លោកស្រី បន្តថា លោក ឃួង ស្រេង អភិបាល នៃគណៈអភិបាលរាជធានីភ្នំពេញ និងជាប្រធានគណៈបញ្ជាការឯកភាពរដ្ឋបាលរាជធានីភ្នំពេញ តែងតែណែនាំ និង សង្កត់ធ្ងន់ជាប់ជាប្រចាំចំពោះ អភិបាលខណ្ឌទាំង ១៤ ត្រូវចុះត្រួតពិនិត្យទីតាំងសង្ស័យប្រព្រឹត្តបទល្មើសឆបោកតាមប្រព័ន្ធបច្ចេកវិទ្យា (ONLINE SCAMS) ផ្សព្វផ្សាយអនុក្រឹត្យលេខ ០៣ ឲ្យកាន់តែសកម្ម និង មិនត្រូវរាថយដាច់ខាត ធ្វើយ៉ាងណាត្រូវតែធានាលុបបំបាត់ឲ្យអស់នូវបទល្មើសក្នុងមូលដ្ឋានរបស់ខ្លួនទាំងស្រុង។ ជាក់ស្តែងគិតត្រឹមថ្ងៃទី ០៣ ខែមិថុនា ឆ្នាំ ២០២៦ ម្សិលមិញនេះ គណៈបញ្ជាការឯកភាពរដ្ឋបាលរាជធានីភ្នំពេញ ក្រោមការដឹកនាំ និង បញ្ជាផ្ទាល់របស់ លោក ឃួង ស្រេង រដ្ឋបាលខណ្ឌទាំង ១៤ បានចុះត្រួតពិនិត្យតាមទីតាំងអគារខុនដូរ អាផាតមិន បុរី ផ្ទះសំណាក់ និង សណ្ឋាគារមួយចំនួន ក្នុងគោលដៅប្រតិបត្តិការបោសសម្អាតទីតាំងសង្ស័យប្រព្រឹត្តបទល្មើសឆបោកតាមប្រព័ន្ធបច្ចេកវិទ្យា (ONLINE SCAMS) និង ផ្សព្វផ្សាយអនុក្រឹត្យលេខ ០៣ អនក្រ.បក ចុះថ្ងៃទី ០៥ ខែមករា ឆ្នាំ ២០២៦ របស់រាជរដ្ឋាភិបាលកម្ពុជា ស្ដីពីការគ្រប់គ្រងសន្ដិសុខសុវត្ថិភាពតាមទីតាំងរស់នៅប្រមូលផ្ដុំក្នុងភូមិសាស្ដ្ររាជធានីភ្នំពេញបានចំនួន ៩៤ ទីតាំង រកឃើញជនបរទេសស្នាក់នៅសរុបចំនួន ៤៨០ នាក់ (ស្រី ១៤៤ នាក់) ក្នុងនោះ ជនបរទេសដែលស្នាក់នៅដោយពុំមានលិខិតឆ្លងដែនមានចំនួន ០៦ នាក់។

លោកស្រីអ្នកនាំពាក្យ បញ្ជាក់ទៀតថា ក្នុងថ្ងៃនេះដែរ នៅខណ្ឌសែនសុខ ក្រុមការងារបានចុះត្រួតពិនិត្យទីតាំងខុនដូរពិភពថ្មីសែនសុខ ស្ថិតនៅក្នុងភូមិសំរោងទាវ សង្កាត់ក្រាំងធ្នង់ មាន ០៨ អគារ រកឃើញជនបរទេសស្នាក់នៅសរុបចំនួន ៣៦ នាក់ (ស្រី ០២ នាក់) ពុំមានលិខិតឆ្លងដែន ០៣ នាក់។ ក្រុមការងារបានរកឃើញបទល្មើសឆបោកតាមប្រព័ន្ធបច្ចេកវិទ្យា ០១ ករណី នៅអគារទី ០៥ ជាន់ទី ១២ បន្ទប់ ១២០១ ដោយបានឃាត់ខ្លួនជនសង្ស័យជាជនជាតិចិន ០៣ នាក់ ព្រមទាំងសម្ភាររួមមាន Laptop ចំនួន ០១ គ្រឿង និង ⁠ទូរស័ព្ទចំនួន ០៣ គ្រឿង។ តាមការធ្វើកោសល្យវិច័យរបស់ការិយាល័យប្រឆាំងបទល្មើសបច្ចេកវិទ្យា នៃស្នងការដ្ឋាននគរបាលរាជធានីភ្នំពេញ រកឃើញមានជាប់ពាក់ព័ន្ធនឹងករណីសង្ស័យប្រព្រឹត្តអំពើឆបោកតាមប្រព័ន្ធបច្ចេកវិទ្យា។

លោកស្រី ដោ សម្ផស្ស បញ្ជាក់បន្ថែមថា ក្រោយចប់ប្រតិបត្តិការ ជនសង្ស័យ និង សម្ភារខាងលើ ត្រូវបានបញ្ជូនទៅស្នងការដ្ឋាននគរបាលរាជធានីភ្នំពេញ ដើម្បីបន្ដនីតិវិធី ហើយចំពោះទីតាំងបន្ទប់ពាក់ព័ន្ធករណីនេះ ក្រុមការងារសម្រេចបិទឃ្លុំបណ្ដោះអាសន្ន។

ជាមួយគ្នានេះដែរ ថ្ងៃនេះ ស្នងការដ្ឋានននគរបាលរាជធានីភ្នំពេញ បានអនុវត្តការផាកពិន័យចំពោះម្ចាស់ ឬ អ្នកគ្រប់គ្រងទីតាំងរស់នៅប្រមូលផ្ដុំតាមអនុក្រឹត្យលេខ ០៣ ចំនួន ០២ ទីតាំង មនុស្សចំនួន ០៩ នាក់ គិតជាថវិកាសរុបចំនួន ៣៦.០០០.០០០ រៀល (សាមសិបប្រាំមួយលានរៀល)៕
អត្ថបទ ៖ ស្រីរ័ត្ន

The post ថ្ងៃទី ០៣ មិថុនា ចុះត្រួតពិនិត្យទីតាំងសង្ស័យប្រព្រឹត្ត (ONLINE SCAMS) ៩៤ ទីតាំង រកឃើញជនបរទេសស្នាក់នៅជិត ៥០០ នាក់ ពុំមានលិខិតឆ្លងដែន ០៦ នាក់ appeared first on Kampuchea Thmey Daily.

ការចុះរដ្ឋបាលនេះបានធ្វើឡើងកាលពីថ្ងៃទី ៣ ខែមិថុនា ឆ្នាំ ២០២៦​ នៅក្នុងសង្កាត់ទន្លេបាសាក់ ខណ្ឌចំការមន រាជធានីភ្នំពេញ ។

លោក កៀង លក្ស័ អភិបាលខណ្ឌចំការមន បានឲ្យដឹងថា លោកដឹកនាំ​គណៈបញ្ជាការឯកភាពរដ្ឋបាលខណ្ឌចំការមន ដោយបានការសម្របសម្រួលផ្លូវច្បាប់ពីលោកស្រី ភី ស៊ីថង ព្រះរាជអាជ្ញារង នៃអយ្យការអមសាលាដំបូងរាជធានីភ្នំពេញ ចុះត្រួតពិនិត្យរដ្ឋបាលលើទីតាំងចំនួន ៣ ដោយមាននៅតាមផ្លូវសុធារស ភូមិ ១ , ផ្លូវសុធារស ភូមិ ៥ , ផ្លូវរដ្ឋសភា ភូមិ ១៤ ក្នុងមូលដ្ឋានសង្កាត់ទន្លេបាសាក់ ខណ្ឌចំការមន។

បន្ទាប់ពីត្រួតពិនិត្យចប់សព្វគ្រប់ ជាលទ្ធផល ទីតាំងទាំង ៣ ខាងលើ មានអ្នកស្នាក់នៅសរុបចំនួន ៨៨ នាក់ (ស្រី ៤៣ នាក់) ដោយក្នុងនោះ ស្របច្បាប់ ៨៦ នាក់ និង ខុសច្បាប់ ២ នាក់ ប៉ុន្តែពុំមានរកឃើញសម្ភារៈពាក់ព័ន្ធសង្ស័យបម្រើការឲ្យបទល្មើសឆបោកតាមប្រព័ន្ធបច្ចេកវិទ្យា (ONLINE SCAMS) ឫ សម្ភារបម្រើឲ្យការលេងល្បែងស៊ីសង នោះទេ។ ក្នុងនោះ អាជ្ញាធរ ក៏បានផាកពិន័យជាទឹកប្រាក់លើម្ចាស់ទីតាំងទៅតាមច្បាប់ចែងផងដែរ៕
អត្ថបទ ៖ រដ្ឋា

The post ផាកពិន័យម្ចាស់ទីតាំង ១ កន្លែង ក្រោយត្រួតពិនិត្យជនបរទេស ៨៨ នាក់ រកឃើញស្នាក់នៅខុសច្បាប់ ២ នាក់ នៅសង្កាត់ទន្លេបាសាក់ appeared first on Kampuchea Thmey Daily.

អនុវត្តតាមការណែនាំរបស់លោក ឃួង ស្រេង អភិបាលនៃគណៈអភិបាលរាជធានីភ្នំពេញ នៅថ្ងៃទី៣០ ខែឧសភា ឆ្នាំ២០២៦ ក្នុងមូលដ្ឋានខណ្ឌបឹងកេងកង ខណ្ឌពោធិសែនជ័យ និងខណ្ឌមានជ័យ កម្លាំងគណៈបញ្ជាការឯកភាពរដ្ឋបាលខណ្ឌ បានចុះត្រួតពិនិត្យរដ្ឋបាល និងការរស់នៅប្រមូលផ្តុំ នៅតាមទីតាំងសំខាន់ៗមួយចំនួនក្នុងមូលដ្ឋានខណ្ឌនីមួយៗ ដោយទទួលបានលទ្ធផល ដូចខាងក្រោម៖

១. ខណ្ឌបឹងកេងកង៖ ត្រួតពិនិត្យ បន្ទប់ស្នាក់នៅសរុប ចំនួន៤ទីតាំង ស្មើនឹង ២៥៥បន្ទប់ (រួមមាន៖ ទី១. អាគារស្នាក់នៅរួម និងមន្ទីរពេទ្យធ្មេញស្តង់ដារ ស្ថិតនៅអគារលេខ ១២C ផ្លូវលេខ ៥៧ ភូមិ ៦ សង្កាត់បឹងកេងកងទី១ ទី២. បន្ទប់ជួល នៅអគារលេខ ០២A ផ្លូវលេខ ១៥៩ ភូមិ៥ សង្កាត់អូឡាំពិក ទី៣. ផ្ទះជួល លេខ៩AB ផ្លូវលេខ២៨៨ ភូមិ៦ សង្កាត់បឹងកេងកងទី២ និងទី៤. បន្ទប់ជួលលេខ ៣៤C ផ្លូវលេខ៣៧៦ ភូមិ៤ សង្កាត់បឹងកេងកងទី៣) រកឃើញជនបរទេស សរុប១៥៤នាក់/ស្រី១៧នាក់  ស្មើនឹង១៤សញ្ជាតិ ក្នុងនោះ ជនបរទេសដែលគ្មានលិខិតឆ្លងដែនចំនួន១២នាក់ និងទិដ្ឋាការ ហួសសុពលភាពចំនួន ៣នាក់។

២. ខណ្ឌពោធិ៍សែនជ័យ៖ បានចុះត្រួតពិនិត្យទីតាំងរោងចក្រផលិតសង្កសី ស្ថិតនៅភូមិក្រាំង សង្កាត់ត្រពាំងក្រសាំង មាន៤ អគារ មានបន្ទប់ស្នាក់នៅសម្រាប់កម្មករចំនួន ៣៨បន្ទប់ រកឃើញជនបរទេសសរុបចំនួន ២៧នាក់ (មាន២សញ្ជាតិ) ក្នុងនោះមានជនបរទេសចំនួន ១នាក់ ស្នាក់នៅដោយគ្មាន ឯកសារត្រឹមត្រូវ។

៣. ខណ្ឌ មានជ័យ ៖ បានចុះត្រួតពិនិត្យចំនួន ៣ទីតាំង (រួមមាន៖ ទី១. អគារខុនដូរម៉ារីថាម ៣៤ជាន់ ស្ថិតនៅផ្លូវ ៦០ម៉ែត្រ ភូមិព្រែកតាគង់ សង្កាត់ចាក់អង្រែលើ ទី២. សណ្ឋាគារអាយលី ឈិញសី ផ្លូវ៦០ម៉ែត្រ ភូមិព្រែកតាឡុង១ សង្កាត់ចាក់អង្រែក្រោម និងទី៣ អគារខុនដូរ និងសណ្ឋាគារ VERSAILES SQUARE ផ្លូវ ៦០ម៉ែត្រ ភូមិព្រែកតានូ សង្កាត់ចាក់អង្រែលើ) រកឃើញជនបរទេសសរុបចំនួន ៥០នាក់ មាន៤សញ្ជាតិ ដោយក្នុងនោះ មានជនបរទេសចំនួន ៣នាក់ បានស្នាក់នៅសណ្ឋាគារអាយលី ឈិញសី ស្នាក់នៅពុំមាន ឯកសារត្រឹមត្រូវ។

ក្រោយការត្រួតពិនិត្យ ជនបរទេសដែលគ្មាន ឯកសារស្នាក់នៅត្រឹមត្រូវ ត្រូវបានប្រគល់ជូនស្នងការដ្ឋាននគរបាល រាជធានីភ្នំពេញ ដើម្បីបន្តនីតិវិធីតាមផ្លូវច្បាប់៕

អត្ថបទ៖ ស្រីរ័ត្ន

The post ខណ្ឌចំនួន៣ ចុះពិនិត្យ៣ទីតាំង រកឃើញ​ជនបរទេសជាង​២០០នាក់ និងគ្មានលិខិតឆ្លង​ដែនជាង១០នាក់ appeared first on Kampuchea Thmey Daily.

ក្នុងកិច្ចប្រជុំ សាមញ្ញលើកទី២២ របស់ក្រុមប្រឹក្សាខណ្ឌ អាណត្តិទី៤ នាព្រឹកថ្ងៃទី២៧ ខែមីនា ឆ្នាំ២០២៦ លោកជា ខេមា អភិបាលខណ្ឌដូនពេញ បានឲ្យដឹងថា ៖ ដោយអនុវត្តតាមអនុក្រឹត្យលេខ០៣របស់សម្តេចប្រមុខរាជរដ្ឋាភិបាលកម្ពុជា កម្លាំងគណៈបញ្ជាការឯកភាពរដ្ឋបាលខណ្ឌ និងគណៈបញ្ជាការឯកភាពរដ្ឋបាលសង្កាត់ទាំង១១ក្នុងមូលដ្ឋាន នៅតែបន្តបង្កើនការចុះត្រួតពិនិត្យការស្នាក់នៅប្រមូលផ្តុំរបស់ជនបរទេស ដើម្បីបន្តអង្កេតតាមដានការចូលមកជ្រកកោននៅកម្ពុជាដោយខុសច្បាប់ដើម្បីប្រព្រឹត្តិបទល្មើសនានា ពិសេសនោះ គឺ ការឆបោកតាមប្រព័ន្ធបច្ចេកវិទ្យា ( Online Scams ) តែម្តង។

លោកអភិបាលសង្កត់ធ្ងន់ថា ក្នុងមូលដ្ឋានខណ្ឌដូនពេញ មានអាគារ ខុនដូរ អាផាតមិន សណ្ឋាគារ ចំនួន៣១៥ទីតាំង កម្លាំងគណៈបញ្ជាការនៃរដ្ឋបាលខណ្ឌបានបែកចែកកម្លាំងជា៣ក្រុម បន្តចុះត្រួតពិនិត្យ ជាប់ជាប្រចាំ ក្នុងយុទ្ធនាការចុះត្រួតពិនិត្យនោះ មិនមានបទល្មើសអនឡាញស្កែម (oine scams)នោះឡើយ។

លោកអភិបាលខណ្ឌបានបញ្ជាក់ថា ក្នុងមូលដ្ឋានខណ្ឌដូនពេញជាបេះដូងរបស់រាជធានីភ្នំពេញ ដូច្នេះមិនត្រូវមានបទល្មើសគ្រប់ប្រភេទ បញ្ហាក្មេងទំនើង មានការប្រមូលផ្ដុំគ្នាពេលយប់ព្រលប់ បញ្ហាសន្តិសុខ សណ្ដាប់ធ្នាប់នេះជាកត្តាសំខាន់ និងត្រូវធនាបានសន្តិសុខសុវត្ថិភាព សណ្ដាប់ធ្នាប់សាធារណៈល្អប្រសើរ ជូនដល់ ប្រជាពលរដ្ឋ ម្ចាស់អាជីវកម្ម ភ្ញៀវទេសចរណ៍ជាតិ អន្តរជាតិ។

ប្រជាពលរដ្ឋ សម្ដែងការគាំទ្របំផុតចំពោះយុទ្ធនាការបោសសម្អាតឧក្រិដ្ឋកម្មឆបោកតាមប្រព័ន្ធបច្ចេកវិទ្យា  ( Online Scams ) ចេញពីប្រទេសកម្ពុជា ព្រោះកម្ពុជាជាប្រទេសដែលកំពុងមានការអភិវឌ្ឍន៍ក្រោមម្លប់ នៃសន្តិភាព ដូច្នោះហើយប្រជាជន ពុំត្រូវការបទល្មើសឧក្រិដ្ឋទាំងឡាយអាចមានដង្ហើមនៅរស់រាននោះឡើយ។ ប្រទេសកម្ពុជារីកចំរើនទៅបាន ពុំអាស្រ័យទៅលើ បទល្មើសទាំងនោះឡើយ គឺពឹងផ្អែកទៅការវិនិយោគក្រុមហ៊ុន សហគ្រាស វិស័យទេសចរណ៍ វប្បធម៌ ដូនតារបស់ខ្មែរ ជាពិសេស ធនធានមនុស្ស មានចំណេះដឹង.។ល។

គួរបញ្ជាក់ថា ៖ កាលពីថ្ងៃទី២៦ ខែមីនា ឆ្នាំ២០២៦ថ្មីៗនេះ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា បានបន្តដាក់តឿនដល់កងកម្លាំងសមត្ថកិច្ច និងអាជ្ញាធរពាក់ព័ន្ធត្រូវបន្តយកចិត្តទុក ដាក់បន្ថែមលើបញ្ហាសន្តិសុខ សណ្តាប់ធ្នាប់ ពិសេសបង្ក្រាបឲ្យអស់លើឧក្រិដ្ឋកម្មឆបោកប្រព័ន្ធតាមប្រព័ន្ធបច្ចេកវិទ្យា ( Scams Online ) ខណៈក្រសួងមហាផ្ទៃ ក៏បានកំណត់បន្ទាត់ក្រហម នៃការបោសសម្អាតឧក្រិដ្ឋកម្មឆបោកនេះ ត្រឹមដំណាច់ខែមីនា ពោលគឺនៅមុនខែមេសា ឆ្នាំ២០២៦មកដល់៕ អត្ថបទ ៖ សុភា

The post អាជ្ញាធរមូលដ្ឋានខណ្ឌ ក្នុងរាជធានីភ្នំពេញបន្តអំពាវនាវដល់ម្ចាស់ទីតាំងជួលស្នាក់នៅឲ្យជនបរទេស បន្តចូលរួមសហការរាយការណ៍ព័ត៌មានជូនអាជ្ញាធរ appeared first on Kampuchea Thmey Daily.

លោកអភិបាលខណ្ឌមានជ័យ តែងតែយកចិត្តទុកដាក់ខ្ពស់លើការពង្រឹងសន្តិសុខ សណ្តាប់ធ្នាប់ និងការអនុវត្តច្បាប់ឱ្យបានម៉ឺងម៉ាត់ ស្របតាមគោលនយោបាយរបស់រាជរដ្ឋាភិបាល។ ការចុះអនុវត្តជាបន្តបន្ទាប់នេះ បានបង្ហាញពីភាពសកម្ម ភាពទទួលខុសត្រូវ និងការខិតខំប្រឹងប្រែងក្នុងការរក្សាសុវត្ថិភាពសង្គម និងធានាបរិយាកាសរស់នៅប្រកបដោយសុខសន្តិភាពជូនប្រជាពលរដ្ឋក្នុងមូលដ្ឋាន។ ក្នុងការអនុវត្តច្បាប់ដោយស្មើភាព និងថែរក្សាប្រយោជន៍សាធារណៈ ឱ្យសមស្របតាមស្ថានភាពជាក់ស្តែងនៅក្នុងមូលដ្ឋានខណ្ឌមានជ័យ។

គួរបញ្ជាក់ថា យុទ្ធនាការបោសសម្អាតការឆបោកតាមប្រព័ន្ធបច្ចេកវិទ្យាជាមួយការចាត់វិធានការច្បាប់ជាក់លាក់ ស៊ីជម្រៅនៅទូទាំងប្រទេស ក្នុងរយៈពេលជាង៨ខែកន្លងមកនេះ បានបំបែកសំបុកឧក្រិដ្ឋជននៃការឆបោកអនឡាញក្នុងរាជធានី-ខេត្ត ខណៈបានជួយសង្រ្គោះជនរងគ្រោះជាច្រើននាក់ដែលបានចាញ់បោកមេខ្លោង ធ្លាក់ចូលក្នុងអន្ទាក់ឧក្រិដ្ឋកម្មឆបោកនេះ។

ក្នុងចំណោមជនពាក់ព័ន្ធនឹងការប្រព្រឹត្តអំពើឆបោកមាន ២៦ សញ្ជាតិផ្សេងគ្នា។ ហើយទីតាំងពាក់ព័ន្ធនឹងឧក្រិដ្ឋកម្មឆបោកនៅក្នុងរាជធានី-ខេត្ត  រួមទាំងកាស៊ីណូផងនោះ ត្រូវបានបិទខ្ទប់មិនឱ្យមានសកម្មភាពទៀតឡើយ ដោយសមត្ថកិច្ចកំពុងបន្តគ្រប់គ្រងដើម្បីស្រាវជ្រាវ និងអនុវត្តនីតិវិធីច្បាប់៕

The post អាជ្ញាធរខណ្ឌមានជ័យ បន្តចុះផ្សព្វផ្សាយអនុក្រឹត្យ លេខ ០៣ អនក្រ.បក តាមទីតាំងអាគារខុនដូរ មានជនបរទេសស្នាក់នៅ appeared first on Kampuchea Thmey Daily.

ឧបនាយករដ្ឋមន្ត្រី ស សុខា បានសង្កត់ធ្ងន់ថា ជនបរទេសដែលស្នាក់នៅតាមទីតាំងនានា ដោយពុំបានរាយការណ៍ទៅកាន់សមត្ថកិច្ចពីសំណាក់ម្ចាស់ទីតាំង គឺស្ថិតក្នុងចំណោមជនបរទេសដែលអាចសំងំប្រព្រឹត្តបទល្មើស ជាពិសេសនោះគឺអំពើជួញដូរមនុស្ស និងការឆបោកតាមបច្ចេកវិទ្យា (Online Scams) ដែលលោកថា ជាកលល្បិចដ៏ពិសពុលរបស់ជនល្មើស ក្នុងការអូសទាញមនុស្សឱ្យធ្លាក់ក្នុងភាពរងគ្រោះយ៉ាងធ្ងន់ធ្ងរ។

ការរលឹកនេះ បានធ្វើឡើងក្នុងពេលលោកឧបនាយករដ្ឋមន្ត្រីបានអញ្ជើញជាអធិបតីក្នុងទិវាជាតិប្រយុទ្ធប្រឆាំងអំពើជួញដូរមនុស្សលើកទី១៩ ក្រោមប្រធានបទ យើងរួមគ្នាដើម្បីកម្ពុជាគ្មានអំពើជួញដូរមនុស្ស និងអំពើឆបោកតាមអនឡាញ ដែលប្រារព្ធនៅមជ្ឈមណ្ឌលសន្និបាត និងពិព័រណ៍កោះពេជ្រ កាលពីរសៀលថ្ងៃទី២៥ ខែកុម្ភៈ ឆ្នាំ២០២៦។

យោងអនុក្រឹត្យលេខ០៣ របស់ប្រមុខរាជរដ្ឋាភិបាល កាលពីថ្ងៃទី៥ ខែមករា ឆ្នាំ២០២៦ ម្ចាស់ទីតាំងរស់នៅប្រមូលផ្តុំ ឬអ្នកគ្រប់គ្រងទីតាំងរស់នៅប្រមូលផ្តុំ ដែលធ្វេសប្រហែសខកខានមិនបានបំពេញកាតព្វកិច្ច ដូចមានចែងក្នុងមាត្រា១៦នៃអនុក្រឹត្យនេះ ត្រូវផាកពិន័យជាប្រាក់ចំនួន៤០០ ០០០រៀល ដោយមិនទាន់គិតដល់ព្យសនកម្មដែលកើតឡើងពីការធ្វេសប្រហែសនេះឡើយ។

បើតាមអនុក្រឹត្យដដែល ម្ចាស់ទីតាំងរស់នៅប្រមូលផ្តុំ ឬអ្នកគ្រប់គ្រងទីតាំងរស់នៅប្រមូលផ្តុំ ដែលមានចេតនាលាក់បាំង និងអនុញ្ញាតឱ្យជនបរទេសដែលចូលមកព្រះរាជាណាចក្រកម្ពុជាដោយខុសច្បាប់ ស្នាក់នៅក្នុងទីតាំងស្ថិតនៅក្រោមការ ទទួលខុសត្រូវរបស់ខ្លួន ត្រូវផាកពិន័យជាប្រាក់ចំនួន៤ ០០០ ០០០ រៀល សម្រាប់ជនបរទេសម្នាក់ ដោយមិនទាន់គិតដល់ទោសព្រហ្មទណ្ឌដែលបានកំណត់ក្នុងច្បាប់ជាធរមានឡើយ។

ឧបនាយករដ្ឋមន្រ្តី ស សុខា បានលើកឡើងដូច្នេះថា «ចំពោះម្ចាស់ទីតាំង អ្នកដែលបង្កលក្ខណៈឱ្យជនបរទេសស្នាក់នៅដោយមិនប្រាប់អាជ្ញាធរ ហើយចាប់ពីដើមខែ៣នេះទៅ គឺត្រូវអនុវត្តឱ្យបានពេញលេញលើអនុក្រឹត្យ០៣នេះ។ អ៊ីចឹង អ្នកដែលមិនរាយការណ៍ ឬ ជួលឱ្យជនបរទេសស្នាក់នៅមូលដ្ឋាន បូកទាំងនៅផ្ទះសំណាក់របស់ខ្លួន ដែលខ្លួនធ្វើអាជីវកម្ម មិនរាយការណ៍ដល់អាជ្ញាធរពាក់ព័ន្ធ ឈានដល់ការផាកវិន័យ១លានរៀលក្នុងម្នាក់ បើ១០នាក់ ១០លានរៀល ហើយនិងទោសទណ្ឌដទៃទៀតទៅតាមច្បាប់ជាធរមាន»។

លោកឧបនាយករដ្ឋមន្ត្រី បានថ្លែងអះអាងថា រាជរដ្ឋាភិបាលកម្ពុជានៅតែបន្តការប្តេជ្ញាចិត្តយ៉ាងពេញទំហឹងក្នុងកិច្ចការពារសុវត្ថិភាពប្រជាពលរដ្ឋ សន្តិសុខសង្គម និងសន្តិភាពជាតិឱ្យនៅស្ថិតស្ថេរយូរអង្វែងតទៅ ដោយលុបបំបាត់ឱ្យខាងតែបាននូវរាល់ឧក្រិដ្ឋកម្ម ដែលកើតមានលើទឹកដីកម្ពុជា។

ទន្ទឹមនឹងការប្ដេជ្ញាការពារប្រជាជនកម្ពុជា រាជរដ្ឋាភិបាល ក៏ត្រូវមានការធានាចំពោះសុវត្ថិភាពជនបរទេសទាំងឡាយណា ដែលបាននិងកំពុងស្នាក់នៅលើទឹកដីកម្ពុជា តាមរយៈការទទួលបាននូវកិច្ចការពារតាមច្បាប់ ដោយឥតរើសអើង និងមិនបណ្តែតបណ្តោយឱ្យបទល្មើសរីកធំធាត់ ក្លាយជាឧបសគ្គដល់ដំណើរការអភិវឌ្ឍន៍សង្គមជាតិរបស់កម្ពុជាឡើយ។

គួរជម្រាបឱ្យដឹងថា ក្នុងឆ្នាំ២០២៥កន្លងទៅ សមត្ថកិច្ចកម្ពុជា បានស្រាវជ្រាវ រកឃើញ និងបង្ក្រាបករណីជួញដូរមនុស្ស បានសរុបចំនួន៧៩ករណី លើ២៨ករណី បើប្រៀបធៀបទៅនឹងរយៈពេលដូចគ្នាក្នុងឆ្នាំ២០២៤ គឺកើនឡើងបីដង។ ក្នុងនោះឃាត់ខ្លួនសង្ស័យសរុបបានចំនួន១៣០នាក់ និងបង្ក្រាបបទល្មើសធ្វើអាជីវកម្មផ្លូវភេទបាន១០១ករណី ឃាត់ខ្លួនជនសង្ស័យ១៤៤នាក់។ នេះបើតាមរបាយការណ៍របស់លោកស្រី ជូ ប៊ុនអេង រដ្ឋលេខាធិការក្រសួងមហាផ្ទៃ និងជាអនុប្រធានអចិន្ត្រៃយ៍នៃគណៈកម្មាធិការជាតិប្រយុទ្ធប្រឆាំងអំពើជួញដូរមនុស្ស៕

The post រដ្ឋមន្រ្តីមហាផ្ទៃ រំលឹកម្ចាស់ទីតាំងមានជនបរទេសស្នាក់នៅ ត្រូវអនុវត្តកាតព្វកិច្ចរាយការណ៍ឱ្យសមត្ថកិច្ច  appeared first on Kampuchea Thmey Daily.

យោងតាម Khaosod English ចុះផ្សាយ​ថ្ងៃទី២៣ ខែ​កុម្ភៈ, ក្នុង​វីដេអូ​ឃ្លីប​មានអ្នកចូលមើល​ជិត ៤០០ ០០០ដង, ​Shams ​និយាយ​ថា​៖ «ហេតុ​អ្វី​បាន​ជាអ្នក​ស្រុកថៃ​ភាគ​ច្រើនមិន​គោរព​ចំពោះ​ជនបរទេស និង​អ្នកទេសចរ​?។ នៅ​ពេល​​​និយាយ​ភាសាអង់គ្លេស​ទៅ​កាន់​អ្នកស្រុក មនុស្ស​ជាច្រើនមិនយល់ ហើយ​ហាក់​ដូច​ជា​មិន​អើ​ពើ​នឹងអ្វី​ដែល​ខ្ញុំ​ព្យាយាមធ្វើ​​ទំ​នាក់​ទំនង»។

Shams ​បន្ត​ថា៖ «រឿងមិនចេះភាសា​គឺ​ជារឿងធម្មតា​ទេ​សម្រាប់មនុស្ស ជា​ពិសេស​នៅ​ពេល​អ្នក​ទៅជ្រុង​ម្ខាង​ទៀត​នៃ​ពិភពលោក ប៉ុន្តែ​គ្រាន់​តែ​ទាញ​យក Google Translate មក​ប្រើមក ប្រសិនបើ​អ្នកមិនយល់ពីអ្វីដែល​ខ្ញុំ​កំពុង​និយាយ។ កុំ​មិន​អើពើ​នឹងខ្ញុំ។ គ្រាន់​តែ​និយាយ​ថា មិន​​និយាយភា​សា​អង់​គ្លេសទេ ​ទៅ​បាន​ហើយ​»៕

ប្រែ​សម្រួល៖ ណឺ មិនា

The post ​តារា TikTok បរទេសដ៏ល្បីឈ្មោះ រិះគន់​អ្នក​ស្រុក​ថៃថា ឈ្លើយ  appeared first on Kampuchea Thmey Daily.

ការណែនាំនេះ ធ្វើឡើងដោយយោងទៅលើការណែនាំរបស់លោក ស សុខា ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ កាលពីថ្ងៃទី១៩ ខែមករា ឆ្នាំ២០២៦ ស្ដីពីការគ្រប់គ្រងជនបរទេស ក្នុងន័យបង្ក្រាបបទល្មើសឆបោកតាមប្រព័ន្ធបច្ចេកវិទ្យា (ONLINE SCAMS) ឲ្យទទួលបាននូវប្រសិទ្ធភាព។

តាមរយៈលិខិតជម្រាបជូនលោកឧត្ដមសេនីយ៍ទោស្នងការនគរបាលខេត្ត លោកមេបញ្ជាការនៃបញ្ជាការដ្ឋានកងរាជអាវុធហត្ថខេត្ត និងអភិបាលក្រុង ស្រុក កាលពីថ្ងៃទី២១មករា លោក ជាម ច័ន្ទសោភ័ណ បានស្នើឲ្យលោកស្នងការនគរបាលខេត្ត លោកមេបញ្ជាការកងរាជអាវុធហត្ថខេត្ត និងអភិបាលក្រុង-ស្រុក ត្រូវបន្តពង្រឹងការគ្រប់គ្រងជនបរទេសគ្រប់ប្រភេទឱ្យបានហ្មត់ចត់ដែលបានទទួលស្គាល់តាមផ្លូវច្បាប់ នៃព្រះរាជាណាចក្រកម្ពុជា និងត្រូវក្តាប់ទិន្នន័យឱ្យបានគ្រប់ជ្រុងជ្រោយ ចំពោះជនបរទេសមានប័ណ្ណស្នាក់នៅ។

លោកអភិបាលខេត្តសង្កត់ធ្ងន់ថា ការណែនាំនេះ ក៏ដើម្បីអនុវត្តកិច្ចការងារ រក្សាការពារសន្តិសុខសណ្តាប់ធ្នាប់ របៀបរៀបរយសាធារណៈ និងសុវត្ថិភាពសង្គមសំដៅបង្ការទប់ស្កាត់ និងបង្ក្រាបបទល្មើសនានា ឱ្យបានទាន់ពេលវេលាផងដែរ៕

The post អភិបាលខេត្តកំពង់ស្ពឺឲ្យអាជ្ញាធរក្រុងស្រុកគ្រប់គ្រងជនបរទេសឲ្យបានហ្មត់ចត់ ដើម្បីទប់ស្កាត់ និងបង្ក្រាបបទល្មើស ONLINE SCAMS ឲ្យមានប្រសិទ្ធភាព appeared first on Kampuchea Thmey Daily.