ច្បារអំពៅ Archives - Kampuchea Thmey Daily

អាជ្ញាធរសង្កាត់ច្បារអំពៅ២សំណូមពរពលរដ្ឋបញ្ឈប់ការចោលសំរាមពាលវាលពាសកាល

hun sirivadh — Thu, 06 Nov 2025 07:22:39 +0000

សំរាមជាច្រើនបានពោពាសនៅលើសួនតាមបណ្ដោយផ្លូវជាតិលេខ១ និងសួនសាធារណៈជារៀងរាល់ព្រឹក ខណៈអាជ្ញាធរបានប្រមូលកម្លាំងចេញសំអាតជានិច្ចកាលផងដែរ។ អាជ្ញាធរបញ្ជាក់ថាបើសិនពុំបានប្រមូលមួយថ្ងៃនោះច្បាស់ណាស់សំរាមពិតជាគោពាលវាលពាសកាលជាពុំខាន។

សមាជិកក្រុមប្រឹក្សា និងជាជំនួយការសាលាសង្កាតច្បារអំពៅទី២ លោក ជូន វ៉ាននី បានឱ្យដឹងថាសំរាមទាំងនេះភាគច្រើនបង្កើតឡើងដោយអ្នកដើរលេងពេលយប់ និងបន្សល់ទុកឱ្យឃើញជារៀងរាល់ព្រឹក។

លោកថា៖ « បើពុំបានប្រមូលសំរាមលើសួននេះទេគឺសំរាមច្បាស់ជាគរពាសវាលពាសកាល។ហើយអ្នករអែងចោលសំរាមលើសួនភាគច្រើនអ្នកដើរលេងពេលយប់តែម្តង»។

កំពុងដឹកនាំកម្លាំងប្រជាការពារប្រមូលសំរាមបណ្ដើរក៏ចូលរួមរើសបណ្ដើរផងនោះលោក វ៉ាន់នី បានសំណូមពរដល់ពលរដ្ឋបញ្ឈប់ការបោះសំរាមលើសួនបន្តទៀត សូមគិតថាទីតាំងសាធារណៈទាំងនេះគឺជារបស់ពលរដ្ឋទាំងអស់គ្នាដូចជាផ្ទះរបស់ពួកគេផងដែរ។

លោកបន្ថែមថា៖ «សុំបញ្ឈប់ការបោះសំរាមលើសួនទៀតទៅអាក្រក់មើលណាស់»។

ការទុកដាក់សំរាមគឺជាផ្នែកមួយនៃឥរិយាបថ ចំណេះដឹង សីលធម៌នៃការរស់នៅរបស់ពលរដ្ឋក្នុងសង្គម។ ខណៈដែលកម្ពុជាកំពុងឈានទៅកាន់ប្រទេសមានប្រាក់ចំណូលមធ្យមកម្រិតខ្ពស់ ២០៣០នោះ ការអប់រំពីការទុកដាក់សំរាមពិតជាមានសារៈសំខាន់។ ក្រសួងបរិស្ថានជានិច្ចកាលតែងតែផ្សព្វផ្សាយជំរុញការចូលរួមរបស់ពលរដ្ឋយកចិត្តទុកដាក់លើបញ្ហាសំរាមនេះផងដែរ។

រដ្ឋមន្ត្រីបរិស្ថានលោក អ៊ាង សុផល្លែត ធ្លាប់បានលើកឡើងដោយជំរុញដល់ពលរដ្ឋទាំងអស់រៀបចំទុកដាក់សំណល់សំរាមឱ្យបានត្រឹមត្រូវ និងបញ្ឈប់ការចោលសំរាមតាមទីសាធារណៈហើយបែរមកទុកដាក់ឱ្យបានត្រឹមត្រូវជាពិសេសអនុវត្តវិធាន 4Rs ដែលមានដូចជាការបដិសេធ ការកាត់បន្ថយ ការប្រើប្រាស់ឡើងវិញ និងការកែច្នៃឡើងវិញ៕

ដោយ៖ នរា

The post អាជ្ញាធរសង្កាត់ច្បារអំពៅ២សំណូមពរពលរដ្ឋបញ្ឈប់ការចោលសំរាមពាលវាលពាសកាល appeared first on Kampuchea Thmey Daily.

ពលរដ្ឋក្នុងភូមិព្រែកជាងព្រុំ សង្កាត់វាលស្បូវ ទទួលបានផ្លូវបេតុង១ ខ្សែ

deth leng — Sun, 18 May 2025 09:55:00 +0000

នៅអំឡុងខែឧសភា ឆ្នាំ២០២៥នេះបងប្អូនប្រជាពលរដ្ឋរស់នៅភូមិព្រែកជាងព្រុំ សង្កាត់វាលស្បូវ ខណ្ឌច្បារអំពៅរាជធានីភ្នំពេញបានទទួលផ្លូវចាក់ក្រាលបេតុងមួយខ្សែដែលគេហៅថា ផ្លូវអ្នកតាឃ្លាំងដែលពីដើមមកជាផ្លូវលំពីដូនតាមក។

យោងតាមប្រសាសន៍លោកស្រី យន់ សុផល ចៅសង្កាត់វាលស្បូវបានឲ្យកម្ពុជាថ្មីដឹងថា ផ្លូវអ្នកតាឃ្លាំងដែលកំពុងស្ថាបនានេះគឺស្ថិតក្នុងភូមិព្រែកជាងព្រុំដែលមានទទឹង៥ម៉ែត្រ និងបណ្តោយ២៥០ម៉ែត្រ។

ផ្លូវ១ខ្សែនេះគឺពីដើមមកជាផ្លូវលំដែលជាផ្លូវសម្រាប់ប្រជាកសិករដឹកផលដំណាំចេញពីចំការយកទៅលក់នៅទីផ្សារប៉ុណ្ណោះ។ ប៉ុន្តែបច្ចុប្បន្នប្រែក្លាយពីផ្លូវលំទៅជាផ្លូវចាក់ក្រាលបេតុង។

លោកស្រីចៅសង្កាត់វាលស្បូវបានបន្តទៀតថា មុននឹងស្ថាបនាផ្លូវចាក់ក្រាលបេតុងនេះឡើងគឺអាជ្ញាធរបានជីកដាក់ប្រពន្ធ័លូបង្ហូទឹកពីក្រោមផ្លូវបានរួចរាល់ហើយដែរ។

ក្នុងនោះអាជ្ញាធរក៏បានកំពុងតែជីកដាក់លូបង្ហូទឹកតាមបច្ចេកទេសស្ថិតផ្លូវទួលតានងដែលមានប្រវ៉ែង២៥០ម៉ែត្រនិងទទឹង៥ម៉ែត្រតភ្ជាប់ទៅសង្កាត់ព្រែកឯងខណ្ឌច្បារអំពៅទៀតផង។

តាងនាមឲ្យអាជ្ញាធរសង្កាត់វាលស្បូវលោកស្រី យន់ សុផល បានសំដែងការដឹងគុណដល់លោក ចេង មុនីរ៉ាអភិបាលខណ្ឌច្បារអំពៅដែលលោកតែងតែលើកសំណើទៅសាលារាជធានីភ្នំពេញ ដើម្បីទម្លាក់ថវិកាមកស្ថាបនានៅសង្កាត់វាលស្បូវបានជាច្រើនខ្សែកន្លងមក៕

អត្ថបទ៖ នរា

The post ពលរដ្ឋក្នុងភូមិព្រែកជាងព្រុំ សង្កាត់វាលស្បូវ ទទួលបានផ្លូវបេតុង១ ខ្សែ appeared first on Kampuchea Thmey Daily.

អាជ្ញាធរចុះគូសគំនូសកំណត់ចំណតរថយន្តមុខបេនឡាន និងមុខផ្សារច្បារអំពៅ

អុន ស្រីមាន — Sun, 26 Jan 2025 03:04:13 +0000

ដើម្បីរៀបចំសណ្តាប់ធ្នាប់ចរាចរណ៍ដែលកំពុងកកស្ទះសឹងជារៀងរាល់ថ្ងៃ ពិសេសតំបន់ផ្សាររដ្ឋក៏ដូចជាផ្សារឯកជន អាជ្ញាធរក៏បានចុះរៀបចំរបៀបរៀបរយចៀសវាងបើកបរមិនគោរពច្បាប់។

ជាក់ស្តែងអាជ្ញាធរខណ្ឌច្បារអំពៅរាជធានីភ្នំពេញ បានចាត់តាំងកម្លាំងចុះគូសគំនូសកំណត់ទីតាំងចំណតសម្រាប់រថយន្តដែលចូលចតដើម្បីចូលទៅទិញឥវ៉ាន់។ លោក ហ៊ត គឹមនី អភិបាលរងខណ្ឌច្បារអំពៅដែលបានដឹកនាំកម្លាំងចម្រុះចុះរៀបចំសណ្តាប់ធ្នាប់ក្នុងមូលដ្ឋានខណ្ឌច្បារអំពៅបានចាត់កម្លាំងឲ្យចុះគូសគំនូសនៅមុខបេនឡាននិងមុខផ្សារច្បារអំពៅដើម្បីកុំឲ្យរថយន្តឈប់សំចតបែបអានាធិបតេយ្យបង្កឲ្យស្ទះចរាចរណ៍សឹងរាល់ថ្ងៃ។

ទន្ទឹមនិងនោះលោកអភិបាលរងខណ្ឌបានសំណូមពរដល់បងប្អូនអាជីវករលក់ដូរទាំងអស់បញ្ឈប់រំលោភយកចំណីផ្លូវដាក់តាំងលក់ជាបន្តទៅទៀត។ ប្រសិនបើមិនចូលរួមគោរពតាមការណែនាំអាជ្ញាធរនិងដកហូតសម្ភារៈដែលដាក់លក់លើផ្លូវយកមករក្សាទុកនៅសាលាខណ្ឌជាការព្រមាន៕

ដោយ៖នរា

The post អាជ្ញាធរចុះគូសគំនូសកំណត់ចំណតរថយន្តមុខបេនឡាន និងមុខផ្សារច្បារអំពៅ appeared first on Kampuchea Thmey Daily.

Update ៖ ករណីអគ្គិភ័យនៅច្បារអំពៅ ឆេះឃ្លាំងស្ដុកក្រដាសសែន និងគ្រឿងជ័រទាំងស្រុង

អ៊ិន ពិសី — Fri, 29 Nov 2024 09:32:19 +0000

ឆេះឃ្លាំងស្តុកក្រដាសសែន និងគ្រឿងជ័រមួយឃ្លាំងទាំងស្រុង ផ្អើលសមត្ថកិច្ច និងប្រជាពលរដ្ឋ ក្នុងមូលដ្ឋានសង្កាត់ច្បារអំពៅទី ០១។

អគ្គិភ័យនេះដែរ បង្កការភ្ញាក់ផ្អើលកាលពីវេលាម៉ោង ០៣ និង ២៥ នាទីរសៀល ថ្ងៃទី ២៩ ខែវិច្ឆិកា ឆ្នាំ ២០២៤ នៅចំណុចផ្ទះលក់ក្រដាសសែន ស្ថិតតាមបណ្ដោយផ្លូវលេខ ៣៥៧ ខាងក្រោយពេទ្យបង្អែកច្បារអំពៅ សង្កាត់ច្បារអំពៅទី ០១ ខណ្ឌច្បារអំពៅ រាជធានីភ្នំពេញ។

ប្រភពព័ត៌មានពីប្រជាពលរដ្ឋរស់នៅក្បែរកន្លែងកើតហេតុ បានឲ្យដឹងថា គេបានឃើញមានផ្សែងខ្មៅហ៊ុយខ្មួលខ្មាញ់ លាយឡំអណ្ដាតភ្លើង។ ភ្លាមៗ នោះ ពលរដ្ឋបាននាំគ្នាជួយយកទុយោទឹកមកជួយបាញ់ដែរ ប៉ុន្តែដោយសារឃ្លាំងកើតហេតុខាងលើសម្បូរទៅដោយក្រដាសសែន ជាហេតុធ្វើឲ្យមិនអាចទប់ស្កាត់បាន ទើបបង្កឲ្យអណ្ដាតភ្លើងលេបត្របាក់ឆក់យកឃ្លាំងខាងលើទាំងស្រុងតែម្ដង។

ក្នុងហេតុការណ៍នេះ ក៏មានវត្តមាន លោក ចេង មុន្នីរ៉ា អភិបាល នៃគណៈអភិបាលខណ្ឌច្បារអំពៅ រួមនឹងមន្ត្រីក្រោមឱវាទបានចុះមកដល់ទីតាំងឆេះខាងលើនេះផងដែរ។

អគ្គិភ័យនេះដែរបានឆាបឆេះឃ្លាំងស្តុកក្រដាសសែនចំនួន ០១ ឃ្លាំង ទាំងស្រុង រួមនឹងសម្ភារៈគ្រឿងជ័រមួយចំនួនធំ។ ក្នុងនោះបានប្រើប្រាស់រថយន្តពន្លត់របស់ស្នងការរាជធានីភ្នំពេញជាច្រើនគ្រឿង បាញ់ពន្លត់រហូតរលត់ជាស្ថាពរ។ ចំពោះមូលហេតុសមត្ថកិច្ចជំនាញកំពុងបើកការស្រាវនៅទីតាំងខាងលើនេះផងដែរ៕

អត្ថបទ ៖ រដ្ឋា

The post Update ៖ ករណីអគ្គិភ័យនៅច្បារអំពៅ ឆេះឃ្លាំងស្ដុកក្រដាសសែន និងគ្រឿងជ័រទាំងស្រុង appeared first on Kampuchea Thmey Daily.

អាជ្ញាធរសង្កាត់ច្បារអំពៅ ដាក់របាំងមិនឲ្យរថយន្តធំបើកក្រោមស្ពានព្រោះខ្លាចប៉ះតួស្ពាន

Sokhom Khon — Sat, 09 Nov 2024 04:16:36 +0000

លោក យ៉ិន វុធ ចៅសង្កាត់ច្បារអំពៅទី២ បានប្រាប់កម្ពុជាថ្មីនៅថ្ងៃទី៩ ខែវិច្ឆិកានេះថា សាលាខណ្ឌច្បារអំពៅបានសម្រេចដាក់របាំង សង្ខាងស្ពានព្រះមុនីវង្សចាស់ថ្មីដើម្បីទប់ស្កាត់កុំឲ្យរថយន្តធុនធំបើកឆ្លងកាត់ក្រោមស្ពានព្រោះខ្លាចប៉ះបាតស្ពានដូចពេលកន្លងមក ខណៈផ្នែកជំនាញកំពុងជួសជុលសព្វថ្ងៃ។

លោក យ៉ិន វុធ បានបន្តថា ការដាក់របាំងសង្ខាងផ្លូវក្រោមស្ពានព្រះមុនីវង្សចាស់ថ្មីស្ថិតក្នុងខណ្ឌច្បារអំពៅរាជធានីភ្នំពេញនេះគឺមិនអនុញាតិឲ្យរថយន្តធំឆ្លងកាត់ក្រោមស្ពានព្រោះកន្លងមកធ្លាប់រថយន្តដឹកទឺកសុទ្ធបើកបុកបង្កឲ្យបែកបេតុងស្ពានព្រះមុនីវង្សថ្មីដែលបច្ចុប្បន្នកំពុងជួសជុលមិនទាន់រួចផងហើយផ្លូវបេតុងក្រោមស្ពានដែលសាលារាជធានីភ្នំពេញកសាងឡើងគឺសម្រាប់តែឲ្យរថយន្តធុនតូច និងអ្នកថ្មើជើងរួមជាមួយម៉ូតូប៉ុណ្ណោះ។ចំពោះការជួសជុលស្ពានមកដល់ថ្ងៃនេះមិនទាន់រួចរាល់នៅឡើយទេ៕

អត្ថបទ៖ នរា

The post អាជ្ញាធរសង្កាត់ច្បារអំពៅ ដាក់របាំងមិនឲ្យរថយន្តធំបើកក្រោមស្ពានព្រោះខ្លាចប៉ះតួស្ពាន appeared first on Kampuchea Thmey Daily.

ប្រឡាយមួយខ្សែដែលកំពុងជីកអាចសង្រ្គោះតំបន់លិចលង់បាន៥សង្កាត់ ក្នុងទឹកដីខណ្ឌច្បារអំពៅ

Ngoeul Narath — Sat, 29 Jun 2024 08:00:00 +0000

លោក ចេង មុនីរ៉ា អភិបាលខណ្ឌច្បារអំពៅ ធ្លាប់បានថ្លែងប្រាប់«កម្ពុជាថ្មី»ឲ្យដឹងថា ចំពោះប្រឡាយដ៏ធំដែលអាជ្ញាធរកំពុងដាក់គ្រឿងចក្រជីកដាក់ប្រពន្ធ័លូធំនេះអាចសង្រ្គោះពីជំនន់ទឹកភ្លៀងនារដូវវស្សាបានចំនួន៥សង្កាត់ក្នុងមូលដ្ឋានខណ្ឌច្បារអំពៅរាជធានីភ្នំពេញ។

មន្ត្រីជំនាញនៃសាធារណការសាលាខណ្ឌច្បារអំពៅបានឲ្យកម្ពុជាថ្មីដឹងថា រាល់ថ្ងៃនេះគ្រឿងចក្របានសម្រុកស្តាប្រឡាយធំមួយខ្សែសម្រាប់រំដោះទឹកចេញពីទីតាំងដែលធ្លាប់រងការលិចលង់ដែលក្នុងនោះមានសង្កាត់ចំនួន៥ក្នុងចំណោមសង្កាត់ទាំង៨ក្នុងមូលដ្ឋានខណ្ឌច្បារអំពៅរាជធានីភ្នំពេញ។សង្កាត់ទាំង៥នោះរួមមានសង្កាត់ព្រែកប្រា សង្កាត់ព្រែកថ្មី សង្កាត់ព្រែកឯង សង្កាត់វាលស្បូវនិងសង្កាត់វាលស្បូវ។

ចំពោះដំណើរការជីប្រឡាយធំនេះដែរ ប្រជាពលរដ្ឋក្នុងសង្កាត់ទាំង៥ខាងលើមានក្តីរីករាយ ព្រោះលែងព្រួយបារម្ភពីការលិចលង់លំនៅឋាន និងដីចំការតទៅទៀត ខណៈរយៈពេលជិត៥ឆ្នាំមក រៀងរាល់រដូវវស្សាម្តងៗពួកគាត់តែងតែជួបប្រទះបញ្ហាទឹកជំនន់លិចលង់អស់ពេលជាច្រើនខែទំរាំតែបានស្រកទៅវិញ។

គួរបញ្ជាក់ថាប្រឡាយដ៏ធំនេះឆ្លងកាត់បឹង ព្រែកឯង វាលស្បូវ ព្រែកថ្មីនិងព្រែកប្រា បច្ចុប្បន្នប្រឡាយចាស់នេះត្រូវលុបបំបាត់ដោយសារបំណាក់ដី៕

អត្ថបទ៖នរា

The post ប្រឡាយមួយខ្សែដែលកំពុងជីកអាចសង្រ្គោះតំបន់លិចលង់បាន៥សង្កាត់ ក្នុងទឹកដីខណ្ឌច្បារអំពៅ appeared first on Kampuchea Thmey Daily.

អាជ្ញាធរតាមរកមុខអ្នកតែងដុតស្មៅ ដែលអាចបង្កឱ្យឆេះរាលដាលដល់ផ្ទះប្រជាពលរដ្ឋ

KC Virak — Mon, 12 Feb 2024 05:51:58 +0000

លោក យុិន វិធី ចៅសង្កាត់ច្បារអំពៅទី២ បានប្រាប់ កម្ពុជាថ្មី ថាលោកកំពុងចាត់កម្លាំងឱ្យស្រាវជ្រាវរកមុខជនដែលតែងដុតស្មៅបង្កឱ្យឆេះរាលដាលដល់ផ្ទះប្រជាពលរដ្ឋ។

ជាក់ស្តែងនៅវេលាម៉ោង ១១ និង ១០នាទី ព្រឹកថ្ងៃទី១២ ខែកុម្ភៈ នេះ មានជនមិនស្គាល់មុខបានដុតស្មៅ ស្ថិតនៅដីឡូត៍មួយកន្លែង ក្នុងភូមិដើមស្លែង១ សង្កាត់ច្បារអំពៅទី២ ខណ្ឌច្បារអំពៅ រាជធានីភ្នំពេញ ហើយស្របពេលមានខ្យល់បោកបក់ខ្លាំងផង ធ្វើឱ្យកម្លាំងភ្លើងឆាបឆេះរាលដល់ក្បែរផ្ទះប្រជាពលរដ្ឋ រហូតដល់អាជ្ញាធរសុំការអន្តរាគមន៍ដល់រថយន្តពន្លត់អគ្គិភ័យរបស់សាលាខណ្ឌច្បារអំពៅ ឱ្យជួយបាញ់ពន្លត់ ទើបស្ថប់ស្ងាត់ទៅវិញ។

លោកចៅសង្កាត់ច្បារអំពៅទី២ បានថ្លែងទៀតថា បើពុំមានរថយន្តពន្លត់អគ្គិភ័យមកជួយទាន់ពេល គឺច្បាស់ជាឆ្លងរាលដាលដល់ផ្ទះប្រជាពលរដ្ឋរាប់រយខ្នងជាក់ជាពុំខាន។ ដូច្នេះហើយទើបអាជ្ញាធរសុំសហការណ៍ពីប្រជាពលរដ្ឋឱ្យរកមុខជនដែលតែងដើរដុតស្មៅបង្កឱ្យភ្លើងងាយរាលដាលដល់ផ្ទះប្រជាពលរដ្ឋ៕

អត្ថបទ៖ នរា

The post អាជ្ញាធរតាមរកមុខអ្នកតែងដុតស្មៅ ដែលអាចបង្កឱ្យឆេះរាលដាលដល់ផ្ទះប្រជាពលរដ្ឋ appeared first on Kampuchea Thmey Daily.

ពលរដ្ឋរំពឹងថា ស្ពានបាឡេ ព្រែកប្រាឆ្លងទៅចាក់អង្រែក្រោម នឹងកាត់បន្ថយទាំងកកស្ទះចរាចរណ៍ ចំណេញពេលវេលា និងថវិកា

អុន ស្រីមាន — Fri, 12 Jan 2024 04:22:20 +0000

ប្រជាពលរដ្ឋដែលរស់នៅជិតវត្តព្រែកប្រា សង្កាត់ព្រែកប្រា ខណ្ឌច្បារអំពៅ បង្ហាញពីភាពសប្បាយរីករាយដែលរដ្ឋាភិបាលកំពុងដំណើរការសាងសង់ស្ពានបាឡេឆ្លងទន្លេបាសាក់ពីចំណុចព្រែកប្រា ទៅចាក់អង្រែក្រោម ដោយពលរដ្ឋលើកឡើងថានៅពេលស្ពាននេះសាងសង់រួច នឹងជួយសម្រួលចរាចរណ៍ ក៏ដូចជាបង្កើនដល់សេដ្ឋកិច្ចរបស់អ្នករស់នៅទីនោះផង។

អ្នកស្រី ឡុង សាត ជារស់នៅទីនោះ និងលក់ដូរនៅមុខវត្តព្រែកប្រាបានប្រាប់ថា អ្នកស្រីសប្បាយចិត្តនៅពេលមានការសាងសង់ស្ពាននៅចំណុចនោះ ព្រោះរាល់ដងនៅពេលអ្នកស្រីចង់ចូលក្រុងភ្នំពេញ ឬ ទៅក្រុងតាខ្មៅ ត្រូវជិះវាងឆ្ងាយ ប៉ុន្តែ ប្រសិនជាស្ពាននេះសាងសង់រួចរាល់គឺជួយសម្រួលចរាចរណ៍អ្នកស្រីបានច្រើន ព្រមទាំងចំណេញពេលវេលាផង។ អាជីកររូបនេះបន្ថែមថា ប្រសិនជាស្ពានសាងសង់រួចអាចមានមនុស្សមកខាងតំបន់ព្រែកប្រាច្រើនព្រោះចរាចរណ៍ងាយស្រួលធ្វើដំណើរ ដូចនេះការលក់ដូររបស់អ្នកស្រីក៏ងាយស្រួលជាងមុនផង។

ជាមួយគ្នានេះ អ្នកស្រី ស៊ឹម អៀងស្រ៊ុន ជាអ្នកលក់ទឹកអំពៅនៅជិតកន្លែងសាងសង់ស្ពាននោះ បានលើកឡើងថា នៅពេលដែលមានស្ពាននេះ នឹងជួយសម្រួលចរាចរណ៍បានច្រើន មិនមានការកកស្ទះ ជាពិសេស សម្រាប់អាជីវករលក់ដូរនឹងមានភាពងាយស្រួលក្នុងការធ្វើដំណើរទៅវិញ ទៅមកម្តងៗរហ័សទាន់ពេលវេលា។ ចំពោះការលក់ដូរវិញ អ្នកស្រី យល់ឃើញមិនខុសពី អ្នកស្រី ឡុង សាត ឡើយ ការលក់ដូររបស់ប្រជាជននៅទីនោះអាចលក់ដាច់បានជាងពីមុន ព្រោះមានផ្លូវងាយស្រួលក្នុងការធ្វើដំណើរ។ ពោលគឺ អ្នកស្រីយល់ថាល្អគ្រប់យ៉ាងសម្រាប់ទាំងពលរដ្ឋនៅតំបន់ព្រែកប្រា និងពលរដ្ឋនៅតំបន់ផ្សេងផង។

ចំណែក អ្នកលក់ការ៉េមឡើងចុះព្រែកប្រា តាខ្មៅ ច្បារអំពៅ បានឱ្យដឹងថា លោកពិតជារំភើបប្រសិនជាស្ពានសាងសង់រួចរាល់ ព្រោះរាល់ថ្ងៃលោកដើរលក់ការ៉េមចល័ត ដូចនេះ ការធ្វើដំណើរតម្រូវឱ្យគាត់វាងឆ្ងាយដែរ បើសិនជាបានស្ពាននេះមក លោកចំណេញពេលវេលាធ្វើដំណើរបានច្រើន។

ចំពោះលោក ជិន សុធន់ ដែលជាអ្នករស់នៅទីនោះ បម្រើការងារជាសន្តិសុខក៏និយាយមិនខុសពីពលរដ្ឋខាងលើឡើយ។ លោកថា នៅពេលដែលមានស្ពាននេះ គឺជួយដល់ប្រជាពលរដ្ឋទាំងអស់ដែលឆ្លងកាត់ទីនោះ និងមានភាពងាយស្រួលជាងមុន។ ជួយកាត់បន្ថយការកក់ស្ទះចរាចរណ៍ ចំណេញពេលវេលា ចំណេញថវិការបស់ពលរដ្ឋបានច្រើន។ សម្រាប់ការដឹកទំនិញរបស់ប្រជាពលរដ្ឋក៏ងាយស្រួលជាងមុន ដោយមិនចាំបាច់ចំណាយពេលវេលាយូរឡើយ។

លោកក៏បានថ្លែងអំណរគុណដល់រាជរដ្ឋាភិបាលកម្ពុជា ដែលបានគិតគូរដល់ប្រជាពលរដ្ឋ ព្រមទាំងបានសាងសង់ស្ពានឡើងមកសម្រាប់ជួយសម្រួលចរាចរណ៍ និងបង្កើនសេដ្ឋកិច្ចរបស់ប្រជាជនផង។ សូមជម្រាបថា ស្ពានបាឡេដែលកំពុងតែដំឡើងនៅព្រែកប្រា ឆ្ពោះទៅចាក់អង្រែក្រោម គឺជាស្ពានដែលរុះរើពីឫស្សីកែវមក និងត្រូវបានរដ្ឋបាលរាជធានីភ្នំពេញ ដំឡើងជាបណ្ដោះអាសន្ន ដើម្បីសម្រួលការធ្វើចរាចរណ៍របស់ប្រជាពលរដ្ឋ មុនពេលស្ពានថ្មថ្មី កាត់ពីសង្កាត់ព្រែកប្រាទៅចាក់អង្រែក្រោមដល់ផ្លូវ៦០ម៉ែត្រសាងសង់រួចរាល់នៅពេលខាងមុខ៕

The post ពលរដ្ឋរំពឹងថា ស្ពានបាឡេ ព្រែកប្រាឆ្លងទៅចាក់អង្រែក្រោម នឹងកាត់បន្ថយទាំងកកស្ទះចរាចរណ៍ ចំណេញពេលវេលា និងថវិកា appeared first on Kampuchea Thmey Daily.