យោងតាមការវាយតម្លៃរបស់ FIFA ដែលបានធ្វើបច្ចុប្បន្នភាពកាលពីថ្ងៃទី ០១ ខែ មេសា ឆ្នាំ ២០២៦ បានឱ្យដឹង ថា ក្រុមជម្រើសជាតិ កម្ពុជា ឡើង ៣ ចំណាត់ថ្នាក់ពីលេខ ១៨០ ទៅលេខ ១៧៧។ ដោយឡែកក្រុមនៅ អាស៊ាន ផ្សេងទៀត គឺ ទីម័រខាង​កើត​ ស្ថិតនៅលេខខ ២០០, ប្រ៊ុយណេ ស្ថិតនៅលេខ ១៩៣, ឡាវ ស្ថិតនៅលេខ ១៨៥, និង​មីយ៉ាន់ម៉ា ស្ថិតនៅលេខ ១៥៨។

ក្រុម សិង្ហបុរី ស្ថិតនៅលេខ ១៤៧, ក្រុម ហ្វីលីពីន ស្ថិតនៅលេខ ១៣៥។ ចំណែក ម៉ាឡេស៊ី វិញស្ថិតនៅចំណាត់ថ្នាក់លេខ ១៣៨, ឥណ្ឌូណេស៊ី ស្ថិតនៅចំណាតថ្នាក់លេខ ១២២, ក្រុមជម្រើសជាតិ វៀតណាម ស្ថិតនៅលេខ ៩៩ និងចុងក្រោយ ថៃ ស្ថិតនៅលេខ ៩៣។

ការឡើងចំណាត់ថ្នាក់របស់ក្រុម កម្ពុជា គឺបានធ្វើឱ្យអ្នកគាំទ្រចាប់អារម្មណ៍ជាខ្លាំង ដោយសារថ្ងៃ FIFA’s Day នៃខែ មេសា​ ក្រុមរហស្សនាមគោព្រៃមិនបានប្រកួតទាល់តែសោះ។ ហេតុផល ដែលអាចបង្ហាញពីការឡើងចំណាត់ថ្នាក់របស់ កម្ពុជា ទាំងមិនបានប្រកួតសោះ នោះគឺដោយសារ FIFA ប្រើរូបមន្តគិតចំណាត់ថ្នាក់តាមប្រព័ន្ធ “Sum”។

ប្រការនេះមានន័យ ថា ក្រុមនីមួយៗទទួលបានពិន្ទុ ឬបាត់បង់ពិន្ទុអាស្រ័យលើ លទ្ធផលប្រកួតឈ្នះ ស្មើ ឬចាញ់។ ប្រសិនបើឈ្នះទទួលបានពិន្ទុ ចាញ់បាត់បង់ពិន្ទុ ហើយប្រសិនបើមិនលេងសោះ គឺពិន្ទុនឹងនៅរក្សាដដែល។ ជាមួយគ្នានេះ គេក៏គិតលើសមត្ថភាពរបស់ក្រុមគូប្រជែង និងកម្មវត្ថុនៃការប្រកួតផងដែរ ថា តើការប្រកួតនោះជាពានផ្លូវការ ឬមិត្តភាព។

ក្រុមមិនបានលេង គឺពិន្ទុរបស់ពួកគេមិនបាត់បង់នោះទេ។ ដូច្នេះចំណាត់ថ្នាក់របស់ពួកគេ គឺឡើងចុះអាស្រ័យលើក្រុម ដែលបានលេង។ មានន័យថា បើក្រុមបានលេងទទួលបានជ័យជម្នះ នោះចំណាត់ថ្នាក់ក្រុមមិនបានលេងនឹងធ្លាក់ ហើយបើក្រុមបានលេងចាញ់ នោះក្រុមមិនបានលេងនឹងឡើងចំណាត់ថ្នាក់៕

អត្ថបទ៖ សេម កុសល

The post នេះជាមូលហេតុ កម្ពុជា ឡើង ៣ ចំណាត់ថ្នាក់ក្នុង​តារាង FIFA Ranking ទាំងមិនបានលេងសោះ appeared first on Kampuchea Thmey Daily.

យោងតាមការវាយតម្លៃរបស់ FIFA ដែលបានធ្វើបច្ចុប្បន្នភាពកាលពីថ្ងៃទី ២៣ ខែ មីនា ឆ្នាំ ២០២៦ បានឱ្យដឹង ថា ក្រុមជម្រើសជាតិ កម្ពុជា ធ្លាក់មួយចំណាត់ថ្នាក់ពីលេខ ១៧៩ មកលេខ ១៨០។ ដោយឡែក ទីម័រ ស្ថិតនៅលេខខ ១៩៨, ឡាវ ស្ថិតនៅលេខ ១៩០, ប្រ៊ុយណេ ស្ថិតនៅលេខ ១៨៨, ក្រុម មីយ៉ាន់ម៉ា ស្ថិតនៅលេខ ១៦៣, ក្រុម សិង្ហបុរី ស្ថិតនៅលេខ ១៤៨, ក្រុម ហ្វីលីពីន ស្ថិតនៅលេខ ១៣៦។

ចំណែក ម៉ាឡេស៊ី វិញធ្លាក់ដល់ទៅ ១៤ ចំណាត់ថ្នាក់ ដោយបច្ចុប្បន្នស្ថិតនៅលេខ ១៣៥។ ការធ្លាក់ចំណាត់ថ្នាក់យ៉ាងគំហុករបស់ក្រុមខ្លាម៉ាឡាយ៉ាន ដោយសារពួកគេចាញ់ក្តីរឿងបន្លំសញ្ជាតិកីឡាករ ៧ នាក់ រហូតត្រូវជាប់ពិន័យឱ្យចាញ់ការប្រកួតផ្លូវការមួយចំនួន។ ងាកមកកាន់ ឥណ្ឌូណេស៊ី វិញ បានឡើង ១ ចំណាត់ថ្នាក់ ទៅលេខ ១២១, ក្រុមជម្រើសជាតិ វៀតណាម ឡើង ៥ ចំណាត់ថ្នាក់ទៅលេខ ១០៣ និងចុងក្រោយ ថៃ បន្តនៅលេខ ៩៦ ដដែល។

ចាប់អារម្មណ៍ជាមួយចំណាត់ថ្នាក់លំដាប់កំពូលទាំង ៥ ក្នុងពិភពលោកវិញ គឺមិនមានអ្វីប្រែប្រួលច្រើននោះទេ ក្នុងនោះ អេស្ប៉ាញ បន្តឈរនៅចំណាត់ថ្នាក់ទី ១ ដដែល។ ចំណែក អាហ្សង់ទីន ឈរនៅលេខ ២, បារាំង ឈរនៅលេខ ៣, អង់គ្លេស ឈរនៅលេខ ៤ និង ប្រេស៊ីល ឈរលេខ ៥៕

អត្ថបទ៖​ សេម កុសល

The post ម៉ាឡេស៊ី ធ្លាក់ ១៤ ចំណាត់ថ្នាក់ ខណៈ កម្ពុជា ធ្លាក់ ១ ចំណាត់ថ្នាក់ ក្នុងចំណាត់ថ្នាក់ FIFA appeared first on Kampuchea Thmey Daily.

បន្ទាប់ពីមិនមានការប្រកួតអំឡុងថ្ងៃ FIFA Day ២ លើកជាប់គ្នា នៅខែ វិច្ឆិកា នេះ ក្រុមជម្រើសជាតិ កម្ពុជា បានមានការប្រកួតជាថ្មី ដោយបាន​ប្រកួតមិត្តភាពកម្តៅសាច់ដុំទល់នឹងក្រុមជម្រើសកោះចិនហុងកុង កាលពីថ្ងៃ ទី ១៣ ខែ វិច្ឆិកា ហើយជាលទ្ធផល គឺបានបញ្ចប់ដោយស្មើគ្នា ១ ទល់នឹង ១។

លទ្ធផលស្មើគ្នានេះ បានធ្វើឱ្យ កម្ពុជា ទទួលបានពិន្ទុ ១.៣៣ ពិន្ទុ និងបច្ចុប្បន្នមានពិន្ទុសរុបចំនួន ៩១១.៥៤ ពិន្ទុ។ ទោះបីជាយ៉ាងណា ចំណាត់ថ្នាក់របស់ កម្ពុជា គឺពុំមានអ្វីប្រែប្រួលនោះទេ ដោយរក្សានៅលេខ ១៧៩ ដដែល។

ក្រឡេកមកមើលក្រុមក្នុងតំបន់ អាស៊ាន ១០ ទៀតវិញ មាន ៦ ក្រុមបានឡើងចំណាត់ថ្នាក់ ក្នុងនោះ ថៃ បានឡើងពី ៩៦ ទៅ ៩៥។ វៀតណាម ឡើងពីលេខ ១១១ ទៅ ១១០។ ម៉ាឡេស៊ី ឡើងពី ១១៨ ទៅ ១១៦។ ហ្វីលីពីន ឡើងពី ១៤១ ទៅ ១៣៦។ សិង្ហបុរី ឡើងពី ១៥៥ ទៅលេខ ១៥១ និងចុងក្រោយ ឡាវ ឡើងពី ១៨៨ ទៅលេខ ១៨៧។

ដោយឡែក ឥណ្ឌូណេស៊ី នៅរក្សាចំណាត់ថ្នាក់លេខ ១២២ ដដែល។ មីយ៉ាន់ម៉ា ក៏នៅរក្សាចំណាត់ថ្នាក់លេខ ១៦៣ របស់ខ្លួនដដែល។ រីឯ ប្រ៊ុយណេ ធ្លាក់ពីលេខ ១៨៥ មកលេខ ១៨៩។ ទីម័រខាង​កើត ធ្លាក់ពីលេខ ១៩៧ មកលេខ ១៩៨។

ចាប់អារម្មណ៍ជាមួយចំណាត់ថ្នាក់លំដាប់កំពូលទាំង ៥ ក្នុងពិភពលោកវិញ គឺមិនមានអ្វីប្រែប្រួលច្រើននោះទេ ក្នុងនោះ អេស្ប៉ាញ បន្តឈរនៅចំណាត់ថ្នាក់ទី ១ ដដែល។ ចំណែក អាហ្សង់ទីន ឈរនៅលេខ ២, បារាំង ឈរនៅលេខ ៣, អង់គ្លេស ឈរនៅលេខ ៤ និង ប្រេស៊ីល ឈរលេខ ៥ ដោយទម្លាក់ ព័រទុយហ្គាល់ ទៅលេខ ៦៕

អត្ថបទ៖ សេម កុសល

The post ក្រុម អាស៊ាន ប្រែប្រួលចំណាត់ថ្នាក់ FIFA Ranking ខណៈ កម្ពុជា រក្សាចំណាត់ថ្នាក់ដដែល appeared first on Kampuchea Thmey Daily.

ក្រុមជម្រើសជាតិ កម្ពុជា បានស្ថិតនៅក្នុងចំណោមក្រុមជម្រើសជាតិក្នុងតំបន់ អាស៊ាន ទាំង ៦ ដែលបានឡើងចំណាត់ថ្នាក់ក្នុងតារាងបាល់ទាត់ពិភពលោក បើធៀបនឹងខែ កញ្ញា។ កម្ពុជា បានឡើង ១ ចំណាត់ថ្នាក់ ពីចំណាត់ថ្នាក់លេខ ១៨០ មក ១៧៩។ យ៉ាងណា ការឡើងចំណាត់ថ្នាក់របស់ កម្ពុជា ហាក់ភ្ញាក់ផ្អើលបន្តិចដែរ ព្រោះថានៅខែ តុលា នេះ ក្រុមរហស្សនាមគោព្រៃមិនមានសកម្មភាពការប្រកួតណាមួយសោះឡើយ។

ចំណែកក្រុម ៥ ទៀត ដែលបានឡើងចំណាត់ថ្នាក់ផងដែរ ក្នុងនោះ ថៃ បានឡើង ៥ ចំណាត់ថ្នាក់ពីលេខ ១០១ មកលេខ ៩៦, វៀតណាម ឡើងពីលេខ ១១៤ មកលេខ ១១១, ម៉ាឡេស៊ី ឡើងពីលេខ ១២៣ មកលេខ ១១៨, ហ្វីលីពីន ឡើងពីលេខ ១៤៣ មកលេខ ១៤១ និង សិង្ហបុរី ឡើងពីលេខ ១៥៨ មកលេខ ១៥៥។

ក្រឡេកមកមើលក្រុម ដែលធ្លាក់ចំណាត់ថ្នាក់វិញ ក្នុងនោះមាន ឥណ្ឌូណេស៊ី បានធ្លាក់ ៣ ចំណាត់ថ្នាក់ ពីលេខ ១១៩ ទៅលេខ ១២២, មីយ៉ាន់ម៉ា ធ្លាក់ពីលេខ ១៦០ ទៅលេខ ១៦៣, ប្រ៊ុយណេ ធ្លាក់ពីលេខ ១៨៣ ទៅលេខ ១៨៥, ឡាវ ធ្លាក់ពីលេខ ១៨៥ ទៅលេខ ១៨៨ និង ទីម័រខាង​កើត ធ្លាក់ពីលេខ ១៩៤ ទៅលេខ ១៩៧។

ចាប់អារម្មណ៍ជាមួយចំណាត់ថ្នាក់លំដាប់កំពូលទាំង ៥ ក្នុងពិភពលោកវិញ គឺមិនមានអ្វីប្រែប្រួលច្រើននោះទេ ក្នុងនោះ អេស្ប៉ាញ បន្តឈរនៅចំណាត់ថ្នាក់ទី ១ ដដែល។ ចំណែក អាហ្សង់ទីន ឈរនៅលេខ ២, បារាំង ឈរនៅលេខ ៣, អង់គ្លេស ឈរនៅលេខ ៤ និង ព័រទុយហ្គាល់ ឈរនៅលេខ ៥៕

អត្ថបទ៖ សេម កុសល

The post កម្ពុជា ឡើង ១ លេខ ខណៈ ឥណ្ឌូណេស៊ី ធ្លាក់ ៣ លេខ ក្នុងចំណាត់ថ្នាក់បាល់ទាត់ពិភព​លោក appeared first on Kampuchea Thmey Daily.