ឆ្លងឆ្នាំ Archives - Kampuchea Thmey Daily

តារាល្បីៗជាច្រើន ត្រៀមឡើងឆាកនៅលើអាកាស ក្នុងកម្មវិធីប្រគំតន្ត្រីរបស់ក្រុមហ៊ុន Smart

Sorn Phanith — Thu, 30 Dec 2021 09:50:40 +0000

នៅសល់មិនយូរថ្ងៃទៀតទេ ដែលយើងនឹងត្រូវនិយាយពាក្យលាទៅកាន់ឆ្នាំ 2021 ហើយចូលទៅឆ្នាំ 2022។ ប្រិយមិត្តទាំងអស់គ្នា មានគម្រោងប្រារព្ធយប់ដ៏អស្ចារ្យនេះនៅទីណាខ្លះ ? ប្រសិនបើទំនេរ កុំភ្លេចចូលទៅទស្សនា កម្មវិធីប្រគំតន្ត្រីលក្ខណៈ ឌីជីថល របស់ Smart ដែលមានឈ្មោះថា Smart 2022 Virtual Sky-High New Year’s Countdown ដែលនឹងប្រារព្ធឡើងនៅយប់ថ្ងៃទី 31 ធ្នូ ចាក់ផ្សាយផ្ទាល់នៅក្នុង ហ្វេសប៊ុករបស់ Smart Axiata និង Pleng by Smart ចាប់ពីម៉ោង 7:30 យប់តទៅ។

តាមរយៈក្រុមការងារបានឲ្យដឹងថា ការប្រគំតន្ត្រីលើកនេះ មិនមែនធ្វើនៅក្នុងឆាកធម្មតាៗនោះទេ តែជាឆាកដែលនៅលើអាកាសខ្ពស់ត្រដែត ស្ថិតនៅលើសណ្ឋាគារលំដាប់ផ្កាយ សុខា។ ការរៀបចំបែបនេះ នឹងធ្វើឲ្យការសំដែងរបស់សិល្បករ សិល្បការិនីលំដាប់កំពូលៗប្រចាំប្រទេសកាន់តែលេចធ្លោ ប្លែកភ្នែក និងទាក់ទាញ ដែលមិនធ្លាបមានពីមុនមក។ សាកស្រមៃទៅមើលថា យើងបានទស្សនា អាយដលក្នុងដួងចិត្ត ច្រៀង និង រាំបទចម្រៀងដែលយើងពេញចិត្ត ដោយព័ទ្ធជុំវិញទៅដោយទេសភាពដ៏ស្រស់ត្រកាល នាពេលរាត្រី ក្នុងទីក្រុងភ្នំពេញ។

ពិសេសជាងនេះទៅទៀត កម្មវិធីមិនមែនមានត្រឹមតែការសម្តែងពីកំពូលតារាចម្រៀងល្បីៗនោះទេ តែក៏មានការចាប់រង្វាន់ជូនអតិថិជន ដែលមានសំណាងពីការចុះឈ្មោះបញ្ចូលលេខទូរស័ព្ទ ពី SmartNas app ថែមទៀតផង។ បើអតិថិជនមិនទាន់បានចុះឈ្មោះទេ អាចចូលទៅកាន់ SmartNas app បាន ឬ ចុចលើតំណភ្ជាប់នេះ Smartnas.smart.com.kh។

ឈ្នះម្តងហើយ អតិថិជនអាចមានសំណាងឈ្នះសារជាថ្មីម្តងទៀត ព្រោះអំឡុងពេលកំពុងទស្សនា ក្រុមការងារនឹងមានទម្លាក់ជាលេខកាតកោស ជារង្វាន់ដល់អ្នកទស្សនា។

មុនថ្ងៃប្រគំតន្ត្រីមកដល់ ប្រិយមិត្តអាចទៅស្តាប់បទល្បីៗពីអាយដូលទាំង 21 នាក់នៅក្នុង Pleng ឲ្យហើយ ស្រួលដល់ថ្ងៃកម្មវិធី អាចច្រៀងតាមកុំឲ្យភ្លាត់។ តោះចូលទៅ Pleng តាមតំណភ្ជាប់នេះ pleng.smart.com.kh។ TVC Link: www.youtube.comSmartAxiata៕

The post តារាល្បីៗជាច្រើន ត្រៀមឡើងឆាកនៅលើអាកាស ក្នុងកម្មវិធីប្រគំតន្ត្រីរបស់ក្រុមហ៊ុន Smart appeared first on Kampuchea Thmey Daily.

ក្រុងខេមរភូមិន្ទ កំពុងតុបតែងលម្អតាមដងវិថីសំខាន់ៗ ត្រៀមទទួលអ្នកទេសចរថ្ងៃបុណ្យឆ្លងឆ្នាំ

sopheak khoun — Mon, 27 Dec 2021 08:32:54 +0000

អាជ្ញាធរក្រុងខេរមភូមិន្ទ កំពុងចាប់ដៃជាមួយក្រុមហ៊ុនឯកជន យ៉ាងជិតស្និត លើកិច្ចការតុបតែងសោភ័ណ្ឌភាព តាមដងវិថីសំខាន់ៗ ឲ្យកាន់តែទាក់ទាញ សម្រាប់ទទូលភ្ញៀវទេសចរ ទៅលេងកម្សាន្តនាថ្ងៃបុណ្យឆ្លងឆ្នាំខាងមុខ។

លោក ឈេង សុវណ្ណដា អភិបាលក្រុងខេមភូមិន្ទ បានឲ្យដឹងរសៀលថ្ងៃទី ២៧ ខែធ្នូនេះថា ៣ថ្ងៃមកនេះ រូបលោក និងបុគ្គលិកផ្នែកអគ្គិសនីក្រុមហ៊ុន LYP Group មមារញឹករៀបចំជួសជុលតុបតែង បំពាក់អំពូលលម្អបន្ថែម តាមបង្គោលភ្លើង ឬស្ពាន ត្រៀមអបអរសាទរបុណ្យចូលឆ្នាំថ្មី ថ្មីសកលឆ្នាំ ២០២២។

លោកអភិបាលក្រុងខេមរភូមិន្ទ បានបន្ថែមថា គោលដៅដែលត្រូវលើកកម្ពស់សោភ័ណ្ឌភាព ពេលរាត្រី គឺដងវិថីបន្ទាយកងរាជអាវុធហត្ថខេត្ត រហូតដល់មុខផ្សារដងទង់ ព្រមទាំងផ្លូវស្ពានសំខាន់ៗ មួយចំនួន។ ដោយឡែកវិថី ចាប់ពីមុខអគាររដ្ឋបាលខេត្ត ទៅកែងផ្លូវបត់ ទៅរមណីយដ្ឋានធម្មជាតិ ព្រៃកោងកាងពាមក្រសោប បានរៀបចំកន្លងទៅហើយដែរ។

ចំពោះការត្រៀមខ្លួន ទទួលភ្ញៀវទេសចរទៅលេងកម្សាន្ត នាថ្ងៃបុណ្យឆ្លងឆ្នាំសកលនេះដែរ លោកស្រី មិថុនា ភូថង អភិបាលខេត្តកោះកុង នៅព្រឹកថ្ងៃទី ២៧ ខែធ្នូនេះ បានចេញលិខិតជូនដំណឹង ដល់អាជ្ញាធរក្រុង-ស្រុក មន្ទីរអង្គភាពនានា ម្ចាស់សណ្ឋាគារ ភោជនីយដ្ឋាន និងប្រជាពលរដ្ឋ ត្រូវធ្វើអនាម័យបោសសំអាតសំរាមគ្រប់ប្រភេទ កាត់ស្មៅ ក៏ដូចជាតុបតែងភ្លើងពណ៌ ដើម្បីអបអរសាទ ក្នុងឱកាសចូលឆ្នាំថ្មី ឆ្នាំសកល ដែលចូលមកដល់ ៤ថ្ងៃទៀតនេះ។

លោកស្រីអភិបាលខេត្ត បានស្នើឲ្យមានការយកចិត្តទុកដាក់ ប្រុងប្រយ័ត្នក្នុងបង្ការ នូវគ្រោះអគ្គិភ័យដែលអាចកើតឡើងជាយថាហេតុ ដូចជា៖ ភ្លើងទៀត ធូប ភ្លើងចង្រ្កានផ្ទះ ការតបណ្តាញអគ្គិសនី និងគ្រឿងផ្ទុះឆេះផ្សេងៗ ដែលនាំឲ្យកើតជាអគ្គិភ័យឡើង។ ទន្ទឹមនឹងរាជរដ្ឋាភិបាល អនុញ្ញាតឲ្យបើកប្រទេស ឬប្រកាសបិទព្រឹត្តិការណ៍ ២០ កុម្ភៈក៏ដោយ ក៏ទាមទារឲ្យអ្នកទេសចរ ប្រជាពលរដ្ឋ អ្នកពាក់ព័ន្ធ បន្តចូលរួមអនុវត្តការណែនាំ របស់ក្រសួងសុខាភិបាល ក្នុងការទប់ស្កាត់ និងបង្ការជំងឺកូវីដ-១៩ឲ្យបានខ្ជាប់ខ្ជួន៕

អត្ថបទ៖ សិរី វឌ្ឍនៈ

The post ក្រុងខេមរភូមិន្ទ កំពុងតុបតែងលម្អតាមដងវិថីសំខាន់ៗ ត្រៀមទទួលអ្នកទេសចរថ្ងៃបុណ្យឆ្លងឆ្នាំ appeared first on Kampuchea Thmey Daily.

ថៃ ព្រមានផ្ទុះ អូមីក្រុង ខ្លាំងក្លាក្រោយការប្រារព្ធពិធីឆ្លងឆ្នាំ

Sok Sovann — Wed, 15 Dec 2021 02:36:11 +0000

នាយកដ្ឋានសេវាកម្មវេជ្ជសាស្ត្រនិយាយថា ប្រទេសថៃអាចជួបប្រទះនូវការកើនឡើង នៃករណីឆ្លងវីរុសកូវីដ១៩បំប្លែងខ្លួន អូមីក្រុង បន្ទាប់ពីការប្រារព្ធពិធីឆ្លងឆ្នាំ។

ប្រធាននាយកដ្ឋាន លោក Somsak Akksilp បាននិយាយថា សាធារណជនត្រូវតែបន្តអនុវត្តតាមវិធានការបង្ការជំងឺ ដើម្បីទប់ស្កាត់ការឆ្លងរាលដាលខ្លាំងក្លា។ លោកបន្ថែមថា រោគសញ្ញាស្រាលអាចព្យាបាលបាន ខណៈអ្នកជំងឺត្រូវធ្វើចត្តាឡីស័កនៅផ្ទះ។

ថ្វីបើវីរុសបំប្លែងខ្លួននេះ អាចឆ្លងទៅមនុស្សដែលចាក់ថ្នាំវ៉ាក់សាំងរួចហើយក៏ដោយ ប៉ុន្តែវ៉ាក់សាំងនឹងនៅតែអាចការពារប្រឆាំងនឹងជំងឺធ្ងន់ធ្ងរ។ លើសពីនេះ ការព្យាបាលថ្មីដូចជាថ្នាំគ្រាប់ Molnupiravir របស់ក្រុមហ៊ុន Merck និង Paxlovid របស់ Pfizer ក៏បានបង្ហាញថាមានប្រសិទ្ធភាពផងដែរ។

លោក Somsak បញ្ជាក់ថា បច្ចុប្បន្ន គ្មានអ្នកជំងឺ អូមីក្រុង ណាម្នាក់ តម្រូវឲ្យទទួលការព្យាបាលនៅក្នុងបន្ទប់ ICU ទេ ហើយរហូតមកដល់ពេលនេះ មានអ្នកស្លាប់តែម្នាក់គត់នៅចក្រភពអង់គ្លេស។

ស្របពេលដែល ករណីនៃវីរុសបំប្លែងខ្លួន Delta មានការធ្លាក់ចុះនៅក្នុងប្រទេសថៃ មន្ត្រីសុខាភិបាលអាចប្រើការធ្វើតេស្ត PCR ដើម្បីបញ្ជាក់ថា តើអ្នកជំងឺឆ្លងមេរោគប្រភេទណា។ ប្រទេសថៃ ត្រូវតែពន្លឿនការចាក់វ៉ាក់សាំងដូសជំរុញ ដើម្បីផ្តល់ការការពារអតិបរមាដល់ប្រជាជន។

យោងតាមរបាយការណ៍របស់ បាងកក ប៉ុស្តិ៍ បានបញ្ជាក់ថា ឥឡូវនេះ ប្រទេសថៃរកឃើញ អូមីក្រុង ចំនួន១១ករណី ដែលសុទ្ធតែជាករណីនាំចូល៕

ប្រែសម្រួល៖ Vann Vann

ប្រភព៖ Thaiger

ចុចអាន៖ ថៃ រកឃើញអ្នកឆ្លង Omicron ថែមទៀតហើយ

The post ថៃ ព្រមានផ្ទុះ អូមីក្រុង ខ្លាំងក្លាក្រោយការប្រារព្ធពិធីឆ្លងឆ្នាំ appeared first on Kampuchea Thmey Daily.

ប្រជាពលរដ្ឋ សម្រុកចេញដំណើរទៅស្រុកកំណើតដើម្បីជួបជុំគ្រួសារឆ្លងឆ្នាំសកល

Kang Tola — Thu, 31 Dec 2020 12:19:35 +0000

ភ្នំពេញ ៖ ប្រជាពលរដ្ឋបានចេញដំណើចេញទៅស្រុកកំណើតយ៉ាងណែនណាន់តាន់តាប់ខុសផ្លែកពីធម្មតាក្នុងសម័យកាលជំងឺកូវិដ១៩នេះ។ យោងតាមប្រភពពីលោកវរសេនីយ៍ទោ ឯក សារ៉ន អធិការរងនគរបាលខណ្ឌច្បារអំពៅ ទទួលបន្ទុកសណ្តាប់ធ្នាប់ចរាចរណ៍បានឲ្យដឹងថា នារសៀលថ្ងៃទី៣១ខែធ្នូនេះនៅតាមដងផ្លូវជាតិលេខ១ចាប់តាំងពីគល់ស្ពានព្រះមុនីវង្សចាស់ថ្មីរហូតដល់សង្កាត់ព្រែកឯងគឺចរាចរណ៍ណែនណាន់តាន់តាប់ខុសផ្លែកពីថ្ងៃធម្មតា។

លោកសារ៉ន បន្តថា តាមប្រភពពីអ្នកធ្វើដំណើរដែលបានឆ្លងកាត់ច្បារអំពៅបានប្រាប់ថា ពួកគាត់ចេញដំណើរទៅស្រុកកំណើតដើម្បីទៅជួបជុំក្រុមគ្រួសារក្នុងថ្ងៃឆ្លងឆ្នាំសកលនាយប់ថ្ងៃទី៣១ខែធ្នូឈានចូលថ្ងៃទី១ខែមករាឆ្នាំ២០២១។

ដោយឡែកនៅប៉ែកក្បាលថ្នល់វិញគឺចរាចរណ៍កកស្ទះ បើទោះជាកម្លាំងកងរាជអាវុធហត្ថរាជធានីភ្នំពេញ សហការណ៍ជាមួយកម្លាំងនគរបាលចរាចរណ៍ចុះសម្រួលចរាចរណ៍យ៉ាងណាក៏នៅតែកកស្ទះ។

ទាក់ទិនការកកស្ទះចរាចរណ៍ខាងលើនេះ លោកឡុង ង៉ែត អភិបាលរងខណ្ឌមានជ័យបានបញ្ជាក់ថា នៅថ្ងៃទី៣១ខែធ្នូនេះគឺនៅតាមដងផ្លូវក្នុងមូលដ្ឋានខណ្ឌមានជ័យរាជធានីភ្នំពេញពិតជាមានប្រជាពលរដ្ឋធ្វើដំណើរចេញទៅស្រុកកំណើតយ៉ាងច្រើនកុះករប្រាកដមែនខុសប្លែករាល់ថ្ងៃចរាចរណ៍មិនសូវមមាញឹក។

ទោះជាយ៉ាងណាក៏សមត្ថកិច្ចនិងអាជ្ញាធរបានជួយសម្រួលចរាចរណ៍ដើម្បីកុំឲ្យអ្នកដំណើរមានការត្អូញត្អែរ។ ប៉ុន្តែសំណូមពរដ៏ទទូចរបស់លោកឡុង ង៉ែត គឺសុំឲ្យបងប្អូនអ្នកដំណើរកុំបើកបរលឿនហួសការកំណត់ព្រោះងាយនិងគ្រោះថ្នាក់ខណៈដែលនាំគ្នាបើកបរមិនគោរពច្បាប់ចរាចរណ៍នោះ៕
ដោយ ៖ នរា

The post ប្រជាពលរដ្ឋ សម្រុកចេញដំណើរទៅស្រុកកំណើតដើម្បីជួបជុំគ្រួសារឆ្លងឆ្នាំសកល appeared first on Kampuchea Thmey Daily.

កូរ៉េខាងត្បូងហាមឃាត់ការប្រមូលផ្ដុំគ្នាច្រើនជាង ៤ នាក់ នៅថ្ងៃបុណ្យណូអែល និងឆ្លងឆ្នាំ

Sok Chivon — Mon, 21 Dec 2020 09:58:39 +0000

ទីក្រុងសេអ៊ូលនៃប្រទេសកូរ៉េខាងត្បូង និងតំបន់ជុំវិញបានហាមឃាត់ការប្រមូលផ្តុំមនុស្សច្រើនជាង ៤ នាក់នៅថ្ងៃឈប់សម្រាកបុណ្យណូអែល និងឆ្លងឆ្នាំថ្មី ខណៈប្រទេសនេះបានកត់ត្រាចំនួនអ្នកស្លាប់ប្រចាំថ្ងៃខ្ពស់បំផុតពីជំងឺកូវីដ ១៩ នៅថ្ងៃចន្ទ ទី២១ ខែធ្នូនេះ ។

រដ្ឋាភិបាលទីក្រុងសេអ៊ូល ខេត្ត Gyeonggi និងទីក្រុង Incheon បានចេញបទបញ្ជាដែលមិនធ្លាប់មានពីមុនមកលើការប្រមូលផ្តុំនេះចាប់ពីថ្ងៃទី ២៣ ខែធ្នូដល់ថ្ងៃទី ៣ ខែមករា ។

អភិបាលក្រុងសេអ៊ូលលោក Seo Jung-hyup បានថ្លែងនៅឯសន្និសីទមួយថា “យើងមិនអាចយកឈ្នះលើវិបត្តិបច្ចុប្បន្ននេះបានទេ បើមិនកាត់បន្ថយការឆ្លងជាចង្កោមដែលកំពុងរាលដាលតាមរយៈការជួបជុំឯកជនជាមួយក្រុមគ្រួសារ មិត្តភក្តិនិ ងមិត្តរួមការងារ ។ នេះគឺជាឱកាសចុងក្រោយដើម្បីទប់ស្កាត់ការរីករាលដាល ។

ការហាមប្រាមការប្រមូលផ្តុំនេះគឺអនុវត្តចំពោះមុខងារក្នុងផ្ទះ និងក្រៅទាំងអស់លើកលែងតែពិធីបុណ្យសព និងពិធីមង្គលការ ។ បច្ចុប្បន្នការប្រមូលផ្តុំមនុស្សច្រើនជាង ៩ នាក់ត្រូវបានហាមឃាត់ ។

យោងតាមទិន្នន័យពីរដ្ឋាភិបាលក្នុងតំបន់បាននិយាយថា នៅក្នុងទីក្រុងសេអ៊ូល ភោជនីយដ្ឋាន និងកន្លែងស្រដៀងគ្នានេះមានចំនួន ៤១.៤ ភាគរយនៃការឆ្លងជាចង្កោមក្នុងរយៈពេល ៤ សប្តាហ៍ បន្ទាប់មក ១៦.៩ ភាគរយក្នុងការិយាល័យធ្វើការ ១៥.៥ ភាគរយពីកន្លែងគោរពបូជា និង ១២.៣ ភាគរយពីកន្លែងព្យាបាល និងមណ្ឌលថែទាំ ។

ទីក្រុងបាននិយាយនៅក្នុងសេចក្តីថ្លែងការណ៍មួយថា ប៉ូលិសបានធ្វើការឆ្មក់ចូលទីតាំងរាប់សិបកន្លែងរួមមានបារ៍ និងក្លឹបខារ៉ាអូខេដែលត្រូវបានគេសង្ស័យពីបទរំលោភលើគោលការណ៍គម្លាតសង្គមកាលពីថ្ងៃសុក្រដោយបានចោទប្រកាន់មនុស្សចំនួន ៣៥ នាក់ ។

ទីភ្នាក់ងារទប់ស្កាត់ និងបង្ការជំងឺកូរ៉េបាននិយាយថា គិតត្រឹមពាក់កណ្តាលអធ្រាត្រថ្ងៃអាទិត្យមានអ្នកស្លាប់ដោយសារជំងឺកូវីដ ១៩ ចំនួន ២៤ នាក់បន្ថែមទៀតដែលធ្វើឲ្យចំនួនអ្នកស្លាប់សរុបកើនដល់ ៦៩៨ នាក់ ខណៈអ្នកឆ្លងថ្មីចំនួន ៩២៦ ករណីបន្ថែមធ្វើឲ្យករណីឆ្លងសរុបចំនួន ៥០,៥៩១ ករណី ៕

ប្រែសម្រួលដោយ ៖ ជីវ័ន្ត

ប្រភព ៖ CNA

ចុចអាន ៖ ថៃដាក់ចេញវិធានការបន្ទាន់ ១០ ចំណុចដើម្បីគ្រប់គ្រងការចម្លងកូវីដ

ចុចអាន ៖ អាមេរិកត្រៀមដាក់សាច់ពស់ថ្លាន់ក្នុងមីនុយមុខម្ហូបតាមភោជនីយដ្ឋាន