គិតត្រឹមដើមខែឧសភានេះ មន្ត្រីជំនាញនៃមន្ទីរកសិកម្ម រុក្ខាប្រមាញ់ និងនេសាទខេត្តក្រចេះបាន្យដឹងថា ការងារដាំដុះដំណាំដំឡូងមីទូទាំងខេត្ត សម្រេចបានប្រមាណជាង ៣,៥៨៨ ហិកតានៃផែនកាទូទាំងខេត្ត។

លោក ឌីម វាសនា ពលរដ្ឋរស់នៅភូមិអញ្ចាញ ឃុំដារ ស្រុកចិត្របុរី បានឲ្យដឹងថា ជារៀងរាល់ឆ្នាំ លោកតែងដាំដំណាំដំឡូងមី និងធ្វើស្រែស្រូវរដូវវស្សា ដើម្បីរកប្រាក់ចំណូលបន្ថែមផ្គត់ផ្គង់សេដ្ឋកិច្ចគ្រួសារ។

លោកបន្តថា ការប្រមូលផលដំណាំដំឡូងមីឆ្នាំនេះទទួលបានទិន្នផលល្អ គិតជាមធ្យមប្រមាណជា ២៥ ទៅ ៣០ តោន ក្នុង ១ ហិកតា និងលក់ក្នុងតម្លៃចន្លោះពីជាង ២០០រៀល ទៅជាង ជាង ៤០០ រៀល ក្នុង ១ គីឡូក្រាម សម្រាប់ដំឡូងមីស្រស់។

ទោះបីជាដំឡូងមីស្រស់នាពេលបច្ចុប្បន្ននៅពុំទាន់មានទីផ្សារល្អយ៉ាងណាក៏ដោយ លោក ឌីម វាសនា បានបញ្ជាក់ថា មិនបោះបង់ដំណាំងដំឡូងមីនេះចោលឡើយ ព្រោះជាចំណូលប្រចាំឆ្នាំ។ ម្យ៉ាងវិញទៀត លោករំពឹងថានៅឆ្នាំក្រោយដំណាំដំឡូងមីនឹងមានទីផ្សារសមរម្យ ហើយលោកក៏បានដាក់ដាំដំណាំស្វាយចន្ទីរាប់រយដើមបន្ថែមទៀតផងដែរ៕

អត្ថបទ៖ ប្រុញ វិធិន

The post កសិកររំពឹងតម្លៃដំឡូងមីស្រស់ឆ្នាំក្រោយទទួលបានសមរម្យ ខណៈកសិករសម្រុកដាំជាង ៣,៥៨៨ ហិកតា ក្នុង​ខេត្តក្រចេះ appeared first on Kampuchea Thmey Daily.

ខណៈ​ការផ្លាស់ប្តូរពីការនាំចេញមើមដំឡូងមីស្រស់ទៅជាការកែច្នៃក្នុងស្រុកជួយ​បង្កើតតម្លៃ​សេដ្ឋកិច្ច​បន្ថែម, លើកកម្ពស់ជីវភាព​របស់ប្រជាកសិករ, និងធ្វើពិពិធកម្មឧស្សាហកម្ម បច្ចុប្បន្ន​កម្ពុជា​មាន​រោងចក្រកែច្នៃដំឡូងមី​​ដែល​កែច្នៃដំឡូងមីស្រស់​ទៅ​​ជា​ម្សៅដំឡូងមី​នាំចេញទៅ​ក្រៅប្រទេស។

រោងចក្រកែច្នៃដំឡូងមីរបស់ក្រុមហ៊ុន Singsong Industrial (Cambodia)

រោងចក្រកែច្នៃដំឡូងមីរបស់ក្រុមហ៊ុន Singsong Industrial (Cambodia) សាងសង់​នៅលើផ្ទៃដីជិត ២៣ ហិកតា ក្រោមទុនវិនិយោគប្រមាណ ៣០ លានដុល្លារ​អាមេរិក ​​មានទីតាំង​នៅ​សង្កាត់​អូរឫស្សី ក្រុងក្រចេះ ខេត្តក្រចេះ ដែល​កំពុងដើរតួនាទី​យ៉ាងសំខាន់ក្នុងវិស័យកសិឧស្សាហកម្មនៅ​ក្នុងតំបន់។

រោងចក្រនេះវិនិយោគ​មក​​ពីប្រទេស​កូរ៉េ ដែល​​បច្ចុប្បន្នមានបុគ្គលិកនិងកម្មករបម្រើការងារ​សរុបចំនួន ៥៩ នាក់ (ខ្មែរ ៥៤ នាក់ និងបរទេស ៥នាក់)។

សមត្ថភាពផលិតកម្ម រោងចក្រអាចផលិតម្សៅដំឡូងមីបានចំនួន ២៤០ តោនក្នុងមួយថ្ងៃ ដោយ​ត្រូវការ​វត្ថុធាតុដើមជាដំឡូង​មីស្រស់រហូតដល់ ៨៩០ តោនជារៀងរាល់ថ្ងៃ។ ចំពោះទីផ្សារវិញ ក្រុមហ៊ុន​បាននាំចេញទៅកាន់ប្រទេសកូរ៉េចំនួន ២០% និងផ្គត់ផ្គង់ក្នុងស្រុកចំនួន ៨០%។ ​

រោងចក្របានចាប់ផ្តើមដំណើរការកាលពីអំឡុឆ្នាំ២០១៧ ដែល​​ជាសហគ្រាសឈានមុខគេក្នុងខេត្តក្រចេះ តាមរយៈការប្រមូល​ទិញ​កសិផល​ពីប្រជាកសិករ បង្កើតឱកាសការងារ និងចូលរួមចំណែកក្នុងការការពារបរិស្ថាន។

រោងចក្រកែច្នៃ​ម្សៅដំឡូងមីរបស់ក្រុមហ៊ុន ជា ទូច

រោងចក្រកែច្នៃ​ម្សៅដំឡូងមីរបស់ក្រុមហ៊ុន ជា ទូច មានទីតាំងស្ថិតនៅភូមិសោមគល់ ឃុំសោមធំ ស្រុក​អូរយ៉ាដាវ ខេត្តរតនគិរី។

ក្រុមហ៊ុនបានដាក់ទុនវិនិយោគសាងសង់រោងចក្រអស់ទឹកប្រាក់ចំនួន​ជាង​ ៣០ លាន​ដុល្លារ​អាមេរិក លើ​ផ្ទៃដី​ជាង ៤០ ហិកតា ហើយបានសម្ភោធដាក់ឲ្យដំណើរការសកម្មភាពនៅថ្ងៃទី៧ ខែ​ឧសភា ឆ្នាំ២០១៨។

ក្នុង​ដំណើរ​ទស្សនកិច្ច​របស់​ក្រុមអ្នកសារព័ត៌មានទៅខេត្តភាគ​ឦសាន​ លោក ញ៉ែម សំអឿន អភិបាល​នៃ​គណៈ​អភិបាល​ខេត្ត​រតនគិរីបានគូស​បញ្ជាក់​ថា រោងចក្រ​ដែល​ស្ថិតនៅ​តាម​ផ្លូវ​ទៅច្រក​អន្តរជាតិ​អូរយ៉ាដាវនេះ មាន​សមត្ថភាព​អាច​ផលិតម្សៅមី​​បាន​ប្រមាណ ១ ០០០ តោន​ក្នុង​មួយ​ថ្ងៃ សម្រាប់​នាំ​ចេញ​ទៅ​ប្រទេស​ចិន និងសិង្ហបុរី។

សហគ្រាស HLH

ក្រៅតែពីជំរុញការដាំដុះដំឡូងមី​នៅខេត្តកំពង់ស្ពឺ ក្រុមហ៊ុន «HLH Agriculture» បានបង្កើតរោងចក្រកែច្នៃដំឡូងមីជាម្សៅសម្រាប់នាំចេញនៅឆ្នាំ ២០១៥។

រោងចក្រកែច្នៃដំឡូងមីរបស់ក្រុមហ៊ុន HLH អាចផលិតម្សៅមីបានប្រមាណ ១២០ តោនក្នុងមួយថ្ងៃ ហើយក្នុងមួយ​ខែ​រោងចក្រផលិតម្សៅមីចន្លោះពី ៣ ០០០ ទៅ ៥ ០០០តោន សម្រាប់ផ្គត់ផ្គង់អតិថិជននៅក្រៅប្រទេស។

ក្រុមហ៊ុន «HLH Agriculture» ជាក្រុមហ៊ុនវិនិយោគមានមូលដ្ឋានមកពីប្រទេស​សិង្ហបុរី។ កាលពីឆ្នាំ ២០០៨ ក្រុមហ៊ុនទទួល​បាន​ដីសម្បទានសេដ្ឋកិច្ចពីរាជរដ្ឋាភិបាលជិត ១ ម៉ឺនហិកតា ដើម្បីអភិវឌ្ឍលើវិស័យកសិកម្មនៅស្រុកឱរ៉ាល់ ខេត្តកំពង់ស្ពឺ។

ក្រុមហ៊ុន Green Leader

រោងចក្រកែច្នៃដំឡូងមីរបស់​ក្រុមហ៊ុន Green Leader បានបើកការដ្ឋានសាងសង់កាលពី​ថ្ងៃទី ១ ខែមេសា ឆ្នាំ​២០១៨ នៅលើផ្ទៃដីទំហំ​ជាង ២០ ហិតា នៅក្នុងតំបន់សេដ្ឋកិច្ចពិសេសស្រុកស្នួល ខេត្តក្រចេះ ក្រោមទុនវិនិយោគប្រមាណ ២០ លាន​ដុល្លារ ។

រោងចក្រកែច្នៃដំឡូងមីរបស់ក្រុមហ៊ុន​ មាន​សមត្ថភាព​កែច្នៃដំឡូងមីទៅ​ជា​ម្សៅ​បាន​ចំនួន ១៣០ ពាន់តោនក្នុងមួយឆ្នាំ និងអាចស្រូបយកវត្ថុធាតុដើមដំឡូងមីចំនួន ៥០០ ពាន់តោន។

ក្រុមហ៊ុន​បាន​​ដាក់ចេញ​ផែនការ ក្នុងរយៈពេល ៥ ឆ្នាំ មានគម្រោងសាងសង់រោងចក្រខ្នាតធំឲ្យបាន ២០ រោងចក្រទូទាំងប្រទេស។

ក្រុមហ៊ុន «Guanshen Shengda Agriculture Industry Co., Ltd.»

កាលពី​អំឡុង​ខែមេសា ឆ្នាំ ២០២៦ រោងចក្រផលិតម៉្សៅដំឡូងមីរបស់ក្រុមហ៊ុន «Guanshen Shengda Agriculture Industry Co., Ltd.» បានបើកការដ្ឋានសាងសង់ដែល​មានទីតាំង​ស្ថិតនៅ​ភូមិចេក ឃុំអូរ ស្រុកភ្នំស្រួច ខេត្តកំពង់ស្ពឺ នៅ​ចន្លោះគីឡូម៉ែត្រ ៧៤-៧៥។

ក្រោមការបណ្តាក់ទុនប្រមាណ ២០ លានដុល្លារ បន្ទាប់ពីបញ្ចប់ការសាងសង់ ក្រុមហ៊ុន​អាចបង្កើតចំណូលលក់ប្រចាំឆ្នាំប្រមាណ ៩០ លានដុល្លារ ដោយផលិតម្សៅដំឡូងមី ១០ ម៉ឺនតោន ដំឡូងមីស្ងួត ១០ ម៉ឺនតោន និងកាកដំឡូងមីប្រើសម្រាប់ផលិតចំណីសត្វប្រមាណ ៣ ម៉ឺនតោន។

កម្ពុជាជាប់ចំណាត់ថ្នាក់ជាប្រទេសនាំចេញដំឡូងមីធំជាងគេទី ៤ នៅអាស៊ី និងទី១០ នៅលើពិភពលោក ជាមួយ​ផ្ទៃដីដាំដុះប្រមាណ ៦០០ ០០០ ទៅ ៨០០ ០០០ ហិកតា។

រោងចក្រកែច្នៃដំឡូងមីចំនួន ១៦ ទីតាំង បាន​បោះ​​មូលដ្ឋាន​ស្រូបប្រមូល​កសិផល​ដំឡូងមីកែច្នៃ​នាំចេញទៅក្រៅប្រទេស។ នេះ​បើ​យោងតាមរបាយការណ៍របស់​​ក្រសួងពាណិជ្ជកម្ម។

នៅ​ក្នុង​ឆ្នាំ ​២០២៥ ​កម្ពុជា​រក​ចំណូលបាន ​៦៤៦ ​លានដុល្លារ ​ពីការ​នាំ​ចេញ​​ដំឡូងមីទៅទីផ្សារអន្តរជាតិ៕

The post មកស្គាល់​រោងចក្រ​ធំៗកំពុង​កែច្នៃ​ដំឡូងមី​ស្រស់​នាំ​ចេញទៅក្រៅប្រទេស​ appeared first on Kampuchea Thmey Daily.

លោក ស្លេស ម៉ានវ៉ាន់ទីន អាយុ ៥៩ឆ្នាំ រស់នៅឃុំពូជ្រៃ ស្រុកពេជ្រាដា ខេត្តមណ្ឌលគិរី បានប្រាប់កម្ពុជាថ្មីថា ក្រោយពីមានភ្លៀងធ្លាក់ជាច្រើនមេមកនេះ លោក និងកសិករផ្សេងទៀត បានចាប់ផ្តើមដាំដំឡូងមីបន្តិចម្តងៗ ហើយរំពឹងថា នឹងដាំដុះរួចរាល់ នៅពេលមានភ្លៀងធ្លាក់គ្រប់គ្រាន់នៅពេលខាងមុខ។ លោកមានផ្ទៃដីដាំដំឡូងមីចំនួន ១០ ហិកតា ហើយមានបទពិសោធន៍ក្នុងការដាំដំណាំនេះជាង ១០ ឆ្នាំមកហើយ។

តាមបទពិសោធន៍កន្លងមក លោកអាចទទួលបានទិន្នផលប្រហែល ២០ តោនក្នុងមួយហិកតា។ ទោះបីជាទិន្នផលដំឡូងមីមានការថយចុះបន្តិចម្តងៗរៀងរាល់ឆ្នាំក្តី អ្វីដែលលោក និងកសិករផ្សេងៗចង់បាន គឺតម្លៃទីផ្សារដំឡូងមីកើនឡើង ដើម្បីធានាប្រាក់ចំណេញសម្រាប់គ្រួសារ។ លោកបានបញ្ជាក់ថា បន្ទាប់ពីដាំដុះរួចក្នុងខែឧសភានេះ កសិករអាចចាប់ផ្តើមប្រមូលផលក្នុងរយៈពេល ៥ ទៅ ៦ ខែ ​ខាងមុខ។ ប៉ុន្តែការប្រមូលផល អាស្រ័យលើស្ថានភាពទីផ្សារ និងឈ្មួញជាអ្នកកំណត់ជាចម្បង។

យ៉ាងណាមិញ ក្នុងនាមជាកសិករមួយរូប លោកនៅតែបន្តសំណូមពរទៅកាន់មន្ត្រីជំនាញ និងក្រុមហ៊ុនសហគ្រាស ឱ្យជួយរកទីផ្សារ និងធានាតម្លៃដំឡូងមីឱ្យបានសមរម្យ ស្របតាមថ្លៃកម្លាំងពលកម្ម និងការខិតខំប្រឹងប្រែងរបស់កសិករ ដើម្បីអាចទទួលបានប្រាក់ចំណេញ និងធ្វើឱ្យជីវភាពគ្រួសាររីកចម្រើនល្អប្រសើរឡើង៕

ដោយ៖រៀម សុខហេង

The post ក្រោយភ្លៀងប៉ុន្មានមេមក អំណោយផលដល់កសិករខេត្តមណ្ឌលគិរី ចាប់ផ្តើមដាំដំឡូងមី appeared first on Kampuchea Thmey Daily.

នៅពេលសាងសង់រោងចក្រនេះរួមរាល់ រំពឹងថានឹងពង្រឹងសមត្ថភាពកែច្នៃក្នុងស្រុក គាំទ្រកសិករ និងជំរុញកំណើននៃការនាំចេញ។

លោក សុន សេងហួត រដ្ឋលេខាធិការក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ បានលើកឡើងថា៖ «វិស័យដំឡូងមីកំពុងផ្លាស់ប្តូរពីការនាំចេញក្នុងទម្រង់ជាវត្ថុធាតុដើម ទៅរកការកែច្នៃក្នុងស្រុក ដើម្បីបង្កើតតម្លៃបន្ថែមកាន់តែខ្ពស់»។

កម្ពុជាមានបរិមាណផលិតកម្មដំឡូងមីប្រមាណ ១៣,៨៩ លានតោន ក្នុងឆ្នាំ២០២៣ ហើយ វិស័យនេះបន្តទាក់ទាញការវិនិយោគឯកជនធំៗ ស្របតាមគោលដៅអភិវឌ្ឍន៍វិស័យកសិ-ឧស្សាហកម្ម របស់រាជរដ្ឋាភិបាលកម្ពុជា។

បច្ចុប្បន្ន មានរោងចក្រកែច្នៃដំឡូងមីចំនួន ១៦ (កើនឡើង ៩ រោងចក្រ ធៀបនឹងឆ្នាំ២០២០ ដែលមានតែ ៧ រោងចក្រ) កំពុងដំណើរការ ដែលបង្ហាញពីកំណើន យ៉ាងឆាប់រហ័ស នៃសមត្ថភាពកែច្នៃក្នុងស្រុក។

ទន្ទឹមនឹងនេះ កម្ពុជាក៏បានអភិវឌ្ឍស្តង់ដាជាតិចំនួន ៤ សម្រាប់វិស័យដំឡូងមី រួមមានស្តង់ដា CS056:2007 សម្រាប់ផលិតម្សៅដំឡូងមី (Tapioca Flour), ស្តង់ដា CS058:2008 សម្រាប់ម្សៅអាមីដុងដំឡូងមី (Tapioca Starch), ស្តង់ដា CS328:2014 សម្រាប់ដំឡូងមីផ្អែម និងស្តង់ដា CS516:2014 CAR/RCP73-2013 សម្រាប់គ្រប់គ្រងអាស៊ីត Hydrocyanic (HCN) ដើម្បីឆ្លើយតបទៅនឹងតម្រូវការគុណភាពផលិតផល និងតម្រូវការទីផ្សារ។

បន្ទាប់ពីការសាងសង់ និងដាក់ឱ្យដំណើរការ រោងចក្រនេះរំពឹងថានឹងទទួលចំណូល ពីការលក់ប្រចាំឆ្នាំប្រមាណ ៩០ លានដុល្លារអាមេរិក ដោយមានសមត្ថភាពផលិត ម្សៅដំឡូងមី សម្រេច ១០០.០០០ តោន, ចំណិតដំឡូងមីស្ងួត ១០០.០០០ តោន និងសំណល់ សម្រាប់ ចំណីសត្វ ៣០.០០០ តោន ក្នុងមួយឆ្នាំ។

យោងតាមក្រសួងពាណិជ្ជកម្ម កម្ពុជា​រក​ចំណូល​បានជាង ៣៧៦ លានដុល្លារ ​ពីការនាំចេញ​ដំឡូងមី នៅក្នុងត្រីមាសទី១ ឆ្នាំ ២០២៦ (មករា-មីនា) ២០២៦ កើនឡើង ១៦,២៦% ធៀបនឹងរយៈពេលដូចគ្នានៅឆ្នាំ ២០២៥។

នៅ​ក្នុង​ឆ្នាំ ​២០២៥ ​កម្ពុជា​រក​ចំណូលបាន ​៦៤៦ ​លានដុល្លារ ​ពីការ​នាំ​ចេញ​ដំឡូងមី ​ធ្លាក់ចុះ ១៤,៤៨% ​ប្រៀបធៀប​នឹង​ឆ្នាំ ​២០២៤៕

The post ក្រុមហ៊ុនចិនបោះទុន ២០ លានដុល្លារ សាងសង់រោងចក្រកែច្នៃ​ដំឡូងមី ​នៅកំពង់ស្ពឺ appeared first on Kampuchea Thmey Daily.

​លោក អិល ឈិញ ប្រធានសមា​គមកសិករដំឡូងមីខ្មែរ ​ប្រាប់កម្ពុជាថ្មីថា​ តម្លៃដំឡូងមីស្រស់​បាន​​កើន​ឡើងវិញដល់ជាង ​៣០០ រៀល ​ក្នុង​មួយ​គីឡូ ​ចាប់​តាំង​ពី​ដើម​ខែ​កុម្ភៈ ​២០២៦ ​ដោយសារ​ការកើនឡើងនៃតម្រូវការសកល។

​លោក អិល ឈិញ ​បន្ថែមថា៖ «តម្លៃដំឡូងមីស្រស់នៅភាគខាងជើង ​២៩០ រៀល ក្នុងមួយគីឡូ ​នៅ​ភូមិ​ភាគ​កណ្ដាល ​មានខេត្តកំពង់ធំ ​ខេត្តកំពង់ចាម ឡើងដល់ ៤០០ រៀល ក្នុងមួយគីឡូ ​និង​ភាគ​ខាង​លិច​​មាន​ខេត្ត​បាត់​ដំបង​ ខេត្តប៉ៃលិន ​ឡើង​ដល់ជាង​ ៣០០ រៀល ក្នុង​មួយគីឡូ​»។​

​បើតាម​ប្រធានសមាគមដំឡូងមី នៅក្នុង​ឆ្នាំ ២០២៦ ​កសិករ​ភាគច្រើន​ធ្វើដំឡូងមីស្ងួត ​ដែល​ទទួល​បាន​តម្លៃ​ខ្ពស់ ​រហូតដល់ជាង ​៦០០ រៀល ​ក្នុង​មួយ​គីឡូ។ ​ទីផ្សារ​ដំឡូងមីកម្ពុជា ​មាន​ប្រទេស​វៀតណាម ចិន​ និង​ការ​ប្រើប្រាស់​ក្នុងស្រុក។ ​

​រាជរដ្ឋាភិបាល​បានខិតខំ​ជំរុញ ​និង​ពង្រីកទីផ្សារនាំចេញដំឡូងមី​រហូតដល់ប្រមាណ ​១០ លានតោន ទៅកាន់ទីផ្សារអន្តរជាតិនៅក្នុងឆ្នាំ ២០២៥​។

​យោងតាមក្រសួងពាណិជ្ជកម្ម នៅ​ក្នុង​ឆ្នាំ ​២០២៥ ​កម្ពុជា​រក​ចំណូលបាន ​៦៤៦ ​លានដុល្លារ ​ពីការ​នាំ​ចេញ​ដំឡូងមី ​ធ្លាក់ចុះ ១៤,៤៨% ​ប្រៀបធៀប​នឹង​ឆ្នាំ ​២០២៤។​ ​

បរិមាណ​នាំ​ចេញ​ដំឡូងមីស្រស់មានចំនួន ​៣ ១០៥ ៥០០ តោន ធ្លាក់​ចុះ​ ៩,៨២% នៅក្នុងឆ្នាំ ២០២៥ រីឯចំណិតដំឡូងមីក្រៀម​បាន​កើនឡើង ៦២,២២% ដែលមានចំនួន ១ ៥៦៥ ៩៤០ តោន ប្រៀប​ធៀប​ឆ្នាំ ២០២៤៕​

​អត្ថបទ៖ ឡេង ដេត

The post កម្ពុជា​ រកចំណូល​បាន​ជាង ​៣៧៦ ​លានដុល្លារ ​ពីការ​នាំចេញ​ដំឡូងមី​ នៅ​​រយៈពេល ​៣ ​ខែ ឆ្នាំនេះ appeared first on Kampuchea Thmey Daily.

​លោក ​ស៊ុន ចាន់ថុល ​ឧបនាយករដ្ឋមន្ត្រី អនុប្រធានទី១ ក្រុមប្រឹក្សាអភិវឌ្ឍន៍កម្ពុជា នៅថ្ងៃទី ២៦ ​ខែមីនា ២០២៦​ បានជួបពិភាក្សាការងារជាមួយ​លោក Chen Mingyu ​ប្រធាន​ក្រុមហ៊ុន ​Guangxi State Farms Mingyang Starch Development Co., Ltd.។​

​ក្រុមហ៊ុន Guangxi State Farms Mingyang Starch Development គឺជាសហគ្រាសរដ្ឋឈានមុខ និងមាន​ទ្រង់ទ្រាយធំមួយរបស់ចិន ​ក្នុងវិស័យកែច្នៃដំឡូងមី​ ដែលមានគុណភាពស្តង់ដារ​ទទួលស្គាល់​ដោយ​សហរដ្ឋ​អា​មេរិក។ ​

​​ក្រុមហ៊ុនរដ្ឋចិនមួយនេះ ​ក៏សិក្សាពីកាលានុវត្តភាពក្នុងការបង្កើតរោងចក្រកែច្នៃតម្លៃបន្ថែម​ដោយ​ផ្ទាល់​នៅកម្ពុជា ​និង​ផ្ទេរចំណេះដឹងតាមរយៈពិនិត្យលទ្ធភាព​សហការជាមួយ​រាជបណ្ឌិត្យ​សភាកម្ពុជា ដើម្បីចែករំលែកបច្ចេកទេសដាំដុះ ​និង​ការ​កែច្នៃកម្រិតខ្ពស់ជូនដល់ប្រជាកសិករខ្មែរ។​

​លោកឧបនាយករដ្ឋមន្ត្រី ស៊ុន ចាន់ថុល បានជំរុញលើការបង្កើតរោង​ចក្រកែច្នៃក្នុង​ស្រុក​ ដែលជាឆ្អឹងខ្នងនៃយុទ្ធសាស្ត្រផ្ដល់តម្លៃបន្ថែមដល់កសិផលខ្មែរ និងការបង្កើត​ឱកាសការងារ​ជូនប្រជាពលរដ្ឋ។ ​

កម្ពុជាគឺជាតួអង្គយុទ្ធសាស្ត្រដែលស្ថិតនៅចំកណ្តាលនៃមហាអនុតំបន់ទន្លេមេគង្គ និងតំបន់​សេដ្ឋកិច្ច​អាស៊ាន-ចិន ​ដែលផ្តល់នូវភាពអនុគ្រោះបំផុតសម្រាប់វិនិយោគិន។​

​បើតាមលោកឧបនាយករដ្ឋមន្ត្រី ស៊ុន ចាន់ថុល «ផែនការមេភស្តុភារកម្មប្រទាក់ក្រឡា» ​របស់កម្ពុជា​ ដែលនឹង​ជួយ​សម្រួល​​ដល់​ការ​ដឹកជញ្ជូន​ឱ្យកាន់តែរហ័ស ​និង​កាត់បន្ថយ​ថ្លៃដើម​ផលិតកម្ម ធ្វើ​ឱ្យ​ផលិត​ផល​កម្ពុជា​មានសមត្ថភាពប្រកួតប្រជែងខ្ពស់នៅ​លើ​ទីផ្សារសកល។

​លោក អិល ឈិញ ប្រធានសមា​គមកសិករដំឡូងមីខ្មែរ មានប្រសាសន៍ថា បច្ចុប្បន្នការ​ប្រមូលផល​ដំឡូង​មីសម្រេចបាន ៨០% ​ខណៈតម្លៃទីផ្សារ​ដំឡូងមី​ស្រស់​របស់កម្ពុជា នៅចុងរដូវ​នេះបាន​ស្ទុះឡើង​ដល់​ជាង ​៣០០ ​រៀល ​ក្នុង​មួយ​គីឡូក្រាម ​និង​ខេត្តមួយចំនួន​បាន​ជិត​ ៥០០ រៀល ​ខណៈដំឡូងមី​ក្រៀម​​មានតម្លៃ ​៧១០ ​រៀល ​ក្នុងមួយគីឡូក្រាម​។

​យោងតាមក្រសួងពាណិជ្ជកម្ម ​នៅ​ក្នុង​ឆ្នាំ ​២០២៥ ​កម្ពុជា​រក​ចំណូលបាន ​៦៤៦ ​លានដុល្លារ ​ពីការនាំចេញដំឡូងមី ​ធ្លាក់ចុះ ១៤,៤៨% ​ប្រៀបធៀប​នឹង​ឆ្នាំ ​២០២៤។​

បរិមាណ​នាំ​ចេញ​ដំឡូងមី​ស្រស់​មានចំនួន ​៣ ១០៥ ៥០០ តោន ធ្លាក់​ចុះ​ ៩,៨២% នៅក្នុងឆ្នាំ ២០២៥ រីឯចំណិតដំឡូងមីក្រៀម​បាន​កើនឡើង ៦២,២២% ដែលមានចំនួន ១ ៥៦៥ ៩៤០ តោន ប្រៀប​ធៀបឆ្នាំ ​២០២៤៕​

​អត្ថបទ៖ ឡេង ដេត​

The post ​ក្រុមហ៊ុន​រដ្ឋ​ចិន​ បង្កើន​ការ​បញ្ជាទិញ​ដំឡូងមី​ពី​កម្ពុជា​ ១ លានតោន​ appeared first on Kampuchea Thmey Daily.

​លោក អិល ឈិញ ប្រធានសមា​គមកសិករដំឡូងមីខ្មែរ ​ប្រាប់កម្ពុជាថ្មីថា​ តម្លៃដំឡូងមីស្រស់​បាន​​កើន​ឡើងវិញដល់ជាង ​៣០០ រៀល ​ក្នុង​មួយ​គីឡូក្រាម ​ចាប់​តាំង​ពី​ដើម​ខែ​កុម្ភៈ ​ឆ្នាំ ២០២៦ ​ដោយសារការកើនឡើងនៃតម្រូវការសកល។

​លោក អិល ឈិញ ​បញ្ជាក់ថា៖ «តម្លៃដំឡូងមីស្រស់នៅភាគខាងជើង ​២៩០ រៀល ក្នុងមួយគីឡូ ​នៅ​ភូមិ​ភាគ​កណ្ដាល ​មានខេត្តកំពង់ធំ ​ខេត្តកំពង់ចាម ឡើងដល់ ៤០០ រៀល ក្នុងមួយគីឡូ ​និង​ភាគខាងលិច​​មាន​ខេត្ត​បាត់​ដំបង​ ខេត្តប៉ៃលិន ​ឡើង​ដល់ជាង​ ៣០០ រៀល ក្នុង​មួយគីឡូក្រាម​»។​

​បើតាម​ប្រធានសមាគមដំឡូងមី នៅក្នុង​ឆ្នាំ ២០២៦ ​កសិករ​ភាគច្រើន​ធ្វើដំឡូងមីស្ងួត ​ដែល​ទទួល​បាន​តម្លៃ​ខ្ពស់ ​រហូតដល់ជាង ​៦០០ រៀល ​ក្នុង​មួយគីឡូក្រាម។ ទីផ្សារដំឡូងមីកម្ពុជា ​មាន​ប្រទេស​វៀតណាម ចិន​ និងការប្រើប្រាស់ក្នុងស្រុក។ ​

អ្នកស្រី សុខ ​ឃឿន កសិករ​ដាំដុះដំឡូងមី​នៅស្រុក​បាណន់ ​ខេត្តបាត់ដំបង ​បានប្រាប់ឱ្យដឹងថា ​ផល​ដំឡូងមី​ឆ្នាំនេះ​លូតលាស់ល្អ ​​និងប្រមូលផលបានច្រើនជាងឆ្នាំមុនស្រប​ពេល​ទីផ្សារ​ក៏ល្អផងដែរ។ ​

​កសិកររូបនេះ ​អះអាង​ថា ដំឡូងមីស្រស់ឆ្នាំនេះ​លក់​បាន​តម្លៃ ២៣០ រៀលក្នុង ១ គីឡូក្រាម ខណៈ​ឆ្នាំ​មុនលក់បាន ១៥០ រៀល ក្នុងមួយគីឡូក្រាម។​

​រាជរដ្ឋាភិបាល​បានខិតខំ​ជំរុញ ​និង​ពង្រីកទីផ្សារនាំចេញដំឡូងមី​រហូតដល់ប្រមាណ ​១០ លានតោន ទៅកាន់ទីផ្សារអន្តរជាតិនៅក្នុងឆ្នាំ ២០២៥​។ ​

នៅក្នុងខែមករា ​ឆ្នាំ ២០២៦ ​កម្ពុជានាំចេញដំឡូងមីសម្រេចបាន ​១៦១ ​លានដុល្លារ ​កើនឡើង ៩២,២៩% ប្រៀបធៀបនឹងរយៈពេលដូចគ្នាកាលពីឆ្នាំមុន​។

យោងតាមក្រសួងពាណិជ្ជកម្ម នៅ​ក្នុង​ឆ្នាំ ​២០២៥ ​កម្ពុជា​រក​ចំណូលបាន ​៦៤៦ ​លានដុល្លារ ​ពីការនាំចេញដំឡូងមី ​ធ្លាក់ចុះ ១៤,៤៨% ​ប្រៀបធៀប​នឹង​ឆ្នាំ ​២០២៤។​

បរិមាណ​នាំ​ចេញ​ដំឡូងមីស្រស់មានចំនួន ​៣ ១០៥ ៥០០ តោន ធ្លាក់​ចុះ​ ៩,៨២% នៅក្នុងឆ្នាំ ២០២៥ រីឯចំណិតដំឡូងមីក្រៀម​បាន​កើនឡើង ៦២,២២% ដែលមានចំនួន ១ ៥៦៥ ៩៤០ តោន ប្រៀបធៀបឆ្នាំ ២០២៤៕

អត្ថបទ៖ ឡេង ដេត

The post ​ទីផ្សារ​ដំឡូងមីកម្ពុជា​​ស្ទុះ​ឡើង​វិញ ដោយសារតម្រូវ​ការសកល​ appeared first on Kampuchea Thmey Daily.

​អ្នកស្រី វ៉ាន់ សាវឿន កសិករដាំដុះដំឡូងមី ​នៅក្នុងខេត្តបាត់​​ដំបង​ បានប្រាប់ឱ្យដឹងថា​ ទិន្នផល​ដំឡូងមី​អ្នកស្រីឆ្នាំនេះ​ហុចផលតាមការរំពឹងទុក ទាំងបរិមាណ ​និង​គុណភាព ធ្វើឲ្យអ្នកស្រី​សប្បាយ​ចិត្ត ​ដោយគ្រួសារអ្នកស្រីមានចំណូលថវិកាបានគួរសមជាងឆ្នាំមុន​ ខណៈ​ឆ្នាំ​មុនដំឡូង​មីអ្នកស្រី មិនសូវមានមើមធំៗនោះទេ និងបានខូចខាតខ្លះៗ។​

បើតាមការបញ្ជាក់ពីអ្នកស្រី វ៉ាន់ សាវឿន សម្រាប់ទីផ្សារឆ្នាំនេះ មិនមានការប្រឈមនោះទេ បើទោះ​ទិន្នផលឆ្នាំនេះ អ្នកស្រីទទួលបានទិន្នផលហួសពីការរំពឹងទុក ខណៈគ្រាដែលដំណាំដំឡូងមីអ្នកស្រី​ដែលត្រៀម និងប្រមូលផល អ្នកស្រីមានការបារម្ភពីបញ្ហាទីផ្សារមានការកកស្ទះ តែជាលទ្ធផល ទីផ្សារនៅតែល្អ។

អ្នកស្រីបន្តថា ក្រោយអ្នកស្រីប្រមូលទិន្នផល មានឈ្មួញមកកក់ទុកជាស្រេច ដោយអ្នកស្រីលក់បានចន្លោះពី ​២៧០-​២៩០​ រៀល ក្នុងមួយគីឡូក្រាម (មើមសម្រស់) និងមើមស្ងួតលក់បានចន្លោះពី ៥៨០-៦០០រៀល ក្នុង១គីឡូក្រាម៕

​អត្ថបទ៖ សៅ សារិទ្ធ

The post ទិន្នផលដំឡូងមីកើនឡើង ជាមួយនឹងតម្លៃទីផ្សារមានស្ថិរភាព​​ appeared first on Kampuchea Thmey Daily.