ចំណេះដឹង Archives - Kampuchea Thmey Daily

លោកជំទាវ ពេជ ចន្ទមុន្នី៖ ទោះរៀនដល់ណាក៏ដោយ តែបើគ្មានសីលធម៌ហើយ គឺគ្មានអ្នកគោរពឡើយ

Ngoeul Narath — Mon, 10 Feb 2025 10:11:42 +0000

លោកជំទាវបណ្ឌិត ពេជ ចន្ទមន្នី ហ៊ុន ម៉ាណែត ស្រ្តីទីមួយកម្ពុជា បានទូន្មានទៅកាន់សិស្សានុសិស្សថា បើទោះបីជាសិក្សាមានចំណេះដឹងខ្ពង់ខ្ពស់ប៉ុណ្ណាក៏ដោយ បើគ្មានសីលធម៌ គ្មានក្ដីសណ្ដោស គ្មានក្ដីមេត្តានៅក្នុងខ្លួនទេ នោះនឹងមិនទទួលបានការគោរពពីមនុស្សជុំវិញខ្លួនឡើយ ប៉ុន្តែបើគេគោរពបុគ្គលប្រភេទនេះ គឺគេគោរពតែពេលមានបុណ្យសក្ដិអំណាចប៉ុណ្ណោះ ពេលអស់បុណ្យសក្ដិអំណាចកាលណា គេនឹងលែងគោរព។

លោកជំទាវស្រ្តីមួយនៅកម្ពុជា ណែនាំសិស្សានុសិស្សដែលជាទំពាំងស្នងឬស្សីបែបនេះ នៅក្នុងពិធីបុណ្យសម្ពោធឆ្លងបណ្ណាល័យ សមិទ្ធផលនានា និងចម្រើនព្រះជន្មប្រគេន ព្រះគ្រូធម្មតេ្ថរោ សែម សារិន្ទ នៅវត្តវេឡុវន (ហៅត្រពាំងខ្នារ) ភូមិត្រពាំងខ្នារ ឃុំអង្គតាសោម ស្រុកត្រាំកក់ ខេត្តតាកែវកាលពីពេលថ្មីៗនេះ។

នៅចំពោះមុខសិស្សានុសិស្ស លោកជំទាវ ថ្លែងដូច្នេះ៖« ក្មួយៗត្រូវស្ដាប់អ៊ំនិយាយថ្ងៃនេះ ចាំសម្ដីអ៊ំ! ទោះបីជាក្មួយរៀនដល់ណាក៏ដោយ មានចំណេះដឹងខ្ពង់ខ្ពស់យ៉ាងម៉េចក៏ដោយ ប៉ុន្តែបើក្មួយគ្មានសុជីវធម៌ គ្មានគុណធម៌ គ្មានភាពមេត្តាធម៌នៅក្នុងខ្លួនទេ គ្មានអ្នកណាគេគោរពក្មួយទេ ហើយអ្នកនៅជុំវិញក្មួយទាំងអស់គ្នាក៏គេគោរពតែយសស័ក្ដិក្មួយ នៅពេលណាយសស័ក្ដិក្មួយរបស់ក្មួយធ្លាក់ហើយ គឺពេលនោះ គឺក្មួយគ្មានអ្វីទាំងអស់។ អ៊ីចឹងសំខាន់សីលធម៌ គុណធម៌ សុជីវធម៌ ភាពមេត្តាធម៌ ត្រូវតែមាននៅក្នុងចិត្តជានិច្ច នេះគឺជាបណ្ដាំរបស់អ៊ំជូននិយាយថ្ងៃនេះជូនក្មួយទាំងអស់»។

ជាការកត់សម្គាល់ នេះមិនមែនទើបតែជាលើកទីមួយឡើយ ដែលលោកជំទាវបណ្ឌិត ពេជ ចន្ទមុន្នី ហ៊ុន ម៉ាណែត ណែនាំឱ្យយុវជន សិស្សានុសិស្ស ត្រូវប្រកាន់ខ្ជាប់នូវក្រមសីលធម៌នៅក្នុងខ្លួន។

កន្លងទៅ លោកជំទាវ ពេជ ចន្ទមុន្នី ធ្លាប់បានណែនាំឱ្យយុវជនដែលទទួលបានឱកាសទៅចូលកម្មវិធីនៅក្រៅប្រទេសត្រូវប្រកាន់ខ្ជាប់នូវក្រមសីលធម៌ គោរពវិន័យ ពង្រឹងសាមគ្គីភាពជាក្រុម បញ្ចេញសមត្ថភាព និងត្រូវរៀនសូត្រពីមិត្តមកពីបណ្តាប្រទេស ដើម្បីយកចំណេះដឹងទាំងនោះមកចែករំលែក និងអនុវត្តនៅប្រទេសកម្ពុជាវិញ៕

ដោយ៖ ង៉ិល ណារ៉ាត់

The post លោកជំទាវ ពេជ ចន្ទមុន្នី៖ ទោះរៀនដល់ណាក៏ដោយ តែបើគ្មានសីលធម៌ហើយ គឺគ្មានអ្នកគោរពឡើយ appeared first on Kampuchea Thmey Daily.

គន្លឹះខ្លះៗជួយសិស្សនិស្សិតអាចរកចំណូលបន្ថែម ពេលកំពុងសិក្សា

Mean Ratana — Wed, 28 Feb 2024 07:18:18 +0000

អំឡុងពេលរៀននៅថ្នាក់ឧត្តមសិក្សា ប្រាកដណាស់ការចំណាយនឹងកើនឡើងខ្លាំង ពិសេសសម្រាប់យុវនិស្សិតដែលដល់វ័យត្រូវទទួលខុសត្រូវខ្លះៗនូវផ្នែកហិរញ្ញវត្ថុសម្រាប់ការចំណាយប្រចាំថ្ងៃ ។ យ៉ាងណាមិញ ក្រៅតែពីការពឹងផ្អែកនូវថវិកាខ្លះពីអ្នកផ្ទះនោះ ការស្វែងរកខ្ទង់ចំណូលបន្ថែមពីការងារ នៅអំឡុងពេលសិក្សា គឺជាជម្រើសមួយដែលពេញនិយមរបស់ពួកគេ ហើយក្នុងនោះពួកគេក៏អាចន្ថែមនូវគំនិតមួយចំនួនដូចខាងក្រោមដែលអាចជាទុនក្នុងពេលរកថវិកាចំណូលបន្ថែម ដែលមានដូចជា៖

១. ធ្វើការមិនប្រកាន់ខ្លួន

ការស្វែងរកចំណូលបន្ថែមក្នុងទីផ្សារការងារ ប្រាកដណាស់ការងារមួយចំនួនគឺត្រូវនឹងមុខវិជ្ជាសិក្សាដែលកំពុងរៀន ប៉ុន្តែការងារខ្លះទៀតក៏មិនត្រូវនឹងជំនាញដែលកំពុងរៀននៅសាលានោះដែរ ដូចជាការងារបម្រើការនៅសាកលវិទ្យាល័យកំពុងរៀនផ្ទាល់ បម្រើការជាបុគ្គលិកក្រុមហ៊ុន បម្រើសេវាកម្មភោជនីយដ្ឋាន ឬការបង្រៀនក្មេងៗជាដើម ។ តែយ៉ាងណា ការងារដែលមិនត្រូវនឹងជំនាញ គឺជាជម្រើសទី២ ដែលនឹងនៅតែផ្តល់នូវចំណេះដឹង បទពិសោធ ថវិកា និងបណ្តុះជាជំនាញមួយថ្មីផងដែរសម្រាប់សិស្សនិស្សិត ។

២. ការដាក់លក់របស់ប្រើប្រាស់លើអនឡាញ

បណ្តាញសង្គមប្រើប្រាស់សព្វថ្ងៃ ក៏ត្រូវបានគេប្រើសម្រាប់កន្លែងរកចំណូលមួយផ្នែកសម្រាប់ជីវភាពបានផងដែរ។ ជាឧទាហរណ៍ ដូចជាការបង្កើតទំព័រ នៅលើបណ្តាញសង្គមហ្វេសប៊ុក (Facebook) សម្រាប់ដាក់លក់ផលិតផល ឬរបស់របរប្រើប្រាស់សម្រាប់រកជាប្រាក់ចំណេញក៏ជាគំនិតមួយដែលសិស្សនិស្សិតអាចអនុវត្តបាន ។

៣. ច្នៃទេពកោសល្យផ្ទាល់ខ្លួនទៅជាចំណូល

ជំនាញគូរគំនូរ និពន្ធសៀវភៅ ចម្អិនម្ហូប ឬផាត់មុខ ដែលចំណេះជំនាញទាំងនេះ សិស្សនិស្សិតក៏អាចច្នៃវាជាចំណែកនៃការរកចំណូលបន្ថែមបានផងដែរ ហើយពិសេសគេក៏បង្កើតវា ជាអាជីវកម្មដោយខ្លួនឯង ឬច្នៃជាសេវាលក់ដល់ក្រុមហ៊ុនដែលមានតម្រូវការក៏បាន ។

៤. ការបង្កើតប្លុក (Blog) ឬ វីដេអូ Vlog សម្រាប់រកតម្រូវការផ្សព្វផ្សាយ

ការចេះបង្កើតវីដេអូផ្សព្វផ្សាយ ជាចំណេះដឹង ការកម្សាន្តឬសរសេរជាប្លុក (Blog) ចែករំលែកជាគន្លឹះប្លែកៗមានប្រយោជន៍ដល់សាធារណជនក៏អាចជាគំនិតមួយផងដែរសម្រាប់និស្សិត ដែលមានតម្រូវការប្រាក់ចំណូលបន្ថែមពីសេវាផ្សព្វផ្សាយពាណិជ្ជកម្ម។ បើទោះជាការងារនេះ ទាមទារពេលវេលាច្រើន មិនអាចផ្តល់ផលចំណេញជាថវិកាភ្លាមៗក៏ពិតមែន តែសិស្សនិស្សិតក៏នៅអាចពិចារណាបាន។

៥. ទុកឲ្យលុយសម្រាកខ្លះ

ពិតណាស់ សម្រាប់សិស្ស-និស្សិតដែលត្រូវរ៉ាប់រងចំណាយផ្ទាល់ខ្លួនច្រើន ក៏អាចពិចារណាការទុកលុយសម្រាកខ្លះ ពោលគឺការចាយវាយរិះថាំ ឬដាក់វិន័យលើការចាយវាយ ជាការកាត់បន្ថយការចំណាយ។ លើសពីនេះគេក៏អាចអនុវត្តការចាយវាយបែបវៃឆ្លាតផងដែរ ពោលគឺចំណាយតែលើរបស់របរដែលចំបាច់ ឬចំពេលដែលទំនិញចុះតម្លៃក៏ជាចំណែកមួយជួយសន្សំដល់ថវិកាក្នុងអំឡុងពេលរៀនសូត្រផងដែរ៕

ដោយ៖ មាន រតនា

The post គន្លឹះខ្លះៗជួយសិស្សនិស្សិតអាចរកចំណូលបន្ថែម ពេលកំពុងសិក្សា appeared first on Kampuchea Thmey Daily.

គុណធម៌ខ្លីៗ ១៣ ចំណុចពីបុរសខ្លាំងលើក្រដាសប្រាក់ ១០០ ដុល្លារ អាមេរិក

Mean Ratana — Mon, 26 Feb 2024 10:13:25 +0000

លោក Benjamin Franklin គឺជាតួអង្គដ៏សំខាន់សម្រាប់ប្រវត្តិសាស្រ្តអាមេរិកក្នុងតួនាទីបដិវត្តន៍ និងការពិសោធអគ្គិសនី ហើយលោកក៏ជាអ្នកប្រាជ្ញវិទ្យាសាស្រ្ត អ្នកនិពន្ធ និពន្ធនាយក អ្នកដឹកនាំ និងជាអ្នកនយោបាយ ហើយលោកក៏ជាសហស្ថាបនិកនៃសេចក្តីប្រកាសឯករាជ្យ និងរដ្ឋធម្មនុញ្ញអាមេរិកផងដែរ ។

លោក Franklin ធ្លាប់បាននិយាយថា “ប្រសិនបើចង់ឲ្យគេនៅចងចាំអ្នក ទោះជាអ្នកស្លាប់បាត់បង់ជីវិតទៅហើយក្តី ចូរសរសេរស្នាដៃនិពន្ធដែលប្រកបដោយតម្លៃគួរអាន ឬធ្វើអំពើប្រកបដោយតម្លៃគួរនឹងគេសរសេរអំពីស្នាដៃរបស់អ្នក” ។ សម្តីរបស់អ្នកប្រាជ្ញរូបវិទ្យារូបនេះ ច្រើនមានតម្លៃចំពោះអ្នកជំនាន់ក្រោយត្រិះរិះពិចារណា ជាពិសេសគុណធម៌ ១៣ យ៉ាងខាងក្រោម ដែលលោកបានលើកឡើង ហើយលោកក៏បានប្រកាន់គុណធម៌ទាំង ១៣ នេះយ៉ាងខ្ជាប់ខ្ជួនផងដែរ ហើយអ្នកអាចពិចារណារៀនសូត្រពីគំរូវីរៈភាពរបស់លោកផងដែរដែលមានដូចជា៖

១. ការចេះប្រមាណ ៖ បរិភោគត្រឹមល្មមផឹកក៏ត្រឹមល្មម ។

២. ស្ងាត់ស្ងៀម ៖ និយាយតែពាក្យមានប្រយោជន៍ដល់ខ្លួនឯង និងអ្នកដទៃ ហើយចៀសវាងនិយាយបញ្ជោរ ។

៣. សណ្តាប់ធ្នាប់ ៖ ទុកដាក់របស់គ្រប់យ៉ាងឲ្យមានរបៀប ។ របស់របរត្រូវតែមានកន្លែងសម្រាប់ទុកដាក់ ។

៤. ការសម្រេចចិត្ត ៖ ជ្រើសរើសធ្វើកិច្ចការដ៏ត្រឹមត្រូវរួចបំពេញការងាររហូតចប់ចុងចប់ដើម ។

៥. សន្សំសំចៃ ៖ កុំខ្ជះខ្ជាយប្រាក់ ។ ការចាយប្រាក់សម្រាប់ធ្វើអំពើល្អជាមួយអ្នកដទៃ និងខ្លួនឯងមិនចាត់ទុកថាខ្ជះខ្ជាយទេ ។

៦.ឧស្សាហ៍ ៖ កុំខ្ជះខ្ជាយពេលវេលា ។ ជានិច្ចកាលត្រូវធ្វើកិច្ចការអ្វីមួយដែលមានប្រយោជន៍ ។

៧. សេចក្តីស្មោះត្រង់ ៖ កុំកេងប្រវ័ញ្ច ។ ទៀងត្រង់ទាំងគំនិត និងសម្តី ។

៨. យុត្តិធម៌ ៖ កុំបង្កភាពអយុត្តិធម៌ដល់អ្នកដទៃ ។

៩. សមរម្យ ៖ កុំជ្រុលនិយម។

១០. ស្អាតជានិច្ច ៖ សម្អាតរាងកាយ សម្លៀកបំពាក់ និងរស់នៅស្អាត ។

១១. រក្សាភាពស្ងប់ស្ងាត់ ៖ កុំលេងសើច កុំភ្ញាក់ផ្អើលជាមួយរឿងទូទៅ ឬរឿងដែលជៀសមិនផុត ។

១២. បរិសុទ្ធភាព ៖ រួមភេទ ដោយកម្រលើកលែងតែដើម្បីសុខភាព ឬដើម្បីបន្តពូជពង្ស ។

១៣. ការដាក់ខ្លួន ៖ ប្រតិបត្តិតាមសូក្រាត (ទស្សនវិទូក្រិច) ៕

ដោយ៖ មាន រតនា

The post គុណធម៌ខ្លីៗ ១៣ ចំណុចពីបុរសខ្លាំងលើក្រដាសប្រាក់ ១០០ ដុល្លារ អាមេរិក appeared first on Kampuchea Thmey Daily.

មេរៀនប្រចាំថ្ងៃក្នុងជីវិត ៥ យ៉ាងគួរចាប់យកពីអ្នកប្រដាល់ហ្វីលីពីន Pacquiao

Mean Ratana — Wed, 21 Feb 2024 07:18:54 +0000

ពេលឮរហស្សនាមថា PacMan ប្រិយមិត្តប្រាកដជាស្គាល់ហើយ គឺកីឡាករប្រដាល់លំដាប់ពិភពលោកដ៏ល្បីឈ្មោះបោះសំឡេងមកពីប្រទេសហ្វីលីពីន គឺលោក Manny Pacquiao ។ អ្នកស្នេហាវិស័យកីឡាច្រើនមានការជជែកវែកញែកច្រើន ពិសេសតាក់តិចវាយ និងការប្រកួតម្តងៗរបស់កីឡាករអាស៊ីរូបនេះជាមួយនឹងកីឡាករមកពីប៉ែកលោកខាងលិច ។ យ៉ាងណាមិញ នៅក្នុងចំណុចខ្លះនៃការប្រកួតលើសង្វ្រៀនរបស់ Pacquiao ដែលយើងច្រើនហៅលោកថា Pacman នេះ គឺត្រូវបានគេសម្គាល់ជាមេរៀនក្នុងជីវិតប្រចាំថ្ងៃផងដែរ ហើយចំណុចទាំងនោះមានដូចជា៖

១. ដៃគូរបស់អ្នក មិនគួរមើលងាយពួកគេឡើយ

ចំណុចទីមួយពីរឿងមិនគួរមើលងាយនេះ គឺដៃគូលើសង្វៀនរបស់អ្នកប្រដាល់ Manny Pacquiao ជាអ្នកលើកឡើង។ ពួកគេច្រើនលើកឡើង ក្រោយប្រកួតជាមួយ Pacquiao ដោយសារនៅមុនប្រកួតពួកគេផ្ទាល់ច្រើនមើលងាយថា អ្នកប្រដាល់ហ្វីលីពីនរូបនេះមានមាឌតូច និងងាយយកឈ្នះ ឬអាចវាយចូលមុខ Pacquiao បានយ៉ាងងាយ ។ ប៉ុន្តែចុងក្រោយពួកគេច្រើននិយាយថា វាជារឿងងាយស្រួលក្នុងការនិយាយបែបនេះបែបនោះពីគូប្រកួត ប៉ុន្តែពេលជួបលើសង្វៀន ខ្ញុំត្រូវវៃ ហើយ Pacquiao ក៏ត្រូវវៃដូចគ្នា តែគឺមិនងាយស្រួលដូចការគិតនោះឡើយ ។

២. ប្រើប្រាស់បទពិសោធ និងអាយុ ជាចំណុចពិសេស

អ្នកប្រដាល់ Pacquiao ឬឈ្មោះហៅក្រៅថា Pacman លើកឡើងថា បើអ្នកហាត់នៅក្លិបបានល្អនោះពេលនៅសង្វៀន អ្នកអាចប្រើប្រាស់ស្នៀត ឬតិចនិកនោះតាមដែលអ្នកចង់ប្រើ ។ មានដៃគូប្រកួតរបស់ Pacman ច្រើនបង្អាប់អ្នកប្រដាល់កម្ពស់ ១ ម៉ែត្រ ៦៨ សង់ទីម៉ែត្ររូបនេះអំពីអាយុផងដែរ ប៉ុន្តែគូប្រកួតច្រើនភ្ញាក់ផ្អើលអំពីតាក់តិចល្បឿនវាយ និងគ្រោះថ្នាក់ពីទម្ងន់ដៃរបស់អ្នកប្រដាល់ហ្វីលីពីនវ័យ ៤២ ឆ្នាំរូបនេះ ។ ដោយផ្អែកតាមគ្រូបង្វឹកប្រដាល់អូស្រ្តាលី លោក Justin Fortune បានលើកឡើងថា Pacman នៅតែដូចអ្នកប្រដាល់ផ្សេងទៀត ថែមទាំងគ្រោះថ្នាក់បើគូប្រកួតប្រហែស ពិសេសលើតាក់តិចរបស់គាត់។

៣. មិនគ្រាន់តែវាយទេ ថែមទាំងហោះទៅជាមួយទៀតផង

“បើអ្នកពិតជាហ្វឹកហាត់ល្អពិតប្រាកដ អ្នកអាចយកឈ្នះបាន” នេះជាការលើកឡើងរបស់លោក Pacman ។ អ្នកអាចសម្គាល់ពីការវាយរបស់កីឡាករដែលមានដើមកំណើតនៅក្រុងKibawe ប្រទេសហ្វីលីពីនរូបនេះ គឺតែងវាយដូចការហោះខ្លួនទៅជាមួយផងដែរពោលគឺ Pacman មានមាឌតូចជាងគូប្រកួតមែនតែនៅពេលបោះកម្លាំងដៃវាយ គឺហោះព្រមនឹងកម្លាំងពីក្នុងខ្លួនផង។ ពិតណាស់បើអ្នកពុំបានកម្ពស់ ដូចនេះល្បឿន និងកម្លាំងគឺជាចំណុចពិសេស។ ត្រឡប់មកអ្នកវិញគឺយើងអាចផ្តោតលើចំណុចខ្លាំងដែលមាន និងចំណុចពិសេសៗដែលអ្នកធ្វើបាន ជាមួយមូលដ្ឋានដែលអ្នកមាន។

៤. រៀនទទួលកណ្តាប់ដៃ

ចំណុចមួយនេះពីកីឡាករប្រដាល់អាស៊ីប៉ុន្តែវាយលំដាប់ថ្នាក់ពិភពលោករូបនេះ គឺចង់សម្តៅទៅលើការនាំឲ្យយើងចេះទទួលយកបញ្ហាខ្លះ ហើយរៀនដោះស្រាយវា ពោលគឺប្រៀបដូចនៅពេលដែល Pacman តែងសម្គាល់ឃើញថា ដៃគូរបស់ខ្លួនតែងមានបញ្ហា ហើយមិនទាន់ចេះធន់នឹងកម្លាំងដៃដែលលោកវាយទៅនោះទេ ប៉ុន្តែសម្រាប់លោកវិញ កម្លាំងដៃដែលគូប្រកួតវាយមកវិញគឺត្រូវតែរៀនទទួលខ្លះ គេចមិនផុត ប៉ុន្តែលោកមានចំណុចម្យ៉ាង គឺធន់នឹងកម្លាំងដៃ ។

៥. អ្វីដែលអំណោយផលពីធម្មជាតិ

អ្នកអាចភ្ញាក់ផ្អើលពីអ្វីដែលអំណោយផលពីធម្មជាតិដល់ Pacman ពោលគឺលោកមានល្បឿនលឿន ។ ក្នុងវីដេអូផ្សាយព័ត៌មានរបស់ iNetNews បានបង្ហាញថា ល្បឿនវាយប្រកបដោយកម្លាំងរបស់ Pacman គឺ ០.១២ វិនាទី ដែលលឿនជាងល្បឿននៃការព្រិចភ្នែកជាធម្មតាទូទៅរបស់យើងដែលមានល្បឿនប្រហែល ០.៣០ វិនាទី ។ ដូចនេះ ចំណុចមេរៀន គឺត្រូវរកអ្វីដែលជាចំណុចពូកែនៃធម្មជាតិរបស់អ្នក ហើយអាចដុសខាត់វាឲ្យបានប្រសើរឡើង ៕

ដោយ៖ មាន រតនា

The post មេរៀនប្រចាំថ្ងៃក្នុងជីវិត ៥ យ៉ាងគួរចាប់យកពីអ្នកប្រដាល់ហ្វីលីពីន Pacquiao appeared first on Kampuchea Thmey Daily.

សុភាសិតចិន ទស្សនៈរៀនសូត្រពីជីវិត និងសង្គមទូទៅ (ត)

Mean Ratana — Sat, 10 Feb 2024 02:39:15 +0000

អត្ថបទមុនប្រិយមិត្តបានស្វែងយល់ខ្លះពីសុភាសិតចិនមួយចំនួន។ សប្តាហ៍នេះ កម្ពុជាថ្មីសូមនាំប្រិយមិត្ត មិនថាអ្នកជាប់សែស្រឡាយចិន ឬមិនជាប់ខ្សែស្រឡាយចិន មកស្វែងយល់ជាបន្ត នូវប្រយោគខ្លីៗតែមានអត្ថន័យអប់រំជាបទពិសោធន៍ ដែលសុភាសិតទាំងនោះគឺបទពិសោធជួបផ្ទាល់ នឹងត្រូវចងក្រងជាទំនុកអប់រំដល់កូនចៅជំនាន់ក្រោយ ឲ្យបានយល់ឃើញជាមេរៀន និងឆ្លុះបញ្ជាំងទិដ្ឋភាពសង្គមដែលកើតមាន៖

១– ឪខ្លាមិនដែលមានកូនឆ្កែទេ ៖ គឺមេបាមានចរិតលក្ខណៈបែបណា តែបណ្តុះបណ្តាលកូនឲ្យមានលក្ខណៈបែបនោះ។

២– បានត្រឹមតែឮ នឹងភ្លេចទៅវិញ បានឃើញនឹងចងចាំ បានធ្វើដោយផ្ទាល់ទើបយល់ច្បាស់ ៖ គឹធ្វើកិច្ចការអ្វីមួយ ទាល់តែបានអនុវត្តផ្ទាល់ទើបមនុស្សអាចដឹងច្បាស់។

៣– អ្វីដែលមនុស្សគិត មិនឈ្នះអ្វីដែលទេវតាបានរៀបចំ ៖គឺមនុស្សត្រូវវាសនាចារទុកជាស្រេចរួចមកហើយ បើមិនត្រូវបាន ខំយ៉ាងណាក៏មិនសំរេច។

៤– មានលុយ គេអាចប្រើខ្មោចឲ្យកិនស្រូវបាន ៖គឺមានលុយ មានអំណាចអាចធ្វើអ្វីបានគ្រប់យ៉ាង។

៥– ជីកស្មៅ ត្រូវជីកទាំឫស ៖ គឺធ្វើអ្វីត្រូវធ្វើឲ្យចប់ចុងចប់ដើម បើមិនដោះស្រាយរឿងអ្វីមួយឲ្យរួចរាល់ទេ រឿងដដែលនឹងកើតឡើងមកវិញ។

៦– សំដីដែលនិយាយចេញទៅហើយ ទោះជាសេះជាសេះចម្បាំង ក៏ដេញតាមចាប់មកវិញមិនបានដែរ ៖ ដូចពាក្យខ្មែរថា រនាបបាក់ គេអាចយកបន្លាជួស តែសំដីជ្រុលហួស ជួសមិនបានឡើយ ដូច្នេះមុននឹងនិយាយស្តីអ្វីត្រូវគិតឲ្យបានដិតដល់សិន និយាយហើយមិនធ្វើ គេថាអត់សច្ចៈ និយាយអាក្រក់ឲ្យគេ ជួញគេស្អប់ និយាយពាក្យ មិនគួរនិយាយនាំស្តាយក្រោយ។

៧– មិនទាន់ឃើញក្តារមឈូស មិនទាន់ស្រក់ទឹកភ្នែក។

៨–កិត្តិនាមល្បីរន្ទឺរបស់វិរជនម្នាក់ នាំមកជាមួយនូវការលះបង់ជីវិតសាមញ្ញជនរាប់សែននាក់។

៩– ដំណើររាប់ពាន់យោជន៍ ត្រូវចាប់ផ្តើមពីជំហាននីមួយៗចេញទៅ ៖ គឺចង់សម្រេចការធំ ត្រូវចាប់ផ្តើមធ្វើកិច្ចការតូចៗទៅមុន។

១០– ត្រីធំស៊ីត្រីតូច ៖ គឺអ្នកមានអំណាច អ្នកធំតែងកេងប្រវ័ញ្ច យកចំណេញលើអ្នកទន់ខ្សោយ អ្នកតូចទាបជាងខ្លួន។

១១– អ្នកដែលហ៊ានសួរ ធ្វើមនុស្សល្ងង់តែ៥នាទី អ្នកដែលមិនហ៊ានសួរធ្វើជាមនុស្សល្ងង់អស់មួយជីវិត ៖ ដូចពាក្យខ្មែរថាថ្លៃអ្វីនឹងមាត់។

១២- គេឲ្យមួយធុង ត្រូវសងគេវិញមួយពាង ៖ គឹត្រូវសងគុណគេឲ្យបានច្រើនលើសលប់ជាងពេលគេជួយយើង។

១៣– ក្នុងជីវិតមនុស្ស វាសនាអាក្រក់តែងកើតមានច្រើនជាង វាសនាល្អ។

១៤– បើមានផ្សែងចេញពីរូងទទេ វាមិនដែលអត់ហេតុទេ ៖ គឺបើមានរឿងវាត្រូវតែមានហេតុ។

១៥– ចំងាយផ្លូវវែង ស្ទង់កំលាំងសេះ ឯរយៈពេលវែង ស្ទង់ចិត្តមនុស្ស។

១៦– សៀវភៅដែលគ្មានគេអាន ប្រៀបបានក្រដាសទទេ ៖គឺចំណេះដែលមានតែក្នុងក្បួន ពុំបានជាប្រយោជន៍អ្វីឡើយ។

១៧– មាត់ស្អុយ នឹងពុំអាចពោលពាក្យពិរោះពិសាឡើយ ៖ គឺមនុស្សដែលមានមាត់អាក្រក់ តែងស្រដីវាចាតែពាក្យអាក្រក់ៗ ពុំគួរជាទីសណ្តាប់នៃជនផង។

១៨– អ្នកល្ងង់វាយតំលៃមនុស្សទៅសំបកក្រៅ។

១៩- កណ្តុរដែលចូលចិត្តអង្កៀមកន្ទុយឆ្មា នឹងនាំទុក្ខដល់អាត្មាអាសារបង់ ៖ គឺអ្នកតូចដែលទៅរករឿងអ្នកធំ នឹងនាំគ្រោះដល់ខ្លួនពុំលែងដូចពាក្យខ្មែរថា ពងមាន់កុំចង់ជល់នឹងថ្ម។

២០– ជីវិតរបស់កុមារ ប្រៀបបាននឹងផ្ទាំងសំពត់សស្អាត ដែលត្រូវអ្នកឯទៀតធ្វើឲ្យមានស្នាម៖ គឺអប់រំល្អ ធ្វើឲ្យក្មេងក្លាយជាមនុស្សល្អ ការអប់រំអាក្រក់ ធ្វើឲ្យក្មេងក្លាយជាមនុស្សអាក្រក់។

២១– ជីកអណ្តូងមុនពេលស្រេកទឹក ៖ គឺត្រូវត្រៀមឲ្យបានមុនពេលអាសន្នមកដល់៕

ដោយ៖ មាន រតនា

ចុចអាន៖មកដឹងសុភាសិត ចិន ក្នុងទស្សនៈរៀនសូត្រពីជីវិតសង្គមទូទៅ

The post សុភាសិតចិន ទស្សនៈរៀនសូត្រពីជីវិត និងសង្គមទូទៅ (ត) appeared first on Kampuchea Thmey Daily.

បទពិសោធចំនួន ៤ ពីស្ថាបនិកក្រុមហ៊ុនផលិតរថយន្តម៉ាក Honda ក្នុងសហគ្រិនភាព

Mean Ratana — Wed, 07 Feb 2024 07:37:14 +0000

រថយន្តជាមធ្យោបាយធ្វើដំណើរមួយដែលជួយសម្រួលការដឹកជញ្ជូនបានច្រើនក្នុងជីវភាពរស់នៅ។ យើងអាចធ្វើដំណើរទៅទីឆ្ងាយៗគ្រប់ទីកន្លែង មិនថាលក្ខណៈគ្រួសារ បងប្អូន មិត្តភក្តិ គឺជាគុណសម្បត្តិមួយរបស់ឧស្សាហកម្មផលិតរថយន្ត។ ទន្ទឹមនឹងនោះ ប្រិយមិត្តអាចស្គាល់និងដឹងខ្លះៗហើយអំពីម៉ាក Honda ដែលសព្វថ្ងៃម៉ាកមួយនេះកំពុងមានឈ្មោះបោះសំឡេង និងជាក្រុមហ៊ុនផលិតរថយន្តធំជាងគេលំដាប់ទី ៦ លើពិភពលោក ។

នៅពីក្រោយភាពជោគជ័យនៃក្រុមហ៊ុនផលិតរថយន្តមកទល់បច្ចុប្បន្ននេះ គឺមានស្ថាបនិកមួយរូប ដែលជាដើមចមសំខាន់គឺលោក Soichiro Honda ដែលមានអ្នកបានរៀនសូត្រគំនិតខ្លះៗរបស់លោក និងបានបង្ហាញជា ៤ មេរៀនក្នុងភាពជាសហគ្រិនដូចខាងក្រោមនេះ៖

១. ជួលមនុស្សដែលមានគំនិតប្លែកៗគ្នា

លោក Honda ធ្លាប់បានលើកឡើងថា បើអ្នកជួលមនុស្សសម្រាប់ធ្វើការហើយមានគំនិតប្រហាក់ប្រហែល ក៏គួរស្វែងរកបុគ្គលិកដែលមានគំនិតផ្សេងៗមកបន្ថែម។ ស្ថាបនិកក្រុមហ៊ុនផលិតរថយន្តជនជាតិជប៉ុនរូបនេះបានលើកឧទាហរណ៍ថា បុគ្គលិកដែលមានគំនិតផ្សេងៗគ្នាច្រើន ទោះបីពិបាកគ្រប់គ្រងបន្តិច ប៉ុន្តែបានរួមចំណែកច្រើនសម្រាប់អនុវត្តឱ្យក្រុមហ៊ុនមួយបានរីកចម្រើនទៅមុខជានិច្ច ដោយសារការប្រើគំនិតច្នៃប្រឌិតប្លែកគ្នាទាំងនោះ។

២. ជោគជ័យភាគច្រើនគឺមកពីបរាជ័យ

មុនពេលបង្កើតក្រុមហ៊ុន Honda ស្ថាបនិករូបនេះ ក៏ធ្លាប់មានក្រុមហ៊ុនមួយឈ្មោះ Tokai Seiki ដែលផលិតគ្រឿងបរិក្ខារឡាន។ យ៉ាងណាមិញ ក្រុមហ៊ុនបានបរាជ័យដោយសារគុណភាពនៃបរិក្ខារឡានផលិតមិនបានល្អ ចុងក្រោយលោកបានដាច់កុងត្រាដៃគូជាមួយក្រុមហ៊ុន Toyota ដោយសារតែរឿងគុណភាពនោះ។

ប៉ុន្តែ បរាជ័យមិនបានរារាំងមិនឱ្យលោកបន្តស្រាវជ្រាវនិងស្វែងយល់បន្ថែមពីជំនាញវិស្វកម្មនោះទេ ពោលរហូតមកទល់ឆ្នាំ១៩៦៤ ក្រុមហ៊ុន Honda បានក្លាយជាក្រុមហ៊ុនដ៏ធំ និងបានក្លាយជាក្រុមហ៊ុនដែលផលិតម៉ូតូធំជាងគេលើពិភពលោក ។

ក្រុមហ៊ុនអាចទទួលការរីកចម្រើនលូតលាស់ទៅមុខបាន ដរាបណាវាជួបនឹងជម្នះបញ្ហាប្រឈមផងដែរ “ជំនួសឱ្យការខ្លាចនឹងជម្នះការលំបាកនិងបរាជ័យ គួរខ្លាចពីការរត់គេចពីការលំបាកនោះ ហើយមិនធ្វើអ្វីសោះ” នេះដែលលោក Soichiro Honda បានលើកឡើង។

៣. ពិចារណាឡើងវិញ ទោះបីចេញពីកំហុសដែលធ្វើឱ្យអ្នកឈឺចាប់

ធ្វើដំណើរទៅមុខឆ្លងកាត់ឧបសគ្គ អាចជាដំណោះស្រាយ ប៉ុន្តែគ្រាន់តែទៅមុខធម្មតា ពុំមែនជាដំណោះស្រាយប្រសើរពេញលក្ខណៈទេ។ នៅពេលលោក Soichiro Honda បាត់បង់សិទ្ធិដៃគូជាមួយ Toyota លោកបានពិចារណាលើកង្វះខាត ហើយឈានជំហានទៅធ្វើឱ្យមានរឿងប្រសើរឡើង គឺលោកទៅចូលសាលាវិស្វកម្មរៀនពីតាក់តិច ធ្វើដំណើរជុំវិញប្រទេស ដើម្បីសង្កេតមើលតាមរោងចក្រ និងស្វែងយល់។ ត្រឹមឆ្នាំ១៩៤១ដំណើរការផលិតរបស់លោកផ្ទាល់គឺមានគុណភាពអាចទទួលយកបាន។

វាជារឿងពិបាកដែលត្រូវប្រឈមជម្នះនឹងបញ្ហាច្រើន ក៏ដូចជាសម្លឹងមើលពីគុណវិបត្តិដែលអ្នកមានប៉ុន្តែការស្វះស្វែងរកដំណោះស្រាយឱ្យបានប្រសើរជាងមុន ពិសេសគឺសមស្របតាមបរិបទនិងសម័យកាល គឺជារឿងល្អបំផុត។ លោកក៏ធ្លាប់លើកឡើងផងដែរថា មិនមានក្រុមហ៊ុនច្រើនទេដែលអាចឈរមាំឋិតថេរដោយមិនផ្លាស់ប្តូរ ឬបត់បែន រហូតទទួលជោគជ័យនោះ។

៤. ការផ្តោតយកចិត្តទុកដាក់ជាឫសគល់នៃភាពជោគជ័យ

ពីកុមារភាព Soichiro Honda មានចំណូលចិត្តលើគ្រឿងម៉ាស៊ីន ផ្តើមនៅពេលមួយដែលលោកឃើញឡានមួយគ្រឿងជិះកាត់តាមភូមិដែលលោករស់នៅ។ លោកមិនភ្លេចទេនូវក្លិនប្រេងម៉ាស៊ីន ដែលបាននាំលោកឱ្យទៅដល់ក្រុងតូក្យូហើយទៅធ្វើការជាកូនជាងមេកានិចរយៈពេល៦ឆ្នាំ លោកក៏មានក្តីសុបិនមួយថានឹងត្រឡប់មកផ្ទះហើយបង្កើតក្រុមហ៊ុនរថយន្តមួយផ្ទាល់ខ្លួន។

ពិតមែន គោលដៅ ព្រមទាំងជាចំណូលចិត្តលោកបានធ្វើឱ្យយុវជនជប៉ុនម្នាក់នេះ ព្យាយាម និងផ្តោតការស្វែងយល់លើជំនាញទាក់ទិននឹងឡានរហូតពេលខ្លះលោកភ្លេចបាយទឹកទៀតផង។ ប៉ុន្តែដោយសារការផ្តោតលើការសិក្សាជំនាញ លោក Honda ពុំបានចូលរៀន និងមានសញ្ញាបត្រផ្នែកវិស្វកម្មនោះទេ។

“ខ្ញុំមិនសូវរំខានការផ្តោតលើកិច្ចការរបស់ខ្ញុំទេ…ទោះបីពេលខ្លះកូរពោះប៉ុន្តែនៅតែចង់បន្តកិច្ចការតទៀត..” លោក Soichiro Honda បានលើកឡើង។ ចំពោះកិច្ចការខ្លះក៏បានទាមទារត្រូវការរយៈពេលវែង និងការអនុវត្តច្រើនម៉ោងលើដំណើរការរបស់វា ដែលជាហេតុនាំឱ្យលោក Honda បានទទួលជោគជ័យលើគោលដៅរបស់លោក៕

ដោយ៖ មាន រតនា

The post បទពិសោធចំនួន ៤ ពីស្ថាបនិកក្រុមហ៊ុនផលិតរថយន្តម៉ាក Honda ក្នុងសហគ្រិនភាព appeared first on Kampuchea Thmey Daily.

ការពិតខ្លះ និងរឿងមួយចំនួនដែលអ្នកគួរដឹងនៅពីក្រោយភេសជ្ជៈកាហ្វេ ពាក់ព័ន្ធច្រើនទៅបរិស្ថាន

Mean Ratana — Tue, 16 Jan 2024 07:32:07 +0000

កាហ្វេជាភេសជ្ជៈដ៏ពេញនិយមមួយសម្រាប់គ្រប់គ្នា ក្នុងសតវត្សទី២១នេះ ប៉ុន្តែអ្នកដឹងទេថា នៅពីក្រោយផលិតកម្មកាហ្វេ ដើម្បីផ្តល់នូវកាហ្វេរសជាតិឆ្ញាញ់បានមួយកែវនោះ គឺមានពាក់ព័ន្ធទៅនឹងពលកម្មកុមារ ការថយចុះព្រៃឈើធម្មជាតិ ក៏ដូចជាការប្រើប្រាស់សារធាតុគីមី ថ្នាំសម្លាប់សត្វល្អិត ដែលបង្កគ្រោះថ្នាក់ដល់សុខភាព និងបញ្ហាដោយប្រយោលមួយចំនួនទៀត។ ប្រភពព័ត៌មានពី World Counts បានបង្ហាញចំណុចមួយចំនួនគួរចាប់អារម្មណ៍ដូចខាងក្រោម៖

១–ការរុករានឆ្ការព្រៃឈើ ដើម្បីយកកន្លែងដាំកាហ្វេ

ការដាំដុះកាហ្វេតាមធម្មជាតិ គឺគេដាំនៅក្រោមម្លប់ មិនឲ្យត្រូវពន្លឺព្រះអាទិត្យ។ ប៉ុន្តែរយៈពេលចុងក្រោយ ឧស្សាហកម្មកាហ្វេបានកើនឡើង ដោយសារតម្រូវការភេសជ្ជៈនេះច្រើន ដែលវិវឌ្ឍពីការដាំដុះបែបប្រពៃណីក្នុងបរិស្ថានម្លប់នោះ ទៅជាការផ្សាំផ្សេងៗ ឲ្យធន់ត្រូវនឹងកម្តៅព្រះអាទិត្យដើម្បីទទួលបានទិន្នផលច្រើនសម្រាប់ផ្គត់ផ្គង់។ ហើយដំណើរការឧស្សាហកម្មផលិតកាហ្វេដោយប្រើការដាំដុះបែបទន្ទ្រានព្រៃឈើ សម្រាប់ផ្គត់ផ្គង់ទីផ្សារបានដើរតួនាទីជំនួស ជាហេតុធ្វើឲ្យជីវៈជម្រុះអាស្រ័យធនធានធម្មជាតិរងនូវផលប៉ះពាល់។

២– ផលិតកម្មកាហ្វេតាមរបៀបថ្មីមានតម្រូវការចំណាយធនធានច្រើន

កាហ្វេក្នុងចំណុះបរិមាណមួយកែវ គឺស្មើនឹងការចំណាយទឹក១៤០លីត្រក្នុងការដាំដុះវាឡើង។ មិនត្រឹមតែប៉ុណ្ណោះដើម្បីតាមទាន់តម្រូវការ ការដាំដុះបានជំរុញឲ្យ អ្នកដាំដុះត្រូវរុករានឆ្ការព្រៃឈើធម្មជាតិក្នុងទ្រង់ទ្រាយធំដើម្បីយកកន្លែងដាំ ជាមួយគ្នានោះការបំផ្លាញជីវជាតិដីក៏កើតមានផងដែរ តាមរយៈការប្រើថ្នាំគីមី ថ្នាំសម្លាប់សត្វល្អិតដើម្បីគ្រប់គ្រងដំណាំបានល្អ។ ហើយសកម្មភាពទាំងនេះដែលធ្វើឲ្យដីដំណាំជាច្រើនរងខូចគុណភាព ក៏ដូចបង្កប៉ះពាល់ដល់សុខភាពសត្វ និងបរិស្ថានជុំវិញដោយសារសារធាតុគីមីដែលប្រើប្រាស់ជ្រាបចូលក្នុងប្រភពទឹក។

ដោយឃើញពីផលប៉ះពាល់ទាំងនេះ ហើយស្របទៅនឹងតម្រូវការភេសជ្ជៈកាហ្វេនៅតែមាន ក៏មានឧស្សាហកម្មខ្លះងាកមកពីសកម្មភាពបង្កគុណវិបត្តិធ្ងន់ធ្ងរមករក វិធីដាំដុះកាហ្វេតាមលំនាំធម្មជាតិវិញដើម្បីកាត់បន្ថយហានិភ័យទាំងនោះ។ ជាក់ស្តែងការងាកមកដាំដុះដំណាំកាហ្វេដោយផ្សាំភ្ជាប់ទៅនឹងរុក្ខជាតិលូតលាស់តាមធម្មជាតិក្នុងតំបន់ដាំដុះ ជាជាងការទន្ទ្រានព្រៃ។ ទោះបីបិរមាណតិចប៉ុន្តែកាហ្វេទាំងនោះ មានគុណភាពល្អជាង ពិសេសដោយមិនប្រើថ្នាំសត្វល្អិត ដែលធ្វើឱ្យប្រភេទសត្វបក្សី និងសត្វអាស្រ័យសត្វល្អិតផ្សេងៗ អាចរស់នៅដោយសុវត្ថិភាព បង្កជាលក្ខណៈជីវចម្រុះអេកូ-បរិស្ថាន ។

ជាមួយគ្នានេះ បើទោះជាអ្នកញ៉ាំកាហ្វេ និងចូលរួមកាត់បន្ថយពីប៉ះពាល់ខាងលើ ក៏ធ្វើបានតាមរយៈការជ្រើសរើសប្រភេទផលិតផលកាហ្វេ ដែលគាំទ្រការដាំដុះប្រភេទធម្មជាតិ “Shade-grown Coffee” ដែលគេនិយមប្រើប្រាស់វា ដោយវាមានគុណភាពខ្ពស់តាមរយៈការដាំដុះបែបធម្មជាតិ និងមិនបង្កផលប៉ះពាល់ដល់បរិស្ថាន។ គេអាចរកឃើញផលិតផលកាហ្វេនោះតាមរយៈស្លាកសញ្ញាផ្សេងៗ ដែលបញ្ជាក់ពីការមិនបង្កប៉ះពាល់ដល់បរិស្ថាន ឬ Eco-friendly ឬ Shade-Grown ជាដើម៕

អត្ថបទដោយ៖ មាន រតនា

The post ការពិតខ្លះ និងរឿងមួយចំនួនដែលអ្នកគួរដឹងនៅពីក្រោយភេសជ្ជៈកាហ្វេ ពាក់ព័ន្ធច្រើនទៅបរិស្ថាន appeared first on Kampuchea Thmey Daily.

តោះ! មកស្គាល់សាកលវិទ្យាល័យនៅខេត្តបាត់ដំបង សម្រាប់សិស្សបន្តមហាវិទ្យាល័យ

Din Thary — Thu, 13 Oct 2022 03:11:21 +0000

ក្រៅពីរាជធានីភ្នំពេញ នៅក្នុងខេត្តបាត់ដំបងមានគ្រឹះស្ថានឧត្តមសិក្សាសម្រាប់សិស្សសិក្សាគ្រប់មុខជំនាញ។ គ្រឹះស្ថានឧត្តមសិក្សានៅខេត្តបាត់ដំបងមួយចំនួន ក៏ជាបណ្តាញសាខាសាលាធំៗនៅរាជធានីភ្នំពេញ។

កម្ពុជាថ្មី សូមបង្ហាញគ្រឹះស្ថានឧត្តមសិក្សាដែលមាននៅក្នុងខេត្តបាត់ដំបង។

១. សាកលវិទ្យាល័យជាតិបាត់ដំបង

ជាសាកលវិទ្យាល័យរបស់រដ្ឋធំជាងគេបំផុតនៅក្នុងភូមិភាគពាយព្យបង្កើតឡើងដោយអនុក្រឹត្យលេខ ២៦ .អន ក្រ.បក ចុះថ្ងៃទី២១ ខែមិនា ឆ្នាំ២០០៧ ក្រោមគំនិតផ្ដួចផ្ដើមរបស់លោក ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ និងជាតំណាងរាស្ត្រខេត្តបាត់ដំបង។ សាលានេះមានទីតាំងស្ថិតនៅជាប់ផ្លូវជាតិលេខ៥ ភូមិអូរខ្ជាយ សង្កាត់ព្រែកព្រះស្ដេច ក្រុងបាត់ដំបង ខេត្តបាត់ដំបង។

២. សាលាពុទ្ធិកសាកលវិទ្យាល័យព្រះសីហនុរាជ ខេត្តបាត់ដំបង

ជាគ្រឹះស្ថានអប់រំឧត្ដមសិក្សាសាធារណៈបង្កើតឡើងនៅក្នុងឆ្នាំ២០០៦ ដែលមានសាខារាជធានីភ្នំពេញ ខេត្តកំពង់ចាម និងបាត់ដំបង។ សាខាខេត្តបាត់ដំបងមានទីតាំងស្ថិតនៅក្នុងវត្តដំរីស ភូមិកម្មករ សង្កាត់ស្វាយប៉ោ ក្រុងបាត់ដំបង ខេត្តបាត់ដំបង។

៣. សាកលវិទ្យាល័យគ្រប់គ្រង និងសេដ្ឋកិច្ច

សាកលវិទ្យាល័យគ្រប់គ្រង និងសេដ្ឋកិច្ច ជាគ្រឹះស្ថានឧត្ដមសិក្សាឯកជន បង្កើតឡើងដោយស្ថាបនិកលោក ទុន ភក្តី ក្នុងឆ្នាំ១៩៩៨ ដែលមានទីតាំងស្ថិតនៅអាគារលេខ ៧៤ ភូមិព្រែកព្រះស្តេច សង្កាត់ព្រែកព្រះស្តេច ក្រុងបាត់ដំបង ខេត្តបាត់ដំបង។

៤. សាកលវិទ្យាល័យអន្តរជាតិ ឌូវី

សាកលវិទ្យាល័យអន្តរជាតិឌូវី ( Dewey International University) ជាគ្រឹះស្ថានឧត្ដមសិក្សាឯកជន ព្រមទាំងជាសាកលវិទ្យាល័យដំបូងបំផុតនៅកម្ពុជា ដែលមានការគាំទ្រយ៉ាងពេញទំហឹងពី ៣ ប្រទេសរួមគ្នា រួមមាន កម្ពុជា សហរដ្ឋអាមេរិក និងអាល្លឺម៉ង់ ថែមទាំងមានការជួយជ្រោមជ្រែងទាំងផ្នែកបច្ចេកទេស និងសម្ភារពីបណ្ដាប្រទេសជាច្រើនទៀត នៅលើពិភពលោក។ សាកលវិទ្យាល័យ ឌូវី មានទីតាំងស្ថិតនៅភូមិរំចេក៤ សង្កាត់រតនៈ ក្រុងបាត់ដំបង ខេត្តបាត់ដំបង។

៥. សាកលវិទ្យាល័យបញ្ញាសាស្រ្តកម្ពុជា ខេត្តបាត់ដំបង

សាកលវិទ្យាល័យបញ្ញាសាស្រ្តកម្ពុជាខេត្តបាត់ដំបង ជាគ្រឹះស្ថានឧត្ដមសិក្សាឯកជន បណ្តុះបណ្តាលលើមុខជំនាញផ្សេងៗគ្នា ព្រមទាំងបែងចែកចេញជា មហាវិទ្យាល័យចំនួន ៧ ថែមទៀតផង។ ជាសាខាសាលាដ៏ល្បីមួយនៅរាជធានីភ្នំពេញ សាលាបញ្ញាសាស្រ្តកម្ពុជាខេត្តបាត់ដំបងមានទីតាំងស្ថិតនៅភូមិរំចេក ៤ សង្កាត់រតនៈ ក្រុង/ខេត្តបាត់ដំបង តាមបណ្ដោយផ្លូវស្ពាន សម្តេចក្រឡាហោម ស ខេង ត្រើយខាងកើតចម្ងាយ ៣០០ម៉ែត្រ។

៥.សាកលវិទ្យាល័យឯកទេសនៃកម្ពុជា ខេត្តបាត់ដំបង

ជាគ្រឹះស្ថានឧត្តមសិក្សាឯកជន មានមហាវិទ្យាល័យចំនួន ៥ អប់រំទៅតាមជំនាញ មានទីតាំងស្ថិតនៅភូមិអូរតាគាំ២ សង្កាត់ទួលតាឯក ក្រុងបាត់់ដំបង ខេត្តបាត់ដំបង។

៦. សាកលវិទ្យាល័យ ខេមរៈ ខេត្តបាត់ដំបង

ជាគ្រឹះស្ថានឧត្ដមសិក្សាឯកជនមួយ ធ្វើការបណ្តុះបណ្តាលលើមុខជំនាញខុសៗគ្នាជាច្រើន។ សាកលវិទ្យាល័យនេះ មានទីតាំងស្ថិតនៅភូមិកម្មករ សង្កាត់ស្វាយប៉ោ ក្រុងបាត់ដំបង ខេត្តបាត់ដំបង។

៧. វិទ្យាស្ថាន វ៉ាន់ដា ខេត្តបាត់ដំបង

វិទ្យាស្ថានវ៉ាន់ដា ខេត្តបាត់ដំបង ជាគ្រឹះស្ថានឧត្តមសិក្សាឯកជន មានទីតាំងស្ថិតនៅដីឡូត៍លេខ២៧១ ផ្លូវលេខ ៦១៤ ភូមិរំចេក២ សង្កាត់រតនៈ ក្រុងបាត់ដំបង ខេត្តបាត់ដំបង៕

ដោយ៖ ឌឿនចាន់ ថារី

The post តោះ! មកស្គាល់សាកលវិទ្យាល័យនៅខេត្តបាត់ដំបង សម្រាប់សិស្សបន្តមហាវិទ្យាល័យ appeared first on Kampuchea Thmey Daily.

ចំណេះដឹង Archives - Kampuchea Thmey Daily

លោកជំទាវ ពេជ ចន្ទមុន្នី៖ ទោះរៀនដល់ណាក៏ដោយ តែបើគ្មានសីលធម៌ហើយ គឺគ្មានអ្នកគោរពឡើយ

គន្លឹះខ្លះៗជួយសិស្សនិស្សិតអាចរកចំណូលបន្ថែម ពេលកំពុងសិក្សា

គុណធម៌ខ្លីៗ ១៣ ចំណុចពីបុរសខ្លាំងលើក្រដាសប្រាក់ ១០០ ដុល្លារ អាមេរិក

មេរៀនប្រចាំថ្ងៃក្នុងជីវិត ៥ យ៉ាងគួរចាប់យកពីអ្នកប្រដាល់ហ្វីលីពីន Pacquiao

សុភាសិតចិន ទស្សនៈរៀនសូត្រពីជីវិត និងសង្គមទូទៅ (ត)

បទពិសោធចំនួន ៤ ពីស្ថាបនិកក្រុមហ៊ុនផលិតរថយន្តម៉ាក Honda ក្នុងសហគ្រិនភាព

ការពិតខ្លះ និងរឿងមួយចំនួនដែលអ្នកគួរដឹងនៅពីក្រោយភេសជ្ជៈកាហ្វេ ពាក់ព័ន្ធច្រើនទៅបរិស្ថាន

តោះ! មក​ស្គាល់​សាកលវិទ្យាល័យ​នៅ​ខេត្តបាត់ដំបង សម្រាប់​សិស្ស​បន្ត​មហាវិទ្យាល័យ

តោះ! មកស្គាល់សាកលវិទ្យាល័យនៅខេត្តបាត់ដំបង សម្រាប់សិស្សបន្តមហាវិទ្យាល័យ