ចាន់ វឌ្ឍនាកា Archives - Kampuchea Thmey Daily

លោក Conor ប្រាប់ថា ចាន់ វឌ្ឍនាកា មានឱកាសលេង នៅថ្ងៃស្អែកក្នុងពានសម្តេចតេជោ

chean virakbot — Tue, 20 Jan 2026 04:07:50 +0000

ក្លិបបាល់ទាត់ បឹងកេត បានបញ្ចេញបញ្ជីឈ្មោះកីឡាករ ១៨ នាក់ ដែលត្រូវធ្វើដំណើរទៅប្រកួតជាមួយក្រុមឡាយអ៉ិនឃីង ខេត្តសៀមរាប ជើងទី១ វគ្គ១៦ ក្រុមចុងក្រោយ ពានរង្វាន់សម្តេចអគ្គមហាសេនាបតីតេជោ ហ៊ុន សែន លើកទី១៩ នៅថ្ងៃទី២១ ខែមករា ឆ្នាំ ២០២៦ នៅខេត្តសៀមរាប។

ក្រុមបឹងកេត

ក្នុងចំណោមកីឡាករ ១៨ នាក់ មានខ្សែប្រយុទ្ធ ៣ នាក់ដែលមានកីឡាករ ចាន់ វឌ្ឍនាកា, អ៊ាវ សុវណ្ណដារ៉ា និងកីឡាករ Bevn Myer។ អ្វីដែលគួរឲ្យចាប់អារម្មណ៍គឺ ចាន់ វឌ្ឍនាកា ដែលមិនទាន់បង្ហាញខ្លួននៅលើទីលានទេ ក្នុងលីគបាល់ទាត់កំពូលកម្ពុជា ដោយសាររូបគេមានបញ្ហារបួសជាច្រើនខែមកហើយដែល ទើបតែល្អប្រសើរប៉ុណ្ណោះ។

កីឡាករ ចាន់ វឌ្ឍនាកា

ទោះបីជាយ៉ាងណា ក្នុងពានរង្វាន់សម្តេចតេជោ ជើងទី១ វគ្គ ១៦ ក្រុមចុងក្រោយនេះ ចាន់ វឌ្ឍនាកា អាចមានឱកាសបង្ហាញខ្លួននៅលើទីលាន ដោយសារ បឹងកេត ជួប ក្រុមឡាយអ៉ិនឃីង ខេត្តសៀមរាប ដែលមានកម្រិតសមត្ថភាពទាប។

ក្រុមព្រះខ័នរាជស្វាយរៀង

លោក Conor Nestor គ្រូបង្វឹក បឹងកេត បានប្រាប់«កម្ពុជាថ្មី»ថា ៖«ចាន់ វឌ្ឍនាកា មានឈ្មោះក្នុងបញ្ជី ១៨នាក់ហើយ ដូច្នេះរូបគេមានឱកាសលេងនៅលើទីលាន»។

ចាន់ វឌ្ឍនាកា បានរបួសសសៃជើង ACL ដែលបានកើតមានឡើងក្នុងការប្រកួតរបស់ បឹងកេត ជាមួយក្រុមខេត្តកំពង់ចាម ខែមករា ឆ្នាំ២០២៥ ជើងទី១ វគ្គ១៦ក្រុមចុងក្រោយ ពានរង្វាន់សម្តេចតេជោ ហ៊ុន សែន ថ្នាក់ជាតិ រដូវកាល២០២៤-២៥។ គិតរហូតដល់ពេលនេះមានរយៈពេលជាងមួយឆ្នាំហើយដែលរូបគេបានព្យាបាលរបួស និងមិនបានបង្ហាញខ្លួននៅលើទីលាន។

ក្រុមភ្នំពេញក្រោន

សូមបញ្ជាក់ថា ក្រុមនៃលីគកំពូលកម្ពុជា ចំនួន ៤ ត្រូវប្រកួតក្នុងពានរង្វាន់សម្តេចតេជោ ហ៊ុន សែន លើកទី១៩ ជើងទី១ វគ្គ ១៦ ក្រុមចុងក្រោយ នៅថ្ងៃស្អែក ទី២១ ខែមករា ឆ្នាំ ២០២៦។

ក្រុមបាត់ដំបង យូណៃធីត vs ព្រះខ័នរាជស្វាយរៀង នៅទីលានសាកលវិទ្យាល័យ បាត់ដំបង
ក្រុមខេត្តត្បូងឃ្មុំ vs ភ្នំពេញក្រោន នៅទីលានវិទ្យាល័យ ប៊ុនរ៉ានី ហ៊ុនសែន មេមត់
ក្រុមឡាយអ៉ិនឃីង ខេត្តសៀមរាប vs បឹងកេត នៅកីឡដ្ឋាន អាគីហ៊ីរីរូកាតុ
ក្រុមភ្នំពេញហ្គាឡាក់ស៊ី vs វិសាខា នៅទីលានវិទ្យាស្ថានជាតិអប់រំកាយ និងកីឡា

ក្រុមវិសាខា

ការប្រកួតនៅវេលាម៉ោង ៣:៣០នាទី រសៀលដូចគ្នា៕

អត្ថបទ៖ វិរបុត្រ

The post លោក Conor ប្រាប់ថា ចាន់ វឌ្ឍនាកា មានឱកាសលេង នៅថ្ងៃស្អែកក្នុងពានសម្តេចតេជោ appeared first on Kampuchea Thmey Daily.

កីឡាករកម្ពុជា ៣ នាក់ទាយ Liverpool ខណៈ វឌ្ឍនាកា យក Man United ឈ្នះលីគអង់គ្លេសឆ្នាំនេះ

Kosal Sem — Sat, 23 Aug 2025 07:20:48 +0000

កីឡាករជម្រើសជាតិ កម្ពុជា ឆ្នើមៗ ៣ រូបបានព្យាករក្រុម Liverpool នឹងអាចឈ្នះពានលីគកំពូល អង់គ្លេស Premier League រដូវកាល ២០២៥-២០២៦ លើកលែងតែខ្សែប្រយុទ្ធរបស់ បឹងកេត កីឡាករ ចាន់ វឌ្ឍនាកា ជ្រើសរើសយក Manchester United។

ចាន់ វឌ្ឍនាការ

ថ្មីៗនេះតាមរយៈការឆ្លើយឆ្លងសារអេឡិចត្រូនិចជាមួយ Seasia goal កីឡាករជម្រើសជាតិ កម្ពុជា Nick Taylor, Andreas Nieto និងប្រធានក្រុម កាន់ ម៉ូ បានព្យាករដូចៗគ្នា ថា Liverpool នឹងអាចឈ្នះពាន Premier League។

ដោយឡែកកីឡាករ កម្ពុជា ម្នាក់ទៀត គឺម្ចាស់អាវលេខ ១១ ចាន់ វឌ្ឍនាកា ក៏បានព្យាករអំពីក្រុមឈ្នះពានលីគកំពូល អង់គ្លេស រដូវកាលនេះផងដែរ ដោយតាមរយៈវីដេអូសម្ភាសជាមួយក្លិប បឹងកេត រូបគេបានទាយច្បាស់ៗថា ក្រុមបិសាចក្រហម Man United នឹងឈ្នះពាន Premier League ឆ្នាំនេះ។

ខាងលើនេះ ជាទស្សនៈរបស់កីឡាករ កម្ពុជា ដែលព្យាករអំពីក្រុមខ្លួនស្រឡាញ់នឹងអាចឈ្នះពាន Premier League រដូវកាលនេះ។ យ៉ាងណាមិញ បើក្រឡេកមើលអំពីការប្រកួតពាន Premier League រដូវកាលនេះ ឃើញថាក្រុមការពារតំណែងជើងឯក Liverpool នៅតែបន្តធ្វើបានល្អ ដោយឆ្លងកាត់ការប្រកួតសប្តាហ៍ដំបូង ពួកគេបានឈ្នះក្រុម Bournemouth ៤-២។ ដោយឡែក Man United វិញ គឺធ្វើមិនបានល្អនោះទេ ដោយពួកគេបរាជ័យក្រោមថ្វីជើងក្រុម Arsenal ក្នុងលទ្ធផល ១ ទល់នឹង ០៕

កីឡាករទាំង ៤ នាក់ព្យាករក្រុមឈ្នះពាន Premier League រដូវកាលនេះ

អត្ថបទ៖ សេម កុសល

The post កីឡាករកម្ពុជា ៣ នាក់ទាយ Liverpool ខណៈ វឌ្ឍនាកា យក Man United ឈ្នះលីគអង់គ្លេសឆ្នាំនេះ appeared first on Kampuchea Thmey Daily.

សោកស្តាយ ចាន់ វឌ្ឍនាកា របួសដាច់សរសៃ ACL ជាថ្មី

chean virakbot — Thu, 16 Jan 2025 08:53:49 +0000

ក្លិបបាល់ទាត់បឹងកេតបានប្រកាសពីកីឡាករ ចាន់ វឌ្ឍនាកា ដាច់សរសៃ ACL ដែលរបួសបានកើតមានឡើងក្នុងការប្រកួតរបស់ក្លិបជាមួយក្រុមខេត្តកំពង់ចាម កាលពីថ្ងៃទី១៥ ខែមករា ឆ្នាំ២០២៥ ជើងទី១ វគ្គ១៦ក្រុមចុងក្រោយ ពានរង្វាន់សម្តេចតេជោ ហ៊ុន សែន ថ្នាក់ជាតិ រដូវកាល២០២៤-២៥។

ក្លិបបានប្រកាសព័ត៌មានជាផ្លូវការនៅរសៀលថ្ងៃទី១៦ ខែមករា ឆ្នាំ២០២៥ថា ៖«ក្លិបកីឡាបាល់ទាត់បឹងកេតពិតជាសោកស្ដាយ បន្ទាប់ពីទទួលបានលទ្ធផលស្គែន MRI ជង្គង់ខាងឆ្វេងរបស់កីឡាករ ចាន់ វឌ្ឍនាកា នៅថ្ងៃនេះ ដែលបង្ហាញថា ACL ជង្គង់ឆ្វេងរបស់ វឌ្ឍនាកា បានដាច់ ហើយទ្រនាប់ឆ្អឹងខ្ចីជង្គង់របស់គេបានបែក បន្ទាប់ពីបានរងរបួសអំឡុងការប្រកួតទល់នឹង ក្រុមខេត្តកំពង់ចាម ម្សិលមិញ ក្នុងពានរង្វាន់សម្ដេចអគ្គមហាសេនាបតីតេជោហ៊ុនសែន២០២៤-២៥។ ក្លិបសូមជូនពរ វឌ្ឍនាកា ឆាប់បានជាសះស្បើយ»។

ចាន់ វឌ្ឍនាកា បានវិលត្រឡប់មកកាន់ទីលានវិញកាលពីខែមីនា ឆ្នាំ២០២៣ បន្ទាប់ពីបានរបូស ACL ជង្គង់ខាងស្តាំក្នុងការប្រកួតជាមួយវិសាខា ក្នុងពានរង្វាន់ Prince Beer Pre-season Cup ថ្ងៃទី ២៦ ខែមករា ឆ្នាំ ២០២២ នៅកីឡដ្ឋានព្រីនស៍។

រូបគេបានសម្រាកព្យាបាលរយៈពេលជាង១ឆ្នាំទើបបានចូលប្រកួតវិញនាមជាកីឡាករផ្លាស់ប្ដូរចូល នៅនាទី៦២ ពេលបឹងកេត ប្រកួត ក្រសួងការពារជាតិ នៅថ្ងៃទី៥ ខែមីនា ឆ្នាំ២០២៣។ ការវិលត្រឡប់មកកាន់ទីលានវិញ រូបគេមិនសូវបានបង្ហាញខ្លួនញឹកញាប់ទេ។ ម្តងម្កាល រូបគេត្រូវបានប្តូរចូលក្នុងវគ្គទី២ ប៉ុន្តែត្រូវបានកោះហៅចូលជម្រើសជាតិកម្ពុជាកាលពីខែកញ្ញា ឆ្នាំ២០២៣ ក្រោមការដឹកនាំរបស់លោក Felix Dalmas ក្នុងការប្រកួតមិត្តភាពអន្តរជាតិជាមួយហុងកុង។

ក្រោយមក ចាន់ វឌ្ឍនាកា ក៏បានរបួសជាថ្មីដែលធ្វើឲ្យរូបគេមិនសូវបានបង្ហាញខ្លួននៅលើទីលាននៅដើម្បីរដូវកាលថ្មី២០២៤-២៥ ហើយ ពេលនេះរបួសដាច់ ACL ខាងឆ្វេងវិញម្តង។

កាលពីពេលថ្មីៗកន្លងទៅនេះ ចាន់ វឌ្ឍនាកា បានប្តេជ្ញាខិតខំប្រឹងប្រែងជាថ្មីដើម្បីទទួលបានឱកាសជាប់ជម្រើស១១នាក់ដំបូង និងជាប់ជម្រើសជាតិកម្ពុជាជាថ្មី បន្ទាប់ពីខកខានជាច្រើន៕

អត្ថបទ៖ វីរបុត្រ

The post សោកស្តាយ ចាន់ វឌ្ឍនាកា របួសដាច់សរសៃ ACL ជាថ្មី appeared first on Kampuchea Thmey Daily.

ចាន់ វឌ្ឍនាកា ប្រាប់កន្លែងសំខាន់៣ដែលជាបទពិសោធថ្មីនៅទឹកដី Aston Villa

chean virakbot — Wed, 20 Dec 2023 03:02:11 +0000

កីឡាករបាល់ទាត់ជម្រើសជាតិកម្ពុជា និងបឹងកេត ចាន់ វឌ្ឍនាកា បានទម្លាយឲ្យដឹងពីចំណេះដឹងថ្មីក្នុងបាល់ទាត់សម័យទំនើប នៅពេលរូបគេបានទៅទស្សនកិច្ចក្លិប Aston Villa របស់អង់គ្លេសកាលពីសប្តាហ៍មុន។

ចាន់ វឌ្ឍនាកា បានឲ្យដឹងថា រូបគេទទួលបានបទពិសោធថ្មីៗជាច្រើននៅពេលទៅទស្សនកិច្ចក្លិប Aston Villa ដែលជាផ្នែកដ៏សំខាន់ធ្វើឲ្យក្លិបបាល់ទាត់អង់គ្លេសមួយនេះស្ថិតនៅក្នុងកម្រិតស្តង់ដា និងលក្ខណៈអាជីពស្របតាមបាល់ទាត់សម័យទំនើប។

សមាជិកក្លិបបឹងកេតរូបនេះបានបង្ហាញកន្លែង៣សំខាន់គឺ១. ហាងលក់សម្លៀកបំពាក់ និងវត្ថុអនុស្សាវរីយ៍, ២. ទីលានហ្វឹកហាត់ និងកន្លែងធ្វើការងារជំនាញរបស់បុគ្គលិក និង៣.ទីលានប្រកួតផ្លូវការ។

ចាន់ វឌ្ឍនា បានរៀបរាប់ថា ៖«Villastor គឺជាកន្លែងលក់សម្ភារ និងវត្ថុអនុស្សាវរីយ៍របស់ក្លិប។ Bodymoor Health Training Ground គឺជាកន្លែងហ្វឹកហាត់សម្រាប់ក្រុម Aston villa ដែលមានដូចជា ទីលានហ្វឹកហាត់ បន្ទប់សម្រាប់បុគ្គលិកធ្វើការទៅតាមជំនាញរបស់ពួកគាត់ បន្ទប់សម្រាប់ព្យាបាល កន្លែងហ្វឹកហាត់សាច់ដុំ (gym) និងអាហារដ្ឋានសម្រាប់កីឡាករ និងបុគ្គលិក។ Villa Park គឺជាស្តាតសម្រាប់ការប្រកួត ដែលពេលនោះខ្ញុំក៏បានចូលរួមទស្សនាការប្រកួត១ប្រកួតផងដែ និងបានចូលទស្សនកិច្ចផ្ទាល់ក្នុងបន្ទប់ផ្លាស់សម្លៀលបំពាក់ផ្ទាល់កីឡាករ»។

កីឡាកររូបនេះបានបញ្ជាក់ថា នេះជាការរៀនសូត្រចំណេះដឹងថ្មីដែលត្រូវយកមកចែករំលែកក៏ដូចជាអភិវឌ្ឍបាល់កម្ពុជានាពេលបច្ចុប្បន្ន និងថ្ងៃអនាគត។

ចាន់ វឌ្ឍនាកា និង ស៊ូ យ៉ាទី កាលពីថ្ងៃទី១១ ខែធ្នូ បានជួបផ្ទាល់កីឡាកររបស់ក្លិប Aston Villa ៣រូបគឺខ្សែការពារសញ្ជិអង់គ្លេស Matty Cash, ខ្សែការពារកណ្តាលសញ្ជាតិអង់គ្លេស Ezri Konsa និងខ្សែបម្រើកណ្តាលសញ្ជាតិស្លុតឡេន John McGinn ដែលជាប្រធានក្រុម៕

អត្ថបទ៖ វីរបុត្រ

The post ចាន់ វឌ្ឍនាកា ប្រាប់កន្លែងសំខាន់៣ដែលជាបទពិសោធថ្មីនៅទឹកដី Aston Villa appeared first on Kampuchea Thmey Daily.

ថ្ងៃនេះ ចាន់ វឌ្ឍនាកា និង ស៊ូ យ៉ាទី ជួបកីឡាករ Aston Villa ៣នាក់

chean virakbot — Mon, 11 Dec 2023 02:40:49 +0000

កីឡាករបាល់ទាត់កម្ពុជា ចាន់ វឌ្ឍនាកា និង ស៊ូ យ៉ាទី តាមការគ្រោងទុកនៅថ្ងៃចន្ទ ទី១១ ខែធ្នូ នឹងជួបផ្ទាល់កីឡាកររបស់ក្លិប Aston Villa ៣រូប បន្ទាប់ពីបានទស្សនាការប្រកួតរបស់ក្លិបអង់គ្លេសមួយនេះកាលពីអាទិត្យ។

ខ្សែប្រយុទ្ធរបស់ក្លិបបឹងកេត ចាន់ វឌ្ឍនាកា និង អ្នកចាំទីរបស់ ណាហ្គាវើលដ៍ ស៊ូ យ៉ាទី ត្រូវបានដៃគូរបស់ក្លិបបាល់ទាត់អង់គ្លេស Aston Villa អញ្ជើញទៅទស្សនា និងទស្សនកិច្ចកាលពីសប្តាហ៍មុន។ បន្ទាប់ពីបានទៅដល់កីឡាករកម្ពុជាទាំងពីររូបបានទស្សនាការប្រកួតសំខាន់នៅពេល Aston Villa ដែលកំពុងឡើងជើងបានយកឈ្នះក្រុមកាំភ្លើងធំ Arsenal ដោយលទ្ធផល ១-០ នៅកីឡដ្ឋាន Villa Park។

សប្តាហ៍នេះ ចាន់ វឌ្ឍនាកា និង ស៊ូ យ៉ាទី មានសកម្មភាពមួយចំនួនទៀតដូចជាទស្សនាហេដ្ឋារចនាសម្ព័ន្ធកីឡដ្ឋាន Villa Park ទស្សនាទីលានហ្វឹកហាត់ ការណ្តុះបណ្តាលថ្នាលយុវជន ក៏ដូចជាផ្សាររបស់ក្លិបគឺ Villa Shop។

ជាពិសេសកីឡាករកម្ពុជាទាំងពីររូបនឹងបានជួបផ្ទាល់កីឡាករ Aston Villa ៣នាក់គឺខ្សែការពារសញ្ជិអង់គ្លេស Matty Cash, ខ្សែការពារកណ្តាលសញ្ជាតិអង់គ្លេស Ezri Konsa និងខ្សែបម្រើកណ្តាលសញ្ជាតិស្លុតឡេន John McGinn ដែលជាប្រធានក្រុម។ ពួកគេក៏មានការប្រកួតលក្ខណៈ Challenge ដើម្បីដកស្រង់បទពិសោធ និងបង្កើនភាពសប្បាយរីករាយ។

ឆ្លងកាត់ការប្រកួត១៦សប្តាហ៍ Aston Villa បានឈ្នះ១១ ស្មើ២ និងចាញ់៣ មាន៣៥ពិន្ទុ កំពុងឈរលេខ៣ក្នុងតារាងតាមពីក្រោយក្រុមលេខ២ Aston Villa មាន៣៦ពិន្ទុ និងក្រុមលេខ១ Liverpool មាន៣៧ពិន្ទុ៕

អត្ថបទ៖ វីរបុត្រ

The post ថ្ងៃនេះ ចាន់ វឌ្ឍនាកា និង ស៊ូ យ៉ាទី ជួបកីឡាករ Aston Villa ៣នាក់ appeared first on Kampuchea Thmey Daily.

អវត្តមាន Privat និង វឌ្ឍនាកា ធ្វើឲ្យកម្ពុជាកាន់តែជួបបញ្ហាក្នុងតំបន់ប្រយុទ្ធ

Pha Rothana — Tue, 17 Oct 2023 08:02:27 +0000

ក្រុមជម្រើសជាតិកម្ពុជាត្រូវជួបជាមួយក្រុមជម្រើសជាតិប៉ាគីស្ថានក្នុងការប្រកួតជើងទី២ វគ្គជម្រុះបឋមពានរង្វាន់ពិភពលោកឆ្នាំ២០២៦ នៅកីឡដ្ឋាន Jinnah ក្នុងទីក្រុង អីស្លាម៉ាបាដ វេលាម៉ោង៤ រសៀល។

ការប្រកួតជើងទី២កម្ពុជានៅតែជួបបញ្ហាកង្វះកីឡាករនៅតំបន់ប្រយុទ្ធដោយសារកីឡាករដើមកំណើតកាមេរូន ទើបចូលសញ្ជាតិកម្ពុជា Privat Mbarga និងកីឡាករ ចាន់ វឌ្ឍនាកា នៅតែមិនបន្តចូលរួមជាមួយក្រុមជម្រើសជាតិ។ ក្រុមកម្ពុជានឹងត្រូវធ្វើការធ្ងន់នារសៀលនេះ ដោយសារការប្រកួតជើងទី១នៅពហុកីឡដ្ឋានជាតិអូឡាំពិកបានត្រឹមលទ្ធផល ០-០ ក្នុងនាមម្ចាស់ផ្ទះ។

ការប្រកួតជើងទី១ កម្ពុជាធ្វើមិនបានល្អទេ ដោយពិបាករកឱកាសក្នុងការស៊ុតសំដៅទីលើក្រុមប៉ាគីស្ថាន។ ការប្រកួត៩០នាទីពេញកម្ពុជាស៊ុតបាន៩លើក ប៉ុន្តែចំគោលដៅតែ២លើកប៉ុណ្ណោះ។ ចំពោះខ្សែប្រយុទ្ធ២រូបកីឡាករ ឃាន់ សុប៉ិន និង រុឹង ប៊ុនហៀង ដែលលោក Félix Dalmás ជ្រើសរើសមកគឺសុទ្ឌតែជាកីឡាករដែលមាននាទីលេងតិចក្នុងលីគកំពូលកម្ពុជា។ នេះក៏ជាហេតុមួយដែលធ្វើឲ្យកម្ពុជាជួបបញ្ហាក្នុងតំបន់ប្រយុទ្ធ។ លោក Félix ក៏ធ្លាប់លើកឡើងពីបញ្ហាកង្វះខ្សែប្រយុទ្ធក្នុងប្រអប់ ដោយសារក្លិបនៅលីគកំពូលកម្ពុជាភាគច្រើនគឺប្រើប្រាស់ធនធានកីឡាករបរទេសក្នុងតំបន់ប្រយុទ្ធ។

ក្នុងជំនួបរសៀលនេះសមាជិកភ្នំពេញក្រោន៤រូបគឺកីឡាករ Yudai Ogawa, អ៊ន ចាន់ប៉ូលីន, យ៉ើ មូស្លីម និងកីឡារ ជួន ចាន់ចាវ នឹងក្លាយជាតួអង្គដ៏សំខាន់ក្នុងតំបន់បម្រើកណ្ដាលនិងតំបន់ការពារ។ ការប្រកួតជើងទី១ សមាជិកភ្នំពេញ៤រូបនេះពិតជាធ្វើបានល្អមែនទែន ជាពិសេសកីឡាករ Yudai Ogawa លេង៩០នាទីហើយបំពេញតួនាទីរបស់ខ្លួនក្នុងតំបន់បម្រើកណ្តាលបានយ៉ាងល្អ។ រូបគេក៏ជាប់ឈ្មោះជាកីឡាករដែលលេងល្អបំផុតក្នុងការប្រកួតនោះផងដែរ៕

អត្ថបទ៖ ផា រតនា

The post អវត្តមាន Privat និង វឌ្ឍនាកា ធ្វើឲ្យកម្ពុជាកាន់តែជួបបញ្ហាក្នុងតំបន់ប្រយុទ្ធ appeared first on Kampuchea Thmey Daily.

កំណត់ត្រា២របស់ ចាន់ វឌ្ឍនាកា ក្នុងលីគកម្ពុជាមិនទាន់មានកីឡាករណាបំបែកបាន

chean virakbot — Thu, 14 Sep 2023 02:13:45 +0000

គិតត្រឹមសប្ដាហ៍ទី៥ក្នុងពានរង្វាន់ខេមបូឌានព្រីមៀរ រដូវកាល ២០២៣-២៤ ខ្សែប្រយុទ្ធវ័យ២៩ឆ្នាំ ចាន់ វឌ្ឍនាកា កំពុងកាន់កាប់កំណត់ត្រា២ដោយមិនទាន់មានកីឡាករណាអាចបំបែកបានឡើយ។

កំណត់ត្រា១ ចាន់ វឌ្ឍនាកា ជាកីឡាករស៊ុតបញ្ចូលទីច្រើនបំផុតក្នុងមួយរដូវកាលនៃលីគកំពូលកម្ពុជា។ រដូវកាលឆ្នាំ២០១៥ រូបគេរកបាន៣៧គ្រាប់បានក្លាយជាម្ចាស់ស្បែកជើងមាស។ បច្ចុប្បន្ននេះ មិនទាន់មានកីឡាកររូបណាអាចបំបែកកំណត់ត្រាស៊ុតបញ្ចូលទីលើសរូបគេឡើយ។ នៅឆ្នាំ២០១៥នោះ រូបគេបានឈ្នះពានជាកីឡាករឆ្នើមប្រចាំរដូវកាលលថែមទៀត។

កំណត់ត្រាទី២ ចាន់ វឌ្ឍនាកា ជាកីឡាករដែលរកបានគ្រាប់បាល់សរុបច្រើនជាងគេបំផុតក្នុងប្រវត្តិសាស្រ្តលីគកំពូលកម្ពុជា ដែលរហូតដល់ពេលនេះរកគ្រាប់បាន១៥៩គ្រាប់ ក្នុងការបង្ហាញខ្លួនបាន១៤២លើក។ គិតត្រឹមរដូវកាលឆ្នាំ២០២៣-២៤ នេះមិនទាន់មានកីឡាកររូបណាអាចធ្វើបានទេ។

បើនិយាយពីជម្រើសជាតិកម្ពុជាវិញ ចាន់ វឌ្ឍនាកា បានបង្ហាញខ្លួននៅលើទីលានឲ្យឈុតធំប្រមាណ៥២ដង និងរកបាន១៩គ្រាប់។ ចំណែកនៅឈុតយុវជនចាប់ពីអាយុ១៩ឆ្នាំ ដល់២៣ឆ្នាំ ក៏បង្ហាញខ្លួនបានច្រើនលើក និងរកបានគ្រាប់បាល់ជាច្រើនដែរ។

ចាន់ វឌ្ឍនាកា ជាកីឡាករដែលមានបទពិសោធច្រើនទាំងក្នុងស្រុក ក្រៅប្រទេស និងជម្រើសជាតិកម្ពុជាចាប់ពីឈុតយុវជនរហូតដល់ឈុតធំ។ កាលពីឆ្នាំ២០១៧ រូបគេបានផ្ទេរទៅក្លិប Fujiieda MYFC ក្នុងលីគទី២របស់ប្រទេសជប៉ុន បន្ទាប់មកឆ្នាំ២០១៨ ចូលរួមជាមួយក្លិប Pahang FC និងឆ្នាំ២០១៩ ចូលរួមជាមួយក្លិប PKNS នៃលីគកំពូលរបស់ប្រទេសម៉ាឡេស៊ី មុនពេលវិលចូលបឹងកេតវិញ៕

អត្ថបទ៖ ផា រតនា

The post កំណត់ត្រា២របស់ ចាន់ វឌ្ឍនាកា ក្នុងលីគកម្ពុជាមិនទាន់មានកីឡាករណាបំបែកបាន appeared first on Kampuchea Thmey Daily.

ចាន់ វឌ្ឍនាកា និង ប្រាក់ មុន្នីឧត្តម វិលមកជម្រើស១១នាក់ដំបូងគួរឲ្យចាប់អារម្មណ៍

chean virakbot — Mon, 14 Aug 2023 01:31:14 +0000

ខ្សែប្រយុទ្ធ ចាន់ វឌ្ឍនាកា និង ប្រាក់ មុន្នីឧត្តម បានបង្ហាញខ្លួនពីរប្រកួតជាប់គ្នាគួរឲ្យចាប់អារម្មណ៍សម្រាប់ការប្រកួតខេមបូឌានព្រីមៀរលីគរដូវកាល២០២៣-២៤ដែលបានដំណើរ២សប្តាហ៍។

ចាន់ វឌ្ឍនា ទើបតែវិលត្រឡប់មកកាន់ទីលានវិញកាលពីដើមរដូវកាលនេះក្នុងពានរង្វាន់បើករដូវកាលខេមបូឌានលីគខាប់ឲ្យបឹងកេត បន្ទាប់ពីរូបគេបានចំណាយពេលជាងមួយឆ្នាំក្នុងការព្យាបាលរបួសកាលពីរដូវកាល២០២២។ រូបគេបានរបួសក្នុងពេលប្រកួតពានរង្វាន់បើករដូវកាល២០២២ ប៉ុន្តែនៅដើមរដូវកាល២០២៣-២៤ លោកគ្រូបង្វឹកសិង្ហបុរីដាក់ឲ្យចូលលេងក្នុងពានរង្វាន់បើករដូវកាល ខេមបូឌានលីគខាប់។

នៅពេលនេះ ចាន់ វឌ្ឍនា ត្រូវបានលោកគ្រូបង្វឹកដាក់ឲ្យលេងជម្រើស១១នាក់ដំបូងក្នុងការប្រកួតជាមួយអង្គរថាយហ្គឺរ ល្ងាចថ្ងៃអាទិត្យ ទី១៣ ខែសីហា សម្រាប់សប្តាហ៍ទី២ ខេមបូឌានព្រីមៀរលីគ បន្ទាប់ពីសប្តាហ៍ទី១ទល់នឹងភ្នំពេញក្រោនត្រូវបានដាក់ចូលក្នុងវគ្គទី២។

ការបង្ហាញខ្លួនជម្រើស១១នាក់ដំបូង ចាន់ វឌ្ឍនាកា បានបង្កើតការចាប់អារម្មណ៍ជាថ្មី ដោយរូបគេបានស៊ុតចូល២គ្រាប់ក្នុងជ័យជម្នះ ៤-១ លើអង្គរថាយហ្គឺរ។ ការធ្វើបានល្អនេះគឺកើតឡើងដោយសារការប្រឹងប្រែងពោរពេញដោយឆន្ទៈជាថ្មី បន្ទាប់ពីរបួសច្រើនខែ។

ចំណែក ខ្សែបម្រើប្រយុទ្ធ ប្រាក់ មុន្នីឧត្តម របស់ក្លិបបាល់ទាត់ព្រះខ័នរាជស្វាយរៀង បានជាប់ជម្រើស១១នាក់ដំបូងពីរសប្តាហ៍ជាប់គ្នា ក្រោមការដឹកនាំរបស់គ្រូបង្វឹកថ្មីសញ្ជាតិអេស្ប៉ាញ Pep។ កាលពីរដូវកាល២០២២ រូបគេមិនសូវបានជាប់ជម្រើស១១នាក់ដំបូងទេក្រោមការដឹកនាំរបស់លោក Conor Nester។

នៅសប្តាហ៍ទី១ រូបគេបានរួមចំណែកដ៏សំខាន់ក្នុងការជួយឲ្យក្រុមឈ្នះក្រសួងការពារជាតិ ០-២ ប៉ុន្តែត្រូវដូរចេញនៅវគ្គទី២ជំនួសវិញដោយកីឡាករឡាវ។ នៅសប្តាហ៍ទី២ រូបគេក៏រួមចំណែកដ៏សំខាន់ក្នុងការជួយឲ្យម្ចាស់ផ្ទះព្រះខ័នរាជស្វាយរៀងទទួលបានជ័យជម្នះ២-១ លើភ្នំពេញក្រោន។ រូបគេបានលេងពេញ៩០នាទីពេញ។

ពីរសប្តាហ៍នេះ ព្រះខ័នរាជស្វាយរៀងមានទម្រង់លេងគួរឲ្យចាប់អារម្មណ៍ទាំងតំបន់ការពារ បម្រើ និងប្រយុទ្ធដែលទទួលបានការកោតសរសើរពីមហាជន។

ប្រាក់ មុន្នីឧត្តម និង ចាន់ វឌ្ឍនាកា ស្ថិតក្នុងចំណោមកីឡាកររៀមច្បងមួយចំនួនដែលកំពុងលេងយ៉ាងសកម្មឲ្យក្លិបនាពេលបច្ចុប្បន្នដូចជា គួច សុកុម្ភៈ, គួច ដានី, សឿយ វិសាល និង សារ៉េត គ្រីយ៉ា៕

អត្ថបទ៖ វីរបុត្រ

The post ចាន់ វឌ្ឍនាកា និង ប្រាក់ មុន្នីឧត្តម វិលមកជម្រើស១១នាក់ដំបូងគួរឲ្យចាប់អារម្មណ៍ appeared first on Kampuchea Thmey Daily.

ចាន់ វឌ្ឍនាកា Archives - Kampuchea Thmey Daily

លោក Conor ប្រាប់​ថា ចាន់ វឌ្ឍនាកា មាន​ឱកាស​លេង​ នៅ​ថ្ងៃ​ស្អែក​ក្នុង​ពាន​សម្តេច​តេជោ

កីឡាករកម្ពុជា ៣ នាក់ទាយ Liverpool ខណៈ វឌ្ឍនាកា យក Man United ឈ្នះលីគអង់គ្លេសឆ្នាំនេះ

សោក​ស្តាយ ចាន់ វឌ្ឍនាកា របួសដាច់​សរសៃ ACL ជា​ថ្មី

ចាន់ វឌ្ឍនាកា ប្រាប់កន្លែងសំខាន់៣ដែលជាបទពិសោធថ្មីនៅទឹកដី Aston Villa

ថ្ងៃនេះ ចាន់ វឌ្ឍនាកា និង ស៊ូ យ៉ាទី ជួបកីឡាករ Aston Villa ៣នាក់

អវត្តមាន Privat និង វឌ្ឍនាកា ធ្វើឲ្យកម្ពុជាកាន់តែជួបបញ្ហាក្នុងតំបន់ប្រយុទ្ធ￼

កំណត់ត្រា២របស់ ចាន់ វឌ្ឍនាកា ក្នុងលីគកម្ពុជាមិនទាន់មានកីឡាករណាបំបែកបាន

ចាន់ វឌ្ឍនាកា និង ប្រាក់ មុន្នីឧត្តម វិលមកជម្រើស១១នាក់ដំបូងគួរឲ្យចាប់អារម្មណ៍

លោក Conor ប្រាប់ថា ចាន់ វឌ្ឍនាកា មានឱកាសលេង នៅថ្ងៃស្អែកក្នុងពានសម្តេចតេជោ

សោកស្តាយ ចាន់ វឌ្ឍនាកា របួសដាច់សរសៃ ACL ជាថ្មី

អវត្តមាន Privat និង វឌ្ឍនាកា ធ្វើឲ្យកម្ពុជាកាន់តែជួបបញ្ហាក្នុងតំបន់ប្រយុទ្ធ