តួកគី Archives - Kampuchea Thmey Daily

តួកគី បង្ហាញគំរូមីស៊ីលផ្លោងអន្តរទ្វីប (ICBM)បាញ់ដល់គោលដៅឆ្ងាយរហូត ៦០០០គីឡូម៉ែត្រ

Minea Neu — Fri, 08 May 2026 03:55:11 +0000

ប្រទេសតួកគី បានបង្ហាញគំរូដើមនៃមីស៊ីលផ្លោងអន្តរទ្វីប (ICBM) ជាផ្នែកមួយនៃការជំរុញឱ្យក្លាយជាប្រទេសដែលពឹងផ្អែកលើវិស័យការពារជាតិខ្លួនឯង និងដើម្បីទទួលបានតំណែងជាអ្នកការពារជាតិដ៏ខ្លាំងក្លានៅមជ្ឈិមបូព៌ា ក្នុងចំណោមសម្ព័ន្ធមិត្តណាតូ (NATO) ។

យោងតាមសារព័ត៌មាន Al Jazeera ផ្សាយថ្ងៃទី៧ ខែឧសភា ឆ្នាំ២០២៦ មីស៊ីលផ្លោងអន្តរទ្វីបរបស់តួកគី ដែលឲ្យឈ្មោះថា «Yildirimhan» ជាភាសាតួកគី ដែលមានន័យថា «ផ្លេកបន្ទោរ» បានបង្កើតឡើងដោយមជ្ឈមណ្ឌលស្រាវជ្រាវ និងអភិវឌ្ឍន៍របស់ក្រសួងការពារជាតិ ត្រូវបានដាក់តាំងបង្ហាញកាលពីថ្ងៃអង្គារ នៅឯពិព័រណ៍ការពារជាតិនិងអវកាស SAHA ២០២៦ ក្នុងទីក្រុង Istanbul ប្រទេសតួកគី។

មីស៊ីល Yildirimhan របស់តួកគី។ រូបភាព៖ Ynet News

មីស៊ីល Yildirimhan ប្រភេទនេះ បាញ់បានចម្ងាយ រហូតដល់ ៦ ០០០គីឡូម៉ែត្រ។

យោងតាមសហព័ន្ធអ្នកវិទ្យាសាស្ត្រអាមេរិក មីស៊ីលផ្លោងដែលមានចម្ងាយលើសពី ៥ ៥០០គីឡូម៉ែត្រត្រូវបានចាត់ថ្នាក់ជាមីស៊ីលផ្លោងអន្តរទ្វីប (ICBM)។

យ៉ាងណា ប្រសិនបើបាញ់ចេញពីប្រទេសតួកគី មីស៊ីល Yildirimhan នឹងអាចវាយប្រហារគោលដៅដល់ទូទាំងទ្វីបអឺរ៉ុប អាហ្វ្រិក និងអាស៊ី។

យោងតាមទីភ្នាក់ងារសារព័ត៌មាន Anadolu របស់តួកគី ល្បឿនអតិបរមារបស់មីស៊ីល ICBM គឺ Mach-២៥ មានន័យថា វាមានល្បឿនលឿនជាងសំឡេង ២៥ដង។ មីស៊ីលនេះមានម៉ាស៊ីនរុញរ៉ុក្កែតចំនួន ៤ និងបំពាក់ដោយសារធាតុអាសូតរាវ tetroxide។ រីឯក្បាលគ្រាប់របស់វាមានសមត្ថភាពផ្ទុកទម្ងន់បាន ៣តោន (៣ ០០០គីឡូក្រាម)។

យ៉ាងណា ប្រទេសតួកគីមិនទាន់ចាប់ផ្តើមផលិតមីស៊ីលប្រភេទនេះនៅឡើយទេ។

ថ្លែងទៅកាន់ការតាំងពិព័រណ៍នៅទីក្រុង Istanbul កាលពីថ្ងៃអង្គារ រដ្ឋមន្ត្រីក្រសួងការពារជាតិតួកគី លោក Yasar Guler អះអាងថា៖ « នៅក្នុងយុគសម័យនេះ ការចំណាយលើសេដ្ឋកិច្ចក្លាយជាអាវុធមិនស៊ីមេទ្រី! ប្រទេសតួកគីនឹងផ្តល់ជូនសម្ព័ន្ធមិត្ត មិនត្រឹមតែប្រព័ន្ធអាវុធប៉ុណ្ណោះទេ ប៉ុន្តែថែមទាំងបច្ចេកវិទ្យានិងសេដ្ឋកិច្ចសន្តិសុខប្រកបដោយចីរភាពផងដែរ»៕

ប្រែសម្រួល៖ ណឺ មិនា

The post តួកគី បង្ហាញគំរូមីស៊ីលផ្លោងអន្តរទ្វីប (ICBM)បាញ់ដល់គោលដៅឆ្ងាយរហូត ៦០០០គីឡូម៉ែត្រ appeared first on Kampuchea Thmey Daily.

រដ្ឋមន្រ្តីតួកគី៖ អ៊ីស្រាអែលកំពុងគំរាមកំហែងដោយផ្ទាល់ដល់សន្តិសុខពិភពលោក

Minea Neu — Sat, 25 Apr 2026 04:00:00 +0000

រដ្ឋមន្ត្រីការបរទេសតួកគី លោក Hakan Fidan លើកឡើងថា ប្រទេសអ៊ីស្រាអែល បានគំរាមកំហែងដោយផ្ទាល់ដល់សន្តិសុខពិភពលោក ព្រមទាំងព្រមានថា ជម្លោះក្នុងតំបន់មជ្ឈិមបូព៌ាដែលកំពុងកើនឡើងបច្ចុប្បន្ន នាំមកនូវផលវិបាកទូទាំងពិភពលោក តម្រូវឱ្យមានការឆ្លើយតបពីអន្តរជាតិរួមគ្នា។

យោងតាមសារព័ត៌មានតួកគី TRT World ផ្សាយថ្ងៃទី២៤ ខែមេសា ឆ្នាំ២០២៦ ថ្លែងនៅសាកលវិទ្យាល័យ Oxford នៅថ្ងៃសុក្រ លោក Fidan រៀបរាប់ថា៖ « ពិភពលោកមិនត្រឹមតែកំពុងឆ្លងកាត់ការផ្លាស់ប្តូរភូមិសាស្ត្រនយោបាយប៉ុណ្ណោះទេ ប៉ុន្តែជាការផ្លាស់ប្តូររចនាសម្ព័ន្ធកាន់តែស៊ីជម្រៅ។ អ្វីដែលយើងកំពុងឃើញនៅថ្ងៃនេះមិនមែនជាការផ្លាស់ប្តូរជាប្រពន្ធ័ទេ ប៉ុន្តែវាជាការផ្លាស់ប្តូរមួយដោយឯកឯង»។

រដ្ឋមន្ត្រីការបរទេសតួកគី លោក Hakan Fidan ។ រូបភាព៖ Reuters

លោកអះអាងថា រដ្ឋនានាលែងអាចមានលទ្ធភាពពឹងផ្អែកលើប្រទេសដទៃ ក្នុងការរស់រានមានជីវិតជាយុទ្ធសាស្ត្រទៀតហើយ។

រដ្ឋមន្រ្តីរូបនេះបន្តថា៖ «ប្រទេសនានាលែងអាចផ្ទេរសន្តិសុខ ការទូត ឬការធ្វើការជាយុទ្ធសាស្ត្ររបស់ពួកគេទៅខាងក្រៅបានទៀតហើយ»។

លោក Fidan បានចង្អុលបង្ហាញពីសង្គ្រាមដែលពាក់ព័ន្ធនឹងអ៊ីរ៉ង់ បង្កឡើងដោយការវាយប្រហាររបស់សហរដ្ឋអាមេរិកនិងអ៊ីស្រាអែល ជាឧទាហរណ៍មួយអំពីរបៀបដែលវិបត្តិក្នុងតំបន់បច្ចុប្បន្ន កំពុងរង្គោះរង្គើដោយផ្ទាល់ទៅលើស្ថិរភាពពិភពលោក។

លោកបន្ថែមថា៖ «ភាពខុសគ្នារវាងវិបត្តិក្នុងតំបន់ និងវិបត្តិសកលពិតជាបានបាត់ទៅហើយ។ អស្ថិរភាពនៅមជ្ឈិមបូព៌ាឥឡូវនេះប៉ះពាល់ដល់វិបុលភាព សន្តិសុខ ស្ថិរភាព និងខ្សែសង្វាក់ផ្គត់ផ្គង់សកល»។

លោកបន្ថែមថា៖ « ការគំរាមកំហែងជាប្រព័ន្ធរបស់អ៊ីស្រាអែលធ្វើឱ្យតំបន់នេះអស្ថិរភាពហួសពីព្រំដែនក្នុងស្រុក ហើយឥឡូវនេះបង្កើតជាការគំរាមកំហែងដោយផ្ទាល់ដល់សន្តិសុខពិភពលោកទៀតផង»។

លោក Fidan សង្កត់ធ្ងន់ថា៖ « សកម្មភាពបែបនេះទាមទារឱ្យមាន ការឆ្លើយតបរួមគ្នាពីសហគមន៍អន្តរជាតិទាំងមូល។ គ្មានប្រទេសណាមួយអាចគ្រប់គ្រងផលវិបាកដោយខ្លួនឯងបានទេ»៕

គួរបញ្ជាក់ថា ការវាយប្រហាររបស់សហរដ្ឋអាមេរិក-អ៊ីស្រាអែលលើអ៊ីរ៉ង់ នៅថ្ងៃទី២៨ ខែកុម្ភៈ បានបំផ្លាញហេដ្ឋារចនាសម្ព័ន្ធជាច្រើន ព្រមទាំងសម្លាប់មនុស្សក្នុងជួររដ្ឋាភិបាលរបបអ៊ីរ៉ង់ជាបន្តបន្ទាប់ និងឈានដល់បិទច្រកសមុទ្រ Hormuz ប៉ះពាល់ដល់ការផ្គត់ផ្គង់ប្រេងសកលយ៉ាងធ្ងន់ធ្ងរ៕

ប្រែសម្រួល៖ ណឺ មិនា

The post រដ្ឋមន្រ្តីតួកគី៖ អ៊ីស្រាអែលកំពុងគំរាមកំហែងដោយផ្ទាល់ដល់សន្តិសុខពិភពលោក appeared first on Kampuchea Thmey Daily.

តួកគី ជឿថា បទឈប់បាញ់អាមេរិក-អ៊ីរ៉ង់ នឹងពង្រីកបន្ថែម

Minea Neu — Mon, 20 Apr 2026 05:24:01 +0000

ប្រទេសតួកគី បានបង្ហាញនូវទស្សនៈ«សុទិដ្ឋិនិយម» ដែលថា បទឈប់បាញ់រយៈពេលពីរសប្តាហ៍រវាងអ៊ីរ៉ង់និងសហរដ្ឋអាមេរិកដែលផុតកំណត់នៅថ្ងៃពុធសប្តាហ៍នេះ នឹងពង្រីកបន្តទៀត ដែលនឹងអនុញ្ញាតឱ្យមានពេលវេលាវែងបន្ថែមទៀតសម្រាប់ការចរចាសន្តិភាពបញ្ចប់ជម្លោះរវាងភាគីទាំងពីរ។

យោងតាមសារព័ត៌មាន AFP ផ្សាយថ្ងៃទី១៩ ខែមេសា ឆ្នាំ២០២៦ ប្រទេសប៉ាគីស្ថានកំពុងដឹកនាំរៀបចំសម្រាប់ការចរចាសន្តិភាពកម្រិតខ្ពស់រវាងសហរដ្ឋអាមេរិកនិងអ៊ីរ៉ង់ បន្ទាប់ពីជុំទីមួយបញ្ចប់ដោយគ្មានកិច្ចព្រមព្រៀងណាមួយឡើយ កាលពីចុងសប្តាហ៍មុន។

រដ្ឋមន្ត្រីការបរទេសតួកគី លោក Hakan Fidan ។ រូបភាព៖ Reuters

មិនតែប៉ុណ្ណោះ ប្រទេសតួកគី និងអេហ្ស៊ីប បានសម្តែងការគាំទ្រយ៉ាងខ្លាំង ចំពោះគំនិតផ្តួចផ្តើមដឹកនាំដោយប៉ាគីស្ថាន ស្តីពីការពន្យារពេលការចរចានិងការការពារការវិលត្រឡប់ទៅរកជម្លោះវិញ។

រដ្ឋមន្ត្រីការបរទេសតួកគី លោក Hakan Fidan លើកឡើងក្នុងពិធីបិទវេទិកាការទូតរយៈពេលបីថ្ងៃនៅភាគខាងត្បូងខេត្ត Antalya ថា៖ «គ្មាននរណាម្នាក់ចង់ឃើញសង្គ្រាមថ្មីផ្ទុះឡើង ពេលដែលបទឈប់បាញ់ផុតកំណត់នៅសប្តាហ៍ក្រោយនោះទេ។ យើងសង្ឃឹមថា[…] ភាគីនានានឹងបន្តបទឈប់បាញ់។ ហើយខ្ញុំក៏សង្ឃឹមថានឹងមានការបន្ត[បទឈប់បាញ់]។ ខ្ញុំមានសុទិដ្ឋិនិយមលើរឿងនេះ។

លោក Fidan ថា៖ « ការបន្តការចរចាគឺជាអ្វីដែលសហគមន៍អន្តរជាតិទាំងមូលចង់បាន ហើយក៏មានសម្ពាធគួរឱ្យកត់សម្គាល់នៅក្នុងរឿងនេះ»។ ក្រោមកម្រិតសម្ពាធនេះ ខ្ញុំជឿថាភាគីនានាមិនគួរមើលឃើញឧបសគ្គណាមួយ ចំពោះការពង្រីកបទឈប់បាញ់ដើម្បីបន្តការចរចាសន្តិភាពនោះទេ […]»។

ទោះបីជាមានសុទិដ្ឋិនិយមនិងចលនាក្នុងការចរចាក៏ដោយ អ៊ីរ៉ង់បានបញ្ជាក់កាលពីថ្ងៃអាទិត្យថា កិច្ចព្រមព្រៀងសន្តិភាពចុងក្រោយគឺនៅឆ្ងាយ។

លោក Fidan បន្តថា៖ «វាច្បាស់ណាស់ថា ការចរចាបានឈានដល់ដំណាក់កាលដ៏សំខាន់មួយ។ ភាគីទាំងពីរកំពុងបន្តការចរចាដោយភាពស្មោះត្រង់ពិតប្រាកដ។ ពួកគេក៏មានឆន្ទៈក្នុងការរក្សាដំណើរការនេះផងដែរ»៕

ប្រែសម្រួល៖ ណឺ មិនា

The post តួកគី ជឿថា បទឈប់បាញ់អាមេរិក-អ៊ីរ៉ង់ នឹងពង្រីកបន្ថែម appeared first on Kampuchea Thmey Daily.

តួកគីកាន់តែទ្រាំលែងបាន ដោយព្រមានប្រើកម្លាំងយោធាប្រឆាំងនឹងអ៊ីស្រាអែល

Minea Neu — Mon, 13 Apr 2026 03:48:09 +0000

ប្រធានាធិបតីតួកគី លោក Recep Tayyip Erdogan បានចោទប្រកាន់អ៊ីស្រាអែលពីបទប្រព្រឹត្តអំពើដ៏ឃោរឃៅប្រឆាំងនឹងជនជាតិប៉ាឡេស្ទីននិងលីបង់ ហើយអះអាងថា ទីក្រុងអង់ការ៉ា (Ankara) អាចនឹងប្រើប្រាស់សកម្មភាពយោធាប្រឆាំងនឹងរដ្ឋជ្វីហ្វ ស្រដៀងគ្នាទៅនឹងការអន្តរាគមន៍ពីរបស់ខ្លួនពីមុននៅតំបន់ Karabakh និងប្រទេសលីប៊ី។

យោងតាមសារព័ត៌មាន The Jerusalem Post និង Yahoo ផ្សាយថ្ងៃទី១២ ខែមេសា ឆ្នាំ២០២៦ លោក Erdogan បានអះអាងអំឡុងថ្លែងសុន្ទរកថា នៅសន្និសីទអន្តរជាតិអាស៊ី-គណបក្សនយោបាយ ក្នុងទីក្រុង Istanbul ថា៖ « បណ្តាញប្រល័យពូជសាសន៍ដែលប្រឡាក់ដោយឈាមនៅតែបន្តសម្លាប់កុមារ ស្ត្រី និងជនស៊ីវិលស្លូតត្រង់ដោយគ្មានច្បាប់អើពើ ឬគោលការណ៍ណាមួយឡើយ ហើយមិនខ្វល់នឹងតម្លៃមនុស្សគ្រប់ទម្រង់»។

ប្រធានាធិបតីតួកគី លោក Recep Tayyip Erdogan ។ រូបភាព៖ Reuters

លោក Erdogan លើកឡើងថា៖ « ទោះបីជាមានបទឈប់បាញ់ក៏ដោយ ក៏អ៊ីស្រាអែលបានបង្ខំឱ្យប្រជាជនលីបង់ចំនួន ១.២ លាននាក់ចាកចេញពីផ្ទះរបស់ពួកគេ ដោយសារតែខ្លួនវាយប្រហារលើការតាំងទីលំនៅរបស់ជនស៊ីវិលទាំងនោះ។ ទោះបីជាយ៉ាងណា ទាំងអ៊ីស្រាអែល និងសហរដ្ឋអាមេរិកបដិសេធ លើកឡើងថា ប្រទេសលីបង់មិនរួមបញ្ចូលក្នុងបទឈប់បាញ់បច្ចុប្បន្នជាមួយអ៊ីរ៉ង់ក៏ដោយ»។

លោក Erdogan បន្តពិពណ៌នាពីសកម្មភាពរបស់អ៊ីស្រាអែលថា៖ « វាជាអំពើព្រៃផ្សៃ ខណៈច្បាប់ដ៏ចម្រូងចម្រាសមួយត្រូវបានធ្វើឡើងដោយសភាអ៊ីស្រាអែល Knesset អនុម័តទោសប្រហារជីវិតប្រឆាំងនឹងភេរវករ ហើយធ្វើឡើងសម្រាប់តែអ្នកទោសប៉ាឡេស្ទីនប៉ុណ្ណោះ»។

ឆ្លើយតបទៅនឹងអ្នកយកព័ត៌មានមួយថ្ងៃបន្ទាប់ លោក Erdogan ថា ទីក្រុងអង់ការ៉ាអាចចាត់វិធានការផ្នែកយោធាប្រឆាំងនឹងអ៊ីស្រាអែល។

លោក Erdogan ថា៖ « យើងត្រូវតែរឹងមាំ ដើម្បីការពារប៉ាឡេស្ទីនពីអ៊ីស្រាអែល។ ដូចដែលយើងបានចូលរួមជួយនៅតំបន់ Karabakh, ប្រទេសលីប៊ីពីមុន យើងនឹងធ្វើដូចគ្នាចំពោះពួកគេដែរ។ គ្មានអ្វីអាចរារាំងយើងពីការធ្វើវាបានទេ។ យើងត្រូវរឹងមាំ ដើម្បីអាចឱ្យយើងចាត់វិធានការទាំងនោះបាន»។

គួរបញ្ជាក់ថា វោហាសាស្ត្ររបស់ប្រធានាធិបតីតួកគី លោក Erdogan កំពុងព្យាយាមដាក់ប្រទេសតួកគីធ្វើជាអ្នកការពារសិទ្ធិប៉ាឡេស្ទីនយ៉ាងរឹងមាំ៕

ប្រែសម្រួល៖ ណឺ មិនា

The post តួកគីកាន់តែទ្រាំលែងបាន ដោយព្រមានប្រើកម្លាំងយោធាប្រឆាំងនឹងអ៊ីស្រាអែល appeared first on Kampuchea Thmey Daily.

ថៃព្រមានអាជីវកម្មខ្លួន ក្រោយតួកគីរឹតបន្តឹងការនាំចូលផលិតផលផលិតពីសត្វ

Huon Dina — Sat, 07 Feb 2026 06:21:32 +0000

នាយកដ្ឋានពាណិជ្ជកម្មបរទេសថៃ បានចេញការព្រមានពីផលប៉ះពាល់ដែលអាចកើតមានសម្រាប់អាជីវកម្មថៃ ក្រោយប្រទេសតួកគីដាក់ចេញនូវនីតិវិធីនាំចូលថ្មីសម្រាប់ផលិតផលអាហារ «ពាក់ព័ន្ធ» សត្វមួយចំនួន ដើម្បីអនុវត្តតាមបទប្បញ្ញត្តិសុវត្ថិភាពចំណីអាហារ សុខភាពរុក្ខជាតិ និងសុខុមាលភាពសត្វរបស់សហភាពអឺរ៉ុប (EU)។ នេះបើតាមការចុះផ្សាយរបស់កាសែត The Nation។

អគ្គនាយកនៃនាយកដ្ឋានដដែល លោកស្រី Arada Fuangtong បាននិយាយថា សាធារណរដ្ឋតួកគីបានបង្កើនការរឹតបន្តឹងការនាំចូលសម្រាប់ផលិតផលអាហារដែលមានប្រភពមកពីសត្វ ដែលទាំងនោះ រួមមានផលិតផលទឹកដោះគោ អាហារសមុទ្រ ត្រី និងជេឡាទីន និងកូឡាជែនសម្រាប់ការប្រើប្រាស់របស់មនុស្ស។

ការផ្លាស់ប្តូរទាំងនេះស្របនឹងច្បាប់លេខ ៥៩៩៦ ស្តីពីសេវាពេទ្យសត្វ សុខភាពរុក្ខជាតិ ចំណីអាហារ និងចំណីសត្វរបស់សហភាពអឺរ៉ុប ដែលគ្រប់គ្រងបទប្បញ្ញត្តិស្តីពីសុវត្ថិភាពចំណីអាហារ ចំណីសត្វ សុខភាពរុក្ខជាតិ និងបទប្បញ្ញត្តិបង្កាត់ពូជសត្វ។

ដើម្បីនាំចេញផលិតផលទាំងនេះទៅកាន់ប្រទេសតួកគី អ្នកនាំចេញថៃគួរតែទាក់ទងអាជ្ញាធរថៃពាក់ព័ន្ធដែលត្រួតពិនិត្យប្រភេទផលិតផលនីមួយៗ។ ឧទាហរណ៍ ចំពោះការនាំចេញអាហារសមុទ្រ អាជីវកម្មគួរតែទាក់ទងនាយកដ្ឋាននេសាទ ដែលនឹងសម្របសម្រួលជាមួយអគ្គនាយកដ្ឋានចំណីអាហារ និងការត្រួតពិនិត្យរបស់ប្រទេសតួកគី ដើម្បីអនុម័តអ្នកនាំចេញ។

ស្ថិតិពាណិជ្ជកម្មសម្រាប់ឆ្នាំ ២០២៥ (ខែមករា-វិច្ឆិកា) បង្ហាញថា ការនាំចេញសរុបរបស់ប្រទេសថៃទៅកាន់ប្រទេសតួកគីមានតម្លៃ ៤០,៦១ ប៊ីលានបាត។ ការនាំចេញសំខាន់ៗរួមមាន យានយន្ត ម៉ាស៊ីនត្រជាក់ និងកៅស៊ូ។

ការនាំចេញផលិតផលដែលមានប្រភពមកពីសត្វដូចជា ផលិតផលទឹកដោះគោ អាហារសមុទ្រ ជេឡាទីន និងកូឡាជែន មានប្រមាណ ៤៩៨,៦៨ លានបាត ឬស្មើនឹង ១,២៣% នៃការនាំចេញសរុបរបស់ថៃទៅតួកគី។

លោកស្រី Arada បាននិយាយថា វិធានការរឹតបន្តឹងនឹងមិនប៉ះពាល់ខ្លាំងដល់អ្នកនាំចេញថៃទេ ដោយសារបរិមាណនាំចេញផលិតផលដែលត្រូវរឹតបន្តឹងទៅតួកគីមានកម្រិតតិចតួច៕

The post ថៃព្រមានអាជីវកម្មខ្លួន ក្រោយតួកគីរឹតបន្តឹងការនាំចូលផលិតផលផលិតពីសត្វ appeared first on Kampuchea Thmey Daily.

តួកគី Archives - Kampuchea Thmey Daily

តួកគី​ ​បង្ហាញ​គំរូ​មីស៊ីល​ផ្លោង​​អន្តរទ្វីប (ICBM)​​បាញ់​​​ដល់​គោលដៅ​ឆ្ងាយ​​រហូត​​ ៦០០០គីឡូ​ម៉ែត្រ

រដ្ឋ​មន្រ្តី​តួក​គី៖ អ៊ីស្រាអែល​កំពុង​គំរាម​កំហែង​ដោយ​ផ្ទាល់​ដល់​សន្តិសុខ​ពិភព​លោក​

តួក​គី​​​ ជឿថា ​បទឈប់​បាញ់​អាមេរិក-អ៊ីរ៉ង់​ នឹង​ពង្រីក​បន្ថែម

តួក​គី​​កាន់តែ​ទ្រាំលែងបាន​​ ដោយ​​ព្រមាន​​ប្រើ​កម្លាំង​យោ​ធា​ប្រឆាំង​នឹង​អ៊ីស្រាអែល​

ថៃព្រមាន​អាជីវកម្មខ្លួន ក្រោយ​តួកគីរឹតបន្តឹងការនាំចូលផលិតផលផលិតពី​សត្វ

តួកគី បង្ហាញគំរូមីស៊ីលផ្លោងអន្តរទ្វីប (ICBM)បាញ់ដល់គោលដៅឆ្ងាយរហូត ៦០០០គីឡូម៉ែត្រ

រដ្ឋមន្រ្តីតួកគី៖ អ៊ីស្រាអែលកំពុងគំរាមកំហែងដោយផ្ទាល់ដល់សន្តិសុខពិភពលោក

តួកគី ជឿថា បទឈប់បាញ់អាមេរិក-អ៊ីរ៉ង់ នឹងពង្រីកបន្ថែម

តួកគីកាន់តែទ្រាំលែងបាន ដោយព្រមានប្រើកម្លាំងយោធាប្រឆាំងនឹងអ៊ីស្រាអែល

ថៃព្រមានអាជីវកម្មខ្លួន ក្រោយតួកគីរឹតបន្តឹងការនាំចូលផលិតផលផលិតពីសត្វ