ច្រកសមុទ្រហ័រមូហ្ស Archives - Kampuchea Thmey Daily

អង់គ្លេស ប្រកាសបញ្ជូនយន្តហោះចម្បាំង នាវាចម្បាំង ឧបករណ៍រកមីនទៅច្រក Hormuz

Minea Neu — Wed, 13 May 2026 02:37:27 +0000

ចក្រភពអង់គ្លេស បានឲ្យដឹងនៅថ្ងៃអង្គារថា ខ្លួននឹងចូលរួមផ្តល់នូវឧបករណ៍រុករកមីនស្វ័យប្រវត្តិ យន្តហោះចម្បាំង Typhoon និងនាវាចម្បាំង HMS Dragon សម្រាប់បេសកកម្មការពារជាតិពហុជាតិសាសន៍ដែលមានគោលបំណងធានាសុវត្ថិភាពការដឹកជញ្ជូននៅច្រកសមុទ្រហ័រមូស (Hormuz)។

យោងតាមភ្នាក់ងារសារព័ត៌មានរ៉យទ័រ ចុះផ្សាយថ្ងៃទី១៣ ខែឧសភា ឆ្នាំ២០២៦ រដ្ឋមន្ត្រីក្រសួងការពារជាតិអង់គ្លេស លោក John Healey បានប្រកាសពីការប្តេជ្ញាចិត្តនេះ អំឡុងពេលកិច្ចប្រជុំកំពូលជាមួយសមភាគីជាង ៤០រូបមកពីប្រទេសដទៃទៀតពាក់ព័ន្ធនឹងបេសកកម្មនៅច្រកហ័រមូសហើយនឹងចាប់ផ្តើមដំណើរការ ពេលលក្ខខណ្ឌត្រូវបានអនុញ្ញាត។

យន្តហោះចម្បាំងអង់គ្លេស។ រូបភាព៖ Reuters

លោកលើកឡើងក្នុងសេចក្តីថ្លែងការណ៍មួយថា៖ « ជាមួយសម្ព័ន្ធមិត្តរបស់យើង បេសកកម្មពហុជាតិសាសន៍នេះនឹងមាន សុវត្ថិភាព ឯករាជ្យ និងអាចទុកចិត្តបាន»។

សង្គ្រាមដែលបង្កដោយដោយសហរដ្ឋអាមេរិក-អ៊ីស្រាអែលលើអ៊ីរ៉ង់ បានកាត់បន្ថយចរាចរណ៍ឆ្លងកាត់ច្រកសមុទ្រ Hormuz យ៉ាងខ្លាំង ជាពិសេសរំខានដល់ការនាំចេញប្រេងនិងធ្វើឱ្យតម្លៃថាមពលកើនឡើងជាគំហុក។

ការចូលរួមចំណែករបស់ចក្រភពអង់គ្លេស នឹងទទួលបានការគាំទ្រពីមូលនិធិថ្មីចំនួន ១៥៥.៥៣លានដុល្លារ សម្រាប់ឧបករណ៍រាវរកមីន និងប្រព័ន្ធប្រឆាំងដ្រូន ខណៈទីក្រុងឡុងដ៍ស្វែងរកការធានាឡើងវិញនូវការដឹកជញ្ជូនពាណិជ្ជកម្មសេរីភាពនៃការធ្វើនាវាចរណ៍ ចំពេលមានភាពតានតឹងក្នុងតំបន់កាន់តែខ្លាំង។

កញ្ចប់ទឹកប្រាក់នេះនឹងរួមបញ្ចូលគ្នាជាប្រព័ន្ធ ដើម្បីស្វែងរកនិងសម្អាតមីនដោយកងទ័ពជើងទឹក ទូកគ្មានមនុស្សបើកល្បឿនលឿន យន្តហោះចម្បាំង Typhoon សម្រាប់ល្បាតតាមអាកាស និងនាវាចម្បាំង HMS Dragon ជានាវាពិឃាតការពារដែនអាកាស កំពុងធ្វើដំណើរទៅកាន់មជ្ឈិមបូព៌ារួចហើយ៕

សម្រួល៖ ណឺ មិនា

The post អង់គ្លេស ប្រកាសបញ្ជូនយន្តហោះចម្បាំង នាវាចម្បាំង ឧបករណ៍រកមីនទៅច្រក Hormuz appeared first on Kampuchea Thmey Daily.

លោក ត្រាំ គំរាមបំផ្លាញអ៊ីរ៉ង់ជាថ្មី បើទីក្រុងតេហេរ៉ង់ ហ៊ានវាយប្រហារនាវាអាមេរិក

Minea Neu — Tue, 05 May 2026 04:52:32 +0000

ស្ថានភាពនៅមជ្ឈិមបូព៌ាកាលពីថ្ងៃចន្ទ (ត្រូវយប់ថ្ងៃអង្គារម៉ោងនៅកម្ពុជា) បានបង្កឱ្យមានភាពតានតឹងកាន់តែខ្លាំងជាថ្មីម្តងទៀត ដោយសហរដ្ឋអាមេរិក បានបើកការវាយប្រហារលើទូកល្បឿនលឿនរបស់អ៊ីរ៉ង់ ចំណែកអ៊ីរ៉ង់តបវិញដោយបាញ់លើឃ្លាំងប្រេងរបស់ប្រទេសអារ៉ាប់រួម។

ប្រធានាធិបតីសហរដ្ឋអាមេរិក លោក ដូណាល់ ត្រាំ បានព្រមាន ថា យោធាអាមេរិកនឹងបំផ្លាញអ៊ីរ៉ង់ចោល ប្រសិនបើទីក្រុងតេហេរ៉ង់ហ៊ានវាយប្រហារនាវាអាមេរិកនោះ ខណៈភាពតានតឹងជុំវិញច្រកសមុទ្រហ័រមូស (Hormuz) ជំរុញឱ្យបទឈប់បាញ់រវាងប្រទេសទាំងពីរឈានដល់កម្រិតក្តៅបំផុតជាថ្មីទៀត។

ប្រធានាធិបតីសហរដ្ឋអាមេរិក លោក ដូណាល់ ត្រាំ ។ រូបភាព៖ Reuters

សារព័ត៌មាន Al Jazeera ផ្សាយថ្ងៃទី០៤ ខែឧសភា ឆ្នាំ២០២៦ បានឱ្យដឹងថា អរិភាពបានបន្តក្នុងតំបន់មជ្ឈិមបូព៌ាកាលពីថ្ងៃចន្ទ ខណៈអ៊ីរ៉ង់បានវាយប្រហារប្រទេសអារ៉ាប់រួម យ៉ាងណា លោក ត្រាំ អះអាងថា យោធាអាមេរិកបានវាយប្រហារទូកតូចៗចំនួន ៧គ្រឿងរបស់អ៊ីរ៉ង់នៅជិតច្រក Hormuz ។

នៅក្នុងបទសម្ភាសន៍ជាមួយសារព័ត៌មាន Fox News លោក ត្រាំ បានគូសបញ្ជាក់ពីអំណាចយោធារបស់ទីក្រុងវ៉ាស៊ីនតោន ហើយប្រធានាធិបតីអាមេរិករូបនេះនៅបន្តការគំរាមកំហែងលើអ៊ីរ៉ង់ជាបន្តបន្ទាប់។

លោក ត្រាំ លើកឡើងថា៖ « យើងមានអាវុធ និងគ្រាប់រំសេវច្រើនទៀត។ យើងមានឧបករណ៍ល្អបំផុត! យើងមានរបស់របរ[ទ្រព្យសម្បត្តិយោធា] នៅទូទាំងពិភពលោក យើងមានមូលដ្ឋានទ័ពនៅទូទាំងពិភពលោក។ ពួកវាទាំងអស់នោះមានស្តុកទុកដោយឧបករណ៍យោធា។ យើងអាចប្រើប្រាស់របស់របរទាំងអស់នោះបាន ហើយយើងនឹងប្រើប្រាស់ ប្រសិនបើយើងត្រូវការវា»។

គួរបញ្ជាក់ថា យោធាសហរដ្ឋអាមេរិកបានចាប់ផ្តើមអនុវត្តផែនការរបស់ លោក ត្រាំ នៅថ្ងៃចន្ទ ដែលមានឈ្មោះថា «Project Freedom» ដើម្បីណែនាំកប៉ាល់ឆ្លងកាត់ Hormuz និងបំបែកការបិទផ្លូវអ៊ីរ៉ង់ លើផ្លូវទឹកដឹកជញ្ជូនយុទ្ធសាស្ត្រនេះ។

មិនតែប៉ុណ្ណោះ ទីក្រុងវ៉ាស៊ីនតោនអះអាងថា ខ្លួនបានជួយនាវាពាណិជ្ជកម្មអាមេរិកពីរគ្រឿងឆ្លងកាត់ច្រកសមុទ្រ Hormuz ប៉ុន្តែគេហទំព័រតាមដាននាវាបង្ហាញថា ចរាចរណ៍ឆ្លងកាត់ផ្លូវទឹកនេះភាគច្រើននៅតែផ្អាកនៅឡើយ៕

ប្រែសម្រួល៖ ណឺ មិនា

The post លោក ត្រាំ គំរាមបំផ្លាញអ៊ីរ៉ង់ជាថ្មី បើទីក្រុងតេហេរ៉ង់ ហ៊ានវាយប្រហារនាវាអាមេរិក appeared first on Kampuchea Thmey Daily.

អាមេរិក ព្រមានដាក់ទណ្ឌកម្ម លើក្រុមហ៊ុនដែលបង់ថ្លៃឲ្យអ៊ីរ៉ង់ជាថ្នូរឆ្លងកាត់ច្រក Hormuz

Minea Neu — Sat, 02 May 2026 03:33:58 +0000

សហរដ្ឋអាមេរិក បានដាក់ការព្រមាន ក្រុមហ៊ុនដឹកជញ្ជូនណាមួយដែលបង់ថ្លៃសេវា ឬថ្លៃសេវាផ្សេងទៀតដល់អ៊ីរ៉ង់សម្រាប់ការឆ្លងកាត់ច្រកសមុទ្រ Hormuz នោះសហរដ្ឋអាមេរិកនឹងដាក់ទណ្ឌកម្មក្រុមហ៊ុនទាំងនោះដែលហ៊ានបំពាន បម្រាមរបស់សហរដ្ឋអាមេរិក។

យោងតាមការចុះផ្សាយរបស់សារព័ត៌មាន Al Jazeera នៅថ្ងៃទី០១ ខែ៥ ឆ្នាំ២០២៦ ការព្រមាននេះ បានកើតឡើងកាលពីថ្ងៃសុក្រ ខណៈការបិទច្រកសមុទ្ររបស់កងទ័ពជើងទឹកអាមេរិកបានបន្តដល់សប្តាហ៍ទីបី ចំពេលមានការចរចាបទឈប់បាញ់រវាងសហរដ្ឋអាមេរិក និងអ៊ីរ៉ង់កំពុងជាប់គាំងនៅឡើយ។

ប្រធានាធិបតីអ៊ីរ៉ង់ លោក Masoud Pezeshkian ហៅការឡោមព័ទ្ធបិទច្រកចូលនិងចេញកំពង់ផែអ៊ីរ៉ង់ពីសំណាក់សហរដ្ឋអាមេរិក ថា «មិនអាចអត់ឱនបាន»។

ប្រធានាធិបតីសហរដ្ឋអាមេរិក លោក ដូណាល់ ត្រាំ។ រូបភាព៖ Reuters

ឥទ្ធិពលរបស់អ៊ីរ៉ង់ក្នុងការបិទច្រកសមុទ្រ Hormuz គឺប្រកបដោយប្រសិទ្ធភាព បានលេចចេញជាចំណុចសំខាន់មួយនៃឥទ្ធិពលភ្លាមៗបន្ទាប់ពីសហរដ្ឋអាមេរិកនិងអ៊ីស្រាអែលចាប់ផ្តើមវាយប្រហារអ៊ីរ៉ង់នៅថ្ងៃទី២៨ ខែកុម្ភៈ។

នៅក្នុងសំណើកន្លងមកដើម្បីបញ្ចប់សង្គ្រាម អ៊ីរ៉ង់ស្នើឱ្យគិតថ្លៃសេវា ឬថ្លៃផ្លូវនាវាចរណ៍ដែលចង់ឆ្លងកាត់ច្រកនេះ តែទីក្រុងវ៉ាស៊ីនតោនបដិសេធម្តងហើយម្តងទៀតចំពោះការរំពឹងទុកនេះ។

សេចក្តីជូនដំណឹងពីការិយាល័យគ្រប់គ្រងទ្រព្យសម្បត្តិបរទេសនៃក្រសួងរតនាគារអាមេរិកនិយាយថា ប្រទេសអ៊ីរ៉ង់អាចផ្តល់ជូនអ្នកដឹកជញ្ជូននូវរូបិយប័ណ្ណ fiat ទ្រព្យសកម្មឌីជីថល ការទូទាត់សង ការដោះដូរក្រៅផ្លូវការ ឬការទូទាត់ជាសាច់ប្រាក់ផ្សេងទៀត។

សេចក្តីជូនដំណឹងលើកឡើងថា ការទូទាត់ទាំងនោះក៏រួមបញ្ចូលទាំងការទូទាត់ដែលត្រូវបានរៀបចំជាការបរិច្ចាគសប្បុរសធម៌ ឬគណនីស្ថានទូតអ៊ីរ៉ង់ផងដែរ។

ក្នុងសេចក្តីថ្លែងការបន្តថា៖ « ការិយាល័យគ្រប់គ្រងទ្រព្យសម្បត្តិបរទេស (OFAC) កំពុងចេញការជូនដំណឹង ដើម្បីព្រមានដល់ជនជាតិអាមេរិក និងមិនមែនអាមេរិកអំពីហានិភ័យនៃទណ្ឌកម្មនៃការធ្វើការទូទាត់ទាំងនោះ ឬស្នើសុំការធានាពីរបបអ៊ីរ៉ង់សម្រាប់ការឆ្លងកាត់ដោយសុវត្ថិភាព។ ហានិភ័យទាំងនោះកើតឡើង ដោយមិនគិតពីវិធីសាស្ត្រទូទាត់»។

ទោះបីជាយ៉ាងណា ទាំងរដ្ឋាភិបាលអ៊ីរ៉ង់និងកងឆ្មាំបដិវត្តន៍អន្តរជាតិ (IRGC) នៅតែស្ថិតនៅក្រោមទណ្ឌកម្មរបស់សហរដ្ឋអាមេរិក។

ការណែនាំកាលពីថ្ងៃសុក្របានកើតឡើង ខណៈប្រព័ន្ធផ្សព្វផ្សាយរដ្ឋអ៊ីរ៉ង់រាយការណ៍ថា ទីក្រុងតេហេរ៉ង់បានផ្ញើសំណើថ្មីមួយសម្រាប់បទឈប់បាញ់យូរអង្វែងទៅកាន់រដ្ឋបាល លោក ដូណាល់ ត្រាំ៕

ប្រែសម្រួល៖ ណឺ មិនា

The post អាមេរិក ព្រមានដាក់ទណ្ឌកម្ម លើក្រុមហ៊ុនដែលបង់ថ្លៃឲ្យអ៊ីរ៉ង់ជាថ្នូរឆ្លងកាត់ច្រក Hormuz appeared first on Kampuchea Thmey Daily.

ប្រមុខ UN ជំរុញឱ្យអាមេរិក-អ៊ីរ៉ង់ បើកច្រក Hormuz វិញ ដើម្បីឲ្យសេដ្ឋកិច្ចមានដង្ហើម

Minea Neu — Tue, 28 Apr 2026 06:30:00 +0000

អគ្គលេខាធិការអង្គការសហប្រជាជាតិ (UN) លោក Antonio Guterres បានជំរុញឱ្យមានការបើកច្រកសមុទ្រ Hormuz ឡើងវិញ ខណៈពេលដែលការចរចាសន្តិភាពរវាងសហរដ្ឋអាមេរិកនិងអ៊ីរ៉ង់ នៅតែបន្តជាប់គាំងនៅឡើយ។ នេះបើយោងតាមសារព័ត៌មាន TRT world ផ្សាយថ្ងៃទី២៧ ខែមេសា ឆ្នាំ២០២៦ ។

អគ្គលេខាធិការ Guterres ដែលនឹងផុតអាណត្តិនៅចុងឆ្នាំនេះ បានថ្លែងក្នុងកិច្ចពិភាក្សាកម្រិតខ្ពស់មួយរបស់ក្រុមប្រឹក្សាសន្តិសុខអង្គការសហប្រជាជាតិស្តីពីសន្តិសុខដែនសមុទ្រ កាលពីថ្ងៃចន្ទថា៖ « ខ្ញុំសូមអំពាវនាវដល់ភាគីនានា បើកច្រកសមុទ្រ [Hormuz] អនុញ្ញាតឱ្យកប៉ាល់ឆ្លងកាត់ដោយគ្មានការបង់ពន្ធ! គ្មានការរើសអើង និងអនុញ្ញាតឱ្យពាណិជ្ជកម្មរស់ឡើងវិញ ជំរុញឱ្យសេដ្ឋកិច្ចពិភពលោកដកដង្ហើម»។

អគ្គលេខាធិការអង្គការសហប្រជាជាតិ លោក Antonio Guterres. រូបភាព៖ Reuters

គួរបញ្ជាក់ថា ច្រកសមុទ្រ Hormuz មានប្រេងនិងឧស្ម័នធម្មជាតិរាវប្រហែលមួយភាគប្រាំនៃតម្រូវការក្នុងសកលលោក កំពុងប្រឈមមុខនឹងការរំខានយ៉ាងខ្លាំង ចាប់តាំងពីដើមខែមីនា បន្ទាប់ពីសហរដ្ឋអាមេរិកនិងអ៊ីស្រាអែល បានបើកការវាយប្រហាររួមគ្នាប្រឆាំងនឹងអ៊ីរ៉ង់នៅថ្ងៃទី២៨ ខែកុម្ភៈ។

លោក Guterres លើកឡើងថា៖ « ចាប់តាំងពីដើមខែមីនាមក ការរំខានដល់ការដឹកជញ្ជូនតាមច្រកសមុទ្រ Hormuz បានវាយប្រហារសន្តិសុខថាមពលសកល ការផ្គត់ផ្គង់ស្បៀងអាហារ និងពាណិជ្ជកម្ម។ ច្រកសមុទ្រ Hormuz គឺជាផ្លូវសមុទ្រដ៏សំខាន់បំផុតមួយរបស់ពិភពលោក»។

លោកបន្ថែមថា៖ « ការឆ្លងកាត់ដោយសុវត្ថិភាព និងគ្មានឧបសគ្គ គឺជាតម្រូវការចាំបាច់ ទាំងខាងសេដ្ឋកិច្ច និងមនុស្សធម៌។ ការប៉ះទង្គិចសេដ្ឋកិច្ចបានកើតឡើងភ្លាមៗ ហើយមនុស្សគ្រប់គ្នាកំពុងចំណាយខ្ពស់លើតម្លៃថាមពល ប្រេង សកល»។

ក្រៅពីសូចនាករសេដ្ឋកិច្ច លោក Guterres គូសបញ្ជាក់ពីការចំណាយលើមនុស្សនៃវិបត្តិនេះ។ នាវិកជាង ២០ ០០០នាក់ នៅតែជាប់គាំងនៅលើសមុទ្រ ខណៈនាវាពាណិជ្ជកម្មជាង ២ ០០០គ្រឿង ជាប់គាំងក្នុងស្ថានភាពមិនប្រាកដប្រជានិងមានគ្រោះថ្នាក់។

លោក Guterres សង្កត់ធ្ងន់ថា៖ « បុរស និងស្ត្រីទាំងនោះ មិនមែនជាភាគីនៃជម្លោះណាមួយឡើយ។ ពួកគេជាកម្មករស៊ីវិលដែលជួយពិភពលោកប៉ុណ្ណោះ។ មហាសមុទ្រត្រូវតែជាតំបន់សន្តិភាព និងសម្រាប់កិច្ចសហប្រតិបត្តិការ មិនមែនជាការប្រឈមមុខដាក់គ្នា ឬការបង្ខិតបង្ខំនោះទេ»៕

ប្រែសម្រួល៖ ណឺ មិនា

The post ប្រមុខ UN ជំរុញឱ្យអាមេរិក-អ៊ីរ៉ង់ បើកច្រក Hormuz វិញ ដើម្បីឲ្យសេដ្ឋកិច្ចមានដង្ហើម appeared first on Kampuchea Thmey Daily.

កប៉ាល់ដឹកប្រេងអ៊ីរ៉ង់ ៦គ្រឿង ត្រូវយោធាអាមេរិកបិទផ្លូវមិនឲ្យឆ្លង និងបង្ខំត្រឡប់ក្រោយ

Minea Neu — Tue, 28 Apr 2026 05:30:00 +0000

យោងតាមទិន្នន័យតាមដានកប៉ាល់នៅច្រក Hormuz បានបង្ហាញថា កប៉ាល់៦គ្រឿង ផ្ទុកប្រេងរបស់អ៊ីរ៉ង់ត្រូវបង្ខំឱ្យត្រឡប់ថយក្រោយទៅកាន់អ៊ីរ៉ង់វិញ ក្រោយឆ្លងកាត់ច្រកហ័រមូស ដោយសារការបិទខ្ទប់ផ្លូវរបស់សហរដ្ឋអាមេរិកក្នុងរយៈពេលប៉ុន្មានថ្ងៃថ្មីៗនេះ ដែលសកម្មភាពនេះកំពុងបង្ហាញពីផលប៉ះពាល់ ចំពោះចរាចរណ៍ឆ្លងកាត់ច្រកសមុទ្រយុទ្ធសាស្រ្តនេះ ។

យោងតាមភ្នាក់ងារសារព័ត៌មានរ៉យទ័រ ផ្សាយថ្ងៃទី២៧ ខែមេសា ឆ្នាំ២០២៦ ជាធម្មតាមានកប៉ាល់ចន្លោះពី ១២៥ ទៅ ១៤០គ្រឿង ឆ្លងកាត់ ចូលនិងចេញពីច្រកសមុទ្រដ៏សំខាន់នេះជារៀងរាល់ថ្ងៃមុនពេលសង្គ្រាមអាមេរិក-អ៊ីស្រាអែលលើអ៊ីរ៉ង់ចាប់ផ្តើមនៅថ្ងៃទី ២៨ ខែកុម្ភៈ ។ បច្ចុប្បន្នមានតែកប៉ាល់ ៧គ្រឿងប៉ុណ្ណោះ ដែលបានឆ្លងកាត់ក្នុងរយៈពេល ២៤ម៉ោងចុងក្រោយ ហើយក៏គ្មានកប៉ាល់ដឹកប្រេងទៅកាន់ទីផ្សារពិភពលោកដែរ។ នេះបើយោងតាមទិន្នន័យតាមដានកប៉ាល់ Kpler និងការវិភាគផ្កាយរណបពី SynMax ។

កប៉ាល់ដឹកប្រេងឆ្លងកាត់ច្រក Hormuz. រូបភាព៖ Reuters

ម្យ៉ាងវិញទៀត ចរាចរណ៍កប៉ាល់បានធ្លាក់ចុះយ៉ាងខ្លាំង ពីកប៉ាល់ជាង ១០០គ្រឿងជារៀងរាល់ថ្ងៃ មកត្រឹម ៧គ្រឿងប៉ុណ្ណោះ វាបង្ហាញពីឥទ្ធិពលនៃសង្គ្រាមនិងការបិទផ្លូវបានរំខានដល់សកម្មភាពដឹកជញ្ជូនតាមផ្លូវទឹកនេះយ៉ាងធ្ងន់ធ្ងរ។

ទិន្នន័យបង្ហាញថា៖ « នាវាទាំងនោះរួមមាននាវាដឹកទំនិញស្ងួត Bavand ដែលមានទង់ជាតិអ៊ីរ៉ង់បានចាកចេញពីកំពង់ផែអ៊ីរ៉ង់ និងនាវាផ្សេងទៀតដែលចាកចេញពីកំពង់ផែអ៊ីរ៉ាក់»។

អ៊ីរ៉ង់បានដាក់កម្រិតលើការដឹកជញ្ជូនដោយប្រើប្រាស់ច្រកសមុទ្រនេះ ហើយសហរដ្ឋអាមេរិកប្រកាសនៅថ្ងៃទី១៣ ខែមេសា ថា ខ្លួននឹងបិទផ្លូវសមុទ្រដែលដឹកជញ្ជូនទាក់ទងនឹងអ៊ីរ៉ង់។

គួរបញ្ជាក់ថា កងកម្លាំងអាមេរិកបានបញ្ជូននាវាចំនួន ៣៧គ្រឿង ត្រឡប់ក្រោយវិញ ចាប់តាំងពីពេលនោះមក។

មិនតែប៉ុណ្ណោះ ច្រកសមុទ្រនេះជាធម្មតាគ្រប់គ្រង ២០% នៃការផ្គត់ផ្គង់ប្រេង និងឧស្ម័នធម្មជាតិរាវប្រចាំថ្ងៃរបស់ពិភពលោក។

សកម្មភាពរបស់កប៉ាល់ត្រូវបានកាត់បន្ថយតាមរយៈភាពតានតឹងរវាងប្រទេសទាំងពីរ ខណៈការចរចារវាងអ៊ីរ៉ង់និងសហរដ្ឋអាមេរិកនៅតែជាប់គាំងជិតពីរខែ ចូលទៅក្នុងសង្គ្រាម។

យ៉ាងណា យោធាសហរដ្ឋអាមេរិកមិនទាន់ផ្តល់ការវិភាគពេញលេញពីប្រភេទនាវាដែលខ្លួនបានបង្វែរទិសដៅ ឬទីតាំងពិតប្រាកដ បើកផ្ទាំងថ្មីនៃការស្ទាក់ចាប់នោះទេ៕

ប្រែសម្រួល៖ ណឺ មិនា

The post កប៉ាល់ដឹកប្រេងអ៊ីរ៉ង់ ៦គ្រឿង ត្រូវយោធាអាមេរិកបិទផ្លូវមិនឲ្យឆ្លង និងបង្ខំត្រឡប់ក្រោយ appeared first on Kampuchea Thmey Daily.

លោក Hegseth រិះគន់សម្ព័ន្ធមិត្ត ដែលពឹងផ្អែកលើអាមេរិក រឿងបើកច្រក Hormuz

Minea Neu — Sat, 25 Apr 2026 06:27:35 +0000

ប្រធានាធិបតីសហរដ្ឋអាមេរិក ដូណាល់ ត្រាំ ធ្លាប់ស្នើឱ្យសម្ព័ន្ធមិត្តទាំងអឺរ៉ុប-អាស៊ី ជួយបើកច្រកសមុទ្រ Hormuz ឡើងវិញ តែគ្មានប្រទេសណាមួយឡើយ ហើយឥឡូវ រដ្ឋមន្ត្រីក្រសួងសង្គ្រាម Pete Hegseth ស្រាប់តែរិះគន់ប្រទេសនៅអឺរ៉ុបនិងអាស៊ី ចំពោះការពឹងផ្អែកលើយោធាអាមេរិក ដើម្បីបើកច្រកនេះឡើងវិញ បន្ទាប់ពីច្រក ត្រូវអ៊ីរ៉ង់បិទ។

យោងតាមសារព័ត៌មាន BLOOMBERG ផ្សាយថ្ងៃទី២៤ ខែមេសា ឆ្នាំ២០២៦ លោក Hegseth និយាយក្នុងសន្និសីទសារព័ត៌មានមួយកាលពីថ្ងៃសុក្រ ថា៖ «អស់ពេលជាច្រើនទសវត្សរ៍មកនេះ អឺរ៉ុបនិងអាស៊ី ទទួលប្រយោជន៍ពីការការពាររបស់យើង ប៉ុន្តែពេលវេលាដែលប្រើប្រាស់ដោយសេរី បានចប់ហើយ។ អាមេរិកនិងពិភពលោកសេរី សមនឹងទទួលបានសម្ព័ន្ធមិត្តដែលមានសមត្ថភាពនិងស្មោះត្រង់»។

រដ្ឋមន្ត្រីក្រសួងការពារជាតិ លោក Pete Hegseth ។ រូបភាព៖ Reuters

ប្រមុខមន្ទីរបញ្ចកោណ លើកឡើងថា៖ «ការបិទច្រក Hormuz ដែលផ្លូវទឹកសំខាន់មួយ សម្រាប់លំហូរប្រេងនិងឧស្ម័នចេញពីឈូងសមុទ្រពែរ្ស កំពុងប្រឈមហានិភ័យកាន់តែខ្លាំងឡើងជារៀងរាល់ថ្ងៃ»។ លោកសង្កត់ធ្ងន់ម្តងទៀតថា៖ «អឺរ៉ុបនិងអាស៊ីពឹងផ្អែកច្រើនជាងសហរដ្ឋអាមេរិក លើប្រេងនិងឧស្ម័នដែលចេញពីឈូងសមុទ្រពែរ្ស»។

សូមជម្រាបថា ច្រក Hormuz បានបិទនៅថ្ងៃទី២៨ ខែកុម្ភៈ បន្ទាប់ពីសហរដ្ឋអាមេរិក-អ៊ីស្រាអែល វាយប្រហារទ្រង់ទ្រាយធំមកលើអ៊ីរ៉ង់យ៉ាងចាស់ដៃ ហើយទីក្រុងតេហេរ៉ង់ ក៏បានសងសឹកប្រទេសនៅមជ្ឈិមបូព៌ាជាបន្តបន្ទាប់៕

ប្រែសម្រួល៖ ណឺ មិនា

The post លោក Hegseth រិះគន់សម្ព័ន្ធមិត្ត ដែលពឹងផ្អែកលើអាមេរិក រឿងបើកច្រក Hormuz appeared first on Kampuchea Thmey Daily.

ម៉ាក្រុង ដាក់កំហុសទាំងអាមេរិកនិងអ៊ីរ៉ង់ លើការបិទ-បើកច្រក Hormuz

Minea Neu — Tue, 21 Apr 2026 11:41:00 +0000

ប្រធានាធិបតីបារាំង លោក អេម៉ានូអែល ម៉ាក្រុង (Emmanuel Macron) បានរិះគន់ទង្វើភាគីពីរធំៗ ដែលធ្វើឱ្យមានភាពតានតឹងកើនឡើងថ្មីៗក្នុងឈូងសមុទ្រពែរ្ស ដោយលើកឡើងថា វាជាការសម្រេចចិត្តរបស់សហរដ្ឋអាមេរិកក្នុងការរក្សាការបិទផ្លូវទឹក ហើយអ៊ីរ៉ង់អនុវត្តបញ្ច្រាសគោលនយោបាយនៃសេរីភាពក្នុងច្រកសមុទ្រ Hormuz ជាបន្តបន្ទាប់គឺជាកំហុសមួយរបស់ភាគីទាំងពីរយ៉ាងច្បាស់។ នេះបើយោងតាមភ្នាក់ងារសារព័ត៌មានតួកគី Anadolu ផ្សាយថ្ងៃទី២០ ខែមេសា ឆ្នាំ២០២៦ ។

ប្រធានាធិបតីបារាំង លោក អេម៉ានូអែល ម៉ាក្រុង ។ រូបភាព៖ Reuters

ថ្លែងក្នុងសន្និសីទសារព័ត៌មាននៅទីក្រុង Gdansk ប្រទេសប៉ូឡូញ ជាមួយនាយករដ្ឋមន្ត្រីប៉ូឡូញ លោក Donald Tusk, លោក ម៉ាក្រុង បានសម្តែងការព្រួយបារម្ភពីស្ថានភាពច្រកសមុទ្រដ៏ផុយស្រួយ បន្ទាប់ពីមានព័ត៌មានថា សហរដ្ឋអាមេរិកនឹងបន្តបិទផ្លូវនាវាដែលមានទំនាក់ទំនងជាមួយទីក្រុងតេហេរ៉ង់ ទោះបីជាមានការបើកផ្លូវការទូតរយៈពេលខ្លីកាលពីថ្ងៃសុក្រសប្តាហ៍មុនក៏ដោយ។

លោក ម៉ាក្រុង លើកឡើងថា៖ «បន្ទាប់ពីការសម្រេចចិត្តរបស់សហរដ្ឋអាមេរិកក្នុងការរក្សាការបិទផ្លូវទឹក ជាពិសេសលើគោលដៅច្រក Hormuz វាប៉ះពាល់ដល់អ្នកដែលមានទំនាក់ទំនងជាមួយអ៊ីរ៉ង់ហើយអាជ្ញាធរអ៊ីរ៉ង់ផ្លាស់ប្តូរជំហរដំបូងរបស់ពួកគេ [បើកច្រក Hormuz នៅថ្ងៃទី១៧ ខែមេសា]។ ខ្ញុំជឿថានេះជាកំហុសមួយរបស់ភាគីទាំងពីរ»។

លោក ម៉ាក្រុង សង្កត់ធ្ងន់ថា៖ « សហគមន៍អន្តរជាតិត្រូវតែត្រឡប់ទៅរកការសម្រេចចិត្តនៅថ្ងៃសុក្រវិញ។ អ្វីៗគ្រប់យ៉ាងត្រូវតែដោះស្រាយតាមរយៈការទូត។ មនុស្សគ្រប់គ្នាត្រូវតែត្រឡប់ទៅរកភាពស្ងប់ស្ងាត់វិញ»។

លោក ក៏អំពាវនាវឱ្យមានសន្តិភាពយូរអង្វែង តាមរយៈការចរចាលើបញ្ហានុយក្លេអ៊ែរនិងមីស៊ីលផ្លោង ជាជាងវត្តមាននៃសម្ពាធយោធាបច្ចុប្បន្ន។

លោក ម៉ាក្រុង បានជំរុញឱ្យមានការតស៊ូមតិជំនួសវិញសម្រាប់បេសកកម្មការពារ ផលប្រយោជន៍អន្តរជាតិ ដើម្បីធានានូវការបើកច្រកនេះឡើងវិញ ដោយគ្មានលក្ខខណ្ឌសម្រាប់សន្តិសុខថាមពលសកល៕

ប្រែសម្រួល៖ ណឺ មិនា

The post ម៉ាក្រុង ដាក់កំហុសទាំងអាមេរិកនិងអ៊ីរ៉ង់ លើការបិទ-បើកច្រក Hormuz appeared first on Kampuchea Thmey Daily.

លោក ស៊ី កំពុងជួយបញ្ចប់សង្គ្រាមនៅអ៊ីរ៉ង់ និងឱ្យគ្រប់ភាគីឈប់វាយប្រហារកប៉ាល់ឆ្លងកាត់ច្រក Hormuz

Minea Neu — Tue, 21 Apr 2026 04:17:20 +0000

ក្រោយពីមានភាពរកាំរកូសដាក់គ្នាជុំវិញបទឈប់បាញ់រវាងសហរដ្ឋអាមេរិក-អ៊ីរ៉ង់ ច្រកសមុទ្រ Hormuz ក្លាយជាប្រធានបទក្តៅក្នុងជម្លោះនៅមជ្ឈិមបូព៌ា ហើយវានៅតែមិនទាន់បើកចំហឲ្យធ្វើនាវាចរណ៍ដោយសេរីនៅឡើយទេ។

ប្រធានាធិបតីចិន លោក ស៊ី ជីនពីង បានអំពាវនាវឱ្យរក្សាការឆ្លងកាត់របស់កប៉ាល់តាមច្រកសមុទ្រ Hormuz ធ្វើឡើងជាធម្មតា ក្នុងការសន្ទនាតាមទូរស័ព្ទកាលពីថ្ងៃចន្ទជាមួយព្រះអង្គម្ចាស់ប្រទេសអារ៉ាប៊ីសាអូឌីត Mohammed bin Salma ខណៈទីក្រុងប៉េកាំងកំពុងបង្កើនកិច្ចខិតខំប្រឹងប្រែង ជួយបញ្ចប់សង្គ្រាមនៅអ៊ីរ៉ង់។ នេះបើយោងតាមទីភ្នាក់ងារសារព័ត៌មានរ៉យទ័រផ្សាយថ្ងៃទី២០ ខែមេសា ឆ្នាំ២០២៦ ។

ប្រធានាធិបតីចិន លោក ស៊ី ជីនពីង ។ រូបភាព៖ Reuters

ប្រទេសចិនសម្តែងការព្រួយបារម្ភពីអស្ថិរភាពដែលកើតឡើងវិញ ជុំវិញផ្លូវទឹកយុទ្ធសាស្ត្រនេះ ខណៈបទឈប់បាញ់រវាងសហរដ្ឋអាមេរិកនិងអ៊ីរ៉ង់ស្ថិតក្រោមភាពតានតឹងជាថ្មី បន្ទាប់ពីសហរដ្ឋអាមេរិកបានរឹបអូសកប៉ាល់ដឹកទំនិញអ៊ីរ៉ង់មួយគ្រឿង ហើយទីក្រុងតេហេរ៉ង់ផ្តល់សញ្ញាថាខ្លួននឹងមិនចូលរួមក្នុងកិច្ចចរចាសន្តិភាពជុំទី២ ជាមួយអាមេរិកទេ។

គួរបញ្ជាក់ថា ប្រទេសចិនគឺជាអ្នកទិញប្រេងឆៅដ៏សំខាន់របស់អ៊ីរ៉ង់។ ដោយឡែក អ៊ីរ៉ង់បានបិទច្រកសមុទ្រនេះមិនឱ្យកប៉ាល់ផ្សេងទៀតឆ្លងកាត់ចាប់តាំងពីសហរដ្ឋអាមេរិក និងអ៊ីស្រាអែលចាប់ផ្តើមវាយប្រហារទ្រង់ទ្រាយធំកាលពីថ្ងៃទី២៨ ខែកុម្ភៈ ខណៈទីក្រុងវ៉ាស៊ីនតោនបិទផ្លូវកប៉ាល់អ៊ីរ៉ង់ចាប់តាំងពីសប្តាហ៍មុន។

ទីភ្នាក់ងារសារព័ត៌មានរដ្ឋ Xinhua ដកស្រង់សម្តីរបស់ លោក ស៊ី ថា ប្រទេសចិនគាំទ្របទឈប់បាញ់ជាបន្ទាន់និងទូលំទូលាយ ហើយទទូចឱ្យមានការដោះស្រាយជម្លោះនៅមជ្ឈិមបូព៌ាតាមរយៈបណ្តាញនយោបាយ និងភាសាការទូត។

លោក ស៊ី ប្រាប់ព្រះអង្គម្ចាស់អារ៉ាប៊ីសាអូឌីតថា៖ « ច្រកសមុទ្រ Hormuz គួរតែបើកចំហសម្រាប់ការឆ្លងកាត់របស់កប៉ាល់ធម្មតា ព្រោះវាបម្រើផលប្រយោជន៍រួមរបស់ប្រទេសក្នុងតំបន់ និងសហគមន៍អន្តរជាតិ»។

ការហៅទូរស័ព្ទរបស់ លោក ស៊ី ជាមួយព្រះអង្គម្ចាស់រាជទាយាទអារ៉ាប៊ីសាអូឌីតកើតឡើង បន្ទាប់ពីកិច្ចប្រជុំមួយនៅទីក្រុងប៉េកាំងកាលពីសប្តាហ៍មុនជាមួយព្រះអង្គម្ចាស់រាជទាយាទអាប៊ូដាប៊ី ខណៈ លោក ស៊ី ជំរុញឱ្យភាគីទាំងអស់ប្រកាន់ខ្ជាប់នូវច្បាប់អន្តរជាតិ។

លោក ស៊ី ក៏បានប្រាប់ព្រះអង្គម្ចាស់អារ៉ាប៊ីសាអូឌីតថា៖ « ប្រទេសចិនគាំទ្រប្រទេសនានានៅមជ្ឈិមបូព៌ាចេះក្តោបក្តាប់អនាគត និងវាសនាក្នុងដៃខ្លួនឯង ជាពិសេសលើកកម្ពស់ស្ថិរភាព សន្តិភាពក្នុងតំបន់រយៈពេលវែង»៕

ប្រែសម្រួល៖ ណឺ មិនា

The post លោក ស៊ី កំពុងជួយបញ្ចប់សង្គ្រាមនៅអ៊ីរ៉ង់ និងឱ្យគ្រប់ភាគីឈប់វាយប្រហារកប៉ាល់ឆ្លងកាត់ច្រក Hormuz appeared first on Kampuchea Thmey Daily.

ច្រកសមុទ្រហ័រមូហ្ស Archives - Kampuchea Thmey Daily

អង់គ្លេស​ ប្រកាស​​បញ្ជូន​យន្ត​ហោះ​ចម្បាំង នាវា​ចម្បាំង​ ឧបករណ៍​រក​មីន​ទៅ​ច្រក​ Hormuz

លោក ត្រាំ​ គំរាម​បំផ្លាញ​អ៊ីរ៉ង់​ជា​ថ្មី បើ​ទី​ក្រុង​តេហេរ៉ង់​​ ហ៊ាន​​វាយ​ប្រហារ​នាវា​អាមេរិក​

អាមេរិក​ ព្រមានដាក់​ទណ្ឌកម្ម​ លើ​​ក្រុមហ៊ុន​ដែល​បង់ថ្លៃ​ឲ្យ​អ៊ីរ៉ង់​​ជាថ្នូរឆ្លងកាត់​ច្រក Hormuz

ប្រមុខ​ UN​ ជំរុញ​ឱ្យ​អាមេរិក-អ៊ីរ៉ង់​ បើក​ច្រក​ Hormuz ​វិញ ដើម្បី​ឲ្យសេដ្ឋកិច្ច​​មានដង្ហើម​

កប៉ាល់​ដឹក​ប្រេងអ៊ីរ៉ង់​ ​៦គ្រឿង ត្រូវ​​យោធា​អាមេរិក​បិទ​ផ្លូវ​​មិនឲ្យ​ឆ្លង​ និង​បង្ខំ​ត្រឡប់ក្រោយ​

លោក Hegseth រិះ​គន់​សម្ព័ន្ធ​មិត្ត​ ដែល​ពឹង​ផ្អែក​លើ​អាមេរិក ​រឿង​បើក​ច្រក​ Hormuz

ម៉ាក្រុង ដាក់​កំហុស​​ទាំងអាមេរិកនិង​អ៊ីរ៉ង់ លើ​ការ​បិទ-បើក​​​​ច្រក​ Hormuz

អង់គ្លេស ប្រកាសបញ្ជូនយន្តហោះចម្បាំង នាវាចម្បាំង ឧបករណ៍រកមីនទៅច្រក Hormuz

លោក ត្រាំ គំរាមបំផ្លាញអ៊ីរ៉ង់ជាថ្មី បើទីក្រុងតេហេរ៉ង់ ហ៊ានវាយប្រហារនាវាអាមេរិក

អាមេរិក ព្រមានដាក់ទណ្ឌកម្ម លើក្រុមហ៊ុនដែលបង់ថ្លៃឲ្យអ៊ីរ៉ង់ជាថ្នូរឆ្លងកាត់ច្រក Hormuz

ប្រមុខ UN ជំរុញឱ្យអាមេរិក-អ៊ីរ៉ង់ បើកច្រក Hormuz វិញ ដើម្បីឲ្យសេដ្ឋកិច្ចមានដង្ហើម

កប៉ាល់ដឹកប្រេងអ៊ីរ៉ង់ ៦គ្រឿង ត្រូវយោធាអាមេរិកបិទផ្លូវមិនឲ្យឆ្លង និងបង្ខំត្រឡប់ក្រោយ

លោក Hegseth រិះគន់សម្ព័ន្ធមិត្ត ដែលពឹងផ្អែកលើអាមេរិក រឿងបើកច្រក Hormuz

ម៉ាក្រុង ដាក់កំហុសទាំងអាមេរិកនិងអ៊ីរ៉ង់ លើការបិទ-បើកច្រក Hormuz