ចំណេះដឹងបច្ចេកវិទ្យា Archives - Kampuchea Thmey Daily

កុំពឹងផ្អែកលើប្រព័ន្ធសន្តិសុខ App ធនាគារទាំងស្រុង ត្រូវពង្រឹងសុវត្ថិភាពបន្ថែម

Chan Sotheavy — Sun, 28 Jan 2024 23:15:00 +0000

ជាទូទៅ Mobile APP របស់ធនាគារ មានមុខងារប្រព័ន្ធសន្តិសុខស្រាប់ អាចឱ្យអ្នកប្រើប្រាស់កំណត់លេខសម្ងាត់ ដើម្បីពង្រឹងលើសុវត្ថិភាពនៃការប្រើប្រាស់ មិនអាចមានជនទី២ ចូលប្រើប្រាស់បាន។ ប៉ុន្តែទោះជាបែបនេះក្តី ត្រឹមតែលេខ សម្ងាត់លើកម្មវិធីធនាគារមួយមុខ មិនអាចធានាសុវត្ថិភាពបានទាំងស្រុងឡើយ គឺត្រូវពង្រឹងលើប្រព័ន្ធសន្តិសុខបន្ថែមទៀត ទាំងកម្មវិធីទូរសព្ទដៃ និងប្រយ័ត្នពីការបើកឱកាសឱ្យ Hacker ដែលផ្តើមចេញពីកត្តាខ្លួនឯង។

ក្នុងសម័យកាលឌីជីថលនេះ ទន្ទឹមនឹងគុណប្រយោជន៍នៃវិស័យបច្ចេកវិទ្យា គ្រោះថ្នាក់នៃបច្ចេកវិទ្យា ក៏អាចកើតមាន ផងដែរ បើសិនជាមិនយល់ច្បាស់ពីការប្រើប្រាស់។ ការបោកបន្លំតាមប្រព័ន្ធបច្ចេកវិទ្យា កើតមានច្រើនករណីហើយ ដោយជនអនាមិកបានប្រើរូបភាពផ្សេងៗ ដើម្បីបានលេខសម្ងាត់ពីជនរងគ្រោះ រួមមានទាំងការឆបោក ដោយបន្លំអត្តសញ្ញាណ ឬជាការ Hack តាមមធ្យោបាយ អ៉ីនធឺណិតជាដើម។

ជុំវិញបញ្ហានេះ អ្នកជំនាញណែនាំឱ្យ មានការប្រុងប្រយ័ត្នបន្ថែម ព្រោះការពង្រឹងលើប្រព័ន្ធសន្តិសុខ គឺផ្តើមចេញពីកត្តាបុគ្គលជាចម្បង ដោយត្រូវធ្វើរឿងចាំបាច់ទូទៅមួយចំនួនទៀត ដូចជា៖
១. ប្រើប្រាស់លេខសម្ងាត់ឱ្យបានរឹងមុាំ ដោយមានបញ្ចូលលេខ អក្សរតូច អក្សរធំ និងនិមិត្តសញ្ញា និងឧស្សាហ៍ប្តូរលេខ សម្ងាត់។
២. ប្រើប្រាស់ Two Factor Authentication (មុខងារសុវត្ថិភាព) ។
៣. ជៀសវាងការប្រើប្រាស់ Wifi សាធារណៈ ព្រោះមានពេលខ្លះ Hacker អាចអនុញ្ញាតឱ្យមនុស្សទូទៅប្រើប្រាស់ Wifi របស់ខ្លួនហ្វ្រី ដើម្បីបន្លំយកទិន្នន័យ។
៤. ជៀសវាងការចុចតំណលីង ដែលមិនមានប្រភពច្បាស់លាស់។
៥. ជៀសវាងការបង្ហាញឯកជនភាពច្រើនពេក នៅលើបណ្តាញសង្គម ពិសេសលេខទូរសព្ទដែលមានភ្ជាប់ នឹងបណ្ណ សំខាន់ៗ ដូចជាធនាគារជាដើម ឬបណ្ណសម្គាល់ខ្លួន។
៦. កុំធ្វើតាមការណែនាំតាម ឬបញ្ជូនឯកសារព័ត៌មានផ្ទាល់ខ្លួនណាមួយ ទៅឱ្យបុគ្គលណាម្នាក់ដែលអះអាងថាខ្លួនជា បុគ្គលិកស្ថាប័នណា ឬអ្នកណាក៏ដោយ។
៧. ការឱ្យជាងជួសជួលទូរសព្ទបង្កើតគណនីហ្វេសប៊ុក ដោយឱ្យពួកគេប្រើប្រាស់លេខសម្ងាត់ដដែលៗពីមួយទៅមួយ។
៨. ត្រូវ update ប្រព័ន្ធប្រតិបត្តិការ (OS) និង App ទៅជំនាន់ចុងក្រោយជាប្រចាំ។

ជាមួយគ្នានេះ ធនាគារក៏បានណែនាំផងដែរ នៅពេលប្រើប្រាស់សេវាធនាគារតាមអនឡាញ ត្រូវផ្តោតលើចំណុចសំខាន់ និងចាំបាច់មួយចំនួន សម្រាប់ APP ធនាគារ។
១. កុំបង្ហាញ ឬប្រាប់ព័ត៌មានចាំបាច់នានា ដែលប្រើសម្រាប់ការចុះឈ្មោះជាមួយធនាគារ ទៅឱ្យបុគ្គលណាម្នាក់ឱ្យសោះ។
២. កុំប្រាប់ ឬផ្ដល់លេខកូដសុវត្ថិភាព ដែលទទួលបានពីធនាគារ តាមរយៈសារ SMS ឬសារជូនដំណឹង ទៅឱ្យបុគ្គល ណាម្នាក់ឱ្យសោះ បើទោះបីបុគ្គលនោះអះអាងថា ខ្លួនគេជាបុគ្គលិកធនាគារក៏ដោយ។
៣. កុំបង្ហាញលេខទូរសព្ទដែលប្រើភ្ជាប់ជាមួយកម្មវិធីសេវាធនាគារ (Mobile App) ជាសាធារណៈ។
៤. ត្រូវឧស្សាហ៍ប្តូរលេខសម្ងាត់ (PIN) កម្មវិធី Mobile ឱ្យបានទៀងទាត់ជាប្រចាំ។
៥. មិនត្រូវប្រាប់ ឬផ្តល់ពាក្យសម្ងាត់ (Secret Word) លើកម្មវិធីសេវាធនាគាររបស់ខ្លួន ទៅឱ្យបុគ្គលណាម្នាក់ឡើយ។

គួរបញ្ជាក់ថា ជនឆបោកតែងតែរកល្បិចថ្មីៗ ដើម្បីលួចយកព័ត៌មានសម្ងាត់របស់អ្នកប្រើប្រាស់សេវាធនាគារ ដោយអាចខលតាមទូរសព្ទ កុហកថាជាបុគ្គលិកធនាគារ ឬក្លែងបន្លំធ្វើជានរណាម្នាក់ដែលយើងស្គាល់ ឬប្រាប់ថាលោកអ្នកបានឈ្នះរង្វាន់ផ្សេងៗ ដោយផ្ញើលីងដើម្បីថតយកព័ត៌មាន នៅពេលដែលលោកអ្នកបំពេញលីងនោះ។ ហេតុនេះ ដាច់ខាតកុំប្រាប់ ឬផ្ដល់កូដផ្ទៀងផ្ទាត់ (OTP) ដែលបានផ្ញើទៅអ្នកតាមសារ SMS និងត្រូវពិនិត្យលីងទាំងអស់ ដែលលោកអ្នកបានទទួល ម្ដងហើយម្ដងទៀត ហើយមិនត្រូវផ្ញើព័ត៌មានសំខាន់ ឬព័ត៌មានសម្ងាត់របស់ខ្លួន ទៅឱ្យនរណាម្នាក់ឡើយ ទោះគេជាអ្នកណាក៏ដោយ៕

អត្ថបទ៖ សុធាវី

The post កុំពឹងផ្អែកលើប្រព័ន្ធសន្តិសុខ App ធនាគារទាំងស្រុង ត្រូវពង្រឹងសុវត្ថិភាពបន្ថែម appeared first on Kampuchea Thmey Daily.

តោះ! មកស្វែងយល់ប្រព័ន្ធទឹកក្តៅក្នុងអគារស្នាក់នៅ

Dy Bunnara — Fri, 23 Dec 2022 04:08:56 +0000

នៅក្នុងអគារស្នាក់នៅបច្ចុប្បន្ន ការប្រើប្រាស់ម៉ាស៊ីនទឹកក្តៅទឹកត្រជាក់ កំពុងមានការប្រើប្រាស់ជាទូទៅកាន់តែច្រើនឡើង។

បណ្ដាញទឹកនៅក្នុងអគារស្នាក់នៅបែងចែកជា ៤ ប្រព័ន្ធសំខាន់ៗ៖ 1. Cold Water System (ប្រព័ន្ធទឹកស្អាត) 2. Hot Water System ( ប្រព័ន្ធទឹកក្ដៅ) 3. Soil and Waste Water System ( ប្រព័ន្ធទឹកកខ្វក់ និងទឹកបង្ហូរចោល) 4. Rain Water System (ប្រព័ន្ធទឹកភ្លៀង)។ នេះបើតាមលោកគ្រូ ហាំ គឹមហេង គ្រូបច្ចេកទេសនៅមជ្ឈមណ្ឌលបណ្ដុះបណ្ដាលការងារនិងសហគ្រិនភាព SOS សៀមរាបអង្គរ។

និយាយដាច់ដោយឡែកពាក់ព័ន្ធការប្រើប្រាស់ប្រព័ន្ធទឹកក្តៅ តាមសៀវភៅបច្ចេកទេសបណ្តាញទឹករៀបចំដោយលោកគ្រូ ហាំ គឹមហេង ក៏មានការបែងចែកនិងការផលិតខុសៗគ្នា៖

-Electric Water Heater (ធុងទឹកក្ដៅអគ្គិសនី)
-Solar (ពន្លឺព្រះអាទិត្យ)
-Gas (ហ្គាស)
-Boiler (ឡចំហាយទឹក ឬម៉ាស៊ីនផលិតទឹកក្ដៅខ្នាតធំ)

ធុងទឹកក្ដៅអគ្គិសនី (Electric Water Heater) គឺជាម៉ាស៊ីនទឹកក្ដៅដែលតែងតែឃើញប្រើប្រាស់នៅតាមបន្ទប់ទឹកក្នុងផ្ទះ សណ្ឋាគារ និងកន្លែងស្នាក់នៅនានា។

ម៉ាស៊ីនទឹកក្តៅមានពីរប្រភេទ៖

1. ម៉ាស៊ីនទឹកក្ដៅឆ្លងកាត់
2. ម៉ាស៊ីនទឹកក្តៅផ្ទុក

ក. ម៉ាស៊ីនទឹកក្តៅឆ្លងកាត់ គឺជាម៉ាស៊ីនទឹកក្ដៅខ្នាតតូចដែលប្រើចរន្តអគ្គិសនីទៅកម្ដៅទឹក ដែលឆ្លងកាត់ភ្លាមៗ។ ចំណាំ៖ សីតុណ្ហភាពដ៏ល្អសម្រាប់ការងូតទឹកគឺនៅកន្លែងណាមួយរវាង 90°F – 105°F (32°C 40°C) ដែលខ្ពស់ជាងសីតុណ្ហភាពរាងកាយជាមធ្យម។

ខ. ម៉ាស៊ីនទឹកក្តៅផ្ទុកគឺជាម៉ាស៊ីនទឹកក្តៅដែលប្រើចរន្តអគ្គិសនីទៅកម្តៅទឹកដែលផ្ទុកក្នុងធុង ចំណុះតាមទំហំធុង (32L, 50L, 80L, 100L) តាមតម្រូវការទូទៅ។

២. Solar Hot Water System ៖ ម៉ាស៊ីនកម្ដៅទឹកថាមពលព្រះអាទិត្យ ដើម្បីបង្កើតទឹក ក្តៅសម្រាប់ផ្ទះ។ ពួកវាអាចប្រើប្រាស់បានក្នុងគ្រប់អាកាសធាតុ ឱ្យតែមានពន្លឺព្រះអាទិត្យ។

៣. Gas ហ្គាស ៖ លំហូរជាបន្តបន្ទាប់តាមរយៈប្រព័ន្ធកម្ដៅទឹកក្តៅ គឺជាប្រភេទម៉ាស៊ីន កម្ដៅទឹកក្តៅដោយឧស្ម័ន (ហ្គាស) ដ៏ពេញនិយមបំផុត។

៤. Boiler៖ ប្រព័ន្ធឡចំហាយទឹក គឺជាប្រភេទឡចំហាយដែលត្រូវបានរកឃើញជាទូទៅនៅក្នុងផ្ទះធំ ដែលមានតម្រូវការកាន់តែច្រើនសម្រាប់កម្តៅ និងទឹកក្តៅ៕

The post តោះ! មកស្វែងយល់ប្រព័ន្ធទឹកក្តៅក្នុងអគារស្នាក់នៅ appeared first on Kampuchea Thmey Daily.

លោក ជា វ៉ាន់ដេត៖ ការប្រកួតវិទ្យាសាស្ត្រទិន្នន័យអាស៊ាន បានចូលរួមអភិវឌ្ឍធនធានមនុស្សក្នុងវិស័យឌីជីថល

Thoeun Vansong — Thu, 13 Oct 2022 08:17:33 +0000

លោក ជា វ៉ាន់ដេត រដ្ឋមន្ត្រីក្រសួងប្រៃសណីយ៍ និងទូរគមនាគមន៍ បានថ្លែងថា កម្មវិធីប្រកួតប្រជែង ASEAN Data Science Explorers បានឆ្លុះបញ្ចាំងអំពីចក្ខុវិស័យវែងឆ្ងាយរបស់ក្រសួងប្រៃសណីយ៍ក្នុងការចូលរួមចំណែកអភិវឌ្ឍធនធានមនុស្សក្នុងវិស័យឌីជីថល។ លោក ជា វ៉ាន់ដេត ថ្លែងបែបនេះ នៅក្នុងពិធីបិទកម្មវិធីប្រកួតប្រជែងវគ្គផ្តាច់ព្រ័ត្រ ASEAN Data Science Explorers នៅរសៀលថ្ងៃទី១២ ខែតុលា ឆ្នាំ២០២២ ម្សិលមិញ។

លោក ជា វ៉ាន់ដេត បានលើកឡើងថា ការរៀបចំកម្មវិធីនេះឡើង ដែលកម្ពុជាទទួលធ្វើជាម្ចាស់ផ្ទះ នាពេលនេះ គឺបានសបញ្ជាក់ឲ្យឃើញពីភាពជាអ្នកដឹកនាំរបស់កម្ពុជា ដែលជាប្រធានអាស៊ាននៅឆ្នាំ២០២២នេះ។ ក្នុងន័យនេះ លោករដ្ឋមន្ត្រី បានគូសបញ្ជាក់ថា កម្មវិធីប្រកួតប្រជែងលើវិស័យឌីជីថលនេះ បានផ្តល់ផលប្រយោជន៍ជាច្រើនដល់កម្ពុជា ជាពិសេសយុវជន ដែលអាចជួយឲ្យពួកគេអាចដោះស្រាយបញ្ហានានាប្រកបដោយការច្នៃប្រឌិត ក៏ដូចជាការពង្រឹកពង្រីកសមត្ថភាព និងការយល់ដឹងរបស់យុវជនលើជំនាញស្រាវជ្រាវផ្នែកវិទ្យាសាស្ត្រ និងបច្ចេកវិទ្យាឌីជីថល។

លោករដ្ឋមន្ត្រី បានបន្ថែមដែរថា នាពេលបច្ចុប្បន្ននេះ រាជរដ្ឋាភិបាលកម្ពុជា បានយកចិត្តទុកដាក់យ៉ាងខ្លាំងលើការកសាងប្រព័ន្ធបច្ចេកវិទ្យាឌីជីថល តាមរយៈការអនុម័តក្របខណ្ឌគោលនយោបាយសេដ្ឋកិច្ច និងសង្គមឌីជីថល ព្រមទាំងគោលនយោបាយរដ្ឋាភិបាលឌីជីថល ដើម្បីលើកកម្ពស់គុណភាពជីវិត និងទំនុកចិត្តប្រជាពលរដ្ឋក្នុងការកសាងរដ្ឋាភិបាលឌីជី ថល។

គួរជម្រាបថា កម្មវិធីប្រកួតប្រជែងវគ្គផ្តាច់ព្រ័ត្រ ASEAN Data Science Explorers បានរៀបចំឡើងដោយក្រសួងប្រៃសណីយ៍ និងទូរគមនាគមន៍នៃកម្ពុជា ក្នុងនាមជាម្ចាស់ផ្ទះ ដោយបានសហការជាមួយមូលនិធិអាស៊ាន និងក្រុមហ៊ុន SAP ប្រចាំតំបន់អាស៊ីអាគ្នេយ៍។ កម្មវិធីប្រកួតប្រជែងវគ្គផ្តាច់ព្រ័ត្រ ASEAN Data Science Explorers ដែលរៀប ចំធ្វើឡើងនៅកម្ពុជានេះ គឺមានការចូលរួមប្រកួតប្រជែងពីនិស្សិតឆ្នើមចំនួន ២០រូបមកពី ១០ប្រទេសនៃសមាជិកអាស៊ាន ដែលជ័យលាភីលេខ១ គឺក្រុមយុវជននៃប្រទេសវៀតណាម ជ័យលាភីលេខ២ គឺក្រុមយុវជននៃប្រទេសព្រុយនេ និងជ័យលាភីលេខ៣ គឺក្រុមយុវជនម៉ាឡេស៊ី៕

ដោយ៖ ធឿន វ៉ាន់សុង

The post លោក ជា វ៉ាន់ដេត៖ ការប្រកួតវិទ្យាសាស្ត្រទិន្នន័យអាស៊ាន បានចូលរួមអភិវឌ្ឍធនធានមនុស្សក្នុងវិស័យឌីជីថល appeared first on Kampuchea Thmey Daily.

៧ ចំណុចដោះស្រាយបញ្ហាអ្នកលួចប្រើ Wifi និងការពារសុវត្ថិភាពអ៊ិនធរណេត

Sonya — Mon, 28 Jun 2021 03:30:01 +0000

ដើម្បីការពារប្រព័ន្ធ WiFi កុំឲ្យមានអ្នកលួចប្រើ ព្រមទាំងការពារសុវត្ថិភាព និងប្រសិទ្ធភាពអ៊ិនធរណេត អ្នកអាចអនុវត្តតិចនិកទាំង ៧ នេះបាន។

១. ប្ដូរឈ្មោះ WiFi

ជាម្ចាស់ប្រព័ន្ធ Wifi កុំប្រើឈ្មោះដែលក្រុមហ៊ុនយកមកដាក់ឱ្យ ដោយអ្នកប្រើប្រាស់គួរតែប្ដូរឈ្មោះ SSID ។ ពេលប្ដូរ ក៏ពុំគួរប្រើឈ្មោះងាយរាវរកដូចជា ឈ្មោះខ្លួនឯង ឬគ្រួសារ។ល។ ព្រោះឈ្មោះទាំងនោះសុទ្ធតែបង្កភាពងាយស្រួលដល់ពួក Hacker ក្នុងការ Hack។

២. ដាក់ពាក្យសម្ងាត់ (Password) ពិបាកស្មាន

នៅលើ WiFi Router ពេលទិញមកភ្លាមតែងភ្ជាប់មកជាមួយនឹង Default Password រួចជាស្រេច ដែលវាមានលក្ខណៈស្រាល ហើយងាយរាវខ្លាំងណាស់។ ដូច្នេះនៅពេលដាក់ Password ត្រូវតែមានយ៉ាងតិច ២០ តួ រួមបញ្ចូលទាំងលេខ អក្សរតូចធំ និង សញ្ញាផ្សេងៗចម្រុះគ្នា។

៣. បិទ WiFi បើមិនប្រើប្រាស់

គួរបិទប្រព័ន្ធ WiFi ចោល ប្រសិនបើពុំត្រូវការប្រើវា ដូចជាពេលពុំនៅផ្ទះជាដើម ព្រោះបើបើកវាចោល ពួក Hacker អាចតាមដាន ហើយក៏ជាឱកាសសម្រាប់ពួកគេលុកលុយផងដែរ។

៤. កំណត់ប្រភេទ Encryption

សម្រាប់ WiFi Router គេមានប្រព័ន្ធ Encryption ដែលជាជម្រើសពេញនិយមប្រើប្រាស់រួមមាន WEP, WPA និង WPA2។ ក្នុងចំណោមប្រភេទទាំងបី WPA2 គឺមានសុវត្ថិភាពជាងគេ ព្រោះវាអាចបិទប្រព័ន្ធ Wifi ពីឧបករណ៍ផ្សេងៗដែលគ្មានការអនុញ្ញាត។

៥. បិទមុខងារ Remote Access

ចំពោះ Router មួយចំនួនអាចដំណើរការបានតាមរយៈមុខងារ Remote Access ។ ករណីនេះ បើសិនអ្នកបើកវា នោះក៏ជាឱកាសសម្រាប់ឲ្យ Hacker អាចចូលទៅដំណើរ និងកំណត់ Private Setting របស់ Router បាន។ ដូច្នេះគួរតែបិទមុខងារ Remote Access ទើបការល្អ។

៦. បើកដំណើរការ Firewall

ករណីដែល Router មិនមាន Firewall ត្រូវប្រាកដថា កុំព្យូទ័របានបើកដំណើការ Firewall ឬក៏បានត្រូវដំឡើងកម្មវិធី Firewall ដើម្បីការពារ និងតាមដានការលួចដំណើរការ Wireless ខុសប្រក្រតីណាមួយដែលអ្នកមិនដឹង។

៧. ធ្វើបច្ចុប្បន្នភាព (Update Router ) 

កម្មវិធីណាក៏ដោយ ឱ្យតែមិនធ្វើបច្ចុប្បន្នភាព (Update) វានឹងផុតកំណត់ ព្រមទាំងមានមេរោគអុកឡុកផងដែរ។ ដូចគ្នាដែរ អ្នកត្រូវ អាប់ដេត Router ឱ្យបានទៀងទាត់ចៀសវាងចំណុចខ្វះខាតណាមួយដែលនាំឱ្យប្រព័ន្ធសុវត្ថិភាពថយចុះ ហើយវាក៏អាចការពារការវាយប្រហារ និងបញ្ហាផ្សេងទៀត៕

ប្រែសម្រួល៖ សន្យា

ប្រភព៖ MARTECH

ចុចអាន៖ អាថ៌កំបាំងធំបួនយ៉ាងរបស់បណ្ដាញwifiដែលមិនងាយមានអ្នកណាដឹង

ចុចអាន៖ ប្រយ័ត្ន ៥ ចំណុចនេះបាន ទើបអាចការពារទូរសព្ទដៃពីមេរោគឬពួក Hacker

The post ៧ ចំណុចដោះស្រាយបញ្ហាអ្នកលួចប្រើ Wifi និងការពារសុវត្ថិភាពអ៊ិនធរណេត appeared first on Kampuchea Thmey Daily.

បើមិនចង់មានការវាយប្រហារ អ្នកត្រូវប្រើបច្ចុប្បន្នភាពកម្មវិធី Chrome 88 ជាបន្ទាន់

Sorn Phanith — Fri, 05 Feb 2021 03:52:54 +0000

មុខងារសម្រាប់ធ្វើបច្ចុប្បន្នភាពដោយស្វ័យប្រវត្តិរបស់កម្មវិធី Chrome បានធ្វើឲ្យមានភាពងាយស្រួល ដែលអ្នកប្រើប្រាស់មិនចាំបាច់ចំណាយពេលវេលានិងតាមដានក្ នុងការធ្វើបច្ចុប្បន្នភាពដោយខ្លួនឯង ប៉ុន្តែពេលនេះក្រុមអ្នកស្រាវជ្រាវបានស្នើឲ្យអ្នកប្រើប្រាស់ធ្វើបច្ចុប្បន្នភាពកម្មវិធី Chrome ជាបន្ទាន់ដើម្បីចៀសវាងពីការវាយប្រហារ។

ការធ្វើបច្ចុប្បន្នភាពកែសម្រួលនេះ គឺមានការប៉ះពាល់ជាមួយប្រព័ន្ធប្រតិបត្តិការទាំងបីធំៗ Windows, Mac និង Linux។ ក្រុមហ៊ុន Google ពុំបានផ្ដល់ព័ត៌មានលម្អិតទាក់ទងនឹងបញ្ហានេះទេ ប៉ុន្តែក្រុមហ៊ុនទទួលស្គាល់ថា ជនខិលខូចកំពុងតែប្រើភាពចន្លោះប្រហោងនេះ ដើម្បីធ្វើការវាយប្រហារ ដូច្នេះអ្នកប្រើប្រាស់គួរតែធ្វើបច្ចុប្បន្នភាពជាបន្ទាន់។ ជាងនេះទៅទៀតក្រុមហ៊ុន Google ក៏បានបញ្ជាក់ផងដែរថា គេនឹងបង្ហាញព័ត៌មានលម្អិតទាក់ទងនឹងការវាយប្រហារនៅពេលដែលអ្នកប្រើប្រាស់ភាគច្រើនបានធ្វើបច្ចុប្បន្នភាពរួចហើយនោះ។ ដូច្នេះដើម្បីសុវត្ថិភាពក្នុងការប្រើប្រាស់កុំព្យូទ័ររបស់លោកអ្នក នាយកដ្ឋានសូមឲ្យលោកអ្នកធ្វើបច្ចុប្បន្នភាពកម្មវិធី Chrome ជាបន្ទាន់ដើម្បីចៀសវាងពីការវាយប្រហារ៕

ប្រភព៖ នាយកដ្ឋាន ប្រឆាំងបទល្មើស បច្ចេកវិទ្យា

The post បើមិនចង់មានការវាយប្រហារ អ្នកត្រូវប្រើបច្ចុប្បន្នភាពកម្មវិធី Chrome 88 ជាបន្ទាន់ appeared first on Kampuchea Thmey Daily.

មកស្គាល់ App និង Program មួយចំនួន ជួយសម្រួលការងារពីផ្ទះ ជំនួសទៅកន្លែងការងារ ក្នុងកំលុងពេលកូវីដ១៩

សាង ស្រីល័ក្ខ — Tue, 19 Jan 2021 02:29:49 +0000

ក្រុមហ៊ុន Code Orange បានប្រកាសណែនាំពីកម្មវិធីនិង App មួយចំនួនដើម្បីបង្កភាពងាយស្រួលដល់អ្នកដែលមិនអាចទៅធ្វើការនៅការិយាល័យផ្ទាល់ ដោយធ្វើការពីផ្ទះជំនួសវិញបាន ក្នុងអំឡុងពេលកំពុងផ្ទុះឡើងនៃជំងឺកូវីដ១៩ដែលបណ្ដាលឲ្យបុគ្គលិកមួយចំនួនមិនអាចទៅធ្វើការដូចប្រក្រតី។ វាជាឧបករណ៍ទូរគមនាគមន៍ដែលជួយឲ្យពួកគេនៅតែមានផលិតភាពការងារដូចមុន ទោះបីនៅទីណាក៏ដោយ។

SLACK

កម្មវិធីនេះមាននៅលើប្រព័ន្ធប្រតិបត្តិការ Android, iOS, Mac និង Windows។ SLACK ជាឧបករណ៍ដែលអាចអនុញ្ញាតឲ្យអ្នកផ្ញើសារនិងឯកសារដោយផ្ទាល់ទៅមនុស្សម្នាក់ឬក្រុមបាន។ ឧបករណ៍នេះធ្វើការសន្ទនាផ្ញើសារដោយប្រព្រឹត្តទៅនៅក្នុងឆានែល។ កម្មវិធី Slack អាចហៅជាសំឡេងនិងវីដេអូ។ ដូច្នេះអ្នកអាចរៀបចំការប្រជុំ ឬសន្និសីទជាវីដេអូពីចម្ងាយដើម្បីពិភាក្សាពីបញ្ហាបន្ទាន់បាន។ ផ្នែកល្អបំផុតរបស់ SLACK គឺវាមានកំណែទម្រង់ឥតដែនកំណត់។ ប៉ុន្តែវាអាចហៅជាសំឡេងនិងវីដេអូបានតែពីម្នាក់ទៅម្នាក់ប៉ុណ្ណោះ ដោយមិនអាចហៅជាក្រុមបានទេ។ អ្នកក៏អាចចូលមើលសារថ្មីៗរបស់ក្រុមអ្នកបាន ១០០០០ សារភ្លាមៗផងដែរ។

G SUITE

កម្មវិធីនេះមាននៅលើប្រព័ន្ធប្រតិបត្តិការ Android, iOS, Mac និង Windows។

កម្មវិធី Google’s G Suite រួមមាន Gmail, Google Drive, Docs, Hangouts, Calenda និងសេវាកម្មផ្សេងទៀត។ វាជាវិធីងាយស្រួលបំផុតដើម្បីធ្វើការពីផ្ទះ ដោយអាចទាក់ទងជាមួយមិត្តរួមការងាររបស់យើងបានគ្រប់ទីកន្លែង។ G Suite អនុញ្ញាតឲ្យអ្នកបង្កើតឯកសារ សៀវភៅបញ្ជី និងបទបង្ហាញ។ អ្នកអាចផ្ទុកឯកសារនៅលើ Google Drive ហើយស្វែងរកអ្វីដែលអ្នកត្រូវការភ្លាមៗនៅលើវាបាន។ រីឯ Calenda អនុញ្ញាតឲ្យមនុស្សគ្រប់គ្នាមើលឃើញកាលវិភាគរបស់អ្នកដទៃដោយមិនចាំបាច់ហៅឬផ្ញើសារទៅគ្នាទៅវិញទៅមកទេ។ ចំណែក Hangouts មានកម្មវិធីជជែកដែលអនុញ្ញាតឲ្យមនុស្សទាក់ទងគ្នាបាន។

ZOOM

កម្មវិធីនេះមាននៅលើប្រព័ន្ធប្រតិបត្តិការ Android, iOS, Mac និង Windows។ ZOOM ជាកម្មវិធីសម្រាប់អ្នកដែលចង់ឬចូលចិត្តការហៅជាក្រុម។ វាអាចជជែកបានច្រើននាក់ក្នុងពេលតែមួយ ប៉ុន្តែមិនលើសពី ៤០នាទីទេ។ វាជាកម្មវីធីដែលមាន អេក្រង់ពេញច្បាស់ពេលហៅជាវីដេអូឬផ្ញើសាររូបភាព។ ZOOM អាចប្រើក្នុងសន្និសីទ និងរៀបចំកាលវិភាគដោយផ្ទាល់ពី Google Calenda។ អ្នកក៏អាចថតជាវីដេអូ ថតសម្លេង និងសរសេរអត្ថបទទុកក្នុងពេលហៅជាវីដអូផងដែរ។

TRELLO

កម្មវិធីនេះមាននៅលើប្រព័ន្ធប្រតិបត្តិការ Android, iOS, Mac, Windows និង Web។ TRELLO ជាឧបករណ៍ពេញនិយមសម្រាប់អង្គការធំៗដូចជា Kickstarter និង Unicef។ វាប្រើសម្រាប់ចែកចាយគ្រប់គ្រងការចែករំលែកគម្រោងជាក្រុម ។ លក្ខណៈពិសេសជាមូលដ្ឋានរបស់វាគឺអាចប្រើបានដោយសេរី ទោះបីជាមានការរឹតត្បិតត្រឹមដែនកំណត់ភ្ជាប់ 10 MB ក៏ដោយ។

TOGGL

កម្មវិធីនេះមាននៅលើប្រព័ន្ធប្រតិបត្តិការ Android, iOS, Mac, Windows និង Web។ TOGGL ងាយស្រួលសម្រាប់អ្នកធ្វើអាជីវកម្មនិងជំនួញ។ វាជួយពន្លឿនការងារធ្វើឲ្យចំណេញពេលនឹងការទូទាត់ប្រាក់ជាមួយអតិថិជន។ វាត្រូវបានសហការជាមួយ ឧបករណ៍ផ្សេងៗដូចជា Asana, Basecamp និង Google Calenda ដែលផ្ដល់ភាពងាយស្រួលក្នុងការចាត់តាំង និងតាមដានពេលវេលាសម្រាប់គម្រោងជាក់លាក់។ អ្វីដែលពិសេសបំផុតនោះគឺមុខងារសំខាន់ៗរបស់វាអាចរកបានដោយឥតគិតថ្លៃ៕

ប្រែសម្រួល៖ សន្យា

ចុចអាន៖ជំនាញបច្ចេកវិទ្យាជាន់ខ្ពស់ណាខ្លះជាតម្រូវការអាទិភាពលើទីផ្សារសម្រាប់ឆ្នាំ ២០២១

ចុចអាន៖សហរដ្ឋអាមេរិក បញ្ជាឲ្យបិទកម្មវិធីចិនចំនួន៨បន្ថែមទៀត រាប់បញ្ចូលទាំង Alipay និង WeChat Pay

The post មកស្គាល់ App និង Program មួយចំនួន ជួយសម្រួលការងារពីផ្ទះ ជំនួសទៅកន្លែងការងារ ក្នុងកំលុងពេលកូវីដ១៩ appeared first on Kampuchea Thmey Daily.

ជំនាញបច្ចេកវិទ្យាជាន់ខ្ពស់ណាខ្លះជាតម្រូវការអាទិភាពលើទីផ្សារសម្រាប់ឆ្នាំ ២០២១

សាង ស្រីល័ក្ខ — Tue, 19 Jan 2021 02:03:57 +0000

ម្ចាស់អាជីវកម្មឬអ្នកគ្រប់គ្រងនានា តែងតែស្វែងរកមនុស្សថ្មីណា ដែលមានជំនាញបច្ចេកវិទ្យាខ្ពស់ ដើម្បីបំពេញកន្លែងខ្វះខាតនៅក្នុងក្រុមហ៊ុនរបស់ពួកគេ ជាមួយនឹងសូហ្វវែរ និងឧបករណ៍បច្ចេកវិទ្យាដែលតែងតែរំកឹលទៅមុខនិងផ្លាស់ប្តូរឥតឈប់ឈរ។

តើជំនាញបច្ចេកវិទ្យាកំពូលអ្វី ដែលជាតម្រូវការអទិភាពនៅឆ្នាំក្រោយនេះ ? អានជាមុន ដើម្បីបង្កើនគុណវុឌ្ឍិចាំបាច់ដើម្បីចាប់អាជីពថ្មីទាន់ពេលវេលា។

ការវិនិយោគលើខ្លួនឯងសម្រាប់អនាគតកាល និងពង្រីកទីផ្សារការងារកម្រៃ និងឱកាស។ ទទួលការបណ្តុះបណ្តាលបច្ចេកវិទ្យាតាមអ៊ីនធឺណិតជាវិធីសាស្ត្រល្អ ព្រោះបុគ្គលិកសំខាន់ៗនឹងត្រូវបានស្វែងរកដោយនិយោជកភាគច្រើនផ្អែកលើលក្ខណៈសម្បត្តិជំនាញបច្ចេកវិទ្យាក្នុងសម័យកាលឌីជីថល។

១ ភាពវៃឆ្លាតសិប្បនិម្មិត Artificial Intelligence (AI)

ភាពខុសគ្នារវាង AI និងការរៀនម៉ាស៊ីនគឺរៀនតាមរបៀបមួយដែលត្រូវបានគេចាត់ទុកថាវៃឆ្លាត ប្រើតក្កវិជ្ជានិងហេតុផលដើម្បីបង្កើតចម្លើយ។ ការរៀននឹងម៉ាស៊ីនទៅរួចនៅពេលយើងចូលក្នុងដំណើរការមូលដ្ឋានទិន្នន័យ ចំណែកAIអនុញ្ញាតឲ្យរកចម្លើយបានដោយខ្លួនឯង។

២ បច្ចេកវិទ្យា blockchain

Blockchain គឺជាសំណ។ស្វែងរកទិន្នន័យទំនើបចុងក្រោយដែលមានសុវត្ថិភាពបំផុតនិងរក្សានូវទិន្នន័យល្អ។ វាក៏ជាបញ្ជីនៃកំណត់ត្រានៅក្នុងខ្សែសង្វាក់ដែលតំណនីមួយៗត្រូវបានអ៊ិនគ្រីបជាមួយកំណត់ពេលវេលានៃប្លុក មុននិងទិន្នន័យអាចប្រតិបត្តិការ។ មនុស្សភាគច្រើនទទួលស្គាល់និងចាប់ប្រើបច្ចេកវិទ្យាblockchain នៅលើលុយអនឡាញ Bitcoin ។

៣ ក្លោដនិងអាម៉ាហ្សូន Cloud and Amazon Web Services (AWS)

នេះជាសេវាកម្មពពក តាមអ៊ិនធរណេតដែលធំជាងគេបំផុតនៅលើពិភពលោកបច្ចុប្បន្នផ្តល់ជូននូវសេវាកម្មពេញលេញជួយដល់អាជីវកម្មនិងក្រុមហ៊ុនបច្ចេកវិទ្យាធំតូចក្នុងការដោះស្រាយ នាយកដ្ឋានធំៗ ចម្បងៗរបស់គេ រាប់ចាប់តាំងពីការធ្វើទីផ្សារ រហូតដល់នីតិវិធីគណនេយ្យ

សេវាកម្មប្រើប្រាស់មជ្ឈមណ្ឌលទិន្នន័យពិភពលោកមួយនេះ នឹងរក្សាទុក ក៏ដូចជាធ្វើដំណើរការព័ត៌មានយ៉ាងរហ័សនិងសុវត្ថិភាព។

៤ អាជីពខាងសន្តិសុខតាមអ៊ិនធឺរណែត Cybersecurity

ពួក Hacker តែងតែរិះរកវិធីថ្មីៗដើម្បីវាយប្រហារគេហទំព័រនានា កម្មវិធីអេប និងវេទិការបស់ក្រុមហ៊ុនទាំងពួង។ ជារឿងចាំបាច់ដែលយើងត្រូវមានជំនាញមួយជាការឆ្លើយតបចំពោះការវាយប្រហារទាំងនេះ៕

ប្រែសម្រួល៖ សុភា

ប្រភព៖woz-u

ចុចអាន៖មហាសេដ្ឋីបច្ចេកវិទ្យាទាំងនេះបានផ្លាស់ប្ដូរអនាគតរបស់មនុស្សជាតិ

ចុចអាន៖ជំនាញទីផ្សារឌីជីថល៖ ធ្វើទីផ្សារតាមការផ្ញើម៉ែលមិនដែលហួសសម័យទេ

The post ជំនាញបច្ចេកវិទ្យាជាន់ខ្ពស់ណាខ្លះជាតម្រូវការអាទិភាពលើទីផ្សារសម្រាប់ឆ្នាំ ២០២១ appeared first on Kampuchea Thmey Daily.

ជំនាញទីផ្សារឌីជីថល៖ ប្រើបណ្ដាញសង្គម Boost យ៉ាងណាឲ្យយីហោយើងបានទៅដល់ក្រុមអតិថិជនគោលដៅ

សាង ស្រីល័ក្ខ — Mon, 28 Dec 2020 04:18:49 +0000

Boost គឺជាឧបករណ៍ដ៏ពេញនិយមលើប្រព័ន្ធផ្សព្វផ្សាយសង្គមដែលយើងត្រូវបង់ប្រាក់រុញមាតិកាឬផលិតផលដែលយើងកំពុងផ្សាយឲ្យទៅដល់គោលដៅរហ័សទាន់ចិត្តនិងចំៗ។

អំណាចនៃគេហទំព័រសង្គមមួយនេះ ហួសពីការផ្សាយតាមបែបមិនបង់ប្រាក់(សរីរាង្គ)។ វេទិកាបង់ប្រាក់ (Boost)ឬហៅថា(adv)អាចរុញយីហោរបស់យើងឲ្យទៅដល់នៅចំពោះមុខក្រុមគោលដៅ អតិថិជន អ្នកកន្លងមកយើងមិនដែលបានពួកគេឮឬឃើញ។

បណ្តាញសង្គមសំខាន់ៗ ហ្វេសប៊ុក IG Twitter។ ល។ មានចងក្រងបាននូវទិន្នន័យច្រើនណាស់លើអ្នកប្រើប្រាស់របស់ពួកគេ ដែលការកំណត់គោលដៅមិនពិបាកអ្វីទាំងអស់។

ចំណែកខាងក្រោមនេះ គឺជាកម្មវិធីមួយចំនួន ដែលយើងគួរតែស្គាល់ ក្នុងនាមអ្នកទីផ្សារឌីជីថលដើម្បីរើសយកមកប្រើនាពេលអនាគត៖

១ ណានីហ្គាន Nanigans

គឺជាកម្មវិធីផ្សាយពាណិជ្ជកម្មពហុមុខងារ ជាមួយនឹងការសង្កត់ធ្ងន់លើទីផ្សារហ្វេសប៊ុក។ សូហ្វវែរ Nanigansនេះ អាចចូលប្រើហ្វេសប៊ុកប្តូរប្រាក់ដើម្បីពិនិត្យឡើងវិញនិងប្រើឧបករណ៍ផ្សេងទៀតធ្វើឲ្យគោលដៅផ្សាយចេញមានប្រសិទ្ធភាពជាងមុន។ លើសពីការលើកឡើងរបស់ហ្វេសប៊ុកវេទិកា nanigans នេះមានលក្ខណៈពិសេស ផ្ដោតលើការផ្សាយពាណិជ្ជកម្មតាម Twitter និងកំណើន Instagram ទៀតដែលជាឧបករណ៍នៃជម្រើសសម្រាប់ក្រុមហ៊ុនធំៗលើលោកបច្ចុប្បន្ននេះដូចជា Zynga, Wayfair និង Rovio ។

២ facebook power editor របស់ហ្វេសប៊ុក

ជាកម្មវិធីបង្កើននិងគ្រប់គ្រងការផ្សាយពាណិជ្ជកម្ម ដែលភាគច្រើនត្រូវបានប្រើដោយ Agency អ្នកផ្សាយពាណិជ្ជកម្មលើហ្វេសប៊ុកធំ ៗ ឬអ្នកផ្សាយពាណិជ្ជកម្មដែលចង់បានលក្ខណៈពិសេសកម្រិតខ្ពស់បំផុតដូចជា Rolls Royce ។ល។ ចំណុចប្រទាក់នៃ កម្មវិធីនិពន្ធថាមពលមើលទៅខុសគ្នាឆ្ងាយពីកម្មវិធីគ្រប់គ្រងការផ្សាយពាណិជ្ជកម្ម។ កម្មវិធីនិពន្ធថាមពលpower editor របស់ហ្វេសប៊ុកគឺជាកម្មវិធីជំនួយដែលដំណើរការជាមួយ Google Chrome.F ហើយឧបករណ៍នេះបញ្ចេញជាញឹកញាប់នូវលក្ខណៈគោលដៅថ្មីសម្រាប់អ្នកប្រើប្រាស់កាន់តែងាយស្រួលនិងពេញចិត្តទ្វេឡើង។

សម្រាប់អ្នកទីផ្សារឌីជីថល ការប្រើToolនេះគឺងាយស្រួលបំផុតដើម្បីបង្កើតនិងគ្រប់គ្រងការផ្សាយពាណិជ្ជកម្មលម្អិតធានាថាអាចកំណត់គោលដៅបានហើយសន្សំថវិកាផង៕

ប្រែសម្រួល៖ សុភា

ប្រភព sproutsocial

ចុចអាន៖

The post ជំនាញទីផ្សារឌីជីថល៖ ប្រើបណ្ដាញសង្គម Boost យ៉ាងណាឲ្យយីហោយើងបានទៅដល់ក្រុមអតិថិជនគោលដៅ appeared first on Kampuchea Thmey Daily.

ចំណេះដឹងបច្ចេកវិទ្យា Archives - Kampuchea Thmey Daily

កុំពឹងផ្អែកលើប្រព័ន្ធសន្តិសុខ App ធនាគារទាំងស្រុង ត្រូវពង្រឹងសុវត្ថិភាពបន្ថែម

តោះ​! មក​ស្វែង​យល់​ប្រព័ន្ធ​ទឹក​ក្តៅ​ក្នុង​អគារ​ស្នាក់នៅ

លោក ជា វ៉ាន់ដេត៖ ការប្រកួតវិទ្យាសាស្ត្រទិន្នន័យអាស៊ាន បាន​ចូលរួមអភិវឌ្ឍធនធានមនុស្សក្នុងវិស័យឌីជីថល​

៧ ​ចំណុចដោះស្រាយបញ្ហាអ្នកលួចប្រើ​ Wifi និងការពារសុវត្ថិភាពអ៊ិនធរណេត

បើ​មិន​ចង់មាន​ការវាយ​ប្រហារ អ្នក​ត្រូវ​ប្រើ​បច្ចុប្បន្នភាព​កម្មវិធី Chrome 88 ជាបន្ទាន់

មក​ស្គាល់ App​ និង​ Program មួយ​ចំនួន​​ ជួយ​សម្រួល​ការងារ​ពី​ផ្ទះ ​ជំនួស​ទៅកន្លែងការងារ ក្នុង​កំលុងពេល​កូវីដ១៩

ជំនាញ​បច្ចេកវិទ្យា​ជាន់ខ្ពស់​ណា​ខ្លះ​ជា​តម្រូវការ​អាទិភាព​លើ​ទីផ្សារ​សម្រាប់​ឆ្នាំ ២០២១