លោកឧបនាយករដ្ឋមន្ត្រី ស សុខា បានថ្លែងថា តាមតម្រូវការរបស់មនុស្ស បានធ្វើឱ្យមានការកាប់ព្រៃឈើជាច្រើន ដើម្បីរៀបចំលំនៅឋាន ការទាញផលជាសេដ្ឋកិច្ច និងការកែលម្អដែនដីនគរូបនីយកម្ម ដែលនេះបានគំរាមកំហែងដល់ធនធានធម្មជាតិដែលបង្កហេតុនាំឱ្យអាកាសធាតុប្រែប្រួលយ៉ាងធ្ងន់ធ្ងរ និងធ្វើឱ្យបាត់បង់ជីវៈចម្រុះ។

ក្នុងន័យនេះ លោក ថា ដើម្បីចូលរួមទប់ស្កាត់ និងស្ដារដើមឈើឡើងវិញ ប្រជាពលរដ្ឋ១នាក់ ត្រូវដាំដើមឈើ១ដើម ជារៀងរាល់ឆ្នាំ មិនថានៅទីកន្លែងណា ឬក្នុងបរិវេណណា ជារួមទាំងនៅសាលារៀន វត្តអារាម ទីប្រជុំជន ក៏ដូចជាកន្លែងធ្វើការជាដើម។ លោកបានសង្កត់ធ្ងន់ថា ការប្រារព្ធពិធីនៅថ្ងៃនេះ គ្រាន់តែជានិម្មិតរូបមួយប៉ុណ្ណោះ ពោលគឺដើម្បីពិភពលោកកាន់តែបង្កើននូវគម្របបៃតងឡើងវិញនោះ ទាមទារជាចាំបាច់ការចូលរួមពីពលរដ្ឋម្នាក់ៗ និងនៅគ្រប់បណ្ដាប្រទេស លើពិភពលោក ដែលក្នុងនោះក៏រួមទាំងប្រជាពលរដ្ឋក្នុងខេត្តព្រៃវែងដូចគ្នាដែរ។

ពីវេទិកានេះ ឧបនាយរដ្ឋមន្ត្រី រដ្ឋមន្ត្រីក្រសួងមហាផ្ទៃ បានណែនាំឱ្យអាជ្ញាធរឃុំស្រុក រៀបចំផែនការឱ្យបានច្បាស់លាស់នូវតម្រូវការនៃប្រភេទដំណាំ ឬប្រភេទដើមឈើដែលជាតម្រូវការចាំបាច់ ដោយបញ្ជូនទៅរដ្ឋបាលថ្នាក់ខេត្ត មន្ទីរកសិកម្ម រុក្ខាប្រមាញ់ និងនេសាទ ដើម្បីបូកសរុបជាកញ្ចប់នៃបញ្ហា និងស្នើសុំទៅថ្នាក់ជាតិ ពិនិត្យមើលពីស្ថានភាពជាក់ស្ដែងពីបញ្ហានៃតំបន់នីមួយៗ ដើម្បីចូលរួមទប់ស្កាត់ និងបង្ការបញ្ហាបម្រែបម្រួលអាកាសធាតុ។

រដ្ឋមន្ត្រីមហាផ្ទៃរូបនេះ ក៏បានណែនាំឱ្យក្រុមប្រឹក្សាខេត្ត គណៈអភិបាលខេត្ត ព្រមទាំងថ្នាក់ដឹកនាំមន្ទីរ អង្គភាពជុំវិញខេត្ត ថ្នាក់ដឹកនាំក្រុង ស្រុក ឃុំ សង្កាត់ មន្រ្តីរាជការ កងកម្លាំងប្រដាប់អាវុធ និងប្រជាពលរដ្ឋទូទាំងខេត្តព្រៃវែងខិតខំប្រឹងប្រែង យកចិត្តទុកដាក់ទៅលើបញ្ហាធនធានធម្មជាតិនេះ ព្រមទាំងចូលរួមថែរក្សា និងសម្រេចឱ្យបាននូវការរីកចម្រើនលើគ្រប់វិស័យ ពិសេសវិស័យកសិកម្ម និងបរិស្ថាន ដើម្បីចូលរួមសម្រេចឱ្យបាននូវចក្ខុវិស័យឆ្នាំ២០៥០ ក្រោមការដឹកនាំរបស់សម្ដេចធិបតី ហ៊ុន ម៉ាណែត នាយករដ្ឋមន្រ្តីនៃកម្ពុជា។

យោងរបាយការណ៍របស់លោក អ៊ុក សំណាង ប្រធានមន្ទីរកសិកម្ម រុក្ខាប្រមាញ់ និងនេសាទខេត្តព្រៃវែង ឆ្នាំ២០២៥នេះ ខណ្ឌរដ្ឋបាលព្រៃឈើបានបណ្ដុះកូនឈើចម្រុះគ្រប់ប្រភេទចំនួន១៥.៩៤៥ដើម ក្នុងនោះមាន ដើមក្រញូង បេង នាងនួន ធ្នង់ គគីរ ឈើទាល កកោះ និងប្រភេទឈើហូបផ្លែជាដើម ព្រមទាំងបានចែកកូនឈើនៅតាមបណ្ដាវត្តអារាម សាលារៀន មន្ទីរអង្គភាពជុំវិញខេត្ត និងប្រជាពលរដ្ឋដាំក្នុងពិធីសម្ពោធសមិទ្ធផលនានារបស់ថ្នាក់ដឹកនាំ សរុប២.២០៣ដើម៕

The post ឧបនាយករដ្ឋមន្ត្រី ស សុខា បន្តជំរុញឱ្យពលរដ្ឋខេត្តព្រៃវែង រួមគ្នាដាំ និងថែរក្សាព្រៃឈើ appeared first on Kampuchea Thmey Daily.

កញ្ញា ហ៊ន សុខលាង សមាជិកស្នូលនៃក្រុមយុវជនពណ៌ស្វាយ បានប្រាប់ កម្ពុជាថ្មី ថា កម្មវិធីរត់នៅថ្ងៃទី២៦ ចាប់ផ្តើមពីម៉ោង៦ព្រឹក ដល់ម៉ោង១០ព្រឹក ពីចំណុចត្រង់សួនច្បារហាត់ប្រាណនៅទល់មុខព្រះអង្គចេកព្រះអង្គចម រហូតដល់លានជល់ដំរី ដែលមានចម្ងាយសរុបចំនួន១១ គីឡូម៉ែត្រ។ កម្មវិធីនេះ មានគោលបំណង អបអរសាទរទិវាបរិស្ថានពិភពលោកឆ្នាំ២០២៥ រៃអង្គាសថវិកាដើម្បីចូលរួមចំណែកការពារដែនជម្រកសត្វព្រៃភ្នំត្នោត-ភ្នំពក (ព្រៃបេន) និងរួមចំណែកក្នុងយុទ្ធនាការដាំកូនឈើមួយលានដើមក្នុងមួយឆ្នាំរបស់ក្រសួងបរិស្ថាន ការបង់វិភាគទាន។

យុវតី ហ៊ន សុខលាង បន្តថា កម្មវិធីនេះ គឺជ្រើសរើសអ្នកចូលរួមចំនួន១០០នាក់ ដែលរស់នៅក្នុងខេត្តសៀមរាប ហើយចូលរួមត្រូវបង់វិភាគទាន ៣ដុល្លារ ឬលើសពីនេះ។ សម្រាប់ថវិការដែលប្រមូលបាន សុខលាង ថានឹងបរិច្ចាគទៅ លោក បេន ដេវីស ដើម្បីចូលរួមចំណែកការពារដែនជម្រកសត្វព្រៃភ្នំត្នោត-ភ្នំពក ខេត្តព្រះវិហារ។ ចំណែកឯអ្នកនៅរស់ភ្នំពេញ និងបណ្តាលខេត្តផ្សេងៗ ដែលមានបំណងចង់ចូលរួម ក៏នៅតែអាចចូលរួម ដោយត្រូវរ៉ាប់រងការចំណាយខ្លួនឯងដូចជាការធ្វើដំណើរ ស្នាក់នៅ និងអាហារ ជាដើម។

សុខលាង បញ្ជាក់ថា៖ “ក្នុងនាមខ្ញុំជាយុវជនម្នាក់ ពិតជាមានក្តីរីករាយ ដែលបានចូលរួមចំណែកក្នុងរៀបចំកម្មវិធីនេះឱ្យមានរូបរាងឡើង និងបង្កើតឱកាសដល់សាធារណជន ក៏ជាយុវជន ចូលរួមនៅក្នុងសកម្មភាពដែលជាគុណប្រយោជន៍ដល់សង្គម ពិសេសគិតគូរពីបញ្ហាបរិស្ថាន ធនធានធម្មជាតិ”។ យុវតីខាងលើ សង្ឃឹមថា សាធារណជនចូលរួមកម្មវិធីនេះបានច្រើន ដើម្បីចូលរួមថែរក្សបរិស្ថាន និងអភិរក្សសត្វព្រៃឱ្យកាន់តែប្រសើរឡើង។

សូមជម្រាបថា យុវជនពណ៌ពណ៌ស្វាយ គឺជាក្រុមយុវជនមកពីមជ្ឈដ្ឋាន និងសាកលវិទ្យាល័យផ្សេងៗក្នុងប្រទេសកម្ពុជា ដែលមានគោលបំណងក្នុងការធ្វើសកម្មភាពផ្សេងៗ ដើម្បីបរិយាបន្នយេនឌ័រ ហើយក្រុមយុវជនពណ៌ស្វាយបានបង្កើតឡើងនៅឆ្នាំ ២០២២។ កន្លងមក ក្រុមនេះបានចូលរួមកិច្ចការសង្គមជាច្រើនតាមរយៈការរៀបចំយុទ្ធនាការផ្សេងៗ និងការរត់ ជិះកង់ ដើម្បីស្ត្រី និងកុមារ ព្រមទាំងមានការចូលរួមគាំទ្រច្រើនពីសាធារណជនថែមទៀតផង៕

The post យុវជនពណ៌ស្វាយ រៀបចំព្រឹត្តិការណ៍រត់ដើម្បីបរិស្ថាន និងដាំដើមឈើ៤០០ដើម នៅខេត្តសៀមរាប appeared first on Kampuchea Thmey Daily.

ការលើកទឹកចិត្តឱ្យដាំដើមឈើនេះ នាឱកាសលោក សុខ​ លូ អញ្ជើញជាគណៈអធិបតីក្នុងពិធីកប្រុងពលីបើកការដ្ឋានស្ថាបនាផ្លូវ និងកីឡដ្ឋានស្រុកបាណន់ នៅថ្ងៃទី ២១​ខែមិថុនា ឆ្នាំ ២០២៥។ ផ្លូវដែលបើកការដ្ឋាននេះស្ថាបនាជាផ្លូវបេតុង១ខ្សែប្រវែង៤៦០ម៉ែត្រ ទទឹង៨ម៉ែត្រ កម្រាស់០,១៥ម៉ែត្រ ផ្លូវថ្មើរជើង២ខ្សែប្រវែង៩២០ម៉ែត្រ ទទឹង២,៣០ម៉ែត្រ ស្ថិតនៅឃុំឈើទាល ស្រុកបាណន់។

មានប្រសាសន៍ក្នុងឱកាសនោះ លោក សុខ លូ បានថ្លែងការកោតសរសើរដល់ការខិតខំអភិវឌ្ឍរបស់មូលដ្ឋានស្រុក មានដូចជាផ្លូវថ្នល់ សាលារៀន មន្ទីរពេទ្យ និងវត្តអារាមជាដើម។ ទន្ទឹមនឹងនេះលោកលើកទឹកចិត្តដល់អាជ្ញាធរភូមិ ឃុំ ស្រុក ត្រូវបន្តដាំដើមឈើតាមដងផ្លូវ ដើម្បីបង្កើនភាពបៃតង និងលើកកម្ពស់សោភ័ណភាពតាមដងផ្លូវ។

លោកបញ្ជាក់ថា ៖«បច្ចុប្បន្នរាជរដ្ឋាភិបាលកម្ពុជាក្រោមការដឹកនាំរបស់សម្ដេចមហាបវរធិបតី ហ៊ុន ម៉ាណែត ជានាយករដ្ឋមន្រ្តី បានខិតខំខ្លាំងណាស់ឱ្យរដ្ឋបាលថ្នាក់ក្រោមជាតិជំរុញការអភិវឌ្ឍន៍នៅតាមមូលដ្ឋាន ជាពិសេសការអភិវឌ្ឍន៍ ផ្លូវថ្នល់ សាលារៀន សួនច្បារ និងការរៀបចំសណ្តាប់ធ្នាប់សាធារណៈសំដៅបម្រើផលប្រយោជន៍សាធារណៈជូនបងប្អូនប្រជាពលរដ្ឋ»។ ក្រៅពីនេះ លោកអភិបាលខេត្តស្នើដល់បងប្អូនប្រជាពលរដ្ឋចូលរួមផ្សព្វផ្សាយ និងចៀសឆ្ងាយពីគ្រឿងញៀន និងត្រូវចូលរួមថែរក្សាអនាម័យបរិស្ថាន ក្នុងភូមិ ឃុំ តាមលំនៅដ្ឋានឱ្យបានល្អប្រសើរ។

ឆ្លៀតក្នុងឱកាសនោះ លោក សុខ លូ បានផ្សព្វផ្សាយស្តីពីសុវត្ថិភាពចរាចរណ៍ផ្លូវគោក ជូនដល់បងប្អូនប្រជាពលរដ្ឋ ក្នុងគោលបំណងលើកកម្ពស់ការយល់ដឹងអំពីសុវត្ថិភាពចរាចរណ៍ដើម្បីចូលរួម ទប់ស្កាត់ ក៏ដូចជាកាត់បន្ថយចំនួនអ្នកស្លាប់ និងរបួសដោយគ្រោះថ្នាក់ចរាចរណ៍ផ្លូវគោកឱ្យនៅកម្រិតទាប ដោយបើកបរបង្កើនការប្រុងប្រយ័ត្ន រក្សាសណ្តាប់ធ្នាប់ និងមានការយោគយល់អធ្យាស្រ័យគ្នាទៅវិញទៅមក៕

The post អភិបាលខេត្តបាត់ដំបង ណែនាំអាជ្ញាធរភូមិ ឃុំ បន្តដាំដើមឈើតាមដងផ្លូវ appeared first on Kampuchea Thmey Daily.

អភិបាលខេត្តកោះកុង លោកស្រី មិថុនា ភូថង បានឱ្យដឹងថា ក្នុងឆ្នាំ២០២៤កន្លងទៅនេះ នៅទូទាំងខេត្តកោះកុងបានដាំស្ដារព្រៃកោងការឡើងវិញបានជាងចំនួន៥ម៉ឺនដើមរួចហើយ។ លោកជំទាវ បានបន្តថា បច្ចុប្បន្ននេះ មន្ទីរបរិស្ថានខេត្ត ក៏បានបន្តបណ្តុះដើមកោងកាងបានចំនួន ជិត៣ម៉ឺនដើម សម្រាប់ត្រៀមទុកយកទៅដាំនៅកន្លែងផ្សេងៗទៀត ខណៈកូនដើមកោងកាងប្រមាណជា៥ពាន់ដើម ត្រូវបានដាំលើផ្ទៃដីចំនួន៣ហិកតា ស្ថិតនៅក្នុងភូមិសាស្ត្រនៃឃុំកោះកាពិ ស្រុកកោះកុង ខេត្តកោះកុង ដើម្បីជាផ្នែកមួយការពារឆ្នេរ ការពារពីគ្រោះធម្មជាតិ ផ្តល់ជម្រកដល់ជីវៈចម្រុះក្នុងតំបន់ទឹកប្រៃ។

អនុរដ្ឋលេខាធិការក្រសួងបរិស្ថាន លោក ខ្វៃ អាទិត្យា អះអាងថា ក្រសួងបរិស្ថាន បានរៀបចំថ្នាលបណ្តុះកូនឈើខ្នាតតូចនៅតាមមន្ទីរបរិស្ថានរាជធានី-ខេត្ត និងនៅតាមតំបន់ការពារធម្មជាតិ ដើម្បីបង្កើនសមត្ថភាពផលិតកូនឈើ ក្នុងការឆ្លើយតបនឹងតម្រូវការ និងយុទ្ធនាការ ដាំស្តារព្រៃឈើឡើងវិញ និងចែកជូនប្រជាពលរដ្ឋ ដែលមានបំណងដាំដើមឈើដោយឥតគិតថ្លៃ ក្នុងគោលបំណងចូលរួមចលនាបង្កើនគម្របបៃតងនៅកម្ពុជា។ ជាមួយគ្នានេះ ក៏បាននិងកំពុងបំផុសការចូលរួមពីសាធារណជនទូទៅ ក្នុងការចូលរួមដាំកូនឈើ ក៏ដូចជាជំរុញឱ្យពួកគាត់ស្រលាញ់ ថែរក្សា ការពារ ព្រៃឈើដែលបានចូលរួមដាំ និងព្រៃឈើធម្មជាតិ ផងដែរ។ ការថែរក្សាព្រៃឈើក៏នាំមកនូវចំណូលនៃវិស័យទេសចរណ៍ផងដែរ។

សូមបញ្ជាក់ថា អនុលោមតាមយុទ្ធសាស្រ្តបញ្ចកោណ, ក្រសួងបរិស្ថាន បានរៀបចំ«យុទ្ធសាស្រ្តចក្រាវិស័យបរិស្ថាន២០២៣-២០២៨» ក្នុងគោលបំណងតម្រង់ទិស និងចង្អុលបង្ហាញអាទិភាពការងារ ក្នុងការលើកកម្ពស់ កិច្ចគាំពារបរិស្ថាន ការការពារធនធានធម្មជាតិ និងការអភិវឌ្ឍប្រកបដោយចីរភាព ក្នុងមុំចំនួន៣ គឺ «ភាពស្អាត ភាពបៃតង និងចីរភាព» សំដៅឆ្ពោះទៅសម្រេចការអភិវឌ្ឍប្រកបដោយអព្យាក្រឹតកាបូននៅឆ្នាំ២០៥០៕

អត្ថបទ៖ ង៉ិល ណារ៉ាត់

The post រដ្ឋបាលខេត្តកោះកុងជំរុញការដាំស្តារព្រៃឈើឡើងវិញ ដើម្បីបង្កើនភាពបៃតង appeared first on Kampuchea Thmey Daily.

បណ្ឌិត យង់ ពៅ បានប្រាប់មក កម្ពុជាថ្មី ថា បច្ចុប្បន្ន ពិភពលោកកំពុងជួបបម្រែបម្រួលអាកាសធាតុ ជាមួយគ្នានេះ កម្ពុជា និងប្រទេសផ្សេងទៀតក៏មានការកើនឡើងនូវកម្តៅក្តៅខ្លាំងដូចគ្នា ហេតុនេះ ត្រូវមានការដាំដើមឈើឱ្យបានច្រើន តាមដែលអាចធ្វើទៅបាន ដោយលោកបានអំពាវនាវដល់ភាគីពាក់ព័ន្ធទាំងអស់ ទាំងប្រជាពលរដ្ឋ រដ្ឋាភិបាល គ្រឹះស្ថានស្ថាប័នសាធារណៈ និងឯកជន គួរគិតគូរលើបញ្ហានេះឱ្យបានខ្ពស់។ ត្រង់ចំណុចនេះ លោកបានសង្កត់ធ្ងន់ ដល់គ្រឹះស្ថានសាធារណៈ ពោល គឺនៅតាមក្រសួង ស្ថាប័ន ផ្សេងៗគួរគិតគូរពីការដាំដើមឈើដែលផ្តល់ជាម្លប់ឱ្យបានច្រើន ព្រោះលោកសង្កេតឃើញថា នៅតាមក្រសួង ស្ថាប័នសាធារណៈមួយចំនួន មានការចាក់បេតុងពាសពេញ ហើយបេតុងនេះហើយ នឹងធ្វើឱ្យជះកម្តៅកាន់តែខ្លាំង។

បន្ថែមពីនេះ លោកក៏លើកឡើងថា គួរមានការដាំដើមឈើប្រភេទធំៗឱ្យបានច្រើននៅតាមផ្លូវសាធារណៈ ផ្លូវក្នុងទីក្រុង ឬតាមទីប្រជុំជនក្តី ដើម្បីផ្តល់ជាម្លប់ដល់អ្នកធ្វើដំណើរ និងផាសុខភាពដល់ប្រជាពលរដ្ឋ ហើយក៏ជួយធ្វើឱ្យផ្លូវសាធារណៈមានភាពស្រស់ស្អាតផងដែរ។ ចំណុចមួយទៀត លោក យល់ថាតាមបណ្តាសាលារាជធានី-ខេត្ត ក្រសួង មន្ទីរ គួរដាក់កំហិតដល់ការសាងសង់នានា ត្រូវកំណត់កម្រិតនៃការដាំដើមឈើឱ្យបានត្រឹមត្រូវ ដើម្បីកែសម្រួល និងកាត់បន្ថយកម្តៅផែនដី ហើយលោកជឿថា វិធីនេះ នឹងទទួលបានម្លប់ច្រើន។

បណ្ឌិត យង់ ពៅ និយាយថា៖ “អ៊ីចឹង ប្រជាពលរដ្ឋ ខ្ញុំយល់ថាគួរតែចូលរួមជាមួយរាជរដ្ឋាភិបាល ប៉ុន្តែ ទោះជាយ៉ាងណាក៏ដោយ រាជរដ្ឋាភិបាល ក្រសួងមានសមត្ថិកិច្ច អាជ្ញាធរ ត្រូវផ្តល់ភាពជាគំរូ និងដាក់បញ្ញត្តិច្បាស់លាស់”។

ត្រង់ចំណុចនេះ លោកបញ្ជាក់ថា រដ្ឋាភិបាលត្រូវដាក់បញ្ញត្តិឱ្យបានច្បាស់លាស់ មុននឹងចេញអាជ្ញាបណ្ណសាងសង់អ្វីមួយត្រូវដាក់កម្រិតដាំដើមឈើកម្រិតណា រៀបចំប្រព័ន្ធទឹកបែបណាខ្លះដើម្បីផ្តល់ភាពត្រជាក់ និងបរិស្ថានស្អាត ហើយក៏ជាចំណែកជួយលើកសម្រស់ទីក្រុង ប្រទេស កាន់តែមានសោភណភាពផងដែរ៕

អត្ថបទ៖ អុន ស្រីមាន

The post បណ្ឌិត យង់ ពៅ សំណូមពរឱ្យមានការរួមគ្នាដាំដើមឈើដើម្បីមានម្លប់ជ្រកពេលមេឃក្តៅ appeared first on Kampuchea Thmey Daily.

ព្រឹត្តិទៅនាព្រឹកថ្ងៃសៅរ៍ ទី១៧ ខែសីហា ឆ្នាំ២០២៤ ក្នុងបរិវេណវត្តក្ងោក ភូមិក្ងោក ឃុំគគីរ ស្រុកមេមត់ ខេត្តត្បូងឃ្មុំ ដោយមានការចូលរួមពីក្រុមការងាររាជរដ្ឋាភិបាល សមាជិកក្រុមប្រឹក្សាស្រុក ថ្នាកដឹកនាំ និងមន្ត្រីរដ្ឋបាលស្រុកមេមត់ កងកម្លាំងស្រុកទាំងបីប្រភេទ ប្រជាពលរដ្ឋឃុំគគីរ អ្នកគ្រូលោកគ្រូ សិស្សានុសិស្ស យុវជនមូលដ្ឋាន សរុបចំនួនជាង ៤០០នាក់។

កម្មវិធីនេះធ្វើឡើងក្នុងគោលបំណងបណ្តុះនូវផ្នត់គំនិតភាពបៃតងសម្រាប់កម្ពុជា ព្រមទាំងបណ្តុះស្មារតី និងផ្នត់គំនិតដល់សាធារណៈជនគ្រប់មជ្ឈដ្ឋាន ឱ្យស្រលាញ់ភាពបៃតង និងស្រឡាញ់ដើមឈើ និងជាពិសេស ការចែកកូនឈើជូនប្រជាពលរដ្ឋ យកទៅដាំដុះនៅតាមគេហដ្ឋាន សាលារៀន វត្តអារាម ទីកន្លែងសាធារណៈ និងទីតាំងឯកជននានា ដោយឥតគិតថ្លៃ និងដើម្បីផ្សព្វផ្សាយលើកកម្ពស់ការយល់ដឹង ស្តីពីការដាំដើមឈើឱ្យបានច្រើន ដើម្បីបង្កើនគម្របបៃតងនៅកម្ពុជា និងជំរុញការចូលរួមអភិរក្សជីវៈចម្រុះពីគ្រប់ភាគីពាក់ព័ន្ធ ស្របនឹងយុទ្ធសាស្ត្រចក្រាវិស័យបរិស្ថាន ដែលបានដាក់ចេញជាបន្តបន្ទាប់ និងជាជំហានៗ ផ្តោតលើមុំយុទ្ធសាស្រ្តចំនួន៣គឺ ស្អាត បៃតង និងចីរភាព។

លោកបណ្ឌិត ម៉ឹង មករា បានពាំនាំការសួរសុខទុក្ខ និងការនឹករលឹកពី សម្តេចមហាបវរធិបតី ហ៊ុន ម៉ាណែត ជូនចំពោះថ្នាក់ដឹកនាំ មន្ត្រីគ្រប់ជាន់ថ្នាក់ និងប្រជាពលរដ្ឋទាំងអស់ ដែលមានវត្តមានក្នុងកម្មវិធីនេះ។ លោក បានដឹកនាំដាំកូនឈើ ពីរប្រភេទ គឺដើមធ្នុង និងបេង ចំនួន ១០០០ដើម ដោយ ៣០០ដើម ដាំនៅទីតាំងប្រារព្ធពិធីក្នុងបរិវេណវត្តក្ងោក ដោយខាងវត្តជាអ្នកថែទាំក្រោយពេលដាំរួច និង៧០០ដើមទៀត បានចែកចាយឲ្យយកទៅដាំតាមផ្ទះប្រជាពលរដ្ឋ ក្នុងឃុំក្ងោក ស្រុកមេមត់ ព្រមទាំងបានអំពាវនាវដល់ប្រជាពលរដ្ឋគ្រប់រូបចេះស្រលាញ់ដើមឈើ ចូលរួមដាំដើមឈើតាមគេហដ្ឋានឲ្យបានគ្រប់ៗគ្នា ដើម្បីឆ្លើយតបទៅនឹងកម្មវិធីគោលនយោបាយរបស់រាជរដ្ឋាភិបាលកម្ពុជា នីតិកាលទី៧ នៃរដ្ឋសភា ដឹកនាំដោយ សម្តេចធិបតី ហ៊ុន ម៉ាណែត និងការអនុវត្តតាមយុទ្ធសាស្រ្តចក្រាវិស័យបរិស្ថាន ឆ្នាំ២០២៣-២០២៨ ដែលបានផ្តោតលើមុំបីសំខាន់គឺស្អាត បៃតង និងចីរភាព ដើម្បីឆ្លើយតបទៅនឹងតម្រូវការស្ថានភាពជាក់ស្តែងរបស់កម្ពុជា និងនិន្នាការបរិស្ថានពិភពលោក សម្រាប់ឱ្យកិច្ចការពារថែរក្សា និងអភិរក្សជីវៈចម្រុះនិងធនធានធម្មជាតិ ក្នុងតំបន់ការពារធម្មជាតិ ឱ្យទទួលបានប្រសិទ្ធភាព និងមានចីរភាព នឹងជំរុញដំណើរកម្ពុជាឆ្ពោះទៅ ជាប្រទេសអព្យាក្រឹតកាបូន និងមានគម្របព្រៃឈើចំនួន៦០% នៅឆ្នាំ២០៥០។

ឆ្លៀតក្នុងឱកាសនេះដែរ លោកបណ្ឌិត បានធ្វើការណែនាំ និងពន្យល់ពីសារប្រយោជន៍ នៃកិច្ចសហប្រតិបត្តិការណ៍តំបន់ត្រីកោណអភិវឌ្ឍន៍ កម្ពុជា-ឡាវ-វៀតណាម (CLV-DTA) ដល់ថ្នាក់ដឹកនាំ មន្ត្រីរដ្ឋបាលស្រុក និងប្រជាពលរដ្ឋចូលរួមក្នុងពិធីនេះ និងបានលើកឡើងអំពីបញ្ហាបំផុសឲ្យប្រជាពលរដ្ឋចូលរួមធ្វើបាតុកម្មខុសច្បាប់ដោយជនអគតិមួយចំនួន ក្នុងគោលបំណង់ផ្តួលរំលំរាជរដ្ឋាភិបាលស្របច្បាស់ ដែលចលនានេះមិនអាចកើតឡើងទៅរួចទេ ដោយសារប្រជាពលរដ្ឋភាគច្រើនយល់ដឹងច្បាស់អំពីពីសារប្រយោជន៍ នៃកិច្ចសហប្រតិបត្តិការណ៍នេះ។ មុនពេលកិច្ចសហប្រតិបត្តិកាណ៍ CLV-DTA ខេត្តទាំងបួនក្នុងតំបន់នេះពោរពេញដោយគ្រាប់មិនមិនទាន់ផ្ទុះ ប្រជាពលរដ្ឋមិនអាចទទួលកម្មសិទ្ធិដីធ្លី មិនអាចតាំងទីលំនៅ គ្មានផ្លូវទឹកភ្លើង គ្មានសាលារៀន គ្មានវិនិយោគទុនក្នុងការអភិវឌ្ឍន៍តំបន់ និងពិបាកក្នុងការធ្វើដំណើរ។

បន្ទាប់ពីមានកិច្ចសហប្រតិបត្តិការណ៍នេះកើតឡើង តំបន់នេះបានទទួលការអភិវឌ្ឍប្រែក្លាយមុខមាត់យ៉ាងខ្លាំង ដោយមានការកសាងនូវហេដ្ឋារចនាសម្ព័ន្ធពេញតំបន់ តំបន់ចំការមីនក្លាយជាតំបន់ពាណិជ្ជកម្ម ការតាំងទីលំនៅចាបផ្តើមរីកដុះដាលឡើង មានផ្លូវធ្វើដំណើរ ដឹកជញ្ជូនទំនិញ មានទឹកមានភ្លើងអគ្គីសនី និងលុបបំបាត់ជម្លោះព្រំប្រទល់ និងការប្រឈមមុខដាក់គ្នាដោយប្រដាប់អាវុធនៅតាមព្រំដែន។ ២៥ឆ្នាំក្រោយកិច្ចសហប្រតិបត្តកាណ៍ CLV-DTA ចាប់ផ្តើម តំបន់នេះពោរពេញដោយសុខសន្តិភាព សុវត្ថិភាព និងអភិវឌ្ឍ ហើយប្រជាពលរដ្ឋគ្រប់រូបទទួលបានផលប្រយោជន៍ដោយផ្ទាល់ និងប្រយោល ផងដែរ៕

អត្ថបទ៖ សុភា

The post លោកបណ្ឌិត ម៉ឹង មករា ដឹកនាំដាំកូនឈើទូទាំងស្រុកមេមត់ ក្រោមប្រធានបទ “បណ្តុះផ្នត់គំនិតពន្លកបៃតង” appeared first on Kampuchea Thmey Daily.

លោក យុន លីនណេ ជឿជាក់ថា អាជ្ញាធរខេត្តនឹងសហការជាមួយភាគីពាក់ព័ន្ឋ ដើម្បីបន្តដាំដើមឈើនៅតាមដងផ្លូវក្នុងក្រុងសៀមរាបឱ្យបាន១ម៉ឺនដើម ក្នុងរយៈពេល២ឆ្នាំខាងមុខបន្ថែមទៀត ព្រោះថា ព្រៃឈើមានតួនាទីសំខាន់ណាស់ ក្នុងការជួយថែរក្សាដំណើរការប្រព័ន្ធអេកូឡូស៊ី តាមរយៈការជួយធ្វើនិយ័តកម្មអាកាសធាតុ ជួយកាត់បន្ថយឥទ្ធិពលអវិជ្ជមាន នៃការប្រែប្រួលអាកាសធាតុ ដូចជាទឹកជំនន់ ខ្យល់ព្យុះ និងការស្រូបយកឧស្ម័នកាបូនិចពីបរិយាកាស។

លោកអភិបាលរងខេត្ត ថា ពិធីដាំដើមឈើនាពេលនេះ គឺមានអត្ថន័យយ៉ាងជ្រាលជ្រៅសម្រាប់ចលនាបំផុសស្មារតីប្រជាពលរដ្ឋ មន្ដ្រីរាជការ សិស្សានុសិស្ស និងកម្លាំងប្រដាប់អាវុធឱ្យចេះស្រឡាញ់ព្រៃឈើ ចូលរួមដាំដុះ និងការពារព្រៃឈើ ក៏ដូចជាជួយជំរុញផលប្រយោជន៍ដល់ប្រជាពលរដ្ឋក្នុងជីវភាពរស់នៅ បង្កបង្កើនផលកសិកម្ម និងបង្កើនសុខមាលភាពគ្រួសារ ព្រមទាំងជួយលើកស្ទួយបរិស្ថានសង្គម។ លោក ចាត់ទុកចលនានេះ ជាកាតព្វកិច្ចដ៏ចម្បងផ្សារភ្ជាប់នឹងសេចក្ដីត្រូវការចាំបាច់នៃជីវភាពរស់នៅផ្ទាល់របស់ប្រជាពលរដ្ឋក្នុងការប្រកបរបរទទួលទាន និងនាំមកនូវរុក្ខជាតិបៃតងដ៏សែនមនោរម្យលើទឹកដីខេត្ដសៀមរាប ហើយធ្វើឱ្យដងវិថីក្នុងក្រុងក្លាយជារុក្ខវិថីប្រកបដោយបរិស្ថានបៃតង។ 

ទន្ទឹមនេះ ព្រៃឈើបានផ្ដល់នូវសេវាកម្ម និងជួយគាំពារផ្នែកបរិស្ថានជាច្រើនទៀត ដូចជាការការពារទីជំរាល ទប់ស្កាត់ការហូរច្រោះដី ការធ្វើឱ្យប្រសើរឡើងនៃគុណភាពដី កាត់បន្ថយបម្រែបម្រួលអាកាសធាតុ និងផ្ដល់នូវផលអនុផលព្រៃឈើជាច្រើនអនេកដល់ប្រជាពលរដ្ឋក្នុងជីវភាពប្រចាំថ្ងៃ។ លោកអភិបាលរងខេត្ត បានអរគុណអង្គការជាតិ-អន្ដរជាតិ ដែលយកចិត្ដទុកដាក់ជួយដល់ខេត្ដសៀមរាបក្នុងកិច្ចថែរក្សាធនធានធម្មជាតិ សំខាន់ព្រៃឈើដែលជាបញ្ហាចម្បង និងសារៈសំខាន់ដល់ការរស់រាន ព្រមទាំងការអភិវឌ្ឍន៍សង្គមជាតិកម្ពុជា ទាំងពេលបច្ចុប្បន្ន ក៏ដូចទៅពេលអនាគត។

លោកអភិបាលរងខេត្ត បានអំពាវនាវដល់ប្រជាពលរដ្ឋគ្រប់រូប ដែលបាននិងកំពុងកាប់បំផ្លាញព្រៃឈើ ដើម្បីចាប់យកដីព្រៃ ឱ្យបញ្ឈប់ជាបន្ទាន់ព្រោះការធ្វើអាជីវកម្មព្រៃឈើ និងជំនួញដីព្រៃឈើខុសច្បាប់ គឺជាបទល្មើសដ៏ធ្ងន់ធ្ងរបំផុត និងជាកត្តាបង្កឱ្យមានគ្រោះមហន្តរាយធម្មជាតិកើតឡើងចំពោះសង្គមជាតិ។ លោកអភិបាលរងខេត្ត បានសំណូមពរដល់ប្រជាពលរដ្ឋ ដែលមានដើមឈើនៅតាមមុខផ្ទះ ឬអាជីវកម្មរបស់ខ្លួន ជួយថែរក្សា ដើម្បីបង្កើនសោភ័ណភាព កាត់បន្ថយការ កើនឡើងកម្ដៅក្នុងទីក្រុង ព្រមទាំងធ្វេីក្រុងប្រែក្លាយជាក្រុងបៃតង ហើយយុទ្ធនាការដាំដេីមឈេីនៅតាមដងផ្លូវនេះ ដេីម្បីលើកកម្ពស់សោភណ្ឌភាព និងបរិស្ថាន ក្នុងការទទួលស្វាគមន៍ដល់ភ្ញៀវទេសចរណ៍ជាតិ និងអន្តរជាតិ៕

ដោយ៖ គឿន វេត

The post រដ្ឋបាលខេត្តសៀមរាប ដាំដើមឈើនៅតាមដងផ្លូវក្នុងក្រុងឱ្យបាន១ម៉ឺនដើម រយៈពេល២ឆ្នាំ appeared first on Kampuchea Thmey Daily.

លោក​អះអាងថា មក​ទល់​​ថ្ងៃទី១០ ខែ​​កុម្ភៈ ឆ្នាំ២០២៤ ក្រសួងប​រិស្ថាន​បានចែកកូនឈើគ្រប់ប្រភេទ (កូនឈើ​ប្រណិត និងឈើហូបផ្លែ) ចំនួន ២០០ ៥៦២ ដើមរួចជាស្រេច​​ក្នុងផែនការ​ ១ លាន​​ដើម​ជា​រៀងរាល់​ឆ្នាំ ដើម្បី​​ចែក​ជូន​ដល់​ប្រជាពលរដ្ឋជា​​បន្ត​បន្ទាប់តាម​​ការ​គ្រោង​ទុក។

លោក ខ្វៃ អាទិត្យា បាន​ឱ្យដឹងថា រហូត​មកទល់ពេលនេះ ក្រសួង​មាន​កូនឈើជាង ៧០ ម៉ឺន​ដើម​ក្នុងដៃ ទី១ គឺ​មន្ទីរបរិស្ថាន​បាន​បណ្តុះ​បាន​កូន​​ឈើ​ចំនួនជា​ង ៤០ ម៉ឺនដើម ទី២ គឺ​ក្រសួង​បា​នទទួលកូនត្នោតចំនួនជាង ៣០ ម៉ឺនដើម ដែល​​ជាអំណោយពី​លោក​ អ៊ាង សុផល្លែត រដ្ឋមន្រ្តី​ក្រសួង​បរិស្ថាន។

ដើម្បីដាំស្តារ​ព្រៃរិចរឹល ដាំ​នៅតាមមូលដ្ឋាន តាមសហគមន៍ នៅតាមសាលារៀន វត្តអារាម​ គិត​ចាប់​ផ្តើម​​ពីថ្ងៃបើកយុទ្ធនាការ ១០ តុលា មក​ទល់​​ថ្ងៃទី១០ ខែ​​កុម្ភៈ ឆ្នាំ២០២៤ ក្រសួងប​រិស្ថាន​បានចែកកូនឈើគ្រប់ប្រភេទ (កូនឈើ​ប្រណិត និងឈើហូបផ្លែ) ចំនួន ២០០ ៥៦២ ដើម រួចជាស្រេចទៅដល់ប្រជាពលរដ្ឋ។

មន្ត្រី​អ្នក​នាំ​ពាក្យ​រូប​នេះបាន​បន្តថា ក្រសួងបរិស្ថាន តាមរយៈមន្រ្តី​ឧទ្យានុរក្សនៃមន្ទីរបរិស្ថានរាជធានីនិងខេត្តនានាបានបណ្តុះកូនឈើចំនួន ៤១៦,១៦៣ ដើម សម្រាប់​យុទ្ធនាការ ១០ តុលា ឆ្នាំ​២០២៣ ក្នុងផែនការ​ ១ លានដើមជារៀងរាល់ឆ្នាំ ជូនប្រជាពលរដ្ឋកម្ពុជា ដើម្បីដាំ និងស្តារព្រៃឈើឡើងវិញឱ្យបានជាង ៦០% នៅឆ្នាំ២០៥០។

កាលពី​ពេល​កន្លង​ទៅ​ ក្រសួងបរិស្ថានបាន​ដាក់ចេញយុទ្ធសាស្រ្តចក្រាវិស័យបរិស្ថាន ២០២៣-២០២៨ ដែលបានរំលេចចេញនូវការងារអាទិភាពចំនួន ៣ រួមមាន ភាពស្អាត ភាពបៃតង និងចីរភាព។ ក្នុងមុំផែនការអាទិភាពទី២ ភាពបៃតង ក្រសួងបរិស្ថាននឹង​អនុវត្តដោយពង្រីកចលនាដាំដើមឈើ ជំរុញការគ្រប់គ្រងតំបន់ការពារ ធម្មជាតិ និងលើកកម្ពស់ជីវភាពសហគមន៍មូលដ្ឋាន។

មន្រ្តីនាំពាក្យក្រសួងបរិស្ថានបានថ្លែងថា ផែនការយុទ្ធសាស្រ្តទី២នេះ បានរៀបចំឡើងលើការប្រយុទ្ធប្រឆាំងនឹងការប្រែប្រួលអាកាសធាតុ ដែល​យកចិត្ត​ទុកជា​សំខាន់ គឺ​​ជំរុញ​​ការ​​បណ្តុះ​ និងដាំ​កូនឈើ សំដៅបង្កើនគម្របព្រៃ​ឱ្យដល់៦០% នៅ​ឆ្នាំ ២០៥០។

យ៉ាង​ណា​មិញ កន្លង​មក​រដ្ឋមន្ត្រី​ក្រសួង​បរិស្ថាន​ក៏​បាន​ដាក់​យុទ្ធនា​ការ​និង​ផែនការ​យុទ្ធសាស្រ្ត​អភិវឌ្ឍន៍ សហគមន៍​មូលដ្ឋាន​ឆ្នាំ២០២៤-២០២៨ ដែល​ជា​សមិទ្ធផលថ្មីមួយ​ទៀត របស់​ក្រសួងបរិស្ថាន ដែល​បន្តគាំទ្រ​លើក​កម្ពស់​ជីវភាព សហគមន៍​មូលដ្ឋាន តាមរយៈការជំរុញទេសចរណ៍ធម្មជាតិ និង​កៀរគរ​ការចូលរួម​ពីវិស័យ​ឯកជន ដើម្បី​ជម្រើសមុខរបរ ព្រមទាំងលើកទឹកចិត្ត ឱ្យសហគមន៍ដាំដើមឈើដែលមានប្រយោជន៍ និងឈានទៅសហគមន៍អព្យាក្រឹតកាបូន នៅឆ្នាំ​២០៥០។

ក្នុង​រយៈពេលជិត ៧ ខែ ក្នុង​អាណត្តិ​ទី​៧ នៃ​រដ្ឋសភា ​ក្រសួង​បរិស្ថាន​បានសម្រេចសមិទ្ធផលធំៗតាមរយៈយុទ្ធសាស្រ្តចក្រាវិស័យបរិស្ថាន ២០២៣-២០២៨ ដែល​កំពុងអនុវត្តស្របតាមកម្មវិ​ធីនយោបាយ​​របស់​រាជរដ្ឋាភិបាលនិង​យុទ្ធសាស្ត្របញ្ចកោណដំណាក់កាលទី១ ដែល​បានចាត់ទុកការ​កែទម្រង់​ការគ្រប់គ្រង​​ធនធាន​​ធម្មជាតិ និង​បរិស្ថានក្នុង​ចំណោមការងារ​អាទិភាព។ ក្រសួងបរិស្ថាន​បានដាក់បញ្ចូលក្របខណ្ឌការងារ​ចំនួន ៥ រួមមាន៖ ការកាត់បន្ថយការបំពុលបរិស្ថាន, ការពង្រឹងការគ្រប់គ្រងតំបន់ការពារធម្មជាតិ, ការអប់រំផ្សព្វផ្សាយបរិស្ថាន និងការប្រែប្រួលអាកាសធាតុ, ទំនើបកម្មរដ្ឋបាល និងហិរញ្ញវត្ថុប្រកបដោយចីរភាព, និងការលើកកម្ពស់ការទូតបៃតង៕

The post យុទ្ធនាការ ១០ តុលា ​ចែកកូនឈើដល់ពលរដ្ឋ​បាន​ជាង ២០ ម៉ឺន​ដើម appeared first on Kampuchea Thmey Daily.