ជំងឺអុតស្វា Archives - Kampuchea Thmey Daily

លោកស្រី ឱ វណ្ណឌីន ប្រាប់ស្ថានភាពសុខភាពអ្នកជំងឺអុតស្វា និងអ្នកប៉ះពាល់ទាំង ៥ នាក់

KC Virak — Fri, 29 Jul 2022 10:15:28 +0000

លោកស្រី វេជ្ជបណ្ឌិត ឱ វណ្ណឌីន រដ្ឋលេខាធិការ និងជាអ្នកនាំពាក្យ ក្រសួងសុខាភិបាល បានមានប្រសាសន៍នៅរសៀលថ្ងៃទី ២៩ ខែកក្កដានេះថា រហូតមកដល់ពេលនេះ ស្ថានភាពសុខភាពអ្នកជំងឺអុតស្វា ជនជាតិនីហ្សេរីយ៉ា និងអ្នកប៉ះពាល់ ៥ នាក់ គឺមានលក្ខណៈធម្មតាមិនមានអ្វីប្លែកទេ។

នៅពេលសួរថា តើអ្នកជំងឺអុតស្វាអាចជាសះស្បើយ និងចេញពីមន្ទីរពេទ្យនៅពេលណានោះ លោកស្រី វេជ្ជបណ្ឌិតបានបញ្ជាក់ថា វាអាស្រ័យលើការវិវត្តន៍នៃជំងឺ។

ប៉ុន្តែបើតាមលោកសាស្ត្រាចារ្យ ម៉ម ប៊ុន ហេង រដ្ឋមន្ត្រីក្រសួងសុខាភិបាល ធ្លាប់បានមានប្រសាសន៍ថា អ្នកជំងឺអុតស្វាជនជាតិនីហ្សេរីយ៉ា អាចនឹងជាសះស្បើយឆាប់ៗនេះ។

ថ្លែងប្រាប់អ្នកសារព័ត៌មានក្រោយដឹកនាំក្រុមគ្រូពេទ្យចុះពិនិត្យព្យាបាលជំងឺ និងចាក់វ៉ាក់សាំងដូសជំរុញ ដល់ពលរដ្ឋនៅសង្កាត់គោកឃ្លាង កាលពីថ្ងៃទី ២៧ ខែកក្កដានេះ លោករដ្ឋមន្ត្រីបានបន្តថា ស្ថានភាពសុខភាពអ្នកជំងឺអុតស្វាជនជាតិនីហ្សេរីយ៉ា មិនមានអ្វីធ្ងន់ធ្ងរទេ ហើយគាត់នឹងជាសះស្បើយឆាប់ៗនេះ។ ចំណែកអ្នកប៉ះពាល់ផ្ទាល់ ៥ នាក់ជាមួយអ្នកជំងឺនេះ ក៏មិនមានឆ្លងជំងឺនេះដែរ។

យ៉ាងណាក៏ដោយ លោករដ្ឋមន្ត្រីបានណែនាំឱ្យមានការប្រុងប្រយ័ត្នខ្ពស់ បើទោះបីជាវាមានចំនួនតិច និងជាករណីនាំចូល ហើយអ្នកដែលប៉ះពាល់ជាមួយអ្នកជំងឺ ៥ នាក់នោះក៏មិនមានឆ្លងក៏ដោយ ត្រូវបន្តតាមដានអ្នកជំងឺបន្តរហូតដល់ ២១ ថ្ងៃជាបន្តទៀត។

ជាមួយគ្នានេះ លោករដ្ឋមន្ត្រីបានណែនាំឱ្យអាជ្ញាធរនៅតាមច្រកចេញចូលតាមព្រំដែនអន្តរជាតិទាំងអស់ មានការប្រុងប្រយ័ត្នព្រោះថា ជំងឺអុតស្វាមិនមែនកើតនៅស្រុកខ្មែរទេ វាជាករណីនាំចូល តែបើយើងមិនពិនិត្យតាមដានឱ្យបានហ្មត់ចត់ទេ វានឹងអាចឆ្លងក្នុងសហគមន៍របស់យើង។

គួរបញ្ជាក់ថា បុរសជនជាតិនីហ្សេរីយ៉ាឆ្លងជំងឺអុតស្វានេះ មានឈ្មោះ អូសម៉ុងសាហាហ្សីរីម មាន អាយុ ២៧ឆ្នាំ បានគេចខ្លួនពីប្រទេសថៃ ហើយបានធ្វើដំណើរចូលមកប្រទេសកម្ពុជា ត្រូវបានសមត្ថកិច្ចរាជធានីភ្នំពេញធ្វើការឃាត់ខ្លួនកាលពីល្ងាចថ្ងៃទី ២៣ ខែកក្កដា នៅម្តុំផ្សារដើមថ្កូវ ខណ្ឌចំការមន រាជធានីភ្នំពេញ។បច្ចុប្បន្ននេះបុរសនេះកំពុងសម្រាកព្យាបាលជំងឺនៅមន្ទីរពេទ្យខ្មែរសូវៀត ហើយការព្យាបាលជំងឺមិនបានគិតប្រាក់ទេ៕

អត្ថបទ៖ សំអឿន

The post លោកស្រី ឱ វណ្ណឌីន ប្រាប់ស្ថានភាពសុខភាពអ្នកជំងឺអុតស្វា និងអ្នកប៉ះពាល់ទាំង ៥ នាក់ appeared first on Kampuchea Thmey Daily.

WHO ថា រុស្ស៊ី មានហានិភ័យផ្ទុះជំងឺអុតស្វាខ្ពស់ណាស់

សាង ស្រីល័ក្ខ — Sat, 02 Jul 2022 06:30:00 +0000

ប្រធានការិយាល័យអង្គការសុខភាពពិភពលោក (WHO) ប្រចាំប្រទេសរុស្ស៊ី បាននិយាយថា ហានិភ័យនៃការរីករាលដាលនៃជំងឺអុតស្វានៅរុស្ស៊ី មានកម្រិតខ្ពស់ខ្លាំងណាស់។

ការថ្លែងដូចនេះធ្វើឡើងនៅដោយលោកស្រី Melita Vujnovic ជាប្រធានការិយាល័យ WHO ប្រចាំប្រទេសរុស្ស៊ី ហើយលោកស្រីបានប្រាប់សារព័ត៌មាន Sputnik ថា ហានិភ័យនៃការរីករាលដាលនៃជំងឺអុតស្វានៅរុស្ស៊ី គឺមានកម្រិតខ្ពស់ខ្លាំងណាស់។ ខណៈ នៅក្នុងទ្វីបអឺរ៉ុប ក៏កំពុងតែផ្ទុះឡើងខ្លាំង មិនធម្មតាដូចគ្នាដែរ។

គួររំលឹកថា Monkeypox គឺជាជំងឺមេរោគដ៏កម្រមួយ ដែលជាធម្មតាត្រូវបានចម្លងទៅមនុស្សពីសត្វព្រៃ ហើយជាជំងឺរាតត្បាតនៅក្នុងប្រទេសមួយចំនួននៅអាហ្វ្រិក។ ជំងឺនេះអាចឆ្លងតាមរយៈវត្ថុរាវក្នុងរាងកាយ ដំណក់ទឹកផ្លូវដង្ហើម និងវត្ថុធាតុកខ្វក់ផ្សេងទៀត។ ជាធម្មតាបណ្តាលឲ្យមានគ្រុនក្តៅ ឡើងកន្ទួល និងហើមកូនកណ្ដុរ៕

ប្រែសម្រួល៖ សាង ស្រីល័ក្ខ

ប្រភព៖sputnik

ចុចអាន៖ប្រទេស អាស៊ាន មួយទៀតរកឃើញករណី ជំងឺអុតស្វា

The post WHO ថា រុស្ស៊ី មានហានិភ័យផ្ទុះជំងឺអុតស្វាខ្ពស់ណាស់ appeared first on Kampuchea Thmey Daily.

កូរ៉េខាងត្បូងរាយការណ៍ពីករណីសង្ស័យជំងឺអុតស្វាលើកដំបូង

chean virakbot — Wed, 22 Jun 2022 02:06:15 +0000

ប្រទេសកូរ៉េខាងត្បូងនៅថ្ងៃទី២២ ខែមិថុនានេះបានរាយការណ៍ពីការសង្ស័យជំងឺអុតស្វា២ករណីលើកដំបូង និងកំពុងធ្វើការពិសោធបន្ថែមទៀតមុនពេលអាជ្ញាធរសុខាភិបាលធ្វើសន្និសីទសារព័ត៌មានជុំវិញបញ្ហានេះ។

មនុស្សម្នាក់ក្នុងចំណោមអ្នកសង្ស័យឆ្លងជំងឺអុតស្វាគឺជាជនបរទេសដែលកើតមានរោគសញ្ញាខ្លាំងតាំងពីថ្ងៃអាទិត្យ និងបានចូលប្រទេសកូរ៉េកាលពីថ្ងៃចន្ទ ហើយកំពុងស្ថិតក្នុងការព្យាយាមដាច់ដោយឡែកនៅមន្ទីរពេទ្យក្នុងទីក្រុង Busan។

ចំណែកម្នាក់ទៀតជាជនជាតិកូរ៉េដែលមានរោគសញ្ញានៅពេលកំពុងធ្វើដំណើរមកពីប្រទេសអាល្លឺម៉ង់ត្រឡប់ចូលប្រទេសកំណើតវិញកាលពីរសៀលថ្ងៃអង្គារ៍។ ជនជាតិកូរ៉េដែលមានការសង្ស័យម្នាក់នេះបានចូលសម្រាកព្យាបាលនៅមន្ទីរពេទ្យ Incheon។

ទីភ្នាក់ងារគ្រប់គ្រង និងបង្ការជំងឺកូរ៉េខាងត្បូង (KDCA) បាននិយាយក្នុងសេចក្តីថ្លែងការណ៍មួយថា ៖«ការធ្វើតេស្តរោគវិនិច្ឆ័យ និងការស៊ើបអង្កេតរោគរាតត្បាតអំពីជំងឺអុតស្វាកំពុងត្រូវបានធ្វើ ហើយអាជ្ញាធរសុខាភិបាលនឹងធ្វើសន្និសីទសារព័ត៌មានឆាប់ៗដើម្បីប្រកាសពីវិធានការ ក៏ដូចជាផែនការឆ្លើយតប បន្ទាប់ពីការធ្វើតេស្តចេញលទ្ធផល»។

ទោះបីជាយ៉ាងណា KDCA មិនបានបញ្ជាក់លំអិតពីបុគ្គលដែលមានការសង្ស័យឆ្លងជំងឺអុតស្វាទាំងពីរនាក់នោះទេ។

កាលពីដើមខែនេះ កូរ៉េខាងត្បូងបានកំណត់ជំងឺអុតស្វាជាជំងឺឆ្លងកម្រិតទី២ នេះបើយោងតាមប្រព័ន្ធជំងឺឆ្លងដែលមាន៤កម្រិតពាក់ព័ន្ធនឹងជំងឺឆ្លង២២ប្រភេទ ក្នុងនោះរាប់ទាំងជំងឺកូវីដ-១៩ ជំងឺអាសន្នរោគ និងជំងឺអុតស្វាជាដើម៕

ប្រែសម្រួល៖ វីរបុត្រ
ប្រភព៖ Reuters

The post កូរ៉េខាងត្បូងរាយការណ៍ពីករណីសង្ស័យជំងឺអុតស្វាលើកដំបូង appeared first on Kampuchea Thmey Daily.

មិនដល់១ខែផង ជំងឺអុតស្វា វាយប្រហារ២៧ប្រទេស មានអ្នកឆ្លងដល់ ៧៨០ករណី (មានវីដេអូ)

Sok Sovann — Mon, 06 Jun 2022 01:02:13 +0000

អង្គការសុខភាពពិភពលោក (WHO) បាននិយាយថា គិតត្រឹមថ្ងៃអាទិត្យទៅ០៥ខែមិថុនា មានករណីជំងឺស្វាចំនួន៧៨០ករណីហើយ ដែលត្រូវបានរកឃើញនៅខាងក្រៅទ្វីបអាហ្វ្រិក។

នោះគឺជាការកើនឡើង ១គុណនឹង៣នៃករណីចំនួន២៥៧ ដែលបានរាយការណ៍កាលពីមួយសប្តាហ៍មុន។

ស្របពេលជាមួយគ្នានោះដែរ WHO បានវាយតម្លៃកម្រិតហានិភ័យជាសកលថា មានកម្រិតមធ្យម។

ជាធម្មតា ការឆ្លងគឺមានកម្រិតស្រាល ប៉ុន្តែនេះជាលើកដំបូងហើយ ដែលមេរោគអុតស្វា បានរីករាលដាលយ៉ាងទូលំទូលាយនៅខាងក្រៅតំបន់អាហ្វ្រិកកណ្តាល និងអាហ្វ្រិកខាងលិច។

យោងតាម WHO, ករណីទាំងនេះ ត្រូវបានគេរកឃើញនៅក្នុងប្រទេសចំនួន២៧។ ករណីភាគច្រើនគឺនៅអឺរ៉ុប និងអាមេរិកខាងជើង ក៏ដូចជាចំនួនតិចតួចនៅម៉ិកស៊ិក អាហ្សង់ទីន ម៉ារ៉ុក និង អារ៉ាប់រួមផងដែរ។

ចក្រភពអង់គ្លេសមានករណីច្រើនជាងគេគឺ២០៧ករណី បន្ទាប់មកគឺអេស្ប៉ាញមាន១៥៦ករណី និងព័រទុយហ្គាល់មាន១៣៨ករណី។

គួរបញ្ជាក់ថា ជួនកាល ជំងឺអុតស្វា អាចធ្ងន់ធ្ងរ ហើយត្រូវបានគេរាយការណ៍ថា បណ្តាលឲ្យមានមនុស្សស្លាប់នៅអាហ្វ្រិកខាងលិច កាលពីអតីតកាល៕

សូមទស្សនាវីដេអូ៖

ប្រែសម្រួល៖ Vann Vann

ប្រភព៖ BBC

ចុចអាន៖ WHO ព្រមានថា ករណីជំងឺអុតស្វា នឹងកើនឡើងកាន់តែច្រើន ទូទាំងពិភពលោក

The post មិនដល់១ខែផង ជំងឺអុតស្វា វាយប្រហារ២៧ប្រទេស មានអ្នកឆ្លងដល់ ៧៨០ករណី (មានវីដេអូ) appeared first on Kampuchea Thmey Daily.

ជំងឺអុតស្វាឆ្លងចូលសហគមន៍ហើយនៅអង់គ្លេស

chean virakbot — Thu, 02 Jun 2022 03:04:35 +0000

ទីភ្នាក់ងារសន្តិសុខសុខភាពអង់គ្លេស(UKHSA)បាននិយាយកាលពីថ្ងៃពុធ ទី១ ខែមិថុនាថា ជំងឺអុតស្វាទំនងជាកំពុងរាលដាលពីមនុស្សម្នាក់ទៅមនុស្សម្នាក់នៅក្នុងប្រទេសអង់គ្លេសហើយ។

ជាធម្មតាជំងឺកម្រិតស្រាលដែលឆ្លងភាគច្រើនបំផុតនៅអាហ្វ្រិកខាងលិច និងអាហ្វ្រិកកណ្តាល ត្រូវបានដឹងថា ឆ្លងតាមរយៈទំនាក់ទំនងជិតស្និទ្ធបំផុត។ ចាប់តាំងពីដើមខែឧសភាមក ករណីជំងឺអុតស្វានេះកម្រកើតមាននៅខាងក្រៅតំបន់អាហ្វ្រិកណាស់ ហើយជាធម្មតាត្រូវបានផ្សារភ្ជាប់នឹងការធ្វើដំណើរទៅកាន់តំបន់នោះ។

ទីភ្នាក់ងារបាននិយាយថា ៖«ការផ្ទុះបច្ចុប្បន្នគឺជាលើកដំបូងហើយដែលវីរុសនេះបានឆ្លងពីមនុស្សម្នាក់ទៅមនុស្សម្នាក់ក្នុងប្រទេសអង់គ្លេសដែលការធ្វើដំណើរភ្ជាប់ទៅនឹងប្រទេសដែលឆ្លងមិនត្រូវបានលាតត្រដាង»។

យោងតាម UKHSA បង្ហាញថា ភាគច្រើនបំផុតនៃករណីកើតមាននៅអង់គ្លេសគឺមាន១៣២ករណីនៅទីក្រុងឡុងដ៍ ខណៈ១១១ករណីត្រូវបានរកឃើញក្នុងក្រុមមនុស្សប្រុសភេទទី៣ ឬបុរសស្រឡាញ់ភេទដូចគ្នា។ ក្នុងនោះមានតែ២ករណីប៉ុណ្ណោះជាមនុស្សស្រី។

ការធ្វើដំណើរបរទេសថ្មីៗទៅកាន់ប្រទេសផ្សេងគ្នាមួយចំនួនក្នុងតំបន់អឺរ៉ុបក្នុងរង្វល់២១ថ្ងៃ នៃការចាប់ផ្តើមរោគសញ្ញាគឺត្រូវបានរាយការណ៍ពីការបញ្ជាក់៣៤ករណី ឬប្រហែលជា១៨%នៃករណីជំងឺនេះចំនួន១៩០ត្រូវបានបញ្ជាក់ដោយចក្រភពអង់គ្លេសត្រឹមថ្ងៃទី៣១ ខែឧសភា។

រហូតដល់ពេលនេះ ទីភ្នាក់ងារសន្តិសុខសុខភាពអង់គ្លេសបានបង្ហាញពីការភ្ជាប់ទំនាក់ទំនងទៅនឹងបារភេទទី៣ ស៊ូណា និង ការប្រើប្រាស់ apps ណាត់ជួបទាំងក្នុងប្រទេសអង់គ្លេស និងក្រៅប្រទេស។

«ការស៊ើបអង្កេតនៅតែបន្តធ្វើ ប៉ុន្តែថ្មីៗនេះគ្មានសញ្ញានៃកត្តាណាមួយ ឬអ្វីដែលជាប់ពាក់ព័ន្ធត្រូវបានបង្ហាញឡើយ»។ ទីភ្នាក់ងារបាននិយាយ។

លោក Kevin Fenton នាយកមន្ទីរសុខាភិបាលក្រុងឡុងដ៍បាននិយាយថា ជំងឺអុតស្វាអាចមានផលប៉ះពាល់ដល់នរណាម្នាក់ ប៉ុន្តែរោគសញ្ញាភាគច្រើនថ្មីៗនេះគឺសហគមន៍ GBMSM ដែលភាគច្រើនរស់នៅ ឬទំនាក់ទំនងទៅទីក្រុងឡុងដ៍។

«ដូចទៅនឹងការផ្ទុះជំងឺថ្មីណាមួយដែរ ហានិភ័យនៃការមើលស្រាលគឺអាចធ្ងន់ធ្ងរ»។ លោកបាននិយាយពីការដាស់តឿន។

ទីភ្នាក់ងារ UKHSA កំពុងធ្វើការជាមួយក្រុមមនុស្សដែលមានសមាគមន៍សុខភាពផ្លូវភេទ និងជំងឺអេដស៍អង់គ្លេស ព្រមទាងក្រុមណាត់ជួប App Grindr ដែលមានទំនាក់ទំនងជាមួយសេវាសុខភាពផ្លូវភេទ និងសហគមន៍ GBMSM។ ទីភ្នាក់ងារក៏កំពុងជំរុញអ្នករៀបចំព្រឹត្តិការណ៍ LGBT Consortium និង Pride ឲ្យជួយផ្សព្វផ្សាយសារអប់រំ។

ជំងឺអុតស្វាជាធម្មតាបណ្តាលឱ្យមានរោគសញ្ញាដូចជំងឺផ្តាសាយ និងដំបៅស្បែកមានខ្ទុះ ដែលជាធម្មតាដោះស្រាយដោយខ្លួនឯងក្នុងរយៈពេលប៉ុន្មានសប្តាហ៍ ប៉ុន្តែអាចសម្លាប់មនុស្សក្នុងភាគរយទាប៕

ប្រែសម្រួល៖ វីរបុត្រ
ប្រភព៖ Reuters

The post ជំងឺអុតស្វាឆ្លងចូលសហគមន៍ហើយនៅអង់គ្លេស appeared first on Kampuchea Thmey Daily.

WHO ប្រឆាំងការដាក់បម្រាមធ្វើដំណើរ ទោះផ្ទុះជំងឺ អុតស្វា

សាង ស្រីល័ក្ខ — Sat, 28 May 2022 02:20:38 +0000

ប្រធាននាយកដ្ឋានជំងឺរាតត្បាតរបស់អង្គការ បាននិយាយកាលពីថ្ងៃសុក្រថា អង្គការសុខភាពពិភពលោក (WHO) មិនណែនាំប្រទេស ឲ្យដាក់កំហិតការធ្វើដំណើរ ដោយសារតែការផ្ទុះឡើងនៃជំងឺអុតស្វាឡើយ។

លោកស្រី Sylvie Briand

លោកស្រី Sylvie Briand បាននិយាយក្នុងអំឡុងសន្និសីទខ្លីមួយថា “យើងមិនណែនាំឲ្យហាមឃាត់ការធ្វើដំណើរ ឬការរឹតបន្តឹងទេ ហើយយើងត្រូវបន្តទំនាក់ទំនងអំពីអ្វីដែលយើងដឹង អ្វីដែលត្រូវធ្វើ” ។ ជាពិសេសបណ្ដាប្រទេសនានាត្រូវឆ្លើយតបឲ្យបានគ្រប់គ្រាន់ ចំពោះការរីករាលដាលនៃជំងឺអុតស្វា ដោយការតាមដានទំនាក់ទំនងរបស់អ្នកដែលឆ្លងមេរោគ និងដាក់ឲ្យនៅដាច់ដោយឡែកពីគេ។

ប្រធានលេខាធិការដ្ឋានជំងឺអុតស្វា នៅអង្គការសុខភាពពិភពលោក Rosamund Lewis បាននិយាយថា WHO មិនចាត់ទុកការចាក់វ៉ាក់សាំងទ្រង់ទ្រាយធំ ជាវិធានការចាំបាច់ ដើម្បីទប់ទល់នឹងការផ្ទុះឡើងនៃជំងឺអុតស្វានោះទេ។ លោកថា នេះគឺជាលក្ខខណ្ឌមួយដែលត្រូវបានបញ្ជូនជាចម្បង ដោយការប៉ះរាងកាយជិតស្និទ្ធ ស្បែកទៅស្បែក ការប៉ះមុខគ្នា ដូច្នេះហើយ ការតាមដានទំនាក់ទំនង ការស៊ើបអង្កេត និងការដាក់ឲ្យនៅដាច់ដោយឡែក របៀបគ្រប់គ្រងចម្បង សំខាន់សម្រាប់ពេលនេះ។

គួររំលឹកដែរថា ទីភ្នាក់ងារសន្តិសុខសុខភាពរបស់ចក្រភពអង់គ្លេស គឺជាអាជ្ញាធរសុខាភិបាលដំបូងគេនៅក្រៅទ្វីបអាហ្រ្វិក បានរាយការណ៍អំពីករណីជំងឺអុតស្វា កាលពីថ្ងៃទី ៧ ឧសភា ចំពោះអ្នកជំងឺដែលទើបតែបានធ្វើដំណើរទៅកាន់ប្រទេស នីហ្សេរីយ៉ា។ ចាប់តាំងពីពេលនោះមក ការផ្ទុះឡើងនៃជំងឺអុតស្វាក៏ត្រូវបានបញ្ជាក់ នៅក្នុងប្រទេសមួយចំនួន នៃទ្វីបអឺរ៉ុប និងអាមេរិកខាងជើង។ អុតស្វា គឺជាជំងឺមេរោគដ៏កម្រមួយ បានចម្លងទៅមនុស្សពីសត្វព្រៃ។ ជំងឺនេះអាចឆ្លងតាមរយៈវត្ថុរាវក្នុងរាងកាយ ដំណក់ទឹកតាមផ្លូវដង្ហើម និងវត្ថុធាតុកខ្វក់ផ្សេងទៀត ដែលជាធម្មតាបណ្ដាលឲ្យមានគ្រុនក្ដៅ ឡើងកន្ទួល និងហើមកូនកណ្ដុរ។

ដោយឡែក គិតត្រឹមថ្ងៃព្រហស្បតិ៍ WHO បានចុះបញ្ជីករណីជំងឺអុតស្វាប្រហែល ២០០ ករណី នៅជាង ២០ ប្រទេសជុំវិញពិភពលោក ដោយមានករណីចំនួន ១០០ ផ្សេងទៀត កំពុងត្រូវបានស៊ើបអង្កេត៕

ប្រែសម្រួល៖ សាង ស្រីល័ក្ខ

ប្រភព៖sputnik

ចុចអាន៖WHO៖ គ្មានភស្តុតាងណាបង្ហាញថា ជំងឺអុតស្វាមានការបំប្លែងខ្លួន

The post WHO ប្រឆាំងការដាក់បម្រាមធ្វើដំណើរ ទោះផ្ទុះជំងឺ អុតស្វា appeared first on Kampuchea Thmey Daily.

តើមានវ៉ាក់សាំង និងថ្នាំអ្វីដើម្បីបង្ការក៏ដូចជាព្យាបាលជំងឺអុតស្វា?

chean virakbot — Thu, 26 May 2022 03:28:23 +0000

ស្របពេលជំងឺអុតស្វាមិនត្រូវបានបកស្រាយពីមូលហេតុដែលផ្ទុះនៅខាងក្រៅតំបន់អាហ្វ្រិក មន្ត្រីសុខភាពសាធារណៈកំពុងតាមដាន ដាក់ឲ្យនៅដាច់ដោយឡែក និងវ៉ាក់សាំងជាគោលដៅសម្រាប់ការទប់ស្កាត់។

មន្ត្រីសុខភាពសកលបានតាមដានជំងឺអុតស្វាដែលសង្ស័យ និងបញ្ជាក់ចំនួនជាង២០០ករណីដែលចម្លែកចំពោះការឆ្លងក្នុងប្រទេសចំនួន១៩គិតចាប់តាំងពីដើមខែឧសភាមក។ ជំងឺអុតស្វាផ្ទុះថ្មីៗនេះមានហានិភ័យបណ្តាលឲ្យស្លាប់ប្រហែលជា១%ប៉ុណ្ណោះ ប៉ុន្តែរហូតដល់ពេលនេះមិនទាន់មានសេចក្តីរាយការណ៍ពីករណីស្លាប់ឡើយ។

នេះជាអ្វីដែលយើងដឹងអំពីវ៉ាក់សាំង និងថ្នាំព្យាបាលដែលមានស្រាប់៖

វ៉ាក់សាំង

អង្គការសុខភាពពិភពលោក (WHO) បាននិយាយថា វីរុសអុតស្វាយ និងអុតស្វាជាប់ពាក់ព័ន្ធគ្នាយ៉ាងជិតស្និទ្ធ ហើយវ៉ាក់សាំងជំងឺអុតស្វាយជំនាន់ទី១ទំនងជាមានប្រសិទ្ធភាព៨៥%សម្រាប់បង្ការជំងឺអុតស្វា។

វ៉ាក់សាំងបច្ចុប្បន្នមានពីរប្រភេទសម្រាប់ជំងឺអុតស្វាយ។ ទីមួយផលិតដោយក្រុមហ៊ុនដាណឺម៉ាក Bavarian Nordic ដែលមានឈ្មោះវ៉ាក់សាំង Jynneos, Imvamune ឬ Imvanex ដែលអាស្រ័យលើភូមិសាស្ត្រ។

វាផ្ទុកទម្រង់ខ្សោយនៃវីរុសវ៉ាក់សាំងដែលជាប់ពាក់ព័ន្ធគ្នាជិតដិត ប៉ុន្តែមានគ្រោះថ្នាក់តិចជាងមេរោគដែលបណ្តាលមកពីជំងឺអុតស្វាយ និងអុតស្វា។ កំណែទម្រង់វ៉ាក់សាំងនេះមិនបង្កជំងឺក្នុងមនុស្សទេ ហើយក៏មិនអាចបន្តពូជនៅក្នុងកោសិកាមនុស្សដែរ។

វាទទួលបានការអនុម័តពីសហរដ្ឋអាមេរិកសម្រាប់បង្ការជំងឺអុតស្វាយ និងអុតស្វា។ ការអនុម័តរបស់សហភាពអឺរ៉ុបសម្រាប់តែជំងឺអុតស្វាយ ប៉ុន្តែវេជ្ជបណ្ឌិតបានចេញវេជ្ជបញ្ជាឲ្យវាបិតស្លាសម្រាប់ជំងឺអុតស្វាដែរ។ ក្រុមហ៊ុន Bavarian Nordic បាននិយាយថា ខ្លួនប្រហែលនឹងដាក់ពាក្យស្នើសុំដាក់ស្លាបន្ថែមទៅអាជ្ញាធរឱសថសហភាពអឺរ៉ុបដើម្បីបញ្ចូលទាំងជំងឺអុតស្វា។

ផលរំខានដែលត្រូវបានរាយការណ៍រាប់បញ្ចូលទាំងការឈឺចាប់ និងហើមនៅកន្លែងចាក់ ព្រមទាំងឈឺក្បាល និងអស់កម្លាំងផងដែរ។

វ៉ាក់សាំងប្រភេទផ្សេងទៀតត្រូវបានផលិតដោយក្រុមហ៊ុន Emergent Biosolutions ដែលហៅថា វ៉ាក់សាំង ACAM2000។

ផលរំខានដូចទៅនឹងវ៉ាក់សាំងជាច្រើនប្រភេទទៀតដែរ ដូចជាឈឺដៃ និងអស់កម្លាំង។ វាក៏មានការព្រមានធ្ងន់ធ្ងរសម្រាប់ផលលំបាកខ្លាំងរាប់ទាំងរលាកបេះដូង ពិការភ្នែកជាដើម។

វាក៏មិនត្រូវបានធ្វើឡើងដើម្បីប្រើសម្រាប់ក្រុមមនុស្សជាក់លាក់ឡើយដូចជាអ្នកដែលមានប្រព័ន្ធការពាររាងកាយខ្សោយ។

វ៉ាក់សាំង ACAM2000 ទទួលបានការអនុម័តពីសហរដ្ឋអាមេរិកសម្រាប់មនុស្សដែលមានហានិភ័យខ្ពស់ចំពោះជំងឺអុតស្វាយ។ វាមិនទទួលបានការអនុញ្ញាតនៅសហភាពអឺរ៉ុបទេ។

ថ្នាំព្យាបាល

រោគសញ្ញាជំងឺអុតស្វាដែលមានក្តៅខ្លួន ឈឺក្បាល កន្ទួលប្លែកៗ និងដំបៅស្បែកដែលមានខ្ទុះ អាចមានរយៈពេល២ទៅ៤សប្តាហ៍ ហើយជារឿយបាត់ទៅវិញដោយខ្លួនឯង។

អ្នកជំងឺអាចទទួលសារធាតុរាវបន្ថែម និងការព្យាបាលសម្រាប់ការឆ្លងបាតេរីបន្ទាប់បន្សំ។ ថ្នាំព្យាបាលមួយប្រភេទ Tecovirimat ដែលមានម៉ាក TPOXX ត្រូវបានផលិតដោយក្រុមហ៊ុន SIGA Technologies ទទួលបានការអនុម័តនៅសហរដ្ឋអាមេរិក និងសហភាពអឺរ៉ុបសម្រាប់ព្យាបាលជំងឺអុតស្វាយ ខណៈការអនុម័តរបស់អឺរ៉ុបក៏រាប់ទាំងជំងឺអុតស្វា និងអុតធំ។

ថ្នាំផ្សេងទៀតឈ្មោះ Tembexa ផលិតដោយក្រុមហ៊ុន Chimerix ទទួលបានការអនុម័តនៅសហរដ្ឋអាមេរិកដើម្បីព្យាបាលជំងឺអុតស្វាយ។ វាមិនច្បាស់ទេថាតើវាអាចជួយព្យាបាលអ្នកជំងឺអុតស្វាដែរ ឬយ៉ាងណា។

ទាំងថ្នាំ TPOXX និង Tembexa ត្រូវបានអនុម័តផ្អែកលើការសិក្សានៅក្នុងសត្វដែលបង្ហាញថា ពួកគេទំនងជាមានប្រសិទ្ធភាព ពីព្រោះពួកគេត្រូវបានផលិតឡើង បន្ទាប់ពីជំងឺអុតស្វាយនៅក្នុងមនុស្សត្រូវបានលុបបំបាត់តាមរយៈការចាក់វ៉ាក់សាំង៕

ប្រែសម្រួល៖ វីរបុត្រ
ប្រភព៖ Reuters

The post តើមានវ៉ាក់សាំង និងថ្នាំអ្វីដើម្បីបង្ការក៏ដូចជាព្យាបាលជំងឺអុតស្វា? appeared first on Kampuchea Thmey Daily.

អាល្លឺម៉ង់បញ្ជាទិញវ៉ាក់សាំងអុតស្វា៤ម៉ឺនដូសដើម្បីត្រៀមខ្លួនជាមុន

chean virakbot — Wed, 25 May 2022 05:36:14 +0000

ប្រទេសអាល្លឺម៉ង់បានបញ្ជាទិញវ៉ាក់សាំង Bavarian Nordic ចំនួន៤ម៉ឺនដូសដើម្បីត្រៀមចាក់អ្នកដែលបានឆ្លងជំងឺអុតស្វា ប្រសិនបើការផ្ទុះក្នុងប្រទេសមានស្ថានភាពធ្ងន់ធ្ងរ ប៉ុន្តែមន្ត្រីកំពុងចាត់វិធានការផ្សេងៗដើម្បីទប់ស្កាត់ឥឡូវនេះ។

និយាយក្នុងសន្និសីទសារព័ត៌មាន រដ្ឋមន្ត្រីក្រសួងសុខាភិបាលអាល្លឺម៉ង់ លោក Karl Lauterbach បាននិយាយកាលពីថ្ងៃអង្គារ៍ថា វិធានការដូចជាការដាក់នៅដាច់ដោយឡែកក្នុងរយៈពេលហោចណាស់២១ថ្ងៃសម្រាប់អ្នកឆ្លងគឺគ្រប់គ្រាន់សម្រាប់ការទប់ស្កាត់។

«ប្រសិនបើការរាលដាលបន្ថែមទៀត យើងនឹងចង់ត្រៀមខ្លួនដែលអាចទៅរួចគឺចាក់វ៉ាក់សាំងដែលមិនទាន់ត្រូវបានណែនាំទេនៅពេលនេះ ប៉ុន្តែប្រហែលជាអាចចាំបាច់»។ លោក Lauterbach និយាយដោយយោងលើយុទ្ធសាស្ត្រនៃការចាក់វ៉ាក់សាំងសម្រាប់អ្នកឆ្លង។

លោកបានបន្តថា ការផ្ទុះនៃជំងឺអុតស្វាអាចត្រូវបានទប់ស្កាត់បាន ហើយមិនមានសញ្ញានៃការចាប់ផ្តើមណាមួយនៃការរាតត្បាតថ្មីឡើយ។ អន្តរាគមន៍ទាន់ពេលវេលាអាចការពារបានយ៉ាងរឹងមាំមិនឲ្យមេរោគឆ្លងក្នុងសហគមន៍។

លោក Lothar Wieler ប្រធានវិទ្យាស្ថាន Robert Koch សម្រាប់ជំងឺឆ្លងប្រទេសអាល្លឺម៉ង់បាននិយាយថា រហូតដល់ពេលនេះមានករណីជំងឺអុតស្វា៥ត្រូវបានចុះបញ្ជីនៅអាល្លឺម៉ង់។

កាលពីថ្ងៃចន្ទ មន្ត្រីអង្គការសុខភាពពិភពលោកបានចេញសេចក្តីណែនាំស្រដៀងគ្នាដោយនិយាយថា ការផ្ទុះមិនតម្រូវឲ្យមានការចាក់វ៉ាក់សាំងទ្រង់ទ្រាយធំឡើយ ពីព្រោះវិធានការការពារដូចជា អនាម័យល្អ និងឥរិយាបថរួមភេទសុវត្ថិភាពនឹងជួយទប់ស្កាត់ការរីករាលដាលបាន។

អង្គការសុខភាពពិភពលោកបានចុះបញ្ជីពីករណីជំងឺអុតស្វាដែលបានបញ្ជាក់ និងសង្ស័យចំនួន២៥០ហើយជាមួយនឹងភូមិសាស្ត្ររាលដាលគឺខុសប្លែកសម្រាប់ជំងឺដែលកើតមានភាគច្រើនបំផុតនៅអាហ្វ្រិកខាងលិច និងកណ្តាល ប៉ុន្តែកម្រកើតមានកន្លែងផ្សេងណាស់៕

ប្រែសម្រួល៖ វីរបុត្រ
ប្រភព៖ Reuters

The post អាល្លឺម៉ង់បញ្ជាទិញវ៉ាក់សាំងអុតស្វា៤ម៉ឺនដូសដើម្បីត្រៀមខ្លួនជាមុន appeared first on Kampuchea Thmey Daily.

ជំងឺ​អុតស្វា Archives - Kampuchea Thmey Daily

លោកស្រី ឱ វណ្ណឌីន ប្រាប់ស្ថានភាពសុខភាពអ្នកជំងឺអុតស្វា និងអ្នកប៉ះពាល់ទាំង ៥ នាក់

WHO ថា រុស្ស៊ី មានហានិភ័យផ្ទុះជំងឺអុតស្វាខ្ពស់ណាស់

កូរ៉េ​​ខាង​​ត្បូង​​រាយការណ៍​​ពី​​ករណី​សង្ស័យ​ជំងឺ​​អុត​​ស្វា​លើក​​ដំបូង