ឈុត សេរីវ៉ាន់ថង Archives - Kampuchea Thmey Daily

ឈុត សេរីវណ្ណថង រំលឹកអតីតកាលអាជីពប្រដាល់របស់ខ្លួនកើតចេញពីសង្វៀនវត្តត្រស់ពិសី

Sina Noun — Fri, 17 Apr 2026 04:18:01 +0000

កីឡាករ ឈុត សេរីវណ្ណថង រំលឹកទៅអតីតកាលរបស់ខ្លួនថាអាជីពប្រដាល់នេះកើតចេញពីការប្រកួតថ្នាលនៅសង្វៀនវត្តត្រស់ពិសី ស្រុកអូរតាគី ខេត្តបាត់ដំបងនេះហើយបណ្ដុះចិត្តស្រឡាញ់ និងបន្តរហូតក្លាយជាអ្នកប្រដាល់ដែលមានមហាជនស្គាល់ដូចសព្វថ្ងៃ។

រូបភាពលើផេក វណ្ណថង

អ្នកលេងគុនខ្មែរ ឈុត សេរីវណ្ណថង បានលើកឡើងក្នុងវីដេអូរបស់ខ្លួនថា អាជីពរបស់រូបគេគឺចាប់ផ្ដើមចេញពីសង្វៀនវត្តត្រស់ពិសីនៅឯស្រុកអូរតាគី ខេត្តបាត់ដំបង ដែលជាកន្លែងប្រកួតកម្សាន្តសប្បាយរបសស់អ្នកស្រុកភូមិរាល់ពេលបុណ្យប្រពៃណីខ្មែរនេះហើយ។

សង្វៀនវត្តត្រស់ពិសីជាកន្លែងដែលផ្ដល់ឱកាសឲ្យរូបគេបានឡើងប្រកួត បណ្ដុះចិត្តស្រឡាញ់ បង្ហាញសមត្ថភាព សន្សំបទពិសោធ កាលពីអតីតកាលរហូតក្លាយជាកីឡាករអាជីពមួយរូប និងមានសមត្ថភាពដូចសព្វថ្ងៃនេះ។ វណ្ណថង បញ្ជាក់ទៀតថា ប្រសិនបើមិនមានសង្វៀនខាងលើនេះទេក៏ពិបាកផងដែរ ព្រោះមិនសូវមានកន្លែងថ្នាលគុនខ្មែរប្រកួតច្រើននោះឡើយកាលជំនាន់មុន។

វណ្ណថង ទៅមើលការប្រកួតសង្វៀនត្រស់ពិសី

សិស្សគុនក្លឹបរាហ៊ូខេត្តបាត់ដំបងខាងលើសង្ឃឹមថា ថ្នាលជំនាន់ក្រោយៗដែលបានឡើងប្រកួតលើសង្វៀនវត្តត្រស់ពិសីនេះនឹងទទួលបានជោគជ័យ ឬភាពល្បីល្បាញលើវិស័យប្រដាល់គុនខ្មែរនៅថ្ងៃអនាគតដូចជាខ្លួនផ្ទាល់នៅពេលនេះ។

បញ្ជាក់ដែរថា ឈុត សេរីវណ្ណថង ជាកីឡាករល្បីឈ្មោះមួយរូបនៅកម្ពុជានាពេលបច្ចុប្បន្ននេះ។ រូបគេទទួលបានភាពជោគជ័យជាខ្លាំងលើវិថីប្រដាល់គុនខ្មែរនេះដោយមានកេរ្តិ៍ឈ្មោះល្បី មានតម្លៃខ្លួនប្រកួតខ្ពស់ និងឈ្នះខ្សែក្រវាត់ ពានរង្វាន់ មេដាយជាច្រើនគ្រឿងនាពេលកន្លងមក។ កាលពីថ្មីៗនេះរូបគេក៏បានទៅទស្សនា និងគាំទ្រលើកទឹកចិត្តដល់ក្មេងៗថ្នាលដែលប្រកួតលើសង្វៀនវត្តត្រស់ពិសីដែលរូបគេធ្លាប់ឡើងប្រកួតពីអតីតកាលផងដែរ៕

អត្ថបទដោយ៖ នួន ស៊ីណា

The post ឈុត សេរីវណ្ណថង រំលឹកអតីតកាលអាជីពប្រដាល់របស់ខ្លួនកើតចេញពីសង្វៀនវត្តត្រស់ពិសី appeared first on Kampuchea Thmey Daily.

ជំនាន់ចាញ់ខ្សែក្រវាត់ ឡុង ជិន និងធ្លាក់បាក់ឌុប ឈុត សេរីវណ្ណថង ស្ទើរបោះបង់អាជីពប្រដាល់ទៅហើយ

Sina Noun — Tue, 17 Mar 2026 08:22:30 +0000

មុនឈានដល់ភាពជោគជ័យលើវិថីប្រដាល់ និងមានជីវភាពធូរធាដូចពេលនេះ ឈុត សេរីវណ្ណថង ស្ទើរតែបោះបង់អាជីពប្រដាល់នេះ និងការសិក្សាទៅហើយអំឡុងឆ្នាំ២០១៨ ដែលបានចាញ់ខ្សែក្រវាត់ ឡុង ជិន និងធ្លាក់បាក់ឌុបជំនាន់នោះ។

លោក ឈុត សេរី និងកូនប្រុស

បច្ចុប្បន្ននេះកីឡាករ ឈុត សេរីវណ្ណថង បានក្លាយជាកីឡាករជួរមុខមួយរូបនៅកម្ពុជាលើប្រភេទទម្ងន់ ៦០គីឡូក្រាម។ គេមើលឃើញថាអ្នកប្រដាល់ដើមកំណើតពីខេត្តបាត់ដំបងម្នាក់នេះកំពុងទទួលបានភាពជោគជ័យជាខ្លាំងដោយឈ្នះខ្សែក្រវាត់ និងពានរង្វាន់ជាច្រើនគ្រឿងក្នុងអាជីព។ ប្រាក់រង្វាន់លើកទឹកចិត្ត រង្វាន់ផ្ទះ ក្របខ័ណ្ឌទាហានរូបគេសុទ្ធតែទទួលបានអស់ហើយក្នុងអាជីពប្រដាល់នេះ។ ក្រៅពីនេះជីវភាពធូរធា និងមានលទ្ធភាពទិញដី ធ្វើក្លឹបប្រដាល់ និងទិញផ្ទះ ទិញឡាន ជាដើមគឺបានមកពីការចាប់អាជីពប្រដាល់ជាច្រើនឆ្នាំកន្លងមក។

កីឡាករ ឈុត សេរីវណ្ណថង

លោក ឈុត សេរី ដែលជាឪពុកក៏បានរំលឹកទៅអតីតកាលថា អំឡុងឆ្នាំ២០១៨ វគ្គផ្ដាច់ព្រ័ត្រខ្សែក្រវាត់ទី១ ក្នុងអាជីពប្រដាល់នៅសង្វៀនអាស៊ីអាគ្នេយ៍កូនប្រុសរបស់លោកចាញ់ពិន្ទុ ឡុង ជិន បានត្រឹមជើងឯករងប៉ុណ្ណោះ។ ក្រោយចាញ់ខ្សែក្រវាត់ពេលលនោះបានធ្វើឲ្យ វណ្ណថង បាក់ទឹកចិត្តរហូតគ្មានអារម្មណ៍រៀនសូត្រ និងបានធ្លាក់បាក់ឌុប អំឡុងឆ្នាំ២០១៨ នោះទៀតផង។ ស្ថានភាពនៅពេលនោះលោកក៏ពិបាកចិត្តផងដែរ ព្រោះឃើញកូនលែងមានអាម្មរណ៍ធ្វើអ្វីទាំងអស់បែបនេះ។

វណ្ណថង កាលឈ្នះខ្សែក្រវាត់នៅបារាំង

ប៉ុន្តែក្រុមគ្រួសារទាំងមូលបានព្យាយាមលើកទឹកចិត្ត និងពន្យល់ថា «កីឡាតែប៉ុណ្ណឹងឯង មានចាញ់ មានឈ្នះ» ខំប្រឹងតស៊ូបន្តទៀតទៅថ្ងៃក្រោយនឹងទទួលបានជោគជ័យវិញហើយ។ បន្ទាប់ពី វណ្ណថង ធ្វើចិត្តបាន និងបានយល់រួចមកក៏បន្តតស៊ូប្រឹងប្រែងហ្វឹកហាត់រហូតទទួលបានភាពជោគជ័យ និងមានសមិទ្ធផលល្អដូចសព្វថ្ងៃនេះតែម្ដង។

កីឡាករ ឈុត សេរីវណ្ណថង

លោក ឈុត សេរី ថាអ្វីដែលកូនប្រុសរបស់លោក និងជីវភាពក្រុមគ្រួសារមានថ្ងៃនេះគឺសុទ្ធតែបានមកពីវិស័យប្រដាល់គុនខ្មែរ។ លោកផ្ដាំផ្ញើទៅកាន់ក្មេងៗជំនាន់ក្រោយបើមិនទាន់ទទួលបានជោគជ័យនោះទេត្រូវតែខំប្រឹងប្រែងតស៊ូហ្វឹកហាត់បន្តទៅទៀត។ នៅថ្ងៃណាមួយពួកគេនឹងជោគជ័យដូចជាកូនប្រុសរបស់លោកនៅពេលនេះអីចឹងដែរ៕

វណ្ណថង កាលប្រកួតនៅបារាំង

អត្ថបទដោយ៖ នួន ស៊ីណា

The post ជំនាន់ចាញ់ខ្សែក្រវាត់ ឡុង ជិន និងធ្លាក់បាក់ឌុប ឈុត សេរីវណ្ណថង ស្ទើរបោះបង់អាជីពប្រដាល់ទៅហើយ appeared first on Kampuchea Thmey Daily.

ឈុត សេរីវណ្ណថង ពីមុនបានត្រឹមឈរមើលយន្តហោះមិនដែលស្រមៃថាបានជិះ និងដើរច្រើនប្រទេសដូចនេះឡើយ

Sina Noun — Wed, 11 Mar 2026 02:08:05 +0000

កីឡាករ ឈុត សេរីវណ្ណថង ថាខ្លួនមិនដែលនឹកស្រមៃថាបានជិះយន្តហោះ ឬដើរលេងនៅក្រៅប្រទេសបានច្រើនដូចនេះនោះឡើយពិសេទៅជាមួយលោកឪពុក ព្រោះពីមុនបានត្រឹមឈរមើលយន្តហោះហោះប៉ុណ្ណោះឡើយ។

រូបភាពលើហ្វេសបុក វណ្ណថង

អ្នកប្រដាល់គុនខ្មែរ ឈុត សេរីវណ្ណថង បានឲ្យដឹងថា ដោយសារតែកីឡាគុនខ្មែរទើបធ្វើឲ្យខ្លួនមានថ្ងៃនេះពិសេសគឺបានជិះយន្តហោះ និងបានទៅដល់ច្រើនប្រទេស។ ពីមុនធ្លាប់តែឈរមើលយន្តហោះហោះតែប៉ុណ្ណោះមិនដែលស្រមៃថាបានជិះនោះឡើយ។

វណ្ណថង ឈ្នះខ្សែក្រវាត់នៅបារាំង

កីឡាករដើមកំណើតពីខេត្តបាត់ដំបងរូបនេះបន្ថែមទៀតថា កាន់តែអស្ចារ្យសម្រាប់ខ្លួននោះគឺការបានចេញទៅប្រកួតអមជាមួយលោកឪពុកដែលជាអ្នកមានគុណផងដែរដែលនេះពិតជាមានភាពសប្បាយរីករាយជាខ្លាំងចំពោះខ្លួនជាកូន។ ដោយសារតែការចេញទៅប្រទេសធំៗដូចជាប្រទេសចិន ជប៉ុន បារាំង អេស្បាញ់ ជាដើមនេះគឺត្រូវចំណាយថវិកាច្រើនទើបអាចទៅបាន។ មួយវិញទៀតប្រសិនបើចង់មកខ្លួនឯង ឬជាមួយក្រុមគ្រួសារក៏ពិបាកដែរដោយសារតែការចំណាយថ្លៃពេក។ ប៉ុន្តែគុនខ្មែរបានជួយឲ្យខ្លួនជាមួយលោកឪពុកបានមកស្គាល់ពិភពលោកខាងក្រៅ។

វណ្ណថង និងលោកឪពុក

បញ្ជាក់ដែរថា ឈុត សេរីវណ្ណថង ជាកីឡាករជើងខ្លាំងមួយរូបលើប្រភេទទម្ងន់ ៦០គីឡូក្រាមនៅប្រទេសកម្ពុជា។ នៅតាមកម្មវិធីប្រដាល់ធំៗក្នុងស្រុកតែងតែចង់បានរូបគេឡើងប្រកួតឲ្យ ព្រោះមិនសូវធ្វើឲ្យខកបំណង វាយអស់ៗ និងមិនសូវបង្ករបញ្ហាច្រើនអំពីការត្រៀមខ្លួនផ្សេងៗ។ រូបគេក៏ឧហស្សាហ៍បង្ហាញមុខនៅឯក្រៅប្រទេសផងដែរដូចជានៅបារាំង អេស្ប៉ាញ ចិន និងប្រទេសជាច្រើនទៀត។ ថ្មីៗនេះទើបឈ្នះខ្សែក្រវាត់មកពីប្រទេសបារាំងផងដែរពិសេសនោះការប្រកួតមួយនោះក៏មានវត្តមានលោក ឈុត សេរី ទៅជាមួយផង៕

វណ្ណថង និងលោកឪពុក

អត្ថបទដោយ៖ នួន ស៊ីណា

The post ឈុត សេរីវណ្ណថង ពីមុនបានត្រឹមឈរមើលយន្តហោះមិនដែលស្រមៃថាបានជិះ និងដើរច្រើនប្រទេសដូចនេះឡើយ appeared first on Kampuchea Thmey Daily.

ឈុត សេរីវណ្ណថង មានការបារម្ភដែរអំឡុងផ្ទុះសង្គ្រាម និងត្រូវផ្លាស់ប្ដូរជើងហោះហើរកន្លងទៅនេះ

Sina Noun — Mon, 09 Mar 2026 08:39:34 +0000

កីឡាករគុនខ្មែរ ឈុត សេរីវណ្ណថង ថាបារម្ភចំពោះសុវត្ថិភាពដែរពិសេសអំឡុងពេលធ្វើដំណើរដែលកំពុងមានសង្គ្រាមដូចដែលមហាជនបានដឹងហើយ និងបានព្យាពេលការហោះហើរថែមទាំងត្រូវផ្លាស់ប្ដូរជើងហោះហើរថ្មីទៀតផង។

រូបភាពលើផេកសហព័ន្ធ

អ្នកប្រដាល់គុនខ្មែរ ឈុត សេរីវណ្ណថង បានឲ្យដឹងថា អំឡុងផ្ទុះសង្គ្រាមនៅអន្តរជាតិនេះដែលប៉ះពាល់រហូតដល់ការផ្លាស់ប្ដូរជើងហោះហើរដូចនេះគឺខ្លួនពិតជាមានការបារម្ភចំពោះសុវត្ថិភាពដោយខ្លាចជួបគ្រោះថ្នាក់ដោចៃដន្យណាមួយដោយមើលមិនឃើញ។ តាមគម្រោងត្រូវហោះចេញនៅថ្ងៃទី១ មីនា ពីបារាំងទៅឌូប៉ៃ រួចបន្តទៅសិង្ហបុរីទើបទៅដល់កម្ពុជា ប៉ុន្តែដោយផ្ទុះសង្គ្រាមគឺត្រូវព្យាពេលខ្ទង់ ១០-១៥ថ្ងៃឯណោះ។

រូបភាពលើផេកសហព័ន្ធ

ឈុត សេរីវណ្ណថង បន្ថែមទៀតថា ដោយមើលឃើញពីការលំបាករបស់ក្រុមកីឡាករគុនខ្មែរ និងបារម្ភពីសុខសុវត្ថិភាពលោក លាង ម៉េង បានជួយចេញថ្លៃទិញសំបុត្រយន្តហោះថ្មីដើម្បីវិលមកកាន់ប្រទេសកំណើតវិញ។ អំឡុងពេលទិញសំបត្រយន្តហោះថ្មីនេះក៏ត្រូវពន្យារយៈពេល ៥ថ្ងៃទៀតទើបអាចហោះចេញមកបាន ខណៈអំឡុងពេលនោះការចំណាយលើការហូបចុកផ្សេងៗគឺបានលោក ខូវ ឆាយ ជាអ្នកជួយរ៉ាប់រងផងដែរ។

រូបភាពលើផេកសហព័ន្ធ

កីឡាករដើមកំណើតពីខេត្តបាត់ដំបងរូបនេះ ថ្លែងអំណរគុណជាខ្លាំងចំពោះលោក លាង ម៉េង ដែលបានជួយទិញសំបុត្រហោះយន្តថ្មីដល់ក្រុមគុនខ្មែរបានវិលត្រឡប់មកពីបារាំងលើកនេះ និងតែងតែឧបត្ថម្ភដល់កីឡាករកន្លងមក។ ជាមួយគ្នានេះដែររូបគេអរគុណចំពោះសហព័ន្ធប្រដាល់គុនខ្មែរ លោក ខូវ ឆាយ ដែលបានយកចិត្តទុកដាក់ និងមើលថែកីឡាករគុនខ្មែរពិសេសអំឡុងពេលប្រកួតនៅប្រទេសបារាំង។

រូបភាពលើផេកសហព័ន្ធ

បញ្ជាក់ដែរថា ក្រុមគុនខ្មែរដែលបានទៅចូលរួមការប្រកួតដណ្ដើមខ្សែក្រវាត់នៅប្រទេសបារាំង កាលពីថ្ងៃទី១ ខែមីនា ឆ្នាំ២០២៦ កន្លងទៅនេះបានត្រូវព្យាពេលហោះហើរដោយសារសង្គ្រាម និងមិនអាចកំណត់ពេលណាទើបមានជើងហោះហើរថ្មីនោះឡើយអំឡុងពេលក្រោយប្រកួតចប់នោះ។ យ៉ាងណាបន្ទាប់ពីមានការឧបត្ថម្ភថ្លៃសំបុត្រយន្តហោះថ្មីពីលោក លាង ម៉េង បានធ្វើឲ្យក្រុមគុនខ្មែររួមមានគ្រូៗ កីឡាករ ឈុត សេរីវណ្ណថង ពេជ្រ សម្បត្តិ បឺត សង្ឃឹម និងអ្នកមួយចំនួនបានដូរជើងហោះហើរទៅប្រទេសចិនវិញ និងបានជិះបន្តមកដល់ខ្មែរតែម្ដង។ សរុបទៅក្រុមគុនខ្មែរមកដល់កម្ពុជាចុងក្រោយគេអំឡុងថ្ងៃទី៧ ខែមីនា ឆ្នាំ២០២៦ នេះ៕

ក្រុមគុនខ្មែរ

អត្ថបទដោយ៖ នួន ស៊ីណា

The post ឈុត សេរីវណ្ណថង មានការបារម្ភដែរអំឡុងផ្ទុះសង្គ្រាម និងត្រូវផ្លាស់ប្ដូរជើងហោះហើរកន្លងទៅនេះ appeared first on Kampuchea Thmey Daily.

មុនការទម្លាក់គ្រាប់បែករបស់សៀមនៅបាណន់ ឈុត សេរីវណ្ណថង លឺសំឡេងយន្តហោះ និងដ្រូនមិនឈប់

Sina Noun — Thu, 25 Dec 2025 09:38:58 +0000

កីឡាករគុនខ្មែរ ឈុត សេរីវណ្ណថង ដែលកំពុងរស់នៅឯស្រុកឯកភ្នំ ខេត្តបាត់ដំបង មុនការទម្លាក់គ្រាប់បែកពីយន្តហោះចម្បាំងរបស់សៀម T-50 គឺរូបគេបានលឺសំឡេងហោះ និងឃើញដ្រូនហោះជាប់រហូតបន្ទាប់មកទទួលដឹណឹងថាមានការទម្លាក់នៅម្ដុំភូមិសាស្ត្រភ្នំសំពៅ នៅស្រុកបាណន់ តែម្ដង។

ទិដ្ឋភាពក្រោយការទម្លាក់

អ្នកលេងគុនខ្មែរ ឈុត សេរីវណ្ណថង បានឲ្យដឹងថា ម្សិលមិញនេះគឺមានការជ្រួលច្របល់ខ្លាំងនៅឯទីនោះ ដោយសារការទម្លាក់ខ្លាំងក្លា និងក្បែរសាលារៀនជាដើម។ ប៉ុន្តែនៅថ្ងៃនេះគឺមានសភាពស្ងប់ស្ងាត់ជាធម្មតាវិញហើយ។

វណ្ណថង បន្តទៀតថា មុនដល់ការទម្លាក់នេះគឺរូបគេលឺតែសំឡេងយន្តហោះ ប៉ុន្តែមើលមិនឃើញរូបរាងឡើយ។ ចំណែកដ្រូនវិញគឺឃើញហោះឆ្វែលចុះឡើងពេញតែបាត់ដំបងតែម្ដងម្សិលមិញនេះ។

យន្តហោះចម្បាំង T-50

ការទម្លាក់គ្រាប់បែកម្សិលមិញនេះគឺពិតជាមានការប៉ះពាល់ខ្លាំងដល់ប្រជាពលរដ្ឋដែលរស់នៅម្ដុំនោះថានៅជិត ឬឆ្ងាយពីតំបន់នោះក៏ដោយមានការព្រួយបារម្ភ និងប៉ះពាល់ដល់សតិអារម្មណ៍ទាំងចាស់ទាំងក្មេង។ សាលារៀនត្រូវផ្អាក កន្លែងការងារមិនបើកដំណើរការ ការរកស៊ីរបរមួយចំនួនធំក៏ដូចគ្នា។ ម្នាក់ៗនៅតែមានការភ័យព្រួយមិនដឹងថាពួកសៀមមកទម្លាក់នៅកន្លែងណាបន្តទៀត។

កីឡាករ ឈុត សេរីវណ្ណថង

បញ្ជាក់ដែរថា កាលពីថ្ងៃទី២៤ ខែធ្នូ ឆ្នាំ២០២៥ ម្សិលមិញនេះយោធាថៃបន្តប្រព្រឹត្តឧក្រិដ្ឋកម្មសង្គ្រាមយ៉ាងសាហាវព្រៃផ្សៃដោយបានយកយន្តហោះចម្បាំង T-50 មកទម្លាក់គ្រាប់បែក ៤គ្រាប់ក្បែរសាលារៀន បណ្ដាលឱ្យសិស្សានុសិស្សភ័យរត់ចេញពីសាលារៀនក្នុងភូមិសាស្ត្រភ្នំសំពៅ នៅស្រុកបាណន់ ខេត្តបាត់ដំបង ចម្ងាយប្រមាណ១០០គីឡូម៉ែត្រពីព្រំដែន៕

អត្ថបទដោយ៖ នួន ស៊ីណា

The post មុនការទម្លាក់គ្រាប់បែករបស់សៀមនៅបាណន់ ឈុត សេរីវណ្ណថង លឺសំឡេងយន្តហោះ និងដ្រូនមិនឈប់ appeared first on Kampuchea Thmey Daily.

កីឡាករគុនខ្មែរ ៥ រូបលំដាប់ជួរមុខក្នុងទម្ងន់ ៦០ គីឡូក្រាមនៅកម្ពុជាបច្ចុប្បន្ន

chean virakbot — Tue, 22 Jul 2025 02:07:22 +0000

កីឡាករប្រដាល់គុនខ្មែរទម្ងន់ ៦០ គីឡូក្រាម ចំនួន ៥នាក់ ដែលអាចចាត់ទុកស្ថិតនៅលំដាប់កំពូលទាំង ៥ ប្រចាំស្រុកខ្មែរ ដែលទទួលបានការគាំទ្រ និងកោតសរសើរខ្លាំងពីអ្នកគាំទ្រ។

កីឡាករ ឃីម បូរ៉ា

កីឡាករគុនខ្មែរដែលអាចចាត់ទុកលំដាប់កំពូលទាំង ៥ ប្រចាំទម្ងន់ ៦០គីឡូក្រាម គឺ ឃីម បូរ៉ា, ឈុត សេរីវ៉ាន់ថង, ពេជ្រ សម្បត្តិ, បឺត សង្ឃឹម និង សុខ ធី។ ពួកគេជាកីឡាករដែលមានបទពិសោធប្រកួតរាប់រយដង និងទទួលបានសមិទ្ធផលច្រើនដូចគ្នា ប៉ុន្តែបើនិយាយពីបច្ចេកទេសមានលក្ខណៈពិសេសរៀងខ្លួន។

កីឡាករ ឈុត សេរីវ៉ាន់ថង

កីឡាករ ឃីម បូរ៉ា មានក្បាច់ប្រយុទ្ធល្អទាំងព្រមតាមរយៈកណ្តាប់ដៃ ទាត់ ជង្គង់ និង កែង ប៉ុន្តែរូបគេមានកម្លាំងស៊ុហ្វមិនសូវខ្លាំងប៉ុន្មានទេ។ ជាមួយគ្នានេះ ឈុត សេរីវ៉ាន់ថង ក៏មានក្បាច់ល្អទាំងកណ្តាប់ដៃ ទាត់ ជង្គង់ និង កែវ ហើយលក្ខណៈពិសេសរបស់គេគឺការវ៉ៃប្រយោលយកពិន្ទុល្អជាងចូលកៀក។ រូបគេមានស្មារតីប្រយុទ្ធដោយបច្ចេកទេស និងមានកម្លាំងស៊ុហ្វល្អ។

កីឡាករ ពេជ្រ សម្បត្តិ

ក្របីព្រៃ ពេជ្រ សម្បត្តិ ជាកីឡាករដែលមានកម្លាំងស៊ុហ្វល្អ ស៊ូធន់ និងកណ្តាប់ដៃល្អដែលសមត្ថភាពបែបនេះកម្រមានកីឡាករដូចណាស់ ប៉ុន្តែរូបគេប្រើកម្លាំងបុកជាងបច្ចេកទេស ដូច្នេះហើយនៅពេលប៉ះដៃគូល្អក្បាច់គឺពិបាកយកឈ្នះ។

កីឡាករ បឺត សង្ឃឹម

បឺត សង្ឃឹម ត្រូវបានចាត់ទុកជាកីឡាករមានបច្ចេកទេស និងយុទ្ធសាស្ត្រពិសេសប្លែកបំផុត ហើយកម្លាំងស៊ុហ្វក៏ល្អដែរ។ ដៃគូពិតជាពិបាកស្មាន និងការពារពីអាវុធលឿនរហ័សរបស់គេណាស់។ ទោះបីជាយ៉ាងណា នៅពេលប៉ះដៃគូកម្លាំងស៊ុហ្វល្អ និងបច្ចេកទេសល្អក៏ធ្វើឲ្យរូបគេពិបាកពិបាកទប់ទល់ដែរ។

កីឡាករ សុខ ធី

និយាយពី សុខ ធី បន្ទាប់ពីឈ្នះ ពេជ្រ សម្បត្តិ ពិតជាទទួលបានការគាំទ្រខ្លាំងមែនទែនពីមហាជន។ ក្រោយមក រូបគេទទួលបានខ្សែក្រវាត់ ISKA Kun Khmer បន្ទាប់ពីយកឈ្នះកីឡាករអេស្ប៉ាញបានធ្វើឲ្យប្រជាប្រិយភាពកាន់តែឡើង។ សុខ ធី មានអាវុធល្អមួយទាំងព្រមគឺ កណ្តាប់ដៃ ទាត់ កែង និងក្បាច់អោបផ្តួលដៃគូ ហើយមួយរយៈពេលចុងក្រោយនេះស្មារតីប្រយុទ្ធកាន់តែកាច ប៉ុន្តែកម្លាំងហាក់មិនពេញល្អទេ។ ជាពិសេសការប្រកួត ៥ ទឹកគឺ រូបគេប្រើបច្ចេកទេសវ៉ៃយកពិន្ទុច្រើនជាង។

ទោះបីជាយ៉ាងណា នៅមានកីឡាករជាច្រើនទៀត ជាពិសេសកីឡាករស្រករក្រោយក្នុងទម្ងន់ ៦០គីឡូក្រាមដែលកំពុងឡើងខ្លាំង និងទទួលបានការចាប់អារម្មណ៍ពីមហាជន៕

អត្ថបទ៖ វីរបុត្រ

The post កីឡាករគុនខ្មែរ ៥ រូបលំដាប់ជួរមុខក្នុងទម្ងន់ ៦០ គីឡូក្រាមនៅកម្ពុជាបច្ចុប្បន្ន appeared first on Kampuchea Thmey Daily.

ជើងខ្លាំងគុនខ្មែរ២រូបឡើងសង្វៀនទទួលបានរង្វាន់ផ្ទះល្វែង

chean virakbot — Wed, 04 Dec 2024 02:16:06 +0000

កីឡាករគុនខ្មែរ ធឿន ធារ៉ា និង ឈុត សេរីវ៉ាន់ថង ជាកីឡាករប្រដាល់២នាក់ដែលឡើងប្រកួតទទួលបានរង្វាន់ផ្ទះល្វែង។

ប៉ុន្មានឆ្នាំចុងក្រោយនេះ តម្លៃខ្លួន និងរង្វាន់សម្រាប់ការប្រកួតគុនខ្មែរបានកើនឡើងខ្ពស់យ៉ាងឆាប់រហ័សដែលបានធ្វើឲ្យជីវភាពរបស់កីឡាករ កីឡាការិនីប្រដាល់គុនខ្មែរល្អប្រសើរជាលំដាប់។

តាមការឲ្យដឹងពីលោក ខូវ ឆាយ ប្រធានសហព័ន្ធកីឡាប្រដាល់គុនខ្មែរថា ប្រហែលជា២ឆ្នាំចុងក្រោយ តម្លៃខ្លួនកីឡាករមួយចំនួនបានកើនឡើងពី៣០០ដុល្លាររហូតដល់១០០០ដុល្លារ ហើយកីឡាករខ្លះអាចឡើងដល់២០០០ដុល្លារ។ ប្រសិនបើបូកទាំងតម្លៃខ្លួន និងប្រាក់រង្វាន់ផងនោះ កីឡាករខ្លះអាចទទួលបាន២០០០ទៅ៣០០០ដុល្លារក្នុងមួយរាត្រី។

ជាការពិតណាស់ ក្រៅពីតម្លៃខ្លួន អ្នករៀបចំកម្មវិធី និងម្ចាស់ឧបត្ថម្ភបានរៀបចំរង្វាន់ផ្សេងៗទៀតដើម្បីជាការលើកទឹកចិត្តមានដូចជា ប្រាក់សុទ្ធ ម៉ូតូ រថយន្ត ដីឡូតិ៍ និងផ្ទៃល្វែងជាដើម។ ក្នុងនោះមានកីឡាករជាច្រើនទទួលបានរង្វាន់រថយន្តនារយៈពេល២ឆ្នាំចុងក្រោយ។ បើគិតលើការឡើងប្រកួតប្រជែងដើម្បីទទួលបានរង្វាន់ផ្ទះល្វែងគឺមានកីឡាករ ធឿន ធារ៉ា និងឈុត សេរីវ៉ាន់ថង ទទួលបាន។

កាលពីធ្នូ ឆ្នាំ២០២២ សង្វៀនទូរទស្សន៍ប៉ុស្តិ៍លេខ៥បានរៀបចំការប្រកួតដណ្តើមខ្សែក្រវាត់នៅខេត្តសៀមរាបដោយមានរង្វាន់ជាផ្ទះល្វែង។ ព្រឹត្តិការណ៍ដ៏អស្ចារ្យមិនធ្លាប់មាននោះ ឈុត សេរីវ៉ាត់ថង បានក្លាយជាម្ចាស់ផ្ទះល្វែង និងខ្សែក្រវាត់ បន្ទាប់ពីបានយកឈ្នះលើកីឡាករ ឃីម បូរ៉ា ដែលបានចំណាត់ថ្នាក់លេខ២ទទួលបានដីឡូត៍មួយប្លង់ (១០x២០ម៉ែត្រ)។

កាលពីខែវិច្ឆិកា ឆ្នាំ២០២៤ ធឿន ធារ៉ា បានឈ្នះខ្សែក្រវាត់គុនខ្មែរអន្តរជាតិ 8 Men Tournament ជាលើកទី២ដែលមានរង្វាន់ផ្ទះមួយល្វែង។ ក្នុងមួយរាត្រី កូនសិស្សលោកគ្រូ អេ ភូថង បានផ្តួលដៃគូឲ្យសន្លប់ទាំង៣នាក់ដើម្បីទទួលបានខ្សែក្រវាត់អមដោយរង្វាន់ផ្ទះមួយល្វែង។

នៅចាំបានថា កាលពីចុងឆ្នាំ២០២៣ ធឿន ធារ៉ា បានផ្តួលកីឡាករ៣នាក់ក្នុងមួយរាត្រីដើម្បីក្លាយជាម្ចាស់ខ្សែក្រវាត់គុនខ្មែរអន្តរជាតិ 8 Men Tournament លើកទី១ដែលមានរង្វាន់រថយន្តថ្មីសន្លាង១គ្រឿង។

ខ្លឹមសារខាងលើគឺសំដៅលើតែកីឡាករដែលបានឡើងប្រកួតដើម្បីទទួលបានរង្វាន់ផ្ទះល្វែងប៉ុណ្ណោះ ពីព្រោះមានកីឡាករខ្លះទទួលបានផ្ទះល្វែងតាមមធ្យោបាយផ្សេងដូចជាធ្វើជាតំណាងផ្សព្វផ្សាយ BA ជាដើម៕

អត្ថបទ៖ វីរបុត្រ

The post ជើងខ្លាំងគុនខ្មែរ២រូបឡើងសង្វៀនទទួលបានរង្វាន់ផ្ទះល្វែង appeared first on Kampuchea Thmey Daily.

គួរឲ្យស្តាយ ចិត្រា, បញ្ញា, សេរីវ៉ាន់ថង ចាញ់ ខណៈ២នាក់ឈ្នះនៅបារាំងយប់មិញ

Pha Rothana — Fri, 28 Jun 2024 03:48:33 +0000

កម្មវិធីប្រកួតគុនខ្មែរ Laa Belle Equipe នៅប្រទេសបារាំងកាលពីយប់មិញ កីឡាករគុនខ្មែរ២រូបទទួលបានជ័យជម្នះ ប៉ុន្តែ៣បានបរាជ័យ។

ស្ទើរមិនគួរជឿ តារាគុនខ្មែរជួរមុខ ឈុត សេរីវ៉ាន់ថង ដែលជាបេក្ខភាពម៉ារ៉ាតុង បានសន្លប់ក្រោមកណ្ដាប់ដៃដ៏ធ្ងន់របស់កីឡាករអេស្ប៉ាញ Mario Alvarez ក្នុងទឹកទី១ ក្រោយប្រើពេលត្រឹម២នាទី។ វាជារឿងគួរឲ្យស្ដាយសម្រាប់អ្នកលេងគុនខ្មែរ។

ទម្រាំឈានមកដល់វគ្គនេះ រូបគេខំតស៊ូតាំងការប្រកួតម៉ារ៉ាតុងលើកទី១ ក្រោយឈ្នះកីឡាករបារាំង Omar Drissi ក្នុងជុំទី១ និងបន្តយកឈ្នះមិត្តរួមជាតិ ឃឹម បូរ៉ា នៅវគ្គផ្ដាច់ព្រ័ត្រក្លាយជាម្ចាស់ខ្សែក្រវាត់គុនខ្មែរ ទើបទទួលបានឱកាសឡើងមកប្រកួតជុំចុងក្រោយដែលមានរង្វាន់រថយន្ដ។

កីឡាករគុនខ្មែរ ធីម សៀងហៃ និង ព្រំ សំណាង ទទួលបានជ័យជម្នះ។ ក្រោយបញ្ចប់ការប្រកួត៥ទឹក ធីម សៀងហៃ បានយកឈ្នះកីឡាករបារាំង YANIS SOUALILI ដោយពិន្ទុ ដើម្បីក្លាយជាម្ចាស់ខ្សែក្រវាត់។ ចំណែកកីឡាករ ព្រំ សំណាង ក៏ធ្វើបានល្អ ដោយបានឈ្នះពិន្ទុលើកីឡាករបារាំង REDA OUDGOU បន្ទាប់ពីប្រកួត៣ទឹក។

ចំណែកកីឡាករគុនខ្មែរជួរមុខ ឡៅ ចិត្រា និង លន បញ្ញា បានចាញ់កីឡាករបារាំងដូចគ្នា។ ទោះបីជាយ៉ាងណា កម្ពុជាបានប្រឹងប្រែងអស់ពីសមត្ថភាពហើយសម្រាប់ជួបកីឡាករលំដាប់នៅអឺរ៉ុប។

តាមការបញ្ជាក់ពីលោក សឿ វណ្ណៈ ស្ថាបនិកកម្មវិធីប្រដាល់ Kun Khmer Super Fight ថា កីឡាករបារាំងដែលបានយកឈ្នះកីឡាករកម្ពុជានឹងមកប្រកួតនៅទឹកដីកម្ពុជាវិញម្តង។

លទ្ធផលការប្រកួតរបស់កីឡាករកម្ពុជានៅទឹកដីបារាំង

-ឈុត សេរីវ៉ាន់ថង ចាញ់កីឡាករអេស្ប៉ាញ FINLAY SMITH (សន្លប់ទឹក១)

– ធីម សៀងហៃ ឈ្នះកីឡាករបារាំង YANIS SOUALILI (ទទួលបានខ្សែក្រវាត់)

– ឡៅ ចិត្រា ចាញ់ពិន្ទុ កីឡាករបារាំង ANTHONY DEFRETIN

– លន បញ្ញា ចាញ់ពិន្ទុ កីឡាករបារាំង ELIAS NAJI

– ព្រំ សំណាង ឈ្នះពិន្ទុ កីឡាករបារាំង REDA OUDGOU

អត្ថបទ៖ ផា រតនា

The post គួរឲ្យស្តាយ ចិត្រា, បញ្ញា, សេរីវ៉ាន់ថង ចាញ់ ខណៈ២នាក់ឈ្នះនៅបារាំងយប់មិញ appeared first on Kampuchea Thmey Daily.

ឈុត សេរីវ៉ាន់ថង Archives - Kampuchea Thmey Daily

ឈុត​ សេរីវណ្ណថង​ រំលឹក​អតីត​កាល​អាជីព​ប្រដាល់​របស់​ខ្លួន​កើត​ចេញ​ពី​សង្វៀន​វត្ត​ត្រស់ពិសី​

មុន​ការ​ទម្លាក់​គ្រាប់​បែក​របស់​សៀម​នៅ​បាណន់​ ឈុត​ សេរីវណ្ណថង​ លឺ​សំឡេង​យន្តហោះ​ និង​ដ្រូន​មិន​ឈប់​

កីឡាករគុន​ខ្មែរ​​ ៥ រូប​​លំដាប់​ជួរ​មុខ​ក្នុង​ទម្ងន់​ ៦០ គីឡូក្រាម​​នៅ​កម្ពុជា​បច្ចុប្បន្ន

ជើង​ខ្លាំង​គុន​ខ្មែរ​២​រូប​ឡើង​សង្វៀន​ទទួល​បាន​រង្វាន់​ផ្ទះ​ល្វែង

គួរឲ្យស្តាយ ចិត្រា, បញ្ញា, សេរីវ៉ាន់ថង ចាញ់ ខណៈ២នាក់ឈ្នះនៅបារាំងយប់មិញ

ឈុត សេរីវណ្ណថង រំលឹកអតីតកាលអាជីពប្រដាល់របស់ខ្លួនកើតចេញពីសង្វៀនវត្តត្រស់ពិសី

មុនការទម្លាក់គ្រាប់បែករបស់សៀមនៅបាណន់ ឈុត សេរីវណ្ណថង លឺសំឡេងយន្តហោះ និងដ្រូនមិនឈប់

កីឡាករគុនខ្មែរ ៥ រូបលំដាប់ជួរមុខក្នុងទម្ងន់ ៦០ គីឡូក្រាមនៅកម្ពុជាបច្ចុប្បន្ន

ជើងខ្លាំងគុនខ្មែរ២រូបឡើងសង្វៀនទទួលបានរង្វាន់ផ្ទះល្វែង