​លោក ឡុង សំណាង ​ប្រធានផ្នែកប្រឹក្សា​យោបល់ហិរញ្ញវត្ថុក្រុមហ៊ុន ​PP Link securities ​មានប្រ​សា​សន៍ថា ​ស្ថានភាពពិភពលោក​រឹតតែធ្វើឱ្យមានការភ័យខ្លាច​ ខណៈអ្នកវិនិយោគធំៗ​មួយចំនួន ​មិន​មើល​​​ឃើញ​ការជួញដូរអ្វី​ក្រៅតែពីតម្លៃហាងឆេងមាស។​

​លោក ឡុង សំណាង ​បញ្ជាក់ថា៖ ​«វិនិយោគិនធំៗ គេកត់ចំណាំទុកថា ​តើ​ពេល​ដែលមានសង្គ្រាម ​មានវិបត្តិសេដ្ឋកិច្ចកើតឡើង ​តើអាជីវកម្មមួយណាដែលល្អជាងគេបំផុត ​មានតែហាង​ឆេង​មាសទេ ​ដែលមានសុវត្ថិភាពបំផុត​ ហើយរកផលចំណេញបានច្រើន​ ព្រោះតម្រូវការ​មាស​កើន​ឡើង​សម្រាប់​ប្រទេស​ទិញទុកសម្រាប់ការពារហានិភ័យ»។​

​យោងតាមប្រព័ន្ធផ្សព្វផ្សាយ​របស់អាមេរិក ​តម្លៃមាសបានហក់ឡើងខ្ពស់បំផុត ​៥៤៨០ ​ដុល្លារ ​ក្នុងមួយតម្លឹង ស្មើនឹងជាង ៦០% ​នៅក្នុងឆ្នាំ ២០២៥។

​លោក ឡុង សំណាង បានបញ្ជាក់បន្ថែមថា តម្លៃហាងឆេងមាស នឹងបំបែកកំណត់ត្រាថ្មី​ដល់ ៥៦០០ ដុល្លារ ក្នុងមួយតម្លឹងនៅដើមឆ្នាំ ២០២៦ នេះ។

​គិតត្រឹមម៉ោង ៩ ព្រឹកថ្ងៃទី ០៦ ខែមករា ឆ្នាំ ២០២៦ តម្លៃមាសក្នុងស្រុកលក់ចេញ ៥៤០ ដុល្លារ ក្នុងមួយជី កើនឡើង ១០ ដុល្លារ ធៀបនឹងថ្ងៃសុក្រចុងសប្ដាហ៍មុន ៥៣០ ដុល្លារ មួយជី៕

អត្ថបទ៖ ឡេង ដេត

The post ​តម្លៃមាស​នឹង​បំបែក​កំណត់ត្រា​ថ្មីខ្ពស់បំផុត ​៥៦០០ ​ដុល្លារ ​មួយតម្លឹង ​នៅដើមឆ្នាំនេះ​ appeared first on Kampuchea Thmey Daily.

​លោក ឡុង សំណាង ​ប្រធានផ្នែកប្រឹក្សា​យោបល់ហិរញ្ញវត្ថុក្រុមហ៊ុន ​PP Link securities ​មាន​ប្រសាស​ន៍​ថា ​ភាគរយ​នៃការកាត់បន្ថយ​អត្រា​ការប្រាក់ខ្ពស់​ដែល​ធនាគារកណ្ដាលអាមេរិក មានគោលដៅ​ទម្លាក់​មក​នៅ ៣.៧៥% ខណៈអត្រាការប្រាក់ចាស់ឈរនៅ ៤% ​ដែលព័ត៌មាននេះ ​រុញច្រានឱ្យតម្លៃមាស​កើនឡើង​។

​លោក ឡុង សំណាង ​បាន​បញ្ជាក់ថា ​នៅ​ពេល​មានវិបត្តិសេដ្ឋកិច្ចកើតឡើង ​វិនិយោគិនធំៗ និង​ធនា​​គារ​ឯកជននៅលើពិភពលោក​គិតថា​ មាន​តែហាងឆេងមាសទេ​ ដែល​មានសុវត្ថិភាព​ ហើយ​នាំគ្នា​សម្រុក​ទិញមាសទុក ​ដោះស្រាយនៅ​ពេល​​ប្រទេសរបស់ខ្លួន​មាន​បញ្ហា ដែល​នាំ​ឱ្យ​មាស​កើន​ឡើង​។

សម្រាប់ហាងនានាក្នុងរាជធានីភ្នំពេញ លក់ចេញក្នុងតម្លៃ ៥០៨ ដុល្លារ ក្នុងមួយជីនៅព្រឹកថ្ងៃទី ២៩ ខែវិច្ឆិកា ឆ្នាំ ២០២៥៕

អត្ថបទ៖ ឡេង ដេត

The post ​តម្លៃមាស​បាន​ស្ទុះឡើងវិញដល់ជិត ៥១០០ ដុល្លារ មួយតម្លឹង​ មុន​ពេល​អាមេរិក​កាត់បន្ថយ​អត្រាការប្រាក់​ appeared first on Kampuchea Thmey Daily.

គិតត្រឹមម៉ោង ៩ ព្រឹកនេះ ​តម្លៃមាស​បានហក់ឡើងដល់ ​៥ ១០០ ​ដុល្លារ ​ក្នុងមួយតម្លឹង ដោយ​សារ​អាមេរិកត្រៀមកាត់បន្ថយអត្រាការប្រាក់ម្ដងទៀតនៅចុងឆ្នាំនេះ។

​លោក ឡុង សំណាង ​ប្រធានផ្នែកប្រឹក្សាយោបល់ហិរញ្ញវត្ថុក្រុមហ៊ុន ​PP Link securities កត្តា​ដែល​រុញច្រានឱ្យតម្លៃហាងឆេងមាស​កើនឡើងខ្លាំង ​គឺពាក់ព័ន្ធជាមួយ​នឹងទំនុកចិត្ត ​ទាំងវិនិយោគិន ​និងធនាគារ ​ដែលគេមើលឃើញថា ​ប្រាក់ដុល្លារ ទោះបីជារក្សាអត្រាការប្រាក់ក៏ដោយ ​ឬក៏​ដំឡើង​អត្រាការប្រាក់ក៏ដោយ​គ្រាន់តែទប់​ក្នុងការ ការពារ​អត្រា​អតិ​ផរណា​កើនឡើងតែប៉ុណ្ណោះ​។

​អ្នកស្រី ហ៊ង រីណា ​អាជីវករលក់មាសផ្សារធំថ្មី ​បានឱ្យដឹងថា ​តម្លៃមាសបានកើនឡើងរាល់ថ្ងៃ ​ខណៈ​សកម្មភាពទិញ-លក់ស្ងប់ស្ងាត់ ​ដោយសារការបារម្ភរបស់អតិថិជន។​

អាជីវកររូបនេះ បាន​បញ្ជាក់ថា មានអតិថិជនមួយៗទិញដែរ ប៉ុន្តែទិញជាដុំមាសជាគីឡូ ខណៈគ្រឿង​មាស​លែង​មានជួញដូរហើយ៕

អត្ថបទ៖ ឡេង ដេត

The post ​តម្លៃមាស ​បន្ត​កើន​ឡើង​បំបែក​កំណត់​ត្រាថ្មី​ appeared first on Kampuchea Thmey Daily.

​លោក ឡុង សំណាង ​ប្រធានផ្នែកប្រឹក្សាយោបល់ហិរញ្ញវត្ថុក្រុមហ៊ុន ​PP Link securities មាន​ប្រសាសន៍ថា​ គិតត្រឹមម៉ោង ៨៖០០ ព្រឹកថ្ងៃទី ១៤ ខែតុលា ឆ្នាំ ២០២៥ ហាងឆេងមាស​មានតម្លៃ ៥០០០ ​ដុល្លារ ក្នុងមួយតម្លឹងដោយ​សារ​អាមេរិកត្រៀមកាត់បន្ថយអត្រាការប្រាក់ម្ដងទៀតនៅចុងឆ្នាំនេះ ប៉ុន្តែត្រូវ​បានរំខាន​ដោយ​អតិផ​រ​ណា ដោយសារតែនៅ​ខណៈនេះ អត្រាអតិផរណានៅសហរដ្ឋ​អាមេរិកបាន​កើនឡើងខ្ពស់ ដែល​ធ្វើ​ឱ្យ​ធនា​គារកណ្ដាលពិបាកក្នុងការសម្រេចចិត្តកាត់បន្ថយអត្រាការប្រាក់។

លោក ឡុង សំណាង បន្ថែមថា៖ «កត្តាសំខាន់បំផុតដែលរុញច្រានឱ្យតម្លៃហាងឆេងមាស​កើន ឡើងខ្លាំង ​គឺពាក់ព័ន្ធជាមួយ​នឹងទំនុកចិត្ត ​ទាំងវិនិយោគិន ​និងធនាគារ ​ដែលគេមើលឃើញថា ​ប្រាក់ដុល្លារ ទោះបីជារក្សាអត្រាការប្រាក់ក៏ដោយ ​ឬក៏ដំឡើងអត្រាការប្រាក់ក៏ដោយ​គ្រាន់តែទប់​ក្នុងការ ការពារ​អត្រា​អតិផរណា​កើនឡើងតែប៉ុណ្ណោះ»។​

​ស្ថានភាពគោលនយោបាយដឹកនាំប្រទេសរបស់អាមេរិក ​កំពុងជួបប្រទះ​ក្នុងការ Lockdown រដ្ឋាភិ​បាលធ្វើឱ្យ​ស្ថាន​ភាពនៅអាមេរិក​កំពុងតែច្របូកច្របល់​ហើយ​ប្រាក់ដុល្លារថយចុះ ខណៈស្ថានភាព​សង្គ្រាម​នៅតែបន្ត។

លោកបណ្ឌិត ជ័យ តិច អ្នកស្រាវជ្រាវការអភិវឌ្ឍសង្គម-សេដ្ឋកិច្ច យល់ឃើញថា៖ «មាស និងថាមពលដើរបញ្ច្រាស់គ្នា ជាធម្មតា នៅពេលដែលមាសឡើងថ្លៃ គឺប្រេងចុះថោក នៅពេលដែលប្រាក់ដុល្លារចុះថោកមាសក៏ឡើងថ្លៃដែរ នេះគឺវាពាក់ព័ន្ធបញ្ហាភូមិសាស្ត្រនយោបាយ នៅពេលដែលភូមិសាស្ត្រនយោបាយ ឬក៏សង្គ្រាមផ្សេងៗ កើតឡើងគឺវាធ្វើឱ្យតម្រូវ ការមានការថយចុះ មានន័យថា ការផលិតថយចុះ ដូច្នេះតម្រូវការនៃថាមពលមានការថយចុះ ដូច្នេះតម្លៃប្រេងសាំងមានការចុះថ្លៃ»។

លោកបណ្ឌិត ជ័យ តិច បន្ថែមថា នៅពេលដែលសេដ្ឋកិច្ចមិនច្បាស់លាស់ គឺធ្វើឱ្យអ្នកវិនិយោគស្ទាក់ស្ទើក្នុងការដាក់ទុន សេដ្ឋកិច្ចមានភាពមិនច្បាស់លាស់ ដូច្នេះ អ្វីដែលជាទំនុកចិត្តគឺការជឿជាក់ទៅលើមាស នៅពេលដែលសេដ្ឋកិច្ចមិនច្បាស់លាស់មាសគឺជាទំនុកចិត្តដ៏ខ្ពស់ ដែលតម្រូវឱ្យមានការទិញចូល ធ្វើឱ្យតម្លៃកើនឡើង៕

អត្ថបទ៖ ឡេង ដេត

​

The post ​តម្លៃ​មាស​បំបែក​កំណត់​ត្រា​ខ្ពស់​បំផុត ៥ ០០០ ​ដុល្លារ មួយ​តម្លឹង​ appeared first on Kampuchea Thmey Daily.

​លោក ឡុង សំណាង ​​ប្រធានផ្នែកប្រឹក្សាយោបល់ហិរញ្ញវត្ថុនៅក្រុមហ៊ុន ​PP Link securities ​បាន​ឱ្យ​ដឹងថា គិតចាប់​ពីថ្ងៃទី ​១៨ ​ខែកញ្ញានេះទៅ ​តម្លៃមាស​នឹងធ្លាក់ចុះបន្តិចម្ដងៗ​ ក្រោម​ឥទ្ធិពល​នៃ​ការកាត់បន្ថយអត្រាការប្រាក់រួចរាល់ហើយរបស់អាមេរិក។​

​​​ធនាគារកណ្តាលសហព័ន្ធអាមេរិក (Fed) បានកាត់បន្ថយអត្រាការប្រាក់ ២៥ ពិន្ទុ កាលពីថ្ងៃពុធ ដែល​នេះជាការកាត់បន្ថយលើកដំបូងរាបត់ាំងពីចុងឆ្នាំមុន ដោយ​លើកឡើងពីកង្វល់អវិជ្ជមាន​ក្នុងវិស័យការងារ ដែលជាសញ្ញាមិនល្អសម្រាប់សេដ្ឋកិច្ច។​

ការកាត់បន្ថយ ២៥​ ពិន្ទុ ឬ ០,២៥ ភាគរយ មាន​ន័យថា អត្រាការប្រាក់គោលរបស់ Fed បច្ចុប្បន្ន​ ត្រូវបាន​ទម្លាក់មកត្រឹម ៤,០-៤,២៥ ភាគរយ។ ​

​លោក ឡុង សំណាង​ បញ្ជាក់ថា៖ «កាលពីមួយខែមុន ​ឥទ្ធិពលនៃការកាត់បន្ថយអត្រាការប្រាក់ ​នរណាក៏ដឹងលឺ ហើយគ្រប់គ្នាច្បាស់ថា ​នឹងកាត់បន្ថយអត្រាការប្រាក់ ០,២៥% ​អញ្ចឹងគេនាគ្នា​ទិញ​តាំងពីមួយខែមុន ​ដើម្បីកាត់ចំណេញ​នៅថ្ងៃទី ១៧ ​ពោលគឺមានការលក់​ចេញពីទីផ្សារច្រើន ​ធ្វើឱ្យ​ធ្លាក់ចុះបន្តិចៗម្ដងៗ ​រហូតដល់មានព័ត៌មាន​ដែល​ទាញ​ឱ្យមាសកើនឡើងវិញ ​ឬរហូតដល់ពេល​វេលា​នៃការកាត់បន្ថយអត្រាម្ដងទៀត ​ព្រោះដោយសារ​នៅចុងឆ្នាំនេះ គេងនឹងកាត់បន្ថយអត្រា​ការ​ប្រាក់ ៣ ដង ហើយ​កាត់​ម្ដង​ហើយ នៅសល់ ២ ដង​ទៀត អញ្ចឹង​វា​នឹង​កើន​ឡើង»។​ ​តម្លៃ​មាស​អាច​នឹង​ទម្លាក់​ខ្លួន ​មក​​នៅ​ត្រឹម ៤៣៣៨ ​ដុល្លារ ​ក្នុង​មួយ​តម្លឹង​។

​បើ​តាម​ លោក ឡុង សំណាង ការកាត់បន្ថយអត្រាការប្រាក់មានការជំរុញខ្លាំង ពីលោក ដូណាល់ ត្រាំ ដោយសារតែការទម្លាក់អត្រាការប្រាក់ធ្វើឱ្យលុយដុល្លារធ្លាក់ចុះ រដ្ឋាភិបាលអាមេរិកចង់​ឱ្យអ្នក​វិនិយោគ ទៅរកស៊ីនៅអាមេរិក។

លោក ឡុង សំណាង បន្ថែមថា៖« ពេលដែលកាត់បន្ថយអត្រាការប្រាក់ វាទាញវិនិយោគិនធំៗ ទៅអា​មេរិកតែម្ដង ហើយធ្វើឱ្យវិនិយោគិនធំៗ ខ្ចីលុយអាមេរិកយកទៅរកស៊ី អញ្ចឹងអាមេរិកចំណេញ​​ទាំងការប្រាក់ និងវិនិយោគ ការអភិវឌ្ឍ កំណើន​ការងារ ដែលសេដ្ឋកិច្ចអាមេរិកនៅតែល្អ»។​

​លោក ឡុង សំណាង បញ្ជាក់ថា ការកាត់បន្ថយអត្រាការប្រាក់ ០,២៥% ​មិនទាន់ដល់គោលដៅដែល លោក ដូ ណាល់ត្រាំ ​ចង់បានទេ ​ដែលត្រាំចង់បានគឺ ​ក្រោម ៣.00% ​ហើយការកាត់បន្ថយនៅ ២ ដងទៀត ​នៅចុងឆ្នាំនេះ។

​ទោះយ៉ាងណា តម្លៃមាសនៅតែបន្តឡើងដល់ដំណាច់ឆ្នាំ ២០២៥ ដោយសារកំណើននៃការងារអត់ការងារធ្វើ នៅអា​មេរិក និង​ប្រាក់ចំណូលមិនមានការកើនឡើង ដែលរុញឱ្យអតិផរណាកើន ឡើង​ដែលរុញច្រាន​ឱ្យមាស​កើន​ឡើង៕​

អត្ថបទ៖​ ឡេង ដេត

The post តម្លៃមាស​ធ្លាក់ចុះបន្តិច ក្រោយកាត់បន្ថយអត្រាការប្រាក់ appeared first on Kampuchea Thmey Daily.

លោក ឡុង សំណាង ប្រធានផ្នែកប្រឹក្សាយោបល់ហិរញ្ញវត្ថុក្រុមហ៊ុន ​PP Link securities បានឱ្យដឹងនៅថ្ងៃទី ១៩ ខែមិថុនា ឆ្នាំ ២០២៥ ថា គិតចាប់ពីពេលនេះ រហូតដល់ដំណាច់ឆ្នាំ នៅសល់ការ​ទម្លាក់ ឬដំឡើងអត្រាការប្រាក់របស់អាមេរិកប្រមាណ ២ ដងទៀត ដែលអាមេរិកអាចនឹងទម្លាក់អត្រាការប្រាក់នៅចុងឆ្នាំ នឹងធ្វើឱ្យប្រាក់ដុល្លារចុះខ្សោយនៅក្នុងដំណាក់កាលនោះ។

លោក ឡុង សំណាង បន្ថែមថា៖ «អ្វីដែលយើងពិចារណា គឺអាមេរិកកំពុងតែរក្សានូវកម្រិតប្រាក់ដុល្លារឱ្យមានលំនឹងមួយដោយសារតែមិនអាចទម្លាក់ឥឡូវបានទេ បើទម្លាក់ឥឡូវហាក់ដូចជាវាធ្លាក់​​ថោក​ខ្លាំងពេក អញ្ចឹងរក្សាឱ្យមានលំនឹងទីផ្សារជាមួយនិងអតិផរណាឱ្យបានត្រឹមត្រូវបន្តិចសិន ពាក់ព័ន្ធជាមួយនឹងថ្លៃទំនិញ ឬសេវាកម្មផ្សេងៗ»។

លោក ឡុង សំណាង យល់ថា៖ «នៅក្នុងឆ្នាំ ២០២៥ ខ្ញុំមើលឃើញកត្តាមួយចំនួន ដែលអាច​ធ្វើឱ្យតម្លៃហាងឆេងមាសបន្តកើនឡើង ទី១ អត្រាការប្រាក់នៅខ្ពស់ គេអាចនឹងកាត់​បន្ថយអត្រា​ការ​ប្រាក់ លុយដុល្លារអាមេរិកនឹងធ្លាក់ចុះ»។

បើតាមលោក ឡុង សំណាង សម្ពាធពន្ធហាក់បីដូចជាស្ងាត់បន្តិច ប៉ុន្តែវាមិនទាន់ចប់សព្វគ្រប់ និងកំណត់ពន្ធបានត្រឹម​ត្រូវនៅឡើយទេ ដរាបណាមានលោក ដូណាល់ ត្រាំ​ ជាប្រធានាធិបតីអាមេរិក តម្លៃមាស​នៅតែកើនឡើង។

សង្គ្រាមរុស្ស៊ី-អ៊ុយក្រែន មិនទាន់មានសញ្ញាបញ្ជាក់ថា សន្តិភាព ព្រមទាំង​បណ្ដាប្រទេស​មួយចំ​នួន​ទៀត ដូចជាអ៊ីរ៉ង់-អ៊ីស្រាអែល ដែលសុទ្ធតែជាកត្តាធ្វឱ្យមាសកើនឡើង។

គិតត្រឹមម៉ោង ១០ ព្រឹកថ្ងៃទី ១៩ ខែមិថុនា ឆ្នាំ ២០២៥ មាសជួញដូរក្នុងតម្លៃ ៤០៦៨ ដុល្លារ ក្នុងមួយតម្លឹង។ សម្រាប់​ហាងលក់មាសនៅក្នុងរាជធានីភ្នំពេញ លក់ចេញក្នុងតម្លៃ ៤០៨ ដុល្លារ ក្នុង​មួយជី៕

អត្ថបទ៖ ឡេង ដេត

The post តម្លៃហាងឆេងមាសធ្លាក់ចុះបន្តិច ក្រោយអាមេរិករក្សាអត្រាការប្រាក់ ៤,៥%ដដែល appeared first on Kampuchea Thmey Daily.

តាមការចុះផ្សាយរបស់ទីភ្នាក់ងារសារព័ត៌មាន​រ៉យទ័រ តម្លៃមាស​បាន​ហក់ឡើងដល់ ៣ ០៣៨ ដុល្លារ/អោន ក្នុងការជួញដូរ​កាលពីថ្ងៃអង្គារម្សិលមិញ ដែល​នេះ​ជាតម្លៃខ្ពស់បំផុត​ក្នុងប្រវត្តិសាស្រ្ត​។ រាប់តាំងពីដើមឆ្នាំ ២០២៥ មក តម្លៃមាស​បាន​កើនឡើង ១៤ ភាគរយ ​ខណៈ​បំបែកកំណត់ត្រាខ្ពស់បំផុត​ក្នុងប្រវត្តិសាស្រ្ត​ប្រមាណ ១៤ ដងរួចទៅហើយ​ រាប់តាំងប្រធានាធិបតីអាមេរិក លោក ដូណាល់ ត្រាំ ឡើង​កាន់អំណាច​នៅ​ខែមករា​។

អ្នកជំនាញលើកឡើងថា ការព្រួយបារម្ភសេដ្ឋកិច្ចក្រោមសង្រ្គាម​ពាណិជ្ជកម្មដោយសារតែពន្ធគយ​ ការទិញ​របស់ធនាគារកណ្ដាល និង​បញ្ហា​ភូមិសាស្រ្តនយោបាយ​ គឺជា​មូលហេតុសំខាន់ៗ​ដែល​ធ្វើឱ្យ​តម្លៃមាសហក់ឡើងជាបន្តបន្ទាប់។ ការណ៍នេះហើយ ធ្វើឱ្យបណ្ដា​ធនាគារ​ផ្សេងៗ​បន្ត​បង្កើនការព្យាកររបស់ខ្លួន។

ធនាគារ​វិនិយោគស្វីស UBS បាន​ចេញការ​ព្យាករកាលពីថ្ងៃអង្គារ​​ថា​ តម្លៃមាសនឹង​ហក់ឡើងដល់ ៣ ២០០ ដុល្លារ/អោន ឆ្នាំនេះ ខ្ពស់ជាងការព្យាករ ៣ ០០០ ដុល្លារ/អោន កាលពីលើកមុនរបស់ខ្លួន ​ដែលជំរុញដោយ​កំណើនតម្រូវការវិនិយោគលើ​ទ្រព្យសម្បត្តិសុវត្ថិភាពមួយនេះ។

ក្រៅពីបញ្ហា​ពន្ធគយរបស់ ត្រាំ អ្នកវិភាគរបស់ UBS បាន​សរសេរ​ក្នុងកំណត់ត្រារបស់ខ្លួន​ថា មាស​ «ក៏នឹងទទួលបានអត្ថប្រយោជន៍ផងដែរពីទស្សនវិស័យកាន់តែអាក្រក់សម្រាប់សេដ្ឋកិច្ចអាមេរិក ដោយពាណិជ្ជករឥឡូវនេះ​រំពឹង​ពី​ការកាត់បន្ថយអត្រាការប្រាក់បន្ថែមទៀតពី​ធនាគារកណ្តាលសហព័ន្ធអាមេរិក​ ដោយសារតែការព្រួយបារម្ភអំពី​កំណើន​វិបត្តិសេដ្ឋកិច្ច»។

នៅថ្ងៃអង្គារដដែល ធនាគារ ANZ បាន​ព្យាករថា​ តម្លៃមាសក្នុងរយៈពេល ៣ ខែទៅមុខ នឹង​ឡើងដល់ ៣ ១០០ ដុល្លារ/អោន និង ៦ ខែទៅមុខ នឹង​ឡើងដល់ ៣ ២០០/អោន ខណៈធនាគារ Macquarie Group បានព្យាករថា តម្លៃនេះអាចឡើងដល់ ៣ ៥០០ ដុល្លារ គិតត្រឹមដើមត្រីមាស​ទី ៣​ ឆ្នាំ ២០២៥។ ​

ធនាគារ​អាមេរិក Goldman Sachs ឯណោះវិញ បាន​បង្កើនការព្យាកររបស់ខ្លួន​ត្រឹម​ ៣ ១០០ ដុល្លារ/អោន ​ដោយ​លើកឡើងពីកំណើនតម្រូវការ​របស់​បណ្ដាធនាគារកណ្ដាល​នៃប្រទេសផ្សេងៗ សម្រាប់​ទុន​បម្រុង​របស់ខ្លួន។

អ្នកវិភាគរបស់ធនាគារ​បានសរសេរ​កាលពីពេលថ្មីៗថា​ ភាពមិនប្រាកដប្រជា​កំពុង​បន្ត ដូចជាការព្រួយបារម្ភអំពីពន្ធគយ ហានិភ័យភូមិសាស្ត្រនយោបាយ ឬការខ្ចីប្រាក់ពីរដ្ឋាភិបាលខ្ពស់ អាចនាំឱ្យអ្នក​ក្រឡុកទីផ្សារ​បង្កើនការវិនិយោគរបស់​ខ្លួន​លើមាស។ នេះ អាចជំរុញឱ្យតម្លៃមាសឡើងខ្ពស់ដល់ ៣ ៣០០ ដុល្លារ/អោន ត្រឹមចុងឆ្នាំ ២០២៥​៕

The post បណ្ដាធនាគារ​អន្តរជាតិ​ធំៗ បង្កើន​ការ​ព្យាករ​តម្លៃ​មាស​​​ជាថ្មី appeared first on Kampuchea Thmey Daily.

ធនាគារព្យាករថា តម្រូវការរបស់ធនាគារកណ្តាលខ្ពស់ ក៏ដូចជា​កំណើនមាសក្នុងមូលនិធិវិនិយោគ​ នឹងបង្កើនតម្លៃមាស ៩ ភាគរយ ត្រឹម​ចុងឆ្នាំ ២០២៥​។ ភាពរឹងមាំនៃតម្រូវការដូច្នេះ នឹងធ្វើឱ្យ​មាសឡើងថ្លៃ ទោះ​បីជា​ក្នុងសេណារីយ៉ូដែល​ភាព​ស្រពិចស្រពិលសកលថយចុះ ហើយ​ការលក់មាសចេញរបស់​អ្នកវិនិយោគកើនឡើង​​ក៏ដោយ​។

លើសពីនេះ​​ ក្នុងសេណារីយ៉ូដែលថា គោលនយោបាយមិនច្បាស់លាស់ រួមទាំងវិធានការពន្ធ នៅតែបន្តខ្ពស់ នោះ​តម្លៃមាសអាចហក់ឡើងរហូតដល់ ៣ ៣០០ ដុល្លារ/អោន ត្រឹមចុងឆ្នាំ។

ជាមួយគ្នា​នោះ Goldman Sachs បាន​បង្កើន​ការ​ព្យាករ​ពី​តម្រូវការ​របស់​ធនាគារ​កណ្តាល​ដល់ ៥០ តោន​/​ខែ ដោយ​​កើនឡើង​ពី ៤១ តោន/ខែ។ ធនាគារ​ដដែល​បន្ត​ព្យាករថា​ ​ប្រសិនបើការទិញជាមធ្យមកើនដល់ ៧០ តោន/ខែ ​នោះតម្លៃមាសអាចឡើងដល់ ៣ ២០០ ដុល្លារ ក្នុងលក្ខខណ្ឌដែលថាការជួញដូររបស់អ្នកវិនិយោគ​មាន​ស្ថេរភាព​។​

គួរគូស​បញ្ជាក់ថា​ អ្នកជំនាញ​បាន​លើកឡើងថា តម្លៃមាសនឹង​បន្ត​កើន​ឡើង​នៅឆ្នាំ ២០២៥​ ចំពេល​ដែល​​បណ្ដាធនាគារ​បន្តទិញមាសទុកសម្រាប់ទុនបម្រុង​របស់​ខ្លួន ចំពេល​ភាពមិនប្រាកដជាសកលកើនឡើងដោយសារជម្លោះពាណិជ្ជកម្ម​ គោលនយោបាយពន្ធគយ និង​ជម្លោះភូមិសាស្រ្តនយោបាយ​។ កាលពីដើមខែនេះ ក្រុមហ៊ុនធនាគារវិនិយោគ Citigroup Inc បាន​ព្យាករថា តម្លៃមាសនឹង​កើនដល់ ៣ ០០០ ដុល្លារ/អោន។

នៅថ្ងៃអង្គារ (១៨ កុម្ភៈ) តម្លៃមាសអន្តរជាតិ​ជួញដូរ​ ២ ៩១៤ ដុល្លារ/អោន កើនឡើង ០,៦ ភាគរយ ធៀប​នឹង​តម្លៃបញ្ចប់ការជួញដូរនៅថ្ងៃចន្ទ​។ តម្លៃទ្រព្យសម្បត្តិសុវត្ថិភាព​នេះ បាន​កើនឡើងដល់​កម្រិតកំណត់ត្រាជាបន្តបន្ទាប់ក្នុងរយៈពេល​ប៉ុន្មានសប្ដាហ៍ចុងក្រោយ​ និងខ្ពស់បំផុតចុង​ក្រោយ​ដល់ ២ ៩៤២,៧០ ដុល្លារ/អោន នៅថ្ងៃទី ១១ កុម្ភៈ៕

The post Goldman Sachs បង្កើនការព្យាករតម្លៃមាស​​ឆ្នាំនេះ​ ដល់ ៣​ ១០០ ដុល្លារ/អោន appeared first on Kampuchea Thmey Daily.