លោកជំទាវ ឆាយ ស៊ីវលីន ប្រធានសមាគមទេសចរណ៍កម្ពុជា បានឱ្យដឹងថា ការដាំកូនត្នោតនាពេលនេះ ធ្វើឡើងក្នុងគោលបំណងបង្កើនភាពស្អាត និងភាពបៃតងធ្វើឱ្យពលរដ្ឋមានសុខុមាលភាពក្នុងសហគមន៍បង្កើតអនុស្សាវរីយ៍ជាមួយនឹងបវរកញ្ញាពិភពលោក ដែលមកពី៥០ប្រទេសផ្សេងគ្នា ក្នុងគោលដៅរួមផ្សព្វផ្សាយពីសក្តានុពលទេសចរណ៍នៅសហគមន៍កំពង់ឃ្លាំង  និងបង្ហាញពីអត្ដសញ្ញាណជាតិទៅកាន់ពិភពលោក។

លោក ង៉ូវ សេងកាក់ អភិបាលរងខេត្ដសៀមរាប មានប្រសាសន៍ថា កូនត្នោតទាំង ៤០០ដើម ដែលបានដាំនាឱកាសនេះពិតជាមានសារៈសំខាន់ណាស់ ក្នុងការលើកកម្ពស់ការអភិរក្សបរិស្ថាន ការបង្កើនភាពបៃតង និងការអភិវឌ្ឍន៍ទេសចរណ៍ប្រកបដោយចីរភាព។ ជាពិសេសការដាំដើមត្នោតនេះ មិនត្រឹមតែរួមចំណែកក្នុងការថែរក្សាធនធានធម្មជាតិប៉ុណ្ណោះទេ ប៉ុន្ដែថែមទាំងជាការថែរក្សានូវអត្តសញ្ញាណវប្បធម៌របស់យើងផងដែរ ពីព្រោះដើមត្នោតត្រូវបានចាត់ទុកជារុក្ខជាតិដ៏មានតម្លៃ និងបង្ហាញពីអត្ដសញ្ញាណជាតិរបស់ប្រទេសកម្ពុជា។

លោកអភិបាលរង មានប្រសាសន៍បន្ដថា សម្រាប់ការធ្វើដំណើរទស្សនកិច្ចរបស់ប្រតិភូបវរកញ្ញាភពផែនដីអន្ដរជាតិ ឆ្នាំ២០២៦ លើកទី៤ នាពេលនេះ ក្នុងគោលបំណងស្វែងយល់ពីរបៀបរស់នៅ វប្បធម៌ ប្រពៃណី និងជីវភាពរស់នៅរបស់បងប្អូនប្រជាពលរដ្ឋនៅក្នុងសហគមន៍។ ការចូលរួមរបស់ប្រតិភូអន្ដរជាតិនេះ ក៏ជាឱកាសមួយក្នុងការផ្សព្វផ្សាយនូវសក្ដានុពលទេសចរណ៍ធម្មជាតិ និងវប្បធម៌របស់ខេត្ដសៀមរាបទៅកាន់សហគមន៍អន្ដរជាតិ និងពិភពលោកផងដែរ។

‎លោក គិម វណ្ណៈ អភិបាលស្រុកសូទ្រនិគម បានឱ្យដឹងថា ការរៀបចំទស្សនកិច្ចទេសចរណ៍ ដែលមានព្រឹត្តិការណ៍ដាំកូនត្នោត គឺដើម្បីបណ្ដុះគំនិត ពន្លកបៃតង ដែលចូលរួមចំណែកក្នុងយុទ្ធសាស្ត្រចក្រាវិស័យបរិស្ថានរបស់រាជរដ្ឋាភិបាល ក្រោមការដឹកនាំដ៏ឈ្លាសវៃរបស់សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា។

‎លោកអភិបាលស្រុកក៏បានធ្វើការលើកទឹកចិត្តដល់បងប្អូនប្រជាពលរដ្ឋ ក្មួយៗសិស្សានុសិស្ស នាំគ្នាដាំកូនត្នោត ដើមឈើនានាឱ្យបានច្រើនក្នុងគោលបំណងទុកជាប្រយោជន៍ក្នុងសហគមន៍ បង្កើនជីវចម្រុះ សេដ្ឋកិច្ច សង្គមកិច្ច និងបង្កើនការទប់ទល់នឹងការប្រែប្រួលអាកាសធាតុ៕

ដោយ ៖ ជុន កុសល

The post កូនត្នោត ៤០០ដើម ត្រូវបានដាំក្នុងសហគមន៍កំពង់ឃ្លាំង ដើម្បីលើកកម្ពស់វិស័យបៃតង appeared first on Kampuchea Thmey Daily.

លោក ខ្វៃ​ អាទិត្យា អនុរដ្ឋលេខាធិការ និងជាអ្នកនាំពាក្យក្រសួងបរិស្ថាន នៅថ្ងៃទី២៩ ខែធ្នូ ឆ្នាំ២០២៥ ដោយមានការសហការពីមន្ទីរបរិស្ថានខេត្តកំពង់ស្ពឺ អញ្ជើញដឹកនាំលោកគ្រូ អ្នកគ្រូ សិស្សានុសិស្ស និងមន្ត្រីឧទ្យានុរក្ស ចុះដាំកូនឈើ កូនឈើហូបផ្លែ និងបន្លែ នៅថ្នាលបណ្ដុះកូនឈើភ្នំឱរ៉ាល់ ខេត្តកំពង់ស្ពឺ។

លោក ខ្វៃ អាទិត្យា បានថ្លែងថា ការចូលរួមរបស់យុវជនក្នុងសកម្មភាពដាំកូនឈើពេលនេះ គឺមានសារៈសំខាន់ណាស់ ដែលជាស្មារតីដើម្បីជំរុញការបណ្ដុះគំនិតដល់យុវជនឱ្យស្រលាញ់ភាពបៃតង ស្របតាមយុទ្ធសាស្ត្រចក្រា របស់ក្រសួងបរិស្ថាន ផ្ដោតលើភាពស្អាត ភាពបៃតង និងចីរភាព។

លោក ខ្វៃ អាទិត្យា បានលើកទឹកឱ្យយុវជនចូលរួមដាំកូនឈើ ជាពិសេសកូនឈើហូបផ្លែនៅតាមបរិវេណផ្ទះ ដោយលោក គូសបញ្ជាក់ថា ភាពបៃតង តាមរយៈការដាំកូនឈើ នឹងជួយទាំងបរិស្ថាន និងទាំងសេដ្ឋកិច្ចជាតិ ក៏ដូចជាសេដ្ឋកិច្ចគ្រួសារ។

នៅពេលមានភាពស្អាត និងភាពបៃតង លោក ថា ការរស់នៅរបស់ប្រជាជននឹងប្រកបដោយចីរភាព ដោយពុំមានការបំពុលបរិស្ថាន ពោលគឺមានសុខភាពល្អ។

មន្ត្រីជាន់ខ្ពស់ក្រសួងបរិស្ថានរូបនេះ បានអំពាវនាវឱ្យមានការបន្តរួមគ្នាអនុវត្តនូវយុទ្ធនាការទាំងឡាយរបស់ក្រសួង ដែលបានដាក់ចេញ ជាអាទិ៍យុទ្ធនាការថ្ងៃនេះខ្ញុំមិនប្រើថង់ប្លាស្ទិកទេ យុទ្ធនាការកម្ពុជាស្អាតខ្មែរធ្វើបាន និងយុទ្ធនាការផ្លូវជាតិស្អាត គ្មានសំរាម និងសំណល់ប្លាស្ទិក៕ ដោយ៖ ធឿន​ វ៉ាន់សុង

The post ក្រសួងបរិស្ថានបណ្ដុះផ្នត់គំនិតភាពបៃតងដល់យុវជន appeared first on Kampuchea Thmey Daily.

ពិធីនេះធ្វើឡើងដើម្បីអបអរសាទរ រុក្ខទិវា ៩កក្កដា និងបានប្រព្រឹត្តិទៅ ក្រោមអធិបតីភាព លោក គុជ លីណា សមាជិកក្រុមប្រឹក្សាខេត្ត លោក អ៊ឹង គឹមលាង អភិបាលរងខេត្ត ព្រមទាំងវត្តមាន ថ្នាក់ដឹកនាំអង្គភាពមន្ទីរ កងកំលាំងប្រដាប់អាវុធ មន្ត្រីរាជការ អាជ្ញាធរមូលដ្ឋាន សហភាពសហព័ន្ឋយុវជនកម្ពុជាខេត្ត ព្រមទាំង ប្រជាពលរដ្ឋក្នុងមូលដ្ឋានជាច្រើនទៀត។

លោក ទា គឹមសុទ្ឋ ប្រធានមន្ទីរកសិកម្មរុក្ខាប្រមាញ់និងនេសាទខេត្ត បានរាយការណ៍អំពីស្ថានភាពការងារសហគមន៍ព្រៃឈើការងារបណ្តុះកូនឈើព្រមទាំងការងារបង្ក្រាបបទល្មើសព្រៃឈើជាដើម។ល។ ចំពោះការងារដាំដើមឈើ គឺបានថែទាំចម្ការឈើចាស់ ចម្ការពូជឈើ ចម្ការរុក្ខទិវា និងដាំឈើជាចម្ការឈើថ្មី ស្ថិតក្នុងស្ថានីយស្តារ និងអភិវឌ្ឍន៍ព្រៃឈើ ចំនួន៧កន្លែង ផ្ទៃដី ៣ ៦៧៦ ហិកតា ព្រមទាំងបានរៀបចំថ្នាលបណ្តុះកូនឈើសរុបចំនួន១៥ថ្នាល តាមបណ្តាក្រុង-ស្រុក និងមាន សមត្ថភាពផលិតកូនឈើប្រមាណ ៥ម៉ឺនដើម ក្នុងមួយឆ្នាំ។

លោកបន្តថា ជារៀងរាល់ឆ្នាំកូនឈើត្រូវបានចែកជូនប្រជាពលរដ្ឋ តាមសាលារៀន វត្តអារាម លំនៅដ្ឋានប្រជាពលរដ្ឋ មន្ទីរ-អង្គភាពនានា និងដាំតាមដងផ្លូវ សាធារណៈ ដាំជាចម្ការ ដាំតាមស្ថានីយស្តារ និងស្រាវជ្រាវព្រៃឈើ។ ចំពោះការងារពង្រឹងការអនុវត្តច្បាប់ ក្នុងឆមាសទី១ ឆ្នាំ ២០២៥ នេះ បានធ្វើកិច្ចសហការជាមួយកងកម្លាំងប្រដាប់អាវុធគ្រប់ប្រភេទ និងអាជ្ញា ធរមូលដ្ឋាន បង្ក្រាបបទល្មើសព្រៃឈើ ចំនួន ២០ករណី ដោយពិន័យអន្តរការណ៍ចំនួន ៩ករណី បញ្ជូនទៅ តុលាការចំនួន ៧ករណី និងកំពុងចាត់ការចំនួន ៤ករណី ។

ថ្លែងនៅក្នុងឱកាសដាំដើមឈើនោះ លោក អ៊ឹង គឹមលាង អភិបាលរងខេត្តមានប្រសាសន៍ថា៖ ការដាំដើមឈើនៅពេលនេះ បង្ហាញនូវអត្ថន័យដ៏ជ្រាលជ្រៅសម្រាប់ជាចលនាបំផុសស្មារតីប្រជាពលរដ្ឋមន្ត្រីរាជការ សិស្សានុសិស្ស កងកម្លាំងប្រដាប់អាវុធទាំងអស់ឱ្យចេះស្រឡាញ់ព្រៃឈើ ចូលរួមដាំដុះនិងការពារព្រៃឈើ ក៏ដូចជាជួយជំរុញផលប្រយោជន៍ដល់ប្រជារាស្រ្តក្នុងជីវភាពរស់នៅ បង្កបង្កើនផលកសិកម្មនិងបង្កើនសុខុមាលភាពគ្រួសារព្រមទាំងជួយលើកស្ទួយបរិស្ថានសង្គមផងដែរ។ ម្យ៉ាងវិញទៀតពិធី «រុក្ខទិវា» ត្រូវបានបង្កើតឡើងនៅក្នុងឆ្នាំ១៩៥២ ក្រោមព្រះរាជកិច្ចដឹកនាំរបស់ព្រះបរមរតន កោដ្ឋ ព្រះមហាវីរក្សត្រ ព្រះករុណា ព្រះបាទសម្តេចព្រះ នរោត្តម សីហនុ ក្នុងគោលបំណង ដើម្បីជួយ ឱ្យបរិស្ថាន និងអាកាសធាតុមានភាពវិជ្ជមានចំពោះភពផែនដី និងមនុស្សជាតិ ហើយព្រះអង្គបានបន្សល់ ទុកនូវព្រះរាជបន្ទូលថា “ការចូលរួមចំណែកការពារ និងថែរក្សាព្រៃឈើ ជាកាតព្វកិច្ចចាំបាច់របស់ពលរដ្ឋ គ្រប់ៗរូប ហើយករណីយកិច្ចនេះ គឺតកូន តចៅ និងបានបង្កឱ្យអាកាសធាតុមានភាពប្រក្រតីជាវិជ្ជមាន ចំពោះវិស័យកសិកម្មនិងមនុស្សជាតិ” ។

លោក អភិបាលរងខេត្តបញ្ជាក់ថា៖ព្រៃឈើមានតួនាទីសំខាន់ជាសរសៃឈាម ក្នុងវិស័យកសិកម្មជាតិ ជាអាយុជីវិតប្រជាកសិករ និង ជាខឿននៃសេដ្ឋកិច្ចជាតិ ព្រៃឈើថែរក្សាដំណើរការប្រព័ន្ធអេកូឡូស៊ីតាមរយៈការជួយធ្វើនិយ័តកម្មអាកាស ធាតុ ជួយកាត់បន្ថយឥទ្ធិពលអវិជ្ជមាននៃការប្រែប្រួលអាកាសធាតុ ដូចជាទឹកជំនន់ ខ្យល់ព្យុះ និងការស្រូប យកឧស្ម័នកាបូនិចពីបរិយាកាសរក្សាស្ថិរភាពបរិយាកាស ។ ទន្ទឹមនេះព្រៃឈើផ្តល់នូវសេវាកម្ម និងជួយ គាំពារផ្នែកបរិស្ថានជាច្រើនទៀតដូចជា ការការពារទីជម្រាលទប់ស្កាត់ការហូរច្រោះដី ការធ្វើឱ្យប្រសើរ ឡើងនៃគុណភាពដី និងផ្តល់នូវផល អនុផលព្រៃឈើជាច្រើនអនេកដល់ប្រជាពលរដ្ឋក្នុងជីវភាពប្រចាំថ្ងៃ។

ហេតុនេះ លោកសូមអំពាវនាវដល់ប្រជាពលរដ្ឋគ្រប់រូប ដែលកំពុងបន្តអាជីវកម្មកាប់បំផ្លាញព្រៃឈើ ដើម្បីទន្ទ្រានយកដីព្រៃ ការដុតព្រៃឈើយកដី រដ្ឋធ្វើកម្មសិទ្ធិ សូមបញ្ឈប់ជាបន្ទាន់ព្រោះការធ្វើអាជីវកម្មព្រៃឈើ និងជំនួញដីព្រៃឈើ ខុសច្បាប់គឺជាប ល្មើសដ៏ធ្ងន់ធ្ងរបំផុតជាពិសេសគ្រោះមហន្តរាយដល់បរិស្ថានធម្មជាតិ ដែលបណ្តាលមកពីការកាប់បំផ្លាញ ព្រៃឈើនោះនឹងកើតភ្លាមចំពោះសង្គមជាតិ ។

លោក អ៊ឹង គឹមលាងបន្ថែមថា៖យើងត្រូវ រួមសាមគ្គីគ្នា បណ្តុះឡើងវិញនូវគំនិត ស្រឡាញ់ព្រៃឈើ ថែរក្សាការពារព្រៃឈើ និងបណ្តុះឡើងវិញនូវទស្សនៈ សន្សំសំចៃក្នុងការប្រើប្រាស់ផល អនុផលព្រៃឈើគ្រប់ប្រភេទ បណ្តុះឡើងវិញនូវស្មារតីគោរពច្បាប់ អនុវត្តច្បាប់ដើម្បីរួមចំណែកកសាងព្រះ រាជាណាចក្រកម្ពុជាឱ្យទៅជានីតិរដ្ឋ ។ ចំពោះកូនឈើដែលបានដាំរួចហើយ សូមអាជ្ញាធរគ្រប់លំដាប់ថ្នាក់ និងប្រជាពលរដ្ឋនៅនឹងកន្លែង មេត្តាសកម្មចូលរួមថែរក្សាឱ្យបានម៉ត់ចត់ជាប្រចាំ ដើម្បីធ្វើឱ្យកូនឈើទាំង នោះលូតលាស់ ធំធាត់ឆាប់រហ័ស និងពុំបាត់បង់ទៅវិញ ៕

ដោយ៖ គឿនវេត

The post ខេត្តសៀមរាប ដាំកូនឈើទាលជាង ៣០០០ដើម អបអរសាទរ “រុក្ខទិវា” ឆ្នាំ២០២៥ appeared first on Kampuchea Thmey Daily.

លោក សុង ឃាង ប្រធានមន្ទីរកសិកម្មរុក្ខាប្រមាញ់ និងនេសាទខេត្តមណ្ឌលគិរី លើកឡើង ថាក្នុងឱកាសបុណ្យ រុក្ខទិវា នៅខេត្តមណ្ឌលគិរី ឆ្នាំនេះ រដ្ឋបាលខេត្ដបានកំណត់យកទីតាំងបរិវេណមជ្ឈមណ្ឌលជនជាតិដើមភាគតិចភ្នំដោះក្រមុំ ដែលស្ថិតនៅក្នុងភូមិដោះក្រមុំ សង្កាត់សុខដុម ដើម្បីរៀបចំប្រារព្ធពិធីបុណ្យរុក្ខទិវាថ្នាក់ខេត្តនៅឆ្នាំ២០២៥។ លោកបានបញ្ជាក់ថា ការដាំដើមឈើនៅក្នុងឆ្នាំនេះ មន្ទីរបានជ្រើសរើសយកកូនឈើ ប្រភេទ ស្រល់ គគីរ និងឈើទាល ចំនួន ២ ៦៥០ ដើមសម្រាប់ដាំដុះ លើផ្ទៃដីចំនួន ៤ហិកតា និងបានចែកជូនក្នុងអង្គពិធីប្រារព្ធទិវានេះ ចំនួន៤០០ដើម ផងដែរ។

ចាប់តាំងពីបានកំណត់ព្រះរាជក្រឹត្យក្នុងឆ្នាំ១៩៥២ មកដល់ពេលបច្ចុប្បន្ន រាជរដ្ឋាភិបាលកំណត់យកថ្ងៃ៩ ខែកក្កដា ជាពិធីបុណ្យទិវាពលកម្មដាំដើមឈើប្រពៃណីជាតិហៅថា «រុក្ខទិវា» ត្រូវបានប្រារព្ធធ្វើឡើងជារៀងរាល់ឆ្នាំទូទាំងប្រទេស។ ក្នុងឱកាសប្រារព្ធពិធី រុក្ខទិវា ៩កក្កដា នៅខេត្តមណ្ឌលគិរីនោះលោក ថង សាវុន អភិបាលខេត្តមណ្ឌលគិរី បានលើកឡើងថា ការចូលរួមចំណែកបង្ការដាំកូនឈើដើម្បី លើកកម្ពស់សោភណភាពបរិស្ថាន និងម្លប់បៃតង បង្កើនគម្របព្រៃឈើ និងស្រូបខ្យល់អាកាសដ៏បរិសុទ្ធ ដើម្បីអភិវឌ្ឍដោយចេរភាព និងចូលរួមចំណែកកាត់បន្ថយបម្រែបម្រួលអាកាសធាតុស្របតាមយុទ្ធសាស្ត្ររបស់រាជរដ្ឋាភិបាលជាពិសេស ក្រសួងបរិស្ថាន និងក្រសួងកសិកម្ម។

លោកបន្តថា រដ្ឋបាលខេត្តមណ្ឌលគិរី តែងតែប្រារព្ធទិវាដាំដើមឈើជារៀងរាល់ឆ្នាំ ជាពិសេសបណ្ដុះស្មារតីមហាជន និងប្រជាពល រដ្ឋមន្ត្រីរាជការ កងកម្លាំង ប្រដាប់អាវុធ ឲ្យងាកមកចូលរួមចំណែកការដាំដើមឈើដើម្បីគុណភាពបៃតង។ លោកអភិបាលខេត្ត បន្ថែមថា សម្រាប់ខេត្តមណ្ឌលគិរីតែងតែព្យាយាមដាំកូនឈើស្ដារឡើងវិញតាមតំបន់ដែលសឹករិចរិល ដូចជាព្រៃដែលធ្លាប់កាប់រុករានទន្ទ្រានដោយខុសច្បាប់ និងបង្កដោយភ្លើងឆេះព្រៃ។លោកបានបន្ថែមថា នៅពេលថ្មីថ្មីនេះ រដ្ឋបាលខេត្តបានសហការជាមួយមន្ទីរអង្គភាពជំនាញ បានដាំដើមឈើ លម្អព៍ណ និងដើមឈើជ្រកម្លប់ជាច្រើន ពីចំណុចផ្លូវបំបែក ដាក់ដាំឆ្ពោះមករង្វង់មូលគោព្រៃ ដើម្បីលើកកម្ពស់សោភណភាពតាមទីធ្លាសាធារណៈ ក៏ដូចជាសោភណភាពនៅក្រុងសែនមនោរម្យ និងតំបន់ផ្សេងទៀត។ លើសពីនោះអាចទាក់ទាញចំណាប់អារម្មណ៍ភ្ញៀវទេសចរជាតិ និងអន្តរជាតិ ឲ្យមកលេងកម្សាន្តនៅក្នុងខេត្តមណ្ឌលគិរីបន្ថែមទៀតផង។

លោក ថង សាវុន អភិបាលខេត្តមណ្ឌលគិរីបានបញ្ជាក់ថា ការដាំដុះ កូនឈើគ្រប់ប្រភេទនៅក្នុងភូមិសាស្ត្រខេត្តមណ្ឌលគិរីមិនលំបាកនោះគេ ប៉ុន្តែអ្វីដែលជាបញ្ហាប្រឈមគឺការថែទាំ ក្នុងន័យនេះដែលទាមទារឲ្យមានការចូលរួមចំណែកពី ប្រជាពលរដ្ឋក៏ដូចជាមន្ត្រីរាជការ ក្នុងការមើលថែ ដើម្បីភាពលូតលាស់ឲ្យបានល្អ ដើម្បីសោភ័ណភាពបៃតង និងជាគំរូនិងអត្ថប្រយោជន៍ សម្រាប់អនាគតដល់កូនចៅជំនាន់ក្រោយ។ លោកអភិបាលខេត្តក៏បានផ្ដាំផ្ញើទៅដល់ប្រជាពលរដ្ឋ ជាពិសេសមន្ត្រីមូលដ្ឋានសង្កាត់ ត្រូវឧស្សាហ៍ព្យាដើរត្រួតពិនិត្យតាមកូនឈើដែលបានដាំ ហើយពេលដែលឃើញ កូនឈើដែលមិនមានភាពដុះលូតលាស់នោះទេ ក្នុងនាមសង្កាត់ត្រូវតែទៅសហការជាមួយមន្ទីរជំនាញដើម្បីយកកូនឈើថ្មីមកជួសបន្ថែម តាមទីតាំងដែលរដ្ឋបាលខេត្តបានប្រារព្ធពិធីនាពេលកន្លងមក។

អត្ថបទ៖រៀម សុខហេង

The post រដ្ឋបាលខេត្តមណ្ឌលគិរី ដាំ និងចែកកូនឈើជាង៣០០០ដើម ក្នុងពិធីបុណ្យរុក្ខទិវា ៩កក្កដា appeared first on Kampuchea Thmey Daily.

ចំណែកកូនឈើចម្រុះ ចំនួន ១ ៥០០ដើម ត្រូវបានផ្តល់ជូនទៅគ្រឹះស្ថានសិក្សានានាមកពីរាជធានីភ្នំពេញ និងខេត្តសៀមរាប ដើម្បីយកទៅដាំនៅតាមដងស្ទឹងសៀមរាប ស្ថិតនៅខាងជើងស្ពានបច្ចេកទេស(ស្ពានរ៉ោករ៉ាក) នៃរមណីយដ្ឋានអង្គរ។ កូនឈើទាំងនោះរួមមាឈើទាល ២០០ដើម គគីរ ១០០ដើម កកោះ ១០០ដើម គ្រញូង ១០០ដើម បេង ១០០ដើម ធ្នង់ ២០០ដើម ច្រេស២០០ដើម អង្គាបុស្ប ៥០ដើម ប្រាំដំឡឹង ១០០ដើម ព្កុល ៥០ដើម ខ្នារ ៥០ដើម រលួសក្រហម ៥០ដើម ក្ងោក១០០ដើម ចាមរី ៥០ដើម និងលឿងរាជ ៥០ដើម។

ផ្តល់ជូនមូលនិធិបរិស្ថានអ៊ីអន ចំនួន ១០ ០០០ដើម ដើម្បីយកទៅដាំនៅបរិវេណឧទ្យានធម្មជាតិអង្គរ អ៊ីអន នៃរមណីយដ្ឋានអង្គរ។ កូនឈើទាំងនោះរួមមាន គ្រញូង ១ ០០០ដើម បេង ៥០០ដើម ធ្នង់ ១ ០០០ដើម ច្រេស ១ ០០០ដើម គគីរ ៥០០ដើម កកោះ ៥០០ដើម ឈើទាល ១ ០០០ដើម រាំងភ្នំ ៣០០ដើម ផ្តៀក ១០០ដើម ខ្នុរព្រៃ៣០០ដើម ក្ងោក ២០០ដើម ខ្នារ ៣០០ដើម ចាមរី ២០០ដើម ឥន្ទនេល ២០០ដើម ព្កុល ២០០ដើម រំដួល ២០០ដើម ស្តៅ ៥០០ដើម និងរាំងទឹក ២ ០០០ដើម។

ផ្តល់ជូនលោក ឃន គឹមធរ លោក សេង វុទ្ធី អ្នកស្រី ហាប់ ម៉ាឡែន និងលោក យូ ចន្ថា ប្រជាពលរដ្ឋរស់នៅខេត្តសៀមរាប ចំនួន ១ ១២០ដើម ដើម្បីយកទៅដាំលើដីផ្ទាល់ខ្លួន និងតាមសាលារៀន នៅស្រុកមង្គលបូរី ខេត្តបន្ទាយមានជ័យ ស្រុកជីក្រែង ស្រុកពួក ស្រុកប្រាសាទបាគង ខេត្តសៀមរាប។ កូនឈើទាំងនោះរួមមាន គ្រញូង ២០០ដើម ធ្នង់២២០ដើម បេង ៥០ដើម ច្រេស ៥០ដើម ឈើទាល ២៥០ដើម គគីរ ២០០ដើម កកោះ ៥០ដើម ព្កុល ៥០ដើម ក្ងោក៥០ដើម។

ផ្តល់ជូនលោក សូ មករា លោក ហូរ ហាវ និងលោក ស៊ុន ដារ៉េត ប្រជាពលរដ្ឋរស់នៅខេត្តសៀមរាប ចំនួន ៣៨០ដើម ដើម្បីយកទៅដាំលើដីផ្ទាល់ខ្លួន និងតាមសាលារៀន នៅក្រុងសៀមរាប ស្រុកអង្គរធំ និងស្រុកស្វាយលើ ខេត្តសៀមរាប។ កូនឈើទាំងនោះរួមមាន គ្រញូង ៧០ដើម ធ្នង់ ៧០ដើម បេង ៧០ដើម ច្រេស ៧០ដើម ឈើទាល ៥០ដើម ត្រសេក ២៥ដើម និងអង្កាញ់ ២៥ដើម។

ផ្តល់ជូនលោក ហ៊ាប វុទ្ធី តំណាងធនាគារអេស៊ីលីដា សាខាក្រុងសៀមរាប ចំនួន ៣០ដើម ដើម្បីយកទៅដាំលម្អក្នុងបរិវេណវិទ្យាល័យ ហ៊ុន សែន រុនតាឯក ស្ថិតនៅក្រុងរុនតាឯកតេជោសែន ខេត្តសៀមរាប។ កូនឈើទាំងនោះរួមមាន ធ្នង់ ១០ដើម គគីរ ១០ដើម និងរំដួល ១០ដើម៕

ដោយ៖ គឿន វេត

The post កូនឈើចម្រុះជាង ១ម៉ឺនដើម ត្រូវបានអាជ្ញាធរជាតិអប្សរា ចែកចាយដោយឥតគិតថ្លៃ ដើម្បីដាំក្នុងខេត្តសៀមរាប appeared first on Kampuchea Thmey Daily.

អញ្ជើញថ្លែងរបាយការណ៍ក្នុងព្រឹត្តិការណ៍ រុក្ខទិវា ៩ កក្កដា ក្រោមអធិបតីភាព ព្រះករុណា ព្រះបាទ សម្តេចព្រះបរមនាថ នរោត្តម សីហមុនី ព្រះមហាក្សត្រនៃព្រះរាជណាចក្រកម្ពុជា នាព្រឹកនេះ លោក ឌិត ទីណា រដ្ឋមន្រ្តីក្រសួងកសិកម្ម បានគូសបញ្ជាក់ថា៖​«មកទល់ពេលនេះ ព្រឹត្តិការណ៍ រុក្ខទិវា បានបង្កើតជាចលនាជាតិស្រឡាញ់ថែរក្សាការពារព្រៃឈើ និងដាំដើមឈើ ឡើងវិញនៅគ្រប់ទិសទីទូទាំងប្រទេស ដោយបង្កើតបានជាចម្ការឈើ និងសួនសាធារណៈរាប់សែនហិកតា នៅតាមវត្តអារាម សាលារៀន ទីធ្លាសាធារណៈ សហគមន៍ និងរមណីយដ្ឋាននានា»។

បើតាមលោករដ្ឋមន្រ្តី សម្រាប់ពិធី រុក្ខទិវា ៩ កក្កដា លើកទី៣០នេះ កូនឈើចម្រុះប្រភេទ មានដូចជា ធ្នង់ នាងនួន គ្រញូង បេង ក្ងោក និងត្របែកព្រៃសរុបចំនួន ១៥ ០០០ដើម នឹងត្រូវដាំក្នុងសួនរុក្ខទិវាទំហំ១០ហិកតានេះ ស្ថិតក្នុងភូមិកសិដ្ឋាន ឃុំបុសខ្នុរ ស្រុកចំការលើ ខេត្តកំពង់ចាម។

រាជរដ្ឋាភិបាលជាច្រើនអាណត្តិកន្លងមក ក្រោមការដឹកនាំប្រកបដោយគតិបណ្ឌិតរបស់ សម្តេចអគ្គមហា សេនាបតីតេជោ ហ៊ុន សែន អតីតនាយករដ្ឋមន្ត្រី បានដាក់ចេញនូវគោលនយោបាយ និងផែនការសកម្មភាពជាច្រើន ដើម្បីពង្រឹងការគ្រប់គ្រង អភិវឌ្ឍន៍ និងអភិរក្សធនធានធម្មជាតិ ជាពិសេស ព្រៃឈើ ទឹក ដី និងសត្វព្រៃ។ ជាមួយគ្នានេះផងដែរ ក្នុងស្មារតីជំរុញវិបុលកម្មសត្វព្រៃ សម្តេចតេជោ ក៏បានសម្រេចអនុញ្ញាតឱ្យបងប្អូនប្រជាពលរដ្ឋដែលស្រឡាញ់សត្វអាចចិញ្ចឹមសត្វព្រៃជាលក្ខណៈគ្រួសារ ដើម្បីឱ្យសត្វទាំងនេះអាចបន្តពូជ និងបង្កើនចំនួន និងអាចត្រូវបានព្រលែងចូលក្នុងព្រៃធម្មជាតិវិញក្រោមការពិនិត្យ និងការផ្តល់បច្ចេក​ទេសពីរដ្ឋបាលព្រៃឈើ នៃក្រសួងកសិកម្ម រុក្ខាប្រមាញ់ និងនេសាទ។

បន្ទាប់មក រាជរដ្ឋាភិបាលនីតិកាលទី៧នៃរដ្ឋសភា ក្រោមការដឹកនាំដ៏ឈ្លាសវៃ ស្វាហាប់ និងប្រកបដោយចក្ខុវិស័យ វែងឆ្ងាយរបស់ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី ដែលមាន យុទ្ធសាស្ត្របញ្ចកោណ ដំណាក់កាលទី១ ជាមាគ៌ា និងមានទស្សនាទាន “មានហូប មានប្រើ មានបាន និងមានរហូត” កំពុងជំរុញ និងបង្កើនល្បឿន នៃការអភិវឌ្ឍវិស័យកសិកម្មដើម្បីធានាសន្តិសុខស្បៀង លើកកម្ពស់ជីវភាពប្រជាកសិករ និងរួមចំណែកទ្រទ្រង់កំណើនសេដ្ឋកិច្ចជាតិ។

គួរជម្រាបថា កម្ពុជា គឺជាប្រទេសឈានមុខគេមួយនៅក្នុងតំបន់ និងពិភពលោក ដែលបានដាក់តំបន់ព្រៃឈើទំហំជាង ៤០% នៃផ្ទៃប្រទេស ជាតំបន់ការពារធម្មជាតិ និងបន្តជំរុញការដាំស្តារព្រៃឈើឡើងវិញ៕

The post រដ្ឋមន្រ្តីកសិកម្ម៖ គិតត្រឹមឆ្នាំ២០២៥ រដ្ឋបាលព្រៃឈើបានបណ្តុះ និងដាំកូនឈើជាង ២១លានដើម appeared first on Kampuchea Thmey Daily.

ក្នុងឱកាសដាំកូនឈើនេះដែរ លោក វុី សំណាង អភិបាលខេត្ត បានអំពាវនាវឱ្យប្រជាពលរដ្ឋក្នុងខេត្កតាកែវ ចូលរួមថែរក្សាបរិស្ថាន និងដាំដើមឈើឱ្យបានគ្រប់ៗគ្នា ត្រូវចេះស្រឡាញ់​ និងអភិរក្សធនធានធម្មជាតិ​ព្រៃឈើ​ សម្រាប់មនុស្សជាតិគ្រប់ជំនាន់។

បន្ថែមពីនេះ លោកអភិបាលខេត្ត បានណែនាំដល់មន្រ្តីតំណាងឱ្យមន្ទីរកសិកម្ម រុក្ខាប្រមាញ់ និងនេសាទខេត្ត និងលោកនាយខណ្ឌរដ្ឋបាលព្រៃឈើតាកែវ ព្រមទាំងអាជ្ញាធរពាក់ព័ន្ធ ចូលរួមដាំកូនឈើឱ្យបានបន្ថែមទៀត ដើម្បីបង្កើតបរិស្ថានបៃតងក្នុងក្រុងដូនកែវ សម្រាប់ចូលរួមប្រឡងប្រណាំងទីក្រុងស្អាត។

ដោយឡែកបើតាមការបញ្ជាក់ពីលោក ស៊ឹម ឡាប៉ាំង​ នាយខណ្ឌរដ្ឋបាលព្រៃតាកែវ បានឱ្យដឹងថា កន្លងមកមន្រ្តីជំនាញនាយខណ្ឌរដ្ឋបាលព្រៃឈើ បានសហការជាមួយអាជ្ញាធរមូលដ្ឋាន តែងតែចុះដាំដុះកូនឈើ ជាច្រើនប្រភេទនៅតាមដងផ្លូវ និងសួនច្បារមួយចំនួនក្នុងក្រុងដូនកែវ ដើម្បីជួយកែលម្អសោភ័ណភាពទីក្រុងឱ្យក្លាយជាទីក្រុងមានពណ៌បៃតង ប៉ុន្តែដើមឈើ គឺមានសារៈប្រយោជន៍យ៉ាងច្រើនទៅលើផ្នែកបរិស្ថាន ជួយកាត់បន្ថយជាតិពុល ដែលកើតចេញពីយានយន្តតនានា ដែលបាននិងកំពុងធ្វើចរាចរណ៍រាល់ថ្ងៃ៕

​អត្ថបទ៖ វីរៈ

The post កូនឈើទាលជាង១៤០ដើម ត្រូវបានដាំនៅសួនច្បារមាត់បឹងតាកែវ ដើម្បីលម្អសោភ័ណភាព appeared first on Kampuchea Thmey Daily.

លោក សោម ស៊ុន ក្នុងនាមអនុប្រធានអចិន្ត្រៃយ៍នៃគណៈកម្មការការពារទប់ស្កាត់ និងបង្ក្រាបបទល្មើសធនធានធម្មជាតិខេត្តកំពង់ធំ បានបញ្ជាក់ថា អនុវត្តតាមការណែនាំរបស់ប្រមុខរាជរដ្ឋាភិបាលកម្ពុជា ក៏ដូចជាការដឹកនាំពី កងយោធពលខេមរភូមិន្ទគ្រប់លំដាប់ថ្នាក់ កងកម្លាំងចម្រុះនៃគណៈបញ្ជាការឯកភាពរដ្ឋបាលខេត្ត បានធ្វើសកម្មភាពយ៉ាងសកម្មក្នុងរយៈពេល ០៦ខែកន្លងមកនេះពាក់ព័ន្ធការដាំកូនឈើ និងបង្ក្រាបការទន្ទ្រានដីរដ្ឋខុសច្បាប់។

លោកបន្តថា៖«កងកម្លាំងចម្រុះរបស់គណៈបញ្ជាការឯកភាពរដ្ឋបាលខេត្ត ដែលរួមមានកងកម្លាំងប្រដាប់អាវុធទាំងបី និងស្ថាប័នជំនាញពាក់ព័ន្ធព្រមទាំងអាជ្ញាធរដែនដី បានរួមគ្នាការពារទប់ស្កាត់មិនឱ្យមានការកាប់ទន្ទ្រានព្រៃឈើជាថ្មី ហើយបានរកឃើញផ្ទៃដីដែលក្រុមជនល្មើសលួចកាប់ទន្ទ្រាននាពេលកន្លងទៅ មានប្រមាណជាង ២,០០០ ហិកតា នៅក្នុងភូមិសាស្ត្រខេត្តកំពង់ធំ»។
លោកបញ្ជាក់ថា ដីនេះត្រូវបានដកហូតទុកជាដីរបស់រដ្ឋ ដើម្បីដាំស្ដារព្រៃឈើឡើងវិញទុកជាសម្បត្តិធនធានធម្មជាតិរបស់យើងទាំងអស់គ្នា ។

លោក ចាន់ ចេស្ដា រដ្ឋលេខាធិការ​ បានកោតសរសើរចំពោះកងកម្លាំងទាំងអស់ដែលបានយកចិត្តទុកដាក់យ៉ាងសកម្មដោយស្មារតីទទួលខុសត្រូវខ្ពស់ក្នុងការដាំស្ដារព្រៃឈើឡើងវិញ ដែលកន្លងទៅរងការបាត់បង់ដោយក្រុមជនល្មើសលួចកាប់បំផ្លាញទន្ទ្រានយកដីរបស់រដ្ឋធ្វើកម្មសិទ្ធិ ។
ជាមួយគ្នានេះ លោកអំពាវនាវដល់គ្រប់មជ្ឈដ្ឋាន អាជ្ញាធរដែនដី កងកម្លាំងប្រដាប់អាវុធទាំងបី និងប្រជាពលរដ្ឋគ្រប់រូប រួមគ្នាថែរក្សាសម្បត្តិធម្មជាតិឱ្យនៅគង់វង្ស ដើម្បីទុកឱ្យកូនចៅរបស់យើងនៅជំនាន់ក្រោយៗតទៅទៀត៕

The post កូនឈើប្រណិតជាច្រើនដើម ត្រូវបានដាំស្តារឡើងវិញនៅខេត្តកំពង់ធំ appeared first on Kampuchea Thmey Daily.