សារព័ត៌មាន The Straits Times បានដកស្រង់សេចក្តីថ្លែងការណ៍រួម របស់អាជ្ញាធរគ្រប់គ្រងទឹក និងឧតុនិយម ដែលប្រកាសកាលពីថ្ងៃចន្ទ ទី២៥ ខែឧសភា ឆ្នាំ២០២៦ ថា ប្រទេសថៃ កំពុងឈានចូល ​ដំណាក់កាលគ្រោះថ្នាក់ នៃគ្រោះរាំងស្ងួតជាប្រវត្តិសាស្រ្ត និងអាកាសធាតុក្តៅ ដែលមិនធ្លាប់ ជួបប្រទះពីមុនមកសោះ។

កត្តាទាំងនេះ បានជះផលដ៏អាក្រក់ដល់ទាំងមនុស្ស និងធម្មជាតិ ដែលតម្រូវឲ្យមានការចាត់វិធានការចាំបាច់ ជាបន្ទាន់ដើម្បីដោះស្រាយ មិនអាចបង្អែបង្អង់បានទេ។

ជាពិសេស ស្ថាប័នពាក់ព័ន្ធថៃ បានចេញការព្រមានដល់ក្រុមមនុស្សងាយរងគ្រោះ ដូចជា ចាស់ជរា និងទារក ព្រមទាំងកម្មករធ្វើការនៅហាលក្តៅ ត្រូវចៀសវាង កុំឲ្យប៉ះពន្លឺព្រះអាទិត្យ យូរផងដែរ។

មិនត្រឹមប៉ុណ្ណឹង កសិករទាំងឡាយ ក៏ត្រូវជូនដំណឹង ឲ្យត្រៀមលក្ខណៈផងដែរ ព្រោះថា បាតុភូតនេះ នឹងបំផ្លាញផលដំណាំរបស់ពួកគេ ឲ្យខ្ទេចខ្ទី។

សូមជម្រាបថា បាតុភូត «Super El Nino» សំដៅលើបាតុភូត El Niño ដែលមានកម្រិតហិង្សា និងខ្លាំងក្លាបំផុត ខុសពីកម្រិតធម្មតា។ វាគឺជាការប្រែប្រួលអាកាសធាតុសកលលោក ដែលកើតឡើងនៅពេល ផ្ទៃទឹកសមុទ្រនៅភាគកណ្តាល និងភាគខាងកើត នៃមហាសមុទ្រប៉ាស៊ីហ្វិក មានការកើនឡើងកំដៅខុសប្រក្រតីយ៉ាងខ្លាំង ពោលគឺខ្ពស់ជាងកម្រិតមធ្យម ចាប់ពី ២ អង្សាសេឡើងទៅ។

ការឡើងកម្តៅនេះ អូសបន្លាយពេលរាប់ខែ ដែលធ្វើឲ្យវា មានថាមពលគ្រប់គ្រាន់ក្នុងការបង្វែរ និងបង្ខូចទម្រង់ខ្យល់មូសុង និងចរន្តអាកាសធាតុជុំវិញពិភពលោកទាំងមូល៕

អត្ថបទ៖ សុខ សុវណ្ណ

The post ថៃ ឈានចូលដំណាក់កាលគ្រោះថ្នាក់ នៃគ្រោះរាំងស្ងួតជាប្រវត្តិសាស្រ្ត​ និងរលកកម្តៅ ដ៏ខ្លាំង មិនធ្លាប់មាន appeared first on Kampuchea Thmey Daily.

យោងតាមទិន្នន័យចុងក្រោយ ដែល​ចុះផ្សាយ​ដោយ​សារព័ត៌មាន Khaosod នា​ថ្ងៃទី​៤ ខែ​ឧសភា ឆ្នាំ​២០២៦ នេះ បរិមាណទឹក ដែលថៃ​អាចយកមកប្រើប្រាស់បាន នៅទូទាំងប្រទេស មានសល់ត្រឹមតែ ៤១ភាគរយប៉ុណ្ណោះ នៃសមត្ថភាពផ្ទុកសរុប ដែលនេះគឺជាសញ្ញាអាសន្នមួយ សម្រាប់វិស័យកសិកម្ម និងការរស់នៅប្រចាំថ្ងៃ របស់ប្រជាពលរដ្ឋ។

អ្វីដែលគួរឲ្យ​ព្រួយបារម្ភបំផុតនោះ គឺតំបន់កណ្តាលនៃប្រទេសថៃ ដែលជាតំបន់ដាំដុះដ៏សំខាន់ បែរជាមានទឹកសល់ត្រឹមតែ ៣៣ភាគរយ ប៉ុណ្ណោះ។ បើពិនិត្យមើលទៅលើស្ថានភាពតាមទំនប់ទឹកធំៗ ក្នុងអាងទន្លេ Chao Phraya វិញ គឺកាន់តែអាក្រក់ទៅទៀត ដោយក្នុងនោះទំនប់ Pasak Jolasid សល់ទឹកប្រើប្រាស់បានត្រឹមតែ ២១ភាគរយ និងទំនប់ Kwae Noi Bamrung Daen មានត្រឹមតែ ៣០ភាគរយ ដែលជាកម្រិតទាបបំផុតមួយមិនធ្លាប់មាន។

ទោះបីជាមានការព្យាករថា នឹងមានភ្លៀងធ្លាក់ខ្លះៗនៅដើមខែឧសភានេះក៏ដោយ ក៏​អ្នកជំនាញ បានបញ្ជាក់ថា វានឹងកើតឡើងតែមួយរយៈខ្លីប៉ុណ្ណោះ។ បន្ទាប់ពីនោះ បរិមាណទឹកភ្លៀងនៅតំបន់ភាគខាងលើ នឹងចាប់ផ្តើមថយចុះវិញ ដែលធ្វើឲ្យ​ការប្រមូលទឹកទុក ក្នុងទំនប់ជួបការលំបាកខ្លាំង។ អាជ្ញាធរថៃ កំពុងតាមដានស្ថានការណ៍នេះយ៉ាងដិតដល់ និងបានអំពាវនាវឲ្យ​គ្រប់ផ្នែកទាំងអស់ ប្រើប្រាស់ទឹក ដោយសន្សំសំចៃបំផុត ដើម្បីត្រៀមលក្ខណៈទប់ទល់នឹងកង្វះខាតទឹក ដែលអាចអូសបន្លាយយូរជាងការរំពឹងទុក៕

ប្រែសម្រួល៖ ឈាង

The post ថៃ ប្រឈម​គ្រោះរាំងស្ងួត ខណៈទឹកទំនប់ធំៗ ធ្លាក់ចុះ ដល់ចំណុចប្រកាសអាសន្ន appeared first on Kampuchea Thmey Daily.

បើតាមមន្រ្តីអ៊ីរ៉ង់ ទីក្រុងនេះអាចអស់ទឹកស្អាតប្រើប្រាស់ក្នុងរយៈពេលពីរសប្តាហ៍ ដោយសារតែគ្រោះរាំងស្ងួតធ្ងន់ធ្ងរ។ទំនប់Amir Kabir ដែលផ្គត់ផ្គង់ទឹកភាគច្រើនរបស់ទីក្រុងតេហេរ៉ង់ ឥឡូវនេះអាចផ្ទុកទឹកបានត្រឹមតែ១៤ លានម៉ែត្រគូប ដែលស្មើនឹង ៨% នៃសមត្ថភាពរបស់វាប៉ុណ្ណោះ។ ដោយសារតែការខ្វះទឹកភ្លៀង ទើបឆ្នាំកង្វះទឹកធ្ងន់ធ្ងរ។

កង្វះខាតទឹកនឹងប៉ះពាល់ធ្ងន់ធ្ងរ ខណៈទីក្រុងតេហេរ៉ង់ មានប្រជាជនជាង ១០ លាននាក់ ប្រើប្រាស់ទឹកប្រហែលបីលានម៉ែត្រគូបជារៀងរាល់ថ្ងៃឯណោះ។ សង្កាត់មួយចំនួននៅពេលនេះបានប្រឈមមុខនឹងការកាត់ផ្តាច់ទឹករួចហើយ។

លើសពីនេះសីតុណ្ហភាពនៅទីក្រុងតេហេរ៉ង់ថ្មីៗនេះបានឡើងដល់ជាង៤០C និងជាង៥០°C នៅតំបន់ភាគខាងត្បូងមួយចំនួន។ រដ្ឋាភិបាលប្រទេសអ៊ីរ៉ង់ថែមទាំងបានប្រកាសថ្ងៃឈប់សម្រាកសាធារណៈដើម្បីសន្សំសំចៃទឹក និងថាមពលទៀតផង។

លោកប្រធានាធិបតី Masoud Pezeshkian បានព្រមានថា ស្ថានភាពទឹកគឺ «ធ្ងន់ធ្ងរជាងអ្វីដែលមនុស្សគិត»។ ចំណែកអ្នកជំនាញបានស្តីបន្ទោសវិបត្តិនេះទៅលើការគ្រប់គ្រងទឹកមិនបានល្អ ការប្រើប្រាស់ទឹកក្រោមដីច្រើនពេក និងការប្រែប្រួលអាកាសធាតុ។

ប្រទេសជិតខាងរបស់អ៊ីរ៉ង់ គឺប្រទេសអ៊ីរ៉ាក់ ក៏កំពុងរងទុក្ខវេទនាដោយសារជួបគ្រោះរាំងស្ងួតបំផុតមិនធ្លាប់មានចាប់តាំងពីឆ្នាំ ១៩៩៣មកផងដែរ៕

អត្ថបទ៖ ប៊ុន សុភាព

The post រដ្ឋធានីអ៊ីរ៉ង់ អាចនឹងអស់ទឹកស្អាតប្រើប្រាស់ក្នុងរយៈពេលពីរសប្តាហ៍ទៀត appeared first on Kampuchea Thmey Daily.

លោក សុទ្ធ គឹមកុលមុនី អ្នកនាំពាក្យ​គណៈកម្មាធិការ​ជាតិ​គ្រប់គ្រង​គ្រោះមហន្តរាយមានប្រសាសន៍​នៅ​ព្រឹក​ថ្ងៃទី៣កញ្ញានេះ​ថា ស្ថានភាពអាកាសធាតុក្នុងខែសីហា នៅក្នុងតំបន់អាស៊ី និងអាស៊ានរួមទាំងកម្ពុជាផងមានការផ្លាស់ប្តូរប្រែប្រួលច្រើនដោយសារការទទួលរងឥទ្ធិពលខ្យល់មូសុង និងប្រព័ន្ធសម្ពាធខ្លាំងនៅសមុទ្រចិនខាងត្បូង ក្នុងនោះមានព្យុះក្នុងតំបន់ចំនួន៤ ដែលបានកើតមានជាបន្តបន្ទាប់បានធ្វើឱ្យមានភ្លៀងធ្លាក់ខ្លាំងបង្កជាទឹកជំនន់ រអិលបាក់ដីធ្ងន់ធ្ងរនៅក្នុងប្រទេសចិន ឥណ្ឌា ជប៉ុន ប៉ាគីស្ថាន វៀតណាមនិងប្រទេសថៃ។ ចំណែកកម្ពុជាបានទទួលរងឥទ្ធិពលតិចតួចពីព្យុះក្នុងតំបន់ និងបង្កជាប្រព័ន្ធសម្ពាធទាបដែលមាន លើឈូងសមុទ្រថៃ អាងទន្លេមេគង្គ និងរបបខ្យល់មូសុងនីរតី បានធ្វើឱ្យមានភ្លៀងធ្លាក់រាយប៉ាយ តិច និងច្រើនដោយកន្លែងក្នុងសប្តាហ៍ទី៤ នៃខែកក្កដា និងបន្ទាប់ពីកូនដូវប្រាំងបានបញ្ចប់ចាប់ពីថ្ងៃទី១២ ខែសីហា ឆ្នាំ២០២៥។

លោកបានបន្តថា កូនរដូវប្រាំងក្នុងឆ្នាំ២០២៥ ចាប់ពីថ្ងៃទី២២ ខែកក្កដា ដល់ថ្ងៃទី១២ ខែសីហា ឆ្នាំ២០២៥ បានបណ្តាលឱ្យបរិមាណទឹកភ្លៀងក្នុងរដូវវស្សាថយចុះច្រើនទាំងនៅតំបន់វាលទំនាប តំបន់ខ្ពង់រាប និងតំបន់មាត់សមុទ្រ
ក្នុងស្ថានភាពនេះបានធ្វើឱ្យតំបន់មួយចំនួនប្រឈមនឹងការខ្វះខាតទឹកក្នុងវិស័យកសិកម្មដូចជាខេត្តបាត់ដំបង កំពង់ស្ពឺ
និងខេត្តប៉ៃលិន មាន៤ក្រុងស្រុក និង១៤ឃុំសង្កាត់ ប៉ះពាល់ស្រូវវស្សាចំនួន៤០.៥០៧ហិកតា និងខូចខាត ៨.១២៨ហិកតា នៅខេត្តបាត់ដំបង។

យោងតាមក្រសួងកសិកម្មរុក្ខាប្រមាញ់និងនេសាទ គិតត្រឹមថ្ងៃទី១៥ ខែសីហា ឆ្នាំ២០២៥ ល្បឿននៃការបង្កបង្កើនផល អនុវត្តបានចំនួន ២.៧៨៣.៨៩៨ ស្មើនឹង៩២,៩៧% នៃផែនការដាំដុះ និងលឿនជាងឆ្នាំមុនប្រមាណ ៤,៥៣%៕

អត្ថបទ៖ សំអឿន

The post ខេត្តចំនួន៣ រងគ្រោះដោយសារកូនរដូវប្រាំងចន្លោះពីខែកក្កដា និងខែសីហា ប៉ះពាល់ស្រូវវស្សាជាង៤ម៉ឺនហិកតា appeared first on Kampuchea Thmey Daily.

លោក សុទ្ធគឹម កុលមុនី អ្នកនាំពាក្យ​គណៈកម្មាធិការ​ជាតិ​គ្រប់គ្រង​គ្រោះ​មហន្តរាយ មានប្រសាសន៍​នៅ​ព្រឹក​ថ្ងៃ​ទី ៤ កក្កដា នេះ​ថា ​អាកាសធាតុ​ក្នុង​ឆមាស​ទី​ ១ ឆ្នាំនេះ​ មាន​លក្ខណៈ​អំណោយផល​ល្អ ទាំង​កម្រិត​កម្ដៅ​បរិយាកាស ស្ថានភាព​ភ្លៀង កក់ខែ និង​ភ្លៀង​រដូវវស្សា បើ​ប្រៀបធៀប​ទៅ​នឹង​រយៈពេល​ដូចគ្នា​ក្នុង​ឆ្នាំ ២០២៤។ រដូវវស្សា​ឆ្នាំនេះ ​បាន​ចូល​មកដល់​ក្នុង​សប្ដាហ៍​ទី ១ នៃ​ខែឧសភា លឿន​ជាង​ឆ្នាំទៅ​ជាមួយនឹង​បរិមាណ​ទឹកភ្លៀង​ធ្លាក់​រាយប៉ាយ​បានល្អ និង​មាន​បរិមាណ​តិច​ច្រើន​ដោយ​កន្លែង ដោយសារ​ការ​ទទួល​រង​ឥទ្ធិពល​ពី​ខ្យល់មូសុង​និរតី​ជាមួយ​នឹង​សម្ពាធ​ទាប​ដែល​គ្របដណ្ដប់​លើ​ឈូង​សមុទ្រ​ចិន​ខាងត្បូង និង​អាង​ទន្លេមេគង្គ​ ធ្វើឱ្យ​ការងារ​ដាំដុះ​ស្រូវ​រដូវវស្សា​មាន​សន្ទុះ​លឿន​ជាង​ឆ្នាំមុន ហើយ​ក្នុងនេះ​តំបន់​មួយចំនួន​ដែល​ទទួលបាន​បរិមាណ​ទឹកភ្លៀង​ច្រើន​លើស​ពី​កម្រិត​ដែល​ភូមិសាស្ត្រ​អាច​ទទួលបាន​ ក៏​ទទួលរង​ប៉ះពាល់​ដោយ​ជំនន់​ទឹកភ្លៀង​ ជាពិសេស​ទឹក​ហូរ​ធ្លាក់​ពី​តំបន់​ភ្នំ និង​ពី​ប្រទេសជិតខាង​ដែល​ទទួលរង​ឥទ្ធិពល​ពី​ព្យុះ​ទី​មួយ​ក្នុង​តំបន់។

យ៉ាងណាក៏ដោយ លោក​បាន​បន្តថា​ គ្រោះរាំងស្ងួត កង្វះខាត​ទឹក​ក្នុង​វិស័យ​កសិកម្ម ការ​បង្កបង្កើន​ផល​ស្រូវប្រាំង ​ត្រូវបានធ្វើ​នៅ​រាជធានី​-​ខេត្ត ចំនួន ២២ លើ​ផ្ទៃដី​សរុប​ចំនួន ៩០៧.៨៨៩ ហិតា ស្មើ​នឹង ​១៧០,១៤ ភាគរយ នៃ​ផែនការ​ដាំដុះ​ប្រចាំឆ្នាំ ច្រើនជាង​ការដាំដុះ​នៅក្នុង​ឆ្នាំ ២០២៤។ ភ្លៀង​កក់ខែ កើតមាន​ក្នុង​កម្រិត​តិចជាង​មធ្យម បានធ្វើឱ្យ​មានការ​ប្រឈម​ទៅនឹង​តម្រូវការ​ទឹក សម្រាប់​ស្រោចស្រព ហើយ​ក្នុងនេះ​ភូមិសាស្ត្រ​ដែល​នៅ​ឆ្ងាយ ​នឹង​គ្មាន​ប្រភព​ទឹក បាន​ទទួលរង​ការខូចខាត​មួយចំនួន បន្ទាប់ពី​ការអន្តរាគមន៍​ជួយសង្គ្រោះ​ជា​បន្ត​បន្ទាប់ពី​មន្ទីរជំនាញ និង​អាជ្ញាធរ​មូលដ្ឋាន​ក្នុង​ការ​បើក​បញ្ចេញ​ទឹក​ពី​អាង​ស្តុក​ទឹក​នានា និង​ការ​ចល័ត​ម៉ាស៊ីន​បូមទឹក​តាម​បណ្តា​ទីតាំង​មាន​ប្រភព​ទឹក។

លោក​បាន​បន្តទៀតថា មូលដ្ឋាន​ខ្វះ​ទឹក​ស្រោចស្រព​មាន​ចំនួន ១៥ ​រាជធានី-ខេត្ត ៤១ ​ស្រុក-​ក្រុង និង ១៣៩ ឃុំ​-សង្កាត់​ ដោយ​ប៉ះពាល់​ស្រូវប្រាំង​ចំនួន​ ១០១.២៦៨ ហិតា និង​ដំណាំ​រួមផ្សំ ១.៥១៧ ហិតា ​ក្នុង​នោះ បាន​ជួយ​អន្តរាគមន៍​សង្គ្រោះ​ស្រូវ​បាន​ចំនួន ៩៣.១៣៣ ហិតា និង​ខូចខាត​ស្រូវ​ចំនួន ៧.៩៦៨ ហិតា។

លោក​បាន​បន្ថែមទៀតថា ​ទន្ទឹមនឹងនេះ ​ជំនន់​ទឹកភ្លៀង ភ្លៀង​រដូវវស្សា ​បានចាប់ផ្តើម​ធ្លាក់​រាយប៉ាយ​ក្នុង​ក្របខណ្ឌ​ទូទាំងប្រទេស ក្នុង​បរិមាណ​តិច​ច្រើន​ដោយ​កន្លែង ចាប់តាំងពី​សប្ដាហ៍​ទី ​២ នៃ​ខែ​ឧសភា រួមជាមួយ​ការទទួល​រង​ឥទ្ធិពល​ពី​ខ្យល់មូសុង​និរតី និង​សម្ពាធ​ទាប ក្នុង​ខែ​មិថុនា ដែល​បង្កឱ្យ​មាន​ភ្លៀង​ថ្នាក់​ក្នុង​បរិមាណ​ច្រើន​នៅតាម​ភូមិសាស្ត្រ​មួយចំនួន និង​បាន​បង្កឱ្យមាន​ជំនន់​រហ័ស​លិច​លង់​ក្នុង​កម្រិត​តិចតួច​នៅតាម​បណ្តា​ខេត្ត ភាគ​ពាយ័ព្យ ភាគ​ឦសាន និង​តំបន់​ភាគ​ខាងជើង​រួមមាន ខេត្ត​បាត់ដំបង ប៉ៃលិន បន្ទាយមានជ័យ សៀមរាប កំពង់ធំ ក្រចេះ ស្ទឹងត្រែង កោះកុង កណ្តាល ពោធិ៍សាត់ ព្រះសីហនុ កំពង់ចាម តាកែវ និង​ខេត្តព្រៃវែង​ បណ្តាលឱ្យ​លិច​បរិវេណ​ផ្ទះ ១៥៨ ​ខ្នង បាក់​ផ្ទះ​ ១​ ខ្នង​ចូលក្នុង​ទឹក លិច​ស្រូវ (៧​ ខេត្ត​) ៩.៥៥៧ ហិតា និង​ខូចខាត ២.១០១ ហិតា បាក់​ដាច់​ផ្លូវលំ ៥​ កន្លែង លិច​ស្ពាន ​៣ និង​ខូចខាត ២​ កន្លែង រងគ្រោះ​ស្លាប់​ ២ ​នាក់ (​ស្រី ១)។

ជាមួយគ្នានេះដែរ ​បណ្តាល​ឱ្យ​ការបាក់​ស្រុត​ច្រាំងទន្លេ ស្ទឹង​ចំនួន ១៨ ​ករណី នៅ​មូលដ្ឋាន​ខេត្ត​ចំនួន ៧ មាន​ខេត្តបាត់ដំបង ត្បូងឃ្មុំ ព្រៃវែង ខេត្តកំពង់ធំ កណ្តាល ព្រៃវែង និង​រាជធានី​ភ្នំពេញ ស្ថានភាព​រងគ្រោះ ​៖ ផ្ទះ​ខូចខាត ៨ ​ខ្នង រំកិល​ និង​រុះរើ​ចេញ ១១ ​ខ្នង បាក់​ច្រាំង​ទន្លេមេគង្គ ទន្លេសាប និង​ស្ទឹង​សង្កែ ២៤៧ ​ម៉ែត្រ បាក់​ទំនប់​ស្ទាក់​ទឹក​កំពង់​គោ ស្រុក​កំពង់ស្វាយ ខេត្ត​កំពង់ធំ បង្ក​ឱ្យ​មាន​ការ​ខូចខាត និង​បាត់បង់ ទូក​បា​ឡា​ជ័រ ១៣២​ គ្រឿង ម៉ាស៊ីនបូមទឹក ៩៣ ​គ្រឿង ម៉ាស៊ីន​ទូក ៩៨ ​គ្រឿង និង​ម៉ូទ័រ​បូម​ទឹក ៧ គ្រឿង៕

អត្ថបទ ៖ សំអឿន

The post ៦ ខែ ឆ្នាំនេះ គ្រោះរាំងស្ងួត ប៉ះពាល់ស្រូវប្រាំង និងដំណាំរួមផ្សំជាង ១០ ម៉ឺនហិតា appeared first on Kampuchea Thmey Daily.

ប្រភពទឹកសំខាន់សម្រាប់រដ្ឋធានី​នៃ​ប្រទេសដែល​ទើប​​​ប្តូរ​របប​ដឹកនាំ​​នៅ​ដើមឆ្នាំនេះ គឺស្ថិតនៅក្រុង Ein al-Fijeh ដែលពេលនេះបានធ្លាក់ចុះដល់កម្រិតទាបបំផុត​គួរ​ឲ្យ​ព្រួយបារម្ភ​។ ប្រភពទឹកនេះមានទីតាំងនៅជ្រលង Barada ខាងក្នុងប្រាសាទ​ Roman មួយហើយបានផ្តល់ទឹកសាបដល់ទីក្រុងដាម៉ាសរាប់ពាន់ឆ្នាំមកហើយ។

ជាធម្មតា ក្នុងរដូវរងា ជ្រលងប្រភពទឹកនេះពោរពេញដោយទឹក​ដែលទទួលបាន​ពី​របប​​ទឹក​ភ្លៀង និងព្រិលរលាយពីភ្នំក្បែរនោះ។ ប៉ុន្តែនៅឆ្នាំនេះ ទឹកភ្លៀងមានកម្រិតទាបខ្លាំងនិងអាក្រក់បំផុតចាប់តាំងពីឆ្នាំ ១៩៥៦។ ប្រភពទឹកនេះផ្គត់ផ្គង់ទឹក ៧០% នៃទីក្រុងដាម៉ាស បម្រើប្រជាជនប្រហែល ៥លាននាក់។ ឥឡូវនេះ ទាំងតំបន់ប្រភពទឹកនេះនិងទឹកទន្លេ ជិតរីងស្ងួត​អស់​ហើយ។

ប្រជាជន​នៅ​ក្រុង​ដាម៉ាស​កំពុង​ជួប​ប្រទះ​នឹង​បញ្ហា​ធ្ងន់ធ្ងរ។ តំបន់ខ្លះទទួលបានទឹកត្រឹមតែ ៩០នាទីក្នុងមួយថ្ងៃ។ នៅកន្លែងដែលមានការដាច់ចរន្តអគ្គិសនី អ្នកស្រុកមិនអាចបូមទឹកបានទេ។ មនុស្សជាច្រើនត្រូវទិញទឹកថ្លៃពីឡានដឹកប្រេងឯកជន ដែលជាបន្ទុកចំណាយ​ដ៏ធំមួយសម្រាប់ប្រជាជនភាគច្រើនដែលមានចំណូលទាបនៅក្នុងប្រទេសនេះ។

លោក Ahmad Darwish ប្រធាន​អាជ្ញាធរ​ទឹក​របស់​ទីក្រុង​ បាន​និយាយ​ថា បញ្ហា​នឹង​កាន់​តែ​ធ្ងន់ធ្ងរ​នៅ​រដូវក្តៅ។ លោក​បាន​សុំប្រជាជនឱ្យ​សន្សំ​ទឹក​គ្រប់​ពេល​ដែល​អាច​ធ្វើ​ទៅ​បានមិនថា ពេល​ងូតទឹក លាង​ចាន ឬ​សម្អាត ខណៈមានផ្ទះចំនួន ១.១ លានខ្នងអាស្រ័យលើប្រភពទឹកនេះ៕

អត្ថបទ៖ ប៊ុន សុភាព

The post រដ្ឋធានី​ប្រទេស​ស៊ីរី ប្រឈមនឹងវិបត្តិខ្វះ​ខាត​ទឹកដ៏អាក្រក់បំផុតក្នុងរយៈពេល ៧០ឆ្នាំ appeared first on Kampuchea Thmey Daily.

កម្ពស់ទឹករបស់ទំនប់ Lam Takhong ក្នុងស្រុក Sikhiu ខេត្ត Nakhon Ratchasima ត្រូវបានគេរាយការណ៍​ថា បានធ្លាក់ចុះមកត្រឹម៩% នៃសមត្ថភាពរបស់វាដែលត្រូវបានចាត់ថ្នាក់ថាខ្វះខាតទឹកខ្លាំងបំផុត។ ការវាយតម្លៃស្ថានភាព​ទឹក​បច្ចុប្បន្ន បាន​បង្ហាញ​ពី​ទិដ្ឋភាព​គួរ​ឱ្យ​ព្រួយ​បារម្ភ ដោយ​កម្រិត​ទឹក​បាន​ធ្លាក់​ចុះ​យ៉ាង​ខ្លាំងធ្វើឲ្យ​ផុសចេញ​នូវ​របារ​​ខ្សាច់។

លើសពីនេះទិដ្ឋភាពដ៏គួរឱ្យចាប់អារម្មណ៍មួយក៏បានលេចចេញមកដោយសំណល់សំណង់ផ្ទះចាស់ៗដែលលិចទឹកអស់រយៈពេលជាង៥០ ឆ្នាំមកហើយ ឥឡូវនេះអាចមើលឃើញពីលើខ្សែទឹក។

គួរបញ្ជាក់ថា ទំនប់ Lam Takhong មាន​សមត្ថភាព​ស្តុក​ទឹក​សរុប​៣១៤​លាន​ម៉ែត្រគូប​។ បច្ចុប្បន្ននេះ ទឹកប្រើប្រាស់បានត្រឹមតែ ២៦.៨៨ លានម៉ែត្រគូបប៉ុណ្ណោះ ដែលនៅសល់ត្រឹមតែ ៩% នៃសមត្ថភាពពីមុនរបស់វា។ នេះជាគ្រោះរាំងស្ងួតធ្ងន់ធ្ងរបំផុតទីបី ចាប់តាំងពីទំនប់នេះបានចាប់ផ្តើមដំណើរការនៅឆ្នាំ ១៩៦៩បន្ទាប់ពីមានវិបត្តិស្រដៀងគ្នាក្នុងឆ្នាំ ២០០៥ និង១៩៩៣៕

អត្ថបទ៖ ប៊ុន សុភាព

The post ទំនប់ទឹកក្នុងខេត្តភាគឦសានថៃជួបវិបត្តិគ្រោះរាំងស្ងួតអាក្រក់បំផុតក្នុងរយៈពេល២០ឆ្នាំ appeared first on Kampuchea Thmey Daily.

តាមសេចក្តីរាយការណ៍របស់លោក ប៊ិន សំអុល អភិបាលរងស្រុក និងមន្ត្រីពាក់ព័ន្ធ ដែលបានចុះពិនិត្យផ្ទាល់ បានឱ្យដឹងថា នៅពេលនេះអាជ្ញាធរកំពុងប្រើប្រាស់ម៉ាស៊ីនបូមទឹកដែល លោកបណ្ឌិតប្រធានក្រុមការងារចុះមូលដ្ឋានស្រុកបាភ្នំបានផ្ដល់ជូនតាំងពីដើមខែធ្នូ ឆ្នាំ២០២៤នោះ កំពុងបូមទឹក ជូនពលរដ្ឋស្ថិតភូមិស្វាយខ្នី ភូមិពងពស់ និងភូមិជើងទឹក ចំនួន៤៨៧គ្រួសារ ដែលមានផ្ទៃដីចំនួន៤០០ហិចតាស្ថិតនៅក្នុងឃុំរោងដំរី និងឃុំបឹងព្រះ។ ទោះយ៉ាងណា ប្រឡាយរងមួយចំនួនបានរីងស្ងួត ហើយអាជ្ញាធរកំពុងរកដំណោះស្រាយនាំយកប្រភពទឹកពីបឹងទន្លេស្នេហ៍។

គួរឱ្យដឹងថា នៅថ្ងៃទី២៣ ខែមករា ឆ្នាំ២០២៥ លោកបណ្ឌិត ងិន បាណាល់ បានចាត់តាំងក្រុមការងារចុះទៅរៀបចំម៉ាស៊ីនបូមទឹក២ទីតាំងបន្ថែមភ្លាមៗដើម្បីជួយសង្គ្រោះស្រូវកំពុងចេញផ្កា ដាក់ផ្លែនៅឃុំរោងដំរី ឃុំរក្សជ័យ និងឃុំបឹងព្រះ ដែលកំពុងខ្វះទឹកខ្លាំង។ទីតាំងទីមួយ គឺនៅប្រឡាយមេខ្សេ ដាក់ម៉ាស៊ីនបូមពីរគ្រឿង ត្រង់ចំណុចភូមិជ្រួលថ្មី ឃុំរក្សជ័យ និងទីតាំងទីពីរ នៅប្រឡាយពោធិ៍លោក ពីចំណុចទ្វារអូរម្ល ឆ្លងកាត់ឃុំធាយ ឃុំបឹងព្រះ និងឃុំស្ពឺ(ក)។

ជាមួយគ្នានេះដែរលោក ងិន បាណាល់ បានត្រៀមប្រេងឥន្ធៈចំនួន២៥០០លីត្រ និងសម្ភារៈចាំបាច់មួយចំនួនដូចជាទុយយោទឹកដើម្បីបម្រើឱ្យតំណើរការបូមទឹកជូនប្រជាពលរដ្ឋទាន់ពេលវេលា។

ប្រធានក្រុមការងារចុះមូលដ្ឋានស្រុកបាភ្នំ បានចាត់ទុកការជួយសង្គ្រោះស្រូវពលរដ្ឋជាការងារអាទិភាពរបស់ក្រុមការងារ។ លោកបន្ថែមថា ស្រូវជាអាយុជីវិត ដូចសុភាសិតខ្មែរពោលថា«ធ្វើស្រែនឹងទឹក ធ្វើសឹកនឹងបាយ»៕

The post បណ្ឌិត ងិន បាណាល់ ផ្តល់ម៉ាស៊ីនបូមទឹក៤គ្រឿង ជួយសង្រ្គោះស្រូវ នៅស្រុកបាភ្នំ ដែលខ្វះទឹកស្រោចស្រព appeared first on Kampuchea Thmey Daily.