​

លោក ស សារិន ថ្លែង​ថា ​ការ​ធ្វើ​ដំណើរ​ចេញ​ក្រៅ​ប្រទេស​នា​កំឡុង​ចូលឆ្នាំ​ខ្មែរ​​ខាង​មុខ​នេះ​ជា​ទូទៅ​កើត​មាន​ឡើង​ជា​រៀង​រាល់​ឆ្នាំ​ស្រប​ពេល​ប្រជាពលរដ្ឋ​មាន​ពេល​ទំនេរ​ផង​ ដែល​ភ្ញៀវ​ទេសចរ​តែងតែ​រើស​យក​ពេល​នេះ ក្នុង​រយៈ​ពេលមួយសប្ដាហ៍ ឬ​លើស​មួយ​សប្ដាហ៍ ដើម្បីធ្វើដំណើរកម្សាន្ត​។

លោក​ថា៖ «ឆ្នាំ​នេះ តាម​ការ​ប៉ាន់​ស្មាន​របស់​ខ្ញុំ ចំនួន​ភ្ញៀវ​ទេសចរណ៍ មិន​ក្រោម​ ៥ម៉ឺន​នាក់​នោះ​ទេ​ដែល​នឹង​ធ្វើ​ដំណើរ​ទៅ​លេង​ក្រៅ​ប្រទេស​ក្នុង​ចន្លោះ​ពេល​ចូលឆ្នាំ​ខ្មែរ ដែល​ក្នុង​ចំណោម​​នោះ យើង​សង្កេត​ឃើញ​មាន​លក្ខណៈ​ក្រុម​តូចៗផង​ចន្លោះ​ពី ២-៣ ឬ​លក្ខណៈ​គ្រួសារ​ និង​ជា​ក្រុម​ខ្លះ អាច​មាន​ដល់ ១០​នាក់ ឬ​ ៥០ នាក់​»។

លោក​ក៏​បាន​បន្ថែម​ថា​ ការ​ធ្វើ​ដំណើរ​នោះ​ភាគ​ច្រើន គឺ​ទៅ​តាម​ផ្លូវ​គោក និង​ផ្លូវ​អាកាស​ ដោយ​តាម​ផ្លូវ​គោក ​អាច​មាន​ទៅ​វៀតណាម​ ថៃ និង​ប្រទេស​ឡាវ មួយ​ចំនួន​ផង​ដែរ​។

លោក ស សារិន បន្ថែមថា៖ «មែន​ទែន​ទៅ​សម្រាប់​ការ​ធ្វើ​ដំណើរ​ទៅ​ក្រៅ​ប្រទេស​នេះ ​ដោយ​សារ​ប្រជាពលរដ្ឋ​កម្ពុជា​យើង​​មាន​ថវិកា​គ្រប់​គ្រាន់​នៅ​ក្នុង​ការ​ធ្វើ​ដំណើរ​។ ឧទាហរណ៍​ការ​ធ្វើ​ដំណើរ​ទៅ​កាន់​ប្រទេស​ជិត​ខាង ពលរដ្ឋ​អាច​ចាយ​នៅ​ក្នុង​កម្រិត​ទាប​មួយ​ ឬភ្ញៀវទេសចរខ្លះ​ទៀត អាច​ចំណាយ​ក្នុង​កម្រិត​មួយ​ផ្សេង​ទៀត​ដែល​ឈាន​ដល់​ប្រទេស កូរ៉េ ជប៉ុន ជា​ដើម​»។

លោក​ ​បាន​បញ្ជាក់​ដែរ​ថា ឆ្នាំនេះ គោលដៅ​ទេសចរណ៍​ដែល​មាន​ការ​កក់​ទៅ​លេង​ច្រើន​ជាង​គេ មាន​ដូច​ជា ប្រទេស​ វៀតណាម ថៃ ម៉ាឡេស៊ី សិង្ហបុរី និង​ការ​កក់​មួយ​ចំនួន​ហោះ​ទៅ​ដល់​កូរ៉េ ជប៉ុន តៃវ៉ាន់ ឌូបៃ និង​ខាង​ប៉ែក​អឺរ៉ុប​ផង​ដែរ​។

ទន្ទឹម​នឹង​ការ​រីក​ដុះ​ដាល​នៃ​ការ​ធ្វើ​ដំណើរ​ចេញ​ទៅ​ក្រៅ​ប្រទេស​នេះ​ដែរ លោក ស សារិន បានបន្ថែមថា កម្ពុជា​ក៏​ព្យាយាម​បង្កើត​ផលិត​ផល​ទេសចរណ៍​នៅ​ក្នុង​ស្រុក​បន្ថែម​ទៀត ​ដើម្បី​ឱ្យ​ពលរដ្ឋ​កម្ពុជា​អាច​ធ្វើ​ដំណើរ​ទៅ​ទស្សនា​តំបន់​ទេសចរណ៍​​ក្នុង​ស្រុក។

ជាក់ស្តែង ប្រសិន​ការ​ធ្វើ​ដំណើរ​ចេញ​ក្រៅ​ស្រុក​មាន​ច្រើន នោះ​យើង​អាច​មើល​ឃើញ​ជាក់ច្បាស់​ថា​ការ​ចំណាយ​គឺ​ចេញ​ទៅ​ក្រៅ​ប្រទេស​ ប៉ុន្តែ​យើង​ចង់​ជំរុញ​ថា​ការ​ធ្វើ​ដំណើរ​នៅ​ក្នុងស្រុក​ក៏​ជា​គោលដៅ​ទេសចរណ៍​មួយ​ ដូច្នេះ​នៅ​ក្នុង​ករណី​ថា​ការ​ធ្វើ​ដំណើរ​ក្នុង​ស្រុក​មាន​ការ​កើន​ឡើង​នោះ​ចំណូល​របស់​ពលរដ្ឋ​ក្នុង​ស្រុក​ក៏​មាន​ការ​កើន​ឡើង​ និង​ជួយ​ឱ្យ​លំហូរ​សាច់​ប្រាក់​ក្នុង​ប្រទេស​មាន​ការ​កើន​ឡើង​ដូចគ្នា​ដែរ​។

បើតាមលោក​ ស សារិន នៅ​ដើម​ឆ្នាំ​២០២៥ នេះ​ការ​ធ្វើ​ដំណើរ​​មាន​រីក​ផុលផុស​គួរឱ្យកត់សម្គាល់​ ប៉ុន្តែ​ក្នុង​ចំណោម​អ្នក​ដែល​ធ្វើ​ដំណើរ​យើង​សង្កេត​ឃើញ​ថា​មាន​ ៤០%​ ជា​អតិថិជន​ចាស់​ ដែល​ធ្លាប់​ធ្វើ​ដំណើរ​​ម្តង​រួច​ទៅ​ហើយ ប៉ុន្តែ​លើក​នេះ​ក្នុង​គោលដៅ​ផ្សេង​។

ដោយ​ឡែក ប្រហែល ៦០% គឺ​ជា​អតិថិជន​ថ្មី​​ ដែល​ភាគ​ច្រើន​ធ្វើ​ដំណើរ​ទៅ​ក្រៅ​ប្រទេស​ជា​លើក​ទី​១ ទៅ​កាន់​ប្រទេស​ជិត​ៗ ដូច​ជា ថៃ​ ឡាវ វៀតណាម សិង្ហបុរី ជា​ដើម​៕

The post ទេសចរកម្ពុជាប្រមាណ ៥ ម៉ឺននាក់ ចេញទៅក្រៅប្រទេសក្នុងឱកាសបុណ្យចូលឆ្នាំខ្មែរ appeared first on Kampuchea Thmey Daily.

លោក ប៉ែន បូណា ថ្លែងថា៖«ខ្ញុំសូមគូសបញ្ជាក់ជូនបងប្អូនអ្នកសារព័ត៌មាន និងប្រជាពលរដ្ឋទូទាំងប្រទេសឱ្យបានជ្រាបថា ដំណើរកម្សាន្តនេះ(ដំណើរកម្សាន្តរបស់ប្រជាពលរដ្ឋទៅកាន់ភូមិភាគឥសាន) ទទួលបានជោគជ័យ​ធំធេងណាស់ស្របតាមគោលដៅដែលបានគ្រោងទុក»។

លោក ប៉ែន បូណា ហ៊ានវាយតម្លៃថា ដំណើរកម្សាន្តរបស់ប្រជាពលរដ្ឋទៅកាន់ភូមិភាគឥសាន ទទួលបានជោគជ័យធំធេង ក៏ព្រោះតែលោក សំអាងថា ប្រជាពលរដ្ឋដែលបានចូលរួមដំណើរកម្សាន្តនេះបានយល់ច្បាស់ស្រឡះក្នុងចិត្តអំពីរឿងព្រំដែន ដែលកាលពីមុន​ដែលពេលពួកគាត់មិនទាន់បាន​ទៅមើលជាក់ស្តែង និងមិនទាន់បានយល់ពីការងាររបស់រាជរដ្ឋាភិបាល ពលរដ្ឋអាចជឿ ឬមានមន្ទិលសង្ស័យ​ដែរនៅពេល​មានការឃោសនាភូតកុហកថា បង្គោលព្រំដែនចេះដើរ បង្គោលព្រំដែនត្រូវបានប្រទេសជិតខាងលួចបង្ខិតជារៀងរាល់ថ្ងៃ ឬថា ថ្នាក់ដឹកនាំ កាត់ទឹកដីឱ្យប្រទេសជិតខាងជាដើម។

តាមលោក ប៉ែន បូណា នៅពេលដែលប្រជាពលរដ្ឋបានទៅឃើញផ្ទាល់ភ្នែកនូវ​បង្គោលព្រំដែន ផ្លូវក្រវ៉ាត់ព្រំដែន ប៉ុស្តិ៍​នគរបាលវីរៈការពារព្រំដែន និងជីវភាពប្រជាពលរដ្ឋនៅតាមបណ្តោយព្រំដែន ជាពិសេសសុខសន្តិភាព និងសុវត្ថិភាពពេញលេញ​នៅតាម​ខ្សែបន្ទាត់ព្រំដែន ពួកគាត់ស្វាងចែសតែម្តង និងបានយល់ច្បាស់ពីយុទ្ធសាស្ត្រការពារបូរណភាពទឹកដីរបស់រាជរដ្ឋាភិបាល ដែលធ្វើឱ្យការឃោសនា​ភូតកុហកនានា​សាបរលាប​ទាំងស្រុង។ នេះហើយជាជោគជ័យ និងជាគោលដៅដែលសម្តេចធិបតី នាយករដ្ឋមន្ត្រីលោកចង់បាន។

សូមរម្លឹកឡើងវិញថា ក្នុងពេលដែលមជ្ឈដ្ឋានមួយចំនួន បានឡើងឡើងថា រដ្ឋាភិបាលកម្ពុជា កាត់ដីនៅភូមិភាគឥសានឱ្យទៅប្រទេសដទៃ បង្គោលព្រំដែនចេះដើរ នៅព្រំដែនមានជនជាតិដទៃឆ្លងចូលមករស់នៅដោយខុសច្បាប់ ភូមិភាគឥសានគ្មានការអភិវឌ្ឍ សម្ដេចធិបតី ហ៊ុន ម៉ាណែត នៅថ្ងៃទី២២ ខែសីហា ឆ្នាំ២០២៤  បានប្រកាសរៀបចំដំណើរកម្សាន្តរបស់ប្រជាពលរដ្ឋទៅកាន់ភូមិភាគឥសានដើម្បីស្វែងយល់ពីបង្គោលព្រំដែន ផ្លូវក្រវ៉ាត់ព្រំដែន និងបានឃើញពីការអភិវឌ្ឍន៍ និងជីវភាពជាក់ស្តែងរបស់​ប្រជពលរដ្ឋនៅតាមបណ្តោយព្រំដែនទាំងជាមួយ​វៀតណាម និងជាមួយឡាវ​។

ដំណើរកម្សាន្តនេះចាប់ផ្តើមកាលពីដើមខែកញ្ញា និងផ្តល់ជូនដោយសម្តេចធិបតីនាយករដ្ឋមន្ត្រីនិងលោកជំទាវបណ្ឌិតពេជ្រ ច័ន្ទមុន្នី ដោយផ្ទាល់ដោយមានការចូលរួមពីសម្បុរសជនជាច្រើន ហើយ​ដោយមិនប្រើប្រាស់ថវិកាជាតិ ឬថវិកាដែលប្រជាពលរដ្ឋបរិច្ចាគតាមរយៈមូលនិធិ​កសាងហេដ្ឋារចនាសម្ព័ន្ធព្រំដែន​នោះឡើយ។កម្មវិធីដំណើរកម្សាន្តនេះ គ្រោងនឹងបិទបញ្ចប់នៅដំណាច់ឆ្នាំ ២០២៤ នេះ៕

ដោយ៖ ង៉ិល ណារ៉ាត់

The post លោក ប៉ែន បូណា៖ កម្មវិធីនាំពលរដ្ឋទៅមើលការពិតនៅព្រំដែនទទួលបានជោគជ័យធំធេង ដូចការគ្រោងទុក appeared first on Kampuchea Thmey Daily.

ប្រជាពលរដ្ឋសប្បាយរីករាយ និងគាំទ្រចំពោះការបង្កើតដំណើរកម្សាន្តសម្រាប់ពួកគាត់ អាចមានការឱកាសក្នុងការទៅទេសចរណ៍កម្សាន្តផង ក៏ជាផ្នែកមួយអាចឱ្យពួកគាត់បានមើលឃើញពីទិដ្ឋភាពពិតជាក់ស្តែងលើភាពរីកចម្រើននៅតំបន់ខេត្តជាប់ព្រំដែន។

ពលរដ្ឋបន្ថែមថា ការផ្តល់ដំណើរកម្សាន្តនេះ គឺជាចេតនាមួយដែលរាជរដ្ឋាភិបាលចង់ឱ្យប្រជាពលរដ្ឋរបស់ខ្លួនបានទៅមើលឃើញពិតជាក់ស្តែងថា កម្ពុជាមិនបានកាត់ទឹកដីរបស់ខ្លួនឱ្យប្រទេសជាតិសាសន៍ណានោះឡើយ ។

សូមបញ្ជាក់ថា ការផ្តល់ដំណើរកម្សាន្តឥតគិតថ្លៃរបស់រាជរដ្ឋាភិបាលនេះ នឹងធ្វើឡើងចាប់ពីថ្ងៃទី៧ ខែកញ្ញា ឆ្នាំ២០២៤​តទៅ ដោយធ្វើឡើងតែនៅរៀងរាល់ចុងសប្តាហ៍តែប៉ុណ្ណោះ។ ការផ្តល់ជូននេះ គឺនឹងផ្តល់ជូនដល់ដំណាច់ឆ្នាំ២០២៤តែម្តង ។ ចំពោះការចុះឈ្មោះ គឺពលរដ្ឋអាចចុះឈ្មោះតាមប្រព័ន្ធអនឡាយ ( QR ) ដែលក្រសួងព័ត៌មានបានរៀបចំ ហើយរាល់ដំណើរកម្សាន្តក្នុងមួយលើក គឺនឹងផ្តល់ជូនតែ២០០នាក់ប៉ុណ្ណោះ៕

អត្ថបទ៖ សុភា

The post ការផ្តល់ដំណើរកម្សាន្តទៅភូមិភាគឦសាន ជាឱកាសសម្រាប់ពលរដ្ឋបានឃើញវឌ្ឍនភាពអភិវឌ្ឍន៍នៅតំបន់នោះ appeared first on Kampuchea Thmey Daily.

១. ការលេងទឹក
– លេងទឹកជ្រោះ
រឿងចម្បងទីមួយ មុននឹងសម្រេចចិត្តមកលេងតំបន់ទឹកធ្លាក់ ត្រូវដឹងពីស្ថានភាពអាកាសធាតុ ព្រោះតំបន់ទឹកធ្លាក់ មាន​ហានិភ័យ​នៃគ្រោះថ្នាក់ខ្លាំង។ បើតាមបទពិសោធន៍អ្នកប្រកបរបរក្បែរតំបន់ទឹកធ្លាក់ កត់សម្គាល់ឃើញថា រាល់ពេល​ ដែលមេឃចាំផ្តើមស្រទុំ ទឹកមិនដឹងមកពីណា គឺមកជាគំហុកតែម្តង ពិសេសច្រើនកើតមានឡើងក្នុង​អំឡុង​រដូវ​ភ្លៀង​ធ្លាក់ តែម្តង។ ស្ថានភាពភ្លាមៗនេះ ជារឿងដែលមិនអាចស្មានដឹងមុនឡើយ ហេតុនេះ ដើម្បីសុវត្ថិភាព គប្បីកុំលេងឆ្ងាយពីច្រាំងពេក។

មួយវិញទៀត ដើម្បីសុវត្ថិភាពខ្ពស់ពេលលេងទឹក ត្រូវលេងនៅម្តំណាដែលផុតពីល្បាក់ចំណោតដែលទឹកហូរចុះ ព្រោះត្រង់ចំណុចនោះ ហូរ​ខ្លាំង អាចឱ្យយើងបាត់ជំហរហូរទៅជាមួយទឹក។ កំណត់ចំណាំមួយ យើងអាចមើលដឹងពី​កន្លែងដែល​ស្ថានភាព​ទឹក​មិនគួរលេង កន្លែងណាដែលមានទឹកបែកពពុះសៗ ត្រង់នោះហើយ ជាកន្លែងដែលមានកម្លាំងទឹក​ខ្លាំង ហេតុនេះ គួរលេង​នៅកន្លែង​ណា​ដែលចរន្តទឹកមិនសូវខ្លាំង។ អ្វីដែលគួរប្រុងប្រយ័ត្នមួយទៀតនោះ គឺពេលដើរលើថ្ម ប្រយ័ត្នរអិល ព្រោះកន្លែងដែលមិនសូវមានទឹកហូរខ្លាំង ច្រើនមានស្លែរកាន់។

– លេងទឹកសមុទ្រ
ការលេងទឹក​ មិនមានជាបញ្ហាចោទទេ បើសិនអាកាសធាតុអំណោយផល និងរលកតូចៗ​ តែប្រសិនជាស្ថានភាពអាកាសធាតុមិនល្អ រលកបោកបក់ធំៗ ពុំគួរលេងឡើយ។ រដូវវស្សា ជាពេលដែលឧស្សាហ៍មានភ្លៀង ខ្យល់ និងរលកខ្លាំង ដូច្នេះបើ​សិន​ជា​ចង់​លេង​ទឹក​កម្សាន្ត គប្បីមាន​ការ​ប្រុងប្រយ័ត្ន​ខ្ពស់ ត្រូវ​មាន​អាវពោងសុវត្ថិភាព (បើអាច) ហើយកុំចូលទៅកន្លែងជ្រៅ ពិសេសនៅពេលដែលមានរលកបោកបក់ខ្លាំង ព្រោះថានៅពេលកម្លាំងទឹកបោកខ្លាំង នឹងធ្វើឱ្យយើងបាត់ជំហរ​បា​ន​ដោយងាយ។

គួរកត់ចំណាំថា កម្លាំងរលកមិនបានច្រាន យើងទៅច្រាំងភ្លាមៗនោះទេ វាអាចទាញយើងឱ្យចូលទៅកន្លែងកាន់តែជ្រៅ​ ពិបាកសង្គ្រោះ។ លើសពីនេះ ដាច់ខាតកុំលេង​ទឹក​ក្រៅពោងសញ្ញា ដែលអជ្ញាធរដាក់ពង្រាយក្នុងទឹកក្បែរឆ្នេរឱ្យសោះ។

២. ដើរព្រៃខែភ្លៀង
ការដើររុកព្រៃ បោះតង់ លក្ខណៈដំណើរផ្សងព្រេង ជារឿងពេញនិយមខ្លាំងណាស់ សម្រាប់កម្ពុជានាពេលបច្ចុប្បន្ន ប៉ុន្តែក្នុងអំឡុងខែដែលមានភ្លៀងធ្លាក់​ ដំណើរកម្សាន្តទៅកាន់តំបន់ព្រៃ អាចកើតមានគ្រោះថ្នាក់ចៃដន្យមិននឹកស្មានដល់​ ពីកត្តា​ធម្មជាតិ​ដូចជា​ការបាក់​មែកឈើ ចំណោតផ្លូវរអិល ឬជំងឺគ្រុនចាញ់ជាដើម។ ជាទូទៅ​ អ្នកមានបទពិសោធន៍ មិនមានជាបញ្ហាចោទសម្រាប់ការកម្សាន្តប្រភេទនេះប៉ុន្មានទេ ប៉ុន្តែទោះជាយ៉ាងណា ការធ្វើដំណើរកម្សាន្តក្នុងព្រៃ នារដូវភ្លៀងធ្លាក់នេះ មានបញ្ហាប្រឈមច្រើន។

៣. ជិះទូកក្តោង
រឿងរ៉ាវដ៏សំខាន់ដែលត្រូវយកមកពិចារណានៅពេលជិះទូក គឺទិសដៅ និងកម្លាំងនៃខ្យល់។ ជាទូទៅ ខ្យល់ដែលល្អបំផុ តសម្រាប់ការជិះទូកគឺក្តោង គឺខ្យល់ដែលបក់ក្នុងទិសដៅថេរ និងមានកម្លាំងគ្រប់គ្រាន់ដើម្បីរុញទូក ដោយមិនបង្កគ្រោះថ្នាក់ដល់អ្នកជិះ។

៤. ដំណើរកម្សាន្តនៅតំបន់កោះ
ទៅលេងតំបន់កោះ ដោយមិនបានមើលពីការព្យាករណ៍អាកាសធាតុ ដោយប្រថុយៗស្មានៗ​ ជារឿងដែលគ្រោះថ្នាក់បំផុត ព្រោះថា​ ការធ្វើដំណើរទៅកាន់តំបន់កោះក្នុងអំឡុងខែនេះ អាចមានបញ្ហាដែលមិនអាចទាយទុក កើតឡើង ពិសេសអំឡុងពេលមានភ្លៀងធ្លាក់ ខ្យល់ខ្លាំង ធ្វើឱ្យរលកធំៗ។ ហេតុនេះ ទាមទារឱ្យមុននឹងធ្វើដំណើរទៅកាន់តំបន់កោះ ដាច់ខាត កុំមើលរំលងសេចក្តីជូនដំណឹង ព្រោះសេចក្តីជូនដំណឹងនេះ ជាមគ្គទេសក៍សុវត្ថិភាពចម្បងទី១ ដែលជួយយើងបានដឹង ពីស្ថានភាពគ្រោះថ្នាក់បានមុនពេល និងជួយឱ្យសម្រេចចិត្តបានត្រឹមត្រូវ ពីពេលវេលាដែលអាចទៅលេងតំបន់កោះបាន ឬក៏អត់។

៥. មុជទឹកមើលជីវៈចម្រុះបាតសមុទ្រ និងជិះទូកនេសាទសត្វសមុទ្រ
ការកម្សាន្តបែបនេះ មានការពេញនិយមណាស់ ប៉ុន្តែបើសិនជាស្ថិតក្នុងអំឡុងរដូវវស្សា គួរស្វែងយល់ពីស្ថានភាពអាកាសធាតុជាមុនសិន ព្រោះតំបន់សមុទ្រនៅរដូវកាលនេះ ងាយភ្លៀងធ្លាក់ណាស់៕

The post សកម្មភាព ៥ គួរពិចារណា ពេលមានដំណើរកម្សាន្តក្នុងរដូវភ្លៀង appeared first on Kampuchea Thmey Daily.

ការធ្វើដំណើរកម្សាន្តនៅរដូវនេះ អាចមានហានិភ័យបន្តិចនៅតំបន់ខ្លះ តែយ៉ាងណា កម្ពុជាក៏មិនខ្វះកន្លែងដើរលេងដែរ ដូចជានៅតំបន់ភ្នំ និងរមណីយដ្ឋាន មានសុវត្ថិភាពខ្ពស់សម្រាប់ការធ្វើដំណើរកម្សាន្ត បើទោះបីជាអាកាសធាតុ មិនអំណោយ​ផលក៏ដោយ។ ដូចនេះ កម្ពុជាថ្មី សូមចែករំលែក ៧កន្លែង ដែលអាចឱ្យយើងកម្សាន្តបាន​ដោយមិនបាច់ភ័យ។

១. ភ្នំខ្នងផ្សារ
ខ្នងផ្សារ ជាកន្លែងដែលទេសចរមិនមើលរំលងឡើយ ក៏ព្រោះតែ​ទីនេះ មានទេសភាពស្អាតខ្លាំង ពិសេសនៅរដូវវស្សា។
នៅពេលដែលយើងឡើងដល់កំពូលភ្នំ យើងនឹងអាចគយគនវាលស្មៅស្រស់បំព្រងបៃតងខ្ចីនារដូវវស្សា កម្សាន្តបែបដំណើរផ្សងព្រេង បោះតង់ មើលថ្ងៃរះនាព្រឹកព្រលឹមស្រាងៗ ទិដ្ឋភាពថ្ងៃអស្តង្គតនាពេលល្ងាច សោយសុខនឹងធម្មជាតិ។ រមណីយដ្ឋានធម្មជាតិខ្នងផ្សារ ជាតំបន់ព្រៃភ្នំដ៏ធំមួយដែលស្ថិតនៅក្នុងភូមិតាំងបំពង តំបន់រលាក់កងជើង ឃុំតាសាល ស្រុកឱរ៉ាល់ ខេត្តកំពង់ស្ពឺ​ ជាទីតាំងប្រសព្វមុំបីដែលផ្សាភ្ជាប់ខេត្តចំនួនបីគឺ កោះកុង កំពង់ស្ពឺ និងពោធិ៍សាត់។

២. មណ្ឌលគីរី
មណ្ឌលគីរី ត្រូវបានគេស្គាល់ថា ជាទឹកដីនៃភ្នំដែលក្រាលគ្របដោយរុក្ខជាតិ វាលស្មៅ និងព្រៃឈើចម្រុះជាប្លុកៗ​ ហើយទឹកដីនៃ​ខេត្ត​មួយនេះ តែងផ្តល់​ទស្សនីយភាព​គួរឱ្យចង់​គយគន់​គ្រប់​រដូវ។ នៅខែប្រាំងដែលធម្មជាតិ​ក្រៀម​ស្វិត យើងនឹងអាចមើលឃើញវាលស្មៅពណ៌មាស ដែលក្រាលគ្របប្រជុំភ្នំតូចៗ ជាចំណីអារម្មណ៍ម៉្យាង។ ប៉ុន្តែកាន់តែពិសេសទៀតនោះ គឺសម្រស់មណ្ឌលគិរីនារដូវវស្សានេះ ក៏ព្រោះតែអំឡុងពេលវេលាដែលមានភ្លៀងធ្លាក់ញឹកញាប់នេះ រុក្ខជាតិនឹង​លូត​លាស់​ឡើង​ បង្កើតបានជាទិដ្ឋភាពពណ៌បៃតងខៀវខ្ចី ផ្តល់នូវអារម្មណ៍ស្រស់ស្រាយ និងជំនួយដល់សុខភាពភ្នែកថែមទៀត។ ការធ្វើដំណើរកម្សាន្តមកកាន់ខេត្តទេសចរណ៍មួយនេះនារដូវភ្លៀងធ្លាក់ មិនសូវមានជាបញ្ហាចោទប៉ុន្មានទេ ក៏ព្រោះ​តែ​ទីនេះ មានកន្លែងកម្សាន្តលក្ខណៈធម្មជាតិច្រើន បើទោះជាមានបញ្ហាអាកាសធាតុក៏ដោយ។

៣. ភ្នំ ១៥០០
ភ្នំ ១៥០០ ស្ថិតនៅស្រុកវាលវែង ខេត្តពោធិ៍សាត់ ទឹកដីនៃអតីតមូលដ្ឋានទ័ពរបស់កងកម្លាំងខ្មែរក្រហមកាន់កាប់ ហើយបច្ចុប្បន្ន​ជាប់​ឈ្មោះ​ជាស្រុក​ទេសចរណ៍​ដ៏​ល្បី និងមាន​ភាព​ទាក់​ទាញ​ខ្លាំង ដោយសារ​សម្រស់ដ៏​ស្រស់​ត្រកាលនៃព្រៃ​ភ្នំធម្មជាតិ ពិសេស​ផ្លូវ​អន្ទង់​អាំង​ឆ្ពោះ​ទៅ​កាន់​តំបន់​ទេសភាព ដែល​អាច​សម្រាក​កម្សាន្ត ស្នាក់នៅ និងបោះតង់បាន។ ជាទូទៅ ទេសចរដែលមកកម្សាន្ត តំបន់​ទេសចរណ៍​ធម្មជាតិ​មួយ​នេះ តែង​រក​ការ​ស្នាក់​នៅ​តាម​រីហ្សត ឬផ្ទះស្នាក់ នៅលើភ្នំ​តែ​ម្តង ហើយក្រៅនេះ សម្រាប់​អ្នក​និយម​ការ​ដើរ​លេង​បែប​ដំណើរ​ផ្សងព្រេង គេ​ច្រើន​ធ្វើ​​ដំណើរ​លក្ខណៈ​បោះតង់ នៅលើភ្នំទំព័រ (គួរស្វែងរកអ្នកស្រុកនាំផ្លូវ ព្រោះស្ថានភាពភ្នំនេះពិបាកឡើង និងងាយវង្វេង)។

៤. គីរីរម្យ
មិនថារដូវប្រាំង ឬវស្សា រមណីយដ្ឋានឧទ្យានជាតិ​ព្រះសុរាម្រិតកុសុមៈគិរីរម្យ ជាទីឋានដែលទេសចរជាតិមិនដែលរំលង ឡើយ ក៏ព្រោះតែទីនេះ ជាតំបន់ភ្នំធម្មជាតិមានដើមឈើធំៗ ទឹកធ្លាក់ និងកន្លែងកម្សាន្តច្រើន ហើយមានភាពងាយស្រួល ក្នុងការធ្វើដំណើរ ពិសេសចម្ងាយតែប្រមាណជាង ១០០គីឡម៉ែត្រ ពីភ្នំពេញប៉ុណ្ណោះ។ នៅទីនេះ​ គេនិយមការកម្សាន្ត​បែបបោះតង់ និងពិចនិកខ្លាំងបំផុត។​

៥. ភ្នំបូកគោ
ស្របពេលដែលមានភ្លៀងធ្លាក់ញឹកញាប់បែបនេះ ទេសភាពនៅលើកំពូលភ្នំបូកពិតជាអស្ចារ្យណាស់ ដោយសារតែភ្នំខ្ពស់ខ្លាំង ហើយរាល់ពេលដែលមេឃចង់ភ្លៀង ឬចាប់ផ្តើមរលឹមម្តងៗ ពពកចុះទាប បីដូចជាឋានសួគ៌លើដី អាចឱ្យយើង​ប៉ះ​ផ្ទាល់បាន។ ទិដ្ឋភាពបែបនេះ កើតមានតែពេលអាកាសធាតុត្រជាក់ខ្លាំង និងពេលរលឹមប៉ុណ្ណោះ។

៦. ភ្នំកំពង់ត្រាច
រមណីយដ្ឌានភ្នំថ្មដ៏ល្បីល្បាញនៃភាពស្រស់ស្អាតបែបធម្មជាតិ ភ្នំកំពង់ត្រាច ដែលស្ថិតនៅឃុំដំណាក់កន្ទួតខាងត្បូង ស្រុក​កំពង់ត្រាច ខេត្តកំពត ជា​កន្លែង​ដ៏​ពេញនិយម​សម្រាប់​ទេសចរជាតិ និងអន្តរជាតិ។ មកដល់ទីនេះ ទេសចរ​អាច​ងូតទឹកកម្សាន្តទឹកដែលនៅក្នុងរ៉ូងភ្នំ និងទស្សនាសិលាចរិកជាច្រើនក្នុងនោះ។ នៅពេលដែលយើងដើរចូលដល់ក្នុងល្អាងភ្នំ យើងនឹងសំឡេងសត្វយំ ទឹកធ្លាក់ និងរ៉ូងដើរទៅកាន់់ល្អាងតូចធំជាច្រើន។ នៅទីនោះ មានល្អាងមួយ មានវិជ្ជមាត្រប្រមាណ ៣០​ម៉ែត្រ ហើយដីនៅទីនោះ មានពណ៌៧ផ្សេងៗគ្នា។ ល្អាងខ្លះ មានកាំជណ្តើរឡើងកំពស់ប្រមាណ ៤ម៉ែត្រ ព្រមទាំងមានថ្មរចនានៃធម្មជាតិ មើលទៅរាងដូចជារូបសត្វ ឫវត្ថុ។ ចេញពីល្អាងនេះមានរូងមួយទៀត ដែលអាចធ្វើដំណើរបាន ឆ្ពោះទៅល្អាងវាលស្រែ ១០០ និងល្អាងថ្មដុះ។

៧. ទំនប់ប្រទក្សក្រឡា
ទំនប់ប្រទក្សក្រឡា ដែលមានចម្ងាយជាង១០គីឡូម៉ែត្រពីក្រុងកំពត ជារមណីយដ្ឋានធម្មជាតិ ដែលហ៊ុមព័ទ្ធ​​ដោយ​ទេសភាព​ដ៏​ស្រស់​ត្រកាល​នៃ​ភ្នំព័ទ្ធ​ជុំវិញ និងផ្ទៃទឹកប្រមាណ ៣០០០ហិកតា មានខួបប្រាំងខួបវស្សា មិនចេះរីងស្ងួតឡើយ។ នៅដូវភ្លៀងធ្លាក់នេះ នឹងធ្វើឱ្យទីឋានមួយនេះ​ កាន់តែស្រស់ស្អាត ក៏ព្រោះតែមានផ្ទៃទឹកធំល្វឹងល្វើយ អមដោយភ្នំមានរុក្ខជាតិដុះចម្រុះ ខៀវស្រងាត់ រំលេចលើ​សណ្ឋាន​ដី​គ្រួសក្រហម​ស្អាត​ពេក​ក្រៃ៕

The post ៧កន្លែង មានទេសភាពស្អាតបំផុតនៅរដូវវស្សា ដើរលេងដោយមិនបាច់ខ្វល់អាកាសធាតុ appeared first on Kampuchea Thmey Daily.

ក្រៅពីនេះ យើងត្រូវរឿងរ៉ាវមួយចំនួនទៀត នៅពេលទៅលេងកម្សាន្តតំបន់ទឹកធ្លាក់ ដើម្បីបង្កើនសុវត្ថិភាពផ្ទាល់ខ្លួន មិនគ្រោះថ្នាក់ដល់អាយុជីវិត។ កម្ពុជាថ្មីសូមចែករំលែកចំណេះដឹងមួយចំនួន នៅពេលទៅលេងតំបន់ទឹកធ្លាក់។

១. សញ្ញានៃការមកដល់របស់កម្លាំងទឹក
ជាទូទៅ ស្ថានភាពទឹកបុកគំហុកខ្លាំងបំផុត នៅពេលដែលមេឃជិតភ្លៀង ឬពេលល្ងាច។ បើតាមបទពិសោធន៍អ្នកប្រកប របរក្បែរតំបន់ទឹកធ្លាក់ កត់សម្គាល់ឃើញថា រាល់ពេលដែលមេឃចាំផ្តើមស្រទុំ ទឹកមិនដឹងមកពីណា មកជាគំហុកតែម្តង ពិសេសច្រើនកើតមានឡើងក្នុងអំឡុងរដូវភ្លៀងធ្លាក់តែម្តង។ ស្ថានភាពភ្លាមៗ ជារឿងដែលមិនអាចស្មានដឹងមុនឡើយ ហេតុនេះ ដើម្បីសុវត្ថិភាព គប្បីកុំលេងឆ្ងាយពីច្រាំងពេក។

២. គ្រោះថ្នាក់ចៃដន្យ
ធម្មតា ទឹកធ្លាក់ គឺជាតំបន់ជ្រលងភ្នំ ដែលមានដើមឈើធំតូចនៅហ៊ុំព័ទ្ទ លើកលែងតែតំបន់ទឹកធ្លាក់ ដំណាក់ក្រោមៗទេ ដែលមិនសម្បូរព្រៃក្រាស និងស្រួលលេង។ បើទោះជាករណីកម្រ ប៉ុន្តែការលេងកម្សាន្តទឹកធ្លាក់នៅរដូវភ្លៀងធ្លាក់ ក៏មាន​ហានិភ័យដែរ ដូចជាការហូរមែកឈើ ឬកំណាត់ឈើមកតាមទឹកជាដើម។ ករណីនេះ អាចកើតមាននៅពេលដែល ចរន្តទឹកកំពុងកើនល្បឿន ហើយវានឹងអាចនាំមកជាមួយនឹងសំណល់មែកឈើដែលបាក់ ឬមែកឈើផុយស្រួយ ដែលនៅ ប្របមាត់ជ្រោះនោះមក។

៣. បង្កើនការប្រុងប្រយ័ត្នពេលលេងទឹក
ដើម្បីសុវត្ថិភាពខ្ពស់ពេលលេងទឹក ត្រូវលេងនៅម្តំណាដែលផុតពីល្បាក់ចំណោតដែលទឹកហូរចុះ ព្រោះត្រង់ចំណុចនោះ ហូរ​ខ្លាំង អាចឱ្យយើងបាត់ជំហរហូរទៅជាមួយទឹក។ កំណត់ចំណាំមួយ យើងអាចមើលដឹងពីកន្លែងដែលស្ថានភាពទឹក មិនគួរលេង កន្លែងណាដែលមានទឹកបែកពពុះសៗ ត្រង់នោះហើយ ជាកន្លែងដែលមានកម្លាំងទឹកខ្លាំង ហេតុនេះ គួរលេង​នៅកន្លែង​ណា​ដែលចរន្តទឹកមិនសូវខ្លាំង។ អ្វីដែលគួរប្រុងប្រយ័ត្នមួយទៀតនោះ គឺពេលដើរលើថ្ម ប្រយ័ត្នរអិល ព្រោះកន្លែងដែលមិនសូវមានទឹកហូរខ្លាំង ច្រើនមានស្លែរកាន់។

៤. កុំពាក់អាវពោងសុវត្តិភាព
អាវពោងសុវត្ថិភាព គ្រោះថ្នាក់ណាស់ បើសិនជាយកមកប្រើពេលលេងទឹកជ្រោះ ព្រោះស្ថានភាពទឹកជ្រោះគឺមានលំហូរ ហើយអាវពោងមិនត្រឹមតែមិនអាចជួយការពារសុវត្ថិភាពយើងបានទេ ថែមទាំងស្របជាមួយកម្លាំងទឹក នាំយកយើងទៅ​ជាមួយ​បានទៀត៕

The post ចំណុចត្រូវដឹងពេលទៅកម្សាន្តទឹកធ្លាក់ក្នុងរដូវវស្សានេះ ព្រោះមានហានិភ័យណាស់ appeared first on Kampuchea Thmey Daily.

ទោះ​យ៉ាងណា ​អ្នកគ្មានស្រុកឬរវល់ការងារ​មិនអាចទៅស្រុកកំណើតបាន​ ក៏អាច​ចេញ​ទៅ​ផ្លាស់​ប្តូរ​បរិយាកាស​ជាមួយ​ដំណើរ​កម្សាន្ត “Staycation” នៅ​កណ្ដាល​ទីក្រុងស្វែង​រក​សណ្ឋាគារ​ដែល​មិន​ឆ្ងាយ​ពី​ផ្ទះ ​ហើយចំណាយ​ពេលពេញ​មួយ​ចុង​សប្ដាហ៍គេង​នៅ​សណ្ឋាគារ ប្រើប្រាស់​សេវាកម្ម​ផ្សេងៗ​របស់សណ្ឋាគារ ទៅស្ប៉ា លេង​កីឡា ញ៉ាំ​អាហារឆ្ងាញ់ៗ​នៅសណ្ឋាគារ។

យ៉ាងណាមិញ មុននឹងចាប់ផ្ដើមថាយើងគួរធ្វើអ្វីខ្លះនៅទីក្រុង​ស្ងាត់ជ្រងំ​នេះ​យើងមកដឹងពី Staycation ជា​អ្វីមុនសិន។ “Staycation” គឺជាការរួមផ្សំនៃពាក្យ “Stay” ដែល​មានន័យថា ស្នាក់នៅ ឬរស់នៅមួយ​កន្លែង និង “Vacation” មានន័យថា វិស្សមកាលថ្ងៃ​ទំនេរ ដើរ​លេង​កំសាន្ត។ នៅពេលដែលទាំងអស់គ្នា Staycation គឺជាវិស្សមកាលនៅក្នុងប្រទេស, ភូមិ, សង្កាត់​ដែល​នៅ​ជិត​ផ្ទះ។ និយាយឲ្យ​សាមញ្ញ Staycation គឺ​ទៅ​វិស្សមកាល​នៅ​ជិត​ផ្ទះ ឬ​នៅ​ខេត្ត​ដែល​អ្នក​រស់នៅ។ ប៉ុន្តែ​ទទួល​បាន​អារម្មណ៍​ដូច​ជា​ការ​ធ្វើ​ដំណើរ​ដ៏​វែង​ឆ្ងាយ ​តាម​ពិត​ទៅអ្នក​អាច​ជ្រើសរើស​ស្នាក់​នៅ​ផ្ទះ​បាន គ្រាន់​តែ​ត្រូវ​ផ្លាស់​ប្ដូរ​បរិយាកាស​ថ្មី​ឲ្យ​ខុស​ពី​ដើម។

តើការស្នាក់នៅខុស​ពីការស្នាក់នៅផ្ទះយ៉ាងដូចម្តេច? វា​ខុស​គ្នា​ត្រង់​ថា​យើង​ព្យាយាម​ប្តូរ​បរិយាកាស​ដែល​ធ្លាប់​ស្គាល់​ទៅ​ជា​អ្នក​មិន​ស្គាល់។ នៅ​សង្កាត់ ប៉ុន្តែ​មាន​អារម្មណ៍​ថា​ឆ្ងាយ​ពី​ផ្ទះ អត្ថប្រយោជន៍​គឺថាវាជាការធ្វើ​ដំណើរ​ថវិកា​តិច មិនចាំបាច់​យកកាបូបធំដូចទៅជាច្រើន​សប្ដាហ៍។ មិន​ចាំបាច់​នឿយហត់ ឬ​ស្មុគស្មាញ​ក្នុង​ការរៀបចំផែនការធ្វើដំណើររបស់អ្នកទេ។ អាច​បំបាត់​ភាព​តានតឹង​បាន​តាម​ការ​ប្រាថ្នា មិន​បាច់​ចាក​ចេញ​ពី​ការងារ​ទេ គ្រាន់តែ​ប្រើ​យប់​ថ្ងៃ​សៅរ៍ និង​អាទិត្យ។

ជ្រើសរើស​កន្លែង​ដែល​ត្រូវ​ទៅ កុំភ្លេចលក្ខខណ្ឌ Staycation ដែលផ្តោតលើការធ្វើដំណើរក្នុងសង្កាត់ជិតផ្ទះ ប្រសិនបើអ្នក​ចង់​ទៅឆ្ងាយបន្តិចដូចធ្វើដំណើរតាមខេត្តឆ្លងស្រុក ប៉ុន្តែ​វា​មិន​មែន​ជា​ការ​ធ្វើ​ដំណើរ​មួយ​ថ្ងៃ ពេញ​មួយ​យប់ ឬ​ជា​វិធី​ដែល​គិត​តិច​បំផុត​នោះ​ទេ។ គឺ​កក់​កន្លែង​ស្នាក់​នៅ​សណ្ឋាគារ​មួយ​ដែល​យើង​ឃើញជា​រៀង​រាល់ថ្ងៃទៅ​ធ្វើ​ការ។ សណ្ឋាគារមួយដែលយើងធ្លាប់គិតថាចង់ដើរចូលក្នុងនាមភ្ញៀវម្តង។

យកតែអ្វីដែលអ្នកត្រូវការ គោលបំណងនៃដំណើរកម្សាន្តស្នាក់នៅភាគច្រើនគឺដើម្បីបញ្ចូលថាមពល និងផ្លាស់ប្តូរបរិយាកាស។ សរុបមក វាជាដំណើរកម្សាន្តដែលមិនប្រើប្រាស់ថាមពលច្រើន ផ្តោតលើការសម្រាកលំហែ ដូច្នេះយើងមិនចាំបាច់យកសំលៀកបំពាក់ច្រើន ដើម្បី​បង្អួត​អ្នក​ណា​ម្នាក់​ក្នុង​ការ​ធ្វើ​ដំណើរ​ដ៏​ខ្លី​នេះទេ។ គ្រាន់​តែ​ស្លៀក​សំលៀក​បំពាក់​ដ៏​ល្អ សង្កត់ធ្ងន់លើភាពសាមញ្ញ និងផាសុកភាព អ្វីដែលសំខាន់នោះគឺថាអ្នកមិនចាំបាច់យកអ្វីគ្រប់យ៉ាងនៅក្នុងកាបូបរបស់អ្នកឡើយ។ ព្រោះស្នាក់នៅតែប៉ុន្មានយប់ ហើយ​កន្លែង​ស្នាក់​នៅ​ភាគ​ច្រើន​បាន​ត្រៀម​ខ្លួន​រួច​ជា​ស្រេច​សម្រាប់​ការ​បម្រើ។ រៀបចំតែរបស់ដែលអ្នកត្រូវការ។ វាជាការល្អក្នុងការយករបស់ដែលធ្លាប់ស្គាល់ជាមួយអ្នក វា​ដូចជា​ដេក​ឱប ហើយ​វា​កក់ក្តៅ​ដូច​ដេក​នៅផ្ទះ​។

ធ្វើបញ្ជីនៃអ្វីដែលអ្នកចង់ធ្វើ ប៉ុន្តែមិនដែលបានធ្វើ អនុញ្ញាតឲ្យការស្នាក់នៅជា “បទពិសោធន៍” ថ្មី បើទោះបីជាវានៅកន្លែងដដែលក៏ដោយ។ ការពិត វាអាចជាការលំបាកដែលអ្វីៗទាំងអស់ធ្លាប់ស្គាល់។ ប៉ុន្តែប្រសិនបើអ្នកពិតជាចង់បានភាពថ្មីថ្មោង អ្នកនឹងត្រូវបើកចិត្តទៅកាន់ភោជនីយដ្ឋានមួយចំនួនដែលអ្នកមិនធ្លាប់ទៅ។ នាំខ្លួនឯងទៅដេកក្បែរផ្ទះ ដែលផ្តល់ឲ្យអ្នកនូវអារម្មណ៍ប្លែក​ ទោះបីជាវាជាកន្លែងដែលធ្លាប់ស្គាល់ក៏ដោយ។ ប៉ុន្តែសកម្មភាព និងបរិយាកាសជុំវិញមិនដូចគ្នាទេ។

តាមពិតទៅ ដំណើរកម្សាន្ត Staycation នេះ គឺជាដំណើរកម្សាន្តថ្ងៃសម្រាកដុំពុំមានការងារជាប់ជាមួយ។ ការធ្វើដំណើរគឺជាការធ្វើដំណើរ សម្រាកគឺសម្រាក កុំ​ទុក​ឲ្យ​ការងារ​ជា​ឧបសគ្គ​រារាំង​យើង​មិន​ឲ្យមា​នថ្ងៃឈប់​សម្រាកឲ្យសោះ។ ប្រសិនបើអ្នកតែងតែពេញដោយការងារដែលអ្នកធ្វើជារៀងរាល់ថ្ងៃ អ្នកគួរតែអាចរីករាយនឹងវិស្សមកាលតាមដែលអ្នកចូលចិត្ត៕

អត្ថបទ៖ សាង ស្រីល័ក្ខ

ចុចអាន៖ជំងឺភ្នែក ៣ ប្រភេទ គួរប្រយ័ត្នពេលចូលឆ្នាំខ្មែរ ជាពិសេសអ្នកលេងកាំភ្លើងបាញ់ទឹក

The post ចូលឆ្នាំខ្មែរអត់ដឹងទៅណា សាកល្បង Staycation ក្នុងក្រុងភ្នំពេញបានទាំងបទពិសោធន៍ appeared first on Kampuchea Thmey Daily.

នៅខេត្តសៀមរាប សម្បូរដោយប្រាសាទបុរាណរាប់រយប្រាសាទ ដែលបន្សល់ទុកពីសម័យបុរាណកាលមកសម្រាប់ឱ្យកូនចៅជំនាន់ក្រោយបានសិក្សា និងឈ្វេងយល់ពីប្រាសាទទាំងអស់នោះ។ “កម្ពុជាថ្មី” សូមលើកយកប្រាសាទចំនួន ៥ ដែលលោកអ្នកមិនគួរមើលរំលងឡើយ នៅពេលដែលទៅលេងខេត្តសៀមរាបក្រៅពីប្រាសាទអង្គរវត្ត នោះ គឺប្រាសាទបាគង ប្រាសាទបាយ័ន ប្រាសាទបន្ទាយស្រី ប្រាសាទភិមានអាកាស និងប្រាសាទភ្នំក្រោម។

ទី១.ប្រាសាទបាគង

ប្រាសាទបាគង ត្រូវបានសាងសង់ឡើងដោយព្រះបាទឥន្រ្ទវរ្ម័នទី១ នៅឆ្នាំ៨៨១ នៅរាជធានី ហរិហរាល័យ ឬទីក្រុងរលួស។ ប្រាសាទនេះ សង់ឡើងសម្រាប់ឧទ្ទិសថ្វាយដល់ព្រះឥសូរ និងអំណាចព្រះរាជា ដែលមានទីតាំងខាងត្បូងប្រាសាទព្រះគោ ស្ថិតនៅភូមិឪឡោក ឃុំបាគង ស្រុកបាគង ខេត្តសៀមរាប មានចម្ងាយប្រហែល ១២គីឡូម៉ែត្រ ពីទីរួមខេត្តបច្ចុប្បន្ន។ ដើមឡើយ ប្រាសាទមួយនេះ មានឈ្មោះថា ឥន្ទ្រេស្វរ ជាប្រាសាទដំបូងគេដែលត្រូវបានសាងសង់ឡើងដោយថ្មភក់ដ៏អស្ចារ្យ។ លុះនៅក្នុងសម័យកណ្តាល ទើបប្រាសាទមួយនេះបានប្តូរឈ្មោះមកជា ប្រាសាទបាគងវិញ។

តាមការស្រាវជ្រាវបង្ហាញថា ប្រាសាទមួយនេះមានកំពែង ២ ជាន់ គឺកំពែងខាងក្រៅ និងកំពែងខាងក្នុង។ កំពែងខាងក្រៅមានទំហំ ៩០០x៧០០ ម៉ែត្រ ហ៊ុមព័ទ្ធដោយទឹក ដែលតំណាងឲ្យមហាសមុទ្រនៃលោកធាតុវិទ្យាឥណ្ឌា។ ផ្លូវចូលកាន់ប្រាសាទ មានពីរ គឺខាងកើត និងខាងលិច ដែលលំអដោយនាគញីឈ្មោលមួយគូរលូនអមសងខាងផ្លូវ។ ប៉ុន្តែ ដោយសារតែកម្ពុជាឆ្លងកាត់សង្គ្រាមជាច្រើន បានធ្វើឱ្យប្រាសាទបាគងបច្ចុប្បន្នបាក់បែកច្រើន។ នៅជុំវិញប្រាសាទមានដើមឈើធំៗ និងមានស្រះទឹកព័ទ្ធជុំវិញ ជាម្លប់ដ៏ត្រជាក់សម្រាប់ភ្ញៀវទេសចរទៅកម្សាន្តផងដែរ។ យ៉ាងណាមិញ បន្ទាប់ពីព្រះបាទឥន្រ្ទវរ្ម័នទី១ ទ្រង់សោយព្រះទិវង្គត ប្រាសាទនេះត្រូវបានធ្វើជាផ្នូររបស់ព្រះអង្គ។

ទី២.ប្រាសាទបាយ័ន

ប្រាសាទបាយ័ន មានទីតាំងស្ថិតនៅចំកណ្តាលរាជធានីក្រុងអង្គរតែម្តង ត្រូវបានកសាងឡើងនៅចុងសតវត្សរ៍ទី ១២ និងដើមសតវត្សរ៍ទី១៣ ដោយព្រះបាទជ័យវរ្ម័នទី៧ មានទីតាំងស្ថិតនៅសង្កាត់គោកចក ក្រុងសៀមរាប ខេត្តសៀមរាប ចម្ងាយប្រហែល ១១គីឡូម៉ែត្រពីរង្វង់មូលនាគព័ន្ធ។

ប្រាសាទនេះមាន តួប៉មនីមួយៗ មានមុខបួន ដែលមានកំពូល ៤៩ និងកំពូលក្លោងទ្វារចូល៥ ទៀត សរុបទាំងអស់ ៥៤ កំពូល ដែលតំណាងឲ្យខេត្តក្រុងខ្មែរទាំង៥៤ នៅសម័យកាលនោះ។ សាធារណជនមួយចំនួនធំ ស្គាល់ប្រសាទបាយ័​នតាមរយៈព្រះព្រហ្មមុខ៤ ដែលមតិមួយចំនួនយល់ថា តំណាងឱ្យអ្នកថែរក្សាទិសទាំង៤ ដែលគេហៅថា ចតុលោកបាល គឺអ្នកដែលការពារទិសពិភពលោកមុខ៤។ ឯខ្លះទៀត យល់ថា រូបព្រះព្រហ្មមុខ៤ តំណាងឱ្យមេត្តា ករុណា ឧបេក្ខា និងមុទិតា ដែលមនុស្សគ្រប់រូបត្រូវប្រកាន់យកក្នុងជីវិតរស់នៅប្រចាំថ្ងៃ។

ប្រាសាទបាយ័ន គឺជាទីកន្លែងគោរពបូជា និងជាកន្លែងប្រវត្តិសាស្ត្រយ៉ាងស្រស់ស្អាត ភ្ជាប់ជាមួយនឹងវប្បធម៌ខ្មែរ ចម្លាក់ក្បួរក្បាច់រចនាប្រណីតមិនចាញ់ប្រាសាទអង្គរវត្តទេ។ នៅពេលដែលអ្នកទេសចរទៅទស្សនានៅទីនោះ ច្បាស់ណាស់នឹងទទួលបានអារម្មណ៍មួយប្លែកជាមួយនឹងប្រាសាទយ៉ាងធំ ហាក់បីដូចជាអ្នកកំពុងស្ថិតនៅក្នុងសម័យបុរាណអ៉ីចឹងដែរ។

ទី៣.ប្រាសាទបន្ទាយស្រី

ប្រាសាទប្រវត្តិសាស្ត្រមួយទៀត គឺប្រាសាទបន្ទាយស្រី ដែលមានទីតាំងស្ថិតនៅភូមិបន្ទាយស្រី ឃុំបន្ទាយស្រី ស្រុកបន្ទាយស្រី ខេត្តសៀមរាប មានចម្ងាយប្រហែល ៣៩គីឡូម៉ែត្រពីទីរួមខេត្តសៀមរាប។ ប្រាសាទនេះ មានចម្ងាយ ៣២គីឡូម៉ែត្រពីប្រាសាទអង្គរវត្តតាមផ្លូវទៅភ្នំគូលែន។ ប្រាសាទបន្ទាយស្រី បានកសាងឡើងឆ្នាំ៩៦៧ ដោយព្រហ្មណ៍ម្នាក់ឈ្មោះ យជ្ញវរាហៈ ដែលជាព្រះគូ្ររបស់ព្រះបាទជ័យវរ្ម័នទី៥ ដើម្បីឧទ្ទិសដល់ព្រហ្មញ្ញសាសនា។

ប្រាសាទបន្ទាយស្រី ត្រូវបានសាងសង់ឡើងពីថ្មផ្កាឈូកជាមួយនឹងក្បាច់ចម្លាក់យ៉ាងល្អិតឆ្មាររស់រវើកជាងគេ ដោយមានតួប្រាង្គបី ដែលមានសភាពល្អឆើតឆាយដូចស្រីគ្រប់លក្ខណ៍។ ប្រាសាទនេះ សង់លើដីរាបស្មើមានរាងតូចច្រឡឹងដោយថ្មភក់ផ្កាឈូក និងឥដ្ឋរាង៤ជ្រុងទ្រវែង ហើយមានទឹកព័ទ្ធជុំវិញប្រាង្គទាំងបី។

៤.ប្រាសាទភិមានអាកាស

ប្រាសាទភិមានអាកាស ត្រូវកសាងដំបូងនៅដើមសតវត្សទី១០ ក្នុងរជ្ជកាលព្រះបាទយសោវរ្ម័នទី១។ បច្ចុប្បន្ន ស្ថិតនៅ ភូមិនគរក្រៅ ឃុំគោកចក ស្រុកនគរធំ ខេត្តសៀមរាប មានចម្ងាយប្រហែល ១១គីឡូម៉ែត្រ ពីរង្វង់មូលនាគព័ន្ធ។ ប្រាសាទ​នេះ ​ត្រូវបានកសាង​ឡើង​ដោយ​ព្រះមហាក្សត្រ​៣អង្គផ្សេង​គ្នា​ គឺព្រះបាទ​រាជេន្រ្ទវរ្ម័នទី២ ព្រះបាទ​ជ័យវរ្ម័ន​ទី៥  និង​ព្រះបាទ​សូរ្យវរ្ម័ន​ទី១។

ប្រាសាទភិមានអាកាស កសាងពីថ្មភក់ មានទម្រង់ជាប្រាសាទភ្នំ នៅលើគ្រឹះថ្មបាយក្រៀមបីជាន់។ គ្រឹះថ្មបាយក្រៀមទាំងបីជាន់ មានរាងបួនជ្រុងទ្រវែង ហើយមួយជាន់ៗ មានកម្ពស់៤ម៉ែត្រ និងមានជណ្ដើរគ្រប់ទិសទាំងបួន។ ប្រាសាទបុរាណមួយនេះ មានទីតាំងភូមិសាស្រ្តក្បែរប្រាសាទល្បីៗផ្សេងទៀតដូចជា ប្រាសាទបាយ័ន ប្រាសាទបាពួន ប្រាសាទបាលិលេយ្យ និងលានជល់ដំរីផងដែរ។

ទី៥.ប្រាសាទភ្នំក្រោម

ខុសប្លែកពីប្រាសាទផ្សេងៗ ប្រាសាទភ្នំក្រោមស្ថិតនៅលើកំពូលភ្នំក្រោម មានចម្ងាយប្រហែល ១២គីឡូម៉ែត្រពីទីក្រុងសៀមរាប និងបឹងទន្លេសាប និង២២គីឡូម៉ែត្រពីប្រាសាទអង្គរវត្ត។ ប្រាសាទនេះ ត្រូវបានកសាងក្នុងរជ្ជកាលព្រះបាទយសោវរ្ម័នទី១ នៅចុងសតវត្សរ៍ទី៩ និងដើមសតវត្សរ៍ទី១០។ ប្រាសាទនេះ ត្រូវបានសាងសង់ឡើង ដើម្បីឧទ្ទិសដល់អាទិទេពទាំងបីក្នុងព្រហ្មញ្ញសាសនា គឺ ព្រះឥសូរ ព្រះវិស្ណុ និងព្រះព្រហ្ម ។

ប្រាសាទភ្នំក្រោម មានប្រាង្គបីធ្វើអំពីថ្មភក់ ស្ថិតនៅជាជួរលើខៀនមួយពីខាងជើងទៅត្បូង។ ភ្ញៀវទេសចរដែលបានទៅទស្សនាប្រាសាទនោះ ប្រាកដជាបានឃើញទិដ្ឋភាពស្រស់ស្អាតពីលើភ្នំក្រោម ឃើញទាំងវាលស្រែធំល្វឹងល្វើយ បឹងទន្លេសាប និងផ្ទះប្រជាជនជាដើម។

យ៉ាងណាមិញ ក្រៅពីប្រាសាទ ខេត្តសៀមរាបក៏មានកន្លែងដើរលេងជាច្រើនទៀត​ដូចជារមណីយដ្ឋានបែបខ្មែរ កន្លែងបាញ់ធ្នូរបុរាណ និងតំបន់ទេសចរណ៍ជាច្រើនទៀត៕

ដោយ៖ អុន ស្រីមាន

The post អ្នកទៅលេងខេត្តសៀមរាប មិនគួររំលងប្រា​សាទទាំង៥នេះឡើយ! appeared first on Kampuchea Thmey Daily.