ជូញដូរផ្លូវភេទ Archives - Kampuchea Thmey Daily

ឆ្មក់បង្ក្រាបទីតាំងខារ៉ាអូខេ ៣ កន្លែង នៅខេត្តកណ្ដាល សង្ស័យបង្កប់សេវាកម្មផ្លូវភេទ ឃាត់ខ្លួនមនុស្ស ៣៩ នាក់

អ៊ិន ពិសី — Fri, 17 Oct 2025 03:49:09 +0000

កាលពីយប់ថ្ងៃទី ១៦ ខែតុលា ឆ្នាំ ២០២៥ កម្លាំងសមត្ថកិច្ចខេត្តកណ្ដាល បានបើកប្រតិបត្តិការឆ្មក់បង្ក្រាបទីតាំងខារ៉ាអូខេចំនួន ៣ កន្លែង ផ្សេងគ្នា ក្នុងខេត្តកណ្ដាល ដោយសង្ស័យលួចលាក់ធ្វើអាជីវកម្មផ្លូវភេទ កេងប្រវ័ញ្ចលើស្ត្រី និង កុមារ ព្រមទាំងឃាត់ខ្លួនមនុស្ស ៣៩ នាក់ យកទៅសួរនាំនៅនាយកដ្ឋានប្រឆាំងការជួញដូរមនុស្ស និងការពារអនីតិជន។

ជាក់ស្ដែងប្រតិបត្តិការនេះ កម្លាំងជំនាញបានធ្វើការស្រាវជ្រាវឆ្មក់បង្ក្រាបទីតាំងចំនួន ៣ កន្លែង ផ្សេងគ្នា ក្នុងភូមិសាស្ត្រខេត្តកណ្ដាល ដោយទីតាំងទី ១-ដឹកនាំដោយលោកឧត្ដមសេនីយ៍ទោ ងួន សុខចេង អនុប្រធាននាយកដ្ឋានប្រឆាំងការជួញដូរមនុស្ស និងការពារអនីតិជន នៅហាង KTV ត្រជាក់ចិត្ត II ស្ថិតក្នុងភូមិកំពង់ស្វាយក្រោម ឃុំព្រែកថ្មី ស្រុកកោះធំ ខេត្តកណ្តាល រកឃើញមានស្រោមអនាម័យមួយចំនួនធំនៅបន្ទប់រួមភេទគ្មានលេខ ដោយបានឃាត់ខ្លួនមនុស្សចំនួន ៨ នាក់។ ទីតាំងទី ២-ដឹកនាំដោយលោកវរសេនីយ៍ឯក ទេព សុភា អនុប្រធាននាយកដ្ឋានប្រឆាំងការជួញដូរមនុស្ស និងការពារអនីតិជន នៅចំណុចហាង KTV ម្លប់ដូងពូរ៉េត ស្ថិតក្នុងភូមិកំពង់ស្វាយក្រោម ឃុំព្រែកថ្មី ស្រុកកោះធំ ខេត្តកណ្តាល រកឃើញមានស្រោមអនាម័យមួយចំនួន ដោយឃាត់ខ្លួនមនុស្ស ១០ នាក់។ ចំណែកទីតាំងទី ៣ -ដឹកនាំដោយលោកឧត្ដមសេនីយ៍ទោ សុក សំបូរ ប្រធាននាយកដ្ឋានប្រឆាំងការជួញដូរមនុស្ស និងការពារអនីតិជន ឃាត់ខ្លួនមនុស្សចំនួន ២១ នាក់។

បច្ចុប្បន្ន កម្លាំងនាយកដ្ឋានប្រឆាំងការជួញដូរមនុស្ស និងការពារអនីតិជន បាននាំខ្លួនអ្នកដែលពាក់ព័ន្ធយកទៅសាកសួរ ដើម្បីកសាងសំណុំរឿងចាត់ការតាមនីតិវិធីច្បាប់៕

អត្ថបទ ៖ ម៉េង

The post ឆ្មក់បង្ក្រាបទីតាំងខារ៉ាអូខេ ៣ កន្លែង នៅខេត្តកណ្ដាល សង្ស័យបង្កប់សេវាកម្មផ្លូវភេទ ឃាត់ខ្លួនមនុស្ស ៣៩ នាក់ appeared first on Kampuchea Thmey Daily.

ជើងខ្លាំងពាក់ព័ន្ធករណី “សញ្ចារកម្ម” ទៅលើក្មេងស្រីជាច្រើននាក់ ត្រូវបានកងរាជអាវុធហត្ថខេត្តសៀមរាប ឃាត់ខ្លួន

Samean Lay — Sat, 09 Aug 2025 10:23:16 +0000

កម្លាំងមូលដ្ឋានកងរាជអាវុធហត្ថក្រុងសៀមរាប សហការជាមួយការិយាល័យប្រឆាំងការជួញដូរមនុស្ស បានឃាត់ខ្លួនជនសង្ស័យ ឈ្មោះ យឿប ឌីណា ហៅ ម៉េង ភេទប្រុស អាយុ ៣១ឆ្នាំ មុខរបរ លក់កាហ្វេ ជនជាតិខ្មែរ ពាក់ព័ន្ធករណី “សញ្ចារកម្ម” (ទាញយកអត្ថប្រយោជន៍ហិរញ្ញវត្ថុពីអំពើពេស្យាចាររបស់អ្នកដទៃ)។ នេះបើយោងតាមការចុះផ្សាយរបស់កងរាជអាវុធហត្ថខេត្តសៀមរាប។

ការឃាត់ខ្លួននេះ ធ្វើឡើងនៅវេលាម៉ោង ១៩:០០នាទី ថ្ងៃទី០៧ ខែសីហាឆ្នាំ២០២៥ នៅចំណុចភូមិធ្លកអណ្តូង សង្កាត់ស្លក្រាម ក្រុងសៀមរាប ខេត្តសៀមរាប ។ ប្រតិបត្តិការបង្រ្កាប និងឈានដល់ការឃាត់ខ្លួន ដោយយោងតាមពាក្យបណ្ដឹងរបស់ជនរងគ្រោះចំនួន៣ រួមមាន បណ្តឹងរបស់ម្ដាយក្មេងស្រីរងគ្រោះ ភេទស្រី អាយុ ៣៧ឆ្នាំ កូនស្រីរងគ្រោះ អាយុ ១៤ឆ្នាំ , ក្មេងស្រី អាយុ ១៦ឆ្នាំ (គ្មានអាណាព្យាបាល) និង ក្មេងស្រី អាយុ ១៦ឆ្នាំ។

ក្នុងពាក្យបណ្តឹងរបស់ជនរងគ្រោះ បានប្តឹងអំពីករណី “សញ្ចារកម្ម” ប្រព្រឹត្តកាលពីអំឡុងខែកុម្ភៈ ឆ្នាំ២០២៥ រហូតមកដល់បច្ចុប្បន្ន នៅចំណុចផ្ទះជួល ភូមិធ្លកអណ្តូង សង្កាត់ស្លក្រាម ក្រុងសៀមរាប ខេត្តសៀមរាប(កន្លែងលក់កាហ្វេមេត្រីរបស់ជនសង្ស័យ) ។

ជនរងគ្រោះជាអនីតិជនទាំង០៣នាក់បានបំភ្លឺជូនសមត្ថកិច្ចដូចៗគ្នាថា ពួកគេត្រូវបានជនសង្ស័យខាងលើ លួងលោមឲ្យជួលបន្ទប់របស់គាត់ ស្នាក់នៅ ដោយមិនចាំបាច់បង់ប្រាក់ជាមុនទេ ហើយនៅពេណារក ប្រាក់បានចាំបង់ជាក្រោយ រួមទាំងម្ហូបអាហារ និងកាហ្វេទៀតផង ។ ជនរងគ្រោះអះអាងថា៖«នៅពេលពួកគេទាំង០៣នាក់គ្មានប្រាក់បង់ឲ្យគាត់ គាត់បានបង្ខំឲ្យទៅបំរើផ្លូវភេទជាមួយភ្ញៀវ ដើម្បីយកប្រាក់សងថ្លៃដែលពួកខ្លួនជំពាក់គាត់ បើមិនព្រមធ្វើតាមគាត់ទេ គាត់គំរាមថា ចំណាយតែ៣០០បាត កាត់ដៃ-ជើង មិនឲ្យបានសុខទេ»។

មិនតែប៉ុណ្ណោះ ឈ្មោះ យឿប ឌីណា ហៅម៉េង បានដក១០% នៃប្រាក់ ដែលខ្លួនទៅបំរើផ្លូវភេទជាមួយភ្ញៀវទៀតផង បើភ្ញៀវឲ្យបានក្នុង១០០$ គាត់ដកអស់ ២៥$ ពេលខ្លះបានតែ ៥០$ រូបគាត់ដកអស់១០$ ហើយចំណែកប្រាក់ដែលនៅសល់ពីការបំរើផ្លូវភេទ ពួកខ្លួនមិនដែលបានយកមកចាយវាយនោះទេ គឺឈ្មោះ យឿប ឌីណា តម្រូវឱ្យបង់ថ្លៃបន្ទប់ជួល ថ្លៃម្ហូបអាហារ ថ្លៃកាហ្វេ ថ្លៃជួលម៉ូតូ ថ្លៃជួលទូរស័ព្ទប្រើ ។

ឈ្មោះ អ.ធ.ត. ដែលជាជនរងគ្រោះ អាយុ១៤ឆ្នាំ បានររៀបរាប់ជូនសមត្ថកិច្ចដោយក្តុកក្តួលទៀតថា៖ នៅកំឡុងខែឧសភាឆ្នាំ២០២៥ ខ្លួនបានខ្ចីម៉ូតូម៉ាកហុងដាវ៉ារីអូឃ្លីក របស់ឈ្មោះ តេង ចាន់រតន: ភេទប្រុស ត្រូវជាប្អូនធម៌ឈ្មោះ យឿប ឌីណា ដើម្បីដើរលេងតែត្រូវបានជួបគ្រោះ ថ្នាក់ចរាចរណ៍នៅផ្លូវ៦០ម៉ែត្រ បណ្តាលឲ្យខូចខាត ម៉ូតូ បាក់បូម វៀចតួ ពេលនោះពួកគាត់ ( តេង ចាន់រតន:និងឈ្មោះ យឿប ឌីណា) បានឲ្យខ្លួនសងថ្លៃជួសជុលម៉ូតូចំនួន ៨០០$ ដោយសារគ្មានប្រាក់ ទើបខ្លួនមកផ្ទះជួលរបស់ឈ្មោះ យឿប ឌីណា ហៅម៉េង ទើបមាន បញ្ហានេះកើតឡើងតែម្តង ។

ដោយមានការសម្របសម្រួលពីលោក មាស ច័ន្ទពិសិដ្ឋ ព្រះរាជអាជ្ញា នៃអយ្យការអមសាលាដំបូងខេត្តសៀមរាប ការិយាល័យជំនាញកសាងសំណុំរឿងដើម្បីអនុវត្តតាមនីតិវិធី ចំណែកជនរងគ្រោះប្រគល់ជូនមន្ទីរសង្គមកិច្ច អតីតយុវជន និងយុវនីតិសម្បទាខេត្តសៀមរាប ៕

The post ជើងខ្លាំងពាក់ព័ន្ធករណី “សញ្ចារកម្ម” ទៅលើក្មេងស្រីជាច្រើននាក់ ត្រូវបានកងរាជអាវុធហត្ថខេត្តសៀមរាប ឃាត់ខ្លួន appeared first on Kampuchea Thmey Daily.

នគរបាលប្រឆាំងការជួញដូរមនុស្ស និងការពារអនីតិជន ឆ្មក់បង្ក្រាបហាងផឹកស៊ី ២ កន្លែង ឃាត់ខ្លួនមនុស្សប្រុស-ស្រីជាច្រើននាក់ នៅខណ្ឌពោធិ៍សែនជ័យ

អ៊ិន ពិសី — Sat, 10 May 2025 01:33:06 +0000

កម្លាំងនាយកដ្ឋានប្រឆាំងការជួញដូរមនុស្ស និងការពារអនីតិជន នៃអគ្គស្នងការនគរបាលជាតិ បានឆ្មក់ចុះបង្ក្រាបទីតាំងហាងផឹកស៊ី ២ កន្លែង ផ្សេងគ្នា មានយីហោ «ម្លប់ដូងខ្ទិះម៉ារានី» និង ហាង«អង្គរជុំត្រជាក់ចិត្ត» ដោយធ្វើការឃាត់ខ្លួនមនុស្សប្រុស-ស្រី ជាច្រើននាក់ ពាក់ព័ន្ធករណីជួញដូរផ្លូវភេទ។

ហេតុការណ៍នេះបានកើតឡើងកាលពីវេលាម៉ោង ៩ និង ៤០ នាទីយប់ ថ្ងៃទី ៩ ខែឧសភា ឆ្នាំ ២០២៥ ស្ថិតនៅផ្លូវបេតុង សង្កាត់ត្រពាំងក្រសាំង ខណ្ឌពោធិ៍សែនជ័យ រាជធានីភ្នំពេញ។

ប្រភពព័ត៌មានបាននិយាយថា ដោយទីតាំងយីហោ «ម្លប់ដូងខ្ទិះម៉ារានី» និង ហាង«អង្គរជុំត្រជាក់ចិត្ត» ខាងលើសង្ស័យថាមានលួចបង្កប់សេវាបម្រើផ្លូវភេទខុសច្បាប់ ទើបនគរបាលនាយកដ្ឋាន ដាក់កម្លាំងជំនាញ សហការជាមួយនឹងកម្លាំងនគរបាលខណ្ឌពោធិ៍សែនជ័យ ចុះបង្ក្រាបជាក់ស្ដែងតែម្ដង និងធ្វើការឃាត់ខ្លួនមនុស្សប្រុស-ស្រីបានជាច្រើននាក់ដែលពាក់ព័ន្ធ ព្រមទាំងដកហូតសម្ភារៈផ្សេងៗ មួយចំនួនធំ ចំណែកអ្នកមិនមានការពាក់ព័ន្ធវិញនោះ ត្រូវបានឲ្យចេញត្រឡប់ទៅវិញធម្មតា។

ក្រោយពីធ្វើការឃាត់ខ្លួនរួច សមត្ថកិច្ចក៏បាននាំខ្លួនមនុស្សប្រុស-ស្រីជាច្រើននាក់ ខាងលើ រួមមានសម្ភារៈមួយចំនួន យកទៅកាន់នាយកដ្ឋានប្រឆាំងការជួញដូរមនុស្ស និងការពារអនីតិជន នៃអគ្គស្នងការនគរបាលជាតិ ដើម្បីសួរនាំបន្ត និងចាត់ការតាមនីតិវិធីច្បាប់៕

អត្ថបទ ៖ សំណាង

The post នគរបាលប្រឆាំងការជួញដូរមនុស្ស និងការពារអនីតិជន ឆ្មក់បង្ក្រាបហាងផឹកស៊ី ២ កន្លែង ឃាត់ខ្លួនមនុស្សប្រុស-ស្រីជាច្រើននាក់ នៅខណ្ឌពោធិ៍សែនជ័យ appeared first on Kampuchea Thmey Daily.

សមត្ថកិច្ចថៃចាប់ខ្លួនគ្រូបង្រៀនជុំវិញរឿងអាស្រូវផ្លូវភេទជាមួយសិស្សប្រុសៗជាអនីតិជន

Rann Reuy — Tue, 26 Nov 2024 05:15:36 +0000

សមត្ថកិច្ចកិច្ចថៃឃាត់ខ្លួនគ្រូបង្រៀនប្រុសម្នាក់ដែលជាប់សង្ស័យបានប្រព្រឹត្តខុសជុំវិញរឿងអាស្រូវផ្លូវភេទជាមួយសិស្សប្រុសៗប្រហែល១០នាក់។

យោងសេចក្តីរាយការណ៍របស់សារព័ត៌មាន Khaosod របស់ប្រទេសថៃ សមត្ថកិច្ចថៃបានឃាត់ខ្លួនគ្រូបង្រៀនអាយុ៣០ឆ្នាំកាលថ្ងៃចន្ទ នៅក្នុងស្រុក Suan Phueng នៃខេត្ត Ratchaburi ដោយសារតែរងការចោទប្រកាន់ពីបទរំលោភផ្លូវភេទលើសិស្សប្រុសប្រហែល១០នាក់ដែលមានអាយុក្រោម១៥ឆ្នាំ។

តាមសេចក្តីរាយការណ៍នោះ គ្រូបង្រៀននោះមានឈ្មោះថា Kritchtha ដែលមិនត្រូវបានប្រាប់ឈ្មោះត្រកូល បានសារភាពប្រាប់ប៉ូលិសអំពីការប្រព្រឹត្តខុសឆ្គង ប៉ុន្តែអះអាងថា លោកមិនប្រាកដថា មានជនរងគ្រោះច្រើនបែបនោះទេ។

ការចាប់ខ្លួននេះបានធ្វើឡើងបន្ទាប់ពីឪពុកម្តាយកូនសិស្សមួយចំនួនត្រូវបានកូនៗរបស់ពួកគេ ប្រាប់ឲ្យដឹងនិងដាក់ពាក្យបណ្តឹងទៅប៉ូលីស៕

ដោយ រ៉ាន់ រើយ

The post សមត្ថកិច្ចថៃចាប់ខ្លួនគ្រូបង្រៀនជុំវិញរឿងអាស្រូវផ្លូវភេទជាមួយសិស្សប្រុសៗជាអនីតិជន appeared first on Kampuchea Thmey Daily.

ប៉ូលិសចាប់ខ្លួនអ្នករត់តុក្នុងភោជនីយដ្ឋានមួយនៅ វៀតណាម ក្រោយរកឃើញបង្កប់សេវាផ្លូវភេទ

សាង ស្រីល័ក្ខ — Sat, 30 Mar 2024 01:24:38 +0000

ប៉ូលិសបានចាប់ខ្លួនអ្នកគ្រប់គ្រងភោជនីយដ្ឋានមួយកន្លែងស្ថិតក្នុងទីក្រុងហូជីមិញ នៃប្រទេសវៀតណាម ពីបទចោទប្រកាន់ថា លួចលាក់អ្នករត់តុរាប់រយនាក់ទុកសម្រាប់បម្រើសេវាផ្លូវភេទដល់ជនបរទេស នេះបើយោងតាមការចុះផ្សាយពីvnexpress កាលពីថ្ងៃទី ២៩ ខែមីនា ឆ្នាំ២០២៤ ។

មនុស្សពីនាក់ដែលជាជនសង្ស័យ ទីមួយមានឈ្មោះថា Tran Thi Truc Ly និងអ្នកទី២ឈ្មោះ Dang Thanh Gioi ជាបុគ្គលិកគ្រប់គ្រងនៃភោជនីយដ្ឋាន Crystal ត្រូវគេរាយការណ៍ថា បានជួលសេវាចំនួន ១០ ពាន់លានដុង (៤០៣,៤០០ដុល្លារ) ក្នុងមួយខែដល់ពួកគេ។

អតិថិជនសំខាន់ៗរបស់ភោជនីយដ្ឋាននៅផ្លូវ Bui Thi Xuan ក្នុងតំបន់១ គឺជាជនបរទេស ដែលភាគច្រើនជាជនជាតិចិន និងកូរ៉េ។ ប៉ូលិសបានឲ្យដឹងថា អ្នកទាំងពីរបានអនុញ្ញាតឲ្យអ្នករត់តុធ្វើការធម្មតា និងទិញថ្នាំឲ្យអតិថិជន។ ប្រសិនបើអតិថិជនចង់បានសេវាផ្លូវភេទ អ្នកបម្រើនឹងនាំពួកគេទៅសណ្ឋាគារក្នុងតម្លៃពី ១ ទៅ ៨ លានដុង។ ភោជនីយដ្ឋាននេះក៏មានអ្នករត់តុសម្តែងការលេងសើច និងផ្តល់សេវាផ្លូវភេទដល់អតិថិជនស្ត្រីផងដែរ។

ដោយឡែក កាលពីថ្ងៃទី ២១ ខែមីនា ប៉ូលិសបានចាប់បុរសជនជាតិកូរ៉េ ៤ នាក់ ដែលរួមភេទនៅសណ្ឋាគារចំនួន ២ ហើយពួកគេបាននិយាយថា ពួកគេបានទៅភោជនីយដ្ឋាន Crystal ដែលពួកគេត្រូវបានគេផ្តល់សេវាកម្មផ្លូវភេទ។ ស្របពេលដែលរបាយការណ៍បញ្ចាក់ទៀតថា ស្ត្រីពីរនាក់ម្នាក់ឈ្មោះ Tran Thu Ngan អាយុ ២៥ ឆ្នាំ និង Phan Thi Cam Vien អាយុ ២៧ ឆ្នាំ ត្រូវបានគេរកឃើញថាមានថ្នាំញៀនមេតំហ្វេតាមីន។

ទោះយ៉ាងណាក៏ដោយ មកដល់ពេលនេះប៉ូលិសបាននិងកំពុងតែបន្តការស៊ើបអង្កេតបន្ថែម ពាក់ព័ន្ធនឹងភោជនីយដ្ឋានCrystal ព្រមទាំងបិទដំណើរការជាបណ្ដោះអាសន្ន ដើម្បីស្រាវជ្រាវរកមេខ្លោងធំនៅពីក្រោយបង្កហេតុ៕

អត្ថបទ៖ សាង ស្រីល័ក្ខ

ចុចអាន៖វៀតណាម ជាប់លេខ៣ មានបុរសរៀបការជាមួយស្រ្តី កូរ៉េខាងត្បូងច្រើនបំផុត

The post ប៉ូលិសចាប់ខ្លួនអ្នករត់តុក្នុងភោជនីយដ្ឋានមួយនៅ វៀតណាម ក្រោយរកឃើញបង្កប់សេវាផ្លូវភេទ appeared first on Kampuchea Thmey Daily.

កម្ពុជា ទទួលជនរងគ្រោះដោយអំពើជួញដូរមនុស្ស និងអាជីវកម្មផ្លូវភេទ ពីប្រទេសនានា ជាង ៣៤០ នាក់

អ៊ិន ពិសី — Mon, 05 Feb 2024 09:17:58 +0000

ឆ្នាំ ២០២៣ កន្លងទៅ កម្ពុជា បានទទួលជនរងគ្រោះ និងងាយរងគ្រោះដោយអំពើជួញដូរមនុស្ស និងអំពើធ្វើអាជីវកម្មផ្លូវភេទ រំលោភបំពានផ្លូវភេទ ប្រមាណជាង ៣៤០ នាក់ ពីប្រទេសនានា និងបានធ្វើមាតុភូមិនិវត្តន៍ជនរងគ្រោះជាង ៦០ នាក់ ត្រឡប់ទៅប្រទេសកំណើតវិញផងដែរ។

ថ្លែងក្នុងពិធីបើកសន្និបាតបូកសរុបលទ្ធផលការងារឆ្នាំ ២០២៣ និងលើកទិសដៅការងារឆ្នាំ ២០២៤ នៅព្រឹកថ្ងៃទី ៥ កុម្ភៈ នេះ លោក ទៀវ សុគន្ធ រដ្ឋលេខាធិការក្រសួងសង្គមកិច្ច អតីតយុទ្ធជន និងយុវនីតិសម្បទា បានមានប្រសាសន៍ថា ឆ្នាំ ២០២៣ មានជនរងគ្រោះ និងងាយរងគ្រោះដោយអំពើជួញដូរមនុស្ស និងអំពើធ្វើអាជីវកម្មផ្លូវភេទ រំលោភបំពានផ្លូវភេទ ចំនួន ៣៤២ នាក់ បានធ្វើមាតុភូមិនិវត្តន៍ពីប្រទេសនានា និងបញ្ជូនទៅស្តារនីតិសម្បទា ហើយជនរងគ្រោះចំនួន ៦៣ នាក់ ត្រូវបានធ្វើមាតុភូមិនិវត្តន៍ទៅប្រទេសកំណើតវិញ។

លោកបានបន្តថា ចំណែកជនរងគ្រោះ និងងាយរងគ្រោះដោយអំពើជួញដូរមនុស្ស និងអំពើធ្វើអាជីវកម្មផ្លូវភេទ រំលោភបំពានផ្លូវភេទ ត្រូវបានបញ្ជូនទៅស្តារនីតិសម្បទាតាមមណ្ឌលអង្គការ សរុបចំនួន ៤៣៦ នាក់ និងធ្វើសមាហរណកម្មទៅកាន់គ្រួសារ និងសហគមន៍ ២៨៣ នាក់ តាមដានបន្តក្រោយសមាហរណកម្មចំនួន ៣០០ នាក់ និងបិទករណីចំនួន ១៥៣ ករណី។

ជាមួយគ្នានេះ សេវាគាំពារជនរងគ្រោះ ត្រូវបានលើកកម្ពស់ និងយកចិត្តទុកដាក់ ដោយបានផ្ដល់ ជំនួយសង្គ្រោះបន្ទាន់ដល់គ្រួសាររងគ្រោះដាច់ស្បៀង ទីទ័លក្រ គ្រោះធម្មជាតិ និងគ្រោះមហន្តរាយ ដោយយថាហេតុនៅតាមសហគមន៍ចំនួន ៣៨ ៤១០ គ្រួសារ។ ជនអនាថាចំនួន ១ ០៨៨ នាក់ បាន ទទួលសេវាពិគ្រោះយោបល់ ដោះស្រាយ ទប់ស្កាត់ និងការពារ ព្រមទាំងបានធ្វើសមាហរណកម្មទៅ គ្រួសារ និងសហគមន៍វិញ ៨០៣ នាក់។ ជនរងគ្រោះ និងរងផលប៉ះពាល់ដោយសារផ្ទុកមេរោគអេដស៍ ជំងឺអេដស៍ និងជំងឺកាចសាហាវផ្សេងៗ នៅតាមសហគមន៍ចំនួន ២១៥ នាក់ ត្រូវបានប្រឹក្សាយោបល់ ថែទាំ និងគាំទ្រ។ មណ្ឌលថែទាំ និងព្យាបាលជនវិបល្លាសស្មារតី បានទទួលជនវិបល្លាសស្មារតីឱ្យស្នាក់នៅ សរុបចំនួន ១២៥ នាក់ បើគិតពីឆ្នាំ ២០២១ មក មានជនវិបល្លាសស្មារតីសរុបចំនួន ២៤០ នាក់ កំពុងស្នាក់នៅ និងសមាហរណកម្មទៅគ្រួសារ និងសហគមន៍វិញចំនួន ២៣ នាក់៕

អត្ថបទ ៖ សំអឿន

The post កម្ពុជា ទទួលជនរងគ្រោះដោយអំពើជួញដូរមនុស្ស និងអាជីវកម្មផ្លូវភេទ ពីប្រទេសនានា ជាង ៣៤០ នាក់ appeared first on Kampuchea Thmey Daily.

បង្រ្កាបហាងកាហ្វេបង្កប់សេវាកម្មផ្លូវភេទ៣ទីតាំង ឃាត់ខ្លួនមនុស្ស១២នាក់

Sokhom Khon — Sat, 23 Sep 2023 05:16:51 +0000

កម្លាំងគណៈបញ្ជាការឯកភាពខណ្ឌដូនពេញ បានចុះរដ្ឋបាលពិនិត្យទីតាំងតាមហាងកាហ្វេ បង្កប់សេវាកម្មផ្លូវភេទ នៅចំណុចម្តុំផែថ្ម ចំនួន៣ទីតាំង ដោយឃាត់ខ្លួនជនសង្ស័យចំនួន១២នាក់ កាលពីថ្ងៃទី២២ ខែកញ្ញា ឆ្នាំ២០២៣។

ទីតាំងទី១ ហាងកាហ្វេ នៅផ្លូវលេខ៨២ ផ្ទះ១ ភូមិ១៤ សង្កាត់ស្រះចក បានឃាត់ខ្លួនជនសង្ស័យ ចំនួន០៥នាក់ (ស្រី៤) ក្នុងនោះ ម្ចាស់ទីតាំង១នាក់ នារីបំរើ ៣នាក់ និងអ្នកទួលសេវាកម្មផ្លូវភេទ១នាក់។

ទីតាំងទី២នៅផ្លូវលេខ៨០ ផ្ទះលេខ២៣E០ ភូមិ១៤ សង្កាត់ស្រះចក ឃាត់ខ្លួនជនសង្ស័យចំនួន២នាក់ ជាអ្នកបំរើសេវាកម្មផ្លូវភេទ។

ទីតាំងទី៣ ផ្ទះលេខ១៣E០ ផ្លូវព្រះស៊ីសុវត្ថិ ភូមិ១៥ សង្កាត់ស្រះចក បានឃាត់ខ្លួនជនសង្ស័យចំនួន៥នាក់ (ស្រី៤) ក្នុងនោះមានអ្នកអនាម័យម្នាក់ អ្នកយាមម៉ូតូម្នាក់ និងនារីបំរើការសេវាកម្មផ្លូវភេទចំនួន៣នាក់។ ក្រោយឆែកឆេកម្លាំងបានរកឃើញវត្ថុតាងមួយចំនួនដែលបម្រើសេវាកម្មផ្លូវភេទ។

បច្ចុប្បន្នជនសង្ស័យ និងវត្ថុតាងយកមកកាន់អធិការដ្ឋាននគរបាលខណ្ឌដូនពេញ ដើម្បីធ្វើការសាកសួរ។ ដោយឡែក នារីបានដែលបំរើការសេវាកម្មផ្លូវភេទចំនួន៩នាក់ ត្រូវបានបញ្ជូនទៅមន្ទីរសង្គមកិច្ចរាជធានីភ្នំពេញ៕

អត្ថបទ៖ សុខា

The post បង្រ្កាបហាងកាហ្វេបង្កប់សេវាកម្មផ្លូវភេទ៣ទីតាំង ឃាត់ខ្លួនមនុស្ស១២នាក់ appeared first on Kampuchea Thmey Daily.

បង្រ្កាបហាងកាហ្វេបង្កប់សេវាកម្មផ្លូវភេទនៅត្រឡោកបែក ឃាត់ខ្លួនម្ចាស់ទីតាំង៤នាក់ និងរំដោះនារីរងគ្រោះ១២នាក់

Sokhom Khon — Tue, 15 Aug 2023 02:48:07 +0000

កម្លាំងនាយកដ្ឋានប្រឆាំងការជួញដូរមនុស្ស និងការពារអនីតិជន នៃអគ្គស្នងការនគរបាលជាតិ បានឆ្មក់បង្រ្កាបទីតាំង ហាងកាហ្វេចំនួន៥កន្លែងជាប់ៗគ្នាដែលបង្កប់សេវាផ្លូវភេទដោយធ្វើការឃាត់ខ្លួនមនុស្សប្រុសស្រីរី៤នាក់ ដែលជាម្ចាស់ ទីតាំង និងរំដោះនារីរងគ្រោះចំនួន១២នាក់។

ប្រតិបត្តិការនេះបានធ្វើឡេីងកាលវេលាម៉ោង៨និង៤០នាទីយប់ ថ្ងៃទី១៤ ខែសីហា ឆ្នាំ២០២៣ នៅចំណុចត្រឡោកបែក តាមបណ្ដោយផ្លូវ៥៩៨ ក្នុងសង្កាត់បឹងកក់ទី២ ខណ្ឌទួលគោក រាជធានីភ្នំពេញ។

ក្នុងរង្វង់ប្រតិបត្តិការនេះ កម្លាំងសមត្ថកិច្ចបានធ្វេីឃាត់ខ្លួនមនុស្សប្រុសស្រីសរុប១៦នាក់ ក្នុងនោះមានម្ចាស់ទីតាំងចំនួន ៤នាក់ (ស្រី៣នាក់) និង១២នាក់ទៀតជានារីរងគ្រោះ រួមទាំងវត្ថុតាងមានស្រោមអនាម័យប្រេីប្រាស់រួចមួយចំនួន និងមិន ទាន់ប្រេីប្រាស់មួយចំនួន។

សមត្ថកិច្ចបានឱ្យដឹងថា មុនកម្លាំងសមត្ថកិច្ចធ្វើការចុះបង្ក្រាបទីតាំងខាងលើ គឺដោយមានការរាយការណ៍ពីបងប្អូនប្រជាពលរដ្ឋថា ហាងកាហ្វេទាំង៥ទីតាំងខាងលើគឺបេីកលក់ទាំងយប់ទាំងថ្ងៃ និងមានបង្កប់សេវាផ្លូវភេទ។ ហេីយកម្លាំងជំនាញ ក៏បានធ្វើការស៊ើបអង្កេតរហូតនៅយប់កេីតហេតុ កម្លាំងនាយកដ្ឋានប្រឆាំងការជួញដូរមនុស្ស និងការពារអនីតិជននៃអគ្គស្នងការនគរបាលជាតិ និងបានសហការជាមួយអជ្ញាធរមូលដ្ឋានបានធ្វេីការចុះបង្ក្រាប ដោយរំដោះបាននារីរងគ្រោះចំនួន ១២នាក់ ព្រមទាំងឃាត់ខ្លួនម្ចាស់ទីតាំងចំនួន៤នាក់ ក្នុងនោះមានស្ត្រីចំនួន៣នាក់។

ក្រោយពេលឃាត់ខ្លួននារីរងគ្រោះទាំង១២នាក់ ត្រូវបានបញ្ជូនទៅមន្ទីរសង្គមកិច្ចចំណែកម្ចាស់ទីតាំងរួមទាំងវត្ថុតាងត្រូវ បានបញ្ជូនទៅនាយកដ្ឋានប្រឆាំងការជួញដូរមនុស្ស និងការពារអនីតិជននៃអគ្គស្នងការនគរបាលជាតិ ដេីម្បីចាត់ការបន្ត តាមនិតិវិធី រីឯទីតាំងហាងកាហ្វេទាំងប្រាំទីតាំងត្រូវបានបិទជាបណ្ដោះអាសន្ន៕