ជំងឺនេះត្រូវបានរកឃើញជាលើកដំបូងនៅក្នុងភូមិKakhi ដោយមានមនុស្សប្រហែល៩០ នាក់បានធ្លាក់ខ្លួនឈឺ។ អ្នកជំងឺមួយចំនួននៅតែស្ថិតក្នុងស្ថានភាពធ្ងន់ធ្ងរនៅឡើយ។

ដោយសារតែជំងឺនេះកំពុងរីករាលដាល អាជ្ញាធរបានបិទព្រំដែនរយៈពេលពីរខែចាប់ពីថ្ងៃទី ១៣ ខែវិច្ឆិកាតទៅរហូតគ្រប់២ខែ។ ភូមិKakhi នេះត្រូវបានដាក់ជា «តំបន់ទប់ស្កាត់» មានន័យថាមនុស្សមិនអាចចេញចូល ឬធ្វើអន្តរកម្មជាមួយសហគមន៍នៅក្នុងប្រទេសមីយ៉ាន់ម៉ាបានទេ ខណៈបុគ្គលិកសុខាភិបាលកំពុងធ្វើតេស្តប្រភពទឹកដើម្បីស្វែងរកមូលហេតុនៃការផ្ទុះឡើងជំងឺនេះ។

ការបិទព្រំដែនក៏កំពុងប៉ះពាល់ដល់ភូមិក្បែរៗជាច្រើន ហើយអាចបណ្តាលឱ្យមានការខ្វះខាតស្បៀងអាហារនៅក្នុងប្រទេសមីយ៉ាន់ម៉ា ដែលពឹងផ្អែកលើទំនិញមកពីរដ្ឋMizoram ។ នៅKakhi គ្រួសារខ្លះកំពុងខ្វះខាតស្បៀងអាហាររួចទៅហើយ ហើយមនុស្សជាច្រើនមិនអាចធ្វើការបានដោយសារតែការបិទច្រកព្រំដែន។

ថ្នាក់ដឹកនាំភូមិបានស្នើសុំឱ្យថ្នាក់ស្រុក និងអ្នកបរិច្ចាគជួយជាបន្ទាន់ជាមួយនឹងស្បៀងអាហារ និងថ្នាំពេទ្យ ខណៈភូមិនេះមានប្រជាជនជាង ៨០០ នាក់ រួមទាំងជនភៀសខ្លួនជាច្រើនមកពីក្រុង Paletwa ប្រទេសមីយ៉ាន់ម៉ាផងដែរ៕

អត្ថបទ៖ ប៊ុន សុភាព

The post ផ្ទុះជំងឺអាសន្នរោគនៅព្រំដែនឥណ្ឌា-មីយ៉ាន់ម៉ា សម្លាប់មនុស្ស៩នាក់ និងបង្ខំឲ្យបិទព្រំដែនពីរខែ appeared first on Kampuchea Thmey Daily.

ប្រទេសមួយចំនួនកំពុងមានការកើនឡើងវិញនៃការឆ្លងយ៉ាងសកម្ម។ ជាពិសេសជំងឺអាសន្នរោគរីករាលដាលតាមរយៈទឹកដែលមានមេរោគ ហើយអាចសម្លាប់មនុស្សក្នុងរយៈពេលប៉ុន្មានម៉ោងប្រសិនបើមិនបានព្យាបាល។ មជ្ឈមណ្ឌលត្រួតពិនិត្យ និងបង្ការជំងឺអាហ្វ្រិក (CDC) និយាយថា ជម្លោះ អនាម័យមិនល្អ និងការទទួលបានទឹកស្អាតមានកម្រិតកំពុងជំរុញវិបត្តិនេះ ជាពិសេសនៅក្នុងជំរំជនភៀសខ្លួន។

ចំពោះប្រទេសស៊ូដង់បានរងផលប៉ះពាល់ខ្លាំងជាងគេ ដោយមានករណីឆ្លងជាង ៧១,០០០ ករណី និងករណីស្លាប់ចំនួន ២,០០០ នាក់នៅឆ្នាំនេះ ខណៈដែលសង្គ្រាមបំផ្លាញប្រព័ន្ធទឹក និងធ្វើឱ្យការបំពុលកាន់តែអាក្រក់ទៅៗ។ ក្រុមវេជ្ជសាស្ត្រព្រមានថា ការផ្ទុះឡើងកំពុងកើនឡើង ដោយជំរុញឱ្យមានសកម្មភាពបន្ទាន់ដើម្បីកែលម្អការទទួលបានទឹក និងអនាម័យនៅទូទាំងតំបន់ដែលរងផលប៉ះពាល់៕

អត្ថបទ៖ ប៊ុន សុភាព

The post ទ្វីបអាហ្វ្រិក ប្រឈមនឹងការផ្ទុះឡើងនៃជំងឺអាសន្នរោគដ៏អាក្រក់បំផុតរយៈពេល២៥ឆ្នាំមិនធ្លាប់មាន appeared first on Kampuchea Thmey Daily.

ក្រសួងសុខាភិបាលស៊ូដង់ បាន​បញ្ជាក់​ថា ភាគច្រើននៃករណីឆ្លងប្រមាណ៩០% កើតឡើងនៅក្នុងរដ្ឋ​ធានី Khartoum ដែលជាកន្លែងដែលការផ្គត់ផ្គង់ទឹក និងអគ្គិសនីបានដួលរលំដោយសារតែការវាយប្រហារដោយយន្តហោះគ្មានមនុស្ស​បើក​​(ដ្រូន)​របស់​កងកម្លាំង RSF ដែលមានជម្លោះជាមួយកងទ័ពចាប់តាំងពីខែមេសា ឆ្នាំ ២០២៣។ ជម្លោះនេះធ្វើឲ្យប្រទេសស៊ូដង់កាន់តែជួបវិបត្តិមនុស្សធម៌កាន់តែធ្ងន់ធ្ងរបន្ថែមទៀត។

ជំងឺអាសន្នរោគ ដែលជាជំងឺរាតត្បាតក្នុងប្រទេសស៊ូដង់ បានកើនឡើង ខណៈដែលសង្រ្គាមបានបំផ្លិចបំផ្លាញទឹក អនាម័យ និងហេដ្ឋារចនាសម្ព័ន្ធថែទាំសុខភាព។ ការ​វាយ​ប្រហារ​លើ​ស្ថានីយ​ថាមពល​បាន​ធ្វើ​ឱ្យ​រោងចក្រ​ប្រព្រឹត្តិកម្ម​ទឹក​មិន​អាច​ដំណើរការ​បាន ដោយ​បង្ខំ​ឱ្យ​អ្នក​ស្រុក​ប្រើប្រាស់​ប្រភព​​ទឹក​កខ្វក់​ជំនួស​​វិញ​​។

MSF ដែលជាអង្គការមនុស្សធម៌អន្តរជាតិឯករាជ្យផ្តល់ជំនួយសង្គ្រោះបន្ទាន់ដល់ប្រជាជនដែលរងផលប៉ះពាល់ដោយជម្លោះ ជំងឺរាតត្បាត និងគ្រោះមហន្តរាយធម្មជាតិ បានព្រមានពីការរីករាលដាលយ៉ាងឆាប់រហ័សនៃជំងឺនេះដោយសារតែកង្វះទឹកស្អាត និងភ្នាក់ងារពេទ្យ។ អង្គការសុខភាពពិភពលោក និងសហជីពរបស់វេជ្ជបណ្ឌិតស៊ូដង់រាយការណ៍ថា រហូតដល់ ៩០% នៃមន្ទីរពេទ្យបានបិទក្នុងអំឡុងពេលសង្រ្គាម ។

មកដល់ពេលនេះជម្លោះនៅក្នុងប្រទេសស៊ូដង់ បានឈានដល់ឆ្នាំទី៣ហើយ និងបានសម្លាប់មនុស្សរាប់ម៉ឺននាក់ ជម្លៀសប្រជាជន១៣លាននាក់ និងបានបង្កើតវិបត្តិមនុស្សធម៌ដ៏ធំបំផុតរបស់ពិភពលោក ខណៈជំងឺអាសន្នរោគបានបន្ថែមស្រទាប់​ថ្មីដ៏គ្រោះថ្នាក់ដល់ការរងទុក្ខរបស់ប្រជាជនស៊ូដង់បន្ថែមទៀត៕

អត្ថបទ៖ ប៊ុន សុភាព

The post ​ជំងឺអាសន្នរោគផ្ទុះឡើង​ខ្លាំង​នៅស៊ូដង់សម្លាប់មនុស្ស១៧២នាក់ក្នុងពេលត្រឹមមួយសប្ដាហ៍ appeared first on Kampuchea Thmey Daily.

លោក​វេជ្ជបណ្ឌិត លី សូ​វ៉ាន់ ប្រធាន​នាយកដ្ឋាន​ប្រយុទ្ធ​នឹង​ជំងឺឆ្លង នៃ​ក្រសួងសុខាភិបាល បានឱ្យ​ដឹង​ថា ជំងឺ ៧ មុខ ដែល​តែងតែ​កើតឡើង​នៅក្នុង​រដូវភ្លៀង​រួមមាន ជំងឺគ្រុនឈាម គ្រុនចាញ់ ជំងឺ​គ្រុន​ផ្តាសាយ ជំងឺ​គ្រុនក្តៅ ជំងឺ​ចម្លង​ពី​ចំណីអាហារ ជំងឺ​ចម្លង​ពី​ទឹក ជំងឺ​អាសន្នរោគ និង​ជំងឺ​លិ​ប​តូ​ឆ្លង​ពី​ទឹកនោម​សត្វ​កណ្តុរ។

លោក​វេជ្ជបណ្ឌិត ក៏បាន​ណែនាំ​ឱ្យ​ប្រជាពលរដ្ឋ​ពេលធ្វើ​ដំណើរ​ត្រូវមាន​អាវ​ភ្លៀង ឆត្រ និង​ស្បែក​ជើង​លុយ​ទឹក បរិភោគ​ទឹក​ក្តៅ​អ៊ុនៗ ទឹក​ស៊ុប​ក្តៅៗ អនាម័យ​ខ្លួនប្រាណ បរិភោគ​ចំណីអាហារ​ណា​មាន​អនាម័យ និង​មាន​ជីវជាតិ និង​បន្លែ​ពណ៌​បៃតង​ចាស់​ដូចជា ​ផ្ទី ស្លឹក​ងប់ ស្លឹក​បាស ខាត់ណា សណ្ដែកកួរ និង​ប៉េងប៉ោះ​ជាដើម។

លោក​វេជ្ជបណ្ឌិត បាន​បន្ថែមទៀតថា ជាងនេះទៅទៀត ត្រូវ​ចូលរួម​លុបបំបាត់​ដង្កូវទឹក និង​ជម្រក​សត្វ​មូស​ខ្លា​ដូចជា​ សំបក​កង់ សំបក​កង់ឡាន ត្រឡោក​ដូង និង​វត្ថុ​ដែល​អាច​ដក់​ទឹកបាន ដើម្បី​ការពារ​កុមារ​ពី​ជំងឺគ្រុនឈាម។

លោក​វេជ្ជបណ្ឌិត បានឱ្យដឹង​ទៀតថា នៅក្នុង​រដូវភ្លៀង​ធ្លាក់​នេះ ក៏មាន​ឃើញ​ការ​កើនឡើង​ករណី​ជំងឺ​កូ​វីដ​-១៩ និង​ជំងឺ​ផ្តាសាយធំ​ផង​ដែរ។ ដូចនេះ សូម​ប្រជាពលរដ្ឋ​ត្រូវ​បន្ត​ពាក់​ម៉ាស រក្សា​គម្លាត ត្រូវ​ឧស្សាហ៍​លាងដៃ​ជាមួយនឹង​សាប៊ូ និង​ទឹក ដើម្បី​ចៀសវាង​ការ​ចម្លង​ជំងឺ​ទៅ​សមាជិក​គ្រួសារ និង​អ្នកដទៃ និង​ហាម​ក្អក​ដាក់​បាតដៃ ព្រោះ​វា​អាច​ឆ្លង​ទៅ​អ្នកដទៃ​ទៀត​បាន​តាមរយៈ​ការ​ចាប់ដៃ ឬ​ចាប់​របស់​ផ្សេងៗ។

យោងតាម​សេចក្ដីជូនដំណឹង​របស់​ក្រសួង​ធនធានទឹក និង​ឧតុនិយម បានឱ្យដឹងថា ដោយមាន​សម្ពាធ​ទាប​គ្របដណ្ដប់​មកលើ​ឈូង​សមុទ្រ​ថៃ អាង​ទន្លេមេគង្គ និង​សមុទ្រ​ចិន​ខាងត្បូង ស្ថានភាព​បែបនេះ នឹង​ធ្វើឱ្យ​រាជធានី​-​ខេត្ត​ភាគច្រើន នៃ​ប្រទេស​កម្ពុជា អាចមាន​ភ្លៀង​ផ្គរ​រន្ទះ និង​ខ្យល់​កន្ត្រាក់ គ្រប់​ដណ្ដប់​លើ​ផ្ទៃដី ២៥ ​ដល់ ​៣៥ ​ភាគរយ ចាប់ពី​ថ្ងៃទី​ ២៣​ ដល់​ ថ្ងៃទី ​២៥ ខែឧសភា ឆ្នាំ ២០២៥៕

អត្ថបទ ៖ សំអឿន

The post មន្ត្រីជំនាញសុខាភិបាល ណែនាំពលរដ្ឋប្រុងប្រយ័ត្នជំងឺឆ្លង ៧ មុខ តែងតែកើតញឹកញាប់ក្នុងរដូវភ្លៀង appeared first on Kampuchea Thmey Daily.

តាមការចុះផ្សាយរបស់ Bangkok Post នៅថ្ងៃទី១ខែមករាឆ្នាំ២០២៥, ស្រុកចំនួន៥ក្នុងខេត្ត Tak ដែលដាក់ចូលជាតំបន់ក្រហមទាំងនោះមានដូចជា Mae Sot, Mae Ramat, Phop Phra, Tha Song Yang និង Umphang។

ជុំវិញរឿងនេះ នាយកមន្ទីរពេទ្យ Mae Sot លោកវេជ្ជបណ្ឌិត Ramet Wongwilairat លើកឡើងថា ត្បិតស្ថានការណ៍មិនធ្ងន់ធ្ងរក៏ដោយ ប៉ុន្តែមានហានិភ័យនៃករណីថ្មីនាពេលអនាគត។

ស្របពេលជាមួយគ្នានោះ លោក Suphachok Wetchaphanphesat មន្ត្រីតាមដានសុខភាពសាធារណៈ បានបញ្ជាក់ថា គិតត្រឹមពេលនេះ មន្ទីរពេទ្យ Mae Sot រកឃើញអ្នកឆ្លងជំងឺអាសន្នរោគចំនួន៤ករណី ក្នុងនោះមានថៃ២នាក់ និងមីយ៉ាន់ម៉ា ២នាក់ ប៉ុន្តែបានព្យាបាលឲ្យជាសះស្បើយរួចហើយ។

ត្បិតតែមីយ៉ាន់ម៉ា ហាក់ធូរស្រាលបន្តិចពីជំងឺអាសន្នរោគក៏ពិតមែន ប៉ុន្តែបើតាមរបាយការណ៍ពីឆ្មាំព្រំដែនថៃបានឲ្យដឹងថា គិតចាប់ពីថ្ងៃទី១ដល់២៧ខែធ្នូឆ្នាំ២០២៤ ក្រុង Shwe Kokko មានការឆ្លងជំងឺនេះ៧៦១ករណី ដែលតម្រូវឲ្យចូលព្យាបាលក្នុងមន្ទីរពេទ្យ។

អាសន្នរោគគឺជាជំងឺឆ្លងដោយបាក់តេរី Vibrio cholerae ដែលបណ្តាលឲ្យបាត់បង់ជាតិទឹកក្នុងរាងកាយ ដោយសាររាកខ្លាំង ហើយអាចឈានស្លាប់ ប្រសិនបើព្យាបាលមិនទាន់ពេល។

ជំងឺនេះភាគច្រើន ឆ្លងតាមការទទួលទានទឹកឬអាហារដែលមានបាក់តេរីនេះ។ វិធីដើម្បីបង្ការអាសន្នរោគ គឺត្រូវរក្សាអនាម័យខ្ពស់ ផឹកទឹកនិងទទួលទានអាហារឆ្អិនល្អ ប្រើបង្គន់ស្អាត និងលាងដៃដោយសាប៊ូ៕ 

អត្ថបទ៖ សុខ សុវណ្ណ

ចុចអាន៖ អាសន្នរោគនៅមីយ៉ាន់ម៉ា ផ្ទុះរឹតខ្លាំង ធ្វើឲ្យថៃ ភ័យព្រួយ ឈានដល់បិទព្រំដែន

The post ៥ស្រុកនៅថៃ ប្រកាសអាសន្ន ដាក់ចូលជាតំបន់ក្រហមដោយសារ ហានិភ័យជំងឺអាសន្នរោគ appeared first on Kampuchea Thmey Daily.

នៅក្នុងសេចក្តីថ្លែងការណ៍មួយ ទីភ្នាក់ងារអង្គការសហប្រជាជាតិ បានឲ្យដឹងថា គិតត្រឹមថ្ងៃទី១ខែធ្នូ ប្រទេសយេម៉ែន​ដែលស្ថិតនៅ​តំបន់សមុទ្រ​ក្រហម បានរាយការណ៍ថា មានករណីសង្ស័យអំពី​​ជំងឺអាសន្នរោគចំនួន ២៤៩៩០០០ និងករណីស្លាប់ចំនួន៨៦១នាក់នៅឆ្នាំនេះ។

WHO ថា ចំនួនទាំងនេះមាន​៣៥ភាគរយ ជា​ជំងឺអាសន្នរោគសកល និង១៨ភាគរយនៃចំនួនអ្នកស្លាប់របស់ពិភព​លោក​។ ជំងឺទាំងនោះមានដូចជាការផ្ទុះឡើងនៃជម្ងឺឆ្លងតាមទឹក ដូចជាជំងឺអាសន្នរោគ និងជំងឺរាគរូសដែលដាក់បន្ទុកបន្ថែមលើប្រព័ន្ធសុខភាពដែលមានបញ្ហារួចទៅហើយ ដែលប្រឈមនឹងការផ្ទុះជំងឺផ្សេងៗទៀតជាច្រើន។

តំណាងអង្គការសុខភាពពិភពលោក និងជាប្រធានបេសកកម្មនៅយេម៉ែន លោក Arturo Pesigan បានឲ្យដឹងថា អង្គការសុខភាពពិភពលោកមានភាពតានតឹងក្នុងកិច្ចខិតខំប្រឹងប្រែងរបស់ពួកគេដើម្បីដោះស្រាយតម្រូវការកើនឡើងដោយសារតែកង្វះខាតថវិកាយ៉ាងធ្ងន់ធ្ងរ។

បញ្ហានេះ បានបង្ខំឲ្យ WHO បិទមជ្ឈមណ្ឌលព្យាបាលនៅប្រទេសយេម៉ែន ចំពេលមានគម្លាតថវិកាចំនួន​២០លានដុល្លារ។ រហូតមកដល់ពេលនេះ ទីភ្នាក់ងារអង្គការសហប្រជាជាតិបានបិទមជ្ឈមណ្ឌលព្យាបាលជំងឺរាគរូសចំនួន​៤៧ ហើយ គ្រោងនឹងបិទ​១៧​ផ្សេងទៀតនៅចុងឆ្នាំនេះនៅក្នុងប្រទេសនេះ។

យោងតាមអង្គការសុខភាពពិភពលោក (WHO) ប្រទេសយេម៉ែនបានជួបប្រទះនឹងការចម្លងជំងឺអាសន្នរោគជាបន្តបន្ទាប់អស់រយៈពេលជាច្រើនឆ្នាំ រួមទាំងការផ្ទុះឡើងដ៏ធំបំផុតរបស់ពិភពលោកក្នុងប្រវត្តិសាស្រ្តថ្មីៗពីឆ្នាំ ២០១៧ ដល់ឆ្នាំ២០២០ដែលមានជាង ២.៥ លានករណី និងមនុស្សស្លាប់ ៤០០០ នាក់ ខណៈមនុស្ស​៤​លាន​នាក់​កើត​ជំងឺ​អាសន្នរោគ​ជា​រៀង​រាល់​ឆ្នាំ​នៅ​ទូទាំង​ពិភពលោក៕

អត្ថបទ៖ ប៊ុន សុភាព

The post WHO ព្រមានថា យេម៉ែនកំពុងផ្ទុះជំងឺអាសន្នរោគច្រើនជាងគេក្នុងពិភពលោក appeared first on Kampuchea Thmey Daily.

មីយ៉ាន់ម៉ា រាយការណ៍ថា ជំងឺអាសន្នរោគ កំពុងផ្ទុះនៅតំបន់ Shwe Kokko នៃរដ្ឋ Kayin ដោយឆ្លងដល់ប្រជាជនប្រមាណ៣០០នាក់ និងបណ្តាលឲ្យមនុស្ស ២នាក់ បាត់បង់ជីវិត។

ថៃក៏បានរកឃើញដែរថា មានជនជាតិមីយ៉ាន់ម៉ា៣នាក់ដែលធ្វើការក្នុងស្រុក Mae Sot នៃខេត្ត​Tak បានឆ្លងជំងឺអាសន្នរោគ ប៉ុន្តែត្រូវបានបញ្ជូនទៅព្យាបាលនៅមន្ទីរពេទ្យក្នុងតំបន់រួចហើយ។

ដោយសារតែស្ថានភាពវិវត្តគួឲ្យព្រួយបារម្ភបែបនេះហើយ ទើបឧបនាយករដ្ឋមន្ត្រី Phumtham Wechayachai ចេញបញ្ជាឲ្យចាត់វិធានការការពារនិងឃ្លាំមើលឲ្យបានដិតដល់ជាទីបំផុត នៅតាមព្រំដែន។ លោកនិយាយថា ក្រុមប្រឹក្សាការពារ បានជួបប្រជុំគ្នារួចហើយ ហើយនឹងធ្វើការជាមួយកងកម្លាំងប្រដាប់អាវុធរួមទាំងក្រសួងសុខាភិបាល ដើម្បីចាត់ការលើរឿងនេះ។

តាមការបញ្ជាក់ពីលោក Wechayachai, ទាហាននឹងជួយពិនិត្យស្ថានការណ៍ រួមទាំងបង្កើនប៉ុស្តិ៍ត្រួតពិនិត្យនិងរៀបចំកន្លែងធ្វើចត្តាឡីស័ក នៅតាមព្រំដែន ក៏ដូចជាបន្តការឃ្លាំមើលរយៈពេលមួយខែដើម្បីធានាថា ជំងឺអាសន្នរោគ មិនឆ្លងចូលមកខាងថៃ។ 

លើសពីនេះ អាជ្ញាធរមូលដ្ឋានក៏កំពុងផ្សព្វផ្សាយឲ្យប្រជាពលរដ្ឋយល់ដឹងពីគ្រោះថ្នាក់នៃជំងឺអាសន្នរោគ និងចែកស្រោមដៃ និងម៉ាស ដើម្បីធានារក្សាអនាម័យផងដែរ៕

អត្ថបទ៖ សុខ សុវណ្ណ

ចុចអាន៖ WHO រកឃើញជំងឺអាសន្នរោគនៅ​លីបង់ និង​​បារម្ភ​អំពី​ការរីករាលដាលខ្ពស់ណាស់

The post អាសន្នរោគនៅមីយ៉ាន់ម៉ា ផ្ទុះរឹតខ្លាំង ធ្វើឲ្យថៃ ភ័យព្រួយ ឈានដល់បិទព្រំដែន appeared first on Kampuchea Thmey Daily.

WHO បានគូសបញ្ជាក់ពីហានិភ័យនៃការរីករាលដាលនៃជំងឺអាសន្នរោគក្នុងចំណោមមនុស្សរាប់សែននាក់ដែលបានផ្លាស់ទីលំនៅចាប់តាំងពីអ៊ីស្រាអែលបានបង្កើន​​ការ​វាយ​ប្រហារ​​តាមអាកាសប្រឆាំងនឹងក្រុមហេសបូឡា និងបានបើកការវាយលុកក្នុងគោលបំណងជំរុញក្រុមនេះចេញពីព្រំដែនភាគខាងជើងរបស់ខ្លួន។

លោក Abdinasir Abubakar តំណាងអង្គការសុខភាពពិភពលោកប្រចាំប្រទេសលីបង់ បានប្រាប់អ្នកយកព័ត៌មានក្នុងសន្និសីទសារព័ត៌មានអនឡាញថា៖​«ប្រសិនបើការផ្ទុះជំងឺអាសន្នរោគរាលដាលដល់មនុស្សផ្លាស់ទីលំនៅថ្មី វាអាចរីករាលដាលយ៉ាងឆាប់រហ័ស» ខណៈករណីជំងឺអាសន្នរោគត្រូវបានបញ្ជាក់នៅក្នុងចំណោមជនជាតិលីបង់ ដែលបានទៅមន្ទីរពេទ្យកាលពីថ្ងៃចន្ទ ដោយមានជំងឺរាគរូស និងខ្វះជាតិទឹក។ ក្រសួងសុខាភិបាលបានឲ្យដឹងថាអ្នកជំងឺមកពី Ammouniyeh ភាគខាងជើងប្រទេសលីបង់និងមិនមានប្រវត្តិធ្វើដំណើរទេ។

គួរបញ្ជាក់ថា ការរងទុក្ខរបស់ជនស៊ីវិលនៅក្នុងប្រទេសលីបង់បានឈានដល់កម្រិតខ្ពស់មិនធ្លាប់មានពីមុនមក ហើយ​UN​បាន​ព្រមានថា សហគមន៍មួយចំនួនដែលកំពុងផ្លាស់ប្តូរពីភាគខាងត្បូងប្រទេសលីបង់ និង​ទីក្រុង​បេរូត​ អាចនឹងមាន​ហានិភ័យ​ឆ្លងជំងឺអាសន្នរោគខ្ពស់។

អាការៈរបស់ជំងឺអាសន្នរោគនេះបណ្តាលឱ្យរាគរួសធ្ងន់ធ្ងរ ក្អួត និងរមួលសាច់ដុំ។ ជាទូទៅវា​កើត​ឡើងដោយ​សារ​​ការបរិភោគ ឬផឹកទឹកដែលមានបាក់តេរី។ នេះបើយោងតាមអង្គការសុខភាពពិភពលោក។ ប្រសិនបើជំងឺនេះឆ្លងចូលទៅក្នុងចំណោម​ប្រជាជនដែលកំពុងភៀសខ្លួនទាំងនោះហានិភ័យនៃការរីករាលដាលគឺខ្ពស់ណាស់។

ប្រធានអង្គការសុខភាពពិភពលោក លោក Tedros Adhanom Ghebreyesus បានប្រាប់អ្នកសារព័ត៌មានថា ទីភ្នាក់ងារ​បានពង្រឹងការត្រួតពិនិត្យ និងធ្វើការតាមដាន រួមទាំងការឃ្លាំមើលបរិស្ថាន និងការយកគំរូទឹក។

លោកបាននិយាយថា កាលពីខែសីហា ក្រសួងសុខាភិបាលលីបង់បានចាប់ផ្តើមយុទ្ធនាការចាក់ថ្នាំបង្ការជំងឺអាសន្នរោគតាមមាត់ដោយផ្តោតលើមនុស្ស ៣៥០០០០ នាក់ដែលរស់នៅក្នុងតំបន់ដែលមានហានិភ័យខ្ពស់ ប៉ុន្តែយុទ្ធនាការនេះត្រូវបានរំខានដោយការកើនឡើងនៃអំពើហិង្សា។

គួររម្លឹកថាប្រទេសលីបង់បានទទួលរងនូវការផ្ទុះជំងឺអាសន្នរោគជាលើកដំបូងក្នុងរយៈពេល​៣០ឆ្នាំមិនធ្លាប់មាន រវាងឆ្នាំ ២០២២និង ២០២៣ ដែលភាគច្រើននៅភាគខាងជើងនៃប្រទេស៕

អត្ថបទ៖ ប៊ុន សុភាព

The post WHO រកឃើញជំងឺអាសន្នរោគនៅ​លីបង់ និង​​បារម្ភ​អំពី​ការរីករាលដាលខ្ពស់ណាស់ appeared first on Kampuchea Thmey Daily.