ឃាត់ខ្លួន Archives - Kampuchea Thmey Daily

ករណីធ្វើទារុណកម្មស្លាប់ជនជាតិចិននៅខេត្តប៉ៃលិន៖ ចាប់ខ្លួនជនជាតិចិន-ខ្មែរ ៧នាក់ បន្តស្រាវជ្រាវម្នាក់ទៀត

Ngoeul Narath — Wed, 16 Oct 2024 09:32:59 +0000

កម្លាំងនាយកដ្ឋាននគរបាលព្រហ្មទណ្ឌ ដឹកនាំប្រតិបត្តិការបំបែកសំណុំរឿងធ្វើទារុណកម្មបណ្ដាលឲ្យស្លាប់ នៅខេត្តប៉ៃលិន, ឃាត់ខ្លួនជនជាតិចិន និងខ្មែរ ចំនួន៧នាក់។

កាលពីថ្ងៃទី១៧ ខែសីហា ឆ្នាំ២០២៤ វេលាម៉ោង០៥៖០០នាទីព្រឹក មានករណីមនុស្សស្លាប់ ដោយការធ្វើទារុណកម្ម ស្ថិតនៅក្នុងភូមិផ្សារព្រំ ឃុំស្ទឹងកាច់ ស្រុកសាលាក្រៅ ខេត្តប៉ៃលិន ដោយជនរងគ្រោះមានឈ្មោះ ZHOU CHUNHUA ភេទប្រុស អាយុ៣៦ឆ្នាំ ជនជាតិចិន។

លុះនៅថ្ងៃទី០៩ ខែតុលា ឆ្នាំ២០២៤ ក្រោមការសម្របសម្រួលពីតំណាងអយ្យការអមសាលាដំបូងខេត្តប៉ៃលិន កម្លាំងជំនាញនាយកដ្ឋាននគរបាលព្រហ្មទណ្ឌ បានបន្តដឹកនាំសហការ ដោយធ្វើការឃាត់ខ្លួនបានជនសង្ស័យជាបន្តបន្ទាប់ចំនួន០៧នាក់ រួមមាន៖ទី១ ឈ្មោះ LI YU ភេទប្រុស អាយុ២៣ឆ្នាំ ជនជាតិចិន។ ទី២៖ ឈ្មោះ លូ ហ្វុង ភេទប្រុស អាយុ២០ឆ្នាំ ជនជាតិចិន ។ទី៣៖ ឈ្មោះ LIU HUA BING ភេទប្រុស អាយុ២៣ឆ្នាំ ជនជាតិចិន (ទាំង៣នាក់ឃាត់នៅត្រង់ចំណុចភូមិថ្មដា ឃុំថ្មដា ស្រុកវាលវែង ខេត្តពោធិ៍សាត់)។

ទី៤៖ ឈ្មោះ GUO YUNFEI ភេទប្រុស អាយុ៤៣ឆ្នាំ ជនជាតិចិន។ ទី៥៖ ឈ្មោះ ZHANG YUESEN ភេទប្រុសអាយុ៣០ឆ្នាំ ជនជាតិចិន។ ទី៦៖ ឈ្មោះ ជា រិទ្ធី ភេទប្រុស អាយុ៣១ឆ្នាំ ជនជាតិខ្មែរ និងទី៧៖ ឈ្មោះ ហួន រតន: ភេទប្រុស អាយុ៣០ឆ្នាំ ជនជាតិខ្មែរ (ទាំង៤នាក់ឃាត់ត្រង់ចំណុចឃុំស្ទឹងកាច ស្រុកសាលាក្រៅ ខេត្តប៉ៃលិន)។

ប្រតិបត្តិការឃាត់ខ្លួនជនជាតិចិន ខ្មែរ សរុបចំនួន៧នាក់នេះ ធ្វើឡើង ក្រោយពីទទួលបានពាក្យបណ្តឹងរបស់ភរិយារបស់ជនរងគ្រោះ។ ដោយអនុវត្តតាមបទបញ្ជារបស់លោក នាយឧត្តមសេនីយ៍ ស ថេត អគ្គស្នងការនគរបាលជាតិ, អគ្គស្នងការរងទទួលផែន និងលោក ឧត្តមសេនីយ៍ឯក ង៉េង ជួ ប្រធាននាយកដ្ឋាននគរបាលព្រហ្មទណ្ឌ, កម្លាំងជំនាញរបស់នាយកដ្ឋាននគរបាលព្រហ្មទណ្ឌ ដឹកនាំដោយលោកឧត្តមសេនីយ៍ត្រី ហ៊ុន មុន្នីរ័ត្ន និងលោកវរសេនីយ៍ឯក ហែម បូណា អនុប្រធាននាយកដ្ឋាន បានដឹកនាំសហការជាមួយកម្លាំងស្នងការដ្ឋាននគរបាលខេត្តប៉ៃលិន ពោធិ៍សាត់ កងរាជអាវុធហត្ថខេត្តប៉ៃលិន និងអង្គភាពជំនាញពាក់ព័ន្ធចុះស្រាវជ្រាវ និងប្រមូលព័ត៌មាន ដោយកំណត់បានអត្តសញ្ញាណក្រុមជនសង្ស័យ។

បច្ចុប្បន្នជនសង្ស័យខាងលើ ត្រូវបានបញ្ជូនទៅកាន់សាលាដំបូងខេត្តប៉ៃលិន ដើម្បីបន្តនីតិវិធី ខណៈបក្ខពួកម្នាក់ទៀតកំពុងស្រាវជ្រាវបន្ដ៕

The post ករណីធ្វើទារុណកម្មស្លាប់ជនជាតិចិននៅខេត្តប៉ៃលិន៖ ចាប់ខ្លួនជនជាតិចិន-ខ្មែរ ៧នាក់ បន្តស្រាវជ្រាវម្នាក់ទៀត appeared first on Kampuchea Thmey Daily.

ឃាត់ខ្លួនក្មេងស្ទាវ ០៤ នាក់ ខណៈ ០៤ នាក់ទៀត កំពុងគេចខ្លួន ក្រោយវាយតប់គ្នា

អ៊ិន ពិសី — Thu, 08 Dec 2022 07:51:30 +0000

មានហេតុការណ៍បង្កការភ្ញាក់ផ្អើលមួយកាលពីវេលាម៉ោង ១៩ និង ១០ នាទីយប់ ថ្ងៃទី ៧ ខែធ្នូ ឆ្នាំ ២០២២ ស្ថិតនៅចំណុចដីឡូត៍មួយកន្លែង ភូមិទួលល្វា សង្កាត់ទួលល្វា ក្រុងប៉ៃលិន ខេត្តប៉ៃលិន បង្កឡើងដោយក្មេងទំនើងពីរក្រុម បានវាយប្រហារគ្នាទៅវិញទៅមក បណ្ដាលឲ្យមានអ្នកដេកពេទ្យ និងរត់គេចខ្លួន។

តាមប្រភពព័ត៌មានពីសមត្ថកិច្ចនគរបាលខេត្តប៉ៃលិន បានឲ្យដឹងថា ក្មេងទំនើងខាងលើមានពីរក្រុម បក្សពួកសរុប ០៨ នាក់ ដែលមានឈ្មោះដូចខាងក្រោម ៖

ទី១-ឈ្មោះ សុខ ចាន់តារា ភេទប្រុស អាយុ ២១ ឆ្នាំ មុខរបរជាងក្រឡឹង រស់នៅភូមិវាលវង់ សង្កាត់ទួលល្វា ក្រុងប៉ៃលិន ខេត្តប៉ៃលិន។

ទី២-ឈ្មោះ សាក់ ភារ៉ា ហៅអាជ្រូក ភេទប្រុស អាយុ ២៧ ឆ្នាំ មុខរបរកម្មករសំណង់ រស់នៅភូមិទួលល្វា សង្កាត់ទួលល្វា ក្រុងប៉ៃលិន ខេត្តប៉ៃលិន។

ទី៣-ឈ្មោះ សាក់ សំរិត ភេទប្រុស អាយុ ២២ ឆ្នាំ មុខរបរជាងក្រឡឹង រស់នៅភូមិទួលល្វា សង្កាត់ទួលល្វា ក្រុងប៉ៃលិន ខេត្តប៉ៃលិន។

ទី៤-ឈ្មោះ វ៉ាន់ ទុំ ហៅសិទ្ធិ ភេទប្រុស អាយុ ៣១ ឆ្នាំ មុខរបរជាងឡាន រស់នៅភូមិអូរតាពុកក្រោម សង្កាត់ទួលល្វា ក្រុងប៉ៃលិន ខេត្តប៉ៃលិន។

ទី៥-ឈ្មោះ ភ័ក្រ ភេទប្រុស អាយុ ២៣ ឆ្នាំ មុខរបរកម្មករចាក់លូ ទីលំនៅភូមិអូរតាពុកក្រោម សង្កាត់ ប៉ៃលិន ក្រុងប៉ៃលិន ខេត្តប៉ៃលិន(រត់គេចខ្លួន)។

ទី៦-ឈ្មោះ ផាន់ ទី អាយុ ១៩ ឆ្នាំ មុខរបរកម្មករចាក់លូ រស់នៅអូរតាពុកក្រោម សង្កាត់ទួលល្វា ក្រុងប៉ៃលិន ខេត្តប៉ៃលិន (រត់គេចខ្លួន)។

ទី៧-ឈ្មោះ ហេង ភេទប្រុស អាយុ ១៨ ឆ្នាំ មុខរបរកម្មករចាក់លូ រស់នៅភូមិអូរតាពុកក្រោម សង្កាត់ទួលល្វា ក្រុងប៉ៃលិន ខេត្តប៉ៃលិន (រត់គេចខ្លួន) និងទី៨-ឈ្មោះ រក្សា ភេទប្រុស អាយុ ១៩ ឆ្នាំ មុខរបរ មិនពិតប្រាកដ រស់នៅភូមិអូរច្រាលិច សង្កាត់បរយ៉ាខា ក្រុងប៉ៃលិន ខេត្តប៉ៃលិន(រត់គេចខ្លួន)។

តាមប្រភពព័ត៌មាន បានបន្តថា បន្ទាប់ពីធ្វើសកម្មភាពដេញកាប់គ្នាទៅវិញទៅមករួច កម្លាំងសមត្ថកិច្ចជំនាញ នៃការិយាល័យនគរបាលព្រហ្មទណ្ឌកម្រិតស្រាល សហការជាមួយកម្លាំងអធិការដ្ឋាននគរបាលក្រុងប៉ៃលិន និងកម្លាំងប៉ុស្តិ៍រដ្ឋបាល បានចុះទៅដល់ទីតាំងកន្លែងកើតហេតុ ព្រមទាំងធ្វើការឃាត់ខ្លួនក្មេងទំនើងចំនួន ០៤ នាក់ (ដោយម្នាក់ៗរងរបួសធ្ងន់-ស្រាលរៀងៗខ្លួន) នាំមកកាន់មន្ទីរពេទ្យបង្អែកខេត្តប៉ៃលិន ដើម្បីពិនិត្យ និងព្យាបាលរបួស ចំណែកក្មេងទំនើងចំនួន ០៤ នាក់ទៀត បានឡើងជិះម៉ូតូរត់គេចខ្លួនបាត់អស់។

បច្ចុប្បន្នក្រុមក្មេងទំនើងដែលរងរបួស កំពុងសម្រាកព្យាបាលនៅមន្ទីរពេទ្យបង្អែកខេត្ត ចំណែកអ្នករត់គេចខ្លួន កម្លាំងជំនាញការិយាល័យនគរបាលព្រហ្មទណ្ឌកម្រិតស្រាល កំពុងធ្វើការស្រាវជ្រាវ ដើម្បីអនុវត្តតាមនីតិវិធីច្បាប់៕

អត្ថបទ ៖ សេង សុវណ្ណារិទ្ធ

The post ឃាត់ខ្លួនក្មេងស្ទាវ ០៤ នាក់ ខណៈ ០៤ នាក់ទៀត កំពុងគេចខ្លួន ក្រោយវាយតប់គ្នា appeared first on Kampuchea Thmey Daily.

នាយដ្ឋានប្រឆាំងបទល្មើសបច្ចេកវិទ្យា ឃាត់ខ្លួនយុវជនម្នាក់ករណីបង្កើតហ៊្វេសបុកក្លែងក្លាយទទួលកុម្ម៉ង់សម្លាប់មនុស្ស

Kang Tola — Sat, 20 Aug 2022 14:58:06 +0000

ភ្នំពេញ ៖ កម្លាំងជំនាញ នៃនាយកដ្ឋានប្រឆាំងបទល្មើសបច្ចេកវិទ្យា បានធ្វើការឃាត់ខ្លួនយុវជនម្នាក់ ពាក់ព័ន្ធនឹងករណីញុះញង់ឱ្យប្រព្រឹត្តបទឧក្រិដ្ឋ ដោយបានបង្កើតគណនីហ្វេសប៊ុកក្លែងក្លាយឈ្មោះ “ម៉ាណា ប្រទេពស៊ីន” ហើយបានដាក់ Intro ថា មានទទួលកុម្ម៉ង់សម្លាប់មនុស្ស the wing of a devil។ ជនសង្ស័យរូបនេះក៏បានបង្ហោះខ្លឹមសារថា បាញ់លេងសោះងាប់មែនទែន និងបានបង្ហោះលក់ប៊ិចកាំភ្លើង ពាក់ព័ន្ធនឹងករណីញុះញង់ឱ្យប្រព្រឹត្តបទឧក្រិដ្ឋជាអាទិ៍។

ប្រតិបត្តិការឃាត់ខ្លួននេះបានធ្វើឡើង កាលពីថ្ងៃទី១៧ ខែសីហា ឆ្នាំ២០២២ ដោយមានការសម្របសម្រួលពីព្រះរាជអាជ្ញា នៃអយ្យការអមសាលាដំបូងរាជធានីភ្នំពេញ និងដោយមានការអនុញ្ញាតពី ឯកឧត្តម នាយឧត្តមសេនីយ៍ សន្តិបណ្ឌិត អគ្គស្នងការនគរបាលជាតិ និង ឯកឧត្តម នាយឧត្តមសេនីយ៍ ឆៃ ស៊ីណារិទ្ធ អគ្គស្នងការរងនគរបាលជាតិ។

លោកឧត្តមសេនីយ៍ឯក ជា ពៅ ប្រធាននាយកដ្ឋានប្រឆាំងបទល្មើសបច្ចេកវិទ្យា បានបញ្ជាក់ថា ប្រតិបត្តិការនេះ កម្លាំងជំនាញ បានសហការជាមួយកម្លាំងនៃស្នងការដ្ឋាននគរបាលរាជធានីភ្នំពេញ ដើម្បីធ្វើការឃាត់ខ្លួនជនសង្ស័យឈ្មោះ វុធ សុម៉ាណា ភេទប្រុស អាយុ ១៨ឆ្នាំ មុខរបរមិនពិតប្រាកដ ស្នាក់នៅរាជធានីភ្នំពេញ។

ក្រោយពីធ្វើការសាកសួរជនសង្ស័យ កម្លាំងសមត្ថកិច្ចបានរៀបចំកសាងសំណុំឯកសារនីតិវិធី ហើយត្រូវបានចៅក្រមស៊ើបសួរ នៃសាលាដំបូងរាជធានីភ្នំពេញ ចេញដីកាបង្គាប់ឱ្យឃុំខ្លួនជាបណ្តោះអាសន្ន៕

The post នាយដ្ឋានប្រឆាំងបទល្មើសបច្ចេកវិទ្យា ឃាត់ខ្លួនយុវជនម្នាក់ករណីបង្កើតហ៊្វេសបុកក្លែងក្លាយទទួលកុម្ម៉ង់សម្លាប់មនុស្ស appeared first on Kampuchea Thmey Daily.

ចាប់ខ្លួនមន្ត្រីម្នាក់បញ្ជូនទៅតុលាការ រឿងស៊ីដាច់ប្រាក់៣ម៉ឺនដុល្លារ ដើម្បីរត់ការចូលក្របខណ្ឌប៉ូលិស

Kang Tola — Fri, 19 Aug 2022 16:56:38 +0000

ភ្នំពេញ ៖ នគរបាលការិយាល័យព្រហ្មទណ្ឌកម្រិតស្រាលរាជធានីភ្នំពេញ កាលពីថ្ងៃទី១៨ ខែសីហា ឆ្នាំ២០២២ បានបញ្ជូនបុគ្គលជាមន្ត្រីរាជការម្នាក់ទៅសាលាដំបូងរាជធានីភ្នំពេញ ពាក់ពន្ធស៊ីដាច់ប្រាក់អ្នកដទៃចំនួន៣ម៉ឺនដុល្លារអាមេរិក ដើម្បីយកទៅរត់ការចូលក្របខណ្ឌនគរបាលជាតិ។

ជនសង្ស័យមានឈ្មោះ ចាន់ សំមុនី ភេទប្រុស អាយុ៣៣ ឆ្នាំ ជាមន្ត្រីរាជការបម្រើការងារនៅក្រសួងមួយ ស្នាក់នៅផ្ទះលេខ៣៨Eo ផ្លូវលេខ១៥៨ សង្កាត់ជ័យជំនះ ខណ្ឌដូនពេញ។ ជនសង្ស័យត្រូវបានសមត្ថកិច្ចឃាត់ ខ្លួនតាមដីកាបញ្ជាឲ្យចូលខ្លួនរបស់លោក សេង ហៀង ព្រះរាជអាជ្ញារង នៃអយ្យការអមសាលាដំបូងរាជធានីភ្នំពេញ ដើម្បីសាកសួរពីដំណើររឿង ឆបោក និង សមគំនិតក្នុងអំពើ មិនបំពេញកាតព្វកិច្ចចំពោះឧបករណ៍អាចជួញដូរបាន។

ករណីខាងលើនេះផ្តើមចេញពីជនសង្ស័យបានទទួលយកប្រាក់អ្នកដទៃ ប្រមាណ៣ម៉ឺនដុល្លារអាមេរិក ថាយកទៅរត់ការដើម្បីចូលក្របខណ្ឌនគរបាលជាតិ ប៉ុន្តែនៅពេលយកប្រាក់ទៅធ្វើការបែរជាមិនបានជោគជ័យ ទើបត្រូវម្ចាស់ប្រាក់គេប្តឹងឲ្យសមត្ថកិច្ចចាប់ខ្លួន។ យ៉ាងណាក្តីបើតាមចម្លើយសារភាពរបស់ជនសង្ស័យនៅសមត្តកិច្ចថា ខ្លួនគ្រាន់ តែជាសាក្សីដឹងឮ នឹងនាំដើមបណ្តឹងទៅជួបស្ត្រីម្នាក់ទៀត ឲ្យជួយរត់ការក្នុងរឿងនេះទេ លុយកាក់ស្ត្រីនោះក៏ជាអ្នកទទួលដែរ ដូច្នេះគួតែឲ្យគេរួចផុតពីការចោទប្រកាន់វិញ។

នៅថ្ងៃទី១៩ ខែសីហា សំណុំរឿងនេះត្រូវបានតំណាងអយ្យការធ្វើការចោទប្រកាន់ជាផ្លូវការ នឹងបានចាត់បញ្ជូនទៅខាងចៅក្រមស៊ើបសួរ ដើម្បីសម្រេចឃុំខ្លួន ឬមិនឃុំខ្លួនជនសង្ស័យនោះជាឆន្ទានុសិទ្ធិរបស់ចៅក្រម៕

ដោយ ៖ មករា

The post ចាប់ខ្លួនមន្ត្រីម្នាក់បញ្ជូនទៅតុលាការ រឿងស៊ីដាច់ប្រាក់៣ម៉ឺនដុល្លារ ដើម្បីរត់ការចូលក្របខណ្ឌប៉ូលិស appeared first on Kampuchea Thmey Daily.

ចាប់ខ្លួនជំនួយការឧកញ៉ាម្នាក់ បញ្ជូនទៅតុលាការពាក់ព័ន្ធនឹងលុយជាង២១ម៉ឺនដុល្លារ

Kang Tola — Mon, 27 Jun 2022 14:44:00 +0000

ភ្នំពេញ ៖ កាលពីព្រឹកថ្ងៃទី២៧ ខែមិថុនា ឆ្នាំ២០២២ នេះ កម្លាំងសមត្ថកិច្ចកងរាជអាវុធហត្ថរាជធានីភ្នំពេញ បានធ្វើការឃាត់ខ្លួនជំនួយការផ្ទាល់ឧកញ៉ាម្នាក់ បញ្ជូនទៅតុលាការពាក់ពន្ធពីបទរំលោភលើទំនុកចិត្ត និង ឆបោក លើទឹកប្រាក់ប្រមាណជាង២១ ម៉ឺនដុល្លារអាមេរិក។ ជំនួយការឧកញ៉ារូបនោះឈ្មោះ យឹង សារ៉ាត់ ភេទប្រុស អាយុ៣៨ ឆ្នាំ មានទីលំនៅភូមិទ្រាំង សង្កាត់ស្លក្រាម ក្រុង.ខេត្តសៀមរាប។

ទាក់ទិននឹងការឃាត់ខ្លួនជំនួយការឧកញ៉ាបញ្ជូនទៅតុលាការនោះ ត្រូវបានសមត្ថកិច្ចបង្ហើបឲ្យដឹងថា នៅក្នុងអំឡុងឆ្នាំ២០២១ ដើមបណ្តឹងបានបើកក្រុម ហ៊ុនមួយ ដោយតម្រូវឲ្យឈ្មោះ យឹង សារ៉ាត់ ដែលជាជំនួយការឧកញ៉ា ប្រកាសជ្រើសរើសបុគ្គលិកជាច្រើននាក់ ដើម្បីឲ្យចូលបម្រើការងារ តាមផ្នែក តាមជំនាញ ដែលក្រុមហ៊ុនត្រូវការ។ បន្ទាប់ឈ្មោះ យឹង សារ៉ាត ក៏បានជ្រើសបុគ្គលិកបានមួយចំនួនឲ្យចូលធ្វើការងារពិតប្រាកដ និង បើកប្រាក់ខែតាមការកំណត់។ ប៉ុន្តែក្រោយមកក្រុមហ៊ុនបានរកឃើញ ការដឹកនាំ និងការគ្រប់ គ្រង ចាត់ចែង លើបុគ្គលិក ដោយមានភាពអនាធិបតេយ្យរបស់ឈ្មោះ យឹង សារ៉ាត់ ធ្វើរបាយការណ៍មិនត្រឹមត្រូវ ភូតកុហកក្រុមហ៊ុន ពិសេសមានបុគ្គលិក (ខ្មោច) ដូចជាតៃកុឡាន ព្រូឡាន ឈ្មោះខ្លះឈប់ ខ្លះមិនចូលធ្វើការ នៅតែបើកប្រាក់ខែពីក្រុមហ៊ុន ដែលក្រុមហ៊ុនត្រូវបានចំណាយប្រាក់រាប់ពាន់ដុល្លារក្នុងមួយខែ ឲ្យទៅឈ្មោះ យឹង សារ៉ាត់ សម្រាប់បើកឲ្យបុគ្គលិកនោះ ។

ទីបំផុតនៅពេលគណនេយ្យក្រុមហ៊ុនបិទបញ្ជីចំណូលចំណាយប្រចាំខែ ដើម្បីរាយការជូនឧកញ៉ាម្ចាស់ក្រុមហ៊ុន ទើបដឹងពីការ បាត់បង់ថវិកានោះ លុះពេលស្រាវជ្រាវទៅក៏ធ្លាក់លើជំនួយការឧកញ៉ា ជាអ្នកកិបកេង និង ធ្វើឲ្យបាត់បង់ប្រាក់ តាមរូបភាពជ្រើសរើសបុគ្គលិក ខ្មោច ដែលម្ចាស់ក្រុមហ៊ុនទុកចិត្តជំនួយការ មិនបានតាមដានឲ្យដិតដល់ ។ តែបើតាមចម្លើយជនសង្ស័យថា ការចោទប្រកាន់នេះមិនពិតទេ ខ្លួនត្រូវបានឧកញ៉ា ចាត់តាំងឲ្យធ្វើជានាយកប្រតិបត្តិក្រុមហ៊ុន ការជ្រើសរើស និងគ្រប់គ្រងបុគ្គលិកមុនចូលបម្រើការងារ គឺសុទ្ធតែឆ្លងកាត់ការសម្ភាសន៍ជាមួយក្រុមប្រឹក្សាភិបាល និងធនធានមនុស្សរបស់ក្រុមហ៊ុន រួចបញ្ជូនទៅឧកញ៉ាថៅកែក្រុមហ៊ុនពិនិត្យសម្រេច ដើម្បីមានឈ្មោះសម្រា ប់បើកប្រាក់ខែ មិនធ្វើអ្វីតាមចិត្តទេ។

តែយ៉ាងណាក្តីសំណុំរឿងនេះបាន និងកំពុងស្ថិតនៅដំណាក់កាលស្ថាប័នអយ្យការបើកការស៊ើបសួរ ដើម្បីរកបទល្មើស និងចោទប្រកាន់ជាផ្លូវការចាត់ រួចចាត់បញ្ជូនទៅខាងចៅសម្រេចឃុំខ្លួនជនសង្ស័យ៕

ដោយ ៖ មករា

The post ចាប់ខ្លួនជំនួយការឧកញ៉ាម្នាក់ បញ្ជូនទៅតុលាការពាក់ព័ន្ធនឹងលុយជាង២១ម៉ឺនដុល្លារ appeared first on Kampuchea Thmey Daily.

ជនជាតិកូរ៉េ២នាក់ មិនបើកប្រាក់ខែ ឲ្យបុគ្គលិកស្រី១២នាក់ និងថ្លៃជួលលេងឡូតូ ត្រូវម្ចាស់សណ្ឋាគារនិងកាស៊ីណូឌឺហ្គដអហ្វិ ផ្សារព្រំ ឃាត់ខ្លួន

Kang Tola — Tue, 21 Jun 2022 14:42:50 +0000

ប៉ៃលិន ៖ តាមប្រភពព័ត៌មានមួយ បានឲ្យដឹងថា ជនជាតិចំនួន២នាក់ ត្រូវបានម្ចាស់សណ្ឋាគារ និងកាស៊ីណូឌឺហ្គដអហ្វ ស្ថិតក្នុងភូមិផ្សារព្រំ ឃុំស្ទឹងកាច់ ធ្វើការឃាត់ខ្លួន បន្ទាប់ពីជនជាតិកូរ៉េ ទាំងពីរនាក់នេះ មិនបើកប្រាក់ខែ ឲ្យបុគ្គលិកដែលជាស្ត្រីចំនួន១២ និងថ្លៃជួលតុ ដាក់លេងឡូតូ។

ការឃាត់ខ្លួននេះធ្វើឡើងកាលពីវេលាម៉ោង ២២និង០០នាទីយប់ ថ្ងៃទី២០ ខែមិថុនា ឆ្នាំ២០២២ យប់មិញ នេះបើតាមការរាយការ ពីស្ថានកុងស៊ុលកូរ៉េ នៅខេត្តសៀមរាប ជូនព័ត៌មានមកស្នងការនគរបាលខេត្តប៉ៃលិន។

តាមប្រភពព័ត៌មាន បានបង្ហើបឲ្យដឹងថា នៅព្រឹកថ្ងៃទី ២១ ខែមិថុនា ឆ្នាំ២០២២ កម្លាំងការិយាល័យស៊ើបអង្កេត និងអនុវត្តនីតិវិធី បានចុះស្រាវជ្រាវសាកសួរបំភ្លឺ ពីជនជាតិកូរ៉េទាំង០២នាក់នោះ នៅកន្លែងកើតហេតុ ក្នុងសណ្ឋាគារនឹងកាស៊ីណូ ឌឺហ្គដអហ្វិល,ស្ថិតនៅភូមិផ្សារព្រំជើង,ឃុំស្ទឹងកាច់ ស្រុកសាលាក្រៅ ខេត្តប៉ៃលិន ទើបដឹងថា ជនជាតិកូរ៉េទាំងពីរនាក់នេះ មិនបានបើកប្រាក់ខែឲ្យបុគ្គលិកស្ត្រីចំនួន១២នាក់ ព្រមទាំងថ្លៃជួលតុលែងឡូតូក្នុងកាស៊ីណូ។ ប្រភពព័ត៌មាន ក៏បានបញ្ជាក់ដែរថា ជនជាតិកូរ៉េមានឈ្មោះដូចខាងក្រោម៖

១.ឈ្មោះ GOO MINCHEOL ភេទប្រុស ខែឆ្នាំកំណើត 21-09-1987 មុខរបរ ជាអ្នកគ្រប់គ្រងឡូតូ លិខិតឆ្លងដែនលេខៈM57544382 ផុតសុពលភាពៈ1501-2027 ស្រុកកំណើតៈកើតនៅប្រទេសកូរ៉េខាងត្បូង។

២.ឈ្មោះ KIM HYOJOONG ភេទប្រុស ខែឆ្នាំកំណើត 23-11-1977 មុខរបរៈ ជាអ្នកគ្រប់គ្រងIT លិខិតឆ្លងដែនលេខៈM11131959 ផុតសុពលភាពៈ23-11-2031 ស្រុកកំណើតៈកើតនៅប្រទេសកូរ៉េខាងត្បូង។ ហើយជនជាតិកូរ៉េទាំង០២នាក់ ខាងលើ គ្រាន់តែជាតំណាងឲ្យថៅកែជាជនជាតិថៃឈ្មោះ RASSMEE SRIPUPA ភេទស្រី អាយុ ៥០ឆ្នាំ ដែលបច្ចុប្បន្នស្នាក់នៅប្រទេសថៃ ផងដែរ។

បច្ចុប្បន្នជនជាតិកូរ៉េទាំងពីរនាក់ខាងលើ ព្រមទាក់ទងទៅថៅកែថៃ ដើម្បីយកលុយមកបើកឲ្យបុគ្គលិកខ្មែរចំនួន ១២នាក់ និងថ្លៃជួលទីតាំងខាងលើផងដែរ៕

អត្ថបទ ៖ សេង សុវណ្ណារិទ្ធ

The post ជនជាតិកូរ៉េ២នាក់ មិនបើកប្រាក់ខែ ឲ្យបុគ្គលិកស្រី១២នាក់ និងថ្លៃជួលលេងឡូតូ ត្រូវម្ចាស់សណ្ឋាគារនិងកាស៊ីណូឌឺហ្គដអហ្វិ ផ្សារព្រំ ឃាត់ខ្លួន appeared first on Kampuchea Thmey Daily.

សមត្ថកិច្ចឃាត់ខ្លួនជនសង្ស័យ៣នាក់ ករណីឆបោកលក់ដូរវត្ថុអច្ឆរិយ(ថ្មស៊ីដែក)

Kang Tola — Tue, 22 Mar 2022 13:32:02 +0000

កំពង់ឆ្នាំង ៖ សមត្ថកិច្ចនគរបាលខេត្តកំពង់ឆ្នាំង បានឃាត់ខ្លួនជន សង្ស័យចំនួន៣នាក់ពាក់ព័ន្ធក្នុង ករណីឆបោកលក់ដូរវត្ថុអច្ឆរិយ(ថ្មស៊ីដែក)។ ការឃាត់ខ្លួនជនសង្ស័យខាងលើនេះ បានធ្វើឡើងនៅព្រឹកថ្ងៃទី២២ ខែមីនា ឆ្នាំ២០២២ នៅក្នុ ងភូមិត្រពាំងចាន់ ឃុំត្រពាំងចាន់ស្រុកបរិបូណ៌ ។

សមត្ថកិច្ចនគរបាលព្រហ្មទណ្ឌកម្រិតសាល នៃស្នងការដ្ឋាននគរបាលខេត្តកំពង់ឆ្នាំងបានឲ្យដឹងថា ជនសង្ស័យខាងលើនេះបានប្រព្រឹត្តការឆបោកកាលពីថ្ងៃទី១១ ខែមីនា ឆ្នាំ២០២២ វេលាម៉ោង ១៨:០០នាទី ចំណុចការ៉ាស់សាំងរបស់ឈ្មោះ ទុំ សុភី ស្ថិតក្នុងភូមិត្រពាំងចាន់ ឃុំត្រពាំងចាន់ ស្រុកបរិបូណ៍ ខេត្តកំពង់ឆ្នាំង។

ជនសង្ស័យ ដែលត្រូវបានឃាត់ខ្លួនពាក់ព័ន្ធករណីឆបោកលក់ដូរវត្ថុអច្ឆរិយ(ថ្មស៊ីដែក) រួមមាន ១- ឈ្មោះ សែម សុខុម ភេទប្រុស អា យុ ៣៦ឆ្នាំ រស់នៅភូមិទី៤ សង្កាត់បឹងសាឡាង ខណ្ឌទួលគោក រាជ ធានីភ្នំពេញ , ២-ឈ្មោះ ទៀង គឹមម៉ាប់ ភេទប្រុស អាយុ ៣៩ឆ្នាំ រស់ នៅភូមិអូរ ឃុំពន្លៃ ស្រុកបរិបូណ៌ ខេត្តកំពង់ឆ្នាំង និង ៣-ឈ្មោះខឿន សំអាត ភេទប្រុស អាយុ ៤៤ឆ្នាំ ជារស់នៅភូមិក្បាលដំរី ឃុំត្រពាំងចាន់ ស្រុកបរិបូណ៌ ខេត្តកំពង់ឆ្នាំង។

ករណីខាងលើនេះ លោកអ៊ិត សុធា ព្រះរាជអាជ្ញាអមសាលាដំបូងខេត្តកំពង់ឆ្នាំង អំពាវនាវដល់បងប្អូនប្រជាពលរដ្ឋទាំងអស់មុននឹងទិញដូរវត្ថុអ្វីមួយត្រូវគិតគូរពិចារណាឲ្យ បានត្រឹមត្រូវជៀសវាងការចាញ់បោកក្រុមជនបោក៕

ដោយ ៖ ឈៀងថារិទ្ធ

The post សមត្ថកិច្ចឃាត់ខ្លួនជនសង្ស័យ៣នាក់ ករណីឆបោកលក់ដូរវត្ថុអច្ឆរិយ(ថ្មស៊ីដែក) appeared first on Kampuchea Thmey Daily.

ទូរសព្ទបន្លំខ្លួនជាបុគ្គលិកធនាគារ បោកថាត្រូវរង្វាន់ ត្រូវសមត្ថកិច្ចឃាត់ខ្លួនបានពីរនាក់

Kang Tola — Sat, 11 Dec 2021 10:37:45 +0000

ភ្នំពេញ ៖ កម្លាំងសមត្ថកិច្ចនាយកដ្ឋានប្រឆាំងបទល្មើសបច្ចេកវិទ្យា បានធ្វើការបង្ក្រាបជនសង្ស័យចំនួន០២នាក់ ដែលជាមុខសញ្ញាសកម្មឆបោកប្រាក់ពីជនរងគ្រោះ តាមរយៈការបង្កើតកម្មវិធីទូរសព្ទឈ្នះរង្វាន់ពីប្រព័ន្ធធនាគារចល័ត។

ក្នុងប្រតិបត្តិការនេះ បានធ្វើឡើងនៅថ្ងៃពុធ ទី០៨ ខែធ្នូ ឆ្នាំ២០២១ ដោយមានការសម្របសម្រួលពី ឯកឧត្តម ព្រះរាជអាជ្ញា នៃអយ្យការអមសាលាដំបូងរាជធានីភ្នំពេញ និងបានការអនុញាតពី ឯកឧត្តម នាយឧត្តមសេនីយ៍ សន្តិបណ្ឌិត អគ្គស្នងការនគរបាលជាតិ ឯកឧត្តម នាយឧត្តមសេនីយ៍ ឆៃ ស៊ីណារិទ្ធ អគ្គស្នងការរងនគរបាលជាតិ និងក្រោមការចង្អុលបង្ហាញបញ្ជាផ្ទាល់ពី លោកឧត្តមសេនីយ៍ឯក ជា ពៅ ប្រធាននាយកដ្ឋានប្រឆាំងបទល្មើសបច្ចេកវិទ្យា។

លោកឧត្តមសេនីយ៍ឯក ជា ពៅ បានបញ្ជាក់ថា ប្រតិបត្តិការនេះកម្លាំងជំនាញ បានសហការជាមួយកម្លាំងសមត្ថកិច្ចនៃស្នងការដ្ឋាននគរបាលរាជធានីភ្នំពេញ ដោយបង្ក្រាបបានជនសង្ស័យ០២នាក់ឈ្មោះ ម៉េន វាសនា ហៅ យួស សុផារីណូ ហៅ ស្នា ភេទប្រុស អាយុ២៦ឆ្នាំ មុខរបរមិនពិតប្រាកដ ស្នាក់នៅរាជធានីភ្នំពេញ និងឈ្មោះ ប្រាក់ វណ្ណារ៉ុង ហៅ ប៊ី ភេទប្រុស អាយុ៣៤ឆ្នាំ មុខរបរមិនពិតប្រាកដ ស្នាក់នៅរាជធានីភ្នំពេញ ។ លោកឧត្តមសេនីយ៍ឯក បានបន្ថែមថា មុខសញ្ញាសកម្មដែលកម្លាំងជំនាញបង្ក្រាបនេះ តែងតែធ្វើសកម្មភាពក្លែងខ្លួនធ្វើជាបុគ្គលិកធនាគារ ហើយលួងលោមជនរងគ្រោះបង្កើតកម្មវិធីធនាគារនឹងទទួលបានប្រាក់រង្វាន់ ដោយគ្រាន់តែចូលផ្លាស់ប្តូរលេខកូដសម្ងាត់តាមដែលខ្លួនណែនាំ រួចផ្ញើលេខកូដសម្ងាត់ខ្លួន ដើម្បីឱ្យខ្លួនបញ្ចូលប្រាក់រង្វាន់។

បច្ចុប្បន្ន ជនសង្ស័យត្រូវបានកម្លាំងជំនាញសាកសួរ និងកសាងសំណុំរឿងបញ្ជូនទៅសាលាដំបូងរាជធានីភ្នំពេញ ដើម្បីចាត់ការតាមនីតិវិធី ។ ជាមួយគ្នានេះដែរ សមត្ថកិច្ច សូមធ្វើការក្រើនរំឮកដល់បងប្អូន ដែលតែងតែប្រើប្រាស់ប្រព័ន្ធធនាគារចល័ត សូមប្រុងប្រយ័ត្នខ្ពស់ ជៀសវាងការចាញ់បោកជនខិលខូច ដែលលួងលោមឱ្យបង្ហាញលេខកូដសម្ងាត់ធនាគារ រួចអាចទទួលប្រាក់រង្វាន់នានា៕

ប្រភព ៖ នាយកដ្ឋានប្រឆាំងបទល្មើសបច្ចេកវិទ្យា

The post ទូរសព្ទបន្លំខ្លួនជាបុគ្គលិកធនាគារ បោកថាត្រូវរង្វាន់ ត្រូវសមត្ថកិច្ចឃាត់ខ្លួនបានពីរនាក់ appeared first on Kampuchea Thmey Daily.

ឃាត់ខ្លួន Archives - Kampuchea Thmey Daily

ករណីធ្វើទារុណកម្មស្លាប់ជនជាតិចិននៅខេត្តប៉ៃលិន៖ ចាប់ខ្លួនជនជាតិចិន-ខ្មែរ ៧នាក់ បន្តស្រាវជ្រាវម្នាក់ទៀត

ឃាត់ខ្លួនក្មេងស្ទាវ ០៤ នាក់ ខណៈ ០៤ នាក់ទៀត កំពុងគេចខ្លួន ក្រោយវាយតប់គ្នា

ចាប់ខ្លួន​ជំនួយការ​ឧកញ៉ា​ម្នាក់ បញ្ជូន​ទៅ​តុលាការ​ពាក់​ព័ន្ធ​នឹង​លុយ​ជាង​២១​ម៉ឺន​ដុល្លារ

សមត្ថកិច្ច​ឃាត់ខ្លួន​ជនសង្ស័យ​៣​នាក់ ករណី​ឆបោក​លក់ដូរ​វត្ថុ​អច្ឆរិយ​(​ថ្ម​ស៊ី​ដែក​)

ទូរសព្ទ​បន្លំ​ខ្លួនជាបុគ្គលិកធនាគារ បោក​ថា​ត្រូវ​រង្វាន់ ត្រូវ​សមត្ថកិច្ចឃាត់ខ្លួនបានពីរនាក់

ចាប់ខ្លួនជំនួយការឧកញ៉ាម្នាក់ បញ្ជូនទៅតុលាការពាក់ព័ន្ធនឹងលុយជាង២១ម៉ឺនដុល្លារ

សមត្ថកិច្ចឃាត់ខ្លួនជនសង្ស័យ៣នាក់ ករណីឆបោកលក់ដូរវត្ថុអច្ឆរិយ(ថ្មស៊ីដែក)

ទូរសព្ទបន្លំខ្លួនជាបុគ្គលិកធនាគារ បោកថាត្រូវរង្វាន់ ត្រូវសមត្ថកិច្ចឃាត់ខ្លួនបានពីរនាក់