ជំនួយ Archives - Kampuchea Thmey Daily

រដ្ឋបាល ត្រាំ សន្យាផ្តល់លុយ ១.៨ប៊ីលានបន្ថែម ដល់ UN ជាមូលនិធិបម្រុង

Minea Neu — Fri, 15 May 2026 06:56:38 +0000

រដ្ឋបាល លោក ដូណាល់ ត្រាំ ប្រកាសកាលពីថ្ងៃព្រហស្បតិ៍ ថា សហរដ្ឋអាមេរិកនឹងប្រគល់កញ្ចប់ថវិកាបន្ថែមចំនួន ១.៨ប៊ីលានដុល្លារសម្រាប់ជំនួយមនុស្សធម៌ ដល់អង្គការសហប្រជាជាតិ (UN) ជាទ្រព្យបម្រុងទុកសម្រាប់ជំនួយសង្គ្រោះជីវិតដល់ជនរងគ្រោះនៃគ្រោះមហន្តរាយធម្មជាតិ គ្រោះទុរ្ភិក្ស និងមនុស្សត្រូវការជំនួយខ្លាំង ទោះបីជាសហរដ្ឋអាមេរិកបានកាត់បន្ថយជំនួយបរទេសជារួមក៏ដោយ។

យោងតាមភ្នាក់ងារសារព័ត៌មាន AP ផ្សាយថ្ងៃទី១៥ ខែឧសភា ឆ្នាំ២០២៦ ថវិកាទាំងនោះនឹងត្រូវបែងចែកក្នុងរយៈពេលមួយឆ្នាំខាងមុខបន្ថែមទៅលើថវិកាចំនួន ២ប៊ីលានដុល្លារដែលរដ្ឋបាល លោក ត្រាំ បានសន្យាកាលពីខែធ្នូ។

លោក Mike Waltz ឯកអគ្គរដ្ឋទូតសហរដ្ឋអាមេរិកប្រចាំ UN. រូបភាព៖ Reuters

លោក Mike Waltz ឯកអគ្គរដ្ឋទូតសហរដ្ឋអាមេរិកប្រចាំអង្គការសហប្រជាជាតិ លើកឡើងក្នុងសន្និសីទសារព័ត៌មានមួយថា៖ « មូលនិធិថ្មីនេះ គ្រាន់តែជាជំហានចុងក្រោយបំផុតប៉ុណ្ណោះ»។

ការចូលរួមវិភាគទានថ្មីនេះ បាននាំមកនូវការគាំទ្រសរុបរបស់សហរដ្ឋអាមេរិក សម្រាប់កម្មវិធីមនុស្សធម៌របស់អង្គការសហប្រជាជាតិដល់ ៣.៨ពាន់លានដុល្លារ នៅទូទាំងប្រទេសចំនួន២១ ។

បើយោងតាមក្រសួងការបរទេសឱ្យដឹងថា ថវិកានោះនឹងត្រូវបានផ្តល់អាទិភាពសម្រាប់គម្រោងដំណើរការក្នុងស្រុក ជួយដល់ប្រជាជនងាយរងគ្រោះបំផុត។

ក្រសួងការបរទេសបន្ថែមថា៖ « ការចូលរួមវិភាគទានដំបូងបានផ្តល់ជំនួយសង្គ្រោះជីវិតដល់មនុស្ស ២១.១លាននាក់ លឿនជាងមុន មានប្រសិទ្ធភាពជាងមុន និងផ្តោតការយកចិត្តទុកដាក់កាន់តែខ្លាំងលើអ្នកដែលប្រឈមមុខនឹងតម្រូវការមនុស្សធម៌ធ្ងន់ធ្ងរបំផុតក្នុងរយៈពេលតិចជាងបួនខែ»។

យ៉ាងណា ចំនួនទឹកប្រាក់នេះគ្រាន់តែមួយភាគតូចមួយដែលសហរដ្ឋអាមេរិកបានចូលរួមវិភាគទានកាលពីអតីតកាល ហើយឆ្លុះបញ្ចាំងលើរដ្ឋបាលរបស់ លោក ដូណាល់ ត្រាំ នៅតែជឿថាចំនួនទឹកប្រាក់ដ៏សប្បុរសនេះនឹងរក្សាតំណែងអាមេរិកក្នុងនាមជាអ្នកបរិច្ចាគមនុស្សធម៌ធំជាងគេបំផុតរបស់ពិភពលោក។

រដ្ឋបាល លោក ត្រាំ ធ្លាប់បានកាត់បន្ថយជំនួយបរទេសរបស់សហរដ្ឋអាមេរិករាប់លានដុល្លា ធ្វើឱ្យទីភ្នាក់ងារអង្គការសហប្រជាជាតិកាត់បន្ថយការចំណាយ គម្រោងជំនួយ និងការងាររាប់ពាន់កន្លែង៕

សម្រួល៖ ណឺ មិនា

The post រដ្ឋបាល ត្រាំ សន្យាផ្តល់លុយ ១.៨ប៊ីលានបន្ថែម ដល់ UN ជាមូលនិធិបម្រុង appeared first on Kampuchea Thmey Daily.

ផ្ទុះការវែកញែក! ក្រោយអតីតតួសម្តែង F4 ខ្មែរ ចេញសារសុំចិត្តអ្នកសិល្បៈកុំបង្ហោះសុំជំនួយ បើមិនខ្វះខាតខ្លាំង

Chan Sotheavy — Thu, 02 Apr 2026 08:45:42 +0000

ថ្មីៗនេះ បណ្តាញសង្គមហ្វេសប៊ុកបានផ្ទុះការចាប់អារម្មណ៍ និងវែកញែកយ៉ាងខ្លាំង បន្ទាប់ពីអតីតតួសម្តែងក្នុងរឿង F4 ខ្មែរ លោក សោ ពន្លឺ បានបង្ហោះសារសុំទៅកាន់អ្នកសិល្បៈមួយចំនួន កុំបង្ហោះសុំជំនួយ ប្រសិនបើមិនស្ថិតក្នុងស្ថានភាពខ្វះខាតធ្ងន់ធ្ងរ ដោយលោកព្រមានថា អាចនាំឱ្យប៉ះពាល់ដល់កិត្តិយសរបស់អ្នកសិល្បៈខ្មែរទូទៅ។

លោក សោ ពន្លឺ បោះបង់អាជីពសិល្បៈអស់ជាច្រើនឆ្នាំ ខណៈកំពុងរស់នៅប្រទេសអូស្ត្រាលី ជាមួយភរិយា និងកូនស្រីចំនួន៣នាក់ ក្នុងជីវិតគ្រួសារដ៏មានសុភមង្គល។ ទោះបីចាកឆ្ងាយពីវិស័យសិល្បៈក៏ដោយ រូបរាង និងសម្រស់របស់លោកនៅតែទាក់ទាញ ដូចកាលពីនៅលើវិថីសិល្បៈមុនៗ។

យ៉ាងណាមិញ កាលពីថ្ងៃទី១ ខែមករា កន្លងទៅ លោកបានបង្ហោះសារនៅលើគណនីផ្ទាល់ខ្លួន ដោយមានខ្លឹមសារថា សូមអោយអ្នកសិល្បៈមួយចំនួន បើមិនមានបញ្ហាខ្វះខាតខ្លាំងទេ គួរជៀសវាងការបង្ហោះសុំជំនួយ ដើម្បីរក្សាកេរ្តិ៍ឈ្មោះ និងតម្លៃរបស់អ្នកសិល្បៈខ្មែរ។

ភ្លាមៗបន្ទាប់ពីការបង្ហោះនេះ បានបង្កឲ្យមានមតិចម្រូងចម្រាសពីសំណាក់អ្នកលេងបណ្តាញសង្គម និងមិត្តរួមអាជីពសិល្បៈ។ ក្នុងនោះ លោក Sool Cool បានបញ្ចេញមតិថា មិនគួរនិយាយបែបនោះទេ ព្រោះគ្មាននរណាម្នាក់ចង់បង្ហាញភាពលំបាក ឬការឈឺចាប់របស់ខ្លួនឡើយ ហើយមនុស្សគ្រប់រូបសុទ្ធតែមានបញ្ហាផ្ទាល់ខ្លួនខុសៗគ្នា។

ជាមួយគ្នានេះដែរ តារាភេទទី៣ កញ្ញា ប៉ុបពី ក៏បានបញ្ចេញមតិស្រដៀងគ្នា ដោយគាំទ្រថា ការសុំជំនួយគឺជាជម្រើសចុងក្រោយមួយសម្រាប់មនុស្សមួយចំនួន ហើយគួរត្រូវបានយល់ចិត្ត និងគាំទ្រ ជាងការរិះគន់។

ការវែកញែកនេះបន្តកើតមានយ៉ាងក្តៅគគុកលើបណ្តាញសង្គម ខណៈមហាជនមួយផ្នែកគាំទ្រទស្សនៈរបស់លោក សោ ពន្លឺ ប៉ុន្តែម្ខាងទៀតវិញ សូមឲ្យមានការយល់ចិត្ត និងគាំទ្រចំពោះអ្នកដែលកំពុងប្រឈមបញ្ហាជាក់ស្តែងផងដែរ៕ ដោយ៖ ចាន់រ៉ា

The post ផ្ទុះការវែកញែក! ក្រោយអតីតតួសម្តែង F4 ខ្មែរ ចេញសារសុំចិត្តអ្នកសិល្បៈកុំបង្ហោះសុំជំនួយ បើមិនខ្វះខាតខ្លាំង appeared first on Kampuchea Thmey Daily.

ចៅក្រមអាមេរិកមិនឲ្យរដ្ឋបាល ត្រាំ កាត់ជំនួយផ្នែកការថែទាំកុមារពី៥រដ្ឋ

Minea Neu — Sun, 11 Jan 2026 03:00:53 +0000

ចៅក្រមរដ្ឋសហព័ន្ធ បានសម្រេចកាលពីថ្ងៃសុក្រថា រដ្ឋបាលរបស់ប្រធានាធិបតី ដូណាល់ ត្រាំ មិនអាចកាត់ផ្តាច់ប្រាក់សហព័ន្ធសម្រាប់ការឧបត្ថម្ភលើការថែទាំកុមារ និងកម្មវិធីផ្សេងទៀតដែលមានគោលបំណងជួយដល់កុមារខ្វះខាត និងគ្រួសាររបស់ពួកគេទៅកាន់រដ្ឋចំនួនប្រាំ ដែលជារដ្ឋប្រជាធិបតេយ្យ ក្នុងសហរដ្ឋអាមេរិក។

លេខាធិការសុខភាព និងសេវាមនុស្ស (HHS) លោក Robert F. Kennedy Jr, Reuters.

យោងតាមសារព័ត៌មាន ABC News ឱ្យដឹងថា រដ្ឋ California, Colorado, Illinois, Minnesota, New York បានប្រកែកថា គោលនយោបាយដែលបានប្រកាសកាលពីថ្ងៃអង្គារ គឺដើម្បីបង្កកមូលនិធិសម្រាប់កម្មវិធីជំនួយចំនួនបី កំពុងមានផលប៉ះពាល់យ៉ាងខ្លាំងលើកុមារ និងបង្កើតឱ្យមានភាពវឹកវរក្នុងប្រតិបត្តិការ។

តែយ៉ាងណា នៅក្នុងឯកសាររបស់តុលាការ និងសវនាការ កាលពីព្រឹកថ្ងៃសុក្រ រដ្ឋនានាបានជំទាស់ថា រដ្ឋាភិបាលសហរដ្ឋអាមេរិកមិនមានហេតុផលផ្លូវច្បាប់ណាមួយ សម្រាប់ការដកប្រាក់ពីរដ្ឋទាំងនោះទេ។

គួរឱ្យដឹងថា នាយកដ្ឋានសុខភាព និងសេវាមនុស្សរបស់សហរដ្ឋអាមេរិក បាននិយាយថា ខ្លួនកំពុងផ្អាកការផ្តល់មូលនិធិនេះ ដោយសារតែវាមានហេតុផលមួយជឿថារដ្ឋកំពុងផ្តល់អត្ថប្រយោជន៍ដល់ប្រជាជននៅក្នុងប្រទេសដោយខុសច្បាប់ ទោះបីជាវាមិនបានផ្តល់ភស្តុតាង ឬពន្យល់ពីមូលហេតុដែលផ្តោតលើរដ្ឋទាំងនោះ និងមិនមែនរដ្ឋផ្សេងទៀតក៏ដោយ។

ក្នុងនោះរដ្ឋទាំងប្រាំថាពួកគេទទួលបានប្រាក់សរុបជាង ១០ប៊ីលានដុល្លារក្នុងមួយឆ្នាំពីកម្មវិធីផ្តល់ជំនួយ។

មិនតែប៉ុណ្ណោះ ចៅក្រមរបស់អាមេរិក លោក Arun Subramanian ដែលត្រូវបានតែងតាំង ដោយអតីតប្រធានាធិបតី Joe Biden មិនបានគ្រប់គ្រងលើភាពស្របច្បាប់នៃការបង្កកមូលនិធិនោះទេ ប៉ុន្តែលោកបាននិយាយថា រដ្ឋទាំងប្រាំបានឈានដល់កម្រិតផ្លូវច្បាប់ ដើម្បីការពារស្ថានភាពបច្ចុប្បន្ន យ៉ាងហោចណាស់ ១៤ថ្ងៃ ខណៈដែលការជជែកវែកញែកពីរឿងនេះ ត្រូវបានធ្វើឡើងនៅក្នុងតុលាការ។

តែយ៉ាងណា លោកស្រី Kamika Shaw ជាមេធាវីរបស់រដ្ឋាភិបាលសហព័ន្ធ បាននិយាយថា នេះជាការយោគយល់របស់នាង ដែលប្រាក់មិនបានឈប់ផ្តល់ចូលរដ្ឋទេ៕

ប្រែសម្រួល៖ ណឺ មិនា

The post ចៅក្រមអាមេរិកមិនឲ្យរដ្ឋបាល ត្រាំ កាត់ជំនួយផ្នែកការថែទាំកុមារពី៥រដ្ឋ appeared first on Kampuchea Thmey Daily.

ឆឹម សក្កដា ផ្តាំទៅបណ្ឌិតហ្វេសប៊ុកមួយចំនួន កុំដេករិះគន់រឿងចុះជួយកងទ័ព

Chan Sotheavy — Fri, 26 Dec 2025 08:07:00 +0000

តារាសម្តែងលោក ឆឹម សក្កដា បានបង្ហាញអារម្មណ៍ហួសចិត្តខ្លាំង ខណ:ដែលសកម្មភាពចុះជួយដល់វីរកងទ័ពជួរមុខនិងបងប្អូនភៀសសឹកនៅតាមព្រំដែល តែត្រូវបានបណ្ឌិតហ្វេសប៊ុកមួយចំនួន ចុចទូរស័ព្ទចាំតែរិះគន់។ ក្នុងនោះ លោកក៏បានផ្តាំថា លោកធ្វើមនុស្សធម៌ មិនចង់បានមុខមាត់នោះទេ។

តារាប្រុសរាងសង្ហាលោក ឆឹម សក្កដា បានឱ្យដឹងថា ការចុះជួយបងប្អូនវីរកងទ័ពនិងជនភៀសសឹកលោកយល់ច្បាស់ណាស់ថា កន្លែងណាគួរផុស ឬមិនគួរ ហើយក៏ដឹងជាងបណ្ឌិតហ្វេសប៊ុកមួយចំនួនទៀតដែរ។

លោក សក្កដា ចោទសួរវិញថា “សង្រ្គាមលើកនេះខ្ញុំជួយទ័ពបានច្រើនកន្លែងណាស់ ខ្ញុំមានដែលផុសអត់? តែមានអ្នកផុសថាទ័ពម្នាក់ស្លាប់ហើយស៊ែរច្រើនទាំងដែលគាត់នៅរស់ ទើបគាត់ចង់ឱ្យខ្ញុំផុសប្រាប់ហើយមើលវីឌីអូផង ពួកបណ្ឌិតឯងដឹងថានៅណាអត់?”។ លោកផ្តាំថា កុំធ្វើដូចស្រលាញ់ទ័ពស្រលាញ់ជាតិតែម្នាក់ឯងអី។

តារាសម្តែងលោក ឆឹម សក្កដា បានបន្ថែមថា ពេលលោកយកជំនួយទៅជួយជនភៀសសឹកមានគេប្រាប់ថាយកទៅជួបជាមួយអ្នកធំនេះអ្នកធំនោះទៅគឺបានស្គាល់ពួកគាត់ មានមុខមាត់ស្គាល់អ្នកធំ ប៉ុន្តែលោកថាមិនចង់បានមុខមាត់ ឬស្គាល់អ្នកធំណាទេចង់ចែកផ្ទាល់ដៃខ្លួនឯង។

កាលពីដើមខែតុលាកន្លងទៅតារាសម្តែងលោក ឆឹម សក្កដា បានសម្រេចបង្កើតមូនិធិ “សិល្បករទ្រទ្រង់ដល់វីរកងទ័ព” ដោយលោកនឹងដឹកនាំសិល្បករសិល្បការិនីល្បីៗជាច្រើនដួង ចេញទៅច្រៀងនិងសម្តែងនៅលើទឹកដីប្រទេសកូរ៉េដើម្បីរៃអង្គាសថវិកាសប្បុរសជនជួយដល់កងទ័ពជួរមុខ៕ ដោយ ៖ ចាន់រ៉ា

The post ឆឹម សក្កដា ផ្តាំទៅបណ្ឌិតហ្វេសប៊ុកមួយចំនួន កុំដេករិះគន់រឿងចុះជួយកងទ័ព appeared first on Kampuchea Thmey Daily.

អ្នកសមរភូមិក្រោយ បន្តផ្ដល់ជំនួយទៅសមរភូមិមុខ ក្នុងគ្រាប្រទេសជាតិកំពុងទទួលរងការឈ្លានពានទឹកដីពីថៃ

អ៊ិន ពិសី — Mon, 15 Dec 2025 03:10:52 +0000

ប្រជាពលរដ្ឋដែលជាអ្នកសមរភូមិក្រោយ មិនបាននៅស្ងៀមឡើយ ពោលបន្តផ្តល់ជំនួយឧបត្ថម្ភទៅកាន់អ្នកនៅសមរភូមិមុខ ក្នុងគ្រាប្រទេសជាតិកំពុងទទួលរងការឈ្លានពានទឹកដីធ្ងន់ធ្ងរពីប្រទេសសៀម។

លោក មាន រដ្ឋា ហៅ ពូចិន ជាអ្នកកៀរគរប្រមូលជំនួយឧបត្ថម្ភនានាពីសប្បុរសជន បានបញ្ជាក់ថា ក្នុងគ្រាដែលប្រទេសជាតិជួបបញ្ហាជម្លោះព្រំដែនតាមរយៈការបើកការឈ្លានពានពីសំណាក់ប្រទេសថៃរួចមក កម្លាំងសាមគ្គីភាពដ៏ខ្លាំងក្លារបស់ប្រជាជនកម្ពុជា បានរួបរួមគ្នា ក្នុងការបន្តជួយឧបត្ថម្ភជាសម្ភារ ស្បៀងអាហារ ថវិកា និងសម្លៀកបំពាក់ជាដើម ដើម្បីជួយបន្តទៅកាន់វីរជនកងទ័ពអង់អាចហានក្លារបស់កម្ពុជា ក៏ដូចជាជនភៀសសឹក នៅសមរភូមិមុខ។

លោក មាន រដ្ឋា បានបង្ហាញ និងសង្ឃឹមជឿជាក់យ៉ាងមុតមាំខ្លាំងថា ក្នុងនាមប្រជាពលរដ្ឋ ក្រោមដំបូលសន្តិភាព បានកោតសរសើរគាំទ្រលើប្រមុខរាជរដ្ឋាភិបាល សម្ដេចតេជោ ហ៊ុន សែន និងសម្ដេចមហាបវរធិបតី ហ៊ុន ម៉ាណែត ក្នុងការដឹកនាំបញ្ជាក្នុងសមរភូមិដ៏ក្ដៅគគុកនេះ។

ពលរដ្ឋ ជាសប្បុរសជន សម្តែងនូវក្តីក្ដុកក្ដួលក្រៃលែងឥតឧបមា និងទទួលយកមិនបានដាច់ខាតលើទង្វើអមនុស្សធម៌ និងសាហាវព្រៃផ្សៃពីសំណាក់កងកម្លាំងយោធាថៃ ដែលបានបើកការបាញ់ប្រហារគ្មានមេត្តាឈ្លានពានចូលទឹកដីកម្ពុជា បណ្តាលឲ្យមនុស្សជាច្រើនត្រូវរងរបួស និងស្លាប់។

តាមរយៈកម្លាំងសាមគ្គីភាពក្នុងការផ្តល់ជាជំនួយឧបត្ថម្ភទៅកាន់អ្នកសមរភូមិមុខនេះដែរ ប្រជាជន ឬសប្បុរសជននានាទាំងអស់ អាចជួយទៅតាមរយៈអង្គភាព នៃស្ថាប័នរដ្ឋនានាដែលមានការរៀបចំទទួលជំនួយ ឬក៏តាមរយៈការឧបត្ថម្ភថវិកាតាមរយៈការស្កេនលើប្រព័ន្ធអនឡាញ ដែលអង្គភាពនីមួយៗ បានបង្ហាញលើបណ្ដាញទំនាក់ទំនងសង្គម ឬក៏យកទៅផ្ទាល់ដល់ទីតាំងទាំងឡាយមានការរៀបចំទទួល ដើម្បីក្រុមការងាររៀបចំចាត់ចែងបញ្ជូនបន្តទៅកាន់សមរភូមិមុខ ជួយដល់វីរជនកងទ័ព និងជនភៀសសឹកកម្ពុជា ក្នុងគ្រាប្រទេសជាតិកំពុងទទួលរងនូវការឈ្លានពានទឹកដី៕

អត្ថបទ ៖ សុភា

The post អ្នកសមរភូមិក្រោយ បន្តផ្ដល់ជំនួយទៅសមរភូមិមុខ ក្នុងគ្រាប្រទេសជាតិកំពុងទទួលរងការឈ្លានពានទឹកដីពីថៃ appeared first on Kampuchea Thmey Daily.

G-Devith ស្នើកុំបន្ថែមភ្លើងឱ្យរឿងតិចតួចក្លាយជារឿងធំ ព្រោះអាចនាំឱ្យបាត់បង់សេចក្តីថ្លៃថ្នូរ នៃសាមគ្គីសង្គមជាតិ

Chan Sotheavy — Sun, 14 Dec 2025 07:06:55 +0000

ក្រោយមានការវែកញែកពីសកម្មភាពពុំគួរកើតមានឡើងអំឡុងពេលប្រមូលជំនួយពីសប្បុរសជន នៅទីតាំងបឹងកក់ តារាចម្រៀងរ៉េបល្បីឈ្មោះ G-Devith ចេញមុខស្នើសុំឱ្យសាធារណជនមានការយោគយល់ និងថយម្នាក់មួយជំហ៊ាន ដោយកុំបន្ថែមភ្លើងរឿងតិចតួច ក្លាយជារឿងធំ ដែលអាចនាំឱ្យបាត់បង់នូវសេចក្តីថ្លៃថ្នូរនៃសាមគ្គីសង្គមជាតិ។

តាមរយៈវីដេអូជិត ៥នាទី លោក ងួន ចាន់ដេវីត ក្នុងនាមជាម្ចាស់មូលនិធិ “អ្នកចម្បាំងឈាមខ្មែរ” បានលើកជាយោបល់ខ្លះៗផងដែរទាក់ទងនឹងរឿងរ៉ាវរវាងក្រុមការងារស្ម័គ្រចិត្ត ដែលជាអ្នកទទួលស្តុកជំនួយ និងអ្នកគ្រប់គ្រងជំនួយ។ លោកស្នើឱ្យឈរលើជ្រុងមួយទៀត ដោយស្វែងយល់និងយល់អាធ្យាស្រ័យគ្នាក្នុងគ្រាដ៏លំបាកនេះ ដ្បិតម្នាក់ៗសុទ្ធតែអ្នកស្ម័គ្រចិត្តដើម្បីជាតិទាំងអស់គ្នា អ្នកធ្វើក៏ហត់ ឯអ្នកចូលរួមក៏មានទឹកចិត្ត ក្នុងន័យនេះ លោកចង់ឱ្យភាគីពាក់ព័ន្ធនីមួយៗ យោគយល់គ្នា។

លោកសង្កត់ធ្ងន់ដែរថា ក្នុងគ្រានេះ អ្វីដែលកម្ពុជាត្រូវបង្ហាញ គឺការរួបរួមសាមគ្គី និងភក្តីភាព មិនមែនជាការលើករឿងរ៉ាវនៃចានក្នុងរាវមកវែកញែកឱ្យក្លាយជាធំនោះទេ ព្រោះមិនត្រឹមប៉ះពាល់ដល់ទឹកចិត្តអ្នកស្ម័គ្រចិត្តចូលរួមនោះទេ ថែមទាំងធ្វើឱ្យបាត់បង់នូវសេចក្តីថ្លៃថ្នូរ នៃសាមគ្គីសង្គមជាតិទៀតផង។

លោកទទូចដូច្នេះថា “សូមមេត្តាសុំចិត្តបងប្អូនយើងមួយចំនួន កុំថែមភ្លើងទៅក្នុងរឿងតិចតួចដែលបង្ហាញពីការបែកបាក់សាមគ្គី វាអាចបណ្តាលឱ្យលុបបំបាត់នូវពត៍មានសំខាន់មួយចំនួន និងបាត់បង់នូវសេចក្តីថ្លៃថ្នូរនៃសាមគ្គីសង្គមជាតិ។ សូមស្តាប់វីដេអូលម្អិត៖

ពាក់ព័ន្ធនឹងរឿងរ៉ាវនេះដែរ លោក ហេង វិសាល ក្នុងនាមជាអ្នកផ្តួចផ្តើមមូលនិធិ និងកៀរគរសប្បុរសជននៅទីតាំងខាងលើរនោះដែរ បានចេញសារសម្តែងការសោកស្តាយ និងសុំឱ្យមានការយោគយល់ផងដែរ ព្រោះម្នាក់ៗទៅទីនោះ គឺទៅជួយដោយបេះដូង ហើយសុទ្ធតែចំណាយទាំងកម្លាំង និងថវិកាផ្ទាល់ខ្លួន ដូច្នេះមិនគួរមាននរណាម្នាក់ទទួលបានរឿងខកចិត្តដោយសារតែការជួយរបស់ពួកគាត់ឡើយ។

ជួសមុខឱ្យអ្នកស្ម័គ្រចិត្តទាំងអស់ លោក ហេង វិសាល ថា “ជាដំបូងខ្ញុំសូមអធ្យាស្រ័យ ព្រោះរឿងនេះពិតជាមិនគួរមានទេ ព្រោះទាំងក្រុមការងារ ក៏ដូចជាបងប្អូនទាំងអស់ ម្នាក់ៗទៅទីនោះគឺទៅជួយដោយបេះដូង ម្នាក់ៗសុទ្ធតែចំណាយយទាំងកម្លាំង ថវិការក៏ដូចជាទឹកចិត្ត ដូច្នេះមិនគួរមាននរណាម្នាក់ទទួលបានរឿងខកចិត្តដោយសារតែការជួយរបស់ពួកគាត់ទេ ខ្ញុំពិតជាសោកស្តាយដែរមានរឿងនេះហើយក៏សូមអធ្យាស្រ័យពីបងប្អូនទាំងអស់ជំនួសប្អូនស្រី ហើយក្រុមការងារនឹងដោះស្រាយរឿងនេះនៅក្នុងថ្ងៃនេះ”៕

The post G-Devith ស្នើកុំបន្ថែមភ្លើងឱ្យរឿងតិចតួចក្លាយជារឿងធំ ព្រោះអាចនាំឱ្យបាត់បង់សេចក្តីថ្លៃថ្នូរ នៃសាមគ្គីសង្គមជាតិ appeared first on Kampuchea Thmey Daily.

គូស្នេហ៍តារាចម្រៀង ថុល សុភិទិ បន្តឧបត្ថម្ភគាំទ្រ ២ម៉ឺនដុល្លារទៀត ជួយពលរដ្ឋ និងទិញអាវក្រោះជូនកងទ័ព

Chan Sotheavy — Thu, 18 Sep 2025 08:43:07 +0000

តាមរយៈជំនួយជាបន្តបន្ទាប់ អ្នកនាង ឡុង ម៉ានីន ដែលមហាជនស្គាល់ថាជាគូស្នេហ៍តារាចម្រៀងវ័យក្មេង ថុល សុភិទិ ប្រកាស នៅតែបន្តខ្នះខ្នែងរួមចំណែកនឹងថ្នាក់ដឹកនាំកម្ពុជា ខណៈទើបតែប្រកាសចំណាយ ២ម៉ឺនដុល្លារ ដើម្បីទិញអាវក្រោះជូនដល់វីរកងទ័ពជួរមុខ ព្រមនិងប្រជាជនដែលកំពុងតស៊ូជាមួយកងទ័ពសៀម ចូលឈ្លានពានទឹកដី និងប្រើហិង្សាយ៉ាងព្រៃផ្សៃ។

ជាការពិត អ្នកគាំទ្រកត់សម្គាល់ថា ចាប់តាំងពីមានការផ្ទុះសង្គ្រាមឈ្លានពានពីសំណាក់ចោរសៀមគូស្នេហ៍លោក ថុល សុភិទិ ដែលជាអ្នមជំនួញអនឡាញល្បី ឈ្មោះគឺអ្នកនាង ឡុង ម៉ានីន តែងបង្ហាញនូវឆន្ទ:ក្នុងការចូលរួមជាជំនួយសប្បុរសធម៌យ៉ាងសកម្មដល់វីរ: កងទ័និងបងប្អូនភៀសសឹកនៅតាមបន្ទាត់ព្រំដែលគួ រឲ្យសរសើរ។

តួយ៉ាងពេលនេះអ្នកនាង ឡុង ម៉ានីន បានចំណាយនូវថវិកាចំនួន ២ម៉ឺនដុល្លារ បន្ថែមទៀត សម្រាប់ទិញអាវក្រោះផ្តល់ជូនដល់វីរកងទ័ព និងប្រជាជន ដែលកំពុងតស៊ូរការពារទឹកដីពីឈ្លានពានរបស់ទាហានចោរសៀម។ ជាឆន្ទ: អ្នកនាង ឡុង ម៉ានីន បានបង្ហោះលើទំព័រហ្វេសប៊ុកថា “ខ្ញុំចំណាយថែម២ម៉ឺនដុល្លារ ទុកទិញអាវក្រោះជូនដល់កងទព័យើង និងប្រជាជនយើងដែលកំពុងតទាល់និងកងទ័ពសៀម”។

ទន្ទឹមគ្នានេះ អ្នកនាង ម៉ានីន ក៏សម្តែងការឈឺចាប់បន្ទាប់ឃើញទង្វើរយ៉ាងព្រៃផ្សៃរបស់ចោរសៀមមកលើប្រជាពលរដ្ឋ និងព្រះសង្ឃបណ្តាលឲ្យរងរបួសហើយសន្លប់ ក្នុងហេតុការណ៍ប៉ះទង្គិចដែលបង្កឡើងដោយទាហានសៀម បានរាយបន្លាលួសសាជាថ្មីនៅភូមិព្រៃចាន់ ឃុំអូរបីជាន់ ស្រុកអូរជ្រៅ ខេត្តបន្ទាយមានជ័យ ក្នុងទឹកដីកម្ពុជា ដោយទាហានសៀមប្រើអំពើហិង្សាយ៉ាងឃោរឃៅ បាញ់ផ្សែងពុល និងកាំភ្លើងគ្រាប់ច្នៃ ក៏ដូចជាឧបករណ៍បំពងសំឡេងមកលើរាស្ត្រខ្មែរដែលគ្មានអាវុធក្នុងដៃ៕ ចាន់រ៉ា

The post គូស្នេហ៍តារាចម្រៀង ថុល សុភិទិ បន្តឧបត្ថម្ភគាំទ្រ ២ម៉ឺនដុល្លារទៀត ជួយពលរដ្ឋ និងទិញអាវក្រោះជូនកងទ័ព appeared first on Kampuchea Thmey Daily.

តារាភាពយន្ត ច័ន្ទ តារាទី នាំយកអំណោយ និងស្បៀងសប្បុរជនពីសហរដ្ឋអាមេរិក ជូនដល់វីរកងទ័ពជួរមុខ

Chan Sotheavy — Fri, 05 Sep 2025 06:56:46 +0000

ជាការដឹងគុណ និងលើកទឹកចិត្តដល់វីរកងទ័ពជួរមុខ ដែលកំពុងឈរជើងការពារបូរណភាពទឹកដី តារាភាពយន្តជើងចាស់ល្បីឈ្មោះអ្នកស្រី ច័ន្ទ តារាទី ថ្មីៗនេះ បានដឹកនាំក្រុមសិល្បករទៅសួរសុខទុក្ខ និងនាំយកអំណោយសប្បុរសជនជូនដល់វីរកងទ័ពជួរមុខនៅតាមព្រំដែន។

អ្នកស្រី ច័ន្ទ តារាទី បានបញ្ជាក់ថា អំណោយដែលបានយកទៅប្រគល់ជូនដល់វីរកងទ័ពនោះ គឺបានមកពីសប្បុរសជននិងអតីតតារាភាពយន្ត យស បូវណ្ណៈ ដែលបច្ចុប្បន្នកំពុងរស់នៅឯសហរដ្ឋអាមេរិក ព្រមទាំងបងប្អូនសិល្បករសិល្បការិនីទាំងអស់ នៅទីក្រុងឡុងប៊ិច រដ្ឋកាលីហ្វញ៉ា សហរដ្ឋអាមេរិក។

តារាភាពយន្ត ច័ន្ទ តារាទី បានឱ្យដឹងទៀតថា អំណោយទាំងនោះមានដូចជា ម៉ូតូចំនួន ២គ្រឿង វិទ្យុទាក់ទងមួយចំនួនរួមនឹងសម្ភារ:ស្បៀងអាហារជាដើម ដើម្បីប្រគល់ជូនវីរកងទ័ពជួរមុខជាការគោរពដឹងគុណដល់វីរភាពដ៏អង់អាចក្លាហានរបស់ពួកគាត់ ដែលបានលះបង់សាច់ស្រស់ឈាមស្រស់ ការពារអធិបតេយ្យជាតិមាតុភូមិពីការឈ្លានពានរបស់ចោរសៀម។

សូមជម្រាប់ថាអ្នកស្រី ច័ន្ទ តារាទី គឺតារាសម្តែងភាពយន្តជើងចាស់ល្បីឈ្មោះ និងមានភាពលេចធ្លោខ្លាំងលើវិថីសិល្បៈនាអំឡុងក្នុងទសវត្សរ៍ឆ្នាំ៨០-៩០ រួមជំនាន់ជាមួយលោក សាវិន ហ្វីលីព; អ្នកនាង អម្ពរ ទេវី និងតារាសម្តែងលោក ទេព រិន្ទដារ៉ូ ដែលជាដៃគូសម្តែងដ៏ស័ក្តិសមបំផុតនាសម័យនោះ។ គិតរហូតមកទល់បច្ចុប្បន្ននេះ សម្រាប់អ្នកស្រី ច័ន្ទ តារាទី បានប្រឡូកក្នុងវិស័យសិល្ប:រយ:ពេលជាង ៤៣ឆ្នាំហើយ ដែលទីផ្សារសម្តែងនៅតែរក្សាបានការគាំទ្រខ្ពស់មិនមានកាចុះថមថយឡើយ៕ ចាន់រ៉ា

The post តារាភាពយន្ត ច័ន្ទ តារាទី នាំយកអំណោយ និងស្បៀងសប្បុរជនពីសហរដ្ឋអាមេរិក ជូនដល់វីរកងទ័ពជួរមុខ appeared first on Kampuchea Thmey Daily.