តារាកំប្លែងជើងចាស់លោកតា ចេក ធ្លាប់បានបញ្ជាក់ប្រាប់កម្ពុជាថ្មីកាលពីថ្មីៗកន្លងមកនេះថា លោកពិត ជាសោកស្តាយជំនាញអាជីពសិល្ប:ដែលបានសាងឡើងជាង៥០ឆ្នាំ ប៉ុន្តែចុងក្រោយត្រូវបាត់បង់ទៅវិញ ស្ទើរគ្មានអ្នកស្គាល់ពិសេសក្មេងៗជំនាន់ក្រោយ។

យ៉ាងណា ដោយមានការផ្តល់ឱកាសពីខាងអ្នកដឹកនាំរឿង តារាកំប្លែងតាចេក បានបង្ហាញវត្តមានជាថ្មីក្នុងការថតសម្តែងភាពយន្ត។ លោកតា ចេក បានរៀបរាប់ថា ខ្ញុំមកថតកុនរឿងខ្មោចនៅគៀនស្វាយមិនទាន់បានមួយ sense ទេ ប្រហែលរហូតដល់ភ្លឺហើយ ស៊ូៗដើម្បីជីវិត ដឹងម៉េចទេចង់់ភ្លេចអស់ហើយខានថតយូរពេក (មិនមែនផ្ទះថ្មទេចេតីយ៍ដីទេណា។

តារាកំប្លែងវ័យជាង ៧០ឆ្នាំ លោក តាចេក ជារឿយក៏ធ្លាប់ស្នើអ្នកសិល្ប: បើមានការងារថត ឬសម្តែងជួយហៅលោកទៅសម្តែងផង ដើម្បីបានលុយដោះស្រាយជីវភាពនិងចិញ្ចឹមជីវិត។ ជាការពិត តារាកំប្លែងតាចេក កាលពីថ្មីៗនេះបានធ្វើឱ្យទស្សនិកជននិងអ្នក គាំទ្រមានក្តីអាណិតអាសូរខ្លាំងក្រោយឃើញទិដ្ឋភាពតារាកំប្លែងជើងចាស់រូបនេះកំពុងអង្គុយលក់ខ្យងនិងបន្លែនៅក្រោមស្ពានមួយកន្លែងនាទឹកដីស្រុកពារាំងខេត្តព្រៃវែង។

តារាកំប្លែងជើងចាស់មានឈ្មោះដើមឈុំ ប៊ុន ឈឿន ហៅ តាចេក បានបញ្ជាក់ថា រាល់ថ្ងៃនេះជីវភាពប្រចាំថ្ងៃរបស់គាត់ធ្លាក់ដល់កម្រិតសូន្យ ខណ:ដែលអាជីពសិល្ប:ក៏ស្ទើរបាត់បង់ទាំងស្រុង រីឯការរកស៊ី ក៏មិនសូវកាក់កបឡើយ៕ អត្ថបទ៖ ចាន់រ៉ា

The post បានឱកាសចូលសម្តែងជាថ្មី តាចេក ស៊ូកើយអង្រឹងនៅចេតីយ៍រង់ចាំថតរឿងខ្មោច appeared first on Kampuchea Thmey Daily.

អ្នកនាង អេង វ៉ាណង បានបញ្ជាក់ថា ក្រោយព្យាបាលជំងឺមហារីកជាសះស្បើយ ស្រាប់តែពេលនេះ អ្នកនាងបែរមកជួបជំងឺម្យ៉ាងទៀតគឺខូចក្បាលគ្រោងឆ្អឹងត្រគាកឆ្វេង ធ្វើឱ្យដេីរលែងត្រង់ដូចមុន។ អេង វ៉ាណង បានឱ្យដឹងទៀតថា ជំងឺនេះ បើតាមគ្រូពេទ្យបញ្ជាក់ថា ការចំណាយលើថ្លៃព្យាបាលត្រូវប្រើលុយខ្ទង់ជាង ១ម៉ឺនដុល្លារ នៅមន្ទីពេទ្យប្រទេសថៃ។

តារាសម្តែង អេង វ៉ាណង បានបន្តថា នាងពុំមានលទ្ធភាពដើម្បីព្យាបាលទេ ព្រោះទើបតែព្យាបាលជំងឺមហារីកថ្មីៗកន្លងទៅនេះ។ ម្យ៉ាងទៀត បើឱ្យនាងសុំជំនួយពីមហាជន គឺលែងហ៊ានទៀតហើយ ដោយសារកន្លងមក ពួកគាត់ធ្លាប់ជួយសម្រាលការព្យាបាលជំងឺមហារីកជាបន្តបន្ទាប់ ដូច្នេះមានតែការខំប្រឹងតស៊ូទាំងឈឺ ថតរឿងដើម្បីបានលុយផ្គត់ផ្គង់ជីវភាពគ្រួសារសិន។

សូមបញ្ជាក់ថា តារាសម្តែងអ្នកនាង អេង វ៉ាណង កន្លងមក បានធ្លាក់ខ្លួនឈឺធ្ងន់រួមរឹតដោយសារជំងឺមហារីកដំណាក់កាលទី៣ ដែលត្រូវការព្យាបាល តាមរយ:ការចាក់គីមីនិងបាញ់កាំរស្មីសម្លាប់មេរោគច្រើនខែ និងចំណាយរាប់ម៉ឺនដុល្លារ។ទោះបីយ៉ាងណា បន្ទាប់បាត់មុខពីការសម្តែងសិល្ប:មួយរយ:ធំ អេង វ៉ាណង បានប្រកាសវិលរកការសម្តែងជាថ្មីឡើងវិញក្រោយពេលសម្រាប់ព្យាបាលជំងឺមហារីជាច្រើនខែ។

ចំពោះការសម្រេចវិលមកចូលអាជីពសម្តែងជាថ្មីឡើងវិញ ត្រូវបានអ្នកនាង អេង វ៉ាណង បញ្ជាក់ថា ដោយសារជំងឺបានធូរស្រាលប្រសើរជាងមុន ខណ:ដែលការព្យាបាលក៏ត្រូវបានដល់ពេលកំណត់នឹងបញ្ចប់។ ការប្រកាសវិលមករកសិល្ប:អ្នកនាង អេង វ៉ាណង ក៏ទទួលបានឱកាសថតសម្តែងរឿង នៅស្ថានីយ៍ទូរទស្សន៍ក្នុងស្រុកមួយផងដែរ៕ អត្ថបទ៖ ចាន់រ៉ា

The post ឆ្លងផុតជំងឺមហារីក អេង វ៉ាណង បែរជាមានជំងឺម្យ៉ាងទៀតគួរឱ្យបារម្ភ appeared first on Kampuchea Thmey Daily.

តាមការឲ្យដឹងពីលោក ស៊ី ណាវ៉ាត់ត្រា បាននិយាយប្រាប់កម្ពុជាថ្មីថា នេះជាបំណងប្រាថ្នាធំមួយទៀតរបស់លោកដែលភរិយាបានពពោះកូនទី៣ រយ:ពេលចូល២ខែមកហើយ។ លោកថានេះជាកាដូឆ្នាំថ្មី មិនអាចកាត់ថ្លៃបាននោះឡើយ ព្រោះលោកចង់បានកូននៅឆ្នាំម្សាញ់ ដែលត្រូវឆ្នាំ២០២៥ ឥឡូវបានដូចបំណងហើយ។

លោក ស៊ី ណាវ៉ាត់ត្រា ប្រាប់តាមទូរស័ព្ទថា «ខ្ញុំត្រេកអរមែនដែលប្រពន្ធខ្ញុំគាត់មានផ្ទៃពោះចូល ២ខែហើយ អ៊ីចឹងនឹងសម្រាលនៅពាក់កណ្ដាលឆ្នាំ២០២៥ ដែលត្រូវឆ្នាំម្សាញ់ ខ្ញុំចង់បានកូននៅឆ្នាំម្សាញ់ហ្នឹង អីចឹងពួកយើងបានសម្រេចបំណងមួយនេះនៅឆ្នាំក្រោយហ្នឹងហើយ»។

អំឡុងពេលដែលលោក ចាន់ស៊ី ស៊ីណាវ៉ាត់ត្រា កំពុងតែទទួលបានកាដូធំពីភរិយាសំណព្វចិត្តនោះ តារាធ្លាប់មានប្រវត្តិកម្សត់កំព្រាឪពុកតាំងពីតូចរូបនេះ ក៏កំពុងតែពិបាកចិត្តផងដែរ ព្រោះម្ដាយជាទីស្រលាញ់របស់លោកអ្នកស្រី ញេប ឡេង អាយុ៦៥ឆ្នាំ មានជំងឺរបេង រលាកសួត និងទឹកនោមផ្អែម ហើយកំពុងសម្រាកព្យាបាលនៅពេទ្យខេត្តបាត់ដំបង ប៉ុន្ដែលោកថាស្ថានភាពម្ដាយចុងក្រោយបានធូរស្រាលបន្ដិចហើយ។

លោក ណាវ៉ាត់ត្រា ថ្លែងទៀតថា«ខ្ញុំពិបាកចិត្តណាស់ពេលម្ដាយគេងលើគ្រែពេទ្យ ព្រោះខ្ញុំកំព្រាឪពុកតាំង ពីតូច អ៊ីចឹងគាត់ដើរតួនាទីជាឪពុកផងម្ដាយផង។ ប៉ុន្ដែអំឡុងពេលដែលខ្ញុំកំពុងតែមានបញ្ហាផ្លូវចិត្ត ដោយសារតែអាណិតម្ដាយឈឺនេះ ភរិយាបានធ្វើឲ្យខ្ញុំរីករាយមួយផ្នែក នោះគឺគាត់បានពពោះកូនទី៣ ព្រោះខ្ញុំចង់បានកូននៅឆ្នាំម្សាញ់។

លោក ណាវ៉ាត់ត្រា បានភ្ជាប់ទំនាក់ទំណងស្នេហាជា មួយអ្នកនាងសឿន ស្រីវីន អំឡុងឆ្នាំ២០១៤ និងបានរៀបការនៅឆ្នាំ២០១៦ ហើយលោកនៅតែបន្ដអាជីពសម្ដែងធម្មតា ខណៈភរិយាលោកក៏មានមុខរបរផ្ទាល់ខ្លួន។ លោកបានសរ​សើរពីគុណសម្បត្តិភរិយាថាអ្នក នាងស្រីវីន ជាមនុស្សស្រីម្នាក់ដែលចេះយល់ពីលោក និងស្រលាញ់អ្វីដែលលោក​មាន ខណៈដែលលោកក៏ស្រលាញ់នាងដោយស្មោះត្រង់មិនផ្ដោតលើទ្រព្យសម្បត្តិនោះទេ៕ អត្ថបទ៖ ចាន់រ៉ា

The post តារាសម្ដែង ស៊ី ណាវ៉ាត់ត្រា បានកូនឆ្នាំម្សាញ់តាមបំណង តែបារម្ភម្តាយកំពុងមានជំងឺនៅពេទ្យ appeared first on Kampuchea Thmey Daily.

តារា​ស្រី​សម្តី​ផ្អែម សួង សាខារ៉ានីត បាន​ប្រាប់​កម្ពុជា​ថ្មី​ឲ្យ​ដឹង​ថា នាង​ពិត​ជា​មាន​ការ​ព្រួយបារម្ភ​ខ្លាំង​ណាស់​ទៅ​លើ​បញ្ហា​គ្រឿង​ស្រវឹង ព្រោះ​បច្ចុប្បន្ន​មាន​យុវជន​មួយចំនួន​មិនសូវ​បាន​យល់​ពី​ផល​ប៉ះពាល់ នៃ​ការ​ពិសា​គ្រឿង​ស្រវឹង​ទេ ព្រោះ​អ្នកខ្លះ​គិត​ថា ការ​បរិភោគ​គ្រឿងស្រវឹង​មិន​ត្រឹមតែ​ធ្វើ​ឲ្យ​សប្បាយ​នោះ​ទេ ពោល​គឺ​ថែមទាំង​មាន​ការ​លើកទឹកចិត្ត​តាមរយៈ​ការ​ដាក់​រង្វាន់​នៅ​លើ​ក្រវិល​កំប៉ុង​ទៀត​ផង។

សួង សាខារ៉ានីត សង្កត់​ធ្ងន់​ថា “ខ្ញុំ​សូម​ស្នើ​ដល់​បងប្អូន​យើង ព្រមទាំង​យុវជន​មួយ​ចំនួន កុំ​ឈ្លក់​វង្វេង​នឹង​ការ​ពិសា​គ្រឿង​ស្រវឹង​ខ្លាំង​ពេក ព្រោះ​ពេលខ្លះ​គឺ​វា​ជះឥទ្ធិពល​មិនល្អ​សម្រាប់​ខ្លួន​យើង សង្គម​ជាតិ និង​ក្រុម​គ្រួសារ ដោយសារ​គ្រឿង​ស្រវឹង បង្ក​ឲ្យ​ប៉ះពាល់​សុខភាព​,​បង្កើត​ជា​អំពើ​ហិង្សា​ក្នុង​គ្រួសារ និង​បញ្ហា​ធំ គឺ​បង្ក​គ្រោះថ្នាក់​ចរាចរណ៍​នៅ​លើ​ដង​ផ្លូវ​ជាដើម​”។

រ៉ានីត និយាយ​ទៀត​ថា នាង​មាន​ការ​ខ្វល់ខ្វាយ​ជា​ខ្លាំង​ជាមួយ​ប្រជាជន ប្រសិនបើ​ពួកគាត់​ហូប​ត្រឹម​លក្ខណៈ​ជួបជុំ​សប្បាយ​ម្ដងម្កាល ដោយ​កម្រិត​ល្មមៗ វា​ជា​រឿង​ធម្មតា​ទេ ប៉ុន្តែ​ខ្លាច​តែ​លក្ខណៈ​ហូប​ជ្រុល ឬ រាល់ថ្ងៃ ដើម្បី​តាម​យក​រង្វាន់។

នាង​បន្ត​ថា សូម​កុំ​ឲ្យ​ការ​សប្បាយ​ដឹក​មុខ ព្រោះ​នៅ​ពេល​ដែល​មាន​បញ្ហា​កើតឡើង​គឺ​មាន​តែ​ខ្លួន​យើង​ប៉ុណ្ណោះ​ជា​អ្នក​ពិបាក​មុនគេ៕

អត្ថបទ ៖ ចាន់រ៉ា

The post សួង សាខារ៉ានីត បារម្ភយុវជនជំនាន់ក្រោយសប្បាយភ្លើតភ្លើននឹងគ្រឿងស្រវឹងភ្លេចខ្លួន appeared first on Kampuchea Thmey Daily.

ទោះបីជា​តារា​ស្រី​សិច​ស៊ី សាន សុ​ម៉ាលី បាន​បាត់​វត្តមាន​ពី​អាជីព​សម្តែង​មួយសន្ទុះ​ធំ​យ៉ាងណាក្តី សម្រាប់​តារា​ស្រី​រូបនេះ​នៅតែ​ធ្វើ​ឲ្យ​អ្នកគាំទ្រ​នឹក​រម្លឹក​ដល់​នាង​ដែល​ធ្លាប់​បង្ហាញ​ស្នាដៃ​សម្តែង​តាមរយៈ​ភាពយន្ត​របស់​ខ្មែរ​ជាច្រើន។ ពិសេស សុ​ម៉ាលី ក៏​ជា​តារា​ស្រី​ខ្មែរ​មួយ​ដួង​ដែលមាន​សមត្ថភាព​សម្តែង​បានល្អ​ផងដែរ។

បន្ទាប់ពី​ផ្តើម​លេច​វត្តមាន​បណ្តើរៗ​ ឡើងវិញ​ ស្រាប់តែ​តារា​ស្រី​រូបនេះ​បាន​ទម្លាយ​នាង​ក៏​ធ្លាប់​ជួប​ជំងឺ​បាក់​ទឹក​ចិត្ត​ដែរ​ តែ​អ្វីដែល​សំខាន់​គឺ​ការ​តស៊ូ​ និង​កុំ​ប្រមាថ​ជីវិត​អ្នកដទៃ។ សាន សុ​ម៉ាលី និយាយថា «ពេលខ្លះ ខ្ញុំ​ក៏​មាន​ជំងឺ​បាក់​ទឹកចិត្ត​ដែរ​ តែ​តស៊ូ​នឹង​បញ្ហា​ចំពោះ​មុខ»។

តារា​សម្តែង សាន សុ​ម៉ាលី និយាយទៀតថា កុំ​ទម្លាប់​ពេបជ្រាយ​ជីវិត​របស់​អ្នកដទៃ​ មើលងាយ​នរណា​ម្នាក់ ព្រោះ​ក្នុង​លោក​នេះ​គ្មានអ្វី​ស្ថិតស្ថេរ​ទេ បើ​អ្នក​បានល្អ បាន​ខ្ពង់ខ្ពស់​ហើយ ក៏​រីករាយ​ទទួល​ចុះ​ តែ​ហាម​ប្រមាថ​ជីវិត​អ្នកដទៃ​ ប្រយ័ត្ន​បាប​ឲ្យ​ផល​ទាញ​អ្នក​ទម្លាក់​វិញ។

សូមជម្រាបថា​ រឿង «​កាកី​» គឺជា​ខ្សែ​រឿង​ដំបូង​ដែល​ សុ​ម៉ាលី បាន​ចូលរួម​សម្តែង​ និង​បានធ្វើឲ្យនាង​ចាប់ផ្តើម​មានឈ្មោះ​បោះ​សំឡេង​ក្នុង​វិស័យ​ភាពយន្ត។ ទោះជា​យ៉ាងណាក្តី​ តារា​សម្តែង​រូបនេះ ​គឺ​ហាក់​បាត់​ទីផ្សារ​សម្តែង​ច្រើន​នៅ​ប៉ុន្មាន​ឆ្នាំ​ចុង​ក្រោយនេះ​ បន្ទាប់ពី​ផ្ទុះ​រឿង​អាស្រូវ​ផ្ទួនៗ ខណៈ​កាលពី​ថ្មីៗ​ កន្លងទៅ ​ក៏​ផ្ទុះ​ដំណឹង​មានកូន​ទៀតផង៕

អត្ថបទ ៖ ចាន់រ៉ា

The post ធ្លាប់បាក់ទឹកចិត្ត តារាសម្តែង សាន សុម៉ាលី ថា សូមកុំប្រមាថជីវិតអ្នកដទៃ appeared first on Kampuchea Thmey Daily.

ប្រាកដ​ណាស់​នា​ពេល​បច្ចុប្បន្ន​នេះ​បញ្ហា​គ្រោះថ្នាក់​ចរាចរណ៍​តែងតែ​កើត​ឡើង​ជា​បន្តបន្ទាប់​បណ្ដាល​ឲ្យ​មាន​គ្រោះថ្នាក់​ដល់​អាយុជីវិត (​ស្លាប់​) និង​របួស​ជាដើម។ ហេតុ​នេះ​ហើយ ទើប​ក្នុង​មួយ​រយៈពេល​ចុង​ក្រោយនេះ​ឃើញ​មាន​សមត្ថកិច្ច​នៅ​តាម​បណ្តា​ខេត្ត-ក្រុង​មួយ​ចំនួន បាន​បើក​យុទ្ធនា​ការ​អនុវត្ត​រឹត​បន្តឹង​ច្បាប់​ចរាចរណ៍​ផ្លូវគោក ដើម្បី​ចូលរួម​កាត់បន្ថយ​អត្រា​គ្រោះ​នៅ​លើ​ដង​ផ្លូវ។

ដោយឡែក កញ្ញា ញឹម ចាន់ថន បាន​បង្ហោះ​រូបភាព​អម​ដោយ​ខ្លឹមសារ​អំពាវនាវ​ដូច្នេះ​ថា «បងប្អូន និង​ហ្វេនៗ នៅចាំ spot នេះ​ទេ​? ថត​គ្រោះថ្នាក់​ចរាចរណ៍ (TV បាយ័ន​) សូម​គោរព​ច្បាប់​ចរាចរណ៍​ទាំងអស់​គ្នា មិន​នឹកស្មាន spot ល្បី​ខ្លាំង មាន​បងប្អូន​មិត្តភ័ក្ដិ​បារម្ភ​ខល​មក​ច្រើន​ណាស់ ដោយសារ​ដំបូង​គេ​មិន​ទាន់​ឲ្យ​យើង​ផុស​ទេ អ៊ីចឹង​ហើយ​ធ្វើ​ឲ្យ​បងប្អូន​មិត្តភ័ក្ដិ​គិត​ថា​គ្រោះថ្នាក់​មែន»។

តារា​សម្តែង​កញ្ញា ញឹម ចាន់ថន និយាយ​ទៀត​ថា «ពេល​ហ្នឹង​យើង​ដឹង​ច្បាស់​ពេល​ជួប​បញ្ហា​បាន​យើង​ដឹង​អ្នកណា​ខ្លះ​ភ័យ​បារម្ភ​ជាមួយ​យើង តែ​យ៉ាងណា​ក៏​សូម​អរគុណ​ច្រើន​ការ​ស្រទ្បាញ់​រាប់អាន​ស្មោះ​ចេញពី​ចិត្ត​មក​លើ​រូបខ្ញុំ ញឹម ចាន់ថន»។

គួរ​បញ្ជាក់​ដែរ​ថា កន្លងមក​ក្នុង​គោលបំណង​ដើម្បី​ចូលរួម​ការងារ​ជួយ​សង្គម ពិសេស​ការ​ផ្សព្វផ្សាយ​អប់រំ​បញ្ហា​ច្បាប់​ចរាចរណ៍​ផ្លូវគោក និង​របៀប នៃ​ការ​បើកបរ​នាំ​មក​នូវ​សុវត្ថិភាព តារា​ពហុ​ជំនាញ លោក ដួង សុខគា ក៏​ធ្លាប់​បាន​បង្ហាញ​ពី​គោលបំណង​បង្កើត​ផេក​មួយ​ក្នុង​ការ​ផលិត​វីដេអូ​អប់រំ​ដាស់​តឿន​ពី​ច្បាប់​ចរាចរណ៍​ផង​ដែរ៕

អត្ថបទ ៖ ចាន់រ៉ា

The post ញឹម ចាន់ថន អំពាវនាវពលរដ្ឋចូលរួមគោរពច្បាប់ចរាចរណ៍ appeared first on Kampuchea Thmey Daily.

តារា​សម្តែង​សម្បូរ​សាច់ដុំ​លោក អ៊ុន សិទ្ធា បាន​បង្ហោះ​សារ​ខ្លី​មួយ​នៅ​លើ​បណ្ដាញ​សង្គម​ហ្វេស​ប៊ុក​ផ្ទាល់ខ្លួន​ថា «ឆ្នាំនេះ ជា​ឆ្នាំ​ស៊យ​របស់ខ្ញុំ ខំប្រឹង​ងើប​ដើរ​ទៅ​មុខ​បន្ត​ទៀត​ឲ្យ​អស់​ពី​លទ្ធភាព អ៊ុន សិទ្ធា មិន​ងាយ​ចុះចាញ់​នោះ​ទេ»។ តាមរយៈ​ខ្លឹមសារ​នេះ បាន​ធ្វើ​ឲ្យ​អ្នកគាំទ្រ​ជា​ច្រើន​បញ្ចេញ​មតិ​សួរនាំ​គ្រប់គ្នា ដោយ​ចង់​ដឹង​ថា តើ​តារា​ប្រុស​រូប​នេះ​កំពុង​ជួប​បញ្ហា​អ្វី​?។

ប៉ុន្តែ​ទោះបី​យ៉ាងណា តារា​សម្តែង​ល្បីឈ្មោះ​លោក អ៊ុន សិទ្ធា មិន​បាន​បញ្ជាក់​ឲ្យ​ដឹង​ទេ​ថា លោក​កំពុង​ជួប​រឿង​អ្វី​នោះ។ ក្នុង​នោះ​ដែរ ក៏​មាន​ការ​បញ្ចេញ​មតិ​លើក​ទឹកចិត្ត​ថា «កុំ​គិត​ទៅ​ផ្លូវ​រឿង​ស៊យ​អ្វី​កូន ជីវិត​កើត​មក​ចិត្តបុណ្យ​ដូច​កូន​មាន​ទេវតា​តាម​ថែរក្សា​ជានិច្ច​ហើយ សំខាន់​ធ្វើ​ចិត្ត​ឲ្យ​មាំទាំ កុំ​ទោរទន់​ពេក​អី»។

សូម​បញ្ជាក់​ថា លោក អ៊ុន សិទ្ធា បាន​ប្រឡូក​ក្នុង​វិស័យ​សិល្បៈ​តាមរយៈ​ការ​ដើរ​ម៉ូត ,សម្ដែង​រឿង និង​ធ្វើជា​ពិធី​ករ​តាម​កម្មវិធី​ផ្សេងៗ តាំងពី​ឆ្នាំ ២០០៦។ កិត្តិនាម​របស់​លោក​ចាប់ផ្ដើម​ល្បី​សុះសាយ និង​ទទួល​បាន​ការ​គាំទ្រ​ច្រើន​ពី​ទស្សនិកជន បន្ទាប់ពី​លោក​បាន​ដើរ​ជា​តួអង្គ​សំខាន់​ម្នាក់​ក្នុង​រឿង “​ស្បែក​គង់​” ព្រមទាំង​រឿង​ខ្នាត​ធំ និង​រឿង​ភាគ​ដែល​បញ្ចាំង​លើ​កញ្ចក់​ទូរទស្សន៍​ជាច្រើន​ទៀត៕

អត្ថបទ ៖ ចាន់រ៉ា

The post តារាសម្តែង អ៊ុន សិទ្ធា ចាត់ទុក ២០២៤ ជាឆ្នាំស៊យរបស់ខ្លួន appeared first on Kampuchea Thmey Daily.

បើ​តាម​ការ​បញ្ជាក់​ឲ្យ​ដឹង​ពី​លោក កៅ សីហា ដែល​ជា​អ្នក​ដឹកនាំ​សម្តែង បាន​ប្រាប់​ថា លោក អៀម សុខា បាន​ជួប​គ្រោះថ្នាក់​ចរាចរណ៍ កាលពី​ថ្ងៃ​ទី ០៦ ខែ​មីនា ឆ្នាំ ២០២៤ ម្សិលមិញ បង្ក​ឡើង​រវាង​ម៉ូតូ​បុក​ម៉ូតូ បណ្ដាល​ឲ្យ​តារា​ប្រុស​រូប​នេះ​រង​របួស​ធ្ងន់។ បន្ទាប់ពី​ជួប​គ្រោះ លោក អៀម សុខា ត្រូវ​បាន​បញ្ជូន​ទៅ​សង្គ្រោះ​នៅ​មន្ទីរពេទ្យ​រុស្ស៊ី អគារ​ឯកទេស​ថ្គាម និង​ចង្កា។

លោក កៅ សីហា បាន​រៀបរាប់​ថា «ម្សិលមិញ Eam SoKha បាន​ទទួល​រងគ្រោះថ្នាក់​ចរាចរណ៍​រវាង​ម៉ូតូ និង​ម៉ូតូ ដោយ​បាក់​ថ្គាម ហើយ​ត្រូវ​ធ្វើការ​វះកាត់​ថ្គាម​ដាក់​ដែក​អស់​មួយ​ជីវិត ហើយ​ត្រូវការ​ចំណាយ​ទៅ​លើ​ការ​វះកាត់​អស់​ខ្ទង់ពាន់​ដុល្លារ និង​បន្ត​ការ​ព្យាបាល​នៅ​មន្ទីរពេទ្យ​រុស្ស៊ី​អគារ​ឯកទេស​ថ្គាម​ចង្កា»។

លោក​បន្ត​ថា «ខ្ញុំ​បាន​យក​ថវិកា​ឧបត្ថម្ភ​ពី​លោកស្រី Chanlakhena Chorn ប្រធាន​សមាគម​សិល្បករ​ខ្មែរ ចំនួន ១៥០ ដុល្លារ​(ថវិកា​ផ្ទាល់ខ្លួន​គាត់) យក​មក​ប្រគល់​ជូន​ដល់​ប្អូន សុខា ដើម្បី​ជួយ​សម្រាល​ក្នុង​ការ​ព្យាបាល»។

អ្នកដឹកនាំ​សម្តែង កៅ សីហា បន្ថែម​ទៀត​ថា «អាណិត​ណាស់​បងប្អូន​អើយ មក​ត្រៀម​វះកាត់​ដេក ឈឺ​ម្នាក់​ឯង គ្មាន​អ្នក​កំដរ និង​យកអាសា។ បើ​បងប្អូន​សិល្បករ​ដែល​ធ្លាប់​ធ្វើការ​ជាមួយ សុខា ឬ​ធ្លាប់​បាន សុខា ផាត់​មុខ​ឲ្យ ហើយ​មាន​ចិត្ត​អាណិត​ដល់ សុខា ចង់​ចូលរួម​ជួយ​សម្រាល​បន្ទុក​ការ​វះកាត់​ថ្គាម​ដាក់​ដែក​នោះ​ផង»។

សូម​បញ្ជាក់​ដែរ​ថា លោក អៀម សុខា បច្ចុប្បន្ន​ក្រៅពី​អាជីព​សម្តែង លោក​ក៏​ជា​អ្នក​ផាត់​មុខ​ដ៏​ជំនាញ និង​មាន​ស្នាដៃ​ល្អ​ជួយ​សម្រួល​ដល់​ភាព​ស្រស់​ស្អាត​របស់​តារា​ខ្មែរ​មួយ​ចំនួន​ផង​ដែរ៕

អត្ថបទ ៖ ចាន់រ៉ា

The post តារាសម្តែង អៀម សុខា ជួបគ្រោះថ្នាក់ចរាចរណ៍បាក់ថ្គាម ត្រូវវះកាត់ដាក់ដែកអស់មួយជីវិត appeared first on Kampuchea Thmey Daily.