ឈ្នះពានរង្វាន់ Archives - Kampuchea Thmey Daily

ក្រុមនិស្សិតមកពីវិទ្យាស្ថានបច្ចេកវិទ្យាកម្ពុជា ក្លាយជាម្ចាស់ពានរង្វាន់ត្នោតមាសឬ Thnot d’Or លើកទី៦

Kang Tola — Sat, 26 Jul 2025 13:10:36 +0000

ពានរង្វាន់ត្នោតមាស ឬ Thnot d’Or លើកទី ៦ឆ្នាំ២០២៥ សម្រាប់ការប្រកួតប្រជែងសិក្សាស្រាវជ្រាវឈានមុខគេផ្នែកច្នៃប្រឌិត និងការអភិវឌ្ឍន៍ផលិតផលកែច្នៃពីស្វាយ និងការជ្រៀតចូលទីផ្សារត្រូវបានរកឃើញហើយដោយចំណាត់ថ្នាក់លេខ១និងចំណាត់ថ្នាក់លេខ២បានទៅលើក្រុមនិស្សិតមកពីវិទ្យាស្ថានបច្ចេកវិទ្យាកម្ពុជានិងចំណាត់ថ្នាក់លេខ៣បានទៅលើក្រុមនិស្សិតមកពីវិទ្យាស្ថានបច្ចេកវិទ្យាកំពង់ស្ពឺ។

ពិធីប្រគល់ពានរង្វាន់ត្នោតមាស ឬ Thnot d’Or លើកទី៦ បានប្រព្រឹត្តិទៅនៅរសៀលថ្ងៃទី២៦ ខែកក្កដា ឆ្នាំ២០២៥ ក្រោមអធិបតីភាពលោក អ៊ុច បូររិទ្ធ អនុប្រធានទី១ព្រឹទ្ធសភានៃព្រះរាជាណាចក្រកម្ពុជា។ ឧកញ៉ា ឱសថបណ្ឌិត ហៃ លីអ៊ាង ប្រធានមូលនិធិគីណាល់ និងជាប្រធានអគ្គនាយក្រុមហ៊ុន-សហគ្រាស ខនហ្វីរេល និងប៉េប៉េអឹមបានថ្លែងក្នុងឱកាសប្រគល់ពានរង្វាន់ត្នោតមាស ឬ Thnot d’Or លើកទី ៦នាឱកាសនោះថា ចាប់តាំងពីការបង្កើតឡើងនៅឆ្នាំ២០១៨ «ពានរង្វាន់ត្នោតមាស» ឬ Thnot d’Or បានដើរតួនាទីយ៉ាងសំខាន់នៅប្រទេសកម្ពុជាក្នុងការជំរុញលើកទឹកចិត្តដល់ផ្នែកសិក្សាស្រាវជ្រាវ និងការច្នៃប្រឌិតនៅក្នុងចំណោមនិស្សិតកសិកម្ម និងកែច្នៃអាហារ។ គំនិតផ្តួចផ្តើមនេះ ដឹកនាំដោយ មូលនិធិគីណាល់ ដែលជាផ្នែកមួយនៃទំនួលខុសត្រូវសង្គមរបស់សហគ្រាស PPM-Confirel Group គាំទ្រយ៉ាងខ្ជាប់ខ្ជួនដល់អ្នកស្រាវជ្រាវវ័យក្មេងក្នុងការបង្កើតដំណោះស្រាយប្រកបដោយភាពច្នៃប្រឌិត ដែលរួមចំណែកដល់ការអភិវឌ្ឍន៍ជនបទ និងការរីកចម្រើនផ្នែកកសិកម្មនៅកម្ពុជា។

លោកឧកញ៉ា បានបន្តថា ការអភិវឌ្ឍន៍វិស័យកសិកម្ម គឺជាធាតុផ្សំគន្លឹះដ៏សំខាន់ក្នុងការអភិវឌ្ឍន៍សេដ្ឋកិច្ចកម្ពុជាហើយការច្នៃប្រឌិត រួមផ្សំជាមួយនឹងចំណេះដឹងបែបប្រពៃណីរបស់កសិករខ្មែរ គឺពិតជាមានសារៈសំខាន់ខ្លាំងណាស់ ក្នុងការនាំមកនូវតម្លៃបន្ថែមសម្រាប់ផលិតផលក្នុងស្រុករបស់យើង ដែលជាមូលដ្ឋានគ្រឹះនៃការអភិវឌ្ឍន៍ជនបទ។

លោកឧកញ៉ា បានបន្តទៀតថា «មហិច្ឆតារបស់យើងគឺធ្វើយ៉ាងណាឱ្យ«ពានរង្វាន់គីណាល់ និងត្នោតមាស» ក្លាយជាឧបករណ៍ដ៏មានឥទ្ធិពលមួយសម្រាប់ការប្រមូលផ្តុំ និងការទទួលស្គាល់សម្រាប់និស្សិត និងអ្នកស្រាវជ្រាវវ័យក្មេង ក្នុងការបម្រើដល់សុខភាពប្រជាជន ការលើកកម្ពស់បេតិកភណ្ឌរុក្ខជាតិ និងការអភិវឌ្ឍន៍ប្រកបដោយចីរភាពនៅកម្ពុជា»។

លោក អ៊ុច បូររិទ្ធ អនុប្រធានទី១ព្រឹទ្ធសភានៃព្រះរាជាណាចក្រកម្ពុជា បានចូលរួមអបអរសាទរចំពោះក្រុមនិស្សិតដែលទទួលបានជ័យលាភី និងលើកទឹកចិត្តដល់ក្រុមដែលមិនទទួលបានជោគជ័យបន្តខិតខំប្រឹងប្រែងនៅឆ្នាំក្រោយៗទៀត។

លោកអនុប្រធានទី១ព្រឹទ្ធសភាបានចាត់ទុកការបង្កើតពានរង្វាន់ត្នោតមាសរបស់មូលនិធិគីណាល់នេះពិតជាបានចូលរួមចំណែកយ៉ាងសំខាន់ជាមួយរាជរដ្ឋាភិបាល ក្នុងការបង្កើតធនធានមនុស្សប្រកបដោយគុណភាពតាមរយៈការប្រកួតប្រជែងភាពច្នៃប្រឌិតផលិតផលកសិកម្មកម្ពុជាឱ្យកាន់តែសម្បូរបែបសម្រាប់បម្រើនៅទីផ្សារក្នុងស្រុកក៏ដូចជាក្រៅស្រុក។

លោក អនុប្រធានទី១ព្រឹទ្ធសភាបានបន្តថា ការបង្កើតពានរង្វាន់នេះ ជាកម្មវិធីមួយដ៏ល្អក្នុងការផ្តល់ឱកាសឱ្យក្មួយៗខិតខំប្រឹងប្រែងដុះខាតបញ្ញារបស់ខ្លួនដើម្បីអនាគតខ្លួន គ្រួសារក៏ដូចជាប្រទេសជាតិផងដែរ។

គួរបញ្ជាក់ថា កម្មវិធីពានរង្វាន់ត្នោតមាសមានការទទួលស្គាល់ និងល្បីល្បាញគួរឱ្យកត់សម្គាល់តាមរយៈការចុះឈ្មោះចូលរួមប្រកួតជារៀងរាល់ឆ្នាំរបស់និស្សិត។ កាលពីឆ្នាំ ២០១៨ ដែលជាឆ្នាំដំបូងមាននិស្សិតចំនួន ១៩ ក្រុម បានចុះឈ្មោះចូលរួមប្រកួត។ ពីមួយឆ្នាំទៅមួយឆ្នាំកម្មវិធីប្រកួតនេះមានការគាំទ្រកាន់តែច្រើនដោយឆ្នាំ២០២៥នេះ មាននិស្សិតចំនួន៦០ក្រុមបានចុះឈ្មោះចូលរួមប្រកួតប្រជែង អត្ថបទស្រាវជ្រាវនៅក្នុងឆ្នាំនេះផ្តោតសំខាន់លើប្រធានបទស្តីអំពី៖ «ការកែច្នៃផលិតផស្វាយ ព្រមទាំងសិក្សាលក្ខណៈបច្ចេកទេសលើខ្សែសង្វាក់ផលិតកម្មប្រកបដោយនវានុវត្តន៍ សម្រាប់ទីផ្សារ» ដែលឆ្លុះបញ្ចាំងពីសក្តានុពលដ៏សំខាន់របស់ប្រទេសកម្ពុជាក្នុងការផលិត និងនាំចេញស្វាយ។

ក្នុងនោះជម្រុះនៅសល់១០សម្រាប់វគ្គផ្តាច់ព្រ័ត្រហើយចម្រាញ់យក៣ក្រុមដោយចំណាត់ថ្នាក់លេខ១ និងចំណាត់ថ្នាក់លេខ២ បានទៅលើក្រុមនិស្សិតមកពីវិទ្យាស្ថានបច្ចេកវិទ្យាកម្ពុជានិងចំណាត់ថ្នាក់លេខ៣ បានទៅលើក្រុមនិស្សិតមកពីវិទ្យាស្ថានបច្ចេកវិទ្យាកំពង់ស្ពឺ៕

អត្ថបទ ៖ សំអឿន

The post ក្រុមនិស្សិតមកពីវិទ្យាស្ថានបច្ចេកវិទ្យាកម្ពុជា ក្លាយជាម្ចាស់ពានរង្វាន់ត្នោតមាសឬ Thnot d’Or លើកទី៦ appeared first on Kampuchea Thmey Daily.

ត្រឹម ៥ ឆ្នាំ ខេត្តបន្ទាយមានជ័យទទួលពានរង្វាន់ ៤ ផ្សេងគ្នាពីក្រៅប្រទេស

Din Thary — Fri, 31 Mar 2023 05:03:31 +0000

ក្រៅពីមានសក្តានុពលលើវិស័យនានាដូចជា កសិកម្ម ពាណិជ្ជកម្ម ទេសចរណ៍ ក៏ដូចជាវិស័យអប់រំ និងជាច្រើនទៀត ខេត្តបន្ទាយមានជ័យ ក៏មានសក្តានុពល អាចចូលរួមប្រកួតប្រជែងជាមួយបណ្តាប្រទេសមួយចំនួនក្នុងនោះ ខេត្តបន្ទាយមានជ័យ អាចបានទទួលពាន់រង្វាន់ពីក្រៅប្រទេសចំនួន ៤ ដូចជាប្រទេសវៀតណាម, អាល្លឺម៉ង់, ព្រុយណេ ជាដើម។

លោក អ៊ុំ រាត្រី អភិបាល នៃគណៈអភិបាលខេត្តបន្ទាយមានជ័យ បានគូសបញ្ជាក់ថា តាមរយៈការខិតខំយកចិត្តទុកដាក់ពីរាជរដ្ឋាភិបាល ក៏ដូចជារដ្ឋបាលខេត្តគ្រប់លំដាប់ថ្នាក់ អនុវត្តតាមគោលការណ៍ដាក់ចេញដោយរាជរដ្ឋាភិបាល បានជួយលើកមុខមាត់ខេត្ត និងមានការរីកចម្រើនគួរឱ្យគត់សម្គាល់។

មិនតែប៉ុណ្ណោះ តាមរយៈការប្រឡងប្រកួតប្រជែងទាំងនៅក្នុង និងក្រៅប្រទេស ដើម្បីបង្ហាញនូវសមិទ្ធផលដែលខេត្តសម្រេចបាន ខេត្តបន្ទាយមានជ័យ បានទទួលពាន់រង្វាន់ មកពីក្រៅប្រទេសចំនួន ៤ផ្សេងគ្នា និងពានរង្វាន់នៅក្នុងប្រទេសជាច្រើនផងដែរ។

ជារួម ពាន់រង្វាន់ក្រៅប្រទេសទាំង ៤ ដែលខេត្តបន្ទាយមានជ័យទទួលបានរួមមាន៖

- ទី១ ពានរង្វាន់ទេសចរណ៍ប្រកបដោយ និរន្តរភាពអាស៊ានឆ្នាំ២០២០ នៅប្រទេសវៀតណាម

- ទី២ TO DO Award Contest ទេសចរណ៍ទំនួលខុសត្រូវ សង្គមឆ្នាំ២០២០ នៅប្រទេសអាល្លឺម៉ង់ ក្នុងឆ្នាំ២០២១

- ទី៣ ពានរង្វាន់ស្តង់ដារទេសចរណ៍ផ្អែកលើសហគមន៍អាស៊ាន ឆ្នាំ២០១៩-២០២១ នៅប្រទេសព្រុយណេ

- ទី៤ ជយលាភីផ្ទះស្នាក់អាស៊ាន ឃឿន ស្រីមុំ ស្តង់ដារឆ្នាំ ២០១៩- ២០២១ ប្រទេសវៀតណាម

ក្រៅពីពាន់រង្វាន់ក្រៅប្រទេស កាលពីពេលថ្មីៗកន្លងទៅនេះ ខេត្តបន្ទាយមានជ័យក៏បានទទួលពាន់រង្វាន់ក្នុងប្រទេសតាមរយៈការចូលរួមប្រឡងប្រណាំងទីក្រុងស្អាត និងទីក្រុងឆ្លាតវៃ ដូចជា៖

ចលនាប្រលងប្រណាំង បង្គន់សាធារណៈកម្ពុជាលើកទី២ ក្នុងឆ្នាំ២០២០ (ចំណតរថយន្តស៊ូជីង) ទទួលបានស្នាមញញឹម ៣
រមណីយដ្ឋានសួនស្នេហ៍ជនបទ ទទួលបានស្នាមញញឹម ៣
រមណីយដ្ឋានប្រាសាទបន្ទាយឆ្មារ ទទួលបានស្នាមញញឹម ៣
សួនមានជ័យ ទទួលបានស្នាមញញឹម២
ការប្រលងប្រណាំងសហគមន៍ទេសចរណ៍ ល្អបំផុតខេត្ត ទទួលបានជ័យលាភី ៣ ឆ្នាំជាប់គ្នា ( ឆ្នាំ២០១៧-២០២០ )
ការប្រលងប្រណាំងទីក្រុងស្អាតលើកទី២ ឆ្នាំ២០២១ ក្រុងចំនួន២ ដែលបានជាប់ជ័យ លាភី ទទួលបានផ្ការំដួល ២ទងគឺ ក្រុងសិរីសោភ័ណ និងក្រុងប៉ោយប៉ែត
ការប្រលងប្រណាំងទីក្រុង ស្អាតលើកទី៣ ឆ្នាំ២០២២ ក្រុងសិរីសោភ័ណ និងក្រុងប៉ោយប៉ែត បានទទួលជ័យលាភីផ្ការំដួល ២ទង នៅក្រសួងទេសចរណ៍ រាជធានីភ្នំពេញ
ពានរង្វាន់សហគមន៍ទេសចរណ៍ឆ្នើមឆ្នាំ២០២២ នៅរាជធានីភ្នំពេញផងដែរ និងពានរង្វាន់ជ័យលាភីមាសប្រចាំឆ្នាំ២០២២ ផ្នែកអារាមមេត្រីភាពបរិស្ថាន(វត្តប្រាសាទស្រះកណ្ដាល (ខ្ពស់) ស្រុកព្រះនេត្រព្រះ នៅក្រសួងបរិស្ថានរាជធានីភ្នំពេញ។

គួររំលឹកផងថា ខេត្តបន្ទាយមានជ័យជាខេត្តមួយស្ថិតក្នុងចំណោមរាជធានីខេត្តទាំង ២៥ទូទាំងប្រទេស និងមានព្រំប្រទល់ខាងកើតទល់នឹងខេត្តសៀមរាប ខាងលិចទល់នឹងព្រះរាជាណាចក្រថៃ លាតសន្ធឹងប្រវែង ១៥៣គីឡូម៉ែត្រ ជាប់នឹងខេត្តស្រះកែវ និងខេត្តបូរីរ៉ាំ ខាងជើងទល់នឹង ខេត្តឧត្តរមានជ័យ ខាងត្បូងទល់ នឹងខេត្តបាត់ដំបង៕

The post ត្រឹម ៥ ឆ្នាំ ខេត្តបន្ទាយមានជ័យទទួលពានរង្វាន់ ៤ ផ្សេងគ្នាពីក្រៅប្រទេស appeared first on Kampuchea Thmey Daily.

និស្សិតខ្មែរឈ្នះពានរង្វាន់ និងមេដាយជាច្រើនក្នុងការប្រកួតអន្តរជាតិនៅតៃវ៉ាន់

អុន ស្រីមាន — Wed, 07 Dec 2022 09:09:39 +0000

និស្សិត និងសាស្ត្រាចារ្យ២៧រូបមកពីសាកលវិទ្យាល័យន័រតុន មកពីផ្នែកវិស្វកម្មអគ្គិសនី និងអេឡិចត្រូនិក ផ្នែកស្ថាបត្យកម្ម និងនគរោបនីយវិទ្យា និងវិទ្យាសាស្ត្រកុំព្យូទ័របានឈ្នះមេដាយ និងពានរង្វាន់ជាច្រើនក្នុងព្រឹត្តិការណ៍ពិភពលោក “គំនិតច្នៃប្រឌិត និងការបង្កើតថ្មី ជាលក្ខណៈអន្ដរជាតិនៅទីក្រុងកៅស៊ុងប្រចាំឆ្នាំ២០២២” នៅលើទឹកដីកោះតៃវ៉ាន់ ដែលមាន៣៤ប្រទេសចូលរួម។

ព្រឹត្តិការណ៍ពិភពលោក “គំនិតច្នៃប្រឌិត និងការបង្កើតថ្មី ជាលក្ខណៈអន្ដរជាតិនៅទីក្រុងកៅស៊ុងប្រចាំឆ្នាំ២០២២” ប្រព្រឹត្តទៅរយៈពេល០៣ថ្ងៃចាប់ពីថ្ងៃទី ០១ ដល់ថ្ងៃទី០៣ ខែធ្នូ ឆ្នាំ២០២២ ដែលមានប្រទេស ៣៤ចូលរួម ភាគច្រើនសុទ្ធតែជាប្រទេសនៅក្នុងប៉ែកអឺរ៉ុប។ ចំពោះប្រទេសនៅក្នុងតំបន់អាស៊ីអាគ្នេយ៍ដែលបានចូលរួមដែរនោះមានដូចជាប្រទេសកម្ពុជា ថៃ ម៉ាឡេស៊ី ឥណ្ឌូនេស៊ី វៀតណាម និងកោះតៃវ៉ាន់។

ជាមួយគ្នានោះ និស្សិតមកពីសាកលវិទ្យាល័យន័រតុនតំណាងឱ្យប្រទេសកម្ពុជា ក៏បានចូលរួមប្រកួតលើស្នាដៃ ១៤គម្រោងផងដែរ។ ក្នុងនោះ ផ្នែកស្ថាបត្យកម្ម និងនគរោបនីយវិទ្យាមាន០៦គម្រោង។ ចំណែកកវិស្វកម្មអគ្គិសនី និងអេឡិចត្រូនិចមាន ០៣គម្រោង និងផ្នែកវិទ្យាសាស្ត្រកុំព្យូទ័រមាន ០៥គម្រោង។ ជាលទ្ធផល និស្សិតខ្មែរក៏បានទទួលនូវលទ្ធផលជាទីគាប់ចិត្តសម្រាប់មុខមាត់ប្រទេសកម្ពុជា។ ទាំងនេះ សុទ្ធតែជាគម្រោងដែលនិស្សិតខ្មែរទទួលបានពានរង្វាន់ និងមេដាយជាច្រើនទៀត។

ជុំវិញនឹងការទទួលបានជយលាភីនេះ លោកស្រី សូរ សុគន្ធារី ប្រធានកិត្តិយសផ្នែកស្ថាបត្យកម្ម និងនគរោបនីយវិទ្យា នៃសាកលវិទ្យាល័យន័រតុនបានលើកឡើងថា កាលដែលនិស្សិតខ្មែរទទួលបានជយលាភីលើឆាកអន្តរជាតិនេះ គឺជាមោទនភាពធំធេងណាស់របស់កម្ពុជា។

កូនខ្មែរជំនាន់ក្រោយអាចបង្កើតនូវស្នាដៃថ្មីៗបាន ព្រមទាំងទទួលបានជយលាភីលើឆាកអន្តរជាតិដែលភាគច្រើនគឺជាប្រទេសនៅប៉ែកអឺរ៉ុបចូលរួម ទាំងនេះគឺជាលទ្ធផលមួយដែលគួរឱ្យស្ងើចស្ងែង។

កញ្ញា រីចាន់ សាន់ដេ ជានិស្សិតផ្នែកផ្នែកស្ថាបត្យកម្ម និងនគរោបនីយវិទ្យា ដែលទទួលបានពានរង្វាន់ពិភពលោកមួយនេះបានលើកឡើងថា នេះគឺជាលើកទីមួយ របស់កញ្ញា និងក្រុម ដែលខ្លួនមានឱកាសបានទៅប្រកួតលើឆាកពិភពលោកបែបនេះ កញ្ញាពិតជាមានក្តីរំភើបជាខ្លាំងចំពោះជយលាភីមួយនេះណាស់។

ចំណែកលោក ឡុង ដាវិត ផ្នែកវិទ្យាសាស្ត្រកុំព្យូទ័រ បានឲ្យដឹងថា សម្រាប់ការប្រកួតក្នុងព្រឹត្តិការណ៍នេះ លោក និងក្រុមទាំងមូល បានខិតខំប្រឹងប្រែងអស់ពីសមត្ថភាព និងបានប្រើប្រាស់រយៈពេលជាយូរ ដើម្បីបង្ហាញពីសកត្តានុពលរបស់កម្ពុជាទៅកាន់អន្តរជាតិឱ្យបានស្គាល់។ ជាលទ្ធផល ក្រុមលោកគឺអាចយកជយលាភីជូនកម្ពុជាបានប្រាកដមែន។

រីឯ កញ្ញា រដ្ឋា សុផានីត មកពីផ្នែកវិស្វកម្ម អគ្គិសនី និងអេឡិចត្រូនិច ដែលជាម្ចាស់ពានរង្វាន់មួយរូប ក៏បានថ្លែងអំណរគុណដល់សាកលវិទ្យាធិការនៃសាកលវិទ្យាល័យន័រតុន ដែលផ្តល់ឱកាសដល់ខ្លួន និងនិស្សិតដទៃទៀត បានចូលរួមប្រកួត និងបានឃើញពីព្រឹត្តិការណ៍ដ៏ធំមួយនេះ ដែលមានប្រទេសជាច្រើនបានចូលរួមផងដែរ។ ចំពោះពានរង្វាន់ និងជយលាភីដែលកម្ពុជាទទួលបានពេលនេះ គឺបញ្ជាក់ឱ្យឃើញថា កម្ពុជាមានសមត្ថភាពគ្រប់គ្រាន់ មិនមែនជាប្រទេសទន់ខ្សោយឡើយ។

សូមជម្រាបថា ការប្រកួតនេះត្រូវដាក់ពិន្ទុដោយគណៈកម្មការ២ ទៅ៣រូប ដែលសុទ្ធតែជាជនជាបរទេស។ ចំពោះការវាយតម្លៃលើគម្រោង គឺគណៈកម្មការមកពីប្រទេសផ្សេងៗ ដូចជាចក្រភពអង់គ្លេសជាដើម ដែលមើលទៅលើការបង្កើតថ្មីដែលជាអត្ថប្រយោជន៍ដល់បរិស្ថាន និងមិនប៉ះពាល់ដល់ពិភពលោក។ ប្រសិនជាគណៈកម្មការពេញចិត្តលើគម្រោងអ្វីមួយគឺធ្វើការវាយតម្លៃ និងដាក់ពិន្ទុ ដោយមិនបានគិតពីចំណាត់ថ្នាក់ឡើយ គឺគិតពី Top តាមគម្រោងនីមួយៗ។

ចំពោះពានរង្វាន់របស់កម្ពុជាផ្នែកកុំព្យូទ័រវិញ គឺកម្ពុជាទទួលបាន Top ICT ពោលគឺ ពានមួយនេះមានតែកម្ពុជាប៉ុណ្ណោះដែលទទួលបានប្រទេសផ្សេងទៀតដែលចូលរួមប្រកួរគឺមិនទទួលបានឡើយ៕

ដោយ៖ អុន ស្រីមាន

The post និស្សិតខ្មែរឈ្នះពានរង្វាន់ និងមេដាយជាច្រើនក្នុងការប្រកួតអន្តរជាតិនៅតៃវ៉ាន់ appeared first on Kampuchea Thmey Daily.

ធនាគារ អេស៊ីលីដា បានទទួលពានរង្វាន់ហិរញ្ញប្បទានសហគ្រាសធុនតូច និងមធ្យមសកលលោក ឆ្នាំ ២០២២

Sorn Phanith — Tue, 27 Sep 2022 03:37:32 +0000

ធនាគារ អេស៊ីលីដា ភីអិលស៊ី បានទទួលពានរង្វាន់“ហិរញ្ញប្បទានសហគ្រាសធុនតូច និងមធ្យមសកលលោក ឆ្នាំ ២០២២ ជាស្ថាប័ន ដែលផ្តល់ហិរញ្ញប្បទានដល់សហគ្រាសធុនតូច និងមធ្យមប្រចាំឆ្នាំ” ។

យោងតាមសេចក្តីប្រកាសព័ត៌មានរបស់ធនាគារ អេស៊ីលីដា ភីអិលស៊ី បានឱ្យដឹងថា ការទទួលពានរង្វាន់នេះ បានធ្វើឡើងក្នុងវេទិកាហិរញ្ញប្បទានសហគ្រាសធុនតូច និងមធ្យមសកលលោក លើកទី ៩ ដែលបានប្រព្រឹត្តិទៅពីថ្ងៃទី ១៩ ដល់ថ្ងៃទី ២១ ខែកញ្ញា ឆ្នាំ ២០២២ នៅរាជធានីភ្នំពេញព្រះរាជាណាចក្រកម្ពុជា ដែលវេទិកានេះរៀបចំឡើងដោយស្ថាប័នសាជីវកម្មហិរញ្ញវត្ថុអន្តរជាតិ (IFC) និងសហការរៀបចំដោយធនាគារជាតិនៃកម្ពុជា ក្នុងគោលបំណងពង្រីកនូវលទ្ធភាពទទួលបានហិរញ្ញប្បទាន សម្រាប់សហគ្រាសធុនតូច និងមធ្យមទូទាំងសកលលោក។

ធនាគារ អេស៊ីលីដា ភីអិលស៊ី មានមោទកភាពយ៉ាងក្រៃលែង ដែលបានទទួលពានរង្វាន់ “ហិរញ្ញប្បទានសហគ្រាសធុនតូច និងមធ្យមសកលលោក ឆ្នាំ ២០២២ ជាស្ថាប័នដែលផ្តល់ហិរញ្ញប្បទានដល់សហគ្រាសធុនតូច និងមធ្យម ប្រចាំឆ្នាំ”។ ទាំងនេះ សបញ្ជាក់ថា ធនាគារបានខិតខំប្រឹងប្រែងក្នុងការផ្តល់ហិរញ្ញប្បទានដល់សហគ្រាសធុនតូច និងមធ្យមនៅកម្ពុជា។ លើសពីនេះទៅទៀត សមិទ្ធផលនេះ ជាការបង្ហាញពីកំណើនឥណទានដល់សហគ្រាសធុនតូច និងមធ្យម របស់ធនាគារ អេស៊ីលីដា ភីអិលស៊ី ក្នុងរយៈពេលច្រើនឆ្នាំកន្លងមកនេះ ព្រមទាំងការបម្រើផលិតផល សេវាកម្មផ្សេងទៀត សម្រាប់សហគ្រាសធុនតូច និងមធ្យម ផងដែរ។

ធនាគារ អេស៊ីលីដា ភីអិលស៊ី ផ្តល់ជូននូវផលិតផល និងសេវាកម្មដ៏សម្បូរបែប ដើម្បីបំពេញតម្រូវការលើគ្រប់វិស័យ ដែលកំពុងរីកចម្រើន រួមមានសហគ្រាសធុនតូច និងមធ្យម និងអតិថិជនសាជីវកម្ម។ ធនាគារ អេស៊ីលីដា បានផ្តល់ឥណទានដល់សហគ្រាសធុនតូច និងមធ្យមប្រមាណ ៨០% នៃប្រាក់កម្ចីសរុបរបស់ធនាគារ។ ឥណទានសរុបរបស់ធនាគារ សម្រាប់សហគ្រាសធុនតូច និងមធ្យម បានកើនឡើងពី ៣,០៣ ពាន់លានដុល្លារអាមេរិកក្នុងឆ្នាំ ២០១៩ ដល់ ៣,៥៣ ពាន់លានដុល្លារអាមេរិក ក្នុងឆ្នាំ ២០២០ ហើយបន្ទាប់មកកើនឡើងដល់ ៤,២៤ ពាន់លានដុល្លារអាមេរិក ក្នុងឆ្នាំ ២០២១៕

The post ធនាគារ អេស៊ីលីដា បានទទួលពានរង្វាន់ហិរញ្ញប្បទានសហគ្រាសធុនតូច និងមធ្យមសកលលោក ឆ្នាំ ២០២២ appeared first on Kampuchea Thmey Daily.

អបអរសាទរ! ធនាគារ ហត្ថា បានទទួលពានរង្វាន់កិត្តិយសពីព្រឹត្តិការណ៍ ហិរញ្ញវត្ថុសហគ្រាសខ្នាតតូច និងមធ្យមសាកល ឆ្នាំ ២០២២

Sorn Phanith — Fri, 23 Sep 2022 07:18:49 +0000

យើងខ្ញុំមានមោទកភាពជាខ្លាំង ក្នុងការប្រកាសថា ធនាគារ ហត្ថា ម.ក បានទទួលពានរង្វាន់កិត្តិយសពីព្រឹត្តិការណ៍ ពានរង្វាន់ហិរញ្ញវត្ថុសហគ្រាសខ្នាតតូច និងមធ្យមសាកល ឆ្នាំ ២០២២ ឬហៅកាត់ថា Global SME Finance Awards 2022។

ចំពោះជយលាភីឆ្នាំនេះ ធនាគារ ហត្ថា ត្រូវបានជ្រើសរើសចេញពីបេក្ខភាពជាច្រើនដែលមានភាព ប្រកួតប្រជែងខ្ពស់។ គួរបញ្ជាក់ផងដែរថា ព្រឹត្តិការណ៍ Global SME Finance Awards 2022 ត្រូវបានរៀបចំរួមគ្នាដោយ សាជីវកម្មហិរញ្ញវត្ថុអន្តរជាតិ (IFC) ដែលជាសមាជិករបស់ក្រុមធនាគារពិភពលោក (World Bank Group) និងវេទិកាហិរញ្ញវត្ថុសហគ្រាសខ្នាតតូច និងមធ្យមសកល (Global SME Finance Forum) ហើយទទួលបានការគាំទ្រពីសំណាក់ភាពជាដៃគូសាកលសម្រាប់បរិយាប័ន្នហិរញ្ញវត្ថុរបស់ក្រុមប្រទេស G20 (ឬហៅកាត់ថា GPFI ) ដែលព្រឹត្តិការណ៍នេះមានគោលដៅក្នុងការអបអរសាទរដល់ស្ថាប័នហិរញ្ញវត្ថុ និងក្រុមហ៊ុនបច្ចេកវិទ្យាហិរញ្ញវត្ថុ (Fintech) ដែលសម្រេចបាននូវសមិទ្ធផលគួរឱ្យកោតសរសើរក្នុងការផ្តល់ជូនអតិថិជនប្រភេទសហគ្រាសខ្នាតតូច និងមធ្យម នូវផលិតផល និងសេវាកម្មដ៏ល្អឥតខ្ចោះ។

ថ្លែងក្នុងព្រឹត្តិការណ៍ដ៏អស្ចារ្យនេះ លោក Matthew Gamser នាយកប្រតិបត្តិនៃ Global SME Finance Forum បានមានប្រសាសន៍ថា៖ «ជារៀងរាល់ឆ្នាំ យើងសង្កេតឃើញថាមានស្ថាប័នកាន់តែច្រើន ជាងមុន បានធ្វើសកម្មភាពហួសពីការរំពឹងទុកក្នុងការជួយបង្កើនលទ្ធភាពទទួលបានហិរញ្ញប្បទានរបស់សហគ្រាសខ្នាតតូច និងមធ្យម។ បន្ថែមពីលើនេះទៀត យើងក៏សង្កេតឃើញផងដែរនូវគំនិតច្នៃប្រឌិតដ៏អស្ចារ្យជាច្រើន ក៏ដូចជាឱកាសក្នុងការកែលំអអតុល្យភាពកើតចេញពីកត្តាយេនឌ័រ អាយុ និងកត្តាវិសមភាពផ្សេងទៀត ហើយកាន់តែពិសេសជាងនេះទៅទៀត គឺយើងបានមើលឃើញពីវិធីថ្មីៗក្នុងការផ្ដល់ជូនសេវាកម្ម ដែលផ្តោតសំខាន់លើអតិថិជនជាអាទិភាព ដែលធានាបាននូវការផ្តល់ហិរញ្ញប្បទានដែលមានការទទួលខុសត្រូវខ្ពស់ និងផ្ដល់អត្ថប្រយោជន៍យ៉ាងពិតប្រាកដដល់អតិថិជន។ ពានរង្វាន់ប្រចាំឆ្នាំ ២០២២ នេះ ពាំនាំនូវលទ្ធផលដ៏ល្អប្រសើរមិនខុសពីព្រឹត្តិការណ៍មុនៗ ពោលគឺ គំនិតច្នៃប្រឌិត សមិទ្ធផល និងសក្តានុពលកាន់តែអស្ចារ្យជាងមុន។»

The post អបអរសាទរ! ធនាគារ ហត្ថា បានទទួលពានរង្វាន់កិត្តិយសពីព្រឹត្តិការណ៍ ហិរញ្ញវត្ថុសហគ្រាសខ្នាតតូច និងមធ្យមសាកល ឆ្នាំ ២០២២ appeared first on Kampuchea Thmey Daily.

ស្រាបៀរប្រណិតទឹកខ្មៅ ដ្រាហ្គិន ព្រីមៀមដាកបៀរ ឈ្នះពានរង្វាន់ពីរផ្ទួនគ្នាពីកម្មវិធីស្រាបៀរលំដាប់ពិភពលោក World Beer Awards ឆ្នាំ ២០២២

Sorn Phanith — Mon, 12 Sep 2022 04:01:01 +0000

ក្រុមហ៊ុន វឌ្ឍនៈ ប្រ៊ូវើរី មានមោទកភាពក្នុងការចែករំលែកនូវក្តីសោមនស្សរីករាយ ក្នុងឱកាសដែលផលិតផលក្រាហ្វបៀរ (Craft Beer) ទឹកខ្មៅដ៏ប្រណិត ដ្រាហ្គិន ព្រីមៀមដាកបៀរ (Dragon Premium Dark Beer) បានឈ្នះពានរង្វាន់ចំនួនពីរផ្ទួនគ្នា ក្នុងកម្មវិធីស្រាបៀរលំដាប់ពិភពលោក World Beer Awards ឆ្នាំ ២០២២ សម្រាប់ជយលាភីមាស (Cambodia Gold Lager Dark) និងជយលាភីស្រាបៀរទឹកខ្មៅប្រចាំប្រទេសកម្ពុជា (Cambodia Country Winner Lager Dark) ពីចក្រភពអង់គ្លេស។ កម្មវិធី World Beer Awards គឺជាកម្មវិធីប្រកួតប្រជែងដ៏ធំបំផុតលំដាប់អន្តរជាតិដែលរៀបចំឡើង ក្នុងគោលបំណងស្វែងរកផលិតផល និងផលិតករស្រាបៀរដែលមានភាពប៉ិនប្រសប់ និងភាពច្នៃប្រឌិតខ្ពស់ ក្នុងការសម្រេចបាននូវការផលិតស្រាបៀរដ៏អស្ចារ្យ។

ក្នុងឆ្នាំ២០២២នេះ មានផលិតផលស្រាបៀរចំនួនជាង ៣២០០ ម៉ាក មកពីជាង ៥០ ប្រទេសផ្សេងគ្នាជុំវិញពិភពលោកដែលបានចូលរួមក្នុងការប្រកួតក្នុងកម្មវិធី World Beer Awards។ ផលិតផលស្រាបៀរនីមួយៗត្រូវបានឆ្លងកាត់ការត្រួតពិនិត្យវាយតម្លៃយ៉ាងម៉ត់ចត់ និងច្រើនដំណាក់កាល ដោយគណៈកម្មការជំនាញខាងស្រាបៀរអន្តរជាតិជាច្រើនរូប ប្រកបដោយការយកចិត្តទុកដាក់បំផុតទៅលើរសជាតិ គុណភាព និងការរចនា មុននឹងត្រូវបានទទួលស្គាល់ និងផ្តល់ជូននូវជយលាភី។

នេះគឺជាសមិទ្ធផលគួរជាទីមោទនៈថ្មីមួយទៀតរបស់ក្រុមហ៊ុន វឌ្ឍនៈ ប្រ៊ូវើរី ដែលផលិតផលស្រាបៀរថ្មី ដ្រាហ្គិន បៀរ បានឈ្នះពានរង្វាន់ដ៏អស្ចារ្យទាំងពីរនេះពីកម្មវិធីលំដាប់ពិភពលោក បើទោះបីជាទើបតែមានវត្តមាននៅលើទីផ្សារមិនយូរប៉ុន្មានក្តី។ សមិទ្ធផលនេះ កើតចេញពីការប្តេជ្ញាចិត្ត ការយកចិត្តទុកដាក់ និងការផ្ចិតផ្ចង់ក្នុងការផលិតនូវស្រាបៀរដ៏ល្អឯកមួយ ដើម្បីរួមចំណែកលើកស្ទួយកិត្យានុភាពជាតិ និងផលិតផលក្នុងស្រុករបស់ប្រទេសកម្ពុជា។

អ្នកឧញ៉ា សំអាង វឌ្ឍនៈ នាយកប្រតិបត្តិក្រុមហ៊ុន វឌ្ឍនៈ ប្រ៊ូវើរី បានមានប្រសាសន៍ថា៖ «យើងខ្ញុំសូមចែករំលែកភាពសប្បាយរីករាយនិងការអបអរសាទរចំពោះ ភាពជោគជ័យមួយនេះជាមួយនឹងប្រជាជនខ្មែរយើងទាំងអស់គ្នា។ កិច្ចខិតខំប្រឹងប្រែងទាំងឡាយរហូតទទួលបានជោគជ័យនាពេលនេះ គឺដើម្បីតបស្នងឱ្យស័ក្ដិសមទៅនឹងរាល់ការចំណាយ និងការជឿទុកចិត្តដ៏មានតម្លៃបំផុតរបស់អតិថិជន។ ដ្រាហ្គិន ព្រីមៀមដាកបៀរ គឺជាសក្ខីកម្មនៃការបេ្តជ្ញាចិត្ត និងភាពច្នៃប្រឌិតខ្ពស់របស់យើងខ្ញុំ ក្នុងការផលិតស្រាបៀរដែលមានគុណភាពលំដាប់អន្តរជាតិ រសជាតិថ្មីប្លែកមិនធ្លាប់មាន ដើម្បីផ្តល់ជូននូវបទពិសោធន៍ និងទម្លាប់ថ្មីក្មុងការទទួលទានស្រាបៀរនៅក្នុងប្រទេសកម្ពុជា ដែលអាចឱ្យអតិថិជនផ្តល់តម្លៃតាមរយៈការចាប់ផ្តើមសប្បាយជាមួយរសជាតិ និងគុណភាពដ៏ពិតប្រាកដ» ។

ទោះបីទើបតែមានវត្តមាននៅលើទីផ្សារក្នុងរយៈពេលដ៏ខ្លីក៏ពិតមែន ប៉ុន្តែ ដ្រាហ្គិនបៀរ ទទួលបានការគាំទ្រ និងពេញនិយមយ៉ាងខ្លាំង ដោយសារតែរសជាតិស្រាលស្រទន់ថ្មីប្លែកមិនធ្លាប់មាន អមដោយក្លិនឈ្ងុយពីគ្រឿងផ្សំដ៏សម្បូរបែប ដែលពោរពេញដោយឱជារសនិងភាពស្រស់ស្រាយ ជាមួយនឹងកម្រិត IBU ទាបដែលមិនធ្វើឱ្យស្រាបៀរទឹកខ្មៅមួយប្រភេទនេះ មានរសជាតិជូរ និងល្វីងខ្លាំងដូចស្រាបៀរទឹកខ្មៅដទៃទៀតឡើយ។

នេះមិនមែនជាលើកទីមួយឡើយ ដែលផលិតផលស្រាបៀររបស់ក្រុមហ៊ុន វឌ្ឍនៈ ប្រ៊ូវើរី ត្រូវបានទទួលស្គាល់ពីស្ថាប័នអន្តរជាតិធំៗ។ ក្រៅពី Dragon Beer ផលិតផលស្រាបៀររបស់ក្រុមហ៊ុន វឌ្ឍនៈ ប្រ៊ូវើរី ចំនួន ២ ប្រភេទទៀត គឺស្រាបៀរ វឌ្ឍនៈ និងស្រាបៀរ គ្រុឌ ក៏ធ្លាប់បានឈ្នះ មេដាយមាស ពីស្ថាប័ន MONDE SELECTION ដ៏ល្បីល្បាញសម្រាប់ឆ្នាំ ២០២២ នៅទីក្រុងព្រុចសែល ប្រទេសបែលហ្ស៊ិកផងដែរ បន្ទាប់ពីបានឈានជើងចូលក្នុងទីផ្សារប្រទេសកម្ពុជាត្រឹមរយៈពេលជាង ៦ ខែ ស្របពេលដែលស្រាបៀរជាច្រើនម៉ាកផ្សេងទៀត ដែលមានវត្តមាននៅលើទីផ្សារប្រទេសកម្ពុជាជាយូរឆ្នាំមកហើយទទួលបានត្រឹមមេដាយប្រាក់ប៉ុណ្ណោះ។

គួរបញ្ជាក់ផងដែរថា ក្រុមហ៊ុន វឌ្ឍនៈ ប្រ៊ូវើរី បានបើកការដ្ឋានសាងសង់រោងចក្រផលិតស្រាបៀរ ដែលមានតម្លៃជាង ១៤០ លានដុល្លារ នៅខណ្ឌច្បារអំពៅ រាជធានីភ្នំពេញ ក្នុងឆ្នាំ ២០២១។ វឌ្ឍនៈ ប្រ៊ូវើរី គឺជាក្រុមហ៊ុនបុត្រសម្ព័ន្ធមួយរបស់ វឌ្ឍនៈ គ្រុប ដែលជាគ្រុបដ៏លេចធ្លោមួយមានក្រុមហ៊ុនជាច្រើនវិនិយោគលើវិស័យផ្សេងៗដូចជា វិស័យទំនិញ និងសេវាកម្ម អចលនទ្រព្យ សួនឧស្សាហកម្ម ធនាគារ ទីលានវាយកូនហ្គោល បដិសណ្ឋារកិច្ច សំណង់ ម្ហូបអាហារ និងវិស័យអប់រំ។ ដោយសារការប្រកាន់ខ្ជាប់នូវគុណតម្លៃស្នូល «គុណភាព ភាពច្នៃប្រឌិត សេវាកម្មល្អឯក និងសុខុមាលភាព» តាំងពីដើមរៀងមក វឌ្ឍនៈ គ្រុប តែងតែទទួលបានពានរង្វាន់ធំៗជាបន្តបន្ទាប់ពីស្ថាប័នជាតិ និងអន្តរជាតិល្បីៗជាច្រើននៅទូទាំងពិភពលោកសម្រាប់រាល់ការវិនិយោគទាំងឡាយនៅក្នុងប្រទេសកម្ពុជា៕

The post ស្រាបៀរប្រណិតទឹកខ្មៅ ដ្រាហ្គិន ព្រីមៀមដាកបៀរ ឈ្នះពានរង្វាន់ពីរផ្ទួនគ្នាពីកម្មវិធីស្រាបៀរលំដាប់ពិភពលោក World Beer Awards ឆ្នាំ ២០២២ appeared first on Kampuchea Thmey Daily.

មិត្តហ្វូន ឈ្នះរង្វាន់ពីរផ្សេងគ្នាបន្ថែមទៀតពីស្ថាប័ន Globee Awards

Sorn Phanith — Tue, 31 May 2022 09:42:14 +0000

មិត្តហ្វូន (Metfone) ក្រុមហ៊ុនទូរគមនាគមន៍ និងបច្ចេកវិទ្យាឌីជីថលឈានមុខគេនៅកម្ពុជា បានឈ្នះពានរង្វាន់ចំនួនពីរផ្សេងគ្នាបន្ថែមទៀតពីស្ថាប័ន Globee® Awards ដែលរៀបចំកម្មវិធី ផ្ដល់ពានរង្វាន់ដល់អាជីវកម្ម និងដាក់ចំណាត់ថ្នាក់អាជីវកម្មរបស់បណ្ដាក្រុមហ៊ុនធំៗលើពិភពលោក ។ ការប្រកាស និងទទួលពានរង្វាន់នេះបានធ្វើឡើងនៅក្នុងពិធី “ពានរង្វាន់លើកទី ១៧ នៃព័ត៌មានវិទ្យាពិភពលោកប្រចាំឆ្នាំ 2022” ។

ពានរង្វាន់ទាំងពីរនោះរួមមាន ពានរង្វាន់មាស ផ្នែក “កម្មវិធីបច្ចេកវិទ្យា និងបម្រើបម្រាស់សេវាកម្មល្អបំផុតប្រចាំឆ្នាំ” សម្រាប់កម្មវិធី CamID របស់ខ្លួន និងពានរង្វាន់ប្រាក់ចំពោះកម្មវិធីទំនួលខុសត្រូវសង្គមប្រចាំឆ្នាំ សម្រាប់កម្មវិធីទូរទស្សន៍ “នេះមិនមែនជាសុបិន” ។

អគ្គនាយករងក្រុមហ៊ុនមិត្តហ្វូន លោក ញ៉ុង ឌិនថន មានប្រសាសន៍ថា ពានរង្វាន់ទាំងអស់នេះ គឺជាតឹកតាងបង្ហាញឲ្យឃើញថា ក្រុមហ៊ុនមិត្តហ្វូនបានប្រកាន់ខ្ជាប់ចំពោះគុណតម្លៃស្នូលនៃអាជីវកម្មរបស់ខ្លួន ដែលក្នុងនោះ មិត្តហ្វូនមានការប្ដេជ្ញាចិត្តក្នុងការវិនិយោគទៅលើសង្គម តាមរយៈការច្របាច់បញ្ចូលគ្នារវាងប្រតិបត្តិការអាជីវកម្ម ជាមួយនឹងសកម្មភាពសង្គម។ រង្វាន់ទាំងនេះក៏ឆ្លុះបញ្ចាំងឲ្យឃើញពីការប្ដេជ្ញាចិត្តរយៈពេលវែងរបស់មិត្តហ្វូន ក្នុងការត្រួសត្រាយផ្លូវក្នុងវិស័យបច្ចេកវិទ្យាឌីជីថល តាមរយៈការផ្ដល់នូវផលិតផល និងសេវាកម្មបច្ចេកវិទ្យាដែលល្អបំផុតសម្រាប់អតិថិជនរបស់ខ្លួន។

លោក ញ៉ុង ឌិនថន មានប្រសាសន៍ថា៖ “ពានរង្វាន់ដ៏មានកិត្យានុភាពទាំងអស់នេះ សបញ្ជាក់ឲ្យឃើញពីភាពនាំមុខគេរបស់មិត្តហ្វូន និងការប្ដេជ្ញាចិត្តមុតមាំនៅក្នុងការបេសកកម្មត្រួសត្រាយផ្លូវ ដើម្បីបង្កើតបាននូវសង្គមឌីជីថល” ។ លោកបានបន្តថា៖ “យើងពិតជាមានមោទនភាពណាស់ ដែលបានឈ្នះនូវពានរង្វាន់ទាំងអស់នេះ ហើយក៏សូមថ្លែងអំណរគុណក្រៃលែងចំពោះអតិថិជនដ៏មានតម្លៃ សហការី និងដៃគូ ដែលបានជួយឲ្យយើងសម្រេចបាននូវសមិទ្ធផលទាំងអស់នេះ” ។

គណៈកម្មការកាត់សេចក្ដីក្នុងកម្មវិធីពានរង្វាន់នេះ មានសមាសភាពជាថ្នាក់នាយកប្រតិបត្តិ និងអ្នកជំនាញ ក្នុងវិស័យជាច្រើន ដែលបានចូលរួមដើម្បីផ្ដល់ពិន្ទុ និងមតិយោបល់ផ្សេងៗដើម្បីកំណត់ជ្រើសរើសជយលាភីសម្រាប់ពានរង្វាន់ក្នុងឆ្នាំ ២០២២ នេះ។

កម្មវិធី CamID ជាកម្មវិធីប្រកបដោយនវានុវត្តន៍ និងពហុមុខងារ ដែលមិនត្រឹមតែមានលក្ខណៈជាការកម្សាន្តប៉ុណ្ណោះទេ ប៉ុន្តែ ក៏ផ្ដល់សេវាកម្មផ្សេងៗទៀតដែលមានជាលើកដំបូងហើយក្នុងប្រទេសកម្ពុជា។ បច្ចុប្បន្ន CamID មានអ្នកប្រើប្រាស់ប្រមាណ ២,៧ លាននាក់ ដែលក្នុងនោះអ្នកប្រើប្រាស់សកម្មមានចំនួនប្រមាណ ៥៥ ម៉ឺននាក់ក្នុងមួយខែ ។ គោលដៅ គឺថា នៅដំណាច់ឆ្នាំ ២០២២ នេះ នឹងមានអ្នកប្រើប្រាស់សកម្មចំនួន ១,២ លាននាក់ក្នុងមួយខែ ។ តួលេខនេះបង្ហាញឲ្យឃើញពីភាពទាក់ទាញនៃកម្មវិធីនេះ ដោយជួយបើកលំហឌីជីថលសម្រាប់អតិថិជនមិត្តហ្វូនផង និងសម្រាប់កម្ពុជាផង។ ចំណែកឯកម្មវិធីទូរទស្សន៍ “នេះមិនមែនជាសុបិន” បានជួយប្រជាពលរដ្ឋកម្ពុជាក្នុងការស្វែងរកសាច់ញាតិដែលបានបែកគ្នាអំឡុងពេលសង្គ្រាម និងក្រោយពេលសង្គ្រាមដោយសារហេតុបច្ច័យផ្សេងៗ ។ ក្នុងរយៈពេល ១២ ឆ្នាំ ចន្លោះពីឆ្នាំ ២០១០ ដល់ ២០១២ កម្មវិធីនេះបានចាក់ផ្សាយវីដេអូចំនួន ១១៩ ភាគ ហើយបានជួយឲ្យប្រជាពលរដ្ឋ ១២៣ គ្រួសារបានជួបជុំគ្នាឡើងវិញ ក៏ដូចជាបានទទួលសំណើជាង ២០០០ ករណី ក្នុងការស្វែងរកសាច់ញាតិ ។

លោក ញ៉ុង ឌិនថន បានបន្ថែមថា៖ “ក្រុមហ៊ុនមិត្តហ្វូនចាត់ទុកកម្មវិធីទំនួលខុសត្រូវសង្គមជាប្រពៃណីរបស់យើង ក្នុងការផ្ដល់អត្ថប្រយោជន៍ដល់សង្គម និងជួយដល់ប្រជាពលរដ្ឋនានានៅទូទាំងប្រទេស។ យើងមានមោទកភាព និងរីករាយណាស់ ដែលយើងបានជួយប្រជាពលរដ្ឋទាំងនោះឲ្យជួបជុំគ្នាឡើងវិញ បន្ទាប់ពីរងការបែកគ្នាដោយសារតែកាលៈទេសៈអកុសល និងសង្គ្រាមឆាបឆួលនៅក្នុងប្រទេសកម្ពុជាកាលពីប៉ុន្មានទសវត្សរ៍មុន” ។

ក្រុមហ៊ុនមិត្តហ្វូន គឺជាប្រតិបត្តិករទូរគមនាគមន៍ឈានមុខគេនៅកម្ពុជា ដែលមានបណ្ដាញធំទូលាយ គួរទុកចិត្ត និងអាចជឿជាក់បាន។ បច្ចុប្បន្នមិត្តហ្វូនមានអ្នកប្រើប្រាស់ចំនួន ៩ លាននាក់ ដែលស្មើនឹង ៥០% នៃចំណែកទីផ្សារនៅកម្ពុជា៕

The post មិត្តហ្វូន ឈ្នះរង្វាន់ពីរផ្សេងគ្នាបន្ថែមទៀតពីស្ថាប័ន Globee Awards appeared first on Kampuchea Thmey Daily.

អ៉ីម៉ាន់នី (eMoney) ឈ្នះពានរង្វាន់មាស Gold Globee® Winner ពីស្ថាប័ន Globee Awards

Sorn Phanith — Fri, 06 May 2022 09:20:57 +0000

អ៉ីម៉ាន់នី (eMoney) ដែលជាក្រុមហ៊ុនផ្ដល់សេវាហិរញ្ញវត្ថុចល័ត និងជាក្រុមហ៊ុនបុត្រសម្ព័ន្ធរបស់ Viettel Cambodia (មិត្តហ្វូន) ទើបតែទទួលបានពានរង្វាន់មាស Gold Globee® Winner ពីស្ថាប័ន Globee Awards ដែលរៀបចំកម្មវិធី ផ្ដល់ពានរង្វាន់ដល់អាជីវកម្ម និងដាក់ចំណាត់ថ្នាក់អាជីវកម្មរបស់បណ្ដាក្រុមហ៊ុនធំៗលើពិភពលោក។

អគ្គនាយកប្រតិបត្តិរបស់ក្រុមហ៊ុន អ៉ីម៉ាន់នី លោក វុ ទួន ឡុង (Vu Tuan Long) មានប្រសាសន៍ថា ក្រុមហ៊ុនបានទទួលការអបអរសាទរ និងការប្រកាសពានរង្វាន់មាស Gold Globee® Winner នៅក្នុងផ្នែក ជោគជ័យកំណើនការលក់ប្រចាំឆ្នាំ ២០២២ លើកទី ៩ (9th Annual 2022 Sales Growth Achievement) ដែលពិធីប្រកាស និងប្រគល់រង្វាន់នោះ ត្រូវបានរៀបចំឡើងតាមរយៈវីដេអូពីចម្ងាយ និងមានការចូលរួមពីបណ្ដាក្រុមហ៊ុនដែលឈានដល់វគ្គផ្ដាច់ព្រ័ត្រ ក្រុមហ៊ុនឈ្នះពានរង្វាន់ គណៈកម្មការ ក៏ដូចជាអ្នកពាក់ព័ន្ធនៅក្នុងឧស្សាហកម្មពាណិជ្ជកម្មមកពីជុំវិញពិភពលោក។

លោក វុ ទួន ឡុង មានប្រសាសន៍ថា៖ “យើងខ្ញុំសូមថ្លែងអំណរគុណយ៉ាងជ្រាលជ្រៅចំពោះអតិថិជន ដ៏មានតម្លៃ ក្រុមការងារ និងដៃគូសហការទាំងអស់ ដែលបានជួយឲ្យអ៉ីម៉ាន់នីសម្រេចបាននូវសមិទ្ធផលនេះឡើង”។

លោក វុ ទួន ឡុង បានមានប្រសាសន៍បន្តទៀតថា៖ “ពានរង្វាន់ដ៏មានកិត្យានុភាពទាំងអស់នេះ សបញ្ជាក់ឲ្យឃើញពីភាពឈានមុខគេរបស់អ៉ីម៉ាន់នី និងការប្តេជ្ញាចិត្តយ៉ាងមុតមាំក្នុងបេសកកម្មត្រួសត្រាយផ្លូវនៃការបង្កើតសង្គមឌីជីថល និងវិស័យ FINTECH នៅកម្ពុជា”។

គណៈកម្មការកាត់សេចក្ដីក្នុងកម្មវិធីពានរង្វាន់នេះ មានសមាសភាពជាថ្នាក់នាយកប្រតិបត្តិ និងអ្នកជំនាញមកពីបណ្ដាវិស័យផ្សេងៗ ជាង ៥០ រូប មកពីជុំវិញពិភពលោក ហើយបានចូលរួមដើម្បីផ្ដល់ពិន្ទុ និងមតិយោបល់ផ្សេងៗដើម្បីកំណត់ជ្រើសរើសជ័យលាភីសម្រាប់ពានរង្វាន់ក្នុងឆ្នាំ ២០២២ នេះ។

ក្រុមហ៊ុន អ៉ីម៉ាន់នី ផ្ដល់សេវាហិរញ្ញវត្ថុជាច្រើនប្រភេទដល់ប្រជាពលរដ្ឋកម្ពុជា ដែលក្នុងនោះរួមមាន សេវាវេរលុយ សេវាទូទាត់វិក្កយបត្រទឹកភ្លើង បញ្ចូលលុយទូរស័ព្ទ ទូទាត់តាមកូដ QR សេវាដកប្រាក់ និងដាក់ប្រាក់ និងសេវាវេរលុយទៅវៀតណាម ដែលសេវាទាំងអស់នេះមានផ្ដល់តាមរយៈភ្នាក់ងាររបស់អ៉ីម៉ាន់នីប្រមាណជាង ៨០០០ ភ្នាក់ងារទូទាំងប្រទេស៕

The post អ៉ីម៉ាន់នី (eMoney) ឈ្នះពានរង្វាន់មាស Gold Globee® Winner ពីស្ថាប័ន Globee Awards appeared first on Kampuchea Thmey Daily.