ជនសង្ស័យ Archives - Kampuchea Thmey Daily

ជនសង្ស័យវាយទូរលក់មាសនៅផ្សារលើធំថ្មី ក្រុងសៀមរាប ត្រូវបានកម្លាំងជំនាញ កសាងសំណុំរឿងបញ្ជូនទៅតុលាការ

Ken Malis — Mon, 16 Feb 2026 07:37:56 +0000

ចោរចិត្តសឿងម្នាក់ ដែលបានចូលវាយទូរលក់មាស ប្លន់យកគ្រឿងអលង្ការ នៅក្នុងផ្សារលើធំថ្មី ស្ថិតក្នុងភូមិ ដកពោធិ សង្កាត់ស្លាក្រាម ក្រុង ខេត្តសៀមរាប ត្រូវបានកម្លាំងជំនាញ កសាងសំណុំរឿងបញ្ជូនទៅកាន់ សាលាដំបូង ចាត់ការទៅតាមនីតិវិធីនៃច្បាប់។

ករណីខាងលើនេះ កើតឡើងកាលពីវេលាម៉ោង ១៤៖៥២នាទី ថ្ងៃទី១៥ ខែកុម្ភះ ឆ្នាំ២០២៦ ដោយមានបុរសម្នាក់បានចូលវាយទូរលក់មាស ប្លន់យកគ្រឿងអលង្ការ ដែលមានយីហោ វេត ចាន់តាក់ តូបលេខ ៥៩ នៅក្នុងផ្សារលើធំថ្មី ស្ថិតក្នុងភូមិ ដកពោធិ សង្កាត់ស្លាក្រាម ក្រុង ខេត្តសៀមរាប នៅទាំងកណ្តាលថ្ងៃ ហើយត្រូវបានកម្លាំងសមត្ថកិច្ចកងរាជអាវុធហត្ថខេត្ត សហការជា មួយអាជីវករក្នុងផ្សារ ចាប់ឃាត់ខ្លួនបានទាន់ពេលវេលាភ្លាមៗ។

តាមការបញ្ជាក់របស់សមត្ថកិច្ចរាជអាវុធហត្ថខេត្ត បានឱ្យដឹងថា បន្ទាប់ពីទទួលបានព័ត៌មាន កម្លាំងអាវុធហត្ថក្រុងសៀមរាប និងកម្លាំអការិយាល័យជំនាញ ចេញអន្តរាគមន៍ ឃាត់ខ្លួនជនសង័្សយបាន ១នាក់ និងដកហូតវត្ថុតាង មានម៉ូតូស្គប់ពី ១គ្រឿង,ទូរស័ព្ទដៃ ១គ្រឿង , ញញួរ ១ដើម , កាំបិតតាំងតោ ១ដើម , លោកហធាតុពណ៌លឿង ៣ខ្សែ បានបញ្ជូនទៅទីបញ្ជាការកងរាជអាវុធហត្ថខេត្តសៀមរាប ដើមី្បអនុវត្ថនីតិវិធីបន្ត ព្រមទាំងបានប្រគល់ ខែ្សដៃផ្លាក់ទីន ទាំង ៣ខែ្ស ដល់ជនរងគ្រោះវិញផងដែរ។

បើតាមសមត្ថកិច្ច ជនសង័្សយ ខាងលើមានឈ្មោះ ឡេ សុភ័ក្រ ភេទប្រុស អាយុ ៤០ឆ្នាំ ត្រូវបានកម្លាំងជំនាញធ្វើតេស្ត៍ ទឹកនោម រកឃើញមានសាធារធាតុញៀនក្នុងខ្លួន៕

ដោយ៖ គឿន វេត

The post ជនសង្ស័យវាយទូរលក់មាសនៅផ្សារលើធំថ្មី ក្រុងសៀមរាប ត្រូវបានកម្លាំងជំនាញ កសាងសំណុំរឿងបញ្ជូនទៅតុលាការ appeared first on Kampuchea Thmey Daily.

ឃាត់ខ្លួនជនសង្ស័យ ០៨ នាក់ ករណីចាប់បង្ខាំងមនុស្សខុសច្បាប់ និងជំរិតទារប្រាក់

អ៊ិន ពិសី — Thu, 02 Oct 2025 07:04:21 +0000

កម្លាំងនាយកដ្ឋាននគរបាលព្រហ្មទណ្ឌ បង្ក្រាបឃាត់ខ្លួនជនសង្ស័យចំនួន ០៨ នាក់ ពាក់ព័ន្ធករណី«ចាប់បង្ខាំងមនុស្សខុសច្បាប់ និងជំរិតទារប្រាក់» ព្រមទាំងជួយរំដោះជនរងគ្រោះបានដោយសុវត្ថិភាព។

ប្រតិបត្តិការនេះបានធ្វើឡើងកាលពីថ្ងៃទី ២៣ កញ្ញា រហូតដល់ថ្ងៃទី ២៨ កញ្ញា ជាបន្តបន្ទាប់ រហូតជោគជ័យ ដោយអនុវត្តតាមបទបញ្ជារបស់លោកនាយឧត្ដមសេនីយ៍ ស ថេត អគ្គស្នងការនគរបាលជាតិ និងលោកឧត្ដមសេនីយ៍ឯក ង៉េង ជួ ប្រធាននាយកដ្ឋាននគរបាលព្រហ្មទណ្ឌ បញ្ជាឲ្យដឹកនាំកម្លាំងជំនាញរបស់នាយកដ្ឋាននគរបាលព្រហ្មទណ្ឌ សហការជាមួយស្នងការដ្ឋាននគរបាលរាជធានីភ្នំពេញ , ខេត្តស្វាយរៀង , ខេត្តព្រះសីហនុ និងខេត្តកណ្តាល ធ្វើការស្រាវជ្រាវតាមនីតិវិធី និងជំនាញ រហូតកំណត់បានអត្តសញ្ញាណរបស់ក្រុមជនសង្ស័យទាំង ០៨ នាក់។

មន្ត្រីជំនាញបានបញ្ជាក់ថា ក្នុងរង្វង់ប្រតិបត្តិការ កម្លាំងជំនាញពាក់ព័ន្ធបានធ្វើការស្រាវជ្រាវតាំងពីទទួលបានពាក្យបណ្ដឹងរបស់ជនរងគ្រោះ។ លុះនៅថ្ងៃទី ២៣ ខែកញ្ញា ឆ្នាំ ២០២៥ កម្លាំងជំនាញរបស់នាយកដ្ឋាននគរបាលព្រហ្មទណ្ឌ បានធ្វើការជួយសង្គ្រោះជនរងគ្រោះនៅចំណុចស្ថិតក្នុងផ្លូវ ៥៨ ភូមិដីថ្មី សង្កាត់ភ្នំពេញថ្មី ខណ្ឌសែនសុខ រាជធានីភ្នំពេញ។

ក្រុមជនសង្ស័យទាំង ០៨ នាក់ រួមមាន ៖ ០១-ឈ្មោះ ZHU LI MIN ភេទប្រុស អាយុ ៤៤ ឆ្នាំ ជនជាតិចិន។ ០២-ឈ្មោះ HE YE ភេទប្រុស អាយុ ៣០ ឆ្នាំ ជនជាតិចិន។ ០៣-ឈ្មោះ HE SHUAI ភេទប្រុស អាយុ ៣០ ឆ្នាំ ជនជាតិចិន។ ០៤-ឈ្មោះ WANG HUA XIE ភេទប្រុស អាយុ ៦០ ឆ្នាំ ជនជាតិចិន។ ០៥-ឈ្មោះ យឿន វឌ្ឍនា ភេទប្រុស អាយុ ៣៤ ឆ្នាំ ជនជាតិខ្មែរ។ ០៦-ឈ្មោះ ដោម សីហា ភេទប្រុស អាយុ ៤១ ឆ្នាំ ជនជាតិខ្មែរ។ ០៧-ឈ្មោះ យ៉ា ចំរុង ភេទប្រុស អាយុ ២៩ ឆ្នាំ ជនជាតិខ្មែរ និង ០៨-ឈ្មោះ វ៉ែន ដាវីត ភេទប្រុស អាយុ ៣២ ឆ្នាំ ជនជាតិខ្មែរ។

គួរបញ្ជាក់ថា កាលពីថ្ងៃទី ២០ ខែកញ្ញា ឆ្នាំ ២០២៥ អគ្គស្នងការដ្ឋាននគរបាលជាតិ បានទទួលបណ្ដឹងតាមរយៈទូរស័ព្ទដៃ ដោយមានករណីបង្ខាំងមនុស្សខុសច្បាប់ និងជំរិតទារប្រាក់ បង្កដោយជនសង្ស័យមួយក្រុមជនជាតិចិន ជិះរថយន្ត ០១ គ្រឿង ម៉ាក TOYOTA ALPHARD ពណ៌ស បានធ្វើសកម្មភាពចាប់ជនរងគ្រោះម្នាក់ឈ្មោះ JACKY TANG SAI TING ភេទប្រុស អាយុ ៣៨ ឆ្នាំ ជនជាតិចិន សញ្ជាតិកាណាដា ចេញពីសណ្ឋាគារមួយកន្លែង ស្ថិតក្នុងសង្កាត់វាលវង់ ខណ្ឌ ៧ មករា រាជធានីភ្នំពេញ។

បច្ចុប្បន្ន ក្រុមជនសង្ស័យ ត្រូវបានកម្លាំងនាយកដ្ឋាននគរបាលព្រហ្មទណ្ឌ កសាងសំណុំរឿងបញ្ជូនទៅកាន់អយ្យការអមសាលាដំបូងរាជធានីភ្នំពេញ៕

អត្ថបទ ៖ សុភា

The post ឃាត់ខ្លួនជនសង្ស័យ ០៨ នាក់ ករណីចាប់បង្ខាំងមនុស្សខុសច្បាប់ និងជំរិតទារប្រាក់ appeared first on Kampuchea Thmey Daily.

៣ ថ្ងៃ សមត្ថកិច្ចស្រាវជ្រាវបង្ក្រាបជនសង្ស័យ ២២ នាក់ សរុប ១៦ ករណី យកមកបង្ហាញមុខមុនបញ្ជូនទៅតុលាការ

អ៊ិន ពិសី — Wed, 03 Sep 2025 03:41:50 +0000

រយៈពេល ៣ ថ្ងៃ សមត្ថកិច្ចបានធ្វើការស្រាវជ្រាវបង្ក្រាបក្រុមជនសង្ស័យចំនួន ២២ នាក់ ដែលតែងតែធ្វើសកម្មភាពលួច ប្លន់ យ៉ាងសកម្ម តាមបណ្ដាខណ្ឌ ក្នុងភូមិសាស្ត្ររាជធានីភ្នំពេញ និងនាំមកបង្ហាញមុខជាសាធារណៈមុនបញ្ជូនទៅតុលាការ។

បើតាមលោកវរសេនីយ៍ឯក ម៉ម សាវន ប្រធានការិយាល័យព្រហ្មទណ្ឌកម្រិតស្រាល នៃស្នងការដ្ឋាននគរបាលរាជធានីភ្នំពេញ បានឲ្យដឹងថា ដោយមានបទបញ្ជាពីលោកឧត្ដមសេនីយ៍ឯក ជួន ណារិន្ទ អគ្គស្នងការរងនគរបាលជាតិ និងជាស្នងការនគរបាលរាជធានីភ្នំពេញ និង លោកឧត្ដមសេនីយ៍ ប៊ុន សត្យា ស្នងការរងនគរបាលរាជធានីភ្នំពេញទទួលផែននគរបាលព្រហ្មទណ្ឌ កម្លាំងនគរបាលការិយាល័យព្រហ្មទណ្ឌកម្រិតស្រាល សហការតាមបណ្តាខណ្ឌនានាបង្ក្រាបបានក្រុមជនសង្ស័យដែលធ្វើសកម្មភាពយ៉ាងសកម្ម លួច ឆក់ ប្លន់ បានចំនួន ២២ នាក់ ហើយធ្វើការបង្ហាញមុខជាសាធារណៈនៅព្រឹកនេះ។

លោកវរសេនីយ៍ឯក ម៉ម សាវន បានឲ្យដឹងទៀតថា បន្ទាប់ពីទទួលបានព័ត៌មានថាមានករណីក្រុមជនសង្ស័យជិះម៉ូតូជាក្រុមធ្វើសកម្មភាពធាក់វាយប្លន់យកម៉ូតូជនរងគ្រោះ ភ្លាមៗ កម្លាំងសមត្ថកិច្ចព្រហ្មទណ្ឌកម្រិតស្រាលរាជធានីភ្នំពេញ បានធ្វើការស្រាវជ្រាវបង្ក្រាបចាប់បានចំនួន ៨ នាក់ មាន ៤ ករណី។

ជាក់ស្ដែងរយៈពេល ៣ ថ្ងៃ គិតពីថ្ងៃទី ៣១ សីហា ដល់ថ្ងៃទី ៣ កញ្ញា ២០២៥ ជាលទ្ធផលបង្ក្រាបសរុប ១៦ ករណី ឃាត់ ២២ នាក់ សារធាតុញៀន ១០ នាក់ ក្នុងនោះ ១៦ ករណី រួមមាន ការិយាល័យព្រហ្មទណ្ឌកម្រិតស្រាល ករណីប្លន់ម៉ូតូ(ជិះម៉ូតូដេញធាក់) ៤ ករណី ឃាត់ ៨ នាក់ , ករណីលួចម៉ូតូ ១ ករណី ១ នាក់(មានសារធាតុញៀន) , ខណ្ឌពោធិ៍សែនជ័យ ២ ករណី ឃាត់ខ្លួន ២ នាក់ លួចម៉ូតូ ១ ករណី ១ នាក់(មានសារធាតុញៀន) ករណីឆក់ខ្សែក ១ នាក់(មានសារធាតុញៀន) , ខណ្ឌមានជ័យ ៤ ករណី ឃាត់ខ្លួន ៤ នាក់ ករណីលួច(មានសារធាតុញៀន ១ នាក់) , ខណ្ឌ ៧ មករា ២ ករណី ឃាត់ខ្លួនបាន ២ នាក់ ឆក់ទូរស័ព្ទ និង ធ្វើឲ្យខូចខាតដោយចេតនា , ខណ្ឌឫស្សីកែវ ២ ករណី ឃាត់ខ្លួនបាន ២ នាក់ ហិង្សាធ្វើឲ្យខូចខាតដោយចេតនា និង លួច , ខណ្ឌកំបូលឃាត់ខ្លួន ១ នាក់ កាប់ និងវាយកម្ទេចម៉ូតូជនរងគ្រោះ។

បច្ចុប្បន្ន ជនសង្ស័យ រួមទាំងវត្ថុតាង ត្រូវបានកម្លាំងសមត្ថកិច្ចកសាងសំណុំរឿងបញ្ជូនទៅកាន់តុលាការ ដើម្បីអនុវត្តតាមនីតិវិធីច្បាប់៕

អត្ថបទ ៖ ម៉េង

The post ៣ ថ្ងៃ សមត្ថកិច្ចស្រាវជ្រាវបង្ក្រាបជនសង្ស័យ ២២ នាក់ សរុប ១៦ ករណី យកមកបង្ហាញមុខមុនបញ្ជូនទៅតុលាការ appeared first on Kampuchea Thmey Daily.

បុរសចិនដែលចាប់ខ្លួននៅ ថៃ ជាប់ទោសពីបទប្រើឈ្មោះ Jungkook បន្លំលុយជាង ២៩លានដុល្លារ

សាង ស្រីល័ក្ខ — Mon, 25 Aug 2025 07:26:56 +0000

ជនជាតិចិនម្នាក់ដែលត្រូវបានចោទប្រកាន់ពីបទដឹកនាំក្រុម Hacker ហើយបានលួចលុយជាង ៣៨ ពាន់លានវ៉ុន (២៩ លានដុល្លារ) ពីជនរងគ្រោះដែលមានទ្រព្យសម្បត្តិរួមទាំងសមាជិក BTS គឺតារាចម្រៀង Jungkook ត្រូវបានចាប់ខ្លួនជាផ្លូវការនៅក្នុងប្រទេសកូរ៉េ។

លោក Cho Young-min ចៅក្រមនៅតុលាការក្រុងសេអ៊ូលកណ្តាល បានចេញដីកាចាប់ខ្លួនកាលពីថ្ងៃទី២៤ ខែសីហា សម្រាប់ជនសង្ស័យដែលកំណត់អត្តសញ្ញាណដោយនាមត្រកូល Jeon អាយុ ៣៤ឆ្នាំ ដោយចោទប្រកាន់ពីបទរំលោភលើច្បាប់បណ្តាញព័ត៌មាន និងទំនាក់ទំនង និងច្បាប់ស្តីពីការដាក់ទណ្ឌកម្មធ្ងន់ធ្ងរនៃឧក្រិដ្ឋកម្មសេដ្ឋកិច្ចជាក់លាក់។ តុលាការបានលើកឡើងពីការព្រួយបារម្ភថា គាត់អាចនឹងបំផ្លាញភស្តុតាង ឬរត់គេចខ្លួន។

Jeon បានបង្ហាញខ្លួននៅតុលាការនៅម៉ោងប្រហែល ១:១៥ រសៀល។ សម្រាប់សវនាការលើការឃុំខ្លួនបណ្តោះអាសន្ន ប៉ុន្តែបានរក្សាភាពស្ងៀមស្ងាត់នៅពេលដែលអ្នកសារព័ត៌មានសួរថា តើគាត់បានសារភាពចំពោះការចោទប្រកាន់ឬមានគម្រោងផ្តល់សំណងដល់ជនរងគ្រោះដែរឬទេ។

យោងតាមប៉ូលិស និងក្រសួងយុត្តិធម៌ Jeon បានរៀបចំការលួចចូលនៅក្រៅប្រទេសចន្លោះខែសីហា ឆ្នាំ ២០២៣ ដល់ខែមករា ឆ្នាំ ២០២៤ ដោយផ្តោតលើគេហទំព័ររបស់ក្រុមហ៊ុនទូរគមនាគមន៍កូរ៉េ ដើម្បីលួចទិន្នន័យផ្ទាល់ខ្លួន។

ដោយប្រើព័ត៌មាននេះ ក្រុមនេះបានបើកគណនីទូរស័ព្ទចល័តក្រោមឈ្មោះជនរងគ្រោះ និងចូលប្រើគណនីធនាគារ និងរូបិយប័ណ្ណគ្រីបតូ របស់ពួកគេ ដោយបានដកហូតទ្រព្យសម្បត្តិដែលមានតម្លៃជាង៣៨ ពាន់លានវ៉ុន។ ចំណែកឯ ជនរងគ្រោះរួមមាន Jungkook សមាជិកក្រុម BTS ដែលជាប្រធានក្រុមហ៊ុនធំៗ និងជាអ្នកដឹកនាំអាជីវកម្មបណ្តាក់ទុន។

មិនតែប៉ុណ្ណោះ អាជ្ញាធរបានតាមដានលោក Jeon ដោយសហការជាមួយភ្នាក់ងារប៉ូលិសក្រុងសេអ៊ូល និងប៉ូលិស Interpol។ បន្ទាប់ពីដឹងថា គាត់បានចូលដល់ប្រទេសថៃ កាលពីខែមេសា ក្រសួងបានស្នើសុំដីកាចាប់ខ្លួនជាបន្ទាន់ពីអាជ្ញាធរថៃ និងធានាការឃុំខ្លួនគាត់។ គាត់ត្រូវបានគេធ្វើបត្យាប័នទៅប្រទេសកូរ៉េនៅថ្ងៃទី ២២ខែសីហា បួនខែក្រោយមក។

ប៉ូលិសបាននិយាយទៀតថា ពួកគេមានគម្រោងសាកសួរ Jeon បន្ថែមអំពីឧក្រិដ្ឋកម្មដែលអាចកើតមានបន្ថែមទៀត ខណៈពេលដែលកំពុងវិភាគភស្តុតាងដែលរឹបអូសបាន៕

អត្ថបទ៖ សាង ស្រីល័ក្ខ

ចុចអាន៖ពាក្យចចាមអារ៉ាមស្នេហារវាង V និង Jennie ផ្ទុះផ្អើលសារជាថ្មី

The post បុរសចិនដែលចាប់ខ្លួននៅ ថៃ ជាប់ទោសពីបទប្រើឈ្មោះ Jungkook បន្លំលុយជាង ២៩លានដុល្លារ appeared first on Kampuchea Thmey Daily.

ជនសង្ស័យ ១៨នាក់ ត្រូវបានបញ្ជូនទៅពន្ធនាគារ ករណីរុករករ៉ែមាសខុសច្បាប់ ក្នុងដែនជម្រកសត្វព្រៃស្រែពក

Ken Malis — Fri, 18 Apr 2025 04:00:10 +0000

ជនសង្ស័យចំនួន ១៨នាក់ ក្នុងចំណោម ២០នាក់ ត្រូវបានសាលាដំបូងខេត្តមណ្ឌលគិរី បានសម្រេចចេញដីកាបង្គប់ឱ្យឃុំខ្លួនជាបណ្តោះអាសន្ននៅពន្ធនាគារខេត្តមណ្ឌលគិរី កាលពីថ្ងៃទី១៦ ខែមេសា ឆ្នាំ២០២៥។

លោក ហាស់ វិបុល ប្រធានមន្ទីរបរិស្ថានខេត្តមណ្ឌលគិរី បានឱ្យដឹងថា ដោយមានការចង្អុលបង្ហាញពីលោក អ៊ាង សុផល្លែត រដ្ឋមន្រ្តីក្រសួងបរិស្ថាន កម្លាំងជំនាញនៃមន្ទីរបរិស្ថានខេត្ត បានចុះទៅដល់ទីតាំងតំបន់លូងឈូង ហើយក្នុងប្រតិបត្តិការនោះ កម្លាំងជំនាញបានឃាត់ខ្លួនជនសង្ស័យចំនួន ២០នាក់ ពាកព័ន្ធករណីរុករករ៉ែមាសអនាធិបតេយ្យដោយខុសច្បាប់ មិនមានលិខិតអនុញ្ញាត ក្នុងដែនជម្រកសត្វព្រៃស្រែពក កាលពីថ្ងៃទី១២ ខែមេសា ឆ្នាំ២០២៥ ដែលស្ថិតនៅឃុំស្រែហ៊ុយ ស្រុកកោះញែក ខេត្តមណ្ឌលគិរី។ ក្នុងការបង្ក្រាបនោះ មន្រ្តីជំនាញបានរឹបអូសសម្ភារៈមួយចំនួន រួមមាន ម៉ូតូ ១៥គ្រឿង ដែកត្បែង៣ ចបកាប់ដីចំនួន៥។

លោកប្រធានមន្ទីរ បានបញ្ជាក់ថា បន្ទាប់ពីឃាត់ខ្លួនជនសង្ស័យខាងលើរហូតដល់ចៅក្រមស៊ើបសួររួចនៃសាលាដំបូងខេត្តមណ្ឌលគិរី នៅថ្ងៃទី១៦ ខែមេសា ឆ្នាំ២០២៥ តុលាកាបានសម្រេចចេញដីកាបង្គប់ឱ្យឃុំខ្លួន ជនសង្ស័យចំនួន១៨នាក់ ជាបណ្តោះអាសន្ននៅពន្ធនាគារ ខេត្តមណ្ឌលគិរីរងចាំការអនុវត្តបន្ត។ ចំណែកជនសង្ស័យ ២នាក់ទៀត ត្រូវតុលាឱ្យនៅក្រៅឃុំបណ្តោះអាសន្នសិន ដោយម្នាក់ពិការជើង និងម្នាក់ទៀតមានជំងឺធ្ងន់ធ្ងរត្រូវបញ្ជូនទៅសង្រ្គោះបន្ទាន់នៅឯមន្ទីរពេទ្យរាជធានីភ្នំពេញ៕

អត្ថបទ៖រៀម សុខហេង

The post ជនសង្ស័យ ១៨នាក់ ត្រូវបានបញ្ជូនទៅពន្ធនាគារ ករណីរុករករ៉ែមាសខុសច្បាប់ ក្នុងដែនជម្រកសត្វព្រៃស្រែពក appeared first on Kampuchea Thmey Daily.

អាវុធហត្ថខេត្តសៀមរាប បញ្ជូនជនសង្ស័យ ៥នាក់ ទៅតុលាការ ពាក់ព័ន្ធករណីលួចម៉ូតូ និងគាស់ផ្ទះយ៉ាងសកម្ម

Ken Malis — Sun, 01 Sep 2024 08:43:03 +0000

ក្រុមជនសង្ស័យចំនួន ៥នាក់ ត្រូវបានកម្លាំងកងរាជអាវុធហត្ថខេត្តសៀមរាបធ្វើការចាប់ខ្លួនបញ្ជូនទៅតុលាការ ពាក់ព័ន្ធករណី លួចម៉ូតូ និងគាស់ផ្ទះ យ៉ាងសកម្មក្នុងខេត្ត។

មន្រ្តីអាវុធហត្ថខេត្តសៀមរាប បានឱ្យដឹងថា ជនសង្ស័យចំនួន ២នាក់ ត្រូវបានសាកសួរនៅការិយាល័យជំនាញកងរាជអាវុធហត្ថខេត្តសៀមរាប និងបានបន្តឃាត់ខ្លួនជនសង្ស័យចំនួន ៣នាក់ទៀត នៅចំណុចភូមិធ្លកអណ្តូង សង្កាត់ស្លក្រាម ក្រុងសៀមរាប ខេត្តសៀមរាប និងនៅចំណុច ភូមិតាកុះ ឃុំព្រះដាក់ ស្រុកបន្ទាយស្រី ខេត្តសៀមរាប។

ជនសង្ស័យទាំង ០៥នាក់ រួមមាន ១/. ឈ្មោះ ឡុង គឹមលី ភេទប្រុស អាយុ ២៧ឆ្នាំ មុខរបរ មិនពិតប្រាកដ។ ២/. ឈ្មោះ លី សុផាន់ណា ភេទប្រុស អាយុ ២៤ឆ្នាំ មុខរបរ មិនពិតប្រាកដ។ ៣/. ឈ្មោះ វ៉ែន រ៉ាឌី ភេទប្រុស អាយុ ៣៦ឆ្នាំ មុខរបរ មិនពិតប្រាកដ។ ៤/. ឈ្មោះ អ៊ូ ណាត ភេទប្រុស អាយុ ៤១ឆ្នាំ មុខរបរ មិនពិតប្រាកដ។ ៥/. ឈ្មោះ លាប បារាំង ភេទប្រុស អាយុ ២៦ឆ្នាំ មុខរបរ មិនពិតប្រាកដ។

ចំណែក វត្ថុតាងឃាត់បាន រួមមាន ម៉ូតូចំនួន ០៤គ្រឿង ១/. ម៉ាកស៊ុយសាគីស្មាស់រ៉េវ៉ូ ពណ៌ខ្មៅ ផលិតឆ្នាំ២០០៩ ពាក់ផ្លាកលេខ សៀមរាប 1E-5398 ។ ២/. ម៉ាកហុងដាទ្រីម សេ១២៥ ពណ៌ខ្មៅ ផលិតឆ្នាំ២០១៤ ពាក់ផ្លាកលេខ បន្ទាយមានជ័យ 1J-8911 ។ ៣/. ម៉ាកហុងដាទ្រីម សេ១២៥ ផលិតឆ្នាំ២០២១ ពាក់ផ្លាកលេខ កណ្តាល 1AL-7299 ។ ៤/. ម៉ាកហុងដាទ្រីម សេ១២ក ផលិតឆ្នាំ២០១៨ ពាក់ផ្លាកលេខ ភ្នំពេញ 1FL-1254 រួមនឹងសម្ភារមួយចំនួនទៀតផងដែរ។

ការបង្ក្រាបនេះធ្វើឡើង នៅវេលាម៉ោង ១១៖០០នាទី ថ្ងៃទី២៧ ខែសីហា ឆ្នាំ២០២៤ ដោយកម្លាំងជំនាញកងរាជអាវុធហត្ថខេត្ត បានល្បាតនៅតាមបណ្តោយផ្លវ ៦០ម៉ែត្រ ស្ថិតនៅភូមិអញ្ចាញ សង្កាត់នគរធំ ក្រុងសៀមរាប ក្រោមវិធានការរបស់ លោកឧត្តមសេនីយ៍ត្រី សៀ ទីន មេបញ្ជាការ កងរាជអាវុធហត្ថ ខេត្តសៀមរាប។

ក្រោយឃាត់ខ្លួន ជនសង្ស័យទាំង ៥នាក់ បានសារភាពដូចៗគ្នាថា ពួកគេពិតជាបានប្រព្រឹត្តអំពើលួចយ៉ាងសកម្ម នៅក្នុងភូមិសាស្ត្រក្រុងសៀមរាប ពិតប្រាកដមែន។ សូមបញ្ជាក់ថា កម្លាំងអាវុធហត្ថខេត្តសៀមរាប ធ្វើការល្បាតជាប្រចាំ ដើម្បីការពារសន្តិសុខ សុវត្ថិភាព ជូនប្រជាពលរដ្ឋ ក៏ដូចជាភ្ញៀវ ទេសចរណ៍ជាតិ-អន្តរជាតិ ក្នុងភូមិសាស្ត្រខេត្តសៀមរាប៕

ដោយ៖ជុន កុសល

The post អាវុធហត្ថខេត្តសៀមរាប បញ្ជូនជនសង្ស័យ ៥នាក់ ទៅតុលាការ ពាក់ព័ន្ធករណីលួចម៉ូតូ និងគាស់ផ្ទះយ៉ាងសកម្ម appeared first on Kampuchea Thmey Daily.

ឃាត់ខ្លួនជនសង្ស័យ៣នាក់ ពាក់ព័ន្ធករណីយកម៉ូតូមិត្តភក្ដិ និងមានសម្ភារៈ គាស់ ឆ្កឹះសោ

Ngoeul Narath — Wed, 05 Jun 2024 13:35:42 +0000

សមត្ថកិច្ចឃាត់ខ្លួន ជនសង្ស័យចំនួន៣នាក់ បន្ទាប់ពីយកម៉ូតូមិត្តភក្តិជិះបាត់មួយយប់មួយថ្ងៃ សង្ស័យខ្លាចឆបោក ប្តឹងសមត្ថកិច្ចឱ្យជួយ អន្តរាគមន៍តាមស្វែងរក ស្រាប់តែប្រទះជួបកំពុងសង្ងំដេកក្នុងបន្ទប់ រីឯម៉ូតូទុកនៅកន្លែងផ្ញើ ខណៈពេលនេះ សមត្ថកិច្ចឃាត់ខ្លួនឆែកឆេរ ស្រាប់តែរកឃើញមានឧបករណ៍ ឆ្កឹះ គាស់សោ មួយឈុត។ ការឃាត់ខ្លួនជនសង្ស័យខាងលេីបានធ្វេីឡេីងកាលពីវេលាម៉ោង៣រសៀល ថ្ងៃទី០៥ ខែមិថុនា ឆ្នាំ២០២៤ នៅបន្ទប់ជួលក្នុងភូមិត្រពាំងជ្រៃ សង្កាត់កាកាបទី២ ខណ្ឌពោធិ៍សែនជ័យ។

ជនសង្ស័យទាំង៣នាក់រួមមាន ទី១ ឈ្មោះ ថែល សុខហុង ភេទប្រុស អាយុ១៥ឆ្នាំ មុខរបរមិនពិតប្រាកដ ស្នាក់នៅផ្ទះជួលក្នុងភូមិត្រពាំងជ្រៃ សង្កាត់កាកាបទី២ ខណ្ឌពោធិ៍សែនជ័យ មានស្រុកកំណើតនៅភូមិដូង ឃុំដូង ស្រុកបាទី ខេត្តតាកែវ។ ជនសង្ស័យទី២ ឈ្មោះ គីម ហួរ ភេទប្រុស អាយុ២២ឆ្នាំ មុខរបរមិនពិតប្រាកដ ស្នាក់នៅផ្ទះជួលក្នុងភូមិត្រពាំងជ្រៃ សង្កាត់កាកាបទី២ ខណ្ឌពោធិ៍សែនជ័យ មានស្រុកកំណើត នៅភូមិបុឺស ឃុំបុឺស២ ស្រុកក្រូចឆ្មារ ខេត្តត្បូងឃ្មុំ និងជនសង្ស័យទី៣ ឈ្មោះ ប៊ន ដារ៉ា ភេទប្រុស អាយុ១៧ឆ្នាំ មុខរបរកម្មកររោងចក្រ ស្នាក់នៅផ្ទះជួល ភូមិព្រៃល្វា២ សង្កាត់កាកាបទី១ ខណ្ឌពោធិ៍សែនជ័យ ស្រុកកំណើតនៅភូមិទេពភារម្យ ឃុំវាលពន់ ស្រុកថ្ពង ខេត្តកំពង់ស្ពឺ។

តាមប្រភពបានឱ្យដឹងថា មុនកើតហេតុ កាលពីល្ងាចថ្ងៃទី០៤ ខែមិថុនា ឆ្នាំ២០២៤ ជនសង្ស័យទាំង៣នាក់ បានយកម៉ូតូម៉ាកហុងដាឌ្រីម ពណ៌ខ្មៅ ពាក់ស្លាកលេខ បាត់ដំបង 1J-2118 របស់មិត្តភក្តិម្នាក់នៅផ្ទះជួលក្នុងភូមិព្រៃទា១ សង្កាត់ចោមចៅទី៣ ខណ្ឌពោធិ៍សែនជ័យ ដោយប្រាប់ម្ចាស់ថាយកទៅជិះទិញបាយ ប៉ុន្តែបែជាយកទៅឌុបស្រីស្នេហ៍ដើរដេកផ្ទះសំណាក់ បាត់មួយយប់ ព្រឹកឡើង យកទៅផ្ញើ កន្លែងទទួលផ្ញើ ហើយនាំគ្នាទៅសង្ងំដេកក្នុងបន្ទប់ជួលបាត់ ទាំងមិនបានប្រាប់ម្ចាស់ ធ្វើឱ្យម្ចាស់ម៉ូតូ ជាមិត្តភក្តិភ័យខ្លាចចាញ់បោក រត់ទៅប្តឹងសមត្ថកិច្ច ទាំងព្រឹក ថ្ងៃទី០៥ ខែមិថុនា ឆ្នាំ២០២៤ ឱ្យជួយស្វែងរក។

លុះដល់រសៀលថ្ងៃដដែល ស្រាប់តែប្រទះឃើញជនសង្ស័យកំពុងសង្ងំដេកក្នុងបន្ទប់ ភ្លាមៗសមត្ថកិច្ច ឃាត់ខ្លួនសាកសួរ និងឆែកឆេរ រកឃើញមានឧបករណ៍ គាស់ ឆ្កឹះសោ ទើបឃាត់នាំយកទៅប៉ុស្តិ៍ សាកសួរទើបដឹងរឿង ម៉ូតូមិនឆបោកអ្វីទេ ក្រោយពីជិះហើយយកទៅផ្ញើទុក ហើយឡើងទៅសង្ងំដេក តែពាក់ព័ន្ធនឹងសម្ភារៈ សោ ឧបករណ៍ ឆ្កឹះសោ ជនសង្ស័យសារភាព ថាពួកគេទាំង៣នាក់ ធ្លាប់ធ្វើសកម្មភាព ឆ្កឹះសោតាមបន្ទប់ជួល លួចទ្រព្យសម្បត្តិ ។

ជនសង្ស័យទាំង៣នាក់ ផ្អែកលើចម្លើយសារភាព និងវត្ថុតាង សមត្ថកិច្ចឃាត់ខ្លួន កសាងសំណុំរឿងបញ្ជូនទៅផ្នែកជំនាញខណ្ឌ ។ ចំណែកម៉ូតូមួយគ្រឿងខាងលើ ពុំមានពាក់ព័ន្ធ ហើយម្ចាស់សុំយកទៅប្រើប្រាស់វិញ ដោយមិនប្តឹងផ្តល់អ្វីឡើយ ៕

អត្ថបទ៖សុខា

The post ឃាត់ខ្លួនជនសង្ស័យ៣នាក់ ពាក់ព័ន្ធករណីយកម៉ូតូមិត្តភក្ដិ និងមានសម្ភារៈ គាស់ ឆ្កឹះសោ appeared first on Kampuchea Thmey Daily.

ឃាត់ខ្លួនជនសង្ស័យម្នាក់ពាក់ព័ន្ធករណីផលិត និងចែកចាយរូបភាពអាសអាភាសលើបណ្តាញសង្គមហ្វេសប៊ុក

Ken Malis — Tue, 21 May 2024 02:53:42 +0000

ជនសង្ស័យម្នាក់ ត្រូវបានឃាត់ខ្លួនក្រោយរត់គេចខ្លួនជិតមួយឆ្នាំ ក្នុងករណីផលិត និងចែកចាយរូបភាពអាសអាភាសទៅលើបណ្តាញសង្គមហ្វេសប៊ុកកាលពីថ្ងៃទី១៧ ខែកញ្ញា ឆ្នាំ២០២៣។

ការឃាត់ខ្លួននេះ អនុវត្តន៍តាមបទបញ្ជារបស់លោកឧត្តមសេនីយ៍ទោ សិទ្ធិ ឡោះ ស្នងការនគរបាលខេត្តបន្ទាយមានជ័យ និងដឹកនាំសម្របសម្រួលនីតិវិធីពីលោក កើត វណ្ណារ៉េត ព្រះរាជអាជ្ញាអមសាលាដំបូងខេត្ត និងយោងបណ្ដឹងរបស់ឈ្មោះ ហ-ល-អ ភេទស្រី អាយុ ៣៩ឆ្នាំ ទីលំនៅបច្ចុប្បន្ន ភូមិក្បាលស្ពាន១ សង្កាត់ប៉ោយប៉ែត ក្រុងប៉ោយប៉ែត ខេត្តបន្ទាយមានជ័យ។

ស្នងការនគរបាលខេត្តបន្ទាយមានជ័យ បានឱ្យដឹងថា កម្លាំងការិយាល័យប្រឆាំងបទល្មើសបច្ចេកវិទ្យា បានសហការជាមួយកម្លាំងអធិការដ្ឋាននគរបាលក្រុងប៉ោយប៉ែត កាលពីថ្ងៃទី១៦ ខែឧសភា ឆ្នាំ២០២៤ ចុះស្រាវជ្រាវ និងបានឃាត់ខ្លួនជនសង្ស័យបាន ១នាក់ ឈ្មោះ ឡ ណ ភេទប្រុស អាយុ ៤០ឆ្នាំ រស់នៅភូមិសាមគ្គីមានជ័យ សង្កាត់អូរជ្រៅ ក្រុងប៉ោយប៉ែត ខេត្តបន្ទាយមានជ័យ ក្រោយរត់គេចខ្លួនជិតមួយឆ្នាំ។

បច្ចុប្បន្នជនសង្ស័យត្រូវបានឃាត់ខ្លួន និងកសាងសំណុំរឿងបញ្ជូនទៅតុលាការចាត់ការតាមនីតិវិធី៕

The post ឃាត់ខ្លួនជនសង្ស័យម្នាក់ពាក់ព័ន្ធករណីផលិត និងចែកចាយរូបភាពអាសអាភាសលើបណ្តាញសង្គមហ្វេសប៊ុក appeared first on Kampuchea Thmey Daily.