមណ្ឌលគិរី។ នេះបើតាមការឲ្យដឹងរបស់លោក ចាន់ ទិត្យ ស្នងការរង ទទួលផែនការិយាល័យនគរបាលចរាចរណ៍ផ្លូវគោក នៃស្នងការដ្ឋាននគបាលខេត្តមណ្ឌលគិរី។

លោក ចាន់ ទិត្យ បានប្រាប់ « កម្ពុជាថ្មី» ឲ្យដឹងថា រថយន្តក្រុងមួយគ្រឿងពាក់ស្លាកលេខ ៣D.៦៥.៨៤ មានអ្នករួមដំណើរសរុបចំនួន៤៦នាក់ (ព្រះសង្ឃ០៣អង្គ)បានធ្វើដំណើរពីរាជធានីភ្នំពេញ ឆ្ពោះទៅរមណីយដ្ឋានទឹកជ្រោះប៊ូស្រា លុះមកដល់ចំណុចកើតហេតុ ក៏បានជ្រុលចង្កូតទៅបុកនឹងជញ្ជាំងភ្នំតែម្តង បណ្ដាលឱ្យរបួសធ្ងន់០៣នាក់ (ស្រី០២ ប្រុស០១) និងរបួសស្រាល ១១នាក់ (ស្រី០៤ ប្រុស០៧) ក្នុងនោះគ្មាននរណាម្នាក់ គ្រោះថ្នាក់ដល់អាយុជីវិតនោះឡើយ។ តាមស្នងការរង សិស្សនិស្សិតទាំង៤៦នាក់នេះ ធ្វើដំណើរមកកាន់ខេត្តមណ្ឌលគិរី ក្នុងគោលបំណងចុះកម្មសិក្សា។

ក្រោយពីទទួលបានដំណឹងនៃគ្រោះថ្នាក់ចរាចរណ៍នេះ អភិបាលខេត្ត ប្រធានក្រុមប្រឹក្សាខេត្ត ស្នងការនគបាលខេត្តមណ្ឌលគិរី បានចុះពិនិត្យស្ថានភាព សួរសុខទុក្ខក្រុមនិស្សិតប្រុសស្រីទាំង៤៦នាក់ ដោយបានពាំនាំនូវថវិកាមួយចំនួនឧបត្ថម្ភដល់និស្សិតទាំងនោះផងដែរ។

ជាមួយគ្នានេះ លោកអភិបាលខេត្ត បានបញ្ជាឲ្យយករថយន្តរបស់សាលាខេត្តចំនួនបីគ្រឿងដឹក អ្នកដែលមិនរងរបួសបញ្ជូនមករាជធានីភ្នំពេញវិញ និងតាមលំនៅឋានរបស់ក្រុមគ្រួសាររៀងៗខ្លួន ដើម្បីកុំឲ្យបញ្ចៀសការព្រួយបារម្ភរបស់ក្រុមគ្រួសារនិស្សិត។

ជាចុងក្រោយ ក្នុងនាមអាជ្ញាធរជំនាញ លោក បានអំពាវនាវអ្នកបើកបររថយន្តគ្រប់រូបដែល បញ្ជារថយន្តឆ្ពោះមក ខេត្តមណ្ឌលគិរី ត្រូវប្រុងប្រយ័ត្នគ្រប់អំពីស្ថានភាពផ្លូវ ព្រោះខេត្តមណ្ឌលគិរីពោរពេញទៅដោយជួរដងភ្នំឡើងចំណោត ចុះចំណោតខ្លាំង ងាយប្រឈមនឹងជួបបញ្ហា៕

អត្ថបទ៖រៀម សុខហេង

The post របួស១៤នាក់ ក្នុងហេតុការណ៍រថយន្តដឹកនិស្សិតកសិកម្មចុះកម្មសិក្សានៅមណ្ឌលគិរី ជួបគ្រោះថ្នាក់ចរាចរណ៍ appeared first on Kampuchea Thmey Daily.

ពលរដ្ឋអ្នកធ្វើដំណើរ គាំទ្រចំពោះការដាក់រនាំងដែកពុះចែកទ្រូងផ្លូវ នៅផ្លូវ ៦០ ម៉ែត្រ ដើម្បីកាត់បន្ថយគ្រោះថ្នាក់ចរាចរណ៍

អ៊ិន ពិសី — Sat, 25 Jan 2025 04:58:21 +0000

ប្រជាពលរដ្ឋអ្នកធ្វើដំណើរ សម្តែងក្តីសាទរ សប្បាយរីករាយ និងគាំទ្រចំពោះការដាក់រនាំងដែកពុះចែកទ្រូងផ្លូវ នៅមហាវិថី សម្តេចតេជោ ឬ ហៅថាផ្លូវ ៦០ ម៉ែត្រ ដើម្បីកាត់បន្ថយគ្រោះថ្នាក់ចរាចរណ៍។

លោក ណារិន ជាពលរដ្ឋតែងតែធ្វើដំណើរឆ្លងកាត់តំបន់នោះញឹកញាប់ យល់ឃើញថា ការដាក់រនាំងដែកពុះចែកទ្រូងផ្លូវនេះ ជាការសម្រួលដល់ការធ្វើដំណើរទៅមកកាន់តែប្រសើរឡើង ដោយមិនមានការបើកបរបំពានគន្លងផ្លូវគ្នា។ ពួកគាត់ គាំទ្រ និងថ្លែងអរគុណ សម្តេចធិបតី ហ៊ុន ម៉ាណែត នាយករដ្ឋមន្ត្រី ដែលអនុញ្ញាតឱ្យមានការរៀបចំដាក់ទ្រូងផ្លូវបែបនេះ។

គួរជម្រាបថា កាលពីរសៀលថ្ងៃទី ២៣ ខែមករា ឆ្នាំ ២០២៥ កន្លងទៅ ថ្មីៗ នេះ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃកម្ពុជា បានផ្តល់ការអនុញ្ញាតដល់រដ្ឋបាលរាជធានីភ្នំពេញ ឱ្យរៀបចំដាក់របាំងដែកពុះចែកទ្រូងផ្លូវ នៅលើកំណាត់ផ្លូវ ៦០ ម៉ែត្រ ដើម្បីបញ្ចៀស ក៏ដូចជាកាត់បន្ថយបានពីគ្រោះថ្នាក់ចរាចរណ៍ ក្រោយមួយរយៈក្រោយមកនេះ ផ្លូវនេះឧស្សាហ៍កើតមានគ្រោះថ្នាក់ បន្សល់ទុកសោកនាដកម្មធ្ងន់ធ្ងរដល់ពលរដ្ឋអ្នកដំណើរជាញឹកញាប់។

សូមបញ្ជាក់ថា បច្ចុប្បន្ននេះនៅលើកំណាត់ផ្លូវ ៦០ ម៉ែត្រ មានការរឹតបន្តឹងច្បាប់ចរាចរណ៍យ៉ាងតឹងរ៉ឹងពីសំណាក់កងកម្លាំងសមត្ថកិច្ចចរាចរណ៍រាជធានីភ្នំពេញ សហការជាមួយនគរបាលខណ្ឌពាក់ព័ន្ធ ដោយបានដាក់កម្លាំងអនុវត្តច្បាប់ អមជាមួយការបាញ់ល្បឿននៅពេលថ្ងៃ និងការត្រួតពិនិត្យជាតិស្រវឹងនៅពេលយប់ ដើម្បីកាត់បន្ថយបាននូវអត្រាគ្រោះថ្នាក់ចរាចរណ៍ ខណៈមួយរយៈក្រោយមកនេះ គេសង្កេតឃើញនៅលើផ្លូវ ៦០ ម៉ែត្រ តែងឧស្សាហ៍កើតមានគ្រោះថ្នាក់ចរាចរណ៍ញឹកញាប់ បន្សល់ទុកនូវសោកនាដកម្មធ្ងន់ធ្ងរដល់ប្រជាពលរដ្ឋអ្នកដំណើរ៕

អត្ថបទ ៖ សុភា

The post ពលរដ្ឋអ្នកធ្វើដំណើរ គាំទ្រចំពោះការដាក់រនាំងដែកពុះចែកទ្រូងផ្លូវ នៅផ្លូវ ៦០ ម៉ែត្រ ដើម្បីកាត់បន្ថយគ្រោះថ្នាក់ចរាចរណ៍ appeared first on Kampuchea Thmey Daily.

អ្នកលេង TikTok ត្រូវរថភ្លើងបុកស្លាប់ ពេលថតមាតិកាលើស្ពានផ្លូវរថភ្លើង

Rann Reuy — Wed, 18 Dec 2024 06:54:41 +0000

បុរសម្នាក់អាយុ៥១ឆ្នាំត្រូវបានរថភ្លើងបុកស្លាប់នៅព្រឹកថ្ងៃពុធនេះ ពេលគាត់ព្យាយាមថតផ្សាយផ្ទាល់ (Live) លើបណ្តាញសង្គម TikTok អំពីខ្លឹមសារទាក់ទាញទេសចរនៅចំណុចស្ពានដែក Chulalongkorn ដែលមានរថភ្លើងឆ្លងកាត់ នៅខេត្ត Ratchaburi។

ស្ពាន Chulalongkorn។ រូបថត Transport publiczny

សេចក្តីរាយការណ៍របស់សារព័ត៌មានថៃ បានឱ្យដឹងថា សពរបស់គាត់ត្រូវបានដាច់ជាបំណែកៗ ហើយ សមត្ថកិច្ចថៃកំពុងស៊ើបអង្កេតថាតើវាជាឧបទ្ទវហេតុឬក៏យ៉ាងណា។

សារព័ត៌មានថៃបានរាយការណ៍ដោយដកស្រង់សម្តីរបស់ភរិយារបស់បុរសវ័យ៥១ឆ្នាំនេះ ដោយប្រាប់ឈ្មោះបុរសនោះ ត្រឹម«Wiroj» ជាអ្នកផលិតមាតិកាតាមបណ្តាញសង្គម និងជាគ្រូបង្រៀនភាសាអង់គ្លេសតាមអនឡាញ ហើយមុនរថភ្លើងបុកស្លាប់ គាត់ទើបជូនកូនប្រុសរបស់គាត់ទៅសាលារៀនវេនព្រឹក។

The post អ្នកលេង TikTok ត្រូវរថភ្លើងបុកស្លាប់ ពេលថតមាតិកាលើស្ពានផ្លូវរថភ្លើង appeared first on Kampuchea Thmey Daily.

​គ្រោះថ្នាក់​ចរាចរណ៍​ Archives - Kampuchea Thmey Daily