តារាសម្ដែង Archives - Kampuchea Thmey Daily

តារាសម្ដែង លោក លី សុខជន តូចចិត្តដែលសមាគមសិល្បករខ្មែរមើលរំលង

អ៊ិន ពិសី — Tue, 03 Sep 2024 01:49:06 +0000

តារាសម្តែង លោក លី សុខជន ដែលគេស្គាល់ជាឪពុកបង្កើតរបស់តារាសម្តែង លី ច័ន្ទសីហា បានបង្ហាញអារម្មណ៍តូចចិត្ត ខណៈសមាគមសិល្បករខ្មែរតែងមើលរំលងលោក និងកូនស្រី នៅពេលមានកម្មវិធីជួបជុំធំៗ មួយចំនួន នាពេលកន្លងមក។

តារាសម្តែងជើងចាស់ លោក លី សុខជន បានបង្ហោះខ្លឹមសារលើកឡើងថា «ផុសៗ ទៅ ខ្លាចសមាគមសិល្បៈច្រឡំថាខ្ញុំហោះទៅនៅស្រុកគេចោលសិល្បៈ តាមពិតថតឲ្យ លោក កៅ សីហា តែរហូតនឹងតាំងពីបទចម្រៀង MV ជាដើម»។

លោក លី សុខជន បន្តថា «មានតែសមាគមទេដែលមិនចាំ មានកម្មវិធីធំដុំ ខ្ញុំសង្កេតឃើញថា រំលងខ្ញុំ និងកូនស្រីជារឿយៗ ប្រហែលជាគាត់ភ្លេច ឬក៏ច្រឡំថាបានហៅដែរ កម្មវិធីសមាគមសិល្បៈ បើគេមិនហៅ ខ្ញុំ និងកូនស្រី អ្នកណាទៅហ៊ានប្រាប់គេថាហៅខ្ញុំផងខ្ញុំគឺជាអ្នកសិល្បៈដែរ តែទោះជាយ៉ាងណាក៏ដោយ ក៏ទស្សនិកជនបានទទួលស្គាល់ពួកខ្ញុំរួចទៅហើយ (សុំទោស) ឬក៏ច្រឡំថាបាត់មុខហោះទៅស្រុកគេ?»។

លោកបានបន្ថែមថា និយាយឲ្យចំទៅ ក្នុងគ្រួសារមួយកូនតែបួនដប់នាក់នៅយើងច្រឡំ ចុះនេះរាប់ពាន់នាក់ វាតែងតែភាន់អញ្ចឹងហើយ។

បន្ទាប់ពីមានការលើកឡើងរបស់លោក លី សុខជន ខាងលើនេះ គេឃើញមានអ្នកគាំទ្រមួយចំនួនបានបញ្ចេញទស្សនៈវែកញែក និងស្នើដល់សមាគមសិល្បករខ្មែរគួរពិនិត្យផងដែរ ខណៈ លោក សុខជន គឺជាសិល្បករជើងចាស់ផងនោះ៕

អត្ថបទ ៖ ចាន់រ៉ា

The post តារាសម្ដែង លោក លី សុខជន តូចចិត្តដែលសមាគមសិល្បករខ្មែរមើលរំលង appeared first on Kampuchea Thmey Daily.

ស្ងាត់ៗ ឪពុក Kim Soo Hyun រៀបការនៅផ្ទះឯកជនរបស់ខ្លួន ដោយគ្មានការចូលរួមពីកូនៗ

Sorn Phanith — Sun, 14 Apr 2024 05:06:49 +0000

ឪពុករបស់តារាសម្ដែង Kim Soo Hyun បានរៀបការសារជាថ្មីម្ដងទៀត នៅផ្ទះរបស់ខ្លួនផ្ទាល់ ដោយមិនមានការចូលរួមពីកូនៗ ព្រោះជាការរៀបចំអាពាហ៍ពិពាហ៍បែបស្ងប់ស្ងាត់ នេះបើតាមការចុះផ្សាយរបស់ allkpop។

យោងតាមការឲ្យដឹងពីអ្នកគ្រប់គ្រងរបស់តារាចម្រៀង Kim Chung Hoon បានរៀបចំពិធីមង្គលការកាលពីថ្ងៃទី 13 ខែមេសានៅផ្ទះរបស់ខ្លួន នៅឯ Gangnam ទីក្រុងសេអ៊ូល។ ចំណែកតារាសម្ដែង Kim Soo Hyun ត្រូវគេបញ្ជាក់ថា មិនបានចូលរួមកម្មវិធីនោះទេ ព្រោះចង់គោរពការសម្រេចចិត្តរបស់ឪពុកដោយរៀបអាពាហ៍ពិពាហ៍បែបស្ងប់ស្ងាត់។

ពិធីមង្គលការនេះមានការចូលរួមពីមិត្តភ័ក្តិជិតស្និទ្ធរបស់តារាចម្រៀង Kim Chung Hoon ដោយមានតារាចម្រៀងជើងចាស់ Kim Bum Ryong ច្រៀងបទអបអរសាទរ និង Jo Young Gu ជាអ្នករៀបចំកម្មវិធី។

ទន្ទឹមនឹងនោះ Kim Chung Hoon គឺជាអ្នកចម្រៀងនាំមុខនៃក្រុមតន្រ្តីរ៉ុក Seven Dolphins បន្ទាប់មកបានចេញបទចម្រៀងទោលដំបូងក្នុងឆ្នាំ 2009 ។ គាត់ត្រូវបានគេស្គាល់យ៉ាងច្បាស់ថាជាឪពុករបស់ Kim Soo Hyun និងតារាចម្រៀង Kim Ju Na៕

ប្រែសម្រួល៖ សន ផានិត

The post ស្ងាត់ៗ ឪពុក Kim Soo Hyun រៀបការនៅផ្ទះឯកជនរបស់ខ្លួន ដោយគ្មានការចូលរួមពីកូនៗ appeared first on Kampuchea Thmey Daily.

តារាសម្ដែង លី ណូរ៉ា រងបណ្ដឹង ពីបទឆបោកលុយ ៣ ម៉ឺនដុល្លារ ពីស្ត្រីអាណិកជនម្នាក់

អ៊ិន ពិសី — Thu, 04 Jan 2024 02:23:25 +0000

អ្នកគាំទ្រ និងប្រើប្រាស់បណ្ដាញសង្គមហ្វេសប៊ុក មានការភ្ញាក់ផ្អើលគ្រប់គ្នា ខណៈតារាសម្តែងប្រុសលោក លី ណូរ៉ា ចេញមកបញ្ជាក់ថា ពេលនេះលោកបានរងភាពអយុត្តិធម៌ ត្រូវស្ត្រីម្នាក់ប្ដឹងពីបទឆបោកលុយប្រមាណចំនួន ៣ ម៉ឺនដុល្លារ។

តារាប្រុសលោក លី ណូរ៉ា បានលើកឡើងតាមរយៈបណ្ដាញសង្គមហ្វេសប៊ុកផ្ទាល់ខ្លួនភ្ជាប់ជាមួយពាក្យបណ្ដឹង ព្រមទាំងដីកាកោះហៅជាលើកទី ៣ ដូច្នេះថា «ខ្ញុំសុំពឹងបងប្អូនទាំងអស់គ្នាជួយស៊ែរខ្ញុំម្នាក់មួយផង ខ្ញុំរងភាពអយុត្តិធម៌ត្រូវបានគេប្ដឹង ខ្ញុំមិនបានដឹងអ្វីទេ ខ្ញុំមិនដែលស្គាល់អ្នកប្ដឹងទេ ខ្ញុំមិនដែលឆបោក ឬ ក្លែងបន្លំឯកសារក្លែងក្លាយអ្វីទេ»។

លោក លី ណូរ៉ា បាននិយាយបន្តថា «សូមពុកម៉ែបងប្អូនទាំងអស់គ្នា និងថ្នាក់ដឹកនាំច្បាប់ ជួយដឹងឮ និងជួយរកយុត្តិធម៌ឲ្យខ្ញុំផង។ សូមបងស្រីឈ្មោះ លឹម ចន្ធី មកដោះស្រាយជាមួយប្អូន ប្អូនមិនបានដឹងអ្វីទេ បងបងប្ដឹងប្អូនខុសហើយ។ សូមបងៗ សារព័ត៌មានជួយផ្សព្វផ្សាយផង និងពុកម៉ែបងប្អូនជួយស៊ែរខ្ញុំម្នាក់មួយផង ឲ្យបានដឹងដល់បងស្រី លឹម ចន្ធី មកដោះស្រាយ»។

បន្ថែមពីលើនេះ លោក លី ណូរ៉ា បាននិយាយទៀតថា លោកត្រូវបានស្ត្រីអាណិកជនខ្មែរនៅអូស្ត្រាលីដាក់ពាក្យបណ្ដឹង ក្រោយពេលស្ត្រីរូបនោះចាញ់បោកជនអនាមិកដែលក្លែងបន្លំ ដោយយករូបថតរបស់លោកទៅបង្កើត Account Facebook ក្លែងក្លាយ និងខ្ចីលុយអស់ប្រមាណ ៣ ម៉ឺនដុល្លារ។ ប៉ុន្តែបន្ទាប់មកក៏ទាក់ទងលែងបានជាមួយជនអនាមិករូបនោះ ស្រាប់តែស្ត្រីខាងលើ បែរជាមកប្ដឹងរូបលោកទៅវិញ។

លោក លី ណូរ៉ា បញ្ជាក់ដែរថា គិតមកដល់ពេលនេះខាងតុលាការចេញដីកាកោះហៅលោកជាលើកទី ៣ ទើបធ្វើឲ្យលោកស្រឡាំងកាំង និងភ្ញាក់ផ្អើលជាខ្លាំង។ លោកអះអាងថា លោកក៏ជាជនរងគ្រោះដូចគ្នា ខណៈស្ត្រីអាណិកជនក៏ជាជនរងគ្រោះដូចគ្នា។ អ្វីដែលលោកចង់បញ្ជាក់ទៀតនោះ គឺរូបលោកផ្ទាល់មិនបានដឹងពីការបង្កើតហ្វេសប៊ុកក្លែងក្លាយណាមួយឡើយ។ ដូច្នេះ លោកសង្ឃឹមថា ខាងតុលាការ និងស្ថាប័នពាក់ព័ន្ធ នឹងផ្ដល់យុត្តិធម៌ចំពោះរូបលោកចំពោះករណីនេះផងដែរ៕

អត្ថបទ ៖ ចាន់រ៉ា

The post តារាសម្ដែង លី ណូរ៉ា រងបណ្ដឹង ពីបទឆបោកលុយ ៣ ម៉ឺនដុល្លារ ពីស្ត្រីអាណិកជនម្នាក់ appeared first on Kampuchea Thmey Daily.

សាវិន ហ្វីលីព ប្រកាសឆន្ទ:កៀរគរការបរិច្ចាគម្នាក់ ១មុឺនរៀល ព្យាបាលកុមារកេីតមហារីកនៅកម្ពុជា

Sorn Phanith — Mon, 27 Nov 2023 09:25:29 +0000

តារាសម្តែងលោក សាវិន ហ្វីលីព បានប្រកាសបង្ហាញពីឆន្ទ:របស់ខ្លួនក្នុងការកៀរគររកសប្បុរសជនជួយបរិច្ចាគថវិកាក្នុងម្នាក់ត្រឹម ១មុឺនរៀល ដើម្បីជូនអង្គការបេះដូងជប៉ុន (Japan Heart) ព្យាបាលកុមារកេីតមហារីកនៅកម្ពុជា។

លោក សាវិន ហ្វីលីព បានបញ្ជាក់ឲ្យដឹងថា សម្រាប់គ្រួសាររបស់លោកបានចូលរួមបរិច្ចាគរួចរាល់ហើយ ខណ:លោកប្រកាសដែរថា គ្រួសារលោកគឺបានបរិច្ចាគជារៀងរាល់ខែដើម្បីចូលរួមឧបត្ថម្ភជួយដល់អង្គការបេះដូងជប៉ុន(Japan Heart)ក្នុងការព្យាបាលកុមារកេីតមហារីកនៅកម្ពុជា។

តារាសម្ដែងរូបនេះបានអំពាវនាវដល់មហាជនថា សូមមេត្តាជួយបន្តបរិច្ចាគត្រឹម ១ខែ ១មុឺនរៀលក្នុងម្នាក់ ជូនអង្គការបេះដូងជប៉ុន ដេីម្បីឲ្យអង្គការសប្បុរសធ៌មមួយនេះមានលទ្ធភាពបន្តព្យាបាលកុមារកេីតមហារីកនៅកម្ពុជាដោយមិនគិតថ្លៃ។ គ្រួសារខ្ញុំបានបរិច្ចាគជារៀងរាល់ខែ។

លោកក៏បានបន្តថា ខ្ញុំនឹងបន្តជួយកៀរគររកសប្បុរសជនក្នុងប្រទេសកម្ពុជាឲ្យជួយបរិច្ចាគថវិការក្នុងម្នាក់ត្រឹមមួយមុឺនរៀល ក្នុង១ខែប៉ុណ្ណោះ ជូនអង្កការបេះដូងជប៉ុន Japan Heart ដេីម្បីព្យាបាលកុមារកម្ពុជាកេីតមហារីកដោយមិនគិតថ្លៃ។ លោកបានបន្ថែថា បន្ទាប់ពីរៀបចំពិធីបុណ្យ១០០ថ្ងៃម្តាយលោករួចរាល់ហើយនៅដើមខែធ្នូខាងមុខ លោកនឹងឆ្លៀតពេលដើម្បីជួយអង្គការមួយនេះ៕

អត្ថបទ៖ ចាន់រ៉ា

The post សាវិន ហ្វីលីព ប្រកាសឆន្ទ:កៀរគរការបរិច្ចាគម្នាក់ ១មុឺនរៀល ព្យាបាលកុមារកេីតមហារីកនៅកម្ពុជា appeared first on Kampuchea Thmey Daily.

តារាសម្ដែងជើងចាស់ គង់ ប៊ុនសុន អង្គុយលក់នំហាលខ្យល់ភ្លៀងរងាញ័រខ្លួនដើម្បីក្រពះ

អ៊ិន ពិសី — Tue, 03 Oct 2023 06:50:53 +0000

ឃើញហើយពិតជាអាសូរខ្លាំងណាស់នូវរូបភាពដ៏កម្សត់របស់តារាសម្ដែងជើងចាស់ គង់ ប៊ុនសុន ដែលកំពុងអង្គុយលក់នំហាលខ្យល់ភ្លៀងរងាញ័រខ្លួនដើម្បីរកប្រាក់ចិញ្ចឹមជីវិត ខណៈរាល់ថ្ងៃគាត់មានវ័យកាន់តែចាស់ទៅហើយ។

រូបភាពនេះត្រូវបានបង្ហោះនៅលើបណ្ដាញសង្គមហ្វេសប៊ុក បង្កការចាប់អារម្មណ៍សម្រាប់មហាជនអ្នកគាំទ្រ ពិសេសអ្នកធ្វើដំណើរឆ្លងកាត់ដោយបង្ហាញការអាណិតអាសូរចំពោះតារាសម្ដែងជើងចាស់ គង់ ប៊ុនសុន។

ដោយឡែកនៅលើទំព័រហ្វេសប៊ុករបស់តារាសម្តែងអ្នកស្រី គង់ ប៊ុនសុន បានលើកឡើងថា «ភ្លៀងផង ខ្យល់បក់ផង ខ្ញុំរងាខ្លាំងណាស់ តែខ្ញុំត្រូវតែខំប្រឹងតស៊ូលក់នំ ដើម្បីដោះស្រាយជីវភាពដែលកំពុងខ្វះខាតខ្លាំង»។ បើតាមការបញ្ជាក់ឲ្យដឹងសម្រាប់រូបភាពដ៏កម្សត់នេះគឺថតឡើងកាលពីយប់ថ្ងៃទី ០២ ខែតុលា ឆ្នាំ ២០២៣ ម្សិលមិញ។

គួររម្លឹកថា តារាសម្ដែងអ្នកស្រី គង់ ប៊ុនសុន ឬ សម្ភ័ស ប៊ុនសុន កាលពីថ្មីៗនេះ បានចេញមកដង្ហោយសុំផលិតករហៅថតសម្តែង ដើម្បីបានប្រាក់ចិញ្ចឹមជីវិត ខណៈរបរលក់នំមិនសូវដាច់។

អ្នកស្រី គង់ ប៊ុនសុន គឺជាសិល្បការិនីម្នាក់ ក្នុងចំណោមអ្នកសិល្បៈវ័យជរាមួយចំនួនទៀតដែលកំពុងមានជីវភាពខ្វះខាត និងមានជំងឺប្រចាំកាយ។ ប៉ុន្តែអ្វីដែលអភ័ព្វជាងគេទៀតនោះ ពុំមានកូនចៅដែលមានដៃរឹងស្មាមាំជួយជ្រោមជ្រែងនោះទេ ដោយគាត់ត្រូវដើររាល់ថ្ងៃដើម្បីលក់នំតាមផ្លូវ ឬ បាំងឆ័ត្រអង្គុយលក់នំពេលមេឃកំពុងរលឹមជាដើម។

តារាសម្តែង គង់ ប៊ុនសុន បានលើកដៃអំពាវនាវថា «សូមបងប្អូនមេត្តាជួយហៅខ្ញុំថតផង ដើម្បីបានថវិកាចិញ្ចឹមជីវិត ព្រោះរាល់ថ្ងៃខ្ញុំលក់នំគឺមិនសូវដាច់ទេ ពេលខ្លះខ្ញុំបាំងឆ័ត្រអង្គុយលក់នំពេលមេឃកំពុងរលឹម លក់នៅតាមដងផ្លូវ ២៧១ ជិតអតីតធនាគារ ANZ ផ្សារដើមថ្កូវ»។

តារាស្រីអ្នកស្រី គង់ ប៊ុនសុន បានប្រឡូកក្នុងវិស័យសិល្បៈតាមរយៈអាជីពសម្ដែងតាំងពីឆ្នាំ ២០១២។ ក្រៅពីសម្តែងកន្លងមក អ្នកស្រី ក៏ចេះច្រៀង និងបានបង្ហើរសំនៀងបទមរតកដើមជាច្រើនផងដែរ៕

អត្ថបទ ៖ ចាន់រ៉ា

The post តារាសម្ដែងជើងចាស់ គង់ ប៊ុនសុន អង្គុយលក់នំហាលខ្យល់ភ្លៀងរងាញ័រខ្លួនដើម្បីក្រពះ appeared first on Kampuchea Thmey Daily.

តារាសម្ដែង ហេង បូនីកា មិនភ្លេចគុណបុគ្គលសំខាន់ពីររូប នៅពីក្រោយភាពជោគជ័យ

អ៊ិន ពិសី — Mon, 02 Oct 2023 02:10:00 +0000

បន្ទាប់ពីជោគជ័យលើវិថីសិល្បៈមានរយៈពេលប៉ុន្មានឆ្នាំចុងក្រោយនេះ ដោយការមិនភ្លេចគុណបំណាច់ដ៏ធំធេងចំពោះបុគ្គលសំខាន់ក្នុងការជួយត្រួសត្រាយផ្លូវ និងការជ្រោមជ្រែងនោះ តារាសម្ដែង ហេង បូនីកា បានរម្លឹកដល់គុណមនុស្ស ២ នាក់ ដែលតែងនៅពីក្រោយនាងរហូតមានថ្ងៃនេះ។

បុគ្គលសំខាន់ ២ រូប ដែលជាអ្នកមានគុណនៅក្នុងអាជីពសិល្បៈ ត្រូវបានតារាស្រីវ័យក្មេង ហេង បូនីកា បញ្ជាក់ថា ទី១-គឺជាបងប្រុសបង្កើតរបស់នាង និងទី២-តារាសម្ដែងជើងចាស់អ្នកនាង ផាន់ ផាភួង។ នាងថា អ្នកទាំង ២ នេះ ត្រូវបាននាងចាត់ទុកថាជាបុគ្គលសំខាន់ដែលស្ថិតនៅពីក្រោយរូបនាងឲ្យទទួលបានផ្លែផ្កាលើវិថីសិល្បៈនាពេលបច្ចុប្បន្ននេះ។

តាមរយៈកិច្ចសម្ភាសន៍មួយថ្មីៗនេះ តារាស្រី ហេង បូនីកា បាននិយាយថា សម្រាប់បងប្រុសបង្កើតរបស់នាង គឺគាត់បានលះបង់ពេលវេលាច្រើនណាស់ដើម្បីជួយលើកទឹកចិត្ត និងជ្រោមជ្រែងនៅពីក្រោយឲ្យនាងចូលប្រឡូកក្នុងវិថីសិល្បៈ ខណៈទឹកចិត្តធំធេងណាស់ដែលបងប្រុសលះបង់សម្រាប់ប្អូនស្រី។

នាងនិយាយថា «កាលពីចូលសិល្បៈដំបូងៗ ខ្ញុំធ្លាប់មានបំណងចង់បោះបង់ចោលម្តងៗ ទៅហើយ ព្រោះហាក់ទ្រាំមិនបាននូវការស្តីបន្ទោសពីផលិតករ តែបានបងប្រុសខ្ញុំតែងតែលើកទឹកចិត្តជំរុញឲ្យមានការអត់ធ្មត់ និងតស៊ូដើរទៅមុខបន្តទៀត»។

ហេង បូនីកា និយាយបន្តថា ក្រោយមកនាងក៏ចាប់ផ្ដើមមានទឹកចិត្តហាត់រៀនដើម្បីពង្រឹងសមត្ថភាពបន្ថែម។ ហើយបន្ទាប់ការដុសខាត់ខ្លួនឯង និងការជួយបង្ហាត់បង្ហាញពីរៀមច្បង ទើបធ្វើឲ្យនាងអាចសម្ដែងបានរហូតមកទល់ពេលនេះ។ នាងបញ្ជាក់ថា ការដែលនាងអាចមានមុខមាត់ក្នុងវិថីសិល្បៈនាពេលនេះ វាក៏ជាចំណែកមួយពីតារាសម្ដែងអ្នកនាង ផាន់ ផាភួង ផងដែរ។

បន្ថែមពីនេះ កញ្ញា ហេង បូនីកា បានលើកឡើងថា ដោយសារហេតុផលបែបនេះហើយទើបនាងមិនដែលភ្លេចគុណចំពោះបុគ្គលសំខាន់ ២ រូប ដែលជួយជ្រោមជ្រែងនាងឲ្យទទួលបានជោគជ័យក្នុងអាជីពសិល្បៈមកដល់បច្ចុប្បន្ន៕

អត្ថបទ ៖ ចាន់រ៉ា

The post តារាសម្ដែង ហេង បូនីកា មិនភ្លេចគុណបុគ្គលសំខាន់ពីររូប នៅពីក្រោយភាពជោគជ័យ appeared first on Kampuchea Thmey Daily.

ត្រៀមឡើងទទួលពានរង្វាន់ តារាសម្ដែងអេស្ប៉ាញ ត្រូវប៉ូលិសចាប់ខ្លួនពីបទរំលោភសេពសន្ទវៈ

Sonya — Mon, 04 Sep 2023 11:56:00 +0000

តារាសម្តែងជនជាតិអេស្ប៉ាញ លោក Gabriel Guevara ត្រូវបានចាប់ខ្លួននៅក្នុងមហោស្រពភាពយន្តទីក្រុង Venice ប្រទេសអ៊ីតាលី ជុំវិញការចោទប្រកាន់ពីបទរំលោភផ្លូវភេទ ដែលលោកបានល្មើសនៅឯប្រទេសបារាំង។

តារាប្រុសវ័យ ២២ឆ្នាំដែលផ្ទុះភាពល្បីល្បាញ នៅក្នុងខ្សែភាពយន្តយុវវ័យ “My Fault” របស់ផលិតកម្ម Amazon Prime ត្រូវបានចាប់ខ្លួនដោយអាជ្ញាធរអ៊ីតាលី ក្នុងអំឡុងពេលមហោស្រពភាពយន្ត “Venice International Film Festival” លើកទី៨០ មួយថ្ងៃមុនលោកឡើងទទួលបានពានរង្វាន់។

មុនពេលចាប់ខ្លួន ប្រភពពី Variety បានឱ្យដឹងថា Gabriel កំពុងត្រៀមខ្លួនទទួលពានរង្វាន់កិត្តិយសជាតារាសម្ដែងវ័យក្មេងល្អបំផុតដែលផ្ដល់ឱ្យដោយផលិតកម្ម Filming Italy ។

បច្ចុប្បន្នលោកកំពុងស្ថិតក្នុងមន្ទីរឃុំឃាំងដែលមានការការពារជាមួយប៉ូលិសរដ្ឋអ៊ីតាលី ហើយតុលាការឧទ្ធរណ៍នឹងកាត់ក្តីលើករណីរបស់លោកមុនពេលដំណើរការធ្វើបត្យាប័នអាចចាប់ផ្តើម។

យ៉ាងណាមិញ ខាងអ្នករៀបចំមហោស្រពភាពយន្តទីក្រុង Venice បានបដិសេធនៅក្នុងសេចក្តីថ្លែងការណ៍មួយថា តារាសម្តែងជនជាតិអេស្ប៉ាញលោក Gabriel Guevara ពុំមានឈ្មោះចូលរួមក្នុងព្រឹត្តិការណ៍របស់ខ្លួនឡើយ៕

ប្រែសម្រួល៖ សន្យា

ចុចអាន៖ ទម្លាយតម្លៃបន្ទប់គេងថ្លៃកប់ពពក ពេល Jennie វិស្សមកាលនៅអាមេរិក

ចុចអាន៖ ត្រៀមបង្ហាញខ្លួនក្នុងភាពយន្តថ្មី Jisoo រងមតិរិះគន់មិនសំចៃមាត់

The post ត្រៀមឡើងទទួលពានរង្វាន់ តារាសម្ដែងអេស្ប៉ាញ ត្រូវប៉ូលិសចាប់ខ្លួនពីបទរំលោភសេពសន្ទវៈ appeared first on Kampuchea Thmey Daily.

ជា សុវណ្ណនរាហ៍ ជួបរឿងស៊យផ្ទួនៗ រត់ទៅស្រោចទឹករំដោះគ្រោះ

អ៊ិន ពិសី — Sat, 24 Jun 2023 02:36:54 +0000

តារាសម្ដែងចាស់វស្សាលោក ជា សុវណ្ណនរាហ៍ បានប្រកាសយ៉ាងភ្ញាក់ផ្អើលថា មុននេះលោកបានជួបរឿងស៊យផ្ទួនៗគ្នាចំនួន ២ លើក ត្រឹមតែរយៈពេលមិនដល់ ២ ថ្ងៃផង។ បញ្ហានេះទើបលោក សម្រេចទៅវត្តដើម្បីសូមព្រះសង្ឃស្រោចទឹកជាការរំដោះគ្រោះចង្រៃនេះចេញពីខ្លួន។

ជាការកត់សម្គាល់តារាសម្ដែងប្រុសសាច់ដុំធំៗ លោក ជា សុវណ្ណនរាហ៍ ដែលមិត្តភ័ក្ដិសិល្បៈមួយចំនួន តែងហៅលោកថា នាយ ស្និទ្ធ កន្លងមកលោកតែងតែនិយាយបែបលេងសើចច្រើនទាំងនៅលើបណ្ដាញសង្គម និងនៅពេលជួបលោកដោយផ្ទាល់។

ចាប់អារម្មណ៍តារាប្រុសលោក ជា សុវណ្ណនរាហ៍ បច្ចុប្បន្នសម្រាប់ទីផ្សារសិល្បៈក៏កាន់តែទទួលបានការគាំទ្រ និងជោគជ័យគួរឲ្យកត់សម្គាល់។ ជាមួយគ្នានេះ លោក ជា សុវណ្ណនរាហ៍ ធ្លាប់បានបង្ហើបឲ្យដឹងថា សម្រាប់ទីផ្សារសម្ដែងសិល្បៈក្នុងឆ្នាំ ២០២៣ នេះ លោកមានភាពមមាញឹកច្រើន ដោយទទួលបានការងារសម្ដែងភាពយន្តខ្នាតធំជាបន្តបន្ទាប់។

ដោយឡែករឿងដែលធ្វើឲ្យមហាជនភ្ញាក់ផ្អើលថែមទៀត ស្រាប់តែតារាប្រុសរូបនេះបានទម្លាយថា លោកបានជួបបញ្ហាផ្ទួនៗ ចំនួន ២ លើក ស្ទើរមិនគួរឲ្យជឿ។ លោក ជា សុវណ្ណនរាហ៍ បានបង្ហោះសារថា «យប់មិញវីសគ្រោះថ្នាក់ចរាចរណ៍..ថ្ងៃនេះចតឡានចោលគេវ៉ៃកញ្ចក់យកអីវ៉ាន់ក្នុងឡាន..។សុំស្រោចទឹកឲ្យអស់គ្រោះចង្រៃហើយ»។ តាមរយៈដំណឹងនេះ បានធ្វើឲ្យអ្នកគាំទ្រមានការភ្ញាក់ផ្អើល និងជូនពរលោកឲ្យរួចផុតពីគ្រោះចង្រៃទាំងនេះ៕

អត្ថបទ ៖ ចាន់រ៉ា

The post ជា សុវណ្ណនរាហ៍ ជួបរឿងស៊យផ្ទួនៗ រត់ទៅស្រោចទឹករំដោះគ្រោះ appeared first on Kampuchea Thmey Daily.