ជួសជុល Archives - Kampuchea Thmey Daily

ក្រុមបច្ចេកទេសជំនាញ ជួសជុលប្រព័ន្ធលូបាក់ស្រុតចូលទន្លេនៅសង្កាត់ច្បារអំពៅទី ២ ឲ្យរឹងមាំជាងមុន

អ៊ិន ពិសី — Tue, 05 May 2026 07:04:04 +0000

ព្រឹកមិញ ក្រុមបច្ចេកទេសជំនាញ ជួសជុលប្រព័ន្ធលូដែលបាក់ស្រុតចូលច្រាំងទន្លេបាសាក់ នៅសង្កាត់ច្បារអំពៅទី ២ ឲ្យរឹងមាំជាងមុន។

លោក យ៉ិន វុធ ចៅសង្កាត់ច្បារអំពៅទី ២ បានឲ្យដឹងថា កាលពីព្រឹកថ្ងៃទី ៥ ខែឧសភា ឆ្នាំ ២០២៦ នេះ លោកបានចុះទៅពិនិត្យមើលការដ្ឋានជីកដាក់ប្រពន្ធ័លូដែលបានបាក់ស្រុតចូលទន្លេបាសាក់ កាលពីចុងខែមេសា កន្លងទៅ ដើម្បីបានរឹងមាំជាងមុន។

លោកចៅសង្កាត់ បន្តថា លូដែលបាក់ស្រុតចូលទន្លេបាសាក់នេះ ស្ថិតនៅភូមិដើមចាន់ ១ សង្កាត់ច្បារអំពៅទី ២ ខណ្ឌច្បារអំពៅ រាជធានីភ្នំពេញ។ ចំពោះប្រព័ន្ធលូនេះ មានទំហំមុខកាត់ ១ ម៉ែត្រ តភ្ជាប់ពីផ្ទះពលរដ្ឋក្នុងភូមិចូលទៅមុខលូធំ (ផ្លូវ ៣៦៩) ឆ្ពោះទៅលូធំ។

ជាមួយនេះ ខណៈពេលចុះទៅពិនិត្យការដ្ឋានជួសជុលប្រព័ន្ធលូរងការបាក់ស្រុតកន្លងទៅ ប្រជាពលរដ្ឋបានសំណូមពរដល់លោកចៅសង្កាត់ សូមឲ្យក្រុមកម្មករធ្វើយ៉ាងណាឲ្យការជួសជុលមានប្រសិទ្ធភាព ចៀសវាងជួសជុលដដែលៗ ពិសេសខាតបង់ថវិការដ្ឋ៕
អត្ថបទ ៖ នរា

The post ក្រុមបច្ចេកទេសជំនាញ ជួសជុលប្រព័ន្ធលូបាក់ស្រុតចូលទន្លេនៅសង្កាត់ច្បារអំពៅទី ២ ឲ្យរឹងមាំជាងមុន appeared first on Kampuchea Thmey Daily.

មន្ត្រីជំនាញ ជួសជុលកំណាត់ផ្លូវ ២៧១ មានជង្ហុកធំ តែងបង្កគ្រោះថ្នាក់ដល់ពលរដ្ឋធ្វើដំណើរ

អ៊ិន ពិសី — Mon, 20 Oct 2025 08:03:48 +0000

កំណាត់ផ្លូវ ២៧១ ដែលរងការខូចខាតរយៈពេលយូរ កំពុងត្រូវបានមន្ត្រីជំនាញជួសជុលអ៊ុតកៅស៊ូឡើងវិញជូនប្រជាពលរដ្ឋ ដើម្បីកាត់បន្ថយការលំបាក និងងាយស្រួលធ្វើដំណើរ។

ជាក់ស្ដែងបណ្ដោយចំណុចផ្លូវ ២៧១ ខូចខាតប្រវែង ៥០ ម៉ែត្រ នេះ ស្ថិតនៅក្បែរស្តុបបឹងទំនប់ រហូតទៅជិតដល់កែងផ្លូវ ជីបម៉ុង សង្កាត់ចាក់អង្រែលើ ខណ្ឌមានជ័យ រាជធានីភ្នំពេញ។

កញ្ញា ឈៀន បានឲ្យដឹងថា ផ្លូវជង្ហុកនេះខូចខាតរាងយូរគួរសមដែរ ហើយចំណុចនេះមានចរាចរណ៍មមាញឹក ឆ្លងកាត់ទៅមកច្រើន ដែលបង្កការលំបាករាល់ពេលធ្វើដំណើរឆ្លងកាត់។

កញ្ញា បានបន្តថា គាត់តែងឧស្សាហ៍ឃើញមានពលរដ្ឋអ្នកបើកម៉ូតូឆ្លងកាត់ តែងតែជិះធ្លាក់ចូលជង្ហុកនេះម្តងៗ ដោយខ្លះដួល ឯខ្លះទៀត ស្ទើរតែដួលទៅហើយ។ យ៉ាងណា ទោះបីចំណុចនេះមានការខូចត្រឹម ៥០ ម៉ែត្រ ក៏ពិតមែន ប៉ុន្តែមានជង្ហុករាងជ្រៅ ដែលជាហេតុប៉ះពាល់ដល់ការធ្វើដំណើររបស់ប្រជាពលរដ្ឋ ជាពិសេសពេលយប់ រួមមានធ្លាក់ភ្លៀង ជង្ហុកនេះបានដក់ទឹក បង្កឲ្យអ្នកឆ្លងកាត់មិនបានចាប់អារម្មណ៍ជិះធ្លាក់ដួលច្រើននាក់ហើយ។

លោក សុន ហៀង ជាពលរដ្ឋអ្នកប្រកបរបរចិញ្ចឹមជីវិតលើផ្លូវខាងលើនេះ បានអរគុណចំពោះការជួសជុលរបស់អាជ្ញាធរ។ លោកថា បន្ទាប់ពីមានការសំណូមពីពលរដ្ឋដែលជួបការលំបាកបញ្ហាផ្លូវខូច អាជ្ញាធរ តែងតែយកចិត្តទុកដាក់ដោះស្រាយបញ្ហាជានិច្ច ទោះបីជារាងយឺតបន្តិចក៏ដោយ។

ពាក់ព័ន្ធបញ្ហានេះ លោក កែវ សាវឿន ចៅសង្កាត់ចាក់អង្រែលើ បានឲ្យកម្ពុជាថ្មីដឹងថា អាជ្ញាធរខណ្ឌមានជ័យ បានចុះជួសជុលផ្លូវរងការខូចខាត ដោយសារទឹកភ្លៀង ព្រោះចំណុចនេះមិនមានលូសម្រាប់បង្ហូរទឹកនោះឡើយ ដែលធ្វើឲ្យពេលធ្លាក់ភ្លៀងមកទឹកដក់លើផ្លូវរហូតឈានដល់កើតមាននូវជង្ហុកបែបនេះ។

លោកចៅសង្កាត់ចាក់អង្រែលើ បន្តថា លោក នឹងជួយសម្រួលផលលំបាករាល់ពេលធ្វើដំណើររបស់ ប្រជាពលរដ្ឋ និងបង្ការការពារកុំឲ្យកើតមាននូវគ្រោះថ្នាក់ណាមួយកើតឡើងបន្តទៀត។ អាជ្ញាធរ នឹងខិតខំប្រឹងជួសជុល ក៏ដូចជារកដំណោះស្រាយជូនប្រជាពលរដ្ឋកុំឲ្យជួបការលំបាកបន្តទៅទៀត៕

អត្ថបទ ៖ រដ្ឋា

The post មន្ត្រីជំនាញ ជួសជុលកំណាត់ផ្លូវ ២៧១ មានជង្ហុកធំ តែងបង្កគ្រោះថ្នាក់ដល់ពលរដ្ឋធ្វើដំណើរ appeared first on Kampuchea Thmey Daily.

ពលរដ្ឋភូមិខ្វា សាទរចំពោះអាជ្ញាធរជួសជុលឈូសឆាយចាក់ថ្មក្រួសបំពេញផ្លូវ ១ ខ្សែ រងការខូចខាត សម្រួលការធ្វើដំណើរ

អ៊ិន ពិសី — Mon, 20 Oct 2025 07:24:45 +0000

ប្រជាពលរដ្ឋរស់នៅភូមិខ្វា សាទរយ៉ាងខ្លាំងចំពោះអាជ្ញាធរខណ្ឌដង្កោ ដែលចុះត្រួតពិនិត្យផ្លូវ ១ ខ្សែ រងការខូចខាត ព្រមទាំងដាក់គ្រឿងចក្រឈូសឆាយ និងចាក់ក្រួស ដើម្បីសម្រួលដល់ការធ្វើដំណើររបស់ពួកគាត់។

នៅថ្ងៃទី ២០ ខែតុលា ឆ្នាំ ២០២៥ នេះ លោកស្រី គីម ញឹប អភិបាល នៃគណៈអភិបាលខណ្ឌដង្កោ និង លោក ប៊ុន ណារុំ អភិបាលរងខណ្ឌដង្កោ ទទួលបន្ទុកសាធារណៈ បានដាក់គ្រឿងចក្រជួសជុលផ្លូវបេតុង ១ ខ្សែ ក្នុងភូមិខ្វា សង្កាត់ដង្កោ ខណ្ឌដង្កោ រាជធានីភ្នំពេញ ក្រោយពេលផ្លូវនេះរងការខូចខាតប្រវែងជាង ៦០០ ម៉ែត្រ។

លោក សាវី ជាប្រជាពលរដ្ឋរស់នៅតំបន់ខាងលើ បានឲ្យដឹងថា ពីមុនកំណាត់ផ្លូវនេះមិនទាន់ខូចខាតច្រើនដល់ថ្នាក់នេះទេ តែចាប់តាំងពីមានការចាក់ដីខាងក្រោយផ្ទះរបស់ពួកគាត់មក ធ្វើឲ្យលែងមានទីតាំងបង្ហូរទឹក ទើបទឹកចាប់ផ្ដើមហូរចូលផ្លូវ រងការខូចខាត។

លោក សាវី បន្តថា កាលពីឆ្នាំកន្លងទៅ រាល់ពេលមានភ្លៀងធ្លាក់ខ្លាំង កំណាត់ផ្លូវមួយខ្សែនេះ គឺ ត្រូវជន់លិច ថែមទាំងហូរចូលពេញផ្ទះប្រជាពលរដ្ឋតែម្ដង។

ចំណែក លោក ចិត្ត ជាប្រជាពលរដ្ឋរស់នៅតំបន់នោះដូចគ្នា ក៏បានសាទរយ៉ាងខ្លាំង ក្រោយឃើញអាជ្ញាធរខណ្ឌបានយកចិត្តទុកដាក់ពីសុខទុក្ខប្រជាពលរដ្ឋ ជាពិសេសនោះគឺផ្លូវសម្រាប់ធ្វើដំណើរប្រចាំថ្ងៃតែម្ដង។ លោកបាននិយាយទាំងសប្បាយចិត្តថា ពីពេលនេះទៅ លែងមានជង្ហុកពិបាកធ្វើដំណើរទៀតហើយ។ លោកថា មិនដូចពីមុន នៅពេលចេញទៅធ្វើការម្ដងៗ តែងតែខ្ទាតទឹកភក់ ឬក៏ធ្លាក់ជង្ហុក ធ្វើឲ្យប្រឡាក់ខោអាវរំខានដល់ការធ្វើដំណើរ។

លោកស្រីអភិបាលខណ្ឌដង្កោ ក៏បានសំណូមពរទៅដល់ប្រជាពលរដ្ឋដែលរស់នៅក្នុងមូលដ្ឋានខណ្ឌ សូមមេត្តាចូលរួមកុំរំលោភលើចំណែកផ្លូវសាធារណៈ និងធ្វើការវេចខ្ចប់សំរាមទុកដាក់ឲ្យបានត្រឹមត្រូវ ជៀសវាងហូរចូលប្រព័ន្ធលូ បង្កជាការជន់លិច៕

អត្ថបទ ៖ ម៉េង

The post ពលរដ្ឋភូមិខ្វា សាទរចំពោះអាជ្ញាធរជួសជុលឈូសឆាយចាក់ថ្មក្រួសបំពេញផ្លូវ ១ ខ្សែ រងការខូចខាត សម្រួលការធ្វើដំណើរ appeared first on Kampuchea Thmey Daily.

រដ្ឋបាលខណ្ឌសែនសុខ ដាក់គ្រឿងចក្រឈូសឆាយជួសជុលផ្លូវជង្ហុក ប្របផ្លូវរថភ្លើង សម្រួលការធ្វើដំណើររបស់ប្រជាពលរដ្ឋ

អ៊ិន ពិសី — Thu, 16 Oct 2025 07:26:14 +0000

ដើម្បីជួយសម្រួលការធ្វើដំណើររបស់ប្រជាពលរដ្ឋនៅភូមិសេប៉េសេ ភូមិបុរី ១០០ ខ្នង ភូមិចុងថ្នល់ខាងលិច សង្កាត់ទឹកថ្លា និងភូមិភ្នំពេញថ្មី សង្កាត់ភ្នំពេញថ្មី ព្រមទាំងអ្នកធ្វើដំណើរឆ្លងកាត់តាមបណ្ដោយផ្លូវប្របផ្លូវរថភ្លើង រដ្ឋបាលខណ្ឌសែនសុខ បានដាក់ឲ្យគ្រឿងចក្រធ្វើការឈូសឆាយ កិនបង្ហាប់ និងជួសជុលសម្រួលតួផ្លូវ ធ្វើឲ្យងាយធ្វើដំណើរជាងមុន និងចំណេញពេលវេលា។

លោក ធាម ច័ន្ទសេរីវុឌ្ឍ ប្រធានការិយាល័យសាធារណការ បានឲ្យដឹងថា ការងារជួសជុលនេះ បានអនុវត្តចាប់ពីចំណុចផ្លូវលេខ ១០១៩ (ភ្នំពេញ–ហាណូយ) រហូតដល់ផ្លូវ ៥៩៨ (ត្រឡោកបែក) ស្ថិតនៅសង្កាត់ទឹកថ្លា ខណ្ឌសែនសុខ មានប្រវែងជាង ១៨០០ ម៉ែត្រ។ គោលបំណងសំខាន់ ដើម្បីកាត់បន្ថយបញ្ហាចរាចរណ៍ ការកកស្ទះ និងបង្កើនសុវត្ថិភាពក្នុងការធ្វើដំណើររបស់ប្រជាពលរដ្ឋ។ ចំពោះការដាក់ចេញគ្រឿងចក្រជួសជុលផ្លូវនេះ គឺជាផ្នែកមួយ នៃយុទ្ធនាការរដ្ឋបាលក្នុងការឆ្លើយតបតាមតម្រូវការជាក់ស្ដែងរបស់ប្រជាពលរដ្ឋ មានភាពងាយស្រួលក្នុងជីវភាពប្រចាំថ្ងៃ។

លោក ហុង វិចិត្រ ពលរដ្ឋរស់នៅភូមិចុងថ្នល់ខាងលិច សង្កាត់ទឹកថ្លា ប្របផ្លូវរថភ្លើង បានអរគុណយ៉ាងជ្រាលជ្រៅចំពោះការយកចិត្តទុកដាក់របស់រដ្ឋបាលខណ្ឌសែនសុខ ដែលដឹកនាំដោយលោក ម៉ូវ ម៉ានិត អភិបាលខណ្ឌ មានវិធានការក្នុងការជួសជុលផ្លូវមួយខ្សែនេះ ដើម្បីបង្កភាពងាយស្រួលដល់ការធ្វើដំណើរ ខណៈផ្លូវសហព័ន្ធរុស្សីកកស្ទះចរាចរណ៍ជារៀងរាល់ថ្ងៃ ហើយផ្លូវនេះជាផ្លូវវាង ចំណេញទាំងពេលវេលាទៀតផង។ លោកថា បន្ទាប់ពីផ្លូវត្រូវបានសម្រួល ការធ្វើដំណើររបស់រថយន្ត និងម៉ូតូ កាន់តែងាយស្រួលជាងមុន។

រដ្ឋបាលខណ្ឌសែនសុខ បានបន្តអំពាវនាវឲ្យប្រជាពលរដ្ឋទាំងអស់ រួមចំណែកថែរក្សាផ្លូវ និងអនាម័យបរិស្ថាន ដើម្បីអភិវឌ្ឍន៍តំបន់កាន់តែស្អាត និងមានរបៀបរៀបរយ៕

អត្ថបទ ៖ សំណាង

The post រដ្ឋបាលខណ្ឌសែនសុខ ដាក់គ្រឿងចក្រឈូសឆាយជួសជុលផ្លូវជង្ហុក ប្របផ្លូវរថភ្លើង សម្រួលការធ្វើដំណើររបស់ប្រជាពលរដ្ឋ appeared first on Kampuchea Thmey Daily.

អាជ្ញាធរសង្កាត់ស្ទឹងមានជ័យទី ១ ជួសជុលភ្លើងបំភ្លឺផ្លូវ ក្រោមស្ពានអាកាសស្ទឹងមានជ័យឡើងវិញ

អ៊ិន ពិសី — Thu, 16 Oct 2025 04:30:59 +0000

ដើម្បីសម្រួលដល់ការធ្វើដំណើររបស់ប្រជាពលរដ្ឋនាពេលយប់ អាជ្ញាធរសង្កាត់ស្ទឹងមានជ័យទី ១ បានធ្វើការជួសជុលភ្លើងបំភ្លឺផ្លូវក្រោមស្ពានអាកាសស្ទឹងមានជ័យឡើងវិញ ខណៈកន្លងមកពិបាកធ្វើដំណើរដោយសារស្ថានភាពងងឹតខ្លាំង។

ទីតាំងដែលអាជ្ញាធរបានធ្វើការជួសជុលភ្លើងឡើងវិញនេះ ស្ថិតនៅចំណុចក្រោមស្ពានអាកាសស្ទឹងមានជ័យ សង្កាត់ស្ទឹងមានជ័យទី ១ ខណ្ឌមានជ័យ រាជធានីភ្នំពេញ។

លោក តាំង គីម ជាប្រជាពលរដ្ឋ បានឲ្យដឹងថា នៅត្រង់ចំណុចក្រោមស្ពានអាកាសស្ទឹងមានជ័យ នេះ តែងតែមានអ្នកដំណើរគ្រោះថ្នាក់ ដោយសារតែងងឹតមើលមិនឃើញឧបសគ្គខាងមុខ ហើយផ្លូវកោងទៀតផង។

លោក តាំង គីម បន្តថា នៅពេលឃើញមានអាជ្ញាធរមូលដ្ឋានយកចិត្តទុកដាក់ក្នុងការជួសជុលភ្លើងបំភ្លឺផ្លូវនេះឡើងវិញ លោកសប្បាយចិត្តណាស់ ដើម្បីបញ្ចៀសគ្រោះថ្នាក់ដល់អ្នកធ្វើដំណើរ ជាពិសេសនៅពេលយប់តែម្ដង។

លោក ជា សារ៉េត ចៅសង្កាត់ស្ទឹងមានជ័យ បានបញ្ជាក់ឲ្យកម្ពុជាថ្មីដឹងថា ទីតាំងខាងលើនេះ កន្លងមកមានភ្លើងបំភ្លឺហើយ ប៉ុន្តែដោយសារដាច់ប្រព័ន្ធភ្លើង ទើបធ្វើឲ្យងងឹត ដូច្នេះ ដើម្បីសម្រួលដល់ការធ្វើដំណើរ លោកបានចាត់ក្រុមការងារចុះពិនិត្យជួសជុលឡើងវិញ៕

អត្ថបទ ៖ ម៉េង

The post អាជ្ញាធរសង្កាត់ស្ទឹងមានជ័យទី ១ ជួសជុលភ្លើងបំភ្លឺផ្លូវ ក្រោមស្ពានអាកាសស្ទឹងមានជ័យឡើងវិញ appeared first on Kampuchea Thmey Daily.

អាជ្ញាធរខណ្ឌទួលគោក ជួសជុលជង្ហុកសំបុកមាន់ដ៏ធំនៅលើផ្លូវ ៦០៨

អ៊ិន ពិសី — Wed, 08 Oct 2025 07:19:21 +0000

ជង្ហុកសំបុកមាន់នៅលើកំណាត់ផ្លូវ ៦០៨ ដែលមានទឹកដក់ តែងតែបង្កគ្រោះថ្នាក់ដល់អ្នកធ្វើដំណើរឆ្លងកាត់ ជាពិសេសនៅពេលយប់មើលមិនឃើញជង្ហុក បណ្ដាលឲ្យដួល ពេលនេះ អាជ្ញាធរខណ្ឌទួលគោក បានធ្វើការជួសជុលហើយ។

ជាក់ស្ដែង លោក ជា ពិសី អភិបាល នៃគណៈអភិបាលខណ្ឌទួលគោក បានដឹកនាំមន្ត្រីការិយាល័យសាធារណការ ដឹកជញ្ជូន អនាម័យ បរិស្ថាន និងសណ្ដាប់ធ្នាប់សាធារណៈខណ្ឌទួលគោក ចុះពិនិត្យ និងជួសជុលជង្ហុកសំបុកមាន់ដ៏ធំ ស្ថិតនៅផ្លូវលេខ ៦០៨ ក្នុងភូមិសាស្ត្រសង្កាត់បឹងកក់ទី ២ ខណ្ឌទួលគោក ដើម្បីកាត់បន្ថយការកកស្ទះចរាចរណ៍ និងបង្ការគ្រោះថ្នាក់ជាយថាហេតុជូនប្រជាពលរដ្ឋដែលប្រើប្រាស់ផ្លូវនេះ ហើយទីតាំងជង្ហុកសំបុកមាន់ដ៏ធំកំពុងចុះជួសជុលជង្ហុកសំបុកមាន់នេះ មានទំហំ ២ ម៉ែត្រ គុណនឹង ១០ ម៉ែត្រ។

គួររំលឹកផងដែរថា បើតាម លោក វណ្ណា ជាប្រជាពលរដ្ឋរស់នៅលើកំណាត់ផ្លូវខាងលើបានលើកឡើងថា ជង្ហុកទាំងនេះ ដំបូងឡើយមានបន្តិចបន្តួចនោះទេ តែដោយសារអាជ្ញាធរមិនជួសជុល ទុកឲ្យជង្ហុកទាំងនោះទៅជាធំទៅៗ ពេលខ្លះម្ចាស់ផ្ទះបានយកកម្ទេចថ្មមកចាក់បំពេញជង្ហុក ជៀសវាងមានអ្នកធ្វើដំណើរជិះធ្លាក់ជង្ហុកគ្រោះថ្នាក់ជាយថាហេតុ។

ជាចុងក្រោយ អាជ្ញាធរខណ្ឌទួលគោក ក៏បានសំណូមពរទៅដល់ប្រជាពលរដ្ឋរស់នៅក្នុងមូលដ្ឋាន មិនត្រូវបោះចោលសំរាមគ្មានសណ្ដាប់ធ្នាប់នៅតាមទីសាធារណៈនោះទេ ត្រូវវេចខ្ចប់កាកសំណល់សំរាមឲ្យបានល្អ និងនាំយកទៅទុកដាក់ឲ្យបានត្រឹមត្រូវ ជៀសវាងពេលមានភ្លៀងមកម្ដងៗ អាចហូរកាកសំណល់ទាំងអស់នេះចូលតាមប្រព័ន្ធលូ បង្កការជន់លិចដោយសារតែលំហូរទឹកហូរមិនទាន់៕

អត្ថបទ ៖ ម៉េង

The post អាជ្ញាធរខណ្ឌទួលគោក ជួសជុលជង្ហុកសំបុកមាន់ដ៏ធំនៅលើផ្លូវ ៦០៨ appeared first on Kampuchea Thmey Daily.

ផ្លូវតុលាការខេត្តសៀមរាបខូចខាតច្រើនឆ្នាំ បានជួសជុលឡើងវិញ សម្រួលការធ្វើដំណើររបស់ពលរដ្ឋ

អ៊ិន ពិសី — Fri, 12 Sep 2025 07:37:56 +0000

ផ្លូវតុលាការប្រវែងជិត ៣ គីឡូម៉ែត្រ ចេញពីផ្លូវបេតុង សម្តេច ជា ស៊ីម ទៅដល់មុខ ប៉ុស្តិ៍សង្កាត់ជ្រាវ ស្ថិតក្នុងសង្កាត់ជ្រាវ ក្រុងសៀមរាប ដែលរងការខូចខាតជាច្រើនឆ្នាំមកហើយនោះ ត្រូវបានជួសជុលឡើងវិញ កាលពីព្រឹកថ្ងៃទី ១១ ខែកញ្ញា ឆ្នាំ ២០២៥ ដើម្បីសម្រួលដល់ការធ្វើដំណើររបស់ប្រជាពលរដ្ឋ សិស្សានុសិស្ស ក៏ដូចជាមន្ត្រីរាជការ។

ប្រជាពលរដ្ឋ និងអ្នកធ្វើដំណើរលើផ្លូវ ១ ខ្សែនេះ បានបង្ហាញនូវការរីករាយ និងក្តីអំណរយ៉ាងខ្លាំង ចំពោះការចូលមកជួយដោះស្រាយបញ្ហាផ្លូវ ១ ខ្សែនេះ របស់អាជ្ញាធរ និងមន្ត្រីពាក់ព័ន្ធ ជាពិសេសអ្នកឧកញ៉ា សៀង ណាំ ដែលបានជួយជួសជុលធ្វើឲ្យស្ថានភាពធ្វើដំណើរទៅមកកាន់តែងាយស្រួល។

ការជួសជុលផ្លូវនេះ គឺជាផ្នែកមួយ នៃយុទ្ធសាស្ត្រអភិវឌ្ឍន៍ហេដ្ឋារចនាសម្ព័ន្ធក្នុងខេត្ត ដែលមានគោលបំណងធ្វើឲ្យប្រជាពលរដ្ឋមានជីវភាពប្រសើរ ជួយកាត់បន្ថយការលំបាកប្រចាំថ្ងៃ ថែមទាំងអាចជួយលើកកម្ពស់សេដ្ឋកិច្ចក្នុងតំបន់ទៀតផង។

គួរបញ្ជាក់ថា ផ្លូវតុលាការ ១ ខ្សែនេះ ខាងអាជ្ញាធរខេត្តសៀមរាប បានចេញសេចក្ដីប្រកាសព័ត៌មានស្ដីពីការជួសជុលផ្លូវដែលខូចទៅជាផ្លូវចាក់បេតុង នៅក្នុងឆ្នាំ ២០២៦ ឆាប់ៗ នេះ ផងដែរ ប៉ុន្តែគម្រោងមិនទាន់ធ្លាក់មក ទើប អ្នកឧកញ៉ា សៀង ណាំ ជួសជុលឲ្យពលរដ្ឋប្រើប្រាស់បណ្ដោះអាសន្នសិន៕

អត្ថបទ ៖ ជុន កុសល

The post ផ្លូវតុលាការខេត្តសៀមរាបខូចខាតច្រើនឆ្នាំ បានជួសជុលឡើងវិញ សម្រួលការធ្វើដំណើររបស់ពលរដ្ឋ appeared first on Kampuchea Thmey Daily.

ផ្លូវព្រះត្រសក់ផ្អែម ប្រវែងជិត ៤ គីឡូម៉ែត្រ ប្រសព្វឆ្លងកាត់ខណ្ឌចំនួន ៣ ជួសជុលអ៊ុតកៅស៊ូឡើងវិញ

អ៊ិន ពិសី — Sat, 06 Sep 2025 03:31:35 +0000

មន្ទីរសាធារណការរាជធានីភ្នំពេញ បានចុះជួសជុលអ៊ុតកៅស៊ូ តាមបណ្ដោយផ្លូវលេខ ៦៣ (ព្រះត្រសក់ផ្អែម) ឡើងវិញ ដែលមានជង្ហុក និង រលកតូចៗ ជាច្រើន ដើម្បីសម្រួលដល់ប្រជាពលរដ្ឋទាំងការធ្វើដំណើរ និង រស់នៅ។

ជាក់ស្ដែងនៅតាមបណ្ដោយផ្លូវលេខ ៦៣ (ព្រះត្រសក់ផ្អែម) ត្រូវបានជួសជុលឡើងវិញ ពីចំណុចជិតផ្សារថ្មី រហូតទៅដល់ សាលាភូមិន្ទរដ្ឋបាល មានប្រវែងប្រមាណជិត ៤ គីឡូម៉ែត្រ។

លោក ហេង យី ជាប្រជាពលរដ្ឋរស់នៅលើផ្លូវ ៦៣ បានប្រាប់ឲ្យដឹងថា កន្លងមក តាមបណ្ដោយផ្លូវនេះ មានជង្ហុកសំបុកមាន់តូចៗ លាយឡំរលកជាច្រើនកន្លែង ដែលនៅពេលមានអ្នកបើកបរឆ្លងកាត់ ពិបាកតែម្ដង។

លោកបន្តថា នៅពេលភ្លៀងធ្លាក់មក ជង្ហុកទាំងអស់នោះ បានដក់ទឹក ហើយពេលមានអ្នកដំណើរបើកយានយន្ត គឺធ្វើឲ្យទឹកសាចប្រឡាក់ខោអាវ និង ចូលផ្ទះពួកគាត់ថែមទៀត។

ចំណែក អ្នកស្រី ជា ចាន់ណេត ពលរដ្ឋអ្នកធ្វើដំណើរ ក៏បានលើកឡើងដែរថា ពួកគាត់សូមកោតសរសើរ និងសាទរចំពោះអាជ្ញាធរ នៅពេលបានយកចិត្តទុកដាក់ពីសុខទុក្ខប្រជាពលរដ្ឋលើការជួសជុលបណ្ដោយផ្លូវលេខ ៦៣ នេះឡើងវិញ ឲ្យមានសោភ័ណភាពស្អាត និង ងាយស្រួលបើកបរទៅមកបានយ៉ាងងាយស្រួល មិនពិបាករឿងផ្លូវខូចតទៅមុខទៀតនោះឡើយ។

ដោយឡែក លោកស្រី ដោ សម្ផស្ស នាយិកាទីចាត់ការរដ្ឋបាល និងជាអ្នកនាំពាក្យរបស់រដ្ឋបាលរាជធានីភ្នំពេញ ក៏បានបញ្ជាក់ឲ្យដឹងថា មន្ត្រីជំនាញ នៃមន្ទីរសាធារណការរាជធានីភ្នំពេញ បានធ្វើការជួសជុល កាយកំណាយផ្លូវចាស់ចោល រួចអ៊ុតកៅស៊ូថ្មីឡើងវិញទាំងអស់។

លោកស្រីបន្តទៀតថា ចំពោះការជួសជុលនេះដែរ ធ្វើចាប់ចំណុចជិតផ្សារថ្មី រហូតទៅដល់ សាលាភូមិន្ទរដ្ឋបាល មានប្រវែងប្រមាណជិត ៤ គីឡូម៉ែត្រ ដែលប្រសព្វឆ្លងកាត់ខណ្ឌដូនពេញ , ខណ្ឌបឹងកេងកង និង ខណ្ឌចំការមន ដើម្បីសម្រួលការលំបាកជូនពលរដ្ឋ៕

អត្ថបទ ៖ រដ្ឋា

The post ផ្លូវព្រះត្រសក់ផ្អែម ប្រវែងជិត ៤ គីឡូម៉ែត្រ ប្រសព្វឆ្លងកាត់ខណ្ឌចំនួន ៣ ជួសជុលអ៊ុតកៅស៊ូឡើងវិញ appeared first on Kampuchea Thmey Daily.