ជយលាភី Archives - Kampuchea Thmey Daily

ជយលាភីកីឡាអាស៊ានប៉ារ៉ាហ្គេម លើកទី ១១ ទទួលបានប្រាក់រង្វាន់ជាង ២ ពាន់ ៧ រយលានរៀល ពីរាជរដ្ឋាភិបាលជាផ្លូវការ

អ៊ិន ពិសី — Mon, 13 Mar 2023 07:18:13 +0000

កាលពីព្រឹកថ្ងៃទី ១៣ ខែមីនា សម្ដេចពិជ័យសេនា ទៀ បាញ់ ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ និងជាប្រធានគណៈកម្មាធិការជាតិ CAMSOC-CAMAPGOC តំណាងដ៏ខ្ពង់ខ្ពស់សម្ដេចតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា បានអញ្ជើញប្រគល់ប្រាក់រង្វាន់លើកទឹកចិត្តរបស់រាជរដ្ឋាភិបាល ដល់ម្ចាស់ជយលាភីពីការប្រកួតកីឡាអាស៊ានប៉ារ៉ាហ្គេម លើកទី ១១ ឆ្នាំ ២០២២ នៅប្រទេសឥណ្ឌូណេស៊ី ដោយមានថវិកាសរុបចំនួន ២ ៧០៨ ៦០០ ០០០ រៀល នៅទីស្ដីការក្រសួងការពារជាតិ។

កីឡាអាស៊ានប៉ារ៉ាហ្គេម លើកទី ១១ បានធ្វើការប្រកួតកាលពីថ្ងៃទី ៣០ ខែកក្កដា ដល់ថ្ងៃទី ០៦ ខែសីហា ឆ្នាំ ២០២២ នៅទីក្រុងសូឡូ ប្រទេសឥណ្ឌូណេស៊ី ដោយ កម្ពុជា បានបញ្ជូនកីឡាករ កីឡាការិនីជនពិការ ចំនួន ១១៥ នាក់ លើ ១១ ប្រភេទកីឡាចូលរួម ក្រោមការដឹកនាំរបស់ ឯកឧត្ដម ហ៊ុន ម៉ានី ប្រធានសហភាពសហព័ន្ធយុវជនកម្ពុជា និងជាប្រធានប្រតិភូដឹកនាំ។ ជាលទ្ធផលក្រុមអត្តពលិកកម្ពុជា ដណ្ដើមបានមេដាយមាស ៧ ប្រាក់ ១០ និងសំរឹទ្ធ ១១ ឈរចំណាត់ថ្នាក់លេខ ៧ ក្នុងចំណោម ១១ ប្រទេស។

ក្នុងនាមតំណាងដ៏ខ្ពង់ខ្ពស់សម្ដេចតេជោនាយករដ្ឋមន្ត្រី សម្ដេចពិជ័យសេនា ទៀ បាញ់ បានថ្លែងកោតសរសើរ និងវាយតម្លៃខ្ពស់ចំពោះការខិតខំប្រឹងប្រែង និងលះបង់របស់កីឡាករ កីឡាការិនីជនពិការកម្ពុជា ទោះបីមានការលំបាក ពិសេសកំឡុងវិបត្តិជំងឺរាតត្បាតកូវីដ-១៩ ជាង ២ ឆ្នាំ យ៉ាងណា តែថ្នាក់ដឹកនាំគណៈកម្មាធិការជាតិប៉ារ៉ាឡាំពិកកម្ពុជា គ្រូបង្វឹក គ្រូជំនួយ និងកីឡាករ កីឡាការិនីផ្ទាល់ បានព្យាយាម និងខិតខំប្រឹងប្រែង រហូតដណ្ដើមបានជោគជ័យមេដាយ និងកិត្តិយសជូនជាតិយ៉ាងត្រចះត្រចង់។

ដើម្បីលើកទឹកចិត្ត ចំពោះការខិតខំប្រឹងប្រែងខាងលើ ថ្ងៃនេះ រាជរដ្ឋាភិបាល ក៏បានប្រគល់ប្រាក់រង្វាន់ជយលាភីដល់គ្រូបង្វឹក គ្រូជំនួយ និងកីឡាករ កីឡាការិនី។ នេះសបញ្ជាក់ឲ្យឃើញពីការយកចិត្តទុកដាក់ខ្លាំងរបស់រាជរដ្ឋាភិបាល ពិសេសសម្ដេចតេជោ ហ៊ុន សែន ក្នុងការគាំទ្រ ជំរុញ និងលើកទឹកចិត្ត ដល់កីឡាករ កីឡាការិនី ទាំងជនមានពិការភាព និងជនមិនមានពិការភាព ធ្វើឲ្យអត្តពលិកទាំងអស់ មានភាពកក់ក្ដៅ និងកម្លាំងចិត្តចូលរួមប្រកួតអន្តរជាតិនានា ពិសេសត្រៀមធ្វើម្ចាស់ផ្ទះស៊ីហ្គេម-អាស៊ានប៉ារ៉ាហ្គេម ឆ្នាំ ២០២៣ ខាងមុខ។

សម្ដេចពិជ័យសេនា បន្ថែមថា សមិទ្ធផលទាំងអស់នេះ អាចកើតមានបាន ក៏អាស្រ័យប្រទេសមានសុខសន្ដិភាព ទើបជំរុញឲ្យមានការអភិវឌ្ឍគ្រប់វិស័យ រួមទាំងវិស័យកីឡា ដែលជាវិស័យអាទិភាពមួយ ត្រូវបានយកចិត្តទុកដាក់ខ្ពស់ពីរាជរដ្ឋាភិបាល។ ក្នុងន័យនេះ សម្ដេច បានជំរុញឲ្យគ្រប់ភាគីពាក់ព័ន្ធ ទាំងអង្គភាពកីឡា អាជ្ញាធរ វិស័យឯកជន និងប្រជាពលរដ្ឋ បន្តគាំទ្រ និងលេងកីឡា ដើម្បីជំរុញការអភិវឌ្ឍឆ្ពោះទៅរកការប្រកួតប្រជែង និងដណ្ដើមជោគជ័យលើឆាកអន្តរជាតិជាបន្តបន្ទាប់ទៀត ពិសេសឆ្ពោះទៅរកភាពជោគជ័យក្នុងការធ្វើម្ចាស់ផ្ទះការប្រកួតកីឡាស៊ីហ្គេម-អាស៊ានប៉ារ៉ាហ្គេម ឆ្នាំ ២០២៣ ខាងមុខ៕

អត្ថបទ ៖ មន្នីរ័ត្ន

The post ជយលាភីកីឡាអាស៊ានប៉ារ៉ាហ្គេម លើកទី ១១ ទទួលបានប្រាក់រង្វាន់ជាង ២ ពាន់ ៧ រយលានរៀល ពីរាជរដ្ឋាភិបាលជាផ្លូវការ appeared first on Kampuchea Thmey Daily.

ជើងខ្លាំងទាំង៥ក្រុម ក្នុងវគ្គជម្រុះចុងក្រោយ មាន៣ក្រុមណាទៅវគ្គផ្ដាច់ព្រ័ត្របាន?

Sorn Phanith — Mon, 01 Nov 2021 08:00:49 +0000

កាលពីវគ្គពាក់កណ្ដាលផ្ដាច់ព្រ័ត្រ ដែលបានបញ្ចប់កន្លងទៅ កម្មវិធីវង់តន្ត្រីខ្មែរ រដូវកាលទី២ បានស្វែងរកឃើញបេក្ខជនឆ្នើមទាំង៥ក្រុម ក្នុងវិញ្ញាសាបីផ្សេងគ្នារួមមាន វង់ភ្លេងពិណពាទ្យ ល្ខោនខោល និងល្ខោនយីកេ។

បេក្ខជនប្រកួតទាំង ៥ក្រុម ក៏បានឆ្លងកាត់នូវដំណាក់កាលបោះឆ្នោតពីទស្សនិកជន តាមរយៈវីដេអូបង្ហាញសមត្ថភាពនៃបេក្ខជននីមួយៗក្នុងផេកហ្វេសប៊ុកផ្លូវការរបស់សហភាពសហព័ន្ធយុវជនកម្ពុជា ពោលគឺពិន្ទុសម្រាប់វគ្គជម្រុះចុងក្រោយនេះ មាន៤០% ដែលយកចេញពីពិន្ទុបោះឆ្នោតរបស់បងប្អូនទស្សនិកជន។

ដោយឡែកពិន្ទុ៦០%ទៀត ជាការវិនិច្ឆ័យវាយតម្លៃពីសំណាក់គណៈកម្មការមេប្រយោគ ដែលក្នុងនោះ សមាសភាពបេក្ខជនរួមមាន៖

១. ក្រុមទេពបទុមវង្សពិណពាទ្យ (រាជធានីភ្នំពេញ) វិញ្ញាសា បទដំណើរសេះបីជាន់ ឬ(បទសាឡូម៉ា) ៣ជាន់។

២. ក្រុមពន្លកយុវជនយីកេ (រាជធានីភ្នំពេញ) វិញ្ញាសា រឿង ទិព្វសូដាច័ន្ធ (ភាគបញ្ចប់)

៣. ក្រុមមន្ទីរវប្បធម៌ខេត្តបន្ទាយមានជ័យ (ខេត្តបន្ទាយមានជ័យ) វិញ្ញាសា បទដំណើរសេះបីជាន់ ឬ(បទសាឡូម៉ា) ៣ជាន់

៤. ក្រុម យុវជនខ្មែរថែមរតកដូនតា (ខេត្តកណ្តាល) វិញ្ញាសា បទដំណើរសេះបីជាន់ ឬ(បទសាឡូម៉ា) ៣ជាន់

៥. ក្រុមយុវជនល្ខោនខោលកម្ពុជា (រាជធានីភ្នំពេញ) វិញ្ញាសា ដកស្រង់ពីរឿងរាមកេរ្តិ៍

ជាលទ្ធផល គឺកម្មវិធីបានរកឃើញក្រុមចំនួន៣ ដែលទទួលបានពិន្ទុសរុបខ្ពស់ជាងគេ (ពិន្ទុបោះឆ្នោត បូកនឹងពិន្ទុវាយតម្លៃពីគណៈកម្មការ) គឺក្រុមទេពបទុមវង្សពិណពាទ្យ ក្រុមមន្ទីរវប្បធម៌ខេត្តបន្ទាយមានជ័យ ក្រុមយុវជនល្ខោនខោលកម្ពុជា។

បេក្ខជនទាំង៣ក្រុម នឹងមានឱកាសទៅវគ្គផ្ដាច់ព្រ័ត្រ ដើម្បីយកជយលាភីលេខ១ បន្តដោយលេខ២ និងលេខ៣។ ដោយឡែក កម្មវិធីក៏សូមចូលរួមសោកស្ដាយចំពោះក្រុមពន្លកយុវជនយីកេ និងក្រុមយុវជនខ្មែរថែមរតកដូនតា ដែលមិនមានឱកាសទៅវគ្គបន្ត ហើយពីកម្មវិធីក៏លើកទឹកចិត្តឲ្យក្រុមទាំង២ បន្តនូវស្មារតីលើកតម្កើងវប្បធម៌បុរាណខ្មែរជានិច្ចនិរន្តរ៍។

កម្មវិធីវង់តន្ត្រីខ្មែររដូវកាលទី២ នឹងមានការចាក់ផ្សាយលើកញ្ចក់ទូរទស្សន៍ BTV រៀងរាល់ថ្ងៃសៅរ៍ ចាប់ពីម៉ោង ៨យប់តទៅ និងការផ្សាយបន្តផ្ទាល់លើផេកផ្លូវការ របស់សហភាពសហព័ន្ធយុវជនកម្ពុជា ខេត្តស្វាយរៀងផងដែរ៕

The post ជើងខ្លាំងទាំង៥ក្រុម ក្នុងវគ្គជម្រុះចុងក្រោយ មាន៣ក្រុមណាទៅវគ្គផ្ដាច់ព្រ័ត្របាន? appeared first on Kampuchea Thmey Daily.