នេះបើតាមលោក ងី មានហេង ប្រធានមន្ទីរសុខាភិបាលរាជធានីភ្នំពេញ ថ្លែងក្នុងកិច្ចប្រជុំសាមញ្ញលើកទី២៤ របស់ក្រុមប្រឹក្សារាជធានីភ្នំពេញ អាណត្តិទី៤ ក្រោមវត្តមានលោក ម៉ប់ សារិន និងលោក ឯក ឃុនដឿន អភិបាលរង តំណាងលោក ឃួង ស្រេង អភិបាលរាជធានីភ្នំពេញ នាព្រឹកថ្ងៃទី១៣ ខែឧសភា ឆ្នាំ២០២៦ នៅសាលារាជធានីភ្នំពេញ។

យ៉ាងណាមិញ ដើម្បីទប់ស្កាត់ការរីករាលដាលជំងឺគ្រុនឈាមនេះដែរ លោក ងី មានហេង ក៏បានណែនាំសហគមន៍ ភូមិ រដ្ឋបាលសង្កាត់ និងខណ្ឌ ត្រូវសហការជាមួយមន្ត្រីសុខាភិបាល អនុវត្តវិធានការសំខាន់ៗឱ្យបានជាប្រចាំ។

វិធានការសំខាន់ទាំងនោះ រួមមាន ការលុបបំបាត់ជម្រកមូសខ្លា តាមរយៈការសម្អាតបរិស្ថាន និងបំបាត់ទឹកដក់នៅតាមផ្ទះ និងសហគមន៍ យ៉ាងតិច២ដងក្នុងមួយឆ្នាំ ពោលគឺនៅខែឧសភា និងខែសីហា។ ជាមួយគ្នានេះ អាជ្ញាធរ និងមន្ត្រីជំនាញ ក៏នឹងចុះបាញ់ថ្នាំសម្លាប់មូសនៅតាមភូមិ ដែលមានករណីអ្នកកើតជំងឺគ្រុនឈាមលើសពី២នាក់ក្នុងមួយសប្តាហ៍ផងដែរ។

ជាមួយគ្នានេះ មន្ត្រីសុខាភិបាល ក៏បានអំពាវនាវដល់ប្រជាពលរដ្ឋ បន្តយកចិត្តទុកដាក់សម្អាតបរិស្ថានជុំវិញផ្ទះ និងចូលរួមអនុវត្តវិធានការបង្ការជំងឺគ្រុនឈាម ដើម្បីកាត់បន្ថយហានិភ័យនៃការចម្លងជំងឺនៅក្នុងសហគមន៍៕ អត្ថបទ ៖ ស្រីរ័ត្ន

The post ត្រឹម៤ខែ ដើមឆ្នាំ២០២៦ រាជធានីភ្នំពេញ មានអ្នកកើតជំងឺគ្រុនឈាម ជិត ២ពាន់ករណី appeared first on Kampuchea Thmey Daily.

លោកវិជ្ជបណ្ឌិត ងី មានហេង ប្រធានមន្ទីរសុខាភិបាលរាជធានីភ្នំពេញឱ្យដឹងថា អនុវត្តតាមការចង្អុលបង្ហាញពីលោក ឃួង ស្រេង អភិបាលនៃគណៈអភិបាលរាជធានីភ្នំពេញ ដែលមានការយកចិត្តទុកដាក់ និងគិតគូរបញ្ហាសុខភាពសាធារណៈរបស់ប្រជាពលរដ្ឋរស់នៅក្នុងមូលដ្ឋានរាជធានីភ្នំពេញ នាថ្ងៃសៅរ៌ ទី៤ ខែមេសា ឆ្នាំ២០២៦ យុទ្ធនាការបាញ់សម្លាប់មូសខ្លា ក្នុងមូលដ្ឋាននៅរាជធានីភ្នំពេញ ដោយក្រុមការងាររបស់រដ្ឋបាលរាជធានីភ្នំពេញ សហការជាមួយក្រុមការងារកងពលតូច លេខ៧០«ង៧០»បានចុះធ្វើសកម្មភាពបាញ់ថ្នាំសម្លាប់មូសទាំងថ្ងៃ ទាំងយប់នៅក្នុងមូលដ្ឋានខណ្ឌទាំង១៤ សង្កាត់ទាំង១០៥ និងតាមសហគមន៍នានាទូទាំងរាជធានីភ្នំពេញ។

គួរបញ្ជាក់ថា កន្លងមក លោក ឃួង ស្រេង អភិបាលរាជធានីភ្នំពេញបានណែនាំដល់ក្រុមការងារបាញ់ថ្នាំសម្លាប់​មូស​ឱ្យយកចិត្តទុកដាក់បាញ់តាមលំនៅដ្ឋានប្រជាពលរដ្ឋពិសេសនៅតាមប្រឡាយ លូ បានកើតមូសយ៉ាងច្រើន បង្កអោយមានហានិភ័យចំពោះសុខមាលភាពប្រជាពលរដ្ឋ។

ប្រជាពលរដ្ឋនៅក្នុងមូលដ្ឋានខណ្ឌទាំង១៤បានសម្តែងនូវទឹកចិត្តរីករាយយ៉ាងក្រៃលែង និងអរគុណចំពោះ លោកអភិបាលរាជធានីភ្នំពេញដែលបានចាត់ចែងក្រុមគ្រូពេទ្យនៃកងកម្លាំងអង្គភាព៧១១ កងពលតូចលេខ៧០ និងមន្ទីរសុខាភិបាលរាជធានី ឱ្យចុះបាញ់ថ្នាំមូសក្នុងភូមិឋានរបស់ពួកគាត់ ដើម្បីទប់ស្កាត់ជំងឺគ្រុនឈាម ដែលនេះបង្ហាញឱ្យឃើញពីកាគិតគូរពីសុខមាលភាពសាធារណៈរបស់បងប្អូនប្រជាពលរដ្ឋ។

លោក ងី មានហេង ក៏បានអំពាវនាវអោយប្រជាពលរដ្ឋរស់នៅរាជធានីភ្នំពេញ ចូលរួមលុបបំបាត់ជម្រកមូសខ្លា។ ទឹកដក់ថ្លាជាជម្រកមូសខ្លា (ទឹកដក់នៅក្នុងសំបកកង់ឡាន កង់ម៉ូតូ សំបកកំប៉ុង ដប វត្ថុដក់ទឹកភ្លៀងជាជម្រកមូសខ្លា)។ យើងរួមគ្នាលុបបំបាត់ជម្រកមូសខ្លា នៅក្នុងសហគមន៍របស់យើង ដើម្បីរួមចំណែកទប់ស្កាត់ការចម្លងជំងឺគ្រុនឈាម។

លោកប្រធានមន្ទីរបញ្ជាក់ទៀតថា មូសខ្លាជាភ្នាក់ងារចំលងជំងឺគ្រុនឈាម រីឯមូសអង្កាមមិនមែនជាភ្នាក់ងារចម្លងជំងឺគ្រុនឈាមទេ។ ការទុកដាក់សំបកកង់ឡាន កង់ម៉ូតូហាលភ្លៀងនៅក្នុងសហគមន៍ គឹជាការបង្កើតជម្រកមូសខ្លាក្រោយពេលភ្លៀងធ្លាក់។ មូសខ្លាមិនពងដាក់ក្នុងទឹកស្អុយ លូ និងទឹកល្អក់ទេ។ មូសខ្លាពងដាក់ក្នុងទឹកដក់ថ្លា គ្មានក្លិនស្អុយ ទឹកក្នុងថូផ្កា ទឹកក្នុងទម្រជើងទូចាន ទឹកដក់នៅក្នុងចានស្នោ និងកែវជ័រដែលចោលហាលភ្លៀង ទឹកដក់លើថង់ប្លាស្ទិកចោលហាលភ្លៀង៕

អត្ថបទ៖ ស្រីរ័ត្ន

The post រដ្ឋបាលរាជធានី សហការជាមួយកម្លាំងកងពលតូចលេខ៧០ បើកយុទ្ធនាការបាញ់ថ្នាំសម្លាប់មូសខ្លា ក្នុងមូលដ្ឋានខណ្ឌទាំង១៤ appeared first on Kampuchea Thmey Daily.

លោកស្រី ដោ សម្ផស្ស នាយិកា​រង ​និង​ជា​អ្នកនាំពាក្យ​រដ្ឋបាល​រាជធានី​ភ្នំពេញ​ បាន​លើក​ឡើង​ថា ប៉ុន្មាន​ថ្ងៃនេះ មាន​ការ​លើកឡើង​អំពី​បញ្ហា​កំណើន​មូស​ក្នុង​សហគមន៍។ ក្នុងនាម រដ្ឋបាល​រាជធានី លោកស្រី សូម​ជម្រាប​ជូន​សាធារណជន​ជ្រាប​ថា ទោះបីជា​ឆ្នាំនេះ រដ្ឋបាល​រាជធានី​ភ្នំពេញ មិនបាន​ធ្វើ​ពិធី​បើក​យុទ្ធនាការ​ទ្រង់ទ្រាយ​ធំ​ និង​ផ្សព្វផ្សាយ​ជា​សាធារណៈ​ជូន​ប្រជាពលរដ្ឋ​ជ្រាប ប៉ុន្តែ លោក ឃួង ស្រេង អភិបាល នៃ​គណៈ​អភិបាល​រាជធានី​ភ្នំពេញ រដ្ឋបាល​ខណ្ឌ-សង្កាត់ និង​មន្ទីរ​ជំនាញ មិន​ដែល​ធ្វេសប្រហែស​លើ​បញ្ហា​ការពារ​សុខុមាលភាព​ពលរដ្ឋ​ក្នុង​មូលដ្ឋាន​នោះ​ទេ។

លោកស្រី ដោ សម្ផស្ស បាន​បន្ត​ថា រដ្ឋបាល​រាជធានី​ភ្នំពេញ មិន​បាន​ផ្សព្វផ្សាយ​ទូលំទូលាយ ប៉ុន្តែ​ក្រុមការងារ​របស់​រដ្ឋបាល​ខណ្ឌ និង​មន្ទីរ​សុខាភិបាល នៃ​រដ្ឋបាល​រាជធានី​ភ្នំពេញ កំពុង​មមាញឹក​ចុះ​ធ្វើ​សកម្មភាព​បាញ់ថ្នាំ​មូស​ជាប់​ជាប្រចាំ​នៅ​តាម​ភូមិ សហគមន៍ សាលារៀន មន្ទីរពេទ្យ​ វត្ត​អារាម​ និង​តំបន់​នានា​ ជា​រៀងរាល់​ល្ងាច។ ក្រុមការងារ នឹង​បន្ត​ចុះ​បាញ់ថ្នាំ​មូស​នៅ​តាម​មូលដ្ឋាន​ជា​បន្ត​បន្ទាប់​ទូទាំង​រាជធានី​ភ្នំពេញ​ទាំងមូល។ សុខុមាលភាព​របស់​ប្រជាជន ការងារ​សណ្ដាប់ធ្នាប់ ការងារ​បង្ក្រាប​បទល្មើស​ផ្សេងៗ ការងារ​ការពារ​សន្តិសុខ​សាធារណៈ និង​កិច្ចការ​ស្នូល​ជាច្រើន​ទៀត​ផ្សេងៗ គឺជា​ភារកិច្ច​ប្រចាំថ្ងៃ​របស់​អាជ្ញាធរ​មូលដ្ឋាន​ដោយ​មិន​គិត​ថ្ងៃ​យប់​ឡើយ។

លោកស្រី ក៏បាន​សំណូមពរ​ដល់​ប្រជាពលរដ្ឋ សូម​ចូលរួម​លុបបំបាត់​ជម្រក​មូស​ខ្លា ប្រមាណ ១៥០ ម៉ែត្រ ជុំវិញ​លំនៅឋាន ដើម្បី​ចូលរួម​ទប់ស្កាត់​ការ​ចម្លង​ជំងឺគ្រុនឈាម។ «គ្មាន​ជម្រក​មូស​ខ្លា​ គ្មាន​ការ​ចម្លង​ជំងឺគ្រុនឈាម។ កូនចៅ​យើង នឹង​ចៀស​ផុត​ពី​ជំងឺគ្រុនឈាម បើ​យើង​លុបបំបាត់​ជម្រក​មូស​ខ្លា​អស់​ពី​សហគមន៍»៕

អត្ថបទ ៖ ស្រីរ័ត្ន

The post រដ្ឋបាលរាជធានី សំណូមពរពលរដ្ឋចូលរួមលុបបំបាត់ជម្រកមូសខ្លា ប្រមាណ ១៥០ ម៉ែត្រ ជុំវិញលំនៅឋាន appeared first on Kampuchea Thmey Daily.

បើតាមលោក ឡូ វាសនាគិរី ក្រៅពីជំងឺគ្រុនឈាម មានអ្នកជំងឺអេដស៍ដែលកំពុងព្យាបាលដោយឱសថប្រឆាំងមេរោគអេដស៍កើនឡើងពី ៦៦ ៩៩៤នាក់ ដល់៧១ ៦៩៧នាក់ ឬកើនឡើង ២,៤៣ភាគរយ ធៀបនឹងឆ្នាំ២០២៤ អ្នកជំងឺ ៦៩៧នាក់ ក្នុងនោះមនុស្សពេញវ័យ ៦៨៨នាក់ និងកុមារ ៩នាក់ ត្រូវាយការថាស្លាប់។ រីឯអត្រាជោគជ័យនៃការព្យាបាលជំងឺរបេងនៅរក្សាបានខ្ពស់ រហូតដល់ ៩៦%។ ចំណែក គោលដៅជាតិលុបបំបាត់ជំងឺគ្រុនចាញ់នៅឆ្នាំ២០២៥ ត្រូវបានសម្រេច ដោយសារគ្មានករណីឆ្លងថ្មីនៅក្នុងខែធ្នូ ឆ្នាំ២០២៥ និងគ្មានករណីសស្លាប់តាំងពីឆ្នាំ២០១៨។

ដោយឡែក ករណីថ្មីជំងឺទឹកនោមផ្អែម ដែលបានទៅពិនិត្យ ព្យាបាល នៅមូលដ្ឋានសុខាភិបាលសាធារណៈមានចំនួន ២៩២ ១៩៧ករណី កើនឡើង ២៦,៨% ធៀបនឹងឆ្នាំ២០២៤ អ្នកជំងឺសម្រាកពេទ្យមានចំនួន ១៨ ៤២៩នាក់។ ករណីថ្មីជំងឺលើសសម្ពាធឈាម មានចំនួន ៤៥១ ០០៩ករណី កើនឡើង១២,២០% និងអ្នកសម្រាកព្យាបាលមានចំនួន ៤១ ៤៦៣នាក់ ដោយកើនឡើង១៩,១៧% ធៀបនឹងឆ្នាំ២០២៤។

ការពិនិត្យពិគ្រោះជំងឺបេះដូងសរសៃឈាម មានចំនួន ១៥ ៣២៤កររណី និងអ្នកជំងឺសម្រាកព្យាបាលមានចំនួន ២៥ ៤៨១នាក់ ក្នុងនោះអ្នកជំងឺ ១ ០៩១នាក់ បានបាត់បង់ជីវិត។ លោក ឡូ វាសនាគិរី បានឱ្យដឹងទៀតថា មានអ្នកជំងឺមហារីក ទៅទទួលសេវាព្យាបាលចំនួន ៣៥ ៩២១នាក់ កើនឡើង ១៣,៩% ធៀបនឹងឆ្នាំ២០២៤ ក្នុងនោះអ្នកជំងឺ ១៥៥នាក់ បានបាត់បង់ជីវិត៕

The post ឆ្នាំ២០២៥ មានអ្នកជំងឺគ្រុនឈាមសរុបជាង ៥ម៉ឺនករណី ក្នុងនោះស្លាប់ ៦៤ករណី appeared first on Kampuchea Thmey Daily.

លោក​វេជ្ជបណ្ឌិត ហ៊ុយ រ៉េកុល ប្រធាន​មជ្ឈមណ្ឌល​ជាតិ​ប្រយុទ្ធ​នឹង​ជំងឺគ្រុនចាញ់​ប៉ារ៉ាស៊ីត​សាស្ត្រ និង​បាណក​សាស្ត្រ បាន​មាន​ប្រសាសន៍​នៅ​រសៀល​ថ្ងៃ​ទី ៨ តុលា នេះ​ថា ឆ្នាំ ២០២៥ គឺជា​ឆ្នាំ នៃ​វដ្ត​ជំងឺគ្រុនឈាម​ដែល​បណ្តាល​ឱ្យ​កើតមាន​ជំងឺគ្រុនឈាម​ច្រើន​ដោយ​គិត​ពី​ខែ​មករា​រហូតមកដល់​សប្ដាហ៍​ទី ១ នៃ​ខែ​តុលា ឆ្នាំ ២០២៥ នេះ មាន​ករណី​ជំងឺ​សរុប​ជាង ៤ ម៉ឺន ៤ ពាន់​ករណី និង​ស្លាប់ ៥៥ នាក់។

លោក​វេជ្ជបណ្ឌិត បាន​បន្ត​ថា បច្ចុប្បន្ន ស្ថានភាព​ជំងឺគ្រុនឈាម បាន​និង​កំពុង​ថយ​ចុះ​វិញ​ជា​បន្ត​បន្ទាប់​ជាង ៤០ ករណី ក្នុង​មួយថ្ងៃៗ ចាប់​តាំងពី​ដើម​ខែ​សីហា​រហូតមកដល់​ដើមខែ​តុលា​នេះ។

លោក​វេជ្ជបណ្ឌិត បាន​បន្ត​ទៀត​ថា «បើ​ប្រៀបធៀប​ជាមួយ​សន្ទស្សន៍​ព្យាករណ៍​សម្រាប់​ឆ្នាំ ២០២៥ នេះ គឺ ជំងឺគ្រុនឈាម​អាច​កើតមាន​ប្រមាណ​ជា ជាង ៧ ម៉ឺន ៦ ពាន់​ករណី តែ​ដោយ​ចលនា​បុ​រេ​សកម្ម និង​កិច្ចសហការ​ចូលរួម​ពី​គ្រប់​កម្រិត ព្រមទាំង​សហគមន៍ ក៏ដូចជា​ការ​ជំរុញ​លើកទឹកចិត្ត និង​ចង្អុលបង្ហាញ​ជាប្រចាំ​របស់ ឯកឧត្ដម​សាស្ត្រាចារ្យ​រដ្ឋមន្ត្រី​ក្រសួង​សុខាភិបាល មកដល់ពេលនេះ គឺ​យើង​បាន​បង្ការ​ទប់ស្កាត់​មិន​ឱ្យ​កើតមាន​ជំងឺគ្រុនឈាម​ប្រមាណ​ជា ៤១% ឬ ស្មើនឹង ៨៦ នាក់ ក្នុង​មួយថ្ងៃ ដែល​សរុប​គឺ​បង្ការ​បាន​ជាង ៣ ម៉ឺន​នាក់ មិន​ឱ្យ​កើត​ជំងឺគ្រុនឈាម​»។

លោក​វេជ្ជបណ្ឌិត បាន​បន្ថែម​ថា បើ​ប្រៀបធៀប​ឆ្នាំ ២០២៤ បាន​បង្ហាញ​ថា ឆ្នាំ ២០២៥ នេះ ស្ថានភាព​ជំងឺ​ត្រូវ​បាន​កាត់បន្ថយ​កំពូល​ប្រចាំ​ឆ្នាំ​មក​ត្រឹម​សប្ដាហ៍​ទី ២៩ ឬ​ដើមខែ​សីហា ដែល​ឆ្នាំ ២០២៤ គឺ​កំពូល​នៅ​សប្ដាហ៍​ទី ៣៤ ឬ​ចុងខែ​សីហា ដែល​បញ្ជាក់​យ៉ាង​ច្បាស់​អំពី​សមិទ្ធផល នៃ​ការ​ចូលរួម​បង្ការ និង​គ្រប់គ្រង​ស្ថានភាព​ជំងឺ​មាន​ប្រសិទ្ធភាព​ខ្ពស់​គួរ​ជាទី​មោទនភាព។

លោក​វេជ្ជបណ្ឌិត បន្ថែម​ទៀត​ថា បើ​ទោះបី​ជា​ឆ្នាំ ២០២៥ នេះ ស្ថានភាព​បន្ទុក​ជំងឺគ្រុនឈាម​កំពុង​ធ្លាក់​ចុះ​វិញ​មែន ប៉ុន្តែ​និន្នាការ នៃ​ការ​ថយ​ចុះ​នៅ​មាន​កម្រិត​ទាប ដែល​ទាមទារ​ឱ្យ​គ្រប់គ្នា សហគមន៍ អាជ្ញាធរ​មូលដ្ឋាន ប្រជាពលរដ្ឋ​គ្រប់រូប ត្រូវ​ពង្រឹង​កិច្ច​អន្តរាគមន៍​អនុវត្ត អនាម័យ​បរិស្ថាន លុបបំបាត់​ប្រភព​សម្ភារៈ​ដក់​ទឹក​មិន​ប្រាស់ សំបក​កង់​យានជំនិះ លុបបំបាត់​ដង្កូវទឹក​តាម​គេហដ្ឋាន​រៀងៗ ខ្លួន ជាប្រចាំ និង​ត្រូវ​ស្វែងរក​សេវា​ថែទាំ​សុខភាព​បន្ទាប់ពី​ក្តៅ​ខ្លួន​ខ្លាំង​ភ្លាមៗ មិន​លើស​ពី ២ ថ្ងៃ ពិសេស​ទៅ​ប៉ុស្តិ៍​សុខភាព ឬ មណ្ឌល​សុខភាព ឬ​មន្ទីរពេទ្យ​នៅ​ជិត​បំផុត​មិន​ឱ្យ​យឺត​ពេល។ បើ​យឺត​ពេល​មួយ​ថ្ងៃ ជា​កត្តា​ជំរុញ​ការវិវត្តន៍​ជំងឺ​ធ្ងន់ធ្ងរ​អាច​យាយី​ដល់​អាយុជីវិត។

លោក​វេជ្ជបណ្ឌិត បាន​ឱ្យ​ដឹង​ទៀត​ថា «ចូរ​ចងចាំ​ថា បើ​នៅតែ​បន្ត​មាន​វត្ថុ​ដក់​ទឹក​ពាសវាលពាសកាល បន្ត​មាន​ដង្កូវទឹក គឺ​នៅតែ​បន្ត​កើតមាន​សត្វ​មូស​ខាំ​ជានិច្ច «​ចូរ​រួមគ្នា ធ្វើ​អនាម័យ​បរិស្ថាន​គ្រប់គ្នា ព្រោះ​បញ្ហា​មាន​សត្វ​មូស គឺជា​បញ្ហា និង​កាតព្វកិច្ច​របស់​យើង​គ្រប់គ្នា​ក្នុង​ការ​បង្ការ និង​កម្ចាត់​»។ សូម​អំពាវនាវ​ដល់​អាជ្ញាធរ​មូលដ្ឋាន​ចាត់វិធានការ​ចាំបាច់​លើ​អនាម័យ​បរិស្ថាន គ្មាន​ទឹក​ដក់ គ្មាន​ដង្កូវ​ទឹក»។

គួរ​ជ្រាប​ផង​ដែរ​ថា សម្រាប់​ឆ្នាំ ២០២៥ នេះ មិនមែន​តែ​កម្ពុជា​មាន​ការ​កើន​ឡើង​ករណី​ជំងឺគ្រុនឈាម​តាម​របាយការណ៍​អង្គការ​សុខភាព​ពិភពលោក ជំងឺគ្រុនឈាម​នៅ​បណ្ដា​ប្រទេស​អាស៊ី​ប៉ាស៊ីហ្វិក​ក៏​មាន​កំណើន​យ៉ាង​ខ្លាំង​តាំងពី​ពាក់កណ្ដាល​ឆ្នាំ ២០២៤ ដល់ ២០២៥ នេះ ព្រោះ​ពាក់ព័ន្ធ​នឹង​ជុំ​ជា​វដ្ត នៃ​ជំងឺ និង​កត្តា​អាកាសធាតុ​ភ្លៀង​ធ្លាក់​ច្រើន ក៏ដូចជា​កត្តា​បម្លាស់ទី​របស់​ប្រជាជន​ពី​មួយ​ប្រទេស​ទៅ​មួយ​ប្រទេស​ផង​ដែរ៕

អត្ថបទ ៖ សំអឿន

The post គិតត្រឹមសប្ដាហ៍ទី ១ ខែតុលានេះ កម្ពុជា មានអ្នកកើតជំងឺគ្រុនឈាមជាង ៤ ម៉ឺន ៤ ពាន់ករណី និងស្លាប់ ៥៥ នាក់ appeared first on Kampuchea Thmey Daily.

ជាក់ស្ដែង​កាលពី​រសៀល​ថ្ងៃទី ១៥ ខែ​កញ្ញា ឆ្នាំ ២០២៥ លោក ថេង សុថុល អភិបាល នៃ​គណៈ​អភិបាល​ខណ្ឌ ៧ មករា បាន​ចាត់ចែង​មន្ត្រី​ជំនាញ​ចុះ​បាញ់ថ្នាំ​កម្ចាត់​មូស​ក្នុង​សង្កាត់​អូរឫស្សី​ទី ២ ខណ្ឌ ៧ មករា រាជធានី​ភ្នំពេញ។

ក្រោយពី​កម្លាំង​បាញ់ថ្នាំ​របស់​រដ្ឋបាល​ខណ្ឌ ៧ មករា ចុះ​ទៅ​បាញ់ថ្នាំ​សម្លាប់​មូស​រួចរាល់ ប្រជាពលរដ្ឋ​ក្នុង​មូលដ្ឋាន​ខណ្ឌ បាន​សម្តែង​នូវ​ទឹកចិត្ត​រីករាយ​យ៉ាង​ក្រៃលែង​ជា​ខ្លាំង និង​សូម​ថ្លែង​អំណរ​គុណ​យ៉ាង​ជ្រាលជ្រៅ​ចំពោះ លោក​អភិបាល​រាជធានី​ភ្នំពេញ លោក​អភិបាលខណ្ឌ ៧ មករា និង​ក្រុម​ការងារ​រដ្ឋបាល​ខណ្ឌ ដែល​តែងតែ​គិតគូរ​ពី​សុខភាព​សាធារណៈ​របស់​ប្រជាពលរដ្ឋ​ស្ថិត​ក្នុង​មូលដ្ឋាន​ខណ្ឌ ៧ មករា ទាំងមូល៕

អត្ថបទ ៖ ម៉េង

The post អាជ្ញាធរខណ្ឌ ៧ មករា ចុះបាញ់ថ្នាំមូសក្នុងមូលដ្ឋាន បង្ការទប់ស្កាត់ជំងឺគ្រុនឈាម appeared first on Kampuchea Thmey Daily.

លោកវេជ្ជបណ្ឌិត ហ៊ុយ រ៉េកុល ប្រធានមជ្ឈមណ្ឌលជាតិប្រយុទ្ធនឹងជំងឺគ្រុនចាញ់ ប៉ារ៉ាស៊ីតសាស្ត្រ និងបាណកសាស្ត្រ បានមានប្រសាសន៍នៅព្រឹកថ្ងៃទី៣កញ្ញានេះថា ឆ្នាំ២០២៥ ដែលជាឆ្នាំនៃវដ្តជំងឺគ្រុនឈាមកើតច្រើន គឺមានករណីជំងឺសរុបជាង ៣ម៉ឺនករណី និងស្លាប់៥០នាក់។ ប៉ុន្តែស្ថានភាពជំងឺកំពុងបានថយចុះជាបន្តបន្ទាប់ជាង៤០ករណីក្នុងមួយថ្ងៃៗចាប់តាំងពីដើមខែសីហា មកដល់ចុងខែកន្លងមកនេះ បើប្រៀបធៀបជាមួយសន្ទស្សន៍ព្យាករណ៍សម្រាប់ឆ្នាំ២០២៥នេះ គឺគ្រុនឈាមអាចកើតមានប្រមាណជា ជាង៧ម៉ឺន៦ពាន់ករណី។

លោកវេជ្ជបណ្ឌិតបានបន្តថា ដោយចលនាបុរេសកម្ម និងកិច្ចសហការចូលរួមពីគ្រប់កម្រិតព្រមទាំងសហគមន៍ ក៏ដូចជាការជំរុញលើកទឹកចិត្ត និងចង្អុលបង្ហាញជាប្រចាំរបស់លោកសាស្រ្តាចារ្យរដ្ឋមន្រ្តីក្រសួងសុខាភិបាលមកដល់ពេលនេះ គឺយើងបានបង្ការទប់ស្កាត់មិនឱ្យកើតមានជំងឺគ្រុនឈាមប្រមាណជា ៤៣% ឬស្មើនឹង ២៥៧នាក់ក្នុងមួយថ្ងៃ ដែលសរុបគឺបង្ការបានជិត៣ម៉ឺននាក់មិនឱ្យកើតជំងឺគ្រុនឈាម។​ បើប្រៀបធៀបឆ្នាំ២០២៤ បានបង្ហាញថា ឆ្នាំ២០២៥នេះស្ថានភាពជំងឺត្រូវបានកាត់បន្ថយកំពូលប្រចាំឆ្នាំមកត្រឹមសប្តាហ៍ទី២៩ ឬដើមខែសីហា ដែលឆ្នាំ២០២៤ គឺកំពូលនៅសប្តាហ៍ទី៣៤ ឬចុងខែសីហា ដែលបញ្ជាក់យ៉ាងច្បាស់អំពីសមិទ្ធិផលនៃការចូលរួមបង្ការ និងគ្រប់គ្រងស្ថានភាពជំងឺមានប្រសិទ្ធភាពខ្ពស់គួរជាទីមោទកភាព។ លោកវេជ្ជបណ្ឌិតបានបន្តទៀតថា ឆ្នាំ២០២៥នេះមិនមែនតែកម្ពុជាទេដែលមានកំណើនជំងឺគ្រុនឈាមកើតច្រើនបណ្តាប្រទេសអាស៊ីប៉ាស៊ីហ្វិកក៏មានកំណើនជំងឺគ្រុនឈាមយ៉ាងខ្លាំងដែរ។

តាមរបាយការណ៍អង្គការសុខភាពពិភពលោក ជំងឺគ្រុនឈាមនៅបណ្តាប្រទេសអាស៊ីប៉ាស៊ីហ្វិកមានកំណើនយ៉ាងខ្លាំងតាំងពីពាក់កណ្តាលឆ្នាំ២០២៤ ដល់២០២៥នេះ ព្រោះពាក់ព័ន្ធនឹងជុំជាវដ្តនៃជំងឺ និងកត្តាអាកាសធាតុភ្លៀងធ្លាក់ច្រើន ក៏ដូចជាកត្តាបំលាស់ទីរបស់ប្រជាជនពីមួយប្រទេសទៅមួយប្រទេសផងដែរ។

លោកវេជ្ជបណ្ឌិតបានបញ្ជាក់ថា សរុបមក ឆ្នាំ២០២៥នេះ ស្ថានភាពបន្ទុកជំងឺគ្រុនឈាមកំពុងធ្លាក់ចុះវិញមែន ប៉ុន្តែ និន្នាការនៃការថយចុះនៅមានកម្រិតទាប ដែលទាមទារគ្រប់គ្នា សហគមន៍ អាជ្ញាធរមូលដ្ឋាន ប្រជាពលរដ្ឋគ្រប់រូប ត្រូវព្រងឹងកិច្ចអន្តរាគមន៍អនុវត្ត អនាម័យបរិស្ថាន លុបបំបាត់ប្រភពសម្ភារដក់ទឹកមិនប្រើប្រាស់ សំបកកង់យានជំនិះ លុបបំបាត់ដង្កូវទឹកតាមគេហដ្ឋានរៀងៗខ្លួនជាប្រចាំ “ ខ្ញុំជាពលរដ្ឋគំរូ ព្រោះផ្ទះខ្ញុំគ្មានដង្កូវទឹក “ និងត្រូវស្វែងរកសេវាថែទាំសុខភាពបន្ទាប់ពីក្តៅខ្លួនខ្លាំងភ្លាមៗមិនលើសពី២ថ្ងៃ ពិសេសទៅប៉ុស្តិសុខភាព ឬ មណ្ឌលសុខភាព ឬមន្ទីរពេទ្យដែលនៅជិតបំផុតមិនឱ្យយឺតពេលព្រោះថាបើ យឺតពេលមួយថ្ងៃ ជាកត្តាជម្រុញការវិវត្តន៏៍ជំងឺធ្ងន់ធ្ងរអាចយារយីដល់អាយុជីវិត៕

អត្ថបទ៖ សំអឿន

The post ឆ្នាំ២០២៥នេះ កម្ពុជាបានបង្ការទប់ស្កាត់មិនឱ្យកើតមានជំងឺគ្រុនឈាមជិត៣ម៉ឺនករណី appeared first on Kampuchea Thmey Daily.

នៅក្នុង​ឱកាស​ដឹកនាំ​កិច្ចប្រជុំ​ដើម្បី​ពិនិត្យ​វឌ្ឍនភាព និង​ពង្រឹង​ការបង្ការ​ជំងឺគ្រុនឈាម​ឱ្យ​កាន់តែ​ប្រសើរ​ថែមទៀត​ កាលពី​ថ្ងៃទី ​១៣ ​សីហា ​នៅ​ទីស្តីការក្រសួង លោក​រដ្ឋមន្ត្រី​ បាន​ណែនាំ​ឱ្យ​បន្ត​បង្កើន​ការ​យកចិត្តទុកដាក់​ផ្សព្វផ្សាយ​តាម​គ្រប់​មធ្យោបាយ និង​បណ្តាញ​សង្គម ដល់​ប្រជាពលរដ្ឋ​ពី​វិធីសាស្ត្រ​ការពារ​ខ្លួន សម្រាន្ត​ត្រូវ​ចង​មុង សម្លៀក​បំពាក់​ឱ្យ​ជិត​ចុង​ដៃ ចុងជើង និង​យកចិត្តទុកដាក់​ស្ត្រី​មាន​ផ្ទៃពោះ។ មន្ទីរ​សុខាភិបាល ត្រូវ​សហការ និង​ជំរុញ​ការគាំទ្រ​ពី​គ្រប់ផ្នែក​ពាក់ព័ន្ធ អាជ្ញាធរ​មូលដ្ឋាន សាលារៀន វត្ត​អារាម កងកម្លាំង​ប្រដាប់​អាវុធ ដើម្បី​ចូលរួម​លុបបំបាត់​ប្រភព​ដង្កូវទឹក និង​មូស​ខ្លា ពិសេស​ក្នុង​រដូវភ្លៀង​នេះ​។ ត្រូវ​បង្កើន​សមត្ថភាព​ នៃ​ការ​ធ្វើ​រោគវិនិច្ឆ័យ ការប្រើ​វិធីសាស្ត្រ​ព្យាបាល ទាំង​សេវា​សាធារណៈ និង​ឯកជន។

លោក​រដ្ឋមន្ត្រី បាន​ក្រើនរំលឹក​ដល់​ថ្នាក់ដឹកនាំ​សុខាភិបាល ​ត្រូវ​បង្កើន​ការ​យកចិត្តទុកដាក់​ខ្ពស់​ចំពោះ​ជំងឺគ្រុនឈាម ពិសេស​ចំពោះ​ស្ត្រី​មាន​ផ្ទៃពោះ ទារក និង​កុមារ និង​ស្វែងរក​ចំណុច​គន្លឹះ​ក្នុង​ការ​ការពារ ការ​ព្យាបាល​ជំងឺគ្រុនឈាម និង​ការ​ឆ្លើយតប​បាន​ទាន់​ពេលវេលា​ទាំង​កម្រិត​មន្ទីរពេទ្យ ទាំង​ក្នុង​សហគមន៍​។ បង្កើន​ការ​តាមដាន និង​ឆ្លើយតប​ឱ្យបាន​រហ័ស​ទាន់ពេលវេលា​ ត្រូវ​បង្កើន​ការ​រាយការណ៍​ករណី​សង្ស័យ​ពី​គ្រប់​មូលដ្ឋាន​សុខាភិបាល ដើម្បីឱ្យ​ក្រុមការងារ​ឆ្លើយតប​រហ័ស​ពិនិត្យ​ការងារ និង​ចុះ​អន្តរាគមន៍ ដូចជា​ចុះ​អប់រំ​សុខភាព ការ​ចុះ​កម្ចាត់​ជម្រក​មូស ដាក់​ថ្នាំ​អា​ប៊ែ​ត​នៅ​ពាង​ទឹក និង​វត្ថុ ដែល​ដក់​ទឹក និង​បង្កើន​ការបាញ់​ថ្នាំ​សម្លាប់​មូស​នៅ​កន្លែង​ឆ្លង​ខ្លាំង ដោយមាន​ចលនា​ការ​ចូលរួម​ពី​សហគមន៍។

គួរ​បញ្ជាក់​ថា ឆមាស​ទី ១ ឆ្នាំ ២០២៥ កម្ពុជា មាន​ករណី​ជំងឺគ្រុនឈាម​ប្រមាណ​ជា ៧ ០០០ ករណី ស្លាប់ ១៥ នាក់ បើ​ធៀប​ទៅនឹង​រយៈពេល​ដូចគ្នា​ឆ្នាំ ២០២៤ ​មាន​ចំនួន​ប្រហាក់ប្រហែល​គ្នា តែ​ឆ្នាំ ២០២៥ មាន​ករណី​ស្លាប់​ ២៣ នាក់ ​ខណៈ​ឆ្នាំ ២០២៥ នេះ ជា​ឆ្នាំ នៃ​វដ្ដ​ជំងឺគ្រុនឈាម​រៀងរាល់ ៥-៦ ឆ្នាំ ម្តង ដែល​ទាមទារ​ឱ្យ​មាន​ការ​ចូលរួម​អនុវត្ត​រាល់​វិធានការ​បង្ការ​ការពារ​ជំងឺគ្រុនឈាម​ឱ្យ​បាន​សកម្ម​ ដើម្បី​ទប់ស្កាត់​ការ​ឆ្លង​រាតត្បាត​ទ្រង់ទ្រាយ​ធំ​នៅ​ក្នុង​សហគមន៍៕

អត្ថបទ ៖ សំអឿន

The post រដ្ឋមន្ត្រីសុខាភិបាល ជំរុញឱ្យគ្រប់ភាគីពាក់ព័ន្ធរួមគ្នាទប់ស្កាត់ជំងឺគ្រុនឈាម ក្នុងរដូវភ្លៀងនេះ appeared first on Kampuchea Thmey Daily.