ជំងឺបេះដូង Archives - Kampuchea Thmey Daily

ស្រ្តីៗត្រូវដឹង! ជំងឺបេះដូង សម្លាប់មនុស្សច្រើនជាងជំងឺមហារីក ពិសេសស្រ្តីៗតែម្តង

Minea Neu — Mon, 02 Feb 2026 10:30:00 +0000

ស្ត្រីជាច្រើនប្រហែលជាមិនដឹងទេថា ការគំរាមកំហែងសុខភាពដ៏ធំបំផុតរបស់ពួកគេមិនមែនជាជំងឺមហារីកនោះទេ ប៉ុន្តែវាជា«ជំងឺបេះដូង»ទៅវិញ។

នៅឆ្នាំ២០២៣ ជំងឺបេះដូងបាននាំឱ្យស្ត្រីម្នាក់ស្លាប់ ក្នុងចំណោម ៥នាក់ នៅសហរដ្ឋអាមេរិក នេះបើយោងតាមមជ្ឈមណ្ឌលគ្រប់គ្រងនិងការពារជំងឺ(CDC)។ ទោះជាយ៉ាងណាក៏ដោយ CDC ក៏បានរកឃើញថាមានតែស្ត្រី ៥៦ភាគរយប៉ុណ្ណោះ ដែលដឹងពីហានិភ័យនេះ។

ស្រ្តីម្នាក់មានអាការៈចុកពោះ។ STOCK PHOTO/Getty Images

លោកស្រីវេជ្ជបណ្ឌិត C. Noel Bairey-Merz សាស្ត្រាចារ្យផ្នែកជំងឺបេះដូង និងជានាយកមជ្ឈមណ្ឌលបេះដូងស្ត្រីនៅវិទ្យាស្ថាន Cedars-Sinai បានប្រាប់ ABC News ថា៖ «វាជាឃាតករនាំមុខគេលើស្ត្រីគ្រប់វ័យ ដូច្នេះចាប់ពីអាយុ ១៨ឆ្នាំ ស្ត្រីនឹងស្លាប់ដោយសារជំងឺបេះដូងច្រើនជាងជំងឺមហារីកសុដន់។

ទោះបីជាវេជ្ជបណ្ឌិតជាច្រើនបានឱ្យដឹងជាយូរមកហើយថាការឈឺទ្រូងរបស់ស្ត្រីទំនងជាការប្រែប្រួលតាមវ័យរបស់ស្រ្តី តែលោកស្រី Bairey-Merz បាននិយាយថានោះមិនមែនជាការពិពណ៌នាដែលត្រឹមត្រូវនោះទេ។

លោកស្រីបន្ថែមថា៖ «ស្ត្រីមានចំនួន ៥១ភាគរយនៃប្រជាជន គឺមានលក្ខណៈមិនប្រក្រតីច្រើន បើធៀបនឹងបុរសមានតែ ៤៩ភាគរយ»។

លោកស្រី Bairey-Merz បានពន្យល់ថា តាមប្រវត្តិសាស្ត្រ ការស្រាវជ្រាវជំងឺសរសៃឈាមបេះដូងបានផ្តោតលើបុរសភាគច្រើន។

ឧទាហរណ៍ អ្វីដែលមនុស្សតែងគិតថាជារោគសញ្ញាបុរាណនៃការគាំងបេះដូង ដូចជា ការឈឺទ្រូង ការបែកញើស និងការឈឺចាប់ចេញពីដៃឆ្វេង អាចជារឿងធម្មតាសម្រាប់បុរស ប៉ុន្តែមិនមែនធម្មតាចំពោះស្ត្រីទេ។

យោងទៅតាមសមាគមន៍បេះដូងអាមេរិក (AHA) បានឱ្យដឹងថា នៅពេលដែលស្ត្រីមានការគាំងបេះដូង ពួកគេទំនងជាមានអារម្មណ៍ឈឺចាប់នៅផ្នែកខាងលើ ខ្នង ដៃ ក និងថ្គាម។

នៅក្នុងការសិក្សាជាច្រើនដែលបានបោះពុម្ពផ្សាយនៅក្នុងគេហទំព័រ Journal of the American Heart Association ក្នុងខែឧសភា ឆ្នាំ២០២០ ស្ត្រីមានការលំបាកខ្ពស់នៃការឈឺចាប់រវាងស្មា ចង្អោរ និងក្អួត និងដង្ហើមខ្លី និងការថយចុះនៃការឈឺទ្រូង និងបែកញើសដែលទាក់ទងនឹងការគាំងបេះដូង។

លើសពីនេះ លោកស្រីវេជ្ជបណ្ឌិត C. Noel Bairey-Merz បានឱ្យដំបូន្មានទៅកាន់ស្រ្តីនិងបុរសទាំងអស់ ឱ្យហ៊ាននិយាយពីបញ្ហារបស់ខ្លួនទៅកាន់ពេទ្យដោយពុំមានសេចក្តីខ្មាសអៀន៕

ប្រែសម្រួល៖ ណឺ មិនា

The post ស្រ្តីៗត្រូវដឹង! ជំងឺបេះដូង សម្លាប់មនុស្សច្រើនជាងជំងឺមហារីក ពិសេសស្រ្តីៗតែម្តង appeared first on Kampuchea Thmey Daily.

គ្រូពេទ្យឯកទេសជំងឺបេះដូង ជំរុញឲ្យមាតាបិតា យកទារក និង កុមារ មកពិនិត្យអេកូរកជំងឺបេះដូងពីកំណើត

អ៊ិន ពិសី — Mon, 10 Jul 2023 03:15:24 +0000

គ្រូពេទ្យឯកទេសជំងឺបេះដូងនៅមន្ទីរពេទ្យព្រះអង្គឌួង បានជំរុញឲ្យមាតាបិតាយកទារក និងកុមារ មកពិនិត្យអេកូរកជំងឺបេះដូងពីកំណើត ដើម្បីអាចព្យាបាលទារក ឬ កុមារ ឲ្យបានទាន់ពេលវេលា។

បើតាមគ្រូពេទ្យឯកទេសជំងឺបេះដូង បានពន្យល់ថា ការពិនិត្យអេកូបេះដូងទារកក្រោយកើត ឬ កុមារ ជាវិធីស្វែងរកលក្ខណៈទូទៅ ដែលមានលទ្ធផលខ្ពស់ ក្នុងការរកឃើញជំងឺបេះដូងពីកំណើត និងអាចព្យាបាលទារក ឬ កុមារ បានទាន់ពេលវេលា។ មួយវិញទៀត ការធ្វើអេកូបេះដូងលើទារក និង កុមារ ជាបច្ចេកទេសងាយ និងមិនមានការឈឺចាប់ ប៉ុន្តែតម្រូវឲ្យប្រើពេលវេលា និងត្រូវធ្វើជាមួយគ្រូពេទ្យឯកទេសផ្នែកបេះដូង។

គ្រូពេទ្យឯកទេសជំងឺបេះដូង បានមានប្រសាសន៍ថា ភាពមិនប្រក្រតីរបស់បេះដូងមាន ២ កម្រិត ដោយ ទី១-កម្រិតស្រាល គឺ មិនមានបញ្ហាទៅដល់ការលូតលាស់របស់ទារក និងកុមារ ដែលប្រភេទនេះមានចំនួនច្រើន ហើយខ្លះទៀតអាចវិវត្តទៅជាសះស្បើយដោយខ្លួនឯង ឬ បន្ទាប់ពីវះកាត់។ បើក្នុងករណីគ្រូពេទ្យរកឃើញថា ទារក ឬ កុមារ មានបញ្ហាបេះដូងពីកំណើតកម្រិតស្រាល គ្រូពេទ្យបន្តធ្វើការតាមដានក្នុងរយៈពេល ១ ខែ ទៅ ៦ ខែ ទៅតាមសភាពជាក់ស្ដែង។ ចំណែកទារក ឬ កុមារ មានជំងឺបេះដូងកម្រិតធ្ងន់ គឺ ទាមទារការព្យាបាលដោយការប្រើថ្នាំ ឬ ដោយការវះកាត់ព្យាបាលជាមួយបច្ចេកវិទ្យាទំនើបថ្មីៗ នាពេលបច្ចុប្បន្ននេះ ឲ្យបានទាន់ពេលវេលា។

គ្រូពេទ្យឯកទេសជំងឺបេះដូង បានបញ្ជាក់ថា ការរកមើលជំងឺបេះដូងពីកំណើត ដោយពិនិត្យអេកូបេះដូងលើទារក និងកុមារ និងការព្យាបាលឲ្យទាន់ពេលវេលា គឺជាការចាំបាច់បំផុត៕

អត្ថបទ ៖ សំអឿន

The post គ្រូពេទ្យឯកទេសជំងឺបេះដូង ជំរុញឲ្យមាតាបិតា យកទារក និង កុមារ មកពិនិត្យអេកូរកជំងឺបេះដូងពីកំណើត appeared first on Kampuchea Thmey Daily.

ក្មេងប្រុសជនជាតិអាមេរិកអាយុ ៥ ឆ្នាំ ស្លាប់ដោយសារគ្រូបង្រៀនស្មានតែធ្វើពុតឈឺ

Boa Sokunveary — Mon, 10 Apr 2023 06:25:49 +0000

ក្មេងប្រុសឈ្មោះ Romeo Pierre Louis អាយុ ៥ ឆ្នាំរៀននៅសាលាអន្តរជាតិ Charter Oak នៃរដ្ឋ Connecticut បានធ្វើទុក្ខរោគបេះដូងដ៏កម្រ រហូតដល់ស្លាប់ ព្រោះគ្មានអ្នកជួយសង្គ្រោះទាន់ពេលវេលា ។

ដំណឹងខាងលើធ្វើឲ្យឪពុកម្ដាយនិងមហាជនរន្ធត់ចិត្តហើយខឹងសម្បាទៅលើគ្រូបង្រៀនជាពន់ពេក ព្រោះពួកគេធ្វេសប្រហែលជាមួយអាយុជីវិតក្មេងប្រុស Romeo ខណៈពេលនេះឪពុកម្ដាយរបស់ក្មេងរងគ្រោះបានដាក់ពាក្យប្ដឹងសាលាហើយ ។

ខណៈ Romeo ដួលភ្លាមៗក្មេងផ្សេងៗបាននាំគ្នាស្វែងរកជំនួយដែរ ប៉ុន្តែគ្រូបង្រៀនបែរជាគិតថាពួកគេកំពុងលេងធ្វើពុតជាស្លាប់ទៅវិញ ។ តាមពិត Romeo មានជំងឺមួយហៅថា “ Brugada syndrome” ដែលធ្វើឲ្យបេះដូងលោតខុសធម្មតា និងអាចព្យាបាលបានបើនាំទៅពេទ្យទាន់ពេលវេលា ។

ទម្រាំតែគ្រូបង្រៀនដឹងពីស្ថានភាព Romeo នោះហួសពេលបាត់ទៅហើយ ព្រោះបន្ទាប់ពីដួល ៣៥ នាទីទើបឡានពេទ្យមកដល់ ហើយ Romeo បានស្លាប់ក្នុងមន្ទីរពេទ្យក្រោយពីរថ្ងៃកន្លងផុតទៅ៕

ប្រភព ៖ Dailystar

ចុចអាន ៖ ចាប់ខ្លួនគ្រូអាគមឥណ្ឌូណេស៊ី ពីបទសម្លាប់មនុស្សយ៉ាងតិច ១២ នាក់

The post ក្មេងប្រុសជនជាតិអាមេរិកអាយុ ៥ ឆ្នាំ ស្លាប់ដោយសារគ្រូបង្រៀនស្មានតែធ្វើពុតឈឺ appeared first on Kampuchea Thmey Daily.

ស្ត្រីអាចមានហានិភ័យនៃជំងឺសរសៃឈាមបេះដូង អំឡុងពេលមានផ្ទៃពោះ

Saron Sela — Wed, 22 Feb 2023 02:58:41 +0000

យោងតាមមជ្ឈមណ្ឌលគ្រប់គ្រង និងការពារជំងឺបេះដូងបានបញ្ចាក់ថា មូលហេតុចម្បងនៃការស្លាប់ក្នុងចំណោមស្ត្រីនៅក្នុងសហរដ្ឋអាមេរិក ហើយមានចំនួនមួយភាគប្រាំនៃការស្លាប់ទាំងអស់ ក្នុងចំណោមស្ត្រីមានផ្ទៃពោះ។ អ្នកជំនាញនិយាយថា ការប្រែប្រួលនៃសុខភាពស្ត្រីមានផ្ទៃពោះជារឿយៗត្រូវបានកត់សម្គាល់ និងតាមដានយ៉ាងយកចិត្តទុកដាក់អំឡុងពេលមានផ្ទៃពោះ។

ទោះជាយ៉ាងណាក៏ដោយ សុខភាពសរសៃឈាមបេះដូងចំពោះស្ត្រីក្រោយសម្រាលបានទទួលការយកចិត្តទុកដាក់តិចតួចបំផុត។ ប្រសិនបើក្នុងអំឡុងពេលមានផ្ទៃពោះ រាងកាយរបស់ស្ត្រីមានជំងឺ ដូចជាជំងឺទឹកនោមផ្អែមពេលមានគភ៌ និងមុនពេលកើតជំងឺបេះដូង ហានិភ័យនៃជំងឺបេះដូងចំពោះ ស្ត្រីក្រុមនេះក្រោយពេលសម្រាលកូននឹងកើនឡើងខ្ពស់ជាងធម្មតា។

នេះគឺដោយសារតែការផ្លាស់ប្តូរនៅក្នុងរាងកាយអំឡុងពេលមានផ្ទៃពោះអាចនាំឱ្យ myocardial ischemia បណ្តាល ឱ្យមានរោគសញ្ញាជាច្រើនដូចជាការគាំងបេះដូង ដោយសារតែការរួមតូចឬមិនដំណើរការនៃសរសៃឈាមកាត់បន្ថយលំហូរឈាម និងអុកស៊ីសែនទៅកាន់បេះដូងដែលជាការគំរាមកំហែងដល់អាយុជីវិត។

អ្នកជំនាញបានបញ្ចាក់ទៀតថា “ជំងឺសរសៃឈាមបេះដូងចំពោះស្ត្រីមានផ្ទៃពោះ គឺជាមូលហេតុចម្បងនៃការស្លាប់របស់ម្តាយអំឡុងពេល និងក្រោយពេលសម្រាល។ ទោះជាយ៉ាងណាក៏ដោយ ប្រសិនបើស្ត្រីមានផ្ទៃពោះបានពិនិត្យរកមើលក្នុងអំឡុងពេលមានផ្ទៃពោះ និងធ្វើបានល្អក្នុងការព្យាបាលជំងឺទឹកនោមផ្អែម នោះទើបអាចកំណត់ទាំងស្រុងនូវជំងឺសរសៃឈាមបេះដូងបាន” ។

តាមពិតទៅមនុស្សយើងភាគច្រើនគ្រាន់តែចាប់អារម្មណ៍លើការការពារសុខភាពស្ត្រីអំឡុងពេលមានផ្ទៃពោះ ដោយគ្រាន់តែពិនិត្យផ្ទៃពោះធម្មតាៗប៉ុណ្ណោះ ខណៈស្ត្រីមានផ្ទៃពោះនៅតែអាចទទួលរងនូវជំងឺសរសៃឈាមបេះដូង ក្រោយពេលសម្រាលកូនរួច ប្រសិនបើពួកគេធ្វេសប្រហែស។ ដូច្នេះហើយ ការតាមដាននិងថែរក្សាសុខភាពស្ត្រី មុនពេល និងក្រោយពេលសម្រាលកូន គឺមានសារៈសំខាន់ខ្លាំងណាស់៕

ប្រែសម្រួល៖នាងតូច

ចុចអាន៖ស្វែងយល់! តើអ្វីទៅជា«សិទ្ធិជ្រកកោនការទូត»?

The post ស្ត្រីអាចមានហានិភ័យនៃជំងឺសរសៃឈាមបេះដូង អំឡុងពេលមានផ្ទៃពោះ appeared first on Kampuchea Thmey Daily.

ជំនឿខុសឆ្គងទាំង៥ ពាក់ព័ន្ធនឹងជំងឺបេះដូង ដែលយើងគួរដឹង

សាង ស្រីល័ក្ខ — Tue, 16 Aug 2022 02:03:11 +0000

ការថែទាំសុខភាពបេះដូងជារឿងសំខាន់បំផុតមួយ ដែលយើងមិនត្រូវធ្វេសប្រហែសឡើយ។ ពិតណាស់ ពេលខ្លះយើងអាចនឹងយល់ខុសឆ្គងពាក់ព័ន្ធនឹងហានិភ័យមួយចំនួននៃជំងឺបេះដូង ដែលកត្តាអាចនាំឲ្យយើងប្រឈមនឹងគ្រោះថ្នាក់ដោយមិនដឹងខ្លួន។ ដូច្នេះហើយ យើងគួរបោះបង់ចោលជំនឿខុសឆ្គងទាំងនេះ ដើម្បីរួមចំណែកជួយឲ្យសុខភាពបេះដូងកាន់តែប្រសើរឡើង។

១. បើយើងញ៉ាំថ្នាំបញ្ចុះកូលេស្តេរ៉ូល យើងអាចញ៉ាំអ្វីក៏បាន

ជាក់ស្ដែង កូលេស្តេរ៉ូលនៅក្នុងសរសៃឈាមកើតចេញពីប្រភពចំនួន២ គឺទី១ ថ្លើមជាអ្នកផលិតខ្លះ និងមួយផ្នែកទៀត ទទួលបានពីអាហារជាក់លាក់មួយចំនួន។ ពពួកថ្នាំបញ្ចុះជាតិខ្លាញ់ អាចជួយកាត់បន្ថយបរិមាណកូលេស្តេរ៉ូលដែលថ្លើមផលិត និងធ្វើឲ្យកម្រិតកូលេស្តេរ៉ូលក្នុងឈាមធ្លាក់ចុះ ជាហេតុនាំឲ្យបរិមាណកូលេស្តេរ៉ូលនៅក្នុងសរសៃឈាមថយចុះ។ ប្រសិនបើយើងប្រើប្រាស់ថ្នាំបញ្ចុះជាតិខ្លាញ់ ហើយនៅតែបន្តញ៉ាំអាហារដែលមានជាតិកូលេស្តេរ៉ូលខ្ពស់នោះ ថ្នាំនឹងលែងមានប្រសិទ្ធភាព ហើយកម្រិតកូលេស្តេរ៉ូលនឹងបន្តកើនឡើង។ ហេតុដូច្នេះហើយ យើងចាំបាច់ត្រូវកាត់បន្ថយការញ៉ាំអាហារមានខ្លាញ់ឆ្អែត ដើម្បីឲ្យថ្នាំមានប្រសិទ្ធភាព។

២. ចាស់ទៅមានបញ្ហាសម្ពាធឈាមខ្ពស់ ជារឿងធម្មតាទេ

សម្ពាធឈាមអាចនឹងកើនឡើងនៅពេលដែលយើងមានវ័យកាន់តែច្រើន ពីព្រោះសរសៃឈាមក្លាយទៅជារឹង។ កត្តានេះនាំឲ្យបេះដូងច្របាច់កាន់តែខ្លាំង ដើម្បីបំពេញតម្រូវការរាងកាយ ដែលនាំឲ្យខូចសរសៃឈាម ព្រមទាំងបង្កើនហានិភ័យនៃការគាំងបេះដូង និងគ្រោះថ្នាក់សរសៃឈាមខួរក្បាល។

ដូចនេះ យើងចាំបាច់ត្រូវវាស់សម្ពាធឈាមជាប្រចាំ ហើយប្រសិនបើសម្ពាធឈាមលើសពី១៤០/៩០ មិល្លីម៉ែត្របារត នោះយើងចាំបាច់ត្រូវពិគ្រោះជាមួយនឹងគ្រូពេទ្យជំនាញ ដើម្បីជួយឲ្យសម្ពាធឈាមស្ថិតក្នុងកម្រិតសមល្មមវិញ។

៣. ជំងឺទឹកនោមផ្អែមមិនបង្កឲ្យកើតជំងឺបេះដូងទេ បើញ៉ាំថ្នាំទឹកនោមផ្អែម

ថ្នាំសម្រាប់អ្នកទឹកនោមផ្អែម អាចជួយកាត់បន្ថយកម្រិតជាតិស្ករក្នុងឈាម ក៏ដូចជាបង្ការផលវិបាកមួយចំនួនដូចជា ជំងឺតម្រងនោម ពិការភ្នែក លិង្គមិនឡើងរឹង និងការខូចសរសៃប្រសាទ។ ប៉ុន្តែការគ្រប់គ្រងជាតិស្ករក្នុងឈាមមានឥទ្ធិពលតិចតួចប៉ុណ្ណោះទៅលើសរសៃឈាមធំៗដែលរលាក និងកើតជំងឺ ជាហេតុបង្កើនហានិភ័យនៃការគាំងបេះដូង និងគ្រោះថ្នាក់សរសៃឈាមខួរក្បាល។

ហេតុនេះហើយ ក្រៅពីញ៉ាំថ្នាំទឹកនោមផ្អែមឲ្យបានទៀងទាត់ យើងចាំបាច់ត្រូវបន្ថយជាតិកូលេស្តេរ៉ូល និងសម្ពាធឈាមឲ្យនៅទាប ព្រមទាំងឈប់ជក់បារី និងរក្សាទម្ងន់ខ្លួនឲ្យសមល្មម។

៤. កាត់បន្ថយហានិភ័យជំងឺបេះដូង ដោយញ៉ាំពពួកវីតាមីន និងអាហារបំប៉ន

សារធាតុប្រឆាំងនឹងអុកស៊ីតកម្ម វីតាមីនE,C និងសារធាតុBeta Carotene អាចកាត់បន្ថយហានិភ័យនៃជំងឺបេះដូង។ យ៉ាងណាមិញ តាមការសាកល្បងប្រើប្រាស់អាហារបំប៉នជាមួយនឹងវីតាមីនទាំងនេះ យើងនៅមិនទាន់អាចបញ្ជាក់បានពីអត្ថប្រយោជន៍ណាមួយនៅឡើយ។ ដូច្នេះ គ្នាយើងគួរងាកមកញ៉ាំវីតាមីន និងជាតិរ៉ែដែលបានមកពីអាហារ ជំនួសឲ្យការញ៉ាំអាហារបំប៉នវិញ ទើបជាការប្រសើរ។

៥. បើជក់បារីរាប់ឆ្នាំ ទោះឈប់ជក់ ក៏មិនអាចកាត់បន្ថយហានិភ័យជំងឺបេះដូងដែរ

មិនថាយើងជក់បារីច្រើនដើមក្នុងមួយថ្ងៃ ឬជក់រយៈពេលយូរឡើយ ឲ្យតែយើងឈប់ជក់បារី នោះយើងនឹងទទួលបានអត្ថប្រយោជន៍សុខភាពដ៏ច្រើនលើសលប់។ ក្រោយឈប់ជក់បារីមួយឆ្នាំ យើងអាចកាត់បន្ថយហានិភ័យនៃការគាំងបេះដូងរហូតដល់ទៅ៥០% ហើយក្នុងរយៈពេល១០ឆ្នាំ រាងកាយរបស់យើងនៅត្រលប់មករកសភាពធម្មតាដូចអ្នកមិនធ្លាប់ជក់បារីពីមុនមកដូច្នោះដែរ។ ដូចនេះ យើងគួរតែព្យាយាមបញ្ឈប់ការជក់បារីភ្លាមៗ តាមដែលអាចធ្វើទៅបាន៕

អត្ថបទផ្ដល់ដោយ៖ Hello Krupet

ចុចអាន៖គ្រោះថ្នាក់ខ្លាំង ចំពោះមនុស្សមិនចូលចិត្តផឹកទឹកសោះ

ចុចអាន៖ទាំងនេះជារោគសញ្ញាជំងឺខ្សោយតម្រងនោម ត្រូវប្រយ័ត្នចំពោះអាហារទាំងនេះ

The post ជំនឿខុសឆ្គងទាំង៥ ពាក់ព័ន្ធនឹងជំងឺបេះដូង ដែលយើងគួរដឹង appeared first on Kampuchea Thmey Daily.

ការខូចចិត្តខុសពីជំងឺបេះដូង តែអាចធ្វើឲ្យប៉ះពាល់សុខភាពយ៉ាងធ្ងន់ធ្ងរ

សាង ស្រីល័ក្ខ — Thu, 21 Jul 2022 08:40:20 +0000

ការខូចចិត្តអាចហៅម្យ៉ាងទៀតថា Stress Cardiomyopathy ឬ Takotsubo Cardiomyopathy មិនមែនជារឿងសើចនោះទេ។ ទោះបីជារោគសញ្ញារបស់វាដូចគាំងបេះដូងក៏ដោយ ប៉ុន្តែវាបណ្តាលមកពីភាពតានតឹងផ្លូវកាយ ឬផ្លូវចិត្តភ្លាមៗ ធ្វើឲ្យរាងកាយពិបាកទទួលយក។

ខុសពីជំងឺគាំងបេះដូង ជំងឺខូចចិត្តកើតឡើងតែពេលស្ត្រេសផ្លូវកាយនិងផ្លូវចិត្តតែប៉ុណ្ណោះ។ អ្នកប្រហែលជាច្រឡំថាខ្លួនឯងមានជំងឺគាំងបេះដូង ដោយសារតែរោគសញ្ញាវាស្រដៀងគ្នាពេកដូចជា ដកដង្ហើមខ្លីៗ និងឈឺណែនដើមទ្រូងជាដើម ប៉ុន្តែការខូចចិត្តមិនមានការស្ទះសរសៃឈាមបេះដូង ឬការខូចខាតបេះដូងជាអចិន្ត្រៃយ៍ទេ ហើយអ្នកគង់តែជាសះស្បើយ១០០%។

យើងដឹងរួចមកហើយថាហេតុផលអ្វីខ្លះ ជាដើមចមធ្វើឲ្យមនុស្សខូចចិត្ត ដោយសារតែការខូចចិត្តជាបញ្ហាមួយដែលកើតឡើងទៅលើមនុស្សសឹងតែគ្រប់គ្នា គ្រាន់តែមុននិងក្រោយទេ។ នៅពេលមានការខូចចិត្ តរាងកាយរបស់មនុស្សនឹងមានអាការៈដូចជា៖

– ការឈឺចាប់ធ្ងន់ធ្ងរ

– រាងកាយហត់នឿយ

– បញ្ហាសុខភាព (ការវាយប្រហារនៃជំងឺហឺត, ពិបាកដកដង្ហើម, ប្រកាច់, ដាច់សរសៃឈាមខួរក្បាល, ក្ដៅខ្លួនខ្លាំង, ជាតិស្ករធ្លាក់ចុះ, បាត់បង់ឈាមក្រហម, ចង្វាក់បេះដូងគ្មានស្ថេរភាព, សម្ពាធឈាមធ្លាក់ចុះ)

– ការចុះខ្សោយនៃ ventricle ខាងឆ្វេងនៃបេះដូងរបស់អ្នក

– មានសារធាតុរាវនៅក្នុងសួត។

រាល់ពេលអ្នកប្រតិកម្មទៅនឹងអារម្មណ៍ស្ត្រេស រាងកាយអ្នកបញ្ចេញអ័រម៉ូនស្ត្រេសចូលទៅក្នុងឈាមដូចជា អាដ្រេណាលីន, ណូរ៉ាដ្រេណាលីន, អាពីណេហ្វ្រីន និងណូរេពីណេហ្វ្រីន។ អ្នកជំនាញគិតថា អ័រម៉ូនទាំងនេះរំខានដល់មុខងារបេះដូងរបស់អ្នកនិងអាចបណ្ដាលឲ្យខ្សោយសាច់ដុំបេះដូងជាបណ្ដោះអាសន្ន។

ចំណែកឯការព្យាបាលអាស្រ័យលើភាពធ្ងន់ធ្ងរនៃរោគសញ្ញារបស់អ្នកជម្ងឺខូចចិត្ត ជាធម្មតាត្រូវបានព្យាបាលដោយថ្នាំ រហូតដល់ការជាសះស្បើយពេញលេញរួមមាន:

– ថ្នាំ Angiotensin-converting-enzyme inhibitors ដើម្បីបន្ថយសម្ពាធឈាម (រយៈពេលវែង)

– ថ្នាំ beta blockers ដើម្បីបន្ថយអត្រាបេះដូង (រយៈពេលខ្លី)

– ថ្នាំបញ្ចុះទឹកនោម ដើម្បីកាត់បន្ថយការឡើងជាតិទឹក (រយៈពេលខ្លី)

– ថ្នាំប្រឆាំងនឹងការថប់បារម្ភ ដើម្បីគ្រប់គ្រងភាពតានតឹង (ថ្នាំទាំងនេះអាចប្រើរយៈពេលយូរ ប្រសិនបើចាំបាច់)

លើសពីនេះ ការគ្រប់គ្រងភាពតានតឹងផ្លូវកាយ ឬផ្លូវចិត្ត អាចជួយបានដោយធ្វើតាមទម្លាប់ទូទៅដែលមានសុខភាពល្អផងដែរ ទាំងនេះរួមបញ្ចូលទាំង៖

– ការទទួលទានរបបអាហារដែលមានសុខភាពល្អ

– ហាត់ប្រាណទៀងទាត់

– គេងឲ្យគ្រប់គ្រាន់

– ចំណាយពេលជាមួយអ្នកជុំវិញខ្លួន

– គោរពការណាត់ជួបពេទ្យរបស់អ្នក ទាំងការតាមដាន និងការពិនិត្យសុខភាព

– បញ្ឈប់ការជក់បារី ការប្រើប្រាស់គ្រឿងញៀន និងការប្រើប្រាស់គ្រឿងស្រវឹង៕

ប្រែសម្រួល៖ វារី

The post ការខូចចិត្តខុសពីជំងឺបេះដូង តែអាចធ្វើឲ្យប៉ះពាល់សុខភាពយ៉ាងធ្ងន់ធ្ងរ appeared first on Kampuchea Thmey Daily.

ហាត់ប្រាណមួយថ្ងៃ ១ ម៉ោង ជួយកាត់បន្ថយហានិភ័យជំងឺបេះដូង

សាង ស្រីល័ក្ខ — Sat, 02 Apr 2022 01:20:42 +0000

ការហាត់ប្រាណឲ្យបានច្រើនជាប្រចាំ គឺជារឿងល្អសម្រាប់សុខភាពបេះដូង ក៏ប៉ុន្ដែចំពោះអ្នកមិនសូវមានពេលវេលាគ្រប់គ្រាន់ បន្ទាប់ពីបំពេញការងារ នោះគឺជារឿងដែលចាំបាច់ត្រូវស្វែងយល់ឲ្យបានច្បាស់ ថាគួរត្រូវប្រើពេលប៉ុន្មានឲ្យបានគ្រប់គ្រាន់ ក្នុងការហាត់ប្រាណនេះ។ ជាក់ស្ដែងតាមការណែរនាំរបស់ក្រុមគ្រូពេទ្យ បានបង្ហាញថា ការហាត់ប្រាណ យ៉ាងហោចក៏ត្រូវចំណាយពេល ១ម៉ោង ក្នុងមួយថ្ងៃដើម្បីធ្វើឲ្យបេះដូងមានសុខភាពល្អ។

ថ្វីត្បិតតែការលើកឡើងរបស់គ្រូពេទ្យបានបង្ហាញថា ការហាត់ប្រាណបាន១ម៉ោង ក្នុងមួយថ្ងៃក៏អាចផ្ដល់អត្ថប្រយោជន៍មែនសម្រាប់សុខភាពបេះដូង ប៉ុន្ដែក៏មានចំណុចរួមផ្សំមួយចំនួនទៀតដែរ។ ក្នុងនោះរួមមាន ឥរិយាបថប្រចាំថ្ងៃ របបនៃការញ៉ាំអាហារ និង លក្ខណៈការងារ ដែលសកម្មភាពខ្លះក៏អាចរួមចំណែកជាការហាត់ប្រាណ ដល់រាងកាយផងដែរ។

បើគិតទៅលើពេលវេលាគោល ការហាត់ប្រាណ ១ម៉ោងគឺគ្រប់គ្រាន់ធ្វើឲ្យសុខភាពល្អ នោះផ្ដោតសំខាន់លើប្រភេទ នៃការហាត់ប្រាណ ដូចជា ការរត់ ការដើរ(ចន្លោះល្បឿន៤-៥គីឡូ/១ម៉ោង) ការហែលទឹក ការរាំំ ការជិះកង់ សុទ្ធសឹងជាការហាត់ប្រាណបែបសកម្មភាពងាយៗ។ ដូច្នេះយើងអាចធ្វើឲ្យបានយ៉ាងហោច ១ម៉ោង ក្នុងមួយថ្ងៃ ក៏អាចជួយកាត់បន្ថយហានិភ័យជំងឺបេះដូងបាន ២០-៤០%។ ការហាត់ប្រាណ ប្រភេទផ្សេងទៀតក៏មានដែរ ដូចជាការហាត់ប្រាណបែបកាយសម្ពន្ធ ការលើកទម្ងន់។ ការហាត់ប្រាណប្រភេទនេះអាចធ្វើបានយ៉ាងហោចចន្លោះ ៣០ ទៅ ៤០នាទី ក្នុងមួយថ្ងៃជាប្រចាំ ក៏អាចជួយដល់សុខភាពបេះដូងបានដែរ។ សកម្មភាពការងារមួយចំនួនផ្សេងទៀត ក៏អាចចាត់ទុក ថា ការហាត់ប្រាណដូចគ្នា ដូចជាការងារ ត្រូវដើរថ្មើរជើងច្រើន ប្រើកាយវិការច្រើន ពោលសកម្មភាពដែលអាចធ្វើឲ្យមានចលនា សរសៃឈាម និងបេះដូងធ្វើការសកម្មគឺជារឿងល្អសម្រាប់សុខភាព។

ការសង្កត់ធ្ងន់ទៅលើកត្ដាមួយចំនួនទៀត សម្រាប់អ្នកហាត់ប្រាណដែលមានមាឌ គីឡូ វ័យ មិនសមាត្រគ្នា ពោលអ្នកដែលមានមាឌធាត់ លើសទម្ងន់ គួរតែចំណាយពេល ហាត់ប្រាណឲ្យបានយ៉ាងហោចណាស់ ១ម៉ោងកន្លះ ក្នុងមួយថ្ងៃជាប្រចាំ និងត្រូវកំណត់របបអាហារត្រូវញ៉ាំផងដែរ។ ការសិក្សាបញ្ជាក់ថា អ្នកមានបញ្ហាលើសគីឡូច្រើន ភាគច្រើនមានអត្រាភាគរយខ្ពស់ ប្រឈមនឹងជំងឺបេះដូង ជំងឺសរសៃឈាម ដោយមិនប្រកាន់ទៅលើវ័យនោះទេ៕

អត្ថបទផ្ដល់ដោយ៖ Hello Krupet

ចុចអាន៖មិនសូវមានពេលហាត់ប្រាណ តែចង់បញ្ចេញញើស កុំរំលងវិធីនេះ

ចុចអាន៖ស្លៀកឈុតកៅស៊ូហាត់ប្រាណ ពិតជាជួយដុតកាឡូរីបានច្រើន?

The post ហាត់ប្រាណមួយថ្ងៃ ១ ម៉ោង ជួយកាត់បន្ថយហានិភ័យជំងឺបេះដូង appeared first on Kampuchea Thmey Daily.

ផឹកភេសជ្ជៈប៉ូវកម្លាំងច្រើន អាចស្លាប់ដោយ មហារីក និងជំងឺបេះដូង

សាង ស្រីល័ក្ខ — Thu, 02 Dec 2021 10:02:00 +0000

ផឹកទឹកក្រូច និងភេសជ្ជៈប៉ូវកម្លាំងច្រើន ជារៀងរាល់ថ្ងៃ អាចបណ្ដាលឲ្យឆាប់ស្លាប់ ដោយសារជំងឺបេះដូង និងមហារីក។ នេះបើតាមការសិក្សាថ្មីធ្វើឡើងក្នុងសហរដ្ឋអាមេរិក។

ផឹកទឹកក្រូច និងភេសជ្ជៈប៉ូវកម្លាំងច្រើន គឺពាក់ព័ន្ធ នឹងប្រឈមមុខការស្លាប់ដោយជំងឺផ្សេងៗដល់ទៅ ២៨% ជំងឺបេះដូង ៣១% និងជំងឺមហារីក ១៦%។

“នៅអាមេរិក ប្រហែលពាក់កណ្ដាលនៃចំនួនប្រជាជនសរុប គឺផឹកភេសជ្ជៈផ្អែមខ្លាំង ១ កំប៉ុង/ថ្ងៃ… ហើយដើម្បីជំនួសភេសជ្ជៈផ្អែមខ្លាំងទាំងនេះ គួរផឹកភេសជ្ជៈផ្សេងទៀត ជាពិសេសទឹកសុទ្ធ គឺជាយុទ្ធសាស្រ្តមួយ ដើម្បីលើកកម្ពស់សុខភាព និងរស់បានអាយុវែង”។ នេះជាការលើកឡើងរបស់លោក Vasanti Malik អ្នកស្រាវជ្រាវផ្នែកអាហារបំប៉ន នៅឯសាលាសុខភាពសាធារណៈ Harvard TH Chan ក្នុងទីក្រុង Boston។

ទឹកក្រូច ភេសជ្ជៈប៉ូវកម្លាំង និងភេសជ្ជៈផ្អែមខ្លាំង ជាប្រភពចម្បងតែមួយគត់ ដែលមានជាតិស្ករបន្ថែម ទៅក្នុងរបបអាហារពលរដ្ឋអាមេរិកគ្រប់រូប។ នេះបើតាមការកក់សម្គាល់របស់លោក Vasanti Malik។

សាស្ត្រាចារ្យរូបនេះ បានបញ្ជាក់ថា នៅពេលយើង ផឹកទឹកក្រូច និងភេសជ្ជៈមានជាតិស្ករផ្សេងទៀត ទំនងជាបានវិវត្តទៅរកកត្ដាប្រឈមជំងឺទឹកនោមផ្អែម ជំងឺថប់បារម្ភ និងបញ្ហាសុខភាពរ៉ាំរ៉ៃផ្សេងៗ។ យើងអាចទំនងជាទទួលយកចំនួនកាឡូរីសរុប ច្រើនជាងរាងកាយត្រូវការនាំឲ្យបង្កើនមហានិភ័យប្រឈម បញ្ហាសម្ពាធឈាមខ្ពស់ ជំងឺបេះដូង និងដាច់សរសៃឈាមខួរក្បាល។

ចំណែកភាពប្រឈមកើតជំងឺមហារីក ជាមួយភេសជ្ជៈមានជាតិស្ករវិញ ទំនងបង្កឡើងដោយជំងឺមហារីក ដែលពាក់ព័ន្ធនឹងរបបអាហារ រួមមាន មហារីក និងភេសជ្ជៈប៉ូវកម្លាំង។

សម្រាប់ការសិក្សាថ្មីនេះ ហានិភ័យពាក់ព័ន្ធភេសជ្ជៈមានជាតិស្ករខ្ពស់ ខណៈបច្ចុប្បន្នកំណើនអ្នកចូលចិត្តភេសជ្ជៈប្រភេទទាំងនេះ ទាំងបុរស និងស្រ្ដី កំពុងកើនឡើងខ្ពស់ដូចគ្នា។

ការសិក្សាថ្មីនេះ បានពិនិត្យ និងតាមដានលើបុរស ចំនួន ៣៧.៧១៦នាក់ អស់រយៈពេល ២៨ឆ្នាំ និងស្រ្តី ចំនួន ៨០.៦៤៧នាក់ អស់រយៈពេល ៣៤ឆ្នាំ ដោយបានពិនិត្យលើកត្តារបបអាហារនានា សកម្មភាពរាងកាយ និងការធាត់ជ្រុល ដោយសារផឹកភេសជ្ជៈផ្អែមខ្លាំង។ លទ្ធផលរកឃើញថា រយៈពេល ៣៤ឆ្នាំ មកនេះ ស្រ្តី ២៣.៤៣២នាក់ បានស្លាប់ ក្នុងនោះ ៤.១៣៩នាក់ ស្លាប់ដោយសារបញ្ហាបេះដូង និង ៨.៣១៨នាក់ ស្លាប់ដោយសារជំងឺមហារីក។ រីឯបុរសវិញ ក្រោយតាមដាន ២៨ឆ្នាំ ១៣.០០៤នាក់ បានស្លាប់ ដោយក្នុងនោះ ៣.៧៥៧នាក់ ស្លាប់ដោយសារបញ្ហាបេះដូង និង ៤.០៦២នាក់ ស្លាប់ដោយសារជំងឺមហារីក៕

អត្ថបទផ្ដល់ដោយ៖Hello Krupet

ចុចអាន៖មិនថាក្មេងឬចាស់ ចៀសអាហារ ៥ ប្រភេទនេះ ដូចនៅឆ្ងាយពីជំងឺបេះដូង

The post ផឹកភេសជ្ជៈប៉ូវកម្លាំងច្រើន អាចស្លាប់ដោយ មហារីក និងជំងឺបេះដូង appeared first on Kampuchea Thmey Daily.