លោក ម៉ែន អេង អភិបាលរងខេត្តស្វាយរៀង និងជាអនុប្រធាន អ.ន.ក.ខេត្ត បានមានប្រសាសន៍ប្រាប់តំណាងគ្រួសារអតីតគណៈយុទ្ធមិត្តបម្រើកងទ័ពឆ្នាំ១៩៧៨ ដែលបានចូលរួមនាពេលនេះថា ផ្ទះ និងដីសម្បទានសង្គមកិច្ចនៅទីនេះ មិនត្រឹមតែជាជម្រកសម្រាប់ការពារកម្តៅថ្ងៃ ទឹកភ្លៀងប៉ុណ្ណោះទេ វាគឺជាមរតកនៃសន្តិភាព ជាការតបស្នង និងភាពកតញ្ញូរបស់រាជរដ្ឋាភិបាលចំពោះវីរជននៅទីនេះទាំងអស់ដែលបានយកសាច់ស្រស់ ឈាមស្រស់ ទៅប្តូរយកសេចក្តីសុខ សន្តិភាព ជូនជាតិមាតុភូមិកម្ពុជា។ ការផ្តល់ផ្ទះ និងដី សម្បទានសង្គមកិច្ចនេះ គឺជាផ្នែកមួយនៃ យុទ្ធសាស្ត្រគាំពារសង្គមដ៏រឹងមាំរបស់រាជរដ្ឋាភិបាលកម្ពុជាដើម្បីធានាថា គ្មានអតីតយុទ្ធជនណាម្នាក់ត្រូវបានបោះបង់ចោលឡើយ។

លោក ប៉ែន សុវណ្ណនី ប្រធានមន្ទីរសង្គមកិច្ច អតីតយុទ្ធជន និងយុវនីតិសម្បទា ខេត្តស្វាយរៀង និងជាអនុប្រធាន អ.ន.ក. ខេត្ត បានបញ្ជាក់ថា បច្ចុប្បន្នផ្ទះថ្មីទាំង ១២៦ខ្នង នេះ បានសាងសង់រួចរាល់ ១០០ភាគរយហើយ។ លោកបន្តថា ចំពោះផ្ទះថ្មីនេះ ថ្នាក់ដឹកនាំ សមាគមថ្នាក់កណ្តាល និងថ្នាក់ខេត្តបានរៀបចំប្រព័ន្ធភ្លើង និងជីកស្រះស្តុកទឹកសម្រាប់ប្រើប្រាស់រួចជាស្រេចដើម្បីផ្តល់ភាពងាយស្រួលសម្រាប់បងប្អូនអតីតគណៈយុទ្ធមិត្តបម្រើកងទ័ពឆ្នាំ ១៩៧៨ ទាំងអស់ប្រើប្រាស់ដើម្បីបំពេញត្រូវការចាំបាច់ក្នុងការរស់នៅ។

គ្រួសារអតីតគណៈយុទ្ធមិត្តបម្រើកងទ័ពឆ្នាំ១៩៧៨ ដែលបានចូលរួមក្នុងឱកាសនេះ បានបង្ហាញក្ដីសោមនស្សរីករាយ ដែលបានឃើញអំណោយផ្ទះថ្មីត្រូវបានរៀបចំសាងសង់យ៉ាងល្អ ដែលថ្នាក់ដឹកនាំត្រៀមប្រគល់ជូននាពេលឆាប់ៗខាងមុខនេះ។ ជាមួយគ្នានេះដែរ ពួកគាត់ក៏បានសំណូមពរ ជូនទៅថ្នាក់ដឹកនាំជួយរៀបចំអភិវឌ្ឍន៍ហេដ្ឋារចនាសម្ព័ន្ធផ្លូវក្នុងភូមិ និងប្រព័ន្ធទឹកស្អាតបន្ថែម សម្រាប់ផ្តល់ភាពងាយស្រួលឱ្យបងប្អូនដែលចូលមករស់។

សូមបញ្ជាក់ថា ផ្ទះថ្មីដែលជាអំណោយដ៏ថ្លៃថ្លារបស់សម្តេចតេជោ ហ៊ុន សែន និងសម្តេចកិត្តិ ព្រឹទ្ធបណ្ឌិត ប៊ុន រ៉ានីហ៊ុនសែន សាងសង់ជូនអតីតគណៈយុទ្ធមិត្តបម្រើកងទ័ពឆ្នាំ ១៩៧៨ ត្រូវបានសាងសង់លើទីតាំងដីសម្បទានសង្គមកិច្ច ស្ថិតនៅភូមិធ្លកថ្មី ឃុំត្នោត ស្រុកកំពង់រោទិ៍ ខេត្តស្វាយរៀង។ ក្នុងជំហានទីមួយនេះ សមាគមអតីតយុទ្ធជន និងនិវត្តជនកម្ពុជា តាមរយៈឯកឧត្តមកិត្តិសង្គបណ្ឌិត គន់ គីម អនុប្រធាន និងជាអគ្គលេខាធិការ សមាគម បានដឹកនាំការសាងសង់សរុបចំនួន ១២៦ខ្នងផ្ទះ សម្រាប់ផ្ដល់ជូន ១២៦គ្រួសារ៕

The post ផ្ទះថ្មី ១២៦ខ្នង នៅស្រុកកំពង់រោទិ៍ ខេត្តស្វាយរៀង សាងសង់រួចរាល់ ត្រៀមផ្ដល់ជូនគណៈយុទ្ធមិត្តបម្រើកងទ័ពឆ្នាំ១៩៧៨ appeared first on Kampuchea Thmey Daily.

ប្រមុខរដ្ឋស្ដីទី និងជាប្រធានសមាគមអតីតយុទ្ធជន និងនិវត្តជនកម្ពុជា សម្ដេចតេជោ ហ៊ុន សែន បានណែនាំដល់ក្រសួងរៀបចំដែនដី នគរូបនីយកម្ម និងសំណង់ និងគណៈកម្មាធិការសម្បទានដីសង្គមកិច្ចថ្នាក់ជាតិ ត្រូវតែបន្តវាយតម្លៃលើលទ្ធភាពក្នុងការផ្ដល់ដីសង្គមកិច្ចជូនអតីតកងកម្លាំងប្រដា​ប់អាវុធ អតីតយុទ្ធជន និងនិវត្តជន ដែលក្រីក្រពិតប្រាកដ។

សម្ដេចតេជោ បានរំលឹកពីការសម្រេចចិត្តក្នុងអាណត្តិរដ្ឋាភិបាលរបស់សម្ដេច ដែលបានបញ្ឈប់ការផ្ដល់ដីសម្បទានសេដ្ឋកិច្ចទៅឱ្យក្រុមហ៊ុនឯកជន ចាប់តាំងពីឆ្នាំ២០១២មក ហើយដីដែលបានដកហូតពីក្រុមហ៊ុនឯកជន គឺត្រូវបានរដ្ឋរក្សាទុកសម្រាប់ផ្ដល់ជាដីសម្បទានសង្គមកិច្ច ក្នុងនោះមួយភាគត្រូវបានផ្ដល់សម្រាប់អតីតយុទ្ធជន។ ក្នុងន័យនេះ សម្ដេចតេជោ ប្រមុខរដ្ឋស្ដីទី បានជំរុញឱ្យក្រសួងរៀបចំដែនដី ត្រូវបន្តគ្រប់គ្រងដីធ្លីនេះឱ្យបានហ្មត់ចត់ ដើម្បីទុកផ្ដល់ដល់អតីតយុទ្ធជន និងនិវត្តជនដែលខ្វះដីពិតប្រាកដ។

បន្ថែមពីការផ្ដល់ដី សម្ដេចតេជោ ហ៊ុន សែន ក៏បានចង្អុលបង្ហាញដល់សមាគមអតីតយុទ្ធជន និងនិវត្តជនកម្ពុជា ត្រូវបន្តគម្រោងសាងសង់ផ្ទះដល់អតីតយុទ្ធជន និងនិវត្តជន ផងដែរ។ ពីមហាសន្និបាតវិសាមញ្ញតំណាងសមាគមអតីតយុទ្ធជនកម្ពុជានៅថ្ងៃនេះ សម្ដេចតេជោ ក៏បានប្រកាសជួយសាងសង់ផ្ទះសម្រាប់អតីយុទ្ធជនបន្ថែមទៀត ដោយក្នុង១ឆ្នាំ សម្ដេចនឹងសាងសង់ផ្ទះចំនួន១០០ខ្នង ហើយរយៈពេល៥ឆ្នាំ ចាប់ពីឆ្នាំ២០២៥ ដល់ឆ្នាំ២០៣០។

ការសាងសង់ផ្ទះ និងការផ្ដល់ដីសម្បទានសង្គមកិច្ចដល់អតីតយុទ្ធជន និងអតីតមន្ត្រីរាជការស៊ីវិល គឺជាផ្នែកមួយនៃការដោះស្រាយគោលនយោបាយដ៏ចាំបាច់របស់រាជរដ្ឋាភិបាល តាំងពីអាណត្តិរដ្ឋាភិបាល ដឹកនាំដោយសម្ដេចតេជោ ហ៊ុន សែន និងបន្តដោយរដ្ឋាភិបាលដឹកនាំដោយសម្ដេចធិបតី ហ៊ុន ម៉ាណែតពេលនេះ ធ្វើយ៉ាងណាជួយលើកកម្ពស់ជីវភាពរស់នៅរបស់​អតីតយុទ្ធជន អតីតមន្ត្រីរាជការ ដែលបានបម្រើជាតិមាតុភូមិស្ទើរពេញមួយជីវិតរបស់ពូកគាត់៕

ដោយ៖ ធឿន វ៉ាន់សុង

The post សម្ដេចតេជោរំលឹកក្រសួងដែនដីត្រូវផ្តល់ដីសង្គមកិច្ចឱ្យអតីតយុទ្ធជន និងនិវត្តជនដែលអត់ពិតប្រាកដ appeared first on Kampuchea Thmey Daily.

លោក សរ សុវណ្ណ រដ្ឋមន្ត្រីប្រតិភូអមនាយករដ្ឋមន្ត្រី អនុប្រធានប្រចាំការ និងជាប្រធានលេខាធិការដ្ឋានគណៈកម្មាធិការជាតិដឹកនាំអនុវត្តកម្មវិធីផ្តល់ដីការពារព្រៃ ដើម្បីរួមគ្នាអភិវឌ្ឍដោយចីរភាព បានអបអរសារទរដល់អ្នកមានសំណាងទាំង ២ ៥០០គ្រួសារ ក្នុងនោះ៥០០គ្រួសារដំបូង ដែលមានលំដាប់លេខរៀងដំបូងគេ មានសំណាងដើម្បីក្រុមការងារលេខាធិការដ្ឋាន តំណាងខុទ្ទកាល័យសម្តេចធិបតី នាយករដ្ឋមន្ត្រី និងតំណាងអង្គភាពប្រឆាំងអំពើពុករលួយ នឹងចុះត្រួតពិនិត្យលក្ខណៈសម្បត្តិទាំង៤ រួមមានគ្រួសារដែលមានសញ្ជាតិខ្មែរពីកំណើត គ្មានដី ក្រីក្រពិតប្រាកដ និងចង់ទៅរស់នៅទីតាំងអនុវត្តកម្មវិធី ដើម្បីមានសិទ្ធិទទួលបានដីសម្រាប់គម្រោងទី១ ស្ថិតនៅភូមិសាស្ត្រអូរសែវ ឃុំស្ដៅ និងឃុំសាមឃួយ ស្រុកសេសាន ខេត្តស្ទឹងត្រែង។

ប្រធានលេខាធិការដ្ឋានគណៈកម្មាធិការជាតិដឹកនាំអនុវត្តកម្មវិធីផ្តល់ដីការពារព្រៃ ដើម្បីរួមគ្នាអភិវឌ្ឍដោយចីរភាព បានបញ្ជាក់ថា ក្រោយពេលចាប់ឆ្នោតរួច ក្រុមការងារចម្រុះនឹងចុះសម្ភាសន៍បុគ្គលមានលក្ខណៈសម្បត្តិគ្រប់គ្រាន់ មានសិទ្ធិទទួលដីមុនគេ។ ក្រុមការងារលេខាធិការដ្ឋាន នឹងទំនាក់ទំនងជាមួយរដ្ឋបាលឃុំ សង្កាត់ ក្រុង ស្រុក ខណ្ឌ និងរាជធានី ខេត្ត ដើម្បីចុះពិនិត្យភាពសមស្របរបស់គ្រួសារទាំង ៥០០គ្រួសារ ដែលបានជ្រើសរើស។

ចំពោះករណីពេលចុះពិនិត្យឃើញថា មានអ្នកដាក់ពាក្យស្នើសុំដីមួយចំនួនមិនមានលក្ខណៈសម្បត្តិគ្រប់គ្រាន់ដើម្បីអាចទទួលដីបាន អ្នកដាក់ពាក្យនោះនឹងមិនជាប់ឈ្មោះក្នុងកម្មវិធីនេះទេ ហើយក្រុមការងារចម្រុះ នឹងជ្រើសរើសអ្នកជំនួសចេញពីគ្រួសារចំនួន២ ០០០ ដែលបានពីការចាប់ឆ្នោតនៅជុំទី១នេះ ដើម្បីបំពេញចំនួនកំណត់ឲ្យគ្រប់ចំនួន៥០០គ្រួសារ តាមលំដាប់លេខរៀងបន្តបន្ទាប់តាមលទ្ធផលនៃការចាប់ឆ្នោតក្នុង រាជធានី/ខេត្តសាម៉ី។

លោក សរ សុវណ្ណ បានបន្ថែមថា សម្រាប់អ្នកបានដាក់ពាក្យស្នើសុំដីដែលនៅសល់ចំនួន ៩ ៨២៩គ្រួសារ ដែលពុំទាន់មានសំណាងជាប់ឈ្មោះ ក្នុងលទ្ធផលនៃការចាប់ឆ្នោតជុំទី១ នឹងត្រូវចាប់ឆ្នោតនៅជុំបន្តបន្ទាប់ទៀត។

សូមជម្រាបថា គិតមកដល់ពេលនេះតំបន់ដែលស្ថិតក្នុងកម្មវិធីផ្ដល់ដី ការពារព្រៃដើម្បីរួមគ្នាអភិវឌ្ឍដោយចីរភាពក្នុងខេត្តស្ទឹងត្រែង ត្រូវបានរៀបចំឈួសឆាយផ្លូវមេ ផ្លូវរង ប្រវែងសរុបចំនួន ៧២,៥៥គីឡូម៉ែត្រ និងបានលើកតួផ្លូវ ផ្លូវមេ និងផ្លូវរង ប្រវែងសរុបចំនួន ៦០,៥២គីឡូម៉ែត្រ និងបានកសាងផ្លូវសម្រេចជាស្ថាពរចំនួន ២៩,២៥គីឡូម៉ែត្រផងដែរ៕

The post ដំណើរការចាប់ឆ្នោតជុំទី១ រយៈពេល៥ថ្ងៃ កម្មវិធីផ្ដល់ដីការពារព្រៃ បានបញ្ចប់ដោយជោគជ័យ appeared first on Kampuchea Thmey Daily.

ជាការកត់សម្គាល់ ដំណើរការចាប់ឆ្នោតជុំទី១នេះ បនប្រព្រឹត្តទៅរយៈពេល៥ថ្ងៃ ដោយមានការផ្សាយផ្ទាល់ពីស្ថានីយ៍ទូរទស្សន៍ជាតិកម្ពុជា (ទទក) ចាប់ពីថ្ងៃទី៣០ ខែមិថុនា ដល់ថ្ងៃទី៤ ខែកក្កដា ឆ្នាំ២០២៥។

លើកឡើងក្នុងពិធីបិទការចាប់ឆ្នោតនាល្ងាចថ្ងៃទី៤ ខែកក្កដា ឆ្នាំ២០២៥ លោក សរ សុវណ្ណ រដ្ឋមន្ត្រីប្រតិភូអមនាយករដ្ឋមន្ត្រី អនុប្រធានប្រចាំការ និងជាប្រធានលេខាធិការដ្ឋានគណៈកម្មាធិការជាតិដឹកនាំអនុវត្តកម្មវិធីផ្តល់ដីការពារព្រៃ ដើម្បីរួមគ្នាអភិវឌ្ឍដោយចីរភាព បានថ្លែងឱ្យដឹងថា បន្ទាប់ពីដំណើរការចាប់ឆ្នោតរយៈពេល៥ថ្ងៃមកនេះ ការចាប់ឆ្នោតសម្រេចបានចំនួន២ ៥០០គ្រួសារ ក្នុងចំណោមអ្នកបានដាក់ពាក្យស្នើសុំដីសរុបនៅទូទាំងប្រទេសចំនួន១២ ៣២៩ គ្រួសារ។

ដោយឡែក អ្នកបានដាក់ពាក្យស្នើសុំដីដែលនៅសល់ចំនួន៩ ៨២៩គ្រួសារ ពុំទាន់មានសំណាងជាប់ឈ្មោះ ក្នុងលទ្ធផលនៃការចាប់ឆ្នោតជុំទី១ នឹងត្រូវចាប់ឆ្នោតនៅជុំបន្តបន្ទាប់ទៀត។

បើតាមការបញ្ជាក់របស់លោក សរ សុវណ្ណ ក្នុងចំណោមអ្នកចាប់ឆ្នោតបានចំនួន២ ៥០០គ្រួសារនេះ គឺអ្នកមានសំណាងចំនួន៥០០គ្រួសារ ដែលជ្រើសរើសតាមលំដាប់លេខរៀងដែលចាប់បានតាមរាជធានីខេត្ត នឹងត្រូវបានក្រុមការងារចុះត្រួតពិនិត្យលក្ខណៈសម្បត្តិ ដើម្បីអាចមានសិទ្ធិទទួលបានដីក្នុងគម្រោងទី១ នៅភូមិសាស្ត្រអូរសែវ ឃុំស្ដៅ និងឃុំសាមឃួយ ស្រុកសេសាន ខេត្តស្ទឹងត្រែង។ ចំពោះពលរដ្ឋចំនួន ២ ០០០គ្រួសារទៀត លោក បញ្ជាក់ថា នឹងត្រូវជ្រើសរើសសម្រាប់បំពេញបន្ថែមសម្រាប់គម្រោងបន្តបន្ទាប់ទៀតតាមលេខរៀងនៃការចាប់ឆ្នោតក្នុងរាជធានីខេត្ត។

លោក សរ សុវណ្ណ បានឱ្យដឹងបន្ថែមទៀតថា អ្នកមានសំណាងជាប់ឆ្នោតចំនួន៥០០គ្រួសារសម្រាប់គម្រោងទី១ គឺក្រុម ការងារចម្រុះរបស់លេខាធិការដ្ឋានគណៈកម្មាធិការជាតិដឹកនាំអនុវត្តកម្មវិធីផ្តល់ដីការពារព្រៃ ដើម្បីរួមគ្នាអភិវឌ្ឍដោយចីរភាព នឹងទំនាក់ទំនងជាមួយរដ្ឋបាលឃុំ សង្កាត់ ក្រុង ស្រុក ខណ្ឌ និងរាជធានី ខេត្ត និងសាម៉ីខ្លួន ដើម្បីចុះត្រួតពិនិត្យរួមគ្នានូវលក្ខណៈសម្បត្តិទាំង៤ គឺសញ្ជាតិខ្មែរពីកំណើត ក្រីក្រពិតប្រាកដ គ្មានដីពិតប្រាកដ និងស្ម័គ្រចិត្តទៅរស់នៅទីតាំងអនុវត្តកម្មវិធី ដែលចាប់ឆ្នោតបានសម្រាប់គម្រោងទី១ ក្នុងពេលឆាប់ៗខាងមុខនេះ។

ពាក់ព័ន្ធនឹងការរៀបចំដីគម្រោងទី១ ក្នុងស្រុកសេសាន ខេត្តស្ទឹងត្រែង លោក សរ សុវណ្ណ ក៏បានគូសបញ្ជាក់ផងដែរថា ក្រុមវិស្វកម្មសៀមរាបតេជោ ឈូសឆាយបើកផ្លូវបានប្រមាណជាង៧៣គីឡូម៉ែត្រ លើកតួផ្លូវបានប្រមាណ៦១គីឡូម៉ែត្រ និងកសាងផ្លូវសម្រេចជាស្ថាពរបាន៣០គីឡូម៉ែត្រ។ ទន្ទឹមនេះ អនុវត្តតាមការណែនាំរបស់សម្តេចធិបតី ហ៊ុន ម៉ាណែត គឺបានបង្កើតក្រុមការងារចំពោះកិច្ចសម្រាប់គាំទ្រ និងសម្របសម្រួលការអនុវត្តគម្រោងទី១ខាងលើ ក្នុងការកសាងនិងគាំទ្រគម្រោងអភិវឌ្ឍសហគមន៍ ដោយលេខាធិការដ្ឋាន បានរួមសហការជាមួយក្រសួងកសិកម្ម ដើម្បីសម្របសម្រួល និងការបង្កើតសហគមន៍កសិកម្មទំនើប ក្នុងគោលបំណងលើកកម្ពស់កម្រិតជីវភាពប្រជាពលរដ្ឋដែលជាអ្នកមានសំណាងនឹងទៅរស់នៅទីនោះ៕

ដោយ៖ ធឿន វ៉ាន់សុង

The post ពលរដ្ឋ៥០០គ្រួសារនឹងត្រូវពិនិត្យលក្ខណៈសម្បត្តិ មុនទទួលបានដីការពារព្រៃ គម្រោងទី១ appeared first on Kampuchea Thmey Daily.

បើតាមសម្ដេចធិបតី កម្មវិធីផ្ដល់ដីការពារព្រៃ ដើម្បីរួមគ្នាអភិវឌ្ឍដោយចីរភាព គឺបានដំណើរការចាប់ឆ្នោតជុំទី១ ហើយ សម្រាប់អ្នកបានដាក់ពាក្យស្នើសុំដីនៃកម្មវិធីផ្តល់ដីការពារព្រៃ ដែលអ្នកសំណាង៥០០នាក់ នឹងមានសិទ្ធិទទួលបានដីសម្រាប់គម្រោងទី១ នៅខេត្តស្ទឹងត្រែង។

ថ្លែងនៅក្នុងទិវាមច្ឆាជាតិ នៅខេត្តតាកែវ សម្ដេចធិបតី នាយករដ្ឋមន្ត្រី បានលើកឡើងថា មានប្រទេសតិចតួចបំផុត ដែលមានគោលនយោបាយចែកដីឱ្យប្រជាពលរដ្ឋ សូម្បីតែប្រទេសមហាអំណាចធំៗមួយចំនួន ប្រជាពលរដ្ឋអត់ដីជាកម្មសិទ្ធិខ្លួនឯងឡើយ ពោលគឺត្រូវជួលផ្ទះគេមួយជីវិត។ តែសម្រាប់កម្ពុជា មានគោលនយោបាយសម្រាប់ប្រជាពលរដ្ឋដែលអត់ដីពិតប្រាកដ គឺរដ្ឋផ្ដល់ដីឱ្យដើម្បីសង់លំនៅដ្ឋាន។

សម្ដេច ថ្លែងដូច្នេះថា «សម្រាប់ប្រជាពលរដ្ឋ ដែលគ្មានដីពិតប្រាកដ រាជរដ្ឋាភិបាល បានដាក់ចេញនូវគោលនយោបាយ ផ្តល់ដីការពារព្រៃ ដើម្បីជួយបងប្អូនឱ្យទទួលបានដីស្របច្បាប់ និងពឹងផ្អែកលើមុខរបរកសិកម្មសម្រាប់គាំទ្រជីវភាព»។

កម្មវិធីផ្តល់ដីការពារព្រៃ ដើម្បីរួមគ្នាអភិវឌ្ឍដោយចីរភាព ត្រូវបានផ្តួចផ្តើមដោយសម្តេចធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា ក្នុងគោលបំណងបង្កើនការការពារ និងអភិរក្សធនធានធម្មជាតិប្រកបដោយចីរភាព និងបង្កើនប្រសិទ្ធភាព ផលិតភាពនៃការប្រើប្រាស់ដីរដ្ឋផង តាមរយៈការផ្តល់ដី ក្រោមទម្រង់សម្បទានដីសង្គមកិច្ចដល់ប្រជាពលរដ្ឋក្រីក្រពិតប្រាកដ ដែលគ្មានដីសម្រាប់សង់លំនៅឋាន ក៏ដូចជាគាំទ្រគម្រោងអភិវឌ្ឍសហគមន៍ ព្រមទាំងការពារព្រៃនៅជិតទីតាំងផ្តល់ដីប្រកបដោយចីរភាព។

លក្ខណៈសម្បត្តិទាំង៤ ដែលប្រជាពលរដ្ឋអាចដាក់ពាក្យស្នើសុំដីការពារព្រៃនេះ គឺរួមមានគ្រួសារដែលមានសញ្ជាតិខ្មែរពីកំណើត គ្មានដី ក្រីក្រពិតប្រាកដ និងចង់ទៅរស់នៅទីតាំងអនុវត្តកម្មវិធី។ ចាប់ពីថ្ងៃទី១ ខែកុម្ភៈ ដល់ថ្ងៃទី២២ ខែមីនា ឆ្នាំ២០២៥ មានប្រជាពលរដ្ឋបានដាក់ពាក្យស្នើសុំចំនួនសរុប ១២ ៣២៩គ្រួសារ។

ការចាប់ឆ្នោតជុំទី១ សម្រាប់កម្មវិធីផ្ដល់ដីការពារព្រៃនេះមានរយៈពេល៥ថ្ងៃ តាមរយៈផ្សាយផ្ទាល់ពីស្ថានីយ៍ទូរទស្សន៍ជាតិកម្ពុជា (ទទក) ចាប់ពីថ្ងៃទី៣០ ខែមិថុនា ដល់ថ្ងៃទី៤ ខែកក្កដា ឆ្នាំ២០២៥។ តាមការលើកឡើងរបស់លោក សរ សុវណ្ណ រដ្ឋមន្ត្រីប្រតិភូអមនាយករដ្ឋមន្ត្រី អនុប្រធានប្រចាំការ និងជាប្រធានលេខាធិការដ្ឋានគណៈកម្មាធិការជាតិដឹកនាំអនុវត្តកម្មវិធីផ្តល់ដីការពារព្រៃ ដើម្បីរួមគ្នាអភិវឌ្ឍដោយចីរភាព ក្នុងការចាប់ឆ្នោតជុំទី១នេះ នឹងជ្រើសរើសយកអ្នកមានសំណាងចំនួន ២ ៥០០គ្រួសារ ហើយបែងចែកជាពីរដំណាក់កាល គឺទី១) អ្នកបានដាក់ពាក្យស្នើសុំដីចំនួន ៥០០គ្រួសារ ដែលមានសំណាងលំដាប់លេខរៀងតាមការចាប់ឆ្នោតបានមុនគេ និងបន្តបន្ទាប់ (៤%) ក្នុងរាជធានី/ខេត្តសាមី ត្រូវបានចុះត្រួតពិនិត្យបុគ្គលមានលក្ខណៈសម្បត្តិគ្រប់គ្រាន់ ដែលអាចមានសិទ្ធិទទួលដីសម្រាប់គម្រោងទី១ នៅភូមិសាស្ត្រ អូរកែវ ឃុំល្ពៅនិងឃុំសាមមួយ ស្រុក សេសាន ខេត្តស្ទឹងត្រែង។

ចំណែកទី២ ក្នុងចំណោមអ្នកដាក់ពាក្យស្នើសុំដីដែលមានសំណាងចំនួន ២ ០០០គ្រួសារ ដែលសល់ពុំទាន់បានចុះទៅត្រួតពិនិត្យលក្ខណៈសម្បត្តិ នឹងត្រូវចុះត្រួតពិនិត្យបន្តបន្ទាប់ សម្រាប់បំពេញចំនួនកំណត់៥០០គ្រួសារ និងគម្រោងបន្ទាប់ តាមលំដាប់លេខរៀងបន្តបន្ទាប់ តាមលទ្ធផលនៃការចាប់ឆ្នោតក្នុងរាជធានីខេត្តសាមី។

ដោយឡែក សម្រាប់អ្នកបានដាក់ពាក្យស្នើសុំដីដែលនៅសល់ចំនួន ៩ ៨២៩គ្រួសារដែលពុំទាន់មានសំណាងជាប់ឈ្មោះក្នុងលទ្ធផលនៃការចាប់ឆ្នោតជុំទី១ នឹងត្រូវចាប់ឆ្នោតនៅជុំបន្តបន្ទាប់ទៀត។

ថ្លែងបើកពិធីចាប់ឆ្នោតអ្នកបានដាក់ពាក្យស្នើសុំដីជុំទី១ សម្រាប់ខេត្តបាត់ដំបង ស្ទឹងត្រែង ព្រះវិហារ បន្ទាយមានជ័យ និងខេត្តកោះកុង កាលពីរសៀលថ្ងៃទី៣០ ខែមិថុនា ឆ្នាំ២០២៥ លោក សរ សុវណ្ណ លើកឡើងថា ការចាប់ឆ្នោតជ្រើសរើសនេះ គឺធ្វើឡើងម្តងមួយខេត្តៗ និងធ្វើឡើងដោយតម្លាភាព សុក្រឹតភាព យុត្តិធម៌ និងអាចជឿទុកចិត្តបាន ដោយចាប់ និងបង្ហាញសន្លឹកឆ្នោតជាសាធារណៈ ហើយប្រកាសឈ្មោះអ្នកដាក់ពាក្យស្នើសុំ៕

ដោយ៖ ធឿន វ៉ាន់សុង

The post នាយករដ្ឋមន្ត្រី ថា កម្មវិធីចាប់ដីការពារព្រៃ ត្រូវផ្តល់ឱ្យពលរដ្ឋដែលអត់ពិតប្រាកដ appeared first on Kampuchea Thmey Daily.

តាមការលើកឡើងរបស់លោក សរ សុវណ្ណ រដ្ឋមន្ត្រីប្រតិភូអមនាយករដ្ឋមន្ត្រី អនុប្រធានប្រចាំការ និងជាប្រធានលេខាធិការដ្ឋានគណៈកម្មាធិការជាតិដឹកនាំអនុវត្តកម្មវិធីផ្តល់ដីការពារព្រៃ ដើម្បីរួមគ្នាអភិវឌ្ឍដោយចីរភាព គឺនឹងដំណើរការចាប់ឆ្នោតជុំទី១នេះ មានរយៈពេល៥ថ្ងៃ ដោយមានការផ្សាយផ្ទាល់ពីស្ថានីយ៍ទូរទស្សន៍ជាតិកម្ពុជា (ទទក) ចាប់ពីថ្ងៃទី៣០ ខែមិថុនា ដល់ថ្ងៃទី៤ ខែកក្កដា ឆ្នាំ២០២៥។

ការចាប់ឆ្នោតនេះ គឺបន្ទាប់ពីលេខាធិការដ្ឋានគណៈកម្មាធិការជាតិដឹកនាំអនុវត្តកម្មវិធីផ្តល់ដីការពារព្រៃ ដើម្បីរួមគ្នាអភិវឌ្ឍ ដោយចីរភាព (ផ.ក.អ.) បានប្រកាសឱ្យប្រជាពលរដ្ឋក្រីក្រី មិនមានដីពិតប្រាកដ ឱ្យដាក់ពាក្យនៅតាមឃុំសង្កាត់ ចាប់ពីថ្ងៃទី១ ខែកុម្ភៈ ដល់ថ្ងៃទី២២ ខែមីនា ឆ្នាំ២០២៥ ដោយមានប្រជាពលរដ្ឋសរុប ១២ ៣២៩នាក់បានដាក់ពាក្យស្នើសុំ។

ថ្លែងបើកពិធីចាប់ឆ្នោតអ្នកបានដាក់ពាក្យស្នើសុំដីជុំទី១ សម្រាប់ខេត្តបាត់ដំបង ស្ទឹងត្រែង ព្រះវិហារ បន្ទាយមានជ័យ និងខេត្តកោះកុង នារសៀលថ្ងៃទី៣០ ខែមិថុនា ឆ្នាំ២០២៥ លោក សរ សុវណ្ណ បានលើកឡើងថា ការចាប់ឆ្នោតជ្រើសរើសនេះ គឺធ្វើឡើងម្តងមួយខេត្តៗ និងធ្វើឡើងដោយតម្លាភាព សុក្រឹតភាព យុត្តិធម៌ និងអាចជឿទុកចិត្តបាន ដោយចាប់ និងបង្ហាញសន្លឹកឆ្នោតជាសាធារណៈ ហើយប្រកាសឈ្មោះអ្នកដាក់ពាក្យស្នើសុំ។  

បើតាមលោក សរ សុវណ្ណ គ្រួសារដែលនឹងមានសំណាងក្នុងការចាប់ឆ្នោតចំនួន ២ ៥០០គ្រួសារ តាមលំដាប់លេខរៀងដែល ចាប់ឆ្នោតបានក្នុងរាជធានីខេត្តសាមី ត្រូវបែងចែកជាពីរ គឺទី១ អ្នកបានដាក់ពាក្យស្នើសុំដីចំនួន ៥០០គ្រួសារ ដែលមានសំណាងលំដាប់លេខរៀងតាមការចាប់ឆ្នោតបានមុនគេ និងបន្តបន្ទាប់(៤%) ក្នុងរាជធានី/ខេត្តសាមី ត្រូវបានចុះត្រួតពិនិត្យបុគ្គលមានលក្ខណៈសម្បត្តិ គ្រប់គ្រាន់ ដែលអាចមានសិទ្ធិទទួលដីសម្រាប់គម្រោងទី១ នៅភូមិសាស្ត្រ អូរកែវ ឃុំល្ពៅនិងឃុំសាមមួយ ស្រុក សេសាន ខេត្តស្ទឹងត្រែង។

ចំណែកទី២ ក្នុងចំណោមអ្នកដាក់ពាក្យស្នើសុំដីដែលមានសំណាងចំនួន ២ ០០០គ្រួសារ ដែលសល់ពុំទាន់បានចុះទៅត្រួតពិនិត្យលក្ខណៈសម្បត្តិ នឹងត្រូវចុះត្រួតពិនិត្យបន្តបន្ទាប់ សម្រាប់បំពេញចំនួនកំណត់៥០០គ្រួសារ និងគម្រោងបន្ទាប់ តាមលំដាប់លេខរៀងបន្តបន្ទាប់ តាមលទ្ធផលនៃការចាប់ឆ្នោតក្នុងរាជធានីខេត្តសាមី។

ដោយឡែក សម្រាប់អ្នកបានដាក់ពាក្យស្នើសុំដីដែលនៅសល់ចំនួន ៩ ៨២៩គ្រួសារដែលពុំទាន់មានសំណាងជាប់ឈ្មោះក្នុងលទ្ធផលនៃការចាប់ឆ្នោតជុំទី១ នឹងត្រូវចាប់ឆ្នោតនៅជុំបន្តបន្ទាប់ទៀត។ លោករដ្ឋមន្ត្រី សរ សុវណ្ណ បញ្ជាក់បែបនេះ។

គួរជម្រាបថា កម្មវិធីផ្តល់ដីការពារព្រៃ ដើម្បីរួមគ្នាអភិវឌ្ឍដោយចីរភាព ត្រូវបានផ្តួចផ្តើមដោយសម្តេចធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា ក្នុងគោលបំណងបង្កើនការការពារ និងអភិរក្សធនធានធម្មជាតិប្រកបដោយចីរភាពនិងការបង្កើនប្រសិទ្ធភាព ផលិតភាពនៃការប្រើប្រាស់ដីរដ្ឋផង តាមរយៈការផ្តល់ដី ក្រោមទម្រង់សម្បទានដីសង្គមកិច្ចជូនប្រជាពលរដ្ឋក្រីក្រពិតប្រាកដដែលគ្មានដីសម្រាប់សង់លំនៅឋាន ក៏ដូចជាគាំទ្រគម្រោងអភិវឌ្ឍសហគមន៍ ព្រមទាំងការពារព្រៃនៅជិតទីតាំងផ្តល់ដីប្រកបដោយចីរភាព។

លក្ខណៈសម្បត្តិទាំង៤ ដែលប្រជាពលរដ្ឋអាចដាក់ពាក្យស្នើសុំដីនៃកម្មវិធីផ្តល់ដីការពារព្រៃ ដើម្បីរួមគ្នាអភិវឌ្ឍដោយចីរភាពនេះបាន គឺរួមមានគ្រួសារដែលមានសញ្ជាតិខ្មែរពីកំណើត គ្មានដី ក្រីក្រពិតប្រាកដ និងចង់ទៅរស់នៅទីតាំងអនុវត្តកម្មវិធី។ ចាប់ពីថ្ងៃទី១ ខែកុម្ភៈ ដល់ថ្ងៃទី២២ ខែមីនា ឆ្នាំ២០២៥ មានប្រជាពលរដ្ឋបានធ្វើស្វ័យប្រកាស និងដាក់ពាក្យស្នើសុំនៅឃុំ/សង្កាត់ ចំនួន ១ ១៨២ឃុំ/សង្កាត់ ដោយអ្នកបានដាក់ពាក្យស្នើសុំដីមានចំនួនសរុប ១២ ៣២៩គ្រួសារ និង៤៧០ឃុំ/សង្កាត់ ពុំមានអ្នកដាក់ពាក្យស្នើសុំដីឡើយ ក្នុងចំណោម ១ ៦៥២ឃុំ/សង្កាត់ ទូទាំងប្រទេស៕

The post រដ្ឋ ចាប់ឆ្នោតជុំទី១ សម្រាប់អ្នកដាក់ពាក្យសុំដីនៃកម្មវិធីផ្តល់ដីការពារព្រៃដើម្បីរួមគ្នាអភិវឌ្ឍដោយចីរភាព appeared first on Kampuchea Thmey Daily.

លោក សរ សុពុត្រា សុំការយោគយល់ និងអធ្យាស្រ័យពីប្រជាពលរដ្ឋ និងអ្នករាប់អានលោកដែលព្យាយាមទាក់ទងមកលោកផ្ទាល់ ដើម្បីស្នើសុំដីនៅចំណុចអូរសែវ ស្រុកសេសាន។ តាមរយៈសំណេរនៅលើបណ្ដាញហ្វេសប៊ុកផ្លូវការរបស់លោក នាថ្ងៃទី៣១ ខែមករា ឆ្នាំ២០២៥ លោក សរ សុពុត្រា លើកឡើងដូច្នេះថា«ខ្ញុំសុំការយោគយល់ និងអធ្យាស្រ័យពីពុកម៉ែ ពូមីង បងប្អូនប្រជាពលរដ្ឋទាំងអស់ ព្រមទាំងមិត្តភ័ក្ត្រ និងញាតិសន្តានជិតឆ្ងាយ! ពាក់ព័ន្ធនឹងការស្នើសុំដីក្នុងកម្មវិធីផ្តល់ដី ការពារព្រៃ ដើម្បីរួមគ្នាអភិវឌ្ឍដោយចីរភាព នៅចំណុចអូរសែវ ភូមិហាងសាវ៉ាត ឃុំសាមឃួយ ស្រុកសេសាន ខេត្តស្ទឹងត្រែង»។

ភ្ជាប់គ្នានេះ អភិបាលខេត្តស្ទឹងត្រែង ក៏ផ្ដាំឱ្យប្រជាពលរដ្ឋបញ្ឈប់ការទាក់ទងផ្ទាល់មកលោក ដោយលោក អះអាងថា គ្មានដីជូនទេ ហើយក្នុងនាមលោក ជាអភិបាលខេត្ត ក៏មិនមានសិទ្ធិសម្រេចលើកិច្ចការនេះដែរ។ លោកអភិបាលខេត្ត បានលើកទឹកចិត្តអ្នកទាំងនោះអនុវត្តតាមស្មារតីនៃសេចក្តីប្រកាសព័ត៌មានរបស់លេខាធិការដ្ឋានគណៈកម្មាធិការជាតិដឹកនាំការអនុវត្តកម្មវិធីផ្តល់ដី ការពារព្រៃ ដើម្បីរួមគ្នាអភិវឌ្ឍដោយចីរភាព ដែលបានបញ្ជាក់ច្បាស់ពីកាលបរិច្ឆេទ និងទីកន្លែងទទួលពាក្យ-ដាក់ពាក្យ ព្រមទាំងនីតិវិធី និងលក្ខណៈវិនិច្ឆ័យដែលត្រូវផ្តល់ជូន។  

លោក សរ សុពុត្រា អភិបាលខេត្តស្ទឹងត្រែង បានសង្កត់ធ្ងន់ថា៖ «គ្មានអន្តរាគមន៍ គ្មានលើ-ក្រោម គ្មានក្នុង-ក្រៅ អ្នកប្រព្រឹត្តបំពាន នឹងទទួលខុសត្រូវចំពោះមុខច្បាប់»។

គួរជម្រាបថា ថ្មីៗនេះ រាជរដ្ឋាភិបាល​នីតិកាលទី៧ ក្រោមការដឹកនាំរបស់សម្តេចធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា បានប្រកាសដាក់ឱ្យដំណើរការកម្មវិធីផ្តល់ដី ការពារព្រៃ ដើម្បីរួមគ្នាអភិវឌ្ឍដោយចីរភាព ក្នុងគោលបំណងបង្កើនការការពារ និងអភិរក្សធនធានធម្មជាតិប្រកបដោយចីរភាពសម្រាប់តជំនាន់ផង និងបង្កើនប្រសិទ្ធភាព ផលិតភាពនៃការប្រើប្រាស់ដីរដ្ឋផង តាមរយៈការផ្តល់ដីក្រោមទម្រង់សម្បទានដីសង្គមកិច្ចជូនប្រជាពលរដ្ឋក្រីក្រសម្រាប់សង់លំនៅឋាន និងក្រីក្រគ្មានដីសម្រាប់ធ្វើកសិកម្មជាលក្ខណៈគ្រួសារ និងគាំទ្រគម្រោងអភិវឌ្ឍសហគមន៍ ព្រមទាំងការពារព្រៃនៅជិតទីតាំងផ្តល់ដីប្រកបដោយចីរភាព។

ជាដំណាក់កាលដំបូងនៃកម្មវិធីផ្ដល់ដី​នេះ រាជរដ្ឋាភិបាល បាន​កំណត់យកចំណុចអូរសែវ ភូមិហាសារ៉ាត ឃុំសាមឃួយ  ស្រុកសេសាន ខេត្តស្ទឹងត្រែង ជាទីតាំងជំហានទី១ ដោយគ្រោងផ្តល់ដីជូនប្រជាពលរដ្ឋក្រីក្រីគ្មានដីពិតប្រាកដ ហើយមានបំណងទៅរស់នៅទីតាំងនេះចំនួន ៥០០គ្រួសារ ដោយក្នុងមួយគ្រួសារ នឹងទទួលបានដីលំនៅឋាន និងដីកសិកម្មទំហំសរុប ៣ហិកតា។ 

តាមការអះអាងរបស់សម្ដេចធិបតី នាយករដ្ឋមន្ត្រី កម្មវិធីផ្ដល់ដីដល់ពលរដ្ឋក្រីក្រពិតប្រាកដ នឹងចាប់ផ្ដើមទទួលពាក្យពីពលរដ្ឋចាប់ពីខែកុម្ភៈ ដើម្បីផ្ដល់ដីជូនពលរដ្ឋក្រីក្រពិតប្រាកដ និងទប់ស្កាត់ការទន្ទ្រានដីរដ្ឋធ្វើជាកម្មសិទ្ធិឯកជន៕

អត្ថបទ៖ ធឿន វ៉ានសុង

The post កម្មវិធីផ្តល់ដី៖ អភិបាលខេត្តស្ទឹងត្រែងឱ្យបញ្ឈប់ការទាក់ទងសុំដីពីលោក ព្រោះលោកគ្មានសិទ្ធិសម្រេចទេ appeared first on Kampuchea Thmey Daily.

​

សេចក្ដីប្រកាសព័ត៌មាន ស្តីពីដំណើរការអនុវត្តកម្មវិធីផ្តល់ដីការពារព្រៃ ដើម្បីរួមគ្នាអភិវឌ្ឍដោយចីរភាព ចេញនៅថ្ងៃទី២៩ ខែមករា សរសេបញ្ជាក់ពីនិតិវិធីស្នើសុំដីដូច្នេះ៖«ការរើសបុគ្គលមានសិទ្ធិទទួលដី ដោយផ្សព្វផ្សាយជូនដំណឹងរយៈពេល៣០ថ្ងៃនិងដាក់ពាក្យរយៈពេល២០ថ្ងៃ នៅសាលាឃុំ/សង្កាត់ សាមីខ្លួនរស់នៅអចិន្ត្រៃយ៍(ចាប់ទទួលពាក្យចាប់តាំងពីថ្ងៃផ្សព្វផ្សាយពីថ្ងៃទី១ ខែកុម្ភ: ២០២៥)។ សាមីជនត្រូវធ្វើលិខិតស្វ័យប្រកាសដាក់ពាក្យ ហើយរដ្ឋបាលឃុំ/ សង្កាត់បញ្ជាក់ទទួលស្គាល់។ រដ្ឋបាលឃុំ/សង្កាត់ រៀបចំក្រុមការងារចំពោះកិច្ច ដើម្បីរៀបចំលក្ខណៈវិនិច្ឆ័យ និងមូលដ្ឋានពិន្ទុ ដើម្បីឆ្លុះបញ្ចាំងភាពសមស្របក្នុងការជ្រើសរើសបុគ្គលមានសិទ្ធិទទួលដី»។

សេចក្ដីប្រកាសព័ត៌មាន ឱ្យដឹងថា  សម្រាប់ដំណាក់កាលពិនិត្យភាពសមស្រប គឺមានរយៈពេល៧២ថ្ងៃ ក្នុងនោះក្រុមការងារចំពោះកិច្ចឆ្លុះបញ្ចាំងភាពសមស្របផ្នែកលើលក្ខណៈវិនិច្ឆ័យនិងតារាងពិន្ទុដែលបានរួមគ្នារៀបចំរួច រៀបបញ្ជីតាមលំដាប់អាទិភាពនៃកម្រិតក្រីក្រ កំណត់ហេតុ និងរបាយការណ៍ រួចបញ្ជូនឯកសារទាំងនោះតាមរយៈ ក្រុង/ស្រុក/ខណ្ឌ រាជធានី/ខេត្ត មកលេខាធិការដ្ឋាន បូកសរុបរៀបចំកំណត់ហេតុនិងរបាយការណ៍លើបញ្ជីឈ្មោះបុគ្គលមានសិទ្ទទួលដី គោរពជូនគណៈកម្មាធិការ ជាតិពិនិត្យនិងសម្រេច។

តាមសេចក្ដីប្រកាសព័ត៌មាន ចំពោះដំណាក់កាលពិនិត្យ សម្រេច និងផ្តល់សុពលភាពលើ (១) បុគ្គលមានសិទ្ធិទទួលដីនិងបុគ្គលអាចមានសិទ្ធិទទួលដីបន្ទាប់ (២)ផែនការប្រើប្រាស់ដី (៣)ផែនការហេដ្ឋារចនាសម្ព័ន្ធរូបវ័ន្ត និង (៤)ផែនការបែងចែកដីឡូតិ៍ នឹងលម្អិតដោយគណៈកម្មាធិការជាតិដឹកនាំអនុវត្តកម្មវិធីផ្តល់ដី ការពារព្រៃរដើម្បីរួមគ្នាអភិវឌ្ឍដោយចីរភាព(ផ.ក.អ.) ។

សម្រាប់ដំណាក់កាលផ្តល់ដី ការពារព្រៃ និងការអភិវឌ្ឍន៍ ក្រោយមានការសម្រេចរបស់គណៈកម្មាធិការជាតិរួច លេខាធិការដ្ឋាន នឹងជូនដំណឹងដល់បុគ្គលមានសិទ្ធិទទួលដី ដើម្បីមកចាប់ឆ្នោតយកដី ហើយចុះកិច្ចសន្យា ព្រមទាំងបញ្ចូល ព័ត៌មានទៅក្នុងប្រព័ន្ធគ្រប់គ្រងទិន្នន័យឌីជីថល។ រៀបចំពិធីប្រគល់ដីឡូតិ៍ និងផ្តល់បណ្ណសិទ្ធិកាន់កាប់ប្រើប្រាស់ ដីនៃកម្មវិធី។ ចំណែកឯការចូលតាំងទីលំនៅ ដោយរៀបចំបន្ថែមនូវហេដ្ឋារចនាសម្ព័ន្ធចាំបាច់ ហើយរៀបចំអភិវឌ្ឍ សហគមន៍ឱ្យមាននិរន្តរភាព ដោយ(១) មានយន្តការគ្រប់គ្រង ថែទាំ គាំពារ តម្រង់ទិសជាប្រចាំ (២) លើកកម្ពស់ សុខភាពអនាម័យ ហូបស្អាត ផឹកស្អាត ហាត់ប្រាណ សម្រាក សម្រាន្តទៀងទាត់ គ្រប់គ្រាន់ (៣) លើកកម្ពស់ សមត្ថភាពគំនិតដោយបណ្តុះបណ្តាល និងប្រតិបត្តិ ផ្លាស់ប្តូរផ្នត់គំនិតពីអវិជ្ជមានទៅវិជ្ជមាន មិនខ្ជិល មិនខ្ចីខ្ជា មិនខ្ជះខ្ជាយ សន្សំសំចៃ ឧស្សាហ៍ព្យាយាម ជឿជាក់លើខ្លួនឯង ចេះជួយ ខ្លួនឯង និងជួយអ្នកដទៃ មានគំនិត សហគមន៍ មានភាពជាអ្នកដឹកនាំ ជាអ្នកគ្រប់គ្រង ជាធុរជន… (៤) លើកកម្ពស់កម្រិតជីវភាពតាមរយៈការបង្កើននូវសមត្ថភាពជំនាញតាមស្ថានភាពតម្រូវ លើកកម្ពស់ការបង្កបង្កើនផល ចូលរួមជម្រុញការអភិវឌ្ឍសេដ្ឋកិច្ចក្នុង ភាពជាដៃគូរជាមួយវិស័យឯកជនដោយពឹងកម្លាំងគ្នា ចែករំលែកទីផ្សារ បច្ចេកវិទ្យា ចំណេះដឹង ចំណេះធ្វើ ដោយ គោរពគ្នាទៅវិញទៅមកនិងទទួលផលប្រយោជន៍ពីការការពារនិងដាំព្រៃឡើងវិញ។

គួរឱ្យដឹងថា ជាជំហានទី១ នៅក្នុងកម្មវិធីផ្ដល់ដី ការពារព្រៃឈើ ដើម្បីការអភិវឌ្ឍដោយចីរភាពពលរដ្ឋដែលក្រីក្រពិតប្រាកដ ក្នុង១គ្រួសារ នឹងទទួលបានដីកសិកម្មទំហំ៣ហិកតា បើសិនជាព្រមទៅរស់នៅក្នុងភូមិឃុំសាមហួយ ស្រុកសេសាន ខេត្តស្ទឹងត្រែង ដែលជំហានទីមួយនេះ គឺកំណត់ត្រឹមចំនួន៥០០គ្រួសារសិន ចំណែកជំហានបន្ទាប់ នឹងផ្ដល់ជូន៥០០គ្រួសារបន្ថែមទៀត។តំបន់នេះ មានទំហំជិត ១០ ០០០ហិកតា ស្ថិតនៅជាប់ទីតាំងគម្រោង ដីសម្បទានសង្គមកិច្ច។

រាជរដ្ឋាភិបាលនីតិកាលទី៧នៃរដ្ឋសភា ដឹកនាំដោយ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីកម្ពុជា ដាក់ឱ្យដំណើរការ “កម្មវិធីផ្តល់ដី ការពារព្រៃដើម្បីរួមគ្នារអភិវឌ្ឍដោយចីរភាព” ក្នុងគោលបំណងបង្កើនការការពារ និងអភិរក្សធនធានធម្មជាតិប្រកបដោយចីរភាពសម្រាប់កូនចៅតជំនាន់ផង និងបង្កើនប្រសិទ្ធភាព ផលិតភាពនៃ ការប្រើប្រាស់ដីរដ្ឋផង តាមរយៈការផ្តល់ដីក្រោមទម្រង់សម្បទានដីសង្គមកិច្ចជូនប្រជាពលរដ្ឋក្រីក្រគ្មានដីសម្រាប់ សង់លំនៅឋាននិងក្រីក្រគ្មានដីសម្រាប់ធ្វើកសិកម្មជាលក្ខណៈគ្រួសារ និងគាំទ្រគម្រោងអភិវឌ្ឍសហគមន៍ ព្រមទាំងការពារព្រៃនៅជិតទីតាំងផ្តល់ដីប្រកបដោយចីរភាព។ កម្មវិធីនេះផ្តួចផ្តើមដោយសម្តេចមហាបវរធិបតី នាយករដ្ឋមន្ត្រីដែលនឹងផ្តល់ដីនៅក្នុងតំបន់មួយចំនួនដល់អ្នកក្រីក្រគ្មានដីពិតប្រាកដ ប្រកបដោយសមធម៌ដើម្បីរួមគ្នាកសាងសហគមន៍ក្នុងការប្រើប្រាស់ អាស្រ័យផល និងការការពារព្រៃនិងដីរដ្ឋសម្រាប់ការអភិវឌ្ឍដោយចីរភាព។

សម្រាប់ព័ត៌មានបន្ថែម សូមទំនាក់ទំនងមកលេខាធិការដ្ឋានតាមរយៈទូរស័ព្ទ Hotline 1255 (ដោយឥត គិតថ្លៃ) នៅរៀងរាល់ម៉ោងធ្វើការ ឆានែលតេឡេក្រាម៖ https://bit.ly/secpka និងផេកហ្វេសប៊ុកផ្លូវការ÷ លេខាធិការដ្ឋាន ផ.ក.អ៕

The post កម្មវិធីចែកដី៣ហិកតានៅខេត្តស្ទឹងត្រែង៖ ពលរដ្ឋ ត្រូវដាក់ពាក្យស្នើសុំដីតាមរយៈសាលាឃុំ ពីដើមខែកុម្ភៈទៅ appeared first on Kampuchea Thmey Daily.