តាំងពិព័រណ៍ Archives - Kampuchea Thmey Daily

រូបថតជាច្រើនផ្ទាំង បង្ហាញពីសមិទ្ធផលនានា និងការងារអភិវឌ្ឍន៍ទីក្រុងភ្នំពេញ លើគ្រប់វិស័យ ក្នុងសម័យតេជោ-ធិបតី

អ៊ិន ពិសី — Sat, 17 Jan 2026 03:08:57 +0000

រូបថតសកម្មភាពចម្រុះជាច្រើនផ្ទាំងស្ដីពីសមិទ្ធផលនានា និងការងារអភិវឌ្ឍន៍ទីក្រុងភ្នំពេញ លើគ្រប់វិស័យ ក្នុងសម័យតេជោ-ធិបតី ត្រូវបានដាក់តាំងពិព័រណ៍នៅក្នុងពិធីសន្និបាតបូកសរុបលទ្ធផលការងារឆ្នាំ ២០២៥ និងលើកទិសដៅការងារសម្រាប់ឆ្នាំ ២០២៦ របស់រដ្ឋបាលរាជធានីភ្នំពេញ បន្ទាប់ពីឆ្លងកាត់នូវរឿងរ៉ាវប្រវត្តិសាស្ត្រជាច្រើន រាជធានីភ្នំពេញ បានបំប្លែងខ្លួនពីទីក្រុងគ្មានមនុស្សនៅ ទៅជាទីក្រុងដែលជាបណ្ដុំ នៃការរស់នៅ ប្រកបដោយប្រណិតភាព តំបន់ទេសចរណ៍ដ៏រស់រវើក មានការអភិវឌ្ឍសេដ្ឋកិច្ច និងសង្គម បានយ៉ាងឆាប់រហ័សគួរឲ្យកត់សម្គាល់។

ការយកចិត្តទុកដាក់ និងកិច្ចខិតខំប្រឹងប្រែងអស់រយៈពេលជាងសាមសិបឆ្នាំកន្លងមកនេះ រាជរដ្ឋាភិបាលក្នុងនីតិកាល កន្លងមក ក្រោមការដឹកនាំដ៏ខ្ពង់ខ្ពស់បំផុតរបស់ សម្តេចអគ្គមហាសេនាបតីតេជោ ហ៊ុន សែន និងរាជរដ្ឋាភិបាលនីតិកាលទី ៧ ក្រោមការដឹកនាំប្រកបដោយភាពឈ្លាសវៃបំផុតរបស់ សម្តេចមហាបវរធិបតី បានធ្វើឲ្យព្រះរាជាណាចក្រកម្ពុជា ជាពិសេសរាជធានីភ្នំពេញ មានការអភិវឌ្ឍយ៉ាងឆាប់រហ័ស និងសម្រេចបាននូវស្នាដៃ និងសមិទ្ធផលជាប្រវត្តិសាស្ត្រជាច្រើន។

មុនពិធីបិទសន្និបាតបូកសរុបលទ្ធផលការងារប្រចាំឆ្នាំ ២០២៥ និងលើកទិសដៅការងារឆ្នាំ ២០២៦ របស់រដ្ឋបាលរាជធានីភ្នំពេញ លោក ឃួង ស្រេង អភិបាលរាជធានីភ្នំពេញ បានជម្រាបជូន លោក ស៊ុន ចាន់ថុល ឧបនាយករដ្ឋមន្ត្រី ទទួលបន្ទុកជាអនុប្រធានទី ១ នៃក្រុមប្រឹក្សាអភិវឌ្ឍន៍កម្ពុជា និងជាប្រធានក្រុមការងាររាជរដ្ឋាភិបាលចុះមូលដ្ឋានរាជធានីភ្នំពេញ និងគណៈប្រតិភូចូលរួម ពីរូបភាពជាច្រើនផ្ទាំងខាងលើ បានបង្ហាញពីសមិទ្ធផលនានា និង ការងារអភិវឌ្ឍន៍ទីក្រុងភ្នំពេញលើគ្រប់វិស័យ ក្នុងសម័យតេជោ-ធិបតី និងរឿងរ៉ាវប្រវត្តិសាស្ត្រជាច្រើនរបស់រាជធានីភ្នំពេញ បានបំប្លែងខ្លួនពីទីក្រុងគ្មានមនុស្សនៅ ទៅជាទីក្រុងដែលជាបណ្ដុំ នៃការរស់នៅប្រកបដោយប្រណិតភាព តំបន់ ទេសចរណ៍ដ៏រស់រវើក មានការអភិវឌ្ឍសេដ្ឋកិច្ច និងសង្គម បានយ៉ាងឆាប់រហ័សគួរឲ្យកត់សម្គាល់។

ទន្ទឹមនោះ លោក ស៊ុន ចាន់ថុល បានកោតសរសើរចំពោះ លោក ឃួង ស្រេង និងគណៈអភិបាល ព្រមទាំងថ្នាក់ដឹកនាំរាជធានី បានខិតខំប្រឹងប្រែងបំពេញការងារអភិវឌ្ឍន៍ទីក្រុងភ្នំពេញលើគ្រប់វិស័យទទួលបានផ្លែផ្កាដូចសព្វថ្ងៃនេះ៕

អត្ថបទ ៖ ស្រីរ័ត្ន

The post រូបថតជាច្រើនផ្ទាំង បង្ហាញពីសមិទ្ធផលនានា និងការងារអភិវឌ្ឍន៍ទីក្រុងភ្នំពេញ លើគ្រប់វិស័យ ក្នុងសម័យតេជោ-ធិបតី appeared first on Kampuchea Thmey Daily.

ចុងសប្តាហ៍នេះ នឹងមាន “ពិព័រណ៍ជំនាញ និងសាកលវិទ្យាល័យ” ដល់សិស្សទើបចប់ទី១២

អុន ស្រីមាន — Mon, 18 Nov 2024 04:36:00 +0000

នៅថ្ងៃទី២២ និងទី២៣ ខែវិច្ឆិកា ឆ្នាំ២០២៤ ចាប់ពី ម៉ោង៨ព្រឹក ដល់ម៉ោង៥ល្ងាច នឹងមាន “ពិព័រណ៍ជំនាញ និងសាកលវិទ្យាល័យ” ជាឱកាសល្អសម្រាប់សិស្សនៅវិទ្យាល័យ និងសិស្សទើបប្រឡងចប់បាក់ឌុបចូលរួមដោយសេរី ដើម្បីទទួលបានព័ត៌មានផ្សេងៗសម្រាប់ត្រៀមបន្តការសិក្សានៅឧត្តមសិក្សា។ មិនតែប៉ុណ្ណោះ និស្សិត និងអ្នកកំពុងស្វែងរកការងារធ្វើក៏អាចចូលរួមកម្មវិធីនេះបានដូចគ្នា។

កម្មវិធីនេះ រៀបចំដោយ Sala និងមានការគាំទ្រដោយក្រសួងអប់រំ យុវជន និងកីឡា ដែលនឹងធ្វើនៅសាកលវិទ្យាល័យភូមិន្ទភ្នំពេញ (RUPP) នៅមជ្ឈមណ្ឌលសហប្រតិបត្តិការកម្ពុជា-ជប៉ុន (CJCC) ដែលនឹងមានការចូលរួមពីសាកលវិទ្យាល័យ វិទ្យាស្ថានបណ្តុះបណ្តាលវិជ្ជាជីវៈ និងស្ថាប័នអប់រំជាង៣០។ អ្នកចូលរួមអាចទស្សនាស្តង់របស់សាកលវិទ្យាល័យនីមួយៗ កម្មវិធីជជែកដេញដោល ទាក់ទងនឹងយុវជន ការអប់រំ។ ជាមួយគ្នានេះ ក៏មានតុពិភាក្សាទាក់ទងនឹងសាកលវិទ្យាល័យ និងបទពិសោធការងារពីវាគ្មិនជំនាញផងដែរ។ ចំពោះចែករំលែកបទពិសោធ និងចំណេះដឹងរបស់វាគ្មិន ធ្វើឡើងជុំវិញមូលបទ ៣ធំៗដូចជា “ការត្រៀមលក្ខណៈឆ្ពោះទៅកាន់ជីវិតជានិស្សិត” “ការឈោងចាប់ក្តីស្រមៃ” និង “ការត្រៀមលក្ខណៈឆ្ពោះទៅកាន់វិស័យការងារ”។

បន្ថែមពីនេះ ក៏មានការសម្តែងល្ខោនយីកេក្នុងពិធីបិទកម្មវិធីទៀតផង ជាចំណែកក្នុងការផ្សព្វផ្សាយពីវប្បធម៌ខ្មែរ និងអាចឱ្យយុវជនជំនាន់ក្រោយបានស្គាល់ពីល្ខោនយីកេកាន់តែច្រើន។

ពិព័រណ៍នេះ រៀបចំឡើងក្នុងគោលបំណងឱ្យសិស្សនិស្សិតបានស្វែងយល់ពីជំនាញ និងសាកលវិទ្យាល័យ។ សិស្សអាចសាកសួរព័ត៌មានផ្សេងៗពីជំនាញសិក្សា សាកលវិទ្យាល័យផ្ទាល់តែម្តង និងទទួលបានឱកាសការងារផ្សេងៗដែរ។ លើសពីនេះ ពិព័រណ៍នេះជួយឱ្យសិស្សទទួលបានព័ត៌មានច្រើន ងាយស្រួលក្នុងការចម្រេចចិត្តសិក្សាមុខជំនាញណាមួយ នៅសាកលវិទ្យាល័យណាដែលត្រឹមត្រូវ ហើយក៏ទទួលបានបទពិសោធសិក្សានៅសាកលវិទ្យា និងបទពិសោធការងារពីវាគ្មិនជំនាញថែមទៀត។

សូមជម្រាបថា ឆ្នាំ២០២៤នេះ គឺជាលើកទី៤ហើយ នៃកា រ“ពិព័រណ៍ជំនាញ និងសាកលវិទ្យាល័យ” ដោយដើមឡើយកម្មវិធីនេះត្រូវបានរៀបចំឡើងអំឡុងពេលវិបត្តិកូវីដ១៩ និងត្រូវបានធ្វើឡើងតាមរយៈអនឡាញ រហូតបន្តរៀបចំជារៀងរាល់ឆ្នាំដល់ឆ្នាំ២០២៤។ កម្មវិធីនេះនៅតែបន្តសកម្មភាពដើម្បីឆ្លើយតបនឹងបេសកកម្មរបស់ខ្លួនក្នុងវិស័យអប់រំ ដើម្បីយុវជនអាចទទួលបានជំនាញដែលស័ក្តិសមនឹងក្តីស្រមៃរបស់ពួកគេព្រមទាំងត្រូវជាមួយនឹងទីផ្សារការងារផងដែរ៕

The post ចុងសប្តាហ៍នេះ នឹងមាន “ពិព័រណ៍ជំនាញ និងសាកលវិទ្យាល័យ” ដល់សិស្សទើបចប់ទី១២ appeared first on Kampuchea Thmey Daily.

លោកជំទាវបណ្ឌិត ពេជ ចន្ទមុន្នី ហ៊ុនម៉ាណែត ជំរុញទឹកចិត្តប្រជាពលរដ្ឋទាំងអស់ ឱ្យចូលរួមចលនា ខ្មែរជួយខ្មែរ និងខ្មែរគាំទ្រកសិផលខ្មែរ

Sorn Phanith — Sat, 01 Jun 2024 08:26:06 +0000

នាព្រឹកថ្ងៃទី ១ ខែឧសភា ឆ្នាំ២០២៤ លោកជំទាវបណ្ឌិត ពេជ ចន្ទមុន្នី ហ៊ុនម៉ាណែត បានអញ្ជើញជាអធិបតីក្នុងពិធីបើកពិព័រណ៍ភូមិ កសិផលខ្មែរ និងវេទិកាពិភាក្សារសជាតិកសិផលខ្មែរ ដែលរៀបចំដោយក្រសួងកសិកម្ម រុក្ខាប្រមាញ់ និងនេសាទ រយៈពេល ២ថ្ងៃ ចាប់ពីថ្ងៃទី១ ដល់ទី២ ខែមិថុនា ឆ្នាំ២០២៤ នៅផ្សារទំនេីប ជីបម៉ុង២៧១ រាជធានីភ្នំពេញ ក្នុងគោលបំណងបង្កើនការផ្សព្វផ្សាយលើកទឹកចិត្តឱ្យមានការគាំទ្រ និងការប្រើប្រាស់កសិផលខ្មែរកាន់តែទូលំទូលាយថែមទៀត ដើម្បីជាប្រយោជន៍ដល់ប្រជាកសិករដែលខិតខំប្រឹងប្រែងផលិត។

មានប្រសាសន៍នៅក្នុងឱកាសនេះ លោកជំទាវបណ្ឌិត បានលេីកទឹកចិត្តឱ្យមានការរៀបចំកម្មវិធីពិព័រណ៍បែបនេះជារៀងរាល់ឆ្នាំ ដើម្បីបន្តពូនជ្រុំស្មារតីជាតិនិយម កៀរគរការគាំទ្រដល់កសិផលខ្មែរ ប្រកបដោយមោទនភាពជាតិ ។ ជាមួយនេះ លោកជំទាវបណ្ឌិត បានជំរុញទឹកចិត្តប្រជាពលរដ្ឋទាំងអស់ ឱ្យចូលរួមចលនា ខ្មែរជួយខ្មែរ និងខ្មែរគាំទ្រកសិផលខ្មែរ ព្រមទាំងបានអំពាវនាវ និងលើកទឹកចិត្តដល់ក្រុមហ៊ុនផ្តល់សេវាកម្មអាហារ សមាគម និងភោជនីយដ្ឋាននានា ឱ្យចូលរួមកាន់តែច្រើនកុះករ ដោយចាប់ដៃគូសហការផ្ទាល់ជាមួយក្រុមហ៊ុនផ្គត់ផ្គង់កសិផលខ្មែរ និងសហគមន៍កសិកម្មនានា ជាដើម ។ល។

ជាចុងក្រោយ លោកជំទាវបណ្ឌិត ក៏បានជំរុញ និងលេីកទឹកចិត្តដល់ប្រជាកសិករ និងសហគមន៍កសិកម្ម ដែលជាអ្នកផលិត ឱ្យបង្កើនការយកចិត្តទុកដាក់ គិតគូរដល់ផែនការផលិតកម្មប្រកបដោយនិរន្តរភាព សុវត្ថិភាព និងទីផ្សារ ដើម្បីបន្តកសាង និងពង្រឹងនូវទំនុកចិត្តឱ្យគ្នាទៅវិញទៅមក៕

The post លោកជំទាវបណ្ឌិត ពេជ ចន្ទមុន្នី ហ៊ុនម៉ាណែត ជំរុញទឹកចិត្តប្រជាពលរដ្ឋទាំងអស់ ឱ្យចូលរួមចលនា ខ្មែរជួយខ្មែរ និងខ្មែរគាំទ្រកសិផលខ្មែរ appeared first on Kampuchea Thmey Daily.

សារមន្ទីរព្រះនរោត្តម សីហនុ-អង្គរ រៀបចំពិព័រណ៍ ១០ ថ្ងៃ បង្ហាញវត្ថុបុរាណទើបរកឃើញថ្មីៗ

អ៊ិន ពិសី — Wed, 17 May 2023 23:51:59 +0000

សារមន្ទីរព្រះនរោត្តម សីហនុ-អង្គរ រៀបចំពិព័រណ៍មិនអចិន្ត្រៃយ៍រយៈពេលខ្លី ចំនួន ១០ ថ្ងៃ ចាប់ពីថ្ងៃទី ១៨ រហូតដល់ថ្ងៃទី ២៨ ខែឧសភា ឆ្នាំ ២០២៣ បង្ហាញវត្ថុបុរាណដែលទើបរកឃើញថ្មីៗ។ នេះបើតាមការជូនដំណឹងរបស់អាជ្ញាធរជាតិអប្សរា។

ពិព័រណ៍នេះនឹងរៀបចំតាំងបង្ហាញនូវវត្ថុបុរាណ វត្ថុសិល្បៈ ឬសមុច្ច័យមួយចំនួន ដែលសារមន្ទីរបានជ្រើសរើស និងទើបរកឃើញពីកំណាយស្រាវជ្រាវនៅតំបន់រមណីយដ្ឋានអង្គរ រួមនឹងកុលាលភាជន៍ មានប្រភពពីឡដុតកុលាលភាជន៍បុរាណតំបន់ភ្នំគូលែនផងដែរ។

សម្រាប់សមុច្ច័យដែលនឹងតាំងបង្ហាញក្នុងពិព័រណ៍ខាងលើនេះចែកជា ៣ ប្រភេទ ក្នុងនោះវត្ថុដែលធ្វើពីដីឥដ្ឋមាន លោហធាតុ សំរឹទ្ធ ស្ពាន់ ដែកសំណសមុច្ច័យវត្ថុបុរាណជាត្បូងគ្រីស្តាល់ និងគ្រាប់ក្វាតជាដើម។ សារមន្ទីរព្រះនរោត្តម សីហនុ-អង្គរ មានសុទិដ្ឋិនិយមថា ពិព័រណ៍ខាងលើនេះ នឹង ផ្តល់ព័ត៌មានថ្មីៗ ស្ដីពីវឌ្ឍនភាព និងភាពរីកចម្រើនក្នុងវិស័យស្រាវជ្រាវ និងកំណាយតាមបែបបុរាណវិទ្យា ក្នុងតំបន់ការពារបេតិកភណ្ឌរមណីយដ្ឋានអង្គរ។

សាធារណជន ក៏អាចស្វែងយល់បន្ថែមពីការងារថែទាំ និងជួសជុលវត្ថុបុរាណ ក្រោយពេលបញ្ចប់ការងារស្រាវជ្រាវពីការដ្ឋានកំណាយផងដែរ។

សូមបញ្ជាក់ថា ពិព័រណ៍ខាងលើនេះធ្វើឡើងដើម្បីអបអរទិវាសារមន្ទីរអន្ដរជាតិថ្ងៃទី ១៨ ខែឧសភា។ ក្នុងថ្ងៃទី ១៨ នេះដែរ ភ្ញៀវទេសចរជាតិ អន្តរជាតិ អាចចូលទស្សនាបានដោយឥតគិតថ្លៃ៕

អត្ថបទ ៖ ចាន់រ៉ា

The post សារមន្ទីរព្រះនរោត្តម សីហនុ-អង្គរ រៀបចំពិព័រណ៍ ១០ ថ្ងៃ បង្ហាញវត្ថុបុរាណទើបរកឃើញថ្មីៗ appeared first on Kampuchea Thmey Daily.

Tiger Beer នាំមកនូវពិព័រណ៍សិល្បៈគំនូរដ៏ធំបំផុតនៅប្រទេសកម្ពុជា

Sorn Phanith — Fri, 04 Mar 2022 10:00:06 +0000

ដើម្បីស្វាគមន៍ Year of the Tiger ស្រាបៀរថៃហ្គឺរ បាននាំមកជូននូវកម្មវិធី Murals for Cambodia Festival ដោយសហការជាមួយ FT Gallery និង FONKi។ Murals for Cambodia Festival ប្រារព្ធធ្វើឡើងរយៈពេលបីថ្ងៃ ចាប់ពីថ្ងៃទី25 ដល់ថ្ងៃទី27 ខែកុម្ភៈ កន្លងទៅនេះ ក្នុងនោះមានការតាំងពិព័រណ៌សិល្បៈក្នុងស្រុកនិងអន្តរជាតិ ព្រមទាំងការប្រគំតន្ត្រី នៅមជ្ឍមណ្ឌលច្នៃប្រឌិត Factory Phnom Penh។

កម្មវិធីនេះទទួលបានការគាំទ្រយ៉ាងពេញទំហឹង ដោយមានការចូលរួមពីសំណាក់ភ្ញៀវជាតិ និងអន្តរជាតិយ៉ាងច្រើនកុះករ។ ជាកិត្តិយសណាស់ សម្រាប់ប្រទេសកម្ពុជាដែលបានទទួលស្វាគមន៍វិចិត្រករដែលមានទេពកោសល្យដូចជា MAUY & NAP MSV ដែលជាវិចិត្រករល្បីមកពីប្រទេសថៃ TONES វិចិត្រករជនជាតិខ្មែរដ៏ល្បីល្បាញទូទាំងពិភពលោកមកពីប្រទេសស្វីស KIMSAN SOU វិចិត្រករកម្ពុជាវ័យក្មេង VENKS វិចិត្រករគំនូរជីវចលរបស់ចក្រភពអង់គ្លេស YSK MIKE វិចិត្រករក្នុងស្រុក រួមទាំង TWOONE វិចិត្រករតាមដងវិថីជនជាតិជប៉ុនដ៏ល្បី Jean Baptiste Carraro វិចិត្រករជនជាតិបារាំងដែលមានមូលដ្ឋាននៅព្រះរាជាណាចក្រកម្ពុជានិង RYYSA សិល្បករជនជាតិខ្មែរ-ហូឡង់។ MAUY MSV ជាវិចិត្រករថៃផ្នែកគំនូរតាមដងវិថី បានបង្ហាញស្នាដៃរបស់ខ្លួនតាមរយៈ គំនូររូបខ្លាលើជញ្ជាំង ដែលជាគំនូរដ៏ធំជាងគេបំផុតក្នុងកម្មវិធីនេះផងដែរ ដែលមានទីតាំងនៅបរិវេណ Tiger Plaza, Factory Phnom Penh។

ក្រៅពីផ្ទាំងគំនូរ និងការតាំងពិព័រណ៌សិល្បៈ ក៏មានការប្រគំតន្ត្រីជាមួយនឹងការសំដែងរបស់ DJ និងក្រុម Hip Hop យ៉ាងសំបូរបែបដ៏ល្អបំផុតប្រចាំប្រទេសកម្ពុជា ក្នុងនោះរួមមាន កញ្ញា Nikki Nikki តារាចំរៀងនិងអ្នកនិពន្ធបទចម្រៀង Original Song រូបនេះបានបកស្រាយចំរៀងស្នាដៃថ្មីរបស់ខ្លួន បន្ថែមទៀតនោះក៏មានការសម្តែងរួមគ្នាជាមួយ កញ្ញា Marie Thach និងសិល្បករផ្សេងទៀតផងដែរ។ មិនតែប៉ុណ្ណោះ កញ្ញា Marie Thach ក៏បានបង្ហាញពីជំនាញ DJ របស់គាត់ជាមួយស្ទីលបែប House & Funk ដែលធ្វើឱ្យកម្មវិធីកាន់តែសប្បាយរីករាយថែមមួយកម្រិតទៀត។

ស្វាគមន៍ឆ្នាំថ្មី Year of the Tiger! ពី Tiger Beer តែងតែលើកទឹកចិត្តឱ្យមនុស្សគ្រប់រូប បង្ហាញនូវភាពជឿជាក់ និងបញ្ចេញសក្ដានុពលរបស់ខ្លួន។ អ្នកនាង គង់ សូរីដា Senior Brand Manager របស់ Tiger Beer បានមានប្រសាសន៍ថា “គោលបំណងធំបំផុតរបស់ Tiger Beer គឺចង់បំផុសគំនិត ឱ្យអ្នកទាំងអស់គ្នាមានក្តីស្រមៃខ្ពស់ មានទំនុកចិត្តលើខ្លួនឯង និងអបអរភាពជឿជាក់របស់ខ្លួនឯង។

នៅក្នុង Year Of The Tiger ពួកយើងមិនគ្រាន់តែបំផុសគំនិតឱ្យមនុស្សគ្រប់រូបបន្តក្ដីស្រមៃរបស់ពួកគេនោះទេ ប៉ុន្តែលើសពីនេះយើងនឹងជំរុញភាពក្លាហានដើម្បីឱ្យពួកគេសម្រេចនូវគោលដៅនោះអោយបាន។Tiger ពិតជាមានក្ដីសោមនស្សយ៉ាងខ្លាំងដែលបានសហការជាមួយ FONKi និង FT Gallery ដើម្បីបង្កើតកម្មវិធីដ៍អស្ចារ្យមួយនេះឡើង ហើយនឹងទន្ទឹងរង់ចាំបន្តនូវព្រឹត្តិការណ៍សិល្បៈ និងតន្ត្រីបន្ថែមទៀតក្នុងពេលឆាប់ៗខាងមុខនេះ។

អំពី Murals for Cambodia

Murals for Cambodia គឺជាព្រឹត្តិការណ៍ថ្មីប្រចាំឆ្នាំបន្ទាប់ពីការបើកសម្ពោធ FT GALLERY កាលពីឆ្នាំមុន។ FT GALLERY តែងតែប្រមូលផ្ដុំវិចិត្រករក្នុងស្រុក និងអន្តរជាតិ ដែលមានកេរ្តិ៍ឈ្មោះល្បីៗមកបង្ហាញស្នាដៃដ៏គួរឱ្យកោតសរសើរជាច្រើននៅឯមជ្ឍមណ្ឌលច្នៃប្រឌិតដ៏ធំបំផុតនៅអាស៊ីអាគ្នេយ៍ ក្នុងFactory Phnom Penh។ តាមរយៈព្រឹត្តិការណ៍នេះដែរ FT Gallery ព្រមទាំងអ្នកគ្រប់គ្រង់/សហស្ថាបនិក FONKi នឹងបង្កើតផ្ទាំងគំនូរធំៗ ព្រមទាំងផ្សព្វផ្សាយទូទាំងប្រទេសសម្រាប់ឆ្នាំខាងមុខនេះបន្តទៀត។

អំពី Tiger Beer

Tiger Beer មានដើមកំណើតនៅប្រទេសសិង្ហបុរី ដែលត្រូវបានបង្កើតឡើងនៅឆ្នាំ 1932។ Tiger Beer គឺជាស្រាបៀរលំដាប់ថ្នាក់អន្តរជាតិ សព្វថ្ងៃនេះ ឈរនៅលំដាប់លេខមួយក្នុងអាស៊ី និងជាម៉ាកផលិតផលដែលមានភាពរីកចម្រើនលឿនជាងគេបំផុត។ Tiger Beer មានលក់នៅលើទីផ្សារជាង 50ប្រទេសទូទាំងពិភពលោក។ ការជម្នះគ្រប់បែបយ៉ាងដើម្បីផលិតចេញនូវសមិទ្ធផលដ៏ល្អឥតខ្ចោះដែលមានរសជាតិដិត និងធ្វើឲ្យអារម្មណ៍ស្រស់ស្រាយ។ Tiger បានរកឃើញនូវវិធីដែលអាចនាំអ្នកទៅកាន់ភាពស្រស់ស្រាយថ្មីមួយដែលមិនធ្លាប់មានពីមុនមក ហើយ Tiger ក៏បានសម្រេចអ្វីដែរគ្រប់គ្នាគិតថាមិនអាចទៅរួចជាច្រើនទសវត្សរ៍មកហើយ៕

The post Tiger Beer នាំមកនូវពិព័រណ៍សិល្បៈគំនូរដ៏ធំបំផុតនៅប្រទេសកម្ពុជា appeared first on Kampuchea Thmey Daily.

ពិព័រណ៍យន្តហោះ និងបច្ចេកវិទ្យា រយៈពេល ២ ថ្ងៃ ទាក់ទាញសិស្សានុសិស្ស-និស្សិត និងសាធារណជន ច្រើនកុះករ

សាង ស្រីល័ក្ខ — Sat, 18 Dec 2021 06:55:53 +0000

ការតាំងពិព័រណ៍យន្តហោះ និងបច្ចេកវិទ្យា (Air & Tech Show) កំពុងតែប្រារព្ធធ្វើឡើងរយៈពេល ៣ថ្ងៃពេញ នៅឯមូលដ្ឋានទ័ពអាកាសពោធិ៍ចិនតុង រាជធានីភ្នំពេញ នា ថ្ងៃទី១៧ ១៨ ១៩ ខែធ្នូ ឆ្នាំ២០២១ បន្ទាប់ពីការខកខានកាលពីឆ្នាំមុន ដោយសារតែការរីករាលដាលនៃជំងឺរាតត្បាតសកល កូវីដ១៩។

ថ្វីត្បិតតែខកខានមួយឆ្នាំក្តី តែការទន្ទឹងរង់ចាំចំពោះកម្មវិធីនាឆ្នាំនេះ គឺនៅតែមានសន្ទុះនៃការចូលរួមច្រើនជានិច្ចពីសំណាក់សិស្សានុសិស្ស និស្សិត និងសាធារណជនទូទៅ ដោយមានការចូលរួមជាច្រើនគួរឲ្យកត់សម្គាល់ ដែលមានចំនួនប្រមាណជាង ២ពាន់នាក់ នាថ្ងៃទី១នៃកម្មវិធី។

ក្នុងការតាំងពិព័រណ៍នេះ គឺមានការដាក់តាំងបង្ហាញនូវស្នាដៃបច្ចេកវិទ្យាថ្មីៗជាច្រើនដូចជា មានការដាក់បង្ហាញនូវដ្រូនដែលអាចដឹកមនុស្សបាន ដ្រូនកសិកម្ម មនុស្សយន្តបំរើសេវាកម្មដឹកជញ្ជូនចំណីអាហារ គំរូកូនផ្កាយរណបដែលអាចថតយករូបភាពស្រទាប់ទីពីរនៃផែនដីរបស់សាលារៀនអ៊ីធូស្ទែម និងស្នាដៃបច្ចេកវិទ្យាជាច្រើនទៀតរបស់សិស្សវិទ្យាល័យ និងនិស្សិតនៅសាកលវិទ្យាល័យជាច្រើនក្នុងគោលបំណងដើម្បីបំផុសទឹកចិត្តយុវជនដែលមានទេពកោសល្យ និងសមត្ថភាពផ្នែកយន្តហោះ និងបច្ចេកវិទ្យារបស់កម្ពុជា បានបង្ហាញនូវសមិទ្ធផល និងការច្នៃប្រឌិតបង្កើតថ្មីរបស់ខ្លួន ជូនដល់មហាជននិងអ្នកដែលបានមកចូលរួមទស្សនាទាំងអស់ទទួលយកបទពិសោធន៍និងចំណេះដឹងថ្មីៗ។

នៅថ្ងៃទី១៨ និងថ្ងៃទី១៩នេះ ក៏សង្ឃឹមថានឹងមានការចូលរួមកាន់តែច្រើនពីសំណាក់សាធារណជន សិស្សានុសិស្ស ដើម្បីមកទស្សនាការតាំងពិព័រណ៍សមិទ្ធផលរបស់សិស្សវិទ្យាល័យ និងនិស្សិត មកពីសកលវិទ្យាល័យជាច្រើនក៏ដូចជាផ្ដល់ជាកំលាំងចិត្តដល់អ្នកដាក់បង្ហាញស្នាដៃ និងយន្តហោះ។

នៅក្នុងនោះ ក៏មាននូវការប្រកួតរ៉ូបូតមនុស្សយន្ដ និងយន្តហោះកៅស៊ូផងដែរ។ នារសៀលថ្ងៃទី១ម្សិលមិញនេះ កម្មវិធីប្រកួតប្រជែងរ៉ូបូតមនុស្សយន្ត ដែលមានបេក្ខជនចំនួន១០ក្រុម មកពីវិទ្យាល័យនិង សាកលវិទ្យាល័យ បានបង្ហាញសមត្ថភាពយ៉ាងស្វិតស្វាញ ក្នុងវគ្គប្រកួតជម្រុះក្នុងពូល ដោយលទ្ធផលមាន៤ក្រុម ក្នុងចំណោម១០ ក្រុម បានឈានទៅកាន់វគ្គកណ្តាលផ្តាច់ព្រ័ត្រ និងផ្ដាច់ព្រាត់នៅក្នុងថ្ងៃនេះ។ ចំណែកឯ ការប្រកួតយន្តហោះកៅស៊ូវិញ កម្មវិធីក៏បានជ្រើសយក១០ក្រុម ឆ្ពោះមកកាន់វគ្គផ្ដាច់ព្រ័ត្រផងដែរ។

គួររបញ្ជាក់ថា ពិព័រណ៍យន្តហោះ និងបចេ្ចកវិទ្យា ត្រូវបានបង្កើត និងរៀបចំឡើងដោយក្រុមយុវជនកម្ពុជាមកពី សហភាពសហព័ន្ធយុវជនកម្ពុជា ខេត្តស្វាយរៀង ដែលមានចំណង់ចំណូលចិត្តលើមុខវិជ្ជាយន្តហោះ អាកាសចរណ៍ បច្ចេកវិទ្យា និងវិទ្យាសាស្ត្រ និងគាំទ្រដោយក្រសួងអប់រំ យុវជន និងកីឡា និងកងទ័ពជើងអាកាស។

សម្រាប់ឆ្នាំនេះ កម្មវិធី Air & Tech Show គឺតម្រូវឲ្យអ្នកដែលចង់ចូលរួមទស្សនាការតាំងពិព័រណ៍ ធ្វើការចុះឈ្មោះអនឡាញ ឬ Online Registration តាមរយៈតំណភ្ជាប់នេះ៖ https://www.airandtech.show/registration

ចុចអាន៖ការតាំងពិព័រណ៍យន្តហោះ និងបច្ចេកវិទ្យា លើកទី ៣ នឹងប្រព្រឹត្តទៅនៅថ្ងៃទី ១៧-១៩ ខែធ្នូ ខាងមុខនេះហើយ

ចុចអាន៖ចុះឈ្មោះចូលរួមកម្មវិធី ការតាំងពិព័រណ៍យន្តហោះ និងបច្ចេកវិទ្យា តាមប្រព័ន្ធអ៊ីនធឺណិត ដោយឥតគិតថ្លៃ

The post ពិព័រណ៍យន្តហោះ និងបច្ចេកវិទ្យា រយៈពេល ២ ថ្ងៃ ទាក់ទាញសិស្សានុសិស្ស-និស្សិត និងសាធារណជន ច្រើនកុះករ appeared first on Kampuchea Thmey Daily.

ការតាំងពិព័រណ៍យន្តហោះ និងបច្ចេកវិទ្យា លើកទី ៣ នឹងប្រព្រឹត្តទៅនៅថ្ងៃទី ១៧-១៩ ខែធ្នូ ខាងមុខនេះហើយ

Sorn Phanith — Tue, 14 Dec 2021 04:23:19 +0000

ការតាំងពិព័រណ៍យន្តហោះ និងបច្ចេកវិទ្យា (Air & Tech Show) នឹងប្រារព្ធធ្វើឡើងរយៈពេល ៣ថ្ងៃពេញ នៅឯមូលដ្ឋានទ័ពអាកាសពោធិ៍ចិនតុង រាជធានីភ្នំពេញ នាថ្ងៃទី១៧ ១៨ ១៩ ខែធ្នូ ឆ្នាំ ២០២១ ខាងមុខនេះ បន្ទាប់ពីខកខានកាលពីឆ្នាំ ២០២០ ដោយសារតែការរីករាលដាលនៃជំងឺរាតត្បាតសកលកូវីដ១៩។

គោលបំណងនៃពិព័រណ៍យន្តហោះ និងបចេ្ចកវិទ្យានេះ គឺដើម្បីបំផុសទឹកចិត្តយុវជន ដែលមានទេពកោសល្យ និងសមត្ថភាពផ្នែកយន្តហោះ និងបច្ចេកវិទ្យារបស់កម្ពុជា បានបង្ហាញនូវសមិទ្ធផល និងការច្នៃប្រឌិតបង្កើតថ្មីរបស់ខ្លួន ជូនដល់មហាជន ក៏ដូចជាការដាក់តាំងបង្ហាញនូវយន្តហោះផងដែរ។

ម្យ៉ាងវិញទៀត ពិព័រណ៍នេះ ក៏ជាការផ្តល់ឱកាសដល់សាធារណជន សិស្សានុសិស្ស និងអ្នកទស្សនាបានមកទទួលយកនូវបទពិសោធន៍ ចំណេះដឹង និងព័ត៌មានក្នុងអំឡុងពេលនៃការតាំងពិព័រណ៍ ពីអ្នកតាំងពិព័រណ៍ដែលមកពីវិទ្យាល័យ និងមហាវិទ្យាល័យ ក៏ដូចជាអ្នកបើកយន្តហោះ ដែលឈរនៅក្បែរយន្តហោះផា្ទល់តែម្ដង។

គួររំឭកផងដែរថា កម្មវិធីនេះ មិនត្រឹមតែការតាំងពិព័រណ៍យន្តហោះ និងការតាំងបង្ហាញស្នាដៃបច្ចេកវិទ្យាពីសំណាក់សិស្សនិស្សិតប៉ុណ្ណោះទេ ក៏ប៉ុន្តែ កម្មវិធីក៏បានរៀបចំនូវការប្រកួតចំនួនពីរផងដែរ គឺការប្រកួតយន្តហោះកៅស៊ូ និងរ៉ូបូតមនុស្សយន្ត ដែលសមាសភាពបេក្ខជនចូលរួម គឺត្រូវបានជម្រើសចម្រាញ់ចេញពីសិស្សវិទ្យាល័យ និងនិស្សិតនៅមហាវិទ្យាល័យ ដែលមានទេពកោសល្យ និងសមត្ថភាពផ្នែកយន្តហោះ និងបច្ចេកវិទ្យាផងដែរ។ គួរបញ្ជាក់ថា ពិព័រណ៍យន្តហោះ និងបចេ្ចកវិទ្យា ត្រូវបានបង្កើត និងរៀបចំឡើងដោយក្រុមយុវជនកម្ពុជាមកពី សហភាពសហព័ន្ធយុវជនកម្ពុជា ខេត្តស្វាយរៀង ដែលមានចំណង់ចំណូលចិត្តលើមុខវិជ្ជាយន្តហោះ អាកាសចរណ៍ បច្ចេកវិទ្យា និងវិទ្យាសាស្ត្រ។

យ៉ាងណាមិញសម្រាប់ឆ្នាំនេះ កម្មវិធី Air & Tech Show គឺតម្រូវឲ្យអ្នកដែលចង់ចូលរួមទស្សនាការតាំងពិព័រណ៍ ធ្វើការចុះឈ្មោះអនឡាញ ឬ Online Registration តាមរយៈតំណភ្ជាប់នេះ៖ https://www.airandtech.show/registration